חכם אלייָצ'וּנוֹ וחכם רָבֵּנוּצֶ'ה יוסף אריה עד שנת 611

604

De aki i endelantre, si enpesa la Biografia de solo los 2 ermanos, H. Elijatchuno i H. Rabenutcho, ke ejos si governaron

605          Biografia de H. Elijatchuno i H. Rabenutcho Josef Arie en Samokov.       1841

En el anio de 5601, ke H. Elijatchuno ja estuvo kazado i aijado, mas non kontinuo la echkola de el midrach, ke entre sus parientes, lo toparon de djusto de empeigarlo, mizmo kon una tchika paga, porke sigun ditcho ke sus furtuna ja estuvo enteramente eskapada, i ansi foe ke lo empeigaron en la butika de el S-r. H. Davidtchon ke el koal era un grande merkader de ropas de malifaktura, i para ke si embezara, este ofisio, i tambien li pagava a 10 groches a la semana, i H. Elijatchuno ke ja era boen savido i entelejente, li lavorava kon grande atansion, i eran todos los 2 kontentes i de esto ke resivija i algo de sus kapital ke lis avija kedado era ke H. Elijatchuno, si okupava en las merkidas de los menesteres de la kaza i esto si entiende ke lo azija kon grande ikonomija,

            Sus madre la Bu. Revka mas non si mlesko eja en los gastes de la kaza, ke eja estava siempre kamenando sovre la komadres ke esto kada dija si li foe engrandisiendole, i era ke estava ganando, mas muntcho de loke lo esperava, i aparte tambien la jamavan koando avijan algunos hazinos seja krijaturas komo tambien i mizmo ke eran grandes era eja ke si konsentija para darles ajudos lo koal ke i agora lo azen koando non topan provetcho de los medikos, i por esto tambien era ainda mas grande la paga ke li pagavan, eja montchas notches durmija en las kazas seja de las paridas seja de los hazinos i era mui bien detinida, eja era una mujer sana i mui fursuda, ke non si li enportava si mizmo non durmija muntchas notches, i tambien

606                 Biografia de H. Elijatchuno i H. Rabenutcho Josef Arie en Samokov.                 1841

kon el mantinimiento non si li emportava ke eja si mantenija de koalo foesa, i non li azija dingun danio, eja era una mujer, de talia medijana, era jena su vistido era de un chalvar kon ensima un enteri de 3 aldas sigun ke lo jevavan en akel tiempo, en su kavesa jevava un reboso, de chamis de seda, i koando salija a la plasa si metija feredje kon un dimalo blanko, su avla era mui klara i repozada, eja podija platikar kon todos los ombres i non keri ditcho kon todas las mujeres, era eja mizma ke azija las kuras, i eja las merkava de la plasa, en muntchas kazas menesterozas era eja ke lis merkava las kuras, i si etchava en sus kazas sin dinguna paga, i esto seja koando avijan paridas seja koando avijan hazinos, i a este modo de djente lis enkomendava porke la jamaran ke eja non lis kirija dinguna paga i ansi era ke todos la onoravan i la konsediravan.

1. Rabenutcho ke era mas tchiko era el ke estava en el Midrach, kontinuando sus estudios, kon Hr. Avraam Alkalai, i el koal foe ke embezo kaje a todos los aries a meldar ke era una persona mui kapatche para saver embezar, a meldar a la persona de enfrente ke non era kon amenazos or kon harvarlos, solo ke tenija la metoda de saver enbezar,

            En el anio de 5602, H. Elijatchuno ke estava komo empeigado en la butika de H. Davidtchon, kon la tchika paga ditcha

607                 Biografia de H. Elijatchuno i H. Rabenutcho Josef Arie en Samokov.                 1842

de antes i en este anio li demando porke li pujara algo ke era mui poko esto ke li estava pagando, ma H. Davitchon li dicho ke non li podija nada pujarle i komo kerija ke si saliera, i ansi foe ke el lo topo de empeigarse ande un sierto merkader Djidio, ke lo jamavan el Hotenle ke el koal tambien era un grande merkader, de ansi ropas, i si enpeigo por 20 groches a la semana, i este S-r. hotenli era una persona mui boena i era solo ke el koal era de la sivdad Hoten en Rusija, ke non si supo en toda su vida, por koalo foe ke si vino a Samokov ke la djente lo taksavan ke era foido de el askerlik, ke los tomavan en rusija a los djidios i los maltratavan muntcho, este S-r. era riko, i non si kazo, i lo kerija muntcho bien a H. Elijatchuno, si entiende porke i el li lavorava kon muntcha atansion, i era mui akurat i se dolija por lo todo, es esto ke de el presipio lo kijo de ser empeigado, ke kale dizir, por mas kolai, ke esto ja lo tengo eskrito, ke el presipio, li dieron esto i ansi kontinuo fin a este tiempo ke esto eskriviendo la dita, sigon ke ja lo van a meldar mas adelantre, ke mizmo ke lavoro i por su konto unas koantas veses, es ke non pudo reuchir lo todo porke lo tomo de el presipio, esto de ganar solo por kontos de la djente, i el tomarse kortadamente, su ganansia, ke si es ke lo azijan Haver kon alguno otro podija ser ke reuchija mas mijor, i al menos non estava sotometido toda su vida, se ja el mizmo komo tambien i los vinientes detras de el, i kon esta paga ke resivija i algo tambien adjustava i la Bu. Revka de esto ke eja ganava era ke se ivan pasando, ma esto la Bu. Revka non kirija

608                 Biografia de H. Elijatchuno i H. Rabenutcho Josef Arie en Samokov.                1842

mas ajudar para el gaste de la kasa ke lis dicho a sus parientes ke meraran el molde de ande si tienen de pasar, ke eja kere rekojer unas koantas paras, i en un tiempo i eja irse tambien a Jeruchalaim sigun ke si foeron las todas otras mujeres, i por esto li asiguraron ke ja lo tenijan de merar, para resenterlo i por eja,

1. Rabenutcho ke estava en el midrach estudiando foe de mizmo kontinuando, i su natura era sovre mui travado i por lo todo era ke lis iva kontra, i siempre se iva eskondiendo i non salija entre la djente, ke por esto su S-ra madre lo iva gritandolo i se li araviava por ke foera mas avierto, i ke non estuviera eskondiendose, por los kantones,

En el anio de 5603, a H. Elijatchuno li nasio el sigundo IJO, ke de mizmo lo izieron sigun de todas las otras paridas solo ke en este parto uvo una fiesta mas grande, ke sigun el uzo es ke el Sigundo IJO es ke el sandakud, li toka a los de parte la parida, i en este tienpo, ke el padre de la parida estava en la Bosna ke es H. Refael, i el Sandakud komo era sujo foe ke lo keto el S. Behoratche, jshak G. Arie, kon la Bu. Amadutcha su S-ra Madre, por ke S-r. Behoratche ainda non estava kazado, i en el dija de el Berid Tchelebi Gavriel lo izo boda grande, ke kombedo a la sivdad entera i lis djo a komer i muntchos bevrajes i dulsuras, i a la parida li

609                 Biografia de H. Elijatchuno i H. Rabenutcho Josef Arie en Samokov.                 1843

mando muntchos mudos de prezentes ansi de i para el nasido i el moel foe Tchelebi jeuda, ke era poko tiempo ke avija enpesado a azer berid mila, i esto lo kontinuo longo tiempo, porke non avija ken ke foera moel, i Tchelebi jeuda por kada berid ke azija era ke li mandava a las paridas muntchos prezentes i si es ke eran menesterozas lis mandava aparte de los prezentes tambien i prezentes en moneda i la notche de la Chemira se iva el kon ke si jevava i las komidas i komijan en djuntos, i el nomre de el IJO ditcho lo jamaron NESIM, i su propia madre lo aletcho i lo krejo.

1. Elijatchuno era de mizmo ke i en este anio tambien estuvo en la butika de el S-r. Hotenli, i el ja foe entrado en todo el etcho de la butika, i por lo todo ja estuvo al koriente i ansi era ke por lo mas muntcho de el menester de la butika ja lo respondija ma kon la paga era ke kontinuava de mizmo

La Bu. Revka era de mizmo ke kontinuava su ufisio i siempre se li iva engrandisiendo i iva tambien i amontonando moneda i por la kaza ke ja la kudijava la Bu. Bulisu, porke eja tambien era ke konosija mui bien jevar los menesteres de la kaza sigun su esfoegra, i savija de mizmo azer i la ikonomija, ke en akel tiempo non es komo agora ke ai muntcho lavoro en la kaza, eran solas ejas ke lo eskapavan todo mui presto i mui kolai i tambien ke los apetites de este tiempo non avijan era por el envierno ke si rekojijan toda la Familija en una kamareta i durmijan todos en un lugar, mizmo ke foeran 8 i 10 almas i ja estavan todos mui boenos i sanos i mui kontentes, i de mizmo era i kon los pransos ke espandijan una sofra i

610                Biografia de H. Elijatchuno i H. Rabenutcho Josef Arie en Samokov.                 1843

en la mizma kamareta ke ejos ivan a durmir i una plastarija^[7] ensima i la komida ke ja era de las mas levijanas, ejos mui kontentes, si la komijan i se artavan i sigun ke estava la sofra ansi lo levantavan ke apenas era el menester i de barer porke non si enmatakava nada, i por esto ja alkansavan para lo todo.

            En el anio de 5604, ejos lo asaron [pasaron] torna kon la ikonomija, i H. Elijatchuno ke estava en el magazen de el S-r. Hotenli de mizmo li rogo porke li pujara su paga ke non li estava abastando para el gaste, ma non foe posible porke ni el S-r. Hotanli tenija konto de pagarle mas muntcho, i ansi foe ke li dicho porke si buchkara otro personal ke el non iva a poder estar mas, lo todo foe ke sus parientes li dicheron ke lo ivan a azer haver kon algun otro i por adjusto de sus menester era siempre ke si ivan travando de lo poko de el kapetal ke lis avija kedado,

            La Bu. Revka ke mas non si mleskava en los etchos de la kaza porke eja mas ja non tuvo esta ora ni tiempo ke su medkirija si li avija muntcho engrandisido, ke aparte ke la jamavan por las kazas era tambien i ke li vinijan muntcha djente i a su kaza, i a todas eja ja respondija i era una koza maravijoza sigun ke ja lo eskrivi las kuras ke eja lis dava, i todas si sanavan, ke kon esto eja si ganava de 15 a 20 groches en kada dija, aparte de los prezentes

611                 Biografia de H. Elijatchuno i H. Rabenutcho Josef Arie en Samokov.                 1844

ke li traivan seja en komanija ke eran las kazalinas komo tanbien i las sevdadinas, ke li traivan mudos de mudaduras i tchorapes i de otras ansi kozas, i esto ke era de la komanija se servijan para la kaza, ke i esto lis era una boena ajuda,

            kon el S-r. de H. Rabenutcho era de mizmo ke kontinuava en el midrach, i entre este tiempo tambien era ke el azijia los emplejos para la kaza i la Bu. Revka su S-ra madre kijo espozarlo ke ja estava grande, ke ja avija entrado en los 16 anios, i ansi foe ke lo espozaron kon la Bu. Sara la ermana de S-r. Mairutcho, i izieron el espozorio kon muntcho gusto, i lo todo sin enmankar de nada de los otros ansi espozorios koando los azijan,.

En el anio de 5605, sigun ditcho ke H. Elijatchuno mas non kijo estar en la butika de el S-r. Hotenli por esto ke non li kijo nada pujar, su paga, i el S-r. Hotenli ke foe mui bien kontente en su salirse aparte ke li pago, por su djusto todo esto ke tenija de aver, li dio tambien i un boen prezente, i todos los 2 foeron kontentes, i denpoes ke H. Elijatchuno ke ja estuvo algo sin dingun etcho, seja el mizmo komo tambien i la Bu. Revka lis foeron ande sus parientes, ke son Tchelebi Jeuda i sus ermanos Tchelebi Gavriel i Avraam, por rogarles a ke li toparan un etcho ke sigun mui bien ja lo saven ke paras mas ja non lis kedo i de ande

612                 Biografia de H. Elijatchuno i H. Rabenutcho Josef Arie en Samokov.                 1845

ejos ke si poedgan [poedran] mantener non tienon ke ansi es torna ejos ke tienen de kudijar, ke sovre ejo tomaron en mano i lo izieron kon la suja kontentes, de meterlo en la butika ke ejos ja lo tenijan por Haver a S-r. Konorte, el IJO de H. Chemoelatche el Melamed, ke el kapetal ke tenija el ditcho S-r. Konorte ja era sujos i se espartijan la ganansija kontra metad, i kon este mizmo kapital ke estuviera H. Elijatchuno, i la ganansija ke foera enteramente para el i los ditchos parientes en tal ke tuvieran ejos una boena pasadija, non li kijeron dinguno parte de ganansija para ejos, ke lo azijan lo todo por azerlis bien, i seja la Bu. Revka komo tambien i H. Elijatchuno si los rengrasijaron, i en akel mizmo dija ja si foe H. Elijatchuno a la butika, i pratiko de la merkansija ke ja estava, era ke kontinuavan mui bien en sus etchos, i ivan kamenando adetantre,

Los IJOS de el ditcho S-r. Konorte son agora S-res Jeuda i Refael B. Manoah, i el S-r. Jeuda B. Manoah, foe Toda su vida Haver, de mi S-r. Padre Tchelebi Avraam, i mizmo denpoes ke mi S-r. Padre murio foe de mismo Haver kon mi fin a el dija ke si murio i el kapital ke tenija mi S-r. Padre era siempre 10,000 groches, i siempre foe esta suma i las ganansijas ke amostrava eran a penas de 8 a 10% ma ja si kontentava, solo porke si pasara i el,

i kon una semanada ke li fiksaron porke travara en kada semana era ke si la travava, i kon esto se ivan pasando, i ja lis era bastante por tapar sus gastes, solo ke non podija nada amontonar, i esto a razon ke meravan solo a esto, ke mas ja non tuvieron

613                 Biografia de H. Elijatchuno i H. Rabenutcho Josef Arie en Samokov.                 1845

nada de sus moneda ke lis avija kedado de sus padre,

1. Rabenutcho ke estava espozado kon la Bu. Sarutcha, Foe en este anio ke izieron la boda i foe lo todo sigun en todas la otras bodas, sin nada de trokamiento, ejos si gustaron i se alegraron i la Novia ke ja foe mui boena i ermoza i ke trucho tambien muntcha achugar i kontado, si pasavan i se amavan todos sigun de akejos tiempos, la Bu. Revka siempre las akonsejava a todas sus 2 noeras i ejas tambien la sintijan,i H. Rabenutcho era de mizmo kontinuando sus estudios en el Midrach.

En el anio de 5606, a H. Rabenutcho li nasio un IJO ke kon este parto tambien lo izieron sigun de todos los otros i la vijitaron a la parida kon mandarli tambien i todos los presentes de uzo, i en el dija de Chabad i de mizmo en el dija de el Birkad mila ansi i en el dija de el rihmido lo todo lo izieron sigun ke lo azijan en todos los partos i eja su madre propija lo aletcho i lo krio i la komadre foe la BU. Revka su esfoegra,

1. Elijatchuno ke estava en la butika kon el S-r. Konorte, era ke sus merkansija lis iva endo mui bien en regla i de esto era ke si estavan mantiniendo, i seja ejos komo tambien i todos sus parientes eran mui gustosos ke ja si estavan kamenando en sus etchos mijor de loke si esperava, ma por desplazer, foe ke el S-r.

614                 Biografia de H. Elijatchuno i H. Rabenutcho Josef Arie en Samokov.                 1846

Konorte, adeuna [a de una] kajo hazino de una mala manera, mui foerte, sin ke si supo por koalo i en un enterval de mui pokos dijas foe moerto ke esto aparte ke foe roina para sus djenetores foe tambien i mas muntcho para H. Elijatchuno i toda su Familija, ke kedaron sin dingun abrego, sovre todo ke el S-r. Konorte tenija krijaturas Tchikas i las lees de akel tiempo eran ke en ansi okaziones la polisija se okopava de los bienes de el moerto por proteja a los goerfanos, i lo azija ke lo vendijan todo i pagavan a los ke devija i lo restan lo metijan en las bankas de el governo i de los revinidos era ke lis davan a los goerfanos por sus mantinimiento, foe i aki tambien ke lo izieron esto ma siendo los gastes son grandes i las venditas de las ropas ke las izieron mui baratas, i kon los averes ke tenijan ke non pudieron kovrar ni la metad, ansi foe ke non kedo nada, seja para los goerfanos seja tambien ni para H. Elijatchuno, ke de mizmo foe ke non pudieron tomar, ni el kapetal de Tchelebi Jeuda i sus ermanos ke tenijan, i se foe lo todo, sin ke pudijan mas nada reklamar, i siendo ansi foe ke H. Elijatchuno ke kedo sin etcho aparte de loke estuvieron tanto sikilijados era tambien ke no tenijan de tomar por sus menester de sus mantinimientos, i kedava el etcho a la Bu. Revka, ke si akonsejava kon H. Refael i sus ditchizion era ke foera ande sus parientes ke son Tchelebi jeuda kon sus ermanos es solo ejos ke lis podijan akomodar sus avenir, i otra koza mas ni nada i la Bu Revka ke ja era una mujer mui liberta i se savija mui bien komportar, lo azia ke lis iva a las kazas demanijana, ke ejos

615                 Biografia de H. Elijatchuno i H. Rabenutcho Josef Arie en Samokov.                 1846

ja lo savijan por koal i era ke lis vinija i siempre la konsolavan kon avlas dulses, i eja jorava, i denpoes ke los 3 ermanos vinijan en un kavo i platikavan sovre esto i de el prisipio li mandavan algo de paras para ke tuvieran para gastar, i sus platikas foe ke serija de avrir un magazen para vender ropas en groso en Filibe, ke kon esto podijan estar todos los 2 ermanos, H. Elijatchuno i H. Rabenutcho, i azerlos haverim, para ke poedan kon esto podija ser mas mijor ke adelantavan, i esto si lo dizijan a la Bu. Revka komo tambien i a sus IJOS, i ejos ke ja estavan prontos era ke restava, por akomodarlo i metersen en el lavoro, i fin ke lo azijan esto era ke siempre tenijan el kargo de non decharlos sufrir por sus menester de el mantinimiento ke siempre li mandavan en kada semana una sierta suma de moneda,

En el anio de 5607, sigun ditcho por la ditchision tomada de avrir el magazen en Filibe ke si izieron kontratos i lo izieron de meter Tchelebi Jeuda kon sus ermanos el kapetal i ejos los 2 ermanos H. Elijatchuno kon H. Rabenutcho, ke devijan ser en Filibe los enkamenadores de el etcho de el magazen lo todo soto a los komandos i ordones de los 3 ermanos Tchelebi Jeuda, i las partes de las ganansias ke ivan a ser kontra metad, sovre ejo denpoes ke ja si afermaron los kontratos ejos komandaron las ropas menesterozas,

616                 Biografia de H. Elijatchuno i H. Rabenutcho Josef Arie en Samokov.                 1847

a Viena ke ejos ja savijan i konosijan mui bien este negosio, i sin tadrar partieron Tchelebi Gavriel kon H. Elijatchuno a Filibe i alkelaron los magazenes menesterosos, ansi tambien li reglo la metoda de los tefteres ke los tiene ke jevar, i denpoes El Tchelebi Gavriel se vino a Samokov en restando solo H. Elijatchuno en Filibe, para resivir las ropas ke li ivan en kada dija arivandole, i tambien resentarlas i en mizmo tiempo ke empesara a azer i algunas venditas i esto ja lo tuvo de el presipio, porke vendijan kon unos % mui konvenivles, i tambien kon mui grande deretchedad, porke todos non si entendijan en las ropas mizmo ke las vendijan, i lo todo foe siempre sus venditas en groso, i tambien ke davan muntcho a kredit, i era lo todo en kontos korientes sin tomarles polisas, i sin fiksarles tiempos, i sus klientes eran lo mas muntcho de los deredores de Filibe, ke de filibe non tenijan muntcho ni menos ke lis kerijan vender a razon ke eran chikaneres,^[8] i H. Elijatchuno en kada semana lis mandava nota de las venditas ke azija i tambien lis azija saver koalos artikolos ja mankavan de el magazen para ke komandaran de moevo i esto konto lo jevava solo Tchelebi Gavriel porke el era mas pratik en este etcho de merkansija,

1. Merkadutcho, ke estava en el midrach estudijando foe en este anio ke lo ketaron i era por el presipio ke si okupava para azer las merkidas de los menesteres de la kaza, ke agora ja li foe mas grande, i era ke resivija kortadamente, la suma ke podijan gastar, i aparte los gastes ke si azija H. Elijatchuno en Filibe

617                 Biografia de H. Elijatchuno i H. Rabenutcho Josef Arie en Samokov.                 1847

eran lo todo por su konto, si entiende estos ke eran por el sujo menester, seja de su mantinimiento seja por su vistir, ke por estos ke si azijan para el magazen eran de en medio, i kon esto ja eran mui bien kontentes, de todos los puntos,

I la Bu. Revka era siempre bendiziendolos a sus parientes sovre esto ke ejos los protejan tanto, i eja era de mizmo ke kontinuava, en su ofisio, de la komadres i en ir aziendo kuras a las mujeres seja kazalinas seja i algunas de la sivdad, i todas li pagavan su vijita, i siempre era ke iva amontonando, lo todo sigun ditcho ke si estava prontando por irse a Jeruchalaim.

            En el anio de 5608, a H. Elijatchuno li nasio un IJO, i denpoes ke ja pario si vino H. Elijatchuno a Samokov, ke estuvo unos koantos dijas i lo izieron en el parto ke en kada notche los konbedava a sus parientes, i pasavan kon kantar i bever, i ansi tambien lo izieron en el dija de Chabad i en el dija de el birkad Mila i lo jamaron REFAEL, i el parido li trucho muntchos prezentes para la parida, i para todos los de kaza,

I denpoes ke ja estuvo ainda unos koantos dijas en Samokov, partieron djuntos kon Tchilibi Gavriel a Filibe, por merarsen un konto, ke esto lo izieron en pokos dijas i se toparon mui bien kontentes ke tuvieron grandes ganansijas, i la konsumasion^[9] ke

618                 Biografia de H. Elijatchuno i H. Rabenutcho Josef Arie en Samokov.                 1848

tuvieron tambien foe bastante, i sovre ejo foe ke engrandisieron mas muntcho el etcho, i H. Rabenutcho ke estava en Samokov, si foe i el tambien a Filibe, i lo mandava por la provinsija, para ke iziera los kovramientos de estos ke tadravan para vinir a Filibe i en mizmo tiempo tambien ke lis vendiera i algunas ropas a estos ke non vinijan a Filibe i kada uno li dava un akonto de esto ke devija ke era en esta manera ke si azijan los kovramientos en akejos tiempos i lo todo era kon asenjalar kada uno en su tefter, i koando se meravan los kontos non azijan dingunos jeros, i toda moneda ke enkasavan seja H. Rabenutcho seja esto ke enkasava H. Elijatchuno lo todo era ke si remitijan a Samokov, i de Samokov era ke las remetijan ande era el menester, i la firma de el magazen era al nombre de sus primos ermanos, ke por esto en este tiempo lo demando H. Elijatchuno de trokarlo al sujo nombre, ma non li atchetaron i li dicheron ke si es ke non estava de akordo ja si podijan i espartir, ke para ejos non era nada ke i ejos tambien ja lo konosijan anke el ofisio i tambien ja lo savijan i enkamenarlo i de esto los izo algo jelar non saviendo kon koala entision lo demando ke visto a los kontos ke meraron era koza ke non podija detener H. Elijatchuno solo el un ansi magazen ni menos el 10 % ma lo decharon ke serija un adjamelik or ke foe durtijado de su ermano H. Chemoelatche ke el koal era mui selozo i mui kachteredji^[10], i tambien kandirjador,

Ejos ke ja estuvieron todos 2 ermanos en Filibe era ke azijan grande ikonomija en los gastes ansi de mizmo eskrivijan i

619                 Biografia de H. Elijatchuno i H. Rabenutcho Josef Arie en Samokov.                 1848

a sus kaza en Samokov porke travaran el gaste, ke era esto ke los iva a salvar, ke fin a este tiempo era i la Bu. Revka ke ajudava en el gaste i siendo ke de este tiempo mas a dingun presio non kijo ajudar, era ke lis estava viniendo mas pezgado, i la Bu. Revka gaire en este anio ja estuvo okupada solo en aprontarse los vistidos, i otras kozas ke li podijan servir para Jeruchalaim, i todos li ivan traendole modos de prezentes ke este modo era el uzo para akeja persona ke si iva a ir a Jeruchalaim, eja ke ja tenija boena ke djoja ke li tenija merkado seja el marido de antes komo tambien i Hr. Josef, i esto lo kontava komo moneda pronta i aparte eja tambien ja avija avansado una boena suma ke si mizmo sus IJOS non kirijan darle nada eja si kalkulava ke de loke tenija ja pudija bivir en Jeruchalaim i tambien ke eja iva a azer el ufisio sujo ke lo azija en Samokov, ma sus IJOS non li foeron kontra i ejos li prometieron ke ja li ivan a darle esto ke ejos lo podijan,

En el anio de 5609 a H. Rabenutcho li nasio una IJA, ke kon la koala tambien de mizmo lo izieron sigun de las otras todas paridas, i la jamaron Rahel, ke la koala foe mujer de su sovrino S-r. Refael Elijau Arie, i de mizmo su madre la aletcho i la kreo i H. Rabenutcho non vino en este parto, ke si topava lechos de Filibe, otro ke el li mando algunos prezentes, mas tadre, ke esto la izo

620                 Biografia de H. Elijatchuno i H. Rabenutcho Josef Arie en Samokov.                 1849

abatir a la parida, ma ja la konsolavan sus parientes i tambien la Bu. Revka, su esfoegra,

En este anio ke la Bu. Revka ja estuvo pronta de lo todo para irse a jeruchalaim era ke li avija kedado porke li reglaran sus IJOS la anijada, i tambien ke kalija la akompanijaran ke i esto mas tadre li vinieron todos 2 IJOS de Filibe, i li nombraron una anijada bastante para poder pasarse en Jeruchalaim ke era lo todo mui barato, i li dieron en la mano el menester de moneda para el gaste de el vijaje, i djunto sus 2 IJOS partio via Salonique i sus IJOS la akompanijaron fin a Djuma^[11], i todos sus parientes i la sivdad entera, la akompanijaron fin el kiopri ke si jama Adjilar kioprisi^[12], i en Djuma la mandaron kon unos siertos Jorukis, ke son mui konfidentes i kiradjis, a Salonique, kon ke li dieron kartas de rekomendasion para ke li tomen bilieto para la nave ke iva a partir de mas antes para JAPA, ke esto todo li afito mui djusto i el vijaje lo izo mui levijano ke la mar tambien la paso mui reposada, i en su tiempo ke eja arivo en Jeruchalaim, de vista lis eskrivio kartas para sus IJOS i para todos sus parientes, alavandose ke si topava mui boena i ke el kamino lo paso mas mijor ke podija ser, eja si tomo una kamareta djunto kon otra mujer komo a eja i se pasavan mui bien i la anijada ke ja si la mandavan mui en regla era ke si pasava i bivija mui kontente, i en kada 2 semanas lis mandava kartas para sus IJOS, i lis eskrivija en mui largo.

1. Elijatchuno kon H. Rabenutcho ke estavan de mizmo

621                 Biografia de H. Elijatchuno i H. Rabenutcho Josef Arie en Samokov.                 1849

en Filibe, ivan andando i adelantando, en sus etchos, i siendo ke ja estuvieron reposados de sus pasadija, ejos si enpesaron a kontenersen i entre sus konversasiones, kon sus amigos ejos si alavavan i lis dizijan ke el nombre Tchelebi Jeuda, ke avlach non es nada, ke si jo non estava el non podija azer nada i es ke de las ganansias ke jo lis do de aki es ke ejos si mantienen, i esto avijan djente ke si los kontavan, ma ejos non avlavan nada, ke ja savijan ke la natura de la persona ja es de derokar a el otro, ke el karar de bien ke si li era a una persona non es nunka rekonosido, i esto enreina lo mas muntcho entre las personas las mas konsensiozas i entelejentes, ke kale ke seja ke es porke non lo enpatrona el mizmo este poder, konsentiendose en si ke i el ja lo merisija, tanto presto ke la mas tchika foersa ja enpatrona ja buchka de etcharse ensima de su bien azedor i siendo ke a todos ja es mui bien savido esto, non se por koala razon es ke torna todos lo enplejan, i kada uno ja si lo poede azer una edeja o de sujo ja si li va a responder,

            ejos sin dingun trokamiento era de mizmo ke kontinuava i eran siempre a los ordenes ke resivijan de Samokov, ke si konportavan, i eran mui akurat por todo respondimiento,

En el anio de 5610, Tchelebi Gavriel ke si okopava lo mas muntcho sovre el etcho de el magazen de Filibe i H. Elijatchuno

622                 Biografia de H. Elijatchuno i H. Rabenutcho Josef Arie en Samokov.                 1850

ke era el jevador de los etchos soto los ordenes ke resivija de Samokov, i ejos ke ja eran tanto gustozos ke ja estava kamenando boeno el etcho i ke ja si esperava el adelantamiento seja de H. Elijatchuno komo tambien i de H. Rabenutcho, i era ke si ivan mas muntcho okupando i dando foersa para ainda adelantar, foe ke en este tiempo en sus korespondensias ke ejos tenijan era ke H. Elijatchuno non kijo mas sintirlos i azija sigun ke a el li paresija, i esto ke non estavan de akordo avija enpesado a tener un kedamiento, porke non si lis korespondijavan las operasiones ke si azijan de todas las 2 partes, ke ovo un tiempo ke H. Elijatchuno lis eskrivio ke lo decharan gaire de ir enkamenandolo, i visto a esta karta li kalio ke partiera Tchelebi Jeuda Por Filibe, para entender su edeja, i ansi foe ke en arivando a Filibe li dicho ke el magazen es sujo i ejos ke no kere mas ke si li mleskaran, ke sintiendo esto, Tchelebi jeuda non li avlo nada i se salio de el magazen i foe ande sus amigos por poder entender de ande li vernija estos negros konsejos ke sigun ditcho ke su ermano H. Chemoelatche el Chichko, ke ja era sus enimigo i mui grande selozo ke ja era non li paresija ke lo iva a tomar sus konsejos, ma ja foe ansi ke lo pudo konvenser, i lo akonsejo porke non rekonesiera nada solo kon dizir ke el magazen era solo sujos i dinguno non deve de mleskarse en su etcho, i Tchelebi Jeuda ke ja lo entendio sin tadrar si adereso a la komision de merkaderes ke ja avija en Filibe i ejos lo tomaron el etcho en mano i li izieron ke

623                 Biografia de H. Elijatchuno i H. Rabenutcho Josef Arie en Samokov.                 1850

serara el magazen i Tchelebi Jeuda se vino a Samokov i Partio su ermano Tchelebi Gavriel para espartirsen, i esto sin tadrar lo enpesaron lo todo por vija de la komision, ma H. Elijatchuno lo topo de mijor de non presentarse koando tenijan las adjuntas, i ansi era ke si iva alargando ke apenas en alguna ves koando vinija era kon las mil pretensias, ke si prezentava, i siempre se iva prolongando ke lo todo era ke si lo raportava a H. Chemoelatche, i kon los konsejos sujos era ke si iva, defendendo, i lo todo ke H. Elijatchuno ja estuvo mui repintido, porke avijan kedado de akordo ke se ivan a azer ejos Haverim, ma H. Chemoelatche, komo era atorsedor, lo kerija tambien i a H. Elijatchuno estroirlo i siendo ke el etcho salio i a el Djuzgo i H. Elijatchuno enpeso a jorar ande su ermano ke lo kijo enganijar foe ke si izieron kontratos para koando si eskapa de espartir ke van a ser ejos Haverim kon H. Chelomo Koen,

            I H. Elijatchuno mizmo ke a las sikretas ja si asiguro de su avenir, torna kon todo li rogo a Tchelebi Gavriel porke si repintiera de la espartision i ke foe enganijado de su ermano ma Tchelebi Gavriel non lo kijo esto otro ke solo espartirsen, i siendo ke si foe muntcho alargando esta espartision era ke sufrijan muntcho los enteresos, i siempre ivan aviando danios ke el kerer de H. Elijatchuno era siempre por restar ejos torna Haverim ma non savijan si non era kon alguna otra entision, i por esto era ke Tchelebi Gavriel non si kontentava, mas tadre H. Elijatchuno metio djente porke li rogaran a Tchelebi Gavriel kon ejos estuvo tambien i H. Chemoelatche

624                  Biografia de H. Elijatchuno i H. Rabenutcho Josef Arie en Samokov.                1850

para ke torna restaran sigun antes or si lo kerijan ke trokaran algunas kondisiones ma Tchelebi Gavriel lis dezija ke la detchizion ja es tomada para espartir, otro ke denpoes ke si aze esto ke vengan en Samokov i podran avlar de moevo,

En el anio de 5611, ke de todas las 2 partes ke si Konvensieron por la espartision ejos kedaron de akordo entre ejos solos para espartirsen, i lo izieron esto ke de moevo enpesaron a eskrivir, ke lis turo tambien serka de 2 mezes, i a los kavos lo izieron ke si espartieron la ropa en natur^[13] i esto sigun de las % ke ejos tenijan i kon el aver, foe de mizmo, ke esto lo apartaron loke era saglam^[14], si lo espartieron i esto ke era Tchuruk ke era una suma de 80,000 groches, lo metieron en enkante, i se los resivieron H. Elijatchuno kon H. Rabenutcho, por 10,000 groches, i se endevdaron kon Chetariod aparte a 5000 groches a kada uno, kon la kundision ke fin ke los pagan ke deven de pagar a 80 groches a kada uno a el mez por los entereses i kon esto iva a ser ke pudieron tener ejos el deretcho de enpatronarsen en los 80,000 groches, sin ke podijan tener mas a reklamar nada,

            I los ditchos 10,000 groches ke si endevdaron H. Elijatchuno kon H. Rabenutcho, i a pagar tambien entre los 2 a 160 groches en kada mez, por los enteresos, en este mizmo anio los izieron EKDECH, para el Midrach, ke ejos ja lo tenijan de mas antes

625                 Biografia de H. Elijatchuno i H. Rabenutcho Josef Arie en Samokov.                 1851

por ke meldaran 10 Hahamim en el dija de mierkoles de kada semana en el mizmo midrach, i por sus paga tenija de ser estos 160 groches i ke los tenijan de resivir de H. Elijatchuno i de H. Rabenutcho, i esto lo enpesaron de el mizmo dija ke lo nombraron, i los ke meldavan eran lo todo los mechartim a la kavesera de Hr. Avraam Alkalai ke el koal resivija 2 pagas i el tambien era ke azija los kovramientos i tambien jevava los kontos de koando algunos de ejos mankava ke non lis pagava, i mas ke avija tambien ke apartava para kahves i kaentar el midrach, i kon esto si eskapo todos los kontos, de H. Elijatchuno i de H. Rabenutcho i se eskrivieron los Chetariod de espartision i los afarmaron kon 2 edim, tambien afirmados,

            I Tchelebi Gavriel la ropa ke tomo si lo trucho a Samokov, i por los averes empeigo a una persona porke los foera enkasando, ke i de esto tambien tuvieran algo de danios, ke algunos non lis pagaron, ma de esto non lo avlaron ni lo izieron kistion,

            i H. Elijatchuno kon H. Rabenutcho, restaron en Filibe, i ejos ke tuvieron de esta Hevra una ganansija de 25000 groches ke lis kedo en limpio, foe ke entre ejos tuvieron un mal entindimiento i de esto lis salio tambien i grandes deferensias, fin a el grado ke lis vino el etcho porke i ejos si espartieran, ke esto non foe solo de el etcho de el magazen lo izieron tambien ke si espartieron tambien i de kaza, i para azerlo esto lis kalio ke seraran sus magazen en Filibe i se vinieron a Samokov, i se espartieron tambien i la mobilija de kaza, i mas todo esto ke ejos lo tenijan en djuntos

626                 Biografia de H. Elijatchuno i H. Rabenutcho Josef Arie en Samokov.                 1851

i kon la kaza lo izieron ke si tomaron a 2 kamaretas a kada uno i komijan aparte tambien se guizavan kada uno por si i un sierto tiempo estuvieron anojados todos los 2,

Sovre esto ke los ermanos ke tuvieron algunas deferensias i ke lis arivo el etcho para espartirsen non es de maravijar ke ja es koza naturel, ke poede a todos arivar, por la mas tchika koza, i se esparten ma solo lo mas mijor ke lo izieron foe ke siendo ja tuvieron la okazion para espartirsen de el etcho, foe mui boeno de esto ke si espartieron i de la kaza, ke ja es savido ke ermanos para espartirsen kale ke aigan algunas litigas i si es ke lo dechavan i esto i una ves tambien ke ja se ivan a espartir, kalia ke tuvieran otra una ves la okazion para araviarsen i ansi espartirsen es agora ke de una vija izieron 2 mandados i lo izieron mui djusto,

Mas tadre ke ejos ja lo eskaparon todos estos etchos lis vino karta de Jeruchalaim, ke sus S-ra Madre la Bu. Revka ja foe moerta kon 5 semanas de mas antes i ansi foe ke non lis toko el 7 ejos la joraron muntchos dijas ansi de mizmo foe i la familia i todos los djidios de Samokov, ke por eja ja eskrivi en muntchos lugares todas su boenas koaledades ke eja los tenija i los bienes ke azia a todas los personas eja la mas grande mankura ja la trucho a los parientes de koando si foe a Jeruchalaim, ke denpoes de eja era la Bu Ruzu de H. Merkadutcho ke los reintchija ma non era komo los de la Bu. Revka, i era tambien i la Bu. Esterulatcha de H. Avramatche Avdala ke si entremitija en las koaledades de la Bu. Revka ke eja

627                 Biografia de H. Elijatchuno i H. Rabenutcho Josef Arie en Samokov.                 1851

tambien era una mujer mui nikotchera, i era ke koando avijan seja bodas komo tambien i paridas i mismo hasinos era ke a todas las 2 las jamavan i ejas era ke reintchijan esto ke la Bu. Bevka solo lo azija, i kon la espartision de los 2 ermamos foe ke kedaron todos los 2 sin dingun etcho i estavan todos los 2 en Samokov,