קורותיו של סנ' בנציון מ. אריה בפיליבה

1942

De aki i endelantre si enpesa la

partida de el Sr. Bensijon de el anio 5657

fin a el anio de 5661

1943           Biografia de el Sr. Bensijon M. Arie.               1897

En el anio de 5657, sigun ditcho ke el Sr. Bensijon partio por sofia i sin ke tenija bastante de moneda, i denpoes ke el ja estuvo algo de tiempo kamenandose en bazio foe ke topo a empeigarse ande un sierto komisioner M. Loran dedeken, i se konvino por 80 fr. de paga a el mez, ma era ke lo azija muntcho lavorar, I tambien lo azia ke lo mandava alos lugares lechos de Sofia, porke li enderetchara las deferensias ke el las tenija kon sus klientes, i esto kon ke lo akavedava por ke viniera mui presto, sin ke lo azija konto el tiempo ke li podija turar, por ir i venir, i ansi era ke li kalia ke estuviera siempre koriendo, i tambien ke lo trespajava, i de vez en koanto koando era ke li dava a eskrivir alguna karta i denpoes ke el ja la eskrivija kon muntcha atansion i adetras de sus diktiamiento, i a tan presto ke non li plazija la arazgava i lo kovalejava, i el Sr. Ben-sijon ke non tenija koalo azer era ke lo iva somportando, i se iva muntcho i aflakandose, i mas tadre li djo este dedeken, por ke espegara los miles de los anvelopes ke si li avijan apegado, en el kamino, i esto ke li kalija ke espegara a sienes en kada ora, i sin ke si arazgara ni el uno de ejos, ke altramente era ke non si podijan de eskapar ni en unos koantos anios, i esto de los anvelopes li foe a el Sr. Ben-sijon, grande apreto, asta ke non lo pudo mas somportar los lavoros i sovre todo los trespajos, foe ke li kalio ke si saliera antes de el tiempo, ma era ke se iva mui muntcho sikilijando non seja ke non iva a topar tan presto en otro lugar empeigo, i de

1944             Biografia de el Sr. Bensijon M. Arie.           1897

esto el si foe muntcho aflakandose i li vinieron tambien i unos frios, ke li tomavan en kada dija, el tenija una kamareta en Sofia en Selanik Han, ke merava a el kortijo, i era por el envierno, el si etchava solo en esta kamareta sin ke la azija kaentar, por non azer gastes, i en este tiempo ke estuve jo kon Biju en Sofia era ke siempre lo vijitavamos, i lo kudijavamos, ke viendolo en el grado ke el estava anke ke li porfijavamos por ke si foera a Samokov, ma el esto a dingun presio non lo kerija ni sentir, ke todo su dizir era ke komo el topava a empeigarse ja era ke se iva a sanar, i koando mozotros ja mos ivamos a ir a Samokov ke lo jamimos por ke si viniera djunto kon mozotros i de tanto ke el estava furiozo de Samokov non kijo vinir i mozotros ke ja foemos a Samokov si los izimos saver a sus parientes por el grado ke si topava i ke presto lis kalija ke lo trucheran sigun ke esto ja lo izieron i lo trucheron a Samokov bien hazino i ke el ja foe mui bien merado i kudijado en el tiempo de 2 mezes ke el sufrio en la kama hazino foe ke si sano, i el siempre lo kijo de non estarse kon el padre en Samokov anke ke ja li dizijan ke ja lo tenijan de kudijar i toparle i para el algun etcho en Samokov, sigun de todos los otros ma el non lo kijo pensandose esto ke el lo paso i tambien el sujo avenir i mas ke su mujer la M. Rejina era siempre ke lo akonsejava de non estarse en Samokov,

1945             Biografia de el Sr. Bensijon M. Arie.          1898

            en el anio de 5658, ke el Sr. Ben-sijon ja estuvo sano i boeno, era ke el siempre iva korespondiando seja a Sofia komo tambien a Filibe kon sus amigos i esfoegro el Sr. Nesimatche Kalev, lo todo sovre poder alkansar a topar algun etcho koala foesa or el empeigo, i su esfoegro ke esto lo kirija tambien foe ke li topo a un merkader de vistidos prontos ke vindija i kerija a un enpeigado, el koal era Sr. Echkenazi, i kon muntchas rekomendasiones de su esfoegro foe ke si kontento a tomarlo kon una paga de 80 fr. a el mez i esto ke si lo izo saver, i Sr. Ben-sijon mui kontente de esto el sin tadrar partio por Filibe, i se enpeigo ande el ditcho Sr. Echkenazi, i se metio en el lavoro kon grande atansion, i lo iva kontinoando, i esta paga ja era ke li abastava por ke el estava en la kaza de su esfoegro, ke lo kerijan mui muntcho i lo protejavan tambien mui muntcho, ejos de todas las 2 partes eran mui kontentes, i era ke i el Sr. Echkenaze tambien lo merava muntcho, visto ke ja era ke li merava su etcho kon grande atansion, i ansi foe ke mas tadre ja li konfejo todo su etcho en su mano, i tambien era i ke li jevava i su korespondensija, i estos de la plasa,

El denpoes ke ja estuvo unos koantos mezes solo en filibe i ke ja iva a poder estarse i por el avenir, i kon algo de la paga ke ja li pojo el Sr. Echkenazi el se jevo a su mujer i krejaturas, i se tomo una kaza vizina a la kaza de su esfoegro la koala ke ja era de su esfoegro i kon una tchika kira, i el padre de Samokov li mando tambien i algo de mobilija, i algunos menesteres de kozina

1946            Biografia de el Sr. Bensijon M. Arie.           1898

ejos avrieron la kaza, i se resentaron i bivijan mui kontentes, i su esfoegro kon toda su familija ke ja los vijitavan i los kodijavan siempre era ke ja estavan kontentes, i El Sr. Behoratche su Papu kon su Padre el Sr. Mochonatche ja era ke li mandavan algunos regalos en kada mez por vinirle en la ajuda para el gaste ke la paga ke li pago el Sr. Echkenasi alos kavos foe de 110 fr.

En este anio li nasio una ija en su estar en Filibe i ejos ke ja estavan mui resentados en la kaza foe ke la pario en su kaza, i la jamaron Vida, i era sus parientes de filibe ke la kudiaron si entiende kon todos los menesteres, i la kaza anke ke era tchika torna kon todo la vijitavan i li mandaron todos sus parientes los prezentes ke si mandavan a las paridas,

En el anio de 5659, era de mizmo ke el Sr. Ben-sijon kontinoava en el etcho ke li tenija konfejado el Sr. Echkenazi su amo, i ja eran de todas las 2 partes mui bien kontentes, solo ke la paga ke li estava dandole era ke non li estava abastisiendole por topar sus gastes de la kaza ke el la tenija, a razon ke los presentes ke li mandavan de Samokov foe ke en algunos mezes non li foeron mandando, i a esta razon li kalia ke si enprestara de sus amigos, ke esto li vinija mui pezgado pensandose komo era ke los iva a pagarles, sovre esto el se akecho ande sus parientes de Samokov,

1947           Biografia de el Sr. Bensijon M. Arie.        1899

            En los mezes de Juli i de avgusto, ke ja era muntcho kaente en Filibe, el li demando de su amo por ke li diera algun tiempo de konjeto, ke esto ja lo davan alos empeigados, i foe ke i a el tambien el Sr. Echkenazi li djo 2 mezes i se vino a Samokov, solo en dechando a su mujer kon sus krejaturas en filibe i el los paso estos 2 mezes en Samokov en la kaza de el padre, mui kontente i ke ja si remetio tambien boeno de la kanserija ke el la tenija en el etcho, i denpoes el si foe torna a Filibe en su empeigo i lo iva mui kontente pasandolo, seja en kaza komo i en la plasa.

El de koando estuvo en Samokov kedaron de akordo kon su Sr. Padre por merkarlo algunos artikolos de filibe ke el los vendija en Samokov i de esto ke le tenija de pagarle su komision, i de esto foe ke lis kavzo a tener korespondensias mas espeso por ke antes ejos era mui ralo ke si eskrivijan, porke el Sr. Ben-sijon nunka non si akecho ande sus parientes de Samokov en los tiempos ke el sufrija por moneda, i la suma ke li mandava en kada mes era ke el papu li mandava a 20 fr. i el padre a 10 fr. i 110 fr. ke resivija de su mezada era lo todo ke kon 140 fr. ke si pasava, i ansi era ke i le kalija ke iziera la mas grande ikonomija ma el ja era kontente de esto ke non estava en Samokov, i visto ala ikonomija ke ejos la azijan ja es bien entendido ke i ansi eran tambien i mantenidos a tiempo ke el Sr. Ben-sijon li kalija ke foera mui bien mantenido por ke el lavorava muntcho, i de esto foe ke el de moevo enpeso a tener algo de flakeza i dolor en la tripa, i el en tal de non pedrer este

1948         Biografia de el Sr. Bensijon M. Arie.           1899

            Empeigo i kon azer muntcho i gairet era ke ja se iva mui demaniana a el lavoro, sin ke si merava por su salud, i su mujer tambien era ke lo mandava seja por ke ulvedara sus flakezas or seja por ke foera bien visto a su amo, era ke algunos de los parientes koando ivan a Filibe i ke lo vijan a el Sr. Ben-sijom ke iva endo siempre flako, i esto ke ja si lo dizijan a Sr. Mochonatche ma el era ke non dava dinguna atansion de esto i se araviava koando li kontavan, era solo su madre la M. Tamaro ke lo kudijava mui muntcho i le mandava kaje siempre koalo podija de moneda i sin ke lo supiera el Sr. Mochonatche por ke i kon eja era ke si li araviava koando li avlavan por su ijo el Sr. Ben-sijon, era ansi ke lo pasavan,

En el anio de 5660-61, era de mizmo sigun de el anio Pasado ke lo iva pasandolo, i lo todo kon ir aziendo el gairet, foe ke la flakeza si li foe enfortesiendole fin a el grado ke kajo en la kama, i tuvo la hazinura de tripas, (dezanteri) i sufrio 2 mezes de esto, i era los parientes de filibe ke lo ivan akomodandolo i visto se iva mas enfortesiendole lis telegrafejaron a sus parientes de Samokov por ke foeran ke avista partio la madre, ma ja foe tadre ke el ja estuvo mui muntcho entrado en la hazenura ke i mas denpoes li kalio ke si foera i el padre, i estuvieron en Filibe fin ke si sano i esto lis kosto komo a 1000 fr. solo ke kedo tos^[3], (kataro)

1949              Biografia de el Sr. Bensijon M. Arie.          1900

Koanto a su amo el Sr. Echkenaze era tambien i el ke lo kudijava mui muntcho i su mezada era ke si la i pagava en mui regularmente, i koando ja estuvo sano i boeno el si foe de mizmo a el magasen, ma su amo foe ke lo akonsejo porke si estuviera algo de tiempo ainda en kaza porke si enrezijara mas mijor, ke lo izo i esto de estarse i otros 15 dijas fin ke estuvo sano i boeno i se foe a su lavoro i sus parientes ke ja si vinieron a Samokov era ke kontinoava de mizmo sigun de antes, i el Sr. Echkenazi ja era mui alegre ke ja si sano ma el lo avlava ke foe mui repentido de este empeigado, i anke todo esto ja era ke li amostrava muntcha kara i non li dava muntcho lavoro sigun de antes, por ke era sin foersa,

            Era de mizmo i en el anio de 5661 ke kontinoava, en el mizmo magazen i lo todo era kon grnande flakeza i mas tadre el lo enpeso i a ketar i sangre por la boka, i esto lo izo mui muntcho espantar, ke visto a esto foe ke si foeron de moevo sus padre i madre a Filibe i por buchkar el molde de sanarlo i ejos ke ja li jamaron todos los medikos ke avijan en Filibe, i ejos ke ja lo kuravan i lo examenavan foe ke lo vieron ke el ja estava entrado muntcho en la maladija de la tekija, i la kura era ke li kalija ke estuviera en el mas grande repozo i mui bien merado i kudijado, uke [i ke] non tuviera dingun modo de lavoro ni de okopasion, i por mas mijor li dicheron sea los medikos komo i tambien i sus amigos por ke si foera en los lugares kaentes, i el si foe a Gurfu, por pasar la enviernada, solo ke moneda el ke non tenija i su Sr. padre tambien ke non li kijo nada

1950             Biografia de el Sr. Bensijon M. Arie.          1901

darli por ke li dizija ke i el tambien non tenija, ansi ke lo izo ke si enpresto de sus amigos kon entereso 500 fr. i el esfoegro ke li djo 400 fr. foe ke kon esta suma el ke si foe, i arivando en Gurfo ja foe ke topo i a djente de Sofia ke si avijan ido por ansi maladijas i lo pasavan los dijas djuntos kon ejos, i de esto denpoes ke el ja estuvo unos koantos dijas en Gurfu foe ke si hazinio i se etcho tambien i en kama i siendo ke estava solo en una kamareta i ke no avija ke lo kudijara, foe ke los amigos lis eskrivieron a sus parientes por ke li mandaran a alguna persona por ke lo kudijara ke estava etchado en kama i ejos li mandaron a su mujer M. Rejina ke la koala ja era moi debabija^[4] i koando la vido el Sr. Ben-sijon a su mujer si gusto mui muntcho, i eja ke ja lo kudijo mui bien foe ke si lavanto de la kama, i lo ivan pasando la enviernada los 2 algo boena i koando ja arivaron los mezes de juni i juli los sofijales ke avian ja foe ke si vinieron todos i restaron ejos solos ma siendo ke la klima ja foe mui kaente koza ke non lo podijan somportar foe i ejos ke partieron i si vinieron a kostan, i se iva aziendo merar de el Dr. Lusien ke ja estava en kostan, i viendolo ke non estava boeno el lo mando ala ada de Halki, ke es komo 2 oras lechos de kostan, i ejos ke ja estuvieron unos koantos dijas i siendo los gastes li eran grandes i ke non tenijan ken ke los detuvieran, ejos si vinieron a Samokov, ma non avlava muntcho porke los medikos li defendijan de avlar i era ke siempre lo kalija ke estuviera komiendo, el si komija a el dija de 12 a 15 goevos, i se bivija de 2 a 3 kilos de letche, i

1951                Biografia de el Sr. Bensijon M. Arie.            1901

aparte el tambien komija de todo modo de las komanias, sin ke si artava, i ansi era ke estava mui godro i los mustatches los tenija mui grandes i la boz mui godra, i ronka, i su foersa era mui poka, el de las 24 oras de el dija era ke las 15 estava dormiendo, i ansi lo iva pasandolo en el enverano, ke sus krejaturas ja estavan en Samokov por ke la kaza de filibe la avijan serado de koando si foe la M. Rejina a gurfu, el koando en algunos dijas ke salia ala plasa, si asentava en la butika de el padre i en esta de Sr. Jechua, i mas tadre ke el ja estuvo mas mijor el se iva ala kavane i estava pasando kon djugar en kurtas i el tavlo i de esto era ke iva i pidriendo, i sus parientes se sikilijavan de esto ke djugava sovre todo i ke iva i pidriendo muntcha moneda, anke ke lo akonsejavan porke si repentiera de esto i ke si englenijar a kon algunas otras kozas ma el non sentija i esto era koando ja estuvo sano i boeno i ansi era ke toda la familia eramos gustosos de verlo boeno,

1952

Asta aki si eskapa la partida de el Sr. Ben-sijon

M. Arié komo tambien i estas de los djerenansios de

Tc. Gavriel, fin a el anio de 5661.