סניור בכורצ'ה יוסף א. אריה עד שנת 5653

712

De aki i endelantre si enpesa la partida de el S-r. Behoratche Josef Elijau Arie de el anio de 5623, ke ja si avia apartado de la kasa de su Padre .

713                               Biografia de S-r. Behoratche Josef Elijau Arie.                                1863

En el anio de 5623, ja tuvo la kasa sigun ditcho ke si la merko su esfoegro, i kon una tchika reparasion ke li isieron el ja estuvo mui kontente al menos estarse solo i kon esto ke poede ser si li trokara el masal, i se pasaron en eja i kon alguna kosa de mubilija ke ja tenija i algo ke si li adjusto foe ke si li mobelijo la kasa, solo ke agua non avija en esta kasa i era eja la S-ra. Behurutcha ke entchija kon los kantaros de ande su visino ke era el berberiko, ke el koal a eja ja la dechava ke intchera, prima ke si adjedijava, de verla ke estava prenijada i entrada en los meses kon la tripa a la boka, (porke pario botchkos,) i sigunda, ke koando entrava de la poerta eja la avrija mui reposada, i la detinija kon el pie la poerta i dechava los kantaros en bacho, i la serava la poerta mui avagar para ke non isiera roido el tokmak, i este era ke el berbiriko lo estava viendo de la ventana, i lo desija a la djente de su kasa, ke a esta mujer la alesensijaran para ke intchera agoa ke de la manera de su entrar de la poerta ja si vee ke es de familija noble, lo koal ke otras ansi mujeres ke li entravan era ke non miravan estas kosas i la poerta la avrijan tanto foerte ke el tokmak ke renpochava la poerta batija tanto foerte ke los asija trublar i muntchas veses si li rompija la koedra, i la dechavan avierta, ke esto para el harem ke ejos lo goadran non lis korespondija i ansi foe ke a otra djente non dechava mas entrar en su kasa, i eran uvligadas de entchirsen de los lugares muntcho lechos, era eja

714                               Biografia de S-r. Behoratche Josef Elijau Arie.                                    1863

sola ke akomodava todos los menesteres de la kasa i en mismo tiempo kudijava tambien i por sus krijaturas, ke eran mui tchikos, i lo todo kon grande pasensija i sin kansarse, su madre la Bu. Bulisu era ke la akompanijava siempre, i le mandava de su kasa todo el menester ke eja lo kerija seja en komanija komo tambien i de todas las otras kosas, ke si li podijan ser menesterosas,

S-r. Behoratche ke era sin dingun etcho si levantava demanijana i se iva a el midrach, i denpoes si vinija en kasa, ke ajudava tambien en los etches de kasa, i denpoes se iva a la kavane i koando topava de ganar en alguna kosa era ke non lo dechava ma esto era mui ralo, ke li afetava, i koanto al sujos menester por sus mantinimiento era su esfoegro ke li mandava en kada semana regular uno sierta suma ke lis era bastante sin ke pudieran sufrir por nada

Eja la S-ra Behurutcha ke estava sigun ditcho prenijada arivo el tienpo para parir i este parto li foe mui foerte, ke li turo muntcho tienpo i eja ke era tan flaka era ke non estava pudiendo somportar las dolores i era lo todo kon desmajos, ke apenas koando ja pario era una IJA ke foe moerta, i las komadres ke non si entindijan ke eja tenija otro un krio por ainda parir, non la akudieron sovre esto i poko tiempo pasando eja si li renovaron de moevo las dolores por sigunda ves parir, ke i esto tambien pario i foe ke pario un IJO, ma eja kedo mui flaka i el IJO tambien foe tanto flako ke lo detinijan en algudones para ke si kaentara, i ke foe mui menudo, i de esta manera foe engrandisiendose, kon muntcho kudijado

715                               Biografia de S-r. Behoratche Josef Elijau Arie.                                    1863

ke lo todo era sola tambien su madre ke lo kudijava i lo aletchava i eja tambien kudijando i por todo lo de la kasa, en el parto lo isieron sigun todos los otros ke la vijitaron i li mandaron los platos i muntchos presentes de toda la Familija, i li jamaron CHABETAl ,i lo nombran CHABAT,

En el anio de 5624, ke S-r. Behoratche, era tambien sin dingun etcho, i ke estava undido en sus penserios de non saver koalo aser, i para non enbroljarse de moevo en algunas malas etchas, el lo topo de mijor por enbeveserse, en alguna kosa i para ulvidar, algun sierto tiempo, porke si estava mui muntcho aflakandose ,i iva estando tambien hasino, porke el era una persona menuda i las patchas las tenija kurtas, su vistido era pantalon, i palto, komer komija a poko, porke non li rejevava el estomago i koando englotija era ke abokava la kavesa ke kon esto li dava foersa para englutir, ma el tenija muntcha pasensija, seja de koando estava sin etcho i seja ke estava hasino, el era ke savija boeno kantar, i bos tambien tenija boena i el si merko un keman i se tomo komo maestro a un sierto singano Hasan ke el koal ja era tchalguidji, i li vinija en kada dija en su kasa i lo iva enbesandolo a tanier el keman ke en esto estuvo kontinuando longo tiempo, i era dijas i las notches enteras enbevisido en enbesandose las liksiones ke tomava, i kon esto

716                            Biografia de S-r. Behoratche Josef Elijau Arie.                                  1864

el arivo a boeno enbesarse, i kantava, kon los tchalguidjis koando avijan algunas bodas i fiestas, de pasatiempo, ke tambien si enbeso a djogar, kon el keman todos los mekames, i muntchos pismonim ke sigun ditcho ke konosija tambien i el kante de la boka, i era kon esto ke lo iva pasando estos dijas ke el si topava sin dingun etcho porke el non frikontava muntcho las kavanes i ansi de mismo ni en las mejanes porke su nature non li rejevava de bever dingun modo de alkolik i kahves era mui poko, el si jelava mui muntcho, i li kalija siempre ke estuviera en lugares kaentes,

Mas tadre el enpeso a vijitar en los konakes de los Beguis Turkos ke entre los hismetis ke el lis asija era ke lo asijan tambien ganar en algunas kosas, seja en trokamientos de las monedas seja ke lis vindija algunos fieros, i lis emplejava algunas kosas para sus konakes, i kon esto era ke tenija la okasion para ir tambien i en las botikas de los abadjis tchorbadjis, ke i kon ejos tambien tenija algunas tchikas ganansijas, porke ja lo konosijan de el tiempo de el Padre, ma esto todo non era ke lo podija mantener ,solo ke era por enbeveserse, i siempre era lo mas muntcho en el keman ke era solo esto ke lo ulvidava todos sus penserios i para non enervarse, i mas tadre ke su esfoegro lo vija flako foe ke lo metio en la kacha de el governo kon una tchika paga ke ejos esto ja lo tenijan de siempre i ke lis foera komo kontador de la moneda, ke venija a la kacha, i esto ke lo savija boeno i se entindija en todas las monedas lo iva kontinuando serka de el kachero, ke lo todo era kon

717                            Biografia de S-r. Behoratche Josef Elijau Arie.                                  1864

la entision para ke un dija deviniera komo kachero en la kacha de el governo ke podija resivir una paga de 200 groches a el mes i esto ja li iva a ser bastante, para su pasadija,

En el anio de 5625, li nasio un IJO i siempre era espantada la parida ke torna iva a parir botchkos, i siempre iva jorando, ma este parto lo pario mui kolai, i todos si gustaron ke ja foe solo uno, eja la parida era Sana i boena, i kon este parto tambien lo isieron ke foe el Sandak su esfoegro Tchelebi Avraam, i era en kada notche, ke estavan a vijitarla i en los dijas tambien ke ja la vijitavan sigun de siempre ke ja lo asijan en todos los partos, i en el dija de Chabad komo tambien i en el dija de el Birkad Mila ke ja uvieron muntchos kombedados ke lo todo ja era a los gastes de el Sandak i lo jamaron RAHAMIM, i de mismo su madre lo krio i lo kudio, ansi de mismo i eja kudijava por la kasa entera en todos los puntos, ke ja alkansava para lo todo,

Su ermano S-r. Nesimatche ke era Haver kon S-r. Mochonatche Levi, foe en este tiempo ke si avija espartido porke non li foeron los kontos boenos i salio vasio, i ke ja estuvo longo tiempo sin dingun etcho i de mismo i S-r. Behoratche ke ja estava de mas antes lo mismo, i los konjoramientos de parte sus mujeres ke ja eran ande sus padres, sovre esto ke non estan buchkando sus provetcho

718                               Biografia de S-r. Behoratche Josef Elijau Arie.                                    1865

foe ke Tchelebi Jeuda, li dicho a su ermano Tchelebi Avraam, na ke agora todos 2 jernos ja estan sin etcho i serija boeno poede ser de meter los a 12500 groches a kada uno de kapetal, i los aremos haverim para ke kontinuen torna en la merkansija, kon ke lo van a saver, ke el kapetal va a ser todo de Tchelebi Jeuda, i kon esto poede ser ke enkamenaran el etcho kon mas dikat, kon la esperansa ke si espantavan de Tchelebi Jeuda, i tambien ke el si iva a okupar kon ir asiendoles en kada tiempo algunas revisijas, i Tchelebi Avraam ke ja lo kijo esto si kontento a darle los 12500 groches, i Tchelebi Jeuda, los jamo i lis iso kontratos, i lo tomo butika i los akavido de la manera ke si devijan komportar, i ejos mui gustosos ke ja van a estar en etcho si merkaron el menester de las ropas ke ejos todos los 2 ja la konosijan esto de la merkansija i enpesaron en el etcho i el etcho de los presipios ja lis foe mui bien kamenandoles kon ke Tchelebi Jeuda era ke lis asija las revisijas en kada semana, ke esto lo tomo komo un ufisio, i ke akonto lis devija de kamenarles el etcho, i de esto ke ja lis iva mui bien ende adelantre sus negosio eran seja los jernos komo tambien i los esfoegros mui gustosos,

Ejas las mujeres siempre ivan buchkando de aser la ikonomija la mas grande para ke non tengan gaste i para ke esto non seja un dija rason ke dicheran ejos ke tuvieron grandes gastes, ke ejas koando kerijan seja paras or seja otras kosas siempre ejas lis demandavan de sus padres, ke ejos ja lis davan todo esto ke ejas lo kerijan i por non demandar de sus maridos ke esto ejos ja lo vijan

719                               Biografia de S-r. Behoratche Josef Elijau Arie.                                    1865

ma non lis avlavan nada, a tiempo ke sigun mi es ke non asijan boeno esto ke si kedavan kajados, i devijan ejos de detener el kudio por todo esto ke es el menester para detener una kasa, ke pensando ke ja avija ken los iva a detener viene a ser ke ke non kudijan i buchkan para kale penar i estudijar, para ketarse su menester de su mantinimiento i el sostenimiento de la kasa entera, lo todo a kada uno fin ande li alkansa su poder,

En el anio de 5626, ejos los 2 ermanos mui aunados ivan kontinuando en sus negosios i a el punto de vista era ke ja lis iba kamenando boeno sus etchos i visto i parisiendo verdad esto era ke Tchelebi Jeuda avija mas ralo ke lis iva a aserlis revisija, i ejos para engrandeser el etcho i presto ganar, lo toparon de boeno sin ke si akonsejaron kon dinguno, de avrir una butika de ansi ropas i en Kiostendil, i esto foe ke si aunaron i se isieron Haverim, kon S-r. Jaakov B, Elieser, kojumdji, kon ke mitieron a una i misma kantedad de ropas i se foeron S-r. Behoratche kon S-r. Jakovatche a Kiostendel djunto kon las ropas i se tomaron butika en la prima plasa de Kiostendil i enpesaron en las venditas, ke ja lis foeron mui grandes, i a esta rason ejos ivan asiendo tambien i grandes merkidas de ropas i en mismo tiempo entrando en grandes devdas, i en el tiempo de un envierno entero ke ejos estuvieron anke ke la konsumasion

720                               Biografia de S-r. Behoratche Josef Elijau Arie                                     1866

ja era bastante grande ma torna kon todo ejos non pudieron abasteser para enkontrar los pagamientos i ansi foe ke ejos para non avregonsarsen enpesaron a aser prevalimientos kon tomar muneda kon entereso i mas tadre ke i para esto i kon esto ke non estuvieron pudiendo topar sus enkontros foe ke lis kalio ke seraran la butika de Kiostendil i se vinieron a Samokov ke koando ja si meraron los kontos ke sigun el uso uvieron i muntchas litigas entre los Haverim, i aparte ke non ganaron foe ke tuvieron i piedritas, i de esto eran mui sikilijados i tambien si estavan espantando de Tchelebi Jeuda ke non lo savijan komo era ke se ivan a deskulpar, ma lo ivan somportando i los apretos ke eran mui grandes de esto ke devijan muntcho enpesaron a vender sus ropas abacho de el kapetal, entiende de sujo ke en asiendo esto ande es loke si esperan los kavos ma ejos tuvieron ke si i antcharon tambien i en sus gastes, ke esto jo non lo topo ke lis podija arivar la ruina, de esto ke ejos gastarijan a 500 or mismo i a 1000 groches de mas a kada uno, i ansi foe ke mas koando ja non pudieron responder lo isieron ke seraron la butika, i se enpesaron a etchar las kulpas del uno a el otro, ke esto non lis ajudo nada, i ejos si vinieron de moevo en kasa, todos los 2 pensativles ,

i sus esfoegros esto ke ja lo vijan non avlaron por el presipio nada, i Tchelebi Jeuda se iva tambien sikilijando ke lo iso esto el i non los pudo enkamenar, ma Tchelebi Avraam non avlava nada ke el ja tenija sus okupasiones mui grandes, i non avija el tiempo de pensar en esto, era solo ke la S-ra Behurutcha koando vinia

721                               Biografia de S-r. Behoratche Josef Elijau Arie                                     1866

ande el pardre era ke avlavan de esto i la mandava porke foera ande el Papu i el era ke lo tenija de merar estos etchos solo ke si es ke kerija algunas paras or otra kosa li dava i la mandava i eja deretcho se iva ande el Papu or ande la Vava, i ke ja si savija por koalo venija i Bu. Jael ke ja estava, eran las 2 ke si konjoravan i esto lis desija ke ja lo van a merar, i se ivan,

En el anio de 5627, li nasio a S-r, Behoratche una IJA, ke kon la koala tambien lo isieron sigun de todas las paridas i la jamaron, LINDA ke foe de su madre aletchada i kudijada, i eja la linda koando ja foe de una edad de serka 4 a 5 anios, i ke estando djugando por la kamareta, ke estuvo sola foe ke si kedo en bacho durmida, i su ermano S-r. Rahamim, sin kererlo i sin verla ke eja estava en bacho durmendo, al afito foe ke li peso kon el topuk de su potin, djustamente en un sierto bultiko ke eja lo tenija en la kechada deretcha, sin ke eja konsentija de antes nada de dolor, otro ke en veses a eja li komija ma su madre esto non lo kontava por nada, i en el punto lo li peso la linda ke si esperto jorando ke al punto ja korio su madre i viendola koriendole tambien sangre eja jamo a sus vesinas, i egsamenandola, li vieron ke entre la sangre ke li iva koriendole lo atenaron ke avijan a miles de tchikos gosanikos kamenandole entre la sangre i de esto ejas ke si espantaron lo jamaron

722                               Biografia de S-r. Behoratche Josef Elijau Arie                                     1867

a el mediko, ke de mismo el mediko egsamenandola, lis dicho ke foe mui masaluda la krejatura, ke si en kavso la operasion li asijan non iva afetar de esta manera, ke todos estos gosanikos eran para espanderse las alpoerkas ke non solo en las kechadas otro ke de esta muntchidumbre, si li iva a espander por el poerpo entero i kon las kuras ke el mediko li djo foe ke si li alempio todo i se li sero el logar operado de el topuk de el potin i mas non li kedo nada i esta agora mui boena, solo ke li kedo un tchiko sinijal ke non si li veé muntcho, es esta la LINDA ke la kasaron sus ermanos en el anio de 5651, kon S-r. Rahamim Alkalai, ke li dieron boen kontado i achugar i eja bive kon su marido mui bien kontente, ke su marido es Nalbant, i se pasan mui bien, i eja pario IJOS i IJAS,

Koanto a el Etcho de de la butika, era ke de ves en koanto ivan i venijan ma lis era mui grande apreto de esto ke non savijan komo es ke ivan a responder, seja a los kreditores komo tambien i a sus esfoegros ejos desijan koando ke foera mas presto ke los jamaran ke ja si savija i ansi lo disijan ke va aser ke si van a aravijar i algo los van a gritar i si muntcho podija ser era ke de la ravija lis podijan dar a un chamar a kada uno i kon esto se eskapava porke ja lo vale desijan no a un chamar mismo i a unos koantos a kada uno, solo ke foera mas presto esto i se eskapava i esto era solo las IJAS ke lo podijan eskapar, sigun ke kalio lo isieran i lo isieron kon irles a sus padres por ke ejas era todo kon kechas ke lis davan ke non los keren merar, i

723                               Biografia de S-r. Behoratche Josef Elijau Arie                                     1867

komo keren levantarlos ja lo podijan i sus padre ke kon ejas non si podijan aravijar porke si mleskavan denpoes tambien i las madre era solo ke las albadravan i las mandavan asegurandolas ke ja ivan a resentarlo i kon pasar pokos dijas Tchelebi Jeuda jamo a todos los 2 i kon algo ke los grito i algo si aravio, foe ke kon risa i kon bos mas alta los keto de delantre i kon esto se eskapo todo i kon ropa ke avija en la butika la isieron venderla i esto ke non abasto lo adjustaron i kedaron sin el kapetal i sin dingun etcho ke koanto a sus menester por sus mantinimiento ja lo resivijan aparte en regla solo ke el mal era porke kalia ke estuvieran enbevisidos en algun etcho ke non lis era onor,

En el anio de 5628, sigun ditcho ke estava sin dingun etcho, ke esto la abatija mui muntcho, a la S-ra, Behurutcha, i sigun savido ke era solo el konjorarse ande el padre i la madre ke lo lavava [javava]^[21] el sujo desejo, i en este anio uvo tambien ke los iso i rensponsables, kon una demanda demasija ke era por la kasa ke a ejos lis tenija merkado su esfoegro, ke ja estava mui tchika, i si komo, la familija si li esta engrandisiendo, i mas ja non estan pudiendo bivir en una sola kamareta kon un koltuk i de esto va a poder arivar a hasinijarsen todos, ke ansi kale lis merka otra mas grande kasa, i este foe mas antes tomado en mano i

724                               Biografia de S-r. Behoratche Josef Elijau Arie                                     1868

por non ser responsable lo iso ke li merko una otra kasa mas grande por 8000 groches, ke kontinija 3 grandes kamaretas i kosina i un tchardak en el kortijo aparte i ahir i otluk hana i kortijo mas grande, ke era visina a la kasa de S-r. Rahamim B. Chelomo i S-r. mordehai B. Moche, i kon una tchika reparasion ke li iso ke lo todo ara su esfoegro ke lo gastava, i se pasaron en eja, kon adjustarle tambien i algo de mobilija, i bivijan kontentes, i la kasa ke estava resto por mas tadre ke si paso en eja su ermano S-r. Nesimatche,

Koanto a el uso de todas las mujeres ke ja dan kechas a sus maridos por tan presto koando ja non li trae esto ke ejas lo keren era de mismo i aki ke lis pasavan ansi avlas ke non estava merando de ganar, i de esto el si sikilijava muntcho i en veses si lis rebivija i pleitos, ma el ke non topava, se iva aflakando, i se kedava kajado, i presto ja si asijan la pas,

sus menester por sus pasadija anke ke era mas poko era ke siempre ja la resivijan en kada semana, seja ke las tenijan menester seja ke non las tenijan, i de kasa era siempre aparte ke si lis mandava, koalo podijan lo todo en komanija, i veses algunas ropas para ke si isieran vistidos,

Koanto a loke estava sin dingun etcho el S-r. Behoratche, foe en este anio ke el dicho ke fin agora ja iso merkansija grande i non reucho en los etchos i agora kere ke lo ajudaran para asentarse en una tchika butika i vender solo los artikolos por los kasalinos, ke kon esto podija ser ke mas tadre si li engrandesera

725                               Biografia de S-r. Behoratche Josef Elijau Arie                                     1868

i enpeser de tchiko para ke si aga grande, i esto lo toparon de djusto i el ke ja era kapatche, i savija akomodar koal etcho foesa si tomo presto la butika i li amostraron de ande se iva a prekurar los artikolos ke li podijan ser menester, i se asento en la butika kon muntcha kerensija i kontentes iva asiendo tchikas venditas, sovre lo todo de esto ke ja estava enbevisido, ke kon esto estava mas sano i non kamenava, abatido,

En el anio de 5629, sus IJOS enpesaron a ir a la Echkola i ejos ke foeron tanto reposados fin a el ultimo grado, era tambien ke tenijan mui grande temor de su padre ke koando lo vijan ejos si eskondijan porke si espantavan mui muntcho, sovre esto era ke li davan kechas por esto ke kale seja ke los espantava or ke los harvava, a tiempo ke esto non lo asija i a el de esto li enbarasava muntcho, i mas tadre li kalio ke si enpesara el mismo a eskonderse ke non lo vieran i ke non si espantaran, ma esto non lis turo longo tiempo, ke mas tadre ke ejos ja entraron en los mas ondos de los estudios de la echkola era ke estavan notches enteras eskriviendo i enbesandosen sus liksiones, ke eran siempre ejos los primas elevos de la echkola, i de tchikes ke ja foeron mui entelejentes, en los muntchos Chabatiod i moadim ke si vinijan a komer en la kasa de su esfoegro i ke restavan tambien muntchas veses a unos koantos

726                               Biografia de S-r. Behoratche Josef Elijau Arie                                     1869

dijas era ke los IJOS non vinijan lo todo por non tadrar de la echkola, i los dechavan a sus kerer, el si enteresava por alkansar a saver de todos los pasajes ke avijan por la sevdad, i ande el si li avrijan kaje todos, i esto non era solo por los djidios era tambien i de los turkos i krestijanos porke el si levantava mui temprano lo sentija de todo loke si avlava las demanijanas en las kavanes, i tambien a rason de esto si mleskava tambien i en los etchos de el kolel, ke sovre este li davan kechas, porke era mijor ke non si mleskera ke non era konvenivle para el,

kon el Etcho de su butika era ke kontinuava, i asija las venditas mas grandes solo en los dijas de los pasares, ke entre la Semana era mui poko, i esto era solo por un enbivisimiento, ke non lo mantenija,

En el anio de 5630, ke el etcho de la butika non li pudo mas kamenar i espantandose non seja ke kedara de moeve a dever, lo iso ke la sero i pago a todos i resto de moevo sin dingun etcho, i sigun ditcho ke esto lo apretava muntcho i se hasinijava, i en este tiempo ke el estuvo serka 3 meses sin dingun etcho el avija enpesado a kamenar abokado ke aparte de la flakesa ke el konsentija li vino tambien i una dolor en el bel, i avija enpesado tambien i tener tos kon balgam ke si li iso komo kataro, i su estomago ke

727                               Biografia de S-r. Behoratche Josef Elijau Arie                                     1870

ja era mui flako ansi era ke non podija komer kosa salada i tambien ke kosa agra non komija de el en todo porke non li padijava, i el komija mui poko, el era mui limpio ke sus vistidos ke los jevava li eran siempre komo moevos, li plasija muntcho ke estuviera kada kosa en su lugar ke era el koando lo vija ke lo metija en sus lugares i el ke savija tambien i kusir era ke lis asija i lis kosija los vistidikos para sus krijaturas i ansi tambien i para el ke era mui merakli en estas kosas, i savija tambien i remendar,

Su esfoegro ke lo vija en vasio li demando si es ke kerija enpeigarse, kon 200 groches de paga a el mes, ke el tenija en hevra un maaden kon latif aa, i el molla era un sierto molla Abdurahman ke merava el etcho i para ke li foera komo ajudador i tambien ke si enbesara, de este etcho por un dija podija el devinir en lugar de los mollas ke eran turkos, i el ke ja foe mui kontente de esto porke el etcho ja era asentado i eskrivir ke ja savija bien boeno, si foe djuntas kon el i lo rekomando porke lo enbesaran i lo meraran i kon esto era ke lo estava asiendo i si estava mui bien pasando kon el molla, i li dava los kontos de las operasiones de el maaden a su esfoegro i su mesada la resivija de el molla,

En el anio de 5631, ke ja estava merando el etcho de el maden kon molla abduraman foe ke tuvieron entre sus konversasiones ke ejos tenijan era ke lis salio el etcho a pleito i de esto

728                               Biografia de S-r. Behoratche Josef Elijau Arie                                     1871

el Latif aa se akecho i kalio ke si saliera de esto i kon la misma mesada si lo tomo kon si su esfoegro, i lo mandava en algunos lugares por su etcho partikular ke el ja tenija, ma esto era mui poko i komo non tenija loke aser i enpeso a konochijar kon los rohesim, i disija ke por endelantre si enbevesera al menos en kosa de misva, i se eskrivio i el tambien en la hevra keducha i lo isieron i a el komo tchirak de los rohesim ke kon esto si era ke non si iva a espantar dellos moertos iva a ser ke ja podija entrar i el komo rohes, i ansi lo iso ke non si espanto de lavar a los moertose, i en kurto tiempo ja devino el komo uno de los grandes rohasim, i de esto el non tenija dingun provetcho otro ke se lo lo asija por misva_, i en kada Chabad Komijan la hevra ke para ejos ja era alesensijado esto, i bevijan a 2 tasas de raki i a 2 goevos si tomavan, i ejos eran solo liberos de todos los dasios de el kolel, i algunos otros de entre los djidios ke los tenijan,

Siendo ke agora ja tenija mas muntchos amigos foe ke mando ande su esfoegro porke lo mitiera torna en algun etcho, i ke ja estava enfasijado, de estar arastando por las kavanes, i su esfoegro ke non tenija loke aser, li metio de moevo kapetal i se asento torna para aser la merkansija, ke esto ja lo konosija boeno i el si iva a todas las ferias para aser los emplejos ke eran a usundje-ova i seres, i traiva las ropas, i las iva vindiendo, i de el presipio asija grande ikonomija, en los gastes, i lo iva kamenando mui bien el etcho, i todos ja eran mui gustosos ke ja estava lavorando

729                               Biografia de S-r. Behoratche Josef Elijau Arie                                     1871

sovre todo ke el tambien non iva estando hasino, ma la dolor de el bel non li pasava i siempre kamenava algo abokado,

En el anio de 5632, era de mismo ke kontinuava en la merkansija, i de mismo era ke frekontava las ferias, i sigun de todos los otros merkaderes ke lo asijan ke merkavan fieros a kredit por los tiempos de 4 i de 5 meses, i estos fieros los jevavan a las ferijas i kon 8 i 10 groches mas manko de el presio ke los vendijan era ke asijan los prevalimientos porke non topavan moneda kon entereso i kon esto era ke si akomodavan sus etchos era de esta manera ke lo enpeso tambien a aserlo i el, ke esto ja lo topava, i el ke ja konosija estas operasiones de fieros, ja las asija mas mijor de los otros, i de mismo asija los empleos, de todas las ropas ke si li asijan el menester, i esto koando lo empeso a aserlo sus parientes ja lo dicheron ke non era kosa ke li podija salir, ma su esfoegro non savija de estas operasiones ke el las asija, i koando si lo dicheron ja lo jamo i li dicho ke esto el non lo savija aserlo i no li podija salir los kontos, ma el non lo sentija ke esto ja lo asen todos, ke esta manera si kamina la merkansija, i por esto lo dechavan ke isiera sigun ke el lo savija, en saviendo ke el kapetal si va a pedrer, era una kosa de enkante de en koantas veses ke el si metio en la merkansija i de non afetarle ni en la una ves, ke kale

730                               Biografia de S-r. Behoratche Josef Elijau Arie                                     1872

disir ke non solo en el masal otro ke si keri tambien i detinido mui bien konto, i estar tambien al koriente de todo esto ke si pasa entre todos los otros merkaderes, i komo estan jevando sus etchos, ke para esto non demanda el ser neotral, i merarse solo su etcho, i la prova es ke los merkaderes lo vemos ke si rekojen siempre en un lugar i tratan siempre de sus merkansijas,

En el anio de 5633, li nasio a S-r. Behoratche una IJA, ke kon eja tambien lo isieron sigun las otras veses ke parija, solo ke eja se iva sikilijandose ke estava pariendo mas muntcho ijas, ke para esto ja la konsolavan i su madre era ke siempre estava en el tiempo ke estava parida, de mismo lo asija i su esfoegra, i la jamaron HANNA, i su madre la krejo i la kudio solo ke koando foe mas grande era ke kon eja non tenijan del entodo grasija, i la asijan mas muntcho de las otras lavorar ke i mas tadre la mandavan por ke foera i lavorara tambien i en otras kasas, ke de esto eja jorava muntcho ma non avija kon [ken] ke la sintiera, i esto ke ganava tambien si lo tomavan ke viniendo a las otras non era de esta manera ke las apretavan, i eja kon pasensija lo todo lo somportava, i en el anio de 5652 la kasaron en Dubnisa kon S-r. Naim, el Chohet, kon ke li dieron boen kontado i achugar, i de el presipio eja sufrio de su marido, de maneras de sufrimientos, ma mas tadre seja ke ja si lo

731                               Biografia de S-r. Behoratche Josef Elijau Arie                                     1873

resentaron ke esto era sus vidas seja ke eja tambien pelijava, lo foeron pasando i mas tadre ejos ja si konvinieron i se pasavan boenos, i eja pario 2 IJOS i una IJA botchka, i su marido asija la Chehita en Dubnisa, kon ke li pagavan una semanada regular i aparte tenija tambien i entradas de gudruras i otras kosas ke si toman los Chohetim koando degojan seja los karneros komo tambien i las vakas i ansi mas i otras entradas, de Kolel sigun todos los otros mechartim ke las resiven, i se pasavan mui bien.

Koanto al etcho de la butika tambien foe ke ni en esta ves non li pudo kamenar, i el ke ja si vido ke non estava boeno era ke enpeso a mas non enkamenarla kon kerensija, i non si iva estando mas en la butika, ke esto ke ja lo vija su esfoegro, lo iso ke lo jamo i lo demando la rason i el ke non savija koalo disirle era ke asija serar la butika i en merandole los kontos ja si vija ke el kapetal ja estava pedrido, i sin tadrar lo asijan de vender la ropa i pagar a los ke devija i kon esto salija en limpio, i de moevo si li reglava de ande iva a resivir el menester por los sujos mantinimiento, ke en esta ves lo isieron ke si li dieran a su mujer las semanadas i eja ke la gastara, i el era ke non estava kamenando en baldes i de poko a muntcho tambien si ganava para su hachlik i komo li sovrava tambien traiva i el algunos menesteres de la kasa, i de esta manera tambien en este tiempo lo ivan pasando, ma era siempre kon atagantarse muntcho por esto ke non reuchija,

732                               Biografia de S-r. Behoratche Josef Elijau Arie                                     1874

En el anio de 5634, ke estava sin etcho era ke iva ande sus amigos i konosidos i lis tomava algunas ropas i otras kosas para kosirselas ke esto tanbien lo konosija algo de el tersilik i de esto ke lo kosija en kasa era ke ja si ganava alguna kosa ma era solo por el sujo menester, de su hachlik, ke esto lo asija por tener de enbeveserse, i esto tambien ke foe enfastijado era ke de moevo si enpeso a hasenijarse, i el dolor de el bel ke ja lo tenija ansi de mismo i la dolor de la teta, foe en este tiempo ke si li foe muntchiguando, i arivava a etcharse en lo kama, ke lo todo era de siklet mas muntcho ke li vinija, i koando ja se sanava, era ke estava lo mas muntcho en kasa, ke non kerija ver a dinguno i muntchas veses sin ke dinguno lo viera iva jorando, i koando lo akonsejavan era todo loke desija ke mijor es la moerte ke de estar ansi jevando vidas i el muntchas veses lo buchko para merkarse de moevo tosego ma non lo pudo topar, i kon ke li avlavan seja sus amigos seja sus parientes era ke lo iva pasando, i a esta rason era tambien ke aravijava i muntchas veses pelejava en kasa, i dinguno non li avlava, porke ja lo vijan ke era solo de el bisguinlik^[22], ke lo asija, sus ijos eran ke kontinuavan la echkola i ejos si espantavan tambien muntcho de sus S-r. padre, ke i ejos tambien si eskondijan koando lo vijan i en kasa la S-ra Behurutcha era ke kudijava seja por la kasa komo tambien i por sus krijaturas, i mas por todos los otros menesteres por non decharle el kargo a su marido i ke non si apretara, ke de

733                               Biografia de S-r. Behoratche Josef Elijau Arie                                     1874

esto era mas muntcho ke si hasinijava, lo todo ke non lo podija toper la rason de esto ke en nada non reuchija koando lo asija por el sujo konto,

En el anio de 5635, ke el ja estava enfasijado de estar en vasio li mando a disir a su Esfoegro, ke lo mandara a los kampos seja en alguna de las vignas seja a los maadenes, or en algun otro lugar, ke seja en los kampos, ke kon esto el ja iva a estar mas sano ke el estarse en la sivdad es hasinijarse, sin ke si esta muriendo, i su esfoegro lo mando a Kiostentcha a el maaden komo nastoinik, i kon la paga ke si pagava a todos los nastoinikis ke era 2000 groches en moneda i aparte los taines ke eran 90 okas de karne i otras minudensijas i el ke ja tenija a su desposision en el maaden 30 kabras mondjideras, era ke si prekurava, la manteka, i la letche i el si mantenija de el maaden, i este ke lo mando a Kiostendja foe por ke el aver es mui limpio, ke es en los balkanes, lo todo de arvoleras de tcham de boenos goesmos, i de esto foe mui kontente ke si venija solo alos 15 dijas una ves i buchkava de entregar los kontos mas presto para non restar mas de un dija en la sivdad, i kon esto el ja era sano i boeno, i su mujer era mui kontente ke ja estava en etcho i el de loke tomava de paga lis mandava a kasa para ke gastaran ke non kerija amontonar, el jevava los kontos mui bien i

734                               Biografia de S-r. Behoratche Josef Elijau Arie                                     1875

los entregava tambien sigun el uvligo de todos los nastoinikis, i reintchija los ordenes ke si li davan sovre los lavoros de los fieros ke esto era lo mas enportante.

En este anio li nasio una IJA, i kon eja de mismo lo isieron sigun de todos los otros partos, i la jamaron VIDA, i de mismo su madre la kreo i la aletcho i la kudio, i en el anio de 5654, sus ermanos la kasaron kon S-r. Avraam de Merkado Avdala, kon ke li dieron boen kontado i achugar, i es mui kichta seja de su marido komo tambien i de sus djentes su marido es boen merkader en tavlas i en mismo tiempo lis da paras kon boenos entereses a los kasalinos i se topen bien kontentes eja pario ijos i ijas, i tiene su kasa i botika el patronaje,

En el anio de 5636, S-r. Behoratche ke estava en el maaden de KIOSTENDJA, foe en este anio ke el nastoinik de mahale ke governava las 3 vignas i en las merkidas seja de los kimures komo tambien i de otros materijales, lo iso ke revejo i iso rovos grandes ke sovre este kalio lo ketaran i en su lugar entre S-r. Behoratche por reinchir esta mision ke este li era algo foerte ma el dicho ke por non estar en samokov el ja lo va a poder reintchirli ke si asento en mahale tambien era la klima boena, ke era a la urija de el rio la marisa, i mas serka a Samokov komo 2 oras de lichura, i de este

735                               Biografia de S-r. Behoratche Josef Elijau Arie                                     1876

lugar loke podija venir a Samokov era solo una ves a el mes, ke altramente non podija dechar, porke el etcho era mas grande, i de mismo tambien era ke i la paga era mas grande,

En muntchas okasiones lo mandava a Pasardjik para ke isiera algunas venditas de fieros, ke esto li afitava en 2 i 3 meses una ves, i para entregar los kontos koando si vinija a Samokov, ke si traiva tambien i los tefteres, ke ja los eskrivija mui klaros porke su letra tambien era limpia i klara, solo ke tenija una makola ke era mui ulvidadiso, i koando li damandavan por alguna quistion i a tanto presto ke kerija responder para estar de lo todo el koriente i siendo ke tenija safek si era djusto a loke iva a responder enpesava a gaguejar, ke de esto lo entendijan ke non era la repoesta djusta, i de kavesa non lo dechavan nada responder, otro ke solo kon el tefter, ke de esto non avijan dingunos jeros,

por los menesteres de la kasa era su IJO Chabad ke asija los emplejos, i en mismo tiempo kontinuava tambien i la echkola ansi tambien i su ermano Rahamim,

En el anio de 5637, ke su esfoegro avija merkado en Sesrimo^[23] un maaden, foe ke lo mando porke lo pudiera resentarlo mas mijor, i denpoes ke estuvo algo de tiempo i ja avija arivado fin a un grado mijor a lavorar, akontesio, ke en este tiempo, era las

736                               Biografia de S-r. Behoratche Josef Elijau Arie                                     1877

revulasiones de los Bulgaros, i los Fafunalis kon los Belisalis 2 kasales si avijan solevantado i foeron kemando kiopris i soidejavan a los pasantes i tornantes, i tambien matavan i el espanto komo era grande foe tambien ke i los lavoradores todos en una notche, sin aserlo saver a dinguno todos si fueron i S-r. Behoratche ke kedo solo en el kasal lo iso presto saver a su esfoegro i sigun el orden ke li dio era porke rekojera toda el fiero i mas todo akejo ke era posible i ke lo mandara a Samokov i esto ke non si podija traersi ke lo depositara en los magasenis bien serados i el tambien ke si viniera kon la entision ke mas tadre ke ja se iva de moevo resentar lo koal ke non foe ansi, i sigun ditcho lo iso todo i el tambien si vino a Samokov, i estava serka de su esfoegro ke lo mandava en algunos lugares por su etcho partikular ke el tenija, kon ke el resivija su paga en regular,

En este anio tambien li nasio una IJA i la jamaron SARA, ke la koala denpoes de poko tiempo de las hasinuras de las krijaturas eja murio, i su madre la joro muntcho tiempo porke era  mui ermosa.

Su IJO S-r. Chabad enpeso de este anio a ser el grande monitor en la Echkola, i li pagavan a 10 groches a la semana, por el presipio el ja foe kontente ma mas tadre si foe mui repentido porke iva kedando atras del sus estudios, ke non tenija el tiempo por koando enbesarse las liksiones i esto foe tambien una de las rasones ke non si foe i el a Paris para salir i el tambien profesor,

737                               Biografia de S-r. Behoratche Josef Elijau Arie                                     1877

sigun ke otros si foeron en este tiempo de su klasa,

En el anio de 5638, ke era la guera Turka-Rusa, i ke la armada rusa ja si avija enpatronado de las posisiones de Plevna i ke los sovrinos todos de su esfoegro ja si avijan ido a Kostan i el espanto para ejos komo foe mui grande li kalio i el tambien ke si foera, djunto kon toda su familija, i lo todo ke el enpatronava seja en komanijas ke ja lo tenija lo todo pronto por la enviernada sigun elnuso [el uso] de akel tiempo i todo modo de ropas^[24] seja fieros i otros i vistimientas i mobilijas i mas todo esto ke podija tener lo todo si la konfejo a su jerno por ke lo goadrara, i lo kudijara fin ande era posible i el si foe, i denpoes ke ja pasaron komo 4-5 dijas de la partensija de su esfoegro, el si rekojo sus krijaturas i lo poko de kosas ke el tenija i se vino a la kasa de su esfoegro i su kasa la sero i de esta manera la iva goadrando la kasa kon sus kosas ke avijan i de la komanija ke avija tambien era ke si servija, i siendo ke ja tenija para pasarse era ke non buchko de aser dingun etcho a tiempo ke otros en este tiempo ke los rusos ja vinieron era todo modo de artikolo mui karo i kada uno iva a muntcho ganando por ke i la konsumasion tambien era mui grande ke los rusos trucheron muntcha moneda kon ejos, i gastavan tambien a muntcho i de esto era ke i los sevdadinos tambien gastavan porke ja estavan boeno ganando

738                               Biografia de S-r. Behoratche Josef Elijau Arie                                     1878

i Hr. Avraam mos desija ke en el tiempo de los rusos solo foe las grajas ke non ganaron,

I en este anio ke si vino a Samokov algunos de la Familla ke estavan en Kostan foe tambien ke i jo Tchelebi vine i denpoes ke estuvo unos koantos dijas i ke mi foe torna a Kostan i mi ermana la S-ra Behurutcha ke eja tambien si kijo venir, foe ke mos fuemos djuntos i estuvo en Kostan 3 meses, i kon todos djuntos si vino i eja tambien i koando, ja venieron su esfoegro si entiende de sujo ke toparon lo todo de la komanija en manko i s-r. Behoratche si foe en su kasa ke de mismo la topo vasija sigun ke la decho lo koal ke non lo penso esto ke se iva a ir de moevo en su kasa i ke si [sin] podija prontar alo manko de koalo foesa, Porke a los presipios esto li vino Pesgado, fin resentarse a la vida de mas antes,

En el anio de 5639, ke S-r. Behoratche ja estuvo en su kasa i su paga ke resivija de su esfoegro ja era en regla era ke lo iva pasando i de ves en koanto era ke dolachijava seja por las vignas i los maadenes, i tambien algo en los etchos de la butika aun kon todo ke eran mui kurtos

en este anio tambien li nasio Una IJA ke kon eja lo isieron sigun de la moda de este tiempo, i eja kerija parir otro un ijo i kon esto non parir mas, ke i este desejo tambien ja lo alkanso

739                               Biografia de S-r. Behoratche Josef Elijau Arie                                     1879

i a esta IJA la jamaron SIMHA, i en su tiempo tambien la kasaron, kon S-r. Mechulam Chamli de SOfia i sus ermanos li dieron 60 napoliones de kontado i achugar a sus onor, i biven mui boenos i aunados i eja pario IJOS i IJAS, i su marido si entremete en aser kufores, tambien i otras kosas de merkansija, i se pasan mui boenos,

Su IJO el S-r. Chabad Kontinuava, la echkola komo tambien i su ermano S-r. Rehamim i en mismo tiempo tambien era i monitor en la Echkola i kon una paga mas grande, koanto a S-r. Behoratche, era de mismo en los etchos de su esfoegro, i ejos lo pasavan mui kontentes, ansi tambien i en kasa la S-ra Behurutcha, kudijando la kasa i tambien a sus krijaturas,

En el anio de 5640, ke S-r. Behoratche era nastoinik en el maaden de Kiostendja, lo iva enkamenandolo ma era kon muntcho mal porke los lavoradores, mas ja non kerijan sintir a los komandos seja de el patron seja tambien i de sus nastoinik i ansi era ke non kamenava de el entodo boenos los etchos, i tambien komo el fiero no lo estavan bien lavorandolo, era ke si jevava mal i para venderlo i para aser las venditas en okasion kalia ke foera a Pasardjik i S-r. Behoratche, i en este tiempo ke el topo a merker en Pasardjik una partida de koeros parisiendole ke ja eran baratos i ke lo demanda esto de aserlo en Hevra, ke el tambien lo kirija ganar de afoera

740                               Biografia de S-r. Behoratche Josef Elijau Arie                                     1880

i aun kon todo ke asta non lo podija aser una ves ke ja era empeigado ma siendo ke ja lo kijo i por non romperlo isieron kontratos sovre la Hevra de estos koeros kon la kundision ke el desbolso devija ser de su esfoegro i la ganansija kontra metad ansi tambien i a la piedrita i el ke si foe a resivirlos En Pasardjik, lo iso ke si merko un vistido de 350 groches, i koando vino a entregar los kontos lis dicho a sus konijados por estas 350 groches ke lis asenialaran en la partida de los koeros komo akonto de la ganansja, ke li iva a tokar de su parte, i esto ke non lo toparon de djusto por eskrivir ganansija antes de vendersen foe ke si lo dicheron ke esto ejos non saven aser esta manera de operasion, i siendo ke si lo dicheron i algo komo de kon risa, foe ke si aravio mui muntcho i decho todos los tefteres i kontos i se salio de la butika kon ke mas non lis vino para entregar los kontos ke non si avijan eskapado, i kon esto koeros tambien el non si kijo mas nada okupar i ansi foe ke lis kalio ke lo kargaran a otra persona kon paga para ke los vindiera, i pasando mas largo tiempo apenas ke ja si vindieron foe ke uvo 1000 groches de piedrita, i restaron ansi aviertos, i denpoes ke ja si lo isieron saver este konto ja lis venija de moevo, ma solo ke mas non foe sus empeigados, a rason ke si aravio i non lis vino mas,

En el anio de 5641, S-r. Behoretche se iso kahvedji

741                               Biografia de S-r. Behoratche Josef Elijau Arie                                     1881

i se alkilo una tchika kavane para los djidios i esto para los ke si levantavan demanijana, porke i el era ke si levantava mui demanijana, i esto lo foe kontinuando i lis asija el mismo los kahves, i de esto si enbesava, muntchas kosas ke avijan por la sivdad, i en mismo tiempo tambien tenija ke ja ganava alguna kosa ke era solo por el menester de su hachlik,

Su IJO el S-r. Chabad, en mismo tiempo ke kontinuava la Echkola lo asija tambien ke avijan muntchos empeigados ke kerijan enbesarsen en Franses, i era el ke lis dava liksiones, en las notches, ke de esto el resivija grandes pagas, ansi era i de mismo ke su ermano S-r. Rahamim tambien era mui akurat por enbesarse las liksiones sigun ke todos los 2 ja son mui entelejentes,

Ejos espandieron roidos por la plasa ke keren la eredad, de su padre ke a la S-r. Behurutcha, la kanderijavan porke lo demandara esto i mismo vija de el Djusgo, ma eja desija ke non savia si es ke podija reuchir porke ejos ja tenijan resivido de koando kasaron al menos 50.000 grochas, i aparte S-r. Behoratche ja deve ke li tienen dado, mas 100.000 groches en las merkansijas ke asija i ke a los kavos li kalia ke lo pagara lo todo su esfoegro, i siendo ansi mas non podemos esperar de ejos dingun protejo, ma solo podia ser ke lis rogaran a ke lis reglaran una semanada, kosa de poder tener un enpesijo, por el moestro mantinimiento, i lo todo de estas demandas dechandolo a la vanda, lo isieron sus ermanos ke si uvligaron a darles a 40 groches a la semana entre los 2 ermanos ke son a

742                               Biografia de S-r. Behoratche Josef Elijau Arie                                     1881

20 groches a kada una i aparte tambien i 25 karos de lenija a el anio i esto lo isieron entre los parientes i amigos i de eja li tomaron las deklarasiones menesterosas i aparte lo isieron en el notarios i en el Djusgo ke si iso akt, en deklarando ke eja si konvino kon sus ermanos i ke mas non tiene el deretcho de demander dinguna eredad de su padre, i eja los afirmo i iva resiviendo regularmente los ditcho 20 groches de kada ermano en mui regla, i en kada okasion seja koando kasava a las IJAS seja en otras okasiones era ke siempre ja era regalada de esto ke era posible,

En el anio de 5642, li nasio una IJA, ke la koala foe tambien botchka, i la jamaron VENTURA i las pario mui kolai i eja foe mui vergonsosa ke non resivija a dinguno porke la vijitaran eja jorava, de esto ke ja estava enfasiada i sovre todo de esto ke parija botchkas, i ansi tambien si avergonsava, i S-r. Behoratche, i en este parto el si foe de la sivdad, por unos koantos dijas ke si avija hasinijado,

S-r. Chabad, aparte de las liksiones ke el lis dava a los tchinovnikis^[25], era tambien ke li dava i a Rachel mi IJA kon Oro la IJA de S-r. Behoratche, i si li pagava a 20 groches a la semana, i era mui merakli para ke si enbesaran ke lo mas muntcho ke save es de las liksiones ke tomava de S-r. Chabad, i a S-r. Rahamim tambien lo keto en este anio de la Echkola i lo metio en tersilik

743                               Biografia de S-r. Behoratche Josef Elijau Arie                                     1882

en la butika de H. Jaakov el Tersi komo tchirak, sin ke li pagava dinguna paga, seja el uno, komo tambien i el otro, i por el sostenimiento de esto era su ermano S-r. Chabad de lo poko de su ganansija ke lo sostenija, i aparte el tambien era ke ajudava i para el gasto de la kasa, i en este anio foe ke i jo tambien enpesi a tomer liksiones en bulgar, de el mismo S-r. Chabad, i esto foe ke kontinoi, m mui poko tiempo, i de estas liksiones ke las foe tomando es ke foeron los presipios de lo poko de Bulgar ke se agora, seja en eskrivir komo tambien i en algo avlar,

Sigun ke mas antes ja lo tengo eskrito por la sigunda kasa ke si lis tiene merkado de su esfoegro, en este anio eja la S-ra Behurutcha si konrogo de sus ermanos, por ke si la enpresentaran a eja i kon ke si la pasaran tambien i kon dukomentos en el notarios, ke esto sin dinguna pretensija i por aserli su desejo si la pasaron al sujo nombre, lo todo en el notarius, i de esta manera, foe ke lo tuvo el patronaje de esta kasa

En el anio de 5643, S-r. Chabad, visto a todas sus penas i foersas ke el las iva sakrifikando, i ke todo su ganado era apenas ke estava pudiendo abasteser para los gastes seja de la kasa komo tambien i otros para el non li estava podiendo sovrar ni avansar al menos ni 100 groches, sovre esto el sin tadrar, si ditchiso

744                               Biografia de S-r. Behoratche Josef Elijau Arie                                     1883

de partir de Samokov, i sin ke lo avlo a dinguno el partio por Filibe, i apenas el tenija 16 rublas de paras kon si, i el ke ja arivo a Filibe, i de el presipio, ke non topo ande empeigarse, i ke non saviendo koanto tiempo li iva a turar, fin topar el empeigo i la moneda ke li era mui poka era ke non lo pudo estarse seja en algun Hotel komo tambien ni tomarse una kamareta en alguna kasa kon mas i ikonomija, i de esto era mui sikilijado, fin a ke lo vido un sierto su amigo Djidio, i li dicho si ja es ke non poede gastar, para lokal ande durmir i por aserli plaser, li dicho, si es ke kirija ke si foera en su kasa, i adebacho de la suja eskalera ja si podija etcharse, kon ke este amigo li dio tambien i la kama i de esto foe ke si gusto mui muntcho, ke non li iva a kovrar nada por esto ke iva a durmir en su kasa sin dinguna paga, i ansi lo iso i estuvo durmiendo a debacho de esta eskalera komo 3 meses, i koanto al sujo mantinimiento ja si kere entindido sigun de loke si mantenija, i denpoes de este tiempo ke ja estuvo komo 3 meses en vasio foe ke topo a empeigarse en el prekuror general kon una paga de 8 liras a el mes de paga, i de esto aparte de loke si gusto el mismo foe ke si gustaron tambien i todos sus parientes, i su etcho era ke tresladava todo dukomento de el fransa a el Bulgar, i de el presipio el non mandava nada a kasa, ma mas tadre el si aparto una sierta suma por mandarle a el padre por ajuda de el gaste de la kasa i esto si los mandava regularmente en kada mes,

i koanto a S-r. Rahamim, ke estava en la botika de H.

745                               Biografia de S-r. Behoratche Josef Elijau Arie                                     1883

Mair el Tersi foe en este anio ke si adjunto tambien i S-r. Behoratche, por ke el ja konosija, de este ofisio, i a todos los 2 lis pagava a una mui tchika paga, i kon esto tambien aparte ke si aprovetchava de lo paga era tambien ke ja tenija ande enbeveserse,

En este anio tambien li nasio un IJO ke lo jamaron Avraam, i kon este parto tambien si iso todo esto ke si asija en todos los otros partos porke eja si gusto mui muntcho ke pario IJO sigun ke ja lo tengo eskrito ke esto lo desejava ke era ke li parisija ke denpoes ke parija IJO mas non iba a parir i sigun ke ja foe ansi i era eja ke los kudijava a todos i eja lis prontava la komanija i los kosija i los lavava i mas todo el menester ke lo demanda una kasa sin ke era ajudada de dinguno otro i eja fin ke estuvo pariendo era mui flaka i mui menuda i torna kon todo para lo todo ja alkansava, i era tambien sana i de este tiempo i endelantre ke ja eskapo de parir, eja si anpeso a engodrar, i engrandeserse, i siempre foe mui sana sin ke sufrija de dinguna maladija, solo ke mas tadre eja enpeso a non sintir muntcho de el un ojido i mas tadre li korijan algunas lagrimas de los ojos koando asija frio, sus IJOS la miran i la kudijan mui muntcho i sin eja non estan nunka, ansi tambien la respektan mas de muntcho sus noeras, i eja es jena de la alegrija, eja bive lo mas muntcho kon su IJO el Tchiko ke esta ainda en este tiempo ke esto eskriviendo la dita sin kasar, i de mismo la ama tambien i S-r. Avraam ke esta kon eja, a eja li nombraron una mesada sus IJOS i de esto eja si viste i se mantiene, ke ja li es

746                               Biografia de S-r. Behoratche Josef Elijau Arie                                     1883

grande abondansa, i es mui kontente,

En el anio de 5644, ke S-r. Chabad estava de mismo Empeigado en el prekuror general de filibe ke era la kapetala de la Rumilija oriental en el tiempo ke foe otonomija soto el governamiento de Gavril Pacha, i la paga si la pujaron a 10 liras i era tambien mui kichto de el prekuror, i de mismo li mandava a el padre, la mesada ke li nombro regularmente, i koando si aserkavan los moadim el lis mandava tambien i algunas ropas para ke si isieran vistidos seja para ejos komo tambien i para las krijaturas,

S-r. Rahamim ke estava ande H. Maeir el Tersi, foe ke esto non lo pudo aser, i en este tiempo ke en Stara Sagora avriaron una Echkola para Franses, i kijeron un profesor de Samokov, de los elevos salidos de la Echkola ke eran renomados todos los elevos ke salijan de la echkola de Samokov, i de sus parientes ke ja eran los miembros de el komite echkolar^[26], lo akonsejaron a S-r. Rahamim porke si foera i ansi foe ke si kontento i se foe i lis resento una Echkola lo mijor ke poede ser, kon ke li pagavan la suma de 1000 fr a el anio, i aparte lokal por durmir i para irse ke el non tenija paras li enprestaron de sus amigos i parientes, ke denpoes los pago i se toparon de todas las 2 partes mui kontentes i siempre lo jamavan en las kasas de los mas notavles de la sevdad seja para komer

747                               Biografia de S-r. Behoratche Josef Elijau Arie                                     1884

komo tambien i en los pasatiempos y^[27] sus adjuntas, i todos lo jamavan S-r. musiu, kon boka jena, i lo respektavan muntcho,

S-r. Behoratche tambien mas non kontinuo el tersilik a rason ke iva endo mui flako, i sus IJOS tambien li disijan ke non lavorara, ke ejos ja li ivan a dar fin ande poeden i ke estuviera mas libero, i ansi lo asija,

En el anio de 5645, S-r. Behoratche ke estava sin dinguna okupasion kijo vijitarlo a su IJO Chabat en filibe i kon la suja kontentes el partio por Filibe i se estuvo kon su IJO unos koantos dijas i koando si iva a venir, li djo muntchos presentes, seja en moneda komo tambien i en algunas ropas, i entre sus konversasiones ejos platikaron sovre el sirvisio militer, ke era en este anio ke lo tenijan de merar, i siendo ke en akel tiempo era la disiplina al uso ruso ke los apretavan muntcho a los soldados, sovre todo a los djidios, era ansi ke estava, mui deskurajado, i non savija koala aser, i en FILIBE ke estava tanto kichto de su prekuror, i tambien ke tenija muntchas liksiones ke dava a mansevos sovre el franses, i aparte el eskrivija muntchas prochenijas^[28] kon grandes pagas, i el tambien era sekretar de sosietas djudijas ke avijan en Filibe ke por lo todo resivija pagas aparte, i de todos era tambien mui bien visto, ansi foe ke siempre era sovre esto embrolijado i la

748                               Biografia de S-r. Behoratche Josef Elijau Arie                                     1885

suma de moneda, ke el ja avija amontonado el la dava kon enteres a los sujos konosidos, i mas tadre su ditchision foe de decharlo a filibe i enpeso a rekojerse, por toparse siempre pronto i por non sirvir el sirvisio militario,

S-r. Rahamim i este anio tambien el si empeigo de moevo en la Echkola de Stara Sagora, kon algo ke li pujaron mas muntcho su paga, i de mismo era tambien mui bien visto i el tambien en esta anio li enpeso a mandarle a el padre algo de moneda por ajuda al sostenimiento de la kasa i tambien i el lis mandava muntchos presentes de esto ke avija en la sivdad,

En el anio de 5646, sigun ditcho por S-r. Chabad, ke si estuvo prontando, por partir, foe ke lo iso este sin ke lo iso saver a dinguno, i partio, por Kostan kon la entision de topar algun etcho en Kostan, i denpoes ke el ja estuvo algo de tiempo i non pudo topar dingun etcho ke li era konviniente para el i kamenandose por las plasas de Kostan el si adjunto kon otros ansi mansevos ke i ejos lo isieron este por non sirvir, i lo toparon mas konvenivle de decharlo a Kostan i irsen en Brusa, ke esto lo podijan mijor pasar, i ganar mas muntcho, ke sin tadrar el si rekojo su bagaje, i se merko de Kostan algo de los artikolos de fieririja, i partio djunto sus ropas i arivando en Brusa el si alkelo una butika en la

749                               Biografia de S-r. Behoratche Josef Elijau Arie                                     1886

plasa de ande vendijan ansi artikolos, i kon esto enpeso a aser algunas tchikas venitais, ke de el presipio ja foe kontente ma mas tadre el ja foe deskorajado de estos artikolos,

Por esta parte en Samokov, ke lo buchkaron i ke non lo toparon i en este tiempo ke era la Gera sirba-Bulgara, ke foe ke si adjunto la Rumilja Urienal a la Bulgarija, i ke tenijan el menester de soldados, lo isieron ke lo enseraron a el padre i lo ivan apretandolo porke lo entregara a su IJO, i kon el avijan tambien i otros Djidios ke eran i a ejos ke lo isieron lo mismo ke los enseraron tambien porke los unos de ejos si avijan foido i los otros si avijan eskondido, ke eran S-res Jaakov B. Elieser Kojumiji olu, i Refael B. Manoah, i Nisim Besalel, i todos los 4 eran enserados en una kamareta en el utchastok^[29], i el espanto komo era mui grande lo mas muntcho non seja ke los harvaran, ke en akel tiempo era ke si servijan de la metoda Rusa, kon harvarlos, ke era el 19 i 6, i es ke los desnudavan i en las nalgas kon fletchas delgadas i mojades lis davan al presipio, las 19 asotadas ke de las primeras ja lis saltava tchoros de sangre, i kedavan desmajados i denpoes kon mas flakesa los asotavan i kon las otras 6 asotadas, i era kon esto ke los asijan atorgar a kada uno sus pekados, i pensandosin a esto ejos todos los 4 se isieron hasinos ke el S-r. Behoratche lo poko ke el komja lo gumitava, i S-r. Jakevatche, si avija enkantado, i S-r. Refael li vino una sangre por abacho ke ja si avija muntcho amarijado i el S-r. Besalel, era kon una foerte dolor de kavesa, ke todos estavan

750                               Biografia de S-r. Behoratche Josef Elijau Arie                                     1886

etchados, sin kolor en sus karas, i jo Tchelebi ke foe a vijitarlos i viendolos en el grado ke si topava, i kon grande kuraje mi foe en deretcho ande el komandan ke el los avija etcho enserar, i li diche vos enseratech a 4 djidios, ke los topach, por kulposos, kon la entision ke ejos seja ke los fuiron or seja ke los goadraron a sus IJOS por non decharlos ke siervan el sirvisio militario, jo vos roge ke mi digach, si esta lei es solo para los djidios,? a tiempo ke ja ai i koantos kristijanos ke non si presentaron i a los padres, non los apresatech, ni al uno de ejos,? i sovre todo ke de koando los apresatech, ke ja son agora kon 10 dijas, non kudijatech mas por ejos i va aser ke una demanijana los vach topar a todos moertos, i esto seja ke vaigach vos or seja ke mandech por ke los veigan en el grado ke ejos si topan, va aser entonses ke vos vach a kreér,^[30] i sovre todo estos padres, ke sus IJOS ja son todos majorentes, komo es ke ejos los poeden entregarvolos, ke esto ja lo savech i vos, ke es de moevo rogarvos por ke los soltech, ke todos son patrones de familijas i proves, i denpoes ke jo ja eskapi de avlar, i kon ira grande si levanto en pies, i mi dise ke las leés en bulgarija son para todos unas, por esto ke dises ke ai tambien i kristijanos ansi ke non si presentaron ti uvligo ke fin al tiempo de 2 oras ke mi devis de traer la nota i en kavso kontrario ti ago a ti responsable, i jo ke mi sali de su kanselarija, i ke non savija si mismo avrija menos ni un kristijano ansi foido, foe ke tuve grande espanto, ke en ansi tienpos mi podija i ami mismo meterme en preso, i jo mi foe deretcho

751                               Biografia de S-r. Behoratche Josef Elijau Arie                                     1886

ande el natchalnik^[31] de la sivdad, ke era un mui bien konosido mio i se jamava S-r. Pantaleév, i denpoes ke si lo konti todo esto ke mi paso kon el komandant, foe ke mi dicho ke kalija te aderesaras ande mi ma agora ja paso i non seja ke ti espantes ke jo ja vo ir i se lo vo a avlar, ma si es ke ti jamara li diras ke nombres de personas non saves i esto es en las plasas i las kavanes ke si avlan i si es verdad esta nota de los ke mankan ja la tenech vos, i jo ke mi sali tambien de ande el S-r. Pantaleév, mi foe en kasa i enkomendi ke si en kavso mi buchkaran, ke digan ke non estava en kasa, ke i esto tambien foe ke pasando las 2 oras ja vinieron a buchkarme, i sigun ditcho ke ja lis dicheron ke non estava en kasa ejos ke si foeron por las poertas grandes, i jo por la sigunda poerta, ke akurta el kamino para la plasa komo, serka 250 metros, mi foe mas antes de ejos ande el S-r. Pantaleév, i jo ke li diche ke mi buchkaron lo iso ke vino kon mi djuntos ande el komandir, i jo ke ja estava, kurajoso, kon entrar de la poerta ja mi demando si es ke li truche la nota i jo li diche sigun eskrito ke mi enbeso el Natchalnik, i ejos ke ja avijan mandado seja sus agente seja tambien i a el mediko, i viendolos ke ja era verdad todo esto ke jo lis konti, porke de antes ja lis tenija enkomendado por ke non alempiaran seja los gomitos i seja tambien i la sangre, a los kavos me dicho, ke deven de amostrar fijansas i ja los van a soltar, i jo koando ja foe a los apresados ejos ja estavan rekojendosen ke ja los soltaron, ma esto ke li vino pesgado al komandant, lo iso ke mi buchko tambien i ami komo reservisto^[32] para los opultchensis,^[33] i ke jo tambien devija aser el exersisio

752                               Biografia de S-r. Behoratche Josef Elijau Arie                                     1886

para en kavso menesteroso ser i jo un goadrador para la sivdad, i esto ke jo ja era sigun la lei, i devija aserlo esto, a la ora mi kalio tomer un sertifikato de la munesipalita, en deklarando ke ja era pasado de los anios para este sirvisio, i jo ke foe a tomarlo este sirtefikato, i ke avrieron el rijisto para merar la edad ke jo tengo i ke ja kalija ke sirviera sigun ditcho, lo ise ke mi ermana Behurutcha ke estava, eskrita ke era nasida en el anio de 1842^[34], i ansi detras mi ermana Masalu, i denpoes jo i denpoes Refaelatche, kon darle a entender a el Kmet ke este reguistro era jero i era jo el grande, i denpoes S-r. Refaelatche, i denpoes mis ermanas, ke a esto ke si kontento el Kmet, lo iso trokar, i ke si eskriva sigun de loke jo lo esto deklarando i a esta rason ke mi si de, seja ami komo tambien i a S-r. Refaelatche los sertifikatos, menesterosos, ke todos los 2 ja pasavamos de este sirvisio, i jo ke si lo jevi a el komandant, i non kriendose nos seja ke la tomarija por hatir, lo iso ke vino el mismo a examenar i lo vido ke mi ermana ke estava eskrita kon el nombre de Behora, i denpoes de mosotros, al punto mi dise ke el los djidios el Behor es el grande, i jo ke estava el grande i kon el nombre de Tchelebi keri disir ke jo non so el, grande, ala ora kon una risa li diche ke este behora es la grande de las IJAS i al grande delas IJAS tambien si jaman Behoras, i esto lo aprovo tambien i el Kmet, i kon esto foe valavle el sirtifikato, i se paso i esto de esta forma,

I igual a este paso de la soltadura, de los apresados

753                               Biografia de S-r. Behoratche Josef Elijau Arie                                     1886

ke foe vija de mi Tchelebi, li paso tambien i a mi IJO Jean, en el anio de 5673-1913, koando estava en Seres, en la Gera de los alijados governos de los balkanes kontra el Turko, i ke estava, komo aptekar en la Etapna Bolnisa de la 7 rilska devisija, i en esta gera, ke era tambien el IJO Mordo de S-r. Behor Refael, ke es el inieto de el ke eskrivi S-r. Refael B. Manoah, ke estuvo enserado por su IJO Behor ke es padre de el ditcho Mordo, i este ultimo en una de las etakas ke tuvieron en los kampos de las montanias de la kresna, foe ke seja ke si espanto or seja ke non pudo defenderse, lo iso ke si entrego a la armada Turka komo presoniero, i en el tiempo ke si lo estavan jevando los Turkos, ke si supo ke si lo javaron i ke el kijo entregarse, foe ke korieron partida de la armada Bulgara a detras i kon moevas geras ke ejos isieron foe ke reucheron a tomarselo el ditcho apresado, i siendo ke el si kijo entreger foe ke lo dieron a el Djusgo, ke denpoes ke ja estuvo en preso un sierto tiempo i ke devija ser aplomado, lo trucheron en Seres a la suja devisija para kondenarlo i su padre ke si foe tambien para buchkar a defenderlo, ke disen ke gaste serka 10,000 fr. i sin tenerlos, i saviendo ke Jean ja estava, en Seres seja komo sevdadino seja ke ja tenija el poder de ajudarlo, i por un orgojo ke enreina en el dito Behor, non si li adereso ni una ves a demandarle algun konsejo, i Jean ke ja lo supo de esto i ke kon 3 dijas denpoes ke ja si iva aparar al djusgo i era siguro ke lo ivan a aplomar, i por desgrasija de un orgolio, si podija depedrer el mansevo ke es savio en la agrekoltura lo

754                               Biografia de S-r. Behoratche Josef Elijau Arie                                     1886

iso por aserli plaser i lo jamo al ditcho S-r. Behor sin kontarle nada i li dicho ande disilde a voestro IJO, ke venga al punto ande mi i sin ke mi demandech, para koala, i S-r. Behor lo iso ke si lo mando i li dicho ke diga a el mediko ke estava hasino i ke el ja lo va a meter en su bolnisa, i ansi lo iso i el mediko ke ja estava avlado de Jean lo iso esto i lo metieron en la bolnisa i koando ja arivo el dija de el Djusgo ke lo mandan a tomarlo i ke deven de demandarlo de Jean, i Jean kon un reporto ke iso i afermado de el mediko en deklarando ke el soldado demandado non si lis poede entregar a rason ke esta foerte hasino i ansi ke kale se prolonge el Djusgo para koando ejos de la bolnisa ja lo van a desir ke ja estava sano, i kon este raporto si prolongo el Djusgo para koando si va a deklarar ke ja esta sano i el delo si sero por entera, i kon esto foe deliberado el mansevo para siempre,

En el anio de 5647, S-r. Behoratche se iso haver kon H. Merkadutcho i avrieron una butika para vender arinas, i algunas tchikos artikolos de bakalie, i esto foe ke H. Mekadutcho metio el kapetal, i enpesaron al etcho ke de esto ja foe mui gustoso, ke de esto al presipio ja iva asiendo algo de venditas, i se ganava alguna tchika suma, ke si la espartijan en kada semana la ganansija,

i S-r. Rahamim ke estava en Stara Sagora komo profesor

755                               Biografia de S-r. Behoratche Josef Elijau Arie                                     1887

de la echkola era mui bien kontinundo i era mui bien visto de todos los Djidios, i estava tambien mui bien amontonando moneda, i se topava mui kontente, i siendo ke en este anio tamben lo ivan a merar i a el por tomarlo para soldado, i sigun ditcho ke era espanto grande el ser soldado, foe ke enpeso a kartejarse kon su ermano Chabad ke ja estava en Brusa, para i el tambien adjuntarse a el i esto la kontinuaron fin ke si aunaron para i el tambien irse a Brusa i lavorar los 2 djuntos,

S-r. Chabad ke ja estava en brusa era ke kontinuava en el etcho de su butika de fieririjas, ma de el presipio non li iva sus venditas adelantre, ke de esto foe algo deskorajado, ma iva tiniendo la pasensija, i de esto foe ke lo iso de irse ma non avija remedio, para boltarse,

En el anio de 5648, S-r. Behoratche era ke de mismo Kontinuava, en la butika de las arinas, aun kon todo ke era mui pokos los profitos, i de esto ke resivija de sus konijados a 40 gr. a la semana era ke si lo ivan pasando i del ves enkoanto tambien li avijan enpesado a mandar tambien i sus IJOS de Brusa, algunas sumas de esto ke ejos lo alkansavan, i ansi era ke non jevavan apretos, si entiende ke asijan tambien i algo de ikonomija,

S-r. Rahamim en este anio ke ja estuvo i el en Brusa

756                               Biografia de S-r. Behoratche Josef Elijau Arie                                     1888

lo isieron ke los 2 ermanos ke ja eran aunados, si adjunto tambien i el a la butika ke ja la tenija S-r. Chabad, i por el presipio kontinuaron en la merkansija de los fieros, ma mas tadre ejos lo isieron ke adjuntaron tambien algo de ropas de malifaktura, i esto asijan los empleos de Kostan, i kon la grande ikonomija ke ejos la asijan era ke lo ivan pasando, ejos tenijan una tchika kamareta para durmir i se prontavan ejos mismos el menester de sus mantinimiento i ejos non salijan a dingun luger afoera de sus butika, ejos no frikontaron dingun pasatiempo, por los presipios, a ejos las jamavan en Brusa los muhadjerikos, i de esta manera i kon la mui grande ikonomija lo ivan pasando, ejos non avlavan muntcho para non arivar deskorajarsen, ejos konversavan en las notches solos por el sujos avenir lo todo mui delikadamente, lavoro de la butika era kon grande energija, i kon presios konvenivles asijan las venditas,

En el anio de 5649, kon el etcho de la butika ke tenija S-r. Behoratche, en Hevra kon H. Merkadutcho en este anio, mas non la pudo kontinuar, a rason ke non pudo vender mas arinas, porke uvo en grande abondansa de esto en todas las personas, i ansi foe ke si meraron konto i foe ke li kedo a dever 300 gr. i seraron la butika, ke por las ditchos 300 groches su jerno S-r. Mochonatche lo apreto mui muntcho, por kovrarselas ke saviendolo ke non tenija

757                               Biografia de S-r. Behoratche Josef Elijau Arie                                     1889

torna kon todo lo avregonsava i lo trespajava, i lo desonrava, en la plasa, fin ke sus IJOS kalio ke si los pagaran porke la iva tambien apretando i a su mujer i eja vinija i jorava ande sus ermanos ke este ja lo asen i mismo mas poderosos, i en esto tiempo ke esto eskriviendo la dita, ke mandan a sus mujeres ande sus Padres i madres en los dijas de Moadim i de Chabatiod, para aserlos jorar, i en estas dijas ke la semana entera tambien ja es de kontino i mas mijor lo asen agora ke las asen vistir a sus mujeres de los mas mijores vistidos, i mismo endjojarlas, i las enbesan de koala forma los deve de aserlos jorar, i ejas si en kavso refusan de aserlo esto, lo asen ke lis dan las mas eskuras vidas, kosa ke non es de eskrivirsen lo todo mismo ke ja lo saven ke non tienen,

Los 2 ermanos ke estavan en Brusa, ejos por aser el etcho mas grande, si merkaron un asniko, i lo kargavan de algunas ropas ke si podijan vender por las mahales i S-r. Rahamim, lo javava por la mano de plasa en plasa, i iva vindiendo a las turkas i a otras mujeres, i su ermano S-r. Chabad, si estava en la butika, i el tambien asija las venditas posible, ke kon esto ejos ja tuvieron algo mas grande sus negosio, i en este tiempo ke ja estavan mas liberos enpesaron a frekontar en las kasa de sus amigos en las notches koando si rekojijan por pasatiempo, i siendo ke en Turkija por las notches non si podija kamenar sin ke tuviera un fenor ensindido en su mano, i ejos ke foeron konbedados en una kasa ke era serka de sus kamareta ande durmijan, i pensando ke non los iva aver dinguno,

758                               Biografia de S-r. Behoratche Josef Elijau Arie                                     1889

ejos si foeron sin fener, i koando ja salieron por venirsen en sus kasa, foe ke el djandar komo ke los estava esperandolos i a todos los 2 los rekojo i los metio en preso, por koando iva a venir la sira sujas, i los ivan a djusgar, i ejos ke si goadravan tanto de non salir a dingun luger, i ke lis arivo agora esto era ke non savijan koala rijir, i eran mui sikilijados, porke los podijan kondinar komo personas de mal asedores, sovre todo ke ivan a tener i la butika serada, i protejador ke non tenijan, ejos buchkaron a salvarsen kon dar algunos presentes a los ke los detinijan enserados ma esto non reucheron i pensando ke podija turar esto komo un mes de tiempo foe ke si aderesaron ande uno de sus amigos kon una karta rogandole porke kudijara por ejos i este S-r. ke los konosija foe ke iso los pasos menesterosos en las polisijas i apenas denpoes de una semana los isieron aparar en el djusgo i la kondana foe ke devijan de pagar a 5 midjidies de djesa a kada uno, i esto lis trucho un mui grande deskorajamiento i foeron muntchos dijas mui abatidos i tambien ivan siempre jorando de versen tanto lechos de sus familijas, i mas tadre ejos enpesaron a estudijar esto i en este tiempo tambien ke ja abastesija S-r. Rahamim para el etcho de la butika el S-r. Chabad, si empeigo en una fabrika de sedas ke avija en brusa komo eskrivano ke resivija a 12 liras a el mes de paga ke i esto lis era ganansia aparte, i ejos de mismo siempre kudijavan por sus padre, ke li mandavan siempre de koalo lo podijan, sin ulvedarsen, i en kada semana tambien lis mandavan kartas, ke de este nada non li asijan saver

759                               Biografia de S-r. Behoratche Josef Elijau Arie.                                    1889

para ke non si sikilijara,

En el anio de 5650, S-r. Behoratche ke estava en el anio de la madre, lo kijo ser Hasan i tambien ke li pagaran de el Kolel, ke esto el kumite, lo tomo en mano i ke el ja devija komo 600 groches, i para ke si pagaran i Rohes ke ja era i ke ejos tienen algunas previlegias, lo isieron de pagarle a 20 groches a la semana ke de los koalos los 10 gr. ke si li rebatieran de el konto de la devda i los 10 gr. ke si los ivan a dar en kontante, i de esto foe mui kontente mas muntcho de este ke ja iva a pagar la devda, i non kedar devdor en el kolel, ke sovre esto avijan leés spesijalas ke arivavan tiempos ande los asijan muntcho avregonsar, seja a ejos komo tambien i a los detras de ejos, i kon las Tefilod li era mas kolai ma kon la peracha li foe por los presipios mui foerte, i era la semana entera ke si estava enbesandose la Peracha, para Chabad, ansi i koando vinijan los moadim, i muntchas veses asija jeros ke li ivan areftando de el kolel de abacho i el muntchas veses si chachejava i esto li turo 5-6 meses ke mas denpoes ja si uso, i la desija mui boeno i kantar ke ja savija porke sovija i de mas antes a la Teva en los moadim para ajudar a kantar a el Hasan sigun ke ja lo tengo eskrito, ke en la familija moestra en general ke todos ja savijan kantar, ja era uso ke sovijan, i lo asijan solo por Misva

760                               Biografia de S-r. Behoratche Josef Elijau Arie.                                    1890

i este li era a S-r. Behoratche, una rason para non mankar ni un dija de todas las Tefilod, i por disir el kadich,

Sus IJOS ke estavan en brusa ke a rason ke foeron repintidos de sus ida a Brusa foe tambien ke si foeron deskorajando i a esta kavsa era ke los etchos los tuvieron mas kurtos i Chabad, ke si enpeigava en la fabrika de seda era de 3 a 4 meses ke avija lavoro, i en este tiempo era S-r. Rahamim ke merava la butika, ansi foe ke el etcho ke kamenavan kon el asniko lo abandonaron, ke esto era ke non lis iva a salir los kontos, i ejos si aderesaron ande sus Tijo S-r. nesimatche ke ja estava en Sofia i M. Gavriel ke ja era derektor en la Echkola de la alijansa Jsraelid en Sofia por ke lis toparan algun etcho en Sofia ke si keren gaire vinir ma si espantavan de el etcho de la soldaderija, ke i para esto si es ke iva aver un molde de non sirvir, i S-r. Nesimatche koando resivio la karta sin tadrar ke ejos platikaron sovre ejo i ejos ke ja los podijan ajudarlos, li eskrivio, porke non tadren i ke miren de rekojersin koanto poeden mas antes, i ke si vengan a Sofia ke ja lis van a topar para todos los 2 etchos i ke non si espanten sovre el etcho de la soldaderija ke i para esto tambien ja lis ivan a merar el molde para ke non sirvieran, i koando ejos resivieron esta karta si gustaron mui muntcho, i sus desejo ke ja era esto, de mismo lo isieron ke si enpesaron a rekojer, i esto non lo isieron saver a dinguno i en unas koantas semanes, ke fin a un grado ja rekojeron koalo foe posible lo iso ke partio S-r. Chabad i se vino a Sofia, i se

761                               Biografia de S-r. Behoratche Josef Elijau Arie.                                    1890

abacho en la kasa de su Tio, i S-r. Rahamim resto en Brusa para eskapar de rekojer ke esto li turo mas longo tiempo,

En el anio de 5651, ke S-r. Behoratche asija la Hasanija, foe ke non pudo mas kontinuarla, a razon ke el si avija muntcho aflakado, i si lo krio una tos kon muntcho balgam, ke en veses eskopija tambien i sangre, i visto a esto mas non la pudo kontinuar, i djo la demision ke foe resivida, i de esto si sikilio, ma ja li eskrivieron sus IJOS ke este en reposo ke ja tienen de kudijar ejos para todo el menester,

I S-r. Chabad ke ja estava en SOFIA serka vinido de Brusa lo primero ke iso foe ke si mostro por ke lo mirara la komisia por los soldados, i sigun la lei ke era ke a los botchkos non los tomavan i el ke ja era de estos i kon las demostrasiones menesterosas ke el las demostro, ja foe libero de este sirvisio ke si espantava tanto, i denpoes de esto su primo ermano ke ja era el derektor de la echkola lo empeigo, komo profesor de Bulgar, kon 900 frankos de paga a el anio, i de esto ja foe mui bien kontente, i fin a un sierto tiempo estuvo en la kasa de su Tio i komija i dormija, sin dinguna paga, i S-r. Rahamim ke resto en Brusa era siempre rekojendose i buchkar de vender las ropas ke avijan kedado, i esto sin ke merava ganansijas, porke i su entision era por vinirse i el tambien a Sofia, mismo ke lo tomarijan por soldado,

En este anio ke en Samokov kijeron aser a el plan

762                               Biografia de S-r. Behoratche Josef Elijau Arie.                                    1891

la sivdad i siendo ke su kasa era en una de las prensipalas plasa i vino a ser ke si li foe la kasa entera a el plan i kon muntcho mal li pagaron solo 800 frankos, i esto li kalio ke presto la abandonara la kasa, i ke si saliera, i se alkilo una kasa en una de las plasas ke non iva aver plan en unos koantos anios, ke era en la kasa de el kapetan Nichkov, un sierto makedonijali, i li pago a 300 groches a el anio por kira, ke esto ja era muntcho a rason ke mankaron las kasas, i se paso en eja ma el si sikilio mui muntcho, ke kedo sin kasa, i estuvo algo malato,

En el anio de 5652, ke S-r. Rahamim estava en Brusa foe en este anio ke ja si eskapo de rekojer todo lo de la butika i se vino i el tambien a Sofija serka de su ermano, i denpoes ke estuvo unos koantos dijas en vasijo lo enpeigo i el tambien ande S-r. Sason Pinkas ke era komisioner en el komertcho, para komertchejar ropas de los merkaderes, i li pagava a 60 frankos a el mes de mesada, es de estonses ke i el ainda tambien es komisioner por su konto i komertcheja las ropes de los merkaderes ke es ke devino a ser uno de los mas grandes komisioneres, de esto, i denpoes ke ja estuvo komo 8 meses komo empeigado, foe ke lo meraron tambien i a el para soldado, i de todo loke si peno a ke non sirbiera porke el sufrija de el emoraid, ma non uvo ke li aprovetcho i ansi foe ke

763                               Biografia de S-r. Behoratche Josef Elijau Arie.                                    1892

lo tomaron i sirvio 2 anios i li foe por los presipios mui foerte los exersises ke lo asijan saltar, en los endekes antchos, i el ke ja era de la edad mas grande li foe mui pesgado, i lo sostenija su ermano S-r. Chabad, para el gaste ke si li asija de menester, porke el non tuvo nada de los etchos ke isieron en Brusa,

S-r. Chabad ke estava en la Echkola siendo ke topo a enpeigarse ande S-r. Esra Tatcher, por 100 fr. a el mes de paga i tambien ke podija ver i mas avenir, lo iso ke si salio de la Echkola i si foe ande S-r. Esratche, ke tenija tambien i otras entradas, i li era komo eskrivano ke esto ja lo konose mui bien, i se topavan de todas las 2 partes mui bien kontentes,

I S-r. Behoratche ke estava sin kasa i ke esto non lo pudo somportar, lo iso ke si merko un tereno bastante para una kasa en el tchair de Georgi Makedonijali, por 1000 groches, i se metio en fragua, i iso 3 kamaretas, i kosina i mas todo el menester, kon ke mosotros li dimos una partida de materijal i de la suma ke li avija kedado de los 800 fr. ke tomo de el gradske sovet, ke de los koalos la una partida ja la avija gastado i de su. IJO, S-r. Chabad li tomo tambien 40 napoliones, kon ke li iso la medija kasa a su nombre, i en kurto tiempo is eskapo de fragoar, i se paso en eja i de esto si gusto mui muntcho, ma el si kanso tambien muntcho, i a rason de esto si li renovo la dolor en el bel, i tambien enpeso de moevo a gometar todo loke komija, i siempre kirija estarse entre la djente, ke estuvo mui espantado, i mas tadre el si foe a Sofia por

764                               Biografia de S-r. Behoratche Josef Elijau Arie.                                    1892

verlos a sus IJOS, ke ejos li mandavan siempre mui regolarmente su mesada ke lo avijan nombrado i ke el era mui kontente, ma en Sofia non pudo estar tambien i se vino presto torna a Samokov, el non podija durmir en las notches de la grande flakesa ke tenija, el la mobelio i la resento la kasa mui bien, i en el grande kortijo ke tenija lo sembro todo de modos de arvoles de frutas, i sembro muntchas rosas, la kasa ke ja era visina a la kasa de mosotros li dimos tambien i un kalem^[35] de agoa, ke tuvo boena foente, de agoa limpia, el era siempre kantando en estos tiempos seja en los dijas komo tambien por las notches ke non podija durmir, i lo vijitavamos siempre de mismo i el tambien siempre vinija,

En el anio de 5653, S-r. Behoratche foe indo ainda mas flako, ke aparte de el gomito ke el gometava todo esto de lo poko ke el komija, foe ke enpeso i a gometar tambien lumbrises, por la boka ke esto li era mui foerte, ke sus IJOS li mandavan siempre muntchas kuras de los medikos de Sofia ma non li ajudava, nada, i el non kerija medikos ke lo meraran a tanto ke li porfijavamos todos i todo loke disija era ke koando en mano de mediko si va a dar va aser para murir, i esto ke non lo sintijan ja era ke li traivamos a los medikos ke avijan en Samokov, i mui boeno lo kudijavan ma el era apenas ke tomava las kuras, i se estava rodejandose por los minderes

765                               Biografia de S-r. Behoratche Josef Elijau Arie.                                    1893

tambien por non etcharse en la kama, lo todo espantandose ke de mismo koando iva a entrar tambien i en kama iva aser para non mas lavantarse, ke de esta manera lo foe pasando 4 meses, i koando ja paso i purim ja foe tanto flako ke non pudo mas aserlo komo de antes i se etcho en kama komo un poiko, sin por nada akecharse, i el mediko ke lo vijitava siempre foe lo todo sin dingun provetcho, i ansi foe ke en una demadruga de el 11 Nisan kedo aparado mas para nunka levantarse i murio, i su IJO S-r. Chabad ke estava en Sofia vino i lo jorimos toda la Familia longo tiempo i S-r. Rahamim komo era soldado non pudo vinir de el prisipio otro ke mas tadre, vino i el i de mismo foe demoevo de todos jorando ke la S-ra Behurutcha siempre jorava en disiendo ke li frago kasa para non gosarse de eja de tanto ke peno i ke si gusto koando la eskapo, denpoes ke ja pasaron unos koantos dijas los IJOS si foeron kada uno a sus sirvisios en resentando a la madre su avinir por un sierto tiempo, i eja se akomodava kon sus krijaturas, i jorandolo de dija i de notche,

A S-r. Chabad en este tiempo el S-r. Esratche li pojo su mesada a 150 fr.

766                                             ENTELEGENSA KURAJOSA.

Sigun de loke si veé. de la vida ke la paso S-r. Behoratche, foe lo mas muntcho kon grandes apretos, el foe siempre mui kuragioso, para entrar, en todo modo de kosa, i esto porke todo ja li vinia de su mano i esto li ajudava su entelegensia, i el kurage, sigun lo meldaron koando una persona, ja si entra i para aser i la hasania, i en non siendo, haham para saver meldar la Peracha, ja si keri entindido komo de kuragioso es su nature, solo ke non reuchija ke esto el non lo kulpava, ke la persona su dover es de lavorar, i vinir ensima de el lavoro i adetras, koalo poede mas aser, kijendo disir ke a este modo de personas non tiene dinguno el deretcho de enkulparlo,

767

Asta aki si eskapa la partida de S-r. Behoratche Josef Elijau Arie, fin a el anio de 5653 ke morio, ke todos los anios de la vida ke foeron 52 anios,