צ'. יהודה ואברהם מ. אריה והסניורים מושונצ'ה ודויצ'ונצ'ה

1213                 Biografia de Tchelebi Jeuda i Avraam M. Arie i Mochonatche.         1858

lo amenazarijan i li darijan a entender, todos los otros maadendjis ke kon esto iva a ser kavzante de traerles la ruina a todos ejos, i koanto a los danios ke podija tenerlos ja si poede taksar ke i se lo pagarijan i komo kaimakam ke era siguro ke lo tomava i esto en mano, i tambien ke ejos son ermanos,

              Ejos los 2 ermanos de koando si avijan etcho Haverim en el anio de 5614 ke si avija apartado Tchelebi Gavriel, ke non si tenijan merado bilanso, foe en este anio ke ejos si meraron bilanso ke lis turo komo a 2 mezes, i denpoes ke ja resentaron todos sus livros, i se lo notaron en tchikos livrikos, por kada uno, kon azersin sus partidas aparte figurando i sus % ke ejos tenijan, konforme a el kontrato de 5614, i koando ja arivo el etcho por asenijalar tambien i las %, li dizen a Tchelebi Avraam ke su % era de 35 %, atiempo ke era sigun sus kontrato 40%, i Tchelebi Avraam por demostrarle esto, si foe a la kacha ande lo avija dechado su kontrato, ke esto ja lo eskrivi mas antes, i en non topandolo ejos tuvieron algunas ditchas i defekultades, por esto de el kontrato ke estuvo pidrido, ma ejos non kedaron atras de sus etchos i kon la kontentes de todas las 2 partes si aunaron de moevo por restar torna haverim, i lo izieron de moevo kontratos sin ke asenijalaron las % ni menos ke los afirmaron, ne ke espartieron a kada uno esto ke li tokava de ganansijas de los 4 anios ke ejos lavoraron, i en la partida de S-r. Mochonatche, denpoes ke li metieron esto ke li tokava de ganansia li rebatieron 75,000 gr. por S-r. Davidtchonatche, en entrandolo tambien i a el a

1214                  Biografia de Tchelebi Jeuda i Avraam M. Arie i Mochonatche.             1858

esta hevra, kon decharle a S-r. Mochonatche 125,000 de el primer kapetal, i lo izieron las %, ke li kedavan a Tchelebi Jeuda 45%, i Tchelebi Avraam 40 %, i S-r. Mochonatche, 10, % i S-r. Davidtchonatche 5 %, i se izieron kada uno una kopia de el bilanso, i se lo goadraron kada uno en su kacha i sin ke foeran afirmados, kon la entision ke el kontrato viejo de la manera foesa kalija ke si topara, i ejos si metieron de moevo a el lavoro, sigun de lo todo ke ja lo azian i de antes, solo ke lo mas boeno ke ejos tenijan era, ke seja litigas seja deferensias, ke las tenijan en la plasa, non lo amostravan seja en kaza komo tambien i a otra djente, i era ke siempre vinijan en un kavo, seja en las notches komo tambien i en los Chabatiod, i los moadim, i se vijitavan i komijan i bivijan, en un kavo i kantavan i se alegravan, sin ke pudiera dinguno nada saver, i ansi era ke toda la djente si enselavan, de ejos de el grande aunamiento, ke tenijan, i ke si respektavan mui muntcho de los unos a los otros, ke koando otros ermanos ke tenijan sus deferensias, i ke eran araviados por aunarlos era ke lis metijan el komporto de los Aries de delantre por sus boenos komportos i los respektos ke ejos si los tentjan, i ansi era kon este enchemplo ke los podijan konvenir, a toda vija es mui verdad, ke si konvenijan mui presto, i lo ulvedavan todo lo pasado, i kale saver tambien ke si pagavan mui muntcho de la razon i era lo todo kon mui grande deretchedad, i non komo agora ke las enemistades estan entrando asta el koeso [goeso], sin peadad i para nunka mas ulvedar, ke lo todo kale seja ke los grandes estudios,

1215       Biografia de Tchelebi Jeuda i Avraam M. Arie i S-res mocho. i David       1858

              En este anio enpesaron a fragoarlo el Kaal Kadoch moevo de Samokov, sigun ke ja lo tengo eskrito en las partidas de mas antes, ansi de mizmo tambien ke ja lo tengo eskrito por el Midrach Arié ke apartiene a los 3 ermanos Tchelebi Jeuda Gavriel i Avraam, ke lo fragoaron en igoal parte, ansi de mizmo i kon todos los livros i Sefer tora i toda mobilia, es de el patronage de los ditchos 3 ermanos sin ke tenga mas dinguno parte, ni menos demazija ni manko en siendo el un tersio ke lis apartiene a los desendientes de Tchelebi Jeuda i el sigundo tersio, a los desendientes de Tchelebi Gavriel i el treser tersio a los desendientes de Tchelebi Avraam,

               En este anio ke pario, la S-ra Behurutcha IJA de Tchehelebi Avraam una Ija, ke la jamaron JAFA, foe ke devino PAPU, el tchelebi Avraam en la edad, de 36 anios ke en el parto lo izieron sigun todos i ke ja lo eskrivi, mas antes, en sus partida,

              Entre todos los Hachares, ke tomavan foe en este anio ke lo tomaron tambien i el Hachar de el departamento de Prizdren, i siendo ke de ejos non uvo ken ke si foera por enkamenarle seja ke lo podijan venderlo or seja por ejos diezmarlo foe ke si lo rekargaron a H. Elijatchuno, ke ja li tenijan grande konfiensa, i el ke ja lo resivio a irse, kon ke li pagaron sovre de a 750 gr. de paga a el mez, i el ke ja estuvo en estos lugares ke son tanto espantozos a razon ke son lo mas muntcho arnautes, i todos siempre armados, ke non si lis enporta, por la mas tchika deferensia lo matan a la persona i non ai kon ke los kondine, en sus bokas todo es koando matan a

1216    Biografia de Tchelebi Jeuda i Avraam i S-res mochonatche i Davitchonatche     1858

alguno lis dizen KROK ZA KROK, (kavesa por kavesa,) i en sus ojos es komo degojar una gaina, ke saviendolo esto i la rekolta ke non estuvo tambien tanto boena, lo izo ke lo foe vindiendo kazales por kazales i esto sin dingun profito, en esta sivdad non biven DJidios, a razon ke los matan i en este anio anke ke ja uvieron mas algunos pasajes ma siendo ke ja estan eskritos en las partidas de los otros parientes es ke non lo asigundo a eskrivir i aki i el enteresante poede meldar, en las partidas de este anio, en los otros parientes,

               En este anio de 5619, li merkaron i la otra metad, de el maaden de radoil, djunto kon 2 vignas, de el Hadji Ibraim, kabran, por la suma de 150,000 groches, i esto sin la Kule, de kampania ke tenija el Hadji Ibraim, en el kampo de rudech, ke era una mui muntcho ermoza Vila, ke esta Vila en el anio de 5626, la tuvo merkado, el S-r. Behoratche Jshak G. Arié ke la merko kon mui muntcha kerensia, i denpoes ke ja li izo todas las reparasiones, menesterozas, i ke la mobelio, sigun de loke lo premija, foe ke de tantas deferensias ke uvieron, si la tomo el S-r. Mochonatche, sigun ke ja lo eskrivi el paso entero en la partida de el S-r. Behoratche por la razon ke li foe tomada, ke sovre esta etcha el S-r. Behoratche, i toda su Familija de mizmo i todos los parientes si sekilijaron mui muntcho, fin a el grado ke S-r. Behoratche se izo hazino,

               I agora ke ja foeron patrones de el maaden entero,

1217   Biografia de Tchelebi Jeuda i Avraam i S-res mochonatche i Davitchonatche     1859

kon sus 4 vignas, si metieron kon mas gana en el lavoro, i el maden ke ja era boeno, ke ketava el mijor fiero de todos los otros maadenis i ansi era ke lo vendijan siempre mas karo kon 10 i 15 gr. por kantar anke ke lo davan a fijado, i en el primer anio ejos ke lo lavoraron tambien i por el envierno, pudieron lavorar, 1800 kantares, i ala razon de esto ejos tuvieron dekontino satidji, ke es el vindidor de los fieros, ke si iva en kada semana a Fazardjik, i era en el dija de alhad ke partija de Samokov, i durmija en el maaden de radoil, ke jevava los ordenes, por el nastoinik de el maaden ke li davan de Samokov, i lunes kalija ke estuviera en Pazardjik, por el dija de martes ke resivija los fieros, ke si li mandavan seja de los maadenis, komo tambien i estos ke los merkavan en Samokov i se li mandavan tambien a Pazardjik, por venderlos, i el pazar de las venditas por estos fieros si azijan, de martes la medio dija ke si enpesava, i se eskapava lo todo fin mierkoles demanijana, i denpoes fin a la medio dija era ke si meravan los kontos i azijan los kovramientos, seja de esto ke vendieron komo tambien i estos, de lo fijado i kontos aviertos ke los tenijan, i denpoes de la medio dija ja kalia ke partieran i se vinijan kada satidji, fin ande alkansava a durmir la notche, i dija de Djueves ke ja estava en Samokov, i en la mizma tadre entregava la moneda, ke rekojija, i en viernes azijan sus eskrituras, seja de la suma de fiero ke resivio el satidji, komo tambien i de las venditas ke izo, de mizmo i los enkasos ke izo ansi i mas todo lo menesterozo, porke tenijan una kontabelite enteramente aparte, sovre este

1218    Biografia de Tchelebi Jeuda i Avraam i S-res mochonatche i Davitchonatche     1859

etcho de los fieros i era Tchelebi Avraam ke lo jevava este konto,

               En este maaden komo tambien i en las vignas avija en todas sus ermozas kules de kampanias, i ejos enpesaron a ir en todas ejas, sovre todo en la kule de el maaden de radoil ke si jamava orta maaden, i era en medio de el kazal radoil, ke era mui boena, fragua, i tenija todo djusto, aun kon todo ke era mui pirikolozo de durmir en ansi lugar, en akel tiempo, porke avijan sigun ditcho mas antes muntchos ladrones, ma ejos non si espantavan, i tambien ke ja eran goadrados de turkos armados, lo boeno ke era el estar en estas vilas de las vignas i los maadenes, lo primo era ke la klima mui limpia i mui saludoza, en las mas de ejas eran fragoadas a el deredor, de las montanias jenas de boenas i grandes arvoles de sus manera, i en todos ejos jenos de bulbolikos, maneras de Pachares, todos tchuflando i kantando de sus manera, i tambien en los deredores koriendo los rios, de las agoas limpias, de unos sonetes mui muntcho plasientes, i de mui levijanos, i en el maaden i las vignas ke era el sonete de la lumbre, lo todo en flamas, de 2 i de 3 metros de altura, ke azija la kolor de la flama, en kada 5 puntos, kon arondjar a miles de sintejas, grandes i tchikas de mil kolores, i aparte era ke lo tenijan i un mijor sonete los fojos, asupladores de la lumbre, mui delgado i mui agradavle, ke era de kontino, ke el uno si levantava i el otro si etchava, por ir asuplando la lumbre, i lo todo ke era a foersa de la agoa, ke i esto tambien traiva i ainda mas mijor son i ja si keri entindido el durmir en ansi lugares limpios i airejados

1219    Biografia de Tchelebi Jeuda i Avraam i S-res mochonatche i Davitchonatche     1859

i de ansi levijanos sonijos, koalos plazeres traen a la persona ke sovre todo akejos ke ja lo enpatronan, ja son komo unos esfoenios, de panoramas, or ke koando la krejatura esta dormiendo en la kuna ke la van konando, i ke durme tanto dulse, era esto mizmo verdad el dormir en ansi kampanijas i es solo los ke lo vieron ke si lo poeden kreer, i este ke lo melda, non poede ser ke si kreiga, i estos todos plazeres siendo era ke mos avrija i el apetite de komer, mizmo ke en los maadenis avijan a 25 i 30 kavras mondjederas, por tomarles la letche, i asijan jegurtes, mantekas, i modos de gizados kon letche, i aparte avija jaikes^[64], por batir, la manteka, a foersa de la agoa, i tomavan los airanes, ke era kon okas ke les bevijamos, sin artura i el pan ke era de los trigos tchavdar, de los mijores, i mui bien amasado i kotcho, era kon okas el komer, i al kavo non avija artura 4 i 5 veses a el dija komijamos, i estavamos mui sanos i mui fursudos sin kansarmos de tanto ke kamenavamos por todas las montanias, siempre en kada resperasion kale dizir ke li davamos a miles de kilos de foersa a la sangre, i las agoas ke las bivijamos sin artura seja ke eramos kansos i seja ke non, porke eran tan levijanas i limpias, i harvadas, non mos azija ni nada, ni de las luvijas ni de los aires mos jelavamos en ansi limpios klimas,

               Tchelebi Avraam en este anio enpeso a fragoar, en su kaza ke morava, un kultuk, porke tenija solo 3 kamaretas, i lo izo a la entrada, de la poerta de el dichari avli, i apegado a la kamareta ke merava, ala ditcha poerta, i siendo ke el lo mas muntcho de

1220    Biografia de Tchelebi Jeuda i Avraam i S-res mochonatche i Davitchonatche     1859

el anio estava en vijajes, foe ke lo decho en su lugar, a su jerno S-r. Behoratche E, Arié, porke lo kudijara, i el era ke merkava seja el materijal komo tambien i todo el menester, por el fragoaniento, i le vino a kostar 5000 gr. i koando ja foe serka de eskaparse ke las ventanas de esto koltuk ke meravan a la kamareta ke dormija Tchelebi Gavriel su ermano, ke la jaman la kamareta de el banio, i a Tchelebi Gavriel parisiendole ke non iva a avrir ventanas para la kamareta suja, foe en una tadre ke si enkontraron los 2 ermanos, Tch. Gavriel i Tch. Avraam. en la poerta de la kae de sus kazas, i avlando sovre el fragoamiento de el koltuk, lis salio el etcho a letigas, en defendiendosen todos los 2 por sus deretchos, ke Tch. Avraam li dize, ke el es libero para fragoar porke es en su tereno ke el lo esta fragoando, i Tch. Gavriel si defende en disiendole ke sigun la lei, turka non alesensia de avrir ventanas, enfrente de kamaretas de el vizino, por la lei de el Harem, i de este manera si foeron litigando i araviandosen ke lis turo este lingoaje, komo una ora de tiempo, i denpoes ke ja si apartaron ejos kedaron longo tiempo raviozos, i a los kavos foe, ke en las ventanas de este koltuk, li kalio ke lis mitiera tavlas, fin las medias, para ke non si veiga koando ivan a estar asentados, en el koltuk, i por algunas otras kozas ke uvieron a razon de estas revias, ja lo tengo eskrito mas antes,

               Entre todos los hachares ke merkavan de los trigos i en este anio ejos merkaron tambien i el diezmo de los tutunes de el departamento de Djuma, i por este diezmo de los tutunes lo kijo de

1221    Biografia de Tchelebi Jeuda i Avraam i S-res mochonatche i Davitchonatche     1859

tomar parte i Tch. Gavriel, i ejos ke si konvinieron li dieron de parte el 25 %, i koando ja si enpeso a diezmarlo foe ke Tch. Gavriel si repentio, de esto i se konvino de moevo kon ke pedrio 5000 gr. De su parte i kon esto foe salvado, ma a los kavos ejos non tuvieron dingunas piedritas solo ke las ganansias foeron mas tchikas, i en los hachares ke ejos los tuvieron muntchos en Samokov, tuvieron grandes ganansias, i era ke lo meraron ejos propios, kon ke si ivan ejos mizmos a los kazales, i a los kampos i kontavan ejos los tukordjunes^[65] de los trigos, i estos de las pajas, i de mizmo lo izieron i en los armanes de toparsen ejos mizmos, i kon los trigos si non topavan su boen presio para venderlo en el arman propio, era ke lo depozetavan en sus hambares ke ja los tenijan, i esparavan a venderlo por los tiempos de el envierno, a los kazalinos ke lavoravan los kimures i las rudas por los maadenis i vignas ke estos non si okupavan de los sembrados tanto muntcho, a razon ke tenijan mas muntcho konto el lavoro de las fabrikas, i se los vendijan a fijado, i tambien lis vendijam i a los patrones de las fabrikas, ke i estos ultimos konsomijan partidas grandes, por el mantenimiento de los lavoradores ke era ala artura ke lis abastesijan para ke li podieran lavarar, i kon esto era ke lo topavan a venderlo kon los presios mas konvenivles.

                Ejos ke tienen tovisto en Hevra de mas antes, algunos Hachares, en los kasales de Salonique, kon un sierto Mustafa efende ke era MIN, i non si estavan pudiendo konvinir en los kontos, i ke kerijan tambien i eskapar, porke el etcho lis avija salido a el Djuzgo,

1222    Biografia de Tchelebi Jeuda i Avraam i S-res mochonatche i Davitchonatche     1859

i H. Elijatchuno ke ja estava por akejas partes, lo mandaron a Salonique, por ke podiera serar estos kontos ke estuvo longo tiempo fin poder serarlos, sigun ke ja lo eskrivi en la partida de H. Elijatchuno de este anio,

                Ejos tuvieron tambien i el Sumun ke es el dasio de las fabrikas de fiero, ke lis tomava el governo en 8 uno ke es a 12 i medio %, sigun ke ja lo tengo eskrito mas antes, ke todos los maadenis ke avijan en Samokov, eran 18, i kada maaden tenija a 4 vignas i el kalkulo ke podija lavorar un maaden era de 1500 kantares, a el anio, i el peso de un kantar era de 60 okas, ke este sumun tambien si vendija en enkante komo los diesmos de los trigos, i el multesim el merkador de esto era ke mandava sus personales a kada maaden por ke tomara notas de esto ke lavorava en kada dija, i una ves a la semana ke era en el dija de alhad, ke traivan la nota de el lavoro ke si lavoro en la semana entera, i lo tomavan en nota kon ke este personal, li tomava una resivida de el nastoinik de kada maaden, ke la resivida era un raboch, ande li kortava el nastoinik, kon sinial de chifros latinos, la suma de el lavoro de el maaden, kon ke lo partia la metad de este raboch i le dava la metad a el personal i la otra metad si la detinija el nastoinik, kon ke metija tambien i el sijo ke tenijan kada maaden aparte, en los dijas de alhad i en los praznikis mas grandes non lavoravan las fabrikas, ke ja eran kon koenta en koalos dijas non se iva a lavorar, i todos los laboradores eran Bulgares de los kazales de Trin i de Kiostendil, i alhad la tadre ja si

1223    Biografia de Tchelebi Jeuda i Avraam i S-res mochonatche i Davitchonatche     1859

boltavan kada uno a su maaden, ke el mas lechos era de 5 oras de kamino, i en kada 6 or 7 semanas devijan de entregar, kada maadendji, la suma ke li revinija en fiero, i esto los unos en Samokov i los otros en Pazardjik, i el multezim ke es el merkador de este dasio, era ke lo entregava a el Governo, lo todo en natur, (fiero,) i el Governo lo depozetava en sus magazenis tambien ke i el ja los tenija, i depo de 2 or 3 anios, en vezes estos fieros los demandava de Kostan para el Arsinal^[66] or Top-hane^[67], ke los emplejavan por sus munisiones de gera i en veses davan el ordin por ke los vendieran en Samokov, lo todo en enkante ke i esto tambien muntchas vezes los merkavan ejos, i en vezes ganavan porke los fieros ke rekojijan eran los mas bachos, ke podija ser, i ansi era ke era mui foerte las venditas,

              Sigun ditcho ke siempre ejos a dingun presio non dechavan las operasiones seja de el bankerlik komo tambien i el troke de las monedas, asta el grado ke otro non tokava de este ofisio, i era ke koando alguno kerija trokar seja el oro por plata or la kontra ke non savija ande aderesarse, i se demandava, a alguno de los merkaderes de la plasa, lo azijan ke li amostravan or ke los jevavan ejos mizmos ande los Aries, por ke si los trokaran i ejos era ke non tokavan en mano ke de esto podija ser ke i ejos tambien podijan tambien ganar, i por esto tambien es ke fin el tiempo ke los Aries, estuvieron en Samokov es ke los jamavan seja los turkos komo tambien i los krestijanos seja sivdadinos seja kazalinos todos era Saraflar, or Sarafite, i kon este nombre konosijan a toda la Familia, Arie,

1224    Biografia de Tchelebi Jeuda i Avraam i S-res mochonatche i Davitchonatche     1859

i sovre esto de non tokar, de estas operasiones, de las monedas, dinguna otra persona, mas tadres ke los IJOS de estos merkaderes, ke lis kontavan sus padres, sovre estos puntos i el komporto ke ejos si komportavan, enfrente de los Aries, era ke lis davan muntchas kechas a sus padres, i en veses si lis aravijavan i lis salija el lingoaje a pleitos, en diziendoles ke komo viene a ser esto de tenerlis, esti karar de respekto i espanto de estos Aries, a tiempo ke kale dizir ke non lo azijan poede ser por espanto or por el respekto, porke ja tenijan muntchos kontrarios seja de Djidios komo non Djidios, i muntchas veses les azijan i danios, ma solo era si poede dizir por sus flakezas ke tenijan, de todos los puntos, ja es verdad, ke ejos por koando kerijan venir enisma [ensima] de el uno koal foesa, mizmo ke foera i Turko, ja tenijan la foersa de sakrifikar seja tiempo komo tambien i moneda, i lo podijan kondenar en las mas grandes penaletas, i esto por non darsen de debacho, ke ejos ja tenijan la enfloensa en los mas grandes personages i de mizmo en todas las admenestrasiones, seja en Samakov komo tambien en sus deredores, fin a Kostan ke era mui grande loke los katavan, i los sentijan, i esta manera de enfloensa, en este tiempo non existe agora, en dingun ombre de la mas grande, i onorada i rika familia, i esto ja es una razon i la sigunda es ke el MAZAL, i esto es partikularmente DADIVA DE EL DIO.

              Aparte de la kacha ke la tenijan siempre en Samokov, foe en este anio ke tomaron tambien i la kacha de Kiostendil, i sigun ke ja lo saven por las operasiones de las monedas ke lo azijan

1225    Biografia de Tchelebi Jeuda i Avraam i S-res mochonatche i Davitchonatche     1859

sovre todo en esto delos bechlikes i los metalikes, ke era toda la moneda ke kaiva en las kachas era lo todo bechlik i metalik, i ejos de pechin ja las trokavan por el oro, ke avija ajo, en las plasas de a 3 i 4 % i ken ke lis iziera dingunas revizias non avija porke la konfiensa ke lis tenijan era mui grande, i koando ja se rekojija sumas mas grandes ke ejos ja lo izieron todos los trokes i los prevalimientos, era ke lis davan polisas para kostan pagavles dopo de 31 dija, kon ke lis tomavan a 2 1/2 % de polisa bachi, ke era por los gastes i el remetimiento i el riziko, i aparte tenijan ke ganavan de la deferensija de el ajo de Kostan ke avija de 4 a 5 % tambien de ajo i lo todo travavan a S-r. Kamondo, de Kostan, i los remetimientos eran ke lis davan monedas a los djelepis, ke rekojijan karneros por Kostan i de ejos tambien lis tomavan ajo, a 2 %, i se es ke non abastesija era ke remetijan kon la pochta, ke era una ves a la semana, ma por esto ejos non si apretavan, porke el kredito ke lo tenijan ande S-r. Kamondo era sin limeto, i travavan las sumas ke kerijan i siempre S-r. Kamondo lis eskrivija, ke non si travaran de travarles ke sus kacha estava avierta para ejos komo ejos mizmos, esto era kon Kostan aparte sigun ke ja lo tengo eskrito ke lo tenijan tambien i en Salonique, ke lo asijan kon S-r. Jshak M. Tijano, por las valutas ke lis kaijan de oro i de plata, i ke las estavan notches enteras apartandolas, ke de esto ja eran mui pratik, ke kada piesa, ja lis era bastante kon tokarla en la mano de konoser, el pezo ke pezava, i la valor ke tenija, i non si enfastijavan de lavorar ni ke avija kanseria,

1226    Biografia de Tchelebi Jeuda i Avraam i S-res mochonatche i Davitchonatche     1859

para ejos, sus lavoro de los dijas era de las manianas ke salijan 8 la ora a la franka, fin a las 6 de las tadres ejos estavan lavorando, siempre en sus kontoares, i el uno de ejos era ke siempre kamenava i vijitava, en todos los konakes de los begis, i en las admenestrasiones, seja ke tenijan etcho i seja ke non tenijan lo azijan ke ivan por enbezarsen las moevas de kada dija i de lo todo tambien non lis enkovrijan nada, ke por lo todo koalo foesa ja si los dizijan i anke ke non era de los sujos enteresos era ke de lo todo estavan al koriente por saverlo, i a estos todos ke lis ivan era tambien ke i ejos los vijitavan en sus kontoares en los dijas de mierkoles i de viernes las tadres kon ke lis davan tchibukes i kahves, i muntchas veses tambien lis davan i cherbetis, ke esto lis davan tambien i a ejos koando lis ivan, ejos ke ja enpesaron a tener sus kutchis i los paitones era ke en las tadres de el enverano se ivan a las vignas i maadenis, i tambien kavajavan i a kavajos ke esto tambien los tenijan i lo todo de los boenos, i ejos eran mui kavajadores, en las medio dijas non era el uzo de ir a kaza por komer, otro ke lis traivan al kontoar, i komijan todos djuntos, i non tenijan fiksado punto de medio dija por komer, otro ke era, sigun ke lis vinija ke en vezes komijan i 2 i 3 oras denpoes de la medio dija, i en el kontoar tenijan sus pirones kotcharas kotchijos tovajas lavamanos, i mas todo el menester, de la meza ejos eran servidos de 2 mosos solo para ejos, sin ke salieran de el kontoar afoera, ke aparte tenijan los kamenadores de las plasas, i estos ke lis raportijavan de la plasa, i tambien

1227    Biografia de Tchelebi Jeuda i Avraam i S-res mochonatche i Davitchonatche     1859

los personales ke lis eran por los lugares, de afoera de Samokov, ejos al punto de vista era ke non si lis vija los tantos etchos ke los eskapavan ma ja tenijan el tiempo para lo todo ke todos sus lavoros eran kon muntcho repozo, i kon muntcho saverisio,

               En kaza las mujeres de este tiempo i endelantre ja foeron i ejas sirvidas de mas muntchos sirvidores ke ejas ja tuvieron aparte de las mosas tambien i gizanderas, i aparte los mosos por ke lis izieran las merkidas seja por los menesteres de la kaza komo tambien i estos mandados de los sujos plazeres, para las merkidas de la plasa, ejas denpoes de las medio dija si rekojijan en una kasa de entre la familia, por sus pasatiempo, lo todo kon ke si vestijan de los mijores vistidos de akel tiempo i se adonavan, lo todo por entre ejas, ke a otras kazas era mui ralo ke ivan otro ke siempre era ke ande ejas lis venijan lo mas muntcho, i lo mas si kamenavan i se asentavan en las ermozas goertas ke en todas las kazas ja las tenijan kon muntchos mudos de rozas golientes i sin golor, i aparte los tchikos fores, de los arvoles bien lavorados, de frutas i sin frutas, i ansi los arvolikos tchikos de los merdjanes, i de las malenas, i las kondjas, i otras ansi modos de kozas ermozas i ke davan golores ermozas, i tambien los tchimenlikes, vedris de boenas i ermozas olas, i tambien las hoentes i chaderbanes, ke ja eran de kontino koriendo i kon abondansa de agoas, i kada kaza, non era menos de 5 a 6000 metros de kampo, lo todo rodejado de paredes de piedras, i enkalado kon kalnka^[68], ejas aparte de entre ejas ke kantavan era ke si i azijan traer,

1228    Biografia de Tchelebi Jeuda i Avraam i S-res mochonatche i Davitchonatche,    1859

tambien i a kiotchekes por ke lis bailaran i les kantaran i aparte si azijan traer i a turkas HANENDES? ke son las azideras de areir, i era kon mudos de djuegos ke lis azijan, lo todo era por mujeres ke ombres, non dechavan entrar, a razon de el Harem, ma jo kon S-res Naimatche i Mochonatche ke eramos mas tchikos era ke mos eskondijan moestras madres, de las turkas i para ke vieramos sigun de loke las azijan areir, ke jo agora ke esto eskriviendo ja mi esto ariendo ke de algunas kozas mi akodro, i es la verdad ke era de reir, i de esto era ke estavan seja las mujeres komo tambien i los ombres i las kreaturas todos breando sus vistas, i artos de lo todo i ansi es ke agora los ke lo vieron esto de antes non lis es en sus ojos nada de koalo foesa ke agora lo veran en todos los puntos, ke ja estamos todos mui bien artos i el ojo mui jeno de koalo foesa,

               En este anio de 5620, merkaron el Hachar de el departamento de NICH, i por meter en ordin esto foe ke partio mi S-r.Padre a Nich, ke en este tiempo era el governador MIDHAD PACHA, ke este ultimo lo kirija a Tch. Avraam muntcho bien i lo ajudava en todos los puntos de koalo foesa ke li demandava, sovre todo ke ja lo saven ke en este etcho de los hachares avijan muntchos mudos de deferensias i letigas i lo todo era ke si eskapava solo ande el Pacha, i ansi era ke si li enkamenava lo todo mui en regla, (este Midhad Pacha mas tadre foe el grand Vizir de el Sultan Abdul Aziz, ke li tenija mui

1229    Biografia de Tchelebi Jeuda i Avraam i S-res mochonatche i Davitchonatche,    1860

grande konfiensa, solo ke a los kavos revejo kontra el Sultan, fin a el grado ke buchko de abacharlo de la sija i asentarse el mizmo, si entiende kon el foerte partido ke el si lo izo, i es este el Midhad Pacha, en el tiempo de koando era grand vizir, ke li eskrivio una karta a mi S-r. padre Tch. Avraam, akonsejandolo sovre el etcho, de una muchija LA PLANA, ke el djuzgo li foe fin a el sadaret^[69], porke si konviniera ke el, ja lis eskrivio seja a el Vali de Rustchuk Abdulrahman Pacha komo tambien i a el mutesarif de Sofia Mahzar Pacha, por mos ajudaran a la konvension, i este paso de la PLANA ja lo tengo de eskrivir mas adelantre en una de las partidas de mi S-r. padre, i tambien este S-r. de Midhad Pacha seja en el tiempo ke era en nich komo tambien i koando foe VALI en Rustchuk, ke koando vinija a samokov ke era 2 i 3 vezes en el anio, era siempre ke si abachava, en la Vila de mi S-ra madre ke era en la vigna de Dragochin, ke era la mas mijor i la mas ermoza de todas las otras vilas, i era kon 15 a 20 puntos de lichura a la sivdad, i non kere ditcho ke ja si azijan todos los prontamientos menesterozos de mas antis por resivir, ansi un musafir i en el tiempo ke estava en Samokov li azija tambien Daavetis DINES^[70] en kaza ke la kaza ke tenija tambien ja li respondija, ke i esto tambien ja lo van a meldar sigun de loke era, esta kaza, i le kombedava a todos los grandes Begis i los S-res de Samokov, kon ke era el de ver de azersilo saver tambien i a el koalos podijan tomar parte lo todo komo era kon su kontentes era ke los kombedavan, i lo rekonosia i lo rengrasiava mui muntcho, i era un ombre mui pasensiozo i muntcho savido, el era devinido de uno delos kazales de Tchirpan[)],

1230    Biografia de Tchelebi Jeuda i Avraam i S-res mochonatche i Davitchonatche,    1860

Denpoes ke Tchelebi Avraam metio en orden fin a un grado los presipios de el etcho el si resento su kanselaria, i enpeso a aser venditas de este hachar en groso ke era venditas a kazales i okolijas, lo todo solo a los ke konosijan esta etcho, i se iva el mizmo seja alos kazales komo tambien i a las okolijas, por azer el mizmo i por konoser a los merkaderes, i demandar por ejos las refrensias, menesterozas a rason ke las venditas eran lo todo a kredit, i esto non lo azia menos de ganar de 10 a 15 % i lis tomava a el 10 i 15 % de kaparo en kontante, i kon sus boenas fiansas, ke era por 6 taksites ke lis vendija por ke li pagaran, i toda moneda ke el rekojija en kada semana era ke si la remitija a S-r. Kamondo, i la valor de este Hachar foe de 2 miliones de frankos, i lo todo en un enterval de 15 a 20 dijas ja lo vendio todo, i denpoes si tomo una kaza kon sus mosos i gizandera i estovo 6 mezes por azer los kovramientos, de kada mes i tambien por responder a las reklamas i las defekoltades ke avijan, ke esto ja era kaje en kada dija, i sigun ditcho ke el Midhad Pacha ja lo protejava muntcho era ansi ke non tenija nada a sufrir, ke por lo todo ja tomava los ordenes mui kolai, avija tambien i un sierto Hadji Tauchan ke era mui enfloente i el koal tambien ke era echpikolante de esto, foe ke li vendio la okolija de Leskovisa, entera por un mas konvenivle presio,ni [i] lo todo ke el koal tambien lo ajudava mui muntcho en algunas defekoltades ke avijan kon los otros, i era ke todos li pagavan en mui regolarmente, i ansi foe ke tuvieron en esto mui grandes ganansias, i en este tiempo ke el estuvo en Nich aparte de

1231    Biografia de Tchelebi Jeuda i Avraam i S-res mochonatche i Davitchonatche,    1860

loke el reglava el etcho de los Hachares lo azija tambien i algunas operasiones de bankerlik kon ke dechkontava polisas de los merkaderes ke el ja los konosio a todos, i tambien lis dava i muneda kon unos interesos de a 10 % a el anio, era kon esta ke si iva enbevesiendo ma este lavoro li era mui poko i a los kavos foe mui enfasjado solo por ke non tenija ande enbeveserse, en los dijas de los Chabatiod, i en algunos de los moadim ke restava en Nich, era ke lo jamavan por ke komiera en sus kazas, ke eran al Rabino de la sivdad Hr. Merkadutcho-Efraim Alkalai^[71] ke el koal tambien era banker, i los S-res H. Moreno Nahmujas i Bukos Gerchon ke eran merkaderes, i ansi mas i otros komo Mandilim, i Levijim, i era ke en las kazas de los todos ditchos siempre lis iva, i pasavan mui bien, mos kontava, por la manera de sus bivir los Djidios en esta sivdad, ke lis era todo, kon espanto a rason ke era konfin de la Serbija, i por esto ejos anke ke tenijan sus mui boenas kazas i butikas i mas lo todo sus mulkes ma non las mobelijavan sigun de loke primija por los sujos repozos i tenijan minderlikes ke non metijan minderes de paja, otro ke esteravan un makat ensima por tapar la tavla, i se asentavan en la tavla i ansi mas lo todo tenijan mui levijano seja en las mobilijas, i seja tambien i en sus vistimientas i mas en lo todo, por la razon ke lo vijan ke kaje en kada dija tenijan atakas los soldados Turkos kon los soldados Sirbos, i tenijan el espanto ke en un dija devijan de entrar los Sirbos a Nich, i era de los turkos ke si espantavan ke lis podijan revatarles todos sus bienes i por estarsen levijanos para poder

1232    Biografia de Tchelebi Jeuda i Avraam i S-res mochonatche i Davitchonatche.    1860

presto foersen, i tenijan tambien ke lo mas de sus mobilijas ke no las kolanijavan las tenijan siempre enpakadas, i siendo ke ja estavan uzados a estas vidas era ke ja si pasavan mui kontentes i sus negosios lo tenijan mui boenos, i korientes, i en sus avlas era siempre ke las emplejavan i dizijan IJO NEGRO A NICH, i koando ja si li alevjano el etcho el ja si vino a Samokov, ke mas tadre tambien se iva por algunas tchikas deferensijas ke lis avija kedado,

              Tchelebi Avraam en este anio la espozo i tambien la kazo a su IJA la tchika, Mazalu, kon S-r. Nisim B. Moche, de H. Aron i kon las achugares ke lis davan ja lo tengo eskrito, mas antes i aki ja lo poedo dizir ke foe ainda mas rika i mas mijor lo todo por ke la novija foera gustoza, ma eja non era de el entodo kontenta, i aun kon todo ke era mui tchika ma era ke siempre estava jorando, ke los dijas eja era ke si enkachava en una kamareta sola i estava dijas enteros jorando por ke non lo kirija a este novio, eja si etchava de boka abacho por jorar sin kansarse, i esto sin poderlo ketar de boka i sus parientes ke la vijan ke era siempre en esto ke eja estava ja si keri entindido la ansija ke la tenijan, ma non tenijan koalo azer, por razon ke en akejos tiempos non podija ser decharsen koando ja espozaron, i tomaron el kinijan, i koando ja si aserko el tiempo de la boda visto ke la novija foe ainda mas muntcho jorando i eskondiendose, si avijan detchizado por non kazarla kon este novio solo ke kijeron saver alguna razon, i la novija ke non kirija eskuvrir nada seja de vergoensa or ke si jorava el mazal, i kon muntcho

1233    Biografia de Tchelebi Jeuda i Avraam i S-res mochonatche i Davitchonatche.    1860

porfijarle seja vija de los parientes i de sus amigas loke dicho, solo foe, ke eja non keri ir a la kaza de H. Aron el Sodro, porke este ultimo era un ombre asenijalado, sovre el kapritcho ke tenija, i era tambien sodro, i ansi tambien lo jamavan H. Aron el Sodro, i mizmo agora sus inietos, ijos de esta S-ra Mazalu la firma ke jevan es Sarov, ke es sodro, i koando ja lo supieron ke era solo la kavza esto por non estar, en una kaza kon H. Aron, lo izieron kundision ke devijan de bivir aparte, kon ke H, Aron tambien devija de bivir en otra kaza, i a la boda ke non devija de vinir, i esto denpoes ke la novija fin a un grado ja foe kontento, izieron la boda, ma tambien eja era sin gana, i ansi foe ke en toda su vida, non bivio kontenta, de su marido, porke i el era una persona burra [dura] i inattchi, i en el tiempo ke kazo la puzision de su Padre el H. Mochon era mui boena ke eran grandes merkaderes, de ropas godras^[72], ma siendo ke i el era lo mizmo kajado i duro, foe tambien ke i los etchos li foeron endo para atras, lo izo ke si espartio, de su ermano H. Avraam ke a todos lis paresija ke era el H. Avraam solo ke la estava boltando la butika, i el ke si avrio por si otra butika de los mizmos artikolos, foe ke solo un anio pudo, lavorar, i kalio de iziera falimento, i non pudo pagar a dinguno ni un santim i denpoes muntchos anios ke el bivio, era solo de esto ke li davan la djente ke si mantenija i salija a rekojer por las butikas en kada viernes, i el H. Mochon, anke ke era ke si li ivan apokando sus etchos ma ja bivio kon mas onor i non foe menesterozo por ke li dieran la djente, i mas tadre si li aparto, su

1234     Biografia de Tchelebi Jeuda i Avraam i S-res mochonatche i Davitchonatche.   1860

Ijo, S-r. Nesimatche, kon ke li djo 2500 gr. por kapital, i su esfoegro li djo tambien 4000 gr. i se asento en botika aparte, por vender ropas por los kazalinos, i en mizmo tiempo si aparto tambien i de kaza, kon ke li djo su esfoegro tambien kaza i li dava a 20 gr. a la semana aparte a la S-ra Mazalu por ke li viniera en la ajuda de algunos gastes i mas muntcho para sus plazeres ke si las emplejara, i ansi foeron kontinuando unos koantos anios, ma siempre bivieron deskontentes porke su marido era sigun ditcho tambien kajado i buro, i foe lo mas muntcho de su vida mizeravle aun kon todo ke su Madre la aregalava en todos los puntos, i eja ke a los kavos ke ja si avija uzado a esta vida, si okupava en la kaza i sus krijaturas i non salia muntcho por las vijitas, eja pario, 3 IJOS Behor-Jshak, i Chemaja, i Avraam, i 2 IJAS Belina i ke la kazo kon Haim Konorte, i Zembul, ke la kazo, kon presijado B. Moche, ke al koal lo mataron el kamino de Djuma, la Tcheta de el Voivoda Boriz Sarafov, por ke lis abastisija arinas a los soldados turkos de Djuma, i mas tadre ke sus IJOS ja foeron grandes i ke los tuvo en su butika, el tuvo mui boena pozision ma de mizmo foe ke la S-ra Mazalu non foe kontenta, de su vida, i lo mas era abatida, solo ke koando los IJOS ja li foeron grandes era ke kon ejos si konsolava, i en el tiempo de la gera Turka-Rusa, en el anio de 5638, si vino kon su marido i sus krejaturas en moestra, kaza, i moro en el apartamento de el Ibich, ke lo jamavamos, por goadrar a sus almas i tambien sus bienes seja de kaza komo tambien i de la butika, ke lo mas muntcho era el mal de los tcherkezes i de

1235    Biografia de Tchelebi Jeuda i Avraam i S-res mochonatche i Davitchonatche.    1860

los zebekis, ke avijan venido de la azija solo por azer platchkas, i en moestra kaza komo ja avija mas djente, si goadravan i se protejavan de los unos a los otros, i mas tadre ejos si merkaron una kaza en frente de el Kaal viejo, ke es la misma kaza ke moro el S-r, Avraam ke vino primero a Samokov, i esta ke li tenija dado el S-r, de Mehmed Emin AA. por ke Morara en toda su vida, sigun i ke ja moro, ma la S-ra Mazalu non alkanso a pasarse porke ja si avija hazinijado i su hazinura foe solo un grande apokamiento, fin a el grado ke si etcho en kama i sufrio 3 mezes, i lo todo foe de el grande siklet, ke a los kavos mas ja non lo pudo somportar, la vida deskontente ke la pasava, ke todo los menesteres de ajudos ke si li dieron seja de parte de su marido i ijos i tambien i moestra lo todo foe sin dingun provetcho, fin ke en el 10 de Tamuz, de el anio de 5639 murio ke mos foe para todos grande mofina i su S-r. Padre, kon sus Ijos i Ija li goadraron el siete, kon ke estovimos asentados aparte de su marido i estovimos solos mozos en moestra kaza asentados, i ejos estuvieron asentados en sus kasa, i todos li goadrimos en el anio entero de limunio eja tuvo la edad, de 33 anios, i mi S-r. padre de este siklet, foe ke li vino un foerte diare, i enpeso a estar hazino ke dija kada dija siempre se iva aflakandose, i aparte li vinija tambien i un boltamiento de kavesa, i siempre se iva lavando la kavesa kon agoa jelada, i muntchas veses el si metija la kavesa en el tchoro de la hoente para ke li foera dando mas foerte la agoa i tambien jelada, ke kon esto li paresija ke ja li vinija por algo de tiempo boeno,

1236    Biografia de Tchelebi Jeuda i Avraam i S-res mochonatche i Davitchonatche.    1860

               De estos tiempos ja foeron, las adjuntas en mui sikreto ke las tenijan kaje dekontino, los Bulgares, por azer los solivantamientos, revolesionarios, kontra el governo Turko, ejos en kada sivdad, fondaron komites, kon ke pagavan todos los bulgares unas siertas taksas, por abonamiento i era la taksa a una rubla por persona lo todo si komportavan a detras delos ordenes i komandos de la Rusia ejos los Bulgares kon notas ke davan a las potensias si akechavan de los Turkos i de los grandes personages, estos de la masa aristokrata ke los estavan exploatando, a el poevlo Bulgaro, kon tomarles grandes enteresos, i los aprezan sin razon, i los maltratan i los dezonran, i dezonran a sus mujeres i ijas, i los matan koando uno si kecha, i les revatan sus bienes i los azen lavorar sin ke seigan pagados i ansi adelantre, todo modo de desderetchedades, ke de estas kozas ja son muntchas mui verdad, i las potensias ke tomavan en mano i ke las deklaravan ke ja era verdad ke si azijan era ke i ejos tambien los protejavan kon demostrasiones, ande el governo Turko ke si las, demostravan i kon las foertes notas ke lis davan, i el governo Turko ke ja lo deklarava lo todo komo berdad, lo izo ke nomeno a sus personajes los mas entendidos, por mandarlos a los vilaetes de los lugares de su Governo por ke djuzgara a el poevlo a estos ke exploatan, i azen las tortaldades, kon ke lis djo el mando de kondenar adetras de las leés, ke izo, moevas para matar, i aprezar, i azer boltar lo revatado i lo demazija tomado, i meterlos i en prezo i aserlo surgun i mas todo lo podija azerlo sin el deretcho de apel, i era al punto,

1237    Biografia de Tchelebi Jeuda i Avraam i S-res mochonatche i Davitchonatche.    1860

reintchido, i a todos estos Pachas lis djo en sus manos a un HAT I HOMAJUN^[73] i los mando, ke entre los ditchos mandados foe, ke vino a el vilaet de NICH, ke era Samokov debacho de esta vilaet, un sierto Kibrizli Mehmed Pacha, i por esta vinida ke ja lo azijan saver de mas antes, kon telales, i ke eran liberos kada uno de akecharsen por la mas tchika koza, i sin dinguna paga i ke non tuviera dinguno por nada a espantarse, i todos los grandiozos, de la masa aristokrata, eran mui espantados, ke foe solo por ejos, la vinida de estos Pachas se ivan eskondiendo i aziendosen boenos kon todos, i el ditcho Kibrizli Pacha ke Ja vino a Nich, el nomeno komisijas, para ke los foeran resiviendo por las primeras kechas a el poevlo, i entre los prezedentes de estas komisias era tambien i el uno a un sierto, Hadji Tauchan nomenado ke por el koal ja lo eskrivi ke era, mui amigo de mi S-r. Padre Tch. Avraam, i entre tantos reklemadores ke avijan ke a todos eran resividos, era ke al punto kon surudji, los mandavan a jamarlos, kon ke kalia fin a el treser dija ke partiera, i koando no lo mandavan kon djandar i atado, ke esto ainda trocho un mas grande espanto, ke ja lo ivan sintiendo ke a el uno lo enkolgaron i a el otro lo mandaron surgun, i los surudjis ke ivan dekontino viniendo ke non lis dizijan por koalo eran jamados otro ke solo ke si prezentara, i entre estos surudjis foe el uno ke lo kombidan tambien i a Tch. Jeuda, i el kaimakam de Samokov lo mando a jamar en meldandole el orden ke tiene por ke devija de partir, fin a 3 dijas, a Nich, i esto ke vido Tch. Jeuda, foe ke kedo en las demandas, i de el grande

1238    Biografia de Tchelebi Jeuda i Avraam i S-res mochonatche i Davitchonatche.    1860

espanto ke el tuvo foe ke si li patlio el mucho, de abacho i lo vino un boltamiento de kavesa, ke por esto si avrio pechigatorio^[74], i el ke foe por la sigunda ves ande el kaimakam, por poder saver, para koalo lo jamavan, ma foe en baldes porke, sigun ditcho ke non lis azijan saver por koalo los jamavan, i el ke bolto a la oda, i se keto la fes de su kavesa, ke li estava saliendo, a miles de kilos de fumo de la kavesa, de el grande apreto, i non saviendo por koalo serija i su ermano i sus IJOS ke lo vijan ke non keri ditcho ke i ejos ja era lo mizmo ma li dizijan ke si kere tomado el mal kon pasensia, i buchkar a saver por koalo seria, ejos ke kalkulavan seja por los enteresos, ke de algunos lis tomavan a mas muntcho de 12 % or por los etchos de los diezmos ma en nada no si topavan kulpozos, i decharon pasar akeja notche, i ala manijana ke ejos ja vinieron torna en un kavo, i de todos los kalkulos ke ejos los azijan era ke por nada no si topavan kulpozos, i entre mentes [entremientes] ke si el tiempo ja va pasando, i los apretos ainda engrandisiendosen, i ke ja kalia ke partiera, i Tchelebi Avraam ke si adjedejo mui muntcho, li dize a su ermano, ke non si sikilijara ke ja si va el en lugar sujo, ke esto koando sintio seja Tch. Jeuda, komo tambien i sus ijos si lis aklararon sus ojos, i se lo rengrasiaron, ma Tch. Avraam lis dicho, ke esto de irme es kon ke el kontrato de 5614 estava pidrido, i los kontratos ke los izimos en 5618 ainda estan sin afermersen, ke esto komo si afirman i se reglan estos kontos agora es ke jo ainda de esta tadre ja parto, por NICH i sin tadrar en el mizmo punto foeron reglados i afermados

1239    Biografia de Tchelebi Jeuda i Avraam i S-res mochonatche i Davitchonatche.    1860

los ditchos kontratos, i tomandoselo en su petcho, el en akeja tadre ja partio, kon grnade [grande] kuraje, i sin jevarse dingunos dokumentos kon si por ke non savija koalo jevarse, ke en arivando a NICH, kon grande kuraje i pasensia al presipio se adereso a el konosido Hadji Tauchan por poder enbezarse mas antes de el alguna koza, sigun ke ja foe ansi i se adereso ke kon enkontrarsen ja lo resivio kon kara, alegre en disiendole ke non seja ke ti espantes, i esto antes de dizirle el Baruh Aba, ke es un sierto tu pariente Avramatche es ke reklama de vozotros 20,000 gr, de kontos viejos de su padre, i esto ke sintio el Tchelebi Avraam mas non kijo en largo demandarle i se bolto su hotel i li eskrivio a su ermano en aziendole saver koalo era i ke li mandaran los kontos de esto, para poder responder, i koando ja lo supieron ke era esto ke H. Avramatche de H. Refael lis reklamava, ja si kere entendido komo de gusto tuvieron ke si mizmo si los pagavan non kerija disir ni nada, i a la manijana ke ejos ja si apararon en el djusgo, i denpoes ke Tch. Avraam sentio todas las reklamas ke el S-r. de H. Avramatche las izo, lis dicho ke ejos aparte ke non li deven es ainda ke tienen i de aver solo ke siendo non supo por koalo lo jamaron es ke non si trucho dingunos dokumentos por demostrarlo, i lis rogo ke li dieran el tiempo de 10 dijas fin a traerse los dokumentos ke li foe akordado, i esto ja lo eskrivi en mas largo en la partida de H. Avramatche, sigun de loke foe kondenado i metido en prezo i denpoes ke kalio li diera los 5000 gr. de prezente i kon esto ke si foe a Kostan i a Jeruchalaim, i koando ja non tuvo

1240    Biografia de Tchelebi Jeuda i Avraam i S-res mochonatche i Davitchonatche.    1860

Mas moneda ke si vino a Samokov, i torna ke lo meraron kon boenos ojos, sin ke lo decharon a la vanda por esto ke los izo tanto gastar i lo mas muntcho de espantarlos,

              De esto ja mos kale i mozotros, tomar estos enchemplos por komportarnos i nos tambien en okasion, sigun de loke lo izieron moestros padres, ke bivieron kontentes i ulvedavan lo pasado,

               I Tch. Avraam resto en Nich, ke ja tenijan algo de resentamientos de los hachares i algunos averes de los dechkontos ke azijan i otros negosios, foe en este anio ke si merko en Nich una machina para boirse el Tchai ke la koala la tengo jo Tchelebi ainda, i a razon de esta machina el si izo traer de Londra un kilo de Tchai de el boeno i siendo ke non si emplejava esto de tchai en akel tiempo li resto fin a el tiempo de la gera Turka-Rusa, en 5638, ke los Rusus mos enbezaron i lo bevija,

              En este anio de 5621, lo mandaron a Kostan a S-r. Davidtchonatche, i ke ja foe en el tiempo, de las venditas ke si azian de los intizamis, merko el beilik, de los karneros, de el okrug de Sofia, por el presio, de 70,000 liras, ke esto foe mui karo, i sovre ejos uvieron algunas avlas de su ermano ma Tche, Jeuda li djo kechas, ke non era sigun li parisia, i ansi foe ke si gano 100,000 gr. i denpoes estuvo en Kostan serka de un anio, por poder, reglar los kontos kon la ALIDE, Hanum, ke stava en Kostan ke esta ultima era la una de

1241    Biografia de Tchelebi Jeuda i Avraam i S-res mochonatche i Davitchonatche.    1861

las 3 mujeres, de Usref Pacha, ke lis devija, 200,000 gr. kon enteres, i ke avija 2 anios ke non lis pagava ni la moneda ni menos los enteresos, i espantandosen non seja i eja ke si levantara, kon algunas marazod, foe ke buchkaron de la manera foesa a kovrarle, i esta suma de moneda, ke si lis rekojo era, a sus personales Hafiz AA i meraz jedi Suliman aa ke li ivan dando, por el menester, de el enkamenamiento de sus 2 maadenes, ke los tenija en Samokov, i estos, ke non estavan abastisiendo por remeterli moneda a la anum, a Kostan era ke non lis pudieron dingunos akontos de moneda darles, i S-r. Davidtchonatche, ke li iva endole, a poder de una manera, konvenserla ma eja lo azija ke muntchas vezes non lo resivija, i al djuzgo ke non la kijeron darla, era siempre por vija de otros i kon muntchos rogativas, foe ke a los kavos si kontento, por ke li izieran un rebato, i eja ezbarasarse de la devda, kon darles el Tchiflik, ke tenija en la Bana, de Kiostandja, i el orta maaden de kiostandja, i 30,000 gr. de moneda ensima, i kon esto ja si kontentava, i esto lo taksaron los 2 mulkes por la suma de 150,000 gr. ke rebatiendo los 30,000 ke li dieron viene a ser ke restan 120,000 i kon esto si alempiaron todos los kontos ke lis rebatio 80,000 gr. i esto ke tambien ja lis foe i muntcho ke li tomaron porke si kerija non lis pagava nada, i non tenijan koalo azerle, a una mujer,

               Es este el Tchiflik, ke lo enpatronan i oi la metad, el S-r. Mochonatche i la otra metad, el S-r. Davidtchonatche, i el orta maaden en Kiostendja lo enpatrona Tchelebi Avraam de koando si espartieron en el anio de 5630,

1242    Biografia de Tchelebi Jeuda i Avraam i S-res mochonatche i Davitchonatche.    1861

               En el tiempo ke S-r. Davidtchonatche, estava en Kostan li nasio un Ijo en ROCH HODECH TEVET, i lo jamaron, Jeuda (Leon) ke si izo grande boda, en los dijas ke la parida estuvo en la kama, i la kama foe adonada kon muntchos brozlados, i de Djujas en diamante, i sigun de todas las paridas eja foe vijitada, de la sivdad entera seja de las mujeres komo tambien i de los ombres, ke los mas de ejos komijan en las notches, i kantavan i djugavan i se alegravan, i los parientes todos de mizmo li mandaron los platos de dulsuras, los prezentes, seja para la parida komo tambien i para el nasido, ke todos eran gustozos i alegres, i la parida ke ja era mui sana i boena ansi de mizmo i el nasido, eran ainda mas alegres, i el SANDAK, ke foe S-r. Behoratche, Jshak G. Arié en el dija de el BIRKAD-MILA, si kombedo a la sivdad entera, seja a los ombres komo tambien i a las mujeres, i aparte a todas las krijaturas de la echkola, i todos komieron i bevieron en abondansa, i a las krijaturas, a todas lis dieron aparte 1 a 10 paras kon a un ponijado de konfites, para ke si gustaran i a todos los Hahamim i los profesores, de mismo lis dieron prezentes en moneda, lo todo a la onor de el SANDAK, i denpoes era ke su propia madre lo krijava i lo velava, i mas tadre ke ja vino S-r Davidtchonatche, de su vijaje, era ke en la primera vista, ke lo iva aver a el IJO? ke devija de dizir la BERAHA de el CHEHIJANO i en el dija si rekojijan todos los parientes, para responder el AMEN? de el CHEHIJANO? i se adulsavan de moevo kontentes i alegres, i su S-r. papu, Tchelebi Jeuda ke lo amava muntcho era ke siempre lo detinija en

1243    Biografia de Tchelebi Jeuda i Avraam i S-res mochonatche i Davitchonatche.    1861

su alda, i muntchas vezes lo azija espertar, de el esfoenio, para bezarlo i ajogar kon el,

             Tchelebi Jeuda en este anio lis frago una kaza para, sus 2 IJOS los mas grandes, ke los kijo apartarlos por ke ja si lis avija bien engrandisido la familija, i tambien ke ja non estavan i kaviendo, en la kaza ke morava el Padre, i el lis merko de sus vizinos ke eran un sierto Turko ke lio jamavan el BULTO, i de H. Menanom [Menahem] el Chamach, i de H. Chelomo B. Josef (moni) i mas ansi de otros, i le kosto entre la tiera i la frago a 105,000 gr. i koando ja si eskapo de fragoarse, si pasaron en eja los 2 ermanos, el S-r. Mochonatche kon el S-r. Davidtchonatche, ke era solo por bivir i dormir, en eja ma kozina non avrieron i era ke komijan torna todos en una meza, kon el Padre, i lo todo si gizava en la kozina de el padre, i mas tadre ke esto lis foe para todas las 2 partes mui foerte, lo izieron, ke komijan los 2 ermanos aparte en sus kaza, kon ke de mizmo si gizava, en la kuzina de el padre, i en unos tendjeres, solo ke de los mizmos tendjeres, eskudijavan por 2 kazas, i era lo todo a los gastes de el padre, i era ejas mizmas todas a la una se ivan a la kozina i lo todo a los komandos de sus esfoegra, anke ke ja las tenijan i las gizanderas i tambien las mosas, en esta kaza tuvieron solo 4 kamaretas i en el tavan una otra tchika, i aparte, magazenes i kozinas, i 2 jakmaklikes^[75], i ajunto a los magazenes, izieron 2 otras kamaretas, i una sala en medio de las kamaretas, kon 2 ajates ke meravan a la goerta, i en estos ajates era el asiento por el enverano, seja para ejos

1244    Biografia de Tchelebi Jeuda i Avraam i S-res mochonatche i Davitchonatche.    1861

mizmos komo tambien i por koando resivija musafires, de las 4 kamaretas la una lis servija por salon de resivir vijitas, i en las 2 bivijan a una a kada uno, i la otra por las krijaturas i los mosos, a los presipios era ke ja bivijan los 2 ermanos mui kontentes i mui aunados, ma mas tadre ke i a ejos ja si lis engrandisio, la familia, foe ke enpesaron a tener algunas deferensias, seja entre los ermanos komo tambien i entre las mujeres, i a esta razon foe ke S-r. Davidtchonatche, li kalio ke si apartara, de kaza, sigun ke mas adelantre ja lo van a meldar, i en esta kaza tenija un mui grande kortijo, kon sus boenas hoentes i chadirbanes, ke sovija la agoa, a 10 metros, de altura, en las goertas tenijan sembrados muntchos modos de rozas, por el enverano i aparte tenijan i kichlas ke es goerta por el envierno fragoada de ermozos djamis, por la luz, i arientro kon koftores^[76], por la temperature menesteroza para las rozas, i aparte tenija bostan por zarzavat kon ke tenijan gortelanos spesijalmente para esto avija tambien i muntchos arvoles, i tchimenlikes ke el kortijo ja respondija ja para lo todo i aparte tenija su dichari avli kon sus ahires, por kavajos i vakas i mandas mundjideras, por tomarles la letche, por bever i ketar kaimakis de maneras, i mantekas freskas, por los dezajunos ke los gizavan, a la moda turka ke kalija ke foeran de mantekas sin sal, ke de esto si lo enbezavan de las turkas ke vinijan de kostan i tambien ke ja las enbezavan, ke eran unas komidas tanto savrozas i plazientes ke envisijan la alma de la persona, ke non si poeden eskrivirsen la manera de savrozura ke eran i era solo ejas las mujeres

1245    Biografia de Tchelebi Jeuda i Avraam i S-res mochonatche i Davitchonatche.    1861

moestras ke los gizavan porke las gizanderas non savijan ni ke si podijan enbezarsen, i ejas non si avregonsavan, de irles ande las turkas por ke las enbezaran, ke sigun ja lo saven de antes ke ja si vijitavan de las unas a las otras siempre,

               Tchelebi Avraam ke i en este anio tambien estuvo en NICH, por sus maneras de los negosios ke los tenijan i el ke sufria algo de el EMORAID, majasil, ke lo mas muntcho li vino ke loke vijajava lo todo a kavajo ke era el minzil, i era de dija i de notche, i siempre koriendo, ke en vezes li apartava [apretava] mas muntcho, i en su estar en NICH, lo vido a un sierto su amigo ke el koal tambien sofrija de esto i los medikos de Nich ke li izieron ona operasion, foe ke li kortaron mas muntcho de loke era el menester, i ansi era ke en el asiento si li avrio un borako mas grande fin a el grado ke non si sentija koando si salija de el koerpo, ke koando lo vido esto i el ke ja tenija, i pensandose ke si podra arivar en este grado si sekilejo mui muntcho, lo izo ke si lis adereso a estos medikos en diziendoles ke i el sofria de esto solo ke almoranas (tetas^[77]) non tenija, i los medikos ke lo examenaron foe ke lo akonsejaron por ke si foera a viena, i ke sin ningun miedo ke li ivan a azer mui kolai esta operasion, i de el espanto ke tuvo, el buchko presto de reglar su etcho ke lo tenija en Nich, i partio por viena kon paiton a zemlin i de Zemlin ke ja avija Chemendefer, si foe a viena, i en viena ke ja tenijan sus komisioneres de sahtijanes i mechines ke lis mandavan a los S-res Leon Adut i Elijau Chaki por ke si los vindieran por sus kontos

1246    Biografia de Tchelebi Jeuda i Avraam i S-res mochonatche i Davitchonatche.    1861

i en este anio ke ejos tuvieron grandes partidas de sahtijanes i de michines, ke lis foe tambien i una anijada mui provetchoza, ke valieron estos artikolos kon unos presios mui altos, i ganaron mui muntcha moneda, ke en este tiempo ja tenijan en S-r. Adut, 8000 dukados por sus konto depozitados, de las venditas ke ja avija etcho, i denpoes ke ja estuvo unos koantos dijas en viena, en djuntos kon S-r. Chaki, si foeron a un ichpital, i se amostro a los medikoe, ke los koalos si lo izieron mui muntcho leviano, kon dizirle ke esta, operasion era la mas kolai de todas las otras mizmo las tchikas, i ke non tuviera por nada en koalo espantarse, i ke non tenija de konsentir nada de solos [dolor], i kon non era la operasion por kortarle seja kon kotchijos or kon tejeras, otro ke semplemente kon una manera de gumas^[78], i Tchelebi Avraam enkorajandose a estas todas ditchas, lo izo ke a la manijana si foe al ditcho echpetal, i de el presipio li demando a el derektor koalo devija de pagar, seja por la operasion komo tambien i por los medikos ke lo ivan a kurarlo i kudijarlo, i tambien las kuras, i el mantinimiento i el lugar ande iva a estar, i ansi todo mas el menester, de el mantinimiento i otras kozas, ke li podran premir, i el derektor ke lo sintija a todo loke li demandava, su repoesta foe, ke non tenija nada de pagar solo ke koando si sanara i ke ja se iva a ir, si lo kerla es solo ke lis poede darles a los servidores de el ichpital, un tchiko presente i mas a dinguno nada, ke lo todo ja si paga de el uchpetal, i en akel Mizmo dija ja li izieron la operasion, ke li foe mui levijano, i lo metieron en una boena

1247    Biografia de Tchelebi Jeuda i Avraam i S-res mochonatche i Davitchonatche.    1861

i grande kamareta, kon su boena kama i su mobilija, i todos los kudios menesterozos, si los azijan en su tiempo, de mizmo i los medikos ke lo vijitavan 3 vezes a el dia, i seja a los servidores komo tambien i a los medikos era ke siempre lis iva dandoles presentes, en moneda, a la sikreta, i denpoes li adjuntaron a su kamareta ande estava a un sierto Hr. Refael Krispin, de jambol, i el koal sufria de la maladija de el mal de piedra ke non podija urinar, i li kontava, ke esta mal li vino, de koando estava en Kostan i ke lo mas muntcho, si iva ande Tchelebi Avraam Kamondo, ke kon el koal djugavan dijas enteros el tavlo, i a razon ke si avregonsava de ir a urinar, i ke dajanijava muntcho, lo topa ke de esto era ke li vino esta mal, i era ke los mizmos medikos ke lo meravan i ke lo kuravan a Tch. Avraam era tambien i ke lo kuravan i a Hr, Refael, i en sus pasatiempo, ke lo tenijan li dezija, ke ami mi kuran por delantre i a el lo kuran por detras, i pasavan el tiempo mui boeno porke todos los 2 eran Hahamin i mi S-r. Padre estuvo komo un mes en este ochpetal ke en este tiempo era ke kada dija lo vijitavan muntcha djente, sovre todo ke el S-r. Chaki le iva 2 vezes a el dija, i koando ja salio, lo kombedavan muntchos amigos en sus kaza a komer djuntos, i li azijan grandes oneres, i entre los kombites ke tuvo, foe ke lo kombedo, en un dija de viernes, el S-r. Presio de Koko, porke foera la maniana de Chabas a dizir la Tefila en su kaza, ke el koal tenija en su kaza, un Midrach ande meldavan en kada dija 10 Hahamim, por la alma de su padre, ke los koalos eran todos mui bien pagados i en mizmo tiempo dizijan i

1248    Biografia de Tchelebi Jeuda i Avraam i S-res mochonatche i Davitchonatche.    1861

las Tefilod, seja de ensimana komo tambien i en los Chabatiod i los Moadim, kon ke tenijan tambien i los Sefer Toros, i Tch, Avraam ke ja estuvo demanijana de Chabad en su kaza, i ke dicheron la Tefila, foe ke el S-r, Koko, lo kombedo, ke entrara en su kaza i lo entro en la kamareta ande ja estava la meza poesta, de muntchos modos delos dezajunos, en platos de plata, i kotcharas i pirones i kotchijos, de oro, i muntchos modos de los bevrajes, i dezajunaron i bivieron i platekaron en algunos pasajes, de viejo, ke estos todos dezajunos eran etchos kon mantekas i kezos, de lo mas fino, i denpoes ke ja si eskapo esto de lo de kezo, trokaron todos los platos i los pirones i kotchijos i kotcharas tambien de oro i de plata, ke era por de karne ke lis mitio, algoengas aumadas i modos de las salamias, i otras ansi kozas de karne, i denpoes ke ja si eskapo i esto bivieron kahves i se salio mui muntcho kontente de todas las onores ke li izieron, i ansi midrach, ke meldavan en las tadres de kada dija lo tenija tambien i el S-r. Adut, i meldavan Gemara i otras kozas, i mi S-r. padre ke si iva lo mas de las tadres en este midrach sigun ke ja lo saven ke era boen Talmodisto i S-r. Adut tambien i S-r. Chaki ke eran lo mizmo era ke estudijavan en la Gemara, i en esta tadre de Chabad, ke estuvieron djuntos en el Midrach, li demando S-r. Chaki a mi S-r. Padre por ke li kontara, komo lo paso en el dezajuno de S-r. Koko, esta manijana de Chabad, i mi S-r. Padre kon su boen korason li estuvo kontandole, i alavandose por toda la onor ke li izieron, i los boenos dezajunos ke komieron, i tambien li dicho ke komieron boenas

1249    Biografia de Tchelebi Jeuda i Avraam i S-res mochonatche i Davitchonatche.    1861

salamijas i algoengas aumadas, i de esto de las algoengas foe ke si rejo S-r. Chaki i los otros ke estavan en el midrach, en diziendole ke algoengas non kavija en el dezajuno, ke de esto ke si rejeron, lo alkanso a saverlo, i el S-r. Koku, i le vino mui pezgadiko por esto ke si li rieron de el, i esto ke si espandjo en muntcha i otra djente, i a mi S-r. padre li vino tambien mui pezgado i se sikilijo, mui muntcho, lo topo de mijor de irle ande el S-r. Koko, por aklararlo esto, i demandarle las mil eskuzas ke el lo konto por boeno i alavarse de la onor ke li kijo bien azerle, i kon esto el S-r. Koko, ja li dicho, ke non tenija dinguna kulpa, i aparte el foe kombedado i en las kazas de todos de los S-res Mate Ruso, i foe de este tiempo ke enpesaron de moevo a tratar i kon la kaza de el S-r. Mate Ruso, kon ke izieron kondisiones, mas konvenivles de el S-r. Adut, i de el S-r. Chaki, i en las kondisiones ke izieron kon el S-r. Ruso era ke lis avrio el kredit, por ke li podijan travarle la suma ke si lis podia azerlis el menester, sin limeto kon un enteres de 6 % a el anio, i kon la kondision por la suma ke li travaran ke li devijan de remeterle en ropas, ke las merkaran por vendersen seja en viena komo tambien i en Pechta, i ejos sovre esto si komportavan por koando si lis iva azer el menester ja si lo azijan saver de mas antes por la suma ke ivan a kerer i esparavan repoesta i denpoes si prevalijan kon ke li dizijan tambien la manera de los artikolos ke li ivan a mandarle, i ejos si kalkulavan siempre a prevalersen solo el 75 %, de las ropas ke li ivan a mandarle, i en todo el tiempo ke lavoraron foe ke nunka non lis refuzo por la suma ke li demandaron, ke ejos alkansaron a prevalersen fin a 300,000 florinos, i denpoes li mandavan la ropa,

1250    Biografia de Tchelebi Jeuda i Avraam i S-res mochonatche i Davitchonatche.    1861

i la komision ke li pagavan era, de 2 %, i aparte a 3 % por dechkontos de las ropas ke lis vindija ke eran lo todo a fijado, las venditas i restava a los rizikos de el S-r. Ruso si en kavzo alguno non pagava, ke a ejos los akredetava, en el mizmo dija de la vendita, i aparte lis kovrava a 1/2 % de magazenaje, i denpoes de este tiempo mas non mandaron ni a S-r. Adut ni a S-r, Chaki dingunas ropas i Tch, Avraam resto en viena, otros 2 mezes, fin ke si vindieron todas las ropas ke tenijan en estos ultimos S-res. i kortaron todos los kontos i sin ke lo supieron seja el S-r. Adut komo tambien i el S-r. Chaki ke non tenijan de lavorar mas kon ejos, ni menos ke lo supieron las konvensiones ke lo izieron kon los S-res Mate Ruso por lavorar para el avenir kon ejos, ke lo todo foe en sikreto,

               I en este tiempo ke mi S-r. Padre estuvo en Viena el foe merkando muntcha mobelia, seja por su kaza komo tambien i por la kaza de su ermano Tch. Jeuda ke la avija fragoado, para sus Ijos sigun ke ja lo eskrivi mas antes por esta kaza, i estos kanabes, los fotolios, i sijas, i mezas de komer, komo tambien i mezas redondas por las kamaretas, i mezas medias por debacho de los espejos, i los modos de armarios, i bufes i ansi mas seja por las platas i vidros i vistidos, i muntchas modas de estofas por makates i kavesales de los minderes, i bogos de mezas seja de estofas finas komo tambien i de modos de otras ropas, i perdes por ventanas i poertas, i aparte merko tambien muntchas modas de vistidos i ropas seja de mojeres komo tambien i de ombres, para toda le familia, merko tambien i muntchos

1251    Biografia de Tchelebi Jeuda i Avraam i S-res mochonatche i Davitchonatche.    1861

livros todos jaldizlis para toda la familia i eskritos sus nombres i muntchas Megilod, i aparte Remonim de plata, i kotchijos, kutcharas, pirones, tablas de adulsar, Hanokijas, Ase besamim, pimientones kandelares, dulseros, lo todo de plata fina i bien lavorados, i ansi mas todo modo de koza ke es el menester por una kaza komplet i aparte merko i muntcha djoja komo manijas, broches, anijos, perlas, poles de kamiza, kordones, de oro, i la djoja era todo de birlante, fino, i merko aparte oras de pared i de petcho por todas las kamaretas, ansi i espejos grandes por los salones i las kamaretas, ansi i almenaras i muntchos servizes, de tchinis komplet, i vidros, de sus maneras, lo todo seja por si komo tambien i por la kaza moeva de Tch. Jeuda, i fin oi de esta toda ropa, existe, ke todo loke tenemos es de esto ke lo merko, en este tiempo, por ke foe a sumas grandes, la merkida i anke ke si rovaron tanto en la gera Turka-Rusa, de 5638, torna kon todo ja ai muntcho i lo mas de la mobilija ke tenemos es esta, i esta toda ropa se trucho, fin a Zemlin por la tuna i el Chemendefer, i se komertchejo en los komertchos Nemsi, Sirbo, i Turko, lo todo vija el S-r. Galano ke el koal era sus komisioner, por Zemlin, i koando paso Tch. Avraam por Zemlin, ke si li adereso ande el S-r. Galano por darle notas, de las ropas, para ke las podiera komertchejarlas, i por decharli i moneda tambien, para pagar los komertchos, i el ke ja si avija etcho fin a un grado, la suma ke li podija premir, i ke ja si la avija i aprontado, li foe a el kontoar de S-r. Galano por ke i el lo iziera konto, i el koal, ke ja tenija por eskrevano a su jerno

1252    Biografia de Tchelebi Jeuda i Avraam i S-res mochonatche i Davitchonatche.    1861

ke serka ja avija boltado de viena de sus estudios, ke el koal si metio a azer estos kontos, kon tubechir, i los iva aziendo los kontos ensima de su masa [mesa], ke de tantos kontos ke los azija i ke si li entchija la masa [mesa], ke por eskaparlos ke non li kedava lugar, los alempijava todos los kontos kon una espondja, en dechando solo el chifro de la suma de abacho, i ansi foe intchendo i alempiando la meza unas koantas vezes, fin ke lo topo el konto kon 80 dukados manko, de esto ke devija ser, i Tch. Avraam sigun ditcho ke el si avija etcho su konto, visto ke li demanda menos los 80 dukados, li kalio de moevo ke si examenara su konto, i en non topando dingun jero, ala ora li dize a el ditcho sekretar, na ke agora ja alempiates todos los kontos ke izites, i si en kavzo avrija algun jero komo es ke lo vas a poder saver si serijan djustos, i la repoesta de el sekretar foe ke los kontos ke el los izo son mui djustos ke el nunka non si jera, i esto es el konto, i el S-r. Galano visto ke li dicho ke el non si jera, foe ke el mizmo lo izo de moevo konto, i lo topo sigun ke lo avija etcho mi S-r. padre, i el sekretar kedo mui avregonsado, i esto molo kontava, prima ke non kale azer kon tobechir i segunda ke non mos kale dizir ke non mos jeramos, ke es koza ke siempre la persona si poede mui presto azer todos los jeros ande non si lo poede pensar, i denpoes ke ja lo reglo i esto el partio, por belogrado, ma siendo ke era en el mes de Adar, i ainda ke non estava la tuna avierta para los vapores, ansi ke paso la tuna kon kaik, i los jelos (buzes) ke estavan koriendo a kantedades grandes, foe ke travo mui muntcho apreto, i

1253    Biografia de Tchelebi Jeuda i Avraam i S-res mochonatche i Davitchonatche.    1861

espanto, ke lis turo este vijaje fin a denpoes de la medija notche en siendo ona lichura de apenas medija ora de kamino, i kon muntcho mal ke ja arivaron a la urija de belogrado, i siendo ke era de notche, i la goardija Turka ke la goadrava la kale de Belogrado, non los dechava abachar, ke todos los moldes ke los izieron foeron sin dingun provetcho, i ansi ke ivan endo i viniendo i kamenandosen por la tuna por poder topar el molde de abacharsen ma non lo estavan a dingun presio pudiendo, ke en mientres los grandes buzes ke lo ivan foertemente harvandolo a el kaik era ke si ivan mui muntcho espantandosen fin ke a los kavos si avijan detchizado de boltarsen atras, kon ke gritaron ja batijimos^[79], i la nutchada ke estava mui eskura, i kon un poko otro ke nadaron i el soldado ke goadrava ke non los pudo verlos ejos si abacharon poko mas abacho en tiera, i ansi foe ke podieron tokar la tiera, i enpesaron a kamenar para la sivdad, lo todo ala orija de la tuna, ke avija muntcha luvijas i kanios, i de esto non lis estava nada enportandoles, solo de topar plasa ande moravan los Djidjos, i apenas ke ejos ja vieron sivdad i plasas, i el ke non konosia de mas antes Belogrado, non savija ande entrarse, ke estava entero mujado i enmatakado, i kamenandose foe ke al afito, vido en una kaza ke la poerta estava avierta, i kon kuraje lo izo de entrarse en esta kaza, i mero por la ventana ke estavan en una kamareta, 15-20 personas kantando, kantikas de purim en djodezmo, i todos estavan koziendo maskas, para purim, i koando esto lo vido si gusto entero ke ja era kaza de Djidios, i el ke si entro arientro ja foe ke lo resivieron

1254    Biografia de Tchelebi Jeuda i Avraam i S-res mochonatche i Davitchonatche.    1861

kon kara boena i lo decharon ke si eskansara i denpoes ke el lis konto todos los males ke el los paso lis rogo por ke li amostraran la kaza de el S-r. Galano ke esto ja si lo izieron avista, i arivando de mizmo en la kaza de el S-r. Galano ke foe resivido i li dieron tchamachir i vistido por ke si trokara, i tambien vistido, de loke estava entero mujado i enmatakado, i denpoes ke el repozo un dija en belogrado, foe ke partio, por vija de LOM i se vino a Samokov i algunos i otros pasajes enportantes el ja los tuvo tambien i kon el komandir de la kale de belogrado ma ja lo van a meldarlo en ansi otros pasajes, ke el tuvo,

               ke koando ja estuvo en Samokov el ja foe tanto atagantado i mui muntcho sikilijado, de non toparlo a su ermano el Tchelebi Gavriel ke ja avija morido en el 3 Chevat, i ke el non lo savija ke de lo todo ja lo eskrivi en la partida sujas, i la familija entera estuvieron en el mas grande lutio en el anio entero, sin ke ivan a dingun otro lugar otro ke solo era ke si ivan en kada tadre a meldar en su kaza ke ja li vinijan en kada tadre a meldar por su alma en el anio entero,

              En este anio de 5622, S-r. Mochonatche foe ke estuvo en viena, por kurarse de su maladija ke el la tenija de mas antes sigun ke ja lo tengo eskrito ke tenija en la petchadura de el egado,

1255    Biografia de Tchelebi Jeuda i Avraam i S-res mochonatche i Davitchonatche.    1862

i ke estuvo tambien i en paris, i por lo todo ke a el li paso en estos vijajes, ja lo tengo eskrito mas antes en una de las otras partidas ke ja lo meldaron, i koando el ja si vino a Samokov, longo tiempo si foe kurando, de las milizinas ke lo enbezaron los medikos seja de viena komo tambien i de Paris, i siempre salia mas tadre a la plasa, i kon esto foe ke en toda su vida bivio mui sano i boeno, i mediko era ke mui ralo lo vijitava, i era el mizmo ke si azija las kuras, kon ke iva siempre buendo, los modos de las drogas i de las jervas ke esto lo enbezava, de un livro ke avija en el Midrach, moestro, ke es MAASE TUVIJA^[80], i lo estudijava muntcho, i tambien ke si mantenija mui bien boeno ke lo mas muntcho era ke komija karne asada i li plazija mui muntcho komer pechkado, i bevija tambien i algo de vino en kada komida, i el era mui limpio en el vistir, i tenija muntchos kostumes de vistidos seja ala turka komo tambien i ala franka el tenija muntchos kiordis i echkurtas, kapladijados de todo modo de samaras, i lo todo de las mas finas, ke en su estar en Kostan se izo muntchos kiordis, i muntchos anteris largos, lo todo de las mas finas ropas, li plazija muntcho tener djoja, de ombres, en diamante i en birlante, i siempre jevava, boenos i ermozos i bien valutozos anijos de diamante i de birlante i de otras piedras valutozas, i tambien de maneras de broches en su gravata, lo todo de piedras presiozas,

               En este anio ke Tchelebi Jeuda ja la kazo a su Ija la Bu. Jael kon el S-r. Nesimatche Elijau Arie, i sigun ke ja lo eskrivi en la partida de H. Elijatchuno, por la boda ke la izieron en la

1256    Biografia de Tchelebi Jeuda i Avraam i S-res mochonatche i Davitchonatche.    1862 kaza de Tch. Jeuda, i ke li djo 5000 gr. de kontado, i aparte achugar, i ke estuvo en su kaza 3 anios, komo meza franka, ma el S-r. Nesimatchae, en todo el tiempo ke estuvo en su kaza era siempre mui muntcho abatido, i todo li paresija komo ke li estavan merando, el bukado, de pan ke lo iva a komer, a tiempo ke todos los de kaza lo meravan i lo kudijavan i se les enportava mui muntcho de esto ke era abatido, a tiempo ke ejos lo kirijan ke estuviera siempre mui alegre i gustoso, ma su natura ja era ansi, ke non avlava muntcho i era una persona mui flaka, lo mas de su enbivisimiento i kerensija era los estudios, ke li plazija muntcho estudijar en el Talmud, ke esto lo estudio muntchos anios kon Hr. Avraam Koen en el Midrach moestro,

               A razon ke s-r. Josefatche, el Ijo de H. Merkadutcho ke ja estava en Berkovisa empeigado komo profesor de la Echkola de los Djidios, i ke ja si avija boeno fin a una grado resentado, foe en esto anio ke si foe tambien i su madre la Bu. Ruzu, i de esta i de la Bu. Ruzu de Samokov se sekelijaron mui muntcho todas las mujeres moestras, a razon ke era eja ke si lis topava para lo todo, seja por koando tenijan bodas, i tambien en kavso de algunos hazinos, ke eja era mui nekotchera, i muntcho debabija, ke li vinija todo modo de koza de su mano, eja era ki lis azija todas las kuras a las krejaturas koando estavan hazinas, i eja era para las bodas, ke savija seja el gizar komo tambien i responder por todo el menester, i a eja si lo kargavan lo todo, i eja tambien las akompanijava, koando ivan a visitor ande las hanumes, i sovre lo todo ke era ande eja ke si

1257    Biografia de Tchelebi Jeuda i Avraam i S-res mochonatche i Davitchonatche.    1862

akonsejava en kavso de sus menesteres de las mujeres, i eja ja las kontentava a todas, i sovre lo todo eja era mui kontenta porke era mui konsederada i tambien muntcho regalada, en todos los puntos, ke lo primero era para eja, i koando la akompanijaron eja joro,

                En este anio li nasio a S-r, Mochonatche una Ija, i la Jamaron Regina, ke si izo kon eja tambien sigun de todas las paridas ke la vijitaron la sevdad entera i todos los parientes li mandaron tambien todos los platos de parida i lis presentes, seja por la madre komo tambien i por la nasida, i se gustaron i se alegraron i muntcho se kontentavan, i su propia madre la aletcho, i la kudio, ke es esta la S-ra Reginutcha ke foe mojer de S-r. Haimatche, su primo ermano, ke sovre eja uvieron algunos pasajes dezagradavles i es en una de las partidas de el S-r. Davidtchonatche ke podre eskrivir, algunas de ejas, eja foe mui ermoza i mui linda, i savida i entelejente i eja konose boeno seja el Franses komo tambien i el djudezmo, la amavan mui muntcho todos sus parientes, i la protejavan,

            [en este anio de] 5623 Tch. Jeuda lo kazo a su IJo el S-r. Naimatche, kon M. Rahelu Ija de el S-r. H. Davidtchon B. Moche de Kiostendil, ke la novija trucho muntcha achugar, i 100 dukados minsas de kontado, i aparte trucho tambien muntchos prezentes, en oro i plata i djojas, ke li djo el Padre, i todos sus parientes, i por traer a la novija, si foeron de Samokov, por konsfoegros, mi S-r. Padre Tch. Avraam, S-r.

1258    Biografia de Tchelebi Jeuda i Avraam i S-res mochonatche i Davitchonatche.    1863

Davidtchonatche, Jo Tchelebi, i S-r, Mochonatche, J. Arie, i S-r. Elija B. Eliezer, i komo kilerdji^[81] a H. Binjamin, i por sirvidor a Judatche i todos los mansevos eramos sovidos a kavajos, i los mas aidados eran kon paitones, kon ke mos akompanijavan i 2 turkos de los ke ejos ja los tenijan ke eran bien armados para ke mos goadraran por el kamino, i gijadores de los kaminos, ke koando partimos de Samokov ke era serka de la medio dija, foe kon muntchos tchalgis i kantaderas, kon sus panderos, i a todos mos metieron en las petchaduras modos de rozas, freskas telejadas, kon varak, i aparte un karo kargado de modos de las komanijas i de los bevrajes, en abondansa, i en kada 2 oras ke ja avijan kazales, era  ke repozavamos i komijamos i bevijamos i kantavamos, i a la tadre ke la arivimos en Dubnisa, ke mos resivio, en su kaza H. Davidtchon Echkenazi ke lo jamavan H. Davitchon el preto, ke mos izo mui grande onor i saltanat, i dormimos en akeja notche, kon muntchos kantares i amigos ke kombedo a komer i a la manijana ke partimos por Kiostendil foe de mizmo komo esta de Samokov, i denpoes ke si li dieron todas las grasias a H. Davitchon i ke si li dieron tambien i muntchos presentes, foe ke si li rogo por ke mos resiviera tambien i a la boelta kon la novija en su kaza kon ke todo el gaste ja foe de mozotros i aparte tambien ke li pagaron i su boena paga, i todos, ke eramos armados, kon los plomos de el tchakmak, i jo tambien ke tenija 2 plomos ke plata mui ermozos i mui finos, ke de los koalas el uno lo tiene agora S-r. Refaelatchi, era por el kamino siempre etchando plomos en barut, i esto ke era moestro

1259    Biografia de Tchelebi Jeuda i Avraam i S-res mochonatche i Davitchonatche.    1863

plazer era ke mos ivamos kon esto gustandomos, jo era vistido kon un potur de panio de la kolor de el gamejo, i enkochakado de un kuchak de seda, aladjali i ensima un silah, de koero fino, ande los detinija los 2 plomos, i a al siedra tenija una tchanta de plata por meter los fichekis de el barut, i benijado en un kavajo mansevo, ke era AIGIR^[82], de la kolor blanko kon pules pretos, ke era mui liberto i mui enbezado, ke mos kosto en akel tiempo ke eran los kavajos muntcho baratos, por 1750 gr. ke si es agora poede valer 2000 fr. i ansi tambien tenijan i los otros kavajadores, i el vijaje de Dubnisa fin Kiostendil foe de mizmo, komo este de Samokov, i koando ja arivimos en Kadi Kioprisi^[83], los topimos a los konsfoegros de Kiostendil, kon tchalgis, kon ke trocheron muntchas komanijas i bevrajes, i dulsuras ke vinieron kaje la medija sivdad a el moestro enkontro, i seja de Djidios komo tambien i de non Djidios, i denpoes ke ja nos adulsaron kon muntchos modos de konfiturias i de chirupes, mos dieron i komer, lo todo kon tchalgis i panderos, i partimos kon sus paitones ke ejos mo los trucheron, i mos abachimos en su kaza, ke ja tenija 2 apartamentos, i la notche uvieron muntchos kombedados, a komer kon mozos djuntos, i muntchos bevrajes, i kantares, i en este tiempo entro la novija a bezar las manos de los konsfoegros, mui bien vistida i endjujada i akompanijada de sus amigas, en la kamareta ke mozotros estavamos, i bezo a todos las manos i todos mozotros li dimos por las bezas manos koal de nos doblones i koal mahmudies i otros dukados, i bailimos todos kon la novija, i mas tadre ordenaron las mezas, ke

1260    Biografia de Tchelebi Jeuda i Avraam i S-res mochonatche i Davitchonatche.    1863

era todo en mezas redondas, i komimos, al persipio, las komidas de kezo, kon muntchos modos de los dulses de baklabas, i tespichtis, i otros i kaimakis i fides, i ansi mas ke esto era por el presipio, i denpoes, trokaron las bogos i perones i las kutcharas i kotchijos, i todo lo de la mesa i trucheron de moevo lo todo otros por las komidas de karne, i mitieron 20 modos de modos de komidas kon kondutchos i pojos i karnes de su manera, ke de lo todo era a 2 bokados ke si podija tomar porke non si podija komer de todas, i denpoes trucheron las frutas ke foeran 15 modes de frutas lo mas freskas i algunas sekas, lo todo kon muntchos modos de los mas mijores vinos, seja dulses komo tambien i los foertes i tambien muntchos modos de vinos de los buen kon modos de drogas, i koando ja si izo la medija notche mos izieron kamas kon a 3 i 4 chiltes i dormimos mui repozados, i boeno i a la manijana mos dieron los kahves de agoa i aparte de letche, i denpoes los modos de los mijores dezajunos, i denpoes lo vijitimos, en su magazen i este de su ermano H. Nesimatche, i algunos otros amigos i denpoes ke tornimos en kaza komimos de moevo por la medio dia i dorminos komo una ora, i denpoes nos jevo a su tchiflik, el mas serka a la sivdad, komo medija ora ke si jamava GRANISA^[84], i tenija i una kule, mui ermoza, i mos kameno todas las goertas, de los modos de los arvoles de las frutas, i estas de los sembrados i goertas de modos de las mil rozas ermozas, i lo todo a mui muntcho, i este Granisa era un kazal entero, ke es las bachtinas^[85] (muchijas^[86]) i el tenija

1261    Biografia de Tchelebi Jeuda i Avraam i S-res mochonatche i Davitchonatche.    1863

ansi bachtinas, ke las merkava de los Turkos, i kostava kada una de 1500 a 2000 liras turkas, i koando azija estas merkidas li kalia a el presipio ke li foera ande el S-r. de Mehmes [Mehmed] AA. ke el koal era, el NAZIR^[87], de Kiostendil, i kon su komando era ke si governava seja la sivdad de Kiostendil komo tambien i sus todos kazales, i le dizia AGA, tal tchiflik ti lo merki por tantas liras, i si es ke lo kerija el AGA, era ke lo jamava, a su admenestrados, i Kejahja^[88], i le komandava para ke li kontara la moneda a Davitchon Bazirjan i ke li resiviera el takrir, i denpoes a H. Davitchon li demandava, koando era su paga para pagarle ma H. Davitchon non li resivija nada, ke esto li plazija muntcho a el AGA, solo ke en okasion koando si li azija el menester de alguna moneda a H. Davitchon era ke li demandava i el ja li enprestava, sin dingun enteres, i la entision de H. Davitchon era por merkarsilos para si ma non lo podija ke siempre kalija ke foera kon la kontentes de el AGA, ke i esto el AGA, tambien mui boeno ja lo savija, era ke siempre ke li afetava el ja los merkava, i lo todo komportandose sigun eskrito fin ke a el AGA li vinija el keéf, i de esta manera alkanso a enpatronar ke koando el AGA non kerija li dizija este tchiflik tomatelo para ti i si es ke non ti abastara moneda jo ti enprestare, i kon esto li bezava la alda, en sinijal de rekonosimiento i lo tomava sovre si kon ke li dizija ke era para los ijos ke los estava tomando i esto era ke si los pasava i a el nombre de el uno de sus ijos, era de esta manera en akejos tiempos ke si podija merkar mulkes i denpoes ke ja vinimos torna en kaza i la achuger ke ja estava espandida i la sivdad entera ke la ivan vijitando las mujeres i en el dija de Chabad ke vinieron todos los ombres, i a la komida uvieron muntchos kombedados, ansi i la notche de alhad

1262    Biografia de Tchelebi Jeuda i Avraam i S-res mochonatche i Davitchonatche.    1863

foe lo mizmo i mos jevo tambien a el banio Tchifte hamam, kon ke lo angajio, solo para nos, ma mozotros non podimos somportar por estar arientro de la balsa mas de 10 puntos porke era mui kaente, la agoa, i H. Binjamin ke vino kon nos kijo amostrar braverijas, i  ke salto a la balsa, i ke era tanto kaente, i al punto anke ke ja si salio, ma ja si li izieron las karnes mui koloradas i li saltaron botchitcha de sangre de la kaentura, ma ejos los Kiostendilis non Lis azija nada porke ja estavan uzados, i dija de alhad ke ja partimos kon muntcho saltanat, i ke vinimos a Dubnisa la notche i mos abachimos torna ande H. Davitchon Echkenazi, ke ja estava todo pronto i a la maniana, ke partimos por Samokov i abachimos en el Han de rijan, ke foe el karchi, ke salieron Samokov entero i kon muntcho saltanat vinimos kon muntchos paitones i kavajeros, i tchalgis, i kon entrar a el kiopri de la sivdad mos seraron las poertas, ke ja lo saven ke avijan poertas en la sivdad i las notches las seravan i esto ke lis demandaron la razon foe ke kerijan prezentes para los ke seravan en kada notche las poertas i esto ke lis dieron al punto foeron aviertas i pasimos mui liberos, i en el karchi si djo los dulses i los cherupes i algo de dezajunos, i en Samokov si abacho la novija en la kaza moeva ke moravan los IJOS grandes, i en akeja notche tambien uvieron muntchos kombedados i a la manijana ke repozaron i en dija de mierkoles dieron los kiduchim, kon grande saltanat, ke estuvo la sivdad entera kombedados, i los kiduchim se dieron en kaza porke non era el uzo de darsen en el KAAL, ansi de mizmo kombedaron a la sivdad entera

1263    Biografia de Tchelebi Jeuda i Avraam i S-res mochonatche i Davitchonatche.    1863

por la notche de la boda, seja a los ombre komo tambien i a las mujeres, ansi foe i en el dija de Chabad ke estuvieron todos los parientes, i se izo 8 dijas de boda sigun ja lo tengo eskrito i en kada notche kombedavan a una djente, por la sigunda ves ke los parientes ja estavan siempre, seja en los dijas komo tambien i en las notches, ke era ansi ke si alegravan i se gustavan i tambien ke si kontentavan, i denpoes ke la boda ja si eskapo, los konsfoegros todos si foeron i resto la madre de la novija otros 15 dijas, i denpoes tambien si foe i eja, i la novja ke ja foe siempre mui repozada i mui meujuda, i respektoza, mui presto si asamelo en los uzos de la kaza, i ansi ke bivijan de todas las 2 partes, mui bien kontentes ansi de mizmo i kon su marido, en toda sus vida,

           En este anio ejos tuvieron mui grandes okopasiones, en los etchos de sus magazen, ke merkaron grandes partidas de Hachares, en muntchas sivdades, i sigun eskrito antes ke era solo ejos, mizmos ke si lo meravan todos los etchos, i non tenijan dingun eskrivano ni menos, kontabelistos, otro ke los personales ke tenijan era solo, para mandarlos por los kazales i las sevdades de afoera, i los kontos i livros era lo todo ke ejos lo jevavan, seja estos de Samokov komo tambien i los de afoera, ke todos sus personales era ke en kada semana lis mandavan las notas de todas las operasiones, ke azijan, i ejos lo tomavan en nota en sus livros de Samokov, ke la sentrala era Samokov, i todos los ordenes si davan de Samokov, a todos sus personales, i ansi era ke los podieron enkamenar todos sus etchos

1264    Biografia de Tchelebi Jeuda i Avraam i S-res mochonatche i Davitchonatche.    1863

mui regolarmente, i de los hachares de este anio ejos tuvieron mui grandes profitos, de mizmo foe i en el etcho de los maadenis, ke dieron grandes foersas, i podieron lavorar 2 tantos mas muntcho de los otros anios, ke de esto tambien tuvieron mui grandes ganansias, i a esta razon ejos fragoaron en muntchas vignas, i en los maadenis de radoil i de Kiostandja, kazas de kampanijas, ke tenijan en 6 vignas al deredor de samokov ansi kampanias, i una tambien en Mahali Jovan^[89], i en los maadenes i en el tchiflik de la bana, todas mui bien fragoadas, kon sus kozinas i kada una kontenija a 5 i 6 kamaretas, i todas de a 2 etajes, i todas tambien mui bien mobelijadas, i kada uno de nos, mos ivamos, kon moestras mojeres i kreaturas, a una de estas vignas, ke ja tenijamos apartado kada uno su kampanija, i era ke Tchelebi Jeuda se iva a la kampania de rudech, i Tch. Avraam, a la kampanija de draguchin^[90] ke era de mi S-ra Madre, i S-r. Mochonatche a la kampanija de kabran, i S-r. Davidtchonatche, a la kampanija de tchitli, i S-res Naimatche kon Chemoelatche, a la kampanija de izlakutchan, i jo tchelebi a la kampanija de latif AA en rudech, i s-r. Refaelatche a la kampanija de las birzas ke foe fragoada mas tadre, i todas estas eran serka la una de la otra i todas en el kampo de rudech, solamente ke la vigna de draguchin ke era de esta parte de el isker, ke por pasar de la parte a rudech, li izieron un kiopri en el iskir, por poderlo pasarlo a pie, a razon ke koando era el iskir grande, non si podija pasar la agoa kon paiton, i los paitones ke tenijan era ande Tch. Jeuda tenijan 3 paitones kon 3 pares de kavajos

1265    Biografia de Tchelebi Jeuda i Avraam i S-res mochonatche i Davitchonatche.    1863

i ande Tch. Avraam tenija 2 paitones kon 2 pares de kavajos, por sus plazeres, i aparte tenijan i kavajos por benijarlos ke koando se ivan solos era lo todo a kavajo ke kavajavan, i lo todo de los boenos ke aparte tenijan tambien i kavajos por los maadenes i para el etcho i esto siempre en los mas muntchos dijas de el enverano lo azijan de kontino, i todas estas kampanijas eran de kampos mui grandes, i todas eran sembradas de bostanes i goertas, kon montchas hoentes, ke lo mas ke mos rekojijamos era siempre en la kampanija de rudech, ke iva Tch. Jeuda, de la vigna de draguchin ke iva Tch. Avraam enfrente de el Iskir ke era mui ermoza, siempre si meravan de los unos a los otros kon grandes durbines, porke non avija telefones para ke podieran avlarsen, ejos durmijan muntchas notches en estas kampanijas, i en vezes dechavan a las mujeres en las vignas i ejos si ivan a la sivdad por merarsen sus etchos, i  la tadre se ivan de moevo i ansi lo azijan muntchos dijas, i kon semanas enteras, lo mizmo lo azijan kon irsen i a los maadenis, i al tchiflik en la bana, tambien estavan kon semanas enteras, i ansi era ke pasavan sus vidas mui gustozos, i de esto si enselavan mui muntcho seja los turkos komo tambien i los djidios, fin a ke lis dicheron porke si travarar un poko por ke avijan turkos negros, ma ejos non metijan ni entino de esto ke lis avlavan, porke sigun ja lo tengo eskrito ke la enfloensa ke tenijan era mui grande i non si espantavan de dinguno, todos los grandiozos seja turkos komo tambien i krestijanos, i lo mas de los djidios, lis eran devdores, i kon a sumas grandes de moneda, i aparte de esto lo

1266    Biografia de Tchelebi Jeuda i Avraam i S-res mochonatche i Davitchonatche.    1863

mas enportante era ke todas las reklamas ke tenijan todos seja en las polisijas komo tambien i entre los merkaderes era lo mas muntcho por vija de ejos ke si eskapavan,

              En este anio foe nomenado mi S-r. Padre, por miembro en el djuzgo DAAVI^[91], mezlichi^[92], ke es ande djuzgava el Dajan, de este tiempo i en delantre solo el Dajan non podija djuzgar sin ke tuviera 4 miembros kon el en djuntos i eran los 2 turkos i un krestijano i un djidio, i todas las setensias ke si davan kalija ke foeran sijadas tambien i de estos 4 miembros, ke al presipio eran sin dinguna paga i mas tadre lis enpesaron a pagarles a 130 gr. a el mes, i devijan de ir en kada dija antes de medio dija i estavan solo 2 oras por djuzgar a el poevlo, i los djuzgos eran ke koal foesa ke reklamara de el otro seja moneda or seja otra koza era ke devija dar una suplika en deklarando su reklama, i el Dajan en el mizmo punto lo mandava a jamar a el kontrario, vija de su muzur (rasilnik)^[93], kontra de un gr. de taksa, i fin ke vinija el kontrario era ke si esperava en la kamareta ke ja avija apropiado para estos ke esperavan, i koando ja vinija era ke entravan todos los 2 a el mislich, lugar ande los ivan a djuzgar, i denpoes ke ja los djuzgavan i el uno ke devija ser el kondenado, lo detinijan si non tenija fijansa or ke lo enseravan, i ansi era ke los djuzgos si eskapavan en el mizmo dija si era en koza de moneda i se avija de ande kovrarle ja era el pristav ke lo reintchija en el mizmo dija, si entiende por los djuzgos tchikos ke non avijan muntchos, por razon ke lo mas de deferensias ke tenijan ja era

1267    Biografia de Tchelebi Jeuda i Avraam i S-res mochonatche i Davitchonatche.    1863

ke los konvenijan en la plasa entre los merkaderes i los amigos, i sigun de loke lo topavan por deretcho era ke de todas las 2 partes ja si kontentavan en tal de non ir por los djuzgos ke era grande vergoensa, de apararsen en los djuzgos i esto non era solo los djidios ke ja era i los turkos i los krestijanos,

              De este anio, i endelantre, Tchelebi Jeuda enpeso a salir mas poko a la plasa, i el si resento en kaza en el dichari avli ke ja tenija un selamlik kon 3 kamaretas, ke el koal ja existe ainda i las mobelio mui boenas, i era ke si asento en este selamlik, ke li venijan muntchos turkos de los begis, a vijitarlo sigun de el uzo turko, ke tenija sus mosos i kahve odjagis, i tchebukes, por koando li vinijan era ke lis dava kahves i tchibukes, ke era solo por pasatiempo ke li vinijan de mizmo le ivan i los tchorbadjis krestijanos ke eran los grandes de la sivdad i ansi tambien i muntchos djidios, i lo mas muntcho era ke li iva un sierto H. Menahem Matatia, ke el koal konosija el djugo de el tavlo i de la dama, i era ke djugavan porke i Tch. Jeuda tambien los konosija mui bien estos djugos, i a esta ultimo por esto ke siempre lo akompanijava, era ke li dava en kada djueviz a 2 i 3 midjidies, por ke gastara a razon ke non tenija entre todo de sus pasatiempos era tambien ke si okupava i algo de los etchos de los maadenis, ke esto si merava en kaza, i anke ke ja tenijan a 2 derektores ke kudijavan i lo admenestravan, i azijan todas las eskrituras ke non eran pokas, a razon ke tenijan kontos kon 700 a 800 lavoradores, i aparte los fieros ke ketavan i ke los vendijan

1268    Biografia de Tchelebi Jeuda i Avraam i S-res mochonatche i Davitchonatche.    1863

ma torna ja era lo todo kon sus komandos i los ordenes ke lis davan i ansi era ke lo podijan enkamenarlo, i esto era ke si li aderesavan solo ande el, porke Tch. Avraam i los mansevos ke eran en el kontoar ja estavan mui okopados, el si levantava, en kada dija mui demanijana, i dezijan la tefila i meldava el hok le jsrael, i los korbanod, i denpoes ke ja dezajunava era ke si salija a el selamlik ke non mankava, en kada dija ja avijan komandas de darles, a los mollas, i tambien ke i li vinijan la djente seja por pasar la ora komo tambien ke avijan kistiones de reglar por el etcho seja de el kolel komo tambien i de otra djente, i era todos ande el ke li vinijan, i el era ke respondija a lo todo, i koando ja era la ora de komer, el de moevo si entrava en kaza, i denpoes ke komija era ke dormija tambien i komo una ora, i de moevo si salija a el selamlik, i koando ja si azija mas tadre el komandava ke li prontaran el kavajo ke el lo kavajava, ke era ke si jamava chichko, i era de la kolor amarija kui, i mui fursudo i mui repozado, ke al koal lo tuvieron fin a el anio, de 5638 ke ja foe la gera, i se lo jevaron i se iva solo a la vigna de rudech, kon ke vijitava tambien i las otras vignas, en veses si boltava i en vezes si restava en la vigna, kon ke mandava a jamar a su familia i dormijan la notche, i si es ke li plazija si restava i la semana entera, i koando ja eran los mezes, de Julio, i denpoes, se iva a el maaden de radoil i a el tchiflik de la bana kon su familia i restava mezes enteros, era ansi ke lo iva pasando i se iva kontentando, ke bivija mui alegre, su vida i lo pasava mui boeno,

1269    Biografia de Tchelebi Jeuda i Avraam i S-res mochonatche i Davitchonatche.    1863

en kada anio de este tiempo i endelantre el rekojija vakas por engodrarlas, i esto ke si tomava a estos ke lo konosijan este ofisio, por haverin, i denpoes ke ja si engodravan el las vendija seja en Samokov or las mandava a filibe i otros lugares por vendersen, era una persona ke li plazija muntcho kantar, porke i el tambien savija kantar, i en kada tadre si bivija komo serka medio kilo de raki non si enboratchava, el fumava muntcho kon tchibuk, ke era trijakli, i aparte, el travava el enfie, ke kon esto li vinija boeno por la dolor, de kavesa, el vino non lo bivija muntcho, i komer komija a poko, el era algo de poerpo bacho, i era godro, su barva era kirkijada, su vistido era de chalvar, de panio kon kuchak laur, i de una fermela kapladijada kon samara, i ensima una libade algodonada, de deferentes ropas finas, i ensima de esto por el enverano se vistija de modos de echkurtas kapladijadas de los modos de las samaras delgadas de i las boenas, i por el envierno kiordis de samaras godras, mas tadre el si izo pantalones antchos, i en una ves ke jo mi akodro ke vino a el kontoar, kon vistido de una basma ke li avija agradado, i se izo pantalon i lebade, i mi S-r. padre i sus IJOS ke lo vieron kon ansi vistido de basma, li dicheron ke non kale ke si vista de basma i mas non si lo vestio, el kalsado era de laptchines kon chuhas, i mas denpoes se izo potines, sin topukes el jevava en la kavesa una boena fes, kon peskiul de seda,

1270    Biografia de Tchelebi Jeuda i Avraam i S-res mochonatche i Davitchonatche.    1864

            En este anio de 5624, merkaron el beilik de el okrug, de Sofia, ke lis kosto 70 jukes komo una suma de 1,800,000 frankos, i esta merkida la izo S-r. kamondo por sus kontos, ke ejos non foeron a Kostan sigun ke ivan de antes, i de koala manera si azijan estas merkidas i la komision ke li pagavan a el S-r, Kamondo i tambien de koala manera ke si asijan los pagamientos lo todo ja lo tengo eskrito mas antes, i ejos ke ja estuvieron de akordo por esta suma, sin tadrar se mitieron en el lavoro, por enpesar a kontar, ke ja los tenijan a sus personales por kada 3 i 4 kazales, ke ivan un derektor akompanijado de 4 pantas^[94], todos kavajeros, i en un enterval de 15 or muntcho 20 dijas ja kalija ke estuviera todo kontado, i era ke podijan saver seja las ganansias komo tambien i las piedritas, ke el uzo ja era de azer i tchalkatura i kontarlos 2 i 3 vezes, i ke mas de 3 vezes non dechavan revedijar, por razon a ke non si lis rompiera el bien, ke ja avija ke koando alguno goadrava i denpoes li topavan era ke li kovravan 3 tantos, i esto ja era ke en kada revizia ja topavan ke goadravan, i denpoes ke ja eskapavan de kontar todo, era ke si lis dava a kada patron de los karneros i de la kavras, a ona teskere ke ja estavan estampadas, en notandole, la suma de kavesas, ke enpatrona i la suma ke devija de pagar el dasio, kon ke eran i sijadas kon el sio de el governo, i denpoes de esto era ke salijan otros personales por rekojer la moneda, i todos devijan de pagar en un enterval de un mez de tiempo, i siempre turava de 3 a 4 mezes, i los pagamientos los devijan de azerlos en metalik or en bechlik, i en oro de

1271    Biografia de Tchelebi Jeuda i Avraam i S-res mochonatche i Davitchonatche.    1864

la koenta de lira a 100 gr. ke i otras monedas ke avijan ke eran komo rubles, direklis, satchlis, sfansikes, i otras, tambien las resivijan solo ke lis azijan a un rebato de 5 i de 6 % por ajio de kada moneda, i en este tiempo ke toda la moneda ke si kovrava, era ke la van a traer a Samokov, ansi era ke estavan dijas enteros i las notches fin a denpoes de la media notche kontandola por resivirla de kada personal aparte, i tomarlo en nota, de kada uno, i aparte era ke kalia i ke la boltaran por oro, por poder remeterla a Kostan i los metalikes era ke los azijan en bolzikas de a 1000 gr. kon ke si ketavan a 1 gr. de kada bolsita por la valor de la bolsa, i ansi tambien i ejos las davan, los 999 gr. por 1000 gr. por el enkamenamiento, de el beilik por la partida de Sofia era, ke S-r. Mochonatche, se asento en Sofia i se avrio una kanselaria, akompanijado de H. elijatchuno por sekretar i otros mas ansi personales por ajudarlo, ke la partida de Sofia era muntcho mas grande de esta de Samokov, lo mas muntcho por ke estuviera mas serka de el Pacha, ke estava en Sofia, i ke avijan en kada dija modos de deferensias, i era lo todo ande el Pacha ke si eskapavan i tomarle los ordenes, ke eran menesterozos, i S-r. Mochonatche de Sofia era ke kada dija por dija lis eskrivija kartas a Samokov aziendoles saver de todo loke li pasava en kada dija, seja de los ordenes komo tambien i los enkasos i los remetimientos ke los azija por ke lo tomaran en nota, sigun ditcho ke la sentrala era en Samokov i lo todo dependija de samokov, ke i lo mizmo lo azijan i de Samokov ke li eskrivijan en kada dija, i lo todo

1272    Biografia de Tchelebi Jeuda i Avraam i S-res mochonatche i Davitchonatche.    1864

era kon okazion ke mandavan por ke non avija pochtas de Samokov a Sofia era ke avijan 2 kiradjis el uno Jovan ke los Djidios lo jamavan Jovaniko, i el otro Nikoltcho, i estos tenijan a 5 i 6 kavajos a kada uno, ke transportavan a los pasajeros i tambien kartas i grupos i la kira ke tomavan por una persona era 10 gr. i por karta 1 gr. i era en kada dija el uno iva i el otro vinija, i los kaminos ke non eran choses era mui foerte el vijajar, i tambien ke los kaminos non eran tanto siguros por ke avijan tambien i ladrones, i en este tiempo tambien ejos tuvieron ke merkaron i a su mas mui grandes de havales en Kostan por kovrarsen de las kachas de los vilaetes i de los okruges de Rustchuk, Vidin Nich, Sofia, i algo en Filibe, i en Iderne, i las merkavan koando eran por pagarsen en Sofia sovre 108 el %, i por todos los otros lugares era de 110 fin a 115 el %, a razon ke en todas las kachas non pagavan igual era solo en Sofia ke pagavan lo mas tadre fin a 2 mezes, i en las otras turava de 7 a 8 mezes, i non era solo las ganansias de el presio avija ke ejos lo resentavan el etcho kon los mal muderis^[95] i todo el oro ke lis kaiva era, ke si lo tomavan ejos por ke non jevavan konto de oro a la plata ejos savijan gruch, ke esto azija una deferensia de 3 i 4 %, i aparte merkavan grandes partidas de sahtijanes i de mechines, ke i esto era, ke solo ejos si okupavan ke ejos lo konosijan este ofisio mui muntcho, i kon el etcho de los maadenes, ke ja era de siempre ma torne era de ejos ke dependija sovre los desbolsos ke era a sumas mas grandes, i kon las merkidas ke azijan de fieros de todos los otros maadendjis, era

1273    Biografia de Tchelebi Jeuda i Avraam i S-res mochonatche i Davitchonatche.    1864

ke lis kalia ke los tomaran ke altramente non podijan kovrarle, las sumas enportantes ke ejos las tenijan de aver, i aparte era ke siempre lis ivan dandoles moneda kon enteresos seja a los maadendjis komo tambien i a otros merkaderes i los senetis ke lis tomavan era, ke eskrivijan en los unos, por los enteresos kon el nombre de oni, o on birden ke era los 10 gr. por 11, i en otros era ke eskrivijan por el enteres mal pahasindan, ke es por el presio de la ropa, porke el tomar enteres aparte ke era vergoensa i era tambien i mui defindido, i por esto era ke lo mas de sus kontos era en avierto i en kontos korientes, i kon los enteresos ke ejos li pagavan a S-r. Kamondo foe, de este tiempo i endelantre sovre 9 % a el anio, i siempre era ke estavan en avierto kon ke lis devijan a sumas bien redondas, i nunka non lis demandava por ke li remitieran, otro ke era al kontrario, ejos siempre li demandavan por algunos etchos ke los kerijan azerles i lo kerijan sus ajodo i el era ke lis respondija azeldo i travame, la suma ke vos podra premir, ejos avija tiempos ke arivavan en mui grandes krizas i estretchuras por moneda, ma en sus adjuntas ke azijan platikavan muntchas notches, por topar los moldes de los prevalimientos, i lo todo era ke si rekojijan en la kaza de Tch. Jeuda, i les mitijan a kada uno aparte a una banketika kon raki i modos de los mezes, i eran kada uno asentados en una chelte, en bacho i ivan biviendo, i platikando lo todo era ke si estavan solos los ombres, i las mujeres si estavan en otra kamareta, ansi i todas las krijaturas mizmo i jo kon S-r. Naimatche ke ja eramos mas grandes torna kon

1274    Biografia de Tchelebi Jeuda i Avraam i S-res mochonatche i Davitchonatche.    1864

todo era ke non mos dechavan entrar en sus kamareta, i ansi era ke muntchas notches restavan fin a la media notche, platikando i si no podijan detchizar era ke a la otra notche lo azijan de mizmo, i denpoes era ke ivan a komer, ke esto era ke lo azijan seja koando estavan en los mas grandes apretos or ke tenijan algunos djuzgos or koando si prontavan para entrar en etchos redondos kijendo dizir kon los miliones, ke por los tchikos non si avlava, i koando ejos ja los tenijan sus etchos ke ja lis enkamenavan en regla ejos tambien si rekojijan ansi ma era por pasar la ora, i meldar gazetas i avlas de la plasa i algo de sus etchos i esto era ke estavan a poko,

            En Roch hodech ADAR de este anio, ke era en dija de mierkoles, mi S-r. Padre Tch. Avraam ke ja estuvo pronto por la boda foe ke mi kazo ami, Tchelebi kon Beju la IJA de el S-r. Jshak G. Arié i el dizir ke mi kazo sigun ke ja lo saven ke en akejos tiempos non si demandava, la kontentes seja de el novio komo tambien i de la novija, otro ke eran los padres ke vinijan en un lugar, or ke mandavan a los kazamenteros, i se lo konvenijan entre ejos seja por el kontado komo tambien i la achugar i todas las otras kozas, i foe todo 2 mezes ke estuvimos espozados, porke i esto non era el uzo de estar tanto poko espozados, solo la sola razon foe por ke moravamos en un kortijo, i esto ke ja lo tengo eskrito ke non si podijan akarar el novio kon la novija, en el tiempo ke estavan espozados, i ni ke podijan avlar, ni kamenar, ni menos estarsen debacho de un tejado, i en tomando en mano ke mozotros ja moravamos en un kortijo i podija ser,

1275    Biografia de Tchelebi Jeuda i Avraam i S-res mochonatche i Davitchonatche.    1864

ke podijamos pasar en alguna de estas enkomendansas, de las mujeres foe ke si apresuraron i mos kazaron, ke jo el novio tenija 15 anios i la novia apenas tenija 13 anios, i esto jo ja foe grande ke otros novios kazavan koando komplia minjan, i la boda se izo kon mui muntcho grande saltanat, i algunos pasajes ja los vo a eskrivir anke ke van a ser largos solo por ke tengan una edeja de la manera ke si kontentavan mas antes, la novia foe 600 rubies ke trucho de kontado, i achugar en grandes kantedad, sovre todo la blankerija ke aparte de loke ja kolanejo era en tantos anios i ke li djo a Rachel tambien bastante, ja tiene i por la Sofi, i aparte torna li va a restar, ke los testemeles i tovajas i ansi todas las otras kozas ke las davan en akel tiempo, ke ja las saven i todas mui bien lavradas kon briles i klabedones i tertiles, lo todo de oro, aparte eja trucho muntchos vistidos, de modos de ropas de panios i de sedas, i de ichlemes, i kavesera de viena, bien brozlada, kon ke eskrivieron su nombre, en klabedon i aparte li dieron muntchos prezentes, ke el padre li djo un tchapraz^[96] kon 100 rubies, i un chap^[97] kon un doblon rodejado de perlas, i un peskiul de klabedon, kon piedras boenas, i de esta manera de presentes li dieron todos los otros parientes, i ami mi djo mi S-r. Esfoegro un anio de oro kon una boena grande piedra de dijamante i mi S-ra Madre li djo por prezente un CHADAI, de dejamantes li kosto 50 liras, i los dukados ke rekojo la novija de prezentes foe una suma de 6000 gr, i mi S-ra madre li djo aparte un kuti de plata por etchar paras i kotiko redondo tambien de plata por sakiz, i mi S-r

1276    Biografia de Tchelebi Jeuda i Avraam i S-res mochonatche i Davitchonatche.    1864

Padre li djo 2 doblones i aparte djujas, a la novija la vistieron kon el vistido ke li mandimos mozotros ke kon el vistido de el novio era ke si davan los kiduchim, aparte de las mudaduras ke ja foeron, todas de las mas finas ropas blankas por los vistidos de ensima foe, de un anteri largo de ichleme kolorado, i un chalvar de djanfes de mizmo kolorado, i una fermela de ichleme kapladejada, kon samur, i kuchak de chirit de klabedon kon paftas de oro, i sapatos lavorados de klabedon, i de perlas, i kalsas de seda, i por el tokijo, un chami, bien lavorado kon klabedon, i al deredor todo apuntado, de rozas en diamante i de berlante, i por la garganta muntchos masos, de perlas, i por en la petchadura, tchaprazes, de modos de dukados, i restas i chartas, i manijas de oro, i de dejamante i los orejales, de los mas valutozos, i estas djojas era ke las tomavan i de la familia enprestado, lo todo esto ke non lis abastava, i para vistir i adornar a la novija era ke jamavan a turkas, ke savijan esto de vistir, i de peinar a las novijas, i en este tiempo era ke si kombedava a la familija entera para vistir a la novija, i estas turkas era ke las ivan a peinar i adonar i vistirlas tambien i a las konsfoegras i a todas las parientas, ke esto lis turava, de 5 a 6 oras, i tambien dekontino era ke ivan seja los tchalgis komo tambien i las taniederas kantando i bailando, i alegrandola a la novija, i de ves en koanto las ivan adulsandolas kon modos de konfiturijas i cherupis, i de los dezajunos, esperando en la kaza de la novija, fin ke arivava, el tiempo de los kiduchim, era ke si estavan las mujeres en la kaza de la

1277    Biografia de Tchelebi Jeuda i Avraam i S-res mochonatche i Davitchonatche.    1864

Novija, i esto mizmo si azija tambien i en la kaza de el novio, i kombedavan a los mansevos ke al presipio se ivan a el banio, i todos se lavavan djuntos kon el novio, kon ke nomenavan i a un berber por ke lo arapara a el novio, en el banio, i el berber mijo foe s-r. Nesimatche Elijau Arié, i denpoes li vistijan a el novio de muntchos brozlados, i venijan en kaza ke ja estava de moevo el sigundo berber por araparlo ke el koal era Ahmed, Kalfa, lo todo kon tchalgis i panderos ke ja avijan apropijadas kantikas por koando si arapava el Novio ke si kantavan, i eran en djodezmo, i de mizmo se ivan adulsandosen i todos los asistentes li ivan dando prezentes en moneda a el berber, i de parte de el novio era ke aparte de los prezentes ke li davan en moneda era tambien ke li davan i por un vistido, de panio, i esto todo era ke si azija en la notche de alhad, de antes de la boda i en el dija de los kiduchim era de moevo ke vinijan torna los mansevos para vistir a el novio, i los vistidos ke mi los izieron para mi foeron, estos ke mi visti para los Kiduchim, en kiordi largo de panio fino la kolor mui mavi, kapladijado kon samara de elma, i una fermela, tambien de panio i kapladijada kon elma, i un anteri largo de ropa de seda, i un kuchak laur, i una fes kolorada dada a el kalup kon su boen piskiul de seda, i potines de rugan i aparte otros vistidos a la franka, i koando ja estuve pronto vistido, ja vinieron todos los parientes, i amigos para jevarmos ande la novija a tomarla i en la kaza de la novija ke ja estavan esperando, las mujeres de la

1278    Biografia de Tchelebi Jeuda i Avraam i S-res mochonatche i Davitchonatche.    1864

sivdad entera, i mos resivieron en una de las kamaretas i mos adulsaron, i denpoes salimos a la sala, ande ja estava la novija kon todas las mujeres, i el padre de la novija, es el uzo de enkochakarle kon disirle las bindisiones, por ke vaiga kon mazal boeno i detchoza i kontenta, ke biva kon su marido, kon ijos i bien i de todo lo boeno, i li etcha en las aldikeras a unos koantos punijados de moneda, i toman las mujeres a la novija, djunto kon los kombedados i los tchalgis i las kantaderas kantando, traen a la novija en kaza de el novio, i por el kamino siempre van arondjando punijados de aroz mleskado kon paras tchikas, por ke vaigan rekojendo i ke non la miren a la novija, i a la entrada de la poerta de el novio, li meten en una tabla un espejo kon pan i sal, i la azen merarse a la novia en el espejo, i de el pan i la sal li dan un bokado a ke koma la novija i aparte en este tiempo degojaron tambien i un karnero por korban, i esto en el ichik^[98] de la entrada de la poerta ke estava entrando la novija, i denpoes si entraron arientro, ke el talamo ja estava pronto i mui bien etcho kon muntcho lavrados i brozlados de muntchas kaveseras, i los ombres de la sivdad entera ke ja estavan esperando, enpesaron los Hazanim a kantar los pizmonim ke si uzan i mi metieron djunto kon la novija en el talamo, i mos dieron los kiduchim de uzo lo todo mui bien kantandolos, i denpoes los entraron a todos los kombedados en las kamaretas ke era el uzo de estarsen las mujeres kon la novija en kamaretas aparte ke ejas kantavan i bailavan kon la novija i las adulsavan kon pedasos de dulses de narandja, i los ombres ke

1279    Biografia de Tchelebi Jeuda i Avraam i S-res mochonatche i Davitchonatche.    1864

ja estavan tambien en kamaretas aparte porke non era el uzo de estarsen los ombres kon las mujeres en un kavo, i denpoes ke ja los adulsavan tambien i a los ombres era ke si ivan, i denpoes mi entraron djunto kon mis amigos ke mi akompanijavan, en la kamareta de la novja, i mi asentaron alado de la novija, i bailimos el novio kon la novia i mientres ke estavamos bailando ivan arondjando konfites, kon ke ivan kantando seja los tchalgis komo tambien i las kantaderas, las kantikas de novija, ke son spesialmente por las bodas, i aparte baili kon las konsfoegras i los amigos, i denpoes ja si enpesavan a ir las mujeres, i denpoes ke ja si foeron todas las mujeres es ke la jevavan a la novija en otra kamareta para ke repozara, i la akonsejavan i se adulsavan, i komijan i koando ja si azija de notche, ja enpesavan a vinir todos los kombedados, ke van a komer la notche de la boda i esto foe ke kombedaron a la sivdad entera seja a los ombres komo tambien i a las mujeres, i sigun ditcho ke eran siempre los ombres en kamaretas aparte de las mujeres, i fin ke si rekojijan todos era ke lis ivan dandoles rakis i otros bevrajes kon modos de los mezes seja dulses i salados i agros, i dekontino ke ja era el Tchalgi kantandoles, i denpoes ordenavan las mezas, ke ja lo saven ke eran kon sinis, i en la primera meza ke si asentava el novio kon los konsfoegros i los mas viejos, i el Hazan kon el Rabino era ke el novio azija el amosi, i denpoes, al novio, mi metieron, en la fes rozas de dijamantes, i un masiko de ajos tellejado kon varak, i biviendo los modos de los vinos i komiendo las maneras de los dulses i kaimakes i

1280    Biografia de Tchelebi Jeuda i Avraam i S-res mochonatche i Davitchonatche.    1864

i de las komidas de karnes i de los kondutchos i en mizmo tiempo, biviendo los modos de vinos, i en la fruta era ke los hazanim kantavan algunos pizmonim, i denpoes dizijan el CHIBA BERAHOD kantandolo i se izieron 12 mezas de ombres ke kontenija en kada meza de 20 a 25 personas, i por todas las mezas eran igual las komidas, sin dinguna deferensija, i denpoes ja si enpesavan a ir los ombres, i denpoes era ke ivan a enpesar a komer i las mujeres, i la novija komija mas antes kon sus amigas, en meza partikular, lo todo kantandola i alegrandola, i de mujeres si izieron 10 mezas, lo todo sigun de estas de los ombres, ke esto todo turava fin a denpoes de la medija notche, i se ivan tambien i las mujeres, i el Tchalgi ke ja era una trupa mui alegra, ke si jamava la trupa de lambre, ke lo izieron traer de filibe, i eran 6 personas, kon sus enstrumantos, i aparte avijan i 2 djidios, el uno Hason de vidin i el otro, la fatime de Sofia i aparte avijan zinganas kiotchekes ke ivan bailando kiotcheklijki los tchalgidjis ke trucheron muntchas charkis, moevas ke non si kantavan en Samokov, foe ke toda la familija mo las enbezimos i ansi de tanto ermozas i agradavles ke son es ke i agora mizmo ke ja son 50 anios de este pasaje, ke lo esto eskribiendo en el mez de adar tambien de el anio 5674, es ke las kantamos en okazion i en este mez es tambien ke esta kazando i mi inieta M. Alegra, la Ija sigunda de Rachel, i jo el papu i la vava, i Jean i roza mi noera i la Sofi non lo meresimos de tomar parte seja en el espozorio komo tambien ne en la boda, ni en los kiduchim, lo todo por su kapritcho enraegado ke

1281    Biografia de Tchelebi Jeuda i Avraam i S-res mochonatche i Davitchonatche.    1864

ke ja existe en esta djente sigun ke ja lo van a meldar en la partida suja de el S-r. Leon, i las otras de los pasajes ke ejos los tuvieron, i sigun ditcho ke los tchalgitchis ke ja eran i ejos tanto alegres, i agradavles a todos los asistientes era ke todos lis ivan dandoles prezentes en moneda i esto era lo todo a unos koantos midjidies ke lis davan en kada okazion, i ansi foe ke el dito tchalgi si jevo ariva de 100 liras de los prezentes i aparte la paga ke era, 16 liras, si entiende kon los gastes moestros, i las kiotchekis koando ivan bailando era ke si etchavan en las aldas de los ombres ke asistijan, i kon los ziles djogandolos, en sus manos, si estavan unos koantos puntos etchadas, i ejos lis ivan pentandoles [apuntandoles] en sus karas i en sus frentes, tchikos dukadikos komo rubies i barbutes^[99] i 1/2 de mendunies^[100], i ansi otros, i ejas ke eran tanto kontentas era ke non si kansavan kon oras enteras de ir bailando i kantando, i saltando, i mozotros tambien era ke non mos artavamos de ir merandolas, i esto foe 8 dijas i las notches kon sira, i los ombres todos ke ja estavan en kaza porke non avija salir a el tcharchi en todos los 8 dijas, i a la manijana ke es el primer dija de la boda, era de uzo ke si jamava a todos los parientes, i a los amigos a el dezajuno, ke ja los prontavan de antes, de muntchas maneras, de dezajunos, i kon muntchos bevrajes, ke ivan a dezajunar, i en mizmo tiempo traivan los prezentes, ke li dava ainda mas el padre, ke era komo sigunda achugar, de modas de vistidos i mudaduras, i kalsados, i mas todo el menester, ke esto non si eskrivija en la ketuba, i los espandijan

1282    Biografia de Tchelebi Jeuda i Avraam i S-res mochonatche i Davitchonatche.    1864

en mezas, en medio de las kamaretas, para ke toda la djente lo vieran, i el tchalgi kantando i las kotchekes bailando, i kada uno iva etchando presentes en moneda en estas mezas, ke esto era para los servidores de la boda, i komijan el dezajuno i bivijan i se alegravan i denpoes vinijan todas las mujeres de la sivdad entera por ver los prezentes, ke todas eran adulsadas, i a la medio dija komijan i si etchavan a durmir, i a la notche era ke kombedavan de moevo a todos los parientes, i algunos de sus amigos por komer i por denpoes azer djombuch, i para alegrar a el novio kon la novija, ke estavan fin a la manijana kantando i bailando i alegrandosen, i en el dija de viernes era ke prontavan komidas para el Chabad, i seja la notche komo tambien i en el dija era ke los kombedavan de moevo a todos los parientes, i estavan djuntos komiendo i biviendo, i kantando los pizmonim, i las charkis ke el tchalgi non lis kantava en el dija de el Chabad, a razon ke non si poede sintir, en Chabad, ke es pekado i era de esta manera ke lo goadravan el djudezimo, i en la manijana de chabad ke ja si ivan todos a el Kaal por dizir la Tefila, i el novio tomava en Sefer tora ke li ivan a el a meldar, i esto denpoes ke ja eskapavan de meldar la peracha de la semana, ke sovijan todos los parientes a Sefer tora, i koando li meldavan a el novio el Ve avraam Zaken era ke en kada pasuk li kantavan el targum, i denpoes de eskapar la Tefila, los kombedavan a el kolel entero i se asentavan en la azara, ke lis davan la Hevra, ke es un goevo enhamenado i a una tasa de raki i a un djinet encharopado^[101], por dezajuno i el Rabino asija i

1283    Biografia de Tchelebi Jeuda i Avraam i S-res mochonatche i Davitchonatche.    1864

alguna Deracha, i el novio ke estava en pies era ke todos koando bivijan la tasa de el raki, le ivan diziendo BESIMAN-TOV, i denpoes de el kaal en deretcho si vinijan todos los ombres a la kaza de el novio por saludar la boda, i esto sin sus mujeres, i koando ja era la medio dija komijan i esto siempre kantando pizmonim i kantikas, i las mujeres tambien de mizmo kantavan sin sus panderos, porke ni esto tambien non si podija en Chabad tanier kon el pandero, ke esto lis turava fin a el tiempo de la minha ke i esto la dizijan i denpoes ere ke vinijan todas las mujeres de la sivdad entera a vijitar, de mizmo kantavan i bailavan i a todas las adulsavan i esto tambien lo azijan i a los ombres, i koando ja era de notche ja si rekojijan torna la familija entero por dizir la avdala, i bevijan los kahves de la notche de alhad, kon los Tchibukes, i mas tadre ja enpesavan i a venir las mutchatchas i las amigas de la novija a la ketadura de el velo de la novija, ke esto lo jevava la novija fin a esta notche, i ejas kantavan i bailavan ke es esto mirenda de mutchatchas por ke tomaran i ejas parte de la boda, i las adulsavan i denpoes la ke tenija de etchar presentes a la novija era ke bailava de moevo kon la novija, i en bailando li enkolgava, el presente en su braso de la novija, i esto era kada una de su manera de presentes ke li davan, i en este tiempo era ke entrava tambien i el novio en la kamareta de las mutchatchas, i el tambien bailava kon la novia i li dava tambien i el presentes a la novia, i en bailando el novio kon la novija li ivan arondjando konfites, i koando ja si azija tadre era ke ja si

1284    Biografia de Tchelebi Jeuda i Avraam i S-res mochonatche i Davitchonatche.    1864

ivan las mutchatchas i ejos ke repozavan, i a la maniana de alhad era ke azijan la vijita grande kon ke kombedavan a la sivdad entera solo a las mujeres, i todas ja vinijan mui bien vistidas i adonadas i se asentavan en los minderes i el tchalgi kon las taniederas ke ja estavan dekontino kantando i en veses kantavan i ejas mizmas las kantikas ke ja son spesialmente de las novijas, i en mizmo tiempo ejas bailavan i azijan los mil modos de los djugos de sus pasatiempo, i de loke eran kontentas ejas nestavan fin ke ja si azija de notche, i la notche de lonis, tuvieron kombedados a los begis i los notavles turkos de la sivdad, i les gizaron para ejos aparte, kon ke jamaron a las gizanderas turkas, ke i les izo 40 modos de platos de komidas kon muntchos dulses i kaimakes, i hochafes de modos de frutas, ke era ke tomavan solo a un bokado de kada komida i era meter el plato de la komida en medio dela meza, i los tchalgis ke lis ivan kantando, era ke lis plazia mui muntcho, non si artavan de ir sintiendolo, i denpoes ke ja komieron i bivieron los kahves, ejos todos salieron mui kontentes i esto mi lo kontavan ami mizmo denpoes de muntchos anijos ke ja avija kazado, ma foe solo ejos ke komieron, por razon ke las gizanderas turkas lo gizavan lo todo kon mantekas la karni i las otras komidas i esto ke non si podija komer ke era TREFA, i ejos los ombres moestros non si avregonsavan de dezirles por la razon de el TEREFUD, era ke non si asentavan i ejos a komer djuntos kon los turkos, i ejos los turkos ke esto ja lo savijan era ke non lis enbarasava ni menos ke lo azijan kistion, i a la manijana dija de lunes,

1285    Biografia de Tchelebi Jeuda i Avraam i S-res mochonatche i Davitchonatche.    1864

kombedaron a todas las Hanumes turkas, a la vijita ke si lis izo separatamente para ejas, ke todas ja vinieron, i el tchalgi en la otra kamareta kantandoles, por razon de el harem, i para ejas lis trucheron a otras kiotchekes i hanendes, por ke lis bailaran mas mijor, i por ke las izieran a reir, ke i ejas mizmas kantavan i bailavan, i azijan modos de djuegos, i siempre las ivan adulsandolas kon muntchos modos de los dulses, i chirupes i kahves i tchibukes i sigaras, i ejas de tanto kontentas ke si topavan non si artavan de ir kantando, i dandoles las miles de grasias, i se foeron kontentas i a la notche de martes los kombedaron a los tabakes ke eran tambien todos Turkos, porke komieron en la boda, i para ejos la komida ke lis izieron foe, una halva de masa etcha kon arina de aroz, i zerdo pillaf, i 2 juvetchis la una de aroz i la otra de modos de los kundutchos, kon karnes de karnero matchos, i aparte muntchos dulses i kahves i cherupes, i ejos tambien komieron a la artura kon ke si lis merko el pan de la plasa, porke non komijan los turkos de el pan ke amasan los djidios en kaza, i ejos mui kontentes tambien si foeron en dando las miles de las grasias de los turkos, ke esto ejos si foeron mas temprano, por rason de sus namazes, por ke eran una djente mui santa i denpoes de esto foe ke uvieron de moevo a los notavles de la sivdad djidios kombedados por la sigunda ves, i todos ja vinieron i todos los parientes ke ja estavan siempre, komieron i bivieron i kantaron i se alegraron, todos juntos, i ansi se kontentavan en las bodas ke i tambien era ke gastavan i boeno sigun jo lo vido denpoes

1286    Biografia de Tchelebi Jeuda i Avraam i S-res mochonatche i Davitchonatche.    1864

ke gasto mi S-r. Padre para esta boda, 22500 groches, i en martes la tadre ke ja lo azijan el pechkado, sigun ke ja lo tengo eskrito, ke mitijan pechkados bivos en una pastera de tchini i en la agoa ke eran nadando, i a su deredor, metijan de 30 a 40 otros tchinis todos kon modos de rozas i frutas freskas i goevos sin ke foeran enhamenados i lo todo tellejado kon varak, i el tchalgi taniendo, ke vinijan todos los parientes i los amigos, para esta seremonija, i los pasavan a el novio kon la novija a tres vezes por ensima de los pechkados ke estavan nadando, en bindiziendolos para ke montchigoen komo el pechkado i todas las otras bendisiones, i todos los asistientes ivan etchando en kada tchino presentes en moneda, i a los tchalgis i a las kiotchekes lis ivan dandoles a parte, i la moneda ke si lis rekojija en estos tchinis era por los sirvidores de la boda, ke kada uno ja si metija su tchini, i la suma ke si lis rekojija era de 120 a 130 gr. i aparte lis davan seja de parte de el novio, komo tambien i de parte de la novija, a todos los sirvidores i los mechartim, i los hahamim, i chamachim, i seizes^[102] i tchalgidjis i kiotchekes, prezentes en ropas, a koalos panio i a koalos fistanlikes, basmas, kalsados, kuchakes, chamis lo todo a kada uno sigun de loke lo merisija, ke entre todo li entchija a kada servidor komo a 500 gr. a kada uno, i denpoes ke ja si eskapava i esto ordenavan las mezas, i komijan ke en esta meza ke era la de alkavo de la boda era ke davan las enbonoras, i las bendisiones i grasias de todas las 2 partes, i se ivan kada uno en sus kasa, i la novija bezava las manos de todos kon unas

1287    Biografia de Tchelebi Jeuda i Avraam i S-res mochonatche i Davitchonatche.    1864

koantas lagrimas en sus ojos, en kedando la novija en kaza de su novio, ke eja ja foe tanto meujuda anke mui tchika, i mui repozada, i mas muntcho arta de lo todo, i muntcho ikonomioza i non del entodo seloza i mui limpia, eja enbezo todos los mas mijores gizos sovre todo los dulses de sus maneras seja estos de las komidas komo tambien i de todas las frutas i los modos de los chirupes i eja kon mi ja si konvino mui presto i pasamos mui kontentes, eja es mui pasensioza non li plaza fantazijas, eja las ama i las koudija mui muntcho a sus krejaturas, es kon la Rachel la ija grande ke si eskuvro, i se akonseja kon eja, ke a Rachel la ama, el karar ke Rachel me ama a mi, i Jean la ama a su madre, mas muntcho de esto ke jo lo amo a Jean, i la tchika Sofi, non la ama a su madre, el karar, el karar ke jo la amo a la sofi, (esto existe, fin a el tiempo ke lo esto eskriviendo) i a la manijana ke es mierkoles jo el novio mi foe a el kaal, a dizir la Tefija, ke en el primer dija de la salidura de la Hupa koando iva el novio a el Kaal non dizijan, VIDUI, i denpoes mi foe a el midrach, ke meldava kon Hr. Avraam Koen a razon ke ainda non estava en el Tcharchi, i a el dija de Chabad ke si jama el Chabad de torna boda, i mi kombedaron ande mi S-r. Esfoegro a dezajunar, kon muntchos otros de los parientes i amigos ke metieron los mil modos de dulses i de los dezajunos, i denpoes era ke si vinieron de moevo todos los parientes a komer en moestra kaza kon ke si trucheron los modos de las komidas ke esto ja lo saven komo era, el vinirsen a komer, i denpoes mi asijan izjafetis^[103] todos los parientes en los dijas de ensemana, ke

1288    Biografia de Tchelebi Jeuda i Avraam i S-res mochonatche i Davitchonatche.    1864

i esto tambien turarva unas koantas semanas, i era kon esto ke si eskapava la boda, era de esta manera ke si kontentavan i se alegravan ke esto non foe solo en la boda mija ja era ansi en todas en esta manera de uzos,

              En esta anio li nasio a S-r. Davidtchonatche una IJA i la jamaron Rebeka i de mismo sigun de todas las paridas lo izieron i en este parto i su madre la kreo, i en su tiempo la kazaron en Nich, kon S-r. Daniel Kario,^[104] sigun ke en sus partida ja lo van a meldar algunos de sus pasajes,

              I en esta anio foe ke kazo tambien i Tch. Jeuda a su ija M. Tamara kon S-r. Moche Jshak Arie i sigun de loke foe i esta boda ja lo eskrivi en la partida, de sus biografia, i ke el novio estuvo algo malato, a razon ke si apego de los tcherkezes ke avijan venido en este anio i denpoes foe ke estuvo 40 dijas hazino,

            en este anio de 5625, Tch. Jeuda foe dekorado de el Sultan, kon el Nichan de Midjidie, de la 4 klasa, i en mizmo tiempo tambien lo nomenaron por Haham Bachi Vekili, ke de esto si gusto mui muntcho, i esto foe Hr. Presjadutcho, Geron^[105], ke el koal era Haham Bachi en Kostan por los djidios de la turkija entera, ke lo topo por deretcho a ke foera dekorado, i a razon de esto el si izo un vistido de kazmir de la kolor maavi koi, kon setra ala turka, i a su kaza li vinieron, el kaimakam i el Dajan, i algunos de los empeigados de los

1289    Biografia de Tchelebi Jeuda i Avraam i S-res mochonatche i Davitchonatche.    1865

mas altos grados komo tambien i de los begis de samokov, i el kaimakam li meldo el ferman detiniendolo el nichan en su mano i denpoes si lo enkolgo en su petchadura de Tch. Jeuda, i lo jamaron Jeudatche Efendi, i a todos los adulso kon chiropes i dulses i kahves kon los tchibukes, i denpoes ke ja si foeron i la persona ke li trucho este nichan li djo 50 liras de presentes, ke foe mandado kon persona spesjala, de kostan, i denpoes ke ja lo tuvo este titolo de Haham Bachi el tenija el deretcho de toparse en el idare meslichi, ande djuzgava el kaimakam, i todas las mazbatas (kondanas) ke si azijan era ke li kalija i el ke las sijara, i a el tambien ke lo mitieran a el koriente, de todas las operasiones ke si azijan, i de todos los ordenes, ke vinijan, seja por el sostenimiento de el estado, komo tambien i por koando avijan adjuntas djeneralas seja por pujar or enmankar los dasios, i en otras ansi kozas por lo todo kalija i el ke asistiera, i dar tambien su kontentes, i ansi era ke lo mas de los dijas el era en el konak, en la kamareta de el kaimakam, sovre todo era mui grande provetcho la estada suja ande el kaimakam por el provetcho de los djidios ke siempre non mankavan deferensias de los djidios seja kon los turkos i tambien kon los kristijanos, i la estada suja era ke siempre los protejava i non los dechava ke los kondenaran sin razon i muntchas veses los konvenija por afoera de esto ke non podijan ganar, porke aparte ke el ja la tenija la enfloensa era ke i esto ainda li era mas grande ajuda,

              Foe en este anio ke mi S-r. Padre lo mando a S-r.

1290    Biografia de Tchelebi Jeuda i Avraam i S-res mochonatche i Davitchonatche.    1865

Refaelatche su IJO, a Wiena, a los estudios, por ke enbezara el Nemsi, i el foe el primer, de la Familia Arie, ke si foe a el ajeno por estudiar, i kon las rekomendasiones ke li djo para los S-res, Mate, ruso i Chaki i otros sus amigos i komisioneres, lo mitieron en una Echkola prevata, ke tenija S-r. Jehiel Koen, ke el koal era de la Bosna, i resivija ansi elevos, en su echkola, ke era ke tenija i sus profesores ke li vinijan de el Nemsi i de Italijano i de Lachon Akodech, por darles las liksiones, i era ke el los mantenija i los lavava i dormijan en su kaza, i mas todos los kudios menesterosos era ke el los kudijava, i la paga era de 600 florinos a el anio, i era mui kontente, i tambien ke estava i boeno enbezandose, ma loke pudo estar foe solo 15 mezes, i kon este karar tambien el ja enbezo bastante, i la razon ke non estuvo mas foe ke aparte ke en este tiempo el ja gasto ariva de 1500 florinos, foe tambien ke moestra S-ra madre non lo pudo somportar a decharlo solo lechos de eja, anke todos ke ja li dizijan ke agora non es komo el tiempo de antes, i agora kale ke si enbezo para ke non kede azno, esto li dicho, su S-r. Padre el Tch. Jeuda, i eja li respondjo sigun de loke kedaron todos aznos ke kede i refael azno, i esto tambien foe ke lis kalio ke lo trucheran, i en el tiempo ke el estuvo en viena, era ke lo protejavan i lo kudijavan mui muntcho seja los S-res Rusos komo tanbien i S-r. Chaki i los otros amigos, i lo jamavan en kada chabad i moadim en sus kazas i komija en sus mezas i montchas vezes tambien i dormija, en sus kazas, i lo kamenavan a los lugares ke ejos ivan, i kon sus krijaturas

1291    Biografia de Tchelebi Jeuda i Avraam i S-res mochonatche i Davitchonatche.    1865

Djugava i tambien ke li amostravan muntcha kara boena, el si fetografejava en kada mes de su manera una ves kon vistidos a la franka i fes en su kavesa i otra ves kon kiordi i silindro en la kavesa i se lo metija tuerto, lo todo por djugar i mo los mandava a Samokov, para ke mos rieramos, i koando el ja supo mas mijor, avlar la lingoa de el paiz, era ke kamenava solo por las plasas de viena, i en una de estas plasas el lo vido ke estavan vindiendo, bilietos tchikos de lotarijas de a 10 i de 20 kraisares el bilieto lo izo ke si merko i el uno de estos i a el afito li salio ke gano 200 florinos, ke de tanto ke si gusto foe ke si lo konto ande S-r. Russo, i el koal aparte ke lo akavedo por ke mas non djugara en ansi lotarijas foe i ke si lo eskrivio i a su S-r. Padre akonsejandolo por ke li eskriviera a ke mas non djugara en esto i a el S-r. Koen tambien li eskrivieron porke non lo dechara mas djugar foe ansi ke mas non djugo, i el se iva merkando giuegos [djuegos] de las krijaturas, de estas paras, i lo todo era para ke non etchara la sevda en esto i non podija enbezar los sujos estudios, el mandava a una ves a la semana kartas i ansi tambien resivija, ke lo todo era vija de el S-r. Russo, i de Samokov li mandavan muntchas vezes presentes, seja en moneda komo tambien i en komanja, i para el maestro li mandavan, presentes en panio i para ke si iziera djubes, i otras vezes kachkavales ke por lo todo si los resivija kon mui grande plazer, en una ves li mando i 3 kachkavales por ke si los jevara el mizmo a S-r. Adut ke estava en Baden i el ke si los jevo, akontesio ke estava dormiendo el S-r. Adut, i su mujer

1292    Biografia de Tchelebi Jeuda i Avraam i S-res mochonatche i Davitchonatche.    1865

ke li dicho ke non lo podija despertarlo i sovre todo ke lo i dicho porke si esperara, foe ke si los decho, i mas non lo vido i esto foe porke mi S-r. Padre tiene estado en sus kazas en el tiempo ke el estuvo en Viena ke esto ja lo eskrivi en el anio de 5621,

            En este anio li nasio a S-r. Mochonatche un ijo, i lo jamaron Nisim, ansi tambien li nasio i a S-r. Naimatche una IJA la Behora i la jamaron, LEA, Eliza, i kon ejas tambien se izo sigun el uzo de todas las paridas, seja kon los presentes ke li mandavan todos los parientes komo tambien i la vijitaron la sivdad entera, i sus madres mismas las krejaron i las kodijaron, i en todas las 2 paridas si lis foeron en el dija de Chabat a komer, solo ke kon la parida de M. Rahelo se li izo mas muntcho saltanat, por razon ke foe premiriza i tambien ke li vinieron el Padre i la madre de Kiostendil i todas las 2 parieron mui kolali, sin tener el menester de los medikos ni de muntchas komadres, ke ejas ja foeron mui sanas i mui resias i non komo agora, ke sufren tanto,

            Jo i S-r. Naimatche ke fin a este tiempo ke estuvimos seja en el midrach, estudiando las gemarod, i en el Rujdija Gemnazia turka estudiando la lingua turka, ke foeron 6 anios ke lo kontinoimos el turko, i esto ja lo embezimos sigun de loke premi, fin al grado de poder jevar toda la korespondensija turka ke non era poka, ma en el lachon akodech, non lo podimos enbezarlo sigun de moestros padres, i mos detuvieron komo elevos, en sus kontoares, i a los presipios mos azijan sirvir seja a ejos komo tambien i a la djente ke vinijan aun

1293    Biografia de Tchelebi Jeuda i Avraam i S-res mochonatche i Davitchonatche.    1865

kon todo ke ja tenijan ejos 3 mosos ke los servijan ke el uno de estos era siempre ke los akompanijava por koando vijajavan, i mozotros tambien era ke tavamos [davamos] brazikas, lis asijamos kahves seja para ejos komo tambien i para los klientes ke lis vinijan, i mozotros komo krejaturas era ke koando mos komandavan de azerles kahaves era ke si vendija en kiujaikas^[106] de a 10 paras seja de kahve komo tambien i de sukar, i ja era ke lis demandavamos las 20 paras i merkavamos el kahve kon el sukar, i si era mismo por un kahve era ke loke sovrava molo komijamos en takla^[107], i esto ke lo ivamos aziendo a unas koantas vezes a el dija porke non sovrava de el uno para el otro lo todo por esto ke molo komijamos i arientro ejos ke non savijan koalo si lavorava por afoera foe ke moz dicheron un dija ke merkaramos una oka de kar [sukar] ,i medija oka de karne [kafe] por ke non foeramos merkando en kada punto i mozotros ke ja lo izimos tambien esto ma ja foe ke i esto en 2 dijas ja si eskapo i esto por la razon ke molo ivamos komiendo en la takla, i ansi foe ke mas non kijeron ke merkaramos kon okas por ke i esto non lis konvino ma ja era ke non mos avlavan mi [ni] demandavan el konto, i foe sigun antes a las kiulaikas, i en este tiempo era tambien ke merkavamos las menudensijas para el mantenimiento de las kazas, i kalia lo todo ke lo eskrivieramos mismo las 10 paras, de las salatas, i koando non mos kedavan paras era ke kalia jevarles la nota ande las gastimos i ansi mos davan, i am mi [a mi] dava mi S-r. Padre 40 groches ke era por karne, i kondutchos i ansi menudensias, ke el sukar, kahve, aroz, azeite, gudrura, manteka i ansi mas kozas ja era,

1294    Biografia de Tchelebi Jeuda i Avraam i S-res mochonatche i Davitchonatche.    1865

ke lo merkava aparte, lo todo por el menester para 6 mezes kalija ke uviera en kaza, i esto mos turo komo a un mes, i el mediko S-r. Andonake ke entrava i salija muntcho a la oda, i mos vija loke estavamos aziendo, lis dicho a moestros padres estos IJOS voestros non es boeno ke esten ansi ke mosos ja tenech a 3 personas ke eran Haim Aladjem, i Jeuda B. Nisim, i Konorte B. Chelomo Tadjer, i ke por mozotros es boeno de enbezamos en algunas linguas ajenas, ke el ja tiene en su kaza a un profesor ke los estava enbezandolos a los ijos sujos i komo li pagavan alguna koza ja mos dava i a mozotros liksiones, i en esto ke ja si kontentaron lo izieron ke lo jamaron a el ditcho profesor, i lo trataron por 100 fr. a el mes ke mos iva a dar a 2 oras a el dija liksion, i mos iva a enbezar 3 linguas a de una, ke son Franses i nemsi i italiano, i enpeso a vinir i mos dava liksion en la oda ande resivijan los musafires, i su metoda de enbezamos en las 3 linguas a de una era komo por enchemplo (agua) Au, das vaser la aqua (Johanan) Jean, Johan, Geovani, (metro) On, dieli, la mizura, i ansi todas las palavras, molas azija eskrivir, en 3 linguas, i mos fiksava para kada dija, a 20 i 25 palavras, ke devijamos de eskrivirlas en limpio kon letras latinas, i enbezarmolas de kavesa, por a la maniana koando iva a venir ke devijamos prezentarle el papel, ke eskrivimos, i eskotcharselas de kavesa las palavras ke mos djo, i mozotros era ke estavamos dijas enteros lavorando en esto, i mas en otro etcho nada non meravamos ni menos ke mos mandavan a dingun lugar en tal ke mos enbezamos, i esto lo kontinuimos 6 mezes porke mas

1295    Biografia de Tchelebi Jeuda i Avraam i S-res mochonatche i Davitchonatche.    1865

non vino a razon ke si avija pelejado kon el mediko, i ke si fujo i de Samokov tambien i mozotros ke kedimos en medio, i mas ke non mos tomaron a otro profesor, i etcho ke ja avija muntcho en la oda, mos mandavan en las resividuras de los sahtijanes, para apartar, las turas i azer kozir los denkis, i por pezar los fieros seja estos ke los merkavan komo tambien i los ke vindijan, i denpoes mos davan las bolsa de metalik ke eran sin kontar, para ke las izieramos de a 1000 groches, ke esto ja era dijas enteros, ke ivamos kontando, i el kontar era en tavlas, ke avijan spesjalmente para esto ke eran kon unas pervazes al deredor, i mos azentavamos de benahas, i mos metijamos la tavla en la alda, i a 5 metalikes kontavamos i los travavamos, a la parte, fin ke si adjustavan los 1000 gr. a el presipio kontavamos mui avagar, ma mas tadre ja foe mui presto, ke ja mos i avija uzado la mano, seja para etcharlos komo tambien i verlos presto si eran 5 i mos ketavamos a 1 gr. de kada bolsika, i esto era moestra paga, i mas tadre enpisimos a ketar i a 60 paras, porke tenijamos mujer, i non mos dizijan nada, porke ejos torna por 1000 gr. las davan, solo ke koando jevavan paras a la kacha de el governo kalija ke foeran de a 1000 gr. djustas,

              De este tiempo i endelantre si enpesaron mas muntcho a enteresarsen en los etchos de la borsa, ke merkavan i vendijan a suma mui grandes, de los fondos todo turkos, ke era en las konsolites i las tahvilat mumtazi^[108], i de estas ultimas si enteresavan mas muntcho, a razon ke eran kon tiraje, i se travavan 2 vezes a el anio

1296    Biografia de Tchelebi Jeuda i Avraam i S-res mochonatche i Davitchonatche.    1865

i de estos ke si amortijan^[109] la ganansia era a 50 % a razon ke kostavan a medio presio, i siempre ja era ke en kada tiraje, ja lis afitava ke ganavan a 20 i 25000 fr, i la suma ke detinijan tambien era i bastante grande, i todas estas operasiones las azijan vija de S-r. Kamondo, los ordenes ke li davan era lo todo kon kartas, i esto ke era solo una vez a la semana ke avija pochta, aun kon todo ke ja avia i telegrafos, ma non korespondejavan muntcho kon telegraf, seja por ke non lis supieran la djente de los etchos ke asijan ke en turkija ja si podija melder los telegrafos en la srasion [stasion] si entiende, komo si kerija enteresar, i esto a las personas enfloentas ja lis davan por ke meldaran las kopias, or ke non kerijan azer gastes, i tambien ke ja tenijan mui grande la konfiensa en S-r. Kamondo, i koando si travavan si gustavan mui muntcho, i ke ja esperavan las kartas, lo azijan ke mos mandavan a el uno de nos seja ami or a S-r. Naimatche, i ke mos entraramos en la propia sala de el Natchalnik ke iva avrir la pochta, por tomar las kartas en el mizmo punto, ke esto era defendido i a dinguno otro non lo dechavan entrar, ma a mozotros ja mos resivijan, i el pochtalion ke avrija la pochta i ke las devija de tomar en nota todas las kartas, era ke mozotros non esperavamos a esto, otro ke li dechavamos los anvelopis, i presto lis jevavamos las kartas, i ansi lo azijamos i koando ivamos a mandar seja kartas or grupos, i ke ainda non estavan prontos, ivamos i azijamos detener la pochta a 2 i 3 oras fin ke si prontavan, ke muntchas vezes non lis traivan el oro, para adjustar el grupo, i sovre todos los 2 uvo kechas de otros merkaderes ke i ejos kerijan entrar, seja por tomar

1297    Biografia de Tchelebi Jeuda i Avraam i S-res mochonatche i Davitchonatche.    1865

las kartas or por i sus grupos, ma non los resivijan ni ke los dechavan entrar, kon dizirles, ke a los sarafis ke los dechamos entrar i ke detenemos la pochta es porke la medija pochta ke viene es para ejos, i si mizmo lo kerlan i mas muntcho tiempo tambien la vamos a detener la pochta, i ansi era ke non podijan mas nada avlar, otro ke esperar afoera, fin ke denpoes ke partija la pochta, era ke las espartijan las kartas,

                  En este anio si merko mi S-r. Padre, 2 tchaires i 2 butikas de sus paras ke el tenijan aparte, de un sierto Djirk ahmed efendi, i la paja ke tomava delos ditchos tchaires la vendija por ke ejos ja tenijan, de la hevra tchaires, mas muntcho de loke si tenija el menester, por el mantenimiento de sus kavajos i vakas mundjideras ke tenijan en kaza, i kon las butikas tambien las dava a kira, i aparte tenija ke dava i moneda a los merkaderes i tchorbadjis, i turkos kon entereso, i le vinijan a su kasa seja por tomar komo tambien i para pagar, i aparte detinija i muntchos fondos turkos por kovrar los koponis, ma en djugos de borsa non echpikolijava por su konto, i esto foe porke ja tuvieron entre ejos de akordo por negosijar sus moneda, en partikular,

               En este tiempo los gastes ke gastavan para kaza la lis foeron mui grandes, sigun ke ja lo tengo eskrito, ke Tch. Jeuda, por su kaza i este de la kaza de sus 2 ijos los mas grandes ke ja estuvieron aparte, en la kaza moeva ke lis frago, i el gaste por sus mantinimiento, era todo sujo afoera de loke si vistijan, i djep

1298    Biografia de Tchelebi Jeuda i Avraam i S-res mochonatche i Davitchonatche.    1865

hachlik, ke si gastavan ke era a sus kontos, de los ijos grandes los S-res Mochonatche i Davidtchonatche, i koanto a S-r, Naimatche, ke el koal estava en la kaza de el padre, i ke ja estava i kazado, aparte ke ja komija en su meza era ke i el gaste de vistirse, seja para el komo tambien i por su mojer, lo todo era a el konto de el padre, i en este tiempo ke S-r. Naimatche se izo para si i para su mujer algunos vistidos, i tambien se izieron i unos kiordis kapladijados de unas samaras mas karas, foe ke sovre ejo sus ermanos los mas grandes lo enojaron, i tuvieron avlas por este gaste, kon dizirle ke kon ansi gastes iva a ser ke el kapetal de sus padre se li iva apokar, i S-r, Naimatche ke si akecho ande su padre, por esto ke sus ermanos lo enojavan, ke sovre esto foe ke Tch. Jeuda si sekilio, mui muntcho en viniendole a el tino muntchas kozas, ma non lis avlo nada i el gaste ke lo gastava Tch, Jeuda por sus mantinimiento i otros, era de 70 a 75,000 gr, a el anio, i esto aparte de el gaste de el dichari avli ke ja entrava en el gaste, de el maaden (konak masraf) i para el tiempo de agora de la manera ke si komportavan i ke gastavan ansi una suma, i kijendo komportarse i agora de esta manera es ke non lo poeden azer menos de 50,000 fr. de gaste, i mi S-r. Padre gastava de 35 a 40,000 gr. a el anio, S-r. Mochonatche gastava de 8 a 10,000 gr, i S-r, Davidtchonatche la meted de esto,

                         En este anio de 5626, li nasio a S-r. Davidtchonatche

1299    Biografia de Tchelebi Jeuda i Avraam i S-res mochonatche i Davitchonatche.    1866

una Ija i la jamaron DONNA, i kon la koala tambien se izo todo sigun de todas las otras paridas en todos los puntos, es esta LA DONNA ke kazo en vidin kon S-r. Jakov Elijas, aparte de loke eja ja tiene algunos pasajes, i eja en su tchikas, foe mui biva i kontentarse kon todos sus plazeres, i eja frekonto las echkolas, i konose las eskrituras i meldar el Franses i el djodezmo, mui bien i save djugarlo tambien boeno i el kanon i el piano, a detras de las maneras de las liksiones ke eja las iva tomandolas, eja tambien ja es i mui bien entelejente,

            De 5618, ke non si tinijan merado bilanso foe en este anio ke si meraron, i esto ke lis turo komo a 3 mezes, foe ke tuvieron mui grandes profitos, i muntcha ganansia, ejos rebatieron de sus mulkes ke tenijan a 40 % de las valores, para ke lis foeran mas baratos, la una razon de este rebato foe kon ke algunos lis kostava karos i otro, ke ejos todo gaste ke azijan lo ivan pujando a el mulk, i a ansi foe ke por enchemplo una butika ke lis kostava 10,000 gr, i ke gastaron en eja otros 4000 gr, ja lis pujo a 14,000 i ke non valija i sus ganansias tambien ke ja lis respondija para azerlo esto, foe ke lo rebatieron, i estos mulkes ke ejos los empatronavan en este tiempo non era ke los foeron merkando seja por echpikolazion or por tomarles las kiras otro ke lo todo era de estos ke non lis podijan pagarles ke si los ivan tomandolos kon ke lis rogavan mui muntcho, ke ejos non kijeron esto de mulkes komo agora por azer prevalimientos or algunos saltanates, lo todo foe ansi fin a este tiempo, ke si

1300    Biografia de Tchelebi Jeuda i Avraam i S-res mochonatche i Davitchonatche.    1866

foeron en esta edeja, ke ejos davan la foersa a las maneras de los negosios, mizmo si los profitos eran mas tchikos, ejos merkavan madenis, koza ke era de merkansia, en okasiones lis tomavan tambien i djojas i mobilias ke las kerijan venderlas, i estos mulkes ke en akel tiempo los merkaron ja pujaron en el tiempo de agora kon 400 i 800 % mas muntcho i es agora ke ja los estamos vindiendolos, i kaje ke en Samokov ja esta lo todo vindido, seja esto de la sivdad komo tambien i de los kazales i los kampos, i denpoes ke el blianso ja lo eskaparon ejos si tomaron todos a una kopia kon ke en todas las kopias si afirmavan tambien todos, i denpoes si konvinieron torna de moevo i se izieron torna haverim, kon ke mi entraron i ami Tchelebi i a S-r. Naimatche a esta hevra, i mos mitieron moestros padres, por kapital a 200,000 gr. a kada uno, i mos nombraron de parte a 5 % seja de la ganansia komo tambien i de la piedrita, i lo izieron kontrato moevo i mos afirmimos torna todos, i las partes ke tomimos foeron, mi S-r. Padre Tch. Avraam tuvo el 31 %, i Tch, Jeuda 25 %, i S-r. Mochonatche 22 %, i S-r. Davidtchonatche, 12% i jo Tchelebi 5 %, i S-r. Naimatche 5 %, i todos a la una mos metimos a el lavoro kon todas moestras foersas, i mas tadre apartaron por kada uno en koalo era ke iva a tener mas muntcho su okupasion, i mi S-r. Padre ke fin a este tiempo ke era siempre el kachero, i jevador de los livros porke tenija una eskritura mui limpia, i mui klara, i konosija muntcho la algebra, i pasando komo a 2 mezes lo mitio a S-r. Naimatche en la kacha, i lo iva enbezandolo sigun ke devija de jevar el tefter de

1301    Biografia de Tchelebi Jeuda i Avraam i S-res mochonatche i Davitchonatche.    1866

la kacha ke lo jamavan jumie^[110], i en kada presipio de mes, se divija de mirar el konto de la kacha de las entradas i las salidas kon ke kontava tambien i la moneda ke avija en la kacha, i en el primer mez ke el si mero el konto lo topo kon 1200 gr. manko, i esto aparte de los ajos de los trokamientos de el bechlik ke non eran manko de 1500 gr. ke esto viendo foe ke si sikilio mui muntcho, ma non lo dicho a dinguno afoeras de mi, i el ke estuvo una semana entera buchkando a poder topar algunos jeros, ma non topo por la suma ke si tenija el menester, i siendo ke ja si li mlesko i los kontos de la kacha moeva ke non la podo detenerla mas sin serarla, li kalio ke la serara, en asumando las sumas jeradas, kon la entision ke a la kacha moeva ja li podija responder, i ansi foe seja ke topo mas algunos jeros, i a algo de los ajos foe ke si sero la kacha, ke esto ja lo vijan i los padres ma non avlavan nada, i denpoes ja li kamenava en boena regla, i denpoes ke ja estuvo S-r, Naimatche 4 mezes komo kachero, foe ke mi la konfijaron i ami la kacha, ke lo mizmo foe i kon mi ke mi mankava tambien i denpoes ja era ke i ami mi salija djusta, i denpoes foemos siempre los kacheros a un mez a kada uno ke mola entregavamos de el uno a el otro, i esto fin a el tiempo ke estavamos en Samokov, ke ja era ke mos mandavan a las provinsias, i a los kazales i los maadenis i mas a otros logares, i se la entregavamos seja a S-r. Mochonatche or a S-r. Davidtchonatche, ke mi S-r. Padre mas no foe kachero, otro ke el si okupava solo en el jevar los tefteres i los kontos kon kada persona ke lavoravan, i otros, i lo todo dependia

1302    Biografia de Tchelebi Jeuda i Avraam i S-res mochonatche i Davitchonatche.    1866

solo de el, i S-r. Mochonatche jevava la korespondensija porke el tenija mui ermoza letra, i S-r. Davidtchonatche si okupava de el etcho de los maadenis, i kamenava siempre por los maadenis i las vignas, i los kazales i las rodichtas i otros todos los menesteres, i aparte ja tenijan i a 2 mollas ke eran los mudires jevadores de los kontos kon la amole [amele] i los lavoradores ke eran a kazales enteros, i tambien ke ejos eran los respondedores, por lo todo, i este etcho si merava en la kaza de Tchelebi Jeuda, ke avijan 2 kamaretas, en el dichari avli ke era solo para esto, i aparte avijan i servidiras, i toda moneda ke si dava era lo todo por vija de ejos i ejos la resivijan dela oda kontra resivida, kon sus sijos, ke kon esto era ke ivan a entregar sus kontos porke era tambien a sumas bastante grandes, i los dijas de pazar era el dichari avli siempre jeno de los lavoradores ke non abastisijan para responder, i se etchavan muntchos de ejos a dormir en el kortijo fin ke lis iva a venir sus siras,

               En este anio, foe ke mi S-r. Padre si detchizo a fragoarse kaza moeva, por ke en la kaza ande morava ja li foe mui tchika, i el si merko la kaza, de molla ali, por el presio de 25,000 gr. parisiendole ke ja tenija tereno grande, i ke ja iva a ser bastante, ma koando ja li vino el enjeninier de filibi, por azerli en la kaza el plan, i el ke la kijo mui grande, foe ke non abastava, solo esta kaza i li kalio ke merkara i la kaza vizina ke era de un sierto, mehmed tchauch, i el koal visto ke li era promuroza, foe ke li demando 1000 rublas^[111] i esto por hatir, i ke el trato lis foe mui pezgado por

1303    Biografia de Tchelebi Jeuda i Avraam i S-res mochonatche i Davitchonatche.    1866

esto ke non li kijo nada decharle de esto ke li demando i li kalio ke li kontara los 17500 gr. i kon esto ja foe bastante por este tiempo ke sigun ja lo van a meldar ke el ja si merko i mas tadre i otros 2 ansi kortijos, para ke si li arodendijara el kortijo, i denpoes ke el plan ja estuvo pronto el las deroko las kazas ke existijan en estos 2 kortijos, en dechando solo un tchardak, ke avija en la kaza de molla, ali ke el koal ja esta i oi i es de 2 etajes, ke en el primer etage, kontiene por kiler i depozito, i en el sigundo etage kontienen 2 kamaretas i un koredor, i la una kamareta la izo para midrach, kon ke la mobelio i metio 2 Sefer Toros^[112], el uno de viena i el otro tchiko eskrito de H. Daniel el Sofer, i en las tadres de los Chabatiod li vinijan algunos de sus parientes i de los amigos i meldavan un livriko de Teilim, a la klara, kon ke dizijan a un salmo a kada uno, i denpoes dizijan Minha kon Minjan ansi i el arvid, i en este midrach ke mi apartiene ami Tchelebi, adjuntimos otro un Sefer tora ke lo izimos eskrivir tambien de el ditcho H. Daniel, en koero de Gevil i koando mi esparte jo de S-r. Rafaelatche, ke mos espartimos tambien i los Sefer torod, es ke mi kajo ami, el Sefer tora de viena, i a S-r. Refaelatche Sefer Tora tchiko, i el de Gevil resto de en medio ke mos apartiene a todos los 2, kontra metad, i denpoes ke mi S-r. Padre fin a un grado ja avija mobelijado el ditcho Midrach, el se izo traer rimonim i keter, merko de aki lo todo de plata, i aparte izo EHAL, i vistidos por los sefer toros i paronijos [parohijos], i una teva mui ermoza ke si ketava i la metija ande la kerija, i ansi mas todo

1304    Biografia de Tchelebi Jeuda i Avraam i S-res mochonatche i Davitchonatche.    1866

el menester por un midrach, ke merko tambien i muntchos livros de teilim i otros tefilod, i koando el tenija JAR SAJAT, lo azia en este midrach,

              i denpoes ke ja lo izo alempiar el kortijo i el plan ke ja estuvo pronto se izo traer, dulgeris ke azen pared de filibe i a un arhitekt, de Iderne, ke si jamava mastor Stefan, i enpesaron a kavar los temelis, i kavaron komo 2 metros de undura, ma salio muntcha agoa, i a poder de ir ketandola lo izieron los fondamentos lo todo kon kal i orosan^[113], ke la largura de la fragua foe de 32 archines i la antchura de 28 archines (un archin de dulger es 90 santimetros) izo una izba en medio de la fragua ke es solo adebacho de el salon ke era de 10 archines de antchura kon los 32, de largura i de un metro de undura, de el nevo de el kortijo, i esto a razon de la agua i kon un metro ariva de el nevo foe la fragua, i todo el material de tavla lo trucho de Pechtera, i en este tiempo si iva aprontando, lo restan de el materijal en Samokov, i los presios eran de la tula a 28 gr. el milar^[114], i la kal a 4 gr. el kantar ke es 60 okas, las piedras a i gr. el karo, de 350 okas, i el baro amario (ilovisa^[115]) a 50 paras el karo, i el preto^[116] a 1 gr. el karo, los lenios eran los mertekis^[117] a 60 paras el par, i los atiles^[118] a 2 gr. el par, i los keriches^[119] a 3 gr. i las bozmas^[120] a 50 paras el archin, i las tavlas^[121] de 12 palmos de largura a 100 paras el par, i las de 10 palmos a 2 gr. i talpas^[122] komo eran de 4 metros de largura a 6 gr, el par, i ansi koando eran mas largas sovre este konto, i las pagas de los maestros de filibe, eran

1305    Biografia de Tchelebi Jeuda i Avraam i S-res mochonatche i Davitchonatche.    1866

de 15 i de 17 1/2 gr. a el dija, i kon kundision ke en los dijas de Chabad non ivan a lavorar, i lis pagava por el dija de el Chabad la metad de sus jundelikes, i a los maestros  ke eran de Samokov, lis pagava de 6 fin 12 gr. a el dija, i a los rentchperes de 4 fin 6 gr. a el dija, i por el Chabad non lis pagava nada, i era ke en kada dija de alhas lis pagava a todos, seja a los lavoradores komo tambien i todo el material ke merkava, i ansi foe ke kon dinguno non tuvo dingunos kontos, jo Tchelebi era ke estava kon los dulgeres, i el resevidor de el materijal i azija los pagamientos, la fragua foe etcha en 2 etajes, kon un metro mas alta de el nevo de el kortijo, i en el primer etaje izo, a la delantera 2 kamaretas grandes, la una enfrente de la otra, de una grandura de 6 sovre 7 metros, ke las apartava el salon de enmedio, i anlado izo un koltuk (kamareta tchika de 2 1/2 metros de antchura), i enfrente un servisio, kon anlado, jakmaklik por asender la soba i el banio, tchiko ke li izo en esta grande kamareta en kube kon lajas de mermer, i gurna i kazanes de kovre, por la agoa jelada i la kaente, i detras de esto otras 2 kamaretas, tambien la una enfrente de la otra, de a 4 1/2 sovre 5 metros, i en las kamaretas grandes li izo a 10 vintanas por kada kamareta, i en la tchika a una ventana, i en estas ultimas a 5 ventanas, para el kortijo, i a 2 para el salon, i detras de estas otras 2 tchikas koltukes, de a 2 1/2 metro i a el kavo de la fragua, le izo ainda i otras 2 kamaretas, de a 5 sovre a 5 1/2 metros, kon a 5 ventanas en  kada una, i en estas ultimas kamaretas lis izo i a un banio, ke de

1306    Biografia de Tchelebi Jeuda i Avraam i S-res mochonatche i Davitchonatche.    1866

la una foe el banio grande, i lo izo el tavan kon tavlas [tuvlas], detinido kon altchi, i le izo en mudjef,^[123] (paredes enmedjo vazijas) por ke tenga una kachtura dulse, i tambien ke si kaenta i presto, li metio 2 kazanes, de kovre el uno por la agoa jelada i el otro por la kaente, i eran grandes ke rejevavan a 400 okas de agoa, i la agoa li vinija deretcho de la hoente, i aparte en este banio li izo i lugar para dezmudar i vistir, de mizmo en la una pared, de mudjef, para ke li viniera mas poka la kaentura de el banio, izo i una Tevila, de una piedra kavakada sigun el DIN, i para esto li vinija la agua de la hoente, li metio una boena gurna de mermer, i el ducheme lo izo tambien de piedras de mermer, i en las 3 paredes li metio espejos, arientro de las paredes, li izo 2 ventanas oval tchikas, ke meravan para el kortijo,  i en la kamareta ke era enfrente a esta li izo tambien otro banio mas tchiko, kon kube de tuvlas, i mudjef i kazanes de kovra, kon gurna i los duchemes de piedras de mermer, i de un espejo, i la agoa tambien li venija deretcho de la hoente, i adetras de estas kamaretas izo de kada parte, a un jakmaklik, ke es por asender los banios i las sobas, i en todas las kamaretas lis izo, sobas i rimas i dolapis, i tavladikos, tchikos i a 2 minderis, i todas las ventanas lis metio ventanas de fiero, por afoera i esto las decho azer en Filibe, mui delikadas i mui ermozas, i las tchertcheves, los djamlokes las izo todas de tavlas de kain^[124], ke non tienen budakis, i mui turavles i limpias, i todas las ventanas a 2 pares de djamis, ke si avren de la parte de arientro, i todas las kamaretas eran muntcho kaentes

1307    Biografia de Tchelebi Jeuda i Avraam i S-res mochonatche i Davitchonatche.    1866

i en el salon de enmedio, en la delantera, ke merava a la goerta, izo 2 ajatas, ke los apartavan las poertas, de la entrada de la kaza etchas de tavla de moez, i la eskalera era afoera, etcha de piedras pintadas, en un saanlik^[125] de 10 archines de antchura i de 5 archines de antchura, largura, en 4 pilares detiniendo el Salon de el sigundo etaje, i el ditcho saanlik, lo izo lajado, kon piedras de mermer, i la fragua foe etcha para el DAROM, todas las paredes foeron etchas de una gudrura de 45 santimetros de tuvlas kon kal i todos lenio ke foe el menester por el primer etaje, todo foe de pilin [pelit] (dabovo)^[126] i foe traido de los kasales Fafuna i Belisa, de Ihtiman, ke es el lenio kotcho i duro i mui turavle, i la kaza tuvo 2 entradas la una de parte de la goerta, i la otra, de la parte de el kavo de la kaza, i entre esta ultima entrada izo, de kada parte a un servisio, i a un jakmaklik, por asender las sobas i los banios, i la eskalera por el sigundo etaje, la izo entre los 2 jakmaklikes, de la sigunda entrada a la kaza, i asuviendo solo por una eskalera, fin a la metad, i para la otra metad, foe de 2 eskaleras, tomando la eskalera primera en medio fragoadas antchas i mui klaras, i ensima de estas 2 eskaleras li izo un kiochk, alto ke merava a los kampos de rudech i de la tchelik hana i asuvido por 2 mas tchikas eskaleras, ke por el fraguamiento, de el primer etaje lavoraron los dulgeres solo por el enverano de este anio de 5626, ke en el envierno estuvo serada, i en el anio de 5627, lo eskapo de fragoar solo el etaje primero, i en CHAVUOD, de el anio de 5628, denpoes ke ja la mobelio, mos pasimos, a la kaza ke mos

1308    Biografia de Tchelebi Jeuda i Avraam i S-res mochonatche i Davitchonatche.    1866

vinieron la familia entera a vijitar i en mizmo tiempo i a komer, kon sus komidas de gala, ke ja lo saven sigun era koando si ivan a komer, i aparte vinieron el kolel entero a vijitar, i en la primera notche de Chavuod ke si aze MIDRACH, lo izo tambien en moestra kaza, i vinieron mas de la medija sivdad, i denpoes de esto enpeso a resentar el kortijo, i azer al deredor todo de paredes altas, ke de las 2 partes foeron las paredes, de a 8 metros de altura, lo todo de piedras a razon, ke uvo vizinos turkos, i ke si lis via sus haremes de el etaje sigundo, i para esto vinija komision por ke merara a ke foeran etchas sigun la lei, de el harem, i de las otras 2 partes ke non avija Harem foeron etchas las paredes de a 3 i de 4 metros de altura i lo todo de piedra, i de la parte de la plasa, aparto una partida de el tereno, por aser dichari avli, ke la fasate era, de 42 metros, i de antchura li decho 25 metros, para esto, i ala fasata frago, los 42 metros en 8 metros de antchura, i en 2 etajes, ke la una partida de el primer etaje lo izo, ahires para 10 kavajos, i anlado otro mas tchiko, para bufanas i vakas mundjideras, i boejes ke tenija karos, para el lavoro de los maadenes i ke traivan lenia, para kaza, i a la entrada de la poerta de la plasa, frago kamareta para los mosos ke kudiavan los kavajos i las vakas, i aparte 2 kamaretas para los mudires (mollas) ke meravan el etcho de los maadenis, i en el sigundo etaje de esto si frago para si un selamlik, de 2 kamaretas i aparte kahve odjagi, i koredor, ande el si estava i ke resivija a sus amigos i estos ke lo vijitavan, i en mizmo tiempo ke lo admenestrava i a el

1309    Biografia de Tchelebi Jeuda i Avraam i S-res mochonatche i Davitchonatche.    1866

Molla, derektor de los maadenis, i ensima de los ahires izo otlukhanas, (pajeras) para depozitar mantinimiento para las vakas i kavajos ke kavijan komo 5 a 6000 okas de paja, i en los dijas si estava en este selamlik, ke non salija muntcho a la plasa, i denpoes enpeso a azer la goerta, en la delantera de la kaza, i foe en medio de el kortijo, ke a su deredor era todo kampo vazio, la entcho de tiera kon medio metro de altura, i le metio a su deredor kandjelas de fiero, delgado mui delikado, la goerta era de modos de lavoros, i los todos rodejados kon tchimchir, vedre ke non si amarijan ni por el envierno no por el enverano, i arientro de kada pedaso lavrado sembro, los modos de las rozas golientes i sin golor, i serka a esta goerta izo i un chadirvan al deredor todo de tchimen^[127], vedri i menudo, i muntchas de las tadres de el enverano si asentava en este tchimen djuntos kon todos mozotros, i bevija unos 2 vazikos de rakis kon sus modos de los mezes, ke i li vinijan sus amigos i ahbapes a pasar la ora, i de la parte ke aparto el dichari avli, lo izo todo de tchimen vedri, mui deretcho resentado, kon parmaklikes de ermozas tavlas apartado, i a los deredores, seja de la goerta komo tambien i de el tchimen i de el chadirvan todo lo sembro, de arvolikos tchikos, de maneras de las kondjas, i de indji, tchitchegis^[128], i de los merdjanes^[129] i las malenas, i ansi mas i otros muntchos modos, de frutas, i rozas de arvoles tchikos, i por la tresera parte la metad lo izo por bostan, por los zarzavates i los modos de los kondutchos, komo pipinos litchugas, ravanikos, i jagudas (Tchilekis) i fasulia jagli freskas, kalavasikas,

1310    Biografia de Tchelebi Jeuda i Avraam i S-res mochonatche i Davitchonatche.    1866

bizeria, tomat, piperkas tchikas, safanorias, spenaka, salat, i mas ansi, kozas ke esto todo era para arankarlo, fresko, i komerlo, tenija a una krestijana, por gortalena, kon la paga de 6 mezes, para ke lo sembrara i ke lo merara el bostan i aparte tenija i a una turka por ke merara la goerta de las rozas, i aparte por los arvoles, era mi S-ra Madre, ke tenija muntcha merikija en las goertas, i eja ke si levantava mui demanijana, su pasatiempo de las manijanas de el enverano era solo en las goertas, i enbezandolas a las gortalenas, komo ke sembraran, i en la otra partida de el kampo di el kortijo, li sembro todo de los arvoles deretchos i de las mijores frutas i de las sin frutas i de akejos ke soltan rozas de las flores de goesmos ermozos i boenos, i ansi era ke koando si entrava de la poerta de el dichari avli, era ke dava un aire tanto limpio i mui plaziente, le koal ke en el dichari avli non tenija este aire, i por la koatrena parte li izo kozina, kon orno i kiler, i lugar para lavar aparte, los mudantes, kon sus hoentes i echporanes^[130] i anbares para arina, i muntchos dolapis por las komidas i otras mas por todas las kozas ke son el menester por una kozina, i en el dichari avli mas tadre frago un hambar de tavlas al deredor i en medio li izo ojos^[131], apartado kon tavlas godras, en 6 apartamentos, ke rejevava komo a 100,000 oka de trigo, i denpoes ke ja lo eskapo de azer, esto todo, enpeso, a eskapar de fraguar, i el etaje, de ariva, i lo izo lo todo sigun abacho solo ke las 2 kamaretas de enmedio, las decho aviertas, ke foeron 2 tchikos salones, i el tavan de el salon, en medio, li levanto, kon

1311    Biografia de Tchelebi Jeuda i Avraam i S-res mochonatche i Davitchonatche.    1866

2 archines mas alto, para ke formara un kubo [kube] ke foe mui muntcho ermozo, i la altura de el primer etaje era de 4 1/2 archines, i el sigundo de 5 i 1/2 archines, i todas las kamaretas i los salones, las bijadio, kon jagli boja,^[132] i kada una de su kolor, i en las 2 kamaretas grandes, en los tavanes lis izo travar, amerekanes de jenso, por ke foeran los tavanes mui duz i deretchos, i en sima de [e]sto los lavoraron kon delgadas chiches, los modos de las mas ermozas pinturias, i ansi mizmo foeron lavrados todos los tavanes, i denpoes los bojadejo i denpoes lo mando a S-r. Refaelatche a Viena, porke merkara la mobilija por el etaje de ariva, seja por las kamaretas ansi tambien i por los salonos, lo todo de lo boeno i ermozo i foe mui bien adonada, i resentada, komo un tchiko palasio, i todas las vijitas, i los daavetis ke lis azija a los Valis i los Pachas ke vinijan a Samokov, era en estas kamaretas i salones, ke lis dava, el era mui kontente i se alegrava mui muntcho, koando entrava en kaza, i a todos mos dizija porke estuvieramos siempre alegres i mui gustozos, i mas tadre merko tambien i la kaza de S-r. Manoah Levi ke la kijo, venderla i la deroko entera, i frago un salon kon un chadirvan en medio de este salon, i 2 kamaretas ke meravan a el bostan i a la goerta i a los arvoles, i se asentava tambien en muntchas tadres de el enverano, kon todos mozotros, i komijamos en las notches en este chadirvan i en algunos dijas de los Chabatiod, i de los moadim, ke era kon muntcho keef, i gusto ke lo pasavamos, i tambien ke mos kontentavamos,

               El pasatiempo de las mujeres mientres los dijas era,

1312    Biografia de Tchelebi Jeuda i Avraam i S-res mochonatche i Davitchonatche.    1866

ke si vijitavan, entre la familia, i mui poko frekontavan en las vijitas ke avijan en otras familijas, en las notches koando vinijamos en kaza lo mas muntcho, ke estavamos era, fin 2 la ora a la turka, i denpoes komijamos i mos entravamos kada uno en su kamareta, ma non mos levantavamos demanijana, afoera de mi S-ra madre, jo Tchelebi ke non fumava delantre de mi S-r. Padre, foe en este anio ke mi alesensio de fumar delantre de el, ma jo muntcho tiempo denpoes mi avregonsava, de fumar delentre de el, en las mezas el non bivija vinos ke ja las tenija modos en kasa, porke non li dizija koando bivija vino, i en algunas tadres merkava, algunas frutas, i mi S-ra madre mos dava a todos, i komer komijamos todos de un plato ke lo metijan en medio de la meza, i detiniendo kada uno sus tchinis de delantre aparte, i metijan 3 modos de komidas, mi S-r. padre si asentava, por el envierno en la kamreta grande ke era la ke el dormija, i se metija una chilte en bacho, i mozotros ke estavamos kon el fin a ke komijamos, mos asentavaramos en los minderis, i por el enverano en los ajates, de el salén, i por komer ivamos en la una kamareta ke ja era para esto, en las notches non salija a dingun lugar, solo ke en las notches de los alhades se iva ande sus ermanos, i poko ande otros amigos, i por enfrentante li vinijan i a el, sus vistidos eran ke por las manianas si metija un enteri largo, para bever el kahve de la maniana, kon ke lo detinija el mangal de delantre, i denpoes dizija la tefila, i se metija 2 pares de tefilim, i denpoes para salir a la plasa, si vestija de pantalos i setra a la turka, i un pardesu, i por el envierno,

1313    Biografia de Tchelebi Jeuda i Avraam i S-res mochonatche i Davitchonatche.    1866

kiordis kon libades, ke los tenija muntchos de las maneras de las samaras, i por los Chabatiod i los moadim se vistija de anteris largos, de sedas i de lanas, i kuchakes, de modos de laures, i otros, i su kalsado era de el boeno de potines de chevro i rogan ke si los azija traer de Nich, su poerpo era alto i algo flako, la barva la tenija kurta ke non si la kirkijava, otro ke solo los mustatchos, la espalda la tenija algo salida para afoera a el presipio fumava kon tchibuk, i denpoes kon sigara, i el tutun ke fumava era todo jenidje i la tabakera ke tenija era de plata, non li plazia fantazias, koando non tenija koalo enbeveserse, li plazija muntcho estudiar en la gemara i en otros livros de los ondos estudios por ke el era mui savio sovre todos los estudios, i los tenija muntchos en kaza,

              En este anio de 5627, frago el Salon ensima de la kaza ke morava, i gasto en el 30,000 gr. esto lo izo, tch. Jeuda, sigun ditcho en su kaza, el salon foe, de 22 metros, de largura, i de 10 metros de antchura, a deredor lo izo todo de grandes ventanas, kon un balkon ke mira a la goerta, li izo tambien i 2 kamaretas, i lo mobelio, kon boenos minderis, i kanabes i sijas, i muntchos espajos, i en bacho metio una muchama^[133] de un pedaso ke la izo traer de Kostan i lo bojadejo, kon, jagli boja, i en la kaza li izo i una reparasion i el banio, lo renovo kon boenas gurnas, i lajado de mermer, i la goerta kon los bostanes, los renovo, i en la entrada de la kaza kon

1314    Biografia de Tchelebi Jeuda i Avraam i S-res mochonatche i Davitchonatche.    1867

un boen lajado de piedras de maslanik, ke salijan en los balkanes de Samokov, i eran tambien blankas,

               S-r. Behoratche G. Arie, ke estava mui sikilijado, de el etcho de la kula, ke esto ja lo tengo eskrito mas antes, i en este tiempo ke si estava vindiendo, el maaden de Usref Pacha en los iakeris ke es ke si jamava, Tchifte maaden, i ke el non lo konosija este etcho, i por azerlo bien, lo merko Tch. Avraam, kon la kundision, de tomar parte Tch. Avraam solo el un tersio i los 2 tersios, ke apartinieran a S-r, Behoratche, i en esto ke ja estuvieron de akordo, lo tomaron kon ke kada uno desbolso su parte i por el enkamenamiento, a esto lo tomaron a un sierto molla Rachid, soto los komandos de Tch. Avraam, i ejos ke li izieron todas las reparasiones menesterozas, i ke enpesaron en el lavoro, era ke lo todo seja de koalo foesa por las merkidas de los materiales i las venditas de los fieros lo todo si azija en la butika de S-r. Behoratche, solo ke por el menester de los desbolsos era ke davan kada uno su parte, ke por los presipios, ja ivan kamenando boenos seja ejos komo tambien i las venditas, ma mas tadre seja ke el molla Rachid, non sentija or ke las venditas no si estavan aziendo en regla, foe ke lis salio el etcho a deferensias i letigas, ma Tch. Avraam se iva kedando kajado, ke esto ainda mas, ke el etcho estuvo mas grande, i los presios de los fieros era ke en kada dija ivan endo mas abacho i las litigas eran ainda mas grandes, fin i algunos i amenazos, sin pensar ke era por plaser, ke si lo izo, i anke ke si sikilijava ma torna lo somportava, i esto foe fin a el anio de 5630 ke ja si avija espartido Tch. Avraam de sus

1315    Biografia de Tchelebi Jeuda i Avraam i S-res mochonatche i Davitchonatche.    1867

Sovrinos i li kalio ke si lo apartaran en el etcho i se lavoravan kada uno por su konto, i koando el etcho ja troko, i enpeso a valer los fieros kon muntcho altos presios, i todos los 2 ja eran mui bien kontentes, i sovre ejo foe ke S-r. Behoratche, lo mando a s-r. Mairutcho alkalai, ande mi S-r, Padre por ke li demandara si es ke li kerija vender la parte suja de este maaden kon ke li iva a merkar tambien i toda la amele, i todo esto ke podija apartener a este maaden i kon el presio ke lis vino a kostar ke ja lo savijan era solo ke li dichera koanto es ke li iva a demandar de ganansia, i mi S-r. Padre li respondjo ke tenija de pensar sovre esto, i tambien por avlar i kon mozotros, i denpoes ke si foe S-r, Mairutcho mos jamo ami i a S-r. Refaelatche a su kanselaria ke tenija en la butika ke mozotros estavamos, i mos dicho ke lo demanda a merkar el Tchifte maaden S-r. Behoratche, i koala edeja tenijamos mozotros, ke jo li dicho sigun de loke gusta ke lo aga, ma si dava una boena ganansia, ja era de darselo, i mozotros seja ke mos merkamos uno otro ansi maaden or ke merkamos alguna otra koza, i el mos dicho veremos, i sin mas en nada platikar, i a la maniana ke ja vino de moevo el S-r. Mairutcho, por la repoesta, li dicho ke non mos vamos a poder tratar, a razon ke los Ijos keren muntcha ganansia i jo ke non lo takso esta suma, es ke resto por la ora ansi, i mas tadre veremos, i ansi kedo, ke esto foe un mazal de S-r. Behoratche, de esto ke non lo merko, porke foe ke pokos anios pasaron ke mas non kameno el etcho de los maadenes de el entodo boenos i mas tadre ke ja foe la gera Turka-Susa, se deroko

1316    Biografia de Tchelebi Jeuda i Avraam i S-res mochonatche i Davitchonatche.    1867

todo i denpoes si vendjo los terenos por un bokado de pan,

               Foe en este anio, ke mi nasio ami Tchelebi, una IJA, la Behora, i la jamimos Rahel agora Rachel, foe en la sigunda notche de Pesah, ke era notche de alhad, i Beju su madre komo era premiriza ke iva a parir, i algo de dolores, anke ke ja tenija ma iva aziendo gairet, i era ke ainda estavamos en la meza, ke eramos en la kaza de S-r, Behoratche, ke komijamos las 2 primeras notches de Pesah, i denpoes ke ja eskapimos la AGADA, i ke ja i avijamos i komido i estavamos en la fruta, foe ke las dolores de la parida ke si li avijan muntcho engrandesido, i las mujeres viendola, foe ke presto si la jevaron en moestra kaza, i mos mandaron ami kon S-r. Mochonatche, por ke foeramos a traer a la komadre, i mozotros asendimos los feneris, i lo izimos prontar el paiton ke ja lo tenijamos en kaza, i mos suvimos tambien por mas presto traerla ke era la EMETULA DUDI, i de esto ke asendimos feneris i ke mos suvimos tambien i a el paiton, se izo barana grande, por la sevdad entera, i los Hahamim sovre esto lo izieron kistion, ke non podijamos tokar kandela ni menos kariarmos, kon paiton, ke mozotros ke lo izimos foe lo todo por presto i pensando ke komo ja era por el menester de paridas, ke non iva a ser tanto grande el pekado, i a penas ke ja la truchimos a la komadre, eja ja pario mui kolai i seja la madre komo tambien i la nasida ja foeron mui sanas i mui boenas, i avista li izieron la kama alta, i adonada, kon los muntchos modos de los brozlados, i de la kaveseras, i en el Pesah entero, era ke la sivdad entera seja los ombres komo tambien i

1317    Biografia de Tchelebi Jeuda i Avraam i S-res mochonatche i Davitchonatche.    1867

las mujeres la ivan vijitandola, i todos los parientes mo si vinieron a komer djunto kon todas las komidas, i el padre de la parida li mando un fato, de ropas de ichleme, kon muntchos presentes, seja para la parida komo tambien i para la nasida, de mizmo foe i de todos, los parientes, i eja ke estuvo 8 dijas en la kama era ke en las notches vinijan muntcha djente a beklijar a la parida, ke sigun de loke lo azijan ja lo tengo eskrito mas antes, i H. Avramatche el de H. Refael komo era un ombre mui chakrak, i para ainda gustarmos lo izo, ke en la poerta de la kae, enkolgo una grande resta de sevojas, i la enteleo kon varak mui bien, para ke veigan todos ke en esta kaza, li nasio IJA, i el koando entrava a el kortijo, enpesava a dizir IF, iF, ke goezmo de IJA, i todos mos ivamos merandolo i ariendomos, i denpoes ke ja si levanto de la kama, li tomaron a una krijadera, ke era M. Buhuru, mujer de S-r, Avraam Koen, i a una dichipla para ke la velara i ke la konara, a la krejatura, ke era, Esterula de Jaakov B. Reuben, i la aletchavan entre la madre i la krejadera, ke esta ultima estuvo solo 3 mezes, ke mas non foe el menester, ke ja la aletchava su madre, i su vava mi S-ra Madre ke la amava tanto, era entre las 2 ke la kudijavan, i su vava era ke las manianas se la tomava de los petchos de su madre, en loke la madre dormija i se la jevava a kamenarla por las goertas i las vizinas, i koando eja ja kirija tetar, lo azija ke si la traiva por ke la aletchara i denpoes torna si la tomava i la kamenava, eja foe en tchika mui bonatcha, ke de el entodo non jorava, su papu Tch. Avraam la amava tambien mui muntcho

1318    Biografia de Tchelebi Jeuda i Avraam i S-res mochonatche i Davitchonatche.    1867

i le traiva muntchos djugetos i konfiturias i se la tomava en sos brasos, i djogava kon eja, i ami era ke mi esperava por koando iva a vinir i koando mi vija de enfrente eja ja korija i mi abrasava, i se gustava mui muntcho, porke siempre ja li traiva kuzikas ke lis plazijan, eja koando ja tuvo 4 anios si etchava kon mi, en mi kama, i esto lo kontinoimos fin a koando tuvo la edad de 10 anios, i denpoes ke ja li merkimos una kamika de Viena, foe ke si enpeso a etcharse sola ma lo azija ke koando si espertava entre la notche era ke si venija a la kama mija de moevo, i mas tadre ke ja si enpeso a avregonsarse, de etcharse kon mi era ke si enborojava, kon el kiordi or kon el anteri mio, en diziendo jo torna mi vo a etchar kon baba, una ves ke este anteri ja es de baba, i kon esto si dormija, i esto ke lo esto eskriviendo es mui verdad ke tenija mui grande amistad kon mi, i esto kontinuo fin poko tiempo antes de loke la esto eskriviendo la dita biografia, lo todo, era adetras de la edad i el tiempo igoal a estas amistades i kerensias, i foe komo un kotchio ke lo korto, de un sierto tiempo para akei [aki] lo todo a la kontra, i eja koando tuvo la edad de 7 anios ke enpeso a frekontar las echkolas seja por el djidio komo tambien i por el franses, i non mankava nunka de la echkola, i en vezes ke el profesor li dava muntchos pensones,^[134] i eja ke non alkansava a eskrivirlos i ke si dormija, lo azija ke estava fin a denpoes de las medias notches, para eskrivirselos en tal ke eja dormiera i eja las enbeso todas las 2 lingoas a meldar i eskrivirlas mui bien i en este tiempo eja enbezava tambien i a lavrar i a kozir, i estuvo

1319    Biografia de Tchelebi Jeuda i Avraam i S-res mochonatche i Davitchonatche.    1867

en la echkola fin a ke espozo, eja save entontrarse [enkontrarse] kon koal unke persona, i komportarse, koando era tchika era ke todas sus kolegas, li venijan ande eja por irsen djuntas a la echkola i otros sus pasatiempos, eja era en todas las reprezentasiones ke si davan en la echkola, en kada ves de una manera de aktrisa, eja kantava tambien en el KAAL el CHIR ACHIRIM, I el RUD, i la MIKAMOHA, i mas todo esto ke lo kantavan las mutchatchas, i los motchatchos de la echkola, i jo li dava en kada dija ke si iva a ir a la echkola a 10 paras para ke si merkara de fruta, i halva,

              Foe por la primera vez de koando entri a la oda, ke mi mandaron a el primer viaje i esto foe a los kazales de Ihtiman, ke tenijamos muntchas tarlas, i las davan a TREKIO, ke era ke tomavan ejos solo el un tersio de loke salija en la tarla, i todas las tarlas eran sembradas de el trigo bogdai, i mi lo dieron a bilala Suliman ke ja era moestro, empeigado para ke mi akompaniara, i todos los 2 suvidos en boenos kavajos, i el Bilal mui bien armado, i mos foemos i rekojimos todo el trigo ke era una suma bastante grande, i lo mandimos los trigos la una partida a samokov i la otra a los maadenis, i jo estava vistido de un potur de panio kon una fermela ke era kapladijada de samara elma^[135], i la kalor ke era muntcha era ke iva sudando, ma non mi keti la fermela, i a la boelta koando ja mos estavamos viniendo, foe ke abachimos a el tchiflik de la bana, ke estava Tch. Jeuda mi Papu kon mi S-ra Madre i mi mujer Biju, i ejos mi la izieron ketar, i estuvimos unos koantos dijas en el tchiflik, i

1320    Biografia de Tchelebi Jeuda i Avraam i S-res mochonatche i Davitchonatche.    1867

izimos unos koantos banios i denpoes mos vinimos todos a Samokov i era ke en kada okazion si avlava de esto de la fermela de elma,

              Los etchos de este anio, ke lis foeron mas flakos, i loke si okupavan era solo en el etcho de los maadenis, i algo de los sahtijanes ke esto non lo kontavan por nada, i ansi era ke si ivan enbevesiendosen en los etchos de el kolel, i en los gastes ke los azijan sin koenta foe ke enpesaron a irsen kon mas muntcha koenta, i lo todo ke non si davan a saver a la djente, i en las notches ejos siempre ivan tiniendo adjuntas para buchkar a enventar, algunas etchos, i moneda ke davan kon entereso tambien mas non kijeron dar, i ke ivan buchkando, de alevjanar porke ja estavan mui muntcho kargados i lis estava siendo mui foerte los kovramientos,

              Ejos lo toparon de mijor por enpesar a tener relasiones kon kada maadendji aparte por platikar sovre el etcho de los maadenes i kon esto alkansar por merkarles todo el fiero, ke podran lavorar, sin ke mas ejos poedan vender a dinguno otro, i esto ke ja lo enpesaron a azerlo foe ke en un enterval de 2 mezes ejos ja podieron konvenserlos a todos los maadendjis, ke era 18 maadenis, solo ke kon los 2 maadendjis ke eran Emin AA tchamachir agasi i Ahmed efendi ke tenijan un maaden entre los 2 ke non si kontentaron a entrar en esto, i el restan denpoes ke ja si kontentaron, ejos si konvinieron por merkarles toda la suma de fiero ke podran lavorar, sovre el presio de a 150 groches el kantar, i los pagamientos ke lis ivan a azersilos en el dija ke presentan la resivida de la suma de el fiero