קורותיו של סנ' רפאלצ'ה א' אריה

2040

De aki i endelantre si enpesa la partida de

Sr. Refael A. Arié ke enpesa de el anio de 5647

fin a el anio de 5660-61,

2041             Biografia de Sr. Refael A. Arié.                 1887

En el anio de 5647, ke Sr. Refaelatche ya estuvo, enteramente espartido de su ermano, Tchelebi-Moche, seya de la butika komo tambien i de kaza, i ke ya estuvo mui kontente, lo izo ke si asento el mizmo en la butika ke teniya de el kolonial, i se tomo a un moso kon si i era el mizmo ke la estava enkamenandola, pasando i algo de tiempo el si foe a Filibe i se konvino kon uno de los molinos de Filibe de estos ke ya ketavan la arina sigun de esta de el molino ke aviya en Samokov de Rale, i trucho de estas arinas ke ya teniya el konto por konkoreyarle, ke de el presipio, a Sr. Rale non li parisio ke le iva a konkoreyarle i koando ya lo vide foe ke la abacho a muntcho el presio de sus arinas por ke non li konvenga i en mizmo tiempo li mando i a dizir ke eyos sigun ke kon las palas rekojen las arinas ansi es i los napoliones ke los paleyan,^[10] i ke si repentiera de este negosio, ma Sr. Refaelatche lo foe kontinuando, anke ke las ganansias las teniya mas tchikas,

Ansi era ke i kon los artikolos de el kolonial foe ke lo montchigo, i vendiya kon mas konvenivle i ansi foe ke el si i gano a muntchos klientes i era ke en muntchas kazas lis vendiya i a fiyado por kovrarles en kada mez, ke esto ya lo keriyan muntcha djente, sovre todo los enpeigados, el non si avregonsava de sirvir a sus klientes, de koal artikolo foesa mizmo i ke si enmatakava, el fikso los presios en todos los artikolos por ke non uviera tratar kon kada uno i tambien por vender a todos a igual presio, sin deferensia de

2042              Biografia de Sr. Refael A. Arié.                 1887

personas, el en kaza la foe resentando de algunas kozas ke mankavan de las mobilias, kon los gastes ke aziya en kaza eran sovre mas ikonomiya, en las notches era ke siempre eramos en un kavo fin antes de komer seya los ombres komo i alas mujeres, ansi era i en los Chabatiod i los moadim i ke komiyamos en una kamareta i kon moestras mezas aparte, el lo izo el tchimen ke aviya ke li kayo a el lo troko, en goerta por rozas i se izo traer las simientas de la Europa, i a esta razon el era ke i vendiya de ansi simientas por ke non aviya otro ken ke trochera de esto, izo tambien i foente de la partida suya

Las mujeres en kaza era de mizmo ke estavan siempre en un lugar i koando se ivan por las vijitas i ke lo mas muntcho era solo ande las parientas, era de mizmo ke se ivan, eyas non tuvieron dinguna ves ni una de las deferensias de koniyadas, en dingun punto i koando eyas viniyan en un kavo era sin artar de avlar i siempre riendo ke esto es i agora sovre esto lo demandan muntchas i otras mujeres koalo es ke topan de avlar tanto sin estankar seya de el avlar komo i de el reir.

En el anio de 5648, ke el ya resento boeno su andar de la butika i el moso ke lo teniya ke ya era mui konfedente, i mui deretcho ke si yamava Zafir Jontchev, i lo tuvo muntchos anios, i la paga ke li pagava era a 30 fr. a el mez, ke de esto ya era mui kontente

2043              Biografia de Sr. Refael A. Arié.                 1888

era ansi ke li konfeyava a el la butika, i el si merava i algunos otros etchos en la plasa, i tambien el iva i por los djuzgos ke de estos ke non li pagavan de los averes de viejo los dava a el djuzgo i tambien ke era el ke aziya los empleos por el menester de la kaza en este tiempo el foe eskojido, de la sivdad de Samokov por Tchlen^[11] miembro onorario, para el gradski sovet, ke si rekojiyan a 2 i 3 vezes ala semana por reglar los etchos de la sivdad, i en okasion era i ke si rekojiyan mas muntchas vezes ke a razon de esto el tuvo ke lo onoravan toda la djente i lo vijitavan en todas las fiestas moestras todos los empeigados de Samokov, i tambien era i ke el teniya muntchos provetchos para i sus etchos ke los enkamenava mas presto, i ke el siempre ya goadrava los enteresos de todos los djidios ke los defendia mui muntcho en okasion koando teniyan algunas deferensias en el gradske sovet i ansi tambien i en los djuzgos por ke ya lo sintiyan i lo todo lo aziya por plazer, i ansi era ke siempre li viniyan muntchos de los Djidios por rogarle a ke estuviera en su ayuda sovre algunas deferensias ke las teniyan en el gradski sovet, i el ya era ke los sentiya i los ayudava, i siempre ke ya foe el karakter de los Bulgaros de ser kontra de los unos a los otros i siempre ke ya eran de 2 partidos era ke i li viniyan sus kolegas por konvenserlo, por ke lis foera de la parte de kada partido ma el lo aziya ke non trokava su edeya i se enkamenava siempre kon su edeya, i kon esto los unos lo katavan i de suyo los otros era ke li goadravan mal kerensia ma el non si espantava de dinguno, i siendo ke ya era Tchilen foe i

2044              Biografia de Sr. Refael A. Arié.                 1888

ke lo eskojeron tambien i de los djidios por miembro i de el komite senagogal i echkoler, ke eran los mizmos ke kudiyavan i por la echkola, i esto koando ya foe era ke lo mas muntcho de los diyas era ke estava okopado en esto, i el kon muntcha hiba lo kudiyava por goadrar i los entereses i de la komonita, era el ke saliya muntchas vezes por rekojer moneda de estos ke non pagavan en regla i kon algunos tambien era i ke se araviava, ke de esto li kavzava, a ke non lo meravan algunos Djidios kon ejos boenos, de esta manera el kontinuo komo 8 anios seya en el gradske sovet komo i en el kolel de los Djidios, i esto ya si li aviya envistido komo ke era su etcho i non li enportava si kedava atras de sus etchos en tal de resentar estos de la sevdad komo i de el Kolel i sus parientes li davan kechas ke non deviya fin a este grado de okoparse i dechar su etcho atras ma ya foe ke mas tadre ke vino a el poder un sierto Sr. Hristako Zografski por Kmet, i el koal ke era, kontra el partido de Sr. Refaelatche ya foe ke estudiando las postanovlenias^[12] ke las teniyan etcho de mas antes ande lo izieron el yero en unas koantas de eyas i los dyo a el djuzgo lo koal ke ya foeron todos kondenados a prezo i los krestiyanos ke ya si defendiyan kon sus razones i ya eran delebrados ma Sr. refaelatche ke no lo pudo tanto presto el estuvo en algunos apretos ke i por esto mas tadre ya foe i el delebrado i mas non foe ni Tchlen en el Sovet^[13] ni menos de el komite por i entre los dijdios tambien uvieron en este tiempo ke eran en 2 partidos,

2045              Biografia de Sr. Refael A. Arié.                 1889

En el anio, de 5649, era de mizmo ke kontinuava en el negosio de la butika, ke esto li era en este tiempo poko, por su menester de enkontran los gastes ke los aziya para la kaza,

foe ke el tomo el abastisimiento de el zelentchuk, i de los artikolos de kolonial ke lis eran menester por la armada de los soldados ke aviyan en Samokov, de arteliria, i kon esto ke el ya teniya i muntcho konosimiento kon los ofisires era ke lis iva dandoles sigun de loke el lo keriya, i ansi era ke de esto teniya boenos profitos, koando a los pagamientos de estos produktes era ke por los presipios los aziyan en kada mez i en mui boena regla ma mas tadre enpesaron a non pagar komo de antes i ansi era ke en okazian li kalia ke si prevaliera de la plasa, por algunos kurtos tiempos, el koando topava a vender kon sus boenos presios de sus mulkes ke los teniya era ke los iva vendiendolos ansi en este anio el vindio unas tarlas en kalilar kon sus mui boenos presios,

Kon el komertcho ke estava en su kaza en la kaza de el ibich, i ke tomava komo a serka de 1000 fr. de kira a el anio foe en este tiempo ke si levanto de Samokov i resto solo en Vakarel i esta kaza resto algo de tiempo vaziya i mas tadre la vendio a Pop Jovan un sierto makedoniali por 90 liras ke esto ja era aparte de la kaza ke este vizino mos foe mui boeno, i lo avierto ke aviya para el kortijo lo izo todo kon paderes,

2046              Biografia de Sr. Refael A. Arié.                 1889

Kon la mision ke el la teniya seya esta de el Gradski Sovet komo i de el Kolel era ke non lo dechava i siempre se okopava en esto a el li pilaziya siempre platikar lo mas muntcho, de esto, i ande el era i ke li viniyan todos los mechartim, seya por kecharsen de esto ke algunos non lis pagavan en regla lo aziya ke el lis dava moneda de su petcho algunos akontos por ke si prevalieran i de esto li eran mui muntcho rekonosientes por ke los otros esto non lo aziya de enprestarles, i ansi foe ke koando el ya si salio de esto foe ke tuvo una boena suma de aver de el Kolel, i por poderse kovrar foe ke algunos lo sospetchavan i era solo ke si pudo kovrar kon detenerse de sus taksas ke el las pagava, a el Kolel,

Sus ijos ke kontinoavan las echkolas era ke Sr. Josef iva ala echkola de los amerekanos, i el era ke ya non keriya mas kontinoar otro ke su dezeyo era sovre la merkansia i se keriya ir en otra sevdad por toparse algun empeigo, ma su sr. Padre era ke non lo alesensiava, i ansi foe ke resto torna a kontinuar,

En el anio de 5650, sigun ditcho mas antes ke su ijo el grande Sr. Josef, ke su dezeyo era de non kontinuar mas en las echkolas i sus parientes ke esto lo keriyan a ke estuviera, era ke no lo alesensiavan, de salirse, ma el ala sikreta, iva korespondeyando kon sus amigos de Sofia por ke li toparan un lugar ande el si podia

2047             Biografia de Sr. Refael A. Arié.                 1890

empeigar, i esto ke ya si lo prontaron, foe ke el si prokoro una tchika suma de moneda i en un diya sin ke lo izo saver a dinguno, si tomo ala sikreta algo de sus vistidos, i partio, por Sofia i mas tadre ke lo supieron foe ke si sikiliyaron sus parientes mui muntcho ke lo mas muntcho era por ke non saviyan ande era ke si aviya ido, i eyos ke telegrafeyaron en unas koantas sevdades deredor de Samokov fin ke tomaron la repoesta ke estava en Sofia, foe ke su Sr. Padre foe yorando, de esto ke si foe sin dizirlo, ma ya lo izo ke ala maniana ya vinieron seya telegrafos komo i kartas suyas demandando las mil eskuzas de esto ke non si los izo saver, i el ke ya si aviya i topado, un empeigo, en una fabrika ke aziya las biviendas de los lokieros i otros si estuvo ande el kon una mas tchika paga por el presipio, i foe kontinuando en este lo todo por embazarse i el koando ya estuvo komo a 6 mezes ke el ya si vido ke ya si pudo embezarse, fin a un grado, se vino torna a Samokov kon la entision de azerlo el este etcho en Samokov, i el ke ya si merko las esensias menesterozas para esto todas en Sofia lo izo ke izo tambien de todas estas ke si podiyan vendersen en Samokov, ma era las venditas mui tchikas, ke no li konveniya para estar, solo en esto i su Sr. Padre ke keriya ke kontinuara, los estudios foe ke lo izo de moevo entrar en la Echkola de los amerekanos, i foe kontinuando, i koanto alos bevrajes seya de estos ke los aviya prontado komo i de algunos los aziyan de moevo era i ke de esto los ivan vindiendo, lo todo por su konto,

Su ijo el sigundo Sr. jzak, ke ya eskapo la echkola

2048              Biografia de Sr. Refael A. Arié.                 1890

de los Djidios en Samokov lo entro en la Gemnazia sovre el Bulgar Ke entre en la primera klasa, i el ke ya foe mui entelejente, era ke las klasas las pasava en kada anio,

Koanto a los suyos negosios era de mizmo ke los kontinoava, ma ya era su entision de enmankarlo i lavorar mas muntcho i sovre algunas operasiones de el bankerlik, i ansi foe ke el lo enpeso algo a enmankarlo, por prokorarse algo de moneda para esto, lo todo ke uvieron muntchos konkorentes i ya lo estavan aziendo solo por un mantinimiento mizeravle, i esto era lo mas muntcho los Djidios ke ivan konkoreyando, ke los negosios si foeron akurtando en este tiempo, ke los krestiyanos se etcharon muntcho adetras de todas las merkansias, lo todo por tomarles los etchos de los djidios, ke por esto eyos los Tchorbadjis teniyan adjuntas en kada diya de alhad en la metropolia ande la vladika i platikavan sovre el antchamiento de la merkansia de los krestiyanos, i los mas rikos era ke si aziyan Haverim kon estos ke non teniyan el poder por ke avrieran botikas de todas las merkansias, i ansi lo ivan aziendolo kon los mansevos ke ya eran mas aklarados,

En el anio de, 5651, Sr. Refaelatche ke en el etcho de la butika de el kolonial ke ya estuvo bastante leviano era ke el se izo tchika kanselaria vizina a esta butika i enpeso a dar algo

2049              Biografia de Sr. Refael A. Arié.                 1891

de moneda a los kazalinos kon unos enteresos mas grandes i esto ya eran los kazalinos mui kontentes porke otros ke lis davan ansi moneda a estos era los enteresos a una para a el dia por groch, el enteres, kijendo dizir ke en 40 diyas akel ke tomava 100 groches ya kalia i ke li pagara 100 groches por los enteresos ke esto era lo mas muntcho los tchorbadjis ke lo azian seya en las sevdades komo i los TCHORBADJIS DE LOS KAZALES i ansi era ke aviyan muntcho rikos de esto i los kazalinos ke si espantavan de eyos i tambien ke non saviyan, i eyos ke tomavan era a 30 i 50 gr. Por pagar los dasios koanto los apretavan era ke non si li enportava ma a el dador esto li entchiya muntcho, i tambien los aziyan i sotometidos, i Sr. Refaelatche ke lis dava era kon unos enteresos muntcho a mas barato de esto, era ansi, ke tuvo muntchos klientes, i lo foe kontinuando i ke ya li pagavan tambiem i en mui boena regla, i era ke dava siempre a sumas mui chikas el tuvo kaje en todos los kazales de estos ke eran los mas serka a la sevdad, teniya muntchos okaziones ke se iva i el a los kazales, i a el ya era ke esto li konvenya mui boeno, i estava mas libero i repozado, kon el etcho de los bevrajes era de mizmo lo kontinuava, i era djuntos kon su ijo el Sr. Josef ke alos presipios los aziyan seya los lekiores komo i los otros bevrejes, i era ke si los vindiyan a los meyanedjis en groso kon poka ganansia, i esto era lo mas muntcho a kredit, sus ijos los mas grandes eran todos los 2 en las echkolas kontinuando sus estudias, ke todos los 2 foeron kichtos de sus profesores por esto ke si enbezavan mui presto las lixiones, i

2050              Biografia de Sr. Refael A. Arié.                 1891

ke eran tambien mui sotomitidos i tambien era ke el Sr. Refaelatche lis dava siempre paras por todo el menester seya kon livros i tambien kon todos los otros menesteres, i aparte lis dava i a eyos i a semanada, por ke non foeran asretis^[14] por sos plazeres, el en kaza no si araviava kon los ijos i el abastesiya todo el menester en grande abondansa, seya kon la komania komo i kon el vistir, i todas las i otras kozas, a todos los amava igoal todo modo de komania la merkava en su tiempo por azer la ikonomiya, ke la deferensia era de un tanto otro, era el mizmo ke aziya todos los empleos.

En el anio de 5652, li nasio una ija i la yamaron Tamar, ke en este parto la pario muntcho mas foerte de todos los otros fin a el grado ke aparte ke uvieron muntchas komadres foe ke uvieron i medikos, i ansi foe ke la parida komo i la ija por el presipio foeron algo malatos ma ya foe ke todas las 2 mui presto ya estuvieron sanas i boenas i anke la parida hazina torna kon todo si izo azer i kama alta, i la vijitavan la sevdad entera, ansi tambien i todos los parientes li mandavan los platos sigun el uzo de todas las paridas, i en el diya de Chabat tambien si vinieron todos los parientes a komer i fadaron ala ija kon ke i uvieron de los Hahamim para esto, i su madre propio la aletcho i la kudio sigun de todas las otras kreyaturas kon ke i sus ijas las mas grandes era ke las kudiavan tambien

2051             Biografia de Sr. Refael A. Arié.                 1892

non solo a sus ermanikos otro ke era i por el menester i de la kaza, anke ke ya teniyan i mosas i para este tiempo gizanderas i otras mujeres, para ke kudiaran seya por la parida komo i por la kaza por teniya i kreyaturas ke eran ainda tchikas,

Mozotros ke la kaza fin a este tiempo, non la apartimos kon paderes era ke estava entero el salon avierto, i ansi era ke i mozotros estavamos siempre en un lugar seya los ombres komo i las mujeres, ke ya si kere entendido ke i mos ayudavamos tambien en todas las okaziones de los unos a los otros,

El, de mizmo kontinoava en los echkontos i era diya kada diya ke i lo iva engrandesiendolo, i lo todo le iva en mui boena regla, i visto ke el ya estuvo mui enreziado en esto i el etcho de la butika de el kolonial ke era por mano de los mosos foe ke non tuvo mas konto i ansi foe ke el partida de su ropa si la yevo a kaza de esto ke ya li podiya premir por su mantenimiento i lo restan lo vendio a los bakales kon esperarlos algunos tiempos, i la butika la dyo a kira a Sr. Rahamim koen ke mas tadre foe i ke si la vendyo a este Sr. por 105 napoliones, i el si asento en la butika vizina ke la teniya a esta, i ke ya li era bastante,

El lo teniya por un reselo de esto ke en el anio vinidero ya iva a ser merado Sr. Josef, por soldado i el buchkava a tomarlas mizuras por ke foera prolongado a razon ke estava ainda en la Echkola ke esto ya podiya ser ma el diziya ke era mijor sirvir en lo ke era mas mansevo de koando iva a ser mas grande i denpoes de 4 i 5

2052              Biografia de Sr. Refael A. Arié.                 1892

anios, i era de esta manera ke lo ivan etchando en avlas, i sin de tomar dingunas mizuras, ke por una parte ya era i razonavle, sigun de los moestros karakteres ke lo todo lo keremos ke si enpesa para ke este eskapado, i el ya era ke kontinoavaen la Echkola i todos i los profesores de esta Echkola lo amavan mui muntcho,

En el anio de 5653, Sr. Refaelatche era de mizmo ke kontinoava, en lo mizmo de los dechkontos i en este tiempo ya foe mas muntcho antchado en esto, i ke si li aviya tambien i mas grande suma los averes, era ansi ke de moevo non dava, por esto ke algunos de estos devdores ke en kada 3 mezes ke prolongando sus devetos, era i ke si lis iva i rekojendo a mas grandes las sumas, lo izo ke de algunos los dava a el djuzgo i esto non era konvenivle era ke lo aziya ke si lo konveniya de afoera kon rebatirles algunas sumas, i en este tiempo tambien foe ke los gastes los tuvo ma grandes ande non li estavan tapando las ganansias, era esto ke lo azia algo i pensar, i de esto era ke si enbevisia lo mas muntcho en los etchos de el gradski sovet​ i estos de el Kolel, ke sovre esto era ke i sus ijos li davan kechas por ke non si okopara fin a este grado, ma era           sus pensarios, ke li kavzavan a okoparse en esto, ke eyos esto non lo saviyan, i ke manko tambien era ke non lo podiya azerlo, anke ke ya era i ke aziya la ikonomiya,

2053              Biografia de Sr. Refael A. Arié.                 1893

Kon el etcho de soldado de su ijo el Sr. Josef, ke en este anio ya lo meraron, foe ke lo tomaron por pioner i ke deviya de sirvir 3 anios, i esto por ke era de la koatrena klas, ke por pioneres los tomavan solo a estos de echkola, i a el kavo de este anio ke ya los rekojeron el lo kijo de irse a Rustchuk, para servir, ke el lo topo de mas mijor el estar mas lechos de sus parientes, saviendo ke en ansi servisios se pasan komo estos apretos i al menos sus parientes ke non lo veyan, i koando el ya partio ya si kere entendido ke restimos todos mui sikiliyados, ma el era ke si foe mui gustozo, el en el primer anio servio komo a prost^[16], soldado, i ya era ke las utchenias (exersisios) si los enbeza mui presto, i de esto ya era ke i era mui kichto de sus komandires, i tambien ke los sentiya a todos los komandos de kada uno, i al sigundo anio ke ya era la lei por el ken keriya dar egzamen por ser mlatchi, ke deviya de entrar en sus echkolas ke ya las teniya eyos, en el polk, foe ke lo demando esto i lo resivieron i en esto kontinuo algo de tiempo i en su tiempo el si aparo por dar el examen i reucho, a pasarlo kon el punto, de mlatchi unter ofiser, i kon esto en el treser anio ya foe mui kontente i lo pasava tambien i boeno de non teniya lavor ni menos i las utchenias ke esto era mui foerte, i sus parientes eran mui atagantados anke ke el ya lis eskriviya en kada sigundo diya kartas i de letche i miel, ma el travava muntcho mal, i en sus kartas era siempre ke eskrivia ke estava mui boeno pasando el tuvo ke siempre lo yamavan en una kaza de un Djidio ke estava siempre koando tomava las

2054              Biografia de Sr. Refael A. Arié.                 1893

otpuskas^[17] seya en los Chabatiod komo i en los moadim, i lo meravan komo a sus ijos, en todo el tiempo de los 3 anios ke el estuvo en Rustchuk foe solo una vez ke el vino a Samokov, i esto foe por pokos Diyas, ma ya estava boeno por el menester de su djep-hachlik^[18] li mandava el padre a 30 fr. el mez, i esto ya li era mui bastante, i al treser anio ke ya era ke iva a salir su korespondensia ke tenia kon su padre era lo todo ke el non iva a vinir a Samokov, por avrir algun etcho, i a el padre era i ke li eskriviya siempre por ke i el era la edeya de abandonarlo a Samokov, i rekojeron todos seya en Rustchuk or en Sofia, i esto por el presipio non lo pudo azer ma ya foe ke mas tadre ya lo izo,

En el anio de 5654, era ke i su ijo el sigundo Sr. Izak ya aviya eskaparlo la tresera klasa en la Gemnazia de Samokov, i de esta klasa ke ya resiviyan en la Echkola de pedagoji ke avia en Kiostendil, lo izo ke lo mando a kiotendil i se entro en esta Echkola kon la entision ke podiera salir profesor ke esto en este tiempo si demandava muntcho ke mankavan muntcho los profeseres i tambien i ke ya eran mui bien pagados era ke foe kontinuando, i se tomo por koartir en una kaza de un djidio ke komiya i dormiya i lo lavavan i lo kudiavan por una tchika paga a el mez ke su Sr. Padre li mandava a 60 fr. a el mez i kon esto ya era ke pagava el koartir i tambien

2055              Biografia de Sr. Refael A. Arié.                 1894

li abastava por sus tchikos gastes i estos de i merkarse livres i algunas otras kozas por el menester de la echkola lo todo si entiende ke i el tambien aziya i las ikonomiyas, i ansi el lo kontinuo esto de la Echkola todos los 3 anios, siempre tambien el ya paso los kursos i en su tiempo el tomo tambien i su depluma ande foera rekonosido komo profesor, ke esto li valio mui muntcho por el etcho de el askerlik ke serviyan solo a 2 mezes en el anio en el tiempo de las vakansas, el si viniya a Samokov en mientres los tres anios ke estuvo, por el tiempo de las vakansas, i en este tiempo el estudiava i en franses ke esto li era tambien mui promorozo, aparte de los estudios era i ke tomava tambien liksiones i de el violon (keman) ke esto lo supo mui bien djugarlo lo todo kon notas por ke era i esto uvligado de enbezarse, i de esto era ke dava tambien i egzamen, en todo el tiempo ke el estuvo en Kiostendil foe mui sano i boeno, i kon mui muntcha kerensia el se iva antes de su tiempo, solo ke en el un anio ke todos los elevos si revoltaron i tuvieron i ke harvaron a algunos de los profesores por las deferensias, de los kursos, i liksiones, i por viya de la polis ke si tomaron las mizuras foe ke si foeron todos los elevos, i se sero la echkola i mas tadre ke, los i djuzgaron foe ke a muntchos mas non los resivieron en la echkola, ke entre todos foe tambien i Sr. Jzak djuzgado ma ya foe ke el si defendio por esto ke el foe forsado de los otros elevos i ansi ke foe delebrado i en este tiempo ya foe ke si entro i ke foe resivido komo ke non foe kulpozo, i kontinuo en sus estudios fin a el kavo

2056              Biografia de Sr. Refael A. Arié.                 1894

El sus negosios era ke los kontinoava, solo ke li foeron muntcho mas tchikos por deferentes razones, i de esto era ke se iva i apretando i tambien iva endo flako de la salud, porke era ke teniya mas grande la gaile, sovre todo esto de los ijos ke los tenia a el grande en el askerlik i a el sigundo en los estudios i era el menester tambien ke los kodiara, i estuviera a el koriente por todos los menesteres para eyos, i tambien sostener i la kaza ma ya era ke alkansava por lo todo, i respondiya a todos, en mui boena regla, ke ya si entiende ke li arivavan i algunas momentos de apretos, a el i le kalia ke kudiara i por los ijos i ijas ke las teniya en kaza por ke i eyos tambien kontinoavan todos las Echkolas, i era el menester i de sostenerlos, en este tiempo el buchko por ipitekiar la kaza, ke los enteresos ya eran mas baratos i por mas longo tiempo, i esto de Samokov era mas foerte, para azerlo

En el anio de 5655, ke el governo lis avrio kreditos a todos los kazalinos de la Zemledenska Banka, lo todo enfrentante a el bien ke enpatronava kada uno, i kon un entereso de 6% a el anio, i esto foe por ke uvo kechas de estos ultimos sovre esto ke los bankeros los estavan muntcho exploatando, kon unos enteresos mui karos, i lo izieron ke i ketaron sus personas por los kazales i los ivan kanderiando por ke non tomaran mas moneda de los bankeros i ke

2057              Biografia de Sr. Refael A. Arié.                 1895

lis dicheron kon koalos era ke teniyan kontos ke la polis los iva kondenar i tambien i ke lis iva a azerlis boltar atras lo demaziya de enteresos ke lis tuvieron tomado mas de 12 %, sovre esto uvieron a algunos de estos ke los dieron a el djuzgo, i los kondenaron i ansi foe ke en estos tiempos era ni ke ni lis podiya reklamar los devitos ke deviyan ni menos ke si i podiya darle de moevo anke sovre 12% ma mas tadre ya foe ke vino un djuzgador ke keriya ganar i buchkava ansi klientes, ande los enbezava la manera ke se deviyan de komportar, kon ke era ke si li pagava un sierto % de las suma ke el los kondenava a los devdores i esto se konvino i Sr. Refaelatche i los iva dandoles a todos estos ke non keriyan kon las boenas pagar or konvenirsen, i kon esto foe ke el los dyo kaje a todos a el djuzgo i el el Dayan los iva kondenandolos sin ke los dechava nada avlar, solo ke li kaliya ke prezentara sus polisas en regla esto ke ya lo teniya es ke tomava los ispolnitelen listes i devista los dava a el pristav, kon esto el lis tomava de muntchos de koalos las tarlas i de koalos el bien ke lis topava, foe kaje en el anio entero ke si okopava en esto, i tambien era ke iva i buchkando de ir vindiendo i algunos de sus mulkes ke teniya i kon esto era ke se estava prontando por abandonarlo a Samokov, lo todo ke i li kaliya ke li i salieran i los ijos el ya era kontente de esto ke iva reuchendo seya en el kovramiento de sus averes komo i esto ke ya estava topando i a vender de sus mulkes kon unos mijor presios i de esto era ke iva i gastando i siempre estava gustozo i respondiya a lo todo i tambien el sigun

2058              Biografia de Sr. Refael A. Arié.                 1895

ditcho ke buchkava de ipotekiar la kaza ke i esto tambien lo izo, i por tomar la moneda ke tadre algo foe ke tuvo pasensia i ke era i por azer alguna merkansia kon emplear algunos artikolos a Kostan sigun ke i esto ya lo izo, sigun eskrito mas adelantre,

En kaza era ke lo pasavamos lo todo sigun de los otros anios, seja mozotros los ombres komo i las mujeres, i eyas era ke siempre eran djuntas seya por vijitar komo i por estarsen en kaza, i lis viniyan tambien sus hanendes ke las aziyan areir, eyas por en el enverano se enbevisijan lo mas muntcho en las goertas,

En el anio de 5656, se foe a Kostan i el izo algunos empleos de yensos ke los lavoravan en Brusa, i tambien merko partida de kalasados de los kafafes^[19] de kostan komo sapatos lavrados de sus manera i modos de los eskarpines i ansi i otros lo todo ke era mui baratos, ansi tambien merko i algunas samaras, i los modos del los lavrados ke sierven por las achugares, i ansi mas tambien algunas kozas, i esto lo trucho a Samokov i se lo resento en su butika i era ke lo iva vendiendolo kon sus mui boenos presios, i otras de los merkaderes, ke lo vian ke estava boeno viniendo foeron i de eyos tambien trucheron de estos artikolos ma ya foe ke trucheron muntchos de eyos i la plasa de Samokov ke non reyevava foe ke mas ya non uvo dingun konto, por asigondar, i mas non trucho, solo ke lo

2059              Biografia de Sr. Refael A. Arié.                 1895

ke li aviya kedado, lo vendyo kon unos presios mas konvenivles, i partida de los yensos i algunas de estos lavrados los yevo a kaza i ansi foe dezbarasado de esto,

El de koando estuvo en Kostan tuvo avlado kon algunos seya de los kasabim or seya de los echpikolantes ke merkan los boeyes engudrados, por degoyarlos en Kostan, i sovre esto eyos kedaron de i akordo, por mandarle i Sr. Refaelatche de estos ke saliyan en Samokov i kalkulandose ke los presios, ya eran boenos en Kostan el lo izo ke merko una partida de estos seya ke los traivan a el pazar or seya ke los foe merkandolos de los kazales i koando ya los adjusto, komo de 75 a 80 pedasos el merko un pasto, por ke pasiyaran i en mezmo tiempo tambien ke lis dava el salvado i el yulaf, en kada tadre ke kon esto en un enterval de 2 mezes ya si engodran i koando ya estuvieron prontos non los pudo mandar a Kostan ke el gaste era mui grande, i ke non konveniya visto a loke ya si estavan i vindiendo, en Samokov ke viniyan los merkaderes de Sofia i de Filibe i los etuvieron merkandoles kon muntcho mas mijor presios i ansi lo izo ke los iva, vendiendolos en Samokov, ke de esto foe ke ya tuvo algo de ganansias, solo ke este ofisio era mui ponivle [penivle] mas muntcho ke si li foiyan siempre los mosos, i el apsto [pasto]^[20] ke non si topava ande el lo kariya,

En este anio foe ke si salio Sr. Behoratche de la kaza de el padre ke la razon ya lo eskrivi en la partida de Sr. Mochonatche i el ke ya teniya en kaza kamaretas demaziya por ke non estavan sus ijos, i li dyo 2 kamaretas en el primer etaje i 2 kamaretas

2060              Biografia de Sr. Refael A. Arié.                 1896

en el sigundo etaje i aparte su kozina por si i todos los otros i menesteres de una kaza i el ke si paso era i ke li pagava su kira i kada uno se governava por si sin dingunas mleskatinas, el salon ke ya estava vierto, era ke todos los 3 vizinos lo mas de las notches viniyamos en un lugar i pasavamos mui boenos i mui kontentes, a el lo vijitavan siempre sus parientes, i mos rekojiyamos todos en un lugar i lo pasavamos seya en los Chabatod komo i en los Moadim,

Sr. Refaelatche ke ya lo konosiya el etcho de los produktos por los soldados ke ya lo teniya etcho i otra una ves, foe i en este anio ke si izo Haver kon Sr. Mochonatche J, Arié kon sus kondisiones ke si tomaron por eskrito, i lo tomaron esto de dar a los Voinikes^[21] abastisimiento de el zelentchuk,^[22] i el kolonial i lo izieron a el nombre de Sr. Refaelatche por razon ke eyos eran soditos i non resiviyan podratchikis de ajenos i eyos ke ya lo tomaron kon unos presios mui konvenivles foe ke lis ivan abastisiendoles i en esto eyos tuvieron tambien mui boenos profitos i pagar ke ya foeron pagandoles en mui boena regola si toparon mui kontentes,

En el anio de 5657, ke su ijo Sr. josef ya si li adjustaron los 3 anios de la soldaderia el se vino a Sofia, i denpoes ke el estuvo unos koantos diyas el si topo un enpeigo en la Banka de los S-res Markov & Petkov, komo eskrivano i por el presipio ke le

2061              Biografia de Sr. Refael A. Arié.                 1897

ivan a pagarla sovre a 60 fr. a el mez, i de esto el estuvo muntcho kontente i gustoso, i antes de entrarse el se vino a Samokov, i estuvo komo una semana, i partio por Sofia a tomar su posto, ke i el Padre tambien ya estuvo kontente de esto, el ke estuvo sirviendo en esta banka, komo a 3 mezes i ke ya estuvieron kontentes de el, lo nomenaron komo magaziner en la kojarska fabrika^[23] kon 120 fr. de paga a el mez, ke esta fabrika la admenestravan estos S-res anke ke era kon aksiones, i estuvo komo a 3 anios kontinoando en esto i alkanso una paga de a 200 fr. a el mez aparte ke el ya teniya i algunas benefikasiones i aziya tambien i algunos i otros negosios tambien ke ganava, en las adjuntas ke las teniyan el sovet, en kada semana era tambien i el uno de eyos por el enkamenamiento de la fabrika, i ke i lo sentiyan sus konsejos, i ansi era ke en el li tuvieron muntcha la konfiensa i kapatche ke ya era mas de loke si poede esperar, era ke de el si enselavan muntcha djente por ke kamenava kon el paiton de la fabrika ke estava a su dezpozision, i mas tadre ke esto el lo supo foe ke viniya ala sevdad a pie,

Ansi foe ke i en este mizmo anio tambien salio i su ijo el sigundo Sr. Jzak, de la Echkola de Kiostendil de la Pedagoji i ke tomo tambien su deploma, de profesor, se vino i el tambien a Samokov, i siendo ke el kaliya ke i estuviera en alguna Echkola para ke podiera servir solo los 2 mezes a el anio de soldado, i en Selestra ke si demando por la Echkola de los Djidios un profesor salido, de la pedagoji, se konvino por 1200 fr. de paga a el anio i kon ke i

2062              Biografia de Sr. Refael A. Arié.                 1897

le ivan a darle aparte i su koartir, i el ke ya estuvo kontente partio por Silistra i lis resento de moevo una Echkola kon ke lis i dava tanbien liksiones i de el franses, i ansi era ke estavan mui muntcho kontentes la komonita i era mui kichto i lo onoravan mui muntcho el lis izo dar de la Aliansa jsraelid fe [de] Paris a 300 fr. a el anio por ajuda para los proves, el lo mas muntcho estava en las kazas de los notavles de Selistra, sovre todo era en la kaza de el prezedente de la komonite Sr. Eliyatche, ke estava kaje en kada notche seya por el komer komo i por el durmir, i el ke ya foe mui muntcho i ikonomiozo era ke avansava, de la paga, i de tanto ke lis era kichto es i oi ke lo onoran i de esto foe le vino i a tomarse mujer de Silistra i en el tiempo de las vakansas el komo profeser si foe por sirvir los 2 mezes, i esto kon ke i li tomaron por eskrito ke deve de ser profesor 5 anios, ande foesa ke si mizmo en el koatron anio non es profesor es uvligado de sirvir los 2 anios i ansi foe i ke lo izo i se izo eskrivir en Silistra i estuvo en Silistra los 4 anios i el un anio en Sofia,

En este anio la espozo a su ija M. Simha kon Sr. Mordocho N. Avdala, i el espozorio se izo kon muntcho saltanat, i sigun de todos los uzos de akel tiempo,

En el anio de 5658, Refaelatche si foe a Kostan

2063              Biografia de Sr. Refael A. Arié.                 1898

i en este tiempo el buchko por vender el magazen ke lo teniyamos i kon estar unos koantos mezes el ya topo a un merkader ke era Endirne li i lo trato por 1500 liras, i mas tadre koando ya estuvo pronto mi foe i yo tambien a kostan por darle el takrir, i denpoes Sr. Refaelatche se vino deretcho a Sofia i resento una butika por vender azeite i ansi otras kozas de pokos artikolos, i sin avrirla se vino a Samokov, por resentar algo de sus etchos de Samokov i tambien ke en este anio el izo la boda de su ija M. Simha ke ya estava espozada, kon Sr. Mordoche Nisin Avdala, de Samokov, kon muntcho kef, i la novia ke ya es mui savida i nekotchira i ke ya yevo tambien muntcha achugar, i 100 napoliones de kontado foeron de todas las 2 partes mui kontentes i biven mui aunados seya eyos komo i en kaza kon toda su djente, eya pario fin a este tiempo 2 ijas Buka i Sara, i mas tadre pario tambien i un ijo Nisim, su marido estava en la butika de su padre ke eran merkaderes de los primeros en Samokov, en kaza biven mui aunados, i se respektan muntcho de los unos a los otros,

Su ijo Sr. Josef ke estava en Sofia vino i el para la boda i el ke estava ainda sin kazar foe ke mi mando ami komo kazamentero por ke la demandara a M. Laureta ija de Sr. Mochonatche J. Arie por ke si la diera por novia, i siendo ke non foe su kismet, el lo izo ke si foe a Lom ande su papu Sr. Leon B. Jshak por ke li topara una novia i el li tomo a M. Emili ija de el Sr. Uziel Haim de Vidin i se konvinieron ke li iva a darle 100 napoliones de kontado i achugar a su onor, i poko timpo pasando izieron tambien i la boda i

2064              Biografia de Sr. Refael A. Arié.                 1898

vinieron tambien i Sr. Aslan su Papu i Sr. Bukos Alkalai de Rustchuk kon su mujer, i izimos el karchi en Sipotch i en la primera notche los abachimos ala novia kon los konsfoegras en moestra kaza i en akeya notche kombedimos a todos los parientes i amigos a komer, i lo izimos kon muntcho saltanat, ansi de mizmo se izo i en la boda entera, i denpoes de la boda el novio si foe a Sofia a su etcho en dechando en samokov seya ala novia komo tambien i a todos los konsfogros i depoes ke ya partieron todos pasando komo 2 semanas ke ya si tomo kaza en Sofia vino a Samokov i se yevo a su novia a Sofia en la kaza ke ya la aviya resentado i bivieron mui kontentes ansi tambien i la djente de la novia partieron mui kontentes,

El ke ya estava en la fabrika mui kontente foe i en este tiempo ke i se lo yevo tambien i a su ermano mas Tchiko Sr. Avraam komo su pomochtnik^[24], i li Pagava a 50 fr. a el mez i estava en su kaza, lo todo era por ke estuviera mas leviano su Sr. Radre en Samokov i tambien ke ya si estava i prontandese por irse i el tambien a Sofia visto ke sus ijos ya estuvieron en Sofia,

Sr. Refaelatche foe denpoes de esto ke non tomo dingun etcho en Samokov, el era solo ke buchkava a vender algunos de los tchaires i butikas ke no las podiya detenerlas,

En el anio de 5659, si foe tambien i Sr. Refaelatche

2065              Biografia de Sr. Refael A. Arié.                 1899

a Sofia, ke esto ya foe sigun ditcho de antes ke el deretcho de koando bolto de Kostan ke se foe a Sofia, i el resento su magazen de los artikolos lo enportante ke foe la azeite i le metio el nombre de el magazen MAGAZIN GHIERID,^[25] el adjunto i chavones, i denpoes todos i los artikolos de bakalik, i lo povliko en las gazetas i kon esto foe ke tuvo muntchos klientes, ke por los presipios el las venditas ke aziya li eran mui tchikas ma diya kada diya ke si li foeron engrandisiendo, aziya de venditas fin a 700 i 800 fr. a el diya, i esto era solo en detalio, i lo todo en kontante, todos sus artikolos ke los vendiya eran ke si los komandava de la Evropa, i lo todo los merkava por kontante, era lo enportante de las venditas esto de la azeite i el kahve, i los tchaes, i el sukaro, ansi ke era mui gustozo, ke lo esperavan sus muchteris antes ke avriera el magazen, i el su konto li era de la maniana fin ala medio diya la kantedad de suma ke vendiya era igoal a esta de denpoes de la medio diya, fin ala tadre, en su magazen non aviya estankar de los muchteris, ke ya eran dekontino el magazen lo avriyan en kada diya la maniana ala ora 5 i lo seravan la tadre la ora 10 ke esto era seya por el enverano komo i por en el envierno, el estava asentado en la kacha resiviendo la moneda i tomava notas de todos los artikolos ke vendiya, ke i se yevava konto por kada artikolo aparte, MAGAZINNA KNIGA^[26], i sus 2 ijos kon un moso era ke serviyan a los klientes, de esta forma el estuvo en Sofia solo i sin familia 1 1/2 anio i en la kaza de su ijo Sr. Josef, sin tomar dinguna parte en los gastes, i su familia eran en Samokov, i les mandava

2066              Biografia de Sr. Refael A. Arié.                 1899

el menester por sus gastes, el si viniya en los moadim, a samokov i en algunos de los praznikis^[27] ke eran de a 3 i 4 dias, ansi foe ke el foe el primer de el linaje de H. Tchelebi, ke si levanto de Samokov i denpoes de el en un enterval de 4-5 anios foe ke mos venimos toda la Familia Arie de Samokov, en restando solo una Familia ke es Sr. Jshak R. Arie, de le linaje de Hr. Josef, i ansi foe sigun ke ya lo meldaron ke en el anio de 5553, se vino el Sr. Avraam I. de Vidin a Samokov i en el anio de 5663, salimos todos de Samokov, los vinientos de el Sr. Avraam I. i esto los mas muntchos mos estabelisimos en la sevdad de Sofia, kere dizir ke estuvo la Familia Arie komo 110 anios en Samokov, i de esto ke vinimos todos de abandonar Samokov, en mui poko tiempo, ya mi kale dizir ke es una kaza mui koriozo NO? ke i esto, tambien kale dizir ke es solo la union i ermanedad i el abrasamiento, ke la tuvo esta familia fin agora i de non toparsen lechos de los unos a los otros, mi kale dizir ke la natur lo trae en esto ansi ke i por endelantre el DIO kijera foera ansi, anke ke en la vida ya es natoral ke deven de arivar, las deferensias las litigas i otras, ma i kale tomar en mano sigun i de loke si governaron moestros padres antes de mozotros ke non se lo enraegaron fin a el kavo las kozas ke lis pasavan sigun ke ya las meldaron i por lo todo davan i de pasadas, i ansi el korason resta siempre limpio komo si djuzga i kon el korason limpio, i kon esto siempre enreina la union,

En este anio li nasio a Sr. Josef un ijo i lo yamo Chemoel ke lo izo boda grande i en el birkad mila tuvo mozika i yamo

2067              Biografia de Sr. Refael A. Arié.                 1899

a todas sus parientes ke estavan en Sofia i tambien a sus amigos, i estuvo tambien i su S-ra madre de Samokov, ke foeron eyos los Sandakos, i su madre lo kreo i lo kudio,

En el anio de 5660-61, el ke ya estuvo mui bien resentado en su etcho de le magazen lo izo ke si yevo a su familia a Sofia i se tomo kaza aparte i moro en la kaza de Sr. Josef Madjar, ke el si trucho partida de su mobilia de Samokov i lo restan lo metio en una kamareta, de la kaza de Samokov, i eyos mui kontentes biviyan en Sofia, i la kaza de Samokov la alkelo kon una tchika kira a Sr. Presiado Avdala, i su ijo Sr. Avraam ke kontinoava la echkola de Samokov, resto en Samokov alos kudios de mozotros i estava en mi kaza fin ke eskapo la klasa,

En este anio la espozo a su ija M. Rebeka, kon Sr. Nisim B. Rouben, i le dyo 50 napoliones de kontado i achugar a su onor ke i en este anio tambien izieron i la boda, i la boda se izo kon muntcho saltanat i gusto, i de todas las 2 partes foeron mui kontentes sovre todo era ke Sr. Josefatche padre de el Novio si gustava mui muntcho de esto ke tomo noera de la familia Arie, ke koando pario era ke si asentava propio Sr. josefatche a konar ala kreyatura, biven mui kontentes i son de la mijor pozision en todos los puntos eyos son patrones de 2 grandes kazas ande toman ariva de 25000 fr. de revinido

2068              Biografia de Sr. Refael A. Arié.                 1900

Sr. Josef ke estava en la kojarska fabrika^[28] komo empeigado en este anio el mas ya non si kijo estarse, i esto seya por ke el tuvo algunas deferensias kon el derektor de la fabrika or seya ke el etcho non lis estava boeno kamenando, ke el admenestrador, ke foe un tiempo Sr. Dobri Petkov, ya si pasavan boenos ma ke mas tadre los ivan muntcho trokandolos, era ke non ivan de akordo i ansi foe ke el estuvo algo de tiempo en vazio, i era ke li ayudava en la butika de el padre, i Sr. Jsak, se vino a Sofia i foe komo profesor en la Echkola de los djidios, kon una paga de 900 fr. a el anio i esto non li pagavan en regla, ansi era ke i en el anio de 5661, la butika le iva andando i engrandisiendose su merkansia, eyos avrieron i un klon^[29] a este magazin Ghirid, en utch bunar, i era ke vindiyan los mizmos artikolos i en eya si asento Sr. josef, ma siendo ke non foe el etcho, sigun de esta de Sofia la seraron i aziya ke merkava koeros lavorados i los vendiya a los kondradjis, i Sr. Jzak ke mas non kijo ser profesor se empeigo en el magazen de Sr. Meser komo kachero, i resiviya a 100 fr. de paga a el mez, todos lo pasavan mui kontentes, i los gastes ke los aziyan eran igoal a estos i ke los gastavan en Samokov la kaza ande estavan ke ya lis foe tchika tomaron por todos kaza en Nichka ulisa i biviyan todos en una kaza,

2069

Asta aki si eskapa la partida de Sr.

Refaelatche A. Arié djunto kon sus ijos

fin a el anio de 5660-61.