קורותיהם של הסנ' מוֹשוֹנָצֶ'ה, בן בְּכוֹרָצֶ'ה־יצחק, ובנו סנ' בנציון

1927

De aki i endelantre si enpesa, la partida de Sr.

Mochonatche, J. Arié denpoes ke si aparto de el padre i

enpesando de el anio de 5654 fin el tiempo ke estuvieron

djuntos kon su ijo Sr. Bensijon

1928     Biografia de Sr. Mochonatche J. Arie kon su ijo Sr, Bensijon.   1894

En este anio de 5654, ke Sr. Mochonatche ja estuvo espartido de su Sr. Padre, seja de kaza komo i tambien i de la butika i kon la suma ke tomo en moneda, sonante, el si lo tomo tambien i a su ijo el Sr. Bensijon, kon si ala butika moeva ke ejos avrieron, i la suma de moneda ke li avija kedado de el kontado ke tomo Sr. Bensijon de las 400 liras, ke las tenija Sr. Mochonatche, las metio tambien kon ke por nombrar la suma i las pursiones ke ivan a tener lo decharon por mas tadre, i ejos si tomaron una butika a kira por lavorar en los artikolos de kolonial, kon ke espartieron sus furtunas en 3 partidas, kon la entision de lavorar kon el un tersio, en los artikolos de kolonial, i kon el otro 1/3 en dechkontos i de algunas de las operasiones de el bankerlik, i kon el tresero detenerlo en kacha i ejos resentaron sus livros ke era el Sr. Bensijon el jevador de los kontos ke el ja konosija mui bien la kontabelite, i ejos ke ja si mitieron en el lavoro, de el presipio, enpesaron a merkar de los artikolos de kolonial i esto a sumas mas tchikas por el presipio, lo todo de los artikolos ke si lis demandava, i enfrentante era tambien i ke ivan i aziendo venditas, en groso alos bakales mas tchikos de ejos lo todo a kredit por algunos tiempos, i kon la sigunda partida de moneda ivan i dando tambien i kon dechkonto a algunos de los merkaderes ke ja los konosijan, i todos los 2 eran mui aunados i kontinuando en sus operasiones,

En este anio ke ja foe Sr. Bensijon en la edad ke lo

1929      Biografia de Sr. Mochonatche J. Arie kon su ijo Sr, Bensijon.     1894

jamaran de el konsolato Nemse por soldado, i esto ke non estava en la koenta foe ansi un mui grande apreto, i li kalio ke si foera el Sr. Mochonatche a Sofia por buchkar los moldes de delebrarlo, i denpoes ke el ja estuvo unos koantos dijas en Sofia i por vija de los amigos ke era el Sr. Presijadutcho ke iva kamenando i toparon el molde kon ke gasto 150 napoliones ke de los koalos tomo parte tambien i el Sr. Presijadutcho Tatcher, i lo pudieron delebrar, i se vino a Samokov mui gustozo de su reuchimiento, i esto lo detuvieron en mui grande sikreto, i de mizmo era ke kontinoavan en sus todas operasiones ke las lavoravan, koanto alos gastes de sus kaza eran en este tiempo kon mas ikonomija, i anke ke por la butika de su Sr. Padre ke le iva mui ralo ma el ja si gustava ke ja los vija a su ijo ke ja estava boeno entrado en sus etchos,

En el anio de 5655, ejos era ke kontinoavan en sus merkansija, i siempre ivan i engrandesiendo la i en este anio ejos merkaron una partida de lanas de los vlahos i tambien partida de mantekas, i todas las 2 ke non las podieron venderlas presto, ira ke las mantekas lis kalija ke las foeran lavandolas i esto lo azija el Sr. Bensijon propio el las lavava, i non si avregonsava, i de mizmo foe i kon las lanas ke non las podieron vender i ke lis restaron por mas tadre foe ke non tuvieron dingun profito, i las vendieron afiado

1930       Biografia de Sr. Mochonatche J. Arié kon su ijo Sr, Bensijon.    1895

Ejos la butika ke tenijan era en el Pazar de frutas, i era lo mas muntcho ke Sr. Bensijan se okopava en el etcho ke Sr. Mochonatche non si okopava muntcho, ejos en este tiempo enpesaron i azer tambien prevalimientos de moneda kon entereso de la plasa, por poder enkontrar sus merkansias mas mijor, i el Sr. Behoratche ke lo vijitava i ke lo vija ke azijan esto, de prevalersen kon entereso ke para la merkansija non konviene a pagar enteresos non era kontente i los iva akonsejandolos por ke kamenaran kon mas konto a razon ke por enfrentante a el gaste ke ejos lo azijan en kaza ke era, komo a 4000 fr .non podijan ganar ni menos la metad, i non los deskorajava, kon la esperansa ke mas tadre, ja ivan a tener mijor los etchos,

En el anio de 5656, li nasio a Sr. Bension una ija i la jamaron Tamar, i vinieron tambien i el padre i la madre de la parida de filibe, a el parto i lo pasaron mui bien de todas las 2 partes, i sigun de todas las paridas ke la vijitavan seja los amigos komo i tambien i todos los parientes, foe tambien i en este parida, i en una de las vijitas ke estava i jo tambien, uvo una okazion ke li diche ala madre de la parida, ke lo izo mui boeno ke vino la madre ande la ija ke pario una ija, i esto foe arazon ke eja mi tovo ditcho, la otra vez koando vino ke avija parido a Michael, ansi lo esta viendo komo vini jo ande la ija ke mi pario un ijo, era de

1931   Biografia de Sr. Mochonatche J. Arie kon su ijo Sr, Bensijon.     1896

esta manera ke lo pasavamos, i ejos ke ja estuvieron ainda i unos koantos dijas mas de foeron a filibe i su madre lo kreo i la kudijava, solo ke el Sr. Bensijan en este tiempo iva tiniendo una flakeza kon un boltamiento, de kavesa, ma ja era i ke li pasava presto i esto de los chachejos ja uvo en muntchos de la familia Arié i era la kura solo kon esto ke si lavavan la kavesa kon agoa jelada,

Ejos kon sus negosios era ke los kontinoavan i en este anio ejos si izieron traer fieros de las fabrikas de la evropa, i los azijan lavorar de los kovatches por nales i muhes, ke sierven por nalijar los kavajos i vakas, i esto era un mui boen negosio por razon ke fin a este tiempo non avijan traido los prontos tambien de la evropa, solo ke ejos komo non lo konosijan este ofisio, foe ke no lo podieron boeno enkamenarlo,

Ejos entre el padre i el ijo en este tiempo foeron i tiniendo algunas deferensias ke non estavan de akordo, i el Sr. Ben sijon era ke si kedava kajado i non li respondija a su padre, por la razon ke el non tenija foersa i era ke dija kada dija se iva aflakandose i tambien el boltamiento de la kavesa se li iva muntchigoando tenija tambien ke i en kaza entre las mujeres seja por ejas seja por razon de las krejaturas, ke ivan tiniendo algunas avlas i esto era i ke lo iva sekando a Sr. Bensijon, i ansi era ke non li kedava el tiempo por decharse merar de los medikos, i de esta manera lo ivan pasando ke era lo todo entre ejos ke si lo ivan englotiendo, i sin ke lo supieran otra djente, de esto ke a ejos lis pasava,

1932      Biografia de Sr. Mochonatche J. Arie kon su ijo Sr, Bensijon.     1897

En el anio de 5657, el Sr. Bensijon ke la flakeza i el boltamiento de la kavesa ke ja lo tuvo mui foerte, i denpoes ke ja lo meraron todos los medikos de Samokov i ke non topo dingun provetcho lo izo ke si foe a Viena, por ke lo meraran i los medikos de viena i el ke estuvo komo a 2 mezes en viena el estuvo sano i mui boeno i se vino a Samokov, solo ke li kosto esta ida de vina 100 napoliones sin ke li dicheron ken era ke los iva a gastar,

El por asigurarse de este gaste i tambien por reglar de esto ke estava en la butika kon su padre si era ke el iva a tener bastante de parte por ke li taparan sus gastes i este de el kontado ke non si lo deklaro koala suma era ke tenija, era ke non iva muntcho ala butika ke kerija azersen i kontratos, ejos ke ja vinieron en un lugar por platikar de esto foe ke Sr. Mochonatche li dicho ke li gasto 150 napoliones por kortarijarlo de el soldado i 100 napoliones ke ja si gasto en viena ke por estos ultimas ke el lo savija ke los iva a travar una partida el padre i kon los 150 ke el non podija gastar i ke li kalija i ke kedara devdor i ejos ke eran todos los 2 i algo nervozos, ansi ke foeron los enpesijos de las deferensias, i de esto lis vino el etcho i a ravias, i mas non foe ala butika

1933

Asta aki si eskapa la partida mientres el

tiempo ke estuvieron Sr. Mochonatche kon su

ijo Sr. Bensijon en una butika fin a el anio de

5657