קורותיי, צֵ'לֵבּי משה א' [המחבר], עם אחי סנ' רְפָאֵלָצֶ'ה

2022

De aki i endelantre si enpesa la partida de los ijos

de Tch. Avraam en el tiempo ke estuvieron djuntos,

los 2 ermanos Tchelebi-Moche i Refaelatche.

2023                     Biografia de Tchelebi-Moche i Refael A. Arié.                    1880

Mozotros en este anio denpoes de la moerte de moestro Sr. Padre era ke non meravamos kaje dingun etcho solo este ke lo teniyamos i lo ivamos pasando solos seya en kaza komo i en la butika i siempre kamenavamos lo mas muntcho abatidos, i koanto a el moestro avenir non estudimos en nada sovre la manera ke lo ivamos a enkamenar otro ke por un sierto tiempo lo ivamos enkamenando lo todo sigun de antes i por mas tadre azero [azerlo] sigun seriya lo mijor,

En este anio li nasio a Sr. Refaelatche una, ija, i la yamo Rebeka, ke kon eya se izo tambien sigun el menester de este tiempo i su madre la kreyo i la kudio, i eya koando ya foe la edad de ir alas echkolas estuvo en todas i tambien eya kontinuo en la Gemnazia fin ala sinkena klasa, i denpoes estuvo en las echkolas i de los ufisios i ansi i otras, lo todo fin ke ya espozo,

Pasando komo 4-5 mezes denpoes de la moerte de moestro Padre, foe en un diya ke mos azen saver ke vino el Rabino de Filibe Hr. Haim ____ akompaniado, de los ijos de moestra madrasta la M. Viniziu, i su yerno Sr. Benoratche Koen i se abacharon ande Sr. Behoratche kuyumdji oglu, komo musafires kon dizirmos ke eyos vinieron por el etcho de la Ketuba, i mozotros ke non saviyamos koalo responder foe ke mos aderesimos a mi Sr. Esfoegro Sr. jshak G. Arie i moestro Tio Sr. Moche j. Arie por ke respondieran a esta demanda, i ke eyos sin tadrar, si lo adjuntaron a el Rabino de Samokov Hr. Avraam Koen, por platikar de mas antes sovre la vinida de estos komo una komision, kon una espada dezvainada, sovre la falsiya i konbenizon

2024                    Biografia de Tchelebi-Moche i Refael A. Arié.                      1880

parisiendoles ke asistian la mui regla la falsia ke la izieron de el presipio, ke kazo, si lo trucheron a el Haham Bachi ke por el koal tambien kale dizir komo es ke si decho enganiar de unos torpes, i estos ultimos ke ya vinieron en un lugar, de el presipio, ya lis konto, Hr. Avraam Koen ke mi Sr, Padre li teniya konfeyado, una ketuba, kon dizirle mi Sr. padre por razon ke un diya lo sintio dizir de su mujer, por la ketuba ke la izieron koando kazaron i ke era el Tosefed 100 liras, i ke la aviyan dechado en los parientes de parte de la mujer por goadrarla ke ansi era el uzo, i komo foe en el tiempo de la gera i kon mas kozas suyas foe ke i esta ketuba si pedrio tambien, i mi Sr. Padre sigun ya lo saven ke era mui Haham, i ke ya lo saviya por koando akontesiyan ansi kozas ke es el DIN, de azer la sigunda por ke sigun moestra lei es ke non si poede estar kasado sin ke aiga ketuba, i sin ke el lo dicho a su mujer ni menos a dinguno otro, en un diya lo yamo a Hr. Haim B. Moche ke el koal era el eskrividor de las Ketubod, i le izo eskrivir una moeva kon ke la izo i afermar de los EDIM ke eran el menester, i Hr. Haim el ditcho eskrivano era ke antes de la moerte de Mi Sr. Padre ya si aviya morido i la eskritura suya ja era konosida a todos i Hr. Avraam ke ya la trucho kon si esta Ketuba foe ke si la metio delantre de Sr. behoratche i Sr. Mochonatche, i eyos los tres, ke ya lo entendieron ke el etcho era solo por falsia, kedaron de akordo, por yamarlos a estos s-res ke vinieron de Filibe, i antes ke eyos deklaren koalo era ke lo keriyan demandar, de non dizirles ke ya tenemos mozotros ketuba,

2025                   Biografia de Tchelebi-Moche i Refael A. Arié.                    1880

i ansi foe ke lis prontimos en moestra kaza en el salon de el Chadirvan ke teniyamos en kaza por ke si rekojeran i ke platekaran, ke eyos vinieron kon hadra grande, i kon muntcha onor foeron a todos resividos, i denpoes ke ya bivieron el kahve, tomo la palavra Hr, Haim el vinido de Filibe, i dicho, moestra vinida aki a Samokov es para reglar la vida, de la Bu. Viniziu, mujer de Tch. Avraam Arie i esto a razon ke la Ketuba esta pedrida, i moestra propozision es ke la Bu. Viniziu, deve de bivir en un apartamento aparte de los ijos de Tch. Avraam, i esto ala onor de Tch. Avraam, kon ke si li deve de adjuntarlo una mujer por kompaniera, i un ombre por moso por servirla, i kalkular el menester de gaste por kada anio, i ansi de uvligar alos ijos de Tch. Avraam, ke li deven de versarle la suma ke si li nombrara, i esto lo foe avlandolo, el Sr. de Hr. Haim kon boz alta i de amenazavle, i los sentedores, riendosen adebacho de el mostatcho li dizen, kon un lingoaje mui delikado i repozado, en rogandole por ke iva aser boeno se era ke lo repetiyava, esto todo lingoaje mas repozado i kon un ton mas bacho i tambien mas entendivle, por rason ke non si estava nada entindiendo loke estava avlando, sovre esta repoesta el Sr. De Hr. Haim se aravio i se lavanto en pies i dicho ke el savia la gemara de Ketubod entera, i Sr. Mochonatche li dicho ke mozotros ya lo savemos ke el ya la save i de kavesa ma es ke i mozotros tambien ya la tenemos meldado esta Gemara de Ketubod, i lo enpesaron a platikar sovre la Gemara de Ketubod, i siendo ke eyos no lo kijeron mas avregonsar a Hr. Haim komo a un Rabino de Filibe li

2026                   Biografia de Tchelebi-Moche i Refael A. Arié.                    1880

dicheron ke todo loke avlaremos es en vazio, solo kon tiempo ke amostren la Ketuba, i konforme a eya es loke si poeda reglar, ala era dicho el Sr. de Hr. Haim ke non lo penso, ke la Ketuba era pedrida sin ke lo demostraron i ke ya i uvieron algunas ravias li dicheron ke mozotros ja la tenemos i la sigunda, ke anke kijo avlar sovre ejo ma tambien lo avregonsaron demando mil pardones i se foe i mozotros denpoes li dimos las 100 liras i algunos presentes i partieron todos djuntos kon la Bu. Viniziu,

Esto ke lo eskrivi en mas largo es por ke lo sepan ke akontese i ansi kozas i en okazion ke si sepan komportar, lo todo por este ke es amistozo de sus ijos,

En el anio de 5641, mozotros ke estuvimos kansos, de unos koantos atagantos ke los foemos tuviendo, seya esta etcha, de moestra Madrasta komo i tambien uvieron i algunas i otras kozas ansi foe ke non merimos dingun etcho de la butika i menos ke mos i merimos algun konto, por reglarmos moestro andar de adelantre solo era ke lo ivamos enkamenando sigun de mas antes i seya en la plasa komo i en kaza, i komiyamos en una meza mui aunados i ansi tambien i el gaste de la komania era de una bolsa, solo ke sigun de antes era ke por mozotros seya en el vistir komo i otros moestros gastes era ke molo eskriviyamos aparte,

los etchos ke mos foeron mas kurtos lo izimos de azer

2027                   Biografia de Tchelebi-Moche i Refael A. Arié.                    1881

algo de la ikonomiya en los gastes en general, moestra okopasion era lo mas muntcho ke ivamos dando la foersa sovre el lavoro de el Maaden, anke ke non kamenava boeno, ke lo mas muntcho era por poder tambien i ir kovrando de la amele ke teniyamos mui muntcho de aver, ke estos aparte ke non keriyan pagar al menos kon lavoro era i ke se ivan levantando i kon marazod^[11], i ansi foe ke los ivamos a muntchos dandolos, alos djuzgos, i era ke algunos ya pagavan i kon algunos molo konveniyamos de afoera, i los mas muntchos era ke eniegavan i no aviya mas koalo azerles,

mozotros kontinoavamos de mizmo en el negosio, de el kolonial i este de los echpirtos, los kreditos era ke los teniamos aviertos en todos los komisioneres i bankas ma era ke non mos enkachavamos en etchos grandes, la firma ke la yevavamos era komo de antes Avraam M. Arié mozotros kameneimos siempre de ser sovre mas rekojido lo todo ke en los negosios ke los ivamos aziendolos era ke non mos estavan traendo dingunos profitos, porke las konkorensias eran en este tiempo mui grandes i tambien kale dizir ke i mozotros non lo sopimos enkamenar ke non konosiyamos estos negosios,

Mozotros en el anio de 5642, moz merimos un konto i mos izimos un bilanso, por nombrarmos moestro kapetal, i tambien i moestras %, i yo ke teniya mas grande el kapetal foe ke non lo kije buchkar, por koala razon foesa, i ansi foe ke non tovimos menester,

2028                   Biografia de Tchelebi-Moche i Refael A. Arié.                   1882

de muntchos kontos i la suma ke mozotros lo topimos i ke mos i demostro, de furtuna la izimos a kontra metad, i kon la kontentes de todas las 2 partes mos konvinimos de ser torna haverim kon nombrar i a igual parte seya por las ganansias komo i por las piedritas, i mos afirmimos kontratos, i mos metimos de moevo en el lavoro,

i morimos de mizmo en la mizma kaza djuntos sigun de antes i tambien komiyamos i en una meza kon ke el gaste era tambien a kontra metad, solo esta de moestra mantinimiento i koanto a este de vistir i otros gastes partikular por mozotros eran kada uno por su konto, i mozotros seya los ombres komo i tambien i las mujeres eramos mui muntcho aunados seya en kaza komo i en la plasa,

Entre los negosios ke ya los teniyamos foe en este anio ke izimos traer partida de kovro deretcho de las fabrikas, ke de esto tovimos mas muntchas ganansias, i esto era ke fin a esto tiempo non aviyan otros vindidores de este artikolo i la konsumasion era tambien grande ke non era solo por samokov ke los vendiyamos otro ke viniyan de los deredores tambien por merkar, foe en estos tiempos ke si espandio muntcho el uzo por los kazalinos de mandarsen komo presentes en Jovan den^[12] ansi kovros,

En este anio ke si li renovaron torna las maladiyas de mi mujer M. Beju, i ke su Sr. padre Sr. Behoratche ke i el tambien estuvo en este anio algo hazino de sus maladiyas i ke ya se ive a ir a Viena por merarse de los medikos, foe ke si foe i eya tambien kon ke i se lo yevo a johanan ke era tchiko, el ke non si apartava de mi

2029                    Biografia de Tchelebi-Moche i Refael A. Arié.                   1882

ke yo lo teniya en mis brasos para koando se ivan a sevir al Paiton kon yores era ke non si kiriya ir ma por foersa lo asovimos ke estuvo yorando unas koantas oras fin a el grado ke se iva a boltar atras por decharlo i torna irse ma ya foe ke si kedo kayado i se foeron a delantre, mui boenos fin a Viena, i en Viena eyos ke estuvieron ande los medikos foe ke los mandaron ke izieron unos koantos banios en karkes [karles] bad^[13] i unos koantos en Franses bad, i esto ke ya lo izieron eyos si toparon mui kontentes, i entre los banios i en Viena ke estuvieron tambien algo de tiempo, foe ke lis turo este viyaje komo a 3 mezes, i se vinieron sanos i boenos i kon un gaste de 2200 fr. ke mos kosto

En este tiempo tambien kijo irse i M. Behuruteha la mujer de Sr. Refaelatche por vijitar a sus parientes en Lom. i ke ya si foe kon sus kreyaturas, i mozotros ke kedimos solos en kaza kon mi ija Rachel i por ke mos merara seya a mozotros komo i la kaza la tomamos a Bulisu de Moni, komo kudyadera i siendo ke esta non pudo, kudiar la mobilia foe ke entro la poliya en los kanabes i fotolios, i las siyas ke eran todos de ropas de seda kabariyados kon lanas i otros, i ke eran todos merkados de Viena, i koando las mujeres ke ya vinieron i lo vieron foe ke los bozdeimos todos i los ketimos de kaza por goadrar lo restan de la mobilia i ansi es ke fin a este tiempo restan en los magazenes i foe de esta manera ke si depedrieron, i mas tadre koando mos vinimos a Sofia los renovimos ma non foeron etchos sigun de loke eran de el presipio,

En este anio ke los rusos ya si foeron todos i las

2030                   Biografia de Tchelebi-Moche i Refael A. Arié.                    1882

Djidios, tuvimos grande libertad, kon todos los deretchos de sevdadinos, ke todas las administrasiones ya pasaron alos Bulgaros, i ke eran las leés igoal para todos, sin dinguna deferensia de relejion, i nasionaledad, ma los djidios ke ya tuvieron esta libertad si komportavan mui ambiertos enfrente de los krestianos, i era ke se ivan algunos de los Djidios, ke trespajavana algunos de los krestianos ke de esto foe ke ivan goadrando malkerensia, i se akechavan, koantoa los etchos todos kamenavan mui boenos ke los Rusos decharon muntcha moneda, i eran mui galantes, i gastadores,

En este anio li nasio a Sr. Refaelatche un ijo i lo yamaron Avraam, ke kon el se izo en el Birkad mila boda por la sivdad entera, foe en esta boda, ke H. Tchelebon Avdala enkomendo a su mujer por ke non li prontara el pastel para el kuchluk kon la entision ke ya lo ivan a yamar ala boda, ke siempre ya era i el uno de los viejos i notavles de la sevdad, ma afito ke por olvido non lo yamaron i kedo sin komer en akel diya ke sovre esto uvieron algunas kechas ma foe la kulpa de los Chamachim, ke si ulvedaron, i su madre lo kreo sigun de todos los otros,

En el anio de 5643, la esposi, a me ija Rachel kon Sr. Leon D. Arié ke eyos de mas antes ya teniyan etcho las amores, i foe Sr. Nesimatche E. Arié. el kazamentero, i mozotros ke ya lo topimos por deretcho, i kon la kontentes, de la Novia, lo izimos el

2031                  Biografia de Tchelebi-Moche i Refael A. Arié.                1883

espozorio kon el mas grande saltanat, ke tuvimos kombedados a todos parientes i los amigos en la notche i komimos todos djuntos, kon los Tchalgis i kiotchekes, i en el espozorio estuvieron sevdad entera kombedados seya los ombres komo i las mujeres, i moestras kondisiones foeron ke li deviya de darle 300 pol emperiales por kontado i achugar ala miya onor, i mientres ke eyos estuvieron espozados eya ke el novio siempre vijitava ala novia, i el li tomo a un maestro de piano por ke la embezara ke mozotros el piyano ya lo teniyamos en kaza, i eya se enbezo mui bien i era diyas enteros ke estava okopada en este i tambien le traiva prezentes i sigun el uzo de akel tiempo ke era ke si mandava presentes seya de la una parte komo i de la otra todo se izo, ke esto ya lo tengo eskrito en koalas fiestas era ke si mandavan, estos prezentes i siempre mos i vijitavamos,

Mozotros era kon el lavoro de el maaden en Kistendja ke lo ivamos kontinuando, lo todo en Hevra kon el Sr. Zaharie, anke ke non estava boeno, el etcho ke non si estava pudiendo vendersen los fieros, i kon el balkan tambien ke lo teniamos en Kiostendja, ke aviya muntcho kuri, arvoles por el material de tavlas i otros foe en este tiempo ke vinieron unos makedoniyalis bitchkidjis ke eran maestros de tortar las tavlas, ke por los presipios los alkelavamos estos bitchkiz ma mas tadre los lavorimos mozotros por moestro konto ke era un etcho bien enportante, i ganansiozo, ke esto tambien ya lo eskrivi mas antes en las otras partidas de koala forma era este lavoro, i a razon seya de el etcho de el

2032                   Biografia de Tchelebi-Moche i Refael A. Arié.                   1883

maaden komo i por i los betchkis, ke yo Tchelebi iva a Kiostendja por azer algunas revizias i para esto ke lo teniyamos a un sierto Hristo Chehtov, por nastoinik, para el maaden i en mizmo tiempo era i ke merava i este etcho de los betchkis, foe en un diya ke mos estavamos endo a pie alos betchkis, djuntos los 2, ke era en el balkan moestro, i en medio de el kamino, foe ke enkontrimos a un grande kolevro, ke su largura era komo de 2 metros, i su gudrura komo de un braso de persona, i yo komo estava avlando kon el ditcho nastoinik, foe ke non lo ateni de el presipio, a este kolevro, ke viniya a el moestro enkontro, i Hristo ke ya lo vido, lo izo ke mi detuvo kon su mano en mi braso, por non kamenar adelantre, i azerme desenias de restar en el mizmo lugar, i tambien ke non avlara, nada, i yo koando ya lo vide me estremesi entero, ma non aviya koalo azer porke ya lo saven ke de el kolevro la persona non poeda fuir, a razon ke el kolevro salta i siempre mos toma la delantera, i esto afito ke estavamos enfrente de una butika de moestro kovatch, ke mos estava kortando^[14] por moestro konto nales por kavayos, i mozotros ke restimos en el mizmo lugar ke lo vimos foe ke i el kolevro tambien resto de kamenar, i el hristo enpeso a dizir, izmirtva jelezo, izmirtva jeleso ke i ami tambien me izo dizir estas palavras de izmirtva jelezo i de esta manera foemos kontinuando a dizir i sin meneyarmos de el lugar ke estavamos, ansi i el kolevro tambien estava sin kamenar, i denpoes ke ya estuvimos komo mediya ora ansi en pies i siempre diziendo estas palavras i ke ya eramos i kansos, foe ke salio el kovatch, de la

2033                   Biografia de Tchelebi-Moche i Refael A. Arié.                    1883

butika por ke ya lo sintio avlar, i era ke estava kalsado kon unos sapatos de lenio, i de una futa de koero, ke el koal tambien ke lo vido i sin ke nada mos avlo el si foe ala butika i se entcho en su futa una [unas] koantas chlaknas^[15] pedasos de la furda de el fiero, i bolto de moevo i keto de su futa un pedaso de estos fieros i ilo arondjo, ensima de el kolevro kon ke i li afeto a darle djusto en la kavesa, i al punto foe ke el kolevro si arodeyo, komo una karutcha, en espeso i denpoes este kovatch se entro de moevo a su butika i kaento la macha kon koala, afora el fiero koando lo bate ke esta en kaente, i kon los sapatos de palo kamenava a pasos grandes i se aserko a el kolevro ke ya estava aida arodeyado i bive, i kon esta macha li apreto la kavesa, i el kolevro grito un grito godro, i de esta manera lo mato i lo tomimos a el kolevro i lo enkolgimos en un arvol por ke pasaran las 24 oras ke resta bive, anke matado, i denpoes yo en un palo lo pasi el koero, ke si eskortcha entero, solo koando si pasa en palo, i me truche a Samokov, i sigun mos dicho el kovatch era ke si no mos restavamos en el mizmo lugar era ke podiyamos estar en pirikolo por esto lo eskrivo en okazion ke sepan rijirsen,

En este anio ke si vendio el lugar de los hambares de Rachid Bei, ke teniya un kampo grande i una butika i los Hambares, los merkimos mozotros, i esta butika era la apteka de el mediko Sr. Andonake Unterberg, en el tiempo de el turko, i mas tadre ke las vignas i los maadenes ke los ivan derokando foe ke mozotros rekojimos los materiales de 2 vignas i fragoimos 5 magazenes por depozitos

2034                   Biografia de Tchelebi-Moche i Refael A. Arié.               1883

en la una fatcha de estas kampo, ke tenia tambien i un orno grande i ya era ke tomavamos i boena kira i denpoes koando lo vendimos elkampo ke tenia lo fragoaron ke es agora el Hotel Sofia,

A razon ke la kira de el magazen ke lo teniyamos enKostan ke non estuvo en regla pagando la kira foe ke mi foe yo a Kostan por reglarlo i lo ize ke lo resintimos kon la kira moeva ke ya estuvo de moevo por kada mez ke foera pagando lo viejo i lo moevo, i merki tambien algunos artikolos de vidros por venderlos en Samokov ansi i otras kozas tchikas,

En el anio de 5644, li nasio a Sr. Refaelatche un ijo, i lo yanaron Jaakov jak, ke en este parto estuvo en Samokov el tio Hako, ke vino para el parto i a esta okazion foe i el tambien kon su mujer los sandakes, i en su onor se izo boda grande tambien en el Birkad Mila, estuvieron la sevdad entera kombedados seya ombres i tambien las mujeres, i el papu li mando muntchos prezentes seya ala parida komo i a el nasido, i denpoes ke ya estuvieron komo 3 semanas si foeron a lom i eya su madre lo kreo i lo kudio,

En este anio mozotros echpekolimos en los etchos de kolonial a vender en detalio, i para esto avrimos 3 butikas, kon ke metimos moestros personales i kon la moestra admenestrasion, i era ke aziyamos los empleos de las ropas de Filibe i de Sofia, i tambien truchimos los modos de fieros de las fabrikas por los nales i muhes i otros lavoros, i de esto era ke por los presipios ke ya aviya mas

2035                   Biografia de Tchelebi-Moche i Refael A. Arié.                1884

grande konsomasion era ke ya aviyan tambien i boenos kontos, seya en los artikolos de el kolonial komo i este de los fieros i mozotros era ke en kada tadre lis rekojiyamos la moneda ke si vendiya en todas las 3 butikas i era lo todo kon muntcho konto, i alos personales lis pagavamos mezada, aparte ke ya lo teniyamos i el etcho de los kovres era i de esto ke ya aviya tambien boenas ganansias, koanto a el etcho de el Maaden era ke diya kada diya iva endo atras i ansi foe lo foemos enmankandolo, fin ke kalio serarlo i enpesimos a buchkar de poder kovrar koalo si podiya de los averes seya de la amele komo i de los kovatches i vignares por ke esto non era poko, i lo mas muntcho foe por viya de los djuzgos ke anke lo izimos ansi torna kon todo non podimos kovrar ne el 20 % i lo restan batio todo, i kon los Betchkis ke los tovimos por moestro konto era ke el matirial lo ivamos siempre mandandolo a Sofia por venderse ke ya aviya siempre konto ma mas tadre ke esto lo enpesaron a azer todos los kazales de los iskeris ke eyos tambien teniyan sus bitchkis en sus kazales i eyos mizmos era ke lo lavoravan i eyos yevavan i el matirial ke lo ketavan a sofia por venderlo i esto kon sus karos ke non pagavan kiras era ke a eyos a todo presio ya lis konveniya, i ansi foe ke la konkorensia foe mui grande i a mozotros non mos konvino mas i ansi foe ke i esto kalio abandonarlo, i era ke lis vendiyamos lenios por ke eyos si los kortaran los trupes^[16] kon ke i teniyamos moestro korudgik^[17] ke li kontava los trupes ke kortavan, i mos kontavan el enporto en kada semana, mas tadre ke el governo detuvo la exploatasion de todos los

2036                   Biografia de Tchelebi-Moche i Refael A. Arié.                1884

kuris foe i de el moestro tambien ke lo detuvo, anke ke mozotros ya los teniyamos moestros dokumentos en mui boena regla i ke deklavan tambien ke era i kori moestro balkan i de todas las reklamas ke las izimos de boka todas foeron en baldes fin ke mas kalio i ke avrieramos proseso kontra el governo ke esto mos turo longo tiempo ma ya foe ke ganimos, i esto kon ke mos amostravan koalos arvoles era ke los podiyamos kortarlos i el etcho ke ya troko, foe ke non i uvo mas konviniensa para lavorar en esto

En el anio de 5645 mozotros mos merimos un konto i en mizmo tiempo kedimos de akordo i por espartirmos, seya de los etchos de la plasa komo i de estos de kaza, mozotros ke mos izimos un bilanso foe ke entre mozotros solos mos konvinimos seya en los mulkes komo i en los averes i estos de las ropas ke las teniyamos, i lo todo lo apartavamos kalkulando las valores en 2 partidas i era ke etchavamos el goral i a ken de mozotros koalo li kaiva era suyo sin ke uvira mas en koalo avlar, i koanto a las mobilias i vistidos seya de moestro padre komo i moestra madre era ke lo todo estava en kachas aparte foe ke algunas kozas ke si teniya el menester por la boda ke iva a kazar rachel mi ija era kon koento ke las iva tomandolas seya samaras komo i djoyas, i ansi i algunas i otras kozas, koanto a el mantinimiento era ke komiyamos torna en una meza, i el gaste lo gastavamos a kontra metad, i esto koando ya lo izimos i mos afirmimos papeles de

2037                   Biografia de Tchelebi-Moche i Refael A. Arié.                1885

parte aparte, lo izimos ke estovimos torna en una butika i mos meravamos kada uno su etcho aparte, lo todo fin ke lo podimos todo mui bien reglarlo, i kon esto era ke mos i ayudavamos en todos moestros etchos de los unos a los otros komo ke foera uno i mizmo etcho, i kon el grande aunamiento, ke ya lo tuvimos i ansi foe ke de la moestra espartision non lo supieron fin ke mos apartimos i de las butikas, ke de esto se maraviyavan mui muntcho toda la djente,

Siendo ke la boda ya iva a ser en el 13 Sivan de este anio, i koando ya salimos de Pesah mi foe yo a Kostan por azerle la achugar para Rachel, ke estuve komo 5 semanas i me vini kon la achugar en djunto, i en el 13 Sivan ke foe dia de mierkoles dimos los kiduchim, i sigun ke era el uzo de enkolgar la achugar foe etcho kon una semana de mas antes i vinieron la sevdad entera seya los ombres komo i las mujeres todas a vijitar i en el diya de Chabad mosi i vinieron todos los parientes a komer kon sus komidas sigun el uzo de akel tiempo, i mientres ke estuvo la achugar enkolgada en moestra kaza era ke en kada notche teniyamos djente a pasar la ora, i se izo tambien i el kina yedjesi^[18] i la entrada kon muntcho saltanat, ansi i en el diya ke si yevo ala noviya a dar los Kiduchim, i de la manera i ke se izo tambien la boda en la kaza de el Novio ya lo eskrivi en la partida de gr. Davitchonatche de este anio, i ansi ke foemos de todas las 2 partes mui kontentes i pasan mui bien seya kon su marido komo i tambien kon todos los de kaza, en todos los puntos, i mas tadre ke eyos ya estuvieron en kaza aparte era de mizmo ke lo pasaron,

2038                   Biografia de Tchelebi-Moche i Refael A. Arié.                1886

En el anio de 5646, ke moestros etchos de la plasa ya estuvieron mui bien resentados, i kada uno por mozotros foe ke i kedimos de akordo por espartirmos tambien i alas mobilias de kaza ke esto lo teniyamos lo todo en un kavo ansi tambien i kon los vistidos seya de moestro Sr. padre komo i de moestra S-ra madre, i denpoes ke apartimos de los vistidos por moestra ermana M. Buhurutcha i algo i de las mobilias lo restan lo todo lo tomimos en nota kon monbrar [nombrar] tambien i los presios, i esto en las kozas ke eran a tekis^[19] ke por las kozas ke eran a pares i igual ya las tomimos kontra metad, esto foe seya en los vistidos komo i en las mobilias i en las djoyas i a el konto de la moneda molo espartimos, en traendolo a igoal la suma, i koanto ala kaza ke moravamos la espartimos sigun la eskisa ke ya la tenemos i la izimos kon ke la apartimos kon azer i paredes seya en la kaza komo i en el kortijo, lo todo a el gaste de en medio i Sr. Refaelatche si avrio poertas seya por la kaza komo i por el kortijo i anke ke estovimos aparte ya era ke siempre estavamos en un kavo, por ke non tovimos dingunas deferensias seya mozotros los ombres komo i tambien i las mujeres, fin a el diya de oi, i Sr. Refaelatche ke mas ya non estuvo en la butika ande yo estava el si asento en su butika ke li kayo esta ke teniyamos merkado de Rachid Bei ke era en kioche i era ke kontiniava en el etcho de el bakalik,

En este anio li nasio un Ijo a Sr. Refaelatche i lo yamo leon Jeuda i vinieron Sr. Aslan kon su mujer i Bjuyu a el parto i al sandak foe Sr. Aslan i se izo boda sigun las otras,

2039

Asta aki si eskapa la partida de el tiempo

ke estuvimos djuntos, Yo Tchelebi-Moche kon

Sr. Refaelatche fin a el anio de.5646,