קורותיו סנ' נָעימָצֶ'ה, בן צֵ'לֵבּי יהודה, בקונס'

1660

De aki i endelantre si enpesa la partida de el S.

Naimatche de lavida ke el la paso en kostan fin a el anio

de 5650-61

1661              Biografia de S. Naimatche J. Arié.         1878

En el anio de 5638, ke S. Naimatche ja estuvo espartido de sus ermanos sigun eskrito mas antes, el ke ja si vino a kostan, era ke kontinuava, i admenestravan djunto kon su haver el S, Baruhatche, la banka ke ejos ja la tenijan i de antes en Kostan, i ejos tuvieron el mizmo personal, menesterozo por una banka, i sus lokoal [lokal] ke ja lo tenijan en Galata en uno de los apartamentos, en el sigundo etaje, de los hanes de el S. Kamondo, i le pagavan a 180 liras turkas de kira a el anio, ejos tenijan sus paiton delantre la poerta de la banka en la plasa, pronto por vijitar en todas las bankas i los menesterios, i otros lugares, por el menester de sus etchos, los kavajos eran mui ermozos blankos, ansi i el paiton era kuppe, i en esto era solo el S. Baruhatche ke kamenava, i el lo prontava los etchos, i el los eskapava en todos los menesterios, i en todos los otros lugares, i el S. Naimatche era en la banka, por sus respondimientos, ejos tenijan en la banka sus gavas, porke los goadrara i era mui bien i armado de plomos de plata, sus kreditos seja en las bankas de kostan komo tambien i estas de el ajeno, eran extraordinario grandes, ejos los abastesijan moneda a sus klientes, las sumas ke lis demandavan, ejos azijan grandes operasiones en la borsa, seja de kostan komo i en estas de el ajeno, en las echpekulasiones de merkar i de vender, fondos seja turkos komo tambien i ajenos, i esto lo mas muntcho alevre seja por sus kontos komo tambien i por konto de sus klientes, ejos merkavan havales, por koando non topavan a venderlas kon sus

1662              Biografia de S. Naimatche J. Arié.         1878

 boenos presios, lo azijan ke las mandavan a kovrarlas por sus kontos, ansi era ke i mas ansi operasiones de banka ke ejos las azijan era lo todo kon muntchas ganansias, si entiende ke i en algunas kozas ejos tambien i pedrijan, ejos en sus kazas pasavan mui bien i kon muntcha antchura, en todos los puntos, solo ke el S. Baruhatche non pasava tanto boeno kon su mujer, i esto por algunos jeros ke eja lo izo avregonsar adelantre de su padre i madre, i era ke bivijan aparte, ma el S. Naimatche era djusto la kontra ke bivija kon su mujer, mas de loke la persona si lo poede imajenar,

El S. Barohatche, su haver ke estava fragoando, una kaza en kostan, en pera (beg-oglu) por si i en este anio ke el ja la eskapo, de fragoar, i por non pasarsen ejos por esto ke era moeva, i para ke estuviera bien seka li kalia ke pasara un anio i esto kon ke kalia ke moraran djente en eja, i S. Naimatche ke ja kerija kaza, i ke tenija de resivir musafires i non kriendo en esto el si la demando por ke lo alesensiara a morar el en este anio i sin ke li kovrara dinguna kira, i el S. Baruhatche si la djo por este anio, i se pasaron, en eja i ke ja avija i venido i su ermano el S. Mochonatche kon su familia, ke es su mujer i ijos i ijas, aparte de su ijo el grande S. Behoratche, ke si avijan ido ala italia, djunto S, Nesimatche su ermano, i M. Veniziu Mujer de S. Behoratche, ke ejos estuvieron en Brendizi, i en kostan estuvo tambien en esta kaza i Sus S. Madre, i Beju Mujer de S. Chemoelatche, kon sus krejaturas, arazon ke el S. Chemoelatche resto en Samokov por goadrar los sujos bienes, i todos estos se pasaron en esta kaza, i bivieron djuntos kon S. Naimatche.

1663              Biografia de S. Naimatche J. Arié.         1878

kon ke la mobelijaron, de la mobilija ke ja la tenija el S, Naimatche, i de algo de mobilija ke ja si trucho i el S. Mochonatche, i por adjusto ejos tambien i algunas mas kozas, porke la kaza era mui grande, i tenija muntchas kamaretas, i era fragoada en 2 etajes, i tenija mui ermoza i larga vista para la mar, i la plasa, i esto foe fin a ke su vizino non avija fraguado ala delantera ke li tapo la vista, por el sostenimiento de la kaza entera era el S. Naimatche le iva gastando, de su petcho, parisiendole ke esto de la gera podrija turar 2 or muntcho 3 mezes, i denpoes ke ja se ivan a ir kada uno a su kaza, ke el lo penso de detenerlos komo sus musafires, ma siendo ke este tiempo ke el lo penso, ja avija pasado, i la vista de la gera era ainda mui larga, sigun ke ja turo komo a un anio i medio, ke estuvieron en kostan, i siendo ke el gaste ke azijan era grande i mui grande, i el non podija somportarlo, foe ke lis paso a kada uno su %, ejos si komportavan de alta gala, i de muntcha antchura, ejos era ke en kada notche, lo azijan komo a una boda, ke li venijan muntchos de los amigos de kostan, en sus kaza, i komijan i bevijan i dormijan, i tenijan tambien i a muntchos hanendes, i pasadores de ora para azerlos areir, i kantavan i djugavan, en los modos de los enstromentos de muzika, i sus mantinimiento ke ja era de la prima klasa, ke ejos si azijan traer los bevrajes, los mas mijores de la evropa, i ejos eran sirvidos de muntchos mosos i mosas, i de las mas mijores gizanderas, i las mujeres eran todo sus enbivisimiento, de i ir merkandosen, las modas de las vistimientas de las primas modas, i

1664              Biografia de S. Naimatche J. Arié.         1878

 i adonandosen de los mijores i plazentes luksos, i afeites, era ke kada una de ejas mandava por si a demandar, moneda de S. Naimatche, la suma ke si li azija de menester, i el S. Naimatche por los presipios era ke lis iva dandoles, i siendo ke era muntcho loke ivan gastando, lo penso de fiksarles una sierta kantedad de moneda por kada una i esto darsela en kada mes, i esto el lo izo en sikreto sin ke lo avlo a dinguno otro ke el mi lo dicho ami i jo li diche ke no ti van a sentir, ma por una prova el lo izo, i les fikso la suma por kada una sigun de loke lo meresijan, i ejas sin nada avlar si travaron esta suma en una semana, i ejas sigun ditcho ke sus penserio era lo todo en luksos, le ivan tambien demandandole, ke les diera, i el ke lis kijo refuzar, kon dizirles ke la suma fiksada ja si la travaron i ejas kon grande delikates li dizijan va bien ke moestros maridos no mos kerlan soltar mas moneda de lo fiksado, en tanto por lo demasija ke vamos a travar, ke si lis diera de sus moneda ke ejas la tenijan depositada, tambien en S. Naimatche, i ke si las pasara en sus kontos, i S. Naimatche ke no topava koalo dizirles, era ke lis dava,

En los dijas de las fiestas, ejos se ivan a las kampanias deredor de kostan, i a los lugares mas visiozos, akompaniados de djente de pasatiempo, ke esto avija muntcho en kostan, si entiende ke eran i bien pagados, en los dijas de ensimana el S. Mochonatche se iva ala banka de S, Naimatche, i el se iva a vijitar por los konakes de los pachas, i otros begis ke eran enfloensados i konosidos de el S. Naimatche, i era de ejos ke si enbezava, las moevas de la

1665              Biografia de S. Naimatche J. Arié.         1878

gera, i otros etchos de la poletika, i ansi de algunas kozas ke si pasavan en el governo, era ke si enteresava por estar a el koriente por sus etchos, el por los presipios non se okopo en dingun negosio partikolar, pensandose ke presto ja iva a ver una fin en la gera,

En el anio de 5639, a S. Naimatche, li nasio un ijo i lo jamaron Efraim-Ferid, el foe nasido de 7 mezes, i era mui flako ke siempre lo ivan enfachandolo, kon algodones, para ke estuviera kaente, medikos lo vijitavan a unas koantas vezes a el dija, i koando ja arivo a tener, la edad de 2 mezes, ke ja si li adjustaron la edad de los 9 mezes ke li kalia ke estuviera en la tripa de la madre lo izieron Berid, i en este dija lo izieron fiesta grande, i kombedo a todos sus parientes ke estavan en kostan i alos amigos, i komieron i todos en la meza de Elijau Anavi, uvo mozikas i djo muntcha sedaka, alos menesterozos, i su madre lo kudjo, i lo kreo, i algo tambien era i ke lo aletchava, i tenija 2 kreaderas para aletcharlo i era ke al presipio si lis analezava las letches de las kreaderas, i denpoes las tomavan, i ansi analiz era ke lis azijan en kada 15 i 20 dijas, ke si en kavzo era ke si li bozdejava or ke si li enmankava, las letches de alguna de estas kreaderas era ke las dechavan i tomavan a otras, i estas kreaderas eran mui bien pagadas, i bien mantenidas, i vistidas, ke ansi kreaderas en kostan si topava muntchas seja djudias

1666              Biografia de S. Naimatche J. Arié.         1879

komo tambien i non djudijas, i mas tadre ke el S. Ferid, ja foe algo mas grande, era ke lo mantenijan tambien i kon las letches de vaka, para ke estuviera mas arto, i siendo ke las letches ke las vendijan en Kostan, eran lo mas mleskadas, foe uvligado de merkar una vaka de estas de la Chvesaria, i la mundjijan en kaza por ke foera, la letche pura, i esta vaka la merko por 15 liras turkas, i el mediko lo vijitava en kada sigundo dija, foe ansi kreado i velado, fin ke tuvo la edad de 2 anios, i denpoes lo destetaron, i en este dija ke lo destetaron, lo izieron tambien fiesta, ke kombedo a todos sus parientes i amigos, i komieron i se alegraron, i todos los kombedados li trucheron modos de presentes, i djugetos para el destetado,

En este anio ke el Ruso, ja entro en la Bulgaria, i S. Behoratche, ijo de el S. Mochonatche ke estava kon su mujer, M. Venizju, i los otros ke estavan en la italia ke ejos por un sierto tiempo si avijan abachado a Triesta, foe ke si vinieron tambien i ejos a Kostan, porke los gastes lis foeron extraordinarios grandes, i tambien el S. Chemoelatche, ke estava en Samokov por goadrar sus bienes en este tiempo si foe i el a Kostan i todos ejos eran en la mizma kaza, de s. Baruhatche, ke bivijan i sus komporto foe tambien lo mizmo sigun de antes sin ke izieron dingun trokamiento, seja en los ombres komo tambien i en las mujeres, i la sus S. Madre tambien ke era kon ejos, en esta mizma kaza, i era ke i para eja tambien li azijan las modas de vistidos, ala suja edad, i la kontentavan en todo loke eja lo demandava, eja se izo dentadura moeva porke non estava

1667              Biografia de S. Naimatche J. Arié.         1879

boeno podiendo machkar, i de esto non li padiava tambien i iva estando i algo dezganada, i las mujeres mansevas i las mutchatchas, ke si rekojijan en un kavo de toda la familija Arié i ke ejas ja avijan tomado la vida de kostan, i ke ja eran bien artas seja de las vistimientas komo tambien i de sus adonos los plazientes, i los paseos i los otros pasatiempos, lo azijan ke si jamavan a las kantaderas, ke savijan i ke konosijan los kantos, de la boka, para ke las enbezaran a kantar, los modos de las charkis i los mekames, i eran enbevesidas en esto, kon ke eran tambien i mui bien pagadas, i de esto foe ke ejas si enbezaron a kantar, las moevas charkis, seja en turko komo tambien i en djodezimo, i arabo i grego i en Franses,

Los rusos ke ja entraron en Bulgaria, i ke ja si enpatronaron ejos de lo todo, i la admenestrasion de el paiz entero ke ja lo tomaron ejos, foe ke ejos si vinieron a San-Stefano de kostan kon una armada de 40.000 almas, de soldados i el gran duk Nikolas tambien kon ejos i se asentaron, komo ke ja estan en la kapetala, i kon esto foe ke lo forsaron a el Turko por afermar el kontratado, de paz, sigun de loke ejos lo kijeron, i por el mantinimiento de esta armada, foe el S. Naimatche, djunto kon S. Kuppa, i S. Atanasake, Stojanovitch, ke lo tomaron el angajamiento, de el abastisimiento, por el mantinimiento de esta armada, kon ke si izieron kontratos, i nombraron los presios de kada koza, de las komanias ke lis ivan a dar ke lo todo era de la primera koalita, i kon unos presios mui konvenivles, i el pan sovre todo ke devija de ser de el primo ke salija en

1668              Biografia de S. Naimatche J. Arié.         1879

Kostan i ejos lis ivan abastisiendoles, de todo esto ke lis demandavan, i ejos ke estuvieron fin ke si afermaron los kontratados, era ke lis ivan dandoles, i de esto ejos tuvieron muntchas ganansias, ke i los pagamientos era ke los azijan en mui boena regla, i en este tiempo ke el grand duke estuvo en San-Stefano era ke S. Naimatche, por vija de sus amigos i partidos ke li iva tomando las rekomendasiones por los generales i natchalnikes, rusos de las partes moestras ke estavan seja en pazardjik Sofia Samokov, i otros lugares, por ke los meraran kon boenos ojos, a la Familia Arié i ke les soltaran sus bienes ke lis avijan tomado, los rusos koando entraron, en Samokov i Pazardjik, i otras sevdades, porke ejos tenijan ke decharon magazenes jenos, de fieros, trigos i modos de otras ropas, kavajos, paitones mobilijas i ansi mas todo esto ke enpatronavan, sovre todos ejos era i ke si ivan tomando las kiras de los mulkes ke ejos enpatronavan,

I mas tadre anke ke los rusos ainda en estando en la Bulgaria, i fin a un grado ke la tiera ja estuvo repozada, i ke non avija mas dingun espanto, i el S. Mochonatche ke tuvo algunas piedritas en la borsa, i kon los gastes tambien ke lis avija mui muntcho pujado, foe ke enpesaron a rekojersen, i enpesaron a pokos apokos, a partir por Samokov, i en kurto tiempo ejos ja si vinieron todos a Samokov, i kada uno en su kaza, i kon lo de las mobilias ke ejos las tenijan en Kostan, partida si lo trucheron a Samokov, i partida lo vendieron i algunas kozas si las decharon a S. Naimatche, i resto S. Naimatche solo en Kostan i en esta kaza ke al presipio li foe foerte

1669              Biografia de S. Naimatche J. Arié.         1880

En el anio de 5640, era de mizmo ke el S. Naimatche kontinuava en todos sus negusios ke los azijan kon su haver el S. Baruhatche, i se topavan mui bien kontentes, en este tiempo el merko 3 kazas, vizinas la una ala otra, en la plasa de beg-oglu, kaleja Jazidji sokak^[28], ke li kostaron por la suma de 3500 liras turkas, i el ke las merko foeron la una por si i ke si paso en eja kon ke la mobelio de la mijor mobilia, i la otra foe por su ermano S. Mochonatche, i la tresera por S. Chemoelatche, i estas ultimas 2 kazas el las alkelo por konto de sus ermanos, i era mui kontente de ejas ke li foeron mui baratas,

El urdi de el asker turko^[29] ke avija en Edirne, ke eran serka de 50,000 almas, foe en este anio ke si adjuntaron tambien el S. Kuppa, kon el S, Atanasaki por tomar, el mantinimiento de esta divizia, i ejos ke ja konkorijaron alos otros foe ke ja lis kedo en ejos kon unos presios medijanos, i todos los 3 Haverim si mandaron a sus personales, a Edirne i S. Naimatche tambien lo mando a su sovrino S. Behoratche, ijo de S. Mochonatche, kon ke li pago a 500 gr, de paga a el mez, ke el koal partio kon su Mujer M. Veniziu, i todos a djuntos kontinuavan en el etcho, i S. Mochonatche en Samokov, era ke i el tambien lis merkava karneros i vakas, engodradas, i las mandava a edirne, por sus kontos sin ke el si pagava dinguna paga, ansi lo azija i ke lis merkava tambien i algunas i otras kozas de la komania ke lis konvinija a merkar de Samokov, ke esto lo azija por ajudarlo

1670              Biografia de S. Naimatche J. Arié.         1880

a su ermano, kon el etcho ke izieron era boeno, i lis amostrava i muntchas i grandes ganansias, i visto a esto ejos davan grandes foersa, ma kon los kovramientos era ke los estavan aziendoles algo mas tadre, ma non lis estava enbarasandoles, porke i ejos ja ivan topando los moldes a prevalersen de la plasa, en kavzo ke si lis azija el menester de la moneda, i esto ke era la suma kon miliones de frankos i kovrar ke non estavan podiendo era ke enpesaron a travar i algo de apretos por moneda, el S. Behoratche pasava mui bien boeno en su estar en iderne, i en las notches era ke si rekojijan komo a el mansevos, i esto en kada sigunda notche en una kaza, i kantavan i se alegravan i komijan i bevijan, ke esto en edirne avija muntcho entre los djidios, ke lis plazia pasar la ora kon djombuches, porke eran kaje toda la djente mui alegres, i pasadores de ora, i kantar tambien ke ja savijan todos, i el vino ke sale en edirne ke ja es el mijor de todos los vinos de la turkija, i godro, i mui pastozo i ke non enboratcha, era ansi ke eran todos kolorados, i godros, i esto solo en los ombres ke las mojeres eran flakas, i non koloradas, i de este tiempo es ke el S. Behoratche si enbezo a bever, ke esto lo enpleava i en Samokov, i se enboratchava, i el si merko, muntchas modas de vistidos i samaras, i djojas seja para el komo tambien i para su mojer, i fin a este tiempo el non tuvo krejaturas ke non li parija la mujer, anke ke ja estava kazado de antes i ^[11][30] anios,

En la banka de kostan era ke en este tiempo azijan las operasiones de la borsa kon merkar i vender los fondos muntcho,

1671              Biografia de S. Naimatche J. Arié.         1880

 a mas grandes sumas, i ansi foe ke koando azijan las operasiones mas tchikas era ke siempre profetavan ma koando mui grandes en lo mas muntcho pedrijan, i de esto eran algo deskorajados, ma non si repentijan de decharlo esto, ansi era i kon el negosio ke lo azijan de antes de merkar i vender las havales, i kon la entesion ke ja se ivan a kovrar segun de antes de la gera, ke lo enportante era ke tomavan por los vilaetes, de Rustchuk, sofia, Nich, Filibe, Saloniqe, i en este tiempo ke ejos tambien foeron merkando kon presios mas konvenivles ma era ke mas non pagaron sigun de antes, anke en los vilaetes ke li kedaron a el turko, por razon ke todas las kachas ja foeron vaziadas para el menester de la gera, foe i en esto ke mas ja non tenijan tanto konto, porke i ejos era tambien ke si prevalijan i pagavan enteresos, i kon la kaime (banko-notos) ke tenija el turko ke esto era loke serkolijava mas muntcho foe i esto ke si depedrio a razon ke ja valio la una lira por 1500 gr, de kaime, i de esto lis kavzo i ke si travaran, i kriza grande ke ja uvo foe ke travavan i boenos apretos, por moneda,

de parte de sus vidas eran todos los 2 seja el S. Naimatche komo tambien i el S. Baruhatche ke si pasavan mui boenos i ekos foeron siempre mui aonados, i se respektavan mui muntcho de lo uno a el otro, seja ejos komo tambien i sus familias, ke sus gastar ke era kon la mano mui antcha, i el kachero de la banka ke era el Tchelebi Jshak, padre de el S. Baruhatche, komo mas viejo el era ke los akonsejava, porke non si foeran antchando muntcho en los gastes

1672              Biografia de S. Naimatche J. Arié.         1880

ma ejos ke altramente non lo podijan seja por la grande renome ke ejos la tenijan or seja por, esta manera si lis enkamenavan los etchos i ansi era ke non trokavan, ejos en este anio tomaron entre los 2 haverim, una kampania por los dijas de el enverano, en el kazal de Haidar pacha, ke era una Vila mui grande i mui ermoza, i era mira-mar^[31] ke en este lugar se azijan los banios de mar, la vila aparte ke era en 2 etajes era ke tenija mui muntchas kamaretas, i todas mui grandes i mui visiozas, i el kampo de el kortijo era tan grande fin a el grado ke si podija korer kon kavajos, i en el kortijo avijan muntchas goertas todo sembrado, de lo mijor, aparte avija charas (arvoleras), de modos de frutas i sin frutas, tenijan muntchos hervates armados ke los goadravan por las notches ke esto era de el patron de la kaza, a ejos lis vinijan muntchos musafires, para azersen los banios de mar i se abachavan en sus kaza, ke lo todo eran personajes grandes komo pachas i begis, i otros S-es, de kostan i ejos pagavan de kira 180 liras por los 3 mezes, de el enverano, ejos en kada demaniana si vinijan a kostan a sus etcho, i en las tadres era kon vapor ke si vinijan ala kampania, i se asentavan en las birarias, ke avijan a el bodre de la mar, ande vinijan tambien i otros S-es Djidios, ke i ejos estavan en kampania en este kazal, i pasavan algo de tiempo, kon ke i bevijan a unas koantas biras a kada uno kon muntchos mezes, i los pagamientos era ke los azijan, en kada tadre el uno de ejos, por vija de un sierto de sus ahbapes^[32], hanende ke los azija a reir, i se jamava aslan zaade, djidio, i era ke lis kostava en kada notche, de

1673              Biografia de S. Naimatche J. Arié.         1880

20 a 25 medjidies, keri dizir komo a 110 fr, ke de esta suma si tomava tambien el S, de Aslan zaade, los 5 or 6 midjidies, ke era esto por su paga de esto ke los azija areir, i jo ke estava en este tiempo en Kostan, era ke mi iva i jo tambien muntchas notches a haidar pacha, i mi adjuntava a ejos en la biririja, i visto ke en kada notche iva pagando el uno de ejos, i por non estar jo enteramente debaldes kije i jo tambien pagar en la una notche, ma jo no lo savija ke kostava esta suma, i el ditcho aslan zaade komo era mui entelejente, lo dicho va bien ke S. Arié kere pagar en esta notche, i el ke foe a el biradji por demandarli el konto, mi dize ke era el gaste 14 de midjidié, i jo ke sinti esta suma me vino muntcho ma no uvo koalo azer otro ke pagarle, i el S. Naimatche me dize alas kajadas, ja la ketates de baldes, ke mozotros pagamos a 20 i 25 midjidies, kada notche eran ansi los gastes de las kampanias, en kostan,

En el anio de 5641, kon el mantinimiento de la soldaderija de Edirne, ke lis era por un anio, i ke ja si eskapo, foe ke S. Behoratche ke estuvo en iderne, si foe a kostan por entregar los kontos, i mas tadre el si vino a Samokov, ke en este etcho las ganansias ja lis foeron mui boenas, ma era solo ke kovrar non estavan podiendo, i era ke lis davan havales por los vilaetes, de Saloniqe i de iderne, i sigun ditcho antes ke non pagavan, i ejos ke tenijan a

1674              Biografia de S. Naimatche J. Arié.         1881

ariva de 80 mil liras de havales, ke non estavan pudiendo kovrar, i ke ejos ja tenijan tambien i aparte a sumas grandes de aver de los begis i los pachas ke lis enprestavan sin dingun entereso, ke era de esta manera ke si enkamenavan los etchos en akel tiempo, i kon esto era ke las poertas todas lis eran aviertas para ejos, i eskapar todo esto ke ejos lo kerijan i kon boenas ganansias, i en sus klientes ke ja tenijan sus averes de mizmo kon sumas grandes, i non estavan podiendo enkasar, por razon sigun ditcho ke denpoes de la gera uvo kriza grande por moneda, i de esto tambien era ke i ejos ivan travando i boenos apretos, anke ke ja topavan de la plasa prevalersen ma era kon grandes i mui grandes enteresos, koza ensomportavle, ma non tenijan koala azer, solo por ir boltando kon la entesion ke ja ivan a poder kovrar de sus averes,

Visto a estos grandes apretos, el S. Baruhatche era mui deskorajado, i el ke si akonsejava kon sus parientes i amigos, era ke todos le dizijan, ke presto buchakara los medios por espartirse, i a el s. Naimatche non si li demostrava ni li avlava nada por los presipios, ke i el tambien non estava tanto libero, i ansi lo ivan dechando pasar, kon las bankas ke ejos lavoravan seja de estas de kostan komo tambien i de el ajeno, i ke si prevalijan era en este tiempo ke ja estuvieron kon todas jenas, i mas ja non podieron travar, foe ke enpesaron a resivir monedas de algunos ke non lavoravan, i les pagavan algunos enteresos i esto por kurtos tiempos, ansi lo izieron ke tomavan i moneda de turkas bivdas kon entereso i ke de

1675              Biografia de S. Naimatche J. Arié.         1881

esto era sus mantinimiento, i esto non lis era bastante, ke esto lis turo poko tiempo, i mas tadre ke ja foeron i algo kovrando, de sus averes, era ke se ivan algo mas leviano akomodando, i respondiendo en las mas enportantes menesteres, i esto kon ke era S. Jechaja Adjiman derektor de S. Kamondo, en la banka de kostan, ke los akonsejava i los enkamenava, fin a un grado ke i en vezes era ke i el los ajudava i kon moneda, ja era i ke de Samokov sus ermanos ke lo ajudavan i algo kon moneda, ma era a mas poko, porke era ke i ejos tambien ja estavan aferados, kon muntchas sumas de moneda, ke non las estavan tambien podiendo kovrar, lo todo a razon de la gera, S. Naimatche era mui repentido, de esto ke si espartio de sus ermanos, i de esto ke si lo resivio el todo el etcho de kostan,

S. Nesimatche, el ijo de S. Mochonatche ke estava i el en la banka de S. Naimatche, ki era komo su empeigado, kon ke li pagava su mezada, i se mantenija i dormija, en su kaza, i lo kodiava komo a su propio ijo, i estuvo fin a el anio de 5644, lo todo por praktekijarse en etchos de bankerlik, S, Naimatche era mui amorozo, de sus parientes i kon sevdadinos, seja los de Samokov komo tambien i de kiostendil, porke su mujer era de kiostendil, i el era ke en kada viernes si enbezava koalos samakovlis avijan or kiostendilis i los jamava por ke si lis foeran el dija de Chabad or moadim a komer en su kaza, sin apartar seja ke era pariente or ke non era, i de esto todos si gustavan i le ivan, i les amostrava a todos muntcha kara, i de algunos de eston koando non li ivan lo azija ke iva el mizmo,

1676              Biografia de S. Naimatche J. Arié.         1881

 a buchkarlos i lis dava kechas por esto ke non li vinieron el azia muntchos plazeres a ansi djente ke tenijan algunas deferensias, en kostan kon algunos de los merkaderes, i pedrija tiempo por konvenirlos, or apazigoarlos, ansi de mizmo lo azia i kon otra djente seja djidios komo i non djidios, ke tenijan algunos djuzgos, or otras kozas, en las polisijas i ke non estavan podiendo eskaparlas, los enbezava los kaminos ke devijan tomar, i muntchas vezes iva el mizmo, ande los natchalnikis, de las polisias, ke ja li eran kaje lo mas de estos sus konosidos i amigos, i les eskapava sus etchos i lo todo sin ke lis tomava dinguna paga, ke lo azija solo i solo por plazer, ke muntchos de estos era ke de boena gana li kerijan pagarle ma era ke el no resivija, i en vezes anke ke i le kostava, por el eskapamiento de el etcho era ke lo pagava de su petcho i esto ke el amigo ja lo via i ke li kiria pagarle ma non lis resivija i esto era su natura de azer bien a koal lo podija, muntchos de los chelohim i otros menesterozos, ke si li aderesavan ande el era ke a todos los kontentava seja kon moneda komo tambien i kon otras kozas, ansi lo azia i kon muntchos mansevikos moevos salidos de las echkolas, i ke non topavan los empeigos tanto presto era ke el si okupava i kamenava por las bankas i las kazas grandes por empeigarlos, i ansi era ke kada uno ken foesa ke si li aderesara el ja kamenava fin ande podija por azerle el plazer i reuchija, i todos era ke lo amavan i lo respektavan mui muntcho, ke non solo los djidios esto era i los turkos i todas las otras nasiones, i de todos ja era konosido,

1677              Biografia de S. Naimatche J. Arié.         1882

En el anio de 5642, ejos los 2 haverim, foeron en este anio mui rezervados en sus etchos, solo era ke kontinoavan en algunas operasiones en la borsa, i kon los klientes ke ejos los tenijan sovre los etchos de la komision, anke lo kontinoavan ma solo era ke moneda mas non lis soltaron otro ke al kontrario, era de estos, ke tenijan de aver era ke lis buchkavan a kovrarles,

El S. Baruhatche, sigun ditcho, ke era mui deskorajado, visto alos apretos ke los foeron pasandolos, i ke el lo kerija tambien i espartirse, foe en este anio ke topo la okazion, de avlar kon el S. Naimatche, sovre ejo, en diziendole algunas de sus razones ke sovre ejo todos los 2 tuvieron mui bien a pensar i kalkolarlo, i el S. Naimatche era ke si akonsejava, kon sus ermanos de Samokov, i lo mizmo lo azia tambien i S. Baruhatche ke i el tambien si akonsejava kon sus parientes, i este ultimo era ke lo iva enkorajandolo a S. Naimatche, ke el si era ke si iva a espartir ja tenija de estar siempre en su ajuda, sin dinguna parte ni menos dinguna paga, i por enkamenar en todos los etchos de mas antes ke el ja iva por lo todo de ajudarlo, seja kon los viejos ansi i se avran i etchos moevos, por lo todo iva a ser lo mizmo sin dinguna paga, solo i solo espartirse arazon ke iva endo hazino, i kon la vista de los ojos ke se li iva en kada dija akurtandole, ke siempre dizija ke estava viendo 2 a todo loke merava, el S. Barohatche, era una persona mui bonatcha i de boen karakter, i korason limpio, i el S. Naimatche visto a todo esto

1678              Biografia de S. Naimatche J. Arié.         1882

si kontento a espartirse, i sin tadrar ejos enpesaron a merarsen los kontos i en kurto tiempo ke ejos ja lo seraron, i lo izieron el bilanso, foe ke el lo konvinieron ke si lo iva a resevir el S. Naimatche todo el pasiv i el aktiv, kon ke el S. Baruhatche le rebatio de su parte un bien %, i se resivio en limpio esto ke li resto, de su parte en la banka, ke ejos lo tuvieron muntcho manko de sus kapetales, de loke lo avijan metido, porke ejos tuvieron grandes piedritas i la suma ke tomo el S. Baruhatche foe una mui tchika en mano, ke su kapetal tambien de koando la avrieron la banka ke ja era tambien tchika, era ke el ja tenija aparte, 2 kazas i algo de fondos, i sus mobilias, i el S. Baruhatche mas tadre ke non pudo azer dingun etcho foe ke la espozo a su unika ija S. Vida, kon el S. M. Modiano de Saloniqe, i le djo por kontado todo su bien ke el tenija seja en moneda komo tambien i mulkes, i otras kozas ke si asomoava en todo una suma de 60 mil. fr. ke esto lo izo kon la entision, de tener ansi un jerno riko, i parisiendolo ke iva a ser por en kavso menesterozo, ke lo iva a protejar, ma non foe sigun de loke el si lo penso, i el S. Baruhatche ke arivo en unos dijas mui apretados i anke ke si li aderesava, era ke non lo merava, ni kerija sentirlo, mas tadre el ke si li sero enteramente la vista de los ojos, fin a el grado ke se asento en kaza, i por el menester koando kerija kamenar era uvligado de otro ke lo jevara por el braso, i esto ke no lo pudo foe ansi sufriendo, i de mal jevar el murio mansevo, i su mujer la M. Merjamutcha se foe a Saloniqe ande su ija Vidutcha i bivijan djuntas,

1679              Biografia de S. Naimatche J. Arié.         1882

S. Naimatche ke resto agora solo, era ke en los etchos moevos ke el azia, afirmava, Naim J. Arié ma en los etchos viejos afirmo, por los presipios, kon la firma de antes, Arié Baruh Koen Co. i esto fin ke el keto sus tcherkolares, i en este tiempo ja era ke el S. Baruhatche lo ajudava, en algunas kozas de loke ja estava mas al koriente, i S, Naimatche, se izo de moevo otro un enventar, partikolarmente para si, por ver su vera pozision, kon ke foe rebatiendo algunos averes tchuruk, i de el rezoltado ke el lo topo, lo asenijalo en sus livros para ke li figorijara, su djusto i vero kapital, i lo topo por de djusto de asenijalarse komo kapetal la suma de 70.000 fr, i kon esto el lo foe enkamenando lo todo sigun mas antes, i koanto a el personal foe ke lo enmanko, de mizmo i en otros ansi gastes, koanto a los kreditos seja en la plasa komo tambien i en las bankas non li foeron mas kurtos, i de esto ja era mui bien kontente i ja era ke li ivan boenos sus etchos anke ke los azija mas travado el azija tambien i algunas operasiones de borsa seja en merkar komo tambien i en vender sumas tchikas de fondos alevre,

Ejos en kaza bivijan mui kontentes, tenija ke li, vinijan profesores, a su kaza por darles las liksiones de franses i el ingles a sus ijas M. Eliza i Sara, i aparte tenija tambien ke li vinijan i otros profesores por darle alas mizmas ijas, liksiones de el pijano, era su ija la tchika M. Sara, ke lo enbezo a el fondo el djugar el pijano, seja kon notas komo tambien i sin notas, eja djugava kaje, todas las charkis moevas, en turko, i muntchos marches i bailes

1680              Biografia de S. Naimatche J. Arié.         1882

 ejos tenijan en kaza mosos i mosas i gizanderas, su mujer la M. Rahelu non era luksoza, eja goadrava la kaza i kudijava por sus krejaturas, li venijan siempre sus parientes i amigas a vijitarla, i eja las resivija a todas kon kara mui alegra, kon los gastes de la komania en kostan eran mui baratos, ansi de mizmo era i las pagas de los mosos, porke era todo kon groches, solo ke el djep-hachlik, i las vistimientas era ke kostava mui karo,

Sigun ke ja lo tengo eskrito por el S. Naimatche ke era mui plazentero, i ke era tambien mui bien visto, seja en las bankas komo i tambien i entre los personages los mas grandes, de kostan i tambien el ja era ke en todas las adjuntas de ansi ja estava i en este tiempo foe ke si lis envistio, a ansi derektores de bankas i los personajes de las klasas mas altas, por vinirles en la ajuda a algunos menesterozos or ke deskaeron de sus furtunas, i lo ivan aziendo kon ke salijan mismo los derektores i los altos personages, i kamenavan de banka en banka, i en las kazas las mas grandes de merkansia, a rekojer komo DAVAR-MISVA, i kada uno era ke lis iva etchando, sigun la onor de los rekojedores, i entre todos era ke li vinijan tambien i ande el S. Naimatche, i el viendose delantre a S. Fernandes, ke era el derektor de la banka sosiete general, i a el S. Adjiman el derektor de la banka de S. Kamondo, i komo a estos ansi i a otros i el ke ja tenija kon todos estos sus etchos, non saviendo koalo azer, i ke non li amostravan los enchemplos de otros la suma ke davan en dechando a kada uno ke diera esto ke si li envelontava i lo podija,

1681              Biografia de S. Naimatche J. Arié.         1882

i el S. Naimatche era ke los mandava kon darles a koalos 25 i a koalos 30 midjidies, i esto si lo kalkolava sigun de la onor de los rekojedores, i ansi era ke ala semana era ke ivan saliendo, a una i 2 kojetas, i el S. Naimatche esto lo dicho entre sus amigos koando era ke si rekojijan por pasatiempo, i sus ahbapes hanendes ke ja tenijan, para azerles areir en estas adjuntas, foe ke dicho el hanende por koalo ke non salga i S. Arié a rekojer ansi koza de MISVA, ke kada uno ja si lo poede pensar, una koza, de ansi rekojimientos, de esta manera de sumas, i ke save si es verdad ke ja las estan enpleando para bien fizensia, i lo todo ke lo dicho por chaka para ke si rieran, foe ke el S. Naimatche li respondjo, ke si tenija i el alguna okazion, i ke si li aderesava algun menesterozo, mutlak ja salia i pasando komo unos koantos dijas, el S. Naimatche, resivio una karta de el Rabino de Samokov, Hr. Avraam Koen, aziendole saver ke tenija una ija, para serka kazarla, ke ja estava espozada de muntcho tiempo, i ke el novio li demanda de azer la boda, i siendo ke non estava pudiendo adjuster el kontado, i ke todos los notavles de Samokov ja lo regalaron, i li rogava kon esta karta, a el tambien porke lo regalara kon esto ke si li envelontava de la alma, i a S. Naimatche ke ja li afeto la ditcha kon la etcha, i el sin tadrar si adjunto a un amigo komo a el, i salio por todas estas bankas i merkaderes, su konosidos i estos ke a el li venijan, i rekojo una suma de serka a 1500 midjidies, ke es una suma de komo 6000 fr. i S. Naimatche gustozo de su reuchita, li mando a Hr. Avraam, la suma ke lo koal non si

1682              Biografia de S. Naimatche J. Arié.         1882

 lo pensava, i lo restan lo djo por bien fizensias i a algunos ke tenijan el menester,

En el anio de 5643 S. Naimatche foe mui flako en los etchos, sigun savido ke koando la persona tiene devdas, ke sovre todo koando ja son i a sumas grandes, ke estos ke las tienen de aver poeden ir prolongandolas, a 2 i 3 i muntcho a 4 vezes, i koando ja si aze i mas de esto, al menos es menester, de ir versando, algunas anke i tchikas sumas, por de moevo tambien prolongar, ma foe ke en estos tiempos ke siendo non lo pudo azer, a razon porke i el tambien las tenija de aver, lo mas muntcho en las havales, sigun ditcho ke non eran menos de 80 mil liras, i ke todas eran para los vilaetis de Saloniqe i de edirne, i el ke non estava nada podiendo kovrar, i komo en la plasa de kostan ja avijan muntchos echpikolantes, ja era ke topava moneda a prevalerse, ma solo ke era kon unos enteresos, mui foertes, i esto kon pagar a 2 i 3 % de entereso a el mez, i de sujo ja si entiende ke non es kaleja ke si poede salir, i esto era lo todo a sumas mas tchikas, i de esto era ke iva travando grandes i mui grandes apretos, i estava mui sikilijado, i de esto era ke siempre alas solas iva jorando, i sin ke dinguno lo viera, era ke el si korespondejava kon sus ermanos de Samokov, demandandoles la ajuda moral ke el ja lo savija ke non lo podijan sostener kon moneda, anke ke de

1683              Biografia de S. Naimatche J. Arié.         1883

 vez en koanto ja lo ajudavan ma era koza ke non li era ni nada, i su ermano el S. Mochonatche lo topo de mijor por salir el mizmo por buchkar a kovrarle de las havales, i sin tadrar el partjo por Saloniqe, kon ke el S. Naimatche ja lo izo rekomandar kon muntchas rekomendasiones ke el las tomava de los pachas para los valis i motesarifes i los kaimakanes, de todas las sevdades de el vilaet de Saloniqe, i ansi de mizmo lo izo i su ermano el tchiko S. Chemoelatche, ke i el tambien partjo por el vilaet de Endirne, kon ke i el tambien si jevo las mizmas rekomendasiones, por todos los natchalnikis, i lo ivan aziendo todos los moldes por poder azer los kovramientos ke lis era posivle, kon ke ivan endo de sevdad en sevdad, i kovrar koalo foesa i la suma ke ejos enbolsavan ja era ke al punto si la remetijan, ejos lo azijan ke i vendijan tambien partida de estas havales a algunos de los echpikolantes ke ja vija ke merkavan, i kon esto fin a un grado un sierto tiempo ja lo foe pasando, i el S. Naimatche aparte de loke el ja si aderesava a sus amigos en kostan porke lo ajudaran, ke ja avijan muntchos ke lo ajudavan, era ke iva i eskriviendoles i alos amigos i konosidos de otras sevdades, a kada uno de su manera, lo todo por moneda, ke entre estos, li eskrivio tambien i a S. Mairutcho alkalai de Samokov, diziendole porke li enprestara, la suma de fondos ke los tenija en la kacha, por kovrar solo los enteresos, kon ke i li podija tambien i pagarle, alguna suma por este enprestimo, i kon la kondision ke por el tiempo ke si kovrava los kopones ke si lo kerija si los podija remeterselos porke el si los kovrara or ke i ja lo podija i el azer el kovramiento i li tenija de remeter, el emporto

1684              Biografia de S. Naimatche J. Arié.         1883

i kon estos fondos era ke S. Naimatche, los iva a enprendar, en alguna de las bankas i kon esto era ke podija tomar moneda kon los enteresos muntcho mas baratos, ma el S. Mairutcho era ke non li respondija nada sovre esta demada, i lo iva etchando en dijas porke foera pasando, tiempo, i S. Mairutcho ja tenija de aver de S, Naimatche komo a 500 liras, i el ke esperava ke non le iva a refuzar, lo izo ke li asigondo kon otra karta esta demanda en adjuntandole ke visto ke non kijo responderle non seja ke korkarim kazanmajasin, keri dizir mi espanto non seja ke ganes, i sovre esto el S. Mairutcho li foe okazion para esponderle, (ben korkmam ne vakit sen kazanirsin. Jaliniz ben korkarim ne vakit ben kaibedirim,) ke es jo no mi espanto koando tu ganas otro ke jo mi espanto koando jo piedro, i S. Mairutcho kon las 500 liras ke las tenija de aver, non si las demando por azerle plazer, i mi parese ke a el non li djo ni el % ke pago a los otros,

Sus ermanos ke estavan kamenando por los vilaetes ditchos por azer los kovramientos era ke alos kavos podieron mas grandes sumas kovrar, i remeter ke ja si las remetijan avista era ke ja estuvo en algo mas antchura, i estava mas repozado, i el S. Baruhatche tambien ke ja lo ajodava mui muntcho, lo foe pasando,

En este tiempo ke jo estava en Kostan, foe en un dija ke mi estuvo buchkando, para demandarmi se kerija i jo ir a Tuzla un kazal en anadol, ke el tenija su etcho ke avija merkado el hachar de este lugar, i ke el ja apronto komania, kon ke izo azer 2 juvetchis,

1685              Biografia de S. Naimatche J. Arié.         1883

el uno kon aroz, i el otro de kondutchos, i tambien ke ja tomo algo i de bevrajes, i kon el avijan mas i otros 4 amigos, i jo ke non tenija visto komo la koajan la sal, kon la agoa de la mar, i koriozo para ver esto, li diche ke ja iva a ir, i en el mizmo dija mos foemos todos a Haidar Pacha, kon vapor ke en este lugar es la chtasion, de el chemen de fer de la azia, ke iva fin iznemit, i todos mos foemos kon el chemen de fer, i kamenimos komo 1 1/2 ora de kamino, i mos abachimos en una chtasion, por ir a tuzla ke era lechos komo a ora de kamino, i siendo ke non topimos paiton, foe ke mos trocheron aznikos i mozotros ke mos sovimos a los aznikos, arivimos mui boenos a el lugar, i al presipio komimos i bivimos, i denpoes foemos a el lugar ke la koajan la sal, i lo vimos ke es la tiera de este lugar ke la aze koajar, kon ke travan la agoa de la mar, ke tienen uno logares mas bachos de la mar, i vimos tambien ala djente de estos lugares, todo turkos, de unas formas demodadas de los de la parte moestra, i vistidos de unos chalvarikos kurtos, asta las medias piernas deznudas, i en sus kavesas unas fezes puntudas, sarijadas kon kuchakes kolorados i sus lingoajes enteramente trokada de el turko, i los kampos desolados i lo mas muntcho, diezertados, kazales se vijan en kada 8 i 10 oras de lechura de el uno a el otro, i la klima tambien ja estava i freska, i S. Naimatche, ke ja lo topo ala persona ke el la kerija, i fin a ke ja eskapo su etcho ke ja se i avija etcho i tadre, mos trucheron un karo, avierto i largo komo a estos ke kargan las pajas, i kochejado de unas mui ermozas i grandes vakas blankas, ke en esta

1686              Biografia de S. Naimatche J. Arié.         1883

manera de vakas, son mui ralas en las partes moestras, i 2 turkos armados era ke gijavan el karo, i todos mozotros mos sovimos en este karo, i mos trucho ala chtasion ke ja foe la ora djusta, ke ja estava el treno i mos vinimos a kostan, mui kontentes de el moestro viaje, ke el gaste ke si izo foe todo 30 midjidies, i molos espartimos a pagar kada uno proporsionalmente,

en el anio de 5644, los S-es, Mochonatche i Chemoelatche, eran de mizmo ainda kamenando por todas las sevdades, de los Vilaetis seja de Saloniqe, komo tambien i de endirne, i todos los 2 era ke azijan muntcha ikonomija en los gastes, ejos foeron kapatche kaje de poder kovrar el 90 % de las havales, anke ke azijan seja rebatos or ke davan preszentes, i en Kostan el S. Naimatche, tambien ke azija lo mizmo, de estos ke el tenija de aver, lo todo buchkando para salir kon la kara limpia, el non kijo tomar mas dingun etcho moevo, era ke solo se enbevisija en los djugos de la borsa, para ke podija ser ke iva a tener el mazal, de tener algun afito, i pagar a todos estos ke el lis devija, i mas non kerija nada, i non si li estava enportando, de esto ke iva a kedar i pedrer toda su furtuna, el kon la kaza ke tenija merkado algo de tiempo antes el la vendjo solo por ir pagando, ansi lo izo ke vendjo tambien i algunas de sus mobilias ke el tenija, boenos tapetes ke li kostava kada uno a 100 i 150

1687              Biografia de S. Naimatche J. Arié.         1884

 liras, inglezas, ansi el vendjo tambien i algunas de las djojas, el si paso en una tchika kaza ke la tomo a kira, Pasando ainda mas algo de tiempo, los ermanos sigun ditcho ke estavan kamenando sovre el kovramiento de las havales, i ke mas ja non si pudo kovrar, ke lo poko ke avija kedado era ke lo dechavan a algunos de kada sevdad kon komision por ke si okoparan a kovrar por sus kontos, i ejos todos los 2 si vinieron a Samokov, i el S. Naimatche ke mas ja non topo de el entodo, a prevalerse de la plasa, sigun savido ke non podija responder en regla, i lo iva pasando, algo de tiempo, i sus kredetores ke lo ivan apretandolo, foe ke li kalio, rekojera sus kontos i ke iziera un belanso, i esto ke ja lo izo en kurto tiempo, el lo entrego a la kanselaria de el konsolato franses, ke eran soditos fransezes, ma era ke lo detinijan en sikreto, porke non lis konvenija arazon ke ejos tenijan grandes etchos en el palasio, i tambien ke eran todos ejos dekorados de el Sultan, komo soditos turkos, ke esto en turkija ja si podija goadrar, i kon esto el detuvo sus pagamientos, i de la Kanselaria franseza ke lo reglaran sigun sus leés, i el S. Naimatche para azerlo esto, era ke estava siempre kon dezmajos, i muntcho, tiempo jorando, ansi i ke longo tiempo el era ke non salia ala plasa, i sus amigos ke li vinijan por azerle saver ke non devija de estar, fin a esto grado ke todos ja lo savijan ke non lo izo por ganar, i ke ja si tiene visto a muntcho mas grande de el los males mas grandes de sto, i todos ja li konosen su karakter, i ke devija de tomar kon grande pasensia seja por el komo tambien i por su familia, i el

1688              Biografia de S. Naimatche J. Arié.         1884

ke devija responder tambien por algunas de las razones ke li podran demandarle, i de la kanselaria ke ja nomenaron a una komision por ke lo reglara este konto, i foe la suma entera ke el resto a dever de 13,000 liras, i en esta suma avija ke el devija a muntchas almanod bivdas i jetomim, ke esto tambien lo tomo en mano la komision, i ke tambien kudjo i por S, Naimatche, mizmo en tomando en mano ke era i patron de Familia, i la komision denpoes ke ja lo exameno el etcho lo topo de djusto por ke si pagara sovre a 13%, i la mizma komision si okopava por azer los kovramientos de ande el tenija de aver, i en mizmo tiempo el tambien azija i los pagamientos, i los kredetores ke si kontentavan era ke si resivijan kada uno esto ke li revenija i uvo ke algunos non si kontentaron por el presipio kon la esperansa, ke ja ivan a poder tomar a mas muntcho lo koal ke non uvo, anke ke el S. Naimatche lis iva diziendoles ke el ja era ainda mansevo, i podija ganar para pagar, ma siendo ke esto li turo longo tiempo foe ke non lo pudo meterse en dingun etcho, i mas tadre se ivan tomando tambien esto ke lis revenija, i kale dizir por razon ke non si kontentaron algunos de el presipio, foe ke pidrieron ejos i foeron kavzantes de decharlo a S. Naimatche, para siempre dezasperado, i esto lo mas muntcho lo azen akeja djente ke i ejos tambien revataron, sin razon i denpoes lo piedren lo sujo i lo de la djente, i ansi era ke S. Naimatche foe kamenando en vazio i siempre jorando, i sin ke podija a dinguno nada avlar, anke ke el non lo kulpava, i esto ja si unos ke lo azen solo para areirse de el i avengarse de la kroeldad ke es

1689              Biografia de S. Naimatche J. Arié.         1885

En el anio de 5645, S. Naimatche, dezasperado, i mui abatido, de el mal ke li arivo, era ke se iva konsomiendose, i se rekojija temprano en kaza, i en este anio tambien troko i la kaza i se tomo una mas ainda tchika, i kon los gastes de kaza era ke los iva enmankando, i el se decho solo una tchika mosa para la kaza, i el S. Nesimatche ke estava en su banka komo empeigado i ke lo tenija tambien i en kaza, el resivio su paga, de la komision, ke las tenija de aver de 3 anios, las pagas, ke a todos los empeigados pagaron por su djusto, i se vino a Samokov,

Sus ermanos de Samokov, era ke lo ajudavan, en este tiempo, kon algo de moneda porke el non estava podiendo salir ala plasa, para akomodarse or buchkar de azer algun etcho, i ansi era ke i lo kudijavan i muntchos de sus amigos, ke el tenija en kostan i non es komo agora, ke los dechan sufrir fin a el ultimo grado, ke aparte ke non lo ajudan ainda es ke li van i lo gritan i lo avregonsan, i lo maltratan i este los mas serkanos parientes, i mas tadre el enpeso a kamenar i azija algunos tchikos etchos i tambien el buchkava de kovrar de estos ke el ja tenija muntcho de aver, i lis azija saver el grado de su pozision ke se topava, i kon esto ja era ke muntchos li pagavan, el si okopava, lo mas muntcho en las venditas i merkidas de mulkes, ke de esto ja era ke tomava siempre algo de komision, i tambien el ke ja tenija muntchos konosidos en todos los ministerios lo azija ke buchkara para eskapar algunas deferensias ke las tenijan

1690              Biografia de S. Naimatche J. Arié.         1885

 djente de la provensia i ke ja estavan kon anios pudriendosen i el se okopava de esto ke ja reuchija en muntchos i de esto tambien el si pagava, i de esto el konosio ainda i mas muntcho los kaminos de estos etchos, esto li era mui foerte de irles rogando a todos los seja tchikos komo tambien i grandes empeigados, por ke lo ajudaran i para esto tambien el li kalia i ke se iziera i rekomandejar, i mas muntcho lo azija esto por non toparse en las plasas, i entre la djente, ke avija ke lo ivan muntcho prisigiendo algunos de sus kreditores, en medio de las plasas, i lo avregonsavan kon muntcho gretarlo i muntchas vezes era ke i le ivan tambien i ala kaza, i lo todo ja era ke lo somportava kon mui muntcha pasensia, i buchkava a eskonderse, i siempre era ke jorava,

Su mujer kon sus ijas eran siempre en kaza, i ejas sus ijas kontinoavan en sus estudios, i el ijo S. Ferid frekontava i las echkolas, i era sus estudios lo mas muntcho en las lingoas ajenas, i era siempre adelantre, sus amigas ke ejas tenijan era ke siempre la vijitavan, ma eja en este tiempo non salija a dingun lugar, ke sovre esto ke non salija era ke todas la akonsejavan kon las mil maneras de las avlas porke saliera ma eja non lo kijo,

En este tiempo estava el S. Mois bihmoarach, ijo de Tchelebi Chimon de Endirne, en Kostan ke estava merkando koeros tchikos de kodririko i kavrika, seja de las salanas de kostan komo i tambien i de el deredor de las sevdades de kostan, i esto ke era a sumas grandes ke lis dava moneda a los kasabim, de adelantado por dopo

1691              Biografia de S. Naimatche J. Arié.         1885

 resivirles los koeros, i de esto foe ke si afero kon unos koantos de los kasabim, kon sumas mas grandes de moneda, i non estava podiendo, tomarles menos la moneda ke ja kerija rebatirle koalo foesa ma non lo podija, i el S. Naimatche era ke se iva okopando muntcho de esto i el foe kapatche de resentarselo kaje kon todos, i konvenirlo kon kada uno de su manera, ke de esto li era mui rekonosiente el S. Moise, i era ke i li pagava por su djusto, foe esto los presipios de ganarselo por jerno,

En el anio de 5646, el S. Naimatche era ke sofria tambien de algunos de sus kreditores, solo ke era a mas apoko, i el ja lo azija ke moneda ke li entrava en la mano, ja la iva dando a estos ke eran mas menesterozos, i de esta manera lo foe pasando algo de tiempo, el mas non tuvo dija de boeno ke siempre iva abatido, i alas solas era ke siempre estava jorando, i de esto ja era ke si goadrava por non amostrarse ala djente, el iva mui bien vistido sigun de antes, i mui limpio, ke vistidos el ja tenija mui muntchos, el era mui fursudo, ke non si kansava koando el kamenava, dijas enteros i esto mui presto ke eran mui ralo otras personas ke lo podijan alkansarlo, el era alto i godro i mui deretcho, el konosija mui bien la lingoa turka, ansi tambien i eskrivir, el savija la manera de enkontrarse, kon los mas grandes personages, i non si avregonsava anke ke

1692              Biografia de S. Naimatche J. Arié.         1886

 el gagejava, un poko, i tambien de una dolor foerte ke el tuvo en el oido, i li metieron kjullas^[33] enbaradas de sera i adriendo, la detuvo en el oido, ke kon esto ke li pasara la dolor de el oido, ke ja li paso ma si podra dizir ke esto li trucho la sodres, i esto lo izieron en estando en la bana en el tchiflik, porke non avijan medikos esta kecha la dava siempre, ke no lo mandaron a Samokov,

S. Chemoelatche su ermano el tchiko, ke ja si avija espartido de su ermano el grande, S. Mochonatche, en Samokov, el en este tiempo si foe a Kostan, ande su ermano S. Naimatche, arazon ke siendo non estuvo kontente, de la espartision de su ermano, kijo dizirle ke el non kerija rekonoser, algunas piedritas ke las tuvo su ermano en kostan, en los djugos de la borsa, i tambien ke el non estuvo en kostan, en el tiempo de la gera, i su ermano ke kijo djugar i ke foe pidriendo, el kon koala razon tomar parte? ansi i kon la espartision i kon S. Naimatche tambien en 5637 ke non estava kontente, i ke el lo kere por todos estos kontos ke si renoben i ke si meraran de moevo sigun ke ja ai ona lei, en el zakon turko, EADEI MUHASEBE, (boltar de moevo los kontos) i en esto ke el S. Chemoelatche li iva muntcho ensistiendo, i lo iva i apretandolo, ansi ke el S. Naimatche foe mui raviozo de esto, ke mas ja non lo kijo ni resivir, por platikar sovre esto, i el S. Chemoelatche visto a esto el si adereso alos advokatos, ke estos ultimos sigun sus uzos i entereso foe ke lo trucheron el etcho alos djuzgos, i avrieron proseso en el konsolato de Kostan, i el por enkamenarlo iva gastando, muntcha moneda i aparte

1693              Biografia de S. Naimatche J. Arié.         1886

 pidriendo el tiempo, i esto denpoes ke ja si konvensio ke non tenia razon i gastar ke ja non pudo mas foe ke si repentio i se vino, algo raviozo a Samokov,

En este anio el S. Naimatche la espozo i tambien la kazo a su ija la grande Mm Eliza, kon S. Moise bihmoarach djo de Tch. Chimon de endirne, i li djo 400 liras de kontado, i para la boda si foeron de Samokov su S. Madre djunto kon S. Mochonatche su ermano i su mojer la Bu. Amadutcha, i ejos ke ja abacharon toda su familija de kostan, i la novija ke ja si jevo, muntcha achugar ke eja ja la iva prontando de mas antes, ansi ke a todos ejos foeron mui bien resividos en la kaza de el novio, i la izieron la boda kon grande saltanat, i era ke en kada notche kombedava a sus parientes i amigos, i kantavan i se alegravan, porke en endirne en general, toda la djente, ja son alegres i pasadores de ora, i el kante de la boka ke ja lo kantan mui djusto, i trupas de tchalgis ke ja avijan, a unas koantas ansi foe ke si toparon mui bien kontentes, de todas las 2 partes, i denpoes ke ja estuvieron komo a 2 semanas se vinieron kada uno a sus kazas mui bien kontentes,

Seja la novia komo tambien i el novio, foeron mui kichtos de todos los de la kaza, ejos ke si aman muntcho es ansi ke biven mui kontentes, a los presipios ejos bivieron djuntos kon sus otros ermanos, en una kaza en enderne, i kontinuavan en sus etchos de komision, i mas tadre ke ejos los etchos los tuvieron muntcho kurtos, i el S. Moise, se vino a Filibe, por azer algo de etcho en komision

1694              Biografia de S. Naimatche J. Arié.         1886

i el se vino a Filibe kon 16 liras de kapital, i sin deskorajarse el empeso, en el etcho de la komision, ke el tenija unas koantas kazas de ropas de malifaktura, i kon la mas grande ikonomija ke ejos la azijan, seja en los gastes de la kaza komo tambien i en ansi otros era ke lo ivan pasando i kontinuando en lo mizmo, i mas tadre ke el ja pudo ganarse ala kaza de S. Draifus i le djo la reprezentasion por las merkidas de los seriales, ke en esto el foe dando grande foersa, i la aniada ke ja li afeto, porke la kaza izo mui grandes merkidas, de los modos de los trigos, i ke todas las merkidas de el departamento de la trakia entera era ke si azijan por vija de S. Moise, i kon las kazas ke el ja las tenija ke tambien lo kontinuava, era ke en lo todo li foe endo sus etchos mui avante, i iva tiniendo grandes ganansias, i es ke por oi, lo kalkulan, por patron de 500,000 fr, de kapetal, eja la M. Eliza pario 2 ijos Chimon, _____ i una ija, Korin, biven en Filibe muntcho kontentes, i toda la djente de Filibe lo onoran i lo respektan,

En el anio de 5647, S. Naimatche en kostan era ke kontenuava de mizmo en el etcho de los otros anios, lo todo algo en la komision, i kamenando en los ministerios, i ke siempre ja era ke topava a ganarse ma li era muntcho foerte, i lo mas li kalia ke si enprestara por poder tapar sus gastes, i el ja tenija de boeno ke

1695              Biografia de S. Naimatche J. Arié.         1887

ke ja era mui pasensiozo i kurajiozo, por poder somportar sus grandes apretos ke el los travava, i esto ja era kaje en kada dija, i kon sus ermanos de Samokov, ke siempre ja si kartejavan, ma era ke el S. Naimatche non lis azija saver nada de todos los apretos ke el los i iva pasandolos, ma sus ermanos ke ja lo savijan de otra djente, era ke lo akonsejavan, porke serara la kaza de Kostan i ke si vinieran a Samokov, ma siendo ke S. Naimatche, lis devija a S. Mairutcho alkalai, i alos kojumdjis, ke era S. Behoratche B, Eliezer, i S. David Alkalai de Kiostendil, ke estos non si avijan kontentado, sovre el konkordato ke se izo, i travandose non seja ke lo iva a avregonsar, i apretarlo, foe ke non lo topo boeno de venirse, i mas ke el ja non enpatronava, nada en Samokov, sigun ke esto ja lo eskrivi en el anio de 5637, koando si espartio de sus ermanos, i se los avia pasado todo su bien de esto ke el lo enpatronava en Samokov, sin ke si decho ni menos un palmo de tiera, i el foe ke solo lo topo de djusto, de mandar a toda su familia, a Samokov ande sus ermanos, i restar por los presipios, algo de tiempo solo el en Kostan, kon la esperanza ke podrija aver algunos trokamientos, i tambien por estar el algo mas libero, i avija mas tambien ke i algunos de sus kreditores, le ivan endo a su kaza, kon el prestav, por serkosteriar sus kozas de kaza, ke esto li era ainda mas grande apreto, sovre todo ke ivan i jorando su mujer kon sus krejaturas, i en pasando algo de tiempo, ejos rekojeron lo poko de la mobilia, ke tenija i sus vistidos, kon non decharse en Kostan nada, i kon la kontentes de su mujer i krejaturas,

1696              Biografia de S. Naimatche J. Arié.         1887

 el mando a Samokov seja a su mujer kon sus kreaturas komo tambien i la mobilia i las kozas otras ke el las tenija, i la kaza ke la tenijan en Kostan la decharon, i el S. Naimatche si konvino kon una mujer, M. Perla, ke la koala era una mujer bivda, i deskaida, i eja si alkelo un hotel por resivir bekiares, kon ke los mantenija, i los lavava, i dormijan, i el S. Naimatche li pagava a una lira turka ala semana, por lo todo i estuvo en este hotel ke la M. Perla lo kudiava mui muntcho, i en todo tiempo ke su familia estuvo en samokov, el ja foe siempre kudijado de la M. Perla, i era kontente,

M. Rahelu, mujer de S, Naimatche, kon su ija Sara, i su ijo Ferid, ke ja arivaron a Samokov, djunto sus kozas, ejos si abacharon en la kaza de S. Mochonatche, i toda su mobilija i las otras kozas, las metio en 2 kamaretas ke tenija S, Mochonatche, en el primer etaje de su kaza, i ejas estuvieron en una kamareta aparte, en el etaje ke ejos bevijan, i ejas foeron mui bien resividas i mui muntcho kudijadas, i komijan en una meza, eja la Bu. Amadutcha ke i las kudijava mas muntcho era ke li jamava, en su kaza siempre alas parientas, i amigas para ke pasara la ora M. Rahelutcha, i en muntchos dijas eja la jevava, ande las parientas, i alas goertas i los paseos ke avijan en Samokov lo todo para ke ulvedara esto de kostan, i el s. Mochonatche tambien era ke lis enkomendava en kaza, porke li izieran todos sus plazeres, sin ke la decharan sufrir por nada, i ansi era ke ja estava kontenta, i en las notches koando vinijan los ombres a kaza, i ke ejos ja tenijan pijano, i la ditcha Mm. Sara,

1697              Biografia de S. Naimatche J. Arié.         1887

sigun ditcho ke ja konosija el djugar en el piano al fondo, era en kada notche, ke ivan kantando i pasando la ora kon esto, i denpoes ke ja estuvieron longo tiempo en la kaza de el S. Mochonatche, ejas si foeron ala kaza de S. Davitchonatche, kon ke foeron mui muntcho konbedadas ke el lo kijo ke estuvieran tambien i en su kaza el tiempo ke lo kerijan, ke tambien foeron mui bien resividas i mui muntcho meradas, i tenija su kamareta aparte, i komijan tambien de una meza, solo ke las kozas non si jevo i las detinija todas ande el S. Mochonatche seja las mobilias komo tambien i sus vistidos, i koando eja kerija tomarse koalo foesa era ke lo tomava de ande el S, Mochonatche, i tambien la kamenavan i le vinijan por akompaniarla,

En el anio de 5648, S. Naimatche, ke era en kostan i de mizmo en el hotel de la M. Perla, i ansi lo iva pasando solo, i muntchos de sus amigos i konosidos de antes era ke lo jamavan en sus kazas, seja en los chabatiod komo i tambien i en todos los moadim i el restava en las kazas de estos amigos kon semanas enteras, ke ansi ja si uzava en kostan, i entre los dijas el salia mas apoko ala plasa, porke foe mui kanso, de los apretos, i le kalio ke repozara, algo por goadrarse a su salud, el era ke li mandava en kada sigundo dija kartas a su mojer kon sus krejaturas, ansi tambien i le mandava i algo de moneda por su djep hachlik, ansi lo mizmo era ke i eja ke

1698              Biografia de S. Naimatche J. Arié.         1888

li mandava siempre, foe de este tiempo ke S. Naimatche si enpeso a mleskarse en los etchos de el kolel de Kostan, el era ke se iva en muntchos dijas ala Haham Hane, kanselaria de el Haham bachi ke era en kuskundjuk, i eskapava muntchos etchos, komo takrires i pasaportos i otras kozas ke kalija pasaran por algunas de las admenestrasiones de el governo, i tambien i algunas deferensias ke avijan en el Kolel, ansi i por los djuzgos ke avijan entre djidios, ke si meravan en la Haham hane, era ke si eskapavan por vija de el S. Naimatche, i el Haham Bachi ke era Hr. Moche aleviera tambien ke lo protejava mui muntcho, i por lo todo era mui bien pagado, fin a el grado ke arivo en kurto tiempo a ke sin ke estuviera el S. Naimatche, non si merava dingun etcho, i estos ke tenijan el menester de eskapar sus etchos en la Haham Hane kalija ke si aderesaran a el presipio ande el S. Naimatche i denpoes ke si akonsejavan kon el era ke si iva a aderesar a la Haham Hane, ke esto non era solo para los djidios de kostan otro ke era i para los djidios de la turkia entera,

M. Rahelutcha ke estava en la kaza de el S. Davitchonatche, se vino de moevo ala kaza de S. Mochonatche, de mizmo foe i tambien mui bien resivida, i la meravan tambien sigun de el presipio ma eja ja foe mui enfastijada, de estarse komo musafira, i enpeso mas a non kerer salir a dingun lugar, i se iva estando sola en su kamareta, en vezes tambien era i ke jorava, i de esto era ke toda la djente de kaza eran mui sikilijados, de verla ansi ke jorava, i todos era ke la akonsejavan i li avlavan las mil dulses avlas, i le demandava

1699              Biografia de S. Naimatche J. Arié.         1888

si es ke era ke li mankava alguna koza or ke dichera koalo kerija ke ejos ja estavan todos prontos para kontentarla, i eja lis dizija ke non si poeda por nada akechar, ke todo ja estava mui boeno, i ke mas mijor de esta boena kara ke li amostran, non podija en dingun lugar toparlo, otro ke eja si kere ir anlado de su marido, i bivir la vida ke el Dio lis mostrara, esto li turo algo de tiempo i denpoes ja li avija algo pasado, solo ke non estuvo komo al presipio ijo Ferid kontinoava las echkolas, de samokov, i el era lo mizmo mui bien kudiado i mijor de sus propios ijos, de kaza,

Mas tadre ke eja ja non pudo mas estarse en Samokov, demando ke si kere irse a kostan, ke esto si lo izieron saver tambien a S. Naimatche, i el lis respondjo por ke la decharan libera i ke lo iziera sigun de loke eja lo kerija, i el S. Mochonatche kon sus otros ermanos, lo izieron lo mizmo a kontentarla kon el sujo dezejo, sin ke li porfejaron non tambien i apremirla, i eja si rekojo i se aparto loke eja kijo seja de su mobilia komo tambien i de sus vistidos, kon ke decho la mas grande partida, en Samokov en la kaza de el S. Mochonatche, i partio eja kon sus kreaturas kon sus paitones ke ja los tenijan en kaza, i la akompaniaron fin ala chtasion de la bana, ke ala maniana ja arivaron en kostan, todos mui boenos, i el S. Naimatche las resivio kon boena kara, ke foeron de todas las 2 partes mui bien kontentes, i kon la partida de la mobilia ke la decho en samokov mas tadre si la tomaron la una partida el S. Mochonatche i la otra el S. Chemoelatche, kon ke kale seja ke li pagaron su valor,

1700              Biografia de S. Naimatche J. Arié.         1889

el anio de 5649, ke su mujer i krejaturas, ja estuvieron en kostan, ejos si tomaron una kaza a kira, i la mobelijaron, kon la poka mobilia ke eja si trucho de Samokov, i por adjusto de esto ke lis era de primura, lo ivan merkando, i estavan biviendo mui kontentes, i su ija Sara kon su ijo Ferid eran mui gustozos, de esto ke ja estuvieron djuntos kon su padre, i en kostan, ke el S. Naimatche los amava mui muntchos.

M. Rahelutcha era de mizmo tambien mui kontente de esto, ke si foe a Kostan, i ke ja estavan, eja kon sus krejaturas i su marido rekojidos en una meza, eja azija la mas grande ikonomija en kaza, porke eja ja foe arta, siempre de lo todo, ainda de su tchikez de koando estava en la kaza de su padre, sigun ke ja lo tengo eskrito ke su padre era mui poderozo i mui enfloente, ke era la prima firma de kiostendil, i de koando kazo fin a este tiempo ke ja foe, i kon algo mas muntcho, era ansi ke non li enportava, si non tenija todo modo de koza djusta en kaza, siempre loke dizija era sanos estar i repozo ke mos de el Dio, ke mas no kero nada,

Eja aun kon todo ke ja era mui pasensioza, i muntcho repozada, i denpoes ke ja estuvo en su kaza mui bien resentada, i ke ja si topava mui kontenta, foe ke li enpeso a vinir una flakeza, sin ke si akechava ke tenija algunas dolores, or ke non tenija gana de komer, or seja ke dezejava algunas kozas i ke non las estava alkansandolas, ja era ke nada non li mankava, i su marido ke la vija kada

1701              Biografia de S. Naimatche J. Arié.         1889

dija mas dezganada, se iva sikilijando, i le paresija ke poede ser komo mujer se estara pensando, los tiempos pasados, i agora ke esta en este grado, era ke le iva avlandole, porke non pensara lo de antes i ke podija ser ke podran torna arivar en el promer ser, i de esto eja si araviava porke li dizija ansi, ke eja non pensa alos dijas pasados, i ke eja ja esta mui bien kontente i de esta vida, otro ke komo persona, le vino ansi flakeza, ke i esto tambien ja lo iva a pasar era ke S. Naimatche le iva traendole medikos, i le davan las kuras por foersa, ma non era ke li estava en nada ajudandole, i mas tadre ke eja non estava nada trokando la jamo a su ija la grande M. Eliza de enderne, or de Filibe porke si foera a Kostan por algo de tiempo i eja sin tadrar se vino i estuvo en su kaza komo 2 mezes djunto, kon su madre, ke anke lo ivan pasando ma eja era ke non trokava nada i los medikos dezijan atras de ejos, ke ansi flakeza se podija konstatar, los prisipios, de la tuberkoloza, i ke ja si podija sanar, komo era mui bien goadrada i merada, ke esto ja era ke nada non lo dechavan atras i siempre la kudijavan,

S. Naimatche, salija en kada dija ala plasa, i kontinoava en sus negosios de antes, tambien el iva i ala borsa, i azija algunas tchikas operasiones de merkar i vender fondos alevre, i tambien vijitava en muntchos ministerios, seja ke tenija etcho i mizmo si non tenija, ansi de mizmo se iva i ala Haham Hane, en el kazal de kuskundjuk, ke siempre ja avijan para el algunos etchos, i de esto el si mleskava en los etchos de el kolel, i mas tadre li konfejaron

1702              Biografia de S. Naimatche J. Arié.         1889

 i el Gabajud de el kaal de galata, i el era ke jevava todos los kontos de este Kaal de Galata, kon ke tenija tambien i a un sekretar, para esto i ke era pagado, de la komonita, i aparte era ke i a el tambien li pagavan una tchika paga, por esto ke si okopava, i aparte li tomaron i una kamareta en Haviar Han, en galata, kon ke la kira li pagavan de el kolel, porke li sirviera por lokal para merar los etchos de la keila, ke li servija esta kamareta por merar i sus etchos tambien, ke los tenija partikolar, i el estuvo en esta kanselaria muntcho tiempo, Su ijo el S. Ferid, kontinoava las echkolas, i en este anio el entro ala echkola de Robert Koleje, ke avija de los amerekanos en kostan, el era ke toda gazeta ke resivija seja djudija komo tambien turka ke todas eran de el kolel pagadas, i ke si las mandavan en su kanselaria, era ke denpoes ke las meldava lo azija ke las enpakava i se las mandava a su ermano S. Mochonatche en kada dia kon la pochta, i tambien ke li eskrivija i en vezes kartas i le azia saver de todas las moevas de kostan i ansi lo metijan al koriente i de estas de Samokov,

En el anio de 5650, el era ke si enpeso a okopar sovre los dasios ke si pagavan al governo, porke en kostan non azijan los kovramientos de los dasios de los mulkes komo imlak, i idjar^[34], i otros sigun ke kovran en todos los governos, otro ke en la turkija

1703              Biografia de S. Naimatche J. Arié.         1890

era ala boena veluntad de los pagadores, ke koando salijan los birnikis por rekojer ansi dasios era ke les ivan de kaza en kaza i de magazen en magazen, por demandarles los dasios era ke kada uno si defindija de su manera, los unos ke eran suditos, i los otros, empeigados, ke non lis podijan nada apretarlos, i a estos ke ja devijan de pagar regularmente ja era ke li dava unas koantas paras a el birniki tratavan por koanto tiempo non devija de demandarle, i ansi era ke si lis rekojija a sumas grandes las devdas de los dasios, i jo lo vidi en kostan a un amigo, ke tenija un magazen i ke lo kijo venderlo, i denpoes ke ja lo topo a el merkador i se trataron por 500 liras, i para pasarlo a el merkador ke li kalija ke pagara todos los dasios, ke a el vindidor li paresija ke la devia serija poka, i koando ja si aderesaron a esto, lo vide ke el devija por este magazen 445 liras, kijendo dizir ke de su papu ke no tenija pagado dasios, i siendo ke sin pagar non lo podija pasarlo, foe ke si repentio de la vendita i non pago los dasios, i ansi kontinuando va arivar ke los dasios van a ser mas grandes de loke li vale el bien, i de esta manera ke ja eran lo mas muntcho foe ke el governo, lo troko esto de esta metoda, de kovramientos, i lo izo leés moevas, seja por levianesa a los pagadores seja tambien i por kovrar, i esto lo povliko en todas las gazetas i en las plasas, diziendo por todo el ken deve, dasios viejos, ke los podija pagarlos, el 80 % en kaime i otros bonos de el governo ke valijan en la plasa, estas kaimes de 1500 a 1600 gr, la lira, de 100 gr, kere dizir ke uno ke devija 100 liras, era ke las

1704              Biografia de S. Naimatche J. Arié.         1890

 podija pagarlas, las 80 liras en kaime, i ke las podija merkarlas de la plasa, por 5 1/2 liras, i las 20 liras en moneda limpia, kijendo dizir, ke si podijan pagar las 100 liras kon kontar solo 25 1/2 liras, i el S. Naimatche lis merkava las devdas de estos a pagarlas de koal por 30 i koal 35 i algunos por i 28 liras, i el azija todas las formaledades i lis trava los resividas, komo pagadas, i aparte era i ke kontinuava en todo lo de el anio pasado,

Su mujer la M. Rahelutcha, en este anio, foe endo mas muntcho flaka, fin a el grado ke li kalio ke goadrara la kama, i el S. Naimatche era mui muntcho sikilijado, i siempre era ke li iva traendole medikos i algunas mujeres para ke la meraran i ke la velaran, ke non si li estava nada enportando los grandes gastes ke los iva aziendolos, enfrentante porke si sanara su mujer ke la amava muntcho i de todo loke el azija era ke nada de provetcho topavan, a razon ke a eja si li envistio la tekija mui foerte, i ansi foe ke eja estuvo pokos dijas etchada en kama, i murio, para mas nunka levantarse, i esto foe manzija mui grande ke non solo por su marido i krejaturas, otro ke foe para la familia entera, i la joraron en el anio entero, i li goadraron los 7 dijas de el limonio, asentados en kaza i en el anio entero li dicheron el kadich, i se ivan maniana i tadre a el kaal por dizir las tefilod kon minian, i su ija M. Eliza kon su marido se vinieron a Kostan por akompaniarlos i konortarlos, i mas muntcho por kudiar sus bivir de el avenir, ke siendo non tenijan a dinguno de sus parientes en kostan era solo la Mm. Sara ke los iva kudiar

1705              Biografia de S. Naimatche J. Arié.         1890

 i le tomaron a una mujer gizandera, por ke la akompaniara a la Mm. Sara, i en djuntas era ke kudiavan tambien i por la kaza, eja tuvo apenas la edad de 42 anios, era su ijo el S, Ferid ke la joro muntchos anios, sin ulvedarse,

En este anio de 5651, ke seja S. Naimatche komo tambien i sus krejaturas ja foeron fin a un grado konortados de la moerte de su mujer i madre, foe ke la demando a su ija Mm. Sara, un sierto S. Viktor Chnur sudito italiano, por novia para si, ke el koal era en kostan komisioner i representante, de muntchas fabrikas de ropas ke li avijan kon 3 4 anios antes mandado komo sus representante por ke lis vindiera de sus ropas en kostan kon ke li pagavan todas las fabrikas a una sierta mezada i aparte li pagavan i a un sierto % de komision por la suma de las venditas ke el las azia, i el koal ke era un mansevo sin kazar i el S. Naimatche denpoes ke ja tomo todas las enformasiones por el mansevo, i kon la kontentes de la novia ejos lo izieron el espozorio, i en el mizmo anio tambien izieron i la boda, porke el novio non kijo muntchas achugares or kontados, arazon ke el ja era bien riko, i la boda la izieron ala moda franka sin ke uviera dingunos saltanates, i de todas las 2 partes son mui bien kontentes, i biven i se aman muntcho, i la M. Sara ke ja es mui nekotchera, i meradera i kudia la kaza, i mui ikonomioza, i kudia por

1706              Biografia de S. Naimatche J. Arié.         1891

 los enteresos de su marido, i es por esta la M. Sara ke tengo eskrito mas antes ke eja konose al fondo el djugar en el piano, i eja pario 2 ijos jon i Ivio [Livio]^[35], i una ija Beatris,

Agora ke su ija la tchika Sara ja kazo, es ke restaron solos en kaza, sin ke uviera ken ke la kudiara la kaza, i ejos algo de tiempo lo kontinuaron a detenerla la kaza, por razon ke ja era ke li vinija la M. Sara, algunos dijas ma visto ke non era ke la ivan a poder detenerla ejos la seraron, kon ke si aparto algo de su mobilia, el menester por detenerse solo una kamareta, i lo restan lo iva vendiendolo, i ejos padre i ijo se konvinieron de moeva, kon la M. Perla, por la koala ja lo tengo eskrito ke estuvo en su hotel en el tiempo ke su mujer i kreaturas estuvieron en Samokov, i la koala ja era ke kodiava muntcho a sus klientes, sovre todo a el S. Naimatche ke lo kudiava ejas muntcho, i de la mobilia ke si aparto el si mobelio una kamareta en el ditcho hotel, i estuvo muntchos anios, en todo el tiempo ke la M. Perla bivio, i su ijo el S. Ferid era ke kontinoava la echkola, i se vinija a el hotel, ke la M. Perla ja era ke lo merava i lo kodijava mui muntcho tambien, i el S. Naimatche se vinija mas temprano al hotel solo por kudiarlo a su ijo S. Ferid, i la M. Sara ke ja los vijitava en kada dija, seja a su padre ansi i a su ermano el S. Ferid i los kudiava seja por sus vistidos i todos los otros menesteres, el S. Naimatche alos presipios foe mui dezasperado i era ke siempre iva jorando, i mas tadre ja foe ke si lo iva tomando kon mas muntcha pasensia, i koando lo jamavan sus amigos, porke se

1707              Biografia de S. Naimatche J. Arié.         1891

lis foeran todos los 2 a sus kazas, era ke mas non kijo irles, el era ke si gustava mui muntcho, koando los via a sus parientes ke ivan a kostan, i se adjuntava a ejos i kamenava kon ejos, i los ajudava en algunas kozas ke ejos non las konosijan,

El era ke kontinoava en todo lo de los anios pasados i ansi lo mas muntcho en los etchos de el kolel, i koando non tenija ande enbeveserse, el se iva por los konakes de los pachas, ke li eran muntchos konosidos i lo resivijan kon muntcho kavod, i lo respektavan, i de ejos si enbezava muntchos etchos por su menester, i tambien el lis tomava i muntchas rekomendasiones por los otros empeigados ke non los konosia, i alos lugares mas bachos non iva, mizmo si lo tenija el menester, otro ke el los mandava a jamar a su kanselaria i komo non li vinijan si repentija de el etcho ke kon ejos lo iva a poder azer i non irles ande ejos, i kon esto el si goadrava muntcho la onor, el non iva por las kavanes or mejanes seja por djugar or enboratcharse, ni menos avlava kon kada uno ke no li era mui konosido

En el anio de 5652, S. Nesimatche, el ijo de S. Mochonatche, ke estava tambien i el en kostan i ke se enbevisia en korodirias de kambio, djuntos kon su haver S. Agranate de izmir, foe en este tiempo ke si adjunto i el tambien en este hotel de la M. Perla i pasavan djuntos, ke en este anio foe i ke si kazo tambien el S.

1708              Biografia de S. Naimatche J. Arié.         1892

Nesimatche, i el si tomo kaza por si i se aparto de S. Naimatche,

Su ijo el S. Ferid ke ja foe agora mas grande, i sus estudios de las echkolas fin a un grado, ke ja los avija eskapado, lo penso de empeigarlo, en algun lugar ke si mizmo serija kon la paga por los presipios mas tchika, el era mui siguro ke lo iva a topar algun empeigo, pensandose ke el sigun ke ja lo tengo eskrito, ke los izo a muntcha djente empeigar, i a estos ke el los empeigo ja eran agora koal derektor i koal de ejos prokoristos, i otros ke ja si avrieron negosios por sus kontos, de maneras i a todos estos ke el mui bien ja los konosija, li paresija ke todos estos ja se ivan a akodrar i le ivan a buchkar de pagarle agora esto ke el kamenava, i los empeigava, i entre todos estos ke iva aver alguno ke lo iva a kudiar, lo koal ke foe todo djusto la kontra, i el S. Naimatche ke enpeso a vijitarlos a estos, i el lis demandava si era ke si akodravan de koando li vinijan ande el, i li rogavan por ke lis topara enpeigos i el ke iva rogando a uno i a otro, porke los resivieran, i na ke agora, jo vengo a rogar a vozotros, ke resivach a mi ijo, komo a uno de voestros empeigados, ke ja lo se ke ja tenech el poder por resivirlo, va a ser ke mi vach azer plazer ami i bien tambien i ami ijo, i kada uno de estos ja era ke li dizijan ke li eran mui rekonosiente i ke si akodran mui bien de el bien ke el lis izo, i de todo esto ke lis estava avlandoles, i ke ejos tambien de mizmo lo keren de boena gana ajudarlo, ma solo ke si podija ser unos koantos dijas mas tadre i dezijan los unos i los otros, li dizijan ke en sus kanselaria por

1709              Biografia de S. Naimatche J. Arié.         1892

oi non avija lugar vakante, ma ja era ke ivan a merar de la manera foesa, seja en sus kansalareja or seja en otra, i ke non lo ivan a decharlo en vazio, i el S. Naimatche enganiado de ansi falsas prometas, i dechando pasar unos koantos dijas lo azia de irles torna, ke li paresija ke non era enganeos, todas las prometas, i ansi era ke en kada ves ke el lis iva era ke lo resivijan kon muntcha onor, i lo ivan torna etchandolo en dijas kon las maneras de los enganios, i ansi ke lo foe aziendolo unas koantas vezes, fin ke foe enfasiado, de ir endoles i non uvo ni el uno de estos, ken ke lo resiviera, ni mizmo ke kudiara por el, i el S, Naimatche visto a esto, foe ke li rogo a su jerno el S. Chnur, porke lo resiviera en su kansalaria, al menos porke si praktekijara, sin nombrarle koza de paga, i el S. Chnur, por non romperlo a su esfoegro, lo resivio en su kanselaria, i li pago por los presipios, sovre a 4 liras de paga a el mez, ke S. Naimatche foe mui kontente de esto, i el S. Ferid era ke iva kontinuando a ir en la kanselaria de su konijado, i ja era ke lo merava i boeno i lo enbezava tambien,

En el 20 ijar de este anio ke su S. Madre ke estava Samokov, i en la kaza de su ermano el grande el S. Mochonatche, i ke eja estuvo algo hazina, de flakeza, i se poede dizir de vejes, foe ke eja murio, i el S. Naimatche ke ja lo supo en Kostan el li goadro los 7 dijas de el limunio, i la joro muntcho tiempo, ke sus estas las okaziones para akarejar joros ke si mleskan muntchas kozas, el se iva a el kaal kada dija el li dicho el kadich en el anio entero,

1710              Biografia de S. Naimatche J. Arié.         1892

i esto era ke se iva en kada dija a el kaal, eja la Bu, Rahel bivio komo 85 anios, i eja en toda su vida foe sana i rezija, eja tuvo mui grande onor i la katavan todos en Samokov, i todos la jamavan la s. Bulisa, i eja kontentava a muntchas menesterozas de Samokov, i de todas sus boenas koaledades ja lo tengo eskrito en las otras partidas i eja era mui governadera i akonsejava a todos i tambien la sentijan porke su avla era de muntcho meojo,

S. Naimatche en este anio ke foe djugando mas muntcho en las operasiones de la borsa, era porke si enteresava mas muntcho en los etchos de la poletika, ke de esto era ke dependija las rebachos i los aumentos en los fondos turkos, ma non tuvo dingunos profitos, ke por los menesterios enpeso a ir a mas poko, por la razon ke li empesaron a demandarle moneda enprestado los empeigados, ke esto de enprestarles moneda a los empeigados, es ke mas non si lis poede demandarlas, a razon ke en el dija ke si las kerla demandar ja es ke enpesan para azerle los danios, i esto tambien non las podija kovrar lo azija ke se enteresava en los etchos de la komonita,

En este anio de 5653, S. Naimatche tenija muntcho el dezejo, de vinir a Samokov, i sus ermanos ke lo supieron esto lo  kombedaron muntchas vezes, porke si viniera porke i ejos tambien lo  kerijan esto, i era ke seja sus ermanos komo tambien i todos sus

1711              Biografia de S. Naimatche J. Arié.         1893

 parientes, li dizijan i li porfijavan muntcho porke si kazara, kon dizirle tambien, ke non devija de estarse solo, i mas ke era i mui mansevo, ma el no lo kijo, kon dizir ke el mazal sujo, foe a non tener kaza, solo ke kon boeno, a el ferid kazarlo, i mas ke non kerija nada, ma ja foe ki en esto tambien non lo alkanso, porke i el S. Ferid tambien seja por ke non tuvo mekjan^[36] or seja ke el buchkava a topar lugar ande asentarse, i iva endo de lugar en lugar, i ansi foe el estando en marsilia, foe ke afero la mala hazenura de la tekija, i el sufrio muntcho ke lo jevaron a el ichpetal de kostan por ke lo kudiara mijor el S. Lusien ma non tuvo mazal i murio en el anio de 5670, lo poko ke el bivio ke foeron todos sus anios 32, los paso kon apretos, i estuvo sin kazarse ke su padre ja avija morido kon 2 anios de mas antes, i de todos los 2 non lis kedo nada de furtuna, i kon esto se seko esta rama, sin tenerlo por ande i ansi es ke la koza non es boeno de asenialarla de mas antes por el avenir,

S, Naimatche foe siempre sano, el non sufrio de dinguna hazinura, solo ke alos anios de al kavo, sufrija algo ke tuvo el albomin, i ke lo apretava en veses, el en vezes se iva a Enderne, por kamenarse, i non mankava ke ja azija algunos tchikos etchos, porke el i en endirne tenija muntchos amigos i konosidos, i koando a el si li azija el menester de paras era ke si enprestava de el S, Elija de Medina, ke el koal era el kachero de S. Kamondo i eran mui amigos, i el en muntchos dijas se iva ala kaza de su ija M. Sara, i esto koando non estava en kaza su marido el S. Chnur, el lis jevava a sus 2 inietikos

1712              Biografia de S. Naimatche J. Arié.         1893

i enietika, konfiturias i djugetos, i djugava kon ejos, a el Ivio [Livio] lo amava mas muntcho de los otros, i lo jamava kapitan de porto, era kon estos ke si alegrava, i kon su sovrino el S. Nesimatche ke ja estava en kostan tambien era ke si aserkavan tambien muntcho, i en okazion ke era i se ajudavan de el uno a el otro, a el li plazija muntcho meldar, TEVARI,^[37] estoria turka, i el ja tenija muntchos livros en turko, i savija tambien i meldarlos i boeno, el ja konosija mui bien la lingoa turka, ke esto lo enbezo en Samokov, el Rujidié mektebi^[38], ke avija en samokov ke era gamnazia, de 5 klasas, en las manianas el si levantava de maniana, i meldava en kada maniana a un livriko de Teilim entero, i el dezija denpoes la tefila entera kon las zemirod, kon taled i tefilim, i denpoes de esto en vezes meldava i los korbanos i denpoes salija ala plasa, i el en kada tiempo el si fetografejava, i les mandava a todos los parientes, a una fetografija a kada uno, i en sus etchos era de mizmo sigun de los anios pasados i lo todo sovre la komision,

En este anio de 5654, de las 3 kazas, ke las tenija merkado, en kostan ke eran la una de el S, Chemoelatche, i en este anio ke uvo un foego, grande en pera, foe ke si li kemo tambien i la kaza de el S. Chemoelatche, i foe el S. Naimatche ke si okopava por poder kovrar de la sigurita, ke esto en kostan era mui foerte, i le

1713              Biografia de S. Naimatche J. Arié.         1894

 pudo kovrarle serka 500 liras, i el tereno li resto en vazio i kon las otras 2 kazas, ke eran la una de S, Mochonatche i la otra de S. Naimatche tambien ke si kemaron, ma ejos todos los 2 ja las tenijan vendido de mas antes,

S. Naimatche mas ja non tuvo ambision, por buchkar, algun etcho, i por estar mas repozado, por razon ke el a muntchas personas koal foesa ke li avlava, por ke si li adjuntara a el i para echpikolijar en algun negosio, foe ke dinguno non uvo ken ke lo aserkara, ke ja avija ke a muntchos lis propozava, muntchas echpekolasiones i ke eran de azersen, ma era ke las azijan ejos, i les reuchija ke anke lo goadravan de el S. Naimatche ma el ja lo savija, i el ke non tenija ja este karakter para darles kechas era ke si kedava kajado i el era ke torna se okopava en eskapar las deferensias ke las tenijan los unos kon los otros, i de la suma ke lo pagavan el ja era ke si kontentava, en este tiempo ke estuvo H. Davitchon Ariel, de Jeruchalain, en Kostan, ke el koal tenija algunas deferensias kon el governo turko, por unas tieras i etchos de los chemendeferes, era ke lo iva akompaniando, en los minesterios, i otros lugares i esto foe ke li turo mas longo tiempo, fin ke si lo pudo reglarselo i el S. de H. Davitchon ke ja estuvo kontente de su lavoro foe ke li pago komo una suma de 250 liras,

Su ijo el S. Ferid, ja era ke kontinoava de mizmo en la kanselaria de su koniado el S. Chnur, i en este anio foe ke li pojo tambien i su paga a 6 liras a el mez, i tambien lo enpeso i a

1714              Biografia de S. Naimatche J. Arié.         1894

 mandarlo por ke vijitara a sus klientes en la plasa, para ke si praktekijara tambien en esto, i el S. Ferid ke ja era i boen avlador era ke si topava tambien kontente i de esto i lo enbeso la metoda de este ofisio, de la komision, i eskapava tambien muntchos etchos, el de la suma ke resivija de paga era ke non li venija a el padre en dinguna ajuda para los gastes, ke era solo ke si vistija i gastava por sus plazeres i en vezes ja era i ke li demandava i de el padre, porke li diera paras ke en algunos mezes non li abastava la paga ke tomava, i era el padre ke lo mantenija i lo kudijava i en algunas i otras kozas ke era menester de gastar por el i koando li demandava paras ja era ke el padre li dava de lo poko ke el tenija porke lo adjedijava, mui muntcho i ke no estuviera abatido,

En este tiempo algunos de sus amigos ke los tenija de antes foe ke si li foeron alechandose de el i el ke ja lo vija, lo azija ke si ganava a muntchos de los moevos salidos i esto arazon ke si okopava en las etchos de el kolel, i tambien ke era i el gabai de la keila de Galata, i era ke en las adjuntas de Kolel ke avijan era ke kalia ke si topara i el, i de esto lo respektavan, i en muntchas okaziones lo ajudavan, kon ke i lo azijan i ganar algunas sumas de moneda, era de esta manera ke lo iva pasandolo i esto siempre kon la mas grande pasensia,

1715              Biografia de S. Naimatche J. Arié.         1895

En el anio de 5655, El S. Nesimatche su sovrino ke estava en kostan, kon su mujer, i siendo ke sus etchos ke los azija de las korodirijas non li estuvieron tanto boeno kamenandole, i mas ke el non estava en nada profetando, lo izo ke si foe a Samokov, i de esto si sikilio mui muntcho el S. Naimatche seja por ke en vezes ja tenija i algunos provetchos de el i seja tambien ke su ijo el S. Ferid se li iva muntchas vezes en su kaza, i por tener lugar ande en vezes estarse en kaza de familia, i pariente,

Kon el tereno, ke lo tenija S. Chemoelatche, en Kostan de la kaza ke si li avija kemado, era ke li iva eskriviendole a S. Naimatche porke li topara algun merkador ke el la kerija venderla i ke tenija el menester porke non li estava traendole nada de irat, i el S, Naimatche ke ja era ke si okopava siempre koando alguno lo kargava por koalo foesa, i el ke ja era mui kapatche foe ke li topo a un merkador i se lo vendjo por la suma de 500 liras turkas, i el S. Chemoelatche ke ja foe kontente de esta vendita el li pago a su ermano su boena korodirija,

A S. Naimatche li plazija muntcho koando li kontavan los mas viejos de la familia, algunos pasajes, por la Familia Arié i el se enteresava muntcho para entenderlos i lo azija ke si i tomava muntchas notas, i tambien de las edades ke bivio kada uno, i sigun de i loke si komportavan, i komo era sus vidas ke las bivijan i ke las pasavan, i el demandava a todos estos ke ivan a kostan, por todos los miembros de la familia, arié de Samokov i por kada uno aparte

1716              Biografia de S. Naimatche J. Arié.         1895

komo era loke estava i komo lo estavan pasando i seja por los ombres komo tambien i kon las mujeres, lo todo fin a el mas tchiko, por estar i el al koriente de loke si pasava en Samokov, i koando alguno de la familia Arié arivava en alguna estretchura, el lo azija todos los medios, para venirle en la ajuda de esto ke el lo podija, i ansi era ke toda persona ke iva a kostan seja djidios komo i non djidios ja era ke lo buchkavan, para verlo ke de esto el si gustava mui muntcho, el tenija una manija ke si li jorava mui presto, ke era kale dezir de el eskarinio ke el tenija, i era en ansi unas okaziones ke el si estampava i les mandava a todos los parientes, su fetografia, kon la entision ke era ke ja le ivan tambien a mandarle i a el ma era ke todos non li mandavan, i el ke non si astrevija a demandarles lo dechava pasar, sus ermanos li mandavan en kada anio, de Samokov, komo kachkaval, kezo, sarsitcha, dulses de malina i de otras frutas ke no avijan en kostan, i tambien de las alvijanas ke salijan en Samokov ke eran mui savrozas i ke non avijan ansi en kostan, i lo plazija mui muntcho, i por enfrentante era ke i el tambien lis mandava, algunas kozas de komania de kostan, S. Naimatche komija muntcho, i se mantenija tambien i boeno, i el boltava la komida kon ke siempre denpoes ke komija era ke revesava, ma ja era ke non li azija dingun otro danio, el si arapava la barva i los mustatchos los tenija mui blankos, ma los kavejos de la kavesa no li eran muntcho blankos,

1717              Biografia de S. Naimatche J. Arié.         1896

En el anio de 5656, su ijo el S. Esrid [Ferid] ke estava, en la kanselaria de su koniado el S, Chnur, i ke ja estuvo bien praktekijado, en el etcho de la komision, i en este anio tambien era ke S. Chnur lo kargava i en la korespondensia, ke foera eskriviendo kartas alas kazas ke el tenija seja en la Italia komo tambien i en la fransia i otros estados, lo todo porke foera kamenando adelantre, i mas tadre el enpeso a la sikreta a korespondijar kon algunas kazas por ke li dieran a el la reprezentasion ke algunas de ejas ja era ke li prometijan, i de esto el era enkorajado i se konsentija en si ke ja lo iva i el a poder reintchir esto de la komision, sovre esto el ke si akonsejo kon su padre sovre ansi de azer una koza foe ke non lo alesensio en diziendole ke es mui presto a razon ke el ainda non era majorente, i komo es ke li ivan a tener las kazas la konfiensa a una kreatura, ma en pasando ainda algo de tiempo ke ja podija ser i ke S. Chnur tambien ja era de siguro ke lo iva i ajudar, i koanto por algo de moneda tambien ke podija tener el menester esto li dicho, ke kale ke tenga i algo de azer algunas ikonomijas por ke iva muntcho gastando, i ja foe ke i en este anio tambien li pojo ainda mas algo su mezada, i enpeso a meter ala vanda,

S. Naimatche ke era Gabai de el kaal de Galata, el si enpeso tambien i a mleskarse i en los etchos de el kolel, i de el rabenato, i en kostan ke avijan avrido, una echkola semanaria, para ke podieran salir Rabinos por todas las komonitas, i era ke la sostenija el kolel, i en el semanario ke tuvieron el menester de algunos

1718              Biografia de S. Naimatche J. Arié.         1896

livros ke ejos non los tenijan, komo Minhad Chai, i ansi tambien i otros i el S. Naimatche les dicho ke mozotros ja tenemos un midrach en Samokov ande kontienen muntchos ansi livros i se es ke kerijan i merkarlos ke ja podija demandar i ejos ke ja lo kijeron foe ke eskrivio i le mandaron ma la moneda de estos livros ken es ke la resivio es ke non esto al koriente por eskrivirlo, i de esto foeron mui kontentes i gustozos ke ja existen libririjas, i mas tadre ke los miembros de los desendientes de Hr. Tchelebi ke si vinieron todos a bivir en Sofia foe ke si trocheron tambien i esta livrerija, ke foe en el tiempo de el glaven rabino doktor Mordehai Erenfraes, i el Rabino de la komoneta de Sofia, Hr. David Pipano, i kon la kontentes de toda la familia Arié sovre ke los demando el kolel de Sofia, a detenerlos en una de las kamaretas de el Kaal sentral kon ke si ovligaron a godrarlos fin a el tiempo de 10 anios, i denpoes de este tiempo si los kerlan tomarselos la Familia Arié ke deven de entregarselos, i la suma de livros ke si lis entrego es de serka a 1000 livros deferentes i alos gastes de la familia arie si izieron unos armarios ke kostaron serka de 1200 fr, i ke kada uno es libero de estudiar en ejos sin tener el deretcho de ketar afoera de el lokal, i el uvligo lo tiene el S. Leon D. Arié este ke lo djo la komonita de Sofia, i esto si entregaron en el anio de 5672,

por el patronaje de estos livros komo tambien i kon el lokal lugar de el midrach en Samokov, ke apartiene solo alos 3 ermanos ke son Tch. Jeuda Gavriel i Avraam M. Arié porke es ejos ke

1719              Biografia de S. Naimatche J. Arié.         1896

 lo fragoaron i merkaron ainda muntchos livros aparte de los ke los tuvo el S. de Hr, Tchelebi Moche A. Arié. i esto en igoal parte de los 3 ditchos ermanos,

En el anio de 5657, S. Naimatche ke si avija retirado de vijitar por los ministerios, i otras admenestrasiones, foe ke en este anio el enpeso de moevo, a irles, arazon ke muntchos de sus amigos seja estos de kostan komo tambien i de otras sevdades, ke ja estavan mui enfasiados de sus deferensias ke ejos las tenijan i ke non las estavan pudiendo aranjarlas i ke no estavan topando a una persona konfedente i enfloente era ke li rogavan porke si resiviera, el ansi algunas deferensias i ke ja li pagavan mizmo i algo de adelantado, foe ke non los rompia, i se iva tomando en notas de algunos i les iva eskapandolas, kon ke su metoda era de aderesarse, alas kaveseras, de kada admenestrasion, i el no buchkava de el presipio, por azer partido, en los mas tchikos, i ke si en kavzo era el menester, de dar alguna koza de chohad, era ke buchkava el medio de dar solo alas kaveseras, i de esto si li eskapavan mas presto sus etchos, i ansi era ke ja reuchija,

En este anio ke S. Lusien si foe a Kostan por doktor en la medisina i el si li iva en kada dija, ala kanselaria de el S. Naimatche, ke el tambien lo protejava mui muntcho, de mizmo era i ke si li iva tambien i ala kaza de M. Sara, ija de el S. Naimatche, ma

1720              Biografia de S. Naimatche J. Arié.         1897

koando foe ke si kazo, kon M. Florans, ija de el Vitales Pacha, foeron todos los 2 mui raviozos, ke S. Naimatche alos presipios, non li boltava muntcha kara anke ke el ja lo vijitava tambien en kada dija, i esto ke mas tadre si lo resento era ke ja lo resivija komo de antes, en tanto la M. Sara, era ke koando le iva ande eja lo azia ke no lo resivija ni mizmo i koando si enkontravan, no lo saludava i esta ravia lis turo muntchos anios ma tambien i esto ja lis paso, i se vijitavan komo de ante,

Su ijo el S. Perid era de mizmo ke kontinuava en la kanselaria de el S. Chnur, i era ke el etcho li merava kon muntcho kudiado, i todos los 2, ja eran mui kontentes, solo ke el en muntchas de las notches vinija en kaza en el hotel ke ejos estavan mui tadre i el S. Nairmatche ke lo esperava para komer en djuntos, era ke si sikilijava mui muntcho, i en muntchas de las notches el lo azija ke si salija por buchkarlo ma era ke non lo topava, i esto antes de komer, i era uvligado de komer solo i denpoes tambien lo esperava fin ke el iva a venir, i koando ja vinija era ke repozava ma non li avlava nada por ke non si araviara, i non ketar kozas moevas,

Su ija la M. Sara sigun ke ja lo tengo eskrito ke lo vijitava siempre, lo azia de mizmo sin enfastiarse, i eja era ke siempre lis jevava koza de dezajuno, i algunas dulsuras^[39] ke las azija en su kaza, ke a S. Naimatche li plazia muntcho komer kosa de masa, eja los kudiava por sus vistidos, i los tchamachires, i koando lis mankava seja algunos poles^[40] i algunas ruturas era ke eja si los kozia

1721              Biografia de S. Naimatche J. Arié.         1897

i ansi de mizmo i kon tchurapes i otras kozas por un bivo, era ke por lo todo los kudiava i en mizmo tiempo eja li dava regalos ala M. Perla i le rogava por ke los merara, i los kudiara,

En el anio de 5658, S. Leon su sovrino ijo de el S. Davitchonatche, ke estuvo en kostan por vender la kaza, ke la tenijan en kostan i ke foe vendida, por vija de S. Naimatche, kon ke li pago tambien i su mui boena komision, era ke lo iva akonsejandolo, por ke si podieran konvenir de la manera foesa seja kon sus ermanos ke el S. Lusien era ke si li akechava mui muntcho de su ermano el S. leon, i anke ke el ja si defindija kon algunas de sus razones, ma li dizija ke devija i en muntchas kozas dar i de pasadas, i ke non era boeno el estar siempre kon deferensias ke non es sigun de loke li parese ala persona, i akejos tambien tienen sus deretchos, i ke todos los saverisios non kale ke si lo kontenga la persona ke el los save, ansi era i kon sus tios ke era de mizmo ke non si avenijan i siempre estavan kon litigas, i ke non buchkara a enpatronarse en el bien de sus ermanos ke non goele un dija boeno,

En este anio ke jo estuve tambien komo a un mez en kostan i koando ja era tadre ke mas ja non avija plasa, era ke mi i iva ala kanselaria de S. Naimatche, i estavamos oras enteras pasando i kontandomos las vidas ke las pasavamos de mas antes en Samokov, i

1722              Biografia de S. Naimatche J. Arié.         1898

 enfrentante por las vidas de agora, ke las vamos pasando seja nos en Samokov komo tambien i el en Kostan, i denpoes ke ja si azija ainda mas tadre era ke mos alevantavamos i mos ivamos en alguna de las birarijas or kavanes, i siempre ja era ke enkontravamos a muntchos amigos i konosidos, de el tiempo de koando estuvimos toda la Famija Arié en kostan i tambien lo pasavamos kon ir de mizmo kontando sigun de lo boeno ke lo pasimos en akel tiempo, ke i ejos lo dizijan ke mas no uvo akeja manera de pasatiempo, i el S. Naimatche era ke dava las loores sovre esto ke ja si topo en kostan, i ke en algunos de los tiempos de algunos apretos ke en Kostan ja si podijan pasarlo, mas mijor, i se lo olvida el apreto, i por enfrentante ke no asemeja lo de Samokov, ke mas non kedo ni las vignas ni los maadenis i las otras kampanias, ke las enpatronavamos i lo pasavamos i ke lo todo ja esta derokado, ke vino el russo i lo deroko todiko, jcvz^[41].

S. Naimatche, en este anio, por los dijas de el enverano, se iva por kampania a arnaut kjovi, ke es un lugar mui visiozo i es en este kazal ke si veén las agoas de las mares preta i blanka komo si mleskan i koren las agoas de la mar preta sovre la mar blanka, i los kaikes or maonas ke pasan por este lugar es ke los travan kon koedras, por razon ke los poede englotir la mar, i en las notches i en los dijas de las fiestas eran djuntos kon su ijo el S. Ferid i en los dijas de la semana se vinijan a kostan por sus etchos, ke los negosios de todos los 2 eran de mizmo lo de el anio pasado,

1723              Biografia de S. Naimatche J. Arié.         1899

En este anio de 5659, el S. Nesimatche, ijo de su ermano S. Mochonatche, ke estava en Sofia djuntos komo Haver kon un sierto Ben Chimol, i ke eran agentes de una sigurita a vida, i ke ivan asigurando ala djente i siendo ke si ditcho S. Ben Chimol, ke si paso ande si komo una suma de 5 a 6000 fr, i se fujo de Sofia sin ke lo supiera el S. Nesimatche, i S. Nesimatche ke non lo podija azerlo este etcho el solo, li kalio ke lo dechara, i se foe a Kostan por buchkarlo seja por tomarle koalo podija or vinirsen de moevo por kontinuar en el etcho, i esto ke non lo pudo toparlo porke si avija ido ala amerika, i el S. Naimatche era mui raviozo por esto ke no lo kijo askutchar koando li dizija porke non si iziera Haver kon este, i ja era ke torna lo protejava i denpoes ke ja estuvo algo de tiempo en kostan kamenandose en vazio, i su mujer kon sus krejaturas ke estavan en Sofia, en la kaza de el bezesten, ke S. Nesimatche estava i en el Hotel de la M. Perla, ke estava S. Naimatche, i visto ke estavan aziendo muntchos gastes seja su mujer en Sofia komo tambien i el en Kostan, lo izieron de rogarle torna a el S. Chnur por ke si lo resiviera de moevo en su kensalaria, kon ke li pagara tambien i una paga koza ke podija bivir en kostan, kon familia, i el S. Chnur ke ja tenija el menester de personales foe ke lo resivo i le pago sovre a 10 liras a el mez, i foe kontinuando en el etcho de el S. Chnur, i mas tadre el si jevo a su mujer kon sus krejaturas a kostan i sin ke viniera el a Sofia, i foe su mujer ke rekojo i vendjo la mas

1724              Biografia de S. Naimatche J. Arié.         1899

 grande partida de su mobilia, lo todo ke era una mobilia moeva, i mui fina, i komo mujer lo izo ke vendjo una valor de 200 liras por 20 liras, i kon esta suma de moneda eja kon sus krejaturas si foeron a kostan, kon ke si jevo kon eja sus vistidos i kamas, i algunas otras tchikas kozas i ansi foe ke en kostan lis kalio ke merkaran de moevo otra mobilia,

S. Naimatche ke en este anio tambien ke estava en la kanselaria de el rabenato, i el era tambien ke en este tiempo jevava todos los kontos de las entradas i las salidas de el kolel de kostan i en el ja era ke li tenijan grande konfiensa por ke merava i goadrava muntcho los enteresos de la komonita, i en este tiempo ke los Chelohim ke vinijan seja de Jeruchalaim komo tambien i de otros lugares si avijan mui muntcho muntchigoado, i era ke non estavan abastisiendo moneda por darles sus nedavod i tambien mantenerlos, i ke lis pagavan los bilietos de el chemendefer or vapor por ande era ke si kerijan ir, sovre esto en una de sus adjuntas ejos platikaron sovre esto de enmankar los gastes, foe ke lo toparon de nombrar las nedavod por estos ke eran de Kolel darles a 100 fr, i a estos ke eran por si mezmos a 50 fr, i esto komo eran Hahamim i por estos ke non eran Hahamim darles a 25 fr, i aparte seja el mantinimiento komo tambien i el gaste de el vijaje, i esto ke ja lo izieron protokol era ke si enkamenavan a esta lei, solo ke por estos ke eran por si mizmo era el menester de examenarlos por ver si era ke eran Hahamim, i esto li kalija tambien i un Haham ke los examenara, i foe en una ves ke un

1725               Biografia de S. Naimatche J. Arié.         1899

Chaliah de estos ke eran por si mizmo ke si adereso por ke li pagaran i a el tambien la taksa fiksada komo ke ja era i boen Haham, ma siendo ke el haham ke los examenava era ke non estava, i ejos los ke ivan a pagarle ke era el S. Naimatche kon uno otro i ke non eramejos [eran ejos] pertenesientes por examenarlo foe ke dieron karar entre los 2 kon ke lis dichera la LEMIVSAH AL RIFTA de kavesa, esto ja era bastante, i esto de la lemivsah al rifta, ja lo saven ke era ke si uzava a dizirlo en algunas familias en la notche de Chabad en la ora ke ivan a ketar el bogo ke estavan tapadas las 12 pitas ke si mitijan en la meza para azer el anosi, i esto ke en moestra familia ja lo uzavamos a dizirlo, i ansi era ke ja lo savijamos todos de kavesa, ma era ke en muntchas familias ke non lo uzavan a dizir es ke non lo podijan saverlo de kavesa, i ejos ke non toparon otra koza kon koalo examenarlo foe ke li propozaron esto, i el koal ke non lo supo por esto ke ejos tambien non lo uzavan a dizirlo, es ke resivio solo los 25 fr. ma era ke el koal si estava espedasandose kon dizirles ke ja era i bien Haham i ke le demandaran seja de la gemara or de la peracha i koalo otra koza lo kerijan ke ja estava pronto por responder ma no li valio, porke S. Naimatche kon su kompaniero, era ke non savijan de koalo demandarle, i ansi foe ke lis salio el etcho a el rabineto i de esto ke si reéron algo ma ja lo kontentaron tambien i a el S. Chaliah, i no kon todo su deretcho i S. Naimatche ja lo savija esto boeno de kavesa, porke ja lo uzavamos mozos a dizirlo, i el era tambien ke si okopava en eskapar las deferensias de los unos a los otros

1726               Biografia de S. Naimatche J. Arié.         1899

ke vinijan el rabenato ke esto ja avijan en kada dija i ja era ke kada uno li pagavan sigun de el etcho ke lis eskapava,

Era mui gustozo S. Naimatche por su ijo ke ja estava podiendo avansar alguna suma de moneda i ke ja la iva metiendo en la banka, sovre todo aparte ke mas ja non li demando de el padre moneda ja era ke en vezes ke lo vija a el padre koando non tenija paras era ke ja li enprestava el alguna suma,

En el anio de 5660-61, S. Naimatche era mui sikilijado, visto de las vidas ke pasavan, S, Nesimatche kon su mujer, i era ke siempre ivan peleando, i eja era ke iva i aziendo grandes gastes seja en la kaza komo tambien i en sus vistimientas, fin a el grado ke S. Nesimatche non estava podiendo responder, ke de lo poko de la moneda ke li avija kedado, de el kontado, ja lo foe gastando entre las mobilias, i vistimientas, por su mujer, i ansi foe ke mas tadre el si enpresto de su esfoegro algo de moneda, de el S. Rahamim Farhe, i ke esto tambien foe ke en poko tiempo ja si li eskaparon, i el pleito en kaza era ke siempre se lis iva engrandisiendo, i de esto foe ke mas tadre a el li kalio, ke si aderesara ala kanselaria de el konsolo franses en akechandose ke eja los harvava a sus krejaturas, i a su marido lo amenazava en diziendole ke lo iva a antosegar, i de esto ke lo iva aziendo era ke li sovija una vena de lukura, sovre

1727              Biografia de S. Naimatche J. Arié.         1900

 ejo lo izieron ke jamaron a una konsulta de medikos, por ke la examenaran si era ke si li demostrava ansi koza de lokura, i los medikos konstataron ke ja lo tiene esto, ke li viene en algunos tiempos ansi una vena de lokura, i el ke buchko a devorsarla, foe ke estuvo tambien i S. Rahamim. Farhe padre de la M. Irma, i el etcho ke lis i salio alos djuzgos foe ke non podo nada azer, i restaron ke la M. Irma si foera ala kaza de el padre, i S. Nesimatche, kon sus 2 krejaturas estuvo aparte, de eja, i arazon ke tuvo i muntchos gastes seja para los advokatos seja por i otras kozas el kalio ke enprendara partida de su mobilia, para tomar algo de moneda, i mas tadre ke ja si vino a Sofia el kontinoava en los djuzgos, i biven aparte, i el S. Naimatche ke buchko por meter una fin non pudo reuchir a razon ke S. Nesimatche non kijo darle nada de moneda,

En este anio ke en kostan se iva espandiendo la hazinura de la pest, Magefa, i era ke ivan tambien i muntcha djente muriendo, i ansi era ke la djente se ivan kada uno goadrando i se rekojijan temprano en sus kazas, i el governo era ke non tomava dingunas mezuras i ansi foe ke mas tadre ja se depedrio esto i non uvo mas nada, solo ke si goadravan de las komidas mui muntcho,

S. Naimatche era en este tiempo seja arazon de la hazinura or seja por otra koza el si estava en kaza i non salija ke lo mas estava jorando solo i la M. Perla ke lo vija era ke se le iva en su kamareta i de tanto ke li avlava era ke lo azija a ke si foera a la plasa i kon esto era ke ulvedava algo, ma era ke se vinia tambien temprano i antes ke viniera su ijo el S. Ferid, i de mizmo jorava,

1728              Biografia de S. Naimatche J. Arié.         1901

En el anio de 5661 ke si espandjo mas muntcho la hazenura de la pest, en kostan, i esto era mui foerte i aparte era ke i iva uviendo i algunos kavzos de la kolera, i sovre ejo el governo Turka tomo sus mizuras ala turka, kon ke nomeno komisiones en kada departamento, de kostan, i esto de medikos mleskado kon i otras de las personas ke savijan la metoda de esto, i les djo el poder, alas ditchas komisiones de azer ejos sigun de loke ejos lo topan por mas mijor para depedrer estas hazinuras, i ejos en sus adjuntas ke ejos las tenijan de kada dija platikando de esto foe sus ditchizion, de komandar a todos los medikos, i felcheris, i mojeres medikas^[42] de el pratik ke avijan en turkija, i alos hoteldjis i otros, kon bien akavedarlos, ke deven de tener mui grande atansion, sovre las hazenuras seja de la pest komo tambien i de la kolera, por koando alguno seria atakado de estas hazenuras, ke devijan a el punto de azerle saver a las komisiones, kada uno en su departamento, i ke si en kavzo alguno kerla goadrarlo, ke iva a ser kondenado ala moerte, i ansi era ke seja los medikos komo tambien i los otros ke ivan dando de nota alas komisiones por ande si demostravan hazinos, i las komisiones ke ja tenijan prontos sus hamales, i sakos i koedras, i piedras, lo azijan ke denpoes de la medija notche, lis entravan en los lugares ande los hazinos estavan, i sin nada avlar, lo rekojijan a el hazino, i lo metijan arientro el sako, i bien atado kon arientro las piedras, para ke foera pezgado, i los ivan etchandolos ala mar, i alos de kaza lis dezijan ke era a las bolnisas ke lo ivan a jevar i los akavedavan ke

1729              Biografia de S. Naimatche J. Arié.         1901

non lo dicheran a dinguno, i ansi era ke dinguno non podija nada avlar ni menos akecharse, i dizen ke ja uvo unos medikos ke kijeron goadrar ansi a algunos hazinos seja por ke ejos ja lo savijan i ke i lis eran seja parientes or ke lis dirijan ruchfet, i denpoes ke si supo la koza foe ke los etcharon a ejos ala mar, i avijan tambien ke muntchos non jamavan alos medikos i lo goadravan, ma torna ja era ke de muntchos se savian, i alos presipios toda la djente no lo savijan de esto ke lo estavan aziendo, i mas tadre ke ja si espandjo esto, foe ke muntcha djente se ivan foendo de kostan, i estas komisiones lo toparon ke komo lo azijan ansi era ke non si podija mas espander por ke son haziniras apegaderas, solo ke non meravan si era ke si i podija saner, or ke non lo entendirijan bien los medikos, i era al punto etchado ala mar, i ansi foe ke etcharon ala mar kon miles de personas, i en este tiempo profetavan tambien por etchar ala mar i algunos ke lis tenijan el garez or ke eran de el partido kontrario de el Sultan Hamid, este ke foe izolado a Saloniqe, i ke estuvo en la Vila de S. Alatini, porke foe esto en su tiempo, i sovre ejo el S. Naimatche, lo mando a su ijo el S. Ferid a Samokov, ande sus ermanos por goadrarlo de esto, i estuvo en Samokov serka de 6 mezes, i denpoes de esto koando ja non si sintija mas dinguna hazinura de estas en kostan si foe de moevo a kostan i a su etcho de antes,

i el S. Naimatche tambien foe ke en este tiempo i el si salio de kostan i se foe kon otros sus amigos en una de las kampanias de kostan, i era ke lo iva tambien mui boeno pasandolo, ke si

1730              Biografia de S. Naimatche J. Arié.         1901

entiende i ke si goadrava tambien i mui muntcho, i el non abacho a kostan en todo el tiempo ke estuvo la hazinura, el i ke era en mui sikreto, un miembro de la sosieta de los masonim, i de esta sosieta era ke lo ajudavan en muntchas okasiones, seja en moneda komo i tambien i en otras kozas, i el era ke si i azija tambien i rekomandar de los personages los mas grandes de esta sosieta ke ja avijan muntchos ke eran abonados, i sigun ke ja lo saven ke esta sosieta es fondada de los mas altos personages, solo por ajudarsen de los unos alos otros en todos los kavzos sovre todo koando alguno deskae,

1731

Asta aki si eskapa la partida de la biografia de el S.

Naimatche, J. Arié sigun de loke lo paso en kostan de el anio

de 5637 fin 5660-61