חכם רפאל ובנו חכם אברמצ'ה

322           Biografia, de H. Refael A. Arie i su IJO H. Avramatche,          1845

non lis avran la poerta ja enpesan kon ravias, en diziendoles, no podijach, esperar? komo ke ja estach noertos [moertos] por durmir, ke de ansi komportos ja uvo ke era algo nervozo, i ke li vino pezgado lo izo ke kon avrir la poerta i visto a ansi komporto, foe ke lis djo a un boen rempochon a el IJO I a su MUJER, i los keto afoera, i si sero de moevo la poerta, i ejos kalio ke si foeran torna al logar ke ejos estavan, ma esto kada uno non lo poede azer,.

En el anjo de 5606, a H. Rafael li nasio un IJO de la Bu. Mazalutcha, ke lo jamaron MOCHE, i tambien en este anjo li nasio i a su IJO H. Avramatche, i la jamaron Sara, en todas las 2 paridas, lo izieron a kada una sigun de loke lo meresia, ke ja si entiende de sujo ke kon la parida manseva lo izieron kon mas muntcho saltanat, aun kon todo ke la natura de H. Refael sigun ke ja lo savan ke foe siempre mui alegre en esta okasion non foe komo mas antes, ke lo abatio muntcho lo poko de malato ke estuvo, ma ja lo remplaso su IJO porke i el tambien era komo el Padre, alegre, solo ke H. Avramatche gaguejava un poko koando iva avlar, i esto era por el presipio ke enpesava avlar, el poerpo de H. Avramatche era alto i non godro era mui deretcho, era blondo, su barva kurta, i amaria, era mui limpio, i su vistido era al presipio de un chalvar de panio, i una fermela, tambien de panio, i ensima un djube, por el enverano i de un kiordi por el envierno, i mas tadre se vistia de pantalon i djube or kiordi

323           Biografia, de H. Refael A. Arie i su IJO H. Avramatche,      1846

i en su fes ke jevava en la kavesa si atava kon un chami preto al presipio i denpoes si keto i el chami i era solo kon la fes, i de un peskiul kurto, i a los kavos si kirkijava un poko la barva, el era, mui boen suvidor de a kavajo, para koando kavajava, si vistia de potures komo los turkos, i si armava kon su silah, i de boenos plomos i flintas, ke savia kasar pacharos, i otras kasas, i ke tenia tambien i las armas para kasar, i aparte tenia tambien i las redes, para pechkar, el si adjuntava, kon otros ansi kasadores turkos, i se ivan a la kasa, ke non li kostava dingun gaste, i esto lo azia solo por plazer, koando non tenia koalo azer, i en mismo tiempo kantavan i se alegravan i se kontentavan de los plazeres de este mundo,

En este anio ke la kazo Tchelebi Jeuda a su IJA la Bu. Riynu, eran seja H. Refael komo tambien toda la famia en la kaza de la Novia, dias i notches enteras kantando, i alegrandosen, i se lo jevaron tambien i a H. Refael a Sofia a la Boda, porke era el ke savia todos los uzos de las bodas, i el era ke komandava por todo el menester, i a el lo sintian,

Reviniendo a sus negosios, era el H. Refael ke non pudo ir mas tanto a la sus butika, prima era ke ja saven ke non avia eskapado de pagar i le ivan viniendo sus kreditores, a reklamar sus averes i el ke non estovo podiendo responder, era ke si iva ande sus sovrinos ke koando avia algun etcho leviano lo mandavan para ke si enbevisiera ke la paga ja tenia ke li davan en kada djueves, el menester de su mantinimiento, sin ke sufriera por nada, ma H. Rafael en este anio

324        Biografia, de H. Refael A. Arie i su IJO. H. Avramatche,        1846

tambien non era tanto alegre komo mas antes, lo todo era por foersa loke kamenava, i su IJO H. Avramatche, era en la butika, ma eran sus venditas mui tchikas, ke i el tambien era mui deskorajado, de ver sus etchos, fin ke un dija li dicho a su padre, ke ja non keria mas ir a la butika, i ke si kere merar otro negosio, ke sovre esto li dicho azelo komo keres, na ke jo non esto pudiendo azerlo i mas para mi vida non mi kedo, si tenia el molde ju [jo] me iva a Jeruchalaim, ke foe mui grande jero ke mi kazi, ke si es ke estava solo, mizmo kon manos vazias ja mi iva, ma agora, es solo de ir pasando fin ke poedo ser ti se trokara al mazal i tornas etchos mas mijor, todos los dos joraron, i H. Avramatche kontinuo la butika,

en kaza, sus pasar era igoal a los otros anios, i non si azian saver en kaza, de sus puzisiones, ma la ikonomia era muntcha, ejas kudiavan la kaza i sus kriaturas, i se vijitavan siempre entre los parientes sin dinguna deferensia, i se pasavan kon toda la familia boenas, i ejas de mizmo si pasavan en kaza tambien boenas

En el anio de 5607, li nasio a H. Avramatche un IJO, ke foe alegria grande, i kon esta parida tambien izieron todos los uzos ke las azian en todas las otras paridas, i li mandaron toda la familia muntchas dulsuras i presentes, i la sivdad entera la vijitaron i toda la familia, siempre la akompaniaron i en el Chabad i en el

325        Biografia de H. Refael A. Arie i su IJO H. Avramatche,         1847

dia de el Birkad mila lo izieron de todo tchusto [djusto], i al IJO lo jamaron REFAEL, al nombre de su PAPU, es este el S-r. Refael ke si foe a JAFA, kon toda su Familia, i se izo agrekoltor, sigun ke ja van a meldar adelantre, por koala razon si foe i de koala manera lo alkanso su buto, mizmo ke sufrio muntcho,

El S-r. de H. Refael, mizmo ke kontinuava sigun de los otros anios, ma enpeso a ir kada dia mas flako, ke de moevo si li renovo sus maladias, i enpeso a tener sus dolores foertes, fin ke arivo a goadrar la kama, ke de esto foeron la familia entera mui sikiliados i ansi foe ke en el 12 Sivan de este anio murio, i foe para toda la familia mui grande ansia, i todos lo joraron muntchos dias ke trucho mui grande mankansa para la sivdad entera, i la dolor mas grande foe ke todos los 4 ermanos murieron de poka edad, i foeron todos 4 moertos en un enterval de 18 anios, moertos, sigun ke ja lo tengo eskrito mas antes, ke el enteramiento lo azian en el mizmo dia ke murio, tambien a aki li izieron ansi, i seraron el tcharchi entero para akompaniarlo, kon ke los Hahamim i los Hazanim, eran a delantre kantando las endetchas, i el Aron (cercuelio) jevandolo 4 personas en sus plantas, i denpoes sus IJO i mujer i sus IJAS li goadraron el siete sigun el uzo i era kada dia ke li vinian a meldar en kada dia los Hahamim, i toda la sivdad vijitaron a los avelim, i todos sus parientes ke ja eran el dia i la notche kon ke la komania para la kaza entera se prontava ande sus sovrinos, porke en la kaza ande avia AVEL, non si avria kuzina, de mizmo foe ke todo el gaste

326            Biografia de H. Refael A. Arie i su IJO H. Avramatche,          1847

ke si tuvo menester por el enteramiento i de mizmo por el sostinimiento, ke lo izieron ansi fin al mez entero, lo todo foe de 800 groches, i denpoes H. Avramatche si foe de moevo a su butika, ke antes estava, i kontinuava en su etcho, i kon la Bu. Mazalutcha ke kedo bivda, djunto kon sus 2 kriaturas resto en este anio en la kaza de su marido a los kudios de H. Avramatche, i esto ke non li abastisia para el menester de sus mantinimiento era ke li davan sus primos ermanos, en el anio entero, ke H. Avramatche era mui dezasperado, ke sovre ke era ansi lis desplazia muntcho a todos sus parientes, i nunka non lo dechavan solo, ke siempre lo akompaniavan.

Asta aki si eskapa la Biografia de H. Rafael en el tiempo de 16 anios ke lavoro solo i ke murio,

327                     VIDA KONTENTADA

Visto a la vida ke bivio H. Refael es tambien de alavarse, ke la mas grande partida ja la bivio gustoza, i ke topo el molde solo kon pasar su vida kon kantar, ke esto era el plazer sujo i kon esto el ja tuvo tambien todas las onores i los gustos de este mundo, mizmo fin al dija de oi si avla por las koaledades de H. Refael, sovre esto ke era mui alegre persona, i lo poko ke si kanta agora es lo mas muntcho de el tiempo sujo, i moestra Familia koando kantan es enbezado de H. Refael i de sus vinientes,

328

De aki i endelantre enpesa la Biografia de H. Avramatche el uniko IJO de H. Refael A, Arie, fin al dia de su moerte,