חכם אלייָצ'וּנוֹ י. אריה

628

De aki I endelantre kontare solo la biografia de H. Elijatchuno Josef Arie, i de sus vinientes detras de el de el snio de 5612 i endelantre

629                                   Biografia de H. Elijatchuno Josef Arie.                                    1852

En el anio de 5612, ke H. Elijatchuno ja estuvo espartido seja de Tchelebi Jeuda i sus ermanos de el magasen de Filibe, komo tambien i de su ermano H. Rabenutcho, ke ja si espartieron de mismo seja de los etchos ke eran Haverim komo tambien i de kasa i ja foeron enteramente aparte, de todos los puntos,

I siendo ke ja avija pasado algo de tiempo i su ermano H. Chemoelatche el Chichko, no li vino por reintchir su uvligo ke lo avijan etcho ainda en sus estar en Filibe, ansi foe ke li kalio ke li enpesara a irle H. Elijatchuno i siendo ke H. Chemoelatche era una persona mui fesfeseli^[16] i siempre si espantava ke lo ivan a enganijar, era ansi ke lo iva etchando de dija en dija, i de esto H. Elijatchuno era mui sikilijado,

Fin ke lo pudo konvenser H. Chemoelatche a H. Chelomo Koen ke el koal ja era uno de los grandes merkaderes de Samokov para ke entrara i el en la Hevra kon H. Elijatchuno i avrir de moevo un magasen en Filibe, sigun de este ke tenijan Tchelebi Jeuda kon sus ermanos en Hevra kon H. Elijatchuno, i para arivar en esto lis turo sus konversasion komo 2 meses, i lo konvinieron kon ke li tenijan de meter H. Chelomo Koen 30,000 groches i H. Chemoelatche de mizmo 30.000 groches i H. Elijatchuno 10,000 groches, ke esta suma de moneda H. Elijatchuno ja la tenija, en suma todo 70,000 groches, i kon esta suma ja lis iva a ser bastante, i lo konvinieron ke H. Elijatchuno devija de estar en Filibe i el ke lo devija enkamenarlo

630                                        Biografia de H. Elijatchuno Josef Arie.                                          1852

todo el etcho i kon las partes seja en las ganancias^[17] seja en las piedritas ke tenija de ser a igual parte, i sovre esto ejos si izieron de moevo kontratos i los afirmaron kon ke akel dija komieron juvetchis en la kaza de H. Elijatchuno i H. Chemoelatche ke ja era una persona bividor de raki de una oka a el dija foe ke i aki tambien si enboratcharon kon ke si bivieron entre los 3 i 10 okas del vino ke seja H. Chelomo komo tambien i H. Elijatchuno estuvieron 3 dijas hasinos de la buratches, i a H. Chemoelatche non li asija nada mismo i ke biviera i mas muntcho,

Denpoes ke i esto ja paso H. Elijatchuno iso una nota de las ropas ke li ivan a ser menester para ke las ordenaran a Viena ke era solo H. Chelome Koen ke las komandava ke es el koal ja tenija sus komisioneris en Viena sigun ditcho ke i el tambien era de este ofisio, i mas tadre ke las ropas ja enpesaron a arivar loisieron ke si foeron todos los 3 a Filibe i alkelaron los magasenis menesterosos, i denpoes ke ja las resentaron i enpesaron a aser lasvenditas, si vinieron H. Chelomo i H. Chemoelatche, a Samokov endechandolo solo a H. Elijatchuno en Filibe, i el ke ja era mui bienpraktiko en este etcho era ke iva asiendo todas las venditas, ke eran posivle i lo todo kon mui grande reposo i grande deretchedad          i los livros ke los jevava tambien eran de la mas mijor metoda ke non asija kon dinguno dingun jero, i en kada semana tambien lis mandava notas de todas las operasiones ke asija, i en mismo tiempo li dava notas moevas por ke li komandaran i ropas moevas, de estas ke,

631                                        Biografia de H. Elijatchuno Josef Arie.                                          1852

ja li mankavan en el magasen, i por lo todo ja estavan siempre al koriente, i el magasen tambien ja estuvo en boen andar sovre las venditas, ke era lo todo a kredit, ke vendijan.

En el anio de 5613, era de mizmo ke ivan kontinuando en las venditas, i era a mas muntcho de loke lo esperavan, i koanto a los kovramientos los estuvieron aziendo mas apoko ke esto lis trucho un ditinimiento a sus respondimientos i ansi foe ke lo enpesaron a vijitarlo, seja H. Chemoelatche komo tambien i H. Chelomo Koen, i se meraron un konto i ja lo toparon mui djusto, solo ke los averes foeron mui grandes ke era apenas ke estuvieron kon algo i apretar a sus klientes ke podijan kovrar, el 20% i esto los iso mui muntcho pensar, i algo tambien i espantar, i siempre lo ivan enkulpandolo a H. Elijatchuno porke estuvo dando las ropas a fijado ke esto ja era lo todo ke si los asija saver, en kada semana, kon las notas ke li mandava, i esto non lo kulpava H. Elijatchuno, ke lis afeto ke en esta anijada uvo una grande krisa^[18], i ansi foe ke non podieron pagar, sus klientes, i de moevo ke vinieron en un lugar i denpoes de muntchos pleitos i ravijas entre los Haverim, sus ditchision de alkavo foe de kovrar exikotivamente^[19], koalo si poede i esto ke lo enpesaron a reintchir foe ke enpesaron los mas grandes a kovrar i ansi foe adetras i los mas tchikos fin ke enpesaron a non vender

632                                        Biografia de H. Elijatchuno Josef Arie.                                          1853

mas ropas a kredit, i el magasen ke ja estuvo muntcho en manko de los artikolos foe ke en poko tiempo ja non uvo ropas koalo vender mismo i en kontante sigun ditcho ke de mas antes ja avijan kortado de komandar ropas, i ansi foe ke el magasen vino en un grado a restar los raftes kaje todos vasios, i era ke apenas estava podiendo aser venditas para tapar los gastes de el magasen i este sujo, koanto al sostenimiento de la kaza de Samokov era ke en kada semana lis dava H. Chemoelatche, a 40 groches a la semana, i kon esto era ke si pasavan i agora ke lis arivo esta roina mas non kijo darles i era ke foeron sufriendo algo de tiempo fin ke si lo eskrivieron a H. Elijatchuno ke i el si sikilio mui muntcho i sovre todo ke i el tambien non tenija, foe ke la Bu Bulisu su mujer li foe ande Tchelebi Gavriel por rogarle a ke li diera algo de moneda en kada semana fin ke si lis resentava los etcho, i Tchelebi Gavriel li djo 200 groches i li dicho ke fin ke si lis eskapan i en non resiviendo de su marido alguna suma ke li foera de moevo ke el ja li tenija mas de darle, i pasando ainda algo de tiempo visto ke si lis va a ir lo todo ke de esto ja estavan kontentes solo ke ejos tambien devijan a Viena i otros lugares, buchkaron al menos pagar i esto apenas ja podieron kovrar para pagar, ma era lo todo kon pleitos ke la devda era toda al nombre de Chelomo Koen i los pleitos de los 2 Haverim de Samokov eran mui grandes, fin ke lis kalio ke nomenaran una komision para ke li meraran los kontos ke adetras de los pleitos ke era tambien i kon H. Elijatchuno foe ke lo chachirijaron i

633                                         Biografia de H. Elijatchuno Josef Arie.                                         1853

a el ke por esta ditchision kedaron de akordo para espartirsen i ke si ivan a ir a Filibe i Todos los tres venir en un kavo para ke foera kon la kontentes de todos los 3 Haverim, i esto era lo todo siempre kon pleitos i gritos ke si sintijan por la mahale entera i uvo tiempos ke lis kalio los espartieran djente de afoera.

En el anio de 5614 sigun ditcho por la sus ditchision Tomada para espartirsen, ejos de Samokov los 2 Haverim partieron por Filibe, i de mismo kon los gritos i los pleitos, lo enkontraron a H. Elijatchuno, i denpoes ke ejos ja pelijavan fin a el ultimo grado, era ke si rekojijan ejos djunto la komision nominada, i kon enpesar a penas a merarsen kontos ja enpesava el H. Chemoelatche, de moevo a pelijar, fin ke el uno de la komision li dicho a H. Chemoelatche, sigun si vei es ke voestra moneda ke la metitech, en esta hevra kali disir ke vos la tenech revatado de alguno otro i vosesta viniendo mui pesgado porke vo la estan agora revatandola agora i de vos, i ja mos desplase disirvos ke a rason de vos estan pidiriendo i los otros havarim, i koando sintio disir esto el S-r. De H. Chemoelatcha si kedo kajado i mas non avlo de el entodo i kon estofoe ke si mitieron en el lavoro i ivan merandosen los kontos mas sin dingunos pleitos, ke esto lis turo komo a un mes de tiempo, i koando ja lo trucheron en un grado de atar los kontos i asumandolos lo

634                                        Biografia de H. Elijatchuno Josef Arie.                                          1854

vieron ke ja estava pidrido de los kapitales enteramente, ke los averes ke tenijan ja eran muntchos ma siendo ke la krisa foe mui grande i esperansa ke si podija kovrar, non avija por mui longo tiempo, ke esto ejos non lo podijan aser, i kon lo poko de ropa ke avija kedado en el magasen ja era unas ropas ke non eran mas pasavles i H. Elijatchuno por eskapar de los gritos i los pleitos de su ermano H. Chemoelatche, foe ke sin atarlos los kontos si konvinieron entre ejos solos kon ke si endevdo H. Elijatchuno a pagarles a 5000 groches a kada uno por unos tiempos mui largos, kon ke lis djo bonos a todos los 2, i kon esto si lis eskapo la Hevra, i H. Chemoelatche kon H. Chelomo Koen si vinieron a Samokov, en restando de moevo H. Elijatchuno solo en Filibe, ke este ultimo ke foe tanto kanso de estos Haverim para reglarles los kontos, el estuvo unos koantos dijas hasino i etchado en kama, i mas tadre ke el ja reposo si metio de moevo al etcho ma ja foe sin dingun provetcho ke a los todos ande ke tenija de aver ke lis iva, era ke non tenijan nada i ansi foe ke i kon lo poko de ropa ke li avija kedado buchko presto desbarasarse i de eja ke esto tambien lo iso i en poko tiempo ja estuvo desbarasado i de esto i se vino a Samokov solo ke vino mui vasio, i era ke estava sin buchkar a topar de entremeterse por este tiempo en dingun, etcho ke estava mui deskorajado, lo asija ke si iva por las butikas de los Tchorbadjis kristijanos i pasava la ora kon ejos sin ke son ejos ganava nada, i de lo poko de paras ke tenija prontas era ke si iva pasando, de tantos konsejos ke li dava su ermano

635                                        Biografia de H. Elijatchuno Josef Arie.                                          1854

H. Chemoelatche foe en este tiempo ke si los korto i mas non si vijitaron muntcho tiempo, otro ke lo todo si troko kon H. Rabenutcho ke por esto non li enportava,

En el anio de 5615, ke H. Elijatchuno, aparte de loke estava sin dingun etcho era tambien ke estava tambien i en manko de paras, i avija enpesado a emprestarse por el menester, de el sostenimiento de la kasa, i Tchelebi Jeuda i Avraam los 2 ermanos ke eran Haverim porke Tchelebi Gavriel ja si avia espartido, li foe H. elijatchuno ande Tchelebi Gavriel a Rogarle porke lis avlara a sus ermanos ke ejos avijan tomado el idare (abastisimiento ke era menester, de komanija para la soldaderija turka) en el tiempo de la Guera Turka – Russa, de kremeja Savastupol ke abastesijan en Silistra i Rustchuk, i por ke lo mandaran i a el tambien en alguno de estos lugares i Tchelebi Gavriel si lo avlo a Tchelebi Avraam su ermano i ejos ke ja tenijan el menester de ansi personajes konfidentes, foe ke lo tomaron i lo trataron ke li ivan a pagar a 750 groches a el mes por su paga, i partio por Selistra, kon ke li dieron todos los dukomentos menesterosos, i enpeso en su lavoro, ma siendo el etcho era bastante grande, era ke solo non estava pudiendo abasteser i lis eskrivio porke devijan de mandarle otro un ajudador, i ejos ke ja lo vijan foe ke de mismo esto lo kijo i H. Chemoelatche el Chichko

636                                        Biografia de H. Elijatchuno Josef Arie.                                          1855

i mismo ke lis era tanto kontrario, kale disir ke en akel tiempo non avijan ansi personajes otros para ke reintcheran ansi etchos, i lo tomaron tambien i a el kon la misma paga ke li pagavan a H. Elijatchuno i lo mandaron tambien i a el a Silistra, i entre los 2 era ke ivan dando los menesteres i en mismo tiempo tambien asijan i de algunos kovramientos, ke esto siendo ke si iva dija kada dija muntcho engrandisiendo, a H. Chemoelatche el Chichko, se li iva endo de el ojo^[20] de tanta moneda ke iva resiviendo i se la iva remitiendo a Samokov ke kon esto i ejos tambien ivan merkando las ropas de moevo, i Tchelebi Jeuda i Avraam eran en samokov para ir merkando i remetiendoles todos los artikolos de komanijas ke eran el menester, i en este tiempo ke los 2 H. Chemoelatche kon Elijatchuno ke eran en Silistra era ke H. Chemoelatche de kontino lo iva buchkando i kanderijandolo a H. Elijatchuno por asersin a la una i pasarsen ande ejos una boena suma de moneda ke agora era la ora de ganar i de enrekesersin, ma H. Elijatchuno non kijo a dingun presio aserlo esto i H. Chemoelatche, ke non kijo dechar pasar tiempo lo enpeso a aserlo el solo i a la eskondida de H. Elijatchuno, ke era todo enkaso ke el lo asija non las remitija a Samokov, i esto ja lo iso en un tiempo de unos koantos meses kosa ke presto non si pudieran konsentirsen ke ja avija asumado una suma de 300.000 groches, i koando li demandavan paras era todo ke non li kerijan pagar, i ansi lo foe pasando, ke muntchas veses era ke lis eskrivija mui foerte, ke afoera ke ja estuvo jeno de moneda era ke en muntchas kartas los desonrava

637                                        Biografia de H. Elijatchuno Josef Arie.                                          1855

a sus S-res en Samokov, sigun ke ja lo saven ke era una persona mui falso i deskarado i mui pleites, ma non tenija koalo aserli de enfrente, i mas tadre enpeso tambien i a non sintir los komandos ke li davan de Samokov, i por enfrentante era lo todo al kontrario ke H. Elijatchuno, non trokava nada de los ordenes ke resivija de sus parientes de Samokov, i H. Chemoelatche aparte ke ja era bividor grande foe en este tiempo ke iva mas muntcho biviendo i siendo ke muntchas notches si enboratchava, era ke iva pelijando kon H. Elijatchuno tanbien i esto ke lo iso saver a Samokov, i el etcho ke si foe engrandisiendo, kalio ke partiera i Tchelebi Avraam,

En este anio de 5616, sigun ditcho ke partio tambien Tchelebi avraam, por Selistra por poder enderetchar los desordenes ke asija H. Chemoelatche, foe ke en arivando Tchelebi Avraam, en Selistra i H. Chemoelatche partio por la Vlahija, djunto la moneda ke si rovo sigun ditcho ke era una suma de 300,000 groches,

Ke en esta foida de H. Chemoelatche, ke vijajo kon Karussa, en un sierto lugar para irse a Bukarest, foe ke los kavajos si espantaron i lo etcho en un endek, i a esta kavsa si li rompio el braso, i apenas ke ja arivo en Bukarest lo jevaron a el Ichpital, para sanarlo I los medikos ke li dicheron ke era el menester de aserli una operasion en el braso ke si li avija rompido el goeso, i H.

638                                        Biografia de H. Elijatchuno Josef Arie.                                          1856

Chemoelatche, lo iso para non sintirse las dolores de la operasion ke li tenijan de aser, si bivjo i 1/2 oka de raki i los medikos ke ja lo metieron en la kama para aserli la operasion, i para endurmeserlo ke li dieron unas koantas veses a goler el morfin i otras kosas, lo veen ke non troka nada i todos enkantados de ver esto li kijeron de moevo darle a goler mas foerte, ke esto non lis tenija akontesido mismo ke ja tuvieron okasiones de aser operasiones i a muntcho mas foertes de esta persona, i de mismo ke tambien non si endormisio, li demandaron a el mismo si era ke sintija los goesmos de el morfin i H. Chemoelatche, lis dicho ke el ja los esta sintiendo, ma el non si poede endormeser porke avija una ora ke si avija bevido i el oka de raki ke ansi esto non li poede presto pasar, por esto ke non esperen ke si poede endormeser otro ejos ke li agan la operasion, ke non li va a enportar, i ansi foe ke li izieron, i konsentio grande dolor i estuvo etchado longo tiempo fin a sanarse,

i Tchelebi Avraam, ke non lo savija de esto i en akel tiempo non lo podijan aserlo traer, foe ke li eskrivio a su ermano porke i el viniera a Selistra, porke kalija ke estuviera i el para poder abasteser, a los entregamientos, de las menesteres de las komanijas, ke eran mui grandes, mas tadre ke Tchelebi Jeuda tambien vino a Selistra, foe ke el H. Chemoelatche, si estuvo en Bukarest, i en Samokov ke kalija ke estuviera el uno de ejos, kalio ke si boltara Tchelebi Jeuda a Samokov, en restando Tchelebi Avraam kon H. Elijatchuno en Selistra, i denpoes ke ja paso tiempo se vino

639                                        Biografia de H. Elijatchuno Josef Arie.                                          1856

i H. Chemoelatche a Samokov ke todas las mesuras ke tomaron foeron nulla^[21] i non li pudieron aserli nada i resto kon los 300.000 rovados para siempre, foe de esta manera las rikesas de H. Chemoelatche,

i Tchelebi Avraam kon H. Elijatchuno estuvieron fin ke si eskapo el etcho entero ke lis turo el anio entero, i se vinieron a Samokov,

Koando ja si vinieron a Samokov lo esposo H. Elijatchuno a su IJO el grande S-r. Behoratche, kon la ija de Tchelebi Avraam, S-ra Behurutcha, i lo isieron el esposorio kon muntcho kief saltanat, i lo konvinieron ke li iva a dar 5000 groches por kontado i achugar a su onor, i kon esto renovaron de moevo la parientes, ke la Novija tenija 14 anio i el Novio 15,

1. Elijatchuno ke non kijo estar mas djunto kon su ermano H. Rabenutcho, en una kasa, lo iso ke si merko otra kasa ke es la kasa ke moro en eja fin oi i se paso en esta moeva kasa en dechandosela entera a H. Rabenutcho, sin ke li kovro nada por la suja metad, kon la entision de tener el patronage tambien i en la medija kasa ke lis kedo de sus padre, i ni menos li kovro dinguna kira, i seja H. Rabenutcho komo tambien i sus vinientes bivieron en eja todo tiempo ke estuvieron en Samokov, i koando la vendieron a H. Moche B. Avraam la ditcha kaza foe ke los 3 ermanos IJOS de H. Elijatchuno ke son S-res Behoratche Nisimatche i Refael, buchkaron la deretchedad de esta medija kasa, ma non lo pudieron demostrarlo ke sus padre non li kovrarija de H. Rabenutcho su parte i ansi foe ke

640                                        Biografia de H. Elijatchuno Josef Arie.                                          1856

non pudieron tomar nada de parte, i de esto tuvieron i algo de litigas,

En el anio de 5617, ke H. Elijatchuno ja estuvo en Samokov i ke ja tenija bastante de moneda seja de las mesadas ke el avanso seja de algunos presentes ke resivio, era ke si entremetija en darles moneda kon entereso a los jurukes^[22] ke frikontavan a Selaki [Selanik] i ke traivan modos de ropas de komanija, i la vendijan en Samokov, ke de esto lis tomava unos enteresos mas grandes i koando non podijan vender los artikolos ke traivam i ejos ke non podijan restarsen lo asija ke si las merkava el mismo tambien kon unos presios mas konvenivles, i denpoes era ke los iva vindiendo i de esto tenija ke iva ganando, i se pasava mui bien,

El ke ja era mui Haham i bos ke tenija tambien boena i su bos ke ja era mui alta i godra, lo azija ke muntchas veses ke non avijan Hasanim en Samokov, era ke sovija el a la Teva i desija la Tefila seja en los Chabatiod komo tambien i en los moadim, todos si gustavan muntcho koando sovija a la teva a disir la Tefika ke la desija mui klara, i kantava tambien mui boeno, ke esto non lo asija por paga otro ke a el li plasija kantar, i esto non era solo el ke lo asija otro ke koando non avija Hasanim, era kon sira en kada semana ke sovijan la una semana Tchelebi Jeuda i otra S-r. Behoratche

641                                        Biografia de H. Elijatchuno Josef Arie.                                          1857

Gavriel Arie i otra H. Elijatchuno i tambien i algunos otros, ke ja eran Hahamim i tambien ke tenijan i boenas boses, ke esto lo asijan por koando los Hasanim ke ja avijan ke lo kerijan seja por ke lis pujaran sus pagas i ke non lis permitija el Bodjeto or por alguna otra rason lo todo para ke non lis paresiera ke la Keila iva a kedar sin Hasan,

En este anio tambien ke estava esposado su IJO, foe ke demando de aser la boda, i por el tiempo ke lo fiksaron, ejos la isieron la boda, kon grande saltanat, i sigun ke ja lo saven de la manera ke las asijan las bodas foe i aki tambien lo mismo, i la Novija ke ja trucho muntcha achugar i boen kontado i eja ke ja era tambien mui bien savida i ke savija meldar i eskrivir, i lo restan de todos los menesteres de una novija mismo ke era tanto tchika, eja ja foe de el presipio mui respektiosa kon toda la djente de sunsi [su kasa ansi] tambien i kon su marido, eja si enbezo todos los guijos de la kasa, i tambien supo de el presipio la ikonomija, eja de su djoja ke tenija seja de la ke li dieron presentes de la parte de su marido seja de la parte de su padre, en kada tiempo se i iva pidiriendo or ke si la dechava rovar, i eja ke era tchika li vinija ande su padre jorando porke li merkara en su lugar otra para ke non si li aravijaran la djente de su kasa, i el padre ke la amava muntcho lo asija ke li merkava ma tambien i de estas si las jevavan eja ke tuvo muntchos presentes de todos los parientes, seja en djoja komo tambien i en modos de dukados, de antikas foe los mas muntchos ke

642                                        Biografia de H. Elijatchuno Josef Arie.                                          1857

los pedrio, ma esto non era eja kulposa, porke era tchika i non podija ser ke sepa goadrarse, la boda la isieron en dija de mierkolos ke foe en este anio el 20 Tamus,

En el anio de 5618, li nasio a H. Elijatchuno una IJA, ke kon eja tambien lo isieron sigun de todas las otras paridas i li mandaron todos los platos de dulsura i presentes i tambien la vijitaron i la jamaron VENESIA, ke su madre la krejo i la kudio i en el anio de 5639, ke ja arivo su tiempo por kasarla foe ke la kasaron sus ermanos kon S-r. Avraam josef Koen de Samokov, i li dieron boen kontado i achugar, i la novija ke ja foe mui idokada i bien savida eja biven kon su marido bien kontentes, i ansi kon toda la djente de su kasa, eja pario IJOS i IJAS, los todos mui entelejentes i savidos, sus posision es boena i pasan tambien boenos ke ejos enpatronan kasas i butikas i son de los boenos merkaderes,

Ansi de mismo i en este anio tambien li nasio i a su IJO S-r. Behoratche, una IJA, ke kon eja lo isieron el parto kon mas grande saltanat ke es komo a manseva, i de mismo li mandaron todos los parientes muntchos platos i mas muntchos presentes seja para la madre komo tambien i para la nasida, i siempre la vijitaron i en el dija de Chabat lo isieron ke si li foeron todos los parientes a komer djunto kon las komidas sigun ke esto ja lo tengo eskrito

643                                        Biografia de H. Elijatchuno Josef Arie.                                          1858

ke era por el dija de el Fadamiento i la fadaron a la IJA i la jamaron JAFA, ma eja la IJA, non bivio ke murio denpoes de mui kurtotiempo i la madre joro mui muntcho porke era mui ermosa,

En Este anio ke H. Elijatchuno estava sin dingun etcho si lis adereso de moevo ande sus primos ermanos Tchelebi Jeuda i Avraam, ke ja lo supo ke avijan tomado el Hachar de Prisdren^[23] por ke lo mandaran tambien i a el ke non kerija mas grande paga de esta ke tomava de mas antes ke era 750 groches a el mes, por razon ke de esto ke lis dava a los jorukes moneda uvieron unos koantos de estos ke li kedaron a dever, i non vinieron mas, i esto lo espanto muntcho, ke su furtuna ja li foe enmankandose, i ejos ke ja tenijan el menester de ansi personajes, foe ke lo mandaron a Prisdren por ke si okupara de esto i el ke sigun ja lo saven ke ja li vinija de la mano koal etcho si li konfijava, i moi akurat i deretcho ke ja era si foe i resento ke lis dieran en kasa una sierta semanada, por el menester de sus mantinimiento ke esto lis era poko, ma el lo kijo por enmankar el gaste para poder i el amontonar algo de moneda, ke desija es en la manseves ke poede vijajar i mas tadre ke ja entra en la edad, komo es ke si va a poder pasarse ke de todos los negosios ke tiene lavorado ainda non avija en nada reuchido,

de mismo era ke i su IJO S-r. Behoratche ke era resin kasado tambien estava sin dingun etcho, i de la moneda ke tomo de el kontado, era ke la iva gastando, i por ke estuviera i el tambien okopado en algun etcho lo isieron ke su esfoegro Tchelebi Avraam,

644                                        Biografia de H. Elijatchuno Josef Arie.                                          1858

si okupo en esto i li adjunto una sierta suma de muneda, a la suma de paras ke li avija kedado i li avrio algunos kreditos en algunos merkaderes, por ke merkara ropas i kon esto si asento en una butika de malifatura, i iva kontinuando, ke el frekontava las ferias de Usunojo-ova, i esta de Seres i merkava i vendija sigun todos los otros merkaderes ke avijan en Samokov, i seja su esfoegro komo tambien i toda la djente de su kasa eran mui gustosos,

El viendose ke ja li estavan kamenando los etchos boenos foe ke si metio en fragua i frago un Tchardak en la misma kasa ke ejos moravan i gasto en este Tchardak 8000 groches ke sovre ejo seja su esfoegro komo tambien i sus parientes todos lo akonsejavan porke non era el menester, de gastar sin ke ainda non savija sus ganansias i mas tambien ke sigun ditchi ke H. Elijatchuno lis decho mas poko para el menester de sus gaste era ke lo iva adjustando S-r. Behoratche, i de esto tambien li era bastante ke sus ermanos mas Tchikos S-res Nesimatche i Refael eran todos los 2 en la Echkola ke para ejos tambien era el menester de sostenerlos ansi ke para lo todo iva S-r. Behoratche respondiendo, sin ke si estuvo konsintiendose por los gastes ke los iva asiendolo,

En el anio de 5619, ke H. Elijatchuno ainda estava en Prisdren kon el etcho de los Hachares, i en este anio tambien ke

645                                        Biografia de H. Elijatchuno Josef Arie.                                          1859

tomaron i los Hachares,(diesmo de los trigos) de Saluniqu en Hevra kon un sierto Mustafa efendi, (ke el koal es Min^[24], ke ja lo saven ke estos son agora turkos ke jevan solo el nombre de Turkos, los usos tienen lo mas muntcho de Djidios i ejos nos konsogran kon los turkos ni menos ke los djidios konsogran kon ejos, i estos son los ke los jaman pastelikos, porke komen pastel en notche de Chabad, ke es la komida ofisijal de los Djidios, i estos son kedados de el tiempo de Chabetai Zevi, ke si avija nombrado MACHIAH, el salvador de los Djidios i se li avijan adjuntado a el komo 25,000 mansevos Djidios, i en akel tiempo komo los kerijan matar a todos uvo de ejos ke si boltaron a Turkos, para ke non los mataran ke en el tiempo de el Turko koando un Djidio or Kristiano ke era kondenado a la moerte, i si es ke boltava la Lei, i se asija Turko es ke era pedronado, i estos Minim se topan los mas muntchos en Selanique i Ismir, i ejos son todos una djente mui echpikulantes i los mas de ejos son mui rikos, i son una Djente mui ermosas, sus mujeres goadran el medio Harem i non komo a los Turkos,) i en la Hevra ke tuvieron kon el ditcho Mustafa Efende vieron algunas deferensias, i para ke kortara los kontos es ke lo kargaron tambien i a H. Elijatchuno, era ke estava entre Prisdren i Saloniqu en este anio, i en su ida i vinida a Saloniqu, i ke ja era tambien i boen echpekulante, i en moneda bastante ke ja estava siempre de sus primos ermanos, foe ke si topo a un Haver ke era echpekulante sovre la simienta de el kokolio, por el gosano de la seda, i el Haver si jamava H. Behor, i H. Elijatchuno metio por

646                                        Biografia de H. Elijatchuno Josef Arie.                                          1859

kapital 1000 liras turkas, i ejos lo isieron ke la merkaron la simienta, ke era una echpekulasion mui djusta, i la merkaron kon su mui konvenivle presio, i esto si vendija en Marsilija, i ejos ke ja estuvieron prontos para mandarla por desplaser foe ke en este anio non si buchko de este artikolo de el en todo i ansi foe ke ejos ivan buchkando a venderla entre Saloniqui i Ismir i Kostan ma ja tenijan ansi muntcha ropa i los otros echpekulantes, i dinguno non podija vender, i de esto eran tanto sikilijados ke su Haver el H. Behor ke non lo pudo somportarlo foe ke si etcho a la mar i se augo^[25] ke esto buchko tambien de aserlo i H. Elijatchuno ma avija un sierto Hr. Behor Alkalai ke el koal era mui amigo de H. Elijatchuno foe ke lo pudo detener de aserlo esto, i el koal Hr. Behor Muntcho mas tadre vino tambien i a Samokov ke jevava una boneta porke era Haham ma H. Elijatchuno ja si avija morido, i siendo ke H. Elijatchuno tuvo ansi una grande piedrita era ke si estuvo entre Selaniqu i Kostan i se avregonsava de vinir a Samokov mismo ke lo jamavan tanto por ke ejos ja si avijan repintido de esta moneda ke kerijan saver los kontos seja de Prisdren komo tambien i estos de el Mustafa efendi, i kon el kokolio ke mas tadre ja kaento el tiempo foe ke ja si rebevio i li kalio ke todo lo etchara a la mar, sin ke lo viera dinguno i de esto aparte ke pedrio su poka furtuna i estas 1000 liras era ^[26]devija tambien i aparte en Selanik.

En este anio li nasio a S-r. Behoratche su IJO una IJA ke kon eja foe de mismo en el parto sigun todos los otros i la

647                                        Biografia de H. Elijatchuno Josef Arie.                                          1859

jamaron MASAL, i es esta la S-ra Masalu ke la kaso en el anio de 5638, kon S-r. Moche B. Josef Jachar, en el tiempo de la Guiera ke foe Turka-Rusa i ke la djente de su esfoegro estavan todos en Kostan i era el ke estuvo goadrando seja la kasa komo tambien i otras kosas ke tenija su esfoegro Tchelebi Avraam, en Samokov, i tambien estava en la kasa de su esfoegro, i eja kon su marido i toda la djente de su kasa pasavan mui bien ke foe mui grande ikonomiosa, i li pario solo una ves i esto foe movito de 8 meses, i mas fin a el anio de 5661 eja mas non pario, i todas las itchorijas seja de medikos seja de las mujeres todas las iso i aparte eja estuvo tambien i a Vienna i Franses-Bad, i otros banios ma lo todo foe sin dingun provetcho ke si poede disir ke es el S-r. Mochonatche su marido ke non es ombre por parir a tiempo ke eja una ves ja pario,

koanto a la merkansija ke la jevava S-r. Behoratche su IJO, foe tambien non del entodo boena i seja ke el etcho non lo supo jevarlo or seja ke los gastes los tuvo mas muntcho de esto ke lo podija somportar, foe ke los devdores li enpesaron a venir el uno detras de el otro, i ke non pudiendo somportarlo i de la grande vergoensa ke el la tuvo lo topo por mas djusto de depedrerse de este mundo i se merko el tosego de silmen^[27], i se vino a kasa i sin ke lo viera dinguno si lo bevio, i el ke ja foe repintido, de la etcha ke la iso, foe ke lo dicho, a la djente de la kasa, i sin tadrar, foe ke presto lo akomodaron ke era lo todo kon jagurtes i airanes^[28] i modos de gomitorios, ke de esta manera lo kontinuaron komo 2 oras

648                                        Biografia de H. Elijatchuno Josef Arie.                                          1859

i ke foe siempre gumitando foe ke li paso i dopo unos koantos dijas el ja estuvo sano i boeno,

Ma el etcho de la butika lo tenija mui eskuro, ke non tenija tambien ni ropa en la butika, i por esto ke ja era su esfoegro fijansa, ke la devda era una suma de 30.000 groches, i lo poko de ropa ke avija en la butika, ke era ona suma de 4000 groches la vendieron i lo restan lo pago todo su esfoegro, Tchelebi Avraam, i kon esto si likvidio este konto, i lo todo foe denpoes ke paso algo de tiempo, sigun ke vo kontinuar adelantre,

En el anio de 5620, sigun ditcho kon los kontos de S-r. Behoratche, lo izieron ke nomenaron una komision de parte el Djusgo, para ke li meraran los kontos i la lei era ke la komision devija aserlo protokol i konforme al protokol era ke el Djusgo los kondenava i aki foe ke lo kondenaron komo falit, i la lei era ke koando uno asija falimento ke devija de estar en preso 91 dija, si mismo pagavan por su djusto, ke i aki tambien lo isieron esto i lo metieron en preso a S-r. Behoratche, ke ja avijan kamaretas spesial para ansi i merkaderes koando los enseravan, ke lis jevavan de sus kasas las kamas i kuviertas i tambien el mantinimiento, i todo el menester i si estava enserado ke todos sus parientes i amigos li podijan siempre vijitarlo sin ke los defindija dinguno, ma esto era mui

649                                        Biografia de H. Elijatchuno Josef Arie.                                          1860

grande vergoensa li de loke si sikilio mui muntcho li vino un dolor en la teta, ke koando li vinija era ke restava etchado a 2 i 3 semanas en la kama, i era de esta manera ke los foe pasando estos 91 dija en la karsel, ke koando ja salio ke foe tanto flako li kalio ke estuviera longo tiempo en kasa fin a ke si podo remeter, i kon su butika ke ja lo reglo su esfoegro es ke resto tambien kamenandose en vasio i li reglaron una semanada ke la resivija tambien de su esfoegro i kon esto se iva pasando, ke su mujer la S-ra Behurutcha era siempre ke li vinija ande su Padre jorando sovre su vida, ke la estava pasando de verlo a su marido asentado en kasa sin dinguna etcho i ke si lo tomaran kon ejos en koalo foesa i el ke non tenija tambien paras ni para irse a la kavane foe ke li davan tambien i a el aparte para ke si foera a la kavane i ansi era ke si salija de kasa, ma i el tambien lo mas estava jorando,

En este anio li nasio a H. Elijatchuno una IJA ke kon eja tambien lo isieron sigun todos los otros partos, i la jamaron REVKA, ke la koala foe mui delikada en su tchikes i sufrija tambien algo de los ojos, ke kon muntcho ke la kudijaron eja foe mui sana i boena, i en el anio de 5638, sus ermanos la kasaron kon S-r. jeuda B. Elieser Kojumdji ogli, ke el koal era ke si avija dechado kon su mujer, i la tomo sin dingun kontado i esto ke li podieron darle de achugar, eja ke es mui ermosa i mui nikotchera biven kon su marido mui boenos i kontentes eja pario IJOS i IJAS, i su marido ke estuvo

650                                        Biografia de H. Elijatchuno Josef Arie.                                          1860

muntchos anios en Vienna, lo kijo ke si ketara kavejos, porke en Samokov era mui ralo ke otras mansevas ivan kon kavejos, i su madre ke era mui kontrarija de esto porke lis era un mui grande pekado, i foe ke en la una ves ke pario komo li foe el parto mas foerte, era ke su madre en lugar de konsolarla lo asija ke la iva amenasandola en disiendole ansi es para akejas ke si kitan kavejos, i la parida iva jorando a tiempo ke non tenija tanta rason porke su marido era ke lo kerija, i koando ja pario non la kijo mas a la madre,

Mas tadre ejos si foeron de moevo a Vienna, i fin a este tiempo ejos biven en Vienna i su marido se entremete en etchos de komision, sus IJOS i IJAS todos son mui bien estudijados ke los todos son enpeigado de los postos los mas altos ke resiven a grandes pagas,

I H. Elijatchuno ke non estava en Samokov, era ke si foe a Kostan i se iso koredor por vender perlas ke las tomava de los ke venden ansi perlas ke lo mas eran los Minim ke las vendijan, i  de esto apenas si estava pudiendo pasarse el solo ke non li sovrava para mandar a kasa nada, i mas tadre se metio algunas tchikas kosas komo kibrites i papelis de sigara i algujas i ansi otras kosa en un sestiko i se asento en el kiopri de Galata i vendija a los pasantes i tornantes de estas kosas, ke tambien non era nada, i tambien apenas si estava pudiendo mantenerse, i en Samokov en su kasa era ke estavan jevando grandes apretos por el mantinimiento, ke era lo todo ke li mandavan tambien de sus mas serkanos parientes, i sus IJOS los

651                                        Biografia de H. Elijatchuno Josef Arie.                                          1860

mas tchikos S-res Nesimatche i Refael eran en la echkola estudiando, i esto li turo 8 meses ke si estuvo enbivisiendo en estas bavajadas ke muntchas veses ke lo jamavan sus parientes ke si viniera ke loke ja paso non va a boltar, i merar etcho moevo ma el si avregonsava, ke lis kalio ke mandaran kartas a muntchos amigos por ke lo mandaran ke a Samokov non si kijo venir otro ke lo mandaron torna a Saloniqu, i ke resentara los kontos kon el Mustafa efende ke estavan ainda dekolgados i para esto ja si foe i estuvo en Saloniqu algo de tiempo fin resentar los kontos,

I en este anio tambien lo esposaron a su IJO el sigundo S-r. Nesimatche kon la IJA de Tchelebi Jeuda la Bu. Jael ke ja eran todos los 2 grandes para akel tiempo i para aserlo esto kalio ke lo trucheran a H. Elijatchuno de Selanik i Tchelebi Jeuda lo jamo un dija a su kabineto i li dicho lo vamos a esposar a Nisim kon Jael i ja li vo a dar 5000 groches de kontado i achugar a mi onor, 3 anios va estar en mi kasa komo mesa franka para ke poeda a ganansijarlos los 5000 groches i la boda va a ser en mi kasa a los mios gastes, i H. Elijatchuno aun kon todo ke non li podija disir NO, solo li dicho ke el non sirija meresiente de konsograr kon el i la repoesta foe ke tu non saves, i va diles en tu kasa ke ja lo isimos el esposorio, i H. Elijatchuno non tuviendo loke aser i romper ke non lo podija li beso la mano i li dicho BESIMAN TOV, i sin tadrar lo isieron el esposorio kon el mas grande saltanat lo todo a los gastes de Tchelebi Jeuda, sigun ke ja lo saven sigun ke lo asijan ansi

652                                        Biografia de H. Elijatchuno Josef Arie.                                          1860

esposorios, era ansi ke en akejos tiempos los esposavan seja a los IJOS komo tambien i a las IJAS, i es por esto ke agora dan kechas ainda estas IJAS, ke non kudijaron por ejas i ke si meraron solo para ejos de tomarsen mujeres seja ermosas komo tambien i de las Faimilias rikas, ke sovre ejo ja lo eskrivi mas antes ke non tienen rason de darles kechas a akejos padres ke ja estan deja moertos, ke ejos ja supieron mui bien loke isieron,

En el anio de 5621, li nasio a S-r. Behoratche su IJO una IJA, i en la notche ke la estava pariendo ke la jamaron i a la madre de la parida la Bu. Bulisu i eja ke ja sufrija de dolor de dientes, i en esta notche tambien ke tuvo mas foerte dolor fin a el grado de non poderlo somportar, i jo Tchelebi ke estava tambien en este parto porke mi S-ra Madre siempre mi jevava i ami ande era ke iva eja, i lo vide koando li jamaron a el berber ke era Ahmed kalia, porke en akel tiempo eran los berberes ke arapavan tambien i los dantistes para ke si la ketara i de tantos travones ke li djo kon su kerpeden (enstromento, de ketar las moelas) foe ke non si la pudo ketar, i kon un poko de sangre ke li korio foe ke li paso la dolor, i non tuvo mas longo tiempo ansi dolores, i la jamaron JAFA, i kon este parto tambien lo isieron sigun eskrito antes, i era su propia madre ke las aletchava i las kudijava aun kon todo ke era la

653                                        Biografia de H. Elijatchuno Josef Arie.                                          1861

madre tanto flaka i menuda eja tenija bastante de letche para mantener a sus krijaturas, i li sovrava, i eja tambien las kodijava a las otras krijaturas ke eja parija tanto espeso, i ja abastesija para lo todo, es esta la S-ra JAFA ke en el anio de 5641, ke la kasaron en Dubnisa kon S-r. David Konforte^[29], foe ke todo el gaste de la boda seja la achugar komo tambien i el kontado, i mismo i el gaste de el vijaje lo todo foe ke lo gastaron los IJOS de Tchelebi Avraam ke son jo Tchelebi i S-r. Refaelatche, i esto foe a rason ke S-r. Behoratche, padre de la Novija ke es Jerno de Tchelebi Avraam dicho ke en la ora ke estava suplando su ultimo riflo Tchelebi Avraam, li enkomendo porke lis diga a sus IJOS, ke es el ke mos esta komandando porke la kasemos a la Jafa a los moestros gastes, i para ainda mas asermos kreer, lo iso ke S-r. Behoratche si foe ande el Rabino de la sivdad, i resivio Djura, koal mente ke es verdad esto ke el lo esta avlando, i lo isieron ansi sigun ditcho i la kasaron kon muntcho boeno i en la boda en Dubnisa estuvo tambien i Biliu mi mujer kon todos ejos ke pasaron mui bien, i biven mui kontentes kon su marido i son en la boena posision ke enpatronan sus kasas i butikas ejos asen grande merkansija seja en ropas komo tambien i en koeros i otros artikolos, eja pario IJOS i IJAS.

1. Elijatchuno sigun ditcho ke estava en Selanik, por reglar kontos seja estos de el Mustafa Efende komo tambien i lo restan de los kontos de Prisdren, i s-r. Davidtchonatche ke en este tiempo estava en Kostan, i ke estuvo hasino, foe ke lo mandaron a

654                                        Biografia de H. Elijatchuno Josef Arie.                                          1861

Kostan para ke lo akompanijara i estuvo kon el todo tiempo ke estuvo S-r. Davidtchonatche en Kostan.

La Bu. Bulisu su mujer ke siempre estava Bekiara de su marido era ke siempre jorava i esto a las sikretas i su pasadija era lo todo kon kantar, ke estavan notches enteras kon sus IJOS kantando i lis kontava konsejas i belmedjes, ke esto savija muntcho a rason ke eja siempre estava kon las turkas i koando avija vijitas ke ivan las mujeres moestras ande las Hanumes era eja a la kaveseras ke konosija la lingua turka mijor de las turkas, i tambien ke eja kantava de la mas mijor metoda i su bos ke era mui ermosa era ke todas las turkas si gustavan koando iva a kantar DUDA, ke este modo la jamavan las turkas,

S-r. Nesimatche su IJO ke estava esposado era ke li mandava a la Novija siempre presentes i tambien resivija, i se vijitavan muntcho, i la boda la kerijan mas antes aserla ma si komo non estava H. Elijatchuno siempre en Samokov era ke iva kedando,

En el anio de 5622, ke H. Elijatchuno ja si vino a Samokov, ma era ke estava sin paras, sigun ke ja lo meldaron mas antes los danios ke tuvo, i era ke torna asija algunas tchikas operasiones de komision i de esto era las ganansias mui tchikas i entre esto era tambien ke eskapava algunas deferensijas ke tenijan los

655                                        Biografia de H. Elijatchuno Josef Arie.                                          1862

merkaderes i otros i lo kargavan a el para ke los konviniera, ke esto ja li vinija de la mano porke el etcho ja lo estudijava i lo entindija i era ke los konvinija i koando li demandavan en koala kistion foesa a tanto presto ke non la entendija era ke si metija el dedo en la sien i kon unos koantos puntos ke pensava si entiende ke lo kalkulava i era ke respondija, su opinion i de todas las 2 partes si kontentavan porke la repoesta ke dava ja era rasonavle i de en esto era ke algunos li pagavan lo todo komo era alguna paga mas enportante ke komo era kosa tchika non la resivija,

La Bu. Jael ke ja era el sigundo anio ke estava esposada i ke kalija ke isieran la boda, i aun kon todo ke todo el gastes ja iva a ser de Tchelebi Jeuda, ma torna kon todo avijan kosas ke kalija ke las gastara tambien i H. Elijatchuno, i esto el ke non tenija de el entodo en esta okasion el molde para gastar ni un santim, era ke ainda ivan a esperar, la okasion por koando lo ivan a poder, ma Tchelebi jeuda ke kijo aser la boda en este anio, i siendo ke ja espero por ke li demandara H. Elijatchuno boda ke este modo era el uso, foe ke lo jamo i li dicho, kon bos mas alta loke estas mas esperando, koando es ke vamos a aser la boda, ke ja ai muntcho tiempo ke estan esposados, i esto la devemos aserla en este mes, i H. Elijatchuno ke non li pudo disirle nada, i kon salirse de ande Tchelebi jeuda ke estuvo mui sikilijado, si foe a kasa i se lo konto a su mujer, todo esto ke li paso i el molde ke non tenija i su mujer ke lo vido tanto sikilijado, li dicho na ke jo ja tengo una

656                                        Biografia de H. Elijatchuno Josef Arie.                                          1862

klentchera ke ja ai unos koantos dukados ke la gaste i aremos la boda, i para ke non si aravia Tchelebi Jeuda, i ansi lo iso ke la tomo i merko los menesteres ke eran de aserlos el, i en el dija ke fiksaron la isieron la boda, ke foe de lo todo djusto i se kontentaron de todas las 2 partes, i s-r. Nesimatche resto en la kasa de Tchelebi Jeuda sigun sus kundision de restar 3 anios komo mesa franka ke sigun de loke pasava mas adelantre ja lo tengo de eskrivir, i denpoes ke ja estuvieron todos los 8 dijas en la boda ke foe en la kasa de Tchilibi Jeuda, si foeron en sus kasa en restando El S-r. Nesimatche kon su Novija en la kasa de su esfoegro.

Koanto a su IJO el grande S-r. Behoratche, era ke estava sin dingun etcho, i de esto lis era seja a su padre seja a su esfoegro muntcho ataganto, ke non keri ditcho ke a el mismo i su mujer ja lis era ainda mas muntcho, i la S-ra Behurutcha ke dekontino lis vinija ande su padre jorando, es ke lis parisio de boeno de apartarlo tambien i a el de la kasa de el padre, i ejos ke ja foeron tambien kontentes, li merko su esfoegro Tchelebi Avraam, una kasa de Djirk Ahmed Efende visino a la kasa de S-r. Nisim Aladjem, ke kontenija una kamareta grande i un koltuk^[30] i kosina kon kortijo i mas todo el menester, de una kasa, ke si pasaron en eja, mui kontentes i kon esto ke resivija de su esfoegro era ke si pasavan, ke kon esto ejos ja estuvieron mas reposados i de mismo era tambien ke i H. Elijatchuno estuvo mas reposado i tambien kon un mas tchiko gaste, ke si espartio la kasa en 3 lugares, i H. Elijatchuno resto kon su mujer

657                                        Biografia de H. Elijatchuno Josef Arie.                                          1862

i su IJO el Tchiko S-r. Refael i sus 2 IJAS, i unos koantos dijas lis vino mui pesgado esto ke si salieron todos los 2 IJOS es un anio, ke li kaivan las lagrimas sin ke lo avlava a dinguno,

En el anio de 5623, ke H. Elijatchuno ja estuvo solo en kasa sin sus IJOS los grandes, ja era kon mas ikonomija ke si lo ivan pasando, ma el era sin etcho ke lo mas de los dijas se iva ande los Djorbadjis, Kristijanos ke era ande S-r. Saharie de Hadji Juro i ande S-r. Mano Sipotchli i lis asija algunos hismetis i en mismo tiempo lis eskapava i algunos etchos ke lo kargavan de la Plasa i kon esto li pagavan algunas tchikas pagas, i aparte lo ajudavan koando lis demandava algunas paras enprestadas, i en algunas kosas lo asijan i ganar, i en akel tiempo ke S-r. Mano Sipotchli iva merkando balkanes era ke lo metija i a el para eskapar los tratos i li pagava algo de komision, i en muntchas notches si adjuntava tambien i el a las adjuntas ke tenijan el partido kontrario de los Djidios ke platikavan por los etchos de la komunita i de vinir kontra a los ordenes ke dava Tchelebi Jeuda, komo gabai ke era de la KEILA, i en algunas kosas lis dava tambien i el una edeja,

Ke este partido ke era a la kavesera de H. Chelomo Koen i de H. Chemoelatche el Chichko lo jamavan muntchas veses i a

658                                        Biografia de H. Elijatchuno Josef Arie.                                          1863

el para konvenserlo a ke venga i el kontra ma H. Elijatchuno non lo kerija aser esto i romper tambien ke non los kerija era ke estava lo mas muntcho neotral,

En este tiempo ke su ermano H. Rabenutcho ke lo avijan mandado Tchelebi Jeuda i Avraam, a Kiostendil komo derektor sovre los Hachares de el okrug de Kiostendil, i lo iso ke si paso a si una suma de 200.000 groches, i de tanto ke buchkaron kon las boenas a ke las truchera foe ke non kijo nada saver, i por ke li diera mas mijor a entender lo kargaron a H. Elijatchuno, komo su ermano ke de tanto ke li avlava tambien non kerija ni responder, ke li desija por ke non sintiera a los konsejos de H. Chemoelatche, ke esto ja lo savija i el loke li paso propio i kon si mismo ke moestra vida i avenir es solo kon ejos ma siendo mui konvinsido foe ke non li pudo nada darli a entender ke a los kavos salieron tambien i kon ravias, porke H. Rabenutcho era una persona kajada, i algo inattchi, ke non boltava de su saver,

En el anio de 5624, ke H. Elijatchuno estava sin dingun etcho i sus primos ermanos Tchelebi Jeuda i Avraam ke tenijan el Beilik (los 5 groches ke si kovravan por kada karnero ke era de la edad de ariva de un anio) en el okrug de Sofia, i sovre este etcho ke estava S-r. Mochonatche solo, i komo ajudador para este

659                                        Biografia de H. Elijatchuno Josef Arie.                                          1864

beilik ke era etcho mas grande, lo mandaron i a el kon la paga ke ja si li pagava de siempre, i el ke ja foe kontente, ivan entre los 2 kontinuando en el etcho ke estava en mui boena regla kamenandolo

i en este tiempo ke el Governo Russo avija kovalijado a los Tatares i Tcherkeses de su tiera, i estos ke son Turkos foe ke los resivio el Governo Turko en su tiera ke eran una suma de 250,000 almas, i todos eran desmudos i moertos de ambre, i de los males ke jevaron eran lo mas de ejos hasinos ke mas de la metad de ejos si morieron i de estos ke avijan vinido a Sofia komo 12000 almas para ke foeran esparsidos al deredor de Sofia, i de estos ke avijan tambien hasinos de el tifus i estavan por los hanes, sin ke los kudijavan tanto, ke de la kacha de el governo non gastavan otro ke era todo ke tomavan de el poevlo seja mantinimiento seja moneda, i ansi era ke morijan los mas de ejos, i golijan mui muntcho, i en el Han ke estava H. Elijatchuno ke avijan tambien de estos Tcherkeses, hasinos de tifus, foe ke de los goesmos negros si apego tambien i H. Elijatchuno, de esta hasinora, ke a los presipios iva asiendo gairet, a non etcharse en kama ma koando ja pasaron unos koantos dijas el si esmajo un dija en la kanselaria, i de esto los kudios ke li dieron lo pudieron detener para mandarlo a Samokov, ke estuvo etchado en kama komo 3 mesas i non kere ditcho ke ja li dieron todos los kudios, ke eran lo posible ma nada non li ajudava, ke li foe mui foerte, kon rason ke de el presipio non si djo a merar ke esto disijan los medikos de Samokov, i ansi foe ke en una notche de ROCH HODECH, TAMUS, suplo su

660                                        Biografia de H. Elijatchuno Josef Arie.                                          1864

ultimo riflo i resto moerto para siempre en siendo en la flor de sus foersas ke todos los anios de su vida foeron 44 anios, i afito ke en este dija ke murio su mujer la Bu. Bulisu estava parida etchada en kama de sigundo dija de parto ke avija parido una IJA SARA, ke eja tambien non pudo jorarlo en este dija, i la mansija ke foe tanto grande sin abasteser para eskrivir, ke decho a su mujer para toda su vida bivda i 2 ijas kon un IJO sin kasarlos, i li goadraron los dijas de el limunio i mui longo tiempo sin ulvidarsen lo ivan toda la Familia jorandolo, por muntchas rasones.

661                                          ENTELEGENSA DESREOCHIDA.

De todos los lavoros ke los lavoro en su poka vida ke el bivio, ja foeron de el presipio kon muntcha savidurija, seja porke el ja era por si mui savio, i seja ke la entelejensa ja la enpatrono de la eredad de su padre era ansi ke ja lo savija enkamenar todo modo de etcho ke a el si li konfijava, ke mismo ke en una or 2 veses el aria algunos jeros de tresjaro, ja lo djusgavan ke non era de si etchos, i por esto el lo merisija a resivir las mas altas pagas konosiendolo ke ja era persona de grande konfiensa, solo ke por desplaser para si mismo non tuvo dingun provetcho, i foe siempre mui menesteroso i bivio kon grande estretchura,

662

Asta aki si eskapa la partida de la Biografia de H. Elijatchuno, Josef Arie mientres los 44 anios ke el  bivio,