קורותיו של צֵ'לֵבּי אברהם ובניו, צֵ'לֵבּי משה [המחבר] ורְפָאֵלָצֶ'ה

1953

De aki i endelantre si enpesa la partida de Tc.

Avraam M. Arie, enpesando de el anio de 5630 ke si

espartio de su ermano Tch. Jeuda kontinoando i de

sus ijos fin a el anio de 5661,

1954         Biografia de Tch. Avraam kon su ijos Tchelebi Moche i Refaelatche            1870

En el anio de 5630 en Rh. Adar, de este anio ke si espartio mi Sr. padre Tch. Avraam ke era ke estava i jo tambien en akeja kompania, i sigun de loke foe la espartision ja lo eskrivi mas antes, foe ke el ke ja tenija merkado de mas antes una butika de H. Chelomo levi ke era enfrente de la foente grande en el Tcharchi de ariva, en la punta de el enpesijo de el Tcharchi, i el li izo un trokamiento kon ke la izo en 2 apartamentos, ke el uno era por kanselaria ande estavamos mozotros los ijos i la otra se la izo para si komo su kabineto, ande el si asentava i resivija musafires i estos ke kerijan demandarle algunas kozas de etcho, i denpoes ke la mobelio i la bojadejo, el izo un kontrato entre los 3 kon nombrar por kada uno sus kapetales i las pursiones ke ivamos a tener, de el etcho ke lo ivamos a lavorar, i denpoes ke ja los afirmimos i mos tomimos a una kopia a kada uno, i denpoes mos metimos en el lavoro,

De el presipio foe ke merkimos los sahtijanes ke si lavoravan en Samokov, ke era una suma komo de serka 100,000 fr. i el ke ja lo konosija mui bien este ofisio, foe ke en pokos dijas ja lo resivimos i lo enpakimos i lo mandimos a Viena ande el Sr. Mateh ruso por ke molo vindiera por moaestro [moestro] konto, ke esto sigun de loke si mandava i se azijan las venditas ja lo tengo eskrito mas antes, i la ropa ke ja era boena i mui bien sortijada^[41] foe ke en pokos dijas ja si vendjo i uvieron tambien i boenos profitos ke de esto si gusto mui muntcho sovre ke ja reucho en el primer etcho ke li izo,

kon el maaden ke mos kajo de la espartision ke foe

1955         Biografia de Tch. Avraam kon su ijos Tchelebi Moche i Refaelatche            1870

en el kazal de Kiostendja el orta maaden, kon sus 4 vignas ke son la una en Dragochin ke sovre eja ja lo tengo eskrito ke tenija una mui ermoza vila, i ke era enfrente de el rio isker, i era en eja ke nos ivamos siempre por kampania i tambien ke dormijamos en eja i ke era mui serka ala sevdad, i tambien era ke esta vigna dava el mas mijor fiero, i la mobeliimos de moevo kon adjuntar i los menesteres de la kozina, i la sigunda vigna era el en kampo de rudech, ke si jamava latifa vignesi, i en esta tambien era i ke tenija una tchika vila ke kontenija solo 3 kamaretas, i el fiero ke salija era tambien boeno, i era de mizmo i mobelijado ke i en eja era ke ivamos i el kiopri ke avijamos metido, en el iskir era para pasar a esta vigna koando estavamos en Draguchin, i las otras 2 vignas eran en el kazal de MahaleJovan, i eran mijor de las otras, seja por el fiero ke salija komo i tambien i la vila ke tenija era mui ermoza i era fragoada en 2 etajes, kontiniendo a 5 kamaretas grandes i aparte sus salones i ke era fragoada a el bodre de la marisa, ke tenija kampos grandes i todos sembrados de arvoles i goertas i bostanes era tambien i en eja ke ivamos, i en todas ejas tenijan a un nastoinik turko, ke dependia de el seja por el lavoro komo i la merkida de todos los materiales i ejos era ke en kada semana traivan el konto de las operasiones ke izieron, i lo todo lo tomava en nota el mola ke estava en Samokov ke el klal^[42] era ke mos dava los kontos a mozotros, por lo todo, i el Maaden ke era lechos de el kazal de Kiostendja komo 3 kilometros i arientro de las muntanias tenija tambien i su vila mui bien fragoada

1956         Biografia de Tch. Avraam kon su ijos Tchelebi Moche i Refaelatche            1870

en 2 etajes, ke kontenijan a 4 kamaretas grandes, i a un salon, i de mizmo era i ke mos ivamos por el tiempo de el enverano i estavamos a 2 i 3 semanas, ke la klima era mui boena, ke era arientro de montanias i de arvoles de los modos de tchames ke golijan, i tambien en la urija de el rio la Marisa, en el maaden era ke avijan 2 turkos, el uno era el nastoinik^[43] i el otro taindji, ke prontava las komanias seja para ejos komo i tambien por los musafires ke vinijan i se mantenijan en todos los dijas ke si estavan i sin dinguna paga, en el Maaden avijan 30 kavras mundjederas, por tomarles la letche seja para los nastoinikis komo i para los lavoradores ke eran 12 personas ke lavoravan los 6 entre el dija i los otros 6 en la notche, i por los musafires la suma de el fiero ke lavoravan era de 2000 kantares ke el un kantar es 60 okas, de una valor de 70 a 75,000 fr. i los profitos dependijan de las aniadas, ke en vezes ganavan 20 % i en vezes a 10%, i todo el fiero ke salija era ke si mandava a Pazardjik por venderse ke el pazar de esto era solo en pazardjik, ke venijan de kaje toda la trakia, por merkarlo i tenijamos a un turko aparte para esto de azer las venditas, i el moestro era ke si jamava mola Jonuz, i era ke partija en el dija de alhad de kada semana de Samokov, i se iva la notche a el maaden de Kiostendja, ke durmija i esto kon kavajo ke era moestro, i esto era ke li jevava los ordenes sigun de loke devija de fabrikar los fieros de la semana, i tambien la suma ke li devija de mandarle a Pazardjik, i en mizmo tiempo era i ke li azija i algunas revizias^[44], i de maniana de lunis era ke partija de el Maden

1957         Biografia de Tch. Avraam kon su ijos Tchelebi Moche i Refaelatche            1870

i se iva a Pazardjik por enkontrar alos klientes ke siempre ja vinijan de la trakia entera, i el trato de los presios ke los azijan eran sin muntcho tratar i en el dija de martes ja era ke a kada uno lis pezavan kon remanas la suma ke lo kerija, ke esto lis turava el dija entero i la maniana de mierkoles fin ala medio dija se meravan los kontos i azijan los kovramientos, i en el mizmo dija partija por Samokov, i se vinija tambien a el Maaden i dormija la notche i li i komandava la suma de kantares ke li devija de expedir por la semana ke viene i dija de djueves si vinija a Samokov i entregava seja el konto de las venditas ke izo komo i tambien i la moneda, ke rekojo, restava fin dija de alhad i de moevo se iva sigun ditcha ke esto era en kada semana seja por el enverano komo tambien i por el envierno, i las pagas ke si lis pagava eran por el satidji^[45], a 500 fr. a el anio i por el nasteimik de el maaden i vignas a 400 fr. a el anio i por el taindji a 200 fr. i aparte ejos todos tenijan kortadamente^[46] ke si lis dava los taimes^[47] seja en trigo i karne i ansi mas i otras, kozas, i kada maadendji^[48] tenija tambien i a un jezidji^[49], (kamenador) por ke foera kamenando de kazal en kazal i las vignas i maadanes, por ir aziendo abasteser los materiales menesterozos seja en los kemures i las rudas i otras kozas, ke era tambien i ke kada fabrikante ja los tenija las ameles (lavoradores) aparte ke eran ke lis devijan koal 100 i koal 500 fr. i non podija jevar el matirial ke tenija en otra fabrika, solo ke koando li pagava esto ke li devija ke esto ja era komo una lei entre los maadenjis, ke non li podija tomarlo komo no

1958         Biografia de Tch. Avraam kon su ijos Tchelebi Moche i Refaelatche            1870

era su lavorador, los presios eran fiksados en kada anio seja de el kimur komo tambien i de la ruda i ansi i de los otros materiales i de mizmo la paga i de los kovatches^[50] i vignares^[51] i otros lavoradores i para nombrar los presios de estas kozas era ke en kada anio si rekojijan los maadendjis i jamavan a 2 personas de kada kazal i dependia de la aniada seja por pujar komo i por abachar, i esto era de loke lo vijan por deretcho los maadendjis, i mas non avija trokamientos ke esto era el presio por el anio entero, i todos ja si tomavan en nota, i konkorensias non avija kada fabrikante tenija el menester de detener siempre 4 kavajos por los nastoinikis i satidji i jezidji i aparte otros 2 kavajos al menos por su paiten ke vijitava el patron las fabrikas i en vezes ke i iva a pazardjik i otros lugares por ejo i aparte era ke li kalija i ke tuviera i un karo de vakas por el menester de las vignas i ke li traiva tambien i la lenija para la kaza i para todo esto era ke tenijan i un mudir natchalnik el jevador de el etcho entero, i el koal era ke jevava todos los kontos i le raportejava a el patron ke lo todo si enkamenava alos komandos de el patron, i kon el kapetal ke premija por el lavoro de el un maaden era de 80 a 100,000 Fr. a razon ke li kalija los depozitos siempre ke los tuviera jenos, i los averes ke tenija en los lavoradores era alo manko de 15 a 20,000 fr. aparte de las sumas ke las tenijan de aver de las venditas de los fieros en Pazardjik, i otros lugares,

Kon el un tersio ke tenijamos en hevra kon Sr. Behoratche Jshak G. Arié, foe en este anio ke si lavorava sigun de antes

1959         Biografia de Tch. Avraam kon su ijos Tchelebi Moche i Refaelatche            1870

en el tchifte maaden ke ja lo eskrivo mas antes, la manera de el enpatronamiento de este maaden, solo ke los fieros ke salija era ke molos, tomavamos mozotros la parte moestra i molo vendijamos mozotros

En el tiempo ke si vindieron los Hachares foe ke tomimos unos koantos kazales i los diezmavamos mozotros i los trigos los metijamos en los moestros hambares ke ja los tenijamos en kaza, siendo ke esto de los hachares i tambien de los maadenes ke non lo kontavamos por etcho seriozo foe ke enpesimos a korespondejar kon las kazas de Kostan ke eran de Sr. Kamondo i de Sr. Chemoel H. B. Nisim & Co. por merkar Havales, i algunas i otras operasiones de banka i de merkar i vender los fondos turkos, ke i esto mas tadre tambien lo tovimos i esto a sumas mas godras,

En el anio de 5631, li nasio a Tch. Avraam un ijo i lo jamo Jeuda (Leon) ke nasio alos 10 anios, denpoes ke moestra madre avija parido a Nuriel, eja la madre estuvo mui sikilijada de este prenijado ke todo se iva espantandose ke non le iva a poder parir i ke ja estava dezozada de krijar i ke non podijan kudijarlo i koando ja pario ke lo pario mui koli, eja non kijo ke la vijitara dinguno i si estava solo kon un krejadera, sigun de loke si uzava ke vijitavan los parientes i ke mandavan los platos eja non kijo nada solo ke en el dija de el Birkad mila ke uvieron los parientes i amigos a komer, el ke ja foe krjado i kudijado seja de su madre komo i tambien de

1960           Biografia de Tch. Avraam kon su ijos Tchelebi Moche i Refaelatche          1871

las krejaderas el koal era mui ermoza krejansa, en todos los puntos solo ke era mui flako, anke ke era tanto kudijado, ke koando mas e iva engrandesiendo era ke mas flako iva endo i esto foe porke foe i aletchado de otras krejaderas, ke los medikos ke lo meravan era ke dezijan ke en aziendose mas grande ke ja se iva a remeter, lo koal ke non foe ansi i era siempre flako,

En los tiempos ke si vindieron los hachares siendo ke los konkorentes foeron muntchos i ansi foe ke i los presios tambien foeron mui karos en los kazales de Samokov, i mozotros mos foemos a Dubnisa ande merkimos una partida bastante grande de kazales, ke salijan los mijores trigos i tambien el tutun. i otras sembrados i las frutas ke de lo todo si tomava el diezmo i aparte de los personales ke ja los tenijamos era ke ivamos i mozotros propios por diezmarlos ke de esto tovimos boenos profitos a razon ke los trigos los vendimos todos partida a merkaderes i partida a los kazalinos, i esto lo todo en kontante, ansi i de las i otras kozas,

En este anio mi foe jo Tchelebi a Tchirpan por espartir moneda a los tabakis de esta sivdad ke avijan muntchos para ke lavoraran mas muntcha ropa i kon kondision ke mola ivan a dar a mozotros kon algun rebate de el presio ke se iva a kortar en el esnaf, i para esto estuvo jo asentado en Tchirpan el envierno entero, fin ke lo lavoraron i en este tiempo iva tambien i a Stara zagora i en Kizanlik i Haskovo i Estenemaka^[52] ke en estos todos lugares si lavora el Sahtijan i mechinos, i les dava moneda de adelantado por tomarles

1961         Biografia de Tch. Avraam kon su ijos Tchelebi Moche i Refaelatche            1871

seja los sahtijanes or los mechines ke ivan a lavorar, i koando ja era la prima vera ke ja eskapavan de lavorar era ke azijamos el trato i enpesavamos a resivir las ropas ke jo lo tenija por mi kompaniero a Sr. Avraam B. Binjamin (edibaa), de pazardjik, ke era el koal ke mi akompaniava, i a el era ke lo mandava en todos los tabakes por ke los foera siempre dolachijandolos i a el li pagava un tchiko % de el etcho ke si azija solo ke jo lo mantenija i li pagava todos los gastes por ke mi akompaniava, tenija tambien i a un sierto mansevo turko por jasaktchi goadrador ke el koal era siempre armado i dormia en la kamareta ande jo mi etchava, i era ke siempre kamenava kon mi djunto i tenija de su kavajo i li pagava una sierta mezada, ke koando mi se azija el menester de moneda ke travava polisas a viena i a Kostan i era a Filibe ke si negosiavan era ke lo mandava a el ditcho ahmed, ande el Sr. avramatche Kalev ke el koal las vendija i me mandava la moneda kon el dito Ahmed ke era mui konfedente, i a el koal lo tovimos en Samokov denpoes muntchos anios, i todas estas ropas las mandavamos vija de lom palanka a balas de a 55 i 60 okas sarijadas kon tchules, lo todo kon kavajos, i esto ja era ke si eskapava en un enterval de un mez, i en este anio la suma de sahtijanes i del mechin ke tomi foe komo una suma de 250,000 gr. ke esto todo era a sr. Math. ruso de viena ke los mandavamos, i el los vindjo kon sus boenos presios, ke de esto foe ke tovimos tambien bastante de ganansias i eramos mui kontentes, kon el etcho de las havales era lo mas muntcho ke merkavsmos vija de el Sr. Chemoel H. B. Nisim Co. ke el

1962         Biografia de Tch. Avraam kon su ijos Tchelebi Moche i Refaelatche            1871

koal era ke kovrava mas poka la komision, i las havales eran por kovrar de las kachas de Sofija ke eran mas karas por ke pagavan mas presto i tambien de filibe i vidin i Nich, i era ke lo mas muntcho lo mandavamos a Sr. Chemoel Avdala por la parte de Vidin i a Nich se iva Sr. Refaelatche i kon estas de Sofia i de Felibe ke ja estavamos siempre por estas sivdades era ke iva tambien i jo, mas muntcho, i aparte tenijamos tambien i havales en midjidies ke eran por los komertchos ke estas eran ke si kovravan mas antes de todas las otras i las ganansias eran de a 1 %, koanto alas otras era de 3 a 4 %, i ke ja eran a sumas grandes era ke ja avija boenos kontos, porke la mas tchika havale era de 500,000 fr.

A razon ke avijan siempre algunos enderetchamientos en los kontos de la espartision era ansi ke kada dija li kalia ami Sr. Padre, ke estuviera ande los ijos de Tch. Jeuda por resentarlos i ansi era ke siempre lis salija tambien i el etcho alguna vez i a letigas, ke non si podijan tanto presto darsen a entender, ma ja era ke non dava muntcha atansion en las kozas mas tchikas i lo dechava pasar por ke non uvieran litigas sovre todo ke el non tenija este tiempo de okoparse en esto ni metija al tino las avlas i kozas ke lis pasava por ke el ja tenija sus muntcho mas grandes okopasiones ande ke non li permetija el tiempo para merar en esto,

En el kontoar ke el tenija su kamareta aparte era ke li vinijan en kada dija las tadres los turkos begis i los notavles de Samokov a vijitar i por pasar la ora, i sus lingoajes era lo mas

1963         Biografia de Tch. Avraam kon su ijos Tchelebi Moche i Refaelatche            1871

muntcho sovre los estudios, seja de la Biblia komo i de el Talmud ke ja lo saven ke mi Sr. Padre era mui Haham, i los turkos ke i ejos tambien eran savidos era ke lis deklarava las demandas ke li ivan demandandole, de mismo lo azija i el ke los vijitava solo en los dijas de viernes, ke ejos si estavan en sus selamlikes i esparavan vijitas

El era un miembro de el medjlich idare ke es en la kamareta de el Kaimakam, ande si meldavan los ordenes sikretos ke vinijan por el governamiento de el paiz, i ejos lo azijan raportos sigun de loke si devija de governar a el poeclo [poevlo], i sovre todo en el etcho de los dasios ke los trokavan siempre, i las leés^[53] moevas ke avijan en kada dija i ejos raportejavan sigun de loke kamenava el poevlo, i las merkansijas, i sus adjuntas eran 4 vezes ala semana, i esto estavan a 2 oras ke por lo todo lo azijan mazbata, i la sejavan todos, i esto era sin dinguna paga, ke esto era onor de asistir en esto,

El tenija grande enfloensa seja entre los turkos komo I kerstijanos i djidios i era siempre ke li vinijan por akonsejarsen por sus deferensias ke tenijan de los unos a los otros, i ja era ke a todos los apazigoava, i eran kontentes,

En el anio de 5632, ke el sigundo etaje de la kaza ke tenija fragoado, en el anio de 5628 non estuvo eskapada de fragoar, por ke era mui grande sigun ke ja lo eskrivi mas antes sigun de loke era, i en este anio, foe ke de moevo se trucho alos maestros por

1964         Biografia de Tch. Avraam kon su ijos Tchelebi Moche i Refaelatche            1872

eskaparle, i esto era poka koza ke li mankava, i en mizmo tiempo foe i ke la bojadejo kon ke trucho tambien los bojadjis de Filibe i los trato solo por el etaje de ariva por el lavoro por 10,000 gr. i las bojas, foeron moestras ke lo todo era de boja jagli ansi ke la izieron mui ermoza, fin a el grado ke fin agora ke ja son 42 anios ke esto eskriviendo la dita biografija es ke estan estas bojas sigun de loke foeron de koando se bojadijaron de el presipio, sin dingun bozdijamiento, i denpoes ke ja foe eskapada seja las bojas komo i lo restan de algunos tchikos adovamientos foe ke lo mando a Sr. Refaelatche a viena, ke ejos ja si ivan a ir en este anio kon su mujer M. Buhurutcha, a lom, por azer una vijita a su padre, i ke merkara las mobilias menesterosas por este etaje, i ejos ke ja partieron por Lom foe ke resta M. Buburutcha en Lom i Sr. Refaelatche partio por Viena i merko por todas las kamaretas ke son 10 en este etaje las mobilias komo espejos, oras, mezas, de sus manera sijas kanabes, fotelios, tapetis, tapios de mezas, perdes, i ropas por duchemes i ansi mas todo el menester, i aparte el merko muntchos servizes de tchinis i de vidros, i platas, i tambien merko, partida de ropas komo panios i otros por venderlas en Samokov por echpikolasion, i denpoes ke ja izo los emplejos, si abacho a lom i se vinieron djuntos kon su mujer a samakov, i koando ja arivo la ropa la resentamos en kaza i se gusto muntcho moestro Sr. padre ke ja estuvo boeno, i era en el salon ke si asentava en los Chabatiod i moadim i en este lugar resivija las vijitas, ke en el salon podijan asentarsen de 180 a 200 personas,

1965         Biografia de Tch. Avraam kon su ijos Tchelebi Moche i Refaelatche            1872

En este anio li nasio a Sr. Refaelatche un ijo, i lo jamaron Josef-Haim, ke foe gusto grande i li izieron todos los usos seja kon la kama de brozlados komo i tambien ke la vijitavan i li mandaron todos, los platos i los presentes de las paridas, i en el Birkad-mila tambien lo izieron de kombedar a la sevdad entera, i toda la familija ke ja estava lo izieron komo una boda, i su madre lo aletcho i lo krijo, el en tchiko era minudo ma koando ja foe mas grande ja foe grandino i sano i boeno,

Mi mujer M. Beju, ke ja sufrija de mas antes algo de la maladija de el Emoroid^[54], i ke en este anio si li renovo foe ke mos foemos a Sofia alos banios de gorna Banija, i estuvimos komo a 3 semanas aziendo estos banios ke ja topo algo de reposo, ma non foe por entero, i jo Tchelebi ke en este tiempo era la ferija de Pirot, ke jevi una partida de fieros por venderlos en la feria, ke esto en vezes los buchkavan, i tambien ke mozotros tenijamos i un han kon deredor ke tenija butikas, por kovrar las kiras ke tomavamos en todo de 1500 a 2000 fr, de kira a el anio i este han era de la espartision de koando mos espartimos, de Tch. Jeuda, i los fieros foe ke la metad los pudi vender i kon la otra metad la una partida los izo trampa por un paitoniko ala moda Sirba, ke lo podija travar tambien i un kavajo, i era mui ermoso i mui levijano, i foe ke kon el mi vini jo de pirot i denpoes mos vinimos de Sofia tambien kon este paitoniko a Samokov, i kon lo restan de fieros los vende a fijado ke denpoes por kovrar se jevo algo de pena ke non pagavan en regla,

1966         Biografia de Tch. Avraam kon su ijos Tchelebi Moche i Refaelatche            1872

En este tiempo ke si estava vindiendo la Plana, ke es una tchika muchija, en el kampo de el kazal de Tchupetlovo, en el bodre de el balkan Vizocha [Vitocha], ke kontenijan komo a 26 kazas de Krestijanos ke lavoravan en esta plana, i la espandidura de esta plana era komo de 14,000 dekares, de los koalos los 2000 dekares eran de kuris i los 4000 dekares eran de sembrados de tarlas i tchaires i lo restan era todo kampo por pasto de las ovejas, era lo todo en una janura de un alto monte, i era lechos de Samokov komo a 20 kilometros, i los revinidos eran kortadamente ke lo pagava en kada anio los moradores de este lugar, 700 fr. por el sembrado i por el pasto si tomava komo a 1000 fr. i de el kuri tambien si tomava 500 fr, en todo era 2200 fr. i kosto por la suma de 25,000 fr. ke foe una merkida mui barata i mi Sr. Padre si gusto mui muntcho, por ke era un lugar mui visiozo i mui frutchigozo, i denpoes ke ja moz enpatronimos kon les dukomentos menesterosos en Sofija por ke era de la okolija^[55] de Sofia, i los kazalinos ke ja mos kijeron a mozotros por patrones konforme a un temerud-senedi^[56] ke dieron koal mente ke ejos non lo keren merkar, i ke ja eran kontentes ke lo tomaramos mozotros ke la lei ja era ke los kazalinos akonantavan komo ejos lo kerijan i a otro non si vendija i mozotros gustozos de esto lis abachimos la taksa a 600 fr, a el a anio, i ansi kontinuo algo de tiempo ma serka de esto, foe por desplazer ke uvieron unos kontrarios seja de los inimigos komo i de algunos tambien i parientes ke si mleskaron i se aunaron kon estos i enpesaron a ensender a los propios vindidores kon ke ejos lis ivan

1967         Biografia de Tch. Avraam kon su ijos Tchelebi Moche i Refaelatche            1872

enbezandoles de las maneras de las pretensias ke si podijan repentir de la vendita i tambien ke ejos lis ivan prometiendoles ke lis tenijan de pagarles muntcho mas alto presio ma estos ultimos ke eran en 32 partes foe ke a dingun presio ejos non kijeron repentirsen ke eran unos turkos de Sofia, i los kontrarios visto ke non pudieron reuchir de parte los vindidores ejos los ensendieron a propio los moradores krestijanos ke moravan en esta Plana, i kon prometerles ke este lugar ke lis podija apartener a ejos i koanto ala moneda ke ja si la tenijan de darselas ejos i estos ultimos konvensidos de esto lo izieron ke avrieron proseso i enpesimos en los djuzgos, i mientres de este tiempo ke ja estavamos en el djuzgo era ke mos ivan viniendo de estos kontrarios kon dizirmos ke komo lo metemos en Hevra kon ejos este lugar, i ke mos tenijan i de pagar mizmo i algo mas muntcho en konto de la valor ke lo merkimos i entonses iva aser ke mas non ivan a kamenar por ke non lo enpatronaramos mozotros, ma mi Sr. Padre esto non lo kijo, i el kontinoava los djuzgos, i de el presipio ke mos djuzgimos en la primera stansia ke era en Sofia ja foe ke mozotros lo ganimos el djuzgo i ejos ke lo izieron apelo a el Vilaet en Rustchuk foe de mizmo Ke mozotros lo ganimos ma ejos lo izieron kasasia^[57] a Kostan foe de mizmo ke ganimos i siendo ke mas non avija djusgos ande djuzgar ke la kasasia ja era los kavos foe ke tomimos la kondana i lo kejimos de ketarlos a todos los moradores ke avijan en este lugar, i jo ke kamenava siempre sovre esto foe ke lo demande de Mahsar Pacha de Sofia por ke mi diera a 2 Azas^[58] (asistentes)

1968         Biografia de Tch. Avraam kon su ijos Tchelebi Moche i Refaelatche            1872

en el medjlich, idare i a un en bachi kon 10 djandares por ketarlos de el kazal, i esto ke ja foe resivido de el Mutesarif ke era Mahsar Pacha foe en dija de lunes ke partimos todos djuntos kon kavajos, ke era lo todo a el gaste moestro, i la entesion era de ketarlos i derokar or kemar todas las kazas, i ejos de esto ke ja lo supieron kale dizir, foe ke mozotros ke estavamos entrando ala plana vimos de enfrente ke eratavan [estavan]^[59] rekojidos todos los ombres krestijanos moradores de este lugar, en un alto bairiko, (mogila^[60]) i koando mos vieron a mozotros entrar ejos kon gritos de lolo, lolo, enpesaron a foirsen, i los djandares ke korieron de detras foe ke non los podieron alkansar arazon ke ejos si abacharon un etek^[61] entre 2 montanias ande kavajos non podijan abachar, i de otra parte topimos a las mojeres kon las krejaturas jorando kon goajas i ejas si avijan enpesado a foir ma a ejas las detuvieron i de todo loke si lis avlava en nada non respondijan solo ke joravan, i mozotros estovimos akeja notche en una kaza pensando ke ja ivan a venir ma non vinieron i los azas ke eran el uno turko ke si jamava Hadji Bekir i el otro krestijano Hadji Mano, ejos non decharon ni derokar ni menos kemar, i ansi foe ke mos boltimos en vazio, (ke si esto era en el tiempo de agora es mui siguro ke mos matavan a todos,) i visto ke non kijeron entrar en nada foe ke los jamimos por demandarles koalo era sus entasion i ke molo podija mos konvinirlo entre mozotros al amogavle i la repoesta de esto foe ke ejos si foeron a Kostan i se aderesaron a el Babi-ali^[62] ke es ande esta el gran vizir^[63], i el ke vido ke era kon mi Sr. Padre este djuzgo

1969          Biografia de Tch. Avraam kon su ijos Tchelebi Moche i Refaelatche           1872

ke en este tiempo era el gran Vizir Midhad Pacha ke por el koal ja tengo eskrito ke koando venija a Samokov se abachava en la vigna moestra, i siempre li azijamos daavetis^[64] en kaza, foe ke el etcho lo detuvo komo por examenarlo i Tch. Davitchon Karmona ke era uno de los Depotados de el Modjlich Hajan (senator) lo jamo en un dija i li djo una karta eskrita de su mano para mi Sr. padre ande li dizija, por el djuzgo ke tienes kon los planalis ja li eskrivi a Abdurahman pacha ke el koal era el Vali de rustchuk, por ke vauga [vaiga] a Sofia i ke vos konvenga, i se afirmo Mithad [Midhad], kon i ke la sijo, i a Tch. Davitchon li dicho eskrivale a Avramatche Efendi tchok solam^[65], ke non si poede depedrer un kazal i ke Abdulrahman Pacha ke ja va ir a Sofia kon Mahzar Pacha en djuntos ke los konvengan, i Tch. Davitchon ke ja eskrivio ke en este tiempo ja vino i el Abdulrahman Pacha a Sofia ja li telegrafejo vija de el Kaimakam porke si foera mi Sr. padre a Sofia i el ke meldo las kartas foe ke si sikilio mui muntcho de esto ke li eskrivio Midhad Pacha, i ke non lo kijo ajudar, i ansi foe ke el non kijo ir a Sofia i mi mando ami ke mi dicho por ke li diga Tchik selam de mi Sr. Padre i ke el non pudo vinir i ke jo de su parte ke responda por el i ansi lo ize i ejos por forma nomenaron a una komision i lo izieron a detras de loke ejos la taksaron ke foe por 1800 liras komo una suma de 41,000 fr. i jo ke non lis podija nada avlar estuve de akordo, i mos kontaron las 1000 liras Dedo Staiko de Panajurichta i las 800 liras Hristo Srebenikov, de Samokov, i kon esto se eskapo esta kistion mozotros tuvimos 4 anios de djuzgos, i muntcho gasto,

1970         Biografia de Tch. Avraam kon su ijos Tchelebi Moche i Refaelatche         1872

i denpoes ke ja si eskapo mi Sr. padre li respondjo a el Midhad Pacha ke ja lo izo sigun su komando i el Abdulrahman pacha mas tadre ke si vino i el a Samokov kon el Mahzar Pacha, lis izimos el Daavet, sigun ke ja lo saven komo eran estos daavetes,

En el anio de 5633, sigun ditcho mas antes por el ijo Leon ke pario a los kavos moestra madre ke era mui flako, i ke non pedieron topar la kura por sanarlo foe ke murio, ke de esto foe ke moestra Sra Madre si sekilio mui muntcho fin a el grado ke si enpeso, muntcho a nervozejarse i sovre todo eja de esto era ke tenija i algunos penserios i imajinasiones sospetchozas ande la ivan mui muntcho abatiendola, i de esto era ke dija kada dija se iva aflakandose, fin a el grado ke si enkachava sola en una kamareta i se estava solo sin ke resivija a Ninguno, ni kerija kon dinguno avlar, i de tanto ke li foeron avlandole foe ke mas tadre ja bolto ma non foe mas sigun el gusto i el aire ke lo tenija de mas antes,

Mi mujer M. Beju. sigun ja lo eskrivi ke sofria de el majasil imuraid, foe en este anio ke tuvo tambien i el konstipasion kabizlik, i de esto era ke se iva mui muntcho aflakandose i mas ke eja ke foe pariendo foe en los oltimos 3 partos tambien ke non li i bivijan las krejaturas sovre ejo mos dicheron ke era boeno de irmos alas mehadias (Erkoliz-bed), por azer algunos banios i esto sin ke lo tadrirmos i partimos jo i biju i Rachel mi ija vija de lom Palanka

1971           Biografia de Tch. Avraam kon su ijos Tchelebi Moche i Refaelatche          1873

kon moestro paiton ke ja lo tenijamos en kaza, i sin ke mos akompaniara dinguno ke mosos turkos ja los tenijamos, en kaza, i mizmo ke en akejos tiempos era i pirikolo de vijajar, sovre todo ke lo ivamos i apasar el kodja balkan, ma mozotros por la grande energija i enfloensa ke ja la tenijamos, mi tomi kon mi solo 100 dukados minsas, i partimos por Sofia, i mozotros ke estavamos abachando el bair de Lozna akaesio, ke si rompio, el dingil ke era de fiero, i mozotros kortimos un arvole de el kampo ke i esto non si podija i lo atimos en la karutcha i apenas abachimos en lozna i kovatches ke ja avijan lo azimos apegar i partimos a Sofia, i dormimos akeja notche en Sofia ke arivimos tambien i de notche, i ala maniana, ke partimos por Berkovisa i ke tenija 12 oras de kamino i ke lo ivamos tambien i a pasar el kodja balkan (stara-planina) tambien solos lo todo astriviendomos alos kavajos ke eran blankos i mui fursudos i mozotros ke ja arivimos en el han de la klisura lugar ande si enpesa asovir el kodja balkan topamos a 2 turkos mansevos i mui bien armados ke i ejos eran atlis^[66] kon kavajos, i jo ke mi aderesi a el handji, por demandar, kon [ken] eran estos, i el handji mi dize ke estos vinieron, ajer la tadre i ja los estas viendo ke son pantas keri dizir (ladrones) i ejos ke estavan asentados en una meza estavan diziendo ke maniana vamos a reintchir el moestro dezejo, ma jo sin dingun espanto i kon grande kuraje mi aserki ande ejos, i denpoes ke los salodi lis demande por ande era sus viaje, i sus repoesta foe ke ejos estavan sin dingun etcho, i se vinieron en este lugar por akompaniar, alos merkaderes pasajeros ke

1972           Biografia de Tch. Avraam kon su ijos Tchelebi Moche i Refaelatche          1873

vijajan solos, i por ke mos pagan esto ke lis plazera a kada uno kijendote dizir ke ti vamos i akompaniar i a ti ke ja estas solo kon tu familia, i esto fin i a lom palanka, por ke ja ti konosemos ke tu sos de los sarafis de Samokov, (ansi mos jamavan amoestra familia) ke anke ke tu non mos konoses ma mozotros ke tenemos komido de vozotros pan i sal, es ke non ti vamos a dechar ke ti vaigas solo, i jo ke sinti dizir ansi de unas pantas, foe ke lis diche muntchas grasias ma es demazija el vinir kon mozos, i kije darles a un dukado a kada uno ma ejos refuzaron en diziendo ke akejo ke mos kerlas pagar va aser en lom ke molo vas adar, i ke ja es bastante el gaste de los Hanes, i visto ke non uvo remedio por ke non vinieron kon mozotros, kedimos de akordo, ke el uno de ejos iva a estar adelantre de mozotros komo a un kilometro i el otro adetras de mozotros komo a medio kilometro i foe ke partimos i ala tadre ke ja arivimos a Berkovisa ke es 12 oras de Sofia, i dormimos en un a ke ejos molo amostraron i demaniana partimos por lom ke tiena 16 oras i ke los kavajos moestros ke eran mui bien mantenidos ja foe ke arivimos en Lom temprano, i les pagi el gaste de los hanes ke foeron todo 50 gr. i para ejos ke lis kiji darle a 100 gr. kada uno ejos non resivieron ke denpoes kalio Sr. Leon B. Jshak ke los konvensiera ke jo non kero debaldes i los resivieron kon darme las mil grasias, i mozotros ke non konosijamos la lingua romana mos tomimos a una mujer djodija ke ja konosija la lingoa i partimos, kon vapor por la tuna a Turno-severin, i de el Turno kon karusa alas mihadias porke non avija chemen de fer, i mos

1973           Biografia de Tch. Avraam kon su ijos Tchelebi Moche i Refaelatche          1873

abachimos en un Hotel Fras Jozef, ke kostava la kamareta kon 3 kamas a 5 Florinos, por notche, i mozotros ke tenijamos el menester de mediko i la mujer ke mos jevimos loke savija avlar era solo demandar pan i agoa, foe ke lo jami a el hoteldji, i jo ke non savija nada de sus lingoas era ke kon senias i en djudesmo i mleskando turkesko, i bulgar ke le iva avlandole ma ja era ke el hoteldji nada non mi estava entindiendo, i mientres esta moestra konversasion, era ke esta va sintiendomos de enfrente un sierto mansevo bien vistido kon i su silindro en la kavesa, i mos merava de esto ke non mos estavamos podiendomos darmos a entender i el ke ja lo entendjo ke eramos Djidios el mesi aserko en demandandomos koalo era ke li kirijamos dizirle a el Hoteldji i ke el ja mos podija servir, ke visto a esto a mozotros mosi avrieron los ojos i mos gustimos mui muntcho i denpoes ke ja i mos izimos la konosensia, mos salio ke mos era i pariente i era de Bukarest Sr. Jaakov Arié propio de la Familija moestra, i el foe de mizmo ke si i gusto mas muntcho ke mos vido ke el ja savija de la Familia Arié de Samokov, i ansi foe ke por endelantre era lo todo, ke mos servijamos por vija de el, seja por los medikos komo i por los banios, i de mizmo i kon la komania, i la kamareta ke mozotros la tenijamos la trokimos i tomimos vizina ala suja, i komijamos djuntos ke mos merkavamos por las notches kozas jeladas por mas barato, ke una komida en el trkter [trakter] tambien mos estava kostando 5 Fl, i alos pasatiempos era tambien ke ivamos djuntos, i el ditcho Sr. Jaakov era ke sufrija de una dolor en la kachareta, de el pie deretcho i ala

1974           Biografia de Tch. Avraam kon su ijos Tchelebi Moche i Refaelatche          1873

mujer ke mos jevimos de Lom la mandimos por ke mas ja non si tuvo el menester, ansi lo izo i Sr. Jaakov ke i el tenija a un mansevo porke lo akompaniara foe ke i el lo mando, i restimos solos ke estuvimos 5 semanas, aziendose M. Biju los banios, i en este tiempo era i ke se iva aziendose Biju muntchas modas de vistidos, i se keto kavejos ke mas antes non avija esto, i tambien merkandose los modos de los tchapeos i otros menesteres para esto i mozotros platikavamos sovre el estado seja de los Aries de bukarest, ansi i de estos de el Turno severin, i tambien por los negosios ke los azijan ke por ejos mi kontava ke azijan grandes sumas de merkidas en los seriales i esto lo azija el Sr. Jaakov i estava en aleksandarija ke estava el siempre en Aleksandarija i estava sin kazar ke ja era de una edad de komo 25 anios, i sus ermanos Avraam i Chemoel eran en Bukarest, i eran merkaderes de malifaktura i sus empleos los azijan de Paris i de Londra i aparte ejos era i ke merkavan partidas tambien grandes de lanas i las mandavan a Viena por ke si las vindieran por sus kontos, i ejos enpatronavan a sumas grandes de kapetales i todos 3 ermanos eran Haverim, i el mi amostrava las kartas ke las resivija de sus ermanos en kada sigundo dija ande li azijan saver de todas las operasiones ke ejos las azijan, ansi de mizmo era i ke li azija saver i los moestros negosios, i era ke lo pasavamos mui boenos solo ke Biju non topo dingun provetcho, i el gaste ke lo izimos en moestro estar en las mihadias foe de 2000 fr. i ansi foe ke mos ditchizimos de irmos a Viena por ke la meraran los medikos de Viena i sin mas tadrar

1975           Biografia de Tch. Avraam kon su ijos Tchelebi Moche i Refaelatche          1873

mozotros partimos por Viena, i mos abachimos en la kaza de Sr. Jakov Echkenasi, ke el koal resivija a los viajadores ke eran kon Familias en sus kaza, ke mos mantenija, i dormijamos i mos merava mas por todos los menesteres i la paga era de a 8 florinos por persona ala semana, i kon el foemos ande los profesores ke estuvimos komo a una semana, i mientres de este tiempo era ke ivamos siempre en todos los lugares de pasatiempos i estos ke eran de versen i en las notches mos ivamos alos tiatros i otros ansi lugares por aguzarmos i kontentarmos i profetar de la okazion sin ke merava los gastes ke mos estavan kostando, i los medikos mos mandaron a los banios de Franses-bad, ke i esto lo izimos, kon ke los medikos mos dieron kartas de rekomendasion para los medikos de Franses-bad, i en mizmo tienpo mos jevimos tambien i a una ija de el ditcho Sr. Jaakov Echkenazi por ke mos foera i komo terjomana, por la lingua, i koando ja estuvimos i en Franses bad tomimos una kamareta en un Hotel ke pagavamos a 8 florinos, ala semana, por kira, i los medikos de estos banios li dieron a Biju ke iziera, el un dija banios de salvado i a el otro dija banios de mor-bad ke es de tiera, i kostava kada banio a 1 1/2 florin, i las madrugas kon amaneser el dija era ke bivija a 2 kupas, de agoa, de los pozos minerales, ke sos lechos de la sivdad komo a 2 kilometros, i li kalija ke i estuviera kamenando una ora en los lugares apartados ke ja avijan para esto de salones ermozos, i de goertas, i kon muntchos modos de muzikas i otros pasatiempos, ke esto era en kada dija ke lo azija mozotros en este lugar enkontrimos, ala Familia de el Sr. Acher de

1976           Biografia de Tch. Avraam kon su ijos Tchelebi Moche i Refaelatche          1873

Bukarast, ke si estavan i ejas aziendosen los banios i eran estas mujeres una djente mui boena, i muntcho amistozas, ke en kada dija ejas mos vinijan en moestra kaza por tomarmos, para ir djuntos alos pozos para bever las agoas, ansi tambien i por azer los banios, i denpoes mos ivamos djuntos a komer i alos pasatiempos i las goertas i mos jevavan en sus kazas, ke mos davan modos de pastas i otros dezajunos i dulsuras, ke ejas tenijan sus pijanos en kaza ke lo savijan tambien i mui boeno djugarlo i ejas mos enbezavan de la manera ke mos devijamos de komportar i esta de la ikonomija, i mozotros tambien era por enfrentante i ke las kombedavamos en moestra kaza i ejas ja mos venijan, i en estos banios ke M. Beju topo su mui boena melizina ande eja si sano de todos los puntos esto li trucho mui grande i visio, i denpoes ke ja estuvimos komo a 3 semanas, mos vinimos torna a Viena, i mos abachimos de mizmo en la kaza de el Sr. Jakov Echkenazi i kon la mizma paga, de antes, por ke i ejos eran mui kontentes de mozotros i tambien ke los jevavamos i a ejos a todos los pasatiempos ke mozotros ivamos i de toda la ropa ke jo merkava era kon el ke kamenava i tomava su komision seja de mozotros komo i de el merkador i aparte tenija i otras ganansias, de mozotros,

I jo Tchelebi ke tenija en la pierna deretcha un krisido de karne, koanto una tchika mansana, ke esto lo jaman (karpuz) i en poko tiempo era ke mi si foe krisiendo, i esto ke si krese mui presto fin a el grado ke mi se apezga la patcha ande non decha kamenar, i jo non supe dinguna razon de koalo foe ke mi vino esto, i ke

1977           Biografia de Tch. Avraam kon su ijos Tchelebi Moche i Refaelatche          1873

jo le kije en este tiempo por ke mi meraran tambien para ke mi lo podieran sanar esto, los medikos de Viena, ke ejos ke ja mi lo vieron foe ke si tenija el menester de una tchika operasion, i jo kontentandome por esto, kedimos de akordo por ala maniana, ke ivan a venir en kaza los medikos por azomo [azeme] la operasion, ma ala maniana seja por ke mi espante or seja ke non kije, foe ke de madruga jo mi foe de kaza, i sin ke dinguno mi viera, ke foe komo foirme, i koando ja foe 8 la ora demaniana, ejos los medikos ke ja vinieron, i ke non mi toparon en kaza, i ke seja mi mujer M. Beju komo tambien i toda la djente de la kaza ke lo kerijan ke mi lo kortaran por ke era pirikolo komo kedava para mas tadre foe ke los medikos si foeron atras i lis enkomendaron por ke vinieran de moevo ala maniana ke ejos ja mi ivan a serar la poerta de la kamareta ande jo mi etchava para ke non mi podiera salir, i ansi foe i ke lo izieron i sin ke lo supiera jo, i de mizmo ke jo lo kiji torna azerle ala maniana foe ke non lo pudo porke ejos ja si levantaron mas antes de mi i non mi avrieron la poerta, i ansi foe ke los medikos en la ora fiksada ja vinieron, i mi izieron entero desnudar demis vistidos i mi etcharon en una kama, i mi dieron una tovaja para ke foera apretando kon los dientes ke era para ke non sintiera dinguna dolor i jo ke li ize de ir machkando la tovaja, ejos mi izieron la operasion en un enterval de 5 puntos i kon ratchar en el deredor de la karne kresia kon sus bien ezmolados kotchijos, mi ketaron la karne kresida ke estava la kantedad ke si via por afoera este karar era ke i estava kresido i para arientro, i era

1978           Biografia de Tch. Avraam kon su ijos Tchelebi Moche i Refaelatche          1873

la kantedad de un amario de goevo koando esta kotcho, i jo non mi konsinte kaje de el entodo dolor, i ejos denpoes ke ja mi izieron la operasion mi ataron las venas ke kortaron i me ivan kurando solo ke mas muntcha dolor la tuve koando mi dezataron las vetas de las venas i jo ke estuve kurandome 12 dijas en kaza kon ke vinija el mediko en kada dija i el era ke mi kurava i denpoes ja mi paso i enpese a kamenar ke fin ke vino a Samokov era ke estava kon un bastaon por ke algo ainda me dolija i denpoes mi paso i mas fin a este tiempo ke esto eskriviendo la dita non tuvo mas nada, i esta karne la mete en una redoma de vidro kon echpirt, i la tuve muntchos anios goadrada, i la paga ke pagi a el operator foe 10 florinos i a el mediko ke mi vinia por kurar era a 1 florin por vijita i algunos mas de gastes ke uvieron por las kuras lo todo foeron 50 florinos de gaste, i mientres de este tiempo ke jo estava etchado en la kama era ke Beju kon rachel seja en los dijas komo i tambien i en las notches era ke las mandava por ke ejas kamenaran en lo mas de los lugares ke eran de versen en Viena i en mizmo tiempo ejas era i ke si ivan merkardosen las modas de los vistidos, i otras kozas de estas ke non avijan aen Samokov, lo todo ke jo non estava hazino solo ke mi kalia ke non kamenara, por mas presto sanarme, i koando ja mi sani i ke ja podija kamenar era ke kamenavamos todos djuntos, i ke ivamos a la exposision ke foe en este anio la exposision universal en Viena i ke avija mui muntcha djente, i tambien arazon de esto uvieron muntchos modos de artifisios de sus manera ke ivamos en todos i lo todo mui barato las entradas.

1979           Biografia de Tch. Avraam kon su ijos Tchelebi Moche i Refaelatche          1873

ansi de mizmo era i kon las komanias i los hoteles i en general en todo modo de koza i mas barato de antes, ansi era i ke ivamos muntcho i alos tiatros kaje en todos, sigun ditcho ke era mui barato, ansi foe ke estuvimos mui kontentes de todos los puntos i por moneda ke ja tenija la kacha avierta ande el sr. Math Ruso ke el koal era moestro komisioner, i tenijamos en el muntchas miles de turas de sahtijan i muntchas okas de lanas por ke las vindiera por moestro konto era ke tomava la suma ke la kerija i merko aparte por todos muntchos presentes, i platas komo kutcharas pirones tablas i mas ansi kozas i aparte servizes de tchinis i vidros de los boenos i muntchos raidelis^[67] i mobilias i merko tambien i un ermozo paiten por 1500 fr, i los kuchumes^[68] por los kavajos ke kon el mos venimos de Vidin fin Samokov i la suma de gaste ke izo en este vijaje ke mos turo komo 3 mezes, foe de 450 lira komo 10,000 fr. i koando ja partimos de Viena era ke avija ta hazinura de la kolera i a esta razon ke mitieron karantina por la tuna foe ke non podimos abachar a Lom i ke por tiera non avija foe ke mozotros mos foemos por la serbija i mos abachimos en el timok, serka de Vidin i mos vinimos por tera a Vidin ke ja tenijamos por kovrar de ta kacha de Vidin una havale de 80,000 fr, i jo ke estuve kamenando por kovrarla 5 dijas i arazon de non estar el Pacha en vidin ke era aziz pacha por este ke ja lo tengo eskrito ke lo trucho Tch. jeuda a Samokov para ke bozdejara el kontrato ke tenijan kon los maadendjis en Samokov, i foe ke si la vende a Sr. Jumich Chemoel Pinhas por 3 31 dija i mozotros estuvimos musafir en la

1980           Biografia de Tch. Avraam kon su ijos Tchelebi Moche i Refaelatche          1873

kaza de Sr. Chemoel Kapon ke mos izo mui grande onor i era en Roch Achana, i denpoes partimos por tiera a lom i de Lom ke ja mos esperavan moestros kavajos de Samokov mos vinimos vija Sofia a Samokov en Erev Kipur vinimos mui sanos i boemos, i mui kontentes,

Kon el Tchifte Maaden ke lo tenijamos de antes el un tersio, i ke si merava ande el Sr. Behoratche, i siendo ke ivamos i tiniendo algunas deferensias, foe en este anio ke molo apartimos i molo lavoravamos mozotros aparte kon ke mos fragoimos las kimuranas i los otros depositos menesterozos, i kon las vignas mos kajo a mozotros la una vigna en las birzas, ke era serka de el kazal de kalkovo i en este mizmo anio fragoimos una vila en 2 etajes ke salio mui ermoza i ke tenija mui larga vista, i de una klima mui sana i la mobelimos de todos los menesteres, ke era en esta vila ke se iva el Sr. Refaelatche, i se estava kon semanas i en eja si gasto komo 5000 fr.

Kon las opersiones ke las azijamos en la butika eran de mizmo kon merkar las Havales de Kostan, para kovrarlas de las kachas de Sofia i de Rustchuk i de otras sigun ke ja lo tengo eskrito i las sumas ke ja eran kon miles de liras ansi eran tambien i las ganansias, i tambien las operasiones de la borsa de merkar i vender los fondos turkos ke era i esto tambien grande negosio, i en el tiempo ke si vindijan los hachares seja de los trigos komo i estos de el Sumun ke es los fieros, siempre era tambien i ke merakavamos, i kon el lavoro de los maadenes ke ja davamos grandes foersas era i ke merkavamos de los otros maadendjis fieros prontos entregados en

1981           Biografia de Tch. Avraam kon su ijos Tchelebi Moche i Refaelatche.         1873

Pazardjik kon i de 10 a 15 gr. menos de el presio de la plasa ke si vindijan la semana de antes, i la moneda ke davamos kon entereso era lo mas muntcho en este tiempo alos maadendjis, i de lo todo ke siempre ja estava en mui regla kamenando i kon muntchas ganansias, era ansi ke estavamos siempre gustozos i alegres, i kontentandomos de todos los plazeres, i lo todo era tambien i kon la mano muntcho antcha ke los gastes eran tambien i mui grandes i eramos sirvidos de muntchos meses, ke tenijamos 2 mosos krestijanos para el dichari avli i un arabadji por el karo de los boejes, un turko armado ke mas goadrava las notches ke si jamava Zulfikiar aga, un molla por el etcho de los maadenes i komandir de el dichari avli, un moso Djidio por los sirvisios de la kaza, una gizandera, i 2 mosas por kaza, i un moso por la butika, i era lo todo kada uno ke si lavorava su mision sin ke si lo etchavan de el uno a el otro,

Anio 5634; Moestra Sra Madre ke non tenija viajado fin a este tiempo en dingun lugar seja de la evropa komo i tambien i a Kostan foe ke en este anio eja si kijo ir a Kostan, i ansi foe ke si foeron kon mi Sr. padre i el ijo tchiko Nuriel djuntos por vija de Pazardjik a Kostan, ke esto foe solo por azer un vijaje de plazer, i ejos estuvieron en este vijaje komo a 2 mezas, ke li foe mui plaziante, i ejos era ke en kada dija se ivan djuntos en todas las kampanias i los pasatiempos ke avijan en kostan, i ejos foeron siempre konbedados en

1982           Biografia de Tch. Avraam kon su ijos Tchelebi Moche i Refaelatche.         1874

muntchas kazas de los amigos ke lis azijan daavetis, seja en las, notches komo i tambien i en los dijas, ejos lis dechavan en las kazas muntchos prezentes en moneda para los servidores, i tambien ejos si merkaron para ejos de las modas de los vistidos ke si jevavan en Kostan, ansi tambien ke en akel tiempo era ke i merkavan non solo para ejos otro i ke por sus ijos noeras, inietos i por todos los mas parientes, ke esto ja era komo un uvligo, koando Tch. Avraam iva en las bankas por su etcho ke lo tenija kon Sr. Kamondo i Sr. Naimatche i Sr. Chemoel H. B. Nisim Co. era de mizmo ke se ivan djuntos kon mi Sra Madre ke esto non era la moda ala turka ma eja lo kerija por ver sigun ke si azijan estos enkontros sigun ja lo saven ke era mui kurioza i en todas estas bankas eran resividos kon muntcha onor ilos davan Kahves i cherupes arazon de eja i en este tiempo el merko una suma de 200,000 fr. de havales por las kachas de Sofia i Rustchuk i de Vidin ke las merko por tiempos a pagar kon unos presios konvenivles ke foeron sovre a 108 gr. la lira, i esto mas antes si merkavan sovre 105-106 gr. i aki se negosijavan por, 103 gr. i era un etcho mui siguro i tambien i boeno ganansiozo, i gustoso, aparte el ivan i en la borsa ke merkava i vendija de los fondos turkos ke non djugavan los presios a muntcho i esto era komo non topava el presio en el un dija ja era ke las tomava i las detinija en la kacha fin ke topava su presio, foe en este tiempo ke el estuvo en kostan ke alkanso a saver la echpekulasio ke avija en estos fondos de trokar en kada 3 mezes, las konsolites por unos siertos motones, ke se pagavan de mizmo

1983           Biografia de Tch. Avraam kon su ijos Tchelebi Moche i Refaelatche.         1874

los kopones en kada 6 mezes i el presio de estos ultimos era igoal a el presio de la konsolite kalkulando siempre sovre el konto de el entereso, solo era ke de la konsolite si pagavan los kopones en el mez de marso i septembre i de los motones si pagava en junio i en Dekemvro, es ke en kada 3 mezes se kovrava sigun ditcho sin ke trokavan los presios arazon de el kopon i mi Sr. Padre azija trokar en kada 3 mezes las konsolites por motones i kovrava el kopon i alos i otros 3 mezes el de mizmo trokava los motones por konsolites i vinia a ser ke en kada 3 mezes el kovrava kopon komo de 6 mezes i esto lo foemos kontinoando longo tiempo ke avijan muntchos ke non la savijan esta koenta i mas tadre ke ja alkansaron a saver kaje todos ja foe ke mas ja non uvo konto porke ja si negosijava komo el kopon menos, ansi era i ke de esto tambien eran las ganansias boenas i godras ke ja eran las operasiones kon sumas grandes, ejos ke ja estuvieron en kostan i ke ja non avija mas ande ir foe ke si vinieron a Enderne i se abacharon en la kaza de Tch. Chemoel el Butchuk, i estuvieron en enderne 5 dijas i todos seja los ombres amigos i la mujeres era ke los vijitavan siempre i eja ke si komportava mas galante era i ke lis iva a boltarlo vijita i en la entrada las dizija bon jour i ala salida adio, i esto ke non emplejavan en Enderne, era las mujeres ke si dezijan de la una ala otra i alavandola ke savija avlar en Franses i dezijan estach viendo el ermozo Bon jour i el adio ke mos esta diziendomos ke mozotros non savemos nada, i denpoes ke ja estuvieron i en Enderne se vinieron a Samokov mui kontentes de sus vijaje i el

1984           Biografia de Tch. Avraam kon su ijos Tchelebi Moche i Refaelatche          1874

gaste ke lo izieron foe de komo a 6000 fr. solo por sus plazeres,

Koanto a los negosios de la butika era mozotros ke los eskapavamos por ke todo ja estava en boena regula kamenando, i no avija el menester, de estudios, solo era ke mos atagantava el djuzgo de la plana, ma i esto sigun eskrito mas antes ke ja si reglo,

En este anio foe ke si hazenio mi ija Rachel i tuvo el fiebre de tipoid, komo el tifos, i la hazinura foe ke la tuvo en el meojo, ke sufrio komo a 4 mezes mientres de este tiempo eja tuvo ke non avlo 20 dijas, a eja li kaeron todos los kavejos de la kavesa i denpoes ke eja ja estuvo 2 mezes sin ke si savija de si foe ke li salio una postema en la kavesa adetras de la oreja, i li estuvo koriendolo materija 2 mezes i kon esto foe ke levanto kavesa, eja en su estar etchada era ke siempre estava meneando la kavesa de el un kochin a el otro i esto sin avlar, ke koando ja enpeso a estar boena era muntchos males por las komidas ke lo kerija siempre estar komiendo i esto las komidas ke non meresijan para eja i siempre estava jorando i pelejando por las komidas ke eja kerija poka karne i muntcho hamendulse, ma ja era ke kon pasensija lo somportavamos lo todo fin ke si sano i denpoes era vergonsoza de las etchas ke mos azija, i por poder remeterse boena li turo i otros 3 mezes i estuvo komo de antes, mui sana i mui boena, i sin pelejar, i el mediko ke la merava era Sr. Andonake unterberg, ke vinija 2 i 3 vezes a el dija,

1985           Biografia de Tch. Avraam kon su ijos Tchelebi Moche i Refaelatche          1875

En este de 5635, ke ja foeron 5 anios, ke lavorimos, en los etchos de la butika sigun ditcho ke eramos Haverim todos los 3 mos mirimos un konto i mos izimos un bilanso, ke mos topimos mui kontentes de las operasiones ke las izimos, i por el avenir el lo kijo, de non estar mas komo Haver, otro ke el lo kijo repozar, i lo i izo, ke el si aparto los mulkes i los maadenis, i se asento en kaza i era el ke merava kon el molla rl [al] rijo de los mulkes i tambien los maadenis, kon ke su fortuna ke la tenija en la butika foe ke si la travo en dechando, una kantedad de esto de 2 vezes mas muntcho de loke mozotros enpatronavamos, ke i esto ja era una suma bastante i por poder lavarar, ke sovre esto izimos kontratos moevos, ma non foe tanto ke estovimos mozotros kontentes, i non li avlimos nada, i el si asento en kaza i merava el etcho de los maadenis i esto de los mulkes i foe ansi kamenando un sierto tiempo, el non travo mas moneda de la butika por el idare de los maadenis i iva dando de su moneda, ke el ja la tenija, i mozotros era ke de todas las operasiones ke i las azijamos de mas antes era de mizmo ke las kontinoavamos, solo ke el venija mui poko ala butika i demandava komo era ke estavan endo los etchos i mozotros ja era ke de lo todo li raportijavamos, siempre i por muntchas kozas era siempre a el ke li demandavamos i el ja mos dizija de la manera ke mos devijamos de komportar i el tambien si venija para reglarlo, los gastes de la kaza era todos el ke los gastava kijendo dizir estos de el mantinimiento, ke tambien non eran pokos el en su estar en la kanselaria de kaza, era ke merkava karneros i

1986           Biografia de Tch. Avraam kon su ijos Tchelebi Moche i Refaelatche          1875

engodrava sevates^[69], vakas, i las vendija alos merkaderes ke ja venijan de la parte de la trakia, ke esto lo azija lo todo kon Haverim, ke de esto las ganansias non eran grandes solo ke lo tenija por una hairli, etcho, koando non era el menester de salir ala butika el no salija, otro ke en los dijas de viernes ke si iva a vijitar en los konakes era i ke entrava ala butika i si estava komo unas 2 oras ke ja lo vinijan djente por pasar la ora, ma a el li plazija estarse mas muntcho solo en kaza ke ja topava en koalo englenejarse,

A razon de los Madenes ke ja los tenijamos foe ke el li tomo a kira i el maaden de el pacha ke era en Sesrima, i su prekura era un sierto turko Hafiz Aga ke li merava los etchos a los mulkes ke tenija en Samokov el Usref Pacha, i le izo la reparasion menesteroza, i lo lavoro sigun de los otros, i para ke merara el etcho mijor lo tomo por Molla a un sierto Konali Mehmet Efende ke era mui akurat para el etcho i tambien ke era i mui entelejente, sovre todo ke i lo konosija este etcho, i el lo merava lo todo adetras de los ke komandes de Tch. Avraam kon el etcho de la plana anke ke estavamos en djuzgo el tope a un sierto arnaut Hurchid AA, ke era djelep i merkaron en Hevra 750 karneros i 200 vakas por javarles a Kostan i por engodrarlos el los mando a el pasto de la plana ke era boena, i por esto foe ke los kazalinos non avlavan nada, i denpoes ke ja si engodraron los mando a Kostan kon el ditcho Hurchid Aga, ma el koal foe ke en los kontos amostro, ke el devija a otros 28000 gr. i siendo ke lo apretaron lo izo ke los pago de estas paras i a mozos mas non mosi

1987           Biografia de Tch. Avraam kon su ijos Tchelebi Moche i Refaelatche          1875

aparisio fin a este dija,

Su program ke lo izo en este tiempo para pasar el dia foe, ke las manianas el non si levantava demaniana, i era ke bevija en kaza antes de vistirse, 2 kahves ke li turava komo a una ora, i denpoes el dizija la Tefila ke si metija 2 pares de Tefilim, i esto tambien li turava media ora, i denpoes dezajunava, i denpoes meldava el Hok le Jsrael kon ke i lo estudiava, seja la Peracha komo i la Gemara i mas los otros pedasos ke kontenijan en kada dija, i denpoes se vistija i se iva en la kanselaria ke la tenija en el dichari avli i el molla Mehmed Efendi li raportejava los avizos ke vinijan seja de las vignas i tambien i de los Maadenis i otros, de las operasiones de el dija i el akejo ke era de tomarse en nota en sus livros lo eskrivija i le dava les komandos de la manera ke se devijan komportar por todo esto ke lo demandavan, i en este tiempo ja era ke i li vinijan sus amigos seja turkos komo i djidios por pasar la ora i estava kon ejos pasando fin a un sierto tiempo, i en vezes ja era i ke li ivamos i mozotros por algunas demandas, i si es ke era el menester era i ke vinija ala butika, i koando ja era la medio dija, si venija en kaza i komija i denpoes ke bivija el kahvo era i ke dormija komo una ora, i de moevo se iva ala kanselaria, ke siempre era ke ja tenija en koalo enbeveserse, i por las tadres se iva por las vignas, ke en vezes kon paiton i en vezes kon kavajo, i komo li tomava la tadrada era ke i se estava por durmir en alguna de las vignas ke lo mas muntcho era en la vigna de Dragochin, i se iva i mi Sra madre tambien

1988           Biografia de Tch. Avraam kon su ijos Tchelebi Moche i Refaelatche.         1875

i en vezes i mozotros, i ansi lo azija, en vezes ke i se iva i alos Maadenes seja en Tchifte komo i en Kiostandja, i se estava kon semanas, en las tadres el bivija komo a 100 gramos de raki, kon sus mezes el vino non lo bivija i esto mas tadre lo abandono, ke li traiva kaentura, i en este anio a el li vino la maladija de el diare, i era ke 5-6 vezes a el dija salija de el poerpo ke esto li foe traendole grande flakeza, i los medikos li defendieron de bever este poko de raki ke i mas tadre li defendieron tambien i ke non beva ni el kahve i kon el muntcho peiris dieta ke el la goadrava, era ke ja li pasava ma koando el ke ja si vija mijor i ke komija alguna koza ja era ke avista li boltava el tutun lo fumava mas muntcho i en Chabad ke non lo fumava, era ke en el dija de alhad, si azija hazino, ma siento ke su natura ja era sana i boena era ke ja lo somportava,

El ke si jevava kontos, de todas las operasiones ke las azija partikolar en kaza, foe ke le si izo un bilanso seja de las ganansias komo i los gastos, i lo topo ke en este anio el gano en los maadenes 18,000 fr. i en los suvates 3000 fr. i kon los revenidos de los mulkes el tapo los gastes de kaza, ke foeron 12000 fr. aparte de los mosos i de kanselaria i estos de el dichari avli ke entravan en el konto de konak masraf, en konto de los maadenes, i el ke ja estuvo gustozo de esto en un dija se vino ala butika ande mozotros i molo estuvo amostrando, ke i mozotros tambien mos gostimos ke non foe en baldes esta kanselaria de kaza,

Mozotros ke estavamos en la butika era ke kontinoavamos

1989           Biografia de Tch. Avraam kon su ijos Tchelebi Moche i Refaelatche          1875

de mizmo en todas moestras operasiones de mas antes, i en este anio merkimos el sumun diezmo de los fieres kon Sr. Chemoel Farhe en Hevra, i era ke mozotros lo enkamenavamos kon ke ja tenijamos tambien i paga aparte sovre esto, ke uvieron boenas ganansias, i tambien foe i ke merkimos los sahtijanes de Samokov, i Tchirpan i de Selvi ke eran una suma komo de 4000 turas, i la una tura kontenija 10 koeros, ke i pezavan 6 okas, i es ke la una tura tenija una valor de 45 fr. i lo todo era ke si mandavan en Viena por vendersen, aparte tovimos tambien i en Dubnisa los Hachares de 5 kazales, ke en Samokov eran muntcho los konkorentes, mozotros merkimos en este anio en Seres por una prova 20,000 kilos de algudon krudo, i lo mandimos a Viena por venderlo por moestro konto ma kale dizin ke los gastes foeron mas grandes ansi foe ke i las ganansias foeron mui tchikas, mozotros en este tiempo en lugar de merkar havales sigun de antes, foe ke dimos mas grande foersa en merkar ordenes por los komertchos de Sofia i de Filibe, i esto en Kostan ke era kon telegrafo ke davan los ordenes por ke mos entregaran la suma de midjidies ke lo kerijamos ke esto si enbolsavan en muntcho en un enterval de 15 dijas i se ganava de 1 1/5 a 2%, ke para esto non tenijamos el menester de los personales ke ja era propio mozotros ke las kovravamos, i los trokavamos por el oro i se remetija a Kostan, lo mas muntcho kon la pochta en grupos por ke non avijan polisas komo agora,

Los moestros gastes ke gastavamos partikular por mozotros non sovijan a mas muntcho de 1000 fr. a el anio por ke era solo

1990           Biografia de Tch. Avraam kon su ijos Tchelebi Moche i Refaelatche          1875

por un vistir i non avija ande gastar seja en las biririjas or tiatres i kavanes ke non avijan i en kavanes non era onor ke foeramos i en kaza ke ja avija todo era solo de kaza ala butika i de la butika a kaza i alas kampanias, ke non kostava nada,

En el mez de Sivan de este anio ke estuvo en Samokov el Sr. Avraam Arié de Vidin, ke vino por regalarse ande los parientes de Samokov por ke estava algo mizeravle, de su pozision, i komo pariente foe ke mi Sr. Padre lo jamo en su kaza komo su mosafir i ke si estuviera en todo el tiempo ke iva a estar en Samokov, i foe ke en la primera notche ke el vino en kaza i ke estavamos todos asentados en los ajates de el salon de en premer etaje, i biviendo un poko de raki ke ansi era el uzo, i estavamos avlando i platekando sovre las vidas de Vidin, foe ke Nuriel el ijo tchiko, ke era komo de edad de 14 anios, kijo ir a el sirvisio, i el, ke si tomo la kandela porke ja era de notche komo una la ora ala turka, i non paso komo unos koantos puntos ke el ja greto, jamando kon dizir ke mi esto kemando i mozotros todos ke sintimos ansi gritar ja foe ke kerimos en su ajuda i lo topimos ke la kamiza la tenija en una flama, ke foe ke si li afero de la kandela, i jo tchelebi ke li aferi la kamisa en siendo en las flamas, por amatarla, ke ja reuchi anke de mi se kemaron todas las 2 manos ke mi saltaron fuchkas, i ke las kemaduras de Nuriel ke ja foeron kaje nada, todos mos gustimos, ma el ijo ja si espanto, i presto ke ja vino i el mediko, i mozotros ke ja li ivamos avlando i enkorajandolo kon i amostrarle sus kemaduras ke no eran nada, lo todo

1991           Biografia de Tch. Avraam kon su ijos Tchelebi Moche i Refaelatche          1875

foe en baldes ke el ja lo tuvo el grande espanto, ke non manko de darle todas las ajudas menesterozas seja de los, medikos komo i de las mujeres viejas, i el ke era sano i godro i boeno foe ke kaje en kama, i era ke se iva aboltandose komo a un baril, mientres 3 dijas sin ke nada avlava ni menos ke por nada si akechava, i al treser dia ke el si porgo foe su soziedad vedre i los medikos lo konstataron ke si li patleo la fiel i en este mizmo dija el murio, ke era en dija de lunes 15 sivan, de este anio de 5635, ke ja si kere entendido la manzija ke foe para toda la Familia non kere ditcho por su padre i madre, ke para eja mas de este dija non tuvo dija klaro, i muntchos mezes lo joravan sin konortar, i de esto foe ke li vino a su madre el diario kon irse siempre apokandose, i Tch. Avraam su padre era ke muntchas vezes le dicho, ke non li paresija por ser ke Nuriel signefika kandela era ke i se iva a kemar de la kandela, i tambien i ke es i nombre de MALAH es a dizir ke estas kozas mos enbezan tambien por meter nombres a sus ijos ke kale melden beografias, i ke sepan tambien los nombres ke si nombravan sus padres i parientes, i tambien i kalkular la segnifikasion de el nombre, i ansi nombrara sus ijos, anke ke algunos non dan el kredito.

En el anio de 5636, ke mi Sra. Madre sigun ditcho, ke era tanto ansiada de la moerte de su ijo, Nuriel era ke mas non kijo salir de kaza i non iva en dinguna de las kampanias por ke boltara

1992           Biografia de Tch. Avraam kon su ijos Tchelebi Moche i Refaelatche.         1876

i tambien ke ulvedara, i visto ke non kerija ir mas i ke esto se kerija foe ke mi Sr. Padre meroko [merko] en la Banja de Kiostandja una kaza ke servija por kaza de kampania en estos banios ke ja ivan muntcha djente por azersen banios ke eran minerales, i por ke si iziera tambien banios i ke pasara algo de tiempo por el enverano i la merko de un sierto Hadji Osman ke era mui ermoza i de kampo mui grande kon ke i tenija muntchas arvoleras i goertas i sus foentes, i apenas ja foe ke si foe akompaniada de mujeres ke ja eran de estas ke eja pasava kon ejas i estuvo unos koantos dijas ma non pudo estar mas i se vino torna a Samokov, i siendo ke iva i estando algo i hazina lo kijo de irse a Pazardjik, kon la entision de ver a sus parientes ke eran los Panijeles por ke su madre era de la Familia de Panijel de Pazardjik i eja ke partjo akompanijada de su ijo Sr. Refaelatche, estuvieron en la kaza de Sr. Avraam B. Binjamin (edibaa) i en este vijaje eja si topo a sus parientes, i en unos koantos dijas ke eja estuvo en Pazardjik foe ke estuvo mui boena ma siendo ke las reboeltas de los komitos se espandieron muntcho ke en fafuna i Belisa avijan kemado bivos en un Chich a 2 djandares, i en el kazal de Kiz-Kiovi ke si solevantaron i ke ivan kemando algunos kiopris, foe ke li kalio i ejos ke si vinieron i ejos ke partieron kon el moestro paiton ke los kavajos eran mui foertes i enbezados ke ejos sin kedar en dingun kazal i ke pasaron por Kiz-Kiovi, ja vieron muntcha djente krestijanos rekojidos en las mejanas ke estavan boratchijando i kantando, ma non savijan el mal ke ejos lo izieron i ejos foertemente ke pasaron foe ke los unos

1993           Biografia de Tch. Avraam kon su ijos Tchelebi Moche i Refaelatche.         1876

de estos krestijanos lis korieron a detras anke ke non los podijan alkansar, ma ejos ivan koriendo kon la entesion ke en el kiopri de el dere de Sesrima, ke kore el rio la Marisa, i este kiopre ande ke lo ivan a pasar, ke era ke lo avijan en akel mizmo dija kemado i ke era un estretcho ande non si podija pasarlo por la agoa ke aparte ke era mui ondo era i tambien aundado, ma el seiz ke era Georgi, un mui bravo kotchijatch^[70], i astriviendose tambien i alos kavajos sin muntcho pensar i ke ja los tenijan a los enimigos mui serka ejos si enkacharon en la marisa i los kavajos mui fursudos i nadaron foe ke lo pasaron el rio, solo ke ronpieron el hok,^[71] i los presegidores viedo esto restaron de la otra parte de la marisa solo ke dezbarkaron unos koantos plomos por ke ejos non podijan pasarlo, ke ja si kere entendido ke ja tuvieron algo de espanto, ma siendo ke la energija ja la tenijamos mui grande i ke moestra familia nunka non si espantava de dinguno ke non kere ditcho de krestijanos, i ejos ke vinieron en los hanes de Gabrovo ke ja tenijamos i mozotros un han foe ke ejos lo trokaron el Hok, i mui presto ja si vinieron a Samokov, si[n] dingun espanto, (kon 4 dijas mas antes de este paso era ke jo ke estava en Filibe, me vine a Samokov ke estava akompaniado de moestro satidji, Molla Jonuz, i eramos a kavajos viajando, i koando pasimos por este mizmo kiopri ke lo kemaron era ke avija asentado un sierto krestijano ke era sakat, i kon un Nei tchuflet iva kantando i jo ke lo vide mi abachi de el kavajo i li di un juzluk^[72] de prezente, i el koal mi se enkorvo por darme las grasias, i mozotros kontinuimos muestro kamino

1994           Biografia de Tch. Avraam kon su ijos Tchelebi Moche i Refaelatche          1876

i denpoes ke ja akontesio este eskrito en mi Sra Madre kon Sr. Refaelatche era ke el ditcho molla Jonuz, si lo konto a Mi Sr padre esta Sedaka ke jo la di en este Kiopri i a el de loke si gusto li i saltaron las lagrimas, i esto lo kontava a muntcha djente i tambien era ke i ami mi dizija ansi (Tchelebi Efendin juzlugi no verdin ofukara adama dir ne dovasi okundi) la tefila se resivio de akel provo ke li dates las 100 paras, por ke en akel tiempo lo mas muntcho ke si dava a ansi proves era de 20 paras,

En este tiempo ke si estava vindiendose el medio Maaden en Raduil foe ke mi Sr. Padre lo merko i denpoes ke supo Sr. Mochonatche su sovrino si lo demando por ke si lo diera a el ke ejos ja tenijan i otro maaden en radoil i por non refuzarle foe ke si lo konvinieron i se lo vendjo a ejos, i pasando por poko tiempo ke si vendjo tambien i el maaden en Sesrimo, ke era el jokari maaden foe ke lo merko mi Sr. padre, kon 3 vignas ke eran la una en kalkovo i la segunda en Mahale-jovan i la tresera en el kampo de rudech, komo 2 kilometros lechos de la sevdad, ke esta ultima tenija una ermoza i grande vila, fraguada en 2 etajes, i de un mui grande kampo i rodejado de paderes, i en este kampo de esta vigna avija un monturo de piedras i en el koal era ke avija nido de kolevras i las vijames koando si atripavan por las paderes i se ivan alos kampos ma a mozotro ke kamenavamos por todos estos lugares non moz azijan nada i koando mos vijan ejas se eskondijan en sus nidos, i denpoes ke ja se enpatrono kon los dokumentos menesterozos les izo las primeras reparasiones

1995           Biografia de Tch. Avraam kon su ijos Tchelebi Moche i Refaelatche          1876

seja en las vignas komo i tambien i en el maaden, i enpeso en el lavoro, i foe ke en este mizmo anio tuvo kaje de ganansia la metad de loke li kosto el maaden kon las vignas, i denpoes de este el enpeso i en la reparasion de la vila de la vigna de Golka, ke era serka de la sevdad i se iva el en kada tadre lo mas muntcho a pie por kamenarse i esto ke ja lo izo presto el la mobelio komo propio en su kaza, ke kontenija la vila de 4 kamaretas en el primer etaje i 4 en el sigundo etaje kon un salon de ajates ke meravan lo todo por los 4 partes de los kampos i de la sevdad el tenija muntchos durbines ke merava por todos los kaminos i las otras vignas i tambien en la sevdad, i koando ja estuvo de todos los puntos pronta era ke se iva kon sus akranes en kada tadre ke lo mas muntchos se lo jevava a. H. Menahem Matatija, ke el koal era grande avlador i tambien li kontava kozas de la Gresia por ke el foe foido de Janina, sin saver por koala razon i era solo ke si iva por ke mi Sra Madre mas non kijo salir a dingun lugar i ke siempre ja estava endo kada dija mas flaka, era ke eja si jamava en kaza a mujeres i pasavan los dijas de mizmo en kontar de las vidas viejas, ke lo mas muntcho era ke kon la Bu Bulisu de H. Elijatchuno ke lo pasava mas muntcho i kon eja estuvo fin a el punto ke murio, i era tambien ke a todas las regalava kon todo esto ke lo podija en kada dija, i ansi ke foe endo algo de tiempo siempre sin foersa foe ke li kalio ke si etchara en kama, i esto era de mizmo ke se iva siempre aflakandose, anke le los medikos le vinijan unas 2 vezes a el dia ma nada non li ajudavan, fin ke arivo la madrugada de

1996           Biografia de Tch. Avraam kon su ijos Tchelebi Moche i Refaelatche          1876

viernes 8 Nisan, de este anio 5636, ke la vijito la salud komo dizen las mujeres, i eja si levanto sola de la kama i se asento en el minder, dando las loores a el alto Dio, ke gaire ja si topa sana i boena, i mozotros kon todos los de kaza, jenos de la alegrija asentados deredor de eja, avlando i platekando por todos los avenires boenos, i eja mos komando ke dieramos una suma mas grande de Sedaka alos menesterozos, ke i foe al punto espartida, i denpoes ke eja ja estava mui boena asentada en el minder, i ke ja estuvo komo 2-3 oras, li vino komo un esfoenio, i kijo etcharse por durmir un poko, ke esto lo izo i se etcho en la kama i se durmio al punto, i este esfoenio foe para mas nunka espertarse, i sus veladeras ke la vieron sin mas ke resperava foe ke presto ja mos jamaron, i todas las mizuras ke si tomaron todas foeron sin dingun provetcho ke si vido de koando se etcho ke eja ja estuvo moerta, i ke non la vieron de el presipio, i todos mozotros matandomos por esto ke la dechimos de moevo etcharla i ansi foe ke el mal foe mui grande sin ulvedarnos muntchos anio, i siempre jorandola ke todos los dijas de su vida foeron 51 anio, i mozotros sus ijos i ijas foemos mui longo tiempo mui amsijado i mui deskorajados i siempre mos estavamos solos sin kerer ser akompanijados de dinguno otro, i mas tadre ke moestro Sr. Padre viendamos ansi era ke mos konortava i mos akonsejava, i ke devemos de tomarlo el mal kon grande pasensia, i kon los etchos ke devemos de kontinoar, ke los bivos kale bivan kon los bivos, i mozotros era ke en kada dija seja en las Tefilod de las manianas komo i de las tadres era ke siempre las dezijamos en el Kaal kon minjan, i le desijamos el kadich, i mos asentavamos en el avel en el anio entero, i siempre era ke i la vejitavamos

1997           Biografia de Tch. Avraam kon su ijos Tchelebi Moche i Refaelatche          1876

en el Bed akevarod i mos ivamos kon los Hahamim i meldavamos i joravamos i davamos Sedaka i mos venijamos en kaza sin ir mas ala botika ke ja era ke ivamos lo mas muntcho en las tadres,

Moestros negosios en este anifoeron mas flakos seja por esto de la moerta de moestra Sra madre i seja tambien i por ke la gera en la serbija ja estava mui foerte, solo ke algo de sahtejanes tambien los merkimos, i algo de las havales tambien lo todo de estas de el komertcho, i tambien ke si estava i fragoando el Chamen de fer de Belova a Sofia, era i ke davamos moneda kon entereso alos podratchikis, i kon las operasiones ke las azijamos en la borsa foeron en este anio kon danios ke tovimos bastante de piedritas visto ke djugava mui muntcho, los presios, i kon los maadenes era mui boeno ke si demandava muntcho en todos los lugares el fiero, i esto kon i sus boenos presios, ma lo todo era kon los espantos i siempre sovre mas rekojidos, i esto ja era todos ke lo azijan,

En este anio li nasio a Sr. Refaelatche un ijo, ke se izo i kon el sigun de todos los otros i el Sandak foe jo kon mi mujer M. Beju, i en este dija estuvieron kombedados la sevdad entera, ala meza de Elijau Anavi i lo jamaron Jshak (jzak)i su madre lo kreo i lo aletcho sigun de todos los otros,

En el anio de 5637 mi nasio ami un ijo ke foe en dija de Viernes 30 Ilul Erev Roch Achana, i se izo de mizmo sigun de todas

1998           Biografia de Tch. Avraam kon su ijos Tchelebi Moche i Refaelatche          1877

las otras paridas i lo jamimos Avraam-Johanan, i el Sandak foe Mi Sr. Padre kon mi ermana Mazalu, i foe krijado de su madre kon ke tuvimos tambien i una krejadera, ke si jamava M. Orutcha ija de H. Daniel, el sofer i mujer de Sr. Konorto Baruh i li pagavamos a 20 gr. a la semana, ke era eja kon su tchika krejatura se etchava en moestra kaza i el marido kon su ijo mas grande ke tenija, era ke los ivamos a mantenerlos mozotros, i durmejan en sus kasa, la razon de esta krejadera foe por ke su madre la M. Beju konstataron los medikos ke tenia la letche flaka, i por ke foera bien mantenido lo izimos ke foera a letchado de todas las 2 i esto por ke kon otras krejaturas ke parija i ke las aletchava solo su madre era ke koando ja eran algo mas grandes era ke se aflakavan mui muntcho i se murijan ke esto foe porke non eran artas i se morijan de ambre,

Foe en este anio sovre loke ja lo eskrivi por el etcho de la plana ke si nomeno la komision i ke la taksaron por 180000 gr. i de la manera ke foe ja le meldaron mas antes,

Kon la moerte de mi Sra madre ke lo eskrivi en los pasajes de el anio pasado, es yero, ke foe en este anyo.

Foe en este anyo ke se deklaro la gera Turka-Rusa por la Bulgariya, i kada uno era si avija muntcho enpesado a espantar, ma era ke en los etchos de venditas, de los fieros eran muntcho a el koriente, por razon de el trafeko de los soldados turkos ke ivan pasando de parte de la tuna seja por la Serbiya komo i tambien i por la Bulgaria, i de esto foe tambien ke pujaron mui muntcho los presios,

1999           Biografia de Tch. Avraam kon su ijos Tchelebi Moche i Refaelatche          1877

ke valija el un kantar 180 gr. i en este tiempo pujo a 360 gr. i era ke non estava i abastando, ke visto a esto foe ke si dyo muntcha foersa en el lavoro, i ja era ke si foeron vindiendo presto ma mas tadre uvo un kedamiento, i arazon de esto foe ke Sr. Behoratche lo mando a Sr. Mairutcho Alkalai, ande mi Sr. Padre por ke li demandara si era ke si lo kerija venderselo el tersio de el maaden de Tchifte ke lo teniyan, en Hevra, i se era ke si lo iva a vender ke li dichera solo koanto era loke iva a kerer de ganansiya, ke por el presio ke kostava ke el ja lo savija, i mi Sr. Padre ke mos demando amozotros foe ke li dichimos ke esto el ja save mas mijar ma kale tomar i en mano ke ja estava traendo una ganansia de 20 %, i ansi foe ke li dicho ke non lo vendiya, i esto kale dizir ke foe un yero, kijendo dizir ke entre los turkos si enpleyava muntcho la palavra, por koando el uno li demanda a merkarlo el At (kavayo) de el otro i ke ya^[73] es i muy bien savido, ke la alma de el turko es la arma i el At, el patron por ansi una demanda si sikileya mui muntcho, ma non li dize ke non si le vende, por razon ke tiene de akonteser algun malor, i eyos le dizen meter ojo, i se kere vendido, ke esto el ken lo kere atenar i komo si enterese ja lo va a topar ke es mui djusto, ke la verdad es ke non si kere demandado el bien de el otro, por ke non pozo el ayin arah, i es dar el topene a el Mazal, i se kere vindido,

En este anio mozotros merkimos Hachares en los kazal es de Samokov, ke la Beraha de este anio foe mui grande i esto akontesiya en 20 anios una vez, i a razon de esto foe ke non uvo ke

2000           Biografia de Tch. Avraam kon su ijos Tchelebi Moche i Refaelatche          1877

merkara i foe lo todo depozitado en los hambares i denpoes ke vino el Russo ke los levanto la mas grande partida i de esto mas tadre ke foe la razon ke la ambrura ke uvo ke suvyo el trigo a 3 i medyo gr, la oka i esto ke non dechavan i merkar a mas muntcho de a 20 okas por kaza ke avijan djandares en los pazares, i mozotros ke teniyamos un molino en Suli dervent, de 8 piedras foe en este anio ke li izimos una reparasion i ke tomavamos 12000 okas de kira, en el anio lo koal ke mas antes era de 5 a 6000 okas, i esto non lo pagavan en regla,

En el anyo de 5638, ke la gera ja foe mui foerte, i esto trucho un muy grande deskorajamiento, entre la djente, i foe ke i algunos ivan partiendo de Samokov, anke ke ya era en sikreto ma de los vizinos non lo podiyan enkuvrir, i sigun savido ke ya entra un espanto entre las familiyas, era ke de los turkos se ivan ande el kaymakam, kechandosen de esto ke a eyos los va a dechar ke las degoyen los Moskofes, i li ensistiyan por ke lis diera la posebelidad de mandarlos i eyos de Samokov, ke sovre esto el kaymakam ke se aderesava a el Mutesarif, foe ke li dyo foerte ordenes a ke non dechara salir a dinguno de la sivdad ni menos i ke diera a dinguno pasportos, ke esto para moestra familia, lis foe grande apreto, por ke era i eyos ke si estavan prontando por partir, ma eyos sigun ke ya lo saven ke la enfloensa era mui grande ke la teniyan, anke ke en estos diyas ke la djente estavan furtonozos eyos non partieron ma ya

2001           Biografia de Tch. Avraam kon su ijos Tchelebi Moche i Refaelatche          1878

foe ke si tomaron kada uno sus pasaportes i los detuvieron por el diya ke era el menester de partir, ke lo todo era en sikreto, i se los enpatronavan kada uno kon las razones ke los kandiryavan alos seya kaimakames komo i los motesarifes i esto ya lo tengo eskrito en unas koantas partidas de los pasajes de los otros miembros de las moestras familias,

En este tiempo ke estava el mundo tanto reboelto, i ke aviya i espanto, foe ke li vino a Sr. Refaelatche una grande kaentura sin ke los medikos lo podieron entender koalo era ke tenia i esto denpoes ke ya pasaron 2-3 diyas si li demostro ke foe saranpion ke iva a ketar, i kon esto ya foe ke repozimos un poko i sin tadrar foe ke si li tomaron todas las mizuras sovre esto i ja foe levyano ma el sufrio komo a 20 diyas de esto, i medio sanado el ya si levanto i kamenava kon las siniales de esto,

Era en la fiesta de Hanuka ke lo nasio a Sr. Refaelatche Una ija i la jamaron Simha, ke kon eja lo izieron ke la vijitaron los parientes ke estavan en Samokov por razon ke algunos ya aviyan partido, i su madre la aletcho i la kudio, sigun de todos los otros

Visto ke todos ya si estavan endo de Samokov, lo izimos ke a el presipio, apartimos algunas kozas de las mobilias de kaza komo kovres vidros i tchinis, i ansi mas algunas kozas ke non si podiyan bozdeyar en izbas i las metimos en el magazen sikreto ke lo teniyamos en kaza, i algunas otras kozas las enpakimos por goadrarlas en la vigna de golka i lo restan kaje lo mas muntcho de la mobilia

2002           Biografia de Tch. Avraam kon su ijos Tchelebi Moche i Refaelatche          1878

ke era komo espejos, oras, kanabes, siyas, mezas, duchemes, kelimes, i vestidos, samaras, i ansi mas todas las kozas las mas valutozas i ke eran todas serka moevas merkadas i de lo mas mijor ke podiya ser, i lo enpakimos lo todo en balas i kachas, ke era lo todo de notche ke las i vamos enpakandolas lo todo, en mui sikreto ke mos abachavamos en el magazen porke non mos veren ni ke mos sintiera dinguno i era lo todo solos mozotros ke lo ivamos lavorando, i esto foe en 36 grandes balas ke lo enpakimos, i lo mandimos lo todo kon el chemen de fer a Enderne a el Sr. Chemoel H. B. Nisim & Co. ke el koal las resivio i las metio en sus depozitos, i koanto a esto ke avijamos apartado por jevar en la vigna de golka ke tenija boenos magazenes ansi i esto de meterlo en el magazen sikreto de kaza foe ke mos repentimos i partida de esto tambien lo enpakimos i lo mandimos a Enderne i lo restan lo dechimos en kaza, ke esto todo kosto muntcho gaste de el transporto i foe ke lo mas de las espejos se rompieron i de las otras kozas koalas si ronpieron i koalas si bozdeyaron, de esto ke los ivan arondjandolos de el un lugar a el otro,

I koando ya foe kavo de el mez de Kizlev, ke Sr. Refaelatche ya estuvo sano i boeno i M. Buhurutcha ke ya aviya parido, dicho mi Sr. Padre ke partieramos jo, kon mi mujer M. Beyu i mis kreyaturas Rachel i Johanan, por Enderne, i mozotros sin tadrar mos prontimos i en una demaniana partimos kon yavarmos tambien i a Urutcha la kreyadera ke lo aletchava a Johanan, djunto kon su kreyatura, kon moestro paiton de kaza a 4 kavayos, i akompaniado de 2 turkos armados

2003           Biografia de Tch. Avraam kon su ijos Tchelebi Moche i Refaelatche          1878

a Saran Bei, la chtasion de el chemen de fer i mozotros dormimos en akeya notche en Saran Bei i ala maniana partimos por Enderne, i mos abachimos en la kaza, de Tch. Chemoel el Butchuk, anke ke non estavan eyos en Enderne, i dormimos 2 notches en sus kaza i denpoes mos tomimos una kaza a kira en la kaza de Tch. Jeudatche Alfasa, ke era enfrente de el kaal mayor, por una lira a el mez de kira, i esto kon la suya mobilia, ke mos pasimos en eya i estuvimos mui bien kontentes, i la M. Vidutcha noera de Sr. Elizerutcho Geron ke mos venia a vijitarmos por ke esta teniya estado poko tiempo mas antes en Samokov i estuvo en moestras kazas, era ke lis deziya alas mujeres de el Sr. Alfasa porke mos meraran mui muntcho i ke non si lo kontinieran ke mos dieron kaza boena eya lis diziya ke esta kaza ke lis datech es komo el yakmaklik de los servisios ke eyos los tienen en Samokov, i ke yo ya mi esto avergonsando de verlos en este modo de kazas, ma ya son una djente ke vieron muntcho, i non si lis enporta, de koando agora estan sufriendo, sigun i ke ya es ansi,

Denpoes ke ya estuvimos en esta kaza komo 4-5 diyas, foe ke si li entcho la kavesa de Johanan, yena de granos materiozos i le iva koriendo la materia kon ke i se araskava muntcho, i mozotros ke yamimos alos medikos de Enderne i de tantos unterios i milizinas ke eyos lis dieron foe ke nada non li ayudava, i esto a mozotros ke mos izo boeno espantar foe ke yamimos a mujeres viejas ke esto en Enderne si topan muntchas i mos enbezaron kon ke mos enkorajavan ke esto era mui boeno ke li esta koriendo i kon esto li salen todos los

2004           Biografia de Tch. Avraam kon su ijos Tchelebi Moche i Refaelatche          1878

bafes i las hazinuras ke las poede tener, i ke non li kortemos esto ke li esta koriendo, otro ke solo lavarlo la kavesa 3 veses a el diya, kon agoa de malvas, i estas yervas ke son las malvas arankarlas en kada diya freskas ke ya si topan en todos los lugares seya por el enverano komo i portel envierno, i boir una kantedad de medio kilo de malvas en un kilo de agoa, i dechandose yelar ir lavandole i ansi lo foemos kontinoando seya en Enderne komo i en Kostan i mizmo i en Samokov ke li turo longo tiempo esto de ir koriendole i kon esto era ke repozava, i estava sano i boeno, i denpoes ke mozotros ya estuvimos en Enderne komo a 20 diyas foe ke si vino tambien i Sr. Refaelatche kon su mujer i kreyaturas, i estuvimos todos djuntos en esta kaza komo a 2 semanas, i denpoes partio Sr. Refaelatche por kostan para tomar kaza i irmos todos a Kostan, i el la tomo la kaza de el Prens Hamid Efende ke es agora Sultan Hamid, en la kaleja altendji daire enfrente de el kuluk, una kaza en 3 etajes mui ermoza, i mos foemos denpoes i mozotros todos en esta kaza i morimos mui kontentes

i en este tiempo mi Sr. Padre resto en Samokov, por poder rekojer ainda mas algunas kozas, i sin ke mozotros lo sopiera mos foe ke el en este tiempo estava korespondeando en Filibe ke si kijo kazarse i lo mando a Sr. jeuda B. Manoah por ke lo konviniera kon la Bu. Viniziu, dela Familia de Kalev, ke el korespondeyo, kon la koala era de serka bivda de Sr. Levi ke teniya una ija kazada i un ijo Menahem, sin kazar por el koal era ke un sierto tiempo devija de estar kon eya, i ke eyos lo konvinieron si foe a filibe i se kazo

2005           Biografia de Tch. Avraam kon su ijos Tchelebi Moche i Refaelatche          1878

kon ke li izo de Tosefed^[74] 100 liras, i la ketuba sigun el uso ke la detienen de parte de la mujer i aki tambien foe ansi, ke sovre esto mas adelantre ya van a meldar el paso ke uvo sovre esta ketuba, i el kon su mujer se vino a Samokov, eya era manseva komo de edad de 45 anios, i bonatcha i ermoza i mui nekotchera, i todos los 2 kontentes estavan en Samokov, i en este tiempo ke mosotros todos estavamos en Kostan, i los rusos ke ivan kamenando adelantre, i ke el tambien si pronto por venirse a Kostan kon mosotros, el li eskrivi. a Tch. Haim el Butchuk ke ja estava en kostan, por ke mos diga a mosotros sovre esto ke el si kazo, i sigun ditcho ke mosotros non lo supimos, ke kale dizir, ke el si lo pensariya seya por esto ke a mozotros non molo dicho or seya ke de esto ke non estaremos mozotros kontentes, foe ke en un diya demaniana mos viene en kaza el sr. de Tch. Haim, i mozotros enkantados de su vinida lo resivimos kon onor, i denpoes de poko platikar, mos dicho ke mozotros devemos de goadrar ke onor de moestro padre i ke non li devemos vinir en nada de kontra, ya es mui verdad ke vosotros la pedritech a voestra madre ma i voestro Padre tambien kale ke biva sigun de todas las personas de este mundo i el se kazo i en pokos diyas es ke i el ya va a venir a kostan es ansi ke non seya ke lo desrepozech, mizmo ni kon la mas tchika koza i ke estech torna en un kavo komo i de mas antes i a voestra madrasta, ke la merech, todos vozotros kon boenos ojos, i el espera voestra kontentes por vinirse, i mozotros anke ke mos korieron muntchas lagrimas de moestros ojos li rogimos por ke presto li telegrafiara, presto

2006           Biografia de Tch. Avraam kon su ijos Tchelebi Moche i Refaelatche          1878

ke parta de Samokov i ke si venga en su kaza ande mozotros estavamos, i mozotros sigun de fin agora ke lo onorimos i en delantre es lo mizmo sin dingun trokamiento i el es libero de azer todo esto ke el lo kere sin ke mozotros li vinimos kontra, i Tch. Chemoel ke sintyo ansi dizir si foe mui kontente, i li telegrafeyo ke al sigundo diya ya tomimos su telegrafo ke ya partio i mozotros li foemos en su enkontro i los resivimos komo padre i estuvimos todos en esta kaza mui boenos pasando, i kon una semana mas tadre ya foe ke i los rusos ya entraron en Samokov, i todo moestro bien ke lo enpatronavamos sea en kaza komo i en la plasa lo todo si lo konfeyo a su yerno Sr. Behoratche Josef Elijau Arié kon ke i eyos todos si vinieron a bivir en moestra kaza, djunto kon moestro moso Sr. Jeuda B. Chelomo i mas tadre se vino tambien i el sigundo yerno Sr. Nesimatche B. Moche kon su mujer M. Mazalu i todas sus kreyaturas, i todos se mantenijan de las komanias ke mozotros las dechimos en kaza i lis foe bastante por un anio entero,

Mozotros ke ya estuvimos todos en Kostan i en una kaza lo pasavamos mui boenos i kontentes, era ke kada diya saliyamos todos ombres i mujeres por kamenar en los mijores lugares de Kostan i tambien era i ke mos ivamos i en las kampanias deredor de Kostan, todos mozotros era ke mos ivamos aziendo vistidos ala moda de kostan i los gastes ke los ivamos aziendo era sin konto, i sin pensar nada atras, kon los gastes de las komanias era mui muntcho barato, kaje ke kon la metad de el gaste ke lo aziyamos en Samokov mos abastava,

2007           Biografia de Tch. Avraam kon su ijos Tchelebi Moche i Refaelatche          1878

Koando ya paso algo de tiempo, de moestro estar en Kostan, i ke ya non aviya koalo azer mozotros tomimos una kamareta en Selanik Han en Galata, i mos asentavamos por non ir en las kavanes i esto mos kavzo a ke trucheramos en kada semana a un vagon de sukaro, de viena, i de Pechta tambien aziyamos traer echpirtos tambien kon vagones i los vendiyamos en la plasa en groso ke las ganansias eran mui tchikas ma ya mos abastava, i aparte era ke aziyamos traer tambien i en kada semana a 25000 fr. de talires de plata de viena, i los davamos ala zarap-hane, lugar ande si korta la moneda, por ke molos izieran en midjidies de plata, i de esto era ke ya si ganava a 1%, i en vezes erai ke mi Sr. padre se iva ala borsa i aziya algunas tchikas operationes de merkar i vender de los fondos turkos,

Koando los Rusos ke ya estuvieron en toda la Bulgaria i ke los avizos ya viniyan ke lo todo ya estava mui repozado i ke i las merkansias ya estavan boeno serkoliyando, partio mi Sr. Padre a Samokov, por kudiar sovre los bienes ke los dechimos, lo todo alos ayires^[75], i tambien ke las leyes eran por las personas ke si salieron de sus sevdades kon sus familias ke todos sus bienes apartenian a el Governo, sigun ke esto ya lo izieron ansi ke eyos si enpatronaron de lo todo, ke esto ya lo eskrivi en las partidas de mas antes sigun de loke lo aziyan, i era kon los mil males ke los pudo tomarlos lo todo, atras i en este tiempo ke el estuvo en Samokov el si foe tambien i a Pechtera i merko los sahtiyanes ke aviyan lavorado mientres el envierno i se vino de moevo a Kostan,

2008           Biografia de Tch. Avraam kon su ijos Tchelebi Moche i Refaelatche          1878

Koando ya foe el mez de iyar, parti yo por Pechtera por resivir los sahtiyanes ke los aviya merkado, i koando yo abachi en Pazardjik, ke topi a merkar los sahtiyanes de Otluk-kiovi i de stenemaka, ke era una suma de komo a 60,000 fr. los trati i parti por estos lugares al presipio por resivirlos, i denpoes ke ya los resivi i los mandi a Viena i yo ke mi estava endo a Pechtera i ke estava a kompaniado de Sr. Avraam B. Binjamin (edibaa) de Pazardjik, i de un sierto turko Osman Kalfa maestro de apartar los sahtiyanes i azedro de las turas, i todos en una karusa de un kavayo, i mozotros ke ya suvimos el bair de el kazal de radlovo i ke ya ivamos abachar en Pechtera, en una boelta ke ivamos a abachar, mos enkontran 2 personas vistidos de unos vistidos de los pomakes i sus karas enpretisidas kon kimur i mui bien armados lo detienen a el kavayo, i mos ivan diziendo kon boz ronka "pari" par" i yo ke teniya en mi aldikera en un bertoch^[76], algo de moneda minuda si los di en sus mano ke eyos lo tomaron ma non lo avrieron i de moevo torna demandan "pari", i yo ke teniya tambien i 400 liras en una bolsa en mi tchanta kon mis papelis i otras kozas, el Sr. Avramatche la eskondio arientro de la paja ke aviya en la karusa, i mos abachimos de la karusa espaerando la peadad ke mos alkansaran algunos otros pasajeros ma non uvo dinguno, i el uno de estos ladrones era ke lo iva jarvandolo a Sr. Avramatche, ke al koal si li tomo la palavra de el espanto, i yo mi meti adetras de la karusa siempre merando se era le algunos pasajeros ivan avenir i sin por nada espantarme, i yo ke lis diche ke non tengo mas paras

2009           Biografia de Tch. Avraam kon su ijos Tchelebi Moche i Refaelatche          1878

eyos sin nada avlarmi el uno de eyos si suvio ala karusa i karechterio la paja i topo la tchanta i kon abacharse mi la amostra, i me demanda la yave i yo ke la teniya arientro de el birtoch, lis diche ke en el birtoch ke vos di era ke estava la yave ma eyos esto non mi sienten i torna mi demandan la yave por ke eyos ke ya vieron ke avia koza pezgada kijeron solo la moneda tomarsen ke en la tchanta aviya tefteres i papeles i la ora i mas ansi kozas i eyos ke non kitan el birtoch, por avrir i tomar la yave kon ravia lis diche toma kon voestro kotchiyo i kortalda la tchanta i verech, loke kontiene, i en este tiempo ke lo ivan i harvandolo a Sr. Avramatche lis dize ke el era moso i el tchorbadji era yo, ma ami non mi avlan ni mi presigen i koando lis diche porke la kortaran la tchanta ejos lo izieron esto i la ratcharon i lo kontinido en la tchanta lo vaziaron en la tiera i eyos si tomaron solo la bolsa i lo restan todo lo decharon kon la tchanta i mi la amostraron kon dizir rekojete las kozas i andavos a la polis i konyoravos de mozotros i se enkacharon por arientro de los arvoles i se foeron, foe tambien un mazal por ke yo teniya otras mas 1600 liras ke eran para pechtera i las dechi en pazardjik ke si era ke i estas mi las yevava kon mi iva aser tambien ke mi las ivan i a tomar, i mozotros denpoes ke ya si foeron eyos rekojimos las kozas ke vertieron de la tchanta i mos sovimos ala karusa i mos abachimos en Pechtera i kon prima ke dimos el avizo ala polis de pechtera eyos mandaron djandares por toparlos i telegrafeyaron a las sevdades deredor sovre esta etcha ke foe lo todo nada, i yo resivi el sahtiyani

2010           Biografia de Tch. Avraam kon su ijos Tchelebi Moche i Refaelatche          1878

en pechtera, i me vine en Pazardjik, i Filibe por buchkar a estos ladrones, i esto ke ya foe tambien savido de el Knaz^[77] ke foe en este tiempo Knaz Korsakov Dondukov, i su asiento ke era en Filibe foe en un diya ke mi yamo, a su kabineto, por demandarme sigun de loke paso esta etcha i yo ke li konti, me dicho ke eyos ya enseraron a muntcha djente, ke lo pensan, i me dize komo viene a ser ke tu non lis travates kon tu revolver i los matates, porke estos ladrones son Bulgaros i eyos si espantan mas muntcho ke ati, i koando li diche ke yo non teniya dinguna arma, foe ke el Knaz se reyo, i me dicho ke fin a el tiempo ke yo estari aki ya tengo de buchkar, i tu vate a tu etcho, i non vaigas aziendo gastes i pidriendo el tiempo, i yo me vine a Samokov, i estuvo komo a un mez i merava de ir rekojendo de los etchos ke los teniyamos i de los ladrones non si topo fin a este tiempo nada i mozotros mas non buchkimos,

i denpoes de esto ke si kijo vinir i mi ermana la grande M. Buhurutcha a Kostan, i yo ke la kombedi tambieh i a mi ermana la tchika M. Mazalu ke eya non si kijo vinir por non dechar a sus kreyaturas ke eran mas tchikas foe ke mos foemos los 2 a Kostan i estuvimos en orta kiovi por ke en este tiempo la aviyan dechado la kaza de Galata i tomaron en orta kiovi la kaza de portokal eglu ke si yamava el kiavgir, i la kira era 50 liras a el anio, i estuvimos en eya mui kontentes ke era mui boena i grande i teniya su boeha goerta

mientres de este tiempo ke yo estuve en Samokov foe ke mi Sr. Padre foe endo mas muntcho ala borsa i foe djugando en los

2011           Biografia de Tch. Avraam kon su ijos Tchelebi Moche i Refaelatche          1878

fondos turkos i ke el foe aziendo las operasiones mas grandes foe ke non tuvo dingunos afitos i ansi foe ke pedrio grandes sumas de moneda i de esto el si foe mui muntcho sikiliyando, i esto li kavzo i tambien a ke foera endo i malato, i viendose en muntcho en manko, el si detchezo a merkarse un mulk en kostan, ke en esto ya tuvo boen afito i en estos diyas ke si estava vindiendose un magazen, en Galata de 3 etajes, i entero fragoado de piedra pikada, ke era en zindjirli han, kon un revenido de 200 liras de kira a el anio ke ya estava alkelado por 5 anios, i lo merko por 1500 liras, i mos dicho ke lo merki por tener al menos un revenido de 200 liras a razon ke non estava siguro de el bien ke lo enpatronavamos en Samokov, i denpoes ke ya estuvimos mas algo de tiempo en kostan el si enpeso a prontar por venirse a Samokov,

En el anio de 5639, partio mi Sr. padre kon su mujer de kostan por Samokov, en dechandomos ami kon Sr. Refaelatche en Kostan, (i foe en este tiempo ke estuvo en moestra kaza el Sr. Azaria el ermozo ke lo eskrivi mas antes,) i denpoes ke el ya estuvo en Samokov algo de tiempo mos eskrivio porke partiera i Sr. Refaelatche kon su Familia por Samokov, i pokos dijas mas tadre tambien partio i resti solo yo kon mi familia, otros 4 mezes en kostan, por rekojer los etchos ke los teniyamos en kostan i tambien ke teniyamos i una havale de 300,000. gr. de antes de la gera, ke si deviya pagar en Enderne,

2012           Biografia de Tch. Avraam kon su ijos Tchelebi Moche i Refaelatche.         1879

i a razon de la gera ke non pagaron i tambien ke en este tiempo ainda ya estavan i los rusos, foe ke resto por kovrarse, i por esto tambien estava kaminando en el ministerio de las finansas por ke mi la trokaran por kovrarla de algun otro vilaet, i esto fin ke lo toparon era ke iva pasando el tiempo fin ke kon muntcho mal i algo i amenazar foe ke mi dieron para el vilaet, de Konia, i yo ke foe endo alas Bankas seya de Sr. Kamondo tambien ala sosiete general por ke mi la merkaran i eyos ke ya teniyan me dizian a sumas grandes a dingun presio non mi kijeron merkarla solo ke era ke siempre me dizian por ke mi foera yo mizmo anke ke en akeyos tiempos el viajar en ansi unos lugares era mui pirikolozo ke es lugar lechos, ma yo ya keria irme ke li eskrivi a Mi Sr. padre por ir yo foe ke non mi alesensio, solo por el pirikolo i ke merara de venderlas en Kostan i ansi lo iza ke la vendi a un sierto karamanli echpikolante de esto i banker de Konia por un presio mui barato i denpoes ke kovri el emporto mi rekoji i yo tambien kon ke vendi lo mas de la mobilia ke la teniamos i algo lo mandi a Samokov i parti i yo tambien i vinimos a Samokov, mui sanos i boenos,

i ke ya mos rekojimos todos en kaza i kon los negosios ke los azijamos de antes visto ke todos trokaron de tripa a esfoelo i todos los maadenes i vignas i otros mulkes de los kampos ke estavan lo todo derokado, i de todo el bien ke dichimos en samokov ke non topimos ni el 25 %, kon el kuraje i la pasensia enpesimos a rekojer koalo si podiya, i en el maaden parisiendomos ke ya se iva de moevo torna a poder lavorar enpesimos por azer algo de reparasion i esto kon ke mos izimos haverim para el maaden kon Sr. Zaharie Hadji

2013           Biografia de Tch. Avraam kon su ijos Tchelebi Moche i Refaelatche.         1879

Stamo oglu, por lavorarlo i dezbolsavamos kontra metad i en el primer anio las ganansias foeron mui tchikas seya por ke uvieron gastes or ke non si estuvo vindiendo el fiero, kon boenos presios, por razon ke ya trucheron muntcho de la Evropa, ma lo foemos kontinuando,

Mozotros izimos traer sukaros de viena i tambien i de Los echpirtos de Buda-Pechta, lo todo kon vagones i esto era los negosios ke los rusos konsomian muntcho, tambien trochimos i de los i bevrajes ke los biviyan los Rusos komo Vodkas i konyakes i romes i ansi mas modos de los bevrajes lo todo por los Rusos, i torna kon todo las ganansias eran por mozotros mui tchikas por razon ke las konsumasiones non eran a muntcho grandes por poder konkoriar, ma ja lo foemos aziendo, i lo todo sin gana,

Kon los gastes ke los aziyamos de antes en este tiempo ya los izimos mui kurtos ansi i de mizmo enmankimos i los mosos i detuvimos solo 3 kavayos ke los 2 eran por el Paiton i esto ke los podimos tomar atras de los rusos i en moestra kaza ke morava el General Gadolin, mos decho un kavayo de presente ke estava preniado i en Moestra kaza pario i lo engrandesimos i lo beneyavamos ke era mui boeno este General mos deziya ke mozotros non somos komo los Djidios ke el konose en Rusia, ke kale seya ke somos otra Rasa, i ke mozotros ya somos komo a eyos, el mos kombedava siempre en su kamareta i mos dava tchaes i otros bevrajes i dulsuras ke era mui bonatcho,

En este anio mozotros izimos kon Haverim algunas partidas de kezos i los mandimos a Kostan por venderlos ma non era koza

2014           Biografia de Tch. Avraam kon su ijos Tchelebi Moche i Refaelatche.         1879

enportante, lo todo lo ivamos aziendo por provas de poder alkansar algun negosio mas emportante, koanto alos fieros i algunas i otras kozas de ropas ke molo aviyan tomado los rusos ya foe en este tiempo ke kaje ya lo tomimos todo ma non era kon gusto porke mos izieron muntcho kansar, i de esto era ke mi Sr. padre si sikiliyava i se iva tambien mui muntcho i aflakando, ke de este foe ke si li renovo i el diare ke lo tuvo mas antes, i ansi era ke non salia ala plasa montcho i lo mas si estava en kaza, i en este tiempo tambien foe ke i se hazenio mi ermana la tchika M. Mazalu i esto lo apretava mui muntcho, ke era siempre ke la vijitava i la regalava, ma foe sin provetcho i foe su moerte solo de el apokamiento i flakeza mui grande, i el los 7 diyas de el limunio los goadrimos en moestra kaza i su marido kon sus ijos lo goadraron en sus kaza ke estovimos en 2 lugares asentados lo todo por ke i el estava tambien malato, denpoes de esto ke ya mos levantimos de el siete el si foe a Filibe por kamenarse unos koantos dijas, i koando si bolto de el presipio ya estuvo algo de tiempo boeno, ma mas tadre foe ke torna si li renovo su diare, i era ke lo pasava siempre kon Hr. avraam Koen, ke li venia en kaza i era siempre ke estudiavan en la gemara ke ya lo saven ke el en esto era mui savido, i lo konosia mui bien estos estudios,

A mozotros mos amava mas de muntcho el mos akonsejava i mos kontava entre muntchas kozas ke mos dezia, era ke tambien mos dicho ke el en tantas merkansias sea de el las ke las izo komo i de estas ke otra djente las azian, es ke en kada 10 anios azen un troke

2015           Biografia de Tch. Avraam kon su ijos Tchelebi Moche i Refaelatche          1879

sigun de esto loke el lo konstato, kijendo dizir ke un negosio non lo poede kontinoar la persona en toda su vida sigun de la primera metoda ke lo enpeso i deve de trokarlo seya el mizmo negosio kon la metoda de el tiempo or ke kale lo troke enteramente i ke estudiaron negosios moevos, lo todo i komportarse adetras de el etcho i de el tiempo, en todos los puntos, lo todo kon la grande deretchedad i non avregonsarse de koando lavora en algun negosio parisiendole ke non era pertenesiente para el, es de non ser orgoyozo, i kon esto poede arivar a non ser sotometido alas personas, ser onesto i siempre de goadrar la onor de la familia Arié.

En el anio de 5640, ke mi Sr. padre ya estuvo ainda mas flako i el diare ke li iva tambien i kontinuando era ke estava asentado por los presipios en la chilte, ke esto para mozotros mos foe una mui grande ansia i de esto non estavamos pudiendo merar ni dingun etcho, i poko mas tadre el ya, si etcho i en kama ke los medikos era ke lo vijitavan a unas koantas vezes a el diya ma provetcho non topava, era ke todos los parientes lo vijitavan seya los ombres komo i las mujeres i li ivan i aziendo algunas etchuriyas de kaza ke era solo una flakeza ke konsintiya, i su mujer moestra madrasta era tambien ke muntcho lo merava i lo servija i lo velava, ke i en vezes eya yorava ma torna kon todo eya se iva kortando de kontino muntchos modos seya de vistidos i tchamachires i se iva prontando i

2016           Biografia de Tch. Avraam kon su ijos Tchelebi Moche i Refaelatche          1880

goadrandolos, ansi lo aziya i kon la djoya ke teniya siempre la estava goadrandola i era la perla ke la yevava siempre ke non si la ketava de el koeyo mizmo koando se iva a el banio porke esta perla teniya una valor de 6000 fr. ansi lo aziya i kon las yaves de ande los teniya sus vistidos ke koando se iva alavar en el banio ke ya era en kaza lo aziya ke si las yevava kon eya, i en este tiempo eya lo izo ke atras mano si tomava algunas de las kozas de kaza si entiende de lo mijor i las iva mandandolas a Filibe, i lo todo por viya de la mujer bivda de Sr. Avraam Halfon ke i lo koala era de Filibe i morava en Samokov ke kale dizir ke i eya teniya algunas pagas i de los provetchos, i esto todo ke mozotros ya lo estavamos viendo ma no avlavamos nada i goadrandomos non seya ke si akechara ande moestro, padre i ke non si sikiliyara, ma koando eya ya lo enpeso a mandar i kon bogos i mas ala klara, lo todo ande esta M. Bivda Halfona ke li era la yataka, por rovar, foe ke mozotros si los tomimos atras los bogos ande konteniya muntchos modos de kozas seya en vistidos komo i en mobilias i otras kozas valotozos, i a eya ya era ke non si li enportava ni avregonsava ke su karakter kale dizir ke ya era de esto ma eya non i demostrava ke era daniyadera otro ke al kontrario kon todos los de kaza se komportava komo de muntcho amistoza, i eya non teniya apetites en la komania ni menos ke li plaziya muntcho la fantaziya, eya ala sikreta a los presipios ke si kazo seya en Kostan komo i tambien i en Samokov, sie [se] iva aziendose muntchas de las itchoriyas para parir, ma non pario, kon M. Buhurutcha mujer de Sr.

2017           Biografia de Tch. Avraam kon su ijos Tchelebi Moche i Refaelatche          1880

Refaelatche, non si pasava tanto boena i ala espalda era ke avlava kontra de eya, i ala kara era boena, a su ijo Menahenlo tuvo en moestra kaza komo 2 anios seya en kostan komo i en Samokov, el era bonatcho i mui repozado, su ija M. Sultanatche ke ya estava kazada vino una vez a Samokov komo musafira, i estuvo en moestra kaza, komo un mez de tiempo, i se foe a Filibe mui kontenta,

Mi Sr. padre en el mez de Hechvan ke ya estava mas flako, i ke ya estava i etchado en la kama, siempre era ke iva, demandando en koantos de el mez era ke ya estavamos, i siempre lo keria el mez de Hechvan ke pasara, el en todo el tiempo ke estuvo hazino mizmo i fin a el momento ke ya i morio era ke su tino non lo pedrio i siempre avlava komo de koando era sano, i koando ya entro el mez de Kizlev el si gusto mui muntcho, i mos diziya ke ya paso Mar-Hechvan, ma non tuvo dingun trokamiento, i en Roch-Hodech Kizlev, el lo kijo de irse en otra kamareta i lo yevimos ma ala tadre ya si kijo vinir torna ande estava de antes, etchado, i lo truchimos,

I ala notche de lunes 2 Kizlev, poko antes de la media notche el si asento, en la kama, i los yamo serka de el a los 2 veladores de akeya notche ke eran Sr. Jeuda B. Manoah, i su Jerno Sr. Behoratche, i les dicho, en esta notche es la fin de mi vida, lis direch a mis ijos, ke non agan kon mi denpoes de mi moerte, nada de demaziya de todas las personas ke si moeran, i agora non lis digach, ke yo vos esto diziendo, para ke non si sikilein, i mozotros ke ya estavamos siempre en pies i entrando i saliendo kada 2 puntos non mos

2018           Biografia de Tch. Avraam kon su ijos Tchelebi Moche i Refaelatche          1880

dicheron nada, i el denpoes ke lis dicho yo los bindigo, i se tomo la tovaja ke el la teniya anlado de si i se tapo la kara i dicho, CHEMAH JSRAEL ADONAI ELOENO ADOHAI EHAD, i mas non tuvo dingun riflo i los veladores viendolo sin mas riflo i denpoes ke eyos lo examenaron i ke ya lo vieron ke ya estava moerto yamaron por darle algunas ayudas ma foeron todas sin provetcho ke el ya estuvo moerto mas para nunka levantarse, i todos ala una kon el mas grande saluso lo yorimos, de la piedrita ke la tuvimos seya mozotros komo tambien i la Familia entera, en toda la notche, i ala maniana ke ya foeron sus ultimos rijos lo kijeron los Hahamim de yevarlo en el Kaal i detenerlo delantre el Ehal Akodech, komo ke lo merese a razon ke era mui savio en la Tora i li izo una derecha Hr. Haim Alkalai el Chohet, porke el Rabino ke era Koen non lo podiya, i denpoes kon todos los Hahamim i Hazanim i kreyaturas adelantre kantando las endetchas i deteniendolo en las manos lo metimos en la tiera, i denpoes ke espartimos Muntcha Sedaka a todos los manesterozos seya Djidios komo i non djidios ke i eyos vinieron i denpoes ke ya vinimos en kaza ke i mos isimos la Keria^[78], li goadrimos les 7 dijas de el primer limunio i en kada diya viniyan 10 Hahamin a meldar el seder de kada diya para esto i siempre davamos i Sedaka i davamos a komer seya a los Hahamim komo i amenesterozos i tambien i los parientes, i ansi lo izimos i en el kortamiento de el mez, i mozotros era ke en kada 3 4 diyas lo vijitavamos kon hahamim akompaniados i kon ke i meldavamos algunos Perakim de la Michna, i ansi tambien era ke mozotros en el anio

2019           Biografia de Tch. Avraam kon su ijos Tchelebi Moche i Refaelatche          1880

entero, li goadrimos kon ke ivamos seya en las Tefilod de la maniana ansi i estas de las tadres en el Kaal kon miniyan a dizirlas i li asendimos una lampa en el anio entero en el Kaal, i mozotros en el anio entero dinguna poerta non avrimos afoera de la de el Kaal, i a mozotros de vez en koanto mos vijitavan los parientes en los Chabatiod i los Moadim, ke siempre kamenavamos abatidos i ansi era ke i ala plasa era mui poko loke saliyamos i dingun etcho moevo non tomimos ke sovre esto los parientes i los Hahamim mos akonsejavan de no dechar enteramente el negosio, i en la butika koando ivamos ke estavamos los sin ke mos vijitara dinguno era ke enpesavamos a yorar, i mos veniyamos a kaza,

2020                                                   ENERGIA SAVIYA

Mi Sr. Padre Tch. Avraam M. Arié anke ke ya lo meldaron por la menera ke el si komporto en toda su vida para todas sus etchas, es solo ke lo poede dizir porke foe mui savio en todos los estudios, i ansi era ke el en koal lavoro foesa ke lo lavorava seya en el tiempo ke estuvo kon sus ermanos komo i tambien koando estuvo solo, non teniya el menester de estudiarlo de antes, i el ya lo enkamenava komo ke ya teniya el pratik, de muntcho tiempo antes, el en koza ke non li koadrava non metiya mano, en los momentos ke el les tuvo muntchos, por defenderse, delantre los altos djuzgos i de los personajes altos, era ke nunka non si prontava, ni ke lo estudiava, la etcha, por la manera ke el se deviya de defender, otro ke el ya era tanto savio, ande podiya responder, a todas las demandas ke si li aziyan en el mizmo momento ke estava aparado delantre los djusgos i lo todo kon sus entindimiento i kon poko avlar, i ansi foe ke en dingun djuzgo non foe enkolpado, el foe kaje en toda su vida, miembro onorario, en los djuzgos ke si adjuntavan a 2 i 3 vezes ala semana, su pasatiempo en toda su vida foe lo mas muntcho sovre los estudios, i ansi era ke li viniyan ande el, porke lis deklarara, algunos de los estudios ke eran eskritos en mas serado, el non si travava de entrar en todos los lugares altos, i era de todos mui bien resivido i kon grande onor, en todos los negosios ke el lavoro foe ke en todos reuchia, por ke era kon grande deretchedad, atodos el resivia kon la kara alegra i los onorava, ikonomiyas non azia en dingun punto, solo ke su vida foe mui tchika ke bivio 58 anios,

2021

Asta aki si eskapa la partida de la Biografia de

Tch. Avraam M. Arié fin a el tiempo ke estuvo kon

sus ijos Tchelebi-Moche i Refaelatche de el anio

5630 fin a el anio 5640 ke murio