סניור יוסף מיכאל אריה בברקוביצ'ה

570

De aki i endelantre si enpesa la Biografia de S-r. Josef Mihael Arie, kon algunos pasajes, de el anio 5622,

571                                          Biografia de S-r. Josef Mihael Arie.                                  1862

En el anio de 5622, denpoes de la moerte de H. Merkadutcho su Padre, ke estava en Berkovisa, foe ke vino a Samokov i estuvo unos koantos dijas i se reglo fin a un grado, en kaza, ke esto sus tijos non lo decharon nada el ke kudijara, por razon ke rekojera algo de moneda, i tambien porke estuviera mas libero, ke kon esto lo toparon ke iva a estar mas sano, i de la flakeza ke tenija avija espanto ke si iva a entekijar, i su esfoegra ke li era tambien i tija porke era ermana de la madre la Bu. Ruzu, iva a ser ke lo iva a merar mas muntcho, sigun ke por los presipios ja foe ansi, i se foe de moevo solo a Berkovisa, i estuvo el anio entero tambien solo i aparte de la semanada ke tenija avija ke li davan tambien i muntchas Nedavod, de las ke si uzan a dar a los mecharetim, en todas las okaziones de fiestas de los Djidios, i otras, i el ja tuvo fin a este anio komo 2000 groches de paras, i era mui gustozo,

La Bu. Ruzo ke estava en Samokov, era ke si enbezo mui bien la komadres, i ansi era ke la jamavan lo mas de los djidios ke aparte ke ajudava para detener la kaza eja ja pudo avansar tambien i algo de moneda, ke lo todo si prontava para i eja irse a Berkovisa serka de su IJO, i todos sus parientes ke ja tenijan siempre el boen kargo por ejos era ke si iva pasando, i seja la Bu. Ruzu komo tambien i la S-ra Lijalutcha, mujer de S-r. Josef, i sus krijatura eran mui kontentes de sus vida, ma lis burakava muntcho la moerte de H. Merkadutcho, ke kon la ida de sus IJO a Berkovisa tenijan

572                                          Biografia de S-r. Josef Mihael Arie.                                      1862

 la esperansa por ser salvados, i tener un avenir, para poder i ejos bivir sigun toda la djente, una vida mas repozada ma non tuvieron esta vintura, de loke la dezejavan.

En este anio de 5623, ke ejos ja estuvieron konortados de la moerte de sus padre el S-r. Josef, si vino a Samokov i se rekojo, su madre i su mujer i krejatura i de las pokas kozas de mobilija ke el tenija en kaza, partida ke lo podo jevar, lo enpako i esto ke non li servija lo vendjo, i en pasando pokos dijas ke mando todo su bagaje, partieron i ejos, ke los akompanijaron todos sus parientes, kon ke kada uno li jevo de su manera de prezentes, i ejos partieron todos mui bien kontentes, ke en arivando en Berkovisa foeron resividos todos kon boena kara i los katavan a todos sovre todo a la Bu. Ruzu ke ja era komadre i savija azer kuras por las krijaturas ke esto non tenijan en Berkovisa, i ansi era ke de el presipio ja la empesaron a jamar, i todos li pagavan kon su demazija, i de esto si topava mui bien kontente,

            kon la kaza ke tenijan en Samokov, sigun ke ja saven ke foe merkada de H. Elijatchuno kon H. Rabenutcho, i aun kon todo ke non era sujas torna kon todo la dieron a kira a S-r. Hako ben Ruzu, Levi, por 150 groches, a el anio, i la kira si las kovrava S-r. Nesimatche, Elijau Arie, i se la mandava, a Berkovisa, lo todo

573                                          Biografia de S-r. Josef Mihael Arie.                                      1863

para ke ejos tuvieran mas mijor pasadija, i entre todos esto ke ganavan era ke se ivan pasando, ke lo mas muntcho era la Bu. Ruzu ke ganava, i eja era ke akomodava todos los menesteres de la kaza,

En el anio de 5624, li nasio a S-r. Josef un IJO, ke si gustaron muntcho, i todos en Berkovisa la vijitaron a la parida kon las manos jenas ke li jevaron prezentes, sigun el uzu, ke la Bu. Ruzu, ke era komadre, i el ke era Melamed, i ansi ke tambien i el S-r. pardo li jevava siempre, porke el era uno de los notavles de Berkovisa, i lo jamaron Mihael.

            S-r. Josef, era ke kontinuava, en el melamedud, ma por dezgrasija, el enpeso de muevo a ir endo, flako, ke siempre si li akechava ande la madre ke el non lo va a poder azerlo este ofisio, i ke el si va a entekijar, i la madre ke ja lo vija ke estava ansi, iva jorando, de la una parte i de la otra li dava gairet, por ke non si li envistiera este modo de mirikija, i ansi era ke kada dija se iva a el lavoro, i la semanada ke li davan enpesaron a non pagarsila en regla, i de las entradas ke tenija mas antes en este anio non las tuvo, ke era i de esto ke si iva apretando, mas muntcho, i ansi era ke non tenija gana de versi a si^[3],

            era ke torna kedava toda la karga a la Bu. Ruzu, ke era eja ke kudijava, i estava notches i dijas kamenando, por todas

574                                          Biografia de S-r. Josef Mihael Arie.                                      1864

las kazas, i aziendo maneras de itchurijas seja a las krijaturas komo tambien i a las mujeres, i koando avijan i paridas era tambien i ke las komadrijava, i las merava,

en el anio de 5625, ke S-r. Josef, kontinuava, en su mizmo melamedud, era siempre por foersa, i dija kada dija, iva endo mas flako, i siempre hazino, i el ja si lo estava kemando^[4] ke ja estava atakado de esta maladija, i aun kon todo ke azija gairet para irse a el Talmud tora, ma la madre dezija ke si es ke estava en kaza se iva a sekilijar mas muntcho, i mas presto se iva a etchar en la kama, i por esto era ke lo mandava, i el komo ja estava dezasperado, non avlava nada, i se iva, ke muntchas vezes, se durmia en el meldar,^[5] i gana de komer non tenija de el entodo, ke de esta manera, foe endo, poko tiempo fin ke mas non pudo kamenar, i se etcho en kama, ke estuvo pokos dijas ansi apokandose, fin ke kedo sigun ke estava asentado, i murio, i la Bu. Ruzu non si lo estava pudiendo tomarselo a pasensija, ke todo estava kon dezmajos, ke non era solo el mal de la moerte tenija ke decho krijaturas, i de lo todo vazios, era solo el S-r. Pardo ke la konortava,

            eja vindio todo loke tenija en kaza, i su Noera ke estava krijando, estuvieron travando i apretos, por sus mantinimiento eja si kirija vinir a Samokov, ma non podija dechar, a su Noera

575                                          Biografia de S-r. Josef Mihael Arie.                                      1865

ke estava krijando, a su IJO Mihael, ke mas antes ja tenija parido i otro IJO ma i el koal tambien si li murio mansevo i esto tambien de la tekija, era ke la Bu. Ruzu de moevo enpeso en su etcho i de lo poko ke ganava era ke si ivan pasando, lo todo kon la mui grande ikonomoja, ke ja si entiende de sujo ke travavan i boena mizerija, la vida ke bivio el S-r. Josef foe kon siempre mizerija, i todo foe, 32 anios, loke bivio, ke non vido nada de los plazeres de este mundo, otro ke lo todo foe al kontrario,.

576                                          VIDA DEZMAMPARADA.

Na ke i la kurta vida ke Bivio el S-r. Josef, ke non pudo reuchir, en nada, de todo en loke el si entremetio, el non foe komo su Padre depidrido de la vida de este mundo, el ja foe mui repozado i mui penador, i todos sus parientes loke era posivle ja lo ajudaron ma su karakter, non lo rejevava en todos los ofisios enbeveserse, ke koando uno non lo poede, non si deve de apretarse, ke li kavza la tekija i se moere, i tambien ke foe komportado de la madre ke es una mujer, i komo de enstruksion es ke poede tomar de una mujer, sovre todo en akejos tiempos, es ansi ke en esto es loke si poede arivar, es solo un mihael tchiko ke kedo de S-r. Josef,

577

Fin aki si eskapa la partida de S-r. Josef Mihael Arie, ke bivio 32 anios, i es en el anio de 5625, ke murio en berkovisa i se li eskapa su partida,