חכם רפאל ואחיו סניור חיימצ'ה עד שנת 5591

270 BIOGRAFIA, de los 2 ermanos H. REFAEL i S-r. HAIMATCHE A. ARIE.           1830

5590

Ejos los 2 ermanos, si izieron kontratos kon sus kundisiones, i los afermaron en tomandosen a uno a kada uno, i se asentaron en la butika ke ja estava de antes, i ivan aziendo las mizmas venditas de antes, i ansi era ke si topavan mui kontentes, i ejos los 2 ermanos ke ja eran mui aunados, ivan kontenoando en sus negosio i el uno de ejos ivan siempre jevando ropas a las kazas de los turkos ke ansi era el uzo, sigun ke ja lo tengo eskrito ke las mujeres en akeos tiempos non salian para azer los empleos de sus menesteres a la plasa, i poko tiempo pasando ejos los 2 ermanos ditchos si merkaron una kaza, mui boena i mui barata i lis kosto 1800, groches, ke si pasaron en eja, kon ke la mobeliaron i algo de reparasion ke li izieron, i la primera notche ke si pasaron ejos jamaron a sus ermanos i todas sus familias, i sus amigos i komieron i bivieron i kantaron i se alegraron todos djuntos, por la boena estrena de la kaza ke ejos la merkaron, i ejas las mujeres si pasavan i se respektavan de la una a la otra mui muntcho, i ansi es ke bivian en eja mui kontentes,

la ditcha kaza es esta ke en moestro tiempo la enpatrono Sr. MAIRUTCHO ALKALAI, ke era jerno de H. REFAEL, i es en el jekuch^[5] de los molinos antes de el KAAL viejo,

mas tadre ke ejos ja lis mankava los artikolos de la butika, si pronto H. REFAEL para ir a Kostan por azer los empleos menesterozos, ke foe por la primera vez ke iva a ir a Kostan el si jevo muntchas kartas de rekomendasion, i por si ke ja era un ombre mui reprezentante, foe ke en Kostan tuvo grandes onores ke lo jamavan en

271 BIOGRAFIA, de los 2 ermanos H. REFAEL i S-r. HAIMATCHE A. ARIE.           1830

muntchos magazenes por venderle ropas, i tambien lo kombedavan en sus kazas, para komer i durmir, i buen pasador^[6] de ora ke ja era, ansi ke si topavan todos mui kontentes, el si enbezo muntchas moevas kantikas en Kostan, ke koando vino a SAMOKOV las embezava a todos ejos para kantarlas djuntos, el si merko vistidos i kjordis de boenas samaras, ke era una persona mui jakichikli, el era alto i godro i kamenava mui deretcho era sano i mui rezio, i su kara era riente, i denpoes ke ja eskapo de azer sus empleos, ke vino a SAMOKOV, li trucho prezentes para el AA, i para los otros BEGUIS, i aparte trucho para todos sus ermanos, i sus familias, para kada uno un modo de presente, este era su plazer, aun kon todo ke para alguno non li sera enteresante, ma non kalo ke pensa, kada uno ke la koza ke non es enteresante para el uno, es enteresante para el otro, i aki si esta kontando, akejo ke lo azijan, ejos mui kontentes, azian sus boenas venditas, i las ropas ke presto non si lis vendija, las enpakavan i se las jevavan a las FERIAS, ke avian muntchas, i lo mas muntcho frekontavan las ferias de la parte de la makedonia, ejos en este anio si foe el S-r. HAIMATCHE, a la Feria de PETRITCH, i tuvo boenas venditas, ke belte [bolto] mui kontente, el ditcho S-r. HAIMATCHE ja tengo eskrito ke era mui flako i koando belte [bolto]^[7] de esta Feria, estuvo etchado en kama hazino serka 2 mezes, i denpoes ja estuvo boeno, i kontinoava en su negosio de la Butika, i su ermano H. Refael ke lo kudiava muntcho, era ke non lo apretava por nada, i lo mas muntcho lo lavorava su ermano, ejos todos los ermanos si protejavan i se ajudavan de los unos a los otros mui

272 BIOGRAFIA, de los 2 ermanos H. REFAEL i S-r. HAIMATCHE A. ARIE.           1830

muntcho i tambien si vijitavan dekontino, seja ejos komo tambien i sus mujeres, lo mas muntcho se ivan a la kaza ke estava la Bu. BUHURU sus MADRE, ke esto lo azian en todos los MOADIM, i los mas muntchos CHABATOD, i esto ja si kontinuo fin al tiempo moestro ke era uzo i komo un uvligo de vijitar siempre al mas viejo de la FAMILIA seja ke era ombre er [or] ke foera mujer, i koando alguno de la Familia, ke non iva ja era asenialado, i todos demandavan la razon,

Ejos non tenijan dingunas korespondensias, kon dinguno para eskrivir or resivir kartas, ansi tambien kon los kontos de sus butika era mui flako i non tenijan livros de jevar anke la mas tchika kontabelite, era solo ke el Sr. Haimatche tomava algunas notas de loke era lo mas enportante, i esto en un teftiri ke lo jevavan en el petcho,

Sus ermano el grande ke ainda non si avia aferado en dingun etcho, i tambien non avia enbolsado toda la suma ke el devia de resivir, a razon ke los averes ke pasaron todos a H. Refael era ke en kovrandesen se li iva ir dandole de esto ke si iva enkasando una sierta pursion, i siendo ke Hr. Josef tambien ja enpeso de el presipio en su merkansia i ansi de mizmo i H. Refael kon Sr. Haimatche i ejos ke ja estavan bien okupados en sus negosios, es ansi ke non tenian tanto el tiempo de buchkar a azer los kovramientos, era ke iva kamenando Hr. Tchelebi, i de esto ke kovrava si lo espartian ande H. Refael, de mizmo li davan tambien i la parte de Hr. JOSEF, i mas tadre HR. TCHELEBI non kijo mas azer ansi kovramientos de los ke

273 BIOGRAFIA, de los 2 ermanos H. REFAEL i S-r. HAIMATCHE A. ARIE.           1830

tenian de aver a razon ke a H. Refael, li parisjo ke Hr. Tchelebi goadrava, algunos kovramientos, ke sovre esto tuvieron un poko de litigas, ma foe ke presto ja si entindieron, i enpeso de moevo a ir buchkando a kovrar, i en poko tiempo ejos kovraron todo sus averes ke tenijan, i hr. TCHELEBI ke li avia kedado a dever a H. Refael 2000 groches, por la mubilia de kaza ke tomo demazia, foe ke li dio en esta okasion un akonto i por lo restan kedaron de akordo para pagarselos por largos tiempos,

En este tiempo foe ke lo mataron al Sr. de Mehmed emin Aa i su ermano el grande Hr. Tchelebi ke si topo propio en la kamareta ke lo mataron, eran todos mui sikilijados, i en la partida de Hr. Tchelebi ja lo vo a eskrivir en mas largo i sigun de loke paso, ke a esta razon los etchos todos foeron mui kurtes [kurtos], i tuvieron grande espanto mizmo i por ejos, ke Sultan Mahmud iva aziendo kortar las kavesas tanto presto de kada persona ke li azian saver ke tenia relasion kon los Djeniseros, ma en Samokov foe solo a las kaveseras de los Djeniseros ke lis izo kortar las kavesas,.

En este anjo de 5591, ke ja si resento, i repozo la sivdad kon ke entre en su lugar su sovrino USREF BEG, porke el AA, non tuvo eredaderes, mizmo ke tuvo 4 mujeres, ke por el koal tambien ja tengo de eskrivir mas denpoes, la manera ke enpatrono este posto, i todos

274 BIOGRAFIA, de los 2 ermanos H. REFAEL i S-r. HAIMATCHE A. ARIE.           1831

los 4 ermanos, en el mizmo dija ke si asento en la SIJA de este posto ja li foeron a saludarle i lo akodraron sigun ke el S-r. de Mehmed Emin AA, los trucho, a SAMOKOV, i los goadro, si es ke i el tambien los va a goadrar, i konosimiento ke ja tenian de antes, lis dicho ke el ja lo save todas las kozas i ke esten siguros i mui liberes i ke el tambien ja tiene de kudiar por ejos, i todos ejos li bezaron los pies i se salieron

Ejos los 2 ermanos sigun de antes ivan kontinuando en sus negosio, i en mizmo tiempo ivan jevando i ropas al konak del Usref Beg ke el koal tambien tuvo 4 mujeres, i mas tadre ke sus artikolos ja si lis manko foe ke partio de moevo el S-r. de H. Refael por Kostan, i izo mas grandes empleos, kon la entision de fekontar [frekontar] las Ferias, ke le izo ansi i en arivando a Samokov, denpoes ke izo las primeras venditas, ejos enpakaron una suma grande de ropas i las mandaron a la Feria torna de Petrich,

i S-r. Haimatche ke ja tenia ide [ido] i mas antes foe ke i agora tambien partio, ma por desplazer, sigun ke ja saven ke era mui flako, es ke por el kamino ja si hazenio, i a penas ke arivo a la Feria kon muntcho mal pudo alkansar a resentar la una partida de su ropa en la Butika, i mas non pudo i kajo foerte hazino i si etcho en la kama, i sus kamaratos ke ja lo vieron la negra kaida ke kajo i sin tadrar ja li eskrivieron a H. Refael, por ke viniera, i todos los kudios posible anke li dieron i todo foe sin dingun provetcho i fin ke la karta vino a Samokov, i tan presto ke i H. Refael ja partio ma

275 BIOGRAFIA, de los 2 ermanos H. REFAEL i S-r. HAIMATCHE A. ARIE.           1831

non pudo alkansar, porke el Sr. Haimatche al sigundo dia ke si etcho en la kama ja murio, sin ke tuvo dinguno de su djente kon ke lo kudiara, i a todos los Djidios, ke eran de moestras partes lis foe un mui grande desplazer, ma non tuvieron dingun remedio, sus mas amigos, li seraron la butika sigun ke la decho medja resentada, i li rekojeron todo esto ke tenia, i lo jevaron a Chiron (Seres) por ke lo rijeran, i lo enteraran, a razon ke en Petritch non avia komonita de Djidios, i ja si keri entindido la manzia ke foe ke si depedrio por los kampos^[8] un miembro de la Familia en la flor de su manseves, en dechando a su madre i sus ermanos i mujer i su unika ija en la mas grande dolor, ke lo joraron mui longo tiempo sin ulvidarsen, i koando ja arivo H. Refael ja foe tadre ke ja lo avian enterado i la Feria ja si avia serado, foe ke rekojo todo loke avia, ke tuvo muntchos danios ansi de mismo li ketaron mui grandes gastes, seja en Petritch komo tambien i en SERES, i H. Refael li goadro el siete en Seres i lis izo saver tambien a sus ermanos en Samokov de la dezgrasia ke i ejos li goadraron el siete i izieron todas las formalededes del uzo, i de moevo lo joraron el anio entero,

i koando ja bolto H. Refael a Samokov era solo el ke si merava el etcho de la Butika, ma solo ke non si izo un Bilanso ke sovre ejo ja lo ivan akodrando sus ermanos, i siempre lo foe etchando en dias, i kon la Bivda i su ija Ester ke eran en kaza las kudiava mui muntcho H. Refael, solo ke eran mui doloriozas, Es boeno poedi ser si al uno de la Familia Arie terna la

276 BIOGRAFIA, de los 2 ermanos H. REFAEL i S-r. HAIMATCHE A. ARIE.         1831

okazion de estar en la Sivdad de Seres, va azer mui boena si li aze una IZIARA, i vierte en la lampa de el TAMID unos koantos gramos de azieite [azeite], por el repozo de la alma de el S-r. Haimatche uno de los miembros de la FAMILIA Arie, ke murio lechos de sus parientes, i ke non tuvo Ijos, afoera de una Ija Ester ke por la koala ja tengo de eskrivir algo de su vida,

Denpoes ke ja pasaron unos koantos mezes, de la dezgrasia li vinieron sus ermanos de la Bivda a vijitarla, i ejos la vieron ke ja era mui bien kudiada, ma eja non kijo estar mas en Samokov, i lis rogo a sus ermanos, porke denpoes ke kortaran el anio ke la jovaran a Sofia, i ke non buchkaran agora dingunos kontos, seja por la KETUBA ansi tambien i los bienes de su Marido, ke lo todo foe en grande sikreto, i denpoes ke ja estuvieron unos koantos dias, partieron a Sofia

en este anio, dinguno de los ermanos non tuvieron del entodo dingunos pasatiempos, ke lo mas muntcho si vinian en la kaza de H. Refael, i era ke meldavan, ke esta moerte de el Sr. Haimatche lis trucho a todos mui grande ansija, ejos todos los 4 ermanos, si ivan kada dija maniana i tadre a el KAAL i dizijan las TEFILOD, kon minjan i li dizijan todos 4 ermanos KADICH, i este lo kontinuaron en el anjo entero, i denpoes en todo el tiempo ke bivieron los ermanos li azian en kada anjo el jar-sejat,

en este anjo Sr. Eliezer B JEUDA, ke era tambien merkader, enpeso a konkorijarle a H. Refael i enpeso tambien i el a javar ropas ande el Usref Beg, el koal es H. Lezirutcho Kujumdji, ke de

277 BIOGRAFIA, de los 2 ermanos H. REFAEL i S-r. HAIMATCHE A. ARIE.           1831

esto tuvo algo de danios, ma non tenia koalo azer, i komo estava tambien solo era ke non alkansava, ma esto por los presipios non li foe grande danjo, ke mas tadre enpesaron i otros sus klientes a irle a la butika de H. Lezirutcho, i se gano el nombre BAZIRJAN, ke a su mujer fin toda su vida ke bivjo la jamavan la BAZIRJANA, i a H. Refael lo jamavan HODJA RUFAIL.

Aki si eskapa la Biografia de los 2 ermanos, H. Refael i S-r. Haimatche, en el tiempo ke lavoraron djuntos, i ke murio el Sr. Haimatche,

VIDA DEZMENGUADA

Visto a lo poko ke bivio el Sr. Haimatche, foe todo kon dezventura, el por si foe siempre flako i hazino su moerte foe por los kampos, de el non kedo eredador por levantar su nombre, i de la su fortuna ke decho ni su unika ija, non si aprovetcho, es solo sus parientes de jorar por la suja non boena estrena,

278

De aki i endelantre enpesa la Biografia kon algunos pasajes, i otros, de H. Refael, i sus vinientes detras de el fin a el anio de 5660, kon sus datas i partidas aparte de kada kavesera, por sus Djerenansios, i kontinuando la prensipal data,