סניור ניסימצ'ה אליהו אריה

781

 De aki i endelantre si enpesan las partidas

de S-r. Nisim Elijau Arie i de sus IJOS

enpesando de el anio de 5623,

782                                    Biografia de S-r. Nesimatche Elijau Arie.                              1863

            En el anio de 5623, sigun eskrito de mas antes ke el ja estuvo kasado i ke estava tambien en la kasa de su esfoegro ke tenijan kondision de estarse komo mesa franka el tiempo de 3 anios i aun kon todo ke el ja era mui bien visto de todos los de kasa i ke devija de estar otro un anio ainda ma el non pudo somportarlo este, i ansi era ke el koando vinija en kasa era ke si iva deretcho en su kamareta, i si estava solo mismo, ke lo jamavan el non si lis adjuntava ande era ke todos estavan i ansi era ke koando ivan a asentarsen a la mesa lo jamavan para komer i el vinija, i koando eskapavan era ke de moevo se iva a su kamareta i el ke ja savija boeno meldar ke estudio kon Hr. Avraam Koen en la Gemara muntchos anios su pasatiempo era lo todo kon los livros de los estudios, i este li era su plaser ke de esto a toda la djente de la kasa lis enportava ma non lo apretavan i lo dechavan sigun su plaser,

            En este anio li nasio un IJO ke si gusto muntcho i kon la parida lo isieron muntcho saltanat, en todos los puntos, i la sivdad entera la vijitaron, ansi ke toda la familija sigun ke ja lo tengo eskrito tambien si lis foeron a komer kon las komidas i de mismo en el dija de el Birkad mila lo isieron kon jamar muntcha djente a komer i lo jamaron Behor Gavriel, ke su madre lo krio i lo kudio, i eja lo Bu. Jael ke era mui kichta de sus parientes sovre todo de su Padra ke la amava muntcho era ke la kudijavan mas de muntcho, i siempre su padre li dava muntchos presentes, ansi tambien

783                                  Biografia de S-r. Nesimatche Elijau Arie.                                   1863

i sus ermanos, eja si pasava boena kon sus konijadas, i ansi kon todos los de kasa,

            S-r. Nesimatche ke estava sin dingun etcho, i ke el ja estava enfastijado de estarse en vasio, porke el era lo mas muntcho ke lo pasava en el midrach, estudijando, i se topo a un haver, ke era S-r. Mochonatche levi ke el koal ja era merkader en la malifaktura, i kon un sierto kapetal ke li metio de la suma de paras ke el ja tenija de el kontado i algo ke li adjusto su esfoegro, i se asento tambien i el en esta botika ke ja estava S-r. Mochonatche, i lo engrandisieron el etcho mas muntcho, i de el presipio, ja tuvieron bastante de boeno el etcho, i S-r. Nesimatche si gustava, ke ja iva a montchiguar, su furtuna porke gaste de nada non tenija a rason ke estava ande su esfoegro i todos si gustavan sovre esto ke kijo lavorar, porke a el non li disijan nada porke si enbivisiera en algun etcho ke non abastava solo kon meldar, ma el ke tenija mui grande sevda en los estudios, era ke siempre koando tenija tiempo libero el si iva a el midrach, ke en estos tiempos tambien el lo iso de mirikija de enbesarse la CHEHITA, ke esto lo exirsio i se iso traer kotchios i esmoladeras de viena i en un kurto tiempo el si la enbeso i tomo la depluma (SEMAHA) sirviendole komo a un Chohet, i el muntchas veses degojava gainas i los kodreros, ke para los boejes i otras beémod grandes por el presipio non tuvo la lesensija, ke i esto tambien mas tadre ja la tomo, el era una persona ke non avlava muntcho porke su nature era esto solo de sintir, i a tanto ke li

784                                      Biografia de S-r. Nesimatche Elijau Arie.                                        1863

porfijavan porke i el tambien avlara en las konversasiones ke las tenijan koando si adjuntavan la familija, i ke tambien era mui reposado seja para el avlar komo tambien i para todo modo de otras kosas, i sovre esto ke non avlava era ke mui reposadamente lis desija ke jo tengo poka avlada^[25], i el Dio ke mi djo ami ansi poko es ke mi kale i jo tambien reservarme para la vejes, vosotros lo kerech, ke agora lo avle todo amostrame aver de ande es ke jo vo a poder enpatronarme para denpoes, avla para podermi sirvir, era kon ansi repoesta ke si defindija, en ser ke su nature era esto,

            En el anio de 5624, ke era de mismo kontinuando en la butika kon S-r. Mochonatche Levi, i ejos ke si kijeron merar un bilanso ke koando ja lo isieron esto lo vido ke non tuvieron dingun profito i ansi foe ke mas non kijo kontinuar, i lo iso ke si la decho la butika entera a S-r. Mochonatche, i esto de kapetal ke el lo tenija si konvinieron por unos siertos mas largos tiempos a pagarselo en ratas, ke i esto tambien a los kavos non li pudo kovrar porke i el tambien non tuvo profitos ke i esto de moevo si lo konvinieron, kon ke li iso otros rebatos, i de esto foe ke kedo sin dingun etcho, ise iva de moevo a el midrach.

            El ke ja estava ande su esfoegro i ke dainda ja tinija tiempo por estarse ke los 3 anios non li avijan ainda arivado

785                                      Biografia de S-r. Nesimatche Elijau Arie.                                        1864

i siendo ke ja estava enfasijado de estarse en kasas de la djente i el ke era tanto travado i en kasa la Bu. Jael tambien ke tuvo algunas deferensijas kon sus konijadas, pensandose ke sirija mas mijor de salirse antes de el tiempo ke li era fiksado, lo iso ke si merko una kasa ke es la kasa ke mora oi S-r. Rahamim Aron Koen, i mi parese ke la merko por 5000 groches, kon ke li djo una sierta suma de adelantado, i lo restan por unos siertos tiempos ke i esto mas tadre los pago seja kon ke li djo i la Bu. Jael algo i de su esfoegro i de su padre tambien ke lo ajudaron foe enteramente patron i el li iso una tchika reparasion i se paso en eja, ke mas tadre tambien si frago en esta kasa una otra kamareta ke merava a la plasa, el la mobelio, de todo djusto i bivieron mui kontentes todo tiempo ke el estuvo en Samokov, koando si paso a el lo vijitaron todos sus parierates i li jevaron kada uno un presente i aparte lo vijitaron todos sus amigos, solo ke arason de esta merkida el ja estuvo muntcho en manko de su kapetal i ansi, era ke non si podija aferar en dingun etcho i sovre esta merkida su esfoegro non lo akonsejava en nada por algunas rasones i tambien por ke non si sikilijara ke koando se iva a salir solo li dicho ke si es ke lo kerija ke si estuviera anke ke arivaran los 3 anios, i la kasa ke la alkelara, para ke ainda non entrara en gastes, ma el non lo kijo i solo ke si lo rengrasio por esto de tanto tiempo ke estuvo en su kasa i se es ke arija algunas mankuras porke si lo pedronara, i li beso la mano seja de su esfoegro i su esfoegra i sus konijados i konijadas i se foeron gustosos,

786                                      Biografia de S-r. Nesimatche Elijau Arie.                                        1864

            En este anio ke kasi jo Tchelebi i sigun el uso de akel tiempo ke era ke si asija para el Novio tambien banio ofisijal i esto kon muntcho saltanat, i era solo en la notche de alhad ke lo asijan i era tambien ke konbedavan a todos los parientes mansevos i a los amigos i esto aparte de los mansevos ke ainda non eran kasados konbedavan tambien i a los ke eran de serka kasados, i para esto tambien era ke si nomenava a uno de los mansevos kasados komo berber para el novio por el banio, i para esto foe S-r. Nesimatche ke reintcho esta mision, ke el koal ja lo savija aserlo esto de el berberlik, i para el si li dava presentes de parte de la novija, i aparte de el novio, i esto era unos sikretos konvinientes para la parte de la novija, lo koal ke agora non los enplejan estos, i se aderesen ande los medikos,

            En el anio de 5625, a S-r. Nesimatche li nasio un sigundo IJO ke kon el koal tambien lo isieron sigun de i el otro i lo jamaron ELIJAU, al nombre de su Papu, i de mismo su madre lo krio i lo kudio i en este anio foe ke si isieron haverim los 2 ermanos, i avrieron de moevo una butika por malifaktura, i de la manera koala avrieron lo todo en mas largo ja lo eskrivi en la partida de S-r. Behoratche su ermano en este anio, i ejos ke ja eran bien aunados lo enkamenavan el etcho mui bien, i ejos tenijan kortadamente la suma

787                                      Biografia de S-r. Nesimatche Elijau Arie.                                        1865

ke devijan de resivir por sus menester de sus gastes ja era ke no travavan demasia lo todo buchkando para poder reuchir.

            En este anio ke ejos ja estuvieron bien resentados en sus kasa, foeron mui kontentes, la Bu. Jael ke ja era mui ikonomosa i mui meradera de la kasa sovre todo tambien ke eja era i goadradera de la kasa ke non li plasia muntcho vijitar, eja kudijava muntcho por sus kriaturas, i a su marido lo respektava tambien muntcho era ansi ke bivijan kontentes, ejos koando tenian el menester de akonsejamientos era solo entre el marido kon la mujer ke si akonsejavan i la resulusia ke ejos tomavan era akejo ke, lo reentchijan, S-r. Nesimatche, kudiava muntcho por su S-ra Madre, el la vijitava siempre, i los 15 groches ke si avia resivido para darle era el mismo en kada semana ke si los jevava, el era una persona mui neotral ke non si mleskava a saver por los etchos de la djente, su karakter era mui maho, i mui reposado, el kamenava siempre pensativle, i se kontentava kon la suja parte, su natura era flaka i non era fursudo, kamenava mui reposado i su vistido era al presipio chalvar i mas tadre de pantalon i palto non podija viajar a kavajo, el tambien non se podija sirvir de las armas, sigun de todo los otros de la Familia en general, ande su esfoegro, por los presipios ke el ke si avia salido de su kasa ja los vijitava ma mas tadre el lis iva mui ralo ke sovre esto li davan kechas era su esfoegra ke los vijitava kaje siempre, i esto era para enbesarla a la Bu. Jael sigun devija de konportarse, ke esto konosia

788                                      Biografia de S-r. Nesimatche Elijau Arie.                                        1865

mas de muntcho su esfoegra, de saver jevar el guijamiento de una kasa, i la Bu. Jael era ke la sentija,

            En el anio de 5626, sigun eskrito antes ke los 2 ermanos eran haverim en la butika ke lis avrieron sus esfoegros ke ala vista ja era, ke lis iva endo sus etchos adelantre i atanto ke ejos ke penavan tanto i ke asian tanta ikonomia foe ke ejos aparte ke none tuvieron nada de profita, ejos ja estuvieron i en una boena suma en manko, i ansi ke estavan mui muntcho sikilijados fin a ke lis kalio ke seraran la butika ke esto ja lo eskrivi en mas largo en la partida de su ermano en este anio sigun de loke lo isieron i esto ejos lo toparon entre ejos ke poede ser una de las rasones ke en este anio kaso sus ermano el tchiko S-r. Refael, i lis kalio ke ejos lo ajudaran, porke S-r. Refael tambien non tenija, i kontado ke non tomo, foe ke tuvieron i kon el algo de gaste, ma esto non si poedija taksar por rason ke non es kosa grande,

            En este anio ke la S-ra Rahelutcha mujer de S-r. Naimatche ke pario a la Elisa, i la Bu. Jael tambien ke estava preniada i entrada en los meses seja ke iva endo mas muntcho ande la parida or seja ke en este tiempo eja tuvo algunas kechas mas puntchonosas de su marido, i komo en algunas notches eja tambien dormija en la kasa de la parida, foe ke pario tambien i eja en la kasa de la madre

789                                      Biografia de S-r. Nesimatche Elijau Arie.                                        1866

I li isieron tambien i a eja una kama aparte i la vijitavan tambien i a eja aparte i de mismo li mandaron todos los platos i los presentes de parida ke si usavan a mandarsen, i en el dija de el Chabad ke ja estavan la Familia entera a komer i ke era el dija ke las fadavan a las ijas, foe ke las fadaron a todas las 2 i la jamaron ORO, i denpoes de esto ke ja si levanto de la kama i ke ja pasaron unos koantos dijas ke la parida ja foe sana i boena, si foe en su kasa, es esta la S-ra Orutcha ke kaso kon S-r. Nisim Josef avdala jachar, i biven mui kontentes i su marido es la mijor posision ke su negosio es Bankerlik i enpatrona kasa i butikas, eja pario IJOS i IJAS, i siendo ke la butika ja estuvo serada era ke S-r Nesimatche estava sin dingun etcho i de esto se iva muntcho sikiliando i se iva a el midrach para melder i kon esto lo iva pasando,

            En el anio de 5627, li nasio tambien la sigunda IJA en su kasa propia, i kon eja lo isieron de mismo sigun todos los paridas i su esfoegra madre de la parida estuvo siempre todo tiempo ke la parida estuvo en la kama i era eja ke si asija traer mas muntcho de todos los menesteres de su kasa para vinirle en la ajuda para el gaste porke S-r. Nesimetche non podija gastar porke non tenija, i la jamaron ROSA, i su madre la kodio i la aletcho, ke es esta la Rosa ke kaso kon S-r. Tchelebon Madjar de Sofia i biven mui

790                                      Biografia de S-r. Nesimatche Elijau Arie.                                        1867

kontentes i de todas las 2 parte tambien son kontentes, eja pario IJos i IJas, i su marido enpatrona muntcho bien seja en moneda komo tambien i en muntcho mulk, sovre todo denpoes ke ja kaso el ainda si iso muntcho mas riko, solo ke mas tadre el foe atakado algo de la maladija de la tuberkolosa i ansi es ke i eja tambien foe atakada i de mismo i algunos de sus kriaturas i ejos son uvligados de irsen en los lugares lechanos i mui kaentes los unos si van por el enverano i los otros por el envierno i es kon esto ke ejos lo van pasando, i agora adetras de loke ejos foeron tanto kurarsen, es ke agora son todos ejos mui bien sanos i boenos,

            S-r. Nesimatche sigun ditcho ke en este anio ejos ainda non si lis avia reglado de sus butika ansi era ke estava sin dingun etcho, i ansi era ke estava sufriendo por el menester de el sujo mantinimiento, i ansi era ke lo regalava siempre su esfoegro i tambien sus konijados, i la ikonomija ke ejos la asijan en kasa ja era la mas grande ke podija ser, i lo todo era por vija de la Bu. jael ke la regalavan porke eja si akechava dekontino ande el Padre,

            En el anio de 5628, a S-r. Nesimatche li nasio otra una IJA, ke de mismo lo isieron i kon eja sigun todas las otras i la jamaron REGINA, ke ala koala tambien en su tiempo la kasaron kon S-r. Josef Alkalai de Sofia, i biven mui kontentes ke eja pario IJOS

791                                      Biografia de S-r. Nesimatche Elijau Arie.                                        1868

I IJAS, solo ke fin ke la dita esto eskriviendo, su posision non es de el entodo boena i es sus konijados ke lo sostienen, kon ke li dan una semanada regular, ke penador ja es ma aslaha non tiene,

            S-r. Nesimatche, seja de loke si iva sikilijando, or seja ke era mui flako i tambien ke estava i sin dingun etcho li vino un dolor de petcho, i de esto li enpeso i a doler tambien i la t teta, ke esto ja lo tenija i la madre, i ansi foe ke de esto sufrio longo tiempo, i anke ke li pasava, era ke de poka kosa ja si li renovava, i esto lo tuvo en toda su vida, ke por el presipio sufrio de la una teta, ke mas tadre el tovo tambien en todas las 2 tetas, i li kalija ke si estuviera etchado en kasa unos koantos dijas, sigun ke ja lo eskrivi i en la partida de su ermano S-r. Behoratche porke i el tambien sufria de esta maladija de la dolor de la teta, foe en un dija ke un dija ke las 2 konijadas ke es mi ermana la grande S-ra Behurutcha, ke estuvieron en un luger i ejas akechandosen de la una a la otra, sus males ke kaje ja eran igual, en esto, i ke ja estavan enfastijadas de sus vidas, ke en mismo tiempo tambien i joravan i la Bu. Jael ke ja era mas kurajosa, ke por boltar las avlas i para reirsen li konto ke su S-ra madre entre las kosas ke li mandava i en alguna ves, era ke rekojija el bogo de la mesa i sigun de loke estava era ke si lo mandava a su kasa i eja koando lo avrija, topava arientro las kavesas de los eskumbris, i los korasones, de las mansanas, i ansi otras kosas de esta manera, i sin disirlo a dinguna lo rekojija de moevo sigun estava i lo etchava eja a el rio, i kon esto

792                                      Biografia de S-r. Nesimatche Elijau Arie.                                        1868

era ke lo pasavan i esto era los sujos konsfoelos [konsuelos], ke esto non era kulpa de dinguno, ke esto keda para disir solo i solo masal,

            Eja la Bu. Jael, ke ja lo vija a su marido en el grado ke estava, i sin nada disirle a el eja si li iva ande el Padre i muntchas veses si aravijava ande el Padre, por la vida suja i dike es ke non keri merar, un molde para i ejos bivir en este mundo, esto lo tomava el padre en mano ke aparte ke los kontentava en esta okasion era ke non tadrava, de kudijar por ejos, i en este tiempo la mando a jamar a su jerno, i kon dulses avlas ke el li avlava, lo akonsejava, i li dicho porke si buchkara algun etcho ke el lo kiria i el menester de moneda ke si kerla ke li demandara ke el ja li iva a dar i kon esto si salija mas konsoloso,

            En el anio de 5629, S-r. Nesimatche lo topo de mijor torna de avrirse una butika i vender algudones filados, ke era un artikolo ke si vendija solo en kontante, i la mas grande vendita las asija a las kristijanas, ke esto li iva boeno kamenando i a esta okasion el si adjunto tambien i lanas, ke i esto tambien merkavan las Kristijanas, para aser el chajak, i mas tadre el enpeso i a merkarles el chajak koando non lo podijan venderlo tanto presto, ke si entiende ke si los merkava kon unos presios mas konvenivles, i esto lo vendija en la makedonija, ke ja tenija sus amigos ande los

793                                      Biografia de S-r. Nesimatche Elijau Arie.                                        1869

mandava, i ainda mas tadre ke esto li estuvo boeno kamenandole i ke ganava mas mijor de los otros artikolos ke el vindija, lo iso ke enpeso tambien i a darles lanas a las kristijanas ke li lavoraran el chajak por su konto, ke esto lo engrandisio muntcho i a esta rason ke el solo non alkansava, para vijitar a todas las kristijanas el si lo tomo kon si a su ermano mas tchiko S-r. Refael kon una sierta mesada para ke lis foera rekojendo los chajakes ke ja eran prontos i S-r. Refael ke kaje ja konosija en el varoch, a lo mas de las kristijanas de koando el kamenava el varoch kon su tabla, era ke estava siempre rekojendolos chajakes prontos i de moevo jevandoles i la ke tenija el menester, de lanas seja por venderles or seja por sus kontos, ke kon esto el era mui kontente, i sovre ke estava tambien i okupado, era ke estava tambien i sano i non tenija en este tiempo el dolor de la teta, (es por esto ke kale la persona ke kale este siempre okupado, para ke este sana i non komo disen algunos, ke si ja tiente su pasadija ke si este reposando, i ke non lavore mas, i algunos la avergoensan komo lavora ke este agora ja se iso viejo, i el DIO ke ja lo engrasio, seja kon IJOS or seja kon bien sigun los unos si van de estas edejas, i la persona ke ja lo van avregonsando i el si trava i se va en kasa, i enpesa a sintirse las dolores de estar reposando, i kon esta es ke en kurto tiempo ansi una persona, ke ja tiene la foersa para lavorar i ke non lo dechan es ke li kavsan la moerte, i se moere, lo koal ke non deve ser ansi kada persona deve de lavorar, koando poede i poede bivir mas muntcho, i es mas

794                                      Biografia de S-r. Nesimatche Elijau Arie.                                        1869

Sano). la butika ke el si avija tomado foe en la abachada de el jekuch, de las kasapanas viejas, ke era de el Bairaktar,^[26] i denpoes ke estuvo algo de tiempo el si la merko a mulk, i a rason ke era en un lugar mas eskondido, era ke lo vijitavan tambien i las Turkas ke goadran el Harem, ke i kon ejas tambien asija ke lis vindija i lis dava tambien i algudones para ke li ticheran jensos ke i esto era, un negosio serka de este de el chajak, ke en esta botika estuvo todo tiempo ke la iso esta merkansija, i mas tadre ke el si foe a Vakarel tambien la enpatronava i estava serada i koando se iso el plan esta botika si li foe entera a el plan para la ulisa, i li pagaron mui poko, solo ke el matirijal foe sujo ke lo rekojo su ermano S-r. Refael i partida lo vendjo i partida lo komo [kemo],

            En el anio de 5630, era de mismo kontinuando en Su butika, i kon los mismos artikolos, solo ke lo tuvo mas grande, i el enpeso tambien i afrekontar las ferijas, ke sigun ja lo tengo eskrito ke los prevalimientos ke los asijan en akel tiempo en Samokov eran ke merkavan fieros por unos tiempos mas largos i kon algun tchiko rebato ke lo vendijan era ke si aprovetchavan de la moneda, i entre las merkidas de ansi fieros ke el los merkava, era tambien ke li merkava i de su konijado Tchelebi Avraam, i li era mas konvenivle de aserli los pagamientos a 20 midjidies a la semana ke esto

795                                      Biografia de S-r. Nesimatche Elijau Arie.                                        1870

otros vindidores non li asijan i la suma ke li dava tambien non era poka ke sovija fin a 20,000 groches la suma ke li dava, a fijado ke i el tambien asija los pagamientos en mui regula, i esto lo iso tambien i en los tiempos ke non avijan ferijas, i ansi era ke siempre ja estuvo en antcho de monda, i S-r. Refael era de mismo en el Varoch, i todos los 2 ermanos ke ja eran mui aunados i se sintijan por el etcho de el uno a el otro, ke eran mui aunados, i lavoradores fin a el ultimo grado, sin kansarsen, en kasa el non asija grandes gastes ke siempre foe reservado i goadrador de la ikonomija, su S-ra madre era mui gustosa ke lo vija kon etcho i ke ja estava sano ansi i por su IJO el tchiko S-r. Refael, i ke ja estava tambien resiviendo los 15 groches ke si avija uvligado a darle, porke de otro lugar eja non tenija de ande tomar, en este anio ke ja konosio bien a sus klientes foe ke lis enpeso i a darles tambien i algo ropa a kredit, ke esto era su ermano S-r. Refael ke lo enkorajava mas muntcho, i el era ke asija tambien i los kovramientos,

            En el anio de 5631, sovre los prevalimientos ke el los asija de los fieros i siendo ke en este anio la vendita de fieros foe muntcho mas flaka ke de otros anios i ansi ke i kon los presios tambien foeron muntcho mas baratos, i sus konijados los IJOS de Tchilibi Jeuda, sovre esto ke de ejos non lis merkava, lo jamaron

796                                      Biografia de S-r. Nesimatche Elijau Arie.                                        1871

en un dija por darli kechas sovre este ke de ejos non lis merkava ke i ejos tambien li poeden aserli ainda mas mijores kondisiones, i en luger de pagar a 20 midjidijes a la semana ejos si lo poeden aserselo kon ke lis pagara solo a 15 midjidies, i S-r. Nesimatche si los rengrasio por esto solo ke para este anio non va a poder merkarles de ejos por rason ke ja estava angajado kon los otros, ma ja tiene de merar si es ke topava algunos muchteris, ja lis iva a tomar, tambien i de ejos,

            En esta anijada para las merkansijas sujas foeron mas kurtas i ansi foe ke si li avija rekojido una mas grande partida de los sujos artikolos, i de esta li foe algo de apreto ke esto li kavso mas muntcho, esto ke djo a fijado i se kargo mas muntcho en merkidas de las sus ropas, i de esto li vino tambien i a tener mas grandes devdas, ke sovre esto li djo kechas a su ermano, ke kijo, aser venditas a kredit, ma en esto non tuvo dingun danio, ke lo todo lo kovrava, sin ke li batio ni un santim, i de esto ke tuvo mas grande partida de chajakis i jensos, el si jevo kon si una boena partida, por las sivdades de la mekedonija, ke aparte ke el ja las vendjo tuvo tambien ke tuvo entrivistas i kon los fabrikantes, de el algodon de Salonique, i el si konvino para merkarles, los algodones kon mijor presios i tambien kondisiones, i esto lo kontinuo, kon ke tuvo tambien ke lo protejo muntcho S-r. Naimatche ke estava en Kostan, i lo salio komo garante, por una boena suma, i este vijaje li turo komo a serka 2 meses, i se vino mui kontente, porke el non lo

797                                      Biografia de S-r. Nesimatche Elijau Arie.                                        1871

tenija vijajado en otra ves i el si enbeso tambien los artikolos ke eran mas pasables por estas partes, i ansi los enpeso a aser lavorarlos, ke lo mas muntcho era en los chajakis, el etcho ke lo tenija, i aparte foe ke enpeso a merkar i gaitanes i esto tambien era un boen artikolo para la makedonija,

            En el anio de 5632, sigun ditcho mas antes ke el foe jamado de sus konijados porke lis merkara tambien i de ejos fieros kon las mijores kondisiones, i ke ja era serka la ferija de usundje ova, lo iso ke lis angajo una suma de fieros porke si los kargaran de el maaden para la ferija, i ke foeran tambien de una koalita mas mijor, por poderlos mas presto venderlos, i ejos ke ja si konvenieron en el presio, i tambien los pagamientos, i saviendo, ke a el fiero ja lo iva a resivir, en su tiempo, el partio por la ferija ke ja lo saven tambien ke era solo 8 dijas ke turava la feria, i fin ke la feria estuvo avierta, el fiero non li avija arivado i el ke esperava solo a esto era ke li restaron tambien i sus merkidas atras, por los sujos artikolos, i denpoes ke la ferija ja estuvo serada apenas foe ke li arivo el fiero, lo koal ke ja foe mui tadre, a rason ke non lo podija mas venderlo en la ferija, otro ke kalija ke lo jevara a Haskjovi or a otro lugar ke mas non dechavan aser dingunas operasiones en el luger de la ferija, i por mas mijor foe ke i

798                                      Biografia de S-r. Nesimatche Elijau Arie.                                        1872

la koalita de el fiero non li mandaron de el ke era pasavle en estos lugares, i a esta rason el de el presipio non kijo resivirlo porke el presio ja foe mui barato, i non podija somportar esta suma de piedrita, ma entre sus amigos lo toparon de djusto porke lo resiviera i ke ejos ja lis ivan a aser saver, de todo loke paso i kon esto non lo ivan a dechar ke piedrera, S-r. Nesimatche, i visto a esto i el foe ke si kontento i lo resivio i lo vendjo tambien kon un presio mui barato, ke la piedrita era bastante grande, i lo mas muntcho de danijo ke tuvo foe ke non pudo aser dingunos empleos, i esto li kavso tambien a ke non poeda enkontrar i sus pagamientos, ma lo todo iva a depender de el reglamiento kon sus konijados, i el ke ja si vino a Samokov, i koando ja si enkontro kon sus konijados en kurto foe ke ejos non li kijeron rekonoser, nada de todo loke lis kontava seja el komo tambien i sus amigos, i lo ivan apretando por la moneda, i el tan presto ke non pudo responder, seja a ejos komo tambien i a otros de sus kreditores, la iso ke sero la butika i se deklaro de falid^[27], i koando ja si rekojeron todos sus kreditores, i ke lo demandavan la rason era ke lo etchava toda la kulpa a sus konijados, i ansi foe ke si li bosdejo este negosio,

            En el anio de 5633, ke S-r. Nesimatche non la pudo mas enkamenar la butika, de las sujas merkansijas, era mui sikilijado

799                                      Biografia de S-r. Nesimatche Elijau Arie.                                        1873

i de pechin ja si li renovaron todas sus maladijas, i era ke kon la kontentes de todos sus kreditores, lo alesensijaron porke torna la avriera la butika, i kon esto podija ser ke si li renovavan torna sus etchos, ke esto lo iso i estuvo el anio entera vindiendo de las ropas ke el tenija i kon esto lo foe algo pagando i mal pasandose, kon ke i la Bu. Jael ja tenija un venida, de 10 liras de parte de una jaila^[28], ke li isieron 8 partes de 96, i la kira li tokava a 10 liras a el anio i esto tambien si las dava a su marido por venirle en ajuda a el gaste, ke a esta rason foe ke non solo S-r. Nesimatche ke kedo sin etcho foe tambien mas muntcho mal por su ermano S-r. Refael ke kedo enteramente sin nada, porke el non tenija de el entodo i sovre todo ke las 15 groches ke li dava a la madre S-r. Nesimatche, foe tambien ke non si los pudo darselos mas, i de esto vino tambien i a sufrir i su S-ra. Madre, ke eja jorava, i avlava por los kavsantes, ke foeron kavsantes de aser serar 3 kasas, esto mismo lo asija tambien i la Bu. Jael ke lis dava muntchas kechas a sus ermanos fin a el ultimo grado ke los asija muntcho sikilijar,

Sus IJOS todos los 2 ke frikontavan la echkola eran todos los 2 mui adelantre, ke i ejos eran siempre, abatidos, i la madre anke ke los kudijava tanto, ejos non kirijan saver de nada otro ke siempre eran de la echkola kasa i de kasa a la echkola, i siempre okupados en sus eskrituras sin ke otra kosa nada lis vinija a el tino komo krijaturas, ejos eran mui reposados, asta el grado

800                                      Biografia de S-r. Nesimatche Elijau Arie.                                        1873

ke su madre mos kontava, por el M. Gavriel koando era tchiko i ke en la mano tenija el pedaso de pan, i jorava ande la madre porke li diera a komer, i la madre riendose li disija, a IJO kome en la mano ja detienes la komida, i el ke estava tanto delijado^[29] en sus estudios non vija ke el pan ja lo detinija en su mano, i si enpesavan a reir todos los 2,

            En el anio de 5634, S-r. Nesimatche, denpoes ke ja vendjo toda su ropa el pago a todos por su djusto, i denpoes ke ja si desbaraso enteramente de el etcho viejo el si topo a un sierto su amigo ande lo sostenija, i enpeso de moevo a traer ropas de kolonijal de Salonique, i mas tadre trucho tambien i partidas de algudones filados, lo todo de Salonique, i las venditas ke las asija eran lo todo en groso, ke por los presipios lo iso kon mas apoko i kon unas koantas veses ke el ja lo foe boltandolo lo iso ke lo foe siempre engrandesiendolo i kon esto el si gano el kredito en muntchos grandes merkaderes de Salonique, i lis dava komandas a todos i los emplejos ke asija eran todos por tiempos largos, i ansi era ke i el tambien los vendija a fijado, el mandava muntchos artikolos de moestras partes, a selenique, ke los merkava seja de Samokov komo tambien de Dubnisa i Kiostendil, seja ke si los vindieran por su konto seja ke si los merkava muntchas veses i por los sujos konto

801                                      Biografia de S-r. Nesimatche Elijau Arie.                                        1874

i kon las ropas seja estas ke resivija seja las ke mandava fin ke las rekojija el las detinija en su propia butika i el la butika la detinija serada, i el siempre estava kamenando por la plasa por aser venditas, i tambien i los kovramientos, i todo loke rekojija, Siempre lo remitija a Salonique, mismo ke non tenija deskaimientos, i su etcho era kon mui grande deretchedad i mui pontual, para lo todo i ansi era ke todos lo kerijan muntcho bien, el non avlava muntcho ande sus klientes para konvenserlos, i ansi aser las venditas, i nunka non si asentava en las butikas de otra djente ke solo era en estarse en pies lis avlava i mui apoko, el era mui kontrario de koando alguno li demandava, ke Hiduch ai por la plasa, i si en okasion kontava alguna kosa era ke al presipio desija de la persona ke lo ojo el nombre, i denpoes lo disija esto ke sentio,

            en el anio de 5635, foe ke frago en la kasa merando a la plasa en 2 etajes ke en el primer etage iso on deposito i ahir para tener vakas mondjideros i en el sigundo etage frago 2 kamaretas i un koredor, i en la kasa de arientro ke morava li iso una reparasion, kon algunos trokamientos, i en el kortijo iso goertas i tchimenlikes, ke gasto en eja serka 8000 groches, ke su entision foe para prontar komo 2 apartamentos sigun ke i su ermano S-r. Behoratche ja lo iso esto en la kasa de sus Padre, era en akel tiempo ke lo pensavan estas kosas muntcho, para ejos los padres de

802                                      Biografia de S-r. Nesimatche Elijau Arie.                                        1875

prontarles para sus ijos moradas siempre serka de ejos, ke kon esto si reservavan para ejos para la vejes, lo koal ke agora es djusto la kontra ke los Ijos ke van a estar aparte de sus padres kale ke esten lechos de ande moran sus padres, i kon esto estan pudiendobivir en mas reposo seja el padre komo tambien i los Ijos, ke de esta forma de prontamientos mismo para 2 ermanos i todos los ke prontan saviendolo ke non poeden bivir siendo visinos es ke torna kon todo lo asen, es ke kale disir ke la natura de la persona es esto,

            S-r. Nesimatche, en este anio era tambien de mismo ke kontinuava en las merkansijas de traer sus artikolos siempre de Salonique, i en este anio el trucho tambien i koeros krudos para tcharas ke kalsan los kasalinos, i en mismo tiempo tambien i ordenava ropas en komision de los artikolos ke el non los vindia i de esta manera iva mui bien lavorando i adelantando, i se topava mui bien kontente i tambien ke estava sano de la salud.

            En el anio de 5636, ke el ja si li engrandisio el etcho sujo muntcho mas non tenija el tiempo para kontinuar en el etcho de la komision ke mas muntcho foe porke non estuvieron pagando en regla i avija algo de krisa i de mismo era ke i kon los sujos artikolos tambien tuvo las konsumasiones muntcho mas tchikas

803                                      Biografia de S-r. Nesimatche Elijau Arie.                                        1876

i ansi era ke enpeso a travar algo de apretos por enkontrar sus pagamientos i li kalio enpesara a tomar moneda kon entereso, ke i esto tambien non li foe bastante porke non la topava siempre foe ke enpeso a merkar polisas negosijanes por 61 i 91 dia kon dechkontarlas i esto eran una forma de chekis^[30] ke non eran konvenivles ke esto eran los enteresos a mas de 15 % ma non tenija otro remedio, ke esto kavsoalgo de danio a otros merkaderes, i esto ke li dieron kechas lo iso ke vindija muntchos de sus artikolos sin ganar lo todo por goadrarse la onor, i de esta manera tambien la iva kontinuando,

            El foe mui repintido de esto ke frago i ansi foe ke no si asentava a los kavos muntcho sigun de antes en esta kasa moeva i el non foe tanto alegre komo de antes, ke siempre iva pensativle, i era solo los apretos ke non lo dechavan en reposo, el enpeso a buchkar los medios para enpesar a enmankar el etcho porke non estava boeno goliendo los solivantamientos ke ivan uviendo de los komitos ke ivan muntchos danios asiendo por la makedondja, i esto avia enpesado a traer espanto a la djente i kada uno se iva reservando,

            En el anio de 5637, el troko su edeja de enmankar el etcho otro ke siempre asija komandas porke li expidieran ropas i esto anke foe poko por rason ke mas tadre ja non uvieron dingunas serkolasiones, a rason ke la guera Turka-Rusa ja foe deklarada

804                                      Biografia de S-r. Nesimatche Elijau Arie.                                        1877

i el de mismo fin ke iva resiviendo ropas asija tambien i los pagamientos i mas tadre ke mas ja non uvo el molde de remeter era ke si eskulpava la rason de la guera, i kon sus averes ke el tenija tambien non estuvo podiendo kovrar lo todo por esta rason de la guera, i tambien ke uvo on grande trokamiento en la moneda ke era todo en kaime (banko-notos) ke de 105 groches ke valija la lira-turka suvio a 150 groches, i ansi foe ke los danios foeron bastante grandes, i kon este foe ke resto kon moneda sin ke pago mismo i mas tadre a dinguno, i siempre buchko presto de vender sus ropas i de mismo, i rekojer los averis por toparse kon paras lo todo a rason de la guera, ke foe mui grande espanto, para todos lo koal ke no foe sigun de loke si lo pensaron, el la suma ke kedo a dover a Salonique, foe una suma de 500 liras turkas, i este foe loke tuvo i de paras, el lo iso lo todo en oro i las detinija siempre kon si sin ke ki lo aser jo aser dingunas espekulasiones, ke ja uvo muntchos artikolos ke los podija merkar mui baratos, ke lo todo en las ropas i mobilijas ke si isieron platchkas, los tcherkeses kon los sebekis, i mas tadre lo isieron tambien i los bulgares seja los sevdadinos komo tambien i los kasalinos, ke estos ultimos lis revatavan las kosas de los turkos en los kampos koando se ivan fuendo, i en este tiempo ke si foeron tambien i sus konijados S-res Mochonatche, kon Davidtchonatche, djunto kon sus Familijas a Kostan, si los jevaron kon ejos a sus IJOS Gavriel i Oro, lo todo por ke estuvieran mas levijanos, por en kavso de algunos apretos, i tambien por el M. Gavriel ke non pidriera la echkola,

805                                      Biografia de S-r. Nesimatche Elijau Arie.                                        1877

ke lo kudijavan mui muntcho, porke el sigun ke ja lo eskrivi ke tenija grande amor en el estudio, i sus entision era por mandarle Paris sigun ke esto ja lo isieron, de Kostan,

            En el anio de 5638 ke los Rusos ja estuvieron en Samokov, i non foe sigun de loke ejos si espantaron ke ejos entraron kon muntcho reposo i goadraron a todos mas muntcho de en el tiempo de el Turko, i los kondinavan mui foertemente, a akejos, ke kirijan aser algunas nigriguras, i alos djidios tambien era lo todo bratuchka^[31] ke los jamavan i lis disijan ke si en kavso koal foesa ke buchkarija de aser algunas negriguras a ejos ke si lo isieran saver, ke ejos ja las van a kondinar i sigun ke ja foe ansi i kon esto tuvieron mui grande libertad, i sovre todo ke si avrieron muntcho los etchos, i los rusas ke eran muntchos i todos tenijan muntcha moneda gastavan a muntcho i lo todo se iso mui karo i los artikolos mankavan muntchos, i ansi foe ke todos en este tiempo ganaron, i en los etchos de saraflik uvo tambien muntcho lo mas foe en las pomachkas^[32] ke los Rusos trucheron muntchas, i esto las vendijan kon grandes rebatos ke los unos enpesaron a jevarlas a Kostan para trokarlas por rublas de plata, i se ganava, a 8 i 10 % i S-r. Nesimatche tambien ke ja estava en paras lo enpeso i el a aserlo este ke las merkava, sigun ke lo asijan todos los otros i el tambien las enpeso a jevar

806                                      Biografia de S-r. Nesimatche Elijau Arie.                                        1878

a Kostan i de mismo lo foe kontinuando, unos koantas veses, i de esto iva gastando, i el non kijo mas kontinuar el merkansija ke la tenija de antes, de traer ropas de Salonique, ke esto li podija ser mas grande ma el ke non pudo pagar, a estos ke devija de antes, foe ke non lo pudo aserlo esta,

            Kon M. Gavriel ke estava en Kostan el estuvo kontinuando sus estudios en la echkola de la Alijansa, ke era el Derektor M. Dalem i por vija suja lo isieron mandar a Paris tambien ala Echkola de la Alijansa, i en arivando a Paris i ke lo examenaron para ke entrera en la Echkola i siendo ke el non enbeso el lachon akodech ke esto tambien devija de konoserlo foe ke lo kijeron mandar atras i en mismo tiempo li dieron kechas a M. Dalem, porke lis mande ansi Elevos ke ainda non eran prontos, i sovre esto sus Tios tuvieron grandes defekultades, i penas, porke non lo boltaran, i lis kalio ke si aderesaran tambien i ande M. Venisiani, ke el koal era el presedente,de todas las Echkolas de Kostan i de su deredor, i ejos ke foeron tambien, eskriviendo lo isieron porke entrara en la Echkola de el Lachon Akodech, i kon esto foe ke atchetaron, i resto al presipio en esta echkola i mas tadre lo entraron tambien i a la echkola regular, i el ke ja foe mui entelejente i grande kerensija ke ja tenija sovre el estudio foe ke salio uno de los mas grandes profesores, i tuvo los mas altos postas,

            Ejos en kasa lo pasavan mui bien i reposados, seja ejo komo tambien i su madre i resivija su semanada en regle seja de el

807                                      Biografia de S-r. Nesimatche Elijau Arie.                                        1878

komo tambien i de su ermano i S-r. Refael tambien en este tiempo iva i el ganando sigun ditcho ke ja avija etcho para todos,

            En el anio de 5639, el devito ke el devija en Salonique, li enpesaron a buchkarlo i el ke non estava en la posision de poder pagar, toda la suma, porke el todo el gaste ke tuvo en el tiempo de la guera lo todo gastava de esta moneda, i ansi ke estuvo en mas manko, i esto li kavso a irse goadrandose, i non pudo aser tambien i el saraflik de las pomachkas, i mas tadre ke kon algunos tenija a mas poka la suma era ke si lo konvinija, kon algun rebato, ke li asijan i kon los mas grandes, lo iva etchando en dijas para ke foera pasando tiempo, i de esta manera ke li turo mas longo tiempo foe ke kedo tambien i sin paras seja de loke a algunos foe pagando seja foe gastando, el enpeso a enbeveserse en etchos de bevrajes ke los rusos bevijan de los lekores los mas finos, i la konsumasion tambien era grande, era ke los iva merkando i lis vendija a los Rusos, i de esto era tambien ke si topava mui bien kontente, i los topava a merkar,

            Su IJO el M. Gavriel ke estava en Paris era ke siempre si kartijavan i de ves en koanto el li mandava tambien i algo de moneda ke esto aparte sus Tios ja li mandavan de Kostan i kon sus otras krijaturas ke el tenija era ke tenija gaste para sostener los en las echkolas, ke esto li era una demasija, en ansi tiempos,

808                                      Biografia de S-r. Nesimatche Elijau Arie.                                        1879

i esto lo iso algo sikilijar, el non poder responder a sus kreditores de Saloniki ke lo ivan tambien i apretando, i li kalija ke si foera eskondiendo, i non podija tambien aser dingun etcho, i li enpesava a doler la teta ke era mui foerte dolor,

            En el anio de 5640, el si foe a Kostan i su entision era por torna kontinuar en el etcho de los bevrajes, lo todo ke kerija su konijado S-r. Naimatche ke ja estava en Kostan ke lo ajudara, ke esto si lo iso konoser el etcho ke ja era boeno ganansioso i S-r. Naimatche ke ja lo kijo ajudar, el li nombro una sierta suma por kapetal i si isieron kontratos ke ivan a ser haverim kon sus kondisiones ke ejos ja las isieron, i sin tadrar iso los emplejos – -Nesimatche, de una kantetad mas grande, i los trucho a Samokov i li konvenija tambien a vender kon mas baratos presios de los otros ke vindijan i ansi era ke tenija mui boenas venditas, i en mismo tiempo tambien tenija i ganansijas boenas, i esto lo iso ke foe unas koantas veses a Kostan lo todo por ansi emplejos, i en este tiempo tambien ke sus kreditores, de moevo lo ivan presiguendo el lo asija ke se iva konviniendo, i lis iva pagando, i lo todo non si lo asija saver a S-r. Naimatche, por estos desbolsos ke el los iva asiendo de mismo lo goadrava i de S-r. Mochonatche, aun kon todo ke el era ke kudijava en lugar de S-r. Naimatche, i de esta manera el kajo ke si konvino kon todos sus kreditores, i de este foe limpio, lo todo

809                                      Biografia de S-r. Nesimatche Elijau Arie.                                        1880

kon la entision ke el etcho de los bevrajes lis estava boeno endo i ke ja podija ganar para estar boeno kon esto, ma por desplaser, foe ke los Rusos partieron i ansi ke para los sevdadinos non era kosa ke lo podija vender, porke eran artikolos karos, i ansi foe ke non los podieron venderlos, i S-r. Mochonatche, lo akonsejava i tambien lo apretava porke buchkara de venderlos si non lo podija en Samokov ke los jevara seja a Sofija or a Filibe i ke los ketara de la mano mismo ke foera i a pedrer, i alempijar estos kontos ke lo mismo era i S-r. Naimatche ke li iva eskriviendo ma el non estava de akordo ke non solo por esto ke podija aver piedrita ma era porke si avija pasado a su konto las sumas ke las foe pagando, i esto si espantava, i se avregonsava, i en una ves ke S-r. Mochonatche, lo jamo foe ke li dicho ke los venda i ke si es ke avra piedrita ja lo tenijan de travar, ejos, or ke li entregara los kontos i la ropa i ke ejos ja lo van aser esto i S-r. Nesimatche ke non entrava en nada lo todo por esto de la suma ke si travo foe ke lis salio el etcho a litigas, i non li entrego ni los kontos ni menos la ropa,

            En este anio li nasio una IJA, i sus parientes la vijitaron mas poko, i la jamaron SULTANA, i en su tiempo la kasaron sus ermanos en Ismir, kon S-r. Chemoel Himzi, de ismir, i eja bive mui kontente kon su marido i pario mui tadre denpoes ke kaso, ke si iso muntchas itchorijas, su marido es en boena posision, i de todas las 2 partes foeron mui bien kontentes,

810                                      Biografia de S-r. Nesimatche Elijau Arie.                                        1881

            En el anio de 5641, ke S-r. Mochonatche lo iva apretando por el etcho de los bevrajes ke si podijan seja bosdijar or ke si los podijan rovar, i ke si los entrogara, ke ejos ja los ivan a vender, ma era de mismo ke el etcho torna lis salija a litigas, i S-r. Nesimatche, ke non pudo somportar, i ke tenija tambien i el menester^[33], lo iso ke sin disirlo a dinguno si foe a Sofia ande su konijado S-r. Chelemo Tatcher, por rogarle a ke lo ajudara, i ke era menesteroso, ke si kere vinir a Vakarel i aserse komisioner en los komertchos para deskomertchejar ropas de los merkaderes, de Sofia, i esto era solo en Vakarel ke si komertchejavan, por las ropas ke vinijan de Kostan ke era la granisa^[34] de la rumilija oriental, i S-r. Tatcher, lo kontento kon su demanda kon ke li enpresto algo de moneda i kon esto el empeso en Vakarel a deskomertchijar, i en mismo tiempo el iva i venija muntchas veses a Sofija seja por ganarse klijantela, komo tambien i por toparse un banker, para ke lo sostuviera ke este ofisio, demanda muntcha moneda, i mas muntcho para ke li isiera i los kovramientos de sus averes,

            Koanto a el etcho de los bevrajes, ke S-r. Nesimatche non si los kijo ni entregar ni venderlos, li kalio ke los rekojera el i se los metio en su magasen por koando iva a venir, i esto, restaron ansi sin vendersen 8-10 anios, i toda la suma de bevrajes ke rekojo S-r. Mochonatche, foe 200 liras, i mas tadre si los foeron biviendo en kasa, sin ke mas si avlo de esto, i la Bu. Jael resto,

811                                      Biografia de S-r. Nesimatche Elijau Arie.                                        1881

en Samokov kon sus krijaturas, ke a eja non si li enportava enfrentante ke estuviera su marido boeno, i el tambien lis mandava sus menesteres en monda, i aparte kosas de komania i tambien ropas por vistirsen ke esto ja lo merkava muntcho barato de las ropas ke las komertchejava, i el etcho siempre si li foe engrandisiendole, i se topava mui kontente, porke las ganansijas ja eran grandes,

            En el anio de 5642, su IJO M. Gavriel ke estava en la Echkola en Paris, foe ke ja eskapo sus estudios, i lo nomenaron por derektor en la echkola de moevo ke la avijan avrido en Orta-Kiovi kon una paga de 1800 fr. a el anio i de esto si gusto muntcho S-r. Nesimatche, ansi tambien i toda la Familija, el ke ja foe mui entelejente, i la depluma ke tomo foe, de komo los primeros, elevos, sigun ke el foe siempre nomenado a las mas grandes eskolas, si entiende i ke resivija tambien i las mas grandes pagas,

            S-r. Nesimatche, era de mismo ke kontinoava en el komertcho de Vakarel, i siempre se li iva engrandisiendole sus klientes, i la komision ke el lis tomava ja era bien grande ke tenija mui grande konto, sovre todo ke los pagamientos ke si asijan en el komertcho ja eran para kada deklarasija si pagavan denpoes de 31 dija, i mismo ke era ansi el ke ja lo tuvo el etcho bien grande lo vo el menester de banker i lo topo a S-r. Jshak B. David i li avansava

812                                      Biografia de S-r. Nesimatche Elijau Arie.                                        1882

moneda kon un entereso de 15 % a el anio, i en mismo tiempo li asija tambien i los kovramiento ke el los tenija de aver de los sujos klientes, i lo todo lo asijan en konto koriente, i ansi foeron kontinuando, i de todas las 2 partes ja foeron kontentes.

            Su Ijo el sigundo S-r. Elijatche ke estava en la Echkola mui adelantre, el lo keto i se lo jevo kon si a Vakarel, por rason ke S-r. Nesimatche ke non savija eskrivir en Bulgar, i para eskrivir las deklarasias li kalia ke pagara a 5 groches por kada deklarasia i esto ke ja eran ke kada dija eskrivija de 10 a 15 deklarasias i esto era kon muntcho rogarli a el eskrivano, lo topo de mijor de jevarselo i pagarle a so Ijo esto ke li pagava por a kada deklarasia a 3 groches, i aparte eskrivija tambien i a otros komisioneres kon ke i akejos li pagavan a 5 gr. i esto todo ke el iva tomando seja de el padre ke li pagava siempre komo tambien i de los otros lo todo lo iva amontonando, i en el tiempo ke estuvo el rekojo una boena suma de moneda, kon su entision spesiala ke de esto eran gustosos i el Padre i el Ijo.

            En el anio de 5643, su banker ke tenija en Sofia no li pudo abasteser lo suma de moneda ke a el si li asija el menester porke su etcho ja foe muntcho mas grande i sovre todo el ja tuvo i muntchos klientes de la parte de la tuna i tambien de el

813                                      Biografia de S-r. Nesimatche Elijau Arie.                                        1883

deredor de Sofia, i ansi foe ke si adereso ande S-r. Maerutcho Alkalai ke ja era tambien i su Tijo, porke li avansara una sierta suma de moneda ke el koal ke ja era tambien i banker, lo iso ke li djo kon un entereso de 18 % a el anjo i kon esta suma anke el entereso era mui karo ma a el ja li konvenija porke el ja ganava a mas muntcho, ke los komertchos de akel tiempo eran de otras formas ke non meravan muntcho, i pasavan vagones enteros kon nombrarlas por los artikolos de a ejos lis konvenija,

            Sus Ijos seja el M. Gavriel ke era en Kostan en la echkola iva kontinuando i era mui kichto de todos los djidios de orta-kiovo, i la echkola tambien li iva mui adelantre ke sus elevos lo respektavan mui muntcho, ansi de mismo kontinuava tambien i S. Elijatche en Vakarel en ir siempre eskriviendo las deklarasias seja para el Padre komo tambien i para otros i en okasion lis eskrivija tambien i muntchas sajavlenijas^[35] i otras i por lo todo era pagado aparte, i el non gastava nada ke todo lo iva amontonando,

            S-r, Nesimatche, era solo por los Moadim, ke si vinija a Samokov, i ansi era ke seja el komo tambien i la Bu. Jael ja estavan mui enfastijados, de estar solos i tambien ke S-r. Nesimatche tenija ke non podija resistir a estar bekijar, i esto li ronivava [renovava], seja sus maladijas komo tambien, i se li deklaravan i otras, a rason de el bekijarlik, ma el siendo ke kerija ainda enrisijarse mas muntcho en su etcho, era ke lo iva somportando, fin ke a un dia alkansar, por rekojersen todos en un kavo, el mismo ke sofria ja

814                                      Biografia de S-r. Nesimatche Elijau Arie.                                        1883

lo iva somportando, en tal de un dija arivar por tener una vida mas en regula, porke sufrio muntcho,

            En el anio de 5644 ke mas ja non pudo estar solo se vino a Samokov, i el rekojo a sus krijaturas i esto ke lo podo de su mobilija, i se foeron a Vakarel, i a la Bu. Jael non li foe nada de esto ke eja si foe a el kasal, enfrentante, de bivir todos en un lugar, i tambien salirse de Samokov porke ja era mui enfasjada, i la kasa la dieron a kira a un sierto Turko ke era de los beguis ke si jamave Faim AA. (budak) i ejos en Vakarel si tomaron una kasa, serka de el komertcho, ke siempre ja avija muntcha djente, i por los presipios ja pasaron boenas, ma mas tadre a eja li vino mui pesgado de esto ke estava en el kasal i ke estava sola, sin tener, kon ken pasar, i muntchos dijas sus ilusiones la asijan muntcho jorar, i esto si goadrava por ke non la vieran tambien ke estava jorando, i ansi tambien i eja lo iva pasando, lo todo ke sus entisiones ja era por un dija vinirsen a Sofia, era solo en los moadim ke si ivan a Sofia por pasarlo i a Samokov vinijan mui ralo,

            Kon su etcho de el komertcho anke ke ja vinieron i mas muntchos komo a el komisioneres, torna kon todo i el tambien ja ternija mui boenos sus etchos i estava tambien pudiendo i amontonar algo de monda, i por sus komanijas ejos si asijan traer siempre,

815                                      Biografia de S-r. Nesimatche Elijau Arie.                                        1884

de Sofia ke lis era mas serka i tambien ke i el ja iva siempre, por su etcho, i sus IJOS el M. Gavriel era de mismo ke estava en Kostan en la Echkola ma solo ke avansar non estava pudiendo nada, ke su gaste era mas grande, ma S-r. Elijatche era al kontrario, ke siempre estuvo avansando i iva siempre amontonando, ke de esto si gustava muntcho el Padre, i tambien ke era mui reposado i non avlava de el en todo, kon dinguno,

            En el anio de 5645, los komisioneres en Vakarel ja foeron muntchos, i de sujo es ke i los etchos si espartieron, i S-r. Nesimatche ke mismo ja tenija sus klientes, ke non lo dechavan ma ja si avija enpesado a jelar, i tambien ja si enpeso a avlar, ke el komertcho de Vakarel si iva a levantar, a Sofia, i foe ke enpeso a ir a Sofia mas espeso lo todo kon la entision de decharlo a Vakarel i toparse algun etcho en Sofia, i tambien ke si li akurto muntcho el etcho, a toda vija el ja se iso una boena posision de los etchos ke el lavoro en Vakarel, i el lo kijo estarse siempre djuntos kon sus IJOS, ke la Bu. Jael tambien non kijo estarse mas en Vakarel,

1. Gavriel aun kon todo ke ja estava mui boeno en Kostan i tambien bien visto, de todos ma foe mui enfastijado de estarse solo i el rogo de la Alijansa, porke lo nomenaran a Sofia, kon ke el ja lis iso saver algunas rasones, i kapatche ke ja era, i ke

816                                      Biografia de S-r. Nesimatche Elijau Arie.                                        1885

en Sofia ja si tenija el menester, de derektores lo isieron ke lo nomenaron ke de esto si gusto mui muntcho, sovre todo ke i la paga tambien la iva a tener mas grande ke era de 3000 frankos, i S-r. Elijatche tambien lo iso de mismo ke i el tambien si enpeso a buchkarse logar por enpeigarse ke i el tambien lo topo en la asigurasion Datchija Romanija, i si entro kon una paga de 40 fr. a el mes, i ke denpoes esta kompanija paso a el Drujestvo Balkan^[36] i S-r. elijatche siempre estuvo en esta kompanija, i siempre de tiempo en tiempo li ivan pujando su paga, fin a ke arivo agora en este tiempo ke esto eskriviendo la dita a ser el Derektor,( ke i este ke mi seja komo una aprovasion sovre loke tengo eskrito en uno de los 14 karakteres de la familija ARIE, sovre ke son amorosos de el lavoro i ke poeden somportar, asta el kavo fin alkansar, sus buto, na ke S-r Elijatche, pudo Somportar, 30 anios, siempre en un lavoro sin kansarse, ke ja si kere entindido en ansi un largo tiempo komo de enkontros si poeden enkontrar, ma el karakter lo ase enkorajar por somportar a lo todo en tal de alkansar a el sujo buto,) i kon esto ejos ke ja si resentaron si detchesaron de rekojersen todos en Sofia.

            En el anio de 5646, ke el komertcho de Vakarel ja si levanto, es ke natoralmente i ejos mas non tuvieron nada de etcho i sin tadrar, S-r. Nesimatche, si foe a Sofia i se tomo una kasa,

817                                      Biografia de S-r. Nesimatche Elijau Arie.                                        1886

ke era bastante para bivir todos ejos I de lo restan de mobilia ke la avia dechado en Samokov i esto de loke tenia en Vakarel si lo rekojeron todo i se vinieron a Sofia mui kontentes, i M. Gavriel tambien ke ja si vino a Sofia por derektor para la echkola de la Aliansa jsraelid, kon la paga de 3000 fr. ke el la resento mui bien i todos los djidios eran kontentes, i ansi de mismo i S-r. Elijatche tambien ke ja entro en su empeigo era kosa ke non si artavan de gustarsen, i pasavan mui kontentes i mui alegres,

            I a la su S-ra madre ke estava en Samokov, el li dava en este tiempo en luger de los 15 groches ala semana ke si avija adevitado solo a 10 gr. i por los 5 gr. de el adjusto el li mandava algunas ropas para ke si vistiera kon mas de onor, i eja ja estava mui bien kontenta, i aparte li mandavan i sus inietos siempre algunos presentes de koalo lis vinija, ke si gustava muntcho

            S-r. Nesimatche ke ja estuvo en Sofia de el presipio el si entremetio de mismo en el komertcho sigun ke lo asia en Vakarel i era mui poko el etcho ke tenija porke ja uvieron muntchos komisioneres komo a el, de esto el non li foe bestante i siempre el iva buchkando de aser otro negosio, i moneda ja tenija de loke avanso en Vakarel, i para el gaste de la kasa era ke li ajudavan i sus Ijos tambien,

818                                      Biografia de S-r. Nesimatche Elijau Arie.                                        1887

            En el anio de 5647, S-r. Nesimatche ke ja estuvo mas mijor resentado en su vida i ke topo a merkarse una kasa barata i la merko por 4000 fr. ke tenija muntchas kamaretas i kortijo tambien mui grande solo ke el luger era motchorlok^[37] (umido) i kon la entision ke lo iva a entchirlo de tiera foe ke si paso en eja kon ke iso una tchika reparasion, ma intchirlo non lo pudo, i en eja bivio toda su vida, si entiende djunto kon sus Ijos, i la koal kasa denpoes de su moerte arason de este sus Ijos la vendieron a S-r. Binder por 7000 fr. ke el koal gasto ainda muntcha moneda por traerla en mas mijor grado,

            El entre la komisionarija en el komertcho ke de mismo la kontinuava foe tambien ke li foe komo representante de S-r. Mairutcho Alkalai, para dar moneda kon entereso a los merkaderes de Sofia ke en akel tiempo non avian Bankas komo agora, i este se buchkava muntcho, i de este el tomava una komision, i en esto era ke si okupava mas muntcho, ke alkanso a dar unos koantos de sienes de miles de frankos i este kon unos enteresos de ariva de 15 i 18 % i S-r. Mairutcho ke ja tenija la jena konfiensa era ke por la suma de moneda ke li demandava era ke siempre li remitija, ke por los presipios ja foeron todos los 2 mui bien kontentes, ma mas tadre ke uvo krisa en Sofia i foe ke en Sofia [non] pudieron pagar en regla i kalio ke viniera S-r. mairutcho a Sofia por resentar kon estos ke non pudieron pagar, i de esto tuvo grandes danios i lis kavso tambien i agriamientos, por esto ke non kudio, a tiempo ke el non lo kulpava ke por kada uno a

819                                      Biografia de S-r. Nesimatche Elijau Arie.                                        1887

ken iva dar moneda ja era lo todo kon la suja kontentes,

seja M. Gavriel komo tambien i S-r. Elijatche, de mismo kontinuavan en sus mision de los otros anios solo ke a S-r. Elijatche en este anio li pujaron su paga a 60 fr. a el mes i el ke ja tenija de lo avansado de Vakarel komo una suma de 2000 fr. era ke de esto resivija los enteresos, de loke los negosijava aparte,

1.    Gavriel de koando estuvo en la Echkola en Kostan ke avija etcho amor kon demoasel Rachel ija de S-r. Chemoel Koen, el si foe a Kostan i se esposo kon eja i kon kundision ke li iva a dar 400 liras de kontado, i de esto si gustaron muntcho sus parientes, i li mandaron muntchos presentes a la novija,

             En este anio tambien li nasio a S-r. Nesimatche un Ijo i se gustaron todos i lo jamaron IMANUEL, i su madre lo kudio sigun de todos los otros, i el koal bive en paris ke es empeigado i non bive kon sus ermanos ke su Madre este lo regreta muntcho,

            En el anio de 5648, M. Gavriel si foe a Kostan a demandar boda, ke li foe akordado i fiksaron el dija de los kiduchim i partieron tambien i el Padre kon la madre i isieron la boda en Kostan, kon muntcho saltanat, i la Novia ke ja es boena i mui savida i ermosa i kontado i achugar ke ja trucho a muntcho foeron de todas las 2 partes mui bien kontentes, i denpoes ke ja isieron la

820                                      Biografia de S-r. Nesimatche Elijau Arie.                                        1888

boda ejos si vinieron a Sofia i de mismo tambien bivieron en una kasa i a un komer, kon ke ajudava tambien M. Gavriel mas muntcho para el gaste de la kasa, porke ejos en este tiempo si avrieron kon montcho mas de loke gastavan de antes i S-r. Nesimatche ke tuvo mas grande gaste en la ida a Kostan foe ke si li enmanko muntcho su furtuna, i de esto non si li enporto enfrentante a el gusto i alegrija ke tuvo de loke si kaso su Ijo,

            La echkola ke avija en Sofia era ala vieja i komo kapitala en las adjuntas ke tenijan lo toparon de djusto de fragoarsen una moeva echkola i esto era M. Gavriel ke si okupava mas muntcho kon la entision ke si mismo non pudijan abasteser para el gaste la komuneta ke el ja iva a poder demander ajudas seja de la Aliansa jsraelid i seja de otras sosietas i kon esto kedaron de akordo para fragoar,

            S-r. Nesimatche, era de mismo tambien ke kontinuava seja en el bankerlik por el konto de S-r. Mairutcho komo i en el etcho de el komertcho ke en este tiempo ja li foe mui tchiko ke lo mas muntcho ke se li iva enmankando era por rason ke aparte ke non savija eskrivir en Bulgar era tambien ke non konosija tambien i la lingua, ke esto era bien enportante,

            En el anio de 5649, S-r. Elijatche ke estava de mismo

821                                      Biografia de S-r. Nesimatche Elijau Arie.                                        1889

en su empeigo, era ke kontinuava, solo ke el iva endo mui flako i esto los asija atagantar a sus parientes, ma non penso por retirarse de esto i koanto a S-r. Nesimatche, el era de mismo ke non lo dechava el etcho de el komertcho, aun kon todo ke en este anio ja lo tuvo mui manko ke ja non foe ke non lo valija el tiempo ke pedrija ma el si enbevisija en algunos otros etchos ke en Sofia ja avijan de ande si podija ketar la semanada,

1. Gavriel ke ja era el derektor de la Echkola i en este anio ke enpesaron a fragoar la echkola i la moneda ke si avijan aprontado ja foe mui presto eskapada, i la fragua ke ja era bien grande i S-r. Gavriel visto ke non la podijan eskapar de fraguarla porke era lo mas muntcho el ke, si okupava, i sigun ditcho mas antes ke el ja foe eskriviendo, lo iso i kon la kontentes de el komite eskolar i sinagogal partio el mismo a Paris, por rogar seja en La alijansa jsraelid i tambien en la angle joege asusation^[38] i tambien i en ansi i otros lugares, porke los ajudaran kon alguna suma de moneda, i esto foe mui kapatche, de aser sever a todos estos i pudo resivir de todos una bastante suma de moneda, i todos estos la davan kon la kondision, ke era solo M. Gavriel ke la devija gastar saviendo ke non se iva a enplejar por otros lugares, i ansi era ke lo todo lo iva gastando M. Gavriel i el era ke jevava todos los kontos, ke uvieron tiempos ande non kerijan el okupamiento sujo i de esto lis salija i algunas deferensijas seja kon el komite komo tambien i kon algunos notavles de la sivdad, i M. Gavriel ke era solo a el ke si

822                                      Biografia de S-r. Nesimatche Elijau Arie.                                        1889

li remitija la moneda de los presentes ke si lis iso, era ke el non la dava a dinguno i disija ke el orden ke tiene era solo el ke la podija gastarla, i ansi foe ke el non si enfasio, todo tiempo ke si estuvo fragoando siempre de okoparse, por todo el menester, i sin ke merava las letigas ke ja avijan siempre,

            En el anio de 5650, li nasio a M. Gavriel un IJO, i se gustaron muntcho ke lo isieron komo una boda, i lo mandaron muntchos presentes de todos sus parientes, i lo jamaron Elijau Aleksandre, i su madre lo krio i lo kudio,

            En este tiempo tambien ejos merkaron una butika en Sofia por 300 napolonis, ke de esto foeron mui kontentes, i la merkida la iso solo S-r, Nesimatche, por su konto, i siendo ke el non kijo desbolsar, de su moneda pronta ke el tenija foe ke si vino a Samokov, por buchkar a vender, la kasa kon un tchair ke el enpatronava en Samokov, kon la entision de tomar al menos 200 napoliones, ma esto non lo topo, ni menos kon lo merkara, por el mas tchiko presio, i su konijado, S-r. Chemoelatche, por aserli plaser, li merko la kasa kon el tchair, por 90 napoliones, i esto ke non li foe bastante, lo iso de darles parte tambien i a sus IJOS por ke li vinieran en la ajuda, para pagarla, ma por desplaser ejos non pudieron aprovetcharsen de esta butika a rason, ke en estos tiempos ke si iso

823                                      Biografia de S-r. Nesimatche Elijau Arie.                                        1890

la regulasia en las plasas de Sofia foe ke la tomava tambien i esta butika, para la plasa, i esto ke era tambien malo merno^[39] i non tuvo el deretcho, por reklamer, a ke li dieran en algun otro lugar algun pedaso de tiera por fragoarse de moevo torna una butika, otro ke mas tadre sigun ke taksavan a todos sus tieras foe ke i a el tambien li taksaron solo ke foe una suma mui tchika ande li kalio ke si kontentara, ke non lo podija aser altramente, i de esto si sikilijaron mui muntcho, i tambien ke lis kosto muntcha moneda, ke este el koal si la vendio ja lo supo esto solo ke ejos non examenaron el plan de la sivdad, ande ja era kada uno libero para estudijarlo i de esto non venija a merkarla ma esto todos non lo savijan i tambien ke lis paresio ke ja lis ivan a darles en su lugar otro kampo por ke si fragoaran, i ansi ke lis kedo vendida la kasa de Samokov,

1. Gavriel ke si estava mui boeno okopandose en la fragua de la Echkola uvo entre los jehidim de Sofia una adjunta, ke lis parisio ke M. Gavriel non estava bien enpleando los gastes i de mas ke lo sospetcharon ke el tambien si iva aprovetchando a esta okasion por si mismo, kon ke iva resentando los kontos i los iva trokando, i ke li kijeron tomarle esta mision i el ke non la kijo darla, foe ke lis nasio litiges i pleitos, i de parte de el kumite de Sofia ke la foeron asiendolo saver a la alijansa, todo esto ke a ejos lis paresija, foe ke kon orden de la alijansa, si nomeno una komision por ke li resivieran las kontos i entre la komision era el uno de ejos tambien i S-r. Esra Tatcher, a la kavesera, ke el koal

824                                      Biografia de S-r. Nesimatche Elijau Arie.                                        1890

entre sus debates ke ejos tuvieron agriables^[40], i ke M. Gavriel si defindija foertemente adetras de el protejo de la alijansa, i la komision sin mas endenijarse alos protejos de la alijansa, ejos lo isieron ke la seraron la echkola en dechando a todas las krijaturas arastando por las plasas sin kudijar ejos mas i deklararon ke non kerijan mas ke foera detinida la echkola de la alijansa, i ke ejos ja la podijan detenerla, ke a esta rason foe ke li parisio de boeno de dar tambien i la demision i este li foe resivida, kon la entision de non ser mas en dingen luger de esto, i kon las krijaturas ke estavan por las plasas djugando, foe ke el Gradski Sovet, li kalio ke kudijara i los rekojo kon espartirlos en las sujas echkolas i para los tchikos avrirles de moevo otras echkolas, i ansi lo pasaron esta anijada, i kon la fragua era ke kudijava el komite,

            En el anio de 5651 ke S-r. Nesimatche tuvo mui flakos sus etchos, i ke era kosa ke non si estava pudiendo sostener aun kon todo ke sus IJOS ja lo ajudavan i lo enkorajavan ma el non lo kijo esto otro ke el ja podija ainda mui boeno lavorar, i M. Gavriel tambien ke estava sin dingun etcho resto solo a S-r. Elijatche ke era empeigado, i este kon una mui tchika paga, li este ultimo tambien ja tenija una sierta suma aparte de su avansado, lo isieron de vinir todas los 3 en un kavo i asersin haverim, por aser la merkansija solo en los artikolos de kolonijal i esto aser las venditas

825                                      Biografia de S-r. Nesimatche Elijau Arie.                                        1891

solo en groso, ke sovre ke Si kontentaron todos los 3 ejos si isieron kontratos entre ejos kon ke mitieron kada uno a una sierta suma por kapital ke M. Gavriel tambien ja tenija una sierta suma de monda de su avansado i la firme la jevaron Gavriel Elijau Arie. Kon ke lo devijan de enkamenar el etcho S-r. Nesimatche kon M. Gavriel i S-r. Elijatche iva a kontinuar, su empeigo, ejos enpesaron en el lavoro ke si tomaron los magasenis menesterosos, i asijan traer las ropas kon vagones, i ansi de mismo asijan tambien i las venditas, i se topavan mui bien kontentes,

            Ejos en kasa los gastes los tuvieron muntcho mas grandes de los otros anios i lo todo lo gastavan de el magesen i ejos todos bivijan en una kasa, i lis foe muntcho vijitada de sus parientes i amigos, ejos mas non si mleskaron en dingun etcho ke la echkola ni menos de la alijansa jsraelid, ejos jevavan sus livros de la merkansija, en mui regla, ke lo todo era solo M. Gavriel ke asia los kontos, de las ropas ke resivijan,

            En el Anio de 5652, a M. Gavriel li nasio una IJA ke i kon eja tambien lo isieron sigun todas las otras paridas, i la jamaron Jael, i de mismo su madre la krio i la kudio i eja ke ja era mui sana, era ke kudijava tambien i por la kasa, ke era a los kudios de la Bu. Jael, i eja respondija a lo todo, i esto ke eja las

826                                      Biografia de S-r. Nesimatche Elijau Arie.                                        1892

ikonomijas i todos los guijos ja los konosija al fondo i savija tambien i boeno komportarse,

            En este anio M. Gavriel si merko por si una otra kasa ke li kosto 1000 fr. i esto ke ja era tambien visina a la kasa ke merko el padre ke en la koala tambien i ke moravan. el li iso una boena reparasion, ke gasto mas muntcho de loke li kosto i la mobelio, de todo lo menester, i se paso en eja ke kon esto si aparto de la mesa de el padre, i avrio kasa moeva por si en kedando S-r. Nesimatche kon su ijo el sigundo i sus krijaturas,

            Koanto a el etcho de sus magasen ejos kon grande kerensia lo kontinuavan i siempre se lis iva engrandisiedose sus venditas ma sus okupasiones eran tambien i bastante grandes ke esto a M. Gavriel li vinija algo pesgado, ma non lo podija dechar, ke esto el foe mui repentido de loke djo la demision i sovre esto el enpeso a estudijar de koala forma iva a ser ke lo podija torna renovar para entrar de moevo en la Alijansa, i esto ke el su penserio era siempre en esta i ke tambien enpeso i a eskrivir kartas mas largas ande li turava tiempo era ansi ke enpesaron a sufrir los enteresos de el magasen, ke enpesaron a trokar i tambien ke uvieron i otros konkorentes, ke foeron konkorijando i S-r. Nesimatche de esto ke si avija deskorajado M. Gavriel ke lo vija i ke mas non si estuvo okupandose komo de antes, era ke li desplasija mui muntcho ma non li avlava nada porke era a sus nombres el magasen, i ansi era ke de loke si sekilijava era ke si li renovavan sus viejas maladias

827                                      Biografia de S-r. Nesimatche Elijau Arie.                                        1892

lo mas ensomportavle era el dolor de la teta, i dingunas kuras no li ajudavan por tomarle la foerte dolor ke el konsentija solo era ke kalija pasaran 4-5 dijas i denpoes era ke enpesava a poder reposar ma el kedava denpoes muntchos dijas fin ke si venija en si, i siempre mui flako i ansi es ke si entiende de sujo ke i esto lis era una de las kavsas a sufrir ainda mas los enteresos de el magasen, a M. Gavriel lo konsideravan i li asian muntcha onor en el tiempo ke era derektor ma koando ja non foe mas non li isieron akejos onores ke mas antes li asijan i de esto a el non sili enportava,

            En el anio de 5653, S-r. Elijatche ke el non lo kijo dechar su empeigo ke el ja foe konvensido ke non podijan reuchir en las merkansijas ma non se resikitava^[41] [rizikava] a aserlos repentir, i el en nada non lis vinija kontra koando ejos tratavan de esto lo asija solo ke el non si resivija a lavorar otro ke tomava solo parte en los etchos ke si desidavan para lavorarlos,

            Mientres la merkansija de el kolonial ke ejos la asian en mismo tiempo ejos tenijan en komision ke davan muntcha moneda kon entereso a los merkaderes de Sofia, ke lo todo era por al konto de S-r. Mairutcho Alkalai, i en sus negosio de el kolonial ke non lis kameno mas ejos sin tadrar enpesaron presto a buchkar de desbarasarsen ke i esto lo isieron presto ke la ropa ke tenijan

828                                      Biografia de S-r. Nesimatche Elijau Arie.                                        1893

ja respondija a venderse mui presto solo ke foe kon un tchiko re rebato ke anke foe ansi torna kon todo koando ja ataron los kontos ejos estuvieron en una suma bien redonda en manko, ke esto lo iso muntcho abatir a S-r. Nesimatche ansi de mismo i a M. Gavriel, ke el ja tenija la vista algo kurta i se sirvia de entojos, foe ke a esta kavsa si li akurto ainda i algo su vista, i li kalio ke renovara sus entejos, i denpoes de esto ke ja estuvieron sin dingun negosio, ejos enpesaron tambien i a dar sus moneda kon entereso a los merkaderes ke ejos ja los konosijan, i en este tiempo ke uvo algo de krisa i non ivan pagando en regla estos ke li devijan a S-r. Mairutcho Alkalai, i ke tuvieron aparte de las litigas era tambien ke lo enkulpavan ke li amostro los tchurukes sujos komo ke eran de S-r. Mairutcho,

            Ejos ke eran en 2 kasas era tambien i los gastes mas muntcho i visto ke los etchos los tenijan mas kurtos ejos enpesaron mas muntcho a aser la ikonomija, ke esto era boeno ke ja la savijan tambien i aserla sin ke ejos si asian konoser,

            S-r. Nesimatche en estos tiempos non foe estando boeno sano komo de antes el muntchos dijas non li permetijan sus maladias a salir a la plasa ke lo mas muntcho si estava en kasa, i esto los asija muntcho abatir a sus ijos ke lo kudijavan tanto ejos li traivan siempre medikos, i lo vijitavan siempre, ma el non kerija nada i sin avlar el somportava sus dolores de las koalas sufrio lo mas muntcho de su vida, el si asentava en una chelte i al sujo

829                                      Biografia de S-r. Nesimatche Elijau Arie.                                        1893

deredor, tenija las kuras, de las koalas el solo si servija de ejas i su mujer la Bu. Jael era siempre ke lo akompanijava i nunka non lo dechava solo,

En el anio de 5654, li nasio a M. Gavriel una IJA i kon la koala de mismo sigun lo eskrito mas antes, i la jamaron, ESTER? i su madre tambien la kudio, i la krio, i ejos ke estavan en kasa aparte era la Bu. Jael ke la vijitava siempre, ejas ja foeron mui aunadas, i si katavan muntcho de la una a la otra,

            koanto a sus negosios ke ejos lo tenijan anke era mui poko, era solo M. Gavriel ke si okupava, i esto el salija mas tadre a la plasa, porke el tenija sus korespondensijas ke siempre, su entision era de poder alkansar torna a vinir en la alijansa, ke esto sigun ditcho ke el foe mui repentido de esto ke djo la demision i lo todo li kavso el S-r. Esratche ke de el non lo esperava ke ja son i IJOS DE 2 ermanas, i siempre esperava su protejo, ma aki li foe la kontra, i de esto ejos mas non si akararon seja ejos komo tambien i las mujeres muntcho tiempo, i esto los asia tambien muntcho abatirlos, sovre todo ke ejos i kon sus etchos non lis estavan tanto boeno kamenandoles,

            S-r. Nesimatche, ke ja estava malato foe ke en este tiempo el non lo pudo mas estarse en la chilte i li kalio ke tomara

830                                      Biografia de S-r. Nesimatche Elijau Arie.                                        1894

la kama i el ja non tuvo mas de el en todo la foersa ni de resperar, ke mas sus dolores non las sentija i era solo ke una mui grande flakesa el tenija i todos los kudios de tantos medikos ke lo vijitavan a unas koantas veses a el dija foe lo todo sin dingun provetcho i ansi foe ke en una notche de Roch Hodech Adar el kedo moerto para siempre, i lo joraron muntchos dijas seja sus ijos komo tambien i toda la familia, i sus IJOS i los parientes ke tenija aki lo akompanijaron i lo goadraron los 7 dijas de el limunio asentados en kasa i ansi tambien i el mes entero i de mismo el anio entero el todos los anios de la vida ke bivio foeron 51 anios,

831                                                      ENTELEJENSA KAJADA

            S-r. Nesimatche sigun de loke ja lo meldaron ke foe una persona savija, i esto ke el no avlava muntcho ja es natural para las personas de konsensija, i tambien ke su natura foe lo mas muntcho de su vida mui flaka el siempre su tino foe en el lavoro, lo koal ke en todo loke el lavorava, mismo ke los kavos non reuchija, a el ja li abastava de verse rodejado de sus IJOS ke ja foeron todos estudijados i bien entelejentes, el si kontentava, kon su parte, el de su ganado ja alkanso a merkarse kasas i butikas, el non foe devdor en su vida, a el non si li enporto de bivir en kasales, por bivir kon onor, solo ke su vida foe mui tchika, i ke ja si avija resentado su vida, por bivir mas reposado li kavso los sufrimientos, de antes ke el los somportava, a las kajadas, ke lo aflako, i por esto es ke si keri tambien dado de pasadas, i eskuvrido para bivir,

832

Asta aki si eskapa la partida de S-r. Nesimatche Arie, fin a el Anio de 5654, ke murio, i todos los anios De la vida ke bivio foeron 51, i murio en Sofia.