קורותיו של סנ' שְמוּאֵלָצֶ'ה, בנו של צֵ'לֵבּי יהודה

1732

De aki i endelantre si enpesa la partida de el S.

Chemoelatche J. Arié en Samokov enpesando de el anio

5646 fin a el anio de 5660-61

1733            Biografia de S. Chemoelatche J. Arié          1886

En el anio de 5646, ke S. Chemoelatche ja estuvo espartido i de su ermano S. Mochonatche, i el ke non tenija lugar ande asentarse si tomo la butika ke era anlado de la oda i esta es la butika ke moestros padres estuvieron en eja muntchos anios, i esta butika era vakuf ke si pagava mukata para la michkita de el Tcharchi a 45 paras a el mez, i esto era alos presipios a el anio ke denpoes lo boltaron a el mez, i el ke le kijo azer algo de reparasion foe ke su ermano non lo dechava por algunas pretensias ke tenijan entre ejos, ma esto ja lo izo i se enpatrono en eja kon los dokumentos menesterozos, el ke si asento foe ke si tomo en nota de esto ke el lo resivio de ande su ermano, i siendo ke el lo estudio i lo vido ke no foe deretcho la espartision i de tanto ke el li reklamava era ke no avija kon ke li diera repoesta, i esto porke S. Chemoelatche non estuvo tanto al koriente de las operasiones ke si azijan i el non si enteresava tanto, por estudijarlas a el fondo, i ke siendo el ke si vido flako en su furtuna, era ke non estava podiendo estar en un lugar i parisiendole ke su ermano el S. Naimatche de kostan ke ja lo iva a protejar el lo izo ke si foe a kostan kon tomarse en nota de algunas de las partidas ke a el li paresijan ke non foeron regladas djustas, ma solo el non lo penso ke i S. Naimatche tambien ja era ke en este tiempo el ja non tenija este tiempo por reglar las deferensias de los otros, sigun ke ja lo meldaron en su partida los apretos ke el los iva pasandolos i ansi foe ke non li bolto kara, ma el ke

1734            Biografia de S. Chemoelatche J. Arié          1886

 tambien estava en mui estretcho, i non topando koalo azer foe ke si adereso a la kanselaria de el konsolato Franses i ke lo aremedijaran ma non tuvo i en esto dinguna ajuda, i los gastes ke li eran i tambien grandes, foe ke non lo podija somportar i el se vino atras a Samokov, ke a el li paresija sigun de loke el kudio, en el tiempo de la gera ke estuvo en Samokov, por goadrar los bienes seja sujos komo tambien i estos de sus ermanos, i kon esto era ke si li iva i adovar mas su pozision, ma todo foe al kontrario, ke sigun el sujo konto era ke tomo parte en los gastes tanto grandes ke los izieron sus ermanos i tambien algunas piedritas ke las tuvieron en los djugos de la borsa, i el ke iva sufriendo en Samokov komo a estos apretos kon los rusos foe ke dinguno aparte ke no li rekonosieron es i ke li kosto i el era ke se iva ala kavane i por ulvedar estos males lo era ke azija en ir djugando, i el era ke azija la merikija en los tchaires ke tenija i los iva jubrelidijandolos, i el se merko i un ermozo paiton de un kavajo i se kamenava, en las tadres, por los kampos, i el si vinija temprano en kaza i se englenejava en la goerta, i se a konsejava tambien kon su S. Madre por el sujo avenir ke su madre lo amava mas muntcho a S. Chemoelatche, i eja era tambien ke lis avlava i a sus ijos los mas grandes,

en este anio de 5647, ke estava dezasperado, de esto

1735            Biografia de S. Chemoelatche J. Arié          1887

 ke non pudo nada reuchir de sus reklamas de sus ermanos, i ke el tambien era flako en su furtuna, ke de lo poko ke el tenija i la jaila ke tinijan i la davan alos vlahos, foe ke si konvino kon ejos i se topo a un haver ke era S. Chabetai M. Levi, por ke kamenara, i les merko las letches i por azer kachkaval, ke kon esto foe el primer, etcho ke el tomo, i esto ke lo izieron i moneda ke non tenija el menester por razon ke ja era ke tenija de aver de la kira de la jaila, i en un enterval de 2 mezes ejos ja izieron una suma de serka 6000 okas de kachkaval, i lo trucheron en la sevdad, i lo detuvieron por mandarlo a kostan i poder profetar mas muntcho ke ja era i ke vinijan de los kachkavaldjis de kostan por merkar en Samokov, ke otros, ja lis vendijan ma ejos lo izieron por mijor de mandarlo a kostan, i foe ke non pudieron tener dingun profito, i todos estos ke lo mandaron a kostan foe ke pidrieron i estos ke lo vendieron en Samokov, todos ganaron, ma el non foe deskorajado por azerlo tambien i en otro anio, solo foe ke las mantekas i las regotas ke las vindieron en Samokov i de esto se prevalijan por los gastes,

Kon sus madre ke ja lo tengo eskrito de la manera ke si avijan konvinido los ermanos por el sostenimiento de eja i ke eja tambien era i libera de estarse ande eja lo kerija, kon ke li pagavan kada ijo, a el ermano ande eja estava, i S. Chemoelatche ke unos 2 anios non lis tomo sus parte de el gaste ke izo kon sus madre, seja por el mantenimiento komo tambien i por vistirla i el djop hachlik ke por estas 2 ultimas kozas non tenijan fiksado la suma ke devijan

1736            Biografia de S. Chemoelatche J. Arié          1887

de darle otro ke era adetras de el menester ke eja lo iva a kerer i eja anke ke era mui ikonomioza ma torna kon todo lo kalija ke foera tambien i ala onor de sus ijos, i eja tambien li kalija koando li vinijan algunas kojetas por bien fizensia lis kalija ke lis diera a su onor, i en un enterval de unos 2 anios, ke eja non savija la suma ke tomava otro ke eja li demandava solo de el S. Chemoelatche, i el era ke li dava todo esto ke li demandava, i ja era ke koza por koza tambien koando li merkava ke ja lo eskrivija, i ansi koando li dava tambien i en moneda, i en este tiempo ke el ja tuvo el menester de moneda, izo 2 notas i se las djo a una a kada uno a sus ermanos de samokov, porke de S. Naimatche non li demando porke i el era ke non tuvo en este tiempo por darle, i lo izo en 3 partes, ke el S. Mochonatche, non li demando kontos otro ke li konto su parte, i koando ja vino a el S. Davitchonatche, foe ke non lo jamo por pagarle ke el lo espero unos koantos dijas, ma non se izo de el savedor, i pasando i ainda mas tiempo ke S. Chemoelatche li demando foe ke li konto por ke li dichera, para koalo foe ke li merko 12 ridas or 6 pares de kalsas ke eja si estava aziendose tchorapes, i ansi mas i algunas kozas i ke el no atcheta a pagarle esta suma ke li demanda, i sin ke S. Chemoelatche li avlo mas nada, el si foe deretcho a kaza i le konto a su S. Madre todo esto ke lis paso kon su ermano el S. Davitchonatche, i eja ke si estremesio entera, i le saltaron tambien i las lagrimas i li dicho loke mi keres dizir, kon esto i ala ora li dicho ke el non la poede sostener solo otro si lo kerija i ke ja estuvo en

1737            Biografia de S. Chemoelatche J. Arié          1887

 su kaza algo de tiempo i ke si foera djuntos kon el ala kaza de S. Davitchonatche, i eja li dicho jevame tu ala kaza de Davitchon, i se foeron djuntos ma kozas ke eja las tenija non si jevo nada otro ke denpoes S. Chemoelatche li rekojo algunas de los vistidos mas promurozos i se los jevo ande su ermano, ke esto ja li enporto mui muntcho a S, Chemoelatche, ansi tambien i a S, Mochonatche, ma eja ja era mui pasensioza i somportava todo, i a dinguno non si akecho, de esto i mas tadre el ja si kovro tambien este gaste,

En este anio de 5648, el era ke non si okopava en dinguna echpekolasion, solo ke por el enverano foe i en este anio tambien ke izo los kachkavales, i esto ke el non lo konosia ja el ofisio, era ke no reuchija, i ansi era ke tambien pedrio i en este anio i a los kavos foe ke su haver si paso a su konto una suma de moneda ke li kalio la reklamara por vija de los ajuzgos, ke esto ja si entiende los gastes ke tuvo, i ke alos kavos foe ke li kalio ke si i konviniera, i el mas tadre li parisio de rekojer vakas para engodrarlas, ke esto es savat^[5], i las rekojija ke los presios eran de a 70 fin a 90 gr. la una i de gaste tenijan komo a 25 gr. por kada una era ke alas vezes ja li afetava ke podijan ganar a 20 fin 25 gr, por vaka, i esto komo podija venderlas en toptan ke las vezes ke non si vendijan en Samokov, li era el menester ke las degojara, i era etcho mui

1738            Biografia de S. Chemoelatche J. Arié          1888

largo ke era ke iva a rekojer el sevo, i las karnes ke las iva azer sarsitchas, i denpoes venderlas, i ansi foe tambien ke i en este non pudo reuchir,

En este anio ke ja tuvieron la dezgrasia kon la moerte de su ermano el S. Davitchonatche, foe ke esto los deskorajo mui muntcho, i ansi ke todos ejos non kijeron mas saver por lavorar en dingun etcho, i era ke lo mas de las dijas si estavan todos en kaza, i siempre eran pensativles,

Kon las kozas ke avija dechado la M. Rahelutcha, en la kaza de el S. Mochonatche, i S. Naimatche ke ja non las kerija mas en kostan foe ke si tomo algunas de estas el S. Chemoelatche, i esto porke si podijan polijar, anke ke ja las kudijavan i lo restan si las tomo el S. Mochanatche, su S. Madre era ke lo mas muntcho si li vinija en su kaza anke ke ja estava en la kaza de S. Mochonatche i de vez en koanto eja li dava i algunas kozas a M. Beju, seja en djojas komo tambien i en algunas antikas ke eja las tenija muntchas ansi i algunos vistidos,

Ejas las mujeres en kaza lo pasavan sigun ke ja lo tengo eskrito, ke era siempre entre la familia, ma la M. Beju era ke non vijitava mui muntcho porke eja era siempre okopada kon sus krejaturas, i tambien ke S. Chemoelatche era mui mirikiozo sovre la limpieza de la kaza, el tenija sigun el uzo viejo mandas i vakas en kaza i tambien los kavajos, el si levantava demaniana por ver komo las ivan a nundjir a las vakas i mandas i las letches era ke las i boiva

1739            Biografia de S. Chemoelatche J. Arié          1888

i tambien las koajava en jagurtes i kezos, i otras kozas, i en kaza era el ke alempiava los gazes i el los asendija ke li plazija ke estuviera todo mui klaro, el non li iva muntcho ande su ermano, por razon ke non estavan de akordo en sus deferensias,

En este anio de 5649, su koniado S. Nesimatche E. Arié ke ja estava en vakarel, i ke el tambien si merko una kaza en Sofia, foe ke vino a Samokov, por buchkar a vender la kaza ke el la tenia en Samokov komo tambien i ke el tenija i un tchairiko, i de tanto ke el buchko por venderla foe ke non pudo topar un merkador i le rogo a S. Chemoelatche porke si los merkara, i esto kon unos presios mui konvenivle i el ke ja li kijo azerli plazer si lo konvinieron i se la merko seja la kaza komo tambien i el Tchair, i de esta vendita el S, Nesimatche ja foe kontente, i el era ke la dava a kira i kon el tchair li tomava la paja, ke el ja tenija i otros tchaeres, ke lo mas muntcho de la paja era por mantener a los kavajos i vakas ke non li sovrava para vender, lo koal ke el non tenija de el en todo konto, de esto ke lo azija i era solo por una sevada [sevda] ke el tenija, i kon esto era ke si englenijava en kaza, i non salija tanto muntcho ala plasa, el aparte de un kavajo ke ja tenija foe en este anio ke si merko i otro uno i aparte si merko i un ermozo paiton ke si li izieron 2 paitones i los kochejava el mizmo porke i los kavajos tambien li eran

1740            Biografia de S. Chemoelatche J. Arié          1889

 mui boenos, i era solo en esto ke se iva enbevesiendo, sin ke el pensava por el avenir, era solo ke tenija una esperansa ke le iva a tomar de su ermano, sigun el ke li pasava de 60,000 fr, la suma ke el la tenija de aver, ma ja era ke su ermano non li boltava por los presipios tanto kara, i de esto era ke ejos lo mas muntcho estavan anojados, i a esta razon era ke i las mujeres tambien non si frekontavan muntcho i ke eran madre i ija, i ejos ermanos, ke esto non si lo kulpava dinguno, porke el alos presipios, non eskotchava a dinguno, mizmo ke lo akonsejavan, i el era solo merarse el kef, i azerse sus plazeres de todo esto ke li vinija a el tino, i ansi era ke lo dechavan, el si komportava, foertemente enfrente seja de su mujer i komo tambien i de sus krejaturas, a el li plazija ke lo sirvieran, i non si li enportava si los otros sufrijan, era ke sus krejaturas si espantavan mui muntcho de el i ke ja uvo uno ke li dicho, porke non devija de komportarse de esta manera ma la repoesta ke li djo foe ke a el este modo lo izo terbie el padre,

En este anio de 5650, el ke tenija el menester de gastar i ke si i komportava tambien mas kebar i ke li plazija ke uviera en kaza todo modo de las komanias i esto a demazija de loke el lo tenija el menester, ke muntchas vezes el vendija de esto ke li sovrava, i esto era solo sovre la komania, ke para el vistir non tenia

1741            Biografia de S. Chemoelatche J. Arié          1890

dingun punto, atiempo ke de esto ja li davan kechas la djente de su kaza, sovre todo alas krejaturas ke ejas si enselavan de las otras, ke esto ke lo azija tambien era porke i non lo podija, a razon ke en dingun negosio el non si okopava, por poder ganar i para abasteser ke era solo de sus revinidos ke el lo iva pasandolo i esto ke non li era bastante ansi ke iva endo siempre en manko de su furtuna i el ke avija merkado la kaza kon un tchair de su koniado S. Nesimatche E. Arié foe en este anio ke topo a vender la kaza a un sierto S. Rahamim Aron Koen por un presio mas boeno i el si la djo i de esta moneda era ke foe abastisiendo para tapar sus gastes de la kaza, el era su penserio todo, sovre los kontos de mas antes i de koando el si espartjo de sus ermanos, ke non li reglaron djustos sus kontos i ke el buchkava ainda muntcha moneda, de su deretcho, i de esto ke non si li estava koajandose de koala forma el lo podija azer estas reklamas, era ke si asentava en la kavane, i era lo todo kon djugar en el komardjilik ke lo iva pasandolo i de esto tambien era i ke iva pidiriendo, en los djugos, i ja era ke se li aserkavan a el todos estos ke lo tenijan esto de djugar por ofisio avija tambien ke muntchas vezes restava fin ala medija notche, en esto de el djuego, i todos lo akonsejavan por ke si repentiera de esto ma el non sentija a dinguno i se aravijava koando li avlavan, por esto, i su S. Madre tambien ke en algunas vezes era ke lo jamava i lo akonsejava, ma el ja era ke si li deskulpava, kon algunas de sus razones, i non si li estava para sintirla ke la dechava avlando i se

1742            Biografia de S. Chemoelatche J. Arié          1890

salija de delantre de eja i esto por non atagantarla, ke el era ke la katava muntcho, i eja ke ja non podija mas kon koalo akonsejarlo era ke lo dechava, ke iziera sigun lo kerija kon la esperansa ke ja iva a trokar, ke la pasensija ja la tenijan,

En el anio de 5651, ke el sigun ditcho ke iva endo en manko de su furtuna ansi ke vinijan tiempos ande li kalija buchkara de enprestarse, alguna suma de moneda para gastar i el ke non lo podija pasarse sin ke tuviera los mosos i seizes en kaza seja por los kavajos komo tambien i por las vakas, era ansi ke non abastesia i de unas koantas vezes ke el le iva demandandole de su ermano el S. Mochonatche porke li reglara sus kontos de las deferensias ke el las tenija, i ke non li dava repoesta, era ke lis salia el otcho a ravias, i muntchas vezes ke ejos si enkontravan era ke i se amenazavan, uvo dijas ke non si frekontaron de el entodo i se seraron los komchilikes por non versen ke la entrada de la kaza de el S. Mochonatche era lo mas muntcho ke si servijan por la poerta de el S. Chemoelatche, i en este tiempo el li sero esta sus entrada i se sirvijan por sus poerta ke ja tenijan ma non era la entrada klara, i siendo ke li sero la poerta ejos non avlavan nada i se servijan solo por sus poertas, solo ke los kavajos i vakas ke tenija el S. Mochonatche era ke ja los detinija en el dichari avli de S. Chemoelatche, porke ja era

1743            Biografia de S. Chemoelatche J. Arié          1891

 ke tenija i el parte en los ahires komo tambien i las otluk-hanas i el non tenija en su kaza, porke el dichari avli sujo era mui tchiko foe de esta manera, ke lo foeron pasandolo, algo de tiempo, fin ke S. Chemoelatche, li avrio djuzgo, lo todo en el konsolato de Sofia ke i esto tambien li turo longo tiempo, fin ke si pudo darse a entender, i a los kavos foe ke si lo konvinieron tambien entre ejos i por vija de la kanselaria franseza, kon ke el S. Mochonatche li djo algunas kozas ke sigun de el era ke non tenija dinguna razon de reklamarle nada, i mientres ke ejos tratavan de esto foe ke li arivo la moerte a sus S. Madre i esto resto por un tiempo, solo ke el li enprestava algo de moneda, para ke si aremedijara, por un sierto tiempo, i kon la moerte de sus S. Madre sigun de loke foe ja lo eskrivi en las partidas de los otros ijos, i ke murio tambien en la kaza de el S. Mochonatche, i fin ke ejos si lo reglaron era ke S. Chemoelatche, se estava en la kavane i siempre djugando, porke non tenija ande ke foera en otro lugar,

En el anio de 5652, el renovo el djuzgo, kon su ermano sovre las deferensias ke el le iva reklamandole, i kon muntcho ke li dieron a entender foe ke si lo konvinieron porke li diera el S. Mochonatche, la parte de la jaila, ke li tokava a el i la rudichta ke tenija en el kampo de kalkovo, ke es esta ke tengo eskrito ke

1744            Biografia de S. Chemoelatche J. Arié          1892

estuvieron en el tchiflik de piperko en el tiempo de la magefa, i denpoes komo se deroko, el tchiflik, i resto solo un kampo lo merkaron moestros padres la metad para tomar el metal de la ruda, ke i esto ja lo tengo eskrito, i aparte li djo tambien i en moneda, la una partida en kontante i la otra partida li djo en 3 bonos de a 27 liras pagavles por kurtos tiempos, ke esto todo se rekojija komo a una suma, de serka 2000 liras, de valor, i el kon esto ke ja si kontento, foe ke repozaron de todas las 2 partes i denpoes de esto, ja era ke si enpesaron a vijitarsen, i el S. Chemoelatche, se asento en su botika, i enpeso a dar a alguna djente algo de moneda kon entereso, ma esto non lo pudo azerlo porke el kerija ke li pagaran por su djusto i en el dija de el deskaimiento, ke esto en Samokov non podija ser, ke era ke algunos era ke davan unos akontos, i lo restan lo ivan prolongando, kon ke i li pagavan los enteresos, i ansi foe ke si repentjo de esta merkansija, i enpeso a merkar de los fondos de el ajeno, estos ke tenijan tiraje, ke los enteresos eran mui tchikos i el lo azija por el afito, kon la esparansa ke alguno de estos le iva a salir, i esto el lo foe kontinuando i esperando en esto, kon asenijalar los dijas ke si travavan, ma i en esto tambien aparte ke non li afito foe ke koando los kijo venderlos era kon los presios muntcho mas abacho de esto ke li kostavan, i ansi foe ke no echpekolio mas en esto i se iva pasando de los revinidos, de los mulke ke tenija, i el en el anio de 5636 tuvo ke li nasio una ija, i la jamaron Linda ke la koala la kazo en varna en el anio de 5671, i eja bive kon su marido mui kontente, i eja pario ijos i ijas, i en el anio de 5647 tuvo ke li nasio tambien i otra ija ke la jamaron, Margerita

1745             Biografia de S. Chemoelatche J. Arié          1892

 i en el anio de 5650 tuvo ke li nasio un ijo i lo jamaron Mocho, Avraam, Albert, i kon todos estos partos lo izieron sigun de todas las paridas i eja su madre era ke los aletchava i los kudijava porke sus madre era mui sana i pasensioza,

En este de 5653, de la kira ke resivija de la kaza de kostan foe, non pudo kovrar en este anio, i ansi era ke le vinija a mankarle, i el ke non tuvo otro etcho seja por ke non tenija moneda or ke non li estavan reuchendo en todo esto ke echpekolijava, era ke estava en vazio i non si li enportava, otro ke el se merava, sus plazeres, i era ke en kaza tambien era ke si li espantavan todas sus krejaturas, ansi era tambien i su mujer, ke lo katava mui muntcho, ke su merikija era lo mas muntcho en la limpieza, i en los kavajos, i tambien sovre la komanija, ke uviera a muntcho, de todo, modo de las komanijas, el se levantava demanijana, i se estava kamenando por las goertas i el dichari avli, ke esto li torava, longo tiempo, i en eskapando esto el si asentava en la poerta de la kae, por enbezarse las moevas de la sevdad i esto de los pasantes i tornantes era ke atodos lis demandava, si mizmo algunos de estos non li davan reposta non era ke si li enportava, el se mitija entojos seja por fantazia or para ver de lechos, i a kada uno kon foesa ke lo vija era ke lo i jamava por demandarle koalo foesa el era gastador, para kozas mizmo

1746            Biografia de S. Chemoelatche J. Arié          1893

 ke non eran por su menester, el si mleskava tambien i muntcho en los etches de el kolel, i koando su ermano non estava en Samokov, i ke era el el Gabai lo azija ke sovija el ala teva por jamar a Sefer tora, i era ke koando la alija non la azija a el plazer de el poevlo era ke algunos lo dezonravan sigun savido, las merikijas de Chabad ke existija el tirjaklelik de el tutun, ke dingun djidio era ke en Chabad non fumava, el en las medio dijas si etchava a durmir, en kaza, i de estarse en vazio sin dinguna okopasion ja era mui enfasiado ma foe ke estuvo tambien i sin paras en este tiempo, era sovre esto ke li davan algunos de sus parientes kechas de esto ke non kerija en nada okoparse, ma el non lis avlava nada, por razon ke ja si rekonosija sus kulpas, de esto ke non estudijava por lavorar,

En el anio de 5654, ke uvo un grande foego en kostan i en jazidji sokak, ke entre muntchas kazas i botikas ke si kemaron foe tambien ke si kemo i al kaza suja ke el la tenija en kostan, de mizmo se kemaron i las otras 2 kazas ke eran la una de S. Mochonatche i la otra de el S. Naimatche solo ke estas 2 ultimas ja las avijan vendido de mas antes, i esto ke ja estava asigurada, i sigun ja lo saven ke en Kostan los pagamientos de las siguretas las azen mui foerte i por kovrar era ke si kerija un kamenador i ke foera tambien i enfloente, lo izo ke si le rogo de su ermano el S. Naimatche porke

1747            Biografia de S. Chemoelatche J. Arié          1894

 si okopara por poder azer los menesteres de el kovramiento, kon ke li prometjo ke li tenija de pagar por su lavoro, i esto mas muntcho de loke si lo podija imajenar, i el S. Naimatche ke ja li venija de estas kozas a lavorar foe ke si lo resibio, a okoparse de esto i en un enterval de unos koantos mezes el reucho a poder kovrar de la sigureta 500 liras turkas, lo todo kon ke li i demando tambien i la kontentes de el S. Chemoelatche, i el ke ja estuvo de akordo, li remetjo el enporto a Samokov, i denpoes li pago su boena komision, i kon esta moneda el avrio de moevo el etcho de saraflik, i resento en la vetrina de su botika en platikos de palo las sortes de moneda, ke a los presipios el goadrava la butika, ma vinijan dijas ke si enfasjava de estarse solo en la butika, i se iva ala kavane i djugava tavlo i koando alguno kerija alguna moneda bozdejar era ke lo jamava de la kavane i en este tiempo el de moevo iva merkando, algunos de los fondos de otros estados lo todo ke eran kon el tiraje, de mizmo kon la entision ke li afitara algun loto en el tiraje, ke i esto non li afeto, el tambien si okopava en vender bilietos de las lotarijas de Hamburg, i otras lo todo kon esta entision, ke esto era defendido ma lo azija en sikreto, i non uvo ken lo supo,

S. Jomtov, sigun ke ja lo eskrivi en sus partida No.1591 ke non pudo estarse en la kaza djuntos kon su madre i los otros ermanos foe ke li rogo porke lo resiviera en su kaza por estarse kon komer i dormir, i el ke ja lo kijo, se konvinieron ke le iva a pagarle a 120 fr, a el mez por lo todo i komijan en un meza, kon ke

1748            Biografia de S. Chemoelatche J. Arié          1894

li aparto una kamareta por si i aparte ke tenija el deretcho de i prevalerse i de la kamareta de vijita, ke esto a S. Chemoelatche li era igoal para el gaste, solo ke li eran demazija los 120 fr, ke tomava, ejos si pasavan mui boenos seja los ombres komo i tambien i las mujeres, i era tambien ke i la M. Rachel li ajudava en les etchos de la kozina, i en okazion ke se li azia el menester de moneda a el S. Chemoelatche era tambien ke i li enprestava,

En el anio de 5655, era de mizmo ke lo pasavan en kaza kon el S. Jomtov, i de todas las 2 partes eran mui bien kontentes, el ke ja tomava muntcha letche de sus vakas i mandas ke las tenija en kaza era ke bevijan i azijan los modos de las komidas de kezo ala artura, sovre todo esto de bever las letches i komer las mantekas freskas batidas en kaza, las manianas, ke tenija lo jaikes ke si li boltavan a foersa de la agoa, ke sovre esto tenija grande merikija el S. Chemoelatche,

Kon el tereno ke lo tenija en kostan de la kaza ke si li avija kemado, era ke le iva eskriviendole a su ermano el S. Naimatche porke li topara un merkador ke el lo kerija venderlo seja por ke non li estava traendole dingun revinido or seja ke lo kerija merkarse alguna otra koza en Samokov, i S. Naimatche ke ja konosija a estos ke echpekolijavan en merkar ansi tieras, foe ke li topo a una

1749            Biografia de S. Chemoelatche J. Arié          1895

de estos i lo pudo konvinir komo a serka 500 liras turkas ke esto si vendija en kostan kon piko koadrado, ke es 68 santimetros, el un piko, i li pude aferarle esta suma, i kon esta moneda ke el ja la tomo era ke si enbevisija en saraflikes i los fondos i lotarijas ke el merkava partida por venderlas i partida por detenerlas por su konto lo todo era kon la entesion ke se iva azer a de una mui riko, ke entre estas aksiones ke el las merkava, avijan las unas ke podijan ganar ,500,000 fr. i siempre era la merikija en esto i a todos lo kontava, ke lo meldo en la gazeta ke ja estava tambien i abonado, de estas gazetas, por tal fulano en paris ke lo gano la premia,

El en este tiempo buchko por espozarla a su ija Linda ma el kijo un novio, kon mas poko kontado, ke ja uvieron algunos ke la demandaron i lo todo era porke ja estava en moneda, i ja la podia kazarla, ma el kerija kon djoja i poka moneda darle, ke djoja el ja la tenija muntcha, ke sus parientes era ke li ensistijan sovre esto i ke vindiera de la djoja.

En este anio de 5656, li nasio un ijo ke si gusto mui muntcho i lo izo kombedava en kada notche a sus parientes, i amigos, ansi lo izo en el dija de Chabad ke en este tiempo ja si avia levantado la moda de ir a komer los parientes sigun de loke si uzava antes anios, i en el dija de el birkad mila tambien tuvo a muntchos

1750            Biografia de S. Chemoelatche J. Arié          1896

 kombedados, i el Sandak foe su papu el S. Mochonatche, i le mitieron el nombre Moche, i su madre era ke lo kodijava i lo aletchava i seja su madre komo tambien i el ijo eran mui sanos i boenos,

Foe en este anio ke vino a Samokov un mansevo ke era de Enderne i se vino a bivir en Filibe, i ke ja era ke si kirija tambien kazarse, la demando a su ija M. Linda, por novija i denpoes ke ja demandaron algunas referensias por el mansevo i todos ja li dicheron ke ja era boeno i tambien i de familia boena, i ejos si konvinieron ke le iva a darle 4000 fr. en moneda sonante i 2000 fr. de djoja i aparte ke i le iva a darle tambien i la achugar a su onor, ejos lo izieron el espozorio, kon muntcho keef i saltanat, i estuvo unos koantos dijas en kaza i denpoes el partio por filibe ke era ke si i kartejavan tambien i se mandavan algunos presentes, ma mas tadre ke el novio demando a uno de Samokov, ke si avija ido a filibe por su etcho foe ke li avlo mal por la novia i el novio kriendose a este ke lo avlo ke era un mozevir i enimigo sujo i sin ke lo aklatara la koza foe ke mas kortaron la korespondensia fin ke vino el etcho de decharsen lo koal ke la novija ja era sin dinguna mankura, ansi de mizmo i el novio ke ja era mui boeno i mas tadre el novio si kazo i tomo 10,000 fr. de kontado, ansi foe ke de esto si sikilijaron toda la familija mui muntcho, i la novija koando la demandava alguno otro era todo ke dizija ke non kere espozar visto al primer novio, i era ke lis dava kechas a sus parientes de esto ke non li dieron boenas enstruksiones, a tiempo ke ja savija esto ke si podija enbezarse en

1751            Biografia de S. Chemoelatche J. Arié         1896

las echkolas de Samokov, i todos ja li dicheron ke non foe su kismet por kazarse kon esta, ejos en kaza todos lo pasavan mui bien i a todas sus krejaturas seja el padre komo tambien i la madre los kudijavan mui muntcho,

En el anio de 5657, ke su ijo el S. Leon ja avija eskapado fin a un grado, las echkolas de Samokov, i ke el lo kerija kontinuar sus estudios, i el S. Chemoelatche ke non kijo mandarlo a el ajeno i esto seja por el gaste or seja ke non estava ainda bien, kotcho en sus estudios, i tambien ke era mui repozado, i mui vergonsozo, i M. Gavriel su sovrino ke estava en este tiempo en Izmir, komo derektor de la echkola de Izmir, de parte la aliansa jsraelid, i pensandose ke lo iva poede ser a merar de adelantarlo i kudijar por el sigun de loke ejos lo kodijaron a M. Gavriel, i ke estuviera i tambien en su kaza i lo mas muntcho era la entision ke de Izmir ja lo iva a poder mandarlo a Paris, por ke saliera i el komo a uno de los profesores de la alijansa, i denpoes ke ja si kartejaron foe ke el M. Gavriel resivio a tomarlo en su kaza sin ke tuviera a pagarle dengun gaste i el lo mando ke estuvo komo a 2 i 3 anios, ma non pudo ser de mandarlo a Paris, por algunas siertas razones, i el eso [iso] ke lo pudo enbezarlo en Izmir ja lo enbezo ma era algo flako, i la Bu. Jael ke ja estava en Izmir era ke lo kudijava, i mas tadre ke el ja se

1752            Biografia de S. Chemoelatche J. Arié         1897

vino a Samokov, era ke estava en la butika de su S. Padre ma siendo ke en este tiempo non tenija nada de etcho en Samokov el S. Chemoelatche era ke estava i el en vazio, i meldando algunos livros de estudio, ke esto li turo longo tiempo i denpoes se vino a Sofia, i se enpeigo en el drujestvo Balkan kon una tchika paga i esta ainda en esta kompanija, komo enpeigado, kon ke ja li pojaron algo su paga, ma el S. Eli ke esta tambien en esta sosieta komo a derektor sovre la partida de los foegos es ke non lo esta boeno protejandolo a tiempo ke sigun el dizir, era ke en un tiempo li kijeron pujarle sigun i a todos los otros empeigados ma ja foe ke el S. Eli lis dicho, ke a el S. Leon non lo merisija mas de 10 fr. de pujita, a tiempo ke li ivan a pujarlo a 50 fr, sigun de todos los otros i esto kale dizir ke S. Eli se espanto non seja ke li podrija alkansar a tomarle el lugar sujo i de esto S. Chemoelatche foe mui sikilijado, i estuvo tambien i longo tiempo anojado kon su sovrino el S. Eli, ke ejos los kudijaron tanto, a todos 2 ermano,

En el anio de 5658, en la kaza ke el morava i anke ke ja era fragoada de poko tiempo mas antes, ma siendo ke la trataron en toptan i los maestros ke non kavaron los fondamentes sigun de loke premijan foe ke se torsio la kaza i estuvo en pirikolo de asentarse, sovre esto el lis djo muntchas kechas a sus ermanos, por esto

1753            Biografia de S. Chemoelatche J. Arié         1898

ke non kudijaron, koando, si la fragoaron, i sigun la vista era ke no era solo la kulpa de los temeles ke foeron de el presipio etchos flakos, otro, ke el li paso los kanales de las agoas de los banios, ke estavan dekontino koriendo, porke el era ke si lavava en kada viernes, i era ke si lavavan tambien todos, i los kanales ke non estuvieron bien etchos, foe ke li bozdejava las agoas ke korijan lo poko ke gotejavan i por el envierno ke si li azija godros jelos era todo alos temeles ke si li ivan desbrotchando, i el ke la detuvo la kaza en pajantas^[6] foe uvligado ke kavar moevos fondamentos, i todos los izo kon tchimento, i le izo tambien i kanales tambien kon el tchimento por las agoas de los banios, i por lo todo el gasto komo 120, liras turkas, este banio era fragoado mui boeno ke la kaentura li era mui dolse i repozada i se kaentava kon poka lenia i tambien era grande ke si podijan lavar 15 personas ke los kazanes ke tenija eran ke jevavan de 800 a 1000 okas de agoa, i la lenia ke non si merkava kon paras anke el un karo su valor era de 6 a 8 gr. i el ja tenija su karo ke li traiva en kada dija la lenia,

El era lo mizmo ke non lavorava ni en este anio dingunas merkansijas, otro ke solo era ke si enbevesija tambien en las merkidas de los fondos i bilietos de las lotarijas el si merko en este anio otro un ermozo paitoniko, i los kavajos ke ja los tenija tambien boenos era ke el mizmo muntchas vezes los kochejava, i se kamenava en las tadres por los kampos, i de mizmo era tambien ke non salia muntcho ala plasa i se estava en kaza i koando salija era ala kavane

1754            Biografia de S. Chemoelatche J. Arié         1898

deretcho ke si asentava i sus amigos ja lo esperavan porke el savija boeno djugar el tavlo, i tambien i en otros djugos de las kartas a el non si li enportava si mizmo pedrija ke en esto era ke tenija konto koriente kon el kavedji, i al kavo de el anio era ke si meravan los kontos, ke i el toton ke lo fumava tambien era en este konto i lo mas muntcho era ke el li pagava a el kavedji, i nunka el non tuvo ke kovro de estos kontos,

En el anio de 5659, li nasio una ija, ke por esta ija su madre foe mui sikilijada, por ke ja estava mui enfastijada de kudijar krejaturas i ke mas ja non estava i podiendo, i tambien ke ja si li avijan etcho, 5 ijas i de esto foe ke eja se reselava, por ke non li dichera alguno de loke ejos tenijan ditcho por los otros ke tuvieron a 5 i 6 ijas, i esto lo dicheron por uno de sus parientes ke el koal las kazo a todas en sus tiempos i mui bien kazadas, i kon este parto tambien foe sigun de todos los otros, i la jamaron Lusi, i tambien su madre la aletcho i la kudjo, porke todos sus krejaturas foeron mui repozados, i las otras ijas ke ja li eran grandes era i ke se ajudava i de ejas,

S. Chemoelatche ke ja tenija algo ke sufrija de la maladija de potra, ma era ke non li apretava muntcho, porke el ja era mui forsudo, i persona alta i godro, foe en este anio ke tenija

1755             Biografia de S. Chemoelatche J. Arié         1899

 en veses ke si li kaiva mas para afoera, i el ja era ke si metia los bandajes i para esto era ke en el banio li venija boeno para ke si li eskondiera para arientro, ma era tambien ke en vezes li venija i de el banio ke si li demostrava mas para afoera porke si aflakava ke esto de el banio para esta maladija non siervija muntcho el lo azija ke si iva i alos banios de beltchin, por el enverano, i kon esto era ke si li entrava muntcho para arientro, i pasava la enviernada kon mas levijano, ma el era ke si i goadrava mui muntcho de esto ke non lo supieran otra djente ke sufrija de esta maladija,

En este anio ke en Samokov, kijeron avrir plasas moevas, i entre los lugares ke los ivan derokando, seja de la djente, komo tambien i los lugares de[ke] avijan de Fakuf, ke eran para la sivdad, i de estos algunos era ke el gradski sovet los vendija, uvo ke entre estos vindjo tambien i la medrese ke tenijan los softas turkos ande estudijavan i este lugar ke ja era un boen pasaje por azer algunas botikas ke era en boka de tcharchi, i ke lo metieron en enkante foe ke lo merko partida de este lugar el S, Chemoelatche, i esto kon unos presios mas karos, lo todo kon la entision por el fragoarlo, i denpoes ke la vendita se izo i se lo pasaron sovre el i ke konto i tambien el enporto, koando ja foe ke el lo kijo fragoarlo, i ke kalia lo alesensijaran de el gradski sovet, i esto ke non li davan por la razon ke non foe etcho kon la kontentes de el okrujen upravitol^[7] era ke si lo ivan etchandolo en dijas, i ansi foe ke non lo alesensiaran i kon la esperansa ke mas tadre ja lo ivan a alesensiar era ke iva

1756            Biografia de S. Chemoelatche J. Arié         1899

tiniendo la pasensia, i ansi foe ke longo tiempo non si avrio esta plasa i el lugar li resto en vazio ke el buchko muntchas vezes por i poder venderlo ma era ke non topava, anke lo prometija kon unos presios mas baratos de esto ke lo merko, i ansi es ke fin a este tiempo resto en vasio, i sin ke si aprovetchava de el nada de revinido, ke esto foe un jero, ke si iso, ke loke si vido foe por depedrer esta medrese i ke non si nombrara mas ke era Vekuf,

En el anio de 5660-61, ke sofria de la maladija de la potra, foe en este anio ke li apreto muntcho fin a el grado ke el estuvo en grande pirikolo, i de todas las kuras i los ajudos ke el si asija de mas antes foe ke non li aprovetchavan nada, i ansi foe ke el mas ja non pudo ni kamenar, i visto a esto kon su lesensia i esta de todos son parientes, si detchizaron de jamar a un mediko de estos Hirurges ke saven azer esta manera de operasiones, ma era tambien ke en este tiempo el estava i sin moneda ke non podija pagar a el mediko i para esto entre sus parientes ja foe ke S. Jomtov, li prometio de enprestarle alguna suma ke li era bastante, kontra prenda ke ja li djo, i jamaron a el Dr. Asen Petrov, i lo trataron por 30 napoliones, kon ke li mandaron el paiton de Samokov, i estuvo un dia i una notche, i foe propio la tadre ke el vino ke sin tadrar li izo la operasion i estovimos toda la familia, en su kaza ke li turo komo

1757            Biografia de S. Chemoelatche J. Arié         1900

a 2 oras i esto kon ke lo endormisio, i se la izo mui levijano i foe mui gustozo el mediko de la reuchita, ke non kere ditcho todos mozotros, i el denpoes ke lo ato mui bien estuvo etchado de pal [palo] para ariva 24 oras i sin komer ni menos menijarse i tambien non salir de el poerpo, i mas tadre ke el mediko ja si foe el komando la manera ke devija komportarse, por unos koantos dijas i esto ke ja los paso tambien mui levijano foe ke si levanto i estuvo mui boeno i de mizmo fin a el tiempo ke esto eskriviendo la dita el mas non tuvo nada de akecharse de esto,

en el anio de 5661 ke el topo a vender on [un] pedaso de su jajla  balkan ke el lo tenija lo vendjo por 450 napoliones, i kon esta moneda el si komportava, seja por algunos ke el lis devija i ke tenija djoia en presadas foe ke la rezgato, i tambien el si komportava por algunos etchos ke el los azija,

1758

Asta aki si eskapa la partita de S.

Chemoelatche, J. Arié i estas todas de los ijos

de Tch. Jeuda, por kada uno fin a el anio de

5660 – 61