הסניורים רפאל ומשה דויד א. אריה

417       Biografia de S-r. Refael i M. David A. Arie,    1879

            En el anio de 5639, ke H. Avramatche, ja foe moerto i S-r, Refael ke estava en Samokov, i ke ja estava en la kaza de su Padre, ejos li goadraron el anio de limunio, por su Padre, ke iva en kada dija a el Kaal, sija la maniana komo tambien i la tadre en todas las Tefilod, i la Bu. Revkutcha non salia a dingun lugar ke si estava en kaza, i todas sus parientas de kontino la akompanijavan i de mizmo la kudijavan por todos los menesteres, ke lo joro muntcho tiempo, aun kon todo ke su IJO, S-r. Refael ke estava arodejado de muntchas krijaturas, turna kon todo non la decho por nada sufrir a su madre, i el kaminava mui abatido porke de su padre aparte ke non li kedo nada ainda tuvo ke foe gastando en el tiempo ke estuvo hazino i ke el tambien non tenija, i de ves en koanto era i ke kudjava i por su ermano el mas tchiko m. David ke estava en Paris li mandava tambien i a el algo de moneda,

            mas tadre foe ke la Bu. Revkutcha komo tambien i su Noera lavoravan koalo topavan i montchas vezes, tomavan algunas kusturas i lis azijan tchorapis seja ande las parientas komo tambien i en algunas otras kazas i kon esto tambien era ke li vinijan en ajuda, para los gastes de kaza, su ermana la tchika era ke kontinuava la Echkola, porke su ermano M. David ke estava en Paris era dekontino ke lis iva eskriviendo porke non la detuvieran en kaza a la ester, i ke frikontara el estudijo, ansi de mizmo ke lo iziera i propio kon sus IJOS ke la salvasion para sus avenir era solo i solo kon esto

418      Biografia de S-r. Refael i M. David A. Arie,    1879

de los estudios, i sigun ke ja foe ansi ke mas adelantre ja van a meldar los sagrefisios i sufriensas ke travo el S-r, Refael, fin lo pudo arivar para alkansar su dezejo,

1. David era en Paris ke estava de dija i de notche lavorando era sus kamarates^[8] i mizmo los profesores ke lo akonsejavan por ke non devija de lavorar fin a este grado, ma el non eskotchava a dinguno, todos los elevos koando se ivan a las promanadas i otros pasatiempos el non si adjuntava a ejos mizmo ke non tenija nada ande gastar, i siempre lis dizija ke a el li plaze los estudios, i mas no kere nada, a su ermano li eskrivio ke si non podija detener la kaza i merarla mui bien a la madre ke agan konto poeden de ikonomija, i a el ke non li manden nada ke el ja si pasa komo foesa en Paris, i ke non si sekilein^[9], por nada solo tener el mazal de salir una vez de la echkola i denpoes ja tiene el de kudijar por la kaza entera, koando lo supo de la moerte de el Padre foe mui adoloriado i lo joro muntchos dijas, fin ke sus profesores, foe menester ke lo apartaran de la echkola unos koantos dijas, para ke estuviera en algo de repozo, i kon esto foe algo konortado.

            S-r. Rafael, era ke kamenava por los kazales i entchija kezos, en tulum ke lo mandavan a Kostan los merkaderes de esto, i la paga ke tomava era a 5 paras por oka, i se podija ganar al dija de 15 a 20 groches, solo ke era koza ke non lo topava siempre, i en vezes Era ke avrija sergui en los dijas de los pazares, i vendija sal i algunas otras kozas para los kazalinos, i tambien en vezes tomava

419      Biografia de S-r. Refael i M. David A. Arie,    1879

una remana de el Bajdar^[10], lugar ke pezan las ropas i todo modo de artikolos de pezo, en las venditas i merkidas ke si azijan lo todo por ke foera el pezo djusto i ariva de 10 okas kalija ke si pezara en el bajdar, i se pagava a medija para por oka, ke este deretcho si vendija a multezim^[11] en enkante, i estos pezadores, era ke la suma de moneda ke rekojija en el dija entero si la espartijan kon el multezim a metad a kada uno, ke esto tambien li detinija al dija de 15 a 20 groches, ke seja las venditas de las sales i esto de el bajdar era kon la rekomendasijon de S-r. Hristo Srebenisa, i era ansi dija por dija ke kalija ke topara lavoro, i se ivan pasando ke ja si entiende de sujo ke era algo i kon apreto.

            En el anijo de 5640, vino un sierto pariente de la Bu. Revkutcha ke era de la Famijia de los Sidis de Filibe i el ditcho S-r. ke la vijito el vido todas la penas de su IJO, S-r. Refael ke sufrija para poder sostener la kaza, foe ke lo akonsejo por ke si foera a filibe ande sus Tijos, i ke lis rogara porke lo ajudaran kon algo de moneda i algo de kredito i ke markara de Filibe algunos artikolos de kolonijal^[12] i ke los foera vindiendo en Samokov por los bakales, i kon esto podija estar mas libero i se podra mas mijor mantener, i ansi foe ke si lo jevo kon si a S-r. Refael i lis konto tambien de la vida ke pasan de mizmo i el ditcho S-r. ke si lo jevo

420      Biografia de S-r. Refael i M. David A. Arie,    1880

de mizmo lis konto a sus Tios ke eran S-res Jshakutcho i Josefatchi^[13] Sidi, i ejos todos los dos foeron de akordo para ajudarlo i li dieron algo en moneda sonante i algo de kredito en algunos magazenes de los ditchos artikolos i ejos tambien ke ja vendijan artikolos de ahtarie, foe i ejos tambien ke li dieron i se vino kon los ditchos artikolos a Samokov, mui gustozo i los iva vindiendo por los bakales kon poka ganansija, i de esta manera iva kontinuando, sin ke si tomo butika, lo todo por non azer gastes, i se iva pasando mui bien kontente, i en la primera ropa ke trucho la pudo venderla en un enterval de 15 dijas, i se foe de moevo a Filibe i merko de moevo torna ansi artikolos, ke los bakales tambien li ordenavan i algunos artikolos ke non eran sujos i se los merkava por sus kontos kon ke li pagavan la suja komision,

1. David ke estava en Paris, i siendo ke mas non resivijo de su ermano dinguna suma i el ke tenija el menester por merkarse algunos livros, i algunas otras kozas, lo penso mui muntcho para demandar de alguno de sus parientes, de Samokov, al menos 100 fr. enprestado, ke en esta okazion si topo mui flako sovre esto de enprestarse i non tuviendo remedijo lo izo kon ke si konrogo, de uno de sus parientes, i li demando solo 80 fr. por pagarsilos koando iva a salir de la echkola, ke esto ja foe al punto ke si los remetijo 100 fr. i de esto si gusto mui muntcho, ke el non gastava para si kaje ni un santim, ke todo era su penserio sovre los estudios, i ansi foe loke pudo reuchir, i se pronto el avenir para su vida i esta de

421      Biografia de S-r. Refael i M. David A. Arie,    1880

su vinientes detras de el i tambien i la vida de su ermano i de los sujos vinientes, sigun ke mas adelantre ja lo van a meldar de la manera ke ejos todos biven agora i son endependientes sin ke mas tengan el menester, de ser protejados de el otro,

            En el anio de 5641, s-r. Refael era de mizmo ke kontinuava en el negosio de los artikolos de kolonial, i era ke si lo avia resentado de irse en kada mez a filibe, i merkava los artikolos de estos ke si li vendijan, i de este tiempo enpeso a dar algo i a kredit, porke avijan i otros enpesado a traer de estos artikolos ke el los traiva, i lo ivan konkorijando, ke sovre esto si iva sikilijando ke li ivan a tomar el etcho de la mano, ma el de mizmo era ke ja iva de mizmo komo de mas antes kontinuando, i iva tambien tiniendo algo de profito, aun kon todo ke era mui poka las ganansijas, i a el ja li estava abastando, si entiende ke la ikonomija era fin a el ultimo grado mui grande,

            En kaza su S-ra madre la Bu. Revkutcha, i su mujer la S-ra Dudutcha, viendolo a S-r. Refael ke si iva muntcho sikilijando, i tambien si avija mui muntcho aflakado todas las 2 li dizijan por ke non pensara fin a este grado por el bogaz^[14], ke ejas ja van akomodar los menesteres de kaza, i el ke si merara solo los etchos de la plasa, ke sin ke lo supiera S-r. Refael ejas siempre ja resivijan de

422      Biografia de S-r. Refael i M. David A. Arie,    1881

sus parientes el bastante por sus mantinimiento, i mizmo kon su demazija, i aparte tambien ke i ejas lavoravan i de esto si vistijan seja ejas komo tambien i las krijaturas sigun lo veen ke eran todos el uno detras de el otro, i S-r. Refael non alkansava, el iva siempre mui pensativle, i todo su dezejo era, ke si li kreskan los IJOS I MERARSE EL molde para abandonarlo a Samokov, i irse en otra sivdad ke non lo podija somportar, las mizerijas ke travava, ke todo por todo non si poede eskrivirlo aki, es verdad ke era mui muntcho penador i non si kansava por nada, i grasijas ke era una persona mui sana, aun kon todo ke era flako, ke esto era porke non era tanto boeno mantinido, el non tuvo nunka dingunos apetites, seja en la komanija komo tambien i la vistimenta, su pasatiempo era lo mas muntcho en las kazas de su Tija la Bu. Bulisu de H. Elijatchuno i ande sus primos ermanos, i koando tenija de akonsejarse era solo ande ejos ke si akonsejava, ke i estos ultimos tambien lo aserkavan mui muntcho lo todo era ke su Tija lo amava muntcho, i siempre lo vijitava, i lo akonsejava, i li dava muntcho gairet.

            En el anio de 5642, li nasio a S-r. Refael una IJA, ke dizija venga en la boena ora, i el DIO mi esta engrasijando kon el bien de ir dandome djente para entchir el mundo, i jo kon muntcho plazer las esto resiviendo en diziendo ke este DJO ke mi las esta

423      Biografia de S-r. Refael i M. David A. Arie,    1882

dando tambien ja mi aparejo i el sostinimiento para sostenerlos i kerserlos [kreserlos], era la parida ke jorava, por esto ke iva pariendo en kada sigundo anio i ke ja era mui kansa, de merarlos, i su marido la afalagava, de mizmo i todos sus parientes, i en este parto tambien la vijitaron i li mandaron todas las dulsuras i los presentes, ke si mandava a todas las paridas, i en el dija de Chabad, la fadaron i la jamaron, Sultana, su madre era sola ke las krijava, i las kudijava, ke era ja era mui sana mujer,

            en este anio ke ja salio M. David, de la Echkola de la Alijansa Jsraelid de Paris, i lo nominaron por adjuan^[15], en la echkola de Kostan, kon una paga de 1200 fr. al anio, i aparte li davan tambien el bastante de moneda para ke si merkara vistidos i otras ansi kozas i tambien i el gaste de el vijaje, el si vino a Kostan a tomar su posto i si gusto mui muntcho ansi non keri ditcho ke todos sus parientes se gustaron mas muntcho, el ke ja era mui akurat^[16] i lo enbezo el ufisio mas muntcho de loke si keri, ansi era ke el derektor lo amava muntcho i lo kudijava, i denpoes ke ja estuvo komo 2 mezes lis mando a Samokov, 100 fr. para ajuda de el gaste, i lis eskrivio ke esten gustozos, ke de agora i endelantre, non van a sufrir, komo antes, ke el ja va a merar de ganar i de otros lugares kon ke avija enpesado a dar liksiones a elevos, de la lingua Fransesa, i si esta va prontando para poder tomar de 150 a 200 fr. al mez,

            S-r. Refael kon su etcho de las ropas ke traiva de Filibe foe de mizmo i en este anio kontinuando ma non foe sigun de los

424      Biografia de S-r. Refael i M. David A. Arie,    1882

anios de mas antes, porke sigun ke ja lo eskrivi ke salieron i otros ansi echpikulantes i li ivan mui muntcho konkorijando, i siendo ansi i el kapital ke tinija non era bastante para poderse detener, era ke iva endo siempre en manko, i se iva komiendo de el kapetal fin ke non estava pudiendo ir a filibe komo de mas antes en kada mez, otro ke iva a los 2 i 3 mezes una ves i esto si goadrava de sus tios porke non lo vieran,

            en este tiempo ke enpesaron a azer kachkaval en Samokov, i los maestros para esto los traivan de Jambol i de Stara-Zagora, i kalfas ke tenijan de menester tomavan de los mansevos de Samokov kon ke lis pagavan por el presipio de 10 a 12 liras de paga por el tiempo de 2 mezes solo ke kalia ke si foeran por los balkanes, ande eran las mandras de los karneros ke los mundjijan, i entre los todos ke si eskrivieron foe ke si eskrivio tambien i S-r. Refael ke kalia ke uviera i Djidios por la razon de el Kacher, ke en akel tiempo los djidios non merkavan los kachkavales, sin ke tuviera el vindidor un sirtifikato de el Rabino de la Sivdad deklarandolo Kacher, i para ke el Rabino li diera ansi sertifikato komo non avija Djidio en la mandra non li dava, i en Kostan ke si vendija sumas grandes para los Djidios, non li merkavan si [sin] tenerlo esto,

            Sovre el kecherud de el kachkaval ke lo tenijan en Kostan ke era una koza mui kacher, lo todo lis paresija por ke lo jaman al kachkaval en Kostan kon el nombre de Kacher era ke lis paresija en verdad ke era Kacher a tiempo ke si jama tambien i kon el nombre de

425      Biografia de S-r. Refael i M. David A. Arie,    1882

Kacher, i lo komijan los djidios mas santos, ke avija tambien ke ai unos uzos en los Djidios ke en Pesah, los unos non komerlos guizos de otras kazas i los otros non komen tambien guizos mizmo i de sus kazas i estos Djidios ke si guadran tanto, en Pesah, por ser mas Kecherim, si mantinijan kon kesira i de Kachkaval, i en un Pesah ke mi S-r. Padre Tchelebi Abraam II. ke estuvo en Kostan, lo vido una vez a Tchelebi Jshak Koen ke estava komiendo solo i era ke estava komiendo tambien kachkaval, kon kesira, i lo demando la razon de esto ke estava komiendo solo, i tambien kachkaval, foe ke li dicho ke el lo kome esto solo por kecherud, i mi S-r. Padre aparte ke si maravijo foe i ke si li rejo tambien, i li dicho mi es mui grande maravija para el ke es tanto hasia [hasid], i haham ke ja es boeno, i esta komiendo una koza, aparta ke es Hames es tambien i taref, ke una koza porke si jama kon el nombre de kacher komo es ke lo podemos konsiderar por paskoal i Kacher, i estos kachkavales si lavoran por ande mozotros, ke jo ja lo se komo si azen, i de entonses mas non komio, en Pesah, ke foe tambien ke non lo komio ni en semana .,

            En el anio de 5643, M. David, foe nomenado de mizmo komo adjoan en la echkola de Edirne, i era ke en este lugar el gaste lo tuvo mas poko, i ansi era ke de ves en koanto lis mandava, a Samokov, algunas sumas de moneda, por venirles en ajuda para el gaste ke

426      Biografia de S-r. Refael i M. David A. Arie,    1883

tinijan en kaza seja por su madre komo tambien i por su ermana, i en este anio tambien M. David ke estava en Edirne, foe ke si kaso kon M. Esther la kunijada de H. Bejar, ke el koal li foe el profesor, en la echkola de Samokov, i el lo amava muntcho, para el dija de la boda mos konbedo a toda la Familia de Samokov, i todos lo saludimos kon telegrafo, i la novija ke ja es mui savida i mui ermoza eja li trucho muntcha achugar i ——-Fr. de kontado, ansi ke si aman muntcho i biven mui kontentes,

            En este anio tambien li nasio a M. David un IJO, ke si gusto mui muntcho i li jamo Avraam, ke i en este parto tambien mos mando a toda la familia, bilitikos aziendo molo saver,

El S-r. Refael en este anio foe indo mui flako de la salud i lo todo era porke los etchos de el kolonial ke lo azija non li estava kaminando del entodo boeno i era ke kaje ja non li avija kedado nada de el kapital ke li avijan dado sus Tios, en Filibe, i era ke non savija koalo azer, i tambien ke estava sufriendo por el sujo mantinimiento, sigun ke ja lo veen ke la familia tenija grande, i lo todo ja foe karo en este tiempo i mas non foe a filibe porke ja non tuvo mas paras, i ansi foe ke si empeigo torna en el etcho de los kachkavales ke en este anio li pagaron 20 liras, i se foe a los balkanes de Kiostendil, kon la kompanija entera, i denpoes ke ja estuvo komo 15 dijas, era en akejos tiempos ke el Governo Bulgaro avijan empesado a mandar revolosijonarios, por la makedonija para revoltar ke son los komites^[17], ke estos aparte ke kemavan i matavan por los

427      Biografia de S-r. Refael i M. David A. Arie,    1883

kazales de la makedonija era ke koando los prisiguijan de la parte de el Turko si foijan a la Bulgarija i lo todo por los balkanes i en este tiempo era ke soidijavan a los merkaderes ke los enkontravan i koando esto non topavan si rovavan personas de los kampos, i de los Tchiflikes, i tambien i de las sivdades, i se los jevavan kon ejos por los balkanes ande ejos ivan kamenando, i para delebrarlos era ke lis azijan eskrivir al aprezado ande sus parientes porke li mandaran koal 500 i koal 1000 i algunos i 2000 liras, i li fiksavan el lugar ande devija de entregar la suma ke en kavzo ke fin al dija ke li fiksavan si non las remetija era ke lo ivan a matar, sigun ke esto ja lo izieron kon unos koantos ansi apresados^[18], i esto non era solo los komitos^[19] ke lo azijan avija tambien i otras ansi unas kompanijas de ladrones ke eran mleskados de bandidos Bulgares i makedonijales i albanezes, i ejos tambien lo azijan esto ke si revatavan personas de ande los topavan i denpoes li demadavan la suma ke ejos la kerijan,

            I S-r. Refael, sigun ditcho, ke estava en la mandra de los Balkanes de Kiostendil, foe ke en una notche lo rekojeron i se lo jevaron kon ejos por los Balkanes, ke ja si kere entendido el Saar ke si tomo, ma komo era mui kurajiozo i la energia de ARIE ke ja la tiene, non lis vino kontra, en alguna manera para poderse defender, ke ja lo savija ke non iva a ganar nada, foe ke si foeron djuntos i ivan kamenando de balkan en balkan lo todo era ke non podijan restar en un logar porke siempre eran prisiguidos de los turkos, ke i a el

428      Biografia de S-r. Refael i M. David A. Arie,    1883

tanbien^[20] li izieron eskrivir kartas a sus parientes kon los amenazos ditchos ariva porke lis remetieran 500 liras, ke las ditchas ja venijan a sus parientes, ma non era posible ke si li podija rekojer esta suma, i ansi foe ke estuvo mas muntcho de un mez kamenando kon ejos, ke sigun mos kontava koando vino dezija ke non lo apretavan por nada, solo ke kalija ke estuviera siempre delantre de sjos [ejos], i no lo dechavan kamenar solo, i en su tiempo kon ejos djuntos komijan lo todo era gainas i pojos i kodreros ke si los rovavan de los kazales i de las mandras i tambien muntcho vino i modos de bevrajes de los mas mijores, i el pan lo azijan traer en kada dija fresko, i lo davan tambien boenas kuviertas, para ke si kovijara, era de esta manera ke lo foe pasando, el una vez ke buchko a foirse, lo atinaron i sovre este jero ke penso de azerlo foe ke li ataron una koedra en el pie solo en las notches, i la una punta, la detinija una persona, ma i por esto non si espanto, ke ja durmija tambien mui boeno porke bivija muntcho vino i se enboratchava, la kompanija entera era de 80 personas, i seja en los dijas komo tambien i en las notches, era ke metijan de todas las 4 partes de ande ejos estavan lo todo kon durbines ivan merando non seja ke vinieran por presiguirlos, i todos eran mui bien armados, i tenijan kon ejos muntchos kavajos kargados de modos i maneras de munisiones de guera, ejos tenijan sus komandir i detras de el primer unos koantos otros, ke guijavan i reintchijan a los komandos, de el komandir, i muntchas vezes lo vido koando si defendijan de los turkos prisiguidores, ke de esto ja si los azijan

429      Biografia de S-r. Refael i M. David A. Arie,    1883

saver de mas antes estos 4 goadradores ke estavan siempre merando kon los durbines, ke komo eran la djente mas pokos de ejos azijan gueras, ma komo eran mas muntchos de ejos buchkavan a ir en otros balkanes, i foe en una vez ke los saradijaron, muntcha armada, turka i ejos ke non podijan defendersen, lis kalijo mui presto, ke decharan el lugar ke estavan, i presto foirsen, i S-r. Refael tambien foe ke i el tambien iva djunto kon ejos, kamenando, i siempre su intision era de topar un momento favoravle, para espartirse de ejos, si entiende ke si va a foir, i ansi foe ke todos djuntos fuendo arivaron en una abachada mui unda, ke foe un estretcho entre dos montanijas, de una undura de 500 a 600 metros, de undura i kalija mui presto ke si toparan abacho i todos ejos ke ja estavan uzados para abachar ansi unduras, se ivan mui presto abachando i lo ivan gritandolo a S-r. Refael porke i el tambien presto ke abachara, ke aun kon todo ke i el tambien ja podija abachar ma se izo de el bovo komo ke non estava pudiendo i de vez en koanto se iva kaendo i fin ke si levantava ke ja pasava unos dos momentos, i lo foe ansi aziendo unas dos vezes lo todo de esta manera lo topo para ir alechandose de ejos, i koando ja arivaron en otro estretcho ke era jeno de arvoles muntcho espesos, lo izo ke si eskondio debacho de un grande arvol, i los ladrones ke ja se ivan foendo, el los iva merando fin ke ja si alecharon kamino largo i ke non podijan boltar para buchkarlo sovre lo todo en la espesura de los grandes arvoles i la tadre ke ja era, si kedo la notche, en la chara, i komo estava mui kanso i espantado ke

430      Biografia de S-r. Refael i M. David A. Arie,    1883

ja estava, foe ke si durmio, en el lugar ke estava, i koando ja foe komo la medija notche, si esperto de los maujos de los lovos, i de los ronkijos, de los poerkos divipe [divite]^[21], ke si estremesio mui muntcho i dicho foimos de el prichil i lo enkontrimos en la nariz^[22], ma komo ja era una persona mui kuragioza, i la energia de ARIE, ke ja la enpatrona mui foertemente, lo topo de boeno de soveirse [sovirse] en el arvol i se asento en una de las ramas de el grande arvol ke el estuvo de el presipio eskondido, fin ke amanesio el dija ke ja estava bien klaro, ke si en kavzo non lo azija esto i si es ke lo enkontravan, seja los lovos komo tambien i los poerkos, era ke los azijan pedasos, porke ni los lovos ni los poerkos a el arvol non si asuven, i mas tambien ke el non tenija dinguna arma kon si, i loke tenija li kedaron en la mandra, de koando si lo jevaron, ke koando ja amanesio el dija, el si abacho de el arvol, i enpeso asuvir de moevo la muntanija, ke la avijan abachado, i sin kansarse i por nada espantarse, el si topo serka de la medijo dija, en la punta de la muntanija, i este vijaje lo izo sin ke savija ande iva a salir, i koando estuvo en la punta de la muntanija el si asento para eskansarse, i estava tambien mui ambierto, i en este tiempo ke estava asentado si estero para repozar i pensar tambien por koala parte azer su kamino, i en esto si li asemejo komo ke estava sintiendo un sonido de clochette^[23] (djenguirtak) i mas tadre li vino komo un aire un roido de sonito de karneros, i de esto si gusto mui muntcho, i se asento por sintir mas mijor, i lo va ido ke era mui verdad el soneto seja de los clochetis komo tambien

431      Biografia de S-r. Refael i M. David A. Arie,    1883

i los roidos de los karneros, ma non los estava pudiendo verlos, ande es loke estavan, i sin tadrar, enpeso a kamenar al sonido de los karneros, lo todo kon ir abachando i asuviendo de montanija en montanija, fin ke si aserko, i vido ke ja eran mandras de vlahos, solo ke non si pudo aserkarse, por razon ke los peros de los vlahos son mas foertes de los lovos, ke lo azijan pedasos, i li kalio ke si estuviera i akeja notche, lechos enfrente de las mandras, tambien ambierto ke non tenija loke azer, i los peros, de kontino la notche entera aun kon todo ke estuvieron gritando el non si espanto, porke li eran mui lechos, i ala manijana ke los vlahos ja lo vieron, porke lis iva jamandolos, kon muntchos gritos, fin ke si li aserkaron a el i lo tomaron ke ja lo savijan ke los ladrones si avijan rovado i a un Djidio tambien, ke ja lo konosijan, i li dieron a komer, i denpoes ke lo detuvieron 2 dijas en sus mandras, lo jevaron a la mandra de ande si lo rovaron, i non se vino a Samokov otro ke lis izo saver kon karta, i ke ja estava boeno, i ke non lo esperaran fin ke si eskapava el etcho de la mandra, por non pedrer la paga, solo lo izo siendo ke en Chabad non lavorava, si abacho a Kiostendil ke ja era serka, i se foe a el KAAL i se izo jamar a SEFER TORA, ke kijo azer AGOMEL, i en diziendo la BERAHA de el AGOMEL li kaeron las lagrimas i se mogio el SEFER TORA,.

            Visto a el kuraje ke tuvo de foirse de los ladrones, i sovre todo, a la grande pasensija, i la foersa ke tuvo para poderlo somportar, tantos apretos ke paso por el kamino, a tiempo ke en los

432      Biografia de S-r. Refael i M. David A. Arie,    1883

mizmos dijas ke si lo avijan jevado a el ditcho S-r. Refael si jevaron tambien i a un sierto Kristijano de Samokov, i a S-r, Jeuda B. Chelomo de Radoil ke era Nastoinik en el maaden de S-r. Mochonatche ke de estos ultimos a el Kristiano lo mataron i a S-r. Jeuda lo detuvieron muntcho tiempo, i no buchko a fuirse ke ansi momentos ja los tuvo i el tambien solo ke non tenija el kuraje, porke si espantava, kijendo dizir i amostrar, loke es el karakter de ARIE, ke non si espanta, es tanto kurajiozo, para reintchir su ditchizion, sin ke pensa atras nada, i sovre todo la pasensija, ke la detiene fin alkavo ke ansi pasajes ja van a enkontrar unos koantos mas adelantre,

            i la manera ke foe soltado el ditcho S-r. Jeuda ja lo vo a eskrivir en la partida de S-r. Mochonatche,.

            En el anio de 5644, m. David ke era adjuan en Edirne, en este anio, lo nominaron komo direktor en la Echkola de Samokov, ke koando vino mos gustimos todos, i el tambien foe lo mizmo, el si metio al lavoro kon grande kerensia, i todos los elevos eran mui kontentes, ke lis repitava la liksiones, unas koantas vezes, i ansi era, ke todos si enbezavan lo mijor ke podija ser, el izo algunos trokamientos en las reglas de la Echkola, i el tambien resento a muntchos elevos ke los metio en el lavoro, i aparte lis dava tambien i liksiones en las notches, de el Franses, i a estos elevos lis izo pagar,

433      Biografia de S-r. Refael i M. David A. Arie,    1884

tambien i algo de paga en kada mez, de los donos de la Baronesa de Hirch, i en este tiempo kudijava tambien i por su ermano, i a su madre si la tomo kon si de mizmo i a su ermana i se la tomo tambien en la echkola i la kudijava, tambien i en las notches li dava liksiones aparte, i a su ermano lo ajudava, kon ke li dava tambien i algo de moneda en kada semana en regular, i ansi era ke la paga ke estava tomando apenas era ke li estava abastando, i era 1800 fr. al anio ke resivija, i siendo ke los 100 fr. ke si tiene enprestado de koando estava en paris ainda non los avija pagado, era ke si estava apretando, i espantandose, ke non si los demandaran, ma ja foe ke ja lo vijan ke non estava pudiendo avansar para pagar, i non si, los demandaron otro ke foe ke los pago koando si foe de Samokov a Jeruchalaim ke los mando, en este tiempo ke estava, en Samokov, foe ke algunos de los Djidios de Samokov li foeron dando kechas porke non los estava enbezandolos a sus IJOS, komo a otros ke avijan ke si enbezavan mas presto, a tiempo ke esto el non lo kulpava, i algunos uvo tambien ke lo dezonraron, ke esto li vino mui pezgado, i enpeso a eskrivir a la alijansa, porke lo nominaran en alguna otra echkola por las razones ke lis foe eskriviendo,

            En este anio S-r. Refael la espozo a su IJA la Behora, en Sofia, kon S-r. Davitchon el IJO de S-r. Haim B. David, ke los jaman Samakovkis, i se konvino ke li iva a dar 20 liras de kontado, i achugar a su onor i el gaste de la jevadura de la novja ke iva a ser de S-r. Refael, ejos de todas las 2 partes izieron el espozorio de uzo

434      Biografia de S-r. Refael i M. David A. Arie,    1884

ke, ja lo saven sigun ke lo azijan, ke i aki tanbien foe lo mizmo i mientres el tiempo ke estava espozada si mandavan i resivijan dulsuras i prezentes, ke si uzavan a mandarsen mientras las fiestas, i ejos si korespondijavan, i eran mui bien kontentes de todas las 2 partes, i enpeso a prontar algo de achugar,

kon la kaza, ke si li tenija merkado a su S-r. Padre por ser ke ja era algo vieja, i de tantos anios ke non li izieron dinguna reparasion, foe ke en este anio mas ja non pudieron bivir en eja porke koando azija luvija los estava mujandolos i reparasion ke non si podija azer porke ja estava mui estruida, iva buchkando a venderla, ma siendo ke non podija dar takrir^[24] porke el dokumento estava al nombre de S-r. Mairutcho Alkalai, si penso entre si de derokarla i vender el material, ke i para esto tambien non lo podija, porke non era suja, foe en un dija ke mi vino ande mi, i mi estuvo kontando esto eskrito ke lo keri azer, ma si espanta mas muntcho de S-r. Mairutcho, ke de los ARIES, ja save ke non li van a avlar nada, i ke li dichera jo si lo azija esto, i jo, li diche una vez ke de los Aries non vos espantach, azeldo esto i derokalda, i si en kavzo S-r. Mairutcho vos dara alguna kecha li direch ke es jo ke vos alesensio, i ansi foe, ke la dereko, i los lenios i tavlas i mas ansi lo godro lo foe vindiendo, i alguna suma lo gastava para la achugar i la otra partida lo iva gastando para el menester de su mantinimiento, i los pedacos tchikos si los jevo a kaza para kemarlos, por lenija, i el si alkelo de moevo la kaza de S-r. Konorte B Chelomo, ke ja morava de

435      Biografia de S-r. Refael i M. David A. Arie,    1884

antes en esta kaza, i se topavan kontentes, i siendo ke non tuvo dingun etcho en este anio, porke non lo decharon ir a las mandras, visto loke travo en el anio pasado, era solo ke si enbivisija en la vendita de el material, de la kaza ke la deroko,

            En el anio de 5645, a S-r. Refael li nasio un IJO, ke kon el koal tambien lo izieron sigun de las otras vezes ke parija, solo la parida iva jorando ke non kerija mas parir porke non estava pudiendo merarlos, i la esfoegra ke ja si foe kon M. David iva a ser sola eja ke los devija de kudijar, ma ja li avlavan ke esto non es koza ke viene de mano de la persona, lo jamaron NISIM, i todas las parientes la vijitaron i li mandaron platos i prezentes, i tambien kada uno ja tenija el kargo por el sujo sostenimiento, i tambien i en moneda ke ja li mandavan siempre,

            Sigun ditcho mas antes ke M. David non kijo mas estarse en Samokov, foe en este anio ke lo nominaron tambien komo direktor en la echkola de JAFA, kon una paga mas alta, i si los jevo kon si a los 2 IJOS de su ermano ke son a el Gavriel kon Chemoel, i los metio en la Echkola de agrekoltur, de Richon lo Sijon, i tambien si jevo kon si i a su ermana Ester, ke a la koala la metio en la Echkola de los ofisios, i aparte si jevo i a su S-ra madre, lo todo por ke li foera algo de levjaneza a su ermano, el si foe mui kontente, i a su

436      Biografia de S-r. Refael i M. David A. Arie,    1885

ermano li dicho ke ja tiene de kudijar por el i ke tenga ainda un poko de pasensija, para alkansar su dezejo i kon boeno en saliendolo IJOS de la Echkola, va a ser ke aparte ke non van a venir a Samokov es ke vos van a jevar i a vos kon toda voestra familia kon ejos solo vida i salud ke aiga, i koando si foe lo akompanijaron todos sus parientes, i su ermano S-r. Refael resto mui muntcho dezasperado, sovre todo ke tenija de azer i boda, i en dingun etcho ke non estava, i paras ke li mankava, lo izo ke topo a su vizino S-r. Nisim B. Moche, i li rogo por ke li merkara el kampo de la kaza, ke ja la avija derokado, kon kundision ke takrir non li iva a dar, otro ke si lo entrara esti kampo al kortijo sujo, kon ke lo arodejara, de paderes i entonses non se iva a saver ke existija, kortijo aparte, i el S-r. Nesimatche ke ja lo kerija antchar su kortijo, si kontento i se konvinieron por 500 gr. i de esto ke lo izo non lo izo saver a dinguno, i el S-r. Nesimatche si lo tomo arjentro de su kortijo este kampo kon ke lo rodejo de moevas paderes, koza ke dinguno non lo podija apartar ke existija ansi kampo de otro patron,.

            Poko tiempo pasando el konsfoegro S-r. Haimatche, de Sofia li demando Boda, i S-r. Refael ke non estava pronto, li respondio ke agora non poede dar boda otro ke restara por mas tadre, ma el S-r, Haimatche non si kontento a esta repoesta, otro ke li eskrivio de moevo en amenazandolo ke si en kavzo non si kontenta a azer agora la boda a la ora es ke si va a bozdejar, i en mizmo tiempo el S-r. Haimatche, rekojo toda la korespondensija ke tuvieron entre el