קורותיו של סנ' מוֹשוֹנָצֶ'ה יצחק אריה

1934

De aki i endelantre si enpesa la partida

de el Sr. Mochomatche J. Arie. denpoes ke si

salio su ijo Sr. Bensijon de el anio de 5657 fin a

el anio de 5600-61

1935                 Biografia de Sr, Mochonatche J. Arie.          1897

En el anio de 5657, ke el Sr, Bensijon mas ja non li foe a sus butika, i ke ja partio tambien i se foe a Sofia, de la una parte el Sr. Mochonatche era pensativle i algo i sikilijado, ma de la otra parte era i gustozo, sovre este ke ja se iva a merar por si i ke mas el Sr, Mochonatche ke non iva a tener dingun kargo por el ma foe ke Sr. Mochonatche non kudio en este tiempo, por koando iva a partir se era ke tenija paras para el vijaje, solo ke foe ejos en este tiempo ke tuvieron algunas litigas ande lo kavzo ke si foera de Samokov, el de tanta ravia ke tuvo non li demando de el padre por ke li diera, mizmo de loke el enpatronava de el etcho de la butika, i el padre tambien ke si aravio foe ke non se izo ni de el savedor, i ansi foe ke Sr. Bensijon partio sin nada de moneda, ande el travo mui grandes apretos, sin poderlo deskuvrir a dinguno,

En este tiempo ke ja estuvo solo en la butika foe en una notche ke li salio foego i haver ke ja li dieron presto el ja pudo alkansar lo poko de ropa ke el la tenija, i era lanas kon algo fieros i siendo ke si mojaron foe ke tuvo de danio komo unos 1000 f.

En este anio de 5658, era ke de mizmo kontinoava en algunos artikolos, ma eran los profitos mui tchikos, por ke i el etcho ke lo azija era tambien tchiko, el enpeso a traer sal de mar kon

1936               Biografia de Sr, Mochonatche J. Arie.            1898

vagones, i en vezes se iva el mizmo a Burgas por merkarla i la suma ke vendija era de un vagon a el mez, kon ke las ganansias eran de 40 a 50 fr. por vagon, i este era solo por los mezes de el enverano ansi tambien era i en los otros artikolos ke esto se vija ke lo azia solo por englenejarse i non estar en vazio,

El en muntchos dijas se iva ala butika de el padre i lo pasavan kon oras, enteras, avlando de el mundo, era mui mirikiozo de parte de la komania, i le plaza merkar de lo boeno, i de todos modo de komania el merkava siempre a kantedades grandes para ke uviera en kaza siempre a muntcho, el non si haraganijava de ir a kaza unas koantas vezes i esto por la mas tchika koza, a el li plaza muntcho saver de las moevas de la sevdad, por estar a el koriente en lo todo li plaze tambien ke lo onoren i ama muntcho a su mujer i kreaturas el sufre de una dolor en el estomago, kaje siempre i se goadra mui muntcho de las komidas, i su mantinimiento es solo de karne, i algo de los kondutchos, el frutas non kome amontcho, a el en kada 3 i 4 oras li viene komo un istilo i li kale ke koma mizmo un poko de pan kon sal porke tiene el estomago mui avierto, i este li kalo ke le tenga siempre kon si

En este anio ke si regolijo la plasa ande tenija i el la butika ke avija tomado de el padre koando se salio, i siendo ke si li foe para la ulisa entera, foe ke li dieron en su lugar otro kampo en el tcharchi de las kasapanas viejas, i por lo demazija ke li dieron foe ke lis pago en el gradskisovet, 360 fr. este moevo

1937              Biografia de Sr, Mochonatche J. Arie.           1898

kampo el lo frago i izo una grande butika en 2 apartamentes, ke la una li servija por su kanselaria i la otra por deposito por sus ropas, i li kosta komo a 100 napoliones de gaste, foe de mizmo ke i en este tiempo ke si enderetcharon i las kaes ande ejos tenijan la kasas, i de la kaza ke morava el Sr. Mochonatche li tomaron la medija kamareta, i a esta razon li kalio ke i adjuntara i otra kamareta ke gasto en todo 75 napoliones ke era kontra metad kon el padre el gaste i kon esto se li izo la kaza mas grande,

En el anio de 5659, a razon de la moeva butika i ke ja foe muntcho mas grande, de la ke tenija mas antes, i visto ke los klientes si li estavan i enmankando, lo izo de traer ainda, mas muntchos modos de los artikolos ke el los vendija parisiendole de azer mas grande el etcho, lo koal ke foe al kontrario, i era ke kada dija se le iva entchekisiendole el etcho, lo izo i enpeso el mizmo a kamenar en las butikas de los bakales por prometerles de los sujos artikolos, ma ja era ke avijan otros konkorentes, ke estavan koriendo i vindiendo, de estos mizmos artikolos muntcho mas barato de loke kerija vender el Sr. Mochonatche, i el era ke iva tiniendo la pasensia aziendo konto ke non lis konvenija a vender a sus konkorentes en los presios ke ivan vindiendo, ma la koenta era ke estos konkorentes ja lis konvenija por ke el gaste sujos era de 10 fr. ala semana a tiempo

1938                  Biografia de Sr, Mochonatche J. Arie.           1899

ke Sr. Mochonatche kerija al menos 80 fr. ala semana de gaste, ke bivija boeno, i mas ke los konkorentes era ke si etchavan ejos el sako de sal de 100 kilos i se lo jevavan a el muchteri por ke non pagara hamalik ke esto Sr. Mochonatche non lo podija azer, i mas ke en Samokov ja foe en general para toda la Familia Arie ke non lis merkavan de ejos dingun modo de artikolo por ke non ganaran, i aparte era tambien i ke los dezonravan, i los maltratavan, i de esto foe ke non pudo bivir mas la familia Arie en Samokov,

era ke en kaza si komportavan de mizmo sigun i de antes sin dingun trokamiento, el en este tiempo ke su ijo Sr. Bensijon ke ja estava en Filibe, si foe a Filibe por vijitarlo i tambien por akonsejarse ke los kerija mandarlos a sus 2 los otros ijos mas tchikos, Ezra kon Gavriel, ala echkola de filibe sigun eskrito mas adelantre, por la suja entision,

En el anio de 5660-61, Sr. Mochonatche si los jevo a Filibe a sus 2 ijos Ezra kon Gavriel, i lo metio a el Ezra en la gemnazia de filibe en la 4 klasa, kon la entision ke kontinoara fin a la setena klasa, lo koal ke no lo izo i apenas pudo detenerlo fin a la sinkena klasa, i a el Gavriel lo metio en la echkola de la aliansa de filibe, por ke enbezara mijor el franses i en mizmo tiempo ke diera la mas grande foersa sovre el Lachon akodech, sigun ke ja lo

1939               Biografia de Sr, Mochonatche J. Arié.                   1900

eskrivi mas antes, ke su entision era, por ke foera mandado de filibe ala echkola de paris de la aliansa jsraelid, de mizmo i ke foera detinido alos gastes de la aliansa, ke i en esto tambien foe ke no pudo reuchir, i la razon ja lo eskrivi tambien mas antes, ejos estuvieron en la kaza de su ermano el Sr. Bensijon, i se konvinieron ke li tenija de pagar el Sr. Mochonatche a Sr. Bensijon a 40 fr. a el mez por sus mantinimiento i aparte ke li i tenija de ajudarlo por i kira de la kaza, i denpoes ke los resento foe ke si vino a Samokov, i el ke enpeso aver ke el etcho de la butika non li estava de el en todo boeno kamenandolo, i en kada dija era ke se li iva enmankandole los etchos fin ke li arivo algunos dijas ke non vendija ni menos un fr. i ansi foe ke mas non trocho ropas moevas, otro ke siempre iva buchkando de ir enmankandolas, i a esta razon el enpeso a azer algo i de la ikonomija en los gastes de kaza, i tambien lo azija ke si li iva ande el padre i se li konjorava, de esto ke non li eran boenos los etchos, i ke el gaste tambien li pujo muntcho, i lo iva demanda por ke lo ajudara kon alguna suma de moneda, i siempre loke li dizia era ke si lo kresio muntcho la familia, i ke non estava podiendo abasteser por los gastes, i ke ja se izo i viejo, i ke non esta tiniendo la foersa para ir siempre koriendo, i el padre por non refozarlo de esto ke li kontava i ke non li topava razon ja era ke lo regalava siempre seja kon moneda komo i kon i otras kozas, i el era ke entre la djente si komportava de mui galante, i non si demostrava de nada sovre lo ditcho ariva, i era ke todos lo tenijan ke era mui riko,

1940                   Biografia de Sr, Mochonatche J. Arié.                 1901

el ke ja tenija boen protejo de su Sr. Padre i en el anio de 5661 koando ja vino, era ke iva mui ralo por la butika suja i lo azija ke en muntchos dijas el koando la avrija en la medio dija i koando non la avrija de el entodo, i kon la ropa ke li avija kedado era ke la i iva vendiendola kon unos presios muntcho baratos, por dezbarasarse enteramente de eja, i alos kavo ke li avija kedado komo una suma de 2000 fr. la vendjo por tiempos mas largos, i la sero la butika enteramente, i en sus deskaimientos era ke kovrava, i pasando algo de tiempo ke ja estuvo enfastijado de estarse envazio, el la avrio de moevo la butika i lo izo por merikija de enbezarse el kondradjilik i el si tomo a un maestro por ke lo enbezara los presipios de esto, i se merko los enstromentos menesterozos, i se izo i una prostela de kundradjis, i una sija bacha kon una mezika para esto i estava dijas enteros lavorando en esto, i al presipio les izo laptchenikos para las krejaturas, i ke ja si kere entendido ke foeron el uno tchiko i el otro grande i todos los 2 de un pie, i mas tadre les izo i kunderas, i se izo i pare [para] si kon su mujer sapatos, i era kon grande kerensia i atansion ke lavorava, i dezija ke li estavan kostando mui baratos, i ke li paresija ke si lo iva a enbezar este ofisio,

Su ijo Sr. Bensijon ke estava en este tiempo en Gurfu^[1] por ke estava atakado de la tekija, i era mui sikilijado i de esto ke resivija apenas en 15 dijas una ves karta i mas tadre ke ja si vino foe ke repozaron i Sr. Bensijon non li dava dingunas kechas i se asentavan en la botika de el padre, por pasar la ora,

1941

Asta aki si eskapa la partida de la

biografia de Sr. Moche J. Arié fin a el anio

de 5661