קורותיהם של הסנ' בְּכוֹרָצֶ'ה־יצחק ג' ובנו סנ' מוֹשוֹנָצֶ'ה

1801

De aki i endelantre si enpesa la partida de el Sr.

Behoratche, G. Arié, de el anio de 5622 fin a 5661

1802     Biografia de Sr. Behoratche G. Arié.    1862

En el anio de 5622, Sr.^[49] Behoratche, ke si konorto fin a un grado de la moerte de su padre, el enpeso a merar los tefteres i de el presipio, el si mero un konto de la kacha, i viendose una suma grande de moneda ke li mankava, i de las buchkedas ke el la iva aziendo, lo vido ke en su armario, ande ejos tenijan la moneda, i ke era en la kamareta grande, debacho de el merap^[50] ande tenijan la ora ke era kon mozika, i su espalda ke dava, ala chemeneja de el jakmaklik, lo topo ke estava avierto kon una anertura[avertura], de karar poder enkachar el braso, i en buchkando a deklararlo, lo toparon ke su moso Refael B. Manoah. iva en kada okazion, ke topava, i se iva rovando a una i 2 bolsikas de a 1000 gr. de metalik, i mas si deklaro tambien, ke siendo el ditcho Refael, si etchava kon el Sr. Behoratche en una kamareta, lo azija tambien ke koando ja si dormija, li rovava las javes de este dolap, tambien por rovarse esto ke lo podija, i sigun de lo ke kontavan, era ke el Ditcho Refael pasando muntcho anios, lo tuvo ditcho ke si tenija rovado, 28000 gr. ma sigun el konto de Sr. Behoratche era ke solo 12000 gr. li tuvieron mankado, i esto non li reklamaron, otro ke li meraron su konto i li pagaron de esto ke buchkava i mas non lo kijeron, en kaza,

Koanto a el kuti, de enfie de oro, ke si avija desparesido, ke pasando pokos dijas denpoes de la moerte de Tch. Gavriel foe ke la Bu. Dudutcha, lo topo, en el lugar ande lo etchavan el bokluk, i esto foe ke al afito ke si topo la Bu. Dudutcha koando era ke

1803      Biografia de Sr. Behoratche G. Arié.    1862

lo estavan alimpiandolo el lugar de el bokluk, i lo tomo i el dito kuti, resto goadrado muntchos anios, i mas tadre lo tomo Sr. Mochonatche su inieto, i lo kolaneja en algunos de los Chabatiod i moadim

En la kamareta ke durmija Tche. gavriel foe ke muntchos anios non entraron en eja, i denpoes estuvo Sr. mochonatche, ke dormija en eja i el Sr. Behoratche koando ja entrava era komo un enprestado, i fin oi es de mizmo ke non durmen en eja,

Tch. Gavriel era una persona, muntcho meujuda i mui entelejente, sovre todo i mui kebar, era ke toda la djente lo onoravan i lo respektavan mui muntcho, el en kaza si komportava mui amable a todos sus inietos i inietas los amava mui muntcho, todos sus etchos era ke los enkamenava kon la mas grande deretchedad,

El tenija muntchas modas de vistidos, en las tadres de los Chabatiod i de los moadim de el enverano, el si vestija de una echkurta, kapladijada, de samara, de el koero de las kavesas de los patones^[51], su vistido era pantalon preto, kon ensima de un enteri largo, de ropas finas de lana i de seda, i enkochakado de un kuchak de los modos de los chales boenos, i por el envierno de modos de los kiordis, kapladijados de las mijores samaras ansi i de las echkurtas i los djubes de los panios de las kolores, en su kavesa boena fes, kon peskiul de seda, su poerpo era grandino i alto, kamenava mui repozado i deretcho, su fatcha era morena, i era propio komo esta de su inieto Sr. Mochonatche, su barva kurta i rala, non si la kirkijava, i non li era muntcho blanka, su pasatiempo era lo mas muntcho en

1804      Biografia de Sr. Behoratche G. Arié.    1862

 estudiar livros sigun ke ja lo eskrivi mas antes, su nature anke ke era nervozo i se aravijava en algunos tiempos ma ja era ke li i pasava mui presto, a el non li plazia enteresarse en los negosios ke los azijan otra djente, ansi de mizmo ke non si enteresava tambien por saver de las moevas seja de la plasa komo tambien i de otros lugares, el si goadrava muntcho de non darse a konoser a el Signorio, i a todas las personas el las resivija kon kara mui alegra, el jevava siempre un anijo de dijamante en su dedo tchiko de la mano, i el dia de Chabad el si metija un anijo de piedra boena de rubin, a el li plazija ke estuviera seja su mujer lomo tambien i todos los de su kaza mui bien vistidos, i a todos lis azija siempre vistidos moevos, i merkava siempre djojas, i esto de lo boeno.

En este tiempo ke Sr. Behoratche, tenija en Viena, algunas sumas de moneda depozitada, foe ke li eskrivio a su komisioner porke li remetiera kon la pochta, 600 dukados minsas, i en akel tiempo ke en Samokov non avija pochta nemsa, i era a Sofia ke vinijan en las kartas komo tambien i los grupos, i esto a el nombre de H. Avraam B. Basa, ke el koal las resivija i las mandava kon pasajeros, i siendo ke estos 600 dukados si li izieron el menester de remeterlos a Kostan, a Sr. Kamondo, el li eskrivio a H. Avraam porke los remetiera de Sofia kon la pochta sijun estavan a Kostan, i el koal los entrego ala pochta turka, i en akel mizmo dija ke el las entrego i ke partjo la pochta, foe ke en vakarel, una banda de ladrones lo matan a el tatar ke jevava la pochta, i se toman todos los grupos ke avijan

1805      Biografia de Sr. Behoratche G. Arié.    1862

 en lo pochta ke entre todos foe i este, ke si lo jevaron, i el Sr. Behoratche koando ja lo supu. si sekilijo mui muntcho, i todos los menesteres ke el los izo por poder kovrar de el governo esta suma or algo menos lo todo foe en baldes i ansi foe ke non pudo nada kovrar, otro ke el Kaimakam de samokov, ke era Dervich bei, ke lo dicheron ke tuvo i el mano en este rovo, era ke lo azija ganar, kon ke li dava moneda de la kacha, de el governo i le tokava polisas por kostan kon ke li pagava ajos, mas grandes, i tambien li azija i merkar algunos fondos turkos, i era ke iva ganando las deferensias de las monedas, ke non era koza ke si li pagava la suma ke li rovaron,

Esto ke li trucho un mui grande deskorajamiento, lo izo ke si li foe ande su Tio el Tch. Jeuda a konijorarse por los sujos deskontros ke los iva tiniendo seja kon el rovo de su moso Refael komo tambien i este de la pochta, i ansi mas i otros ke los iva tiniendolos, i Tch. Jeuda por enkorajarlo, li dicho ke si es ke lo kiria ke si entrara i el por Haver en el etcho ke ejos lo tenijan, i de esto el ke ja foe de akordo, ma sus kompanieros, de Tch. Jeuda por un dezakordo ke ejos lo tuvieron entre ejos, de algunas sus deferensias, foe ke non si lo podieron konvenirselos, i ansi foe ke non pudo entrar por haver,

i visto a esto el Sr, Behoratche, enpeso de moevo a kontinuar en sus saraflikes i dar moneda kon enteresos,

1806      Biografia de Sr. Behoratche G. Arié.    1863

En el anio de 5623 Sr. Behoratche merko una partida de sahtijanes i les mando a viena ande Sr. Mate Ruso por ke si los vindiera por su konto, i de esto akontesio la boena anijada i tuvo mui boenas ganansias, el merko tambien i algo de fieros ke los mandava a Pazardjik ande H. Jesefatche Baruh tambien por su konto ke si los vindiera, i kon el etcho de los trokamientos de las monedas i estas de las valutas, i los dar moneda kon entereso i las polisas a la kacha, era ke lo azija i de lo todo era a poko, i se kontentava kon las pokas ganansias, sigun el uzo de el padre, i lo todo kon muntcha deretchedad i kon repozo i en lo siguro,

En kaza si komportavan mui bien i goadrava la ikonomia tenija i un kavajo mui boeno i mui ermozo en kaza, ke era aigir, ma siendo ke era mui serbes era ke ejos si espantavan de sovirlo i para kamenarlo era ke lo benijava jo Tchelebi i en muntchas tadres i me kamenava por los kampos, este kavajo saltava las fojas de 7 i 8 metros i sin ke sin konsintiera el ke estava asovido, tenija de mizmo el karo de los boejes por ke li truchera la lenija para el menester de la kaza, ansi i las mandas i las vakas por tomarles la letche tambien por el menester de la kaza,

Foe en este anio ke el nombro una sierta suma de moneda i de los revinidos ke meldaran 10 Hahamim, en las tadres de los dijas de martes, i las notches enteras de kada viernes, i las pagava a 8 gr. ala semana a kada uno, i esto por el repozo de la alma de su Sr. Padre, i esto lo foeron kontinuando muntchos anios ke ivan meldando

1807    Biografia de Sr. Behoratche G. Arié.    1863

i mas tadre ke azijan algunas revizias en las notches de viernes, por ver si era verdad ke meldavan, lo vieron ke algunos de ejos era ke estavan etchados i dormiendo, i anke ke lis davan algunas kechas ma ja era ke davan i de pasadas por razon ke si deskolpavan kada uno kon su razon, i ainda mas pasando ke torna azijan ansi las revizias ja foe ke los toparon kaje a todos dormiendo i esto ke estavan tambien i boenos kovejados, ke visto a esto el lo abandono esto de el meldar, en las notches de los viernes, i lo decho solo ke meldaran en las tadres de martes, i esto foe ke kontinoaron fin a el tiempo de la gera turka-rusa, de 5638, seja por esto ke ja non estavan viniendo i se kovravan sus pagas i mas tambien ke el fondo apartado, ja foe ke non li pagaron estos ke las devijan i de sujo foe ke si abandono tambien i esto,

El en este anio topo en una bolsa ke estava goadrada en un kanton de su armario, ke kontenija 20,000 gr. i era ke i eskrivija ensima de esta bolsa, KODECH, i el ke tuvo muntchas edejas sovre esto, i non saviendo ande emplejarla, esta moneda, lo topo de djusto de fragoar un midrach, ke es este ke esta i agora en el Kaal moevo, i el merko la kaza de H. Jeuda Echkenazi, por 4000 gr. i lo frago a sigun de loke esta i agora, i denpoes ke el lo mobelio, kon menderes i lampas i bankos, i otras kozas i metjo tambien i un Safer Tora, i el dava la lenia por kaentarlo en el envierno i lo izo EKDECH, a el kolel de Samokov, i en el dizen el Tikun Hasod i por el envierno dizen i la tefila de las manianas, i las adjuntas las azen en este

1808    Biografia de Sr. Behoratche G. Arié.    1863

 Midrach estas de el Kolel,

El en este tiempo tuvo una grande flakeza, i kon dolor en el estomago, i ansi era ke estava lo mas muntcho vijitado de los medikos, el anke ke ja goadrava siempre la edieta foe agora ke la goadro enteramente, i el se mantenija solamente de los pojos, i ansi foe ke devino mui flako, i su ijo el Sr. Mochonatche era, ke frekontijava las echkolas i este de el turkesko, i en kaza la Bu. Amadutcha era siempre jorando, por la piedrita de su marido, i era ke apenas si okopava en los etchos de la kaza, i muntchos anios eja non salio de kaza, i la Bu. Dudutcha ke ja estava kargada de krejaturas era ke las kudijava, ande ejas era ke siempre la vijitavan seja sus parientes komo i tambien i sus amigas por akompaniarlas i por konortarla, ma eja non trokava de nada,

En el anio de 5624, en roch hodech Adar, foe ke foe ke kazi Jo kon Beju, su ija la sigunda, i sigun ke foe la boda esto ja lo eskrivi en la partida moestra de este anio, ke aun kon todo ke Sr. Mochonatche ja estava espozado i ke era tambien mas grande de Biju, ke kalija ke kazara el mas antes ma siendo ke jo tambien era mas grande de Sr. Mochonatche izieron la boda mija mas antes, i en akejos tiempos era ke meravan i se apuntavan en estas kozas muntcho

Koando izieron el espozorio de Sr. Mochonatche kon

1809    Biografia de Sr. Behoratche G. Arié.    1864

M. Tamaru, foe ke Tch. Jeuda, lo izo kondision ke para la boda ke devija de traer Tchalgi de enderne, i la boda ke la izieron en el mez de Sivan, foe ke la novija M. Tamaru se avija levantado de una hazinura ke izo i ke estuvo etchada komo a un mez, i en akejos tiempos ke era ke avijan vinido moevos los Tcherkezes, i ke avijan traido los modos de las hazenuras, foe ke i el Novio Sr. Mochonatche tambien si avija apegado, de la vergoela, i akaesio ke en la primera notche de la boda li tomo un frio, i kon esto foe ke si li deklaro la vergoela ma ja foe ke a todos los 2 mui presto ja lis paso i se sanaron mui boenos, i la izieron la boda kon muntcho keef i saltanat, i uvieron a muntchos kombedados seja en los dijas komo tambien i en las notches, i el tchalgi ke ja foe de los mas mijores ke podija ser, ke el grande de ejos era, Merdjan su nombre, i en el enstromento ke el lo djogava era kemantchetche [kemantche], una mui agradavle boz ke sonava, i las charkis muntchas ke ja las konosijan, ansi era ke las notches enteras estavan kantando i alegrandosen, toda la familia Arié i los amigos ke siempre ja estavan en la boda, uvo tambien ke en la una notche, ke kombedaron tambien i alos begis de samokov, i les gizaron las komidas sigun de sus uzos ke este ja lo tengo eskrito komo lo azijan, i en los dijas li venijan i las hanumes a vijitar la boda i sigun de loke las resivijan tambien ja lo tengo eskrito, i en todos los 8 dias de la boda ja era ke tenijan a muntchas mezas de kombedados,

Eja la Novia M. Tamaro, ke ja es boena i entelejente i respektuoza, i ke ja trucho muntcha achugar i 500 rubies de kontado

1810    Biografia de Sr. Behoratche G. Arié.    1864

i aparte eja tambien trucho i prezentes para toda la familia, i ansi ke de todas las 2 partes foeron mui bien kontentes, i ejos los moevos kazados foeron siempre mui aunados i se amen mui muntcho, ansi de mizmo eja respekta a todos los de la kaza,

El novio Sr. mochonatche kontinoava la echkola i estudiava en el midrach, kon Hr. Avraam Koen, i tambien la echkola turka

Sr. Behoratche era de mizmo en sus negosios, i en este anio el merko una partida mas grande de lanas, i las vendija en groso kon boenos profitos, el enpeso tambien i en este anio a merkar de los fondos turkos, solo por el entereso ke non echpekolijava en ejos, i en este tiempo ke avijan salido un fondos tambien turkos ke si jamavan Tahvilat mumtazi, los koalos tenijan un tiraje alos 6 mezes, i eran de a 100 liras inglezas, i en la plasa si negosijavan por 55, 60 liras, i tenijan tambien i a 5 % de entereso sovre el nomenal ke koando si travavan ja era ke i li afetava ke si li amortijan algunas i tenija i otra ganansia de 40 a 45 %,

En este anio li nasio un Ijo i lo jamaron Azarija, i se izo boda grande en el parto, ansi tambien i lo restan ke si i azija en todas i las otras paridas, es este el Sr. Azarija ke lo tuve eskrito mas antes ke foe el sigundo ermozo de entre la familia Arié. i ke si lo kijo jevarselo el Hadim Agasi de la Valide Sultan, de el Sultan Hamid, en su estar en mi kaza en kostan, i en orta kiovi el ditcho Sr. Azarija foe krijado de su madre kon mui muntcho kudiado i su propia madre lo aletcho, el foe mui entelejehte, i li plazija

1811    Biografia de Sr. Behoratche G. Arié.    1864

 mui muntcho los estudios, el era mui bonatcho i mui repozado i mui amistozo kon todos, el en su estar en kostan era ke siempre frekontava las echkolas, i mas tadre ke el ja se vino a Samokov i ke foe i endo algo flako, lo izo de non kontinoar en los estudios, i su Sr. padre si lo tomo kon si en su botika, por ke si enbevesiera en los negosios ke azija el padre, lo todo porke si remetiera i ke estuvieviera sano, i esto li turo poko a razon ke li arivo el tiempo ke lo ivan a buchkar por soldado, i esto ke li foe mui foerte seja a el i komo tambien i a sus parientes, lo izieron de mandarle a Nich Serbia serka de su ermana M, Donna ke estava kazada en Nich, kon Sr, Jshakutcho Kario, i el ke estuvo algo de tiempo en Nich, si foe a viena i se entro en la akademija por estudiar en los altos estudios, i esto ke lo kontenuo un anio entero, i se topava mui kontente i estava endo mui adelantre, ma por desplazer li arivo un dezastre, ke su uzo ja era ke frekontava en todos los tiatros 2 vezes ala semana, i en una notche ke el si foe djuntos kon su profesor a Karl Tiater, i en esta notche akaisio ke salio foego en el tiatro, i ke si kemo entero i estava jeno de djente, ke avijan komo 4000 personas, i el ke estava tambien arientro, ja foe grande mazal ke el non tuvo nada, de apreto ni espanto, i la razon foe ke koando el Sr. Azaria se entro a el tiatro, non si keto su palto, por decharlo ande los enkolgan toda la djente, otro ke el si lo detuvo kon si i lo detinija en el lugar ande el estava asentado, i su profesor el kompaniero, li dize, ke i el tambien devija decharlo ande los dechan todos sus vistidos, en i

1812    Biografia de Sr. Behoratche G. Arié.    1864

 amostrandole kon su dedo ande era ke lo devija de jevarlo, i el Sr. azarija ke si levanto por entregarlo, su palto, en el lugar amostrado, i antes ke el arivara ja foe ke si deklaro el foego, i toda la djente ke ja enpesaron a foirsen i el roido ke ja foe mui grande ke koalos gretavan i koalos joravan, i koalos se renpochavan, de los unos alos otros, buchkando kada uno por salirse mas antes, i el ke ja estuvo mas serka de la poerta, es ke ja foe i el uno de los primeros ke si salieron, i el denpoes ke ja si salio, i ke si metjo a merar, por ver sigun de loke ivan los unos saltando, koalos por las ventanas i koalos por los tejados, koal medio kemado i koal de loke si kaiva era ke kedava moerto en bacho, i sigun de loke se ivan de los unos a los otros pezandosen i matchokandosen kedavan en bacho, i moertos, ke i entre ejos tambien foe i kemado i su profesor, ke era a el ke lo estava esperandolo, i de estas todas vistas el ke si imosiono, i grande estremesion, i imajenandose ke i el tambien podija en esto arivar, i de esto el enpeso de moevo a arivarle su flakeza, i tambien i hazino, i de esto todo era ke sus parientes en Samokov no lo savijan, sovre ke si topo i el tambien en este apreto, i el ke non si los izo saver porke non si sikilijaron, (sovr esto de el goadrar para ke non si sikilion ja lo tengo eskrito i otra ves ke es sigun mi un mui grande jero, i la ganansia es topar la fin i meter en riziko mas grande la vida, a tiempo ke komo lo saven de mas antes es ke si poeden tomar las mizuras presto,) era ke sus amigos de viena ke lo ivan enkorajandolo ma non foe bastante, porke el non troko, nada

1813    Biografia de Sr. Behoratche G. Arié.    1864

i ansi foe ke sus amigos viendolo ke kada dija iva endo mas flako lo izieron ke si lo eskrivieron a sus parientes ke ja si kere entendido la manera ke meldaron esta karta, i foe ke ejos non tadraron de presto traerlo a Samokov ma foe tadre, ke ja estuvo mui flako i tambien hazino, i ansi foe ke dija kada dija se iva konsomiendose ja era ke todos los medikes lo melizinavan, ma a el non li ajudava nada, el ja tuvo el estomago mui flako i de esto poede ser ke era ke en 7 i 8 dijas una ves kon las mil purgas ke si porgava, i mas tadre los medikos lo akonsejaron por ke si foera a kostan i ke estuviera, en la ada de Halki^[52], i el ke ja si foe akompanijado de su ermano el Sr. Mochonatche i estuvieron longo tiempo ke i esto non li aprovetcho, i se vino torna a Samokov, mas hazino i ansi foe ke kajo en la kama i el ke estuvo algo de tiempo en kama foe en un dija de lunes ke kedo moerto, de el anio 5645 ala flor de su mansevez, i foe una mui grande manzija, para toda la familija, sovre todo para su parientes ke non si matavan mas ke ejos,

Su S. Madre de tanto ke eja si lo tomo, foe ke si salio de su tino, i salio loka fin a el grado, ke lis kalio ke la metieran en koartir aparte, i tambien era ke non savija loke azija, a eja foe ke lis kalio ke li i ataran i las manos, porke todo estava buchkando de arazgarse la boka, i foe ke estuvo ansi un anio entero, i mas tadre apoko apoko ja foe ke li foe pasando, i foe mui boena i sigun de antes, solo ke kedo mantchada i es mizmo i oi koando si avla de Azaria, si lis troka las kolores de sus karas i no avlan de el

1814    Biografia de Sr. Behoratche G. Arié.    1864

 I el Sr. Behoratche ke tuvo i otros apretos era ke siempre estava i el endo hazino, i kon la jaila ke ja saven ke la tenian en Hevra, a kontra metad, kon Tch. Jeuda, i ke era siempre Tch. jeuda ke la dava a kira i el la tomava, i Sr. Behoratche ke non keria ir a demandarlo, su parte de los kovramientos ke los azija, foe ke enpesaron a tener algunas deferensias, seja en el darla a kira komo tambien i en los enkasos, ke los azijan,

En el anio de 5625, a razon ke en este anio el merko los sahtijanes de samokov i de Pazardjik, i de otlik kiovi, i de i otros lugares, i komo estava solo lo keto a su ijo Sr. Mochonatche al Tcharchi por ke li viniera en su ajuda, i en estas merkidas de los sahtijanes el tuvo muntchas ganansias, i su ijo ke ja foe mui akurat, era ke lo enkamenavan sus etchos en boena regla, i tambien el era ke li enpeso a jevar sus eskrituras porke el ja savija boeno eskrivir i tenija la eskritura mui klara, el era ke li enpeso a tener i la kacha i li merava en kada mez el konto de la kacha, ansi de mizmo li enpeso i a eskrivir su korespondensia,

Sigun ditcho mas antes por la jaila ke la tenijan en un logar i ke la alkelavan djuntos i de esto era ke tenijan algunas deferensias, foe en este anio ke ejos si la espartieron, i esto kon ke apartaron los pedasos i kon nombrar tambien i presios, i foe ke

1815    Biografia de Sr. Behoratche G. Arié.    1865

 kon el goral ke lo etcharon li kajo a S. Behoratche la partida de vrichnik i li kalio ke li kontara a tch. Jeuda 5000 gr. i la partida de dupnila li kajo a Tch. Jeuda, i kon esto ke ja foeron de todas i las 2 partes de akordo ejos se tomaron en el notarius kada uno por sus dokumentos de patronaje i denpoes era ke kada uno si lo alkelava por su konto mas sin dinguna mleskatina,

Sigun eskrito mas antes ke Sr. Behoratche sofria de el estomago ke era flako, i en este anio ke esto si li renovo, i los medikos de Samokov ke non lo podieron melezinarlo foe ke si foe a Viena, i los medikos de Viena lo mandaron a los banios de Feslao, i estuvo komo a 3 mezes asiendose las kuras i kon ke era akompaniado de sus moso Konorte B. Chelomo, i ke ja estuvo kontente de su viaje ejos si vinieron a Samokov mui sanos i boenos, i el merko en viena muntcha mobilia i vistimientas para todos los de su kaza, i aparte el merko tambien i algo de ropas de malifaktura, por venderlas en Samokov ke esto el ja lo konosija,

En este anio foe ke si izieron Haverim, Sr. Behoratche kon Sr, Mairutcho Alkalai, para negosiar en ropas de malifaktura, i ejos metieron a 1000 liras de kapetal a kada uno, i ejos komandavan las ropas de viena i las jevavan a la feria de uzundje ova, ke si ivan todos los 2 i azijan las venditas en la ferija esto ke lo podian i la suma de ropas ke lis sovrava era ke si la traivan a Samokov, i la vendijan entre sus klientes de Samokov i dubnisa i de otros lugares, i ansi lo foeron kontinuando longo tiempo i ejos eran mui aunados

1816    Biografia de Sr. Behoratche G. Arié.    1865

A razon ke Sr. Mairutcho era Haver lo azija ke siempre los vijitava i los azija tambien mui muntcho areir, ke i las mujeres ke vinijan en un kavo era sus pasatiempo siempre en esto ke ejas sigun ditcho buchkavan siempre el pasatiempo i el adonamiento i azer sus plazeres, porke en kaza non avija grandes okopasiones komo agora ejos eran servidos de muntchos mosos i mosas,

En el anio de 5626, li nasio a Sr. Behoratche una ija i la jamaron Oro, i kon eja de mizmo se izo ke la vijitavan ma eja la madre era mui vergonsoza, por esto ke iva pariendo ijas, ma el era ala kontra ke si gustava, i mizmo ke avija uno de sus parientes ke si li areiva por esto ke le ivan nasiendole ijas, ma ja era ke el non lis avlava nada, a eja la oro su madre la aletcho, i la kudjo i en su tchikes foe mui repozada, i koando ja tuvo la edad de 7 anio ke enpeso a frekontar las echkolas, ejas enbezo el djodezmo i franses i bulagar, i mas tadre estuvo en la echkola de los amerekanos ke si enbezo tambien i el ingles, i fin ke espozo estuvo en las echkolas,

En este anio tchorbadji mano sipotchli, li avrio un djuzgo kontra Sr. Behoratche, reklamandole un pedaso de la jaila, komo ke era sujo, ke Sr. Mano li era vizino a estas jailas, i de esto foe mui sikilijado Sr. Behoratche, i ejos ke si apararon alos djuzgos ke lis turo longo tiempo, i de todas las 2 partes aziendo a sumas

1817    Biografia de Sr. Behoratche kon su ijo Sr. Mochonatche.    1866

grandes de gastes, i ke por enfrentante de los gastes era ke non tenija de valor el lugar, solo era por non darse adebacho, i los djuzgos de esto era ke kalija si meraran en el mizmo logar, i esto kon ke lo deven de demostrar kon los edim, i de koala parte lo demostran kon los mas muntchos edim, i Sr. Behoratche ke si jevo 320 edim, kontra a 230 ke tovo el Sr. Mano foe ke gano Sr. Behoratche, i ja si entiendo loke kostan estos edim, ke aparte de loke ja son bien mantenidos era ke i devijan de ser i mui bien pagados, i la suma de los gastes ke los izo el Sr. Behoratche foeron de 380,000 gr. i a este konto era i el Sr. Mano ke lo azija, i kon esto ja foe ke si enpatrono i tuvo repozo fin a el anio de 5643, i en este tiempo ke ja era bulgaria, tuvo tambien torna kon esta jaila un djuzgo kon los kazalinos iskirlis, ke i ejos eran tambien vizinos, i le reklamavan komo ala metad de la jaila, i esto tambien ke lis turo longo tiempo i muntchos gastes, i afedentos ke foeron mui muntchos, i espantandose ke non iva a ganar, foe ke si lo konvinieron kon los kazalinos kon ke lis decho una grande partida de esta jaila i metieron granisas, kon ke lo mezuraron vija de los enjenieres i asenjalaron los metros ke kontenija la jaila, i lo izieron por vija de el notarios, kon ke i se tomaron de todas las 2 partes sus dokumentos menesterozos, i mas fin a el anio de 5661 non tuvieron dingunas pretensias, i el lugar ke lis decho a los iskirlis es una kantedad ke li podija traer, de 30 a 35 napoliones de revinido a el anio,

En este anio el si merko un tchiko ermozo paitoniko,

1818    Biografia de Sr. Behoratche kon su ijo Sr. Mochonatche.    1866

 de un kavajo, i en mizmo tiempo el si merko tambien i un kavajo, ermozo i era mui godro, i de lo kolor amarija, foe en un dija ke mi asovijo kon Sr. Mochonatche, i mos foemos a el kazal de izlakutchan ke ejos tenijan un Hankon^[53] un molino, i ala tornada en una tchika alachadika [abachadika]^[54] ke uvo en el kamino, foe ke el paitondji ke lo harvo a el kavajo, por ke non lo detuvo boeno a el paiton i el kavajo ke si aravio, lo troko su kamino i en un endek ke si bolto el paiton foe ke kaimos todos los 2 sin tener dingun danio, i el kavajo djunto kon el paiton ke fujo foe ke mozotros kedemos tadre fin arivar en kaza por ke kamenimos 12 kilometros a pie, i moestros parientes ke nos salieron a moestro enkontro kon otros paitones foe serka de la sivdad ke mos alkansaron, solo ke arazon ke el kavajo fujo solo foe ke tuvo algo, de ruturas el paiton,

El konosido Hadji Ibraim ke era el grande de los maadendjis entre los turkos de Samokov, foe en este anio ke el kijo vender su ermoza Vila de kampanija ke el la tenija en el kampo de rudech, ke era una vila de 2 etajes, kon grandes i muntchas kamaretas, i el kampo ke kontenija en esta vila era tambien mui grande entero rodejado de paredes de piedras, i kontenija en este kampo, goertas por rozas, i bostanes por sembrados, de las vedruras de komania, i kiochkes altos, tchimenis vedres i foentes, i chadirvanes, i lugar por los kavajos i paitones, i mas ansi todo esto ke era el menester i era tambien en el mizmo kampo, i enfrente de la vila ande se iva propio Tch. Jeuda, ke esto ja lo tengo eskrito sigun eran estas vilas

1819    Biografia de Sr. Behoratche kon su ijo Sr. Mochonatche.    1866

 ke las tenijan kada uno por si aparte, i esto foe ke el Hadji Ibraim si la prometio a Tch. Jeuda i el komo non la kijo li dicho a Sr. Behoratche porke si la merkara el, i esto por ke non la merkara algun turko, ke si goadravan de ejos solo por el etcho de el harem, ke podijan tener algunos, afedentos, i tambien por ke li foera vizino sus djentes, i el ke ja lo kirija esto de tener una Vila el la merko por 12000 gr. ke era mui barata, i el kon la grande sevda le izo una boena reparasion i la mobelio, i se merko otro paiton de 2 kavajos i eran blankos, i por el enverano era ke se ivan i dormijan en las notches i estavan mui kontentes, ma el Sr, Mochonatche el ijo grande de Tch. Jeuda koando se izo esta merkida era ke non estava en Samokov i mas tadre ke el ja vino, i ke lo supo ke la merko Sr. Behoratche, dicho ke el non decha a dinguno otro enpatronarse en esta vila, ke ejos koando li merkaron las vignas ke su a [son] las fabrikas ande si derita el fiero, de el H. Ibraim ja foe kon la kondision ke a otro la vila non la podija vender, i esto ke si la decharon en akel tiempo foe porke el lo kijo de tener una kampanija i se la decharon solo para el ma a otro non decha el entrar en su kampo por vizino, i Sr. Behoratche de tanto ke si sikilio, se izo hazino i le vino un sarilik, i estuvo muntcho tiempo hazino, seja su Padre Tch. Jeuda komo i Tambien todos sus parientes ke li avlavan i mizmo i lo amenazavan ma foe lo todo sin dingun provetcho, i Sr, Mochonatche sin ke el demando a denguno se adereso a el djuzgo kon el deretcho de chefilik^[55], ke esto la lei ja li dava a mano i ke ja saven ke el chefilik es koando un lugar

1820    Biografia de Sr. Behoratche kon su ijo Sr. Mochonatche.    1866

 si vendija i se el vizino lo kerija era ke akonantava el vizino mas sin dinguna otra razon i li kontava la moneda ke la merko i se lo davan a el vizino i esto era seja en la sevdad komo tambien i en el kampo, seja en tieras komo tambien i en fragoas, i ejos ke ja se ivan aparar a el gjuzgo foe ke los konvenieron i le konto 20,000 gr. i li resto la Vila en Sr. Mochonatche,

En el anio de 5627, Sr. Behoratche era ke kontinoava de mizmo seja en los echkontos i merkar los sahtijanes i mechines i dar las polisas ala kacha de el governo, i tambien la hevra ke tenijan kon Sr. Mairutcho Alkalai, de traer ropas, i siendo ke en esto mas non lo pudo azerlo de ir alas ferias, foe ke lo abandonaron i se espartieron, ke ejos tuvieron en esto muntchas ganansias,

El ke foe endo tambien algo hazino foe ke si pronto, por irse de moevo a Viena, i kon el en djunto si foe tambien Sr. Refaelatche mi ermano por entrar en la echkola para enbezarse el nemsi ke esto lis premia en akel tiempo, i el ke ja estuvo en viena los medikos lo mandaron a los banios de Karles-bad i de Franses-bad, i estuvo komo 3 mezes kurandose, ke se sano mui boeno, i en su tornar en viena el merko alguna mobilias i ropas por la djente de su kaza i tambien i vistidos, i el merko en este tiempo una manias de dejamante por 12000 gr. i tambien i algunas ropas por venderlas en Samokov,

1821    Biografia de Sr. Behoratche kon su ijo Sr. Mochonatche.    1867

Poko tiempo pasando de koando Sr. Behoratche vino de viena, i ke ja estava sano i boeno, era ke si estava vindiendo el maaden de usref pacha, djunto kon 3 vignas, i este maaden se jamava, Tchifte maaden ke era en el boaz de los iskeris, al pie de la montania ke si jama en turko, kasim-baba, i en bulgar, Chichman-jovan, i dizen ke en este lugar esta enterado, el Rei de los Bulgares, Chichman Jovan, a razon ke en el tiempo de las geras kon el turko i ke se iva foendose, foe ke lo mataron en este lugar i aki lo enteraron, i el kampo non era mui grande, solo ke su pozision era mui ermoza, i de una klima muntcho saludoza, a su deredor era todo rodejado de muntanias, non muntcho altas, i todas eran jenas de arvoles, i de muntchos modos de pacharos, kantando en las madrugas kada uno de su manera, i de la una parte era ke korija el rio isker blanko, i de la otra parte el rio isker preto, i sus sonetos eran mui agradavles, tenia 2 apartamentos, la una grande i la una tchika, i en el primer etaje, de la tchika, tenija un grande depozito, por depozitar los fieros i las kioltches, i por todos los otros menesteres seja por el boltamiento de el maaden entero komo i tambien por el menester de el mantenimiento por los lavoradores i este de el personal de el maaden, i en el sigundo etaje era la kanselaria de el nastoinik, i aparte otras kamaretas ande era ke ivan a durmir seja el nastoinik komo tambien i sus ajudantes, tenija i kozina aparte ande si gizava, por el personal de el maaden komo tambien i prontavan komanija por los musafires ke esto non mankava siempre, i tambien ke era mobelijada de todo djusto

1822    Biografia de Sr. Behoratche kon su ijo Sr. Mochonatche.    1867

I en el sigundo apartamento ke era el grande, era ke siempre estava serado, i kudijado de el nastoinik, i se avrija solo por koando era ke ivan a ir los patrones, el era tambien de 2 etajes la fragoa alta i lo todo fragoado de piedras mui rezio, ke en el primer etaje kontenija todos los menesteres de la kozina, i las kamaretas por los mosos, i en el sigundo etaje era lugar por estarsen los patrones, ke kontenija 4 grandes kamaretas, i de un kahve-odjagi, ke si kozijan los kahves, aparte tenija un boen i grande banio i un grande salon kon sus kiochkes, i su vista era mui ermoza, i sus seraduras eran muntcho foertes, avija i otra mas tchika fragua ande dormijan los lavoradores, kon todo su menester, i el lugar de la fabrika ande si lavorava el fiero era mui grande i serado kon tavalas [tavlas], i mas tenija i otra tchika fabrika ande si lavoravan los nales por los kavajos i las vakas ke i esto tambien era un negosio bien grande, i al deredor de esto todo tenija los depozitos por los kimures i otros, i en el kampo eran los bostanes i las goertas ke esto dependijan de la boena veluntad de el nastoinik, por sembrarlos, i tenija muntchas de las foentes ke korijan de kontino, i ansi por las kavras i kavajos i pajeras i mas todo ke non si poede eskrivir,

Kon las vignas, la una era en el kampo de rudech, ke si jamava, Mahmud vignesi, en eja kontenija un grande kampo, ande kontenija, una fragoa kon unas koantas kamaretas, seja por el nastoinik, komo i tambien i por los patrones, i el lokal de la fabrika ande si deritija el fiero, i los depositos por los kimures i mas i las

1823    Biografia de Sr. Behoratche kon su ijo Sr. Mochonatche.    1867

i otras kozas, i aparte bostanes i goertas i kampos grandes i era komo a 2 kilometros lechos de la sevdad, i la otras 2 vignas eran en el kampo de las birzas, ke es serka de el kazal de kalkovo, denpoes es de el kiopri en el iskir de tatar jetchid, i todas las 2 eran en un lugar la una enfrente de la otra, i seradas kada una por si aparte aki era ke tenija una tchika kaza ke servija solo por el nastoinik, i aparte los depositos por los kimores i otras kozas,

Lo eskrivo esto por ke lo sepan ke esto todo en akel tiempo ke usref Pacha lo frago non era a foersa de la moneda otro ke era todo kon garija, i era ke de todos los kasales los mas serka a estas fabrikas lo devijan de lavorarle koalos kon sus karos i koalos kon sus kavajos i los otros ejos solos a 15 dijas a kada uno i sin ke tuvieran dinguna paga, solo ke los mantenija i esto era ke i el pan lo azija traer de otros kazales tambien sin paga, i ansi era i ke li jevavan i el material por koando las lavorava ke era lo todo, sin dinguna paga, i ke ja tenijan kortado kada kazal la suma ke li devijan de jevarle seja el kimor komo i tambien i la ruda, i ansi i otros lavoros, i era de esta manera ke devinijan rikos,

Visto ke Sr. Behoratche ke era muntcho sikilijado, de esto de la Vila ke la avija merkado i ke non li kedo ande el, foe ke mi Sr. Padre Tch. Avraam li dicho ke si es ke lo kerija ke lo merkara este maaden kon las vignas, ma siendo ke Sr. Behoratche se espantava non seja ke li arivara torna esto de la vila de rudech, li dicho, ke aparte de esto era i ke tambien non podija merkar un maaden

1824    Biografia de Sr. Behoratche kon su ijo Sr. Mochonatche.    1867

entero ke aparte ke kosta mui karo, era ke i tenija el menester de grande kapetal, por el sostenimiento, sovre todo ke el non konosija de este etcho nada, sovre esto todo el li dicho mi Sr. padre ke ja tomava i el una parte de tres, seja kon la merkida komo tambien i por el idare, i koanto a el lavoro ke ja lo tenija de resentarle mi Sr. padre, i de esto si lo rengrasio Sr. Behoratche, i se kontento, kon ke kedaron de akordo, para merkarlo, i la prekura de esto por azer la vendita ke era un sierto Suleiman Efende Meraz jedi, de parte las mujeres de el Usref Pacha, ke si Jamavan Izet Kadin i Djemile Hanim i ke ejas estavan en kostan, i los konkorentes ke foeron unos koantos i entre ejos eran tambien i Tch. Jeuda kon su Co. ke anke estava i Tch, Avraam en esta Co. ma non lo savijan ke lo ivan a tomar en Hevra kon Sr. Behoratche, i era ke lo ivan pujandolo el presio, i de esto el Sr. Behoratche era mui deskorado i espantado, ma ja era ke mi Sr. padre siempre lo iva enkorajandolo, kon dizirle a ke non tuviera dingun espanto de los konkorentes ke esto ja lo iva a resestarlo el kon sus Haverim, solo agora era ke restava el etcho de topar el molde, i azer la merkida deretchamente de las patronas en kostan ke sovre ejo me Sr. Padre le izo una kopia de una karta para los S-res Tch. Behoratche i Nesimatche kamondo, de Kostan en aziendole saver algunos pasajes seja sovre el Usref Pacha komo i tambien por el etcho de la vila, i en mizmo tiempo rogandoles porke pudieran ejos mizmos merkarlo este maaden de las patronas Hanimes ke estavan en Kostan lo todo por sus kontos, i esta kopia la eskrivio Sr. Behoratche i la

1825    Biografia de Sr. Behoratche kon su ijo Sr. Mochonatche.    1867

 mando a kostan, i los Sr. Kamondo sin tadrar ejos si aderesaron a las ditchas hanimes i lo trataron el maaden kon las 3 vignas por la suma de 93,000 gr. i de parte las hanumes mandaron a un sierto Bekir AA sus prekura por ke lis diera el takrir, ke el koal foe i ke li vendjo mas i algunas sus kozas ke las tenijan en Samokov, i el takrir foe a el nombre de Sr. Behoratche kon ke li djo por eskrito a mi Sr. padre de esto ke li apartenija a el un tersio de este maden kon las vignas, i ejos ke non tadraron de aser las reparasiones menesterozas, i gastaron otros 27,000 gr. ke si lis asento el maaden por 120,000 gr, i enpesaron en el lavoro, kon ke tomaron a un sierto mola Rachid komo mudir jevador de el etcho, i los desbolses los azijan kada uno su % i de toda merkida i vendita lo todo si azija por vija de Sr, Behoratche, i koanto a el maaden komo i tambien las vignas foeron todas mui bien mobelijadas, i en el estrenamiento, izo el Sr. Behoratche un kombite a toda la familia Arié, seja alos ombres komo tambien i alas mujeres i a las krejaturas, a el Maaden kon ke el pronto, la komanija de el Chich Kebabi, ke ja lo saven ke este chicho kebabi, si kozija la karne en 5-6 oras a foersa de la agoa ke se iva rodejando el Chich, i kon mui poka lumbre, i de mizmo pronto i muntchos modos de las biviendas i las frutas i dulses, i todos ke ja mos foemos, lo pasimos mui kontentes i alegres i esto lo izo komo senial ke ja li paso el anojamiento, de la Vila de Rudech, i komo punto por goadrar torna la amistad i la union entre la familia Arié.

Sr. Behoratche ke ja tenija su paiton era ke siempre

1826    Biografia de Sr. Behoratche kon su ijo Sr. Mochonatche.    1867

se ivan djunto su familija, en este maaden i dormijan muntchas notches, i se gozava de todo lo boeno ande el si li prometijan porke los kombedara todos los begis en este maaden ke era mui ermozo, i el ja lo azija ke los jamava i les dava los modos de los kebapis ke ejos los azijan i por el gaste non si li enportava en tal de pasar la ora ansi de mizmo lo azijamos i mozotros los mansevos ke eramos de una edad jo i Sr. Naimatche, i Sr. Mochonatche i mos azijamos prontar los modos de las komanias i biviendas i mos jamavamos i ansi komo de la moestra edad i mos ivamos tambien mas muntcho en esta maaden i kon los gastes era ke tomavamos la mas grande parte mozotros, ja foe ke en la mas grande adula ke tuvo la familia Arié en Samokov, en todos los puntos ja foe en moestro tiempo ke solo lo boeno era ke lo vimos i de todo loke mos venija a el tino nada atras non lo dechavanos, ke non mosi demandava konto por los gastes ke los azijamos, sin konto, i es ansi ke tenemos el ojo mui arto i non mos es en los ojos nada de todo loke lo veremos porke mozotros ja lo tovimos todo, sin konto i sin poderse eskrivir porke ja mos enbidan los mansevos de agora ke para ejos non lis kedo nada de lo de mas antes de loke mozotros lo pasimos, i esto kale dizirles ke ja lo poeden i ejos mui presto alkansarlo komo lo keren ke de ejos depende i es la UNION? ARIE, mas nada i esto por dezplazer ke si esta muntcho aralandose,

Kon el enkamenamiento de el ditcho maaden foe fin a el anio de 5630, ke estuvo mi Sr. Padre Haver kon su ermano Tch. Jeuda ke i jo tambien era lo mizmo, i en el anio de 5631 ke ja estuvimos

1827    Biografia de Sr. Behoratche kon su ijo Sr. Mochonatche.    1867

espartidos, foe i ke mos apartimos i el lavoro de este maaden tambien ke molo lavoravamos mozotros aparte, i tomimos solo la una vigna en las birzas, i mos fragoimos los depozitos seja por los kimures komo tambien i por las otras kozas i en las fragoas de el Maaden apartimos kamaretas i mos meravamos kada uno por si el etcho, sin ke tovimos mas dinguna mleskatina, i de mizmo era ke mos ivamos todos lo mas muntcho en este maaden por kampania.

Kon el etcho de el lavoro las ganansias non eran tanto foertes, ma ja si kontentavan kon lo poko solo por el lugar ke li servija por kampania, i de esta manera lo kontinuo, fin a el anio de 5638 ke ja foe la gera ke este de la gera ja lo estan viendo ke deroko lo todo, i denpoes mas ja non lo lavoro ni menos ke se iva en el porke ja enpeso a aver espanto porke la enfloensa ke la tenijamos en el tiempo de el turko ja non uvo mas, i era ke rovavan i derokavan anke ke ja tenija sus goadradores, i koando ja foe lo todo derokado lo vendjo el material, i muntchos anios resto el kampo en vazio, i alos kavos lo vendjo su parte por 300 gr. de mizmo foe i kon las vignas, solo kon el kampo de la vigna de Mahmud lo izo en tchair ke tomava un karo de paja, i esto porke non uvo ken ke la merkara,

En el anio de 5628, sigun ditcho ke ja estava espartido de Sr, Mairutcho i el ke avija merkado en viena alguna partida

1828    Biografia de Sr. Behoratche kon su ijo Sr. Mochonatche.    1868

 de ropas, i era solo en la feria ke si podijan vendersen solo ke a el li estava viniendo mui pesgado el irse ala ferija, a razon ke estava solo ansi era ke non savija koalo azer, i el avlando de esto kon Sr. Mairutcho Alkalai, i por azerli plazer, lo enkorajio en deziendole, por ke non si repentiera de ir ala ferija, por esto ke era solo ke i el ja si tenija de ir ala feria, por su etcho, i lo asiguro ke li tiene de ajudarlo, sovre las venditas de estas ropas, i ke siempre tambien iva a estar en su botika, i sin dinguna paga ni menos li kijo i ke li pagara el gaste de el vijaje, i ansi foe ke si foeron todos los 2 ala feria i lo izo sigun ke li prometio, i lo izieron las venditas sigun ke koando eran Haverim, i se topo mui kontente ke lo izo solo por plazer,

En kaza las mujeres lo pasavan kon gozarsen de todo lo boeno, por en el enverano ejas vijitavan poko, a razon ke lo mas muntcho lo pasavan por las kampanias, era ke montchas vezes lis mandavan sus brachoves, porke lis vinieran en las kampanias sus amigas ke todas estas eran sus pasaderas de ora i ke las azijan tambien i muntcho areir, sus pasatiempo era lo mas muntcho kon kantar, i ke lis azijan algunos de los djuegos ke esto ja lo tengo eskrito de koala manera era ke lo azijan, en este tiempo ke ejas ja foeron servidas de muntchas mosas i mosos i las gizanderas, era ke non lis kedava en koalo mas enbevesersen solo en sus plazeres i ejas koando las resevijan a sus amigas lis azijan grandes onores, i ejas era ke i se vijitavan entre la familia de las unas a las otras ke estavan en sus

1829    Biografia de Sr. Behoratche kon su ijo Sr. Mochonatche.    1868

vilas kada familija ke ja las tenijan por si aparte ke esto tambien ja lo eskrivi, sigun de loke eran estas vilas, ke las enpatronavan i todas eran de las unas a las otras lechos komo de 3 i 4 i 5 kilometros de lechura de la una ala otra, i sovre todo ke non avija dingun espanto en de mas koando si dezija saraflar, i por en los dijas de el envierno ke ja eran en kaza, era ke vijitavan muntcho ande las hanumes turkas, i kon un dija de mas antes era ke lis mandavan a dizirles, ke las keren ir a vijitarlas, i ala maniana era ejas las hanumes ke lis mandavan a una okuodjija^[56], kere dizir kombedadera turka, diziendoles ke estavan prontas por resivirlas i les rogavan por ke i lis foeran, i ejas ke si rekojijan todas djuntas, mui bien vistidas i kon los feredjes koala de panio i koala de seda, i de los mijores jachmakes, enboladas ke esto ja lo savijan boeno enbolarsen i akompaniadas de sus mosas tambien mui bien vistidas i enboladas i kon ejas era i ke si jevavan tambien i mujeres ke ja avijan ke savijan boeno avlar en turko, i las resivijan kon azerles grandes onores ke i ejas si kombedavan a sus parientas en estas vijitas, ke li davan los modos de los dulses kon kahves i cherupes i los tchebukes i frotas, i denpoes ke ja era tadre se vinijan mui kontentas ke i por enfrentante era de mizmo ke i ejas tambien si mandavan a kometer i de mizmo lis mandavan las ukoudjijas por kombedarlas, ke ejas si aparejavan mui muntcho por koando era ke ivan a vinir en moestras kazas porke lis azija kon 2 i 3 vezes mas grandes onores ke lis jamavan i a las kiotchekes para ke lis bailaran i ke lis kantaran,

1830    Biografia de Sr. Behoratche kon su ijo Sr. Mochonatche.    1868

los vistidos ke ejas vistian por estas vijitas eran, fustanes de sedas i de lanas finas, i kiordis de panios i de sedas kapladijados kon las samaras las mas finas, kon los tokejos de sus kavesas eran de deferentes modos, los unos eran de unos arikos^[57], mui bien lavoradas kon klabedon i de tertil de oro i de perlas boenas, i en el li apuntavan modos de rozas de djoja en dijamantes, i tambien de los Chamis tensuf^[58], i en lugar de los kavejos se metijan unas perias pretas,^[59] ke lis foera komo kavejos porke en akel tiempo non amostravan las mujeres los kavejos, i esto era ke lis servija komo ke foera kavejos, i las kortavan kiahkiul^[60], sigun ke jevavan las turkas los kavejos, ejas si metijan en sus petchaduras muntchas restas (chartas) de dukados i tchaprazes, i kemeres i en las kavesas los tepelikes lo todo kozido los modos de los dukados, i en sus dedos los anios de diamantes i en los brasos manias i en sus gargantas jerdan^[61] es lo todo en diamante i berlante, i tambien mui bien gozmejadas de los parfumes turkos ke avijun mui muntchos, ejas tambien i vijitavan, i entre los djidios, i esto a todas las vijitas ke las jamavan seja bodas paridas fiestas de espozorios i otros i ja era ke a todas ejas ja eran para lo todo kombedadas, i a ejas era ke lis i davan los primeros lugares, era de ejas ke si lis demandava si lo kerijan ke kantaran or ke bailaran, i de koal dulse foesa ke ivan a adolsar era de ejas ke si enpesava, i ansi lo todo i de otras kozas, pertenesientes a estas era de ejas lo todo ke dependija,

Sr. Mochonatche ke estava en la botika era ke sin ke

1831    Biografia de Sr. Behoratche kon su ijo Sr. Mochonatche.    1868

 li iziera saver de lo todo a su Sr. Padre non podija nada azer, anke ke el savija de todos los kontos i el jevava la kontabelite entera ansi tambien i la korespondensia, i lo respektava muntcho,

Ejos ja foe de este tiempo ke ja si avrieron en los gastes sin mas konto i esto en todos los puntos, seja kon las komanias i komo tambien i kon el vistir i lo todo de la prima koalita, mas ja non buchkaron de azer las ikonomias,

Mozotros ke en este anio ja mos salimos de la kaza ke moravamos, ke es esta ke mora oi el Sr .Mochonatche, foeron las espartisiones, de todas las 2 partes, mui trajik, lo todo ke de todas las 2 partes foeron los abrasos kon tchoros de lagrimas, sovre todo la Bu. Amadutcha, ke jorava mas muntcho de todos ke a eja si li rebolvieron los dijas de su marido Tch. Gavriel, sigun de loke lo pasavan los ermanos, ke foeron mui aunados, i eja de tanto ke siempre era ke buchkava la okazion para jorar, i lo todo ala eskondidas porke no la viera su uniko ijo, ke si sikilijava mui muntcho, era ke se le iva akurtandole la vista de el un ojo, ke esta en toda su vida non si konorto, i mas non kijo saver de nada,

En el anio de 5629, Sr, Behoratche la kazo a su ija M. Veniziju, kon Sr, Behoratche el ijo de Sr, Mochonatche J. Arié, ke li djo muntcha achugar, i 5000 gr, de kontado, i sigun ke ja lo saven

1832    Biografia de Sr. Behoratche kon su ijo Sr. Mochonatche.    1869

sigun ke las azijan en las bodas foe tambien i aki, ke en el tiempo ke la achugar estuve enkolgada, ke se ivan todos los parientes a komer en el dija de Chabad, kon sus komidas i de mizmo si jevaron i las baklabas, i sambustos, i los bermoelos de aire, i kaimakes i eskolatchas i mas ansi komidas de kezo ke las jaman i aparte las komidas de karne, i komijan todos djuntos i kantavan i se alegravan, i el kolel entero la vijitavan en el dija de Chabad i a todos los adulsavan de mizmo i las mujeres ke era la semana entera i tambien li vinijan i las hanumes i tchorbadjijas ke todas eran mui bien resividas i muntcho onoradas, ansi de mizmo lo azijan i en la boda, i la novija ke ja era mui ermoza i savida foeron de todas las 2 partes mui kontentes, i se respektavan mui muntcho, ke esto ja era en general ke ixistija en la familia seja en los ombres komo i tambien i en las i mujeres mizmo fin alas krejaturas,

El era de mizmo ke aparte ke kontinuava en sus negosios de antes era en este anio ke asigurava, en viena el kurso de los napoliones ke estava muntcho djugando el presio, ke las venditas de sus sahtijanes ke el los mandava a viena i ke las venditas lo todo si azijan en florenos, era de esto ke tenija una ganansia de 4 a 5%, i el etcho de el maaden ke era ke lo enkamenava por su vija, foe en este anio ke tuvieron kon mi Sr. Padre algunas tchikas deferensias, seja por los enkasos komo i tambien por los desbolsos, ma ja era ke si lo konvenijan mui presto, porke mi Sr. padre lo mas muntcho de los kovramientos de los kopones ke el tenija partikolar seja de las

1833    Biografia de Sr. Behoratche kon su ijo Sr. Mochonatche.    1869

 konsolites, komo tambien tahvilat, mumtazis, i chemen-deferis, i otros ke el los tenija, era ke lo azija por vija de Sr. Behoratche por ke el lo mas muntcho de el anio estava siempre en vijaje, de mizmo era i ke li azija kovramientos, de sus averes ke el los tenija, en Samokov, i en okaziones remetija tambien por su konto seja valutas i de otras monedas lo todo por su konto, kon ke li pagava, su komision,

El en este anio si merko en Sofia 2 botikas, serka de las ke ja tenija, i mas merko tambien, i 2 tchaires kon 3 tarlas, en los kazales de ihtiman, i aparte merko i 3 butikas en el Tcharchi de los abadjis, kon unos presios muntcho karos, porke en este tiempo en el tcharchi de los abadjis valijan mui karas las butikas, i unos koantos anios, ja tomava las kiras boenas, ma mas tadre ke keja este tcharchi, por razon de la gera ke non kedo etcho en los abas, foe ke non valieron, i de ejas las unas vendjo i las otras las detiene por non aver merkador, mizmo kon los presios mas bachos, i kon los tchaires i tarlas foe lo mizmo i esto por razon de los dasios ke li foeron mui grandes, i non li traivan ni para los dasios, lo todo la razon de la eskura gera, ke trucho estruision,

De este tiempo i endelantre mas non trucho ropas de malifaktura, por las ferias, otro ke el traiva solo tchivit i kirmis por los bojadjis, i tambien algunos sukaros, lo todo de viena, i los vendija en Samokov,

En este anio lo nomenaron por miembro onorario, en el Medjlich de el Dajan ande djuzgavan, a el poevlo, i el iva en kada

1834    Biografia de Sr. Behoratche kon su ijo Sr. Mochonatche.    1869

 dija a 2-3 oras, i en akel tiempo los turkos non los djuzgavan a el poevlo kon kombedarlos kon presovkas por el dija ke ejos lo fiksan otro ke ejos era, koando el uno reklamava de el otro seja moneda or otra koza, era ke el reklamador, kon un harzoal de un gr. de marka azija la demanda i en akel mizmo dija era ke li dava a el muzur el rasilnik de el Dajan otro un gr. i lo buchkava a el devdor i lo traiva en el djuzgo, i el Dajan kon sus asistientes, los djuzgavan, i lo kondenavan en el mizmo tiempo, i la rechenija ke ja si azija era ke lo jevavan ande el juz bachi por ke lo iziera la espulnenie, ke komo non li pagava en vista era ke lo metija en preso i estava 31 dija, i se era por onor era ke li davan unos koantos chamares, i lo soltavan, i ansi era ke todos los djuzgos si meravan mui presto, i ejos los djuzgadores estavan el dija entero pasando la ora i biviendo kahves i tchibukes, i esto en la kanselaria, i alo mas de los ke li ivan seja por djuzgos komo tambien i por pasatiempo era ke lis davan kahves i tchibukes fin ke vinija el kontrario i esto se entiende a los mas notavles de la sivdad

En el anio de 5630 la kazo a su ija M. Esturulu kon Sr, Josef Nisim Farhe de Sofia, ijo de H, Chemoelatche Farhe uno de los primos notavles de Sofia, i el kazamentero foe Sr. Naimatche, i por su paga li dieron un djubelik de panio i vinieron a Samokov muntchos konsfoegros, i les izieron grandes onores i lo restan de mizmo lo

1835    Biografia de Sr. Behoratche kon su ijo Sr. Mochonatche.    1870

 izieron sigun de todas i las otras bodas, i ejos ke si foeron ala boda foe ke i en Sofija foe mui grande el saltanat ke izieron, i el los kombedava en kada notche a modos de amigos i tchalgis ke tuvieron tambien i boeno era ke si toparon mui kontentes de todas las 2 partes tuvo tambien kombedados i a muntchos de los begis de Sofia, i les dava i a komer sigun de sus uzos, i la novija ke ja foe mui meujuda i savida i ke jevo tambien 15 dukados de kontado i muntcha achugar, ansi ke si aman mui muntcho kon su marido, i de mizmo la katan todos los de la kaza de mizmo i eja ke ja respekta a todos son siempre mui kontentes, i ejos ke ja son de la prima pozision i sus negosios era el bankerlik de el primo rango i mas tadre ke ja foe la gera ejos si entremetijan en abasteser las komanias a los soldados de toda la armada seja esta de Sofia komo i tambien i de otros lugares, i esto a sumas bastante grandes, ejos tienen grande enfloensa en todas las admenestrasiones, i en todos los balos ke los dava el Knaz de gala eran i ejos kombedados ke se iba Sr. Nesimatche kon su mujer M. Esturulu, i en kada ida en estos balos era ke li kostava de 1000 a 1500 fr, por vistidos ke lis kalija si los izieran de gala, ejos enpatronan muntchas kasas i botikas, en Sofia i tienen grandes revinidos, foe en el anio de 660 ke los 2 ermanos Sr. Nesimatche kon Sr. Davitchon ke estavan en un etcho i por una deferensija ke ejos tuvieron i de tanto foeron las ravias grandes ke kedo dezmajado el Sr. Nesimatche komo 2 oras en bacho, i estuvo en el pirikolo de moerte, i de esto la M. Esterulu ke si espanto muntcho, foe ke si salio de el tino

1836    Biografia de Sr. Behoratche kon su ijo Sr. Mochonatche.    1870

 i estuvo komo loka ke li turo un anio, ke aparte ke ja li jamaron a todos los medikos, i ke li i izieron todo el menester, foe i ke i lis kalio ke la mandaran i a el ichpetal de los lokos, i de esto ke paso algo de tiempo a eja i paso todo, i esta fin agora mui boena, solo ke por dezplazer foe ke su ijo el Grande Sr. Albert, ke si non kudjo por eja foe ke si komporto mui kroelmente enfrente de eja, i ansi es ke el lo tiene por una grande kulpa esto i eja non lo mira kon ojos boenos, eja pario 4 ijos Albert, AdoIf, Viktor, i Filip. i 3 ijas Sultana, Eliza Rachel i todos unas karas de lunas,

En este tiempo ke si estava vindiendo en kiostendil un balkan ke si jamava at koru, i ke era de un sierto turko Kadiri Bei de Ichtip, lo merko por el presio de 1500 liras turkas ke era mui barato, este balkan tenija una espandedura de 20,000 dekares de kampo, i de los koalos los 10,000 dekares era todo de charas korus, de los modos de los arvoles por los materiales de fragoas, i los otros 10,000 dekares era de kampo por pasto de las ovejas, i lo alkelava, alos djelepis, por 15000 gr. de kira a el anio, i aparte tenija ke moravan i 7 kasas de kasalinos ke i para ejos avijan apartado siertos kampos por sus tarlas i tchaeris, i mas todos sus menesteres i estas 7 kazas pagavan en el anio 250 okas de manteka, i 250 okas de kezo, i 250 gr. en moneda, por paga de kada anio i esto era komo una tchika bachtina, i esto tambien li kontinuo, fin a el anio de la gera, i denpoes de la gera ja foe ke las 7 kasas de los krestijanos mas ja non kijeron pagar, sus taksa anoal, i ejos si enpatronaron de

1837    Biografia de Sr. Behoratche kon su ijo Sr. Mochonatche.    1870

mas muntcho de la metad, de los 10,000 dekares, de lugar, de el pasto, i era i ke lo restan de el pasto non dechavan tambien i alkelarlo, i koanto a la chara (kuru) foe ke si enpatrono el gradski sovet de Kiostendil, diziendo ke esto koru apartiene a la sivdad de Kiostendil, i era ke lo i iva exploatando, visto a esto ejos avrieron djuzgo, i si estuvieron djuzgandosen muntchos anios, i apenas foe ke li dieron el deretcho a Sr. Behoratche, porke si enpatronara solo de el lugar de el pasto ke lo avijan dechado los kazalinis, ke estavan i esto ja foe ke lo pudo alkelarlo i tomava de 5-10 napoliones, de kira a el anio, ke el dasio ke pagava era de 15 napoliones, i siendo ke ja foeron mui enfastijados de los djuzgos foe ke non buchkaron i mas por kontinuarlo, i lis resto ansi fin a el anio de 5661, ke dopo de esto, si foe su ijo el Sr. Mochonatche a Kiostendil, por buchkar al menos venderlo este lugar, i foe ke si lo konvino kon propio lis kazalinos moradores de este lugar, i se los vendjo por 5100 fr. ke es el lugar ke lo ganaron en el djuzgo, ma ja foe ke i sovre esta tan tchika vendita ke uvo pretensias, de parte de el governo, diziendo, ke non tenija dingun deretcho de vender, dingun lugar a razon ke non lo buchko unos koantos anios, ma el koando izo la vendita ja foe ke lis tomo, 1100 fr. komo kaparo, i lo restan en polisas por unos siertos tiempos, kon la kondision ke devija tambien de azerlos enpatronar kon los dokumentos menesterozos, i esto en arivando este tiempo, los merkadores reklamaron porke lis diera el takrir, i esto ke non lo pudo, foe ke de moevo entraron en djuzgo i estan djuzgandosen

1838    Biografia de Sr. Behoratche kon su ijo Sr. Mochonatche.    1870

            En este anio ke murio Tch. Jeuda i ala Bu. Amadutcha ke si le rebolvieron todos sus joros, foe ke eja lo kijo irse a Jeruchalaim, i de tanto ke li foeron diziendole ke non era para eja esto foe ke non li podieron darle a entender, i eja de moevo jorava i ensestija i en mizmo tiempo se iva aparejandose algunas kozas por el menester de la vida de Jeruchalaim, i ejos en kaza gozavan de todo lo boeno i los etchos de el Sr. Behoratche li kamenavan lo mijor ke si podija pensar, i eran mui kontentes,

En el anio de 5631, foe ke si salio, su ijo Sr. Mochonatche, de kaza, ke moravan djuntos kon el padre, i se paso ala kaza moestra ande mozotros moravamos i ke si la vendimos a ejos, i esto por razon ke non li bivijan las krejaturas i sigun los unos es ke koando ansi kozas li arivavan ala persona aparte de las etchurias ke azijan era i esto ke lo azijan de trokar la kaza, i era ke solo dormijan i la kozina era en la kaza de el padre i ejos se ivan a komer, ande el padre ke por lo todo era a el gaste de el padre, i esto lo kontinuaron fin ke pario, ke ja foe en el mizmo anio,

Sigun ditcho ke la Bu. Amadutcha ke si estava prontandose por irse a Jeruchalaim, foe en este anio ke eja ja estuvo pronta, i eja si adjunto kon Bu. Sarutcha mujer de H. Levi ke i eja tambien si foe, a Jeruchalaim, i al presipio ja estuvo kon grande sevda,

1839    Biografia de Sr. Behoratche kon su ijo Sr. Mochonatche.    1871

ma koando ja si li aserko el tiempo ke ja ivan a partir, foe ke si reselava mui muntcho, ma non si podo repentir, i a esta razon era ke siempre estava jorando, ja era ke todos li dizijamos por ke non era nada de vergoensa si non se iva, or ke lo prolongara por otro tiempo ma non foe posivle, de konvenserla, i en el dija ke eja partio foe ke la akompaniaron kaje la sevdad entera, i todos sus ijo inietos, i inietas jernos mos foemos fin a dubnisa i la notche dormimos en la kaza de H. Avraam el Chokordji, i ala maniana ke ja partio i de Dubisa ke si foe vija de saloniqe, li foemos seja mozotros todos los ke foemos a samokov i muntchos de los amigos de Dubnisa, por akompaniarla fin a el kiopri ke si jama hadjilar kioprisi, i en la ora ke ja se iva espartir, de mozotros i ke i le ivamos i a bezarle la mano, foe ke a eja li djo un dezmajo, fin a el grado ke mas ja non si supo de si, i apenas ke ja podieron retornarla, non podimos dinguno de nos bezarla la mano, i sigun ke eja estava medija dezmajada, la tomaron en los brasos i la suvieron a el paiton, i anke ke i en este dezmajo ke todos ja li dichimos por ke si repentiera i mos bolatremos a Samokov, ma eja non mos eskutcho, i partieron djuntos kon sus konfedente moso ke ejos lo tenijan a Sr. Josefatche B. Chelomo Levi, i ke denpoes de unas koantas oras eja ja si vino en si i kontinoaron sus vijaje mui boenos, i kontentes,

eja en la ora de su partensija foe ke li dicho a su ijo por ke li remetiera en regla su aniada ke li iva a kerer mandarle i tambien i ke la kudijara, eja si jevo, kon si aparte de la suma

1840    Biografia de Sr. Behoratche kon su ijo Sr. Mochonatche.    1871

 ke li djo su ijo i una resta de dukados ke kontenija serka de una valor de 40 napoliones, i tambiem i algunos tchikos pedasos de su djoja, i eja lo dicho ke esto, ke esto ke me lo esto jevandolo es por en kavzo menesterozo para prevalerme de ejo, i su ijo li dicho ke eja ja era libera para azerlo todo esto ke eja lo kerla, i koanto a la anijada, ke li tiene de mandarle a 40 napoliones, i esta suma se li vido muntcho, ala Bu. Amadutcha, i para el gaste de el vijaje el li djo, 25 napoliones, i los 40 napoliones de la primera anijada si los djo de adelantado i se los entrego en su mano,

Aparte ke eja tuvo muntchos vistidos, i mobilijas, ke eja si pronto, foe ke i le javaron tambiem todos sus parientes, los Tchamachires, i tchorapes, i mas ansi otras muntchas kozas, eja tuvo tambien i muntcha komanija, i modos de las dulsuras i las frutas sea de loke si lo pronto eja komo tambien i ke li jevaron todos sus parientes, i las amigas ke ja tenija muntchas,

Koando eja arivo en Saloniqe, si abacho en la kaza de Sr. Jshak Tijano, i denpoes ke ja estuvo unos koantos dijas en Saloniqe por esperar a el Vapor, eja partjo por JAFA, i la akompanijaron toda la djente de ande Sr. Tijano, fin a el vapor i partieron mui boenos, i el Sr. Tijano si lo eskrivio a Sr. Behoratche, lo todo sea de sigun lo paso en Saloniqe komo tambien i sigun de loke eja partjo i ke ja estava mui boena, i el vijaje por la mar ejos lo izieron mui boenos i lo pasaron mui levijanos,

Eja koando ja arivo en Jeruchalaim, sr. Josefatche li

1841    Biografia de Sr. Behoratche kon su ijo Sr. Mochonatche.    1871

tomo una kamareta en una de los primeras plasas de Jeruchalaim, i lo resento kon la mobilia menesteroza i la izo konoser, de algunos seja de los Hahamim komo tambien i de los Sres, de mizmo i de H. Chelomo Koen de Samokov ke ja estava en Jeruchalaim, i ansi i de otros ke avijan de las moestras partes, i el Sr. Josofatche denpoes ke ja estuvo unos koantos dijas fin ke si resento boena, eja lo mando por ke si foera i el koando ja vino mos konto, en largo seja de loke lo pasaron el vijaje komo tambien i sigun de loke si resento i ke ja la decho mui kontente, ansi eja kedo kon la su kompaniera la Bu, Sarutcha, i se akompaniavan de la una ala otra, eja eskrivija una vez ala semana kartas, i de Samokov era ke su ijo tambien li eskrivija, lo mizmo, i aparte tambien li eskribijan i toda la familia, i las kartas era alas 15 dijas una ves ke arivavan porke esta manera era las pochtas i ja era bastante,

Eja la Bu. Amadutcha ke ja estavan mui bien pasando kon la Bu. Sarutcha, i foeron ansi solo 3 mezes, por razon ke la Bu. Sarutcha sin ke estuvo hazina, foe en una notche ke eja murio, i esto de la moerte de la Bu. Sarutcha, li kavzo muntcho mal ala Bu. Amadutcha, porke eja si espantava mui muntcho de estarse sola, i esto li kavzo de enpesar de moevo a jorar, i sigun ditcho mas antes ke eja la vista de el un ojo, ja si li avija akortado de koando jorava por la moerte de su marido, i koando si murio tambien i Tch. Jeuda ke si espanto mui muntcho, la era ke si lo dicheron, i eja ke si foe ala kaza de Tch. Jeuda, ke tenijan un estretcho pasaje, de la una

1842    Biografia de Sr. Behoratche kon su ijo Sr. Mochonatche.    1871

 kaza ala otra, i komo era de notche i eja ke ja si espantava muntcho, i en medio de el pasaje ke iva a entrar en el komchilik eja si estremesio, i de un grito de espanto ke eja grito porke estava sola, foe por entero ke si li eskoresio la vista de el un ojo por entero, i agora ke eja iva de mizmo jorando, i non mankava ke le ivan seja H. Chelomo koen komo tambien i mujeres sus konosidas i li ivan avlandole por esto a ke non jorara i le prometijan i algunas otras mujeres por ke li foeran por kompanija, ma eja era ke non sintija nada, i su etcho era de dija i de notche de estar jorando, i de esto kale dizir ke foe en mui pokos dijas eja ja estuvo kurta de la vista i de el sigundo ojo, i ansi foe ke kedo siega de todos los 2 ojos, i ansi foe ke kedo siega para toda la vida, i de muntchos medikos ke la meraron, non pudieron darle dinguna ajuda, por razon de su maladija foe fe [de] kataran, i non la podijan kurarla ke ala vista ja era, ke sus ojos se le vijan mui klaros, ke eran propio sigun i ke los tenija de mas antes, i nada de sinial non si li demostrava, sigun de algunos ke tienen algunas nuves, or algunos perdes, i algunas dolores i de esta manera eja sufrio en su estar en Jeruchalaim, 2 mezes, i en este poko tiempo ja foe ke todo esto ke eja le tenija seja vistidos seja mobilias, la resta i la moneda, i mas todo loke eja tenija si le rovaron ke apenas li decharon solo el vistido ke eja lo tenija ensima vistido, i H. Chelomo Koen ke la vija ansi i eja ke ja si kijo i vinirse a Samokov, foe ke si lo eskrivio por ke mandarla a tomar ke Sr. Behoratche non savija nada de esto ke eja lo estava pasando

1843    Biografia de Sr. Behoratche kon su ijo Sr. Mochonatche.    1871

fin a este grado, i sin tadrar el si korespondejo kon H. Chelomo, por vija de el telegrafo, i el karar foe ke li topara H. Chelomo a ona persona kon una mujer, i sin tadrar ke la mandaran vija de kostan, i a estas personas las trataron por 12 1/2 liras i aparte los gastes de el vijaje i otros de estos por ir i venir, i ejos ke partieron i ke ja arivaron en Kostan, i Sr. Naimatche ke ja estava en kostan, eja si akecho de este ultimo por esto ke non la kudijo sigun premija i denpoes ke ja estuvo 2 dijas en kostan eja si abacho tambien i en Filibe i estuvo en la kaza de Sr. Jshak Albalah, un dija i su moso, Sr. Josefatche, ke ja foe a Filibe a su enkontro, si vinieron djuntos a Samokov, i las reseveduras en Samokov ja si kere entendido ke foeron de toda la familia kon joros, i eja ke non vide a dinguno era ke torna siempre jorava,

Este Jeruchalaim de la Bu. Amadutcha por los 6 mezes ke estuvo entre los vijajes i su estar en jeruchalaim li vino a kostar a su ijo el Sr. Behoratche, 300 liras turkas,

I koando ja estuvo en Samokov, li prontaron una kamareta, ke era la kamareta de la odjaklija,^[62] i le tomaron a una mujer, ke si jamava Amadutcha, i eja ke la kudijava, i la akompanijava i eja li dava la komida en su mano, i ansi mas todo el menester por una persona biva, i ja era seja la djente de su kaza komo i tambien toda la familija la kudijavan i la vijitavan siempre, i en todas las notches i los dijas seja de los Chabatiod komo i tambien de los Moadim el Kiduch, lo dizijan en su kamareta, i de todas las komidas ke

1844    Biografia de Sr. Behoratche kon su ijo Sr. Mochonatche.    1871

ke ejos las komijan de lo todo era i ke si li dava i a eja, solamente ke en una meza non komijan lo todo por ke non si arejestara, i ke non seja i ke si travara, mizmo por la mas tchika koza, i ansi lo kontinuaron 5 mezes, i foe en una notche de Chabad, 22 Hechvan, de el anio 5632. i ke estavan todos en la meza komiendo, ansi de mizmo i eja tambien en su kamareta, i mientres la komida ke era ke estavan komiendo la eskolatcha, i la amadutcha ke la kudijava ke si avija ido a traersela, siendo ke eja si tadre, un poko, i ke eja resto sola, en este tiempo, foe ke la jamo kon un grito mas foerte, i esto de la otra kamareta ke lo sintieron, ansi gritar, ja foe ke presto, korio, la M. Tamarutcha, por demandarle koalo kerija, i en entrando de la poerta li dicho por ke non si espantara, i ke si foera atras, i ke non esto kon mi, i tambien ke non esto boena, i M. Tamarutcha ke si bolto ala kamareta ande todos ejos estavan i ke los konto todo esto ke eja li avlo, foe ke ja korieron todos, i la topan kaida moerta, i li estava enkolgando la algoenga, salida para afoera, i presto ke ja jamaron djente por vinir en su ajuda, ma ja foe lo todo en baldes, porke ja estuvo moerta, i esto foe de gota (apopleksi) su moerte, resto el Chabad en kaza i ala notche de alhad foe enterada,

El Sr. Behoratche era de mizmo ke kontinoava en todos sus negosios de los otros anios, i la suma de moneda ke a el li sovrava era ke la depozetava en la banka de Sr. Kamondo en kostan, sin dingun entereso, otro ke era al kontrario ke Sr. Kamondo li kovrava a 1/2% de komision por detenersela, i en este tiempo ke Sr. Naimatche

1845    Biografia de Sr. Behoratche kon su ijo Sr. Mochonatche.    1871

 avija avrido una kaza de banka en kostan kon Sr, Baruhatche Koen, i por adjusto de la suma de kapetal ke devijan de meter Sr, Naimatche kon sus ermanos, tuvieron el menester de 1000 liras otras, i Sr, Mochonatche ke ja lo savija, ke tenija moneda en kostan depozitada i sin ke estava kovrando dingunos enteresos, foe ke li demando 1000 liras ke li diera por el tiempo, de un anio, i ke le iva i a pagarle los enteresos, sovre a 12 % i siendo ansi Sr. Behoratche li djo las 1000 liras, ma en pasando komo 15 dijas foe ke Sr. Mochonatche si las bolto, i esto ke non li konvino a Sr, Behoratche por ke kalija de moevo ke pagara otro 1/2 % de komision, i por esto tuvieron algunas deferensias ma ja si lo konvinieron vija de otros,

En este anio foe ke mozotros molo apartimos el etcho de el Tchifte maaden ke si merava ande Sr. Behoratche, por la parte moestra de el un tersio, ke tenijamos i para esto mos turo komo 2-3 mezes, arazon de algunas tchikas deferensias, ke tovimos,

En el anio de 5632, li nasio a Sr, Mochonatche un ijo, i lo jamaron Ben Sijon, ke este nombre foe ke en loke estava la Bu. Amadutcha su vava, en Jeruchalaim, lo izo por segula, i jamo a Hahamim delantre el Kotel maaravi, de el Bed Amikdach, i meldan algunos pedasos de esto ke ja estan resentados, por etchar goral por nombre ke es por akejas ke non lis biven la krejaturas i el nombre

1846    Biografia de Sr. Behoratche kon su ijo Sr. Mochonatche.    1872

ke lis salen en el goral es akel nombre ke lis meten i esto en koando estan preniadas, i seja por ijo komo tambien i por ija, es ke lis meten este nombre ke lis salio en el goral, i esto sigun ke ja lo eskrivi mas antes, ke Sr. Mochonatche si avija ido ala kaza ke li vedimos [vendimos] mozotros, solo por esta razon, i eja ke ja pario i li metieron el nombre Ben Sijon, i denpoes ke ja estuvo komo a 2 anios i ke ja lo desteto, a el ijo se foeron de moevo ala kaza de el padre, Ben Sijon foe krejado i mui muntcho kudjado seja de su madre i komo tambien i de todos los de la kaza, i koando foe ke nasio era ke estava Sr, Mochonatche kon mi en djunto, en pazardjik, resiviendo sahtijanes, i kon telegrafo lo jamaron, por ke asistiera i el en la fiesta de el Birkad mila, i partjo avista, por samokov,

Foe i en este anio tambien ke i li nasio a Sr. Behoratche tambien un ijo i lo jamaron Jechua, i en todos los 2 partos lo izieron sigun de todos los otras, i si gustaron muntcho,

Ben Sijon koando ja foe mas grande el kontinuo las Echkolas, i era mui entelejente, i se enbezava las liksiones mui presto, el era mui amorozo kon todos, i se pagava muntcho de la razon, denpoes ke ja eskapo las echkolas el estuvo en la kanselaria de el Djuzgo, por praktekijarse, en esto de las kanselarias, el frekontava en los grandes kafes, konose mui bien las linguas, i eskrituras Lachon Akodech, Franses, Bulgar i la kontabelita, es mui repozado al avlar li plaze mui muntcho la limpieza, el non si avregoensa no si kansa de lavorar para esto, i el non si decha sirvirse otros,

1847    Biografia de Sr. Behoratche kon su ijo Sr. Mochonatche.    1872

De mizmo foe i Jechua, koando el tambien foe grande, ke kontenuo las echkolas, i konose el Lachon Akodech, i el Franses, el Bulgaro, el tiene la dadiva de saver kompozar poezias, i se okupa muntcho en esto, el es tambien mui repozado, ejos kon Ben Sijon siempre estuvieron djuntos, se aman i se ajudan de el uno a el otro en todos los puntos, ejos los 2 dormieron fin a ke kazaron en una kamareta, el non es koket i non li plaza avlar muntcho, los ama mui muntcho a sus parientes, i los proteja,

En este anio el si konvino kon la banka ke avrieron Sr. Arie Baruh Koen & Co. por las polisas ke iva a travar, de las kachas seja de Samokov komo i de i otros lugares por ke si las atchetara, i el tuvo limitado una sierta suma de kredito, i kon esto tambien el era ke li iva travandole, i su ijo el Sr. Mochonatche, era ke vijajava en las sivdades de pazardjik, Pechtera, i Panajurichta, i esto por merkarles los sahtijanes i era ke en Panajurichta el si konvino kon muntchos de los tabakes i lis dava moneda kon kundision ke lavoraran los sahtijanes en Hevra i tambien ke devijan de darselos a el i esto sigun de el presio, ke si kortava en el osnaf, i si en okasion ke no si los kerija merkarselos por koala razon foesa, era ke i el tambien lis vendija su parte i se kovrava la moneda ke el li tenija dado a el Haver i ansi tambien i las ganansias, ke esto era tambien un negosio bastante grande,

En este anio ke estavan en el anio de la Bu. Amadutcha era ke non salijan a dengun lugar a vijitar i ja era ke siempre

1848    Biografia de Sr. Behoratche kon su ijo Sr. Mochonatche.    1872

todas las parientes seja ombres komo i las mujeres i los amigos ke los akompanijavan siempre, i por los dijas de el enverano era ke en los dijas se ivan a las kampanijas i sin ke durmieran en las notches, el ja era ke se iva en kada demanijana a el kaal a dizir la Tefila kon minjan i ansi las tadres por la minha i el arvid, i se asentava en el Avel, i en los mas muntchos de los Chabatiod i de los Moadim merkava la aftara, i en los kortamientos seja de el siete komo i de el mez i el Anio li iso el Jar Sajat de uzo i dava a komer seja a los Hahamim komo i a los menesterozos i los parientes todos ke ja era el uzo ke komijan tambien era ke non lo mankava de azer todos i los uzos, i non komo agora ke no miran estas kozas, el dava siempre muntcha i Sedaka, sin ke azija las ikonomijas,

En el anio de 5633, ke si iva a vender el Sumun (diezmo) de los fieros, el li vino ande mi Sr. Padre Tch. Avraam por tomarlo en Hevra, i ejos ke ja si konvinieron i nombraron fin a koala suma de kantares ke lo podijan merkarlo i ke lo tenija de tomarlo mi Sr. Padre a su nombre, i tambien ja era ke si en kavzo podija ser mas ariva de 15 a 20 kantares ke non iva a ser nada, i esto ke foe ke kalio tomarlo kon otros 15 kantares mas ainda, i ke ja li kedo en mi S. Padre i el ke si lo izo saver a Sr, Behoratche, i ejos ke ja eran repentidos de esta merkida foe ke vinieron Sr. Behoratche kon su ijo Sr. Mochonatche ande mi Sr. Padre, diziendole ke ejos eran Haverim sigun de el kontrato, i agora ke ja es demazija ejos non lo keren

1849    Biografia de Sr. Behoratche kon su ijo Sr. Mochonatche.    1873

 i mi Sr. Padre ke lis dicho por esto ke ja tenijan avia por si en kavzo era ke salija el presio mizmo i otros 10-15 kantares ke non iva a ser nada, foe ke li dicho Sr. Mochonatche ke Laf torbaja jirmez^[63] )palavra non entra en la torba,) ke sovre esta repoesta ke li vino muntcho pezgado a mi Sr. Padre non platikaron mas de esto i lis razgolos kontratos en kedandole solo el ditcho sumon i denpoes ke lo supo ke tuvo una ganansia de 500 kantares, li vino de moevo ma non kijo avlar de esto,

En este anio ke estuvo en Samokov, Tch. Menahematche Bihmoarach, de enderne, ke es el ermano tchiko de Tch, Chimon, sigun ke ja lo tengo eskrito ke Tch. Gavriel tratava muntcho kon este ultimo, i Tch. Menahematche si abacho tambien en la kaza de Sr. Behoratche kon su entision, i siendo ke estos en este tiempo estavan algo deskaidos de sus furtunas i el denpoes ke estuvo unos koantos dijas komo musafir, si li konrogo de Sr. Behoratche por ke li enprestara 500 liras kon pagarle los enteresos, or si esto non lo podija ke li diera una karta de kredito para Sr. Chemoel H. B, Nisim & Co. de Kostan, ke el koal ja era komisioner tambien sujo, i para ke estuviera siguro de este enprestimo ke li iva a ipotekijar un magazen ke tenia en Filibe en el Kitchuk bezisten, i el Sr, Behoratche por azerle el plazer li djo la karta por el tiempo de un anjo, i por enfrentante li ipotekijo, el ditcho magazen, en el notarius, ke denpoes ke li djo las grasias, patjo Tch. Menahematche, i se travo las 500 liras sin ke mas se izo de el savedor para pagarlas, i en arivando el

1850    Biografia de Sr. Behoratche kon su ijo Sr. Mochonatche.    1873

 tiempo de el anjo, Sr. Ch. H. & Co. si las pasan en su konto, i en eskriviendole por ke si las remetiera, i Sr. Behoratche ke tomo ansi avizo i denpoes ke el ja las izo las reklamas todas seja ande Tch. Menahematche komo tambien i otros foe ke Tch. Menahematche li respondjo, ke de el presipio ja era ke lo izo esto komo a vendita, i agora ke li kedava solo, de enpatronarlo kon el takrir de patronaje, i por koando lo kerla esto ke li eskriva ke ja estava pronto para vinir a Filibe i enpatronarlo, i a Sr. Behoratche de esta manera de komporto sovre ke lo enganjo, li vino por el presipio mui pezgado, porke el si lo avija etcho por plazer para ke si aremedijara, i por la emistad ke li tenija de viejo, i ejos koando vinieron en un lugar si lo konvinieron kon ke li djo 200 liras en moneda i por las (300 si lo izo paso el magazen, ke non valija mas muntcho de 150, liras, i vizino a este magazen ja tenija el uno otro, de koando si espartieron Tch. Gavriel de sus ermanos, en el anjo de 5614, i era ke todos los 2 magazenes los alkalava, kon unas tchikas kiras, i mas tadre ke uvieron unos foertes Raachim teretemblos de tiera, foe ke todos los 2 magazenes, tchatlejaron los kubes de unas antchas avierturas, i por esta kavza estuvieron longo tiempo serados, i en el anio de 5653, ke se izo el plan de las plasas de filibe, foe ke los fragoaron de moevo ande gastaron komo a serka 500 liras, i agora los tienen a kira ke toman de ejos komo e 40 napoliones, a el anjo,

En este anjo tambien su ijo el Sr. Mochonatche foe nomenado komo miembro onorario, para el beledie (monasipalita) de

1851    Biografia de Sr. Behoratche kon su ijo Sr. Mochonatche.    1873

Samokov, ke si rekojijan 3 vezes ala semana, por reglar los etchos de la sevdad, i foe de este tiempo ke empesaron a asender los feneres por el aklaramiento de las plasas de la sevdad ke mas antes non avia i metieron tambien a 2 baredores para ke las barieran las plasas las mas frekontadas, i el prezedente de esto era un sierto Mesut Bei ke es ijo de el kaimakam Jasin Bei ke por el koal ja tengo eskrito, i era ke siempre estava en la kanselaria i le pagavan a 150 gr. a el mez por su mezada, i un moso avija ke li pagavan a 50 gr. a el mes i por el gaste de la kanselaria se lis soltava 150 gr. a el anjo, i esto eran los gastes ke si azijan en el tiempo de el torko por las admenestrasiones, i la suma de moneda ke tenijan en kacha fin a este tiempo era de 300,000 gr. i en este tiempo ke estavan fragoado el konak en Sofia en el tiempo de Mahsar Pacha, i siendo ke non abasto la suma ke si li tenija soltado para la fragoa, foe ke vino el Pacha a Samokov i kon sus avlas dulses lo konvensjo a el Mesut Bei i le tomo los 250,000 gr. para la ajuda de este konak, kijendo dizir ke el Palasjo ke es agora en Sofia ande esta el Knaz es este mizmo ke lo tiene fragoado Mahsar pacha en este anjo solo ke li izieron un trokamiento i ke adjustaron i algunos otros pedasos,

En el anio de 5634, a Sr. Behoratche li nasio una ija la tchika ke mas denpoes de esta non tuvo mas otras krejaturas, i la

1852    Biografia de Sr. Behoratche kon su ijo Sr. Mochonatche.    1874

jamaron Estreja, i su madre la Bu, Dudutcha non kijo ni ke li izieran kama alta, ni menos ke li mandaran dinguno presentes ke si uzavan otro ke semplemente eja si estava lo mas muntcho sola ke non resivija a dinguno, solo ke en el dija de Chabad arazon ke la ivan a fadar para meterle el nombre, es ke mos foemos la familija entera a komer kon las moestras komidas ke ja lo saven de las baklabas i los otros dulses, i mas lo todo,

Estreja foe krejada i kudijada de su propija madre, eja koando ja foe en la edad de los 7 anios, de mizmo frekonto todas las echkolas sigun todas las otras, seja ijos komo tambien i ijas, eja en su tchikes era mui repozada, i mui bonatcha, eja los kudijava i los amava mui muntcho a sus ermanos, i koando mas ja non foe alas echkolas, eja era en kaza, i los merava a sus padre i madre, i los azija todos los hizmetis, sovre todo a el Padre, ke lo kodjava mui muntcho eja era ke non li plazija djugar komo otras krejaturas, a eja todos la amavan por la suja bonatches ke tenija, eja era mui arta de lo todo, su avlar es mui repozada i mui klaro, i siente a todo es por koalo foesa, ke non es kontraria,

En este anio ke Sr, Behoratche ja lo eskapo de fragoarlo el Salon, i por todos los pasajes i las pretensias ke tuvo kon el Sr, Mochonatche ja lo eskrivi en el anio de 5609, i el la mobelio mui bien i trucho una almenara de bronzo mui grande koza ke lo aklarava el salon entero, i era por asenderlo kon las muntchas lampikas de petrolio, i tenija muntcha sevda ke seja en todas las tadres komo

1853    Biografia de Sr. Behoratche kon su ijo Sr. Mochonatche.    1874

 tambien i en lo mas de las manianas era ke se bevija el kahve en este salon, i su asiento era lo mas muntcho en este salon, por ke era mui klaro i tenija mui larga vista por todos los kampos i las montanias, ansi era i en todos los Chabatiod i los moadim de mizmo i koando tenija, bodas i vijitas i balos i dines ke ja los tenija siempre era en este salon ke los azijan, ansi lo izo i mizmo i denpoes de la gera, de 5638, anke ke ja li avijan rovado lo mas muntcho de su mobilija, ma el ja foe ke lo renovo lo todo i de mizmo era i ke si asentava komo de antes, solo ke koando ja foe mas tadre komo en el anio, de 5656, non kijo mas asentarse i ansi foe ke en kada dija iva endo en manko, fin ke agora mas non asuven dinguno, i se sierven de el permeter algunos enbarasos komo kachas i otras kozas, i la mobilija ke ja foe estroida foe ke non la renovaron mas,

Kon el lavoro de el maaden, era ke lo kontinoavan, i las venditas de los fieros era ke lo azijan lo mas muntcho en Samokov ejos ke tenijan ariva de 50,000 gr. de zimen^[64] aver en los lavoradores seja los kimurdjis komo tambien i los kovatches i vignares, ke esto li kalija ke siempre los tuviera, i denpoes de la gera ke ja non si pudo mas lavorar, foe ke batio todo, i non pudo nada kovrar, ke alos presipios ja foe buchkando por poder koalo foesa kovrar, ma no lo pudo porke era todo en kontos korientes, i era solo el Molla Rachid ke lis era el jevador de el etcho ke lo asenjalava, i los devdores era ke tenijan a un raboch, ke lis iva kortando el Molla, koando lis morava los kontos, i foe ke kon algunos de estos tuvo djuzgos ke si

1854    Biografia de Sr. Behoratche kon su ijo Sr. Mochonatche.    1874

 li levantavan kon la chikanerija i las marazod ke ejos tenijan de aver, i esto ke non lo pudo somportar foe ke mas non lis buchko i le batejo todo, sigun de lo todo

En este tiempo el merko una jaila, en kiostendil ke si jamava sajdenik, por la vija de H. Chemoel Avdala, ke era koredor de esto, i por la suma de 28,000 gr. i la koala jaila komo era en muntchas partes tuvo el menester de tomar 320 tapis, i li kosto muntcha moneda para el dasio, i el revinido ke tenija esta jaila era de serka 2000 gr. ma non pagavan tanto en regla, i ansi tambien i kon esto li foe fin a el anio de 5638 de esta manera, ke es la gera i denpoes mas ja non pagaron, i lo izieron sigun eskrito ke avija i una komision nomenada de el governo i eja era ke los iva presijando las estas jailas ke eran mochijas, i esta si la presijaron por 5000 gr, ke era el governo ke las pagava i denpoes ejos los krestijanos la pagavan por 20 anios, i Sr. Behoratche non tuviendo loke azer foe ke si kontento, i resivio la moneda de la kacha de el governo.

El era de mizmo i en este anio tambien ke kontinoava en lo mizmo i de el anio pasado en todos sus negosios ke los azija i sin ke troko en kozas moevas, solo ke lo azija en mui travado ke ja si avija enpesado a sintir algunas tchikas reboeltas en la serbija, i denpoes ke ja si i esperava i por la Bulgarija, i el ke ja si espantava mui muntcho era ke siempre si rezervava,

Los begis turkos komo ejos non tenijan loke azer,

1855    Biografia de Sr. Behoratche kon su ijo Sr. Mochonatche.    1874

i sus penserios ke ja era lo todo en komer i pasatiempos, era ke si li venijan a la butika suja i sovre todo koando vinijan i algunas pachas era ke li demandavan por ke lis iziera kombites a el Maaden sigun ke ja lo eskrivi ke era mui viziozo lugar, i el ke non lis podija romperles era ke lis azija los daavetis kon los chich kebabis i las halvas i los jovetchis ke este eran las komidas ke komijan los turkos en los kampos, i se ivan todos i ke ejos ja tenijan todos sus paitones i era ke gastava tambien para esto komo de 500 a 600 gr. ke era koza ke non si li enportava por ke de ejos ja los ganava kon su demazija ke los turkos ja eran djente ke rekonosijan,

En el anio de 5635, visto ke uvieron algunos trokamientos en los fondos foe ke i el iva aziendo algunas operasiones de vender i merkar fondos de la borsa de kostan i lo todo lo azija por vija de Sr. Kamondo, ke el presio de la konsolite era de 50 a 52 gr. i komo si avlara de algunas deferensias, entre la serbija i la bulgarija, kontra de la turkija, era ke los fondos turkos ivan aziendo grandes trokamientos sus presios en las borsa, fin ke uvo tiempos ke abacho la konsolite fin a 40 gr. i en esto tuvo algunas piedritas, i ansi foe tambien i en los chemendeferes, ke valijan a 160 fr. i abacharon fin a 120 fr. solo ke Sr. Kamondo, non li reintchija a todos los ordenes ke le iva dando, i lo azija sigun el loke lo kerija i

1856    Biografia de Sr. Behoratche kon su ijo Sr. Mochonatche.    1875

seja en el merkar komo i tambien i en el vender, ke si en kavzo era ke Sr. Kamondo li sintija a todos los ordenes ke li dava podija arivar a tener mui grandes piedritas, i esto era Sr. Kamondo ke si lo azija por plazes, i por lo todo lo akonsejava, i lo protejava, ke ja lo saven ke Sr. Kamondo de viejo foe siempre ke protejo a toda la familia Arié.

Su ijo Sr. Mochonatche, en este anio si foe a Kostan por azerle la achugar por su ermana M. Donna, ke ja estava espozada en Nich, kon Sr. Jshakutcho Kario, i el estuvo komo 2 mezes fin ke li izo de todo djusto i de lo boeno, i aparte li trucheron tambien i kavesera brozlada de viena, kon su nombre eskrito, i tambien i muntcha blankerija, i en su estar en este tiempo en kostan era ke i azija azer vija de Sr. Kamondo algunas tchikas venditas or merkidas en la borsa de los fondos turkos i de esto non tuvo algunos afitos ke siempre era ke djugava mui muntcho, en elos presios,

Su moso el Sr. Josofatche ke ja estuvo muntchos anios ande el i la paga ke tomava era apenas por poderse mantener, ke era 120 gr. a el mez. foe en este anio ke si konrogo porke li enprestara alguna suma de moneda por azer en Hevra una partida de kezos en tulum ke los jevavan a kostan, i siendo ke ja lis foe mui konfedente, foe ke lo alesensijaron por ke merkara una partida de kezos en Hevra, i para ke podiera i el ganar alguna koza, i esto ke el ja lo izo i ke los jevo a Kostan ma siendo la anjada non li foe favoravle, i el presio ke foe abacho era ke non los estava presto podiendo venderlos

1857    Biografia de Sr. Behoratche kon su ijo Sr. Mochonatche.    1875

i visto ke si ainda esperava era ke ja li pasava i el tiempo, lo topo de mijor por azerle trampa por garato i otros pechkados salados porke i esto foe ke en este anio uvo mui muntcho kijendo dizir ke de todas las 2 partes kali seja ke ja estavan enfastijados de sus artikolos i se los trokaron i kon esto foe dezbarasado de los kezos i el los trucho a samokov, ke li dizija el Sr. Behoratche ti jevatis dezajuno i trochites seuda chelichid, i esto apoko apoko el lo iva vendiendolo ma sin dinguna ganansia, i foe ke non tuvo dingun provetcho ma ja era ke Sr. Behoratche lo mandava por ke resiviera sahtijanes i era el uzo ke de kada botika de los tabakes ke davan por prezente komo tchodjuk^[65], a un koero, i esto li entchija en el anjo komo a 500 i 600 gr. i su mezada foe en estos tiempos ke si la pujo fin a 200 gr. a el mez, ma era ke otro etcho non tenija i li kalija ke si li estuviera ande el, i era mui repozado i mui djusto,

Ejos lo tenijan por Haver a H. Josofatche Koen ke vendija ropas de malifaktura, i en kada anio ja era ke lis dava a ganar alguna koza, i en este tiempo ke H. Josefatche seja por ke tuvo los gastes mas grandes or ke los etchos non li kamenaron boenos, era ke non lis estava dandoles nada de ganansia, i ejos ke si espartieron foe ke li kedo a deverle komo una suma de 100 liras i esto lo izieron por ke si los iva a pagar en unos siertos tiempos ma siendo ke i esto non si los pudo pagarselos, ejos si konvenieron ke li djo la butika por paga de las 100 liras, i mas tadre el Sr. Behoratche la vendjo esta botika por 70 liras, i kon esto se alempiaron los kontos,

1858    Biografia de Sr. Behoratche kon su ijo Sr. Mochonatche.    1875

 sigun ke ja lo eskrivi mas antes por los begis turkos ke era ke si li asentavan en kada dija en su butika i el ke ja los resivija kon kara boena i era tambien i el kon ejos ke estavan pasando la ora, ke lo todo era mas muntcho a razon de el mahmud bei ke i el li vinija i siendo ke tenija muntcho provetcho de el era ke los resivija a todos los otros, ma siendo ke el tambien tenija ke li entravan i salijan djente a su botika i era ke koal traiva paras i koal tomava i los turkos ke ja lo vijan esto i ke si i enselavan foe ke lo enpesaron a enbedijarlo kon dizirle ala kara bre tienes muntcho etcho i estas muntcho ganando i esto ke li vinija mui pezgado por ke li dizijan ansi era ke mas enpeso mas ralo de asentarse kon ejos i non lis estuvo tambien i aboltandole tanto kara, ke esto i ejos ke ja lo vijan era ke li enpesaron a irle mas ralo, i en este tiempo ke tuvo de vinir a Samokov un sierto Hadji latif ke el koal era grande merkador de fieros i komo tenija trato i kon los begis era ke i el tambien li vino ala butika, i en un dija ke si ditcho Hadji kijo bever agoa, i Sr. Mochonatche su ijo ke estava en la otra kamareta, li dicho abre kopil^[66] (keri dizir mamzer) traemi una kupa de agoa, i Sr. Mochonatche ke sintio ansi dizirle kon el nombre de kopil, li dize kopil sos tu, deskarado, i el Hadji kedo mui muntcho avregonsado, i Sr. Mochonatche sovre esto ke lo jamo ansi si[n] tadrar si foe ande el kaimakam i se akecho sovre esto ke lo jamo ansi un ajeno, i el kaimakam, tambien presto lo mando a jamar, a el Hadji latif por darle kechas i amenazarlo, sovre ansi komporto, i el Hadji anke ke si eskulpava, disiendo

1859    Biografia de Sr. Behoratche kon su ijo Sr. Mochonatche.    1875

 ke el non lo izo por negro, ke el uzo de su sevdad ja es ansi ke todos los turkos jaman ansi, alos mansevos ke non son turkos, i el kaimakam li dize por azerle plazer porke presto si foera, de Samokov, ke el etcho non lo tiene boeno, i ansi foe ke el Hadji sin aze nada de etcho partio de samokov en sikreto i se foe a enderne, i en el anio de 5638 ke jo estuve en enderne, i ke tenijamos etcho de fieros kon el dito Hadji Latif, i koando estuve en su botika, mi lo konto esto todo ke li paso en su estar en Samokov, ke jo ja lo savija, i me dicho ke la enfloensa ke la tenech, voestra familija en Samokov, es mas grande de esta de los turkos ke son los patrones de la tiera, i jo li diche ke i mozotros tambien somos suditos turkos, i se kedo mui kajado, ke esto es verdad ke el komporto de los turkos por la trakia es mui deferente de este de las partes moestras,

En el anio de 5636, Sr, Behoratche la kazo a su ija M. Donna, ke estava espozada kon Sr. Jshakutcho, kario de Nich, i a razon de la gera sirba turka, ke ja estava deklarada i Nich, ke era granisa de la serbija foe ke Sr. Behoratche non kijo ir a Nich i el si kontento a travar todo el gaste de la boda, i ke si viniera en Samokov, el novio kon su djente por azer la boda en Samokov, i de esto ke ja foeron de akordo foe ke si vinieron todos a Samokov i la izieron la boda kon muntcho keéf i saltanat, i uvo tambien i boen tchalgi

1860    Biografia de Sr. Behoratche kon su ijo Sr. Mochonatche.    1876

i las mojeres ke vinieron de Nich, ke ja savijan todas mui boeno i kantar, i bailar ala moda sirba, ansi era ke notches enteras i toda la familija Arié ke ja estavamos siempre era kantar i bailar, i aparte ke ja avijan tambien i muntchos kombedados de los amigos i esto tambien era seja en las notches komo i tambien i en los dijas, avija tambien i muntchas kombedadas turkas de las hanumes ke entre ejas estuvo tambien i la mujer de Chahzi Bei, ke en este tiempo avija vinido a Samokov, de Kostan, ke la koala es ija de el Mumtaz Efendi ke tengo eskrito, mas antes de koando tuvieron los djuzgos, kon los begis de Samokov, en el anio de 5612, i a su onor li izieron un daavet, de pranso de gala, ke este pranso li foe mui muntcho plaziente, ke uvieron tambien i otras hanumes a su onor, i eja koando si torno a Kostan aparte ke si lo konto a su padre por todas las onores ke li izieron foe ke eja lo konto i a muntcha djente otra seja en las kazas de los pachas komo tambien i en los begis, i en el anio de 5638, ke la Bu. Dudutcha estuvo en kostan i el Mumtas Efende ke lo supo la izo kombedar ala Bu. Dudutcha, a su kaza ke estava tambien i su ija morando en su kaza djuntos kon su marido, el Chazi bei, i li izo un daavet, lo todo de las komidas jeladas por razon de el kechrud, kon muntchos modos de dulses i los salados, i mas i otras kozas ke en kostan ja avijan muntchas i denpoes li davan los mil modos de los chiropes i otras dulsuras ke eja tambien foe mui kontente, por todas las onores ke li izieron i eja si los rengrasio por esto ke li izieron ke foe muntcho i ke non lo meresija fin a este grado ma ejas li

1861    Biografia de Sr. Behoratche kon su ijo Sr. Mochonatche.    1876

 dicheron ke esto es mizmo i poko enfrentante de las onores ke eja lis izo en Samokov, i denpoes molo kontava sigun eran los komportos en las kazas de las Hanumes ke non eran tanto de alavar, enfrentante a loke molo podemos imajenar,

Koanto a el novio kon su djente ke vinieron de Nich, Sr. Behoratche lis djo por sus koartir, la kaza ke mora oi su ijo Sr. Mochonatche, ke en este tiempo estava vazija, i en eja ke ja la mobelio estuvieron mui kontentes, ke era solo para ke durmieran en eja ke por lo restan seja la boda komo i tambien i la kozina, i todo sus estar era en la kaza de Sr. Behoratche, i koanto a el gaste lo gasto todo Sr. Behoratche, solo porke non si dichera ke el novio non gasto nada li djo 50 liras a tiempo ke non li abasto ni 100 liras para el gaste ke si izo, ma non meravan, en akel tiempo,

La novia ke ja trucho muntcho achugar i ____ liras de kontado, i aparte ke ja lis dieron la familia entera muntchos presentes seja de parte de el novio komo i tambien i de parte de la novia ansi ke foeron de todas las 2 partes mui bien kontentes, i denpoes ke ja estuvieron 12 dijas en Samokov, partieron por Nich, mui alegres i mui kontentes, i la novia ke ja es komplida de lo todo, era ke bivieron en Nich, mui aonados i se amavan kon su marido muntcho, i tambien i ke todos los de su kaza la respektavan i de mesmo era i eja, i eja pario, un ijo Borovoi, i una ija Sara, i su marido era ke estava en la butika de merkansija de malifatura ke tenija su padre, i ejos azijan grandes merkansias ke traivan las ropas deretcho de

1862    Biografia de Sr. Behoratche kon su ijo Sr. Mochonatche.    1876

viena, i ansi foe fin a el anio de 56__ ke murio, el Sr. Jshakutcho, por dezgrasia, i la razon foe ke en este anio li merkaron el Hatan tora, i kijendo Sr. Jshakutcho adonar la suka por ke le ivan a venir la djente a vijitarlo, foe ke si estero para enkolgar en el tavan de la suka algunos adonos por ermozejarla, i siendo ke el ja lo tenija el mal ke era kevrado, i en la primera esteradura, ke el si estero, foe ke li vino la kevratina i kedo en el lugar moerto, i todos los ajudos ke li dieron foeron todos en baldes i ansi foe ke la M. Donna kedo bivda, i alos kudios de su esfoegro, ke li tomo una kaza, aparte la koala ke ja era sujas, i se governava sola eja kon sus 2 krejaturas, ke esto foe fin a el anio de 5656, i en este tiempo el Sr. Behoratche, ke kudio por eja foe ke lo mando a su ijo el Sr. Jechua a Nich, por ke li podiera reglar su avenir ke esto si lo demando eja, de su padre, ma foe ke non si li demostro ke el tuvo ni ke kedo nada de Sr, Jshakutcho, i mas tadre se vino la M. Donna ala kaza de su padre, en dechando a sus 2 krejaturas a los kudios de su Papu, i en el anio de 5658, si kazo kon Sr. Moche Levi ke i el koal era tambien de Nich, i le djo Sr. Behoratche 100 napoliones por kontado, i mas tadre era ke li iva tambien i dandole koando 25 i koando 30 i 40 napoliones, i ejos ke ja estuvieron algo de tiempo en Nich denpoes si foeron a Kiostendil i mas tadre a Samokov i agora biven en Pazardjik, i el si okupa en etchos de saraflik, i biven mui aonados, i fin a este tiempo la M. Donna kon este marido no pario,

En este tiempo ke ja era la gera Sirba, kon el turko

1863    Biografia de Sr. Behoratche kon su ijo Sr. Mochonatche.    1876

 Sigun ditcho ke la gera en serbija estava mui foerte, era ke i se iva avlandose, por ke se iva i a deklarar i la gera en la bulgarija, i de esto era ke los negosios eran mui muntcho kurtos, i avijan tambien grandes espantos de los grandes trafekos de los soldados turkos ke los ivan transportando de el un lugar a el otro, i siempre era ke i ivan rekojendo, ajudas en moneda de todos sus suditos ke salija el kaimakam i lis tomava komo por foersa, la suma ke el lo vija por deretcho, ke este modo de ordenes tenija, i visto a esto era ke kada uno iva buchkando de toparse mas rekojido, en todos los puntos, i los de la familia moestra era ke siempre ivan tiniendo adjuntas por estudiar sus avenir, ke non si savija koalo podija arivar, ke fin a este tiempo muntchos anios non supieron loke es gera,

En el anio de 5637, ke la gera ja foe deklarada, tambien i para la bulgarija, i el ruso ja tenija su armada, de la otra parte de la tuna, ma el turko ke tenija su armada, de esta parte de la tuna ja era ke si iva pudiendo defenderse, solo ke por mozotros el aspanto ja foe mui grande, i a razon de esto avija ke i avijan enpesado i a amenazar algunos turkos, i tambien ke i ivan viniendo muntchos zebekis veluntarios, i entravan por las kazas ke arazon de ejos i adjuntavan tambien i los tcherkezes i rovavan djuntas,

i visto a esto todo, su ijo Sr. Mochonatche si auno,

1864    Biografia de Sr. Behoratche kon su ijo Sr. Mochonatche.    1877

 kon Sr. Behoratche, ijo de el Sr. Mochonatche, j, Arié i Sr. Haim Haimatche, ijo de el Sr, Davitchonatche, ke ja estavan kazados, i Sr. Leon, de mizmo ijo de el Sr. Davitchonatche ke non estava kazado i ansi i Sr. Nesimatche, partieron ejos i sus mujeres i kreaturas todos djuntos, kon sus paitones i 3 mui bien armados de sus mosos turkos, por goadrarlos, vija Saloniqe a Brindizi, en la Italia, i ejos koando abacharon a Saloniqe los resivieron S-res Jshak Tijano kon su ermano, en sus kazas, i denpoes ke ejos ja estuvieron en Saloniqe unos koantos dijas, partieron kon vapor i abacharon en Brendezi, i denpoes si foeron a Ledji, i ejos estuvieron un sierto tiempo en Ledji i eran todos en una kaza, djuntos i seja ejos komo tambien non ni si dieron a konoser por djidios ni menos ke los konosieron ke i eran djidios, i pasando algo de tiempo ejos si foeron todos a Triesta i en el tiempo ke ejos estavan en Ledje, akaesieron las fiestas de Roch achana, i Kipur, i Sukod, i a razon ke en Ledje non avija Djidios, foe ke Sr. Behoratche li eskrivio a su ijo Sr. Mochonatche por ke si foera a Napoli i ke non las pasara las fiestas santas en lugar de krestijanos, i sigun su komando el avista partio por Napoli, solo ke ja avijan djidios, i denpoes ke las paso las fiestas el si vino de moevo a Ledje, i en sus estar tambien en triesta era de mizmo ke bivijan djuntos todos en una kaza, i era ke si ganaron a muntchos amigos en triesta ke los primeros eran los ijos de el Dr. Chalom de la Bosna ansi i otros muntchos, i los ditchos Sres Chalom era ke todos los 2 ermanos tenijan aparte sus negosios, i Sr. Mochonatche ke

1865    Biografia de Sr. Behoratche kon su ijo Sr. Mochonatche.    1877

tratava kon el un ermano era ke li komandava algunos artikolos de kolonial i se los mandava a kostan a su Sr. Padre por ke los vindiera i ke si i englenijara, anke los profitos eran mui tchikos, i a esta kavza era ke los jamava en su kaza en algunos dijas i pasavan kon kantar, i M. Tamaro era ke lis azija i algunas komidas ala turka ke lis plazija mui muntcho, i el Sr. Behoratche era ke tratava kon el otro ermano, i el azija lo mizmo de este,

Sigun ditcho ke ejos todos estavan biviendo en una kaza, foe ke Sr. Behoratche, en una notche ke estava algo bivido i kale dizir i komo boratcho, foe ke ejos tuvieron unas litigas i deferensias, fin a el grado ke lis arivo a defendersen i kon las manos, i la razon era, ke siendo Sr. Mochonatche non estava bien limpio vistido, i Sr. Behoratche ke li dicho ke estava mui suzio i ke el ja si estava i avregonsandose, de kamenar djuntos, sovre ejo Sr. Mochonatche si aparto de ejos, i se tomo un koartir aparte, en restando todo otros torna en djuntos, i de esto ke si aparto Sr. Mochonatche foe ke Sr. Behoratche lo enegresio ande su amigo el Sr. Chalom. ke esto lis turo, el anojamiento poko tiempo, i denpoes ke ja si razonaron, ejos ja vinijan torna en un lugar, i koando ja foe el anio de 5638, ke la gera ja foe eskapada, se vino Sr, Mochonatche a Kostan kon toda su familia, i estuvieron djuntos en la kaza ke ja estava su Sr. Padre, en kostan,

i denpoes ke ja avija partido su ijo Sr. Mochonatche por Ledje i ke Sr. Behoratche kedo en Samokov, pasando komo poko

1866    Biografia de Sr. Behoratche kon su ijo Sr. Mochonatche.    1877

 tiempo, si enpeso i el tambien a prontarse por partir a Kostan, i mi Sr. padre ke lo supo de esto ke si kirija irse, le dicho porke dainda, non era poede ser ke podijan aver algunos pirikolos, por ke la gera anke ke era mui foerte en Plevna ma ja era de dizir tambien ke el osman Pacha ja si estava boeno detiniendo, i si a plevna entran los rusos ja es entonses de salir de Samokov, i sovre ejo li dicho Sr. Behoratche ke poede ser ke sera ansi ma ja tenemos la palavra ke la dizen los turkos Ak aktche kara Jun itchum^[67], keri dizir ke la moneda es para el dija malo, i ansi foe ke partio djunto su familia, i se foeron a Kostan, i estuvieron en kostan serka de 2 mezes, i los otros todos de la familia ke estavan en Samokov i merandosen sus etchos, i ke non avija dingun espanto, i el ke estava solo en kostan gastando muntcha moneda, i su etcho kon todo su bien ke si lo decho a su moso el Sr. josefatche, lo izo ke si vino atras a Samokov kon toda su familia, i koando ja vino el kontinoava en su negosio, anke sovre rekojido, ma el foe mui repentido de esto ke si bolto, porke si espantava mui muntcho, i de su ijo el Sr. Mochonatche ke non estava akoruto tomando sus kartas li era apretos,

En el anio de 5638 ke la gera foe mui foerte i ke se iva sintiendo ke el osman Pacha non iva a poder rezistir, el izo, ke enpako de moevo lo mas mijor de sus vistidos i de la mobilia kon

1867    Biografia de Sr. Behoratche kon su ijo Sr. Mochonatche.    1878

sus djojas i platas i ansi mas i otras kozas i las mando a Kostan i kon lo restan lo enpako tambien i lo goadro en kaza, i de esto pasando algo de tiempo sovre ke algunos i otros se ivan prontando por partir de Samokov, foe ke los turkos si akecharon, ande el pacha en Sofia diziendo ke estos ke ivan partiendo, estan kavzando un grande deskorajamiento, entre el poevlo, sovre todo a las mojeres, ke todas las turkas, i krejaturas, ja son tanto espantadas diziendo i jorando ke van a venir los moskofis i mos van a matar a todos, es ansi ke keremos ke mos amostren lugar ande es ke i mozotros mos devemos de irmos, i el pacha, aparte ke lis izo saver por ke non tuvieran de nada por koalo espantarsen, i ke ejos ja estan al koriente por azer todo akejo ke es el menester, i djo orden por ke non decharan salir a dinguno de la sivdad ni menos ke dieran pasaportes, i esto ke lo supo Sr. Behoratche, ansi i toda la familia Arié foeron mui muntcho sikilijados, ma sigun eskrito de mas antes ke la familia Arié ja lo tuvo siempre la enfloensa, i ejos ja foe ke le izieron todos los pasos menesterozos, i se enpatronaron de los pasaportes, ke el primer ke lo tomo foe Sr. Behoratche, i denpoes ansi todos i aparte de la familia Arié a otros non dieron a dinguno pasaporte ke sovre esto i tambien uvieron kechas ma ja foeron sin baza, Sr. Behoratche foe el primer ke partio de Samokov, por la sigunda ves, kon toda su famija en dechando torna todo su bien a su konfedente moso el Sr, Josefatche, ke el koal li merava i li kudijava muntcho por los enteresos de su amo i arivando a kostan ke poko tiempo pasando ke ja si foe i

1868    Biografia de Sr. Behoratche kon su ijo Sr. Mochonatche.    1878

 Sr. Davitchonatche, de mizmo kon toda su familia, i ke ejos ke son kunijados (badjanakes) i primos ermanos, si tomaron una kaza entre los 2, i era la kaza en bei oglo de Sr. Danon, i komijan en una meza kon ke pagavan el gaste a kontra metad, i tenijan apartado sus kamaretas i pasavan mui bien, i eran mui aonados, ke sus mujeres ja eran i ermanas ja era ke si konvenijan, i ansi las krejaturas,

El por non estar en vazio si tomo una kamareta por botika en Galata en Selanik, han, i azija venditas de las ropas de kolonial ke li mandava su ijo Sr. Mochonatche de Triesta, ansi i algunos otros artikolos ke los merkava de kostan ke anke las ganansias li eran mui tchikas ma lo azija por koalo foesa, el azija tambien i algunas operasiones de vender i merkar fondos en la borsa de kostan, ma de esto el tovo algunas piedritas, i non grandes, el merko i djojas entre ejas merko tambien i unas eskolaritchas de berlante por 90 liras turkas, i algunas mobilias ke li mankavan en kaza, i en este tiempo era ke se ivan tambien i muntchos dijas por las kampanias, de mizmo i en muntchos de los pasatiempos de kostan, siempre si merkava seja para el komo i tambien i para toda su familia muntchas modas de vistidos, ke non si li enportava el gastar ni menos ke azija las ikonomijas, a razon de ir kon la onor, i koando ja si vino i su ijo el Sr. Mochonatche de triesta, ke el tadro mas muntcho de los otros arazon ke el se izo sodito Nemsi en triesta i para legalezar su pasaporto li kalio ke tadrara, ke esto li valio muntcho por muntchas kozas, i es rekonosido, seja el komo tambien i sus ijos, ke ainda

1869    Biografia de Sr. Behoratche kon su ijo Sr. Mochonatche.    1878

pasando ke ja repozo los espantos lo izo ke se vino Sr. Behoratche a Samokov, por poder aresgatar de mano de los rusos, koalo lo podia de sus ropas ke li revataron, i kon los mil males ja era ke algunas kozas ja las iva podiendo tomarlas, porke los rusos todo loke ditijan [dizijan] era ke por la persona ke fujo en la gera non enpatrona mas su bien, ma torna kon todo era ke lis iva tomandoles, en tanto en la gera de los balkanes en el 1913, los sirbos i los gregos lo azen ke koal foesa sodito ke si kerla salir de en el paiz ke esta i ke non kere ser sodito seja sirbo or grego, ke es algun bulgar or Turko, i ke enpatrona mulkes es ke non lo decha venderlos mizmo ke non si fujo en el tiempo de la gera kon dizirle mozotros non pelijamos por ganar personas otro ke por ganar tiera, es ansi ke tu ja sos libero de irte ande keres ma la tiera es moestra i non la poedes venderla solo ke tu ja la poedes enpatronar komo tu estas aki i si ti keres irte es ke la tiera resta para el governo, i ansi lo estan aziendo, i kon los fieros i otras kozas ke el las tenija foe ke los rusos la una partida lo levantaron a sus depozitos i la otra la sijavan en el mizmo depozito ke si topava, ke esto en este tiempo non lo pudo tomarlo otro ke koando ja si vinieron kon toda la familia foe ke ja lo tomo, en el tiempo ke el estuvo en Samokov, foe ke non pudo entrar en su kaza, a razon ke la kacha de la moneda era en su kaza i tambien ke morava el general i denpoes ke ja estuvo algo de tiempo en Samokov el se bolto torna a Kostan, i sin tadrar el si pronto por vinirse a samokov, i se vino a el presipio el kon su familija i resto

1870    Biografia de Sr. Behoratche kon su ijo Sr. Mochonatche.    1878

 su ijo el Sr. Mochonatche kon su familia, en Kostan, i se abacha en su kaza ke ja lo alesensiaron por ke estuvieran en unas koantas kamaretas, i el koando entro en su kaza bezo la tiera i dicho binditcho mi Dio, ke mi rogo a vinir torna a mi kaza, i el ke enpeso de moevo a buchkar sus bienes, ke el komandir de la sivdad era un ruso ke si jamava Chegorin, i el Natchalnik era Rizansia, i todos los 2 ke anke eran muntcho boratchemes ma ja era ke si dechavan avlar, i se pagavan de la razon, i lo resivijan kon boena kara, ke por los presipios era todo ke non podija tener dingun bien solo por esto ke si fujo, ma denpoes koando en el kongreso de Berlin ja si voto ke si devijan de boltar todos los bienes ke enpatronava kada uno foe ke i el lo iva tomando lo todo esto ke avija a el ojo i por esto ke ejos lo emplekaron i tambien ke si lo rovaron foe lo todo pedrido, i kon estas kozas mankas tuvo muntcho danio,

En el anio de 5639, Sr. Mochonatche kon su familija ke avijan restado en kostan, foe i el ke si enpeso a prontar por vinirse a Samokov, i el aparte de la mobilija ke la tenijan la una partida la enpako i la mando a Samokov i lo restan lo vendio, i ejos tambien partieron i se vinieron a Samokov, i ejos ke vinijan kon el Chemendefer i serka de enderne, se lis avrio la poerta de el kupe ke estavan ejos solos i su mosa ke la detinija a su krejatura la tchika

1871    Biografia de Sr. Behoratche kon su ijo Sr. Mochonatche.    1879

en sus brasos i sin ke lo viera ke la poerta non estava bien serada i eja ke si aremo ala poerta foe ke si kaeron en bacho afoera de el vagon en loke estava kamenando el tren, i ejos ke kedaron en medjo de los kampos, i sin ke tuvieron dingun danio ni menos ke si i toeron^[68] ja foe ke presto lo jamaron a el kondoktor i iso detener el treno i se suvieron i se abacharon en Enderne por ke el treno non vijajava en las notches, i los kaeidos [kaidos] foe solo un poko de espanto ke tuvieron en el punto ke si kaeron i mas non tuvieron nada, ala maniana ejos partieron torna kon el Chemendefer i se vinieron a Pazardjik ke mas non avija linija, i de Pazardjik ejos se vinieron kon paiton a samokov, i la ditcha krejatura ke si kajo de el vagon, pasando algo de tiempo eja por ser ke estuvo hazina i ke ja era i mui flaka se morio ke non foe por algun espanto or ke si harvarija,

Koando ejos todos ja si rekojeron en sus kaza i los rusos kon la kacha de la moneda ke estava en sus kaza ja si salieron i restaron solos ejos i se resentaron komo de antes, solo ke la M. Tamaru era ke siempre iva jorando, i koando li demandavan la razon de esto ke eja jorava su repoesta era, ke koando el tiempo era novlado li apretava, i se le jorava, ejos en sus estar en la italia ke si enbezaron muntchas kantikas seja en italjano komo i franses i koando ejas vinijan en un kavo era ke siempre estavan kantando, i se kontavan las vidas i los pasatiempos ke ejas lo pasavan en la italia i ejas non eran kontentes de la vida de Samokov, ansi de mizmo i de esta de kostan, lo todo merando ala vida ke ejos lo pasaron en la

1872    Biografia de Sr. Behoratche kon su ijo Sr. Mochonatche.    1879

 Italia, ke merando ala vida de Samokov era ke si le iva jorando,

Los rusos ke davan muntchos balos i soares, i era ke i a ejas tambien las kombedavan por ke tomaran parte, i sovre esto ke solo a ejas las kombedavan era ke unos koantos mansevos de samokov lis davan kechas alos dadores de estos balos por koalo era ke i a ejos tambien non los kombedavan, porke i ejos son rikos i ke sus mujeres ja tienen muntchos vistidos i ke ja savijan i bailar i los rusos lis respondijan ke a vozotros vos manka el aire de la nobles, i ke ja poede ser ke sigun dizich ke soch kapatches i rikos i ke tenech muntchos vistidos ma es solo esto la razon ke non podech kaver en estos balos i otros pasatiempos, i ejas mas tadre ejas tomavan liksiones en franses de un sierto M. Chulman ke avija por derektor en la echkola de la aliansa israelid, i en esto era ko [ke] lo pasavan lo mas muntcho, i a esta razon era ke non salijan a dingun otro lugar, por las vijitas ke esto ja avija muntcho en Samokov i de esto tambien era i ke lis davan kechas, ke ejas las kombedavan muntcho ma siendo ke non lis tomava sus avlas era ke si enbevesijan en esto de los estudios, i los enbezamientos,

Ejos los ombres era ke denpoes ke mas ja non podieron tomar mas nada de esto ke lis avijan rovado era ke si enbevesijan en algunos artikolos de merkansijas deferentes ma non tenijan dingun profito i kon el etcho de el maaden ke ja lis koadro ke non podija lavorar por muntchas razones ejos lo abandonaron por entero i lo azijan de poder kovrar esto ke era posivle de los averes ke tenijan en

1873    Biografia de Sr. Behoratche kon su ijo Sr. Mochonatche.    1879

 los lavoradores, ejos ke merkavan de mas antes los sahtejanes i los mechines, foe i en este anio ke los krestijanos lo lavoraron el sahtijan i el ke lis merko foe ke lo mando a viena ma siendo ke non foe bien lavorado ke los krestijanos non li davan el material menesterosos sigun ke lo azijan los turkos, ansi foe ke lis kedo krudo, i li kalio lo vindiera kon los presios mas baratos i non tuvo dingun profito i mas non merko, era ke si enbevesija en los etchos de saraflik ke avija etcho en las pomachkas i las rublas de plata ke eran mankas i en samokov non lo azijan deferensia, i esto se merkavan en kostan i se trokavan por las pomachkas,

En el anio de 5640, li nasio a Sr. Mochonatche una ija, i la jamaron Viktoria, i kon eja no lo izieron sigun de todas las otras paridas a razon ke en el dija ke la pario foe ke mos levantimos mozotros de el siete de la moerte de mi Sr. Padre Tch. Avram eja foe krijada de su madre, i de mizmo tambien i kudijada, i eja koando ja foe mas grande frekonto todas las echkolas i esta de los amerekanos i mas denpoes eja estuvo en las chastras i tomo las liksiones de el pijano, i eja kudjava por todos los de su kaza, i li plaze muntcho la limpieza, ke los vistidos ke eja los viste son mui djustos i la plaza vistirse de lo boeno, porke es eja ke si los save kozir, eja es mui respekteoza i respekta a todos,

1874    Biografia de Sr. Behoratche kon su ijo Sr. Mochonatche.    1880

 Sr. Mochonatche ke lavoro kon su padre fin a este tiempo el era ke non savija si el era ke tovo alguna parte en las ganansias or ke por i en delantre lo iva a tener, sovre esto li demando por ke li deklarara, i la razon foe ke en este tiempo, algunos de sus parientes li kontava ke las leés de la bulgarija sovre el etcho de el meraz, non son sigun de el tiempo de el turko, para los djidios porke las ijas non tomavan a igoal parte, komo los ijos es ke agora era todo una koza, sigun los ijos toman i las ijas, i tambien ke en Sofia ja uvo fakto sovre esto de el meraz ke non li kerijan darle ala ija sigun el ijo i eja ke se adereso a la djustisia foe ke lo kondinan a esto ke non li kerijan darle porke era la eredad en igoal parte, i esto ke si lo estavan kontandolo era en loke ejos estavan komiendo en la meza, i el Sr. Mochonatche ke lo sentija foe ke li djo un dezmajo i kedo dezmajado algo de tiempo, i Sr. Azaria ke ja estava en la plasa foe i kon el ke tuvieron algunas deferensias letigavles, ke visto a esto ejos ke vinieron en un kavo kon sus Sr. Padre si lo reglaron kon ke lis nombro sus kapetales i tambien las partes de las ganansias, ke las ivan a tener kada uno, i lo izieron kondision por los gastes de sus vistimientas ke se devijan de jevar kada uno konto por si i koanto alos gastes de la komania ke lo iva lo todo a travarlo sus Sr. padre, i ke ejos ja komijan todos de una meza i moravan en una kaza,

i por mas ainda asigurarse el Sr. Mochonatche ke non seja ke denpoes de la moerte de el padre ke podijan tomar parte en la eredad lo izieron de boltar la firma, kon ke si izieron kontratos deklarandosen

1875    Biografia de Sr. Behoratche kon su ijo Sr. Mochonatche.    1880

sus furtunas i las % ke tenijan i la firma la jevaron Moche J. Arie, o ejos ketaron serkolares deklarando ke Sr. Jshak G. Arié i sus ijos Moche i Azaria ke son haverim i ke deven todos de afermar, Moche J. Arié i sovre esto kontinoaron en todos sus negosios,

De prima ejos merkaron partidas de sahtijanes i mechines i los mandavan a viena por ke si los vindieran por sus kontos, ejos komandaron de viena partidas de sukares i djam, i ansi otros artikolos, ejos ke ja merkavan de mas antes las lanas de los vlahes foe i en este anio ke merkaron ma non podijan azer las venditas sigun de akejos tiempos i esto porke mas non travo la bosna los potures i los Chalvares i otros de los Chalakes [chajakes] ke si lavoravan en Samokov, kon las butikas ke ejos las tenijan en Sofia lis enpesaron muntcho a pujarlos las kiras, i era de esto las mas grandes ganansias ke ejos las tenijan,

En kaza las mujeres lo pasavan mui bien, i ejas ja era ke i kudijavan por la kaza i de este tiempo i endelantre ja foe ke si troko en todos los puntos los uzos, seja en los ombres komo i en las mujeres, de este tiempo i endelantre foe ke vinijan los ombres a komer por la medio dija a kaza, i komijan todos djuntos, i non komo de mas antes ke lis mandavan alos ombres a komer a el tcharchi, i las krejaturas koando salijan de la echkola i las mujeres komijan solas foe ke agora si rekojijan todos a medio dija i komijan, i mas ke koando avijan algunas vijitas mas antes era ke vijitavan solos los ombres i las mujeres solas i agora vijitavan djuntos por ke antes

1876    Biografia de Sr. Behoratche kon su ijo Sr. Mochonatche.    1880

 era vergoensa de vijitar kon las mujeres, ejas si enbevisijan en las modas de los vistidos, mas ejas non si tokavan komo antes kon i los chamis i las perias i los arikos^[69], otro ke si ketaron todas kavejos i jevavan chiniones, i kon tchapeos, sus lingoajes era todo sovre las modas i las vistimientas, i las vidas seja de la italia komo i esta de kostan, i la amistad ke ejas la tenijan kon la kozina ja foe dija kada dija en manko i mas non kijeron prontar las komanias sigun antes para el anio entero por razon ke si kerijan i kudiarlos,

En el anio de 5641, ejos ke en Sofia tenijan, unas koantas butikas, i kon las kiras ke ja era ke ivan siempre pujando, lo izo ke enpeso a ir mas espeso Sr. Mochonatche a Sofia por aver [ver] sigun de loke otros lo ivan aziendo, i kon esto ja foe ke i el tambien si las pujava, i a esta razon el tambien ke ja estava en paras foe ke lis dava tambien i a algunos sus konosidos moneda i kon entereso ke en akel tiempo non avija ainda bankas sigun ke ai agora, i siendo ke en Sofia avijan boenos pasatiempos era ke si estava mas muntcho, tiempo en Sofia, ke koando venija a Samokov el si sikilijava, i era ke buchkava la mas tchika okazion para irse a Sofia, ke lo mas muntcho de el anio el lo pasava en Sofia, el kerija estabeleserse en Sofia ma era ke su Sr. Padre non lo alesensiava, el en algunas de las okaziones si la yevava tambien i a su mujer M. Tamaru, i se abachava

1877    Biografia de Sr. Behoratche kon su ijo Sr. Mochonatche.    1881

en la kaza de su ermana M. Esturulu, ke mas tadre ejos koando se ivan era i ke si abachavan por los hoteles ke ja azija boenas komoditas, ejos ke ivan gastando montcho mas de loke era el menester, ke era por el konto de todos ejos foe ke li dieron kechas, a sus krejaturas las dechavan a los kudios de sus Vava la Bu Dudutcha, porke eja los amava muntcho i era una mujer ke non si kansava, ni ke si li enportava de kudijarlos, anke ke eja kudijava tambien i por la kaza

El Sr. Behoratche era en Samokov, i el kudijava por los etchos de Samokov, ma era ke salija poko ala plasa por razon ke a el si li renovo torna el dolor de el estomago ke ja lo tenija i de mas antes, i era siempre ke estava kon los medikos,

Ejos en este tiempo buchko a vender unos kandelares de plata ke los tenija merkado, en Filibe de Sr. Jshak Albalah, en el anio de 5632, i los koalos kandelares koando los merko, era ke el Sr. Albalah tenija el menester, de moneda a razon ke si avija etcho Haver kon Sr. Mochonatche J. Arié i su Co. i por el adjusto a el kapetal ke i el devija versar era ke li mankavan otras 200 liras, i la marka ke avija en estos kandelares, era J. A. ke es ke ja si melda i Jshak Arié i el Sr. Albalah lo kijo enganijar a Sr. Behoratche, de la manera ke lo vo a kontar, i Sr. Albalah siendo ke li rogo muntcho i ke li konto la razon foe ke Sr. Behoratche por azerle el plazer, si kontento a merkarselos, i los trataron sovre a 5 gr. la drama, i el Sr. Albalah ke ja foe mui gustozo de esta vendita, sin tadrar los trucho a su magazen ande estavan, i ejos ke los pezaron foe ke vinieron

1878    Biografia de Sr. Behoratche kon su ijo Sr. Mochonatche.    1881

4000 dramas, i el Sr. Behoratche viendo esta pizgura foe mui maravijado, i el ke los tomo en su mano por examenarlos, visto ke non lo podijan tener esta pezgura ala vista, i kalkulando ke esta suma non podijan i valer, lo topo ke en el pie ande si asentan los kandelares avija adjuntado un boen godro pedaso de plomo (kruchum) ke esto era para ke non si kaigan porke eran i altos, foe ala ora ke el Sr. Behoratche kon tchika riza li dicho a el Sr. Albalah, ke kale ketar los kruchumes i pezarlos para rebatir, i tambien kale i jevarlos a el moestro por ke los examenara non seja ke konterna i en algun i otro lugar ansi plomos, sovre ejo el Sr. Albalah ke si avregonso i foe ke i li djuro ke koando el los merko ke non li rebatieron nada por los kruchumes, i Sr. Behoratche li dicho ke si a el ja lo anganiaron ja kalija ke el non enganiara a los otros, i ejos ke rebatieron lo todo foe ke resto solo 1000 dramas i li konto los 5000 gr, es ke los ditchos kandelares non los pudo venderlos por razon ke la plata ja avia muntcho abachado en este tiempo komo ala metad de el presio de antes i ansi foe ke los detienen i oi en kaza,

Kon los kavajos ke tenijan de koando si los jevaron los rusos mas otros non merkaron, solo ke el brachov lo tuvieron longo tiempo en kaza i alos kavos ke si pudrio foe ke lo vindieron por el presio de fiero ke kontenija, ansi de mizmo foe i kon el karo de boeyes tambien ke si lo avijan jevado los rusos mas non lo renovaron solo tuvieron a un moso krestijano ke lis azija los mandados de la kaza i durmir non dormija en el dichari avli ke servija i por bektci

1879    Biografia de Sr. Behoratche kon su ijo Sr. Mochonatche.    1881

otro ke se iva en su kaza por razon ke non tenijan la konfiensa, de este tiempo mas non salijan por los kampos seja los ombres komo i tambien i las mujeres, porke ja foe muntcho espanto, de algunos de los krestijanos ke avijan negros i ke los rusos ja si avijan ido, ansi era tambien ke i en las notches non salijan ne ande los vizinos

En el anio de 5642 li nasio a Sr. Mochonatche un ijo i lo jamaron Ezra, i kon el koal tambien se izo sigun de todas las paridas de este tiempo, ke i su propia madre lo aletcho i lo kudio, i koando el ja foe mas grande, enpeso a kontinoar de el presipio la Echkola djudija, ke estuvo fin ala premera klasa, i denpoes si foe ala narodna echkola, de los bulgares, i entro en la koatrena devizion i lo kontinuo fin ala koatrena klasa, i siendo ke en Samokov non avia klasas mas ariva el si foe a Filibe, ala gemnazija, ke su ermano el Sr. Ben sijon ja estava en Filibe, ke era empeygado, i estuvo en su kaza kon ke Sr. Mochonatche sus padre li pagava a Sr. Bension, a 30 fr. a el mez por esto ke komija i dormija i lo kudijavan en su kaza i el entro torna en la koatrena klasa por razon ke no kijo dar examen, Sr. Ezra es un ijo mui repozado i non avla muntcho, i mui vergonsozo, a el li plazija muntcho los estudios i ansi era ke siempre ja si enbezava todas sus liksiones, a el, non li plaze los pasatiempos detras de sus estudios, el koando estava en Samokov era algo flako,

1880    Biografia de Sr. Behoratche kon su ijo Sr. Mochonatche.    1882

de la natura ma koando ja estuvo en Filibe el ja foe mui sano i boeno, el non era koket en sus vistimientas i sus parientes todos lo aman de esto ke es mui bonatcho, i mui repozado,

Sigun ditcho mas antes ke Sr. Behoratche foe siempre flako i ansi era ke lo mas muntcho el estava hazino, foe i en este tiempo ke aparte de sus maladijas ke si li renovaron foe ke i li vino, i la hazinura ke la jaman lo de el monte ke de esto sufrio longo tiempo, i koando ja estuvo algo mijor i su ijo el Sr. Azaria ke estava en este tiempo en viena i el ke lo kijo tambien vijitarlo, el si pronto i partieron kon su mujer la Bu. Dudutcha, i tambien si lis i adjunto i su ija M. Beju, mi mujer, porke i eja sufria de un diare i ke tenija tambien i el mal de el emoraite foe ke i eja si foe djuntos i se lo jevo tambien i a su ijo Jean porke eja non lo konfejava a dinguno otro, i todos djuntos partieron vija Lom palanka, i arivaron sanos i boenos en viena, i denpoes ke ejos se izieron merar seja de los medikos komo i tambien de los profesores en viena, los mandaron a todos alos banios de Karles-bad, i de Franses-bad, i estuvieron entre los banios i viena komo a 3 mezes, i ejos en sus estar en viena era ke los kombedavan, en sus kazas a komer muntchos de los amigos de viejo, en sus kazas i les azijan muntchas onores i ejos se merkaron muntchas modas seja de vistidos para ejos komo tambien i para la djente de sus kazas, ansi i muntchos presentes para todos sus parientes, i ejos ke ja estuvieron todos sanos i boenos si vinieron

1881    Biografia de Sr. Behoratche kon su ijo Sr. Mochonatche.    1882

a Samokov, i en viena ejos tuvieron a Sr. Tio Alkalai por terjeman ke el koal era ke i lis azija i algunos hizmetes porke ejos non konosijan dinguna de las lingoas ajenas, en este vijaje li kosto a Sr. Behoratche 250 napoliones i ami mi kosto por Biju 100 napoliones, i Sr. Behoratche en este viaje el merko algunos artikolos de ropas i las reucho a samokov ke ja las vendija kon algunas ganansias, i su ijo el Sr. Mochonatche ke era solo en Samokov era ke eskapava todos sus respondimientos, i en okazion el era i ke si iva tambien a Sofia i reglava esto ke ejos lo tenijan i en Sofia unos tiempos el ja foe kanso ma ja lo merava, todo, i en kaza era la M. Tamaru ke lo kudiava en el tiempo ke la Bu. Dudutcha estuvo en viena,

En este anio ke Sr. Mochonatche era el prezedente de el komite senagogal de Samokov, i era i ke si okopava mui muntcho en los etchos de la komonita, foe i en este tiempo ke los bulgares moradores de Samokov, ke ivan tiniendo muntchas adjuntas en sikreto, ke estudijavan por boltar el pazar ke si azija en dija de lunes por el dija de Chabad, lo todo porke los djidios non tuvieran algunos provetchos, i a Sr. Mochonatche ke ja si lo azijan saver de las adjuntas ke tenijan ke era solo por esto de el pazar, era ke i el tambien iva buchkando todos los moldes por ke non foera trokado, ke alos krestianos lis paresija ke komo el Pazar se azia en el dija de Chabad i ke los djidios ke non lavoran en el dija de Chabad, iva a ser ke todo el etcho iva a pasar ande los krestijanos, i kon esto ejos ivan a ser dezbarasados de los djidios de Samokov, i ejos ke en este reucheron

1882    Biografia de Sr. Behoratche kon su ijo Sr. Mochonatche.    1882

 i ke foe trokado el pazar en el dija de Chabad, ja era ke algunos Djidios tenijan algunos danios, ma los kazalinos non foeron kontentes de esto, i era ke muntchos de ejos vinijan torna en el dija de lunes, ma la polisija era ke los boltava atras i non los dechava entrar i sovre ejo foe ke de parte de los djidios lo izieron ke si akecharan a el ministerio de Sofia, en demandando si era ke los kazalinos non eran alesensiados de entrar en las sevdades aparte de los dijas de los pazares, i sovre ejo uvieron grandes kechas a los natchalnikis, i akavedandolos ke non poeden defender a dinguno, por la entradura a las sevdades, i ke kada uno es libero de entrar i salir i merkar i vender, en todos los dijas mizmo i en las notches, i ke la merkansija es libera para todos sin dinguna deferensia, i en estos dias non avija nombre de el dija de pazar, i era ke kada dija ivan viniendo, i en el dija de Chabad non vinija dinguno, sovre esto uvo un sierto tchariktchi djidio, ke si Jamava Sr. Behor B, Chabetai, i el koal ke kamenava por todas las butikas de los krestijanos, era ke lis iva diziendoles a los krestijanos ke si okopavan por el trokamiento de el pazar, lis dezija ansi, mozotros ke somos djidios, i aun kon todo ke el pazar lo boltach por el dija ke mozotros non vamos a estar en la plasa, ma torna kon todo kale ke lo sepach, ke mozotros los djidios siempre tenemos de komer el pan de el trigo boidai i vozotros torna vach a komer el pan de el trigo tchavdar, i ansi foe endo unos koantos mezes, i mas tadre ke si rekojeron muntchos kazalinos en un kavo, ke de mizmo foeron enbezados de los djidios, i kon

1883    Biografia de Sr. Behoratche kon su ijo Sr. Mochonatche.    1882

 una rogativa ke izieron a el ministerio en afirmandosen muntchas firmas de los kazalinos, ande lis rogava porke foera el pazar en Samokov en dija de lunes sigun de mas antes, i de los djidios ke los i ajudavan, foe ke si troko torne el pazar ke foera solo en el dija de lunes sigun de antes,

I de esto pasando algo de tiempo foe ke los krestijanos de Samokov, se aunaron i enpesaron de moevo a lavorar sovre esto de boltarle el pazar en el dija de viernes i Chabad, kon topar la razon ke los kazalinos estavan ezbivlando el dija santo de el alhad, arazon de los kazalinos ke moran lechos de la sivdad i ke non alkansan a partir en el mizmo dija i vinir a el pazar i ke son uvligados de partir en dija de alhad por alkansar a vinir en lunes i viene aser ke lo ezbivlan el dija de el alhad, sovre ejo tomaron unos dokumentos de el Sveti sinod, deklarando ke non si poede ezbivlar el santo alhad, i kon ejo lo izieron por ke foera el pazar 2 dijas ke es viernes i Chabad ma siendo ke i esto non era konvenivle para los djidios de Samokov foe ke ejos de moevo lavoraron, siempre por vija de los kazalinos ke devijan de pedrer los 4 dijas de la semana, i ansi foe ke torna se izo el pazar en dija de lunes i fin agora es de mizmo en el dija de lonis i mas non buchkaron por trokarlo,

En el anio de 5643, Sr. Behoratche era ke non salia

1884    Biografia de Sr. Behoratche kon su ijo Sr. Mochonatche.    1883

 muntcho ala plasa ni ke i se okopava tanto en los etchos ke ejos los tenijan ke lo mas muntcho goadrava su repozo, i en vezes el se iva a el midrach ande era ke estudiavan Hr. Avraam Koen djunto kon i otros de los Hahanim ke avijan en Samokov, seja en la Gemara komo i tambien i en otros estudios, i koando era los tiempos de merkar los Sahtijanes, era a el ke li plazija resivirlos i si estava kon semanas enteras, enbevisiendose en esto, fin ke lo azija azer en balas, i se iva en kada dija a el depozito de esto ande lo lavoravan,

Jo ke en este anio la espozi a mi ija M. Rachel kon Sr. Leon D. Arié. i ke Sr. Behoratche estava en el depozito ditcho en los Sahtijanes i komo Papu ke li era li foe por azerle saver, de el espozorio, i koando si lo dichi, el non mi saludo i jo ke estuve i algo koanto mas en el depozito foe ni ke mi kijo merar ni en la kara i jo ke lo vide ke estuvo jelado foe ke mi sali i sin ke mi dicho nada, i la koza non si supo por koalo foe ni menos ke mas lo izimos kistion ni menos ke mos aklarimos, i en akeja mizma notche ke mos vinieron todos los parientes komo i amigos por saludar i ke uvo muntchos kantes i bailes i kon tchalgis ja foe ke estuvo i el tambien,

Kon la jayla ke ejos tenijan foe en este anio tambien ke li avrieron los djuzgos, sigun ke ja lo eskrivi mas antes de koala manera foe ke si lo konvinieron, solo ke los apretos lis foeron mui grandes i muntchos gastes,

Ejos ke tenijan las butikas en Sofia i ke estavan i tomando muntchas kiras foe ke se detchesaron de merkar tambien i en

1885    Biografia de Sr. Behoratche kon su ijo Sr. Mochonatche.    1883

Nich, ke ja era sigunda kapetala de Serbija i en Kostan ma no lo pudieron merkar por ke non toparon presios konvenivles i el ke ja iva siempre a Sofia era lo todo sovre esto ke estudijavan i mas tadre el estuvo a el presipio en Nich, lo todo por esto ma de nich el partjo por kostan por poder tambien merkar en Kostan i el ke ja avija tratado 2 magazenes, serka de el tonel de la parte de galata, por la suma de 600 liras, i arazon ke presto non lis pudo tomarles el takrir foe ke si vino a Samokov i sin ke mas foe por tomarles, ke de esto ejos si toparon mui kontentes, de loke non merkaron por razon ke poko tiempo pasando seja en Nich komo i tambien i en kostan abacho mui muntcho el mulk, ansi i las kiras, ke por enfrentante foe djusto la kontra en Sofia ke dija kada ivan pujando seja los mulkes komo i tambien i las kiras, i los dasios ke eran mui pokos, era ke en este tiempo non avijan en Sofia bastante seja kazas komo i tambien butikas, porke en el tiempo de el turko los moradores ke avijan en Sofia eran todos de 14 a 15000 i koando ja arivo este tiempo ja uvieron serka 40,000 almas, i la merkansija ke si foe siempre antchandose era a poder de la moneda ke podijan topar seja kazas komo i tambien butikas, ke si una persona enpatronava una kaza de 3 kamaretas ke esto li era el menester, era ke si enkachavan todos en la una kamareta i las 2 las alkelava, i tomava de ejas por kada una a de 600 a 700 fr. de kira a el anio, i si en kavso tenija la ventura ke en la kaza uvieron 2 servisios, era ke el uno lo alkelava para depositos de ropas, i tomava tambien de 300 a 400 fr. de kira, i ansi foe unos 2

1886    Biografia de Sr. Behoratche kon su ijo Sr. Mochonatche.    1883

anios, i mas denpoes ja enpesaron a fragoar, seja kazas komo tambien i magazenes, i ja era ke lo mas muntcho de el poevlo era ke buchkavan para fragoar, i los kostava las fragoas de 200 a 220 fr, el metro, i las bankas ke avijan ke lo mas muntcho era la narodna banka ke soltava moneda por en tal ke la djente fragoaran, i de esto foe ke lo mas muntcho de la djente kaeron devdores, fin a el grado ke no pudieron responder, i foeron uvligados de vender sus mulkes, i valio el metro kon la tiera i todo fin a 50 fr, i ansi foe ke muntcha de la djente si estrueron i muntchos falieron, porke afoera ke non topava el presio de la fragua ke la frago foe i ke pedrio i la tiera i esto lo izieron los unos de fragoar i los otros ke enpatronavan algunos terenos era ke topavan altos presios i los vendijan, i sovre todos los 2 kale dizir ke izieron jeros, kon el ke frago non li konvinija porke non era su moneda, i kon el ke vendjo non reucho en la merkansija i se antcho en los gastes ke non los azija mas antes i se las komijo foe ke salio Sr, Petkov por kmet i alempio i lo deroko la sevdad entera de Sofia, i enpesaron de moevo todos a fragoar,

En el anio de 5644, Sr. Mochonatche si foe a kostan en djuntos kon su ermano el Sr. Azaria, ke por este ultimo ja lo tengo eskrito mas antes ke era el sigundo ermozo de forma entre la Familia Arié ke en su estar en viena en los estudios, ke li afeto,

1887    Biografia de Sr. Behoratche kon su ijo Sr. Mochonatche.    1884

 a ke si topara i el koando si kemo el karlintidor^[70] ke si espanto mui muntcho de esto si hazenio, i era kada dia ke iva endo mas flako, i su maladija era en el estomago, ke non li molija i era lo todo apoder de las purgas ke si porgava, i esto en 4 i 5 dijas una ves, i de esto era siempre mui flako, foe ke el mediko de Samokov ke era en este Tiempo el Sr. Vartan Efendi, lo akonsejo por ke tomara en kada dija a 2 de Tamar-indien ke es komo tchika purga por razon de las purgas ke el las iva tomandolas era ke si li iva mas muntcho aflakandose, el estomago, i esto tambien ke non li aprovetcho, es ke si foeron a Kostan, porke lo meraran i los medikos tambien de kostan i los koalos lo mandaron por las adas sigun ke ja lo eskrivi,

En este tiempo ke ejos estavan en kostan i sus ermana M. Oro, ke estava espozada kon Sr. Refael Baruh de Pazardjik, li izieron la achugar, ke li merkaron muntchas modas de vistidos i tambien las blankerijas, i aparte si merkaron i para todos ejos de mizmo los vistidos, ke lis kosto komo 200 liras i ejos ke estuvieron komo 2 mezes tuvieron de gaste serka 75 liras, i siendo ke non toparon dingun provetcho ejos si vinieron a Samokov,

En este tiempo ke la banka ja lis avrio a kaje lo mas de los merkaderes kreditos i ejos ke lis davan moneda kon entereso mas karo foe ke li enpesaron a pagarle i ansi era ke los ke li tomavan moneda eran estos ke non tenijan el kredito en la banka si entiendo por ke non lo merisijan,

Foe en este anio ke si nomeno la komision, en Sofia,

1888    Biografia de Sr. Behoratche kon su ijo Sr. Mochonatche.    1884

 por ke reglara las deferensias de los tchiflikes, mochijas, de Kiostendil i de i otros lugares, i ejos ke lo tenijan el Balkan de atkoru, en Kiostendil, algun eskrito mas antes ke el koru lo alokedejo^[71] el Gradski sovet de kiostendil, i el lo iva i exploatando, i kon el pasto tambien ke lo alokodijaron las 7 kazas ke avijan i en esto tiempo ja si izieron mas muntchas, i ejos ke non si enteresaron por reklamar sus patronaje, foe ke i la komision tambien non si okopo i sovre el at koro, i ejos mas tadre koando ja lo buchkaron, li dieron solo un deretcho, provezorio en una tchika partida de el pasto, i kon lo restan seja kon el pasto komo i de los lugares ke si sembravan i de el koru, era ke se ivan aprovetchando los kazalinos i el Gradski sovet, i esto foe fin a el anio de 5661 ke iva ansi, i koanto alos dasios, era siempre ke Sr. Behoratche los iva pagandolos seja por i esto ke li revataron komo i tambien por esto ke lo enpatrono, i visto ke non era koza de somportarlo lo izo ke si konvino kon propio los kazalinos, i se lo vendjo por la suma de 5100 fr. kon ke lis tomo solo los 1100 fr. en kontante i por lo restan por koando lis iva a darles el takrir, i por un jero ke izieron parisiendole por boeno de dar una prochenija, a el ministerio, diziendoles ke ejos keren vender al amigavle el lugar ke lis aparto la komision para los kazalinos or ke lo presiaran ejos la suma ke era por deretcho i ke ejos ja ivan a estar kontentes, en kontandoles tambien ke ejos ja si konvinieron kon los kazalinos por el lugar ke lis decharon i se los vindieron por la suna de 5100 fr. sovre ejo li mandaron una kopia de la rezolusia

1889    Biografia de Sr. Behoratche kon su ijo Sr. Mochonatche.    1884

 dada, ala suja prochenia, diziendole ke aparte, ke non es patron de el lugar, ke ja lo enpatronan los kazalinos ke non poede azer i vendita de esto ke si li tiene alesensiado, por ke lo enpatronara, i esto a razon ke sigun la lei de el estado por una tiera ke non si lavora 3 anios, resta komo mahlul^[72] para el governo, sovre ejo i los merkadores ke ja lo supieron esto foe ke li reklamaron i los 1100 fr. ke li avijan dado, i esto kon los enteresos i los gastes, i los krestijanos ke si aderesaron a los advokatos foe ke los akonsejavan por ke si los reklamaran vija de el djuzgo, i ejos lis kalio ke reklamara Sr. Jechua ke era sudito bulgaro, porke Sr, Mochonatche ke es sodito Nemse era ke li kalia lo enkamenara vija de el konsolo i para esto ke los konsolos non si podijan mleskar era, ke ivan buchkando de koala manera enkamenarlo, i de esto, estuvieron mui muntcho sikilijados, visto de loke li revatavan sus bienes,

En el anio de 5645, li nasio, a Sr. Mochonatche un ijo, i lo jamaron Gavriel, i kon el koal de mizmo foe ke se izo sigun de todos los otros los nasidos, i su propia madre lo kudjo i lo aletcho, el tambien en su tchikes foe mui repozado, i koando ja foe mas grande el frekontava las echkolas i era ke todas las klasas las pasava en kada anio, el ke estuvo en la echkola de Samokov fin a el anio de 5660, era la entesion de Su Sr, Padre por ke foera mandado

1890    Biografia de Sr. Behoratche kon su ijo Sr. Mochonatche.    1885

 de la echkola de samokov ala echkola de pariz por ke saliera profesor por sus echkolas, ke ja lo saven ke en paris non tenijan dingun gasto, otro ke era lo todo de la alijansa, ke los enbezavan i los sostenijan, i era ke estavan tambien 3 anios fin ke podijan tomar a sus deplumas, i denpoes ja era ke ejos lo nomenan seja por derektor en alguna de las echkolas or komo adjuan^[73] en las echkolas mas grandes i esto por prima lis pagavan a 1500 i 1800 fr. a el anio, i ansi por endelantre era ke en kada sigundo or treser anio li pojavan su paga, el ke ja estuvo pronto i eskapo la echkola en Samokov i ke ja era i sertenesiente^[74] por poder irse a Paris, foe ke en paris lo izieron lei moeva ke todo elevo ke era pronto por irse a paris li kalija i ke i estuviera i pronto de el Lachon akodech, i Sr. Gavriel ke non estava pronto de esto foe ke lo akonsejo el derektor ke avija en Samokov, M. basad, porke lo mandara ala echkola de filibe ke ja avijan mas mijor Hahamim, i de filibe tambien ja era ke lo i podijan mandarlo a Paris, ke lo izo i esto ma anke ke ja estuvo un anio en filibe foe ke non si pudo prontar ni menos ke i lo kijeron mandar de filibe a Paris porke ja avijan otros mas adelantre ke a el i tambien ke la aliansa non resivija a los elevos ke ja eran poderozos porke ja si podijan ejos sostener, i ansi foe ke si vino a samokov, i kon esto de azer ansi un jero foe ke pedrio, 4 anios atras de sus estudios, i en Samokov entre de moevo ala gemnazia por kontinuar, i koando li demandavamos a Sr. Mochonatche de esto ke lo mando ala echkola de filibe ke todas se kamenavan kon un program, dezija ke su entision era

1891    Biografia de Sr. Behoratche kon su ijo Sr. Mochonatche.    1885

 por ke podiera irse en alguna de las semenarias de la evropa i kon esto ke podiera devinir un dija komo un gran rabino de algun estado, ma non reucho sigun ditcho ke se vino a Samokov,

En este anio foe ke el Sr. Azaria murio i los pasajes ke el los tuvo ja lo foe eskriviendo en unas koantas partidas, i por esto ke su madre la Bu. Dudutcha ke si lo tomo tanto foe ke non estuvo kon su tino, i de esto tambien ja lo eskrivio ke la kavza foe solo esto de la moerte de su tanto kirido Azarija, a eja por los presipios era ke si li avija ketado el esfoenio de las notches, i loke dormija era solo apenas 2 ores, i lo restan de el tiempo seja en las notches komo i tambien i en los dijas era, ke si asentava sola en el un kanton de la kamareta, i estava siempre fumando sigaras, i esto li turo komo a 2 mezes, i denpoes de este tiempo ja foe ke mas ja non durmio de el entodo, i mientres de este tiempo eja era ke avlava sola i en vezes jorava, i tambien i gritava, eja tuvo unos tiempos ke non kijo komer mas, i azija ke si arazgava i se harvava, i mas tadre mas non avlava de el entodo, i koando alguno lo iva de delantre era ke lo merava kon unos ojos mui grandes, eja tambien tuvo un tiempo ke si kirija arazgar la boka, i la iva travando kon sus 2 dedos, i dizija ke la tenija kozida, i ke non li estava kaviendo el bokado, ke iva a komer, i era ke por foersa ke li davan seja a komer komo i tambien i bever, i esto ke se li iva en kada dija mas muntcho enfortesiendose, foeron uvligados, de meterla en koartir aparte, i tuvo un tiempo ke i li ataron las manos por esto ke si kerija arazgar la boka, a eja

1892    Biografia de Sr. Behoratche kon su ijo Sr. Mochonatche.    1885

 le adjuntaron a una mujer por ke la kudijara i ke la gijara, i siempre ja era ke todos sus parientes la vijitavan a unas koantas vezes a el dija, i esto li turo komo un anio, i denpoes de este tiempo seja a foersa de las kuras de los medikos ke ja la vijitavan en kada dija, seja, de esto ke tuvo a mujeres ke la ivan siempre akonsejando foe ke i enpeso a ser en kada dija mas mijor, fin ke eja lo demando porke se kirija irse a su kamareta, i esto ke ja la kontentaron sin tadrar, foe solo ke estuvo mui avregonsada, i non kerija dinguno nada ke li avlara, i ansi foe ke li paso todo i esta agora mui sana i boena, eja konsiente grande kaentura, i en el lugar kaente non poede estar, i sus vistidos ke eja los vistija eran mui delgados mizmo i por el envierno, lo mijor ke tuvo foe ke eja siempre buchkava para estar okopada, i su okopasion era lo mas en los etchos de la kuzina i era eja sola ke gizava lo todo, i lo prontava i tambien kudijava por los menesteres de la kaza entera, eja si levantava mui demaniana, i siempre kon el kargo de los etchos de la kuzina,

Ejos los ombres en este anio non meraron kaje dingun etcho, i los gastes ke ejos los tuvieron tambien lis foeron grandes en el tiempo ke la Bu. Dudutcha estuvo malata era la M. Tamaro ke lo kudijava los etchos de la kaza, foe en este tiempo ke su madre la Bu. Rahel se akechava de esto ke su ija la M. Tamaru ja estava mui kansa

1893    Biografia de Sr. Behoratche kon su ijo Sr. Mochonatche.    1886

En el anio de 5646, Sr. Behoratche la kaza a su ija M. Oro, kon Sr. Refael Josef Baroh ke ja estavan espozados de antes i la achugar tambien ke ja si la tenijan etcho de mas antes, se foe ala boda, Sr, Behoratche komo tambien i la Bu. Dudutcha, anke ke fin a este tiempo tanto boeno non li avija pasado, su maladija, ma ja foe ke si foeron tambien i mi mujer M. Beju kon M. Tamaru por akompaniarla, i la boda la izieron kon muntcho keéf i gusto, i la novija ke ja es boena ermoza, i mui savida, i ke lis jevo tambien i muntcha achugar i 300 polis de kontado, aparte de muntchos i otros prezentes ke li dieron seja el padre komo i tambien i todos los parientes, es ke ja foeron de todas las 2 partes mui bien kontentes, sovre todo de esto ke de parte de el novio foeron mui gustozos sovre ke tomaron novija de moestra Familia, i Beju mi mujer se vino a Samokov en medio de la boda kon su jerno Sr. Leon ke avija abachado de Kostan, i denpoes ke ja si eskapo la boda se vinieron tambien i ejos mui kontentes, ejos si aman i se respektan mui muntcho,

Sr. D. Petkov el Tcholak^[75] ke foe nomenado en este anio por kmet en la sevdad de Sofia, lo primo de loke el lo demando de su konsilio foe por ke si li soltara, una sierta suma djunto kon 2 enjenieros ke el kere vijitar algunas de las sivdades de la evropa, por eskojer un plan para fragoar tambien i la sevdad de sofija komo una kapetala, i esto ke ja li akordado el sin tadrar partio kon los 2 enjenieres i vijito en muntchas de las kapetalas ke de muntchas el si trucho los planes i de ejos foe ke eskojeron una mleskita i enpesaron

1894    Biografia de Sr. Behoratche kon su ijo Sr. Mochonatche.    1886

 a derokar, kaes i plasas enteras, sin ke el sentija las reklamas de dinguno, i lo iva regolijando ke los terenos ke restavan tchikos era ke los iva dandolos a estos ke los tenijan mas grandes i esto el los presijava, i lis kovrava de estos ke lis dava i ansi lis iva i pagandoles a estos ke lo pedrieron el lugar lo todo kon sus boenas i presios, ke anke lis pagava kon boenos presios tambien era ke non lis konvenija porke las kiras ke estavan tomando eran mui grandes, i entre estos derokamientos foe i ke lis derokaron tambien i todas las butikas ke tenija el Sr. Behoratche en Sofia i era el Sr. Mochonatche ke iva kamenando sovre esto, para reglar i era ke por algunos de los lugares era ke tomava la valor i de otros li davan en su lugar otros terenos i esto en otras plasas, i de todo loke el podo tomar de tereno foe todo 280 metros, i esto los 80 metros koadrados en la ulisa tergovska i estos si los vindjo a un sierto Sr. Babiniv, Bulgar por 400 napoliones, ke el koal lo frago este lugar i izo 2 magasenes i ensima kazas en 2 etajes ke li traen komo a 3500 fr. de revenido, i kon los otros 200 metros koadrados li foeron en Vitochka ulisa, i los detuvieron kon la entision de fragoarlo, i por lo restan ke lis tomaron era ke iva kovrando la moneda i esto ke mas tadre ja no pagaron mas en regla sigun de el presipio, es ke i oi tienen de aver ke mas ja non los estan ni buchkandolos por razon ke lis salieron i muntchas defekultades en los reglamientos de antes,

1895    Biografia de Sr. Behoratche kon su ijo Sr. Mochonatche.    1887

En este anio de 5647, ejos non tuvieron dingun repozo seja por esto ke estava ainda malata la Bu. Dudutcha i tambien i esto de los derokamientos de sus bienes de Sofia, i estavan mui muntcho sikilijados, i sovre todo ke el chef de el etcho ke era Sr. Mochonatche era ke estava a lo mas muntcho en Sofia, seja por reglar los kontos de el gradske sovet komo i tambien estava buchkando de kovrar de estos ke el tenija de aver ke lis dava moneda kon entereso lo todo por rekojersin i para fragoar el lugar de la ulisa Vitochka, ejos foe i en este anio ke tuvieron i algunas deferensias entre ejos de familia, ke lo todo kavzava los sikletis, i ke Sr. Mochonatche non lo sintija muntcho alos komandos de su Sr. Padre, i era ke se iva kamenando sigun de loke el lo kerija, ma non li estava reuchendo, por razon ke el patron de todo el bien ke ejos lo enpatronavan era todo de Sr. Behoratche, ejos non si ketavan ala plasa sus deferensias ke las iva tiniendolas kaje en kada dija,

En el anio de 5648, li nasio a Sr. Mochonatche una ija, i la jamaron Hana, ke i kon eja tambien se izo sigun el uzo de todas las paridas, i su madre la kudio i la aletcho i eja de mizmo koando foe grande kontinuo todas las echkolas, i las chastras, i era mui repozada, i kodjo por todos sus parientes,

1896    Biografia de Sr. Behoratche kon su ijo Sr. Mochonatche.    1888

Sr. Behoratche non era de el entodo alegre en este anio, por razon ke a su ijo el Sr. Mochonatche ke li avija dado la prekura, era ni ke lo sentija ni menos ke lo konsederava i muntchas vezes era i ke lo i avregonsava, i mas tambien era ke se iva ainda sikiliando de esto, ke lo vija ke lo iva mui muntcho avregonsandolo a su ijo el tchiko Sr. Jechua, i por enfrentante era ke a su ijo Sr. Ben sijon lo sonalsava, i el sr. Jechua ke si enselava de esto lo azija ke se iva eskondiendose por los kantones, anke ke el gaste en general ja era lo todo en konto de el Sr. Behoratche, i a Sr. Mochonatche parisiendole ke ja lo enpatrono en lo todo, era ke mas non sentija dinguno, i el loke li paresija akejo lo azija, apenas era ke li dava algo de moneda a Sr. Jechua por su menester de gaste, i tambien para el non li dechava ke si iziera vistidos, kon ke li dizija ke tu ti enkanias i estrues muntchos vistidos, i tambien ke non miras ande kaminas i ti enkachas adrientro de los kanios, i ansi mas ditchas de trespajarlo i avregonsarlo, lo koal por enfrentante era ke a su ijo el Sr. Ben Sijon, li dava siempre el karar de paras ke li demandava, i li kortava tambien i muntchos vistidos, ansi de mizmo lo azia i kon su mujer M. Tamara, i por todas las otras sus kreaturas, i de esto ke ja lo vijan todos era ke non tenija el koraje dinguno de avlarle nada es de sujo ke ja si entiende la manera ke lo pasavan,

1897    Biografia de Sr. Behoratche kon su ijo Sr. Mochonatche.    1889

En este anio de 5649, era de mizmo sigun i de los otros anios ke lo ivan pasando las vidas de kaza, i Sr, Behoratche visto lo de Sr. Jechua ke si akechava lo mas muntcho ande la madre, i esto ke ja si lo kontava a su Sr. padre foe ke el al presipio buchko de kazarlo i sigun ke ja lo eskrivi sovre las Vidas de Sr. Jechua enfrente de estas de Sr. Bensijon, i ejos ke si etchavan en una kamareta era grande mizmo i la deferensia i de los letchos de el uno a el otro, i de esto tambien lis salija i deferensias i entre ejos, anke ke estavan en una kamareta, por ke Sr. Jechua si enselava de el Sr. Ben Sijon, fin a el grado de non poderlo somportar ke si detchezo de entosegarse, i el lo izo ke en un dija el si merko el tosego, de la butika de Sr. Nisim jachar, i sin deskuvrirlo a dinguno el si avia aprontado por komerselo en medio de la notche, i el lo izo ke denpoes ke si etcharon todos el si lo metio adebacho de la kavesera, kon esta entision, i se dormio, i antes poko de la medija notche, los vizinos lo sienten batir la poerta, fin a romperla, i apenas ke ja la avrieron, los veén entrar a el Sr, Nisim Jachar kon sus ermanos, i akompanijados de el moso Sr, Josofatche levi ke lo tomaron de su kaza, i todos eran sin kolor en sus karas, i ejos viendolos ansi ja si entiende i el espanto ke i ejos tambien lo tuvieron, i sin alma lis demandaron si era ke Sr. Jechua estava en kaza, i koando ja li dicheron ke en kaza ja estava foe ke repozaron i el Sr. Nisim koriendo si li foe ala kamareta de Sr. Jechua sin avlar, nada i li buchko en las aldokoras i en mas todos los sus eskondedijos i non topando li metio

1898    Biografia de Sr. Behoratche kon su ijo Sr. Mochonatche.    1889

la mano adebacho de la kavesera, ande si lo avija goadrado, i ke ja lo topo foe mui gustozo, ke ja reucho a tomarselo, i el Sr. Jechua komo krejatura i ke estava dormiendo el non sintio nada de esto todo ke li paso, i sin azer mas dingun roido todos si salieron de la kamareta, i enpeso Sr. Nisim a rogarle a Sr. Behoratche por ke li pedronara, sovre el jero ke el lo izo, i sigun el dizir de el Sr. Nisim era ke el ni una de mil non savija ke esto era tosego, i ke non se podija i vender, i foe grasias ke ejos en kaza kon sus ermanos ke estuvieron avlando de sus etchos de la butika, i entre sus avlas lis konto tambien i Sr. Nisim ke i el li vendjo a Sr. Jechua, ansi tosego i esto koando lo sentio sus madre sin detenerlos ni un punto, ke los mando por ke foeran i ke buchken de todas las maneras a tomarselo atras, sigun i ke ja lo izieron, i kon esto es ke kedo sin entosegarse i el, ke ja si esperto para reintchir su entision i non topandole foe mui sikilijado i espantado de esto ke non seja ke lo savrija el padre porke si espantava mui muntcho, ma ja foe ke dinguno non si izo de el savedor, ni menos i ke li avlo, i de esto ke pasaron algunos dijas foe ke sus parientes torna non lo kudijaron, i era ke sin trokamiento de nada lo ivan torna sigun de antes pasandolo, ma el Sr. Jechua ke non lo podija somportar foe ke el de moevo buchko por merkarse ansi tosego ma non pudo topar, i lo izo ke mi eskrivio ami una karta en rogandome porke li avlara a su ermano, a ke non lo foera mas respajando i ke si kompartara i kon el tambien sigun este de Sr. Bensijon kon kavzo kontrario iva aser ke se iva a meter la fin en la vida,

1899    Biografia de Sr. Behoratche kon su ijo Sr. Mochonatche.    1889

 i jo ke meldi la karta lo jami a Sr. Mochonatche, i li konti mui delekadamente algunas kozas sovre la vida de el Sr. Jechua, ma el Sr. Mochonatche me dise, ke non es persona ke si save komportar, i ke el non tiene el menester de los konsejos, de los otros i ke el ja lo save gijar a sus djentes, i siendo ke mi dicho ansi foe ke jo mas non li avli nada, i poko pasando ke Sr. Jechua me vino por saver si era ke li avija avlado, i jo por non meterlos en entregas, lo akonseji ke le iva a azer muntcho mas mijor komo se li aderesava deretchamente ande el Padre, i el ke ja lo izo ansi i ke ejos ja si lo konvinieron i la razon ke lo aparto el padre a Sr. Mochonatche i ke li i tomo atras la prekura ke li avija dado sigun ke ja lo van a medar adelantre foe i esta una de las razones, i a Sr. Mochonatche en este tiempo foe ke se le ivan pujandole sus nervozedades i tambien la dolor en el estomago, ke si goadrava mui muntcho de komer las komidas de masa anke ke li plazijan muntcho,

En este anio de 5650, Sr. Behoratche siendo ke la vista de sus ojos era ke dija kada dija se le iva entchekisiendose, fin a el grado ke apenas estava i podiendo kamenar solo, por ke non estava viendo, i ke lo kijo el kazarlo a su ijo Sr. Jechua, anke ke era mui tchiko, el li topo una novija en lom de Sr. Jaakov B. Avraam la ija M. Aliza, i lo espozo, i el novio se foe a lom por vijitar a su

1900    Biografia de Sr. Behoratche kon su ijo Sr. Mochonatche.    1890

novija, ke esto lo demandaron de parte la novija ejos se kamenaron en lom i denpoes ejos si foeron a vidin i otras deredor sevdades i ke ja estuvieron kontentes de todas las 2 partes ejos si dieron los prezentes de parte a parte, i se vino a samokov,

En este tiempo ke el Sr. Mochonatche iva mas muntcho sufriendo de la dolor en el estomago, i otras ke el tenija era ke se iva muntcho aflakandose, i el si foe a viena por decharse merar de los medikos de viena, i lo mandaron alos banios de Kalt-luigeben ke son serka de viena i de agoas Jeladas, i el ke estuvo komo a 6 semanas foe ke si sano mui boeno i se topo mui kontente, i mientres este tiempo foe ke Sr. Behoratche se korespondejo kon el konsfoegro de Lom demandandole ke kerija azer la boda, i el ke ja estuvo kontente li eskrivio a Sr. Mochonatche por ke si abachare a lom i ke truchera ala novija, sigun ke ja lo izo ansi i ejos ke ja estuvieron prontos para este tiempo si vinieron la novija kon toda su djente a Samokov, mui kontentes i gustozos, i la izieron la boda kon muntcho saltanat, i la novija ke ja es mui ermoza, i mui savida i repozada i konose el nemse, ke su padre la tiene mandado, a las echkolas de Brachov, por ke si enbezara, los komportos i la lingua i muntcha achugar i 100 napoliones de kontado, ke ja trucho i tchalgi boeno ke ja uvo i toda, la familia ke ja estavamos dija i notche, siempre ansi ke se izo una boda mui alegra, ejos si aman mui muntcho de mizmo i eja tambien los respekta a todos los de kaza, ansi de mizmo ke i el novio ja es mui repozado i mui savido, i konose boeno las lingoas seja franses komo

1901    Biografia de Sr. Behoratche kon su ijo Sr. Mochonatche.    1890

i tambien el Bulgar, li plaze muntcho los estudios, i melda, siempre muntchas estorias, el save azer boenas poezijas, non li plaze los pasatiempos de los mansevos, i non si adjunta muntcho a ejos, el es mui akurat para su etcho, es mui plazentero, i non li enporta si gasta, i piedre tiempo para azer plazer aken lo poeda, i non es orgojozo

Kon el tereno ke ejos lo tenijan en Sofia sigun ditcho mas antes este de en la ulisa vitochka ke eran 200 metros foe en este anio tambien ke lo enpesaron a fragoarlo, i lo izieron en el primer etaje, 2 magazenes, i en el sigundo etaje, una kaza kontiniendo 5 kamaretas grandes i kon todos mas los menesteres de una kaza, i en todo el tiempo ke la fragoaron era el S. Mochonatche ke estuvo en Sofia fin ke si eskapo, i gastaron en eja komo 30,000 fr. i esta suma la ivan travandole de los averes ke ejos los tenijan i los revenidos de esta kaza por los presipios foeron de komo 4500 fr. a el anio, i eran kontentes,

En este anio tambien li nasio a Sr. Mochonatche un ijo i lo jamaron Jshak, ke kon el tambien foe de mizmo sigun de siempre por todas las paridas i su madre lo aletcho i lo kudio, i mas de esto non pario mas, otras kreaturas,

En este anio de 5651, foe ke si aparto el Sr. Mochonatche de la kaza de el padre, i se foe en la kaza moestra ke mozos

1902    Biografia de Sr. Behoratche kon su ijo Sr. Mochonatche.    1891

lis avijamos vendido en el mizmo kortijo ke ejos meravan, i esto kon ke la kozina era en la kaza de el padre i ejos se ivan a komer, djuntos en la meza de el padre, ke era solo por durmir, i esto ja lo izieron i mas antes, por koando nasio Sr. Bensijon,

Visto ke Sr. Jechua ja estuvo kazado i ke era mas tchiko de el Sr. Bensijom, foe ke si enpeso a enselarse, i Sr. Mochonatche ke le vija esto lo izo ke si foe el mizmo a filibe, i lo tomo por novija para su ijo el Sr. Bension ala ija de el Sr. Nesimatche Kalev de filibe, M. Regina, i se konvinieron por achugar i kontado en 400 liras, i en este mizmo anio ejos la izieron i la boda, i la boda foe en la kaza, de el Sr. Behoratche, ansi de mizmo i el gaste, ke foe lo todo al konto de su papu ke el non kijo ke gastaran ni su ijo ni su inieto, de mizmo foe i la boda suja sigun esta de el Sr. Jechua, i la novija ke ja es boena i ermoza i savida i konose las linguas franses i el grego, foeron de todas las 2 partes mui kontentes i se aman muntcho, ansi era ke i kon su esfoegra ke bivijan en una kaza las mujeres si pasavan boenas, ke la M. Tamaro la merava mui muntcho i non li dava dingunas kechas por nada i lo azija su esfoegra para ke non uvieran avlas, i ke non seja ke dichera ke para eja non li davan de esto ke si azija en la kaza, era ke mizmo i se azijan dezajunos en kaza era ke li apartava para eja la metad i ansi de todas las otras kozas i ke non seja ke si travava de demandar i se lo dava porke eja lo tuviera, kijendo dizir ke la M. Tamaro si konporto kon su noera kontra de todas las esfoegras, i ansi foe ke si pasaron siempre boenas en todo el tiempo ke estuvieron djuntas,

1903    Biografia de Sr. Behoratche kon su ijo Sr. Mochonatche.    1891

 Visto ke todos los 2 moevos kazados i mui mansevos, i ke non tenijan en koalo enbecesersen entre los dijas foe ke Sr. Behoratche los metio en el Midrach, moestro ke ja era en su kaza, i ke meldaran kon Hr. Avraam Koen ke el koal era el Rabino de la sevdad, i ke ja estava siempre en el midrach, meldando kon i otros de los Hahanim ke avijana en Samokov, i era ke estudijavan en la gemara i ejos i tomavan liksiones aparte i Sr. Behoratche era ke en kada notche lis azija repetijar sus liksiones i esto ke non lo entendijan era ke si lis deklarava el porke el ja savija boeno meldar, i en este tiempo era ke los 2 mansevos si pasavan mui boenos, i estavan siempre gostozos i alegres,

Sigun ditcho mas antes ke la vista ja la tuve mui kurta i foe en este tiempo ke se li sero por entero i estuvo 8 mezes sin poder ver ni a kamenar solo i era su ija la tchika M. Estreja ke lo kudiava, por todos los puntos i eja li dava fin a el bokado ala boka, ke todos los medikos ke avijan de esto en Samokov ja foe ke todos lo meravan i lo dizijan ke tiene el perde i esto li kalia ke pasara algun tiempo fin ke si li engodresija el perde i entonses era ke si lo ivan a poder kortarselo, i esto ke ja si li engodresio presto le izo ke lo mando a Kostan a Sr. Mochonatche porke li merara a un mediko ke konosija esto de los perdes i el ke ja estuvo en kostan topo a un mediko ke li asiguro de poder azer esta operasion, i a esta prometa el si foe tambien a Kostan i le izo la operasion ke estuvo komo a 2 mezes i se sano mui boeno i se vino a Samokov mui kontente

1904    Biografia de Sr. Behoratche kon su ijo Sr. Mochonatche.    1891

i mui gustozo i era ke via sigun de antes solo ke li kalija ke kamenara siempre kon antojos, porke non li diera los ayres,

En el anio de 5652, Sr. Behoratche la kazo a su ija la tchika M. Estreja, kon Sr. Nesim Hananel, de pazardjik, a eja tambien li djo muntcha achugar i 180 napoliones de kontado izieron la boda kon muntcho kef i alegrija i la novija ke ja es moi ermoza i mui savida i repozada, foeron de todas las 2 partes mui kontentes, i ejos si amavan mui muntcho ansi i eja tambien era ke los respektava a todos los de la kaza, ejos eran en la mas mijor pozision i uno de las primeras firmas notavles de Pazardjik, ma siendo ke el esfoegro foe una persona mui bonatcha i los jernos ke tuvo ke lo ivan exploatando i los etchos ke non li kamenaron tanto boenos era ke el Sr. Nesimatche, lo iva enkamenandolo ma non pudo reucheir de esto ke li foeron sus konijados lo todo kon los djuzgos i de esto el ke non lo pudo somportarlo foe ke si entekejo i fin ke murio i resto tambien i devdor, es ansi ke deskaeron i eja pario un ijo kon 2 ijas i sufren por sus pasadijas, anke ke ja la ajudan sus ermanos ma eja ja lo somporta kon muntcha pasensia, fin ke sus ijos si engrandesen,

En este anio li nasio a Sr. Jechua un ijo i lo jamaron Azaria (adolf) ke foe alegrija mui grande, i vinieron el padre kon la madre de la parida de lom para el parto i se kontentaron mientres de

1905    Biografia de Sr. Behoratche kon su ijo Sr. Mochonatche.    1892

los 8 dijas ke la parida estuvo en la kama ansi i en el dija de el Birkad-mila, i en este tiempo ke el Sr. Jaakov estuvo en samokov el se entereso tambien i por el avenir de su jerno, i era ke lo iva akonsejandolo sigun de loke si devija komportar enfrente de su ermano el Sr. Mochonatche adetras de algunos de los pasajes ke li kontarija su jerno el Sr. Jechua i el Sr. Jaakov ke non kijo aderesarse ande Sr. Mochonatche lo izo ke si li adereso deretchamente ande el Sr. Behoratche su konsfoegro, en kontandole algunos pasajes ke li pasavan entre los ermanos, i ke Sr. Jechua komo mas mansevo era ke non lo estava podiendolo somportar, i el ke ja estava al koriente de lo todo li vino mui pezgado de esto ke si li eskruvio, ande su esfoegro ma non li avlo nada otro, ke li dicho komo su ijo el ja lo kudija, i li goadra los enteresos de su ijo, ke esto ja li foe mui bastante para el Sr. Jaakov, i denpoes ke estuvieron algunos i otros unos koantos dijas ejos partieron por Lom mui kontentes de su vijita,

Pasando algo de tiempo foe ke Sr. Jechua topo la okazion de kontarle a su padre, kaje todos los pasajes ke el enkontrava kon su ermano, i de esto tambien era ke si sikilijava mui muntcho el padre, ma ja li prometio, i lo asiguro, en diziendole por ke tuviera ainda algun tiempo de pasensia, i ke el ja lo tiene de kudijarlo muntcho mas mijor de loke lo poede esperarlo, i de esto foe mui gustozo el Sr. Jechua i se salio de delantre de su padre,

Foe de mizmo ke i en este anio li nasio tambien i a Sr. Bensijon un ijo i lo jamaron Michael, i vinieron Sr. Nesimatche

1906    Biografia de Sr. Behoratche kon su ijo Sr. Mochonatche.    1892

Kalev de Filibe i su mujer ke ja estava de mas antes, i se gustaron todos i lo izieron komo una boda, sigun el uzo de en todas las paridas ke ja lo saven, solo ke el Sr. Nesimatche non si foe tanto kontente, arazon ke su ija la parida, M. Rejina, si li akecho ande su padre enfrente seja de su esfoegra komo i de i su esfoegro, lo koal ke non podija tener razon de nada, porke todos ja lo savemos mui bien ke la meravan mas muntcho de esto ke lo meresija, sovre todo ke ja era ke el Sr. Bensijon, ja la akavedava muntcho bien a su madre por ke non foera ke li avlara nada ni ke merara si non ajudava en los etchos de la kaza, i la M. Tamarutcha ke si espantava mui muntcho de su ijo Bensijon porke lo amava mas de muntcho, era ansi ke non tenia por ande akecharse,

En el anio de 5653, kon los magazenes ke ejos los tenijan en filibe, i a razon de unos teretemblos ke uvieron en filibe ke si avijan tchatladijado i ke estavan serados i esta kalija en este anio ke la regolejaron de el gradski sovet foe ke lis derokaron tambien i estos magazenes, i ke i lis kalija los fragoaran, foe ke lo mandaron a sus konfedente moso el Sr, Josefatche, por ke los fragoara sigun de el plan ke ja lis dieron de el gradske sovet, foe ke si metieron en la fragoa, i los izieron en 2 magazenes, i gastaron komo a 10,000 fr. i foeron boenos etchos i toman un vinid fr. 1000 fr.

1907    Biografia de Sr. Behoratche kon su ijo Sr. Mochonatche.    1893

En este anio ke el Sr. Mochonatche non estava de akordo kon el padre i ke i ivan tiniendo algunas deferensias i el Sr. Jechua tambien ke lo iva kiriendo de su padre por ke lo mitiera en algun etcho era ke non si estavan konviniendo, i arazon de esto era i ke non estavan o merando mas dingun etcho era solo ke siempre ivan rekojendo sus averes, ke Sr. Mochonatche non si pasava de el entodo boeno kon el Sr. Jechua, i a razon de esto era ke ejos ivan tiniendo adjuntas entre ejos i azijan modos de planes, ke konforme ala prekura ke tenija Sr. Mochonatche de el anio de 5640 era ke eran Haverim el Sr. Behoratche kon sus 2 ijos Sres Mochonatche i Azaria, i koanto a el Sr, Jechua era ke non tenija nada, i lo kerija ke estuviera enteramente de afoera, atiempo ke non tenija dinguna razon el Sr. Mochonatche i ansi era ke estavan sin repozo, ma ja foe ke este non lo deskovrieron a dinguno fin ke li kalio a Sr. Behoratche en una ravia ketarlo a Sr. Mochonatche i tomarle en mizmo tiempo la prikura, i kon esto ejos ke si meraron konto si lo konvinieron entre ejos,

En el anio de 5654, foe ke Sr. Behoratche lo aparto a Sr. Mochonatche, de anlado de si kon ke si lo konvinieron entre ejos, kon tomarle atras la prekura ditcha, i li djo solo esto ke li revino de las ganansias, en el tiempo ke lavoraron djuntos en moneda sonante, aun kon todo ke non le se siguro ma por tener una edeja, es

1908    Biografia de Sr. Behoratche kon su ijo Sr. Mochonatche.    1894

ke jo una ves ke vinimos en abla kon Sr. Mairutcho Alkalai, por esta espartision, arazon de las avlas ke uvieron entre los krestijanos Tchorbadjis, ke Sr. Behoratche lo kovaleo a Sr. Mochonatche su ijo i de kaza i de la butika i esto siendo ke non konviene a ke si diga por la familia Arie, i saviendo ke el ditcho Sr. Mairutcho kon Sr. Chimon Echkenazi foeron los edim ke si afirmaron en el kontrato de la espartision, i me dicho ke era una suma de 700 liras, ke tomo en moneda i aparte li djo la metad de la kaza, ande morava ke es la kaza moestra, i una butika en el tcharchi de los fruteros, i tambien li djo i un tersio, de parte en la kaza kon los magazenes ke tienen en Sofia foe de esta manera ke si lo konvinieron i se aparto Sr. Mochonatche de su padre de todos los puntos,

1909

Asta aki si eskapa la partida mientres el

tiempo ke estuvo Sr. Mochonatche kon la prekura ke

li djo su padre en el anio de 5640