הסניורים גבריאל ואלייָצֶ'ה נ. אריה

833

               De aki i endelantre si enpesa la Partida de la biografia de los S-res Gavriel i Eliatche Nisim Arie, enpesando De el anio 5655 fin a el anio de 5660-61.

834        Biorafia de S-res Gavriel i Elijatche N. Arie.     1895

            En el anio de 5655, ejos ke ja si konortaron de la moerte de sus Padre, i sovre loke tengo eskrito ke demandava de la alijansa Jsraelid, porke foera, torna resivido en la alijansa, i en este anio li akordaron su rogativa, i en mismo tiempo lo nomenaron por derektor a la Echkola de Ismir, i de esto si gusto mui muntcho, ke sovre ke ja foe nomenado i ke kalija fin a un sierto tiempo ke si foera a resivir el empeigo ejos los 2 ermanos, ke eran haverim, en las operasiones ke isieron de el kolonijal ke non seraron los kontos seja en las operasiones de el bankerlik ke ejos las isieron i esto de loke lis revinija de sus padre, foe ke si isieron un bilanso i sigun de loke ejos lo dicheron foe ke tuvieron entre todos komo 1000 napoliones, i esta suma si la espartieron para todos en igual parte, i koanto a el estado de sus madre i sus ermanos ejos si lo reglaron ke devijan de estar en la kasa ke morava el Padre, S-r. Elijatche kon sus madre i sus ermanas i el Imanuel i para esto ejos nombraron la suma ke devijan de gastar, i a koanto a kada uno ke devijan de tomar parte, i en la kasa ke ja morava S-r. Gavriel iva a restar, su mujer kon sus krijaturas fin ke si iva a resentar en Ismir, lo todo a su gaste, i sovre este akordo ke kedaron foe ke partio M. Gavriel, i se foe a Ismir, solo i denpoes ke el ja si resento, i se tomo kasa, i se los jevo a su mujer kon sus krijaturas, i akompanijadas de su madre, i su ermana Rejina, i Imanuel ke ja estava en la echkola, i ejos ke partieron si abacharon en

835       Biorafia de S-res Gavriel i Elijatche N. Arie.     1895

Kostan i estuvieron unos koantos dijas en la kasa de S-r. Koen, el esfoegro, de M. Gavriel i denpoes ejos partieron por Ismir, i la kasa ke ja estava pronta ejos bivijan mui kontentes, porke la paga ke el resivija era de 4000 fr. i aparte tenija i otras entradas, el era mui bien visto de todos los moradores djidios de Ismir, i lo ke asediravan^[11] mui muntcho, ke non keri ditcho, tambien ke i el ja si savija mui bien komportar, el aldija [al dija] los vijitava unas koantas veses fin ke tomaron boeno la klima de Ismir, i el ke ja si resento bien boena la Echkola, iva siempre kamenando adelantre, i eran kontentes de el sujo program,

            i koando ja si foeron todos ke resto solo S-r. Elijatche ejos alkilaron las kasas por una mui tchika kira porke sigun ke ja lo eskrivia ke era nomli [nemli] i avija muntcha umedad, ke una de la flakesa de seja S-r. Nesimatche seja i de M. Gavriel era esto de la kasa ke travava muntcho i tambien la Bu. Jael ke tuvo un grande romatisimo en las piernas era tambien de esto, i kon ke se iva unos koantos anios a los banios de Kiostendil es ke li paso por entero, i S-r. Elijatche ke resto en Sofia si mantenija por los trakteres^[12] i durmija en una kamareta ke si alkilo,

            En el anio de 5656, ke a S-r. Elijatche ja li pejaron su paga a 150 fr, a el mes, foe mui kontente, ke ja iva a poder

836       Biorafia de S-res Gavriel i Elijatche N. Arie.     1896

Bivir en mas antcho porke fin a este tiempo el era apenas i kon muntcha ikonomija ke si estava pudiendo pasar, i de esta paga ke el resivija ja pudo tambien i apartar, una suma por vinirle en la ajuda de su ermano ke detinia a toda la Familija en su kasa i a sus gastes en Ismir,

1. Gavriel kontinuava mui bien su echkola i siempre iva adelantre, i de mismo los moradores de Ismir eran kontentes, i lo katavan i tambien lo regalavan i eja la Bu. Jael resivija muntchas damas de los notavles djidios de Iemir ke la vijitavan i eja ke ja savija boeno enkontrarlos todos tambien i a eja la konsideravan muntcha i a todos estas ke a eja li vinijan era ke i eja tambien lis boltava vijitas i li asijan grandes onores,

            En este anio S-r. Chemoelatche su Tio, li mando a su IJO Leon, porke estuviera en su echkola de Ismir, kon la entision komo derektor ke ja era i por ke lo pudiera prontarlo para mandarlo a Paris, ke de la Echkola de Samokov non podija ser, por algunas rasones, i la grande esperanza ke tenija S-r. Chemoelatche era ke lo iva a kudijar, i tambien detenerlo en su kasa, ke kon esto M. Gavriel sin dubio, ke ja si iva akodrar, todo loke kon el lo isieron ejos, i se podijan pagar, ma non foe ansi ke Leon non pudo entrar, en el grado de poder mandarse a paris, i ansi foe ke esto li desplasija muntcho a M. Gavriel, el solo lo detinija en su kasa a los sujos kudios, i la Bu. Jael ke ja estava, era ke paso mui bien kontente, lo todo ke li pagava por esto ke estava en su kasa, i mas

837       Biorafia de S-res Gavriel i Elijatche N. Arie.     1896

tadre ke ja eskapo todas las klasas ke avijan en esta Echkola Foe ke si vino a Samokov, i denpoes si empeigo en el Dr. Balkan ke era S-r. Elijatche, ke lo enbesava, por los presipios,

            En el anio de 5657, S-r. Elijatche kijo kasarse i sovre esto ejos los 2 ermanos ke si korespondijaron i sus S-ra madre ke ja estava en Ismir i por non tomarse mujer de moestras partes seja de la Familia Arie or seja de otras, lo toparon de mijor de tomarle a M. Leonora de la Familia Faradji de Ismir ke la koala ja estava en la echkola i ke ja era mui savida i entelejenta i mui ermosa sin ke tomo nada de kontado, i S-r. Elijatche ke ja estuvo kontente a esto, lo konvinieron el esposorio i mas tadre partio de Sofia i S-r. Elijatche a Ismir i isieron la boda en Ismir en siendo mui kontentes de todas las 2 partes i denpoes ke ja estuviron unos koantos dijas, si vinieron los moevos kasados a Sofia i se alkelaron una kasa en una de las grandes plasas de Sofia i bivieron mui kontentes i aunados, (sovre esto ke todos los 2 ermanos ke si tomaron mujeres de lugares lechanos foe solo por el igene visto ke sus papu i sus padre ke tomaron mojeres de la Familia Arié, foeron kavsantes de traer flakesa a sus ijos, i tambien jo lo tengo sintido disir de el uno ke su madre foe tambien de Arié, ke es mui maravioso en akel tiempo komo las davan a sus ijas a sus mosos por mujer

838       Biorafia de S-res Gavriel i Elijatche N. Arie.     1897

es ke non lo pudieron entender, mismo ke non es konvenivle para ejos de disirlo esto torna kon todo ja esto siguro ke si mismo otra okasion lis verna sin pensarlo tambien lo tienen de disirlo, sovre la primera rason ke la topan sovre ke si kere el trokamiento de la sangre? koando ja son de el treser i koarten kuchak mas ja non keda etcho de sangre, i si es ke vamos a las onduras rios kale tomar a mujeres de otras nasiones, a rason ke todos los Djidios somos de Jaakov Moestro padre, i sovre de esto ke eran de una Familia esto non keri disir nada, mi paresi disir ke es el kontrario tomarsen mujeres de otras Familias, en saviendolo ke en kada Familia siempre existe una manera de hasinuras, lo koal ke aparte de loke si goadran sovre afirmar la lei de la hygiene, por ke naskan ijos de sangre limpia, kale disir ke konkrijan de esto i las hasinuras ke existen i en la familia, de la mujer ke tomo, i va aser entonses una mleskatina de 2 hasinuras),

            Koanto a esta kosa maraviosa, ke tuvieron de dar a sus ijas a los sujos mosos, prima es ke ejos ja supieron el fruto ke va a salir, i la prova es de loke ja esta klaro, i mas ejos eran todos los mas savios i entelejentes de la Familia entera ke sigun kada persona lavora por el sojo [sujo] bivir i koando non reuche en el un lavoro el lo troka en otro, i savido es ke por todos los lavoros ja somos komo mosos ke si aprovetchan i los otros, si merkader de ropas serija li kale merka la ropa de el fabrikante i ansi si banker serija torna li kale ke si prevalga de el otro es ansi ke li kale

839       Biorafia de S-res Gavriel i Elijatche N. Arie.     1897

lavorar el presipio para el primer i denpoes aprovetcharse el mismo, ansi eran i ejos sigun ke ja lo meldaron ke ejos de todo loke lavoraron por sus kontos siendo ke non pudieron reuchir es ke lis kalio ke trokaran sus merkansija en empeigos i esto era ejos solos ke admenestravan los etchos ke lis eran konfijados i kon las mas altas pagas, i estos ke eran los 2 de la una parte ermanos i los otros 2 tamben ermanos i todos 4 primos ermanos ijos de 2 ermanos i H. Elijatchuno ke tuvo 3 Ijos foe ke si kasaron a las Ijas de los otros 3 ditchos ke los 2 mas grandes ke son S-r. Behoratche i si kaso kon la Ija de Tchelebi Avraam i S-r. Nesimatche si kaso kon la Ija de Tchelebi jeuda i S-r. Refael si kaso kon la Ija de H. Rabenutcho, i todos los 3 tuvieron Ijos i Ijas, lo koal ke lo vemos todos los Ijos de los 2 ermanos mas grandes ke si maravijaron estan en la mijor posision ke poede aver i por enfrentante los Ijos de el tresero non son ansi por koalo ke seiga ansi en siendo todos una misma sangre,? poede ser abastarija disir solo ke los primeros foeron protejados i sostenidos i sakrifikado kon ejos de el presipio fin a el kavo i kon el treser ke foe manko de esto serija poedi ser una rason, i mas ke alos padres de estas 2 Ijas los detinijan komo sus propios Ijos, i era ansi ke lo todo era igual,)

            Koanto a la kasa ke ejos tenijan en Sofia foe en este tiempo ke la vendieron, lo todo por este ke era umida i la vendieron muntcho mas barata de loke lis kosto, a ejos komo 6000 fr., i M. Gavriel ke era en Ismir kon toda la familia, lo pasavan mui bien, i

840       Biorafia de S-res Gavriel i Elijatche N. Arie.     1897

mui kontentes, ansi de mismo i la Bu. jael aun kon todo ke ja estava mui bien vista seja de su Ijo komo tambien i de todos los de su kasa i mismo de los moradores de Ismir, torna kon todo eja era su desejo de vinirse a la tiera de su nasimiento,

            En el anio de 5658, li nasio a M. Gavriel en Ismir un Ijo, i se gustaron i alegraron kon ke konbedo a todos sus amigos lo ke el si gano en Ismir i en el dija de el Birkad mila el djo a komer a muntcha djente, i lo jamaran Narcisse, de mismo su madre lo krio i lo kudio, i el ke ja era mui kontente de su mision bivijan todos mui kontentes, i en este mismo anio tambien li nasio i a S-r. Elijatche un Ijo ke para este parto se vino su S-ra madre a Sofia por merar la parida, i de esto tambien si gustaron muntcho, i de mismo la vijitaron todos sus parientes, i tuvo muntchos kombedados i lo jamaron Michel, ke el koal koando ja foe mas grande era ke non avlava boeno, i tambien ke era algo manko de el meojo, i kamenava komo un enkantado, ke de todos los ajudos ke si li dieron nada non li iso provetcho ke siempre foe de una manera, i esto dicheron porke non foe tanto boeno kudijado, i koando ja foe de una edad de komo 10 anios, de una hasinura foerte ke tuvo kedo moerto, i se sikilijaron mui muntcho, i la Bu. jael estuvo en Sofia longo tiempo sigun ditcho ke a eja li plasija mas muntcho estarse en Sofia ke estar

841       Biorafia de S-res Gavriel i Elijatche N. Arie.     1898

en Ismir, ejos todos los 2 ermanos mui aunados si pasavan mui boenos, i sovre todo ke ja estuvieron bien resentados en sus vida, i la Bu. jael partio de moevo por Ismir,

            En el anio de 5659, la Aliansa jsraelid merko un grande tchiflik komo 2 oras lechos de Ismir, el koal ke sirviera para los elevos de la Echkola de Ismir porke lavoraran i kon esto ke tuvieran un presipio de prontamiento por mandarsen a las echkolas de agrekoltura ke ja las detinijan en otros lugares, i por el sostenimiento de este tchiflik li foe konfijado a M. Gavriel para aser seja los gastes komo tambien i el governamiento ke i por esto tenija ke resivija tambien i su paga aparte, ke afoera de la paga el tenija i mas otros provetchos seja por este ke ja lo meresio or seja ke de esto si enbesava tambien a governar i lo todo lavorava sin kansarse, i respondija a lo todo,

            La Bu. jael ke ja estuvo en Ismir eja ke tuvo una foerte dolor de piernas fin a el grado ke li kalio estuviera asentada 3 meses i kon toda kura ke eja enplio foe ke nada non li aprovetcho i koando ja estuvo algo mijor sin tadrar eja si vino a Sofia i se foe a los banios de Kiostendil, i kon esto foe ke reposo i ansi lo kontinuo unos koantos anios i se li depedrio enteramente este dolor i de esta vinida a Sofia mas non si foe a Ismir.

842       Biorafia de S-res Gavriel i Elijatche N. Arie.     1899

            S-r. Elijatche ke estava enpeigado en el drujestvo Datchia romania, ke a rason ke likidio i lo paso a el Drujestvo BaIkan i en este paso uvo ke las adjuntaron las aksiones i en mismo tiempo ke nombraron presios i las puvlikaron por venderlas i entre kada uno ke foeron angajando foe ke i S-r. Elijatche ke angajo tambien una suma mas redonda, i la suma de los angajantes ke salio a unas koantas veses mas grande de la suma ke a esta rason foe ke el presio tambien pujo a muntcho i de este tuvo una ganania bien redonda, i esto ke foe etcho komo al asalto i el ja si enpatrono de la ganansija, solo ke en este anio non estuvo en empeigo, i non buchko de lavorar en dinguna otra merkansia lo todo ke estuvo tiniendo la pasensia por de moevo torna entrer en ansi empeigo, sigun de loke ja foe ansi, i mas tadre el si empeigo torna en el Dr. Balkan kon una mas grande paga de la de antes i se konvino por 400 fr. de paga a el mes, ke i fin oi ke esto eskriviendo la dita tambien esta en el ditcho Dr. i ke agora alkanso a ser el derektor de este Dr. i kon la paga de un derektor, lo todo ke el tomo i konosio al fondo las entranijas de este etcho i es mui kichto i lo sienten todos a las sujos proposisiones ke el lis presenta a los admenestradores i li son resividas,

              En el anio de 5660-61, a todos los 2 ermanos lis nasieron

843       Biorafia de S-res Gavriel i Elijatche N. Arie.     1900

otros Ijos asi^[13] nasieron todas las 2 paridas el uno en Ismir i el otro en Sofia lo isieron de todo djusto, i los jamaron a el de M. Gavriel, jeuda i a el de S-r. Elijatche —- ke i el koal tambien non li bivio i de esto si sikilijava mui muntcho, i mas tadre el ja tuvo otros Ijos ke ja estan mui boenos, i los kudijan mui muntcho, M. Leonora ke si adjuntava de mas antes kon sus amigas para djugar en kartas por pasatiempo es ke agora por kudijar mas a sus krijaturas es ke non si adjunta en kada adjunta ke ejas las tienen, i en este tiempo foe ke si merko S-r. Elijatche en hevra kon su konijado S-r. Nisim B. Josef (jachar) la kasa de el pogatchadji por 48000 fr. ma siendo ke su konijado tuvo unas deferensijas de chikanerijas ke uvo entre ejos i el etcho lis salio a el djusgo foe ke M. Gavriel lo akonsejo porke iva a ser mijor ke non merkara kasa ande va a ser aujada [anjada] sovre todo koando su haver de el presipio ja enpeso kon las falsijas, i ansi foe mismo ke li kosto algo non kijo tomarla i resto la vendita en vasio ni mismo para su konijado, i pasando unos koantos anios ejos los 2 ermanos si merkaron una otra kasa en Pirotska ulisa^[14] por 70,000 fr. i en una grande reparasion ke ejos li isieron kon aserli i otro un etaje kontiniendo 4 apartamientos i unos koantos magasenes para la plasa biven en eja tambien todos 2 ermanos kada uno en el uno de estos apartamentos, mui kontentes, en la reparasion ke ejos li isieron en esta kasa gastaron serka 80,000 fr. i tambien tiene su valor, porke tiene boen vinid[a], i ke es tambien bastante grande,

844       Biorafia de S-res Gavriel i Elijatche N. Arie.     1900

1. Gavriel era de mismo en Ismir lo todo sigun de los otros anios, i su ermano el mas tchiko ke estava en la echkola en djuntos kon Leon el ijo de S-r. chemoelatche, i ke ejos todos los 2 ja non tenijan mas por koalo restar i sigun ditcho por el S-r. Leon ke non foe posible de mandarse a Paris foe ke si vino a Samokov i kon su ermano el S-r. Imanuel, lo mando a jeruchalaim ala echkola de mekanik, por ke enbesara este ufisio, i la Bu. Jael ke ja estava en Sofia kon esta resto solo kon sus krijaturas, i mas tadre seja ke si kanso or seja ke los kontos li foe mui pesgado para entregarlos li foe viniendo una flakesa, i estuvo mui espantado i esto mas tadre ke si li foe enresijandoli kalio ke abandonara la echkola i si foe a Daus por bivir en los averis mas limpios, ke estuvo kon toda su familia unos koantos anios, fin ke si vido mas mijor ke todo li paresija ke estava atakado de lo tuberkolosa, i agora bive en Sofia i se goadra mui muntcho,

845

Asta aki si eskapa la partida de la Biogafia de los 2 ermanos S-res Gavriel i Elijatche N. arie fin a el anio 5660-61.

846

Fin aki son eskritas todas las partidas de el Djerenansio de H. Elijatchuno, i de todos los vinientes detras de el por sus kaveseras, es ansi ke kada uno ke kerla kontinuar es libero