קורותיהם של בּוּ' בּוּליסוּצָ'ה, אלמנת סנ' דָּוִידְצ'וֹנָצֶ'ה, ובניה חיימָצֶ'ה, לאון ויומטוב

1572

De aki i endelantre si enpesan las

partidas de los ijos de S. Davitchonatche kon

la Bu. Bulisutcha su mujer enpesando de el

anio 5649 fin a el anio de 5660-61.

1573            Biografia de Bu. Bulisutcha kon sus ijos Haimatche, Leon i Jomtov.         1889

En el anio de 5649, ke mas ja non tuvieron a sus padre por kavesera, ejos los 3 ermanos los mas grandes ke son S-es. Haimatche, Leon i Jomtov, vinieron en un lugar, i se detchizaron de ir ande el konsolato en Sofia porke lis nomine opekun i en mizmo tiempo ke lis soltara las kozas ke ejos las tenijan sijadas, i de la kanselaria lis komandaron ke devijan de azer un bilanso, de todo el bien ke lis kedo de sus padre, ke esto lo izieron, i lo prezentaron al konsolato ke el koal lis aparto a todos en igoal parte, i la nomenaron por opekunka a sus S. Madre, kon ke li devijan de presentar en kada anio un bilanso de las entradas i las salidas, i para jevar estos kontos foe kargado S. Leon kon ke li fiksaron tambien i una sierta paga i el koal era ke en kada anio lo azija esto i prezentava estos bilansos en la kanselaria, i por sus S. Madre tambien li fiksaron una sierta suma, ke fin ke lo izieron esto ejos gastavan todos de una bolsa, anke ke S. Leon ja estava en kaza aparte de el tiempo de el padre, i denpoes ejos si apartaron los gastes, i se eskrivian kada uno por si kon ke fiksaron por los mas tchikos a una sierta suma, por ke aparte de S. Leon ke bivija en kaza aparte lo restan era todos ke estavan en una kaza, ejos de el presipio sus dedjizion foe de rekojer sus averes i etchos ke tenijan, i sovre esto kontinuaron ke S. Haimatche si okopava en los mulkes ke los tenijan por afoera, i los S. Leon kon Jomtov era de esto de Samokov, komo tambien i el etcho de la butika de los koeros, kon los gastes ke azijan eran kon

1574          Biografia de Bu. Bulisutcha kon sus ijos S. Haimatche, Leon i Jomtov.       1889

 kontos aparte sovre el vistirsen sus firma ke enkamenavan era esta de sus padre, Josef D. Arié ma S, Leon de loke foe mui kargado de los etchos komo tambien mui sekilijado de la moerte de el Padre, foe en este anio ke iva i el tiniendo el boltamiento de la kavesa, ma ja era koza ke lo estava podiendo somportar, i ansi era ke iva endo en kada dija mas flako, i a esta razon tambien era ke non buchkaron de azer dingun etcho moevo, ejos era solo de sus revenido ke ivan pasando i ja lis era bastante seja por el sujos mantinimiento komo tambien i este de el sostenimiento de sus ermanos i ermanas en las echkolas, sovre todo ke en este tiempo las kiras en sofia ke ja avijan pujado, i ke ejos tenijan en el bezesten komo 15 butikas i de 10 napoliones ke kovravan de mas antes foe en este tiempo ke ja suvieron a 40 napoliones, kon ke lis rogavan para tomarselas,

            Donna sus ermana ke ja estava kazada en Vidin ke lo supo de la moerte de su padre eja si vino a Samokov, kon su entision ke denpoes ke eja ja estuvo algo de tiempo lis demando de sus ermanos ke eja si goedra el deretcho de la eredad de sus padre, ansi de mizmo i por su ermana Rebeka, sin azer dinguna deferensia, ke sovre ejo ejos tuvieron muntchas litigas i algunas deferensias, ma la M. Dona si defendija, porke eja es mui avlistona i liberala, anke ke sus ermanos ja si defendijan kon dizirles ke a ejas ja si lis djo mas muntcho de esto ke lis podra apartener, de koando ejas kazaron, sovre todo kon la M. Donna, ma non sintijan en nada, i por abatir la kistion en este tiempo ejos li dieron algo de moneda a M. Dona i kon esto

1575        Biografia de Bu. Bulisutcha kon sus ijos S-es Haimatche, Leon i Jomtov.     1889

 resto la kistion por mas tadre, i aparte eja lis djo kechas a sus ermanos por esto ke non la estavan bien kudiandola a sus Madre porke eja tambien si akecho ande sus ijas, ke li kargaron todo lo de la kaza i esto de las kriaturas mas tchikas a eja i mas ja non estava pudiendo, anke ke ejos ja tenijan mosas en kaza i aparte tenijan tambien i a un krestijano, ke merava las vakas i mandas ke tenijan, por tomarles la letche de kada dija, ke era de 8 a 10 kilos a el dija, i esta letche era toda para la kaza, ke azijan kaimakes, i batijan por mantekas freskas i koajavan los jagurtes, i tambien los kezos freskos, i bevijan seja los tchikos komo tambien i los grandes en kada manijana los kahves de letche i los dezajunos, i aparte era ke el ditcho moso lis azija todos los emplejos, de la komanija por el menester de la kaza, i los kortijos ke ja eran mui grandes era el ke los barija, el tambien lis sembrava los bostanes i las goertas, ke esto ja lo eskrivi de mas antes sigun de loke eran, i las lenijas ke lis traivan sus karos, de kada dija era el ke las kortava, i en el envierno era el ke lis asendija las sobas de todas las kamaretas por kaentarlas, i el lis prontava las lumbres seja por la kuzina komo tambien i de la kaza, el era ke kudijava por el goadramiento, de la kaza entera, ke el dormija en el dicheri-avli, ke tenija su kamareta, apropiada solo para el i el era ke kudijava en las notches por serarles todas las poertas, de la kae i otras, i en medijo de la notche si era ke afitava, i vinija, alguno i batija la poerta, ke kerija entrar por algun menester, era solo este moso ke la avrija, ke si era

1576        Biografia de Bu. Bulisutcha kon sus ijos S-es Haimatche, Leon i Jomtov.     1889

 ke lo konosija mui bien era ke lo dechava entrar, i komo non lo konosija era ke non lo dechava entrar, ni menos ke lo asija saver alos patrones de la kaza, i si mizmo lo konosija era el menester tambien ke kalija li iziera saver, para koalo era ke lo kerija entrar, i en konvensiendose, iva aser ke iva a ir a dizirselos ke tal fulano, kere entrar, por tala i tala kistion, i si era ke lo alesensijavan era ke lo ivan a dechar entrar, i koando no era ke non lo dechava, i era  ansi estos mosos, ke los tenijan komo goadradores, seja a krestijanos komo tambien i a turkos la familija Arié entera, i kon esto era ejos ke dormijan liberos i sin nada kudijar ke si entiende ke eran tambien i muntcho bien pagados i eran mui konfedentes,

En el anio de 5650, a S. Leon foe ke si li foe ainda mas pujando el boltamiento de la kavesa, ke lo tenija de el anio pasado, i adetras de loke los medikos lo akonsejaron, era ke sin tadrar li kalia ke si foera a viena, porke lo meraran los medikos mas savidos ke ja son en viena, i sovre esto el el pronto i en pokos dijas el partio kon su mujer M. Rachel por ke lo kudijara, i a su ija Loiza ke era mui tchika la decho en moestra kaza para ke nos la kudijaremos, i ke eja ja era de la edad de 3 anios, ke alos presipios ja estuvo boena i mui repozada, ke ja era ke la meravamos i la kudijavamos mas de el menester, ma en pasando unos koantos dijas eja lo

1577        Biografia de Bu. Bulisutcha kon sus ijos S-es Haimatche, Leon i Jomtov.     1890

 enpeso a kerer ala madre, ke era dija i notche jorando, i de todo loke li azijamos era ke en nada non si kontentava, mozotros li merkavamos los modos de los djugetos de las krejaturas, i li traivamos i a otras krejaturas komo de su edad, para ke djugara lo todo para ke ulvedara, i eja era siempre en lo sujo i su vava la M. Beju, era jena de ansia, i espantandose non seja ke si hazenijara, era ansi ke non savija koalo azerle, i koando ja era de notche ke apenas se durmija era ke en medio de la notche si espertava, lo mizmo buchkando i jorando por la madre, i era ke mi levantava i jo, i la tomava en mis brasos i la estava kamenandola por los kortijos i las goertas kon oras enteras i sin kansar i enfastijar, era de esta manera ke lo pasimos los primeros dijas, i mas tadre ke ja foe pasando tiempo, foe ke repozo algo i eramos gustozos de verla sin jorar,

i ejos ke ja estuvieron en Viena, lo izieron ke si aderesaron en unos koantos de los medikos, i los profesores, i todos lo enkorajavan kon dizirle ke ja era koza kuracle [kuravle], i ke non tenija de nada por koalo espantarse, ni menos deskorajarse, por ke a el li paresija ke le iva arevar komo a el padre, i lo rekomendaron porke si foera en unos banios serka de viena, ke son en KALT-LUITGEBEN i ke en estos banios el ke iva a topar mui presto la salvasion ke i ejos lo izieron esto i se foeron kon ke izieron los banios adetras de la komanda delos medikos, i denpoes ke ja los adjustaron i ke ja si topo boenos, ejos si vinieron de moevo a Viena, kon ke si aderesaron de moevo alos mizmos medikos i ejos ke lo examenaron de moevo, lo toparon

1578        Biografia de Bu. Bulisutcha kon sus ijos S-es Haimatche, Leon i Jomtov.     1890

ke ja estava sano i boeno i lo alesensiaron porke si venga a Samokov kon ke li izieron un program de la manera ke si devija komportar fin a un sierto tiempo, i ejos ke ja si vinieron a Samokov, mui kontentes, foe ke mas fin a este tiempo ke esto eskriviendo la dita ke non tuvo mas el boltamiento, de la kavesa, sigun de antes,

kon la butika de los koeros ke el la tenija en esto ke si foe a Viena el si la konfejo a su ermano el S. Jomtov, i el era ke la enkamenava, mizmo i denpoes ke ja vinio de viena, i S. Leon era ke si enpeso a okopar de el etcho en djeneral de lo todo, ke el era ke asija los kovramientos, de sus averes i alkelar las butikas seja de Sofia komo tambien i de Samokov, i las kazas i tarlas i tchaires i mas todo esto ke ejos lo enpatronavan, i en mizmo tiempo el era ke i azija los respondimientos, i las korespondensias, i el sostenimiento, de las kazas, de todos los ermanos, seja los envolsos​ i ansi tambien i los desbolsos, en moneda, en fin toda la admenestrasion era el solo ke la admenestrava, i por lo todo si li demandava de el i el era ke respondija alo todo, i esto li kavzo a resevirselo a razon ke su ermano el grande S. Haimatche, ke estava en Sofia por kudijar, sovre sus mulkes, de Sofija i por algunos i otros etchos ke ejos los tenijan, foe ke mas non kijo vinir a Samokov, i la razon mas grande era porke non bivija tanto boeno kon su mujer, M. Reginutcha, i el si tomo en Sofia a una sierta demoazel komo governanta, para ke lo merara, i se alkelo tambien i una kaza, kon ke la mobelio, i dormijan i se mantenijan todos los 2 kon ke gastava por lo todo el S. Haimatche, i aparte el tambien la vistija, i le pagava tambien i su

1579        Biografia de Bu. Bulisutcha kon sus ijos S-es Haimatche, Leon i Jomtov.     1890

boena mezada, i ansi foe ke los gastes ke asija li eran bastante grandes, i mas ke el S. Haimatche adetras de la kaza i la demoazela i aziendose sus plazeres, era ke non salija tambien muntchos dijas i ala plasa, i de esto era ke lis estava sufriendo i sus enteresos, ke por esta menera de komporto anke ke seja los parientes komo tambien i los amigos ke lo akonsejavan ma el era ke non kirija nada a dinguno sintir, i koando ja salija ala plasa, era ke li tadravan muntcho de eskapar sus etchos, i en este tiempo tambien ke en Sofija ja avijan enpesado a derokar las plasas, kaje todas por el enderetchamiento de la sivdad komo kepetala, para ke foera ermoza, ke por lo todo eran mui bien pagados a estos ke lis derokavan, i kon unos presios mui altos, i los pagamientos tambien los azijan en mui boena regla, lo todo de el gradski Sovet, i a muntchos de estos ke lis derokavan seja las kazas komo tambien i las butikas, si lo kerijan ja era ke i les davan tambien i lugar para ke si fragoaran or komo non kerijan ja era ke lis kontavan la moneda, i entre estos derokamientos foe ke i les derokaron tambien i la butika ke la avijan tomado de el S. Jshakutcho tager, i vizina a esta butika ke avija tambien i una Djami i mas ansi lugares i ke ja eran malo-merno, i ke non lis dechavan fragoar en lugares tchikos, era ke S, Haimatche las foe merkando, i esto kon sus mui boenos presios, de los patrones mizmos, kon ke ja lo alesensijavan de el Gradski-sovet, i de esta manera foe ke adjustaron un tereno komo 150 metros koadrados, ke es en la punta de las ulisas Lege i La Tergovska i por este lugar ejos izieron el plan menesterozo

1580        Biografia de Bu. Bulisutcha kon sus ijos S-es Haimatche, Leon i Jomtov.     1890

i la fragoaron, sigun ke es agora i esto lo izo S. Haimatche kon la kontentes de todos sus ermanos, i gastaron en eja komo a serka de 100,000  frankos,

En este anio li nasio a S. Leon una Ija, ke la pario en su kaza ke ja estava aparte, i li izieron lo todo sigun de todas las paridas, kon la kama alta i los brozlados, i li mandaron toda la Familija los platos de las dulsuras kon los prezentes, i ansi en el dija de el Chabad ke era el dija de Fadar a la nasida por meter el nombre mos foemos todos a komer, i la jamaron SIMHA-ALEGRA, i denpoes ke ja estuvo 8 dijas en La kama, sana i boena seja la parida komo tambien i la nasida, se levanto de la kama i eja su propia madre la krejo i la aletcho, fin ke la desteto i ke ja se kresio,

En el anio de 5651 sus ermano el S. Lusien ke estava en kostan en la echkola de Galata Sarai, foe ke en este anio ja si vino porke el ja eskapo tambien i los estudios i en esta echkola ke denpoes ke el ja estuvo un sierto tiempo en vazio en Samokov, por razon ke para el non avija en koalo ke lavorara, i en koalo ke si enbevesiera, i ansi era ke entre los ermanos S-s Haimatche, Jomtov, i Lusien ivan tiniendo sidutas sikretas, kontra de sus ermano S. Leon en diziendo sovre esto ke si tomo solo el la admenestrasion entera, i el era solo ke respondija alo todo sigun de loke a el li paresija

1581        Biografia de Bu. Bulisutcha kon sus ijos S-es Haimatche, Leon i Jomtov.     1891

 i sin ke si akonsejara kon dinguno de los otros ermanos, a tiempo ke ejos todos tenijan a igual parte, i tambien ke sus ermanos ke lo kerijan en okazion tomar moneda por sus menesteres el lo azia ke non lis dava la kantedad ke ejos lo kerijan, en okazion ke i ejos kerijan saver de sus entradas or salidas, i ke lis demandavan, era ke alos majorentes lis dezija, los livros aviertos estan i ami non kero nada ke mi demandech, i alos tchikos lis dezija, vozotros non soch, kompetentes para demandar dingunos kontos, porke non soch majorentes, ke ansi era ke repoesta adinguno non lis dava, i lo ivan pasando ke de esto lis salija ravias i litigas entre los ermanos, ma S. Leon de nada non kerija ni saver, ni menos ke los sentija, seja a sus ermanos komo tambien i adinguno de sus parientes, otro ke el lo enkamenava sigun de loke a el li paresija, i sus ermanos ke non topavan dingun remedio por reintchir sus kerensia, era ke lo dechavan i lo ivan ansi pasandolo, i se kedavan kajados,

El S. Lusien enfastijado de estarse en vazio, kijo el irse a el ajeno para eskapar sus estudios sovre la medikirija, ke los estudios ke los eskapo en la echkola de galata sarai en kostan foeron sovre este punto, i se es ke lo dechava mas ainda pasar iva aser, lo todo, pedrido seja el tiempo komo tambien i el gaste ke lo izio el en Kostan, i sovre esto ke el ensisto i su ermano S. Leon ke ja si konvensio ke tenija razon sovre esto, i kon la kontentes de Su madre i de sus los otros ermanos, lo alesensiaron porke si foera a Paris, por eskapar sus estudios sovre la medikirija, i en kurto tiempo ke el ja

1582        Biografia de Bu. Bulisutcha kon sus ijos S-es Haimatche, Leon i Jomtov.     1891

 estuvo pronto por partir, i S. Leon ke ja li prometio, i lo asiguro ke ja lo tenija de kudijar, por el sostinimiento, de parte de la moneda, i ke si mizmo non li abastesirija, la kantedad, de moneda, ke el ja tenija de revinido, ke li tenija de toparle el molde, de la manera ke foesa, i ke le iva a remeter, i sovre esto tambien el partio, i ja era ke estos estudios de la medikirija non le ivan a turar menos de 5 anios, i el partio de Samokov akompanijado de su ermano S. Leon, i vinieron a Sofia por tomar pasaporto, de el konsolo franses i kon algunas kartas de rekomendasion ke si jevo tambien el ke ja arivo en Paris, i se entro en la akademija, de paris sovre el estudio de la medikirija, i enpeso a kontenuar, ke alos presipios, li mandavan a 150 fr, a el mes, ma mas tadre siempre li foeron pujando los gastes, fin ke li arivaron unos tiempos de non abasteserle sus revenidos, i de esto el tuvo tiempos de grandes krizas, ke anke S. Leon li iva remetiendo ma non li era bastante i ansi lo foe pasando los 5 anios, i en todo el tiempo ke el estuvo en paris el vino solo 3 vezes a Samokov, ma foe una persona mui entelejente ke si gano la depluma de los mas altos grados, fin ke el arivo en este tiempo aser el Chef de la Bonisa Franseza de Kostan, i el su espesialitet la mas grande es sovre la komadresa, ke en kostan lo jaman de las familias las mas grandes i resive por su vijita de ansi komadres de 25 a 30 liras i ansi el tambien es jamado i por muntchas konsultas,

Sus tios S. Mochonatche kon S. Chemoelatche ke eran en Samokov, i sigun ke ja lo saven ke tenijan en hevra el bezesten

1583        Biografia de Bu. Bulisutcha kon sus ijos S-es Haimatche, Leon i Jomtov.     1891

i la jaila, i aparte ejos tambien i tenijan ainda i algunos kontos de reglar de el tiempo de el padre, i S. Mochonatche ke kerija, meter tambien i fin sovre la kistion de su ija M. Reginutcha, ke era mujer de S, Haimatche, i ke non bivijan boenos, i esto era la mas grande razon, de esto ke non venija, S. Haimatche a Samokov, i ansi era ke todas las litigas ke si lis rebivija eran solo esto de la M. Reginutcha, i ansi era ke lis restava siempre dekolgado, i lo todo era ke de todas las 2 partes, era ke alkelavan i kovravan i siempre ja vinija a ser ke de la una parte enkasavan a mas muntcha suma, i ansi era i kon la jaila, i koando avijan de pagar dasios, era ke vinijan en un lugar, para merarsen kontos, i pagar los dasios, i algunas reparasiones tambien ke ja avijan, i lo mas muntcho era ke lis salija el etcho a pleitos, i restava ansi fin ke de la una parte, podija azer los enkasos mas grandes, i lis kalija ke pagaran seja los dasios komo tambien i las reparasiones kada partida sigun de la suma ke lis apartenia, por razon ke ejos todos, ja tenijan dado sus deklarasias, por kada uno su parte ke lo enpatronava, i se pagavan kada uno su parte de esto ke li revinija,

El S. Jomtov ke era ke si okopava en la butika de los koeros, i toda entrada i salida ke avija si lo entregava, a S. Leon ke esto el lo kerija enteramente el solo enkamenarlo ma su ermano no lo alesensiava, i S. Lusien ke ja era en paris era ke kontinoava en sus estudios i de kontino le iva demandando moneda seja por las taksas de la echkola komo tambien i por merkarse livros i otras kozas, ke li eran de primura i su ermano era ke li iva remetiendole, i kon

1584        Biografia de Bu. Bulisutcha kon sus ijos S-es Haimatche, Leon i Jomtov.     1891

los otros ermanos los mas tchikos ke eran S-es. Jsrael i Jeaqe era ke kontenoavan las echkolas, en esta de Samokov de la aliansa jsraelid ke sovre estos ultimos 2 ermanos, en mitiendo atansion en sus nombres viene aser ke si nombran de un mismo nombre, en saviendo ke JAAKOV MOESTRO PADRE si jamo tambien i Jsrael kijendo dizir ke es uno i mizmo nombre, i esto non mos kale dizir ke non lo kalkularijan i por koalo lo arijan ansi non se koanto a sus madre i Reginitcha, ke eran en kaza ejas si pasavan mui boenas, ansi tambien i sus ijas Rachel, Furtune, i Ida, ke todas ejas kontinuavan las echkolas, i de ves en koando sus S. Madre se li iva ande su konijado el grande S. Mochonatche, i se li akechava, por sus ijos ke non la estavan bien merandola i ke non li davan paras por su djep hachlik, i tambien ke non la vistijan sigun de loke premija,

En el anio de 5652, S. Jomtov, se espozo kon M, Rachel ija de el S. Chelomo A. Tager de Sofia, ke es ija de la Bu Reinu ermana de el S. Davitchonatche, i se konvenieron ke le ivan a dar de kontado i por achugar 20,000 fr. i en este mizmo anio izieron i la boda, i los kiduchim los dieron en Sofia, ke non kijo S, Jomtov en Samokov por non azer gastes, i kon 3-4 dijas mas antes si foeron de Samokov, su S. Madre djuntos kon S. Leon i M. Rachel i M. Reginutcha, i se abacharon en el hotel i el S. Jomtov ke ja estava de mas antes en

1585        Biografia de Bu. Bulisutcha kon sus ijos S-es Haimatche, Leon i Jomtov.     1892

Sofia, foe ke dieron los Kiduchim, i denpoes de esto lis djo un dine en el hotel de panah, i gasto 600 fr, para este dine, i en akel mizmo dija partieron el novio kon la novija i se foeron a Viena, i les turo este vijaje, komo a 2 mezes, i se merkaron muntchos vistidos i mobelias, i algunas djojas, porke la novija non se izo la achugar antes de kazar, i esto ke ja lis era kondision ke devija de azerle la achugar de la suma de el kontado ke tomo, i mui kontentes de sus vijaje ejos si vinieron a Samokov, ala kaza grande ande todos ejos ke bivijan djunto kon su S. Madre i eja la novija, siendo ke ja vino prenijada de este vijaje, era ansi ke non si okopava en nada de la kaza, otro ke a eja la kudijavan todos i su esfoegra era ke la kudijava mas muntcho de todos, i non la dechava ke si okopara en nada de los etchos de la kaza, i eja era ke si pasava kon todos los de kaza mui boena, i kon la suma de la moneda ke li resto de el kontado era ke si la negosijava el por si aparte, i S. Jomtov si foe de mizmo a la butika de los koeros i kontinuava en esto.

El S. Haimatche ke era siempre en Sofia, el era ke no vinija a Samokov, i la kaza ke la avija avierto en Sofia el kon su governanta, la detinija i iva tambien i gastando sin konto, i el era ke si okopava tambien en los etchos ke tenijan en Sofia i sus korespondensias lis era en boena regula,

I en Samokov era de mizmo sigun de los otros anios ke S. Leon lo enkamenava alo todo, i de mizmo a s. Jakim era ke le remetija siempre por todo el menester de el sujo sostinimiento en paris

1586        Biografia de Bu. Bulisutcha kon sus ijos S-es Haimatche, Leon i Jomtov.     1892

ke estava estudiando en la akademija i tambien era ke kudijava por el sostenimiento de la kaza grande ande era ke estavan todos su ermanos i madre, ke los gastes non eran tanto grandes era ke se ivan de la parte de la ikonomija, i luksos de el entodo non azijan ke era lo todo kon grande konto, i de esto tambien tenija kechas, ke el ja si merava para si en sus kaza,

En este anio li nasio a S. Leon un ijo, ke su madre lo pario mas foerte i esto por ke el nasio grandino, ma dopo unos koantos dijas eja ja estuvo Sana i biena, de foe ke si li izo la kama alta, kon los brozlados, i la vijitaron la sivdad entera, i tambien todos los parientes li mandaron los platos i los prezentes de uzo, i seja el Chabad komo tambien i en el dija de el birkad mila konbedo ala sivdad entera a la seuda de elijau anavi, i lo jamaron DAVID a el nombre de su papu el S. Davitchonatche, ansi de mizmo en este anio li nasio tambien i a S. Jomtov una ija i la pario en la kaza grande ande bevijan todos djuntos, i kon eja si li izo de mismo sigun eskrito de mas antes, ke vino su S. Madre la Bu. Reinu de Sofia i li trucho muntchos presentes seja para la madre komo tambien i fato ala franka para la nasida i la jamaron REINA-OLGA, al nombre de su vava la Bu. Reinu. i denpoes ke estuvo ainda unos koantos dijas denpoes ke ja si levanto de la kama la parida i ke ja estuvo Sana i boena eja si foe a Sofia i todas las 2 madres ke parieron ejas mizmas los krejavan i los kudijavan, mui sanas i mui boenas,

En este anio tambien ke la Bu. Bulisutcha sus S. Madre

1587        Biografia de Bu. Bulisutcha kon sus ijos S-es Haimatche, Leon i Jomtov.     1892

 kijo espozarla a su ija la S. Rachel, i sus ermanos ke si korespondejaron kon S. Behor Aronovitch, un inieto de H. Behoratche de Tchelebi aron de Sofia, i por vinir en un akordo, el kijo vinir a Samokov seja por ver ala novija, seja tambien i por algunas konvesiones [konvensiones], i de todas las 2 partes ke ja estuvieron por azerlo esto foe ke el si vino a Samokov akompaniado de sus amigos, i lo resivieron en sus kaza, i denpoes ke el ja estuvo unos koantos dijas, i se amaron kon la novija, lo izieron el espozorio kon muntcho saltanat, i tuvieron a muntchos kombedados, i li dieron de kontado 180 napoliones, i achugar a sus onor, i el novio li djo muntchos presentes ala novija, i denpoes partjo el novio kon sus akompanijadores, mui kontente, i mientres ke ejos estuvieron espozados el novio siempre li mandava presentes la novija, i en algunos de los moadim era ke vinija tambien el novio por li vijitar a su novija, i ansi tambien era i de parte de la novia tambien era ke li mandavan seja dulsuras komo tambien i presentes a el novio sigun el uzo de akel tiempo,

En el anio de 5653, uvo unos muzemirlikes^[10] sovre el besesten ke era Vakuf, i de el gardski sovet de sofia li demandaron los dukomentos ke los presentaron ke para azerlo esto ejos sufrieron muntchos apretos i lo todo era por vija de el konsolato fransez ke los protejava mui muntcho, ke la entesion de el gradski sovet era para

1588        Biografia de Bu. Bulisutcha kon sus ijos S-es Haimatche, Leon i Jomtov.     1893

enpatronarse el de este lugar tanto boeno, ke sovre todo en este anio ke ainda suvieron tanto las kiras, i esto seja de los derokios ke kaje ja avijan derokado komo la sivdad entera i aparte ke ivan i viniendo muntcha djente seja de la makedonija komo i tambien i de la bolgaria entera por estabelisersen en Sofia i las butikas eran mui muntcho demandadas, ansi era i kon las kazas, ke el ke tenija 3 or 4 kamaretas para morar el kon su familija foe en este tiempo ke ejos los patrones de las kazas se enkachavan solo en la una kamareta i las otras las davan a kira ke resivijan por kada borako de kamareta a 40 i 50  fr. a el mes de kira, i siendo ke el gradski sovet non podo reintchir su dezejo era ke los iva apretandolos por ke lo derokaran komo opasnost^[11], i ke devijan de fragoarlo sigun de el plan ke ejos le ivan a darles i esto tambien lo foeron siempre prolongando,

La S. Rachel ke estava espozada foe en este anio ke el novio lis demando boda, i kon la kontentes de todos sus parientes ejos fiksaron el tiempo por azer la boda, i por azer la achugar foe ke S. Leon si foe a kostan i li izo la achugar a detras de la nota ke ejos todos la izieron, i para azerlo esto li kalio ke estuviera en kostan komo un mez de tiempo, i la trucho ke estuvo seja la novija komo tambien i sus djenetores mui kontentes, i en el tiempo fiksado vinieron konsfoegros de Pirot por tomar ala novia, i enkolgaron la achugar, sigun el uzo de akel tiempo, i kon muntcha kontentes de todas las 2 partes, se alegraron aki en Samokov, i en vijitandolos todos sus amigos i parientes, i partieron de aki kon muntcho gusto i

1589        Biografia de Bu. Bulisutcha kon sus ijos S-es Haimatche, Leon i Jomtov.     1893

 alegria, i la izieron la boda en Pirot, kon muntcho saltanat, i todas las onores meresientes, i de todas las 2 partes mui kontentes se vinieron a Samokov, i los moevos kazados biven tambien mui kontentes i se aman de todas las 2 partes i mas tadre ejos si apartaron de la kaza de el padre, i bivieron en kaza aparte, i el S. Behor lavora por si mesmo, ke mas tadre ejos si lebantaron a Nich, i ainda pasando algo de tiempo ejos si vinieron a Filibe, i se estabelisieron en filibe, ke en akel tiempo si avija ido tambien i S. Jomtov a filibe i mas tadre ke ja si foe tambien i su esfoegra la Bu Bulisutcha kon su ija M. Rebeka, i se tomaron kaza todos djuntos i bivijan en una kaza a un komer i bivir, kon ke si konvinieron kon S. Behor ke li pagavan ejas una sierta suma por el mantinimiento i el la governava, la kaza ke para la Bu. Bulisutcha era ke li davan tambien sus ijos i aparte la suma de moneda ke li era el menester por vistirse i otros gastes, i la M. Rebeka ke ja tenija su revinido de su moneda ke eja tenija kon ke si la tenijan sus ermanos, ke koando non li abastesija era tambien i para eja ke li adjustavan, sus ermanos i la M. Rachel pario una ija Olga, ke la pario a el sigundo anio ke kasaron,

Kon la kaza ke ejos la tenijan en Kostan siendo ke los kiradjis ke moravan en eja non la kudijaron foe ke tuvo el menester de una mas grande reparasion, i las kiras tambien ke non lis foeron pagando en regla, ansi era ke non lis estava traendoles ni los mas tchikos enteresos, i los dasios ke pagavan a el governo turko tambien ke lis eran grandes, foe ke sus S. Tio S. Naimatche, ke

1590        Biografia de Bu. Bulisutcha kon sus ijos S-es Haimatche, Leon i Jomtov.     1893

ja estava en kostan, i ke era el ke si okopava sovre esta kaza, kon ke li pagavan tambien i a el aparte, el lo topo de mijor por darle para echkola, de los gregos, i ja era la kira mas grande, i kon sus kontentes si las djo alos gregos ke uvieron komo a 300 elevos i la kira tambien ja era ke si la pagavan en mijor regla,

S. Jomtov ke morava, en la kaza grande djunto kon su madre i sus ermanos i ermanas, foe ke en este tiempo ejos enpesaron a tener algunos dezakordos, seja entre las mujeres en kaza kano tambien i kon los ermanos en la plasa, i ansi era ke non estavan pudiendo bivir repozados, i S, Jomtov kijo apartarse de kaza, ma su etcho kon los ermanos non lo tenija reglado, ke lo todo lo enkamenavan en una masa [mesa], i S. Jomtov se iva a Sofia i se akonsejava kon sus konijados, S-es. presjadutcho i Ezratche, tagar, i les rogava porke kudijaran por el i ke lis toparan un molde, para poderse apartar seja de kaza komo tambien i de el etcho, kon ke li dieran a el su % de esto ke li revinija de la eredad de su padre, ke el non iva a poder bivir ni menos lavorar djuntos kon sus ermanos, i sovre esto ja era ke sus konijados muntchas veses si li aderesavan ande S. Leon, sovre esta kistion, ke de el koal dependija todo, arazon ke era el solo ke lo enkamenava a todos sus etchos, i S. Leon ke lis asija saver kon muntcho repozo a estos ultimos, ke era enposible en estos tiempos, de azerlo esto, ke lo demanda el S. Jomtov, en kontandoles tambien sus modos de las razones, i el S. Haimatche ke era en Sofia foe ke i el enpeso a irle kontra de su ermano el S. Leon, sovre todo ke el mas ja non kijo

1591        Biografia de Bu. Bulisutcha kon sus ijos S-es Haimatche, Leon i Jomtov.     1893

enteramente, okoparse, de el etcho ke el lo merava, al menos en Sofia ke anke i esto era ke S. Leon non pidrio el koraje, i era el ke iva kuriendo tambien i por esto, mizmo ke el travava, mui grandes apretos i arivava en muntchas krizas por moneda, ma ja era ke lo todo lo sonportava kon grande pasensia, i azija todos los moldes para akomodar seja los pagamientos, komo tambien i los kovramientos, i por todos los otros respondimientos, sin kansarse i non tomava los konsejos de dinguno, por nada ke el era solo en el konsolato ke si akonsejava,

En el anio de 5654, sigun ditcho ke S. Jomtov, ke non estava mas pudiendo bivir en la kaza kon toda la familija, foe, ke el si konvino kon S. Chemoelatche su Tio, por irse a su kaza i kon komer tambien en su meza i por morar en su kaza, kon ke li djo una kamareta, por si aparte, i ke podija servirse tambien i de la kamareta de vijita, i ansi mas de algunos i otros lugares de la kaza, por en el kavzo menesterozo, i li pagava por lo todo a 120 fr. a el mez i sin tadrar el si rekojo su mobilija, ke el ja la tenija partikular ke si la avija merkado de viena por una kamareta komplet de durmir, i de kaza ke ja li dieron algo de la mobilija ke ejos la tenijan en kaza, komo tambien i los menesteres de la kozina, lo todo si lo jevo ande S. Chemoelatche, i en este tiempo kijo tambien i ke li dieran i algo de las platas, komo tambien i de la djoja, i ansi lo mizmo foe

1592        Biografia de Bu. Bulisutcha kon sus ijos S-es Haimatche, Leon i Jomtov.     1894

ke i S. Haimatche lo kijo, i li dieron tambien i a el seja de las platas komo tambien i de las djojas, i el S. Leon enfrentante ke ja tomaron los otros ermanos el non lo demando porke i para el tambien ke si li apartara, anke ke ja estava i el en kaza aparte, i el S. Jomtov denpoes ke ja resivio, seja la mobilija i las platas i la djoja ke li dieron de kaza el kon su mujer i su ija olga, si foeron ande el S. Chemoelatche, i estuvieron djuntos, komo a 2 anios ke pasavan mui boenos i mui kontentes, de todas la 2 partes,

Koanto a sus negosios de la plasa eran todos en djuntos, i S. Jomtov era ke kontinuava, en la butika de los koeros, i S. Haimatche, sigun ditcho ke non kijo mas okuparse, de sus etchos, era de mizmo ke estava en Sofia, i lo pasava lo mas muntcho en kaza, i kon las platas i las djojas, ke el tomo, si las trucho a Sofia, iva gastando sin konto, ke koando non podija enkasar de sus revinidos, se prevalija de la plasa kon entereso, para gastar, i S. Leon era ke iva koriendo, seja en Samokov komo tambien i en otros lugares en djeneral, i kudijando por respondia i a lo todo,

Kon el etcho de el bezesten, de Sofia, foe en este anio ke los apretaron de el gradski sovet, porke lo derokaran, kon ke lis fiksaron katigorikamente, un tiempo por en kavzo ke si ejos non lo derokaran, ke lo tenijan de azerlo esto ejos, sovre ejo tuvieron muntcho a kudijar, i era ke tenijan adjuntas muntchas vezes kon sus Tios, S-es Mochonatche, i Chemoelatche, por razon ke el patronage de este bezesten era la metad de los desendientes de el S. Davitchonatche

1593        Biografia de Bu. Bulisutcha kon sus ijos S-es Haimatche, Leon i Jomtov.     1894

i la otra metad de sus Tios S-es mochonatche i Chemoelatche, i en kada adjunta ke ejos las tenijan ja era ke siempre lis salija kistiones de las deferensias, de siempre, i ansi era ke non si konvenijan i saviendo ke nunka si tenijan de konvenir foe ke si foe S. Leon a Sofia, i se konvino kon unos dulgeres kon un presio mui karo, para ke lo derokaran, por razon ke esta fragoa era mui vieja, i era fragoado dizen de el tiempo, de los latinos de koando enreinavan en la Bulgaria, i ke era mui foerte para derokarse, i komo pasando un sierto tiempo ke ja foe derokado, i alempiado, foe ke resto ansi sin ke lo fragoaron algo de tiempo, lo todo porke non si konvenijan seja por fragoarlo djunto or seja i apartarselos, ke alos kavos foe ke si lo apartaron i se lo fragoaron kada uno por si.

Visto ke el bezesten ke ja estuvo derokado, i los revenidos ke ejos los tenijan ke ja lis foeron tambien mas pokos, era ke lis kalia tambien ke izieran i la ikonomija, en los gastes, i en mizmo tiempo si lo izo saver, i a S. Jakim, ke estava en Paris estudiando sovre la medikirija, porke i el tambien ke iziera ikonomija i tambien ke non li iva a poder remeter por endelantre, sigun de loke li remitija de mas antes, i el S. Jakim li respondjo, ke aparte de loke non podija nada azer de ikonomija era ke a el le ivan a ser menester ainda mas muntcha, moneda, por razon ke estava en los kursos mas altos, i siendo ke ja li eskrivio ansi foe ke el si penso de toparse un molde, por kontinuar, i en este tiempo, ke S. Presjadutcho Tatcher ke estava en paris, el si penso de demandarle porke li avansara

1594        Biografia de Bu. Bulisutcha kon sus ijos S-es Haimatche, Leon i Jomtov.     1894

una sierta suma kon pagarle los enteresos, i esto ke el ja lo izo de enkontrarse en un sierto resturant, i denpoes ke ejos ke komieron i kon la entision ke non li iva a refuzar porke ja eran i primos ermanos, el li demando esto i S. Presijadutcho li dicho ke ja podija ser i ke li iva a poder darle por sostenerlo fin ke eskapava sus estudios, solo kon una kondision ke komo atchetava a ser su jerno, kon ke si espozara, kon su ija Rebeka ke ja la konosija mui bien, i S, Lusien ke ja la konosija i ke ja le iva a dar i moneda, foe mui gustozo i li atcheto, a su propozision, i sovre esto ejos izieron todas las formaledades, de el espozorio, i se dieron por eskrito de parte a parte, ke S. Presijadutcho se uvligo, a sostenerlo kon moneda fin ke eskapa, sus estudios, i el S. Jakim se uvligo a kazarse, kon su ija Rebeka, denpoes ke eskapa sus estudus, i es ke estuvieron espozados, i el S. Presjadutcho era ke le iva remetiendo moneda en kada tiempo ke li demandava, i en un enterval de serka 2 anios, alkanso a remeterle S. Presijadutcho, una suma de serka 3500 fr, ke i S. Jakim en este tiempo ja era i ke resibija, tambien de loke le iva mandando i su ermano S. Leon, de Samokov, i denpoes de esta suma ke S. Jakim li demando ainda mas por ke li remetiera, su esfoegro, adetras de su kondision ke ejos la tenijan, i foe ke su esfoegro li respondjo, ke el loke le iva a poder mas remeterle iva a ser, komo si kazava de agora, kon la kundision ke el ja si podija ir torna a eskapar sus estudios, i S. Jakim ke non li atcheto a esto, adetras de sus kondision ke a S. Presijadutcho, li paresija ke el S. Jakim non se iva a kazar

1595        Biografia de Bu. Bulisutcha kon sus ijos S-es Haimatche, Leon i Jomtov.     1894

 kon su ija Rebeka denpoes ke iva a eskapar sus estudios, por alguna razon, i tambien ke S. Presijadutcho lo pensava, ke si non lo azia esto non iva a poder topar otro remedio, por eskapar sus estudios, ke kale dizir ke S. Presijadutcho izo jero en esto, por razon ke adetras de la grande amor ke tenija S. Jakim aparte ke non lo iva azer esto era tambien ke non le iva aser i onor, i tambien ke era ke a el li mankava poko el tiempo para eskapar sus estudios, ke ja era koza ke ja podija topar el molde de la moneda, i sigun de loke ja foe ansi i ke ja topo, i la repoesta ke li djo el S. Jakim foe framkamente en diziendole ke si enkavzo adetras de sus kondision se non lo reintchija ke iva aser i el forsado de azer lo mizmo, ke pasando unos koantos dijas i ke non resivio, la suma ke el la demando lo izo ke si konvino kon sus ermanos, i toparon el molde de la moneda, i kontinuo fin ke eskapo, i denpoes ke ja vino a Samokov, el lo izo ke li pago a S. Presijadutcho la suma ke li tenija remetido kon sus enteresos,  i ansi se espartieron i se bozdejo el espozorio,

S. Jsrael sus ermano el Sinkeno ke i el ja avija en este anio eskapado, la echkola en samokov, demando ke i el si keri ir irse, a el ajeno por estudiar sovre el engener, ke esto lo decharon para examenarlo mas tadre, arazon ke era algo flako, i non savijan si era ke lo podija somportar, ansi estudios ke son mas foertes i ke demandava mas muntcho tiempo,

1596        Biografia de Bu. Bulisutcha kon sus ijos S-es Haimatche, Leon i Jomtov.     1895

En el anio de 5655, El S. Jomtov, non kijo mas okuparse de la butika ke ejos la tenijan de koeros, otro ke el kijo espartirse i tomar su parte, de esto ke li revinija, i lavorar solo por su konto, por razon ke non si avenija kon su ermano, i ke eran tambien kontra de edejas, ke visto a esto ke non la kijo mas enkamenar la ditcha butika, de los koeros, si la tomo S. Leon sovre si, para el enkamenarla, i en la butika ke ja estava mui manka de los artikolos si foe el mizmo a S. Leon, a Varna i Rustchuk, i merko una grande partida de estos koeros i otras kozas, ke lo demandava la butika, i los trucho a Samokov, i los iva vendiendolos, seja en Samokov, komo tambien i en otras sevdades, i los kazales, i ansi lo izo ke mas tadre si foe tambien i a Kostan, por ansi empleos, i de esta manera, le foe endo avante esta botika,

El S. Jomtov, era ke si okupava en su etcho partikular kon su moneda ke la tenija tomado de el kontado, i en este tiempo el se iva a Sofia ande sus konijados, por akonsejarse, de koala manera si podija mas presto desbarasarse, de sus ermanos, por razon ke non si estavan konviniendo, i sus konijados, ke ja tomaron en mano las reklamas de el S. Jomtov, foe ke si enpesaron tambiem i ejos mas muntcho a enteresarsen, i en mizmo tiempo era ke tambien si enteresavan i sus tios, i los otros miembros de la familia, para ke S. Leon su ermano, atchetara a entrar en alguna konvension, por denpoes aderesarsen ande el konsolo, i esto lis turo este anio entero,

1597        Biografia de Bu. Bulisutcha kon sus ijos S-es Haimatche, Leon i Jomtov.     1895

 koanto a el S. Haimatche, sigun eskrito mas antes ke non estava kiriendo saver, mas de nada, ni menos enteresarse a saver, or kudijar por el enderetchamiento de algunas deferensias ke las tenijan kon alguna djente, por ke el ja estava mas al koriente, de todos los etchos era un desplazer de esto ke estuvo retirado enteramente de todos los puntos, i el era ke si estava merando solo sus plazeres, i tomando moneda de los bankeres de la plasa, de sofia kon entereso, i iva gastando sin mas nada pensar atras, ke al menos si era ke ja estava espartido de sus ermanos, i si era ke tenija fin a un grado, sus kontos i su vida reglada, ala ora kon todo ke tambien non era deretcho, de ansi komporto, ma ja si podija dizir, ke en pasando tiempo, ja se iva a repintir, i de esto ke lo estuvo aziendolo, i ansi es ke kale dizir ke li vernija alguna lukura, fin ke arivo en un grado, sigun de loke lo vo a eskrivir mas adelantre, koando si espartio, de sus ermanos, los sufrimientos ke el los sofreo, i ke los esta i sufrendo,

Sus S. Madre la Bu Bulisutcha, amava mas muntcho a S, Haimatche, i S. Jomtov, ke de los otros sus ijos, i eja era siempre ke dizija ansi, (lo adjidejo muntcho a Jomtoviko, ke Leon lo va a dechar enteramente vazio,) i eja ke non si enteresava, de el entodo por koando los ermanos sus ijos, tenijan algunas deferensias, seja por ke non la sentijan or ke non li konvenija, ansi de mizmo era i por koando tenijan i las deferensias i kon sus tios, era ke lo azija ke los dechava, por ke lo komportaran sigun ke ejos lo kerijan, eja era ke si okopava solo de la kaza, a detenerla mui limpia, i kudiar por

1598        Biografia de Bu. Bulisutcha kon sus ijos S-es Haimatche, Leon i Jomtov.     1895

sus krejaturas las mas tchikas, ejas goadrava siempre la kaza, i non salija a vijitar or pasatiempos, los luksos non li plazia, i foe siempre mui ikonomioza,

El S. Jsrael ke ja avija eskapado la echkola en el anio pasado, foe ke i el si foe tambien a los estudios a las echkolas de zurik, por estudiar, sovre el injenierlik de pont i de chose, i esto lo izo sin la kontentes seja de su madre komo tambien i de sus ermanos, ke el non kijo eskutchar a dinguno, en diziendo ke el non kere kedar, sin tener algun ofisio, por el sujo avenir, i ke moneda el ja tiene, bastante, para el sujo sostenimiento, de los revenidos de tantos anios, ke a el li apartenijan de su parte, i ke el en el tiempo ke estuvo en la echkola de Samokov, non tuvo algunos gastes, aparte de un mantenimiento, i vistir, ke non era nada, i non li sovija ni el 20 % de sus revinidos, i el ke ja estuvo en Zurik, entro ala akademija, i enpeso a kontenuar en sus estudios, i su ermano el S. Leon, era ke lo kodijava, para abasteserle sus menesteres, seja en la moneda komo tambien i de otras kozas, i tambien siempre eskriviendole kartas en regla,

M. Dona ke ja estava kazada en vidin se vino a Samokov por kecharse ande su madre i sus ermanos, en diziendoles ke eja estava muntcho sufriendo, de su marido i ke non era koza de poderlo mas somportar, i les dizija ke la arondjaron a eja alos lugares lechanos i mas ke non keren nada kudijar por eja, i lo kerija ke li toparan un molde por apartarla de su marido, i vinirse a Samokov, ke de el

1599        Biografia de Bu. Bulisutcha kon sus ijos S-es Haimatche, Leon i Jomtov.     1895

bien ke decho su padre ja si podija i eja pasar, i ke non deven de enpatronar el bien solo los ermanos, i kon ansi modos de los amenazos eja era ke los iva apretandolos, seja a su madre komo tambien i a sus ermanos, i de kontino li dava kechas a S. Refaelatche, parisiendole ke el foe el kavzante, ke kazarse kon este marido, (i a eja non li vinija a el tino la koza ke eja lo izo,) i su madre kon sus ermanos ke non eran de akordo por ke si apartara de su marido era ke i davan algo de moneda i se iva a su kaza,

i S. Lusien ke era en Paris era ke kontinuava, en sus estudios, i los otros en Samokov seja ermano komo tambien i ermanas ivan alas echkolas, i en kaza todos bivijan i lo pasavan boeno,

En el anio de 5656, el S. Jomtov ke lo foe kiriendo por tomarse su parte de la eredad de su padre, foe en este anio ke sus ermanos, kedaron de akordo porke li merkara S. Leon la parte, de el S. Jomtov, i el S. Leon ke ja si kontento tambien por konvenirse ejos izieron un bilanso, kon nombrar los presios de sus mulkes, i de las mas i otras kozas ke ejos les tenijan, i kon ke apartaron la kaza grande de Samokov ande ejos moravan, ke devija de apartener a sus S. Madre, i lo toparon ke la suma ke li podija revinir a el S. Jomtov era komo a 16,000 fr. i S. Leon li dicho ke komo si kontenta el S. Jomtov, a vender su parte por 14,000 fr. el ja si la podija merkar,

1600        Biografia de Bu. Bulisutcha kon sus ijos S-es Haimatche, Leon i Jomtov.     1896

i esto kon pagarselos en ratas, kon ke si azen todas las formaledades de vendita en la kanselaria de el konsolato franses, i el S. Jomtov ke non si kontento a este bilanso, el lo enpeso de moevo a examenarlo kon ke era ke tenijan muntchas litigas i deferensias, i era ke en kada partida azijan muntchas demandas, i estudios, i lo kerija ke el S. Leon se las deklarara, kada partida por si aparte, seja en los enkasos komo tambien i los dezbolsos, i siendo ke esto li era mui foerte, era ansi ke non si avenijan, i se litigavan, ke sovre esto tambien era ke S. Jomtov iva endo a Sofia, por akonsejarse kon sus ermanos, ke ja estava S. Haimatche en Sofia, ansi i kon sus konijados, i aparte el se iva i ala kanselaria franseza ke de la kanselaria era ke en nada non lo ajudavan,

I el S. Haimatche, visto a esto de su ermano ke estava buchkando para apartarse, kijo i el tambien demandar lo mizmo, ma non estava topando el molde, komo i el tambien demandar esto, ke S. Haimatche sigun ditcho ke se avija reterado, enteramente de el etcho ke non kijo mas ni saver ni menos enteresarse por dinguna kistion, otro ke el era solo enbevisido en su kaza, kon la governanta, ke si jamava Tinka, ke koando salija ala plasa, era solo para rekavdar moneda de los averes ke tenijan, or bien kovrar, de las kiras de sus mulkes, i merkarse lo menesterozo para la kaza, i gastar por sus plazeres, ke de esta manera estuvo kontinuando, longo tiempo, i ansi foe ke S. Leon su ermano, viendo el komporto ke si estava komportando, de ir enkasando, moneda de todos los ermanos, i ke si la iva gastando

1601        Biografia de Bu. Bulisutcha kon sus ijos S-es Haimatche, Leon i Jomtov.     1896

solo por sus plazeres, fin a el grado ke ja si avija gastado la suma de toda su furtuna, ke li podija tokar de parte de la eredad, ke visto a esto era ke S. Leon iva mas espeso endo a Sofia, i les iva diziendo a estos todos de ken ejos tenijan de aver, komo tambien i a todos los kiradjis de las butikas, porke non li dieran dinguna moneda, en aziendoles saver por la manera ke si estava komportando, i ansi foe ke mas el S. Haimatche non pudo tomar de dinguno nada de moneda, ke el de mizmo visto a esto era ke non se repentija de su manera de el komporto, i lo azija ke iva tomando de algunos moneda kon los enteresos mui karos, i ansi foe ke en un kurto tiempo ja si li asumo la devda komo a 7000 fr. lo todo gastando sigun de antes, i mas tadre ke ja enpeso a non topar moneda ni kon entereso, foe ke si akonsejo kon su tinka, i konbenaron por ke li reklamara, de S. Haimatche la suma de 3500 fr. komo ke los tenija de aver, i eja ke ja lo izo esto kon la entision para tomar paras i gastarlas torna en djuntos, i eja ke ja tomo el ispolnitelen list^[12], se vino a Samokov, por kovrarlos, vija de el sudeben pristav^[13], i en aderesandose a el pristav i konforme a las leés, foeron ala kaza grande ande moravan todos ejos por serkosteriar esto ke ivan a topar, i ejos ke ja se demostraron ande el pristav, ke S. Haimatche non enpatronava nada de la kaza, es ke el pristav tambien non tiene el deretcho de tokar nada, i se bolto en vazio, de mizmo i la tinka se foe a Sofia, en vazio, i el S. Haimatche visto a esto foe ke enpeso a kamenar kon la kavesa abokada, i vergonsandose de salir ala plasa, porke moneda mas ja non tuvo, i a

1602        Biografia de Bu. Bulisutcha kon sus ijos S-es Haimatche, Leon i Jomtov.     1896

estos ke el lis devija enpesaron todos a reklamarle, sus averes, i non topando mas koalo azer, foe ke se vino tambien i S. Haimatche a samokov, i sigun ditcho mas antes ke S. Haimatche non bevija boeno kon su mujer la M. Reginutcha, se levanto tambien kistion i por esto por meter una fin, ke si enteresaron los ermanos i los parientes, por akomodar i la kistion i de el S. Haimatche, en este tiempo ke ja si estava tratando, por el S. Jomtov, lo tomaron en mano i la kestion de el S. Haimatche, i lo konvinieron kon ke merko S. Leon, la parte de el S. Jomtov por la suma de 14,000 fr. i la parte de el S. Haimatche foe, tambien ke si la resivio S. Leon kon ke pago solo los 7000 fr. ke devija el S. Haimatche en la plasa de Sofia, i para ke se li diera el GET (devorso) a su mujer la M. Reginutcha, li dieron 2000 fr. a su mojer, i para su ijo Chimon se uvligo a darle, a 150 fr. a el anio por vistirse, kon ke la M. reginutcha kon su ijo Chimon devajan de irsen ala kaza de su padre el S. Mochonatche, porke dicho el S. Mochonatche ke el a su ija kon chimon ja las resivija solo por mantenerlos, ma koanto a chimon ke non es uvligado, de vistirlo, ke esto todo denpoes ke si konvinieron, seja kon S. Haimatche, i M. Reginutcha, i S. Jomtov, si foeron todos a Sofia, ala kanselaria de el konsolo franses, i lo izieron todos los dokumentos menesterozos, en la kanselaria, i denpoes todos ejos si aderesaron ande el notarios, i pasaron todos sus mulkes, i mas lo todo, a el nombre de el S. Leon kon kreposten akt,^[14] i aparte ejos se dieron por eskrito, sovre ke mas non lis kada, dinguna reklama de la eredad, i ke es lo todo de S. Leon

1603        Biografia de Bu. Bulisutcha kon sus ijos S-es Haimatche, Leon i Jomtov.     1896

S. Jomtov, ke ja tenija algo de etcho, ke el lavorava en partikular, si tomo una butika, i enpeso a engrandeser, sus negosios, i de kaza ke ja estava de mas antes apartado, lo pasava,

Koanto a S. Haimatche sigun ditcho ke el non tomo, nada, de moneda en mano, foe ke alos presipios estava i el en kaza, kon sus madre, i mas tadre se foe a Sofia, sin saver koalo era ke iva a azer, ke mas non tuvo la kaza ke la tenija en Sofia, i era ke estava por los hoteles,

I la M. Reginutcha, kon su ijo Chimon, si tomaron todas sus kozas, seja vistidos i djojas i mobilias, i mas todo esto ke eja lo enpatronava, i tambien i algunas mas ainda kozas ke eja las, kijo ke non meraron, i se foeron ala kaza de su padre el S. Mochonatche, (los kiridos meledadores ja si lo imajinan komo de ida foe esta seja por eja ke si foe komo tambien la resividura de sus parientes, ke la resivieron denpoes ke ja estuvo kazada komo 20 anios, i ke ja pario 2 vezes,) i lo todo lo somportaron de todas las 2 partes, kon grande pasensia, i la M. Reginutcha mas tadre, era ke si iva muntchas vezes ala kaza de su vieja esfoegra i tija ke ja li era, i dormija tambien muntchas notches, en su kaza, i komijan i pasavan la ora en djuntas, i Chimon tambien si estava kon su madre ande su vava, i koando ja foe mas grande, si li foe ala kaza de su vava, i se estuvo algo de tiempo, kon su vava, ke lo vistijan i lo kudijavan, i lo mandavan ala echkola, i lo detinijan komo a sus otros ijos, ma el padre era ke koando mizmo vinija a Samokov, i ke ja estava i el en kaza

1604        Biografia de Bu. Bulisutcha kon sus ijos S-es Haimatche, Leon i Jomtov.     1896

 non li boltava kara ni menos ke i lo kerija ni verlo, ke muntchas vezes si li aserkava, ma el padre lo arondjava, de delantre,

S. Leon ke ja resto solo, en todo el etcho, kontinoava en su admenestrasion, i kudiando tambien por lo todo, seja por sus ermanos, S-es Jakim i Jsrael, ke estavan estudiando en el ajeno ansi de mizmo i por todos los otros de la kaza,

El en este anio si izo Haver, kon el aptekar de Samokov, S. Robert Goinarev, para fabrikar soda limonata, gaseus, ke esto non avija en Samokov, i entre los 2 si komandaron de el ajeno una machina para esto, djunto kon el menester de los sifones, i todo lo ke era mas de menester, i se alkelaron un lokal para esto, i se metieron en el lavoro, ke esto de la soda era solo por el konto de S. leon ke los otros ermanos non tuvieron parte,

De el S. Jsrael ke estava estudiando en Zurik, enpesaron a resivir, montchas desplazientes kartas, en aziendoles saver ke el estava atakado, de la maladija de la tuberkuloza, i ke ja lo examenaron los medikos, i lo akonsejaron por ke devija mui presto, de tomar las mas grandes mizuras, porke si li espandjo mui foerte, i ejos mui atagantados de meldar ansi kartas, ke i en korto tiempo ja li kavzo i a goadrar la kama, i non saviendo koalo azer, el S. Leon, si apresuro i li eskrivio, i a S. Lusien ke estava en paris, ke siria de irsen todos los 2 a zurik, para merar el molde i ejos si fiksaron el dija de toparsen en viena, por partir djuntos, a Zurik, ke sin tadrar lo izieron esto, i ejos ke ja estuvieron en Zurik, i ke ja lo

1605        Biografia de Bu. Bulisutcha kon sus ijos S-es Haimatche, Leon i Jomtov.     1896

vieron a sus ermano en el grado ke si topava, sus ditchizion foe de traerlo a Samokov, ke i esto sin tadrar, ejos todos 3 ermanos partieron, de zurik, i se vinieron a viena, ke mas adelantre non pudieron viajar, i lo metieron a el S. Jsrael en un senatiorium, i pasando komo a 2 dijas ja foe moerto, i ejos si toparon en grandes apretos de la manzia, ke lis arivo i ansi de mizmo foe i para la familia entera de Samokov, i en viena lo enteraron, kon azerle todas las ultimas onores, i gastaron por esto la suma de 3000 fr, solo por el enteramiento ke aparte de loke ejos gastaron,

El S. Jakim partio de Viena por paris por eskapar su estudios, ke el ja estava en los examenes por tomar el depluma de mediko, i S. Leon se vino a Samokov, i pasando algo de tiempo, foe, ke reklamaron sus ermanos los ke ja estavan espartidos, i sus ermanas porke lis dieran las partes de esto ke enpatronava sus ermano el malogrado, ke i esto ejos los 3 ermanos S-es, Leon, Lusien, i Jeaqe si resivieron ejos todo el bien de S, Jsrael i lis pagaron a todos los otros esto ke lis revinija, i el si avija jamado Marel^[15], ke foe a ona suma de komo a 2500 fr, a kada uno, i esto tambien lo izieron kon todas las formaledades menesterozas seja en el konsolato franses komo ansi tambien i en el notarios bulgar,

1606

Asta aki si eskapa la partida de la Bu.

Bulisutcha komo opikunka i sus ijos fin ke

estuvieron todos djuntos,