הסניורים מושונצ'ה, נעימצ'ה, שמואלצ'ה, שותפים

1399

De aki i endelantre si enpesa, la partida de los 3 ermanos, S-res. Mochonatche, Naimatche, Chemoelatche, por ke a penas ja si salio sus ermano
El S-r. Davitchonatche,

1400          Biografia de S-res Mochonatche, Naimatche, i Chemoelatche, J. Arie.        1877

                En este anio de 5637, ke el S-r. Davitchonatche, ja estuvo espartido, kaje enteramente de los kontos de Samokov, foe ke vino el S-r. Naimatche de Kostan por reglar i los kontos de la banka de Kostan, porke tenija i el parte en esta banka, i el non kijo vinir antes ke si reglavan los kontos de Samokov ke lis turo longo tiempo i lo mas era kon litigas, i koando ja estuvo unos koantos dijas ke el ja lo trucho todo pronto ke ja lo iso reglar de sus eskrevanos de Kostan, anke ke tuvieron i algunas defekultades ma ja non foeron komo estas de los kontos de samokov, i por estos kontos tambien ejos si dieron de parte a parte los dokumentos menesterozos, i los afirmaron, kon todos las batalnamas^[4], kon los EDIM,
El S-r. Naimatche, sigun mi tenija ditcho, ke visto, las defekultades, por la espartision, kon el S-r. Davitchonatche, foe mui deskorajado, i visto tambien las reboeltas de la Bulgaria, ke los Rusos, ja estavan arientro de la Bulgaria, i ke era solo en la sivdad, de Plevna, ke estava el Turko, foertemente detiniendose, soto la komanda de el komandir, OSMAN PACHA, i ke kaeron mui muntchos, soldados Rusos i sus komandires, en las batalias de Plevna, i la gera entera estava dekolgado, solo en Plevna, i en plevna tambien estuvo i el grand duk Nikolas, para komandar la armada Russa, i Osman Pacha ke era el mas grande komandant de el Turko, supo muntcho tiempo, defenderse de los Rusos, i la suma de armada ke tenia el Osman Pacha debacho de su komanda era, de serka 80,000 almas, i kon esta suma de armada vinija kontra a 350,000 almas de los Rusos, ke estavan a los

1401         Biografia de S-res Mochonatche, Naimatche, i Chemoelatche, J. Arie.         1877

deredores de Plevna, i el espanto era mui grande en toda la djente porke si en kavzo los Rusos si enpatronavan de Plevna, esto ja lis era bastante para ganar la gera, i a todos los ke moravan en la Bulgaria lis paresija, ke en entrando el Ruso, iva a matar a toda la djente, i en mizmo tiempo tambien ke iva a kemar todas las sevdades i los kazales, lo koal ke foe djusto la kontra, i por esto foe ke una djente buchkaron a salirsen de la Bulgaria, si entiende, los poderozos, ke ja si podijan sostenersen, i esto kali dizir ke foe un grande jero, visto ke en general, por lo mas de estos ke si foeron i ke eran en el boen séer, koando ja boltaron foeron en manko de sus furtunas i estos ke non si foeron foe todos ke si enrekesieron, vino a ser ke los ke non si foeron a el presipio foeron repintidos i los ke
si foeron a los kavos tambien foeron repintidos, es ke de todas las 2 partes uvo repentimiento, koal repintimiento es mas valable? Es digo los ke si foeron son mas repintidos, ke anke estavan todos iva i el a estar, i otra razon foe ke los deskorajo mui muntcho las operasiones de la borsa ke lo azijan seja en Kostan komo tambien i en Samokov, i los rebachos ke foeron a de una mui grandes foe ke tuvieron tambien i algunas piedritas, i por ke si meraran kada uno sus edeas
Sus espartision los foe mui kolai ke si lo avinieron entre ejos a las solas, ke ejos en el anio de 5630 ke si avijan etcho Haverim, todos 4 ermanos, denpoes ke ja si avija salido Tch. Avraam sus hevra foe solo en la moneda ke tenijan en sonante, i kon los mulkes i otras kozas, era aparte kada uno por si sigun de el bilanso,

1402         Biografia de S-res Mochonatche, Naimatche, i Chemoelatche, J. Arie.         1877

de koando se aparto Tch. Avraam, i lo enpatronava kada uno por si aparte, i todos los revenidos ke si tomavan, de los mulkes era ke si lis akredetava, a kada uno en su partida, i ansi era i por a koando si azijan algunos gastes, i dasios ke pagavan era tambien ke los adevetavan, i se alguno de estos mulkes seja ke los vendijan or seja ke si merkavan era de mizmo kada uno por su konto, i todos estos kontos era ke si jevavan en la mizma kanselaria ke ejos estavan, i para lo todo era una kacha, i koanto a el kapetal ke li metieron a S-r. Naimatche, por la banka de Kostan, ke era el Derektor, era tambien a proporsional de los kapetales ke tenijan en la kaza de samokov, i foe esto loke aranjo kon el S-r. Davitchonatche, por la soma de kapetai ke li apartenija a el S-r. Davitchonatche, en la banka de Kostan entre la konvension foe ke li djo S-r. Naimatche la 1/2 kaza, por su
presio a S-r. Davitchonatche, esta ke la tenija en Hevra kon S-r. Davitchonatche, i li djo tambien i algunos fondos Turkos i por el adjusto si li adevito a pagarle en algunos tiempos en ratas, en moneda sonante, i kon los otros ermanos S-res Mochonatche i Chemoelatche,
lo izo kon ke si konvinieron a darle S-r, Naimatche todo esto ke lo enpatronava, en Samokov de los mulkes, kon los presios ke izieron algunos trokamientos, de loke los tenijan nombrado, i aparte lis djo tambien i la suma de moneda ke tenija de kapetal, en la kaza de Samokov, sin ke apartaron dingunos de los averes tchuruk ke non si podijan kovrar, i por enfrentante el S-r. Naimatche, si resivio las partes de todos los 2 ermanos, el S-res Mochonatche, i Chemoelatche, de

1403         Biografia de S-res Mochonatche, Naimatche, i Chemoelatche, J. Arie.         1877

esto ke tenijan de parte en la banka de Kostan, i esto non foe kon merarsen kontos, or azersin bilansos, por balansar djustamente, era ke ariva abacho ivan tomando notas, i lo izieron komo un avinimiento al amigavle, i sovre ejo se izieron kontratos, entre ejos, deklarandosen por la espartision de lo todo, en diziendo ke S-r. Naimatche, iva a enpatronar de todo el dar i aver, de la banka de Kostan, i los S-res Mochonatche i Chemoelatche, ke ivan a enpatronar, de todo esto ke li podija apartener, seja en mulkes komo tambien i en moneda, a el S-r. Naimatche, lo todo de la kaza de Samokov, i sin ke poeda aver mas dingun trokamiento, i los afirmaron denpoes ke ja si kontentaron de todas las 2 partes, i foe ansi ke si aparte tambien i el S-r. Naimatche, i foeron kontentes, (por esta manera de espartision, kale taksar ke aparte de estos 3 ermanos ke ja foeron siempre mui avenidos es tambien ke en las 2 partes ternijan poede ser i algunas sikretas edejas, sin nada nombrar),
El S-r, Naimatche, mui kontente de esta espartision, i ke mas en Samokov ke ja non li kedo dingun patronage, i pasando pokos dijas, si rekojo todo esto ke li podija valer por jevarselo a Kostan lo enpako, i loke non li parisio ke non li varla [valer] por kostan,
de ejo enpresento a algunos i algo si konvino kon sus torne 2 ermanos i se los vendjo a ejos, i en una demanijana ejos partieron djuntos su mujer M. Rahelutcha kon sus 2 Ijas M. Eliza i Sara, kon sus paitones ke ja los tenijan en kaza, i akompanijados de 2 i 3 turkos armados fin a Saran Bei, la Stasion de el Chemen defer, ke es lechos, de

1404         Biografia de S-res Mochonatche, Naimatche, i Chemoelatche, J. Arie.         1877

Samokov komo a 8 oras, mui kontentes i a el sigundo dija ke ja arivaron en Kostan ejos ke ja tenijan la kaza pronta, se repozaron i se resentaron mui presto, ke la M. Rahelu ja era mui meradera de la kaza i mui boena nekotchera, en todos los puntos, i el S-r. Naimatche de mizmo se foe en sus banka, ke ja lo enkamenava lo todo, su haver, el S-r. Baruhatche, ke era una persona mui amable i boena, i eran mas muntcho de ermanos loke si pasavan i se konvenijan,

1405

         Asta aki si eskapa la partida de el tiempo foeron Haverim los 3 ermanos S-res Mochonatche, Naimatche, i Chemoelatche, i ke si espartio S-r. Naimatche,