אלמנת רפאל וילדיה בפזרג'יק (הפרק הוגדר בתרגום)

329             Biografia de H. Avramatche R. Arie,            1848

En el anio de 5608 H, Avramatche aun kon todo ke ja estava  algo konortado de la moerte de su Padre, ma era mui pensativle i kontinoava en el etcho de la butika aun kon todo ke era mui poko asta el grado ke non podia vender mizmo para el menester de sus mantinimiento, ma de esto non jevava dingun apreto porke ja li mandavan en regular kada semana, una sierta suma de paras seja ke las tenija menester or seja ke non las tenija menester, i aparte li mandavan dubleto en la semana de kada moed, i koando si merkavan para ejos kichlikes^[8] era ke de todo li mandavan tambien i para el si nada ke mankavan mizmo i la lenia para el envierno, i esto lo azian para ke non foera desesperado i lo tenian propio komo un IJO sujos,

La Bu. Mazalutcha kon sus 2 kriaturas ke las pario de H Refael eran tambien en kaza, i en este tiempo eja kijo irse kon su Padre a pazardjik, eja demando ke li pagaran la ketuba ma siendo ke non avia de ande ke li dieran foe ke entre los parientes kijeron darle alguna suma en moneda kontante i ke non lis vaziara la kaza entera, ma eja a dingun presio non si kontento i eja mando a jamar de su djente de Pazardjik porke li reglaran su deretcho ke sigun el Din de moestra LEI es ke la Ketuba se paga enprimero i denpoes es ke poedan kovrar los otros si ternan de aver, i non se mira si es ke non keda atras nada i el DIN es ke si vendan fin a las tejas de la kaza para pagar la Ketuba, sigun ke lo izieron ansi, i vinieron su djente, i se foeron a DIN TORA, i sigun ditcho ke la lei ja li da

330             Biografia de H. Avramatche R. Arie,            1848

 a mano fin abachar las tejas, foe ke lo izieron esto, i li vindieron todo loke tenia sin ke tuvieron la peadad de decharles ni nada i ansi foe ke kedaron si poede dizir enteramente dezmudos, i denpoes ke ja se tomo lo todo por su djusto, si jevo kon eja a la Ester i a Moche kon eja djuntos, sin ke vinieron mas aki dinguno de ejos mizmo i koando foeron grandes,

En el N-o 279 de la dita biografia ke eskrivi por la Bivda de S-r. Haimatche, ke era de la Familia de los Mevorah, i ke agora son S-res Behor i Pecho Salamonov, sigun mi dicheron ke non son estos ditchos ultimos, de la Familia de la ditcha Bivda, otro ke estos oltimos son IJOS de la Bu. Esturulu, la IJA de H. Refael, ke la Bu, Mazalutcha si la jevo a Pazardjik, i en su tiempo la kazaron sus parientes i su ermano en Sofia tambien en la Familia de los mevorahes kon Sr, CHelomo Baruh Mevorah ke este ultimo estuvo siempre en Ihtiman, ke tenia butika en Ihtiman i en todos los Moadim se vinia a Samokov, i era musafir, de tchelebi Jeuda i sus ermanos, ke era una persona mui ahbap^[9], azidor de areir, i todos se gustavan i se aparejavan para koando avia moadim ke ja iva a venir H. Baruh, ke los iva azer areir, es ke son estos ditchos S-res, Behor i pecho los IJOS de la Bu, Esturulu, i sus negosio es de el grande es advokato i jerno de H. Jesufatche el de Hr. Tchelebi i el sigundo es empeigado en la kaza de Sr, Kalenov kon una paga de 500 fr al mez, eja la Bu, esturulu ke estuvo bivda muntchos anios la kudiava mui muntcho su IJO el Tchiko S-r. Pecho, ke bivio kon el toda su vida,

331             Biografia de H. Avramatche R. Arie,            1848

            Koanto al S-r. Mochonatche, el ijo ke lo pario la Bu. Mazalutcha de H. Refael i ke si lo jevo tambien a Pazardjik, de mizmo foe engrandesido de sus parientes i en su tiempo tambien lo kazaron i lo metieron en etcho, i tuvo una butika ke vendia artikolos de kazalinos i mas tadre foe koredor de merkar i vender trigos, ke los rekojia en el pazar i por los kazales i los vendia a los merkaderes grandes ke rekojen ansi sumas grandes, ke su pasadija era boena i se topava i bivia kontente, i en el tiempo ke S-r. Behoratche, G Arie, lo estava eskriviendo el arvol de la Familia Arie, sigun ke eskrivia a todos los miembros de la familia Arie, ke estavan en otras sivdades, por ke li dieran nota de sus IJOS i IJAS, i INIETOS, i MAS, i kada uno si apresorava, i li respondia, dandole nota de todos sus IJOS, ke lis nasieron djunto sus datas, foe ke li eskrivio tambien i al ditcho S-r. Mochonatcha, por ke li diera nota, el koal le dicho entre su djente por ansi karta de resivio, i ke el si espanta de dar ansi nota ke non save koalo seria su entision, ma si eske li pagava, a 2 frankos por kada miembro, ala ora ja li aze la nota, i S-r. Behoratche ke lo supo esto, si[n] tadrar li mando 20 frankos, akonto i se terna mas muntcho de 10 IJOS, ke li eskriva por mandarle i lo restan, i ansi foe ke kon resivir el enporte li mando la nota, siguiente,

            El ditcho S-r. Mochenatcha tuvo 2 IJOS, el primer li nasio en el anjo de 5620, i lo nombro, Refael i el signado li nasio en el anjo de 5625, i lo nombro Reuben, i los koalas todos los 2 en su tiempo los kazo, i tuvo el IJO grande el S-r. Rafael ke li nasio en

332              Biografia de H. Avramatche R. Arie,            1848

el anjo de 5648, una IJA i la nombro, Rahel i en el anjo de 5650, tuvo un IJO i lo jamo Jakov, i en el anjo de 5652, li nasio la sigunda IJA, i la jamo Ester, i el ditcho S-r. Refael bive en kaza aparte, i tiene su negosio tambien aparte, i se pasa mui bien, en Pazardjik, i kon el sigundo IJO de S-r. Mochonatche, ke es S-r. Reuben, sigun ditcho ke el koal tambien si kazo en su tiempo i tuvo ke li nasio en el anio de 5650, un IJO i lo jamo, Moche, i en el anjo de 5652, li nasio una IJA i la, jamo, Rahel, i en el anio de 5654, li nasio la sigunda IJA, i la jamo Belia, i en el anio de 5656, li nasio la tresera IJA i la jamo Furtune, i en el anio de 5659, li nasio un IJO si lo jamo Jakov, ke el koal tambien bive aparte i se pasa tambien mui boeno i tiene su negosio aparte, i kon el treser IJO ke tuvo Sr, Mochonatche, ke li nasio en el anio de 5645, i lo jamo Nisim bive tambien en Pazardjik, i era sin kazar, ke i el tambien tiene su negosio aparte de sus ermanos, tambien es boeno de su pozision, i a este konto de los 20 fr. viene a buchkar el S-r. Mochonatche otros 2 fr. i non se si es ke si los pago, ke si los reklamara de koal foesa de la Familia Arie son rogados de kontarselos, porke ansi foe su kondision ke lo izo para dar la nota,

Es ansi ke los S-res aries ke biven oi en Pazardjik son sigun eskrito ariva propio de moestra sangre, ke son de la denastia de H. Refael el IJO tresero de el S-r. Abraam M, Arie. I. i el primer ke vino a Samokov, ma ejos nunka non si aserkaron a mozotros, los Aries de Samokov, mizmo en el tiempo ke frekontavamos en Pazardjik