מיסיה דויד א. אריה כשהיה בירושלים (Tunos) ובטוניס

481

De aki endelantre si enpesa la
partida de la biegrafia de M. David
en su estar en Jeruchalaim i en los
otros lugares, de el anio 5646-5660-61

482                        Biografia de M. David A. Arie, en su estar en Jeruchalaim.            1886

En este anio de 5646, ke M. David ja estava en Jeruchalaim komo profesor en la Echkola de la Alijansa Jsraelid, i sovre todos los pasajes ke tuvo su ermano el S-r. Refael kon el baron de Rotchild, ja los eskrivi en su partida, i siendo ke kon telegrafo komando el Baron porke si li diera, a S-r. Refael las 60 liras, es ke salieron en su buchkida de el S-r. Refael, i siendo ke non lo estavan topandolo, si li avijan aderesado a el, porke i el tambien lo buchkara, ke M. David de el prisipio non savija de los apretos i el kuraje ke tuvo de azer, enfrente de el baron, por poder reuchir a todo lo avizado en su partida de el S-r. Refael, i de el grande espante i SAAR, ke si tomo, ke estuvo durmiendo a debacho de un arvol ke li avija tomado un foerte frio, lo izo lo todo por el bien de su ermano, i foe por esto ke lo enkontro kon algunas palavras, mas tokantes, i denpoes ke ja lo supo todo, el ja foe mui repentido, i li demando los mil perdones,

El foe mui maravijado de ver ke su ermano foe el mas kapatche de todos los otros ke ja avijan muntchos komo a el ke lo kerijan azer, ma non eran rezikijozos, i esto lo konvensio ainda mas a M. David, ke es verdad, ke su ermano, va reuchir, en todo esto ke el lo iva a kalkular, por el avenir i sigun ke ja foe ansi,

koanto a todos los uvligos ke si li tomaron de el S-r. Refael todos los izo M. David, por venirle en la ajuda, de non arivar en okazion de avregonsarse, ke esto li turo serka de 2 meze

483                         Biografia de M. David A. Arie, en su estar en Jeruchalaim.                 1886

fin ke si afermaron,

el kudijava, por los 2 IJOS los grandes de su ermano ke estavan en la Echkola de la agrekoltur, i de su ermana la Ester en la Echkola de los ofisios, i tambien ke la tenija a su S-ra madre en su kaza a los kudios tambien sujos, i non li estava siendo en sus ojos nada seja el kudijar komo tambien i el gastar, enfrentante de reintchir sus buto, por ser endependientes, i el era apenas ke podija tapar seja los gastes sujos komo tambien i estos de sus parientes i de su ermano tambien,

            En el anio de 5647, el kontinuava, en su lavoro de la Echkola, ke era mui kapatche por enkamenarla, i ansi era ke era kichto de todos los abitantes djidios de Jeruchalaim, el iva muntchas vezes a vijitarlo al grand Rabino Hr. Panijel i li plazija muntcho su konversasion porke el RAV, tambien konosija mui muntcho i al fondo la lingua Franseza, sovre todo ke si kontava tambien i moestro pariente, i ansi era ke lo protejava muntcho, en muntchas okaziones ke ja lo saven ke en Jeruchalaim avijan siempre muntchas defekoltades sovre las Echkolas de la alijansa Jsraelid, ke lo mas muntcho era de el partido de los Hahamim, ke lis paresija ke estos eran los presipios, de azer a los Djidios kristijanos, lo todo si bazavan sovre los misjonarios de los protestanes, ma era siempre ke

484                           Biografia de M. David A. Arie, en su estar en Jeruchalaim.                       1887

el RAV, los konvensija, el en la Echkola a los elevos los mas grandes los enpeso a enbezar, a kantar, de los marches Fransezes, porke el ja konosija mui bien esto de el kante, sovre todo ke en esta Familia ja existo esto de el kante en todos ejos, ke sigun si vee, i ke el DIO, engrasia a kada persona kon una dadiva, i aki en este linaje si vido ke de H. Refael ja enpeso este de kantar, i kontinuo, en todos ejos, i todos sus vinientes, seja en los ombres komo tambien i en las mujeres,

En el anio de 5648, m. David foe mui kontente ke su ermano ja si avija fraguado la kaza, i los IJOS ke ja avijan salido de la Echkola, lo mandaron a S-r. Refael a Samokov porke la truchera a su Familia, i es el ke li izo tomar los bilietos gratis seja de el vapor komo tambien i de el chemen de fer, para toda su familia, i tambien li dio i algo de moneda, para ke si pudiera, komportar, i fin a este tiempo los detinija a todos ejos en su kaza a sus gastes, i non li era en sus ojos nada de loke iva, gastando, solo por adelantarlos,

Su S-ra madre ke ja estava de mas antes, kon el lo izo en este anio ke la metio en una pansion, de las ke ja avia en Jeruchalaim, lo todo por ke foera mas mijor merada, i tambien mantenida, i lo mas muntcho porke tuviera de pasar kon otras mujeres komo a eja ke ja avijan ansi muntchas, ke en su kaza kon su mujer ke

485                           Biografia de M. David A. Arie, en su estar en Jeruchalaim.                       1887

estava tanto okupada, seja kon sus krijaturas komo tambien i kudjando la kaza, era ke non tenija el tiempo koando estarse kon eja, i el kerer de M. David era porke de agora i en delantre ke repozara ma eja non li foe por el presipio tanto a plazer, de esto ke la metio en pansion i esto lo vido mas tadre ke foe mas mijor,

En este anio ke li nasio a S-r. Refael un IJO eja su S-ra madre si foe en la kaza de la parida i estuvo fin denpoes ke pario otros 2 mezes, por vinir en ajuda de la kaza, eja siempre dava las loores al DIO, de ver a sus IJOS en ansi repozo i tambien ke eja ja estava mui bien vista, seja de sus IJOS komo tambien i de la djente ke eja pasava, kon muntchas amigos ke si gano en Jeruchalaim eja si konportava kon muntcha onor,

En el anio de 5649 ke li nasio a M. David una IJA, el kombedo a su ermano i toda su Familia i su S-ra madre, ke estuvieran en el Chabad ke la ivan a fadar a la IJA, i todos ke ja estuvieron, lo izieron en este dija sigun ke si azija en Samokov, koando tenijan ansi fiestas, i li mitieron el nombre REVKA? ejos todos si gustaron i si alegraron, i la parida ke ja era mui boena i sana, es eja ke la aletcho i la krejo i la kudio,

            el de mizmo kontinuava en la Echkola, siempre, lo azia sus liksiones ke lis dava a los elevos, ke si los repetava a

486                           Biografia de M. David A. Arie, en su estar en Jeruchalaim.                      1889

unas koantas vezes i kon esto era ainda seja de los padres de los elevos komo tambien i de los elevos mui kichto i kada uno de los elevos li traivan muntchos modos de prezentes, ke avijan tambien ke algunos li davan i prezentes en moneda,

            El tenija mas ke dava liksiones de el Franses a muntchos de los S-res mansevos seja a Djidios komo tambien i a los arabos ke de esto li entrava mas muntcho de la paga ke resivija de la alijansa Jsraelid,

            El nunka non dechava pasar las oras en baldes, i en el tiempo ke estava libero era dalijado [delijado] en los estudios ke estava, muntchas vezes en las notches fin a despoes de la media notche, meldando, i aparte ke el ja konosija algo la lingua araba torna kon todo azija ke tomava ainda mas liksiones en arabo, ke para esto era ke si tomava a los mas grandes, profesores ke avija por esto, i lis pagava sus mijor paga, sin azer la ikonomija,

En este anio de 5650, su ermano S-r. Refael aranko de todas las frutas ke el tenija de sus arvoles, lo todo las mas mijores, i mui enpakadas, las metio en 2 sestos i los kargo en un azniko i si las jevo el mizmo a su ermano porke li resiva, estas pokas frutas, ke son de los revinidos de sus revinido i ke si las koman a su gusto, i en mizmo tiempo lo kombedo, a el i a toda su familia

487                           Biografia de M. David A. Arie, en su estar en Jeruchalaim.                       1890

porke si foeron a su kaza en la kolonija ke li nasio, una IJA, i para fadarla ke estuvieran i ejos todos ke kon esto era ke si ivan a alegrar, i M. David li dicho ke ja tenijan de ir sigun i ke ja foeron i lo izieron en este dija tambien de Chabas^[5], kon muntcho ke i kantaron i se alegraron, todos djuntos, de mizmo i kon sus madre ke ja estava de unos koantos dijas de mas antes,

            En este anio ke estuvo algo malata sus madre eja non kijo estarse mas en la pansion parisiendole ke ja se iva a murir, i lis rogo a sus IJOS, porke la resivieran el uno de ejos en sus kaza, ke non si keri murir por los Hotelis, en tuviendo 2 ijos serka de eja, ke sovre esto todos los 2 li dicheron porke eja era libera para estarse ande lo kere, sin ke si travara por nada, i eja ke lo amava mas muntcho a su IJO el grande S-r. Refael lo izo ke si estuvo un sierto tiempo en su kaza i mas tadre si foe tambien i ande el M. David, i koando ja estuvo sana i boena eja ke ja si avija uzado a la vida de la pansion lo kijo torna de irse a la mizma pansion, i se topava mui bien kontente, porke ja topava a pasar la ora, kon otras mujeres ke ja avijan i tambien ke si iva djunto kon ejas a el KAAL, por todas las TEFILOD, de kada dija,

            En este anio de 5651, M. David sigun siempre ke ja vijitava a su ermano foe en este tiempo ke unas koantas simanas non

488                           Biografia de M. David A. Arie, en su estar en Jeruchalaim.                       1891

lo avija visto, i si foe el mizmo a la kolonia, i lo topo ke estava etchado en la kama, ke de esto si sikilio mui muntcho i sin tadrar, si foe i li mando al mediko i foe ke tuvo una frialdad, i kon las pokas kuras ke li djo el ja foe en 5-6 dijas sano i mui boeno, ke esto non lo kontava nada el S-r. Refael porke ja lo tenija en kada tiempo i ansi li dicho tambien i a su ermano, ma foe ke li dicho ke agora non es komo el tiempo de la mansevez, ke kale a dingun presio non decharse arivar a esto, en akejos tiempos koando uno ja pasava la edad de los 40 anios, ja era ke lo kontavan viejo, i ja non lo dechavan mas lavorar, a tiempo ke para el tiempo de agora, es al kontrario, ke ala edad de 30 anios es loke va a poder salir a el negosio ke fin a este tiempo apenas es loke estan podiendo eskapar sus estudios, i mas ke en la flor de las foersas, i el konsintimiento, koando ja non lo dechavan mas lavorar, es ke lo aparejavan para, la moerte, i koando la persona, esta en vazio, de sujo es ke ja si desforsa, i kae hazino, i sin ke seja su edad de murir ja si moere, por non tener dingun enbivisimiento, kijendo dizir ke la persona sigun mi edeja es ke deve de lavorar, i enbeveserse, en koalo la podra, mizmo ke terna la mas alta edad, i nunka non estarse en vazio i ansi es ke podra bivir mas muntcho i mas siempre estar sano, ke esto kada uno ja lo aparta, de las personas ke lavoran.

489                           Biografia de M. David A. Arie, en su estar en Jeruchalaim.                       1892

            En este anio de 5652 M. David ke era de mizmo kontinuando en su Echkola, i tambien en las liksiones ke el ja las dava a sus elevos partikulares, sin enfastijarse, en el momento ke el era libero lo azia de estudijar, i en mizmo tiempo iva eskriviendo i kompozando livros de estudio i resentando maneras de reglamientos sovre el adelantamiento de las metodas de el enbezamiento de los elevos en las Echkolas, ke este todo lo iva raportejando a la alijansa Jsraelid, en Paris, i sovre muntchas kozas de estos reglamientes li demandavan algunas explikasiones, i el si las deklarava, en mas antcho, i aparte el si okupava tambien i sovre las antekedades, seja de Jeruchalaim komo tambien i de su deredor, i de lo todo era ke lo iva eskriviendo,

Su S-ra madre en este tiempo si foe tambien ala kaza de S-r. Refael, en la kolonija, porke de moeve avia enpesado a estar flako, ke esto lis foe grande siklet, lo izo ke su S-ra madre si lo dicho a M. David ke este asigundamiento de la flakeza de su ermano a eja non li estava siendo ke li podra ser boeno ke de esta manera foe tambien i sus S-r Padre i eja li rogo porke foera i lo viera, i ke tomara algunas mizuras mas seriozas, seja ke i lo jevara a jeruchalaim seja ke li mandara midikos i lo todo mas presto,

I M. David visto a esto en el mizmo dija si jevo kon si a la kolonija a un mediko ke ja la tenija merado i la otra vez ansi hazino, koando estuvo, ke el mediko koando ja lo vido foe ke non li plazia, i lis dicho ke non era el menester de dezrepozarlo

490                           Biografia de M. David A. Arie, en su estar en Jeruchalaim.                       1892

i de non jevarlo en dingun lugar, ke el ja tiene de kudijarlo en su kaza, solo ke kalia vijitarlo en kada dia ke esto, li dicheron ke lo iziera, i ke ja tenija de ser pagado mas muntcho de su paga, ke lo enpeso a merarlo ma foe ke en nada non li pudo dar dingunas ajudas, i dija kada dija iva endo mas flako, fin ke pokos dijas pasando kedo moerto para siempre i foe mui grande manzija, ke de este siklet foe ke estuvo etchado i M. David hazino serka de un mez, i lo joro longo tiempo,

En el anio de 5653, M. David los akonsejava a sus sovrinos, i tambien los guijava, i los enkamenava, por todos los menesteres de el lavoro de sus tieras, i los enkorajava, porke si kontinuaran lo todo sigun ke en el tiempo de sus padre i ke foeran siempre aunados, i kon los IJOS i las IJAS mas tchikas si las tomo el kon si i las kudijava para ke kontinuaran las Echkolas i las detinija en su kaza para guijarlas, i aparte era siempre ke los vijitava, i lis demandava, de todos sus lavoro de kada dija, lo todo lo azija sin enfastijarse, ke de esta manera, foe ke si foeron kamenando siempre adelantre i M. David el gustava mui muntcho de verlos a sus sovrinos ke ja eran mui bien aunados,

            En este anio a M. David li avia enpesado a kurtarse la vista de sus ojos, ke esto li apretava muntcho i ansi era ke non

491                           Biografia de M. David A. Arie, en su estar en Jeruchalaim.                       1893

estava pudiendo kontinuar sus estudios i mizmo tiempo i sus eskritoras ke sovre esto lo izo saver a la alijansa en rogandose porke lo mitieran en algun otro lavoro por algo de tiempo fin ke si podija milizinar, algo de tiempo, ke este lo topava, de loke si okupava muntcho en la Echkola, i ke li era mui foerte a darles a entender a los elevos ke sus lingua era solo en arabo i ke non podijan tomar tanto presto el istil franko, i sovre este la alijansa tomaron en mano su reklama, i lo asiguraron por reintchirla,

En este anio de 5654, foe ke a M. David si li enfortesio mas muntcho el akurtamiento de la vista de sus ojos, i los entojos ke el los jevava li kalio de los abandonara, i meterse otros mas foertes, i mizmo ke ainda non li avija venido el orden porke la [de]chara la Echkola, el non iva mas i poko tiempo pasando ja lo remplase otro profesor, i a el lo nomenaron komo eskrivano en las kolonias de Jeruchalaim i de su deredor, i kon esto el ja tenija repozo, i ansi era ke iva indo mas muntchas veses a la kolonija de Richon le Sijon i lis dava konsejos a sus sovrinos i en mizmo tiempo los akonsejava i los enkorajava i tambien los ajudava, en muntchos menesteres de sus etchos de sus tieras,

el si okupava en este tiempo por espozarlo a el S-r. Gavriel ke en esto tuvo boena reuchita tambien i izo las kundisiones

492                           Biografia de M. David A. Arie, en su estar en Jeruchalaim.                       1894

sigun el dezejo de su konijada, i lo todo lo dicho a la klara sin nada guadrar, en kontandoles seja a el padre de la Novija komo tambien i a la Novija, i non lo izo sigun ke algunos si alavan seja sus pozision en non siendo, i las prometas komo iluzionadas, por la vida ke la van a pasar, i la Novia kriendose a las todas prometas i denpoes ke ja kazan i non son reintchidas, de sujo es ke si lo prontan de antes para non bivir kontentes, i lis kavza naser pleitos i kechas, sin tener el menester, i es para toda sus vidas non bivir kontentes, lo koal ke esto ja lo tengo visto en muntcha djente konsensioza, ke lo deklaran seja sus pozision seja sus vida de el komporto i regla de sus kaza, lo todo de antes, i koando son de akordo de todas las 2 partes, es ke si toman las manos, i lo azen, i de esta manera son aparejados para bevir alegres i bien kontentes, en toda sus vida, ke ejos van a estar kazados,

            En el anio de 5655, a M. David, li nasio un IJO, ke i en este parto los jamo tambien a sus sovrinos i estuvieron todos en el dija de el BIRKAD MILA, ke komieron i se alegraron todos djuntos, i lo jamaron REFAEL, de mizmo era ke su madre lo kudijava i lo krijava, i su S-ra madre era ke estava siempre de 2 a 3 mezes fin denpoes ke parija, i de moevo se iva a su pansion ke ja estava de mas antes, porke eja ja non kijo estar mas kon sus IJOS, sigun ke

493                           Biografia de M. David A. Arie, en su estar en Jeruchalaim.                       1895

ja lo eskrivi mas antes ke ja si avija uzado a la vida de la pansion, i ke ja si avija etcho muntchas amigas,

en este tiempo ke sus sovrinos kijeron merkarsen ainda mas tieras, foe ke li rogaron a sus Tio porke lis foera en sus ajuda ke era ke tenijan de menester algo de moneda i el ke ja los ajudava muntcho ma moneda komo non tenija foe ke lis topo de otro lugar la suma ke ejos la kijeron kon ke pagaron tambien i los enteresos i estas merkidas de las tieras ke si las vendijan de los unos a los otros, era ke si eskapava lo todo vija de el derektor de la kolonija, lo todo para ke non uvieran denpoes dingunas deferensijas

En el anio de 5656, ke si kazo su sovrino S-r. Gavriel foe el Sandak M. David, sigun ke ja lo eskrivi en la partida de los IJOS de S-r. Refael i M. David li dio a la Novija muntchos prezentes, i denpoes de la boda el los kombedo en su kaza, ke estuvieron komo una semana, i en este tiempo tambien los kombedava i a los konsfoegres, para alegrarsen djuntos,

en este tiempo li vino el orden de la Alijansa, ke si prontara, porke lo ivan a nomenar komo derektor en la Echkola de tunis, ke en akel tiempo era Turkija i agora ke esto eskriviendo la dita Biografia en el anio 5673-1913, ja es Fransia, ke mas non uvieron ansi Echkolas sostenidas de la Alijansa Jsraelid, i sovre esto

494                           Biografia de M. David A. Arie, en su estar en Jeruchalaim.                       1896

ke lo nomenaron de moevo ja foe mui bien kontente, sovre todo ke la paga tambien iva a ser mas grande,

            i el enpeso a reglar sus kontos ke si li tinijan konfijado por en su tiempo entregarlos i tambien los akonsejava, i a sus sovrinos por ke si komportaran a detras de sus komandos ke el lis dava, i ke ja tenija tambien de siempre eskriviendoles, lo todo era mas muntcho sovre los mas tchikas IJOS i IJAS de su ermano ke el las kudijava, komo a sus propios ijos,

En el anio de 5657, ke a M. David ja li vino el ordin porke partiera por Tunis, i sus kontos de la mision de eskrivano ke tenija si lo entrego a el derektor de las kolonijas, i en su kaza lo reglo por sus pasadijas, i komo tambien sigun ke ja lo eskrivi por los IJOS los tchikos de su ermano ke los detinija a los sujos kudios, ke foe ke los resento en una pansion ke era grates i ansi de mizmo kon su S-ra madre, tambien en la pansion i el partio solo, ke si era ke iva a poder estar mas longo tiempo era ke si la iva a jevar su mujer kon sus krijaturas,

El apenas ke estuve algo de tiempo en Tunos foe ke la Echkola la seraron porke ja foe ke la okuparon los Fransezes, ma M. David estuvo kaje el anio entero en vazio en tunis, i en este tiempo el non estava en vazio i lo azia ke dava liksiones, a mansevos lo mas muntcho de Djidios, en la lingua Franseza, ke esto lo tenija

495                              Biografia de M. David A. Arie, en su estar en Tunis.                          1897

ke era mui pratik por enbezar, al otro i savia la metoda sigun ke si keri enbezado, porke i esto tambien es una de las dadivas de el DIO, ke lo engrasija a la persona,

El era mui maravijado de los uzos de esta sivdad, en los Djidios ke eran enteramente deferentes de los de las partes moestras, i la mas maravioza li foe ke el ke estuvo en una kaza kombedado por unos koantos dijas ke era en una kaza de los mas grandes rikos i notavles de la sivdad, i iva viendo muntchas mujeres i todas komo S-ras de la kaza, ke el koal S-r. tenija tambien 3 IJOS los todos grandes i ke ja eran kazados i enteresandose a saverlo por estas todas mujeres ke el las iva viendo, foe ke demando a el un IJO i li dicho en amostrandoselas, a kada una, i li dicho ke las 4 mujeres eran de el padre ke estava kasado kon ejas kon ketuba i kiduchim, i de las koalas las 2 era ke podijan parir i las otras 2 ke no ivan a parir, i kon las otras eran ke tinijan todos 3 ermanos a 3 mujeres, i todos los 3 ermanos tambien kazados kon ketuba i kiduchim, i kon las kondisiones ke solo la una de kada ermano ke podija parir i las otras era al plazer de el marido komo la alesensijava, era ke podija parir, i todos bivijan en una kaza, i se pasavan todas mui boenas, ansi tambien i ejos, el ja lo vija en Jeruchalaim, ke algunos si tomavan a 2 mujeres ma era ke avija alguna razon, i esto kali dizir ke non si enkamenavan a detras de moestra LEI otro ke lis foe a ejos kedado komo uzo, i mas mijor era ke estas mujeres kalija ke

496                              Biografia de M. David A. Arie, en su estar en Tunis.                              1897

foeran todas godras porke sus vistidos non lis korespondejavan komo eran flakas, i sus vistimientas eran de ropas las mas finas i apegadas a sus karnes sigun se visten las aktrisas, koando djugan en los tiatros i otros lugares, i akeja ke era flaka la engodravan kon mantenerla solo kon kuskusu, ke es una manera de supa, kontiniendo masa kon goevo, i de una manera de arozikos ke los azijan en kaza i mizmo de masa kon goeve sigun ke azen por mozotros la tarana, i kon este mantinimiento dize ke si engodravan en un enterval de 2 mezes ejas goadravan el harem komo las turkas, i koando salijan a la plasa era ke si vistijan de feredjes i jachmakes sigun las turkas, i ansi uzos avijan muntchos, ma non si poeden eskrivir, ke esto todo en este tiempo kali seja ke ja si trokaron todos,

En el anio de 5658, foe nomenado de moeve komo derektor en la Echkela de Jeruchalaim, i se vino de moevo i foe mui kontente, ke el ja si avija enbezado, todos los andares de Jeruchalaim i tambien ke ainda kerija ke los IJOS de su ermano si enfortesieran mas muntcho sovre los lavoros de sus tchiflik ke ja lis foe agora mas grande, i tambien ke ja estavan i sembrando, los arvoles de las azeitunas, ke de este si gusto muntcho M. David,

En este anio ke li nasio el primer IJO a S-r. Gavriel le izo ke si foe el kon su mujer a la kolonija, i estuvieron fin

497                           Biografia de M. David A. Arie, en su estar en Jeruchalaim.                 1898

fin a el dija de el Birkad mila ke lo keto M. David kon su mujer^[6] i en este dija lo izieron komo boda, sigun ke ja lo eskrivi en la partida de los IJOS de S-r. Refael,

Kon la vista de sus ojos ke los tenija malatos en este anio ja estuvo sano i boeno ma los entojos non si los keto, i kon las liksiones ke dava de mas antes en partikular foe ke de moevo, enpeso a darlas i en esta okazion tuvo mas muntchos elevos, foe ke avrio tambien i una Echkola i su mujer, para dar liksiones a IJAS i de esto tambien tenija ke tomava boenas pagas, porke i eja tambien konosija mui bien la lingua Franseza,

En el anio de 5659, li nasio una IJA, ke kon la koala tambien lo izieron sigun todas los otros partos, i en el dija de Chabad kombedo a algunos Hahamim i sus todos parientes ke ja estuvieron la fadaron a la IJA i la jamaron JEDIDJA,

visto ke agora ja si li estava engrandisiendole la Familia i el ke ainda non avija pudisto nada avansar, de tantos anios ke ja era derektor i visto a los otros profesores ke avijan salido kon el Djuntos, kaje ke todos ja avijan amontonado sumas bastantes, ke kada uno sigun ke lo pudo ja foe kapatche de meter a la vanda koal suma grande i koal mas tchika, i el ke ainda non tenija ni nada foe ke esto lo izo algo abatirlo i ansi foe ke empeso a azer

498                           Biografia de M. David A. Arie, en su estar en Jeruchalaim.                       1899

algo de ikonomija en kaza, parisiendole ke iva a ser de esto ke si podija enrekeser, i viendo ke de esto non va levantar kavesa, lo izo ke foe dando mas muntcha foersa a las liksiones i tambien su mujer ke ja iva tambien boeno tomando lo azijan ke estas ganansias, las ivan metiendo en la banka, i en un enterval de un anio ejos ja pudieron avansar, una boena suma redonda i kon la paga ke resivija de la alijansa era ke si ivan pasando, ma esto non li estava siendo bastante visto a todos los otros, ke ja estavan todos boeno rikos, el lo kalkulo muntcho tiempo esto i en sus kalkulos ja lo kombenava ma era ke si kirija tambien i la okazion i esto fin a este tiempo non lo pudo alkansar ,

En este anio de 5660-61, M. David de mizmo era ke kontinuava en la Echkola de Jeruchalaim, lo todo sigun de antes, i de mizmo tambien i kon las liksiones ke el i su mujer davan a los elevos en partikular, ma sigun ditcho de mas antes ke a el si li avija envistido esto ke non estava pudiendo avansar dinguna suma, de moneda, i sovre ke sus sovrinos agora ja estuvieron mui bien resentados, el tuvo muntcho a pensar sovre el sujo avenir,

Ansi foe ke mas tadre lo izo ke enpeso a eskrivir a la alijansa jsraelis en paris, rogando porke lo nomenaran en algun otro lugar, kon algunas siertas razones ke el lis iva eskriviendoles

499                           Biografia de M. David A. Arie, en su estar en Jeruchalaim.                       1900

i mas tadre i denpoes de la data ke esta Biografia es eskrita, el foe nomenado en otras Echkolas, ke estuvo tambien en Pitola [Bitola] i en Silanik, i tambien i en Rustchuk, ke en su estar en silanik el si resento una Echkola partikular i non foe mas de parte la alijansa, ke en esto alos presipios tuvo boenos elevos i li iva endo su Echkola partikular mui bien ma mas tadre non tuvo mas konto de detenerla, i ansi foe ke li kalio la abandonara, i si foe a Paris i si enpeigo en una grande libririja en Paris, kon una paga bien konvenible, i si estabelisieron en Paris, el i su mujer i sus mas tchikas krijaturas i estan biviendo mui kontentes, i koanto a su IJO el grande S-r. Avraam, ke el koal denpoes ke ja eskapo todos sus estudios, tambien en Paris el estudio sovre la muzika, i la mas grande foersa la djo sovre el djugar en el pijano, i siendo ke esta dadiva de el DIO, ja existe en este LINAJE, entero, es ke i el tambien li travo a esto i si lo enbezo al fondo i tiene la depluma de profesor sovre el kante i es agora ke su negosio es esto ke en Salunique el lis da liksiones en muntchas kazas de los S-res ke tienen Pijanos, i todos buchkan a el ke save tambien i enbezar, ma por dezgrasija el koal ke sufrio longo tiempo de un foerte rematizino es ke kedo sakat de la una patcha, i si metio una patcha postiza, kon muntchas machinirijas, ke si sierve kon esto para kamenar, i li kale se ja koando va abachar or ke va asovir eskaleras li kale ke la kordeja por la parte ke lo tiene el menester, i ansi por kamenar seja presto or avagar i tambien i por asentarse i levantarse, ke es ke el dize ke ja si enbezo

500                           Biografia de M. David A. Arie, en su estar en Jeruchalaim.                       1900

a esta vida, el ainda non esta kazado ni ke pensa por kazarse, i tiene su kasa ke alkelo en Selanik, kon ke es sirvido de una mosa ke li pronta la komania, i li mira la kaza, ke i en kaza tambien el resive elevos para darles liksion de el pijano,

            I mi ijo Jean koando estuvo en Selanik en el tiempo de la guera de los alijados governos de los balkanes en el 1913, estuvo en su kaza en una notche de Pesah, i li plazio mui muntcho su komversasion, i li plazio tambien de ver ke si li alavo ke si ganava de 500 a 600 frankes a el mez.

501                                                      LIBERO.

Es alesensijado, kada miembro ke es de la Familia ARIE, koando lo kerla para kontinuar, por el avenir, su biografia, i en tomandose, una kopia, seja de solo su partida or seja de la de su Djerenansio, de ande es vinido, i kontinuar adelantre, i esto kon la kondision de non enmankar ni menos pujar nada de esto ke ja esta eskrito en esta biografia djenerala, i ansi de mismo es alesensijado tambien de tomarse i kopia de la biografija entera, kon dechar la partida suja a el kavo para ke poeda kontinuar sus eskrituras, i esto lo poede azer solo akel miembro ke es nasido de la Familia ARIE.

502                                                      FROTCHIGUAMIENTO

En el linaje de H. Refael, el frotchiguamiento i el muntchiguamiento de almas, foeron en el tiempo de 89 anio kontando de la data ke kazo H. Refael ke son 89 anios fin a la data de la dita biografia, si veja ke foeron todos los nasidos, 38 almas, i paridos de 10 madres, ke las koalas foeron todas de Familias ajenas, a de los koalas nasidos foeron los 20 matchos i las 18 embras, i de los koalos murieron fin a este tiempo las 8 almas ke son los 4 matchos i las 4 embras de una edad preporsional de 41 anio, i adjuntando tambien i las 6 madres ke i estas ja entran en la familia Arie, son bivos 44 almas, lo todo fin a la data de el anio de 5660, i de los matchos non existe en Samokov ni el uno de ejos, i biven los unos en Paris, Pazardjik, Selanik, i Richon lo Sijon, ansi de mismo i kon las embras ke ja son kazadas todas biven en deferentes sivdades,

503                                                      MATANA ILLAI DADIVA.

            A detras de loke si veye, en todas las partidas eskritas en esta biografija, de el LINAJE, de H. Refael, es ke foe de la onestedad, i kon la amor de el kante, todos ejos en sus vida kaje ke sufrieron por sus mantenimiento, i lo mas de ejos foeron siempre dependientes para poder alkansar sus mantinimiento, i las sus onestedad non los decho trezjarar, por apartarsen de sus onestedad, ejos tuvieron muntchas okaziones para podersen enpatronar de sumas de moneda bien enportantes, ma nunka non lo izieron, mizmo ke sufrijan tanto, ke las sujas konsolasiones eran siempre kon kantar, i esto los azija ulvidar i siempre si servieron de esto seja en los tiempos de lo boeno ansi tambien i en los tiempos de lo non boeno, i visto ke kon esta dadiva, de el kantar foeron engrasijados, de el DIO, es ansi ke el un Inieto, de H. Refael ke es IJO de M. David, es profesor de el PIJANO, i su mantinimiento es de esto,

Koanto al LINAJE de el S-r. Haimatche, en siendo ke foe solo i non tuvo desendientes matchos, es solo ke en su vida, foe siempre neotral,

504

Asta aki si eskapan todas las partidas de su biografia en el Linaje de H. Refael A. Arie, i eskritas en Sofia fin el 26 oktombre 1913 i 8 Hechvan 5674

505

[עמוד זה נמצא ריק בגרסה הישראלית

של הכרוניקה וכן בתרגום אשכנזי.

בראש העמוד רשם המחבר את

מספרו, אך הותיר אותו ריק.]