חכם רפאל עד 5605

279         Biografia, de H. Refael A. Arie.        1832

en el anio de 5592, ke H. Refael foe solo en la Butika i ke ja kortaron el anio de el Sr. Haimatche, era ke kontinoava en la mizma merkansia de antes, sin ke izo dingunos trokamientos, ni menos ke si mere un bilanso, el de moevo si pronto, i si foe a kostan por azer sus empleos, i de mizmo kontinuo en otras FERIAS, i azia sus venditas mui boeno en regla,

La Bivda kon su IJA Ester tambien ke estavan en kaza aun kon todo ja eran mui bien meradas i muntcho kudiadas, sin ke podia por nada tener de akecharse, torna kon todo eja non kijo estarse en Samokov, i ansi foe ke eja si foe a la kaza de el padre en Sofia, ke ja saven ke era de la Familia de Mevorah, i los ke ai agora de esta Familia son, s-r. Behor Salomonov, i su ermano Pecho Salomonov, i non se la razon de esto ke non afirman sus Alkunia, i eja koando si foe de Samokov, non demando nada seja su Ketuba seja tambien el bien de su marido, otro ke solo sus vistidos si rekojo i estos de su IJA, i se foeron, i poko tiempo pasando eja si kazo i se jevo kon eja a su IJA, i bivio kon su sigundo marido Muntchos anios i pario tambien, i el Padrasto la merava propio komo su IJA a la ditcha Ester, i tambien todos sus Tios kudiavan por eja i siempre li mandavan, muntchos prezentes, i pasando unos koantos anios, ke la ditcha Ester ja arivo en la edad por kazarse, si vino a Samokov por buchkar la eredad de su padre, i foe tambien akompaniada de su madre, sigun ditcho ke eja non tomo nada koando si foeron, ma por desplazer non pudo tomar nada porke a H. Refael non li foeron sus etchos a los kavos boenos i ansi

280         Biografia, de H. Refael A. Arie.        1832

foe ke aparte ke pedrio toda su furtuna, foe ke pedrio tambien i este de el Sr. HAIMATCHE, i aparte kedo tambien i devdor, ke esto ja le van a meldar mas denpoes, i visto a esto es ke non tuvo H. Refael de ande darle nada, i sovre ejo estuvieron todos ejos mui muntcho ansiados, i la S-ra Ester foe jorando, i sus Tios, ke non tinian koalo azerli a H. Refael, foe ke entre ejos li rekojeron una sierta suma de moneda karar ke era bastante para kasarse, i se foe fin a un grado kontenta, ke mas tadre la kazaron kon S-r. Aronatche el Ijo de H. Behoratchede Tchelebi Aron, i bivieron unos koantos anios mui boenos i kontentes, i foe mui kichta de todos los de kaza komo tambien i de su marido, eja pario 2 IJOS, el grande Haim B. Aron ke su etcho es, en komision de merkidas i venditas de mulkes, el koal S-r. Haimatche se aparenta muntcho kon todos mozotros, i el sigundo es S-r. Refael B. Aron ke bive en Piret [pirot], i es en boena pozision, i el IJO EL Behor de el ditcho S-r. Refael, si kazo kon la IJA M. Rachel de S-r. Davidtchonatche, i biven en Filibe, i pario una IJA, Olga, i biven tambien mui kontentes i es en boena pozision, i el ditcho S-r. Aronatche en ser ke izo un jero, ke batio la poerta de una turka, pokos anios denpoes ke kazo kon la Bu. Estarulu [Esterulu], es ke non tuvieron longo tiempo vidas boenas, a razon ke estava siempre eskondiendose i fuendo de un lugar a el otro por goadrarse a ke non lo mataran los turkos, ke aparte de esto non pude somportar la vergoensa, seja de kaza komo tambien i de la plasa, i ansi foe ke un dija topo a merkarse sulimen i se lo bivjo si[sin] ke lo viera dinguno, i non kere ditcho ke ja li

281         Biografia, de H. Refael A. Arie.        1832

izieron i li dieron todos los kudios, ma foe todo sin provetcho i murio, ke en el mizmo dia lo enteraron sigun ke enteran a los ke si matan de ejos para ejos^[27], ke foe mui grande dezgrasia, i los 2 ijos, ke kedaron tchikos foeron krisidos kon mizeria, i la Bu. Esterulu sufrio denpoes toda su vida ke eja bivio,

en este anio ke el Usref Beg lo dekuraron kon el titolo de Pacha, li foe H. Refael a saludarlo, i li jevo algunos presentes i el Pacha si lo rengrasio mui muntcho, i li dicho de todos los otros ke mi vinieron a saludar, es solo tu ke mi truchites este presente i jo lo vo a meter en mi salon, para akodrarme de ti, i li dicho ke li va ser plazer komo lo vijita mas espeso, i koando kerla algun ajude ke non si travara de demandarla, ansi era ke H. Refael li iva en kada viernes, a vijitarlo i era kon grande plazer resivido, i en muntchas okasiones lo ajudava, por todo esto ke li demandava,

Por el enverano ke si ivan a la Vigna ke tenia merkado su ermano Hr. Tchelebi, era H. Rafael ke si okupava mas muntcho para azer los juvetchis, i mas otros modos de komanias, ke agora non las azen, i tambien los bevrajes, ke koando se ivan era todos la familia entera, ke si ivan, i era de madruga ke si levantavan i si estavan el dia entero, gozandosen, i kantando i komiendo i biviendo sin ke meravan si non era todo djusto, eios se ivan kon karos de vakas, ke los alkelavan por una mui tchika paga, i en este dia seravan sus Magazenes, porke non tenian los pagamientos o kovramientos ke kalia foeran en el mizmo dia, los otros Djidios ke avian en Samokov si enselavan

282         Biografia, de H. Refael A. Arie.        1832

de esto ke lo azian los Aries, a tiempo ke i ejos tambien lo podian azer ma non tenian el kuraje, por ke si espantavan mui muntcho de los Turkos ke los espantavan i tambien los Harvavan i non tenian el kuraje de akecharsen ande el AA, ke este ultimo djuzgava a todos mui deretcho, i kondenava a los kulpozos,

La kaza ke si merko H. Refael kon su ermano S-r. HAIMATCHE era ke tenia un Rio ke koria a la entrada de la poerta de la kae i otro tenia ariento de el kortijo, de los koalos seja por el enverano komo tambien i por el envierno, li tachijavan i se li entchia el kortijo de agua, foe ke los izo alenpiar, i los kavo mas ondos, para ke foeran korientes, i li izo deredor todo de paderes, kon kal i orosan^[28] para ke non pasara la agua, i li izo kiopris, seja en el de la kae komo tambien i en este de el kortijo, i en el kampo ke avia ke era tambien grande lo izo kavar i sembro en la una partida, muntchos modos da rozas, de ermozos foezmos^[29], i en la otra partida, lo sembro de lugombris, i tambien sembro muntchos arvoles de modos de frutas, i aparte lugar por tchimenlik por asentarsen las tadres ke bivia un poko de raki, i esto li kosto 2000 groches, i era mui kontente ke si li izo el kortijo boeno i ermozo, ke kon esto tambien si iva kontentando, i se gozava,

En el anio de 5593, al ditcho H. Refael li nasio una IJA, i se gusto

283         Biografia, de H. Refael A. Arie.        1833

mui muntcho, i sigun ke ja saven ke li plazia muntcho al pasar el tiempo kon kantar i buchkava la mas tchika okazion para azerlo esto, sovre todo koando ja tenia la okazion de azerlo en su kaza li era plazer i gusto mui grande, i ansi foe ke en este parto era kada notche ke tenia unos kombedados, aparte de los todos sujos ke ja estavan en kada notche, i komian i bevian i kantavan i se alegravan toda la notche, i en el dia de Chabad foe ke kombedo a los Hahamim i los Hazanim tambien para fadar a la IJA i la jamaron REVKA, i es esta la Bu. Ruvkutcha ke en el anio de 5610, denpoes ke ja si avian morido seja el Padre komo tambien i la Madre, ke la kazaron sus parientes i su ermano H. Avramatche, kon S-r. Mairutcho Alkalai, el inieto de el RAV ZEHOR LE ABRAAM, ke si avia vinido de dubnisa, a Samokov komo empeigado, ande el S-r. Jeuda B. Eliezar Kojumdji, ke lo sirvia seja en la Butika komo tambien i en kaza, kon una tchika paga, kon ke si mantenia i durmia en la kaza de el ditcho S-r. Eliezer B. JEUDA, i la Boda tambien la izieron en la kaza de el ditcho S-r. Lizerutcho, ke mientres unos koantos anios ke lo sirvio, i de la grande ikonomia ke el izo i de lo poko de al kontado ke tomo, foe ke si salio de ser mas empeigado i enpeso en operasiones de saraflik, i lo todo sin asentarse en dinguna butika, kon la suma ke el tenia, i de esta manera kontinuo fin ke sus IJOS li foeron grandes, ejos bivieron kon la mas grande ikonomia, fin al ultimo grado, i devino grande riko, ke la Bu. Ruvkutcha, dezia ke su marido kon palas, rekoje los dukados i eja es menesteroza i sufre por la mas tchika suma, i ansi es ke non bivio tanto kontenta toda su vida solo por esto de la tanto grande ikonomia

284         Biografia, de H. Refael A. Arie.        1833

ke la azia su marido, eja pario 3 IJAS i 2 IJOS, i la Ija grande Bu. Viniziu, es kazada kon S-r. Haim B. MOCHE, CHICHKO, i pario Ijos i Ijas, ma eja kedo bivda de su marido manseva porke su marido murio de la boratchos, mui mansevo, i la sigunda Ija Bu. Loalo, kazo kon S-r. David M. Alkalai, sus serkano pariente, ke pario Ijos i Ijas solo ke non pudieron bivir boenos kon su marido i agora bive eja en kaza aparte de su Marido, a razon ke es algo manka de el meojo, i la tresera Bu. Ruzutcha, kazo kon S-r. Nisim Maskona de Pazardjik, ke esta non pario, i denpoes de unos koantos anios si decharon kon su marido, ke a todas las 3 las kazo kon darles a muntchos seja kontado komo tambien i achugar, i kon el IJO grande TCHELEBI MORDEHAI, lo kazo kon M. Rejina IJA de S-r. Jakov Jochua, de Pazardjik, i pario una IJA, Ribeka, i al IJO el sigundo lo kazo kon M. Matilda, dela Familia de KORDOVA, de Jambol, i eja pario Ijos i Ijas, ke en todas las 2 oltimas Bodas las izo kon mui grande saltanat ke trucho Tchalguidjis de Filibe, i en kada notche tuvo a muntchos kombedados, seja S-r. Mairutcho komo tambien la Bu. Ruvkutcha eran mui konsolozos, ma la Bu. Ruvkutcha, ke sufria de azma, murio manseva, i foe ke murio en 17 Ilul de el anio 5652,

Sigun ditcho mas antes ke el S-r. de H. Refael su kerensia i pensorio era lo mas muntcho en pasatiempo i esto ande avia kantar i komo ke era el, tanto amorozo de el kanto, avia tambien i un sierto komo medio Turko ke si jamava TATCHULE, era de mizmo komo H. Refael representante i ansi de mismo amoroso en el kanto, i siempo eran

285         Biografia, de H. Refael A. Arie.        1833

djuntos, de mizmo ke durmian i komian djuntos lo mas muntcho de su vida, el koal tenia boz alta i tambien savia boeno tanier kon el pandero ke era de koero de pechkado, ke li da la boz dulse,

kon su etcho de su magazen iva kontinuando ma en unos koantos anios non si miro konto era solo ke iva vindiendo i merkando i en mizmo tiempo tambien i boeno gastando, era una persona mui kebar, el koando se iva por los konakes, por azer las vijitas era ke si estava kon oras enteras pasando la ora, i non si li enportava ke la Butika la tenia serada, muntchos sus klientes ke non lo topavan en la Butika, li ivan ande su ermano Hr. Tchelebi i li davan kechas por esto ke non goadrava butika, ke esto mas tadre li trucho mui grande danio sigun ke ja van a meldar mas adelantre

la Bu. Rovka, ke estava bivda de su marido Hr. Josef i ke era mui dolorioza, era ke la vijitava siempre, por konortarla, i li azia algunos empleos, por el menester de la kaza i otros, i tambien kudiava por sus Ijos ke kedaron mui tchikos, de mizmo lo azia i kon el Ijo grande H. Merkadutcho, ke lo enkamenava i lo akonsejava, sovre el etcho de su butika, i li dava tambien algunas ropas a kredit, i lo vijitava tambien en su butika,

foe en este anio ke los turkos enpesaron a salir i ejos a la plasa ke fin a este tiempo era vergoensa grande si salian seja a las kavanes komo tambien asentarsen en alguna butika, ke ejos si entiende los grandiosos, ke es los BEGUES, i entre la butika de el Hr. TCHELEBI, ke si asentavan enpesaron tambien i asentarsen i en la Butika

286         Biografia, de H. Refael A. Arie.        1833

de H. Refael, ke esta non li foe tanto a plazer, porke kalio ke estuviera siempre en la butika, ke komo non estava lis iva apareser a los Turkos ke non los kiria, i esto ke non podia ser por razon ke eran sus muchtiris, i ansi foe ke estava mijor merando la butika,

En este anio de 5594, sigun ke ja lo eskrivi mas antes ke H. Lizerutcho Kujumdji li foe konkoriando i aparte iva kamenando en todos los konakes, i iva jevandoles prezentes a los Kapu-Keajasis a ke lis merkaran de su butika, las ropas ke lis era menester, por los Haremis, esto de ir tambien a los ditchos Kapu-keajasis, H. Refael no lo pudu azer por ke non si endeniava, a razan ke el ja tenia las relasiones, kon los mizmos BEGUIS, ke a ejos tambien ja si los dezia, ma non era bastante, i ansi era ke dia kada dia si li iva enmankando sus venditas, ke de esto si sekilijava muntcho,

mas antes ja lo tengo eskrito por un sierto Kara Feizi, ke era al ISPAI de Breznik, i en la kaza de el koal ke tiene estado Tchelebi Jeuda, i en estos tiempos komo uvo revulasion en Turkia, de los Djenisares, kontra Sultan Mahmud porke los mato a todos los grandes kaveseras de los Djenisaros ke entre los koalos foe tambien i uno el Mehmed emin AA, de SAMOKOV, ke li kortaron la kavesa, i estos ke estavan pasando para Kostan ke eran serka 2000 personas, a la kavesera

287         Biografia, de H. Refael A. Arie.        1834

de el dito Kara Feizi, i entre sus ufiseres ke tinia, era tambien i el S-r. Tatchuli, ke el koal de un sierto tiempo mas antes si foe de Samokov, i komo era una persona mui representante lo tomo Kara Feizi por su kumandir, i en akel tiempo era ke los espartian por las kazas, seja a los ofiseres komo tambien i a los soldados, i en la kaza ke ivan a estar devia de mantenerlos i darles lugar por durmir i avia tambien i espanto grande porke algunos lis rovavan i los harvavan, a los patrones de kaza, i al ditcho Tatchule, komo mas grande komandir li avian dado lugar en una kaza de uno de los Beguis, ma el dicho ke li dieran en la kaza de Hodja Rufail, ke si lo izieron saver a H. Refael, porke si prontara para ansi un musafir, i koando ja vinieron foe tambien i H. Refael a kombedar a su musafir ke vinieron en kaza i lo estuvo sirviendolo sigun lo merisia, ma H. Rafael ni una de mil non lo konosio ke era el Tatchule sujo, i este ultimo tambien non si dio a konoser, porke estava vistido de la uniforma de akel tiempo ke era todo de sirma i klabudan i la Fustanela, ke la primera notche la pasaron sin darsen a konoser, i koando vino a sigunda notche demando ke saliera Dona i su Ijo i ke kantaran, i de esto tambien si espanto H. Rafael, ma li demando de ande saves ke jo tengo una ija Dona i ke save kantar, a la ora li dicho el S-r. Tatchule, ke li kiria avlar en otra kamareta a las solas ke avista foeron ma H. Rafael foe mui espantado i se li troko el kolor de la kara parisiendole ke li iva a demandar alguna moneda or otra koza, i el S-r. Tatchule ke ja lo vide ke si espanto i ke es verdad ke non lo

288        Biografia, de H. Refael A. Arie.        1834

estava konosiendolo, a la ora li dize, a bo Hodja rufail, porke es ke ti espantas tanto de TATCHULE ? i H. Refael merandolo boeno lo konosio ke es verdad ke era Tatchule el sujo ke kantavan djuntos, ejos si abrasaron i se bezaron i lo akavido tambien ke non lo dichera a dinguno ke era Tatchule, i enpesaron al etcho sujos, notches enteras kantando i bailando i biviendo lo todo sigon ke lo azian en el tiempo de antes, i denpoes ke ja estuvo 3 dias todo en este etcho i ke ja partieron todos si foe i el tambien i li decho a H. Refael muntchos presentes, i li dicho ke si boltara bivo ja tenia de vinir torna a Samokov,

Sigun ke ja tengo eskrito ke H. Refael frekontava en todas las Fereas foe en este anio tambien ke estuvo i en la feria de Uzundjo-ova, i Tchelebi Jeuda ke estava tambien en esta Feria, ke si avia jevado unos partikolos, ke non eran tanto pasables, i estava jevando grandes apretos para vender ke non estuvo pudiendo vender mizmo ni para el gasto, ke esto todo ja lo vo a eskrivir en la partida sujas de Hr. Tchelebi, i mas antes ja tengo eskrito de los 2 mil groches ke li avia kedado a dever Hr. Tchelebi, a H. Rafael de el konto de la mubilia ke si avian espartido de kaza, foe ke H. Refael, anke lo via a Tchelebi Jeuda en los apretos ke estava, lo iva apretandolo por esta suma, fin al grado ke si aderese a la polisia, i ansi foe ke lo izo muntcho avregonsar, i kon metersen la boena Djente en medio foe ke los konvinieron kon ke li dio de los mizmos artikolos, la mas grande partida i lo restan en moneda, ke sovre esto

289        Biografia, de H. Refael A. Arie.        1834

koando vinieron a Samokov, tuvieron entre ejos algo de kechas ma ja foeron pasables, porke H. refael estava en mas grande apreto ke de esto Tchelebi Jeuda non estava tanto a koriente, ke ejos los ermanos eran mui aonados i se pagavan tambien muntcho de la razon, i non si anojavan, i en sus pasatiempo koando si adjuntavan seja entre ejos seja tambien i en otras kazas, si mizmo tenian algunas deferensias entre ejos era ke todo lo dechavan en kaza, i sus pasatiempo era komo ke non tuvieron nunka nada, esto lo azian seja los ombres komo tambien i las mujeres, i ansi era ke bivian mui aunados i toda la Familia ja si rekojian entre ejos i se ivan ande avia la mas tchika okasion para pasar el dia, or la notche,

En este anio de 5595, H. Rafael, visto ke el etcho de la Butika non li estava koriendo sigun de antes, otro ke al kontrario siempre se li iva enmankando, i non estava saviendo koalo azer i no estava pudiendo topar la razon i tambien estava mui muntcho pensativle, ke non tuvo mas en este anio la gana sigun antes ke estava siempre buchkando, okazion seja para pasatiempo komo tambien i en mizmo tiempo ir kantando,

El sin akonsejarse kon dinguno li parisio de boeno de ir i merkar de sus artikolos a partidas mas grandes, ke kon esto poede ser komo torna ropas muntchas, iva a tener tambien i etchos boenos

290        Biografia, de H. Refael A. Arie.        1835

ma non li aprovetcho ni esto, enpesa i el tambien de ir a los kapo keajasis, i lis jevava presentes, por esto a ke li merkaran tambien i de el algunas ropas ke ja tiene muntchas, i savido es de non dechar foir los muchteris, ke esto li kavzo, por ke non estava indo tanto muntcho a la butika a detras de su pasatiempo, sigun ja lo eskrivi mas antes ke lo buchkavan de la Butika de Hr. TCHELEBI, ke por esto tambien tuvieron algo de litigas, i en este tiempo era ke H. Elizerutcho iva andando i adelantando su etcho, asta ke vino en un grado ke H. Refael kalio ke serara la butika sigun ke ja lo vo a eskrivir adelantre,

El en este anio enpeso a azer ikonomia en kaza, i de esto li estava viniendo mui pezgado, i tambien se iva avregonsando, i de esto non salia muntcho a la plasa, ke si estava en kaza, i non estava pudiendo merar la Butika, su ermano Hr. Tchelebi ke estava tambien mui narvozo i avia enpesado tambien a bever, ke si li iva muntchas vezas a su kaza i le demandava porke li diera a bever koalo ke tenia, porke los ijos non lo dechavan ke biviera a razon ke li estava aziendo muntcho danio i de esto lis salia ravias kon los Ijos ma H. Rafael non lo refuzava i li dava koalo demandava ke si mizmo non tenia en kaza li merkava, i ansi era ke si iva boratcho a kaza, ke los ijos li davan kechas a sus S-r. Tio sovre esto ke li dava i ke li estava muntcho boziando, i mas ke lis estava kavzando a traer pleitos en kaza, i muntchos Chabatiod, ke lis pasava ansi pleitos era ke Tchelebi Jeuda ke era tambien algo foerte i ke non podia

291        Biografia, de H. Refael A. Arie.        1835

somportarlo, se iva i el tambien, i li dizia a su mujer la Bu. Rahelutcha, aide toma el dimalo i vamos ande el Tio H. Refael, ke ja saven ke en akel tiempo non podian salir las mujeres, a la plasa sin ke estuvieran enbeladas komo las Turkas, i koando ja los vian venir li dizia H. Rafael, a su mujer, la Bu, mazalutcha, mi espanto ke Joudatche ja si pelio kon ermano i si esta viniendo aki, i la Bu, Mazalutcha li dezia a H, Rafael porke non los detuviera a komer a razon ke el pastel era en akeja semana de TCHITCHAROS,^[30] de los patos ke avia merkado en akeja semana, i esto non era tanto, pratik para koando avia musafires, i H. Rafael li dicho mira voestro etcho (musafir buldunijer i non umduoni,)^[31] keri dezir ke el musafir komo, akejo ke lo topa i non loke espera, i pasaron fin el tiempo de komer i Tchelebi Jeuda ke si alevante para ir i esperando ke lo detuviera, i H. Rafael ke ja lo savia esto es ke si estuvieron i komieron djuntos, ma non si avlava nada por la kistion de sus kaza, i Tchelebi Jeuda tambien ke ja savia boeno kantar era ke kantavan djuntos i pasavan el dia, kon kantar i bever, i kon esto era ke ulvidavan,

en los dias de Chabad, i moadim, non platikavan de dingun negusio, ni menos si vinian algunas kartas non las avrian, porke non seja ke va aver algun avizo de algun etcho i tambien ke non si poede arazgar la karta, ni menos ke si poede dizir a uno ke non es Djidio porke la avriera, ke si konta komo ke el mizmo la avrio, ansi tambien si alguno si ulvido de kurdijar la ora de la tadre de viernes antes de ir a el Kaal, mas non si podia kurdijar el dija entero, i va

292        Biografia, de H. Refael A. Arie.        1835

aser en notche de alhad, ke si kordijavan las oras i denpoes ke la si dicho la avdala si van a avrir las kartas, i mizmo le lo azian ansi torna kon todo non tenian ke lis traiva dingunos danios en los etchos, i jo mi akodro mizmo i koando ja uvo i telegrafos, ke vinian torna kon todo non los avrian ni mizmo los azian avrir de sus mosos Turkos i Kristianos ke ja los tenijan a muntchos, lo todo era para non ezbivlar el Chabad, i tambien ke si sera algun afedento para non sikilijarsen, es de esta manera ke si meravan tambien i a ejos, sus saludos, i tambien non tenijan algunos danios,

En esta anio de 5596, sigun eskrito mas antes ke el etcho de la butika non li iva boeno i kada dia li iva endo mas atras, i non saviendo koalo rijir, i dever ke devia tambien muntcho, foe ke si detchizo a vender la kaza, i esto tanto presto ke non lo topo era ke se iva muntcho sekiliando, i apretandose, el kijo vendersila a su ermano ma, li refozo katigorikamente, en diziendole ke el apenas era ke avia eskapado de fraguarse, la kaza, i tambien el non si la merka por razon ke siempre, li van a dizir, ke si la tomo el ermano su kaza, i siempre va aser asenialada, i ansi foe ke enpeso a buchkar a otros merkadores, ke esto ja topo i la vendio, i kon esto alguna suma pudo pagar, ma non li abasto, ansi foe ke resto tambien devdor, era ke enpeso a vender de sus ropas de la Butika kon los presios baratos

293        Biografia, de H. Refael A. Arie.        1836

i mismo ke iva vendiendo i ke iva tambien pagando ma torna kon todo non li aprovetchava, era ke si iva deskurajando i avia enpesado a bever mas muntcho i era todo loke bevia, solo vino sovre ejo sus suvrinos Tchelebi Jeuda i Tchelebi Gavriel lo gritavan i lo akonsejavan, a ke non iziera esto del bever ke iva a ser enteramente el depidrimiento, i ansi foe ke si okuparon ejos, i lo ivan fin a un grado akomodandolo, por la vendita ke izo de la kaza, foeron toda la Familia mui sikilijados, i non keri ditcho la Bu, Mazalutcha ke si izo hazina, ke mas eja non foe komo antes sana i gustoza, lo poko mas ke bivio, i H. Refael foe de mizmo en este anjo mui ansiado, era ke lo mas muntcho de el dia estava en kaza,

la Bu. Revka su koniada, siempre lo vijitava a H. Refael i ejos platikavan de sus negosios, sovre todo este de su entenado^[32] el H. Merkadutcho, ke tambien non li kaminavan los etchos del en todo boenos i ke agora ke tenia parida li foe ande eja a demandarle paras para gastar, i H. Refael la akonsejava porke non diera a dinguno nada, porke non iva aver ken ke kudjara por eja, i la Bu. Revka tomava estos konsejos, ke eja si estava prontando para irse a Jeruchalaim, ke eja ja ganava de la komadres, i tambien de otros lavoros ke eja lavorava, en las kazas de todos los parientes, ke todos li pagavan kon su demazia, visto a esto de lo mas egziste entre las mujeres ke si kerin ir lo mas muntcho a Jeruchalaim, kale dizir ke non es solo de la parte de religion, a este konto si vei ke es por ke jevan mal denpoes ke kedan bivdas, i esto mizmo de sus propios IJOS ke ejas

294        Biografia, de H. Refael A. Arie.        1836

los parieron, non keri ditcho ke jevan mas muntcho i de las noeras ke esto ja es en djeneral, mizmo ke estaran i aparte tambien las dezonran, i las azen lavorar ke agora ja egziste i mizmo koando esta i los maridos, i esto ken es ke lo kulpa, es torna el IJO, ke kon su flakeza, aun ke ja esta en la merkansia i de mizmo ke seja estudiado en los mas altos estudios, torna kon todo ai algunos IJOS, ke non si lis enporta i mizmo i ejos tambien las trospajan i las azen jorar a sus madres, sin ke si apejadan, ma si la madre enpatrona la mas tchika suma de moneda, i el IJO si lo alkansa a saver, a la ora li aze muntcha onor, fin ke la va a enganiar, i tomarsela, i denpoes ke mas non kerla darla, en ser ke bien poedi ser ke non torna mas, tambien la kovaleja de kaza, ke algunas madres si a razon ke jevan muntcho mal si entregan ande los IJOS, i kon esto para ke seigan meradas ala vejes es un jero mui grande, i por esto es ke estas mujeres ke buchkan a irsen a Jeruchalaim, es ke ja entendieron la parte ke tiene, ke lo mas akonteso koando las noeras son de otras familias ke no son de mas serka sus sangres, i jo las konsediro a estas ke si van a Jeruchalaim por mui grandes meojudas, ke la kroeldad nunka non poede existir^[33] en las madres or padres enfrente de sus IJOS, i por la kontra ke la kroeldad existe, siempre lo mas muntcho en los IJOS ke los padres sufren i sakrifikan tanto por enbezarlos a sus IJOS, i sovreke esto es verdad, i akel ke si kerla enteresar por saverlo, si en si mizmo non lo alkansara a saver ja lo va a sentir seja de el pariente or de algun vizino, mas serkano,

295        Biografia, de H. Refael A. Arie.        1836

Visto a los apretos, i en las estritchuras ke mizmo en todos los 3 ermanos exiszia [existia], torna kon todo ejos non de davan a konoser ke estavan en esta manera de pozision, i ejos ande la djente se mostravan, de mui galantones, lo todo komo mas antes, ke la djente non savian en el grado ke ejos estavan, ni menos ke los aserkavan koando ejos ^[34]estavan en algunos apretos, porke todos lis azian mui grande onor i esto non solo los Djidio, de mizmo era i los Turkos i los Kristianos ejos lis ivan seja ande el Usref Pacha komo tambien i ande todos los otros Beguis i los Tchorbadjis, por vijitarlos i ejos de mizmo lis venian todos, de mizmo lo azian i las mujeres,

Las devdas ke H. Rafael tenia non era solo de el etcho de la Butika, por las ropas ke el empleava, otro ke sigun ditcho de koantos anios agora non li kamenaron boenas las venditas i ansi era komo non pudo enkontrar sus pagamientos, a razon ke si izo traer tambien i ropas de Viena, izo ke se iva prevaliendo kon tomar moneda kon enteres i los enteresos ke pagava eran de 20 i 24 % a el anio, i esto arivo a una suma de 60 mil groches, i ansi foe ke a estos ke lis devia non podia kortarles nada porke eran lo mas muntcho a Turkas bivdas ke lis devia, i esto, al presipio lo foe eniegando de sus parientes, mas tadre ke lo supieron foe ke li enpesaron a revidiar los kontos, i non lo dechavan mas nada azer solo, ke por lo todo kalia ke demandara, sus parientes la entision era de poderlo delebrar de la devda ke devia kon enteres, ke por las otras devdas ja lo podian akomodar mas kolai, ma non arivaron a esto porke H. Refael,

296        Biografia, de H. Refael A. Arie.        1836

non kijo sintirlos, i lo iva aziendo sigun ke a el li paresia, fin ke non pudo mas boltarlo, se asento en kaza i los kreditores li ivan viniendo a kaza, ke si avia alkilado solo una kamareta en una kaza de un turko i esto era sin ke pagava dinguna kira, i visto a esto la Bu. Veneziana si iva mui muntcho sekliando, i foe estando hazina i las kriaturas ke tenia ke eran tanto kudiadas foe en este tiempo ke las decharon a la vanda, porke la Bu. Veneziana era mui kapritchza, i algo seloza, i se enselava de el marido, ke sovre esto en otra okazion ja tengo de eskrivir la razon,

En este anio de 5597, era de mizmo kon mui grandes apretos ke lo iva pasando, i visto ke era una koza ensomportavlo, lo izo ke detuvo sus pagamientos, li mas non salio del en todo a la plasa, i de la kaza ke estava le ketaron porke li kijo el patron le [ke] li pagara kira, ke esto non lo podia, porke el non se rezerva, nada de mas antes, I KON MUNTCHO MAL FOE KE TOPO OTRA KAZA? I SE PASO EN EJA, i mas tadre, kon algunos de los krediteres lo iziaron porke si asentara torna en la butika, ke lo izo esto ma non li kamenava i de todo loke vendia, iva dando a algunos, krediteres, lo toda las Turkas ke eran bivdas, i de esta manera estuvo kamenando unas koantos mezes, ke mas denpoes non pudo estar mas, i li meraron el konto i foe ke kedo a dever 15000 groches, i decho la butika, i foe ke los ke tenian de aver

297        Biografia, de H. Refael A. Arie.        1837

lo decharon por un sierto tiempo repozado i mas tadre toda la devda si la pagaron los parientes ke eran sus sovrinos Tchelebi Jeuda i Tchelebi Gavrial i kon esto foe ke ke estuvo algo de tiempo repozado, i siendo ke non tenia loke azer, era ke si iva las notches ande los konakes de los beguis, ke sigun ja saven ke savia boeno kantar i tambien savia i bailar kjotcheklik, ke en su manseves, era ke si vistia komo los arnautes, kon tuzlukes i tchepken i lo todo enboelto en la sirma, i una fustanela, kon una tchika fez de un godro peskiul de seda mavi, ke estos vistidos ja los tenia de antes ke eran sujos i unos zilis, de plata en sus dedos, era ke kon estos vistidos bailava, i en mismo tiempo tambien i kantava, i de esto ke iva por los konakes, tenia ke ganava kon ejos, i li davan tambien muntchas vezes i presentes en moneda, de esto ke azia sus parientes non eran del entodo kontentes, i mizmo ke lo defindian el non los sintia, ke el plazer i la natura suja era esto,

Su ermano Hr. Tchelebi, ke estava mui nervoso de kontino se li iva a su kaza, i ja estava ke non savia loke estava asiendo, ke lo todo era de espanto ke tuvo, sigun ke ja lo vo a eskrivir en la partida suja, i tambien komo li defindieron sus IJOS el bever raki, era ke iva biviendo lokma ruhu^[35], i esto era a muntcho, i ansi foe ke mas tadre si etcho en kama i en un enterval de pokos dias ja murio, i foe mui sikiliado, ke tambien si avia enpesado a sintir ke iva uviendo maguefa ke es (peste) i ivan muntchos muriendo, de esta hazinura, ma ivan tiniendo la pasensia kon ke si ivan i muntcho

298        Biografia, de H. Refael A. Arie.        1837

goadrando, era todo a los kudios de su ermano, i sus sovrinos ke si estava pasando, ke non tenian solo a H. Refael de kudiarlo era ke kudiavan i por H. Merkadutcho, i tambien la Bu. Revka i los IJOS, de esto mos enbeza la ermandad ke tenian, sigun ke ja estan viendo porke i ejos tambien, tenijan muntchos males, ma el karakter de ARIE, es esto, lo koal si en el tiempo de agora, arivaria ansi una okazion, ja es mui siguro, ke al punto ja aboltan la espalda, el mas serkano pariente, i non keren ni sintirlo, ke ja uvo muntchos, ke demandaron proteje en moral tambien non lo ajudan, i esto es loke kiji dizir mas antes ke si troko el karakter de la Familia arie,

Mas tadre siendo ke la hazinura de la maguefa si espandio muntcho, i kon toda la Familia de su ermano Hr. Tchelebi ke si foeron de Samokov a un Tchiflik, en el kazal de Kalkovo, si lo jevaron tambien i a al djunto toda su Familia, i estuvieron serka 4 mezes, lo todo a los kudios i gastes de los IJOS de su ermano Hr. Tchelebi i la manera de loke si komportaron en este Tchiflik, ja lo tengo de eskrivir en la partida de Hr. Tchelebi,

en el anio de 5598, H. Rafael se asento torna en una tchika Butika, kon ke sus sovrinos li dieran algo en moneda i algo de kredit, lo todo para ke si enbivisiera i en mizmo tiempo ke si pudiera i mantener, i de esto foe mui kontente, porke el ja era mui bien

299        Biografia, de H. Refael A. Arie.        1838

enfasiado de estar en vazio, i tambien ke tenia el menester, por el sujo sostenimiento, i esto de koando enpeso en el etcho ja li foe mui boeno kamenando, sovre todo ke sus sovrinos, ja enpesaron a ir a Viena, i traivan ansi ropas, era ke li davan tambien la suma ke keria, solo ke sigun ke tenia los etchos de el presipio mas non tuvo, i esto ja li estava siendo muntcho,

en este anio ke kazo Tchelebi Abraam, II. el IJO tchiko de Hr. TCHELEBI, kon la Bu. Bulisu la IJA de Tchelebi Jeuda, foe ke lo kargaron a H. Refael para ke si okupara sovre todo el menester de la Boda, ke esto ja lo savia mui bien akomodar, i solo el era ke azia las merkidas de ropas para la achugar, i el si okopava para aserlas kozir, seja por la Novia komo tambien i por el Novio, de mizmo foe el prontador de todo el menester de la komania, el foe ke kombedo alos RABANIM^[36] de las sivdades deredor de Samokov, i vinieron 10 rabanim a la boda, kon sus rubisas, i koando izieron la boda sero i el tambien la butika, sigun ja saven ke era solo los patrones de la boda ke seraven, lo todo para dar la komanda, el si iva a la kuzina i kon su komando si guizava, i se ordenavan las mezas, i siendo ke ja foeron los gastes de la bolsa antcha non ovo ken li demando kontos,

siendo ke foeron pasando algunos apretos, foe ke la Bu. Veneziana foe indo algo malata, i ansi era ke aparte ke iva tiniendo muntchos gastes tenia tambien i muntcho desrepozo en kaza, era ansi ke i esto lo apretava mui muntcho, eja la Bu. Veneziana, se araviava kon su marido por esto ke las notches se iva a pasar la ora kon ke

300        Biografia, de H. Refael A. Arie.        1838

kantar i bailar i la dechava a eja sola, i le dizia ke gaire ja kale ke si decha, los pasatiempos ke los azia en la manseves,

su IJO el H. Avramatche ke iva kontinuando le echkola no tenija tanto la gana para ir adelantre en sus estudios, porke era mui regalon^[37] porke foe, solo, un IJO, ke muntchos dijas non lo mandava la madre, era de mizmo ke li plazia el kante i sus ermanas la Bu. Bulisu kon la Bu, Ruvkutcha ke ejas tambien savijan mui bien kantar era ke estavan todos los 3 el dija entero kantando, la Bu, Bulisu lis kantava a las Hanumes, koando venian a vijitar i era por nombre ke la jamavan DUDA, ke lis kantara porke tenia, una boz mui ermoza i mui alta, i konosija la manera de el kantar, i de esta manera foe toda su vida ke bivio ke siempre kantava, i todos mos gustava los i li ivamos para sintirla kantar,

1. Rafael ke ja estava mui enfasijado de ir trokando kaza lis dicho a sus sovrinos ke si kerija merkar una kaza de la manera ke foesa, ma solo ke paras non tenija, i ke li dieran sus sovrinos tambien non kerija, ansi ke non savija komo azar, i li dicheron porke esta kistion la dechara para mas tadre, i se topara un molde i merkarla tambien una kaza, ke sovre esta ditcha el S-r. de H. Rafael enpeso a buchkar,

entre las kazas ke iva buchkando H. Rafael para merkarse para si topo una kaza de la aiko^[38] ke ja es konosida a todos i era mui barata, ma a fijado non la kijo darla, foe ke el H. Merkadutcho li iva dando a la Bu, Revka i muntcho sikinti en kaza, i ke keria merkar

301        Biografia, de H. Refael A. Arie.        1838

una kaza de su moneda en tal ke si saliera de kaza, foe ke si la merkaron i kon esto ja si kontento a salirse, kon ke li dieron tambien i algo de moneda para ke si asentara torna en butika, ke sovre esto si iva okupando H. Rafael, i la izieron al nombre de la Bu. Revka porka non la pudiera venderla,

En el anio de 5599, H. Refael kontinuava en su negosio de la Butika aun kon todo ke non era sigun de antes, era ke ja si iva pasando, si entiende lo todo kon la mui grande ikonomia, el nunka de ir vijitando a todos los konakes, ke era de todos mui bien resivido, i en mizmo tiempo li azian tambien i algunas merkidas de sus ropas de la butika,

la Bu, Revka li foe en un dia, i li demando a su IJA la Bu. BULISU por Novia para su IJO el grande H. Lijatchuno, ke sovre ejo si gusto mui muntcho, i lo decharon el etcho para akonsejarser kon sus sovrinos, i esto non lo decharon tadrar, ke en akel dia tuvieron una adjunta de todos los parientes, i lo toparon de djusto de azerlo esto i Tchelebi Jeuda, lis dicho ke li diera H. Rafael 300 grochas de kontado i aparte achugar, i de todas 2 partes ke ja estuvieron mui bien kontentes, si dicheron el BESIMAN TOV, i se adulsaron, i pokos dias denpoes izieron el espozorio ofisial en la kaza de la Bu. Revka, ke lis tomaron el Kinjan a todos los 2 kon ke

302        Biografia, de H. Refael A. Arie.        1839

kombedaron sigun ke lo azian kon todos los otros espozorios a la sevdad entera, de mizmo lo izieron i en la notche, ke komieron i bivieron i kantaron i bailaron i se alegraron, ke el eskrivir aki las koaledades de todos los dos ja es demazia ke, ja lo saven i konosen seja al Novio komo tambien i a la Novia,

En este tiempo ke ja izieron el espozorio foe ke li nasio a Tchelebi Jeuda un IJO, i foe ke lo izieron sigunda boda, porke ja era muntcho tiempo ke non tenian, ansi pasatiempos, i eran todos mui gustosos, i enpesaron a renovar los pasatiempos de antes,

sovre ke si keria merkarse una kaza, foe en este anio ke ja topo a merkarse, sin ke agora konto dinguna suma de moneda, ke lo izo el trato, por 1300 groches, a pagarlos, en kada 6 mezas a 100 groches, esta merkida, koando la izo foe mui gustozo, i de mizmo si gustaron todos sus parientes, ke la koala kaza es agora ke la tienen S-r. Rahamim B. Chelomo, B. Avraam, i la mujer de Mordehai B. David Kiostendeli, i denpoes ke li izo un tchiko adovamiento i la izo bijadijar, i sin tadrar si paso en eja, mui kontente i bivio en eja toda su vida, si entiende de sujo ke non foe komo la primera kaza ke tuvo, su mubilia foe poka, de mizmo i lo restan de kozas,

muntchos Chabatiod, si ivan kon la komida a la kaza de el Novio ke es la Bu. Revka, i la Novia si estava en kaza, ejos komo lis plazia pasar kon kantar i la Bu. Revka ke era sola, se ivan para ke estuviera alegra, la Bu. Veneziana li dezia, ke es vergoensa de

303      Biografia, de H. Refael A. Arie.        1839

azer estas kozas, i ke devija detenerse un poko agora ke ja es mas de edad, kon mas onor, ma H. Refael non la sintia, i li dezia, ke ja non mi avregoenso de ir a la kaza de mi ermano, ma si vos vos avregonsach, estavos en kaza, ke esto todo era porke la Bu. Veneziana, no estava bien sana, i tambien se iva enselando, de esto ke H. Refael kantava i djugava i se arijia kon todos, porke el era una persona mui sana i mui gustoza, i por nada non li enbarasava ni si avregonsava, mizmo ke ja era en la mas edad,

en el anio de 5600, dieron karar, de azer la boda, ke i para azerlo esto, si foeron la Familia entera en una maniana de un Chabad, a la kaza de la Bu, Revka, si entiende ke esto ja lo avlaron de mas antes, para ke lo supiera la Bu. Revka i ke si aparejara, ke iva a tener djente, i koando ja estuvieron todos li demandaron por azer la boda, i esto foe todo kon muntchos kantares las kantikas de Novia, i tambien adulsarsen i biveres [beveres], i la Bu. Revka jena de alegria djo su kontentes, i restaron todos a komer en la kaza de el Novio i todos si jevaron sus komidas kon muntchos modos de dulses, ke ja los prontaron de viernes, i komieron todos djuntos i kantaron i se alegraron, todos mui kontentes,

I denpoes de esto H. Refael enpeso a prontar la achugar i mas todos los otros menesteres, por la boda, i en su tiempo enkolgo

304      Biografia, de H. Refael A. Arie.        1840

la achugar ke li dio de todo a muntcho, i la sivdad entera la vijitaron seja los ombres komo tambien i las mujeres, i en el dia de Chabad si li foeron todos los parientes kon las komidas i modos de los dulses ke ja los prontan para esto, i lo todo lo izieron sigun ke si aze en todas las kazas de la Novia, i sigun ke izieron la boda lo van a meldar en la partida de el Novio,

Koanto a su negosio era ke en este anio enpeso a enteresarse i en otros artikolos, ke los merkava de la plasa i los vendia koando topava mijor presios, ke para esto tambien ke si keria moneda era ke li davan sus sovrinos ke non lo dechavan ke foera dezesperado, era ke en todo loke lis demandava por lo todo lo kontentavan ke lo kerian mui muntcho, i ejos koando tenian por alguna koza de akonsejarsen era todo kon el i en todo modo de koza ke ejos los sovrinos tenian sin ke estuviera el S-r. Tio H. Refael nada non azian,

En este mismo anio pario la ditcha Bu. Bulisu, un IJO, ke foe mui grande alegria seja para H. Refael komo tambien i para la Familia entera, ke en esto tambien lo izieron sigun el uzo de todas las paridas i sigun ke ja lo tengo eskrito, ansi foe tambien ke lo izieron i en el dia de el rihmido^[39], ke esto lo asen ke en el dia de ke nasio, jaman a los parientes i los amigos, i tambien a un koen i denpoes ke meldan el seder sovre esto ke ja esta resentado, apareajan en una tabla una partida de platas, de modos de atvoendos,^[40] de platas, i traen tambien i al IJO, i lo detiene el KOEN en sus manos komo ke es sujo, i denpoes li demandan al padre si kere al IJO kale

305      Biografia, de H. Refael A. Arie.        1840

ke li den las platas, i de sujo es ke el Padre va a kerer al IJO i el KOEN se lo da al IJO al Padre i se toma las Platas, komo paga de el IJO porke todo primero seja persona komo tambien lo krisido de arvoles i otras kozas son de el DIO, i se dan a el KOEN, i esto es loke si jama BEHOR, i en este dia si aze komo una boda ke komen i kantan i para esto tambien ja si apropiado kantikas aparte, ke si uzan a kantar, i al koen denpoes li pagan en moneda, en lugar de las platas, i ansi lis dan tambien i a los Hahamim i a los menesterozos presentes en moneda, el ditcho nasido lo jamaron JOSEF, al nombre de su Papu Hr. Josef, i el koal foe ke kazo kon la Bu. Buhurutcha IJA de Tchelebi Abraam II,

en este tiempo foe ke la Bu. Veneziana, foe endo hazina fin ke si etcho en kama i ansi foe ke H. Rafael era mui sikiliado, i de muntcha ajuda ke li dieron los medikos ke avian en Samokov, i mas otras kuras ke azijan las mujeres viejas, ke de esto era ke si servian mas muntcho, foe ke ja estuvo algo boena, ma kedo mui flaka i tambien li kosto muntcha moneda,

En este anio ke Sultan Mahmud avia kortado el BECHLIK ke es piesas de moneda de la valor de 5 groches kada una, i para ke sirkoliara en la plasa estos bechlikes, kalio ke abandonara toda moneda de plata i oro ke serkoliava, mas antes, i esto para rekojerla lo vendio este deretcho a unos Bankeres (sarafim) ke era solo ejos ke podian rekojerla kon ke lis nombro los presios a kada sorte de moneda, i vinieron en todas las sivdades, ansi sarafim, i las ivan rekojendo,

306      Biografia, de H. Refael A. Arie.        1840

i las mandavan a Kostan a la Zarphane^[41], (ke es logar ande si korta la moneda de el Governo,) i para azer este rekomiento [rekojimiento] lis foe tambien i H. Refael, para serlis i el tambien un rekojedor, ke esto ja lo pudo azer, i li pagavan a un sierto % de la suma ke lis jevava, ke esto iva kontinuando, i tenia boen provetcho, ma mas tadre si lo tomaron este deretcho ke si espantaron non seja ke en sikreto li dara a sus sovrinos, i la mandan a Sofia or otras sivdades, ke avian otros ansi rekojedores, (mubahjadjis^[42]) ke sovre esto en la partida, de Tchelebi Jeuda i sus ermanos ja lo vo a eskrivir en mas antcho sigun ke ejos lo izieron i kon muntcho major deretchos, mizmo ke estuvieron los ditchos Mubahjadjis ke si jamava Bedroz efendi un sierto grande Banker Ermeni,

en el anio de 5601, H. Refael a razon ke los ditchos ariva Mubahjadjis ke li tomaron el deretcho de rekojer las monedas ke eran viajas sigun ditcho ariva, si foe torna a la butika, ma non li estava abastando solo el etcho de la butika ke era mui poka las venditas ke azia, a razon ke H. Lezirutcho si li adelanto muntcho su etcho ansi de mizmo enpeso tambien i H. Chelomo koen, tambien ke iva vindiendo de estos artikolos, i por mas mijor foe ke en este anio al Usref Pacha, lo nominaron por Governador de la Kale de Belogrado i este ultimo ke partio, i la mas grande vendita de H. Rafael era

307      Biografia, de H. Refael A. Arie.        1841

ande el Usref Pacha, ansi ke estuvo, mui sikilijado, ma sus sovrinos ke ja lo vian ke estava ansi li dicheron porke non si apretara por nada, i se tenia de menester paras para gastar ke ja li van a dar ejos, solo ke keren ke este alegre, i en akel dia li dieron 250 groches para ke gastara, li dicheron koando non li keda paras ke non si travara de demandar, i H. Refael, era ke si iva torna a la butika, ma non era kontente de tomar moneda pronta.

La Bu, Veneziana si li renovo su maladia ke eja la tenia i ansi foe ke si etcho de moevo en la kama i non keri ditcho ke ja li jamaron a todos los medikos ke avian en Samokov, i todas las otras ajudas ke foeron posibles ma todo foe sin provetcho, i ansi foe ke 2 dias antes de Pesah, murio, ke foe una mui grande manzia seja para su marido i sus kriaturas, ansi i para toda la Familia, ke en el mizmo dia la enteraron, i esta manera era el uzo en akel tiempo a non tadrar, kale dizir non seja ke si iva poede ser a rebivir i todos la joraron muntchos dias, i lis goadraron solo un dia de el siete, porke ja era Erev de Pesah, i toda la Familia en el Pesah entero kada dia lo vijitavan, de mizmo lo izieron i en el mez entero, ke lo mas muntcho era la Bu. Revka ke kudiava por la kaza, de prontarli la komania i todos los otros menesteres,

Visto ke era koza ensomportavle el estar en kaza sin ke uviera una mujer, penso si era de kazarlo a el IJO enprimero or kazarse el, i foe ke lo topo mas de djusto de kazarse el al presipio i denpoes kazarlo tambien i al IJO H. Avramatche, ke lo izo esto i se

308       Biografia, de H. Refael A. Arie.        1841

foe a Pazardjik, ke topo a una bivda IJA de H. Jshakutcho Finsi, ke la koala estuvo kazada serka 10 anios en Bukarest, i avia un anio ke estava en la kaza de el padre en Pazardjik, i tenia una Ijika, i H. Rafael kon demandarla ja si la dieron, i se konvinieron ke si iva a traer kon eja tambien i a la Ijika, i li izo de TOSEFED 3000 groches, i en erev Chavuod ja izieron la boda, keri dizir denpoes de 40 dias, ke murio la Bu. Venaziana, la novia si jamava Bu. Mazalutcha, i la boda la izieron en Samokov, ke vinieron 10 personas a la boda, i sus Ijas kon su Ijo ke non pueden estar en kaza koando si kaza el Padre, foe ke si foeron el primer dia i la notche en la kaza de uno de sus parientes, foe ke estuvieron los todos otros parientes, i estuvieron los konsfoegros 15 dias, eja la novia era mui boena, i mui nekotchera, i meradera de la kaza, i kudiava por los entenados ke topo, i H. Rafael tambien era mui kontente, mas denpoes ke li foe su Ija la grande la Bu. BULISU, ke ja estava kazada, li dicho el Padre va i bazale la mano a la S-ra Tia, i sepalo ke es propio komo a tu madre, esto li vino mui pezgado, ma non li avlo nada, en la boda tuvo muntcho gaste porke uvieron muntcha djente i su IJO foe raviozo un sierto tiempo,

en este anio lo keto a su IJO a la butika, porke non kijo mas kontinoar en sus estudios, i era ke si okupava muntcho en el etcho de la butika ae el jevava las ropas por los konakes, i H. Rafael era mui gustozo i poko tiempo pasando si foe H. Refael a Filibe i demando a la IJA de H. Bojorutcha Sid[i]^[43], por novia para su IJO Abramatche

309      Biografia, de H. Refael A. Arie.        1841

ke esto foe atchetado, i lo izieron ke li iva dar 500 groches de kontado i achugar a su onor, i el gaste de la traedura de la novia i se dicheron el BESIMANTOV de uzo i la notche lo izieron komo boda sovre todo ke el H. Refael ja saven komo de persona era i non es menester de eskrivir, i se vino a Samokov, i lo izieron tambien, el espozorio, sigun ke ja lo saven tambien, de koala manera lo azian, en non dechando atras nada,

En el anio de 5602, H. Refael lo kijo kazar a su uniko IJO, el H. Abramatche, a razon ke si keria ir a la Bosna ande el Usref Pacha, ke lo izo esto, i sigun el uzo demando Boda, i foe atchetada i el tambien si pronto todo el menester, por la boda, i en el tiempo mando los konsfoegros, i lo izieron sigun ke ja lo saven los uzos de las otras Bodas, i de mizmo en kurto dieron los Kiduchim, i ansi la Boda, kon todo djusto, i la novia ke ja era moi ermoza, i savida de todos los puntos, eran todos mui kontentes, sovre todo el H. Refael era mas alegre, i la Novia ke savia boeno lavrar, kon sedas i klabodanes, foe ke por en el envierno, ke los djamos si jelan i se azen modos de rozas, eja la novia si metio a kopiar, una de las rozas de el djam, ke li iva a lavrar para la esfoegra akejo ke iva a kererlo sin ke ainda si lo avia ditcho a la esfoegra, i en este tiempo ke lo estava kopiandolo entre de la poerta el S-r. Esfoegro, i kon kara

310      Biografia, de H. Refael A. Arie.        1842

ariente, i mui gustozo de verla ke estava saviendolo kopiar, li demando loke era ke estava aziendo, i eja li dicho sigun eskrito ke li iva a lavrar, para la esfoegra, esto ke le iva a kerer, i H. Refael mui gustozo ke ja save, li dicho ke el li iva a traer mudos de sedas i de klabudanes para ke li lavrara para la esfoegra i ke si lavra tambien i para eja, i la Bu. Mazalutcha su esfoegra, ke estava merando de la ventana, todo este linguaje ke el S-r. Esfoegro, estava tiniendo kon la Noera, foe ke si enselo mui muntcho, i denpoes ke kon su marido tuvieron grandes ravias, enpeso tambien i a enegreser^[44] la a su marido el H. Abramatche, fin al grado ke el H. Abramatche tambien mas non la pudo ver longo tiempo, i ansi era ke la novia kedo enkantonada, seja de su marido komo tambien i de la esfoegra, ke de esto si sekilijava mui muntcho H. Rafael, i mas tadre ke el H. Abramatche ja lo supo todo enpeso de moevo a amarla i se troko la inimistad sovre la Bu, Mazalutcha, ke i de esto tambien H. Refael si sikilijava, ke i esto tambien mas tadre ja estuvieron boenos,

Ejos todos los 2, eran en la butika, kontinoando en su negosios, i H. Refael era siempre ke kamenava por los konakes, i tambien para pasar la ora, i muntchos dias se los jamava a los Hazanim ke avian en Samokov para enbezarlos a kantar en el KAAL, ke era muntchas vezes, koando el Hazan azia algun jero en el kante seja en el KADICH, or en el NICHMAD, era ke sovia el a la TEVA, i lo eskapava de kantar ansi lo azia i en los MOADIM, ke en KIPUR era solo el ke kantava el dija entero, i mas tadre si lo tomava tambien i su IJO

311    Biografia, de H. Refael A. Arie.        1842

1. Abramatche para ke si enbezara i tambien para ke lo ajudara, i ansi foe ke H. Abramatche lo azia de mizmo denpoes ke murio el padre, i el tambien enbezava a los todos Hazanim,

Ejas las mujeres en kaza, siendo todas las 2 rezin kazadas, i a tan presto ke ja non si konvinieron, i la mas grande komo mas pratik ja foe kapatche, de azerla abatir, a la tchika, i dechar la enkantonada, por un sierto tiempo, i esta ultima, komo kriatura lo somportava, kon pasensia, i ansi era ke estavan, apartadas, kada una en su kamareta, ke akonto la grande deve de irse konsumiendo, porke eja es aparejada mas muntcho para el mal, en el tiempo de agora ja ai ke las noeras, lo azen esto, ma se dize ke es adjamia, por las pretansiones ke tienen ke SAVEN, i ke si lo kontienen, ke eja foe demandada, i non prometida, son i estas ke si estan sekando en sus kamaretas ala solas i estan reposando, es por esto kale dizir loke buchkan a tomar mujer de familia onorada, i ke tiene visto muntcho, i esto jo sigun ja lo tengo eskrito ke la mujer deve de vinir a los karakteres de la Familia de el marido i non el marido a los karakteres de la mujer i lo todo es la flakeza de el marido, ke non supo komportarse enfrente de su mojer, i es ke esta aparejado para ke toda su vida de jevar mal seja el uno komo tambien i el otro, i tambien es kavzante de ser apartado de su familia, i esto es mas tadre ke lo alkansa a saver koando lo veye ke toda la Familia se rekojen i el es apartado lo todo solo por razon de la mujer, ke non keri ver ni sintir la nombradija de la familia de el marido,

312     Biografia, de H. Refael A. Arie.        1842

Sigun eskrito mas antes ke usref pacha ke era el komandir de la kale de Belegrado, i ke foe nomenado, por Governador en la Bosna, foe ke vino a Samokov kon mui grande saltanat, i koando vino de Belogrado se trucho kon si 50 kavajos kargados de moneda, ke la gano en Belogrado, i estos kavajos eran adelantre de el paiton de el Pacha ke estava asovido, i el Banker de el Pacha ke eran Tchelebi Jeuda kon sus ermanos, koando li foeron a dezirle el Baruh ABA, lis dicho ke si va ir a la Bosna i ja iva a ser plazer komo se ivan i uno de ejos kon el komo su Banker i merkader, i ejos ke non podijan irsen porke estavan mui kargados de sus etchos, li dicheron ke ja van a ir ke era kon la entision de mandarlo a H. Refael, i esto ja lo izieron ke lo izieron prontar a H. Rafael kon algo de ropas por el presipio, i lo mandaron si entiende ke si las merkaron ejos, por ke H. Refael non tenija, i su IJO H. Abramatche kedo en Samokov en la butika, ma el Pacha non estuvo kontento, de esto ke lo mandaron a  H. Rafael, i tambien lo protejava, ma non tenija todos los artikolos,  i al presipio ja foe aziendo algo de etcho porke estava solo i  se iva topando mui bien kontente, i en Samokov era ke kudiava su IJO  seja en la Butika komo tambien i en kaza

en el anio de 5603, H. Rafael ke ja estava en la BOSNA  era lo mas muntcho ke estava en el konak de el Pacha ke muntchas

313     Biografia, de H. Refael A. Arie.        1843

notches komia i durmia tambien en el konak, i en los dias era en la butika ke lo todo las venditas ke azia era lo mas muntcho para el Pacha, i su soeta^[45], ma pasando mui poko tiempo si foe tambien i H. Behor el kojumdji, ke el koal ja era en Samokov el Bazirjan de el pacha i se jevo mui muntcha ropa, lo koal ke H. Refael ja non pudo mas nada vender i era solo por hatir ke li ivan algunas kozas tambien i de el, ma non li konvino i poko pasando si foe tambien i su IJO H. Abramatche, i estuvieron un sierto tiempo i visto ke non avia konto eran pensativles, porke H. BOHOR, lis konkorijava mui muntcho ke este ultimo si hazenio i se etcho en kama i poko tiempo pasando murio, i se vino en su lugar su IJO H, Lezirutcho, ke el koal tambien iva kontinoando, sigun ke era el Padre,

En sus estar H. Refael kon su IJO en la Bosna, foe ke tomo la karta de el Usref Pacha, de rekomendasion, para Tchelebi Jeuda, ke por la koala en la partida de este ultimo ja tengo de eskrivir la forma ke foe eskrita, i el provetcho ke izo ke es koza maravioza, lo todo sigun si dize ke sin sembrar non si rekoje, i esto es loke lo azian, sin ke pensavan para aprovetcharsen en el mizmo dija, i estas okaziones nunka non las dechavan pasar ke mizmo lis kostaria, seja moral komo tambien i material,

Las mujeres ke estavan solas en kaza, eran a los kudios de sus suvrinos i tambien era la Bu. Revka ke las akompaniava mas muntcho, ma la Bu. Revkutcha su Noera komo non si pasava boena kon su esfoegra, eja mando a jamar a su Padre de Filibe por ke viniera

314     Biografia, de H. Refael A. Arie.        1843

a tomarla, i el padre si[n] tadrar vino, i sovre ke la enegresio su esfoegra, uvieron grandes kechas, i avia vinido el etcho a apartarse H. Refael de la Bu. Mazalutcha, lo todo via de kartas, i la Bu. mazalutcha a poder de sus deskulpamientos, i de muntcho ke foe jorando foe ke el etcho resto anojado i a la Bu. revkutcha si la jevo el padre a Filibe, i a razon de esto li kalio ke viniera, H. Refael a Samokov, para reglarlo i tambien los etchos de la Bosna ke foeron kurtos, se vinieron kon lo restan de ropas ke lis avia kedado i se asentaron de moevo en Samokov, en sus Butika, i ivan kontinuando sus etcho de antes,

koanto a la kistion de la Bu, Revkutcha ke estava en Filibe eja non kijo vinir, a samokov, i kalio ke foera tambien H. Refael a filibe i la trucho kon muntchas kondisiones, ke de este tiempo foe ke su marido la amava mas muntcho de al presipio, ke kazo i a su madrasta non foe merada mas de este tiempo kon ojos boenos, seja de su marido komo tambien i de toda la Familia, i H. Refael era mui repintido ke si kazo,

ejos aun kon todo ke los etchos de la Bosna non foeron tanto boenos torna kon todo ejos trucheron 12 mil groches, i esta suma lis foe muntcha ajuda para sus etchos, ke algo pagaron de sus devdas ke tenian de antes, i lo restan se ivan akomodando,

En este anio ke uvieron unas koantas Paridas en la Familia era ke H. Refael ja estava en todas, i tambien en este anio lo kazo Tchelebi Gavriel a su uniko IJO S-r. Behoratche i lo mandaron por

315     Biografia, de H. Refael A. Arie.        1843

konsfoegro tambien i a H. Rafael, a Sofia, ande H. Haimatche Tatcher, ke en su partida ja vo a eskrivir en largo sigun uzueron la Boda ke foe kon grande saltanat, H. Refael estuvo unos koantos dijas enbezando ijikos a kantar para ke kantaran kon el Hazan el dija de los kiduchim, i en dija de Chabad en el KAAL,

en este anio ke si foe tambien la Bu. LEA, a JERUCHALAIM^[46] aparte ke la akompanio H. Avram el Chekerdji, fin Jeruchalaim foe i H. Refael tambien ke la akompanio fin a Selanik, ke en esta ida tambien lo izieron 8 dijas de boda^[47] ke, kombedavan en kada notche a muntcha djente, i en los dijas a las mujeres i komijan todos, kon eja i a los menesterosos lis dava a todo muntcha moneda i aparte prezentes, de kozas de kaza,

En el anio de 5604, a H. Refael li nasio una IJA, de la Bu. Mazalutcha, i en el parto lo izieron sigun todas las otras paridas, i en el dia de Chabad ke si li foeron todos los parientes a komer, la fadaron a la IJA, ke i esto tambien ja lo saven sigun ke lo azian i la jamaron, ESTER?^[48] ke la koala denpoes de la moerte de H. Refael, ke si la jevo la Bu. Mazalutcha a Pazartchik, i koando ja arivo en la edad de kazarla la kazaron de su djente de los Finses i de su ermano Sr, Moche, ke lo pario tambien la Bu, Mazalutcha kon H. Refael, ke i este ultimo tambien resto en Pazardjik, koando si foe

316     Biografia, de H. Refael A. Arie.        1844

la Bu, Mazalutcha ke si los jevo kon eja, ke por el koal tambien mas adelantre ja vo a eskrivir la familia ke tuvo, i algunos sus pasajes de su vida, i otros,

ejos el padre kon el IJO, ke eran en la sujas tchika butika, era a penas ke estavan pudiendo vender para sus mantinimiento, i ansi era ke ivan komiendo de lo poko ke lis kedo de la moneda ke trocheron de la Bosna, i por esto non si apretavan ke era el H. Rafael una persona mui antcha, ma su IJO lo gritava al Padre, por esto ke si komportava de esta manera, i ansi era ke de este tiempo andelantre enpeso a ir muntcho ralo a la butika, i era ke si iva buchkando lugar ande avia de pasar el tiempo kon kantar i a razon de esto iva tambien i biviendo ke lo muntcho bevia vino,

1. Rafael ke non si pasava boeno kon su IJO se akecho ande sus sovrinos, i ejos li dicheron porke komo kiria ke si viniera ande ejos i ke ja li van a pagar i ke si foera a pazardjik a vender fieros ke los merkavan de los madendjis Turkos, i a esto ja estuvo kontente, i era ke enpeso a ir a pazardjik i vendija, ma esto ke kalia ke si foera dia de alhad i ke boltara djuevis, i todo era a kavajo a los presipios non li foe nada ma mas tadre no lo pudo azer porke si avia kansado, solo esto de el estar kaje siempre sovre el kavajo, mas tadre demando ke li amostraran algun etcho en la sivdad ke i esto tambien lo mandavan en algunos lugares, para ke non estuviera en vazio, si entiende ke li pagavan en kada djueves, i su IJO era en la butika, es esto poede ser ke foe la kavza a ke foeran todos sus

317     Biografia, de H. Refael A. Arie.        1844

vinientes detras de el, fin agora todos empeigados, ke ja poeden azer konto, koantos anios si izieron, i sigun ja van a meldar adelantre, koalos foeron los provetchos de el empeigo, ke visto a las 2 partidas de los 2 linajes de H. Refael i de Hr. Josef, en djeneral, lo mas muntcho de sus djerenansios, fin al dia de oi son empeigados mizmo ke agora ja si veye, algunos de ejos, ke alkansaron, unos postos mas altos, ma torna kon todo son dependientes, i esto por koalo, no kale dizir, ke esta vida non es tanto Boena? jo digo ke siria poede ser el non ser kurajozos, i espantandose, ke non si va a poder mantener, va i se empeiga, i ansi lo van kontinuando todos sus vinientes, detras de el, i se van gustando koando lis pujan sus pagas denpoes ke ja sirvio koal 2 i koal 3 anios, kon 20 or 50 frankos mas lo koal de esta edeja, en el linaje de Hr. Tchelebi non se veye, fin al tiempo de los mansevos de agora, i meldando su Biografia ja van a ver, la manera de las vidas ke pasaron seja ejos komo tambien i todos sus vinientes detras de el, sin jerarme por dizir fin al dija de oi, jo ke lo esto eskriviendo es sigun mi edeja, es i lo topo ke la vida de akeja persona ke es dependiente non poede ser nunka igual a las vidas de la persona ke es endependiente, mizmo ke si entremetera en el mas tchiko negosio, i de la merkansia si poede alkansar i rikozas i onor a tiempo ke de el empeigo koalo? ja non si dizoe[dize] ke la merkansia es binditcha de el DIO, ma en la mosedad non si dize, i esto es loke mi parese ami, sin ke kada meldador lo toma en mano esto por baza, ke kada uno ke aga akejo ke lo veye por mas mijor, i la

318     Biografia, de H. Refael A. Arie.        1844

vista de oi para el linaje de Hr. Tchelebi, es tambien por desplazer, mi permeto a dizir, lo todo sigun mi edeja, ke kaje lo mas de los mansevos ja estan empeigados sin ke dinguno esta buchkando por echpikulijar en koal negosio foesa, de amerkadejar, fin al grado ke i las IJAS tambien esta siendo de mizmo, ke jo lis kontare por mi IJA la tchika SOFI, mi dize en un dija, BABA, ami para koalo es ke mi enbezates, i gastates kon mi para ke mi enbeza en DJUDEZMO, i en BULGAR, FRANSES, NEMSE, STENOGRAFI, i otros, kero i jo ganar sigun ke otras komo ami si estan empeigando, i jo aun kon todo ke es kontra de mi edeja, i saviendo ke non mi va a sintir, li diche va bien lo aremos esta prova, i sin tadrar ke eja si foe aziendo muntcho mukaet, kon ke foemos en unas koantas bankas i otros Buros foe ke lo topimos en una Zavedenia,^[49] a empeigarse kon 80 frankos de paga al mez i denpoes ke ja estuvo komo 6 mezes li pujaron a 110 frankos, ke li dicheron tambien ke mas tadre li van ainda mas a pujarle, i de esto foe mui gustoza, para IJAS, non empide tanto ke esto lo poede azer antes de kazarsen ma por los IJOS, non se si es boeno ke si el espanto de ke poede kontinuar i es trokar el karakter i la edeja de los de antes de mozotros, i por enfrentante es de unos 2 anios para aki ke algunos de los mansevos de los otros 2 linajes es muntcho de gustar sigun mi, ke los koalos ja foeron muntchos anios empeigados i todos mui bien savidos ke ja decharon sus empeigos i tomaron la merkansia, kada uno de su manera, i espero ke van a ser mas kontentes, de la vida de antes, al menos sus vinientes si poede esperar ke

319    Biografia, de H. Refael A. Arie.        1844

poeden tomar el esprito de la merkansia, i ejos van a kontinuar en ejo, i non van a kerer el empeigo,

En el anio de 5605, H. Refael si foe a Kiostendil, ke lo mandaron sus sovrinos, (en unas koantas vezes ke foe eskriviendo por los sovrinos i non diche koalos son, porke H. Refael tenia i mas ansi sovrinos ke eran los IJOS de Hr. JOSEF? i tambien IJOS, de su ermana, es a dezirles ke ande eskrivi sovrinos foe solo por los IJOS de su ermano Hr. TCHELEBI, ke son TCHELEBI JEUDA GAVRIEL I ABRAAM,) para ke lo truchera a H. MERKADUTCHO, a razon de un jero ke izo este ultimo, a detras de una karta ke resivieron, de sus amigos de Kiostendil, i por ke non foera, avregonsado i tambien kondenado es ke buchkaron a traerlo ke sovre este ditcho jero ja lo van a meldar en la partida de H. MERKADUTCHO, i koando ja estuvo H. Rafael en Kiostendil, i H. MERKADUTCHO ke ja lo supo ke vino por esto, izo ke si eskondio de la vergoensa, i kalio ke si esperara, 2 dias fin ke salio en medio, i denpoes ke kon las boenas, lo konvensio, li izo ke li rekojo la ropa toda de la butika, i se lo trucho tambien i a el djuntos, i todo el gaste ke si izo por esta venida la izieron los ditchos sovrinos por sus kontos, sin buchkarlos de H. MERKADUTCHO ke sovre esto foeron mui sikilijados la familia entera, ke estava tiniendo mui boen etcho,

320    Biografia, de H. Refael A. Arie.        1845

En este anio ke sus ditchos sovrinos tuvieron la Haratchiria de Samokov tambien, i H. Refael ke ja era boeno kapatche para este etcho, li dicheron si kiria entremeterse en esto ke li ivan a pagar a 300 groches al mez, i H. Rafael mui kontente lo resivio a merarlo, ke kon los djidios i kristianos ja lo konvinia boeno ma kon los zinganos li foe mas pezgado, a razon ke non si podia darse tanto presto a entender, ke este dasio era nombrado, en logar de el sirvisio militario, porke el Turko non tomava soldados de otros poevlos, era ke lis fiksavan a kada poevlo, una sierta suma por esta taksa i ejos ke si la espartieran a kada uno sigun de su posibelidad, ke ja si entiende de sujo ke salen muntchos pleitos, en la espartision, ke entre los djidios i los Kristianos ja los konvinija H. Rafael ke de los Kristianos, lis kovrava aparte por esto de azerlis la espartision i tambien de los Djidios ma de los Zinganos era males grandes, ke eran todos mui proves, i la taksa era, a 20 groches por kada persona Ke ja tiene la edad de 20 anios, ma ja los konvinia, i de esto foe ke si enbezo unas koantas palavras en zinganesko, ke en okazion avlava i los azia ariyir en los pasatiempos

Mas tadre H. Refael foe indo algo malato, porke el era una persona mui sana, i en su vida non sufrio de dinguna maladia, foe an este tiempo ke iva tiniendo algo de dolor koando urinava, ke esto mas tadre si li iva enfortesiendo i non estava podiendo estar

repozado, i kalio ke si aderesara ande los medikos, ke estos ultimos li dicheron ke era de loke iva biviendo de los vinos ke non eran de

321    Biografia, de H. Refael A. Arie.        1845

los boenos i tambien ke non foeran freskos, kere dizir esto, sovre esto sus suvrinos ke lo amavan tanto, li izieron traer, de Filibe un karo [baro]^[50] de 500 okas, de el vino boeno i viejo, i se lo abacharon en su kaza, i de koando enpeso a bever de el ditcho vino enpeso a tener mas poka dolor i tambien urinava mas poko, i ansi foe ke en poko tiempo si li depedrio la dolor i estuvo komo antes sano i boeno,

de esto eskrito ariva, mos kale enbezarmos, los karakteres i la omanedad ke tenian en akeos tiempos los mas mansevos enfrente de los mas viejos, mizmo ke non eran sus padres, i tambien ke non tenia el poder, lo koal ke en el tiempo de agora, ke dizimos el seklo de la mas grande sevilizasion, los viejos kale ke digan "DESPLAZER" i akel mas aedado ke sufrira, lo dechan a la vanda, kon dizir, ja abasto bivio, mas ke provetcho ai de el, i el non si arto dainda de los plazeres de este mundo? i el en su tiempo ja vido komo estas kozas lo koal ke mozotros non las vimos, a ejos ja lis abasta solo un un poko de mantinimiento koza para ke si poeda sostener, i ke si esten en kaza, para ke lis pronten para ejos sus menesteres por koando van a vinir de sus pasatiempos, ke esto ja son lo mas denpoes de la medija notche, i ejos kale ke los esperen, ke komo non los maltratan i muntchos los harvan, a estos ijos non lis viene al tino ke tienen un padre i madre viejo en kaza alguna vez por taparle los ojos^[51], al menos kontarle ande es loke estuvieron, i non keren ke lis traigan a agustar de alguna koala koza la mas tchika ke ejos komieron, or ke bivieron, otro ke ejos vienen, kon ravija grande, i a tanto presto ke