סניור מושונצ'ה ובנו סניור בכורצ'ה

1470

De aki i endelantre si enpesa, la partida de el S. Mochonatche, kon su ijo S. Behoratche,

1471                 Biografia de S. Mochonatche J. Arie i su ijo S. Behoratche.                  1886

En el anio de 5646, ke S. Mochonatche ja foe espartido de todos sus ermanos, el foe mui sikilijado i pensativle, ma el ke ja era mui pasensiozo, non lo amostrava a otros, i li dicho a su ijo porke resentara livros moevos, por denpoes merar en koalo lavorar ke esto lo izieron.

I en este tiempo ke S. Naimatche, iva azer la boda de su ija M. Eliza, ke ja estava espozada kon S. Moiz ijo de el Sr. Tch. Chimon Bihmoarach, de iderne, i se foe S. Mochonatche, kon su mujer Bu. Amadutcha, ala boda i esto kon una semana de mas antes, i de kostan kon toda su familija i el S. Naimatche ke ja abacharon tambien foe ke izieron la boda kon muntcho saltanat, sigun ke ja lo eskrivi en la partida de S. Naimatche de este anio, i S. Mochonatche mizmo i denpoes de la boda estuvieron i una semana otra, ke si toparon mui kontentes seja de el novio komo tambien i de toda su djente, i denpoes se vinieron a Samokov mui kontentes,

Sigun ditcho antes sovre las reklamas de el S. Chemoelatche, ke estuvo en Kostan i ke si adereso tambien i a el konsolato esto lis era mui grande ataganto, i era la korespondiensa kon el S, Naimatche mas larga sovre esto, porke i S, Naimatche tambien era ke ja estava atagantado, ma lo dechavan porke si konvensiera, i visto ke i en el konsolato tambien non gano nada, kale dizir ke non tenija dinguna razon, sigun ke li kalio ke si boltara en vazio a Samokov,

Ejos en este anio non tomaron ni buchkaron a entremeterse

1472                Biografia de S. Mochonatche J. Arie kon su ijo S. Behoratche.              1886

en algunos negosios moevos, por razon ke non estavan liberos de las atagantos, ke los ivan tiniendo kaje en kada dija, i era ke lo ivan pasandolo solo kon esto ke ja lo tenijan de mas antes, i a esta kavza era tambien ke i entre las mujeres, tenijan kechas de las unas a las otras, ke sus S. Madre ke lo protejava mas muntcho, a S. Chemoelatche, seja a razon de loke el li raportijava, or seja porke era el tchiko, i ke estava tambien en su kaza, i mas ke era tambien muntcho mas flako, de los otros ermanos de parte sus furtunas, i esto ja era ke non lo ivan a decharlo en vazio i ja li prometijan ja lo tenijan de kudijarlo komo ermano,

En el anio de 5647, ke su ijo el S. Nesimatche ja era la edad, ke lo buchkaron, de el konsolado franses, por el sirvisio militario, i el ke non si kijo decharse merar, en Sofia, lo izo de irse a Paris, i kon las rekomendasiones de los amigos i esta de el protejo de el S. Kamondo, poder alkansar a delebrarse, i ansi foe ke li toparon una de las lees ke ja avijan en la fransia, por akeos mansevos ke tienen sus negosios en la asia (anadol) ke podijan ser liberos de este servisio, i el ke ja estuvo tantos anios en Kostan ke ja si pudija dezir Azia, i kon las demostrasiones ke el ja las demostro foe ke ja reucho a poder delebrarse, de esto, ma anke ke mas tadre el non estuvo menos ni en kostan, uvo unos ke lo kijeron entregar

1473                Biografia de S. Mochonatche J. Arie kon su ijo S. Behoratche.              1887

kon ke si aderesaron a el konsolato, aziendole saver, ke non estava en la azia, lo todo porke sirviera, el askerlik, ma el ja si defendia, i ansi foe ke li kalio ke si foera a Kostan i entremeterse en algun negosio, sigun ke ja lo izo, i el mientres de su estar en Paris, para arivar en esto ke li turo longo tiempo, ja era ke si okupava tambien i en la borsa de Paris kon ke azija i algunas korodirijas en las borsa de merkar i vender kambio, i algunas ansi otras kozas, ke estas operasiones ja las konosija, de koando estava en Kostan

Aparte el si jevo de Samokov, partida de la djoja, ke ja la tenijan en dijamante i berlante, i algunas otras ansi piedras valutozas, ke eran de las modas viejas, i de ejas foe ke partida, de ejas las vendio, i esto ke li kedava de las piedras mas menudas, ke la valor era mas tchika, lo izo azer en maneras de alfinetes, por gravatas para sus ermanos kon eskrivirles sus nombres en dijamantes, i aparte, maneras de rozas por las mujeres, lo todo de la moda, de el tiempo, i de estas kozas el si ketava los gastes, i mizmo tambien i profetava, i mas tadre ke el ja si asiguro mui bien de su etcho eskapado kon ke tomo tambien i todos sus dokumentos, menesterozos, el non tuvo mas el menester de restar en paris i se vino a Samokov,

Foe en este anio ke si vino a Samokov la Familia de S. Naimatche, ke adetras de sus korespondensia ke tuvieron los ermanos lo toparon de mijor por ke serara la kaza ke tenija en Kostan ke esto ja lo meldaron mas antes ke si reselava mui muntcho el S. Naimatche, por avrir kaza en Kostan, i algunas de las razones por esta

1474               Biografia de S. Mochonatche J. Arie kon su ijo S. Behoratche.               1887

seradura de la kaza en este tiempo, ja lo van a meldar en la partida de el S. Naimatche, eja si trucho lo mas enportante de su mobilia i esto de sus vistidos, ke lo todo lo resivio, en su kaza el S. Mochonatche, i se la resento en 2 kamaretas ke tenija debacho de su kaza, kon ke li djo las javes a la M. Rahelutcha, porke eja las detuviera debacho de su mano i ke las kudiara, ansi de mizmo i kon sus vistidos, i para eja li dieron una kamareta aparte ke estuviera kon sus krejaturas, i ala M. Rahelutcha kon sus krejaturas era la Bu. Amadutcha ke las kudijava mui muntcho, i non las dechava solas ni un punto, eja li jamava en kada dija a las parientas i amigas por ke li foeran en su kaza para ke pasara la ora la M. Rahelutcha, i en vezes la jevava, a eja seja ande las parientas komo tambien i ande las amigas lo todo para ke pasara la ora i ke ulvedara porke a eja nunka li mankavan las lagrimas de los ojos, i el S. Mochonatche era ke siempre lis amostrava boena kara i lis enkomendava a todos los de kaza porke los kudijaran fin a el ultimo grado, sin enfastijarsen, i anke ke ja estuvo longo tiempo en su kaza ejos non si enfastijaron, de kudijaria en todos los puntos,

I el S. Naimatche ke resto en kostan ja si kere entendido, de koala manera el resto solo, i kon la grande pasensia ke el tenija era ke lo somportava, i el se angajo una kamareta en la pansion de una sierta M. Perla, ke resivija a bekiares i los mantenija i los lavava i los kudijava kon una sierta tchika paga, i era ke estuvo en su pansion, i sigun ke en su partida ja lo van a meldar

1475                        Biografia de S. Mochonatche, i S. Behoratche, su ijo.                     1887

El S. Mochonatche, en este tiempo tambiem foe ainda i mas ke se iva sikilijando, por la razon ke sus S. Madre ke estava en la kaza de el S. Chemoelatche, i sigun ke ja lo tengo eskrito ke ejos los ermanos ja tenijan fiksado una sierta suma ke devijan kada uno por el sostinimiento de sus madre, seja por el mantinimiento komo tambien i por el vistir i mas otros menesteres, a sus onor, foe ke en este anio el S. Davitchonatche, non kijo pagar la suma ke li apartenija, i esto por algunas de sus razones, i el S. Chemoelatche ke foe tanto furtonozo, de esto por ke era ke el ja las tenija gastado, i kon la grande ravia, ke el la tuvo, non mero nada atras i foe en su kaza i la tomo a su madre de el braso, i se la jevo ande su ermano el S. Davitchonatche, ke anke ke el ja la resivio kon boena kara ma eja ja vertio muntchas lagrimas de sus ojos, (igoal a esto ja lo izo i su ijo S. Leon ami ke en el primer dija de pesah mi mando pristav a kaza por eskrivirme la poka mobilia ke tenia seja jo komo Jean, i en una maniana de Chabad en el 20 ijar, de este anio ke esto eskriviendo la dita de 5674, mando al pristav en kaza por ke la vendieran kon barabantchik,^[14] i lo izieron esto por 1000 fr. ke si li prometieron kontarle la moneda i ke non kiidijara a ke joraran su esfoegro i esfoegra, ke esta ultima se dezmajo solo por esto ke su jerno lo izo, i kalio ke diera chohad a el pristav dizen los 200 fr. i ke lo kontentara kon su dezejo i la lei ke ja li da a mano de azerlo i esto foe ke lo izieron i es en el dija ke murio moestra vava ke foe el dija de el JAR SAJAT, de la koala estamos avlando,) i esto foe por

1476                   Biografia de S. Mochonatche, kon su ijo el S. Behoratche.                  1887

una suma de la deferensia ke sigun S. Davitchonatche era de 40-50 fr. ke li paresia ke li demando de mas, i foe kavzante de azer verter lagrimas de su madre ala vejes ke ja era de una edad de komo 80 anios, i eja ke tenija la vista mui kurta, arazon de su vejes, ke li kalija ke foera jevada por el braso de otra persona koando eja iva a kamenar i ansi foe ke kavzo mas a atagantar ala familia entera por 40 Fr. i eja ke ja era mui meujuda i pasensioza non avlava nada.

Koanto a sus negosios ejos era ke kontinoavan en lo mizmo ke de los otros anios, ansi tambien eran i el pasar en sus kazas lo todo komo de antes, sin deferensia de nada,

En el anio de 5648, kon el etcho de los tchiflikes (bachtinas), ke las tenijan seja en kiostendil komo tambien i en otros lugares, i ke foeron taksadas de parte de el governo, por ke non uviera mas esto de Bachtinas, foe en este anio ke S. Mochonatche, ja si kontento por las 2 bachtinas a resivir los enportos ke era todo una suma de komo 35,000 fr, i su entision foe de venirse a Sofia, por lavorar en algunas tchikas operasiones de el bankerlik, i denpoes ke el ja lo resivio el enporto se trucho a su mujer a Sofia, i se tomo akira unas 2 kamaretas en la kaza de S. Haim Jechaja, ke por los presipios ja lo iva pasando mui bien i era ke azija ke lis iva dandoles a algunos de los sarafim i merkaderes moneda kon entereso, i esto

1477                    Biografia de S. Mochonatche, kon su ijo S. Behoratche.                     1888

ja era ke denpoes de tomar muntchas enformasiones ke lis dava, i ansi era ke i el etcho ke azija tambien era mui poko, i koza ke non li podijan tapar los gastes, i en este tiempo ke uvo tambien i algo de kriza era ke avijan i algunos de estos ke ivan i kevrando, ke esto lo deskorajo mas muntcho, i estuvo komo serka un anio, i visto ke non iva a tener konto lo izo de venirse torna a Samokov por algo de tiempo kon la entision por mas tadre irse de moevo, i tambien ke no estava topando ande enbeveserse i estuvo mui enfastijado, de estarse solo i apenas topava en alguna butika ande asentarse,

1. Rahelutcha ke estava en su kaza lo kijo i S. Davitchonatche ke si foera tambien i a su kaza, i ke estuviera siempre a todo su gaste, i ke si estuviera en las kamaretas ke eja ja las tenija de mas antes de koando era su kaza, i esto ke ja li demando de su marido el S. Naimatche, ke el koal ja la alesensio, lo izo ke si foe i foe mui bien resivida i kodjada, seja a eja komo tambien i a sus krejaturas, ke estuvo un sierto tiempo, sin ke podija tener por nada de koalo akecharse, ma eja mas ja non lo estava podiendo somportar de estar eja sola en Samokov i el solo en Kostan, i ansi era ke siempre iva jorando, i se la javaron de moevo ala kaza de S. Mochonatche, i su ija M. Sara ke ja konosija mui bien djugar en el pijano, anke ke las notches estavan todos ala una las kantikas en turko, seja de las viejas komo tambien i de las moevas ke ja las savija todas lo todo por modre de eja, ma a eja ja si li envistio ke non kirija mas estarse en Samokov, i visto a esto ke si avija enpesado i a aflakarse

1478                    Biografia de S. Mochonatche, kon su ijo S. Behoratche.                     1888

si lo eskrivieron a S. Naimatche i el lis respondjo, ke la decharan azerlo sigun eja lo kerija, i ansi foe ke eja si rekojo de la mobilija esto ke eja lo kijo, i ansi de sus vistimientas, i otras kozas, ke eja las tenija i en un dija de este tiempo eja partio, por Kostan, serka de su marido i se tomaron una kaza mas tchika, i bivijan mui kontentes, por los presipios ke mas tadre eja foe indo siempre malata, ke non tuvo vida sana, mas,

Koanto ala sus S. Madre ke estava i eja en kaza de el S. Davidtchonatche, foe ke i eja tambien mas ja non si kijo estarse, i se vino a la kaza de el S. Mochonatche, ma lo mas muntcho era ke se iva a la kaza de S. Chemoelatche, porke eja todo loke tenija era en la kaza de S. Chemoelatche ke lo detinija seja sus vistidos i de otras kozas komo tambien i la djoja, ke esto non era poko, loke eja enpatronava, i tambien ke eja tenija i en moneda sonante,

En este anio ke murio, el S. Davitchonatche eran todos mui sikilijados, ke aparte de loke el murio mui mansevo foe ke decho tambien i grande familija ke los mas muntchos eran tchikos, su S. Madre en el tiempo ke su ijo estava esterado moerto en las tavlas, todo loke li dizija era mui [mi] ijo non era la sira tuja, de morirte, komo de sikretos de el DIO son estos i esto en koriendole a miles de las godras lagrimas de sus ojos, i eja ke ja era enteramente kurta de su vista li dizija ke non ti esto viendo, si es tu ke estas esterado, moerto, i eja dezmajada la jevavan ala otra kamareta,

era estos sikletis ke non los dechava estudiar por

1479                     Biografia de S. Mochonatche, kon su ijo S. Behoratche.                    1888

poder enbevesersen en algunos negosios, ke eran solos los 2 ermanos S. Behoratche kon Nesimatche, ke estavan en la oda, i respondijan de esto ke tenijan porke S. Mochonatche non kijo mas salir muntcho, ala plasa, ansi de mizmo era i en kaza las mujeres tambien ke non salijan a dengun otro lugar i siempre era ke se ivan akompanijandosen de las unas a las otras, lo todo entre la familija,

En el anio de 5649, por algunas de sus razones, sikretas ke ejos las pensaron or menos ke las sentieron ke sin ke tenian el menester, lo izieron kale dizir, solo visto a los enchemplos, de algunos otros ke lo avijan etcho, i por esto foe ke lo izieron i ejos de boltar la firma, ke afirmavan de antes Moche J, Arié, i la trokaron en Eliezer M. Arié. (Ke seja el enchemplado, komo tambien i a ejos ja foe ke a todos los 2 ja vino naturalmente a ke si trokara de moevo torna sigun de loke afirmavan de mas antes,) ke a razon de este trokamiento, ejos izieron komandas de koeros krudos, de Salonik i en este tiempo este artikolo foe mui muntcho demandado, i ejos lo vendijan a los Tchariktchis, por tcharas para los kazalinos, i esto eran las venditas partida en kontante i partida a kredit, ansi vendian tambien i a Sofia i Dubnisa, i algunos koeros ke eran los mas mijores, los davan por echtavejarlos^[15] ke si vendijan muntcho mas karos, i ke ja avija un sierto grego tabak ke los savija echtavejarlos i

1480                    Biografia de S. Mochonatche, kon su ijo S. Behoratche.                     1889

lo azija kon unos presios mas baratos, ke era a este ke li davan, vezes por sus konto i veses li vendijan i el koal mas tadre lo izo ke tomo de muntcha djente ansi koeros i en una notche el si fujo si entiende denpoes ke todo lo vendjo i se metio la moneda en el petcho ma solo ke lo izo ke ja era ke non devija a sumas grandes a una persona, por ke non lo buchkaran i ke non lis konviniera a gastar,

Aparte de esto ejos tambien angajaron partida de los algudones filados de la fabrika de Salonique, i esto kon unas kondisiones mui bien konvenivles, i esto tambien era de mizmo ke lo ivan vindiendo, seja en Samokov komo tambien i en las sivdades de el deredor de Samokov, ke lo todo era ke azijan tambien i la konkorensia, ke la djente ainda non estavan tanto uzados a lavorar de estos filados por ke avijan ke los traivan de londra i otras fabrikas, ke de todos estos 2 negosios los profitos foeron mui tchikos, i ansi ke mas tadre lo decharon esto, ke era ke azijan de mizmo los dechkontos, i reglando kontos kon estos ke ejos los tenijan de antes kon muntcha djente, S. Mochonatche, era lo mas muntcho tambien en kaza komo los otros anios, i era siempre en los estudios i meldar las gazetas ke li mandava el S. Naimatche de Kostan, i en este tiempo ke M. Rahelutcha mujer de el S. Naimatche ke iva estando hazina, era ke li eskrivija a su ermano por koalo azer, i su kerensia era ke si es ke se iva de moevo a Samokov podija ser ke ja iva a estar sana, por un sierto tiempo, ke esto foe devista jamada por ke si viniera, ma eja no kijo esto sintirlo a dingun presio, solo ke podija ser ke komo se

1481                    Biografia de S. Mochonatche, kon su ijo S. Behoratche.                     1889

iva tambien i su marido era ke i eja ja se iva, ke eja mas non si podija apartarse de su marido, i esto ke non podija ser el venirse S. Naimatche a Samokov por las razones ditchas de mas antes, foe ke resto en kostan i siempre apokandose,

1. Mochonatche, tuvo ke li nasieron en el anio de 5634, un ijo i lo jamaron Jeuda (tchelebi) i en el anio de 5638, li nasio i una ija i la jamaron Laureta, i en todos los 2 partos, si li izo sigun de todas las otras paridas, sigun ke ja lo tengo eskrito en muntchos lugares, i su madre los kudio, i los aletcho, solo ke por desplazer, el ditcho ijo S. Jeuda (Tchelebi) komo krejatura, koando foe en la edad de 3-4 anios, ke estava djugando kon otras ansi kreaturas el ke si kajo i sin ke dieron tanto atansion ke el anke si akechava, ande sus djenitores ke el sufria, de algunas dolores en la patcha, era ke lo foeron dechandolo pasar kon las kuras de las mujeres i el enpeso a kamenar i algo toerto de la una pierna, i ansi lo iva pasando ke ja lo estava ainda podiendolo somportar, i esto ke si li kangreo, mas tadre se li izo una fistola i li enpeso a korer la materia, fin a ke arivo en un grado ke si li avrio i un burako, i le iva koriendole de kontino, ma ja iva kamenando, ke era algo, i kocho, i de esto tambien era ke si li avija i enpesado i a serle mas kurta la una patcha, fin a el grado ke li kalio, si enpesara i a servir de un palo, por arimarse, i ajudarse por pezar i kon la sigunda patcha, i el burako era ke siempre le iva koriendole, ke de esto venija dijas de el envierno ke non podija salir, i mas tadre el arivo i alas

1482                    Biografia de S. Mochonatche, kon su ijo S. Behoratche.                     1889

moletas, ke era ke apenas podija kamenar, i siempre era ke li iva koriendole las materias seja de la patcha komo tambien i de la nalga i visto a esto anke ke el ja se iva aziendose merar de muntchos medikos seja en Samokov komo tambien i en Kostan i en viena, ke todas las kuras i las operasiones ke li izieron, todo foe sin dingun provetcho i de esto el siempre iva jorando i akechandose de esto ke en el tiempo non foe bien kudijado, es su S. Madre ke lo kudijava i lo kurava i lo lavava siempre sin enfastijarse, es ansi ke fin a ke esto eskriviendo la dita es ke sufre i esta asentado en la kama, solo por esto ke non poede kamenar, ke si li aflakaron enteramente los niervos, ma grasia ke el por si es mui sano i mui boeno de su natura, i non sufre de otra koza por nada,

El tenija de mizmo su paiton i kavajos en kaza solo por su keéf, i se iva en algunas de las tadres a kamenar en los kampos por ke de las kampanijas ke eran serka ja estavan todas derokadas i el moso ke tenijan en kaza era krestijano ke los servija por todos los menesteres de la kaza,

En el anio de 5650, su ijo el sigundo S. Nesimatche ke non pudo restarse en Samokov, lo izo ke si foe a Kostan i el ke ja konosija de las operasiones seja de el bankerlik komo tambien i de las korodirijas de los kambios, el si topo a un haver S. Granati

1483                    Biografia de S. Mochonatche, kon su ijo S. Behoratche.                     1890

ke el koal tambien ja konosija de estas operasiones, i ke era de la sevdad de Izmir i mui biva persona, ejos enpesaron a kamenar de banka en banka i asuviendo los sienes de los eskalones, i sin kansarsen presto sovirlos i abacharlos, solo de la poerta aserles saver el presio de el dija, de todos los kambios, i por koando algunos de estos ke lo iban a kerer seja merkar or vender iva a ser ke lis ivan a dar las komandas i esto kon irles a unas koantas vezes, i ansi era dijas enteros ke estavan koriendo, komo los koredores, i lo todo a pie, i de esto era ke ejos apenas se ketava sus mantinimiento, algo de tiempo, i mas tadre ke ejos todos los 2 ke ja foeron mui kansos, i kaje hasinos de abachar i sovir las altas eskaleras, el S. Granate non lo pudo mas kontinuar,

En Samokov era ke kontinuavan de mizmo sigun de los otros anios, i lo todo en etchos de algo de algunos dechkontos i era ke ejos de mizmo koando si lis prezentava merkadores de koal de sus mulkes foesa el los vendija, i kon el bezesten de Sofia era ke lis ivan pojandoles las kiras, siempre solo ke en kada ves ke ejos azijan los kovramientos i ansi los gastes ke avijan seja de algunas reparasiones i dasios ke pagavan era ke siempre tenijan deferensias i muntchas veses letigavles, ke esto lis kavzava a razon ke non lo tenijan apartado i era ke de todas las 2 partes azijan los kovramientos i de mizmo koando avijan algunas de alkelarlas, ke esto todo era de antes ke lo fragoaran, i por koando lo ivan a fragoar, ja lo van a meldar mas adelantre de la manera ke si lo apartaron ke esto lis turo

1484                    Biografia de S. Mochonatche, kon su ijo S. Behoratche.                     1890

longo tiempo, i litigas, enportantes,

En este anio ke murio M. Rahelutcha mujer de el S, Naimatche, i toda la familija ke si sikilijaron mui muntcho, sigun ke ja lo van a meldar en su partida sus koaledades, tanto boena i bien azidera para todos loke bivio foe solo 42 anios, i esto lo mas muntcho de su tiempo ke estuvo kazada foe siempre sola i lo somportava kon mui grande pasensia, eja era kichta de todos, i S. Mochonatche lo jamo a S. Naimatche por ke si viniera por algo de tiempo a Samokov kon sus krejaturas ma el non lo kijo ke el ja si avija resentado fin a un grado su kaza sigun de loke ja lo van a meldar en su partida,

Sigun ke ja lo tengo eskrito en unos koantos lugares sovre la tanta okoupasion ke se aokupava, S. Mochonatche seja en sovre el adelantamiento de los etchos de el kolel i este de el Kaal, ke es verdad ke lo enkamenava lo todo en mui regla i ke foera plaziente para todos, ansi ke non kere ditcho en la echkola, ke ja era alavada en muntchas sivdades de el deredor de Samokov, i uvieron i muntchos elevos, seja de Samokov krestijanos ansi i de Djidios i de krestijanos i turkos de otras sivdades, i esto por koalo no kale dizir por ke el era solo ke si okupava i la enkamenava, i sakrifikava tambien i muntcha moneda, i por la paga a esto foe de este tiempo ke los mizmos mansevos ke ja salieron de la echkola kale dizir algo enstroidos i enbezados lo ivan dezonrando kon palavras fejas, lo todo por la boena paga ke el foe el kavzante de avrirse la echkola en Samokov ma el ja era ke non merava a estas kozas ke ja se save el ken aze el

1485                     Biografia de S. Mochonatche, kon su ijo S. Behoratche.                    1890

bien kale ke lo espere el mal, i el los jamava a estos mansevos ke eran todos de la masa, i ke resivieron paga i livros i papel de la echkola grates, i lis azija saver ke estavan mui jerados, de ansi un komporto i ke podijan ser kavzantes de derokar la echkola, ma ejos todo loke dezijan era ke la echkola la fondo solo para ke si enbezaran sus ijos a tiempo ke el loke tenija en la echkola era solo un ijo i esto ja era i grande, i para la suma ke el sakrifikava non podija tener el menester de gastar si mizmo lo mandava a el ajeno i siempre el kontinuava en su andar de lo mizmo anke ke lo dezonravan i non merava ni nada ke sus ijos li dizijan porke si repentiera de esta sevda ma el non los sentija, i ansi es ke en muntchos otros lugares ke las levantaron las echkolas de la Alijansa Jsraelid, kada una por sus razones igoal a estas ma en Samokov es ke ainda ke esto eskriviendo la dita ja existe, solo ke la poedan detener,

En este anio tambien S. Mochonatche la espozo a su ija Sultana en Sofia kon S. Mordutcho ijo de el S. Jshak B. Mordehai i el espozorio lo izieron sigun de los otros ke ja lo tengo eskrito i mientres ejos ke estavan espozados era ke el novio vino unas koantas vezes a Samokov por vijitar a su novija i era ke li jamavan siempre mansevos para ke pasara la ora, i lo detinijan unos koantos dijas anke ke el era patron de muntcho etcho en Sofia,

1486                     Biografia de S. Mochonatche, kon su ijo S. Behoratche.                    1891

en el anio de 5651, izieron la boda de su ija M. Sultana, ke ja estava espozada kon S. Mordutcho Tatcher, de Sofia, i vinieron konsfoegros, por tomar a la novija, ke estuvieron unos koantos dijas i li djo muntcha achugar i 200 napoliones de kontado, i mientres ke estuvieron los konsfoegros, era en kada notche, ke los jamava a los parientes i amigos, seja por el komer komo tambien i para el pasatiempo denpoes de komer, ke kantavan i se alegravan, i en el dija de el Chabad todos los parientes estovimos a komer, i sigun el uzo en el dija de alhad ke lo izieron el presijado, foe ke en lunes partieron por Sofia i izieron la boda kon muntcho keef i alegria i ansi foe ke estuvieron kontentes de todas las 2 partes, ke eja la novija, era mui muntcho ermoza, i mui savida i meradera de la kaza, i ansi foe siempre mui kichta i mui amoroza de todos los de la kaza sovre todo kon su marido ke era mui muntcho amada, eja pario un ijo i una ija, solo ke por desplazer ejos bivieron kon su marido, mui poko tiempo, a razon ke su marido murio de gota i esto en estando en el banio, de la plasa, ala flor de su manseves, i denpoes eja resto en la kaza de su esfoegra i kodijando sus krejaturas, ke era ke i a eja tambien la meravan i la kudijavan mui muntcho fin el tiempo ke bivieron sus esfoegro, i en este tiempo ke esto eskriviendo la dita eja se vino ala kaza de su ermano S. Tchelebi, kon sus krejaturas ke su ijo el S. Chelomo, ke eskapo sus estudios en la evropa de dantist tiene su kabineto partikular i se lavora por si i eja lo kudija a su ermano sigun ke ja saven ke sufre de la patcha, i biven

1487                    Biografia de S. Mochonatche, kon su ijo S. Behoratche.                     1891

todos en una kaza, adetras de ejos si lo konvinieron por los gastes

1. Behoratche ke iva mas espeso a Sofia, i por tener, enbivisimiento i en mizmo tiempo ganar tambien, foe ke demando de la narodna banka, porke li konfejaran a el la agentura, por azer los kovramientos i algunos de los enkasos ke los tenija la banka de azerlos en Samokov, i el ke ja si demostro kon sus boenas fijansas, i otros menesteres ke la banka los demandava, foe ke se lo konfejaron, i en mizmo tiempo li avrieron tambien i un kredito de 10,000 fr. en konto koriente, i sovre esto foe ke li enpesaron a mandarle, seja en polisas komo tambien i de otros averis ke la banka los tenija en Samokov para ke los iziera los enkasos, anke ke la komision era mui tchika ma siendo, ke las sumas ja eran grandes, era ke fin a un grado ja lis konvenija, i mas tenija tambien ke dopo de 15 dijas era ke li devija de remeter el enporto ke enkaso, i de estos dijas era ejos ke si prevalijan de la moneda, kon ke algunos de los devdores ke non podijan aser sus pagamientos en el mismo dija de el deskaimiento, era ke lo esparavan kon ke lis kovravan los enteresos, i a algunos lis adjustavan algunas sumas, por tiempos, lo todo kon ke lis tomavan unos enteresos mas karos, i lo enportante era de esto, ke tenijan mas muntcho provetcho, seja de los dijas ke el ja tenija el deretcho, por remeter mas tadre komo tambien ke ejos ja tenijan el kredito, i se lo azijan adevetar la suma en sus kontos, i esto mas tadre ke si lis foe pujando de esta forma de averes, i ke si los ivan aziendo pasarselos en sus kontos, foe ke aparte ke ja si lis entcheron los 10,000 fr. de

1488                    Biografia de S. Mochonatche, kon su ijo S. Behoratche.                     1891

el kredito ke lo tuvieron, era ke i esto de los dijas tambien ja estava pujando, i aparte, era i de sus moneda, ke si lis foe rekojendo, i esto lo asijan por demostrarsen enfrente la banka komo ke ja estavan akurat en el etcho, i siendo ke algunos enpesaron i a non poder responder a estos pagamientos, ke S. Mochonatche visto a esto, se iva muntcho sikilijandose, i ensistija porke si repintiera de este etcho i a todo presio, ke buchkara presto de salvarse, i ke buchkara a dingun presio non tener devda en la banka, ke es estruision visto a otra djente, i ansi foe ke lo abandonaron esto i para poder salvarsen de las devdas de la banka, ejos jevaron grandes apretos i tuvieron i algunos danios,

denpoes de esto ejos tomaron el idare ke es el abastisimiento, de la karne i el pan i otras kozas por el mantinimiento de los soldados ke avijan en Samokov, i esto a el nombre de otros de los Haverim ke los tenijan, ke por los presipios ja lis amostrava boenas ganansias sovre todo ke los pagamientos los asijan en mui boena regla ke era en kada mez ke lis pagavan, ma mas tadre lis asijan grandes defikoltades seja en la karne komo tambien i en el pan ke non estava sigun ejos lo kerijan,

Su S. Madre ke ja estava en la kaza de S. Mochonatche sigun ke ja lo eskrivi de mas antes de la manera ke devino avenirse, de koando foe jevada ande S. Davitchonatche, i ke eja non kijo estarse, ke eja en este tiempo ja estuvo de su vista de los ojos enteramente kurta, i kon unos koantos dijas ke eja estuvo malata foe ke en

1489                    Biografia de S. Mochonatche, kon su ijo S. Behoratche.                     1891

el 20 Ijar de este anio de 5651, murio ala edad de 82 anios, ke non keri ditcho ke ja li izieron sus ijos todas las ultimas onores, i li goadraron los 7 dijas de el primer limunio, i ansi el mez entero i denpoes en el anio entero, li dizijan el kadich, de uzo i se asentavan en el avel, i lo todo ke eja lo enpatronava, sigun ditcho i save ke lo tenija todo, en la kaza de el S. Chemoelatche, i denpoes de a komo algun tiempo ke li demandaron, por espartirsen las kozas de sus madre foe ke el amostro esto ke el lo kijo, i se las espartieron i lo restan ke li kedo en el non uvo mas ken ke li reklamara,

En el anio de 5652, li nasio a S. Behoratche un ijo ke si gustaron todos, i lo jamaron Jshak, a el nombre de su papu, S. jshak G. Arié, ke el koal tambien foe i el SANDAK, ke sigun ja lo saven ke el uzo entre los djidios es ke el sigundo ijo, lo apartiene el Sandakud, a los parientes de parte de la madre, ke sovre esto ja lo saven tambien ke tiene uviszo [djuizio?] djuzgos grandes en el tiempo de antes, i se eskrivio komo uvligo ke el sigundo ijo apartiene a los parientes de la madre, i por esto foe la razon de jamarlo JSHAK, i ke siendo es el uzo tambien ke todo el gaste ke si aze en la notche de la fijola ke es la notche de la chemira, apartiene lo todo a el Sandak es ke jamo a toda la familija en esta notche ansi tambien a muntchos amigos i komieron i se alegraron i de mizmo es tambien i a la

1490                   Biografia de S. Mochonatche, kon su ijo S. Behoratche.                     1892

maniana ke es el dija de el BIRKAD MILA, ke es de el Sandak i lo ke kombedo tambien para la meza de ELIJAU ANAVI, a todos los parientes i ala sivdad entera seja a los ombres komo tambien i a las mujeres si komieron todos i el Sandak li mando muntchos presentes seja a la parida komo tambien i para el nasido, ansi i todos los parientes i por lo restan se izo lo todo sigun de todas las otras paridas, i eja la madre lo kreo i lo kudio, anke ke era algo fortiziko ma ja era ke su madre lo somportava alo todo,

Ejos en este tiempo ke se iva a fragoar la dirjavna patchatnisa^[16] en Sofia, i esto ke si metio en enkante, la fragoadura, por el lavoro, ke el material ja lo davan ejos de el governo, foe, ke si aonaron kon S. Jshak B. Mordehai Tatcher, ke ja era sus konsfoegro, i lo tomaron esto por ejos fragoarla ma siendo los konkorentes foeron mui muntchos, i ansi foe ke lis kedo ande ejos kon unos presios mui karos anke ke los planes ja eran presentados a todos ma ejos ke non eran arhitektis non foe bastante, de los estudios de los otros seja enjenieres komo tambien i de los arhitektis, i koando ja si metieron en la fragua, de el presipio ja lo vieron ke ja era koza ke non lis podija konvenir, ma non podijan decharlo, por la razon ke ja estuvieron mui bien atados kon sus kontratos, i tambien ke tenijan i boenas fijansa i los depozitos, era ke lo foeron kontinuando i les turo longo tiempo fin ke la eskaparon, i esto era siempre kon litigas, i visto a esto era tambien ke i el governo non lis avansava tambien la moneda por el karar de lavoro ke li lavoravan a rason ke

1491                    Biografia de S. Mochonatche, kon su ijo S. Behoratche.                     1892

por estarsen ejos de mano para ke non podieran de el en todo decharlo i siempre se rezervavan kon uno i dos mezes ke non lis pagavan, i a ejos ke si lis azija el menester de la moneda, era ke lis kalija ke foeran ejos mas ainda desbolsando ke para esto era ke tenijan entre ejos siempre, deferensias, i litigas i lo mas muntcho se prevalian de la plasa, i denpoes ke ja si eskapo la fragoa ke se meraron los kontos, fin ke si los reglaron foe tambien ke tuvieron muntchas deferensias i letigas, i a esta rason ejos kedaron longo tiempo mui anojados ke non si, avlavan,

En unos koantos anios ke tuvieron kaje todos los kachkavaldjis boenos profitos, ke en Kostan se demandava mui muntcho de los kachkavales de la bulgaria, sovre todo de estos de Samokov, ke ja eran lo mas muntcho de Balkan, i ejos ke ja tenijan sus balkanes, foe ke lis merkaron ejos las letches, de los vlahos (karakatchanes) ke ejos lis davan a kira sus balkanes por el pasto de sus karneros, ansi tambien i de otros ansi balkanes, i uvo ke arivo un tiempo ke non lis davan los balkanes kon la kondision ke lis devijan de darles a ejos las letches, lo todo sigun de los presios ke si kortavan en los mas grandes, i siendo ke ja eran las merkidas de esta forma era tambien ke i los presios ja foeron muntcho mas karos de los otros anios, i ejos kon otros haverim, ke ja lo konosijan el ofisio, izieron en unas koantas mandreas una mas grande partida de kachkavales, solo ke ejos foe ke non lo kijeron venderlo en Samokov, ke ja venijan merkaderes de Kostan i los merkavan kon sus boenos presios, otro ke por

1492                    Biografia de S. Mochonatche, kon su ijo S. Behoratche.                     1892

poder proretar [profetar] ainda mas mijor ejos lo mandaron a Kostan a los komisioneres ke ja avijan de esto por ke si los vindieran por sus konto solo ke en este anjo foe al kontrario de los otros anios ke los ke vindieron en Samokov, todos tuvieron sus boenos profitos, i estos ke mandaron a Kostan por venderlo foe ke apenas pudieron aferar sus kapetales, i ansi foe tambien i para ejos, i mas foe ke non lo izieron esto de kachkavales porke non lo konosijan el ofisio,

30. Nesimatche el ijo sigundo de S. Mochonatche ke estava en Kostan foe ke si espozo, kon la ija de S. Rahamim Farhe, M. Irma, i se konvinieron entre kontado i achugar ke le devija darle la Suma de 30.000 fr, i de esto si gusto mui muntcho el S. Mochonatche sovre todo ke esta suma de kontado, foe el primer de la familia Arié ke lo tomo, i ejos lo izieron el espozorio kon muntcho saltanat en Kostan por razon ke en este tiempo el S. Farhe estava en kostan,

En el anio de 5653, S. Nesimatche ke estava espozado, i kon la kontentes, de su S. Padre, ejos demandaron de aser la boda, i S. Farhe ke ja estuvo de akordo, fiksaron el tiempo, solo ke por algunas razones ke ja foe konvensido i el S. Farje, lo izieron de azer la boda en Iderne, i ke non foera, ni en Kostan ni en Samokov, i de este tiempo la novija se foe a Kostan por prontarse algo de la achugar, ke i para esto tambien ejos ja lo tuvieron fiksado la

1493                    Biografia de S. Mochonatche, kon su ijo S. Behoratche.                     1893

suma ke devija de gastar, i kon unos koantos dijas mas antes de la boda partio S. Mochonatche de Samokov, kon su mujer la Bu. Amadutcha por andirne, i en una kaza ke ejos la alkelaron foe ke izieron la boda, de todo djusto, i antes de la boda ejos tuvieron algunas jelores i deferensias en el trato de el kontado, ma ja si lo konvinieron kon ke li kalio ke a S. Farhi lis diera ensima de los 30,000 fr, i otros 5000 fr, i kon esto si lis eskaparon todas las deferensias, i denpoes ejos en la boda ja estuvieron de todas las 2 partes mui gustozos i la boda la izieron kon muntcho keéf, i alegria, kon ke tuvieron a muntchos kombedados i muntchos tchalgis ke esto ja avijan de los mas mijores, i de las 2 partes siendo mui kontentes el novio i foe de moevo a kostan, i se resento kaza moeva ke li vino a kostar la mobilia komo 8000 fr, ke lo todo si merko en kostan de la primera koalita, i ejos de mizmo bivijan mui kontentes i mui aonados, i S. Mochonatche se vino a Samokov, de mizmo mui kontente,

En este mizmo anio li nasio a S. Nesimatche un ijo i lo jamaron EDOARD, i en el parto lo izieron a el uzo de kostan, ke tuvo tambien i siempre kombedados a sus amigos, i el S. Naimatche ke ja estava en kostan, era ke i el ja estava siempre en su kaza,

En el Kostan era ke kontinuava en su negosio de mas antes, i por lo todo non si estava podiendo tapar los sujos gastes ke esto lo foe ansi pasandolo, i entre las korespondensias ke las tenijan kon su S. Padre era ke lo akonsejava por ke si viniera a Samokov, i merar por resentarlo en algun etcho, i sovre ejo tuvo longo

1494                     Biografia de S. Mochonatche, kon su ijo S. Behoratche.                    1893

tiempo de kalkularlo ke S. Naimatche, tambien ke i el ja lo via ke non estava pudiendo reuchir en los etchos ke azija era ke i el tambien lo akonsejava por ke si foera anke ke non era tanto konvenivle para el seja ke en vezes se enprestava de alguna suma de moneda, i mas ke li era komo una kompanija, ke iva a kedar solo,

1. Tchelebi su ijo el tchiko, sigun ke ja lo saven ke el sufria de la dolor en la patcha, foe en este anio ke el tuvo ainda mas grande las doloros, i ansi era ke non estava de el en todo kamenar, seja porke ja foe mas grande or seja porke se li iva enfortesiendose, i visto ke non avija ainda dinguna salvasion para el era ke lo mas muntcho estava jorando, i se iva akechandose foertemente ande su S. Padre por esto ke non lo estava i a el kudijandelo i ke podija kedar sakat para toda la vida, i siendo ke de tantos medikos ke ja lo meraron por moestra partes, siendo ke ainda non vido dingun provetcho, es solo ke en viena poede ser ke podija topar la salvasion, i esto ke lo kere sovre esto li dicho, su S. padre, de ja iva a venir su ermano el S. Nesimatche de Kostan i ke lo akompaniara, i sovre esto kedaron de akordo para azerlo, solo ke kalia ke viniera porke otro ken lo podia akompaniarlo non avia, i kon esto se konsolo i se gusto, i kon pasensia lo iva esperandolo a su ermano ke viniera de kostan por irsen,

En kaza las mujeres, eran kale dizir boenas, ke lo pasavan ke la Bu, Amadutcha era sola kon sus ijas, ke lo pasava lo mas muntcho, porke la M. Viniziu, su noera, seja porke kudijava sus

1495                    Biografia de S. Mochonatche, kon su ijo S. Behoratche.                     1893

krejaturas, or seja ke tenijan algunos dezakordos, entre la esfoegra kon la noera, era ansi ke i eja tambien si estava sola en su kamareta, i koando se ivan a ir en algun lugar a vijitar eran kada una por si ke se ivan, i esto lis kavzo tambien ke i ejos los ombres, era mas ralo, ke vinijan seja en las notches komo tambien i en los dijas de los Chabatiod i de los moadim, ke si rekojijan en un lugar anke ke bivijan todos en una kaza,

En el anio de 5654, su ijo el S. Nesimatche ke ja estava en kostan tambien i kazado, i ke ja tenija su kaza komplida de todos los puntos, porke el para poderse resentar una kaza mas mijor el lo izo ke gasto, komo 10,000 fr. seja por mobilija komo tambien i por todos los otros menesteres, i el ke si okopava en unos koantos, modos de las operasiones, seja de banka komo tambien i de la komision i otros ansi negosios de ambulant, foe ke el non estava pudiendo reuchir, anke ke el ja las konosija, mui bien todas estas, operasiones porke en kostan ja lo saven la bives de estos echpikolantes de estos ofisios, (aki lis vo a kontar, loke mos tiene kontado mi S. Padre, i es ke en una ves ke el estuvo en kostan, i el ke tenija el menester de merkar bechlikes, en la borsa, por pagar en la hazne, las polisas ke si li travavan de Samokov, i esto ja lo tengo eskrito de la forma ke eran, i un sierto djidio, koredor, ke era Selanikli, li dicho por

1496                    Biografia de S. Mochonatche, kon su ijo S. Behoratche.                     1894

koalo es ke toma tanta pena para merkarlos i kontarlos i jevarselos ande es ke si li azen el menester, ke esto todo, ke molo deche para mozotros, ke ansi komo ansi, ja vamos koriendo, i ke jo tambien si los vo a dar a el presio, ke usted los va a merkar, ke esto non va tener koalo pedreri es a el presio de el dija ke i jo si los vo a dar, i mas nada de komision tiene de pagar, ke va aser al kontrario, ke el va a ganar, el hamalir [hamalik], de transportarlos, i siendo ke el koal ja era persona de boena konfiensa, lo izo de azerli merkar, la suma ke en akel dija li foe de primura, i en su tiempo ke ja si los entrego, foe ke alos kavos mi S. padre li demando ke era mui kuriozo, de saver loke foe la ganansia de esta operasion, ke el tuvo, i su repoesta foe ke los provetchos de ansi operasiones, son solo los jeros, en el kontar, seja en la resividura de los bechlikes komo tambien i esta de en la entregadura, i ke en ansi unas sumas, siempre ja deve de akonteser ke aigan jeros i ke altramente dinguno non paga korodirija, ke ja si lo merkan ejos propios, solo ke ejos non si jeran,) es ansi ke visto a esto es ke non es dado para todos ansi ofisios, i el ke foe endo siempre en manko de su furtuna de la moneda, ke la enpatronava, seja de esto ke el ja tenija de antes de kazarse avansado, komo tambien i de esto ke el tomo de el kontado, i pensandose non seja ke li arivara a venir ainda en mas manko, lo izo de vinirse a Samokov kon su familija, por algo de tiempo, kon ke el enpako, su mobilia, i mas de las kozas ke non li premijan traerse a Samokov, i se vinieron ala kaza de el padre, i kon la suma de moneda ke el tenija foe ke si la

1497                    Biografia de S. Mochonatche, kon su ijo S. Behoratche.                     1894

djo tambien a el padre, kon algunas kundisiones ke ejos las tuvieron, i la suma ke li djo foe de 16,000 fr,

Sigun Ditcho ke S. Tchelebi el ijo tchiko ke sofria de la dolor en la patcha, i ke lo estava esperandolo a su ermano por irsen a viena, foe ke poko tiempo pasando de koando arivo el S. Nesimatche, ejos los 2 ermanos partieron por viena, i ejos si resentaron en viena, kon tomarsen en una kaza una kamareta, i los medikos de el presipio lo ivan kurandolo en kaza ma mas tadre el si foe a el echpetal ande lo kuravan mas mijor, i ansi foe ke estuvo kurandose longo tiempo, i se avija topado muntcho mijor, sovre esto el resto ainda mas en viena, por poder sanarse, por entero ke a el li metieron maneras de machinas en el pie, por ke si li enderetchara, i ke pudiera kamenar mas mijor, i en este tiempo el si tomo a un profesor, por ke li diera liksiones en la lingua nemsa, i el ke ja es tanto entelejente el estava dijas enteros kontinuando en esto, ke en poko tiempo el ja pudo avlar esta lingua, i tambien algo i eskrivir, i mas tadre ke el ja si vido mas mijor foe ke si vinieron a Samokov, i ansi foe ke si topo mui kontente, sovre todo de esto de la machina ke li metieron li ajudava mui muntcho para el kamenar, i tambien mas longo tiempo non tuvo menester ke lo kuraran otros, ke ja si podija i el mizmo kurarse, en okazion, ke si esto el lo azija unas koantas vezes de irse a viena, bien podija ser ke iva a estar enteramente sano, ma el non lo kulpa esto, ke es todo kale dizir el mazal, foe ke tuvo de sufrir, ke non si poede a dinguno enkulpar, por ke todos sus parientes

1498                     Biografia de S. Mochonatche, kon su ijo S. Behoratche.                    1894

lo adjidijavan mui muntcho i tambien lo kudijavan, i S. Nesimatche ke estava en Samokov el era ke estava en vazio ke non tenija en koalo okuparse, era ke su enbivisimiento era lo mas muntcho ke si iva okupando en ir merkando los menesteres de el mantinimiento de la kaza, i de esto ja foe mui enfastijado, i el se kirija torna irse a Kostan porke i su mujer tambien non kijo mas estarse en Samokov, ma foe ke en este anio lo foeron ansi pasandolo,

En el anio de 5655, ke S. Nesimatche, ja non pudo mas somportar el restarse en vazio en Samokov, el si rekojo sus pokas kozas ke el si las avija traido i se foeron djunto su familia de moevo a Kostan, i su mobilija ke ja la tenija enpakada, en Kostan el si tomo de moevo kaza i se resentaron, por buchkar de lavorar en koalo se li prezentara, solo ke a el li foe el kapetal mui tchiko, i li paresio de boeno de konrogarse de su esfoegro por ke lo ajudara kon alguna suma de moneda, kon ke ja li izo saver, por el menester, ke la tenija ma su esfoegro non kijo en nada ajudarlo por razon ke ejos ja tuvieron en otra okazion algunas deferensias, i de este foe tambien los enpesijos de las deferensias ke si lis arebivieron kon su mujer, seja ke i en eja ja avijan algunas mankuras seja tambien ke si ivan i letegando foe ke lis arivo la koza fin a esto de apartarsen i biven eja en la kaza de el padre, i el kon sus krejaturas

1499                     Biografia de S. Mochonatche, kon su ijo S. Behoratche.                    1895

en kaza aparte, ke ja si kere entendido las pasadijas de todos los 2 ke mizmo fin a este tiempo ke esto eskriviendo la dita ejos ainda non si konvinieron denpoes ke ja si djuzgaron unas koantas vezes, ke eja demanda el get, kon sus deretchos, i esto ke non li kere responder el S. Nesimatche, es ke estan ansi, todos los 2 jevando mal,

Kon el bezesten ke ejos lo tenijan en Sofia, foe en este anio ke lis eskrivieron tambien i a ejos por ke lo derokaran sigun ke ja lo saven ke lis davan un sierto tiempo ke en kavzo kontrario era ke de el gradske sovet lo derokavan i denpoes lis kovravan el gaste ke lo asijan kon 2 i 3 tantos i si tan presto non lis pagavan era ke li vendijan la tiera para kovrarsen sus gastes, ke ja avijan muntchos merkadores, i tambien ke devijan de fragoarlo de moevo, i ejos los haverim ke son los ijos de el S. Davitchonatche, ke vinieron en un lugar para merar algun molde a ke restara ainda algun tiempo, por ke ejos sigun ditcho ke de en anio en anio ivan siempre pujandoles las kiras, ma siendo ke ejos nunka non si avinieron ke lo todo estos ultimos si espantavan non seja ke los enganijaran i ke ejos non si dechan enganijar, i ansi era ke lis salija el etcho a litigas i pleitos, i restava ansi i S. Mochonatche ke non podija somportar de sus sovrinos los trespajos ke li azijan ke ala kavesera era lo mas muntcho el S. Leon ke gretava, lo izo ke si foe el mismo a Sofia i merar un molde para espartirselos i ejos lavorarsen kon sus parte solo porke non si podijan konvenir en siendo en un lugar, i kon esto pensava de fragoarselo el solo por si, ma para arivar en esto lis

1500                  Biografia de S. Mochonatche, kon su ijo S. Behoratche.                     1895

kalio ke tomaran un enjenier, para ke si los apartara, ma esto de la prima ves non pudo ser ke sigun ditcho ke si espantavan non seja foeron enganijados, i en este tiempo ejos si toparon a unos laboradores por ke lo derokaran por ke era una fragoa mui rezija, i por denpoes ke devinija en kampo era ke podija ser ke si lo ivan a espartir mas kolai, i ansi lo izieron, ke era sus avlas kon gritos koando se tratavan de esto i S. Mochonatche se avregonsava, ma S. Leon komo mui savido AM AARES, era ke iva gretando, i mas tadre ejos fin ke lo derokavan se vinieron a samokov,

Sus ijos ke eran en Samokov, lo mas muntcho lo pasavan sin moevas okupasiones, porke era ke en kaza tenijan tambien i algunas deferensias de familia, i visto a esto S. Behoratche demando por apartarse de kaza, ma en este anio non lo izieron esto, era ke se iva buchkando kaza para salirse

Non abastava las deferensias ke tenijan ejos era ke li iva tambien i la Bu. Bulisutcha ande su konijado konjorandose de su ijo el S. Leon, ke lis esta kiriendo revatarles los bienes de todos los otros ermanos, i el enpatronarse en lo todo, i ke kudijara tambien i por sus sovrinos, ke esto, era tan foerte, porke el konporto de S. Leon era mui kroelmente, i S. Jomtov komo era mui flako, era ke iva jorando, ke non uvo ken non si metio sovre la espartision, de S. jomtov, ke sus konijados tambien de Sofia ke kijeron mleskarsen era ke los trespajava, i los maltratava, fin ke lis kalio kale dizir por un bokado de pan ke lo konvinieron para ke saliera s. Jomtov,

1501                  Biografia de S. Mochonatche, kon su ijo S. Behoratche.                     1895

por razon ke estava endo hazino, i esto ja lo estan viendo ke mizmo i oi todo el bien de todos los ermanos i ermanas lo todo lo enpatrona S. Leon i todos sigun lo veén ke kon todos los ermanos esta siempre pilijado ke todas las razones son sujas,

En el anio de 5656, S. Behoratche su ijo el grande adetras de algunas deferensias ke tenijan seja el komo tambien i las mujeres lo izo ke si aparto i se salio de kaza i se paso en 2 kamaretas de S. Refaelatche, kon una tchika kira, i el aparte ke ja tomo de kaza alguna mobilia i de otros menesteres era ke non li era bastante i se foe merkando esto ke li mankava, i kon el gaste el lo travava de la oda seja por su konto or seja por konto de el padre, i en algunas vezes ke el azija mas grande gaste, i lis travava porke lo pagara su ermano el tchiko arivava algunos tiempos ke li dava kechas sovre esto ke iva a mas muntcho gastando, ma el non los sentija i se merkava todo esto ke el lo kerija, i todos sus djenetores era ke siempre lo vijitavan i el tambien lis iva, solo ke en vezes el lo azia seja por ulvedar or seja porke li plazija en muntchas tadres venija komo buratcho a kaza, de loke bivija en los pasatiempos, ke tenija sus kompanieros, ande bevijan ke esto li turo longo tiempo i de esto era ke muntchas vezes se i hazenijava, i lis salija ke si lis rebivia tambien i pleitos, ma ja era solo entre ejos ke non lis salija ala

1502                  Biografia de S. Mochonatche, kon su ijo S. Behoratche.                     1896

plasa, i en esta kaza ke morava tambien i jo era ke en los Moadim i los Chabatiod, komijamos todos en una kamareta, kon ke kada uno kon su meza aparte, ansi lo asijamos i en muntchas notches tambien i de la semana ke venijamos en un lugar en las notches por pasatiempo, i la kaza komo era el salon mui grande i ke non estava apartado, i de todas las 2 partes ke avijan kamaretas, i esto ke ja eran muntchas i en todas ke ja avijan djente foe ke en una notche ke estuvo la Bu. amadutcha su S. madre a durmir ande su ijo lo vido ke en la notche ivan entrando i saliendo de todas las kamaretas ke eran todas jenas i kada uno kon su kandela se iva endo a su kamareta, i eja ke estava asentada en los ajates de el salon ke era a el presipio de la sala i larga se iva gustando i dezija ke li esta mui muntcho plasiendo, de ver esto parisiendole kome uno de los grandes hoteles ke eja los vido en paris i mui repozados kada uno endose a su kamareta, i todo mui klaro, era ke non si etchava por ver los kavos i koando ja si amtava todo era ke i eja tambien se iva a su kamareta, i denpoes siempre molo kontava esto, ke li plazija mui muntcho, i se gustava

Sigun eskrito mas antes ke el bezesten ja foe derokado i tambien i alempijado foe ke S. Mochonatche ke lo kijo fragarlo i ke li kalija ke estuviera i apartado, porke el non kijo mas temer [tener?] en hevra, i esto de loke una vez ja lo tienen etcho vija de el enjenier no foe bastante, lo izieron de jamar el sigundo i anke lo apartava tambien era ke non si kontentavan los ijos de S, Davitchonatche i de esto si lis rebivija de moevo sus deferensias i litigas, ke lis

1503                  Biografia de S. Mochonatche, kon su ijo S. Behoratche.                     1896

kavzo aderesarsen i vija el konsolato por ke lis apartara las deferensias, ma i kon esto era kon maltratamientos i gritos, fin a el grado ke arivo ke en estando ejos los 2 S. Mochonatche kon S. Leon en el lugar propio de el bezesten de tantos gritos i ravias ke tuvieron sin ke uviera el menester, foe ke S. Leon se permetio de harvarlo a su tio el S. Mochonatche kon su baston fin a el grado ke si li rompio el baston en la espalda de S. Mochonatche, i esto foe ke jo ke estava en este tiempo kon Jean aki en Sofia i estavamos en un hotel kon S. Leon, i en la notche ke ja vinimos todos mi amostro el baston ke si lo rempio en la espalda de el tio, i jo ke li kije darle kechas mi se aravio i kon mi, i mas denpoes ke lo vide tambien i a S. Mochonatche, me dicho vites loke mi izo Leon, ? ke por esto foe ke si akecho en el konsolato, i kon esto foe loke si podieron mas presto konvenirsen i lo apartaron kon ke si i tomaron tambien i dokumentos aparte por kada uno, ma S. Mochonatche de esto ke lo harvo en medio de la plasa se avregonso mui muntcho i se sekelio,

Denpoes ke ja si lo apartaron siendo ke el lugar ke li kedo a el li foe tuerto i ke ja topo a merkar algunos pedasos de tiera por ke si enderetchara el lo frago, kon ke izo tambien i una kaza de 2 etajes kon grandes kamaretas i adebacho le iso todo de butikas, ke de el lugar ke merko el tuvo tambien ke pudo azer i 2 butikas para la plasa, i todo tiempo ke si estuvo fragoandose era ke el mizmo estuvo en Sofia, i ke gasto para esto komo 40,000 fr, por el presipio ke mas tadre por eskaparse era ke iva i mas gastando fin a ke

1504                  Biografia de S. Mochonatche, kon su ijo S. Behoratche.                     1896

si li eskapo koplidamente i las butikas las alkelo de moevo kon unos mijores presios de mas antes, ansi tambien i la kaza, ke i por algunos gastes ke los tenijan en djuntos komo jerizes i otros era lo todo siempre kon pleitos ke si los pagavan,

En el anio de 5657, S. Mochonatche la espozo i en este mizmo anio tambien la kazo a su ija M. Zafira, en Filibe kon S. Nisim B. Israel i li djo 400 napoliones de kontado, i achugar a su onor, i se foeron a filibe por azer la boda, ke en Samokov todos los uzos ke si azijan kon todas las bodas tambien i kon esta foeron etchos, solo ke eja non bivija tanto kontente por los presipios, porke su esfoegra era una mujer mui kroela, ke la apretava mui muntcho, i su marido ke era mas flako era ke non tenija koalo azerle, ma mas tadre eja ja estuvo algo mas repozada seja por ke ja si uzo a esta vida or ke ja trokaron su marido tiene una pasadija mediana, i eja li pario ijos i ijas, i en kada 2 i 3 anios eja los vijita siempre a sus parientes, i la regalan, en todos los puntos, eja en kada ves ke parija era ke su S. Madre se li iva a el parto i se estava longo tiempo fin ke si enrezijava, bena [boena],

1. Nesimatche sigun ke ja lo saven ke estava en Kostan el ke tambien non pudo reuchir en los etchos ke azija en kostan foe si topo a un Haver un sierto Ben Chimol, ke el koal ja era agente de

1505                  Biografia de S. Mochonatche, kon su ijo S. Behoratche.                     1897

unas koantas siguritas seja a vida komo tambien i de foego i ejos reucheron de estas kompanijas de avrir tambien i en Sofia ansi agenturas solo ke alguna suma por kapetal ke era por los presipios de tener era ke si lo konvinieron ke lo iva a dezbolsar el S, Nesimatche ,ansi tambien i ke li iva i avansar, por su menester de su mantinimiento, porke el S. Benchimol non tenija moneda, sovre esto ke ejos ja lo resentaron el etcho boeno en kostan se vinieron todos los 2 a Sofia, i se resentaron sus kanselaria en el un etaje de el bezesten kon ke i S. Nesimatche morava kon su familija en el Bezesten i el otro etaje ejos lo alkelavan, i ejos de los presipios eran ke ivan aziendo mui boenos etchos, i se topavan todos los 2 mui bien kontentes, i a esta razon era ke ejos azijan i mas grande sus gastes, sovre todo el S. Benchimol era mui gastador, i mas tadre ke ejos non lo podieron boeno enkamenarlo era ke algunos de los klientes non eran kontentes, i foe ke se lis iva enmankando los klientes, i los gastes ke lis foeron mas grandes foe ke el S. de Benchimol se pudo pasar a su konto una suma de 6-7000 fr, i partio de Sofia sin azerlo saver, i S. Nesimatche, ke era el rensponsable li kalio ke el los pagara, i anke lo topo a S. Benchimol ma non li pudo nada kovrarle por ke non tenija, i de esto foe ke i el tambien lo abandono esto i koanto a la suma de los 16000 fr. ke li tenija dado a el padre sigun ke ja lo eskrivi mas antes, foe ke el los reklamo ma siendo tuvo el menester por gastar en la fragoa de el bezesten li dicho ke los gasto i ke ja tenijan de reglarlo en una manera seja ke li iva azer a su nombre la

1506                  Biografia de S. Mochonatche, kon su ijo S. Behoratche.                     1897

una partida or podija ser i entero i kon el Tchiflik ke lo tenijan en la bana ke se lo podija aserselo a el nombre de su ermano S, Behoratche, i kon esto ke non tuvieran mas de poder buchkar dinguna de la eredad, ke lo restan de loke enpatronava ke podija ser por S. Tchelebi su ijo el tchiko, ma esto nos lo izieron i resto la koza por mas tadre resentarselos, ke lo todo era a el nombre de S. Mochonatche, i por su komando si enkamenava lo todo,

A razon ke S. Nesimatche ja estava en Sofia lo kijo tambien irse i S. Tchelebi a Sofia i para buchkar de empeigarse komo eskrivano en alguna seja banka or kaza de merkansija ke esto lo izo i por los presipios el se estuvo en la kantchelaria de su ermano S. Nesimatche kon ke li pagavan tambien i una tchika paga, i otro lugar non topo, porke li kalija ke estuviera el dija entero lavorando i esto ke su salud non li permetija era ke estava kon su ermano,

El S. Behoratche, ke era solo en Samokov, el lo mas muntcho se iva a el tchiflik de la bana, i se jevava tambien i a su mujer kon sus krejaturas, i se estava el enverano lo mas muntcho ke ja tenija en koalo enbeveserse, el si okupava de los lavoradores i los molinos, i fondo tambien komonita en la bana kon ke lis resento a kada uno a unas siertas tchikas taksas ke pagaran por el sostenimiento de el hazan i ke era i chohet i melamed, i tambien el lokal ande dezijan las tefilod,

1. Mochonatche ke era solo en kaza li era mui pezgado i en las notches non durmija ke era todo al amaneser ke si dormija,

1507                  Biografia de S. Mochonatche, kon su ijo S. Behoratche.                     1897

i ansi era ke si i levantava tambien i komo serka de la medio dija i ala plasa non salija muntchos dijas ni menos ke avrija tambien i la oda, solo ke koando tenija el menester de tomar alguna koza era ke salija, i se estava lo mas muntcho en kaza,

En el anio de 5658, sigun ditcho ke S, Mochonatche era enteramente solo en kaza, ke todos sus 3 ijos eran lechos de el i los gastes ke asija el S. Behoratche, anke non eran mui grandes torna kon todo, li davan kechas i ke si viniera i el a kaza, i ke estuviera kon el padre, sovre esto i el por non refuzarle se rekojo sus kozas, i se foe ala kaza de el padre, ke kon esto ja estuvo mas repozado el padre, i en kaza las mujeres tambien ja si pasavan boenas, ke sus krejaturas ja eran mas grandes i eran repozados, i de ves en koando era ke lo vijitava tambien a sus ermanos en Sofia lo todo ke merava tambien i de rekojer las kiras de las butikas de el bezesten porke avijan algunas ke non lis estavan pagando en regla,

en este tiempo buchkaron para espozarla a su ija la tchika M. Laureta, i esto foe ke aparte ke ja la avijan demandado, unos koantos novios, porke eja era mui ermoza, foe ke lo toparon de mijor a espozarla kon S. Nisim Behar, de pazardjik, ke eran unos mui boenos i rikos merkaderes, i su S. Madre si gusto mui muntcho, de esto i lo izieron el espozorio kon muntcho saltanat, i el novio era

1508                   Biografia de S. Mochonatche, kon su ijo S. Behoratche.                      1898

ke en kada 2 i 3 semanas se vinija a Samokov i se estava kon semanas i el era tambien mui avlador i pasador de ora, ke esto lis plazia muntcho, a todos los de kaza,

Koanto a los 2 ermanos S. Nesimatche i Tchelebi ke estavan en Sofia, sigun ke ja lo eskrivi ke el haver ke tenija el S. Benchimol ke si fujo de Sofia kon ke li jevo tambien i la suma de la moneda, i para azer la buchkida li kalio ke lo dechara el etcho i ke si viniera a samokov, i ansi foe ke sero la kaza de Sofia komo tambien i su kanselaria, i se vino a Samokov ansi de mizmo se vino tambien i S. Tchelebi, i eran todos en kaza, sigun de mas antes, ma S. Nesimatche era mui sikilijado, ke aparte de loke li kalija el solo ke respondiera la suma de moneda ke li jevo el S. de Benchimol era i de esto ke i kedo tambien i sin dingun etcho, ma su S. Padre ja lo konsolava i lo akonsejava, para ke non si foera siklijandose, ke de esto era ke i a el tambien si li enportava mui muntcho, i sigun ke ja lo saven ke era una persona ke non amostrava a el de enfrente por koando tenija algunos atagantos era ke si lo iva solo el englotiendo i era ke non salija i se estava en kaza, englenijandose kon sus livros de los estudios i las gazetas ke ja las resivija kon kada pochta en regla ke si las mandava el S. Naimatche, i tambien era ke ejos ja era ke siempre si korespondejavan i se eskrivijan de todo esto ke lis pasava a todas las 2 partes, i en veses era ke li remitija i algo de moneda koando non topava a ganarse S. Naimatche en Kostan, porke i el tambien era ke tenija bastante de gaste seja por si komo tambien era

1509                   Biografia de S. Mochonatche, kon su ijo S. Behoratche.                      1898

i ke lo sostenija a su ijo S. Ferid, ke el koal en mansevo foe un poko adjami, i el padre ke kerija ke si adelantara i ke non si avregonsara entre los otros mansevos era ke li iva dandole todo loke el lo kerija, ke esto anke ke i el ja lo savija ke non lo azija boeno, ma lo iva ansi pasandolo, fin ke el iva de sujo a aboltar,

1. Chemoelatche, ke siempre era i el tambien ke lis tenija algunas ravias, kon su ermano, ke esto era de loke non li azia esto ke el lo kerija, i en este tiempo tambien ke en su kaza ande ke morava, siendo ke seja ke los temelis foeron etchos al tiempo mas flakos or seja ke las agoas las pasava para los banios ke eran dekontino koriendo foe ke si li torsio la kaza i ke estava en el riziko de derokarse, i ansi ke li kalija ke iziera un kaste [koste] komo de 2 a 3000 fr, i por esto ke el non podija gastarlos, li dava kechas por esto ke al tiempo koando la fragoaron ke non koudijaron tambien i por esto ma el S. Mochonatche non li avlava nada solo ke se vijitavan komo anojados, ke de esto ja estan viendo de koala manera de vidas era ke lo iva pasando, i esto por koalo era kale dizir ke non estavan ejos okupados en dingun negosio, ke non avija en koalo pensar kijendo dizir ke la persona es nasida para non estar en vazio si mizmo tiene su boena pasadija, i de esto akarejan hazinuras, i deferensias entre la familia, ma por koalo era ke a los kavos non buchkaron de entremetersen en koalo foesa, kale dizir ke la persona ke si enbezo en los etchos grandes non si poede endenijar a los tchikos, kalkulandose ke serija bavajadas, koalo lo aran, i enfrentante por koando ja non uvo

1510                   Biografia de S. Mochonatche, kon su ijo S. Behoratche.                      1898

mas koalo azer, i ejos ke non podemos dizir ke eran personas sin konsensia, podija ser ke non tenijan akordo el padre kon sus ijos or ermanos, i pasensiozos ke ja eran muntcho, lo dechavan pasar, i ansi es ke mizmo i agora ainda si esta kamenando en esta edeja, los unos, i ke siendo ja son todos tanto entelejentes es ke ja estan topando a ganarsen i kon ser enpeigados solo ke estan sembrando para el avenir a kontinuar esto i sin poder alkansar el adelantamiento de la Familia

En el anio de 5659, la kazaron a su ija M. Laureta, sigun ja saven ke estava espozada en Pazardjik, i sigun el uzo vinieron konsfoegros i lo izieron sigun de todas las otras bodas mui alegres, i foeron de todas las 2 partes mui kontentes, i la novia ke ja era mui idokada i savida i mui ermoza i achugar i kontado ke ja si jevo bastante, bivijan mui boenos i kontentes i era mui kichta de todos los de kaza, i eja pario una ija, i koando pario el sigundo parto ke li foe mas fortiziko foe ke li kajo la madre de la tripa, i ke anke los medikos si la metieron torna en su lugar, foe todo sin provetcho  i ansi foe ke eja murio de esto ke foe una mui grande manzija para todos, solo ke la krejatura ke ja foe mui bien kudijada es ke ja resto biva, i su marido non si kazo longo tiempo, por kudijar ala krejatura, i ejos si aparentan muntcho, ke lis kedo grande amistad,

1. Nesimatche ke ja estava sin dingun etcho, lo izo

1511                   Biografia de S. Mochonatche, kon su ijo S. Behoratche.                      1899

ke si foe de moevo a kostan i por merar de empeigarse, por razon ke si mizmo ainda li kedarijan algo de moneda se espantava, ke tambien i estas ke las podija pedrerlas, el si adereso ande su Tio el S. Naimatche, por rogarle a ke li avlara a S. Chnur. ke ja era su jerno por ke si lo tomara komo su empeigado para kamenar en la plasa, por prometer ropas ke el ja tenija muntchas fabrikas ke era el representante, ma S. Naimatche lo gritava por esto ke non lo kijo askutchar de koando li dizija por ke non se iziera haver kon Benchimol ke el ja lo konosija de mas antes ke era una persona mui enganijador, i mas tambien ke S. Naimatche se travava muntcho de S. Chnur por ke el era una persona mui foerte i mui raviozo, ke muntcho non si dechava avlar, ma porke era S. Nesimatche li dicho ke ja iva a buchkar una okasion koando lo topara de muntcho boenas umores, i la natura de el S. Naimatche ke ja era por koando lo kargava alguno para azerle el plazer era ke dechava todo su etcho en tal de azer plazer i ansi foe ke el ja topo presto la okazion, para avlarle, i lo izo ke lo resivio kon pagarle a 10 liras de paga a el mez, i denpoes ke ja estuvo algo de tiempo, solo i su mujer ke estava entre Samokov i Sofia, foe ke li eskrivio porke vindiera, dela mobilia alguna partida i lo restan ke lo enpakara i kon la moneda ke iva a tomar de la vendita ke iva a azer ke li foera para el gaste de vinirse i eja ke esto ja lo kerija lo izo ke se vino a Sofia ande la tenija su mobilija i vendio lo mas enportante ke era de una valor komo de 2000 a 2500 fr, por el presio de 20 napoliones, i sin tadrar partio eja por kostan serka de su

1512                   Biografia de S. Mochonatche, kon su ijo S. Behoratche.                      1899

marido, i el ke ja lo sopo, de la etcha ke lo izo, foe mui muntcho sikilijado, ma non li aprovetcho nada, i el ke ja tenija i algo de mobilija de antes i kon de moevo ke merko si resentaron de moevo kaza i lo ivan pasando kon la paga ke el resivija de el S. Chnur, ke esto mas tadre ja li pujo i la paga,

La M. Reginutcha ke ja estava de mas antes devorsada i ke era en la kaza de el Padre, kon su ijo Chimon, era i esto para S. Mochonatche, un grande ataganto i sovre todo esto de Chimon anke ke S. Leon si avija endevdado por darle a el anio al menos 150 fr, por vistir, ke mamtener ja si mantenijan en la kaza de el papu a tiempo ke esto non li tokava a el ma por ke non si estuviera su ija la M. Reginutcha sola era ke lo detinija era ke i esto era kon los mil males ke si los dava, foe en estos tiempos ke li trokaron el nombre de Mr. Leon en Mr. Pavon, ke esto foe muntcho tiempo ke lo jamavan a S. Leon ansi i esto foe lo mas muntcho de koando lo apreto mui muntcho a S. Jomtov, fin ke si lo revato su bien por una bavajada i esto sigun el dizir de sus konijados i su esfoegra de S. Leon ke es la Bu. Riinu, i ke es i tija de S. Leon, i denpoes ke ja enpeso i a su ermano el grande a presigirlo fin ke i a el tambien lo izo foir ke ja son agora komo 20 anios ke esta en marsilia komo kelner por las kavanes i los hotelas, i ansi kon sira a todos los otros, fin ke el S. Lusien kalio ke se iziera krestijano para poder kortarijar i ansi el S. Jeaque ke esta en la amerika en fin todos foendo de un Leon, i el ensima de todos, ke non savemos la verdad, ma a el punto de vista ja

1513                   Biografia de S. Mochonatche, kon su ijo S. Behoratche.                      1899

si veé ke S. Leon lo enpatrona todo, i todos los otros ermanos i mizmo sus madre, es lechos de el i kon todos esta palajado fin a el grado, ke non si akaran i non keren sintir su nombradija, i esto kale dizir ke li viene de el grande ame aresud, solo ke tiene esta spesijalitet, enfrentante a los otros ke todos son estudiados de las mas grandes universitetis, i non si pudieron darsen a entender, es un desplazer ke este eskrito por un miembro de la familija arié ansi un paso en la biografia, ma siendo ke esto es su natura mi kale eskrivirlo para ke sepan komportarsen en okazion,

En el anio de 5660-61, S. Mochonatche era ke de el entodo anpeso a non salir a la plasa, i lo mas muntcho era en kaza i se englenejava, en la goerta, i el kortijo ke estuviera mui limpio, a el li plazija resivir musafires, i los onorava mui muntcho i non li enportava, de gastar para adornar seja la kaza komo tambien i el kortijo, ke en el anio de 5640, koando si apartaron las granisas de la bulgaria kon la rumilija uriental ke uvo una kumision de todas las potensias, i entre ejos uvo tambien i un sierto Mr. Rozé ke el koal vino a Samokov, i estuvo komo musafir el i su kompaniero un sierto Baron____ i lis jamo a unos ke davan representasiones kon las medijas avlas italijanas, i era mui muntcho ke azijan areir, ke esto lis foe mui grande onor, i se estuvieron riendosen fin detenersen los

1514

[riflos]^[17] ke era la manera ke si kortan los nales para los kavajos, i esto era lo todo kon personas ke lis batijan los fieros, i asuplando las lumbres ke ensima los poerpos de las personas kon los endjenios de artifisios, i de estonses ke li kedo la amistad a este S. I en kada anio lis manda bilietos, de el saludamiento de el anio moevo, foe ke el kortijo entero a tan grande ke era la adono todo kon lampikas de kolores, i entre la mas grande partida de las rozas ke estava sembradas en la goerta de la entrada de la poerta de el dichari avli en las unas las telleo, kon varak i en las otras lis metio tchikos fenerikos kon kandelas asendidas, para ke diera la relustror a los varakes ke era mui ermozo i ansi ke si lo rengrasio mui muntcho i li dicho ke el non lo meresija fin a este grado de onores, i S. Mochonatche li dicho ke el ja lo meresija mui muntcho mas ma es ke en Samokov es este karar ke se li poede azer, i denpoes el lo jevo a vijitar en algunos de los parientes, i denpoes si foeron a el manastir de la Rila por el balkan de la rila ke es un kamino mui muntcho pirikoloso i es apenas ke poede pasar kavajo, de las grandes pinjaskos ke avijan ma el lo kijo maksus pasar este lugar por ke el era mui korioza persona, i mui sovidor de kavajo, ke el ja foe akompanijado de muntchos djandares, i amostradores de los kaminos, i el koal foe mas tadre muntchos anios depotado en la kamara de los depotados de Paris i el era de familia mui alta, i mui savida persona, i mui jano, el konosija kaje todas las lingoas ke si avlan en la evropa, el denpoes ke ja lo mando a su musafir, se enbevisija en las foentes i los chadervanes i la kichla ke tenija de envierno era en esto ke si iva enbevesiendose, sin enfastijarse, i por las tadres era ke si asovija

1515                   Biografia de S. Mochonatche, kon su ijo S. Behoratche.                      1900

a su paitan i se kamenava por los kampos, deredor de la sevdad, i el se okupava tambien sigun ke ja lo eskrivi en unos koantos lugares por los etchos de la komonita sovre todo mas muntcho en este de la echkola, i el es ke kale dizir ke si tiene de nombrar sovre esto de la echkola en Samokov i es el mas grande sovenir, para siempre porke foe solo el ke se okopo para avrirla i todo tiempo ke el bivio el es ke la sostuvo anke ke los gastes ja eran algo de la alijansa i algo de la komonita ma non es solo bastante el gastar es tambien i el saverla enkamenar i detenerla, el non si araviava koando li vinijan kontra era ke solo se reiva, i de lo sujo el non si menejava i ansi foe ke i ainda esta, su nature era, de noblez, el non si aravijava, en kaza por nada, i koando avijan algunas deferensias entre la familia el non kerija sentir, i todo loke dizija era esto ke si lo konvengan ejos, el era de la parte de la ikonomija, por si mezmo ma para koando le ivan djente era ke non si li enportava el gastar, li plazia muntcho sintir kantar, porke ja savija i el tambien i konosia todos los mekames turkos, el se vistija mui limpio solo ke alos dijas de su vejes el non topava komo pasaelos [pasarlos] ke el siempre estuvo kon sus foersas ke era mui sano, era el ke koando se vija algo flako ja era ke se azija sus kuras kon ke boiva modos de jervas ke el ja las konosia i se las iva biviendo el non si metio entojos en toda su vida, i su vista non si li akorto, i siempre kamenava mui deretcho, li plazia muntcho mantenerse solo de karne asada, el dolse lo komija mas muntcho, frutas el non komija lo mas muntcho de los pasajes de esta

1516                   Biografia de S. Mochonatche, kon su ijo S. Behoratche.                      1900

biografia era el ke mi los kontava, i non si enfastijava de estar me kontando oras enteras, porke el ja savija i se akodrava mui muntcho i tambien ke el las sentija de su S. Padre, Sus ijos eran ke si okopavan de todos sus etchos ke ejos los tenijan i no lis demandava nada de loke lis pasava, porke mas ja non kijo enteresarse en nada, solo ke koando li kontavan era ke los sentija,

1517

Asta aki si eskapa, la partida de S. Mochonatche, Jeuda Arié kon su ijo S. Behoratche fin a el anio de 5660-61