צ'. יהודה ואברהם, והסניורים מושונצ'ה, דויצ'ונצ'ה, נעימצ'ה, שמואלצ'ה ואני צ'לבי בזמן שהיינו שותפים.

1321  Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche.   1867

ke entregolis devijan de kontarles la metad de la suma i por la otra metad denpoes de 2 semanas, i esto kon ke todas las kondisiones ke foeron el menester ke ja las izieron, ke tinijan tambien sovre el entregamiento de los fieros aparte ke devijan ser boenos era ke i ja
tenijan nombrado koalos maadenes devijan de entregar en Samokov, i koalos en Pazardjik, ke lo mas foeron etchas las kondisiones en favor de los maadendjis, i de todas las 2 partes ke ja estuvieron mui bien kontentes si afermaron los kontratos, i enpesaron a entregar, los
fieros seja estos ke ja los tenijan de mas antes komo tambien i estos ke ivan lavorando, i la koenta ke avijan etcho, era, ke kada maaden ke lis iva a poder entregarles de 1200 a 1500 kantares, i esta suma lo kalkularon ke ja la ivan a poderla vender, i sovre ejo se tomaron
a 2 satidjis, (vendidores) ke era Molla Jonuz, i Suleman AA ke los koalos ivan en kada semana a pazardjik, i el uno de ejos denpoes de el pazar seja ke si estava en pazardjik or se iva a las sivdades deredor de pazardjik por rekavdos i en mizmo tiempo tambien i azer algunas venditas, i el presio ke lo fiksaron foe de 180 gr. el kantar, ke es las 60 okas, i en la primera semana la suma de fieros ke resivieron foe de 1200 kantares, i las venditas foeron solo 300 kantares ke de esta tchika vendita lis vino algo de jelor, ma ejos non si deskorajaron  i kamenaron adelantre, ke por enfrentante los maadendjis, ke ja tenijan moneda, i ke sus fieros ja estan vindidos, enpesaron a dar mas grandes foersas para lavorar, i ketar koanto era posivle a mas muntcho bien, i ansi foe ke de semana en semana los entregamientos

1322 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche.   1867

foeron siempre engrandisiendosen, i por enfrentante las venditas entchekisiendosen, por razon ke los nalbures ke eran los klientes de los fieros, enpesaron a echpekulijar, i azersin traer de los fieros de la Europa, aun kon todo ke era defindido, ma non era kon lei el non traer, solo ke era los kaimakames i los mutesarifes, por koando si lis konjoravan por ansi ke traivan algunos kon dizir ke iva a kavzar danio a la endustria de moestro estado era ke los jamavan a estos i los akavidavan por ke non foeran kavzantes de traer el danio a la moestra endostria, i kon esto era ke los sentijan i tambien ke i se espantavan, i en este tiempo ke la lebertad ja foe para todos mui grande anke ke lo todo lo izieron ma non kijeron nada sintir, i dizijan ke era de los fieros de la Bosna ke estavan traendo ke i la
Bosna era Turkija, i esto era lo mas muntcho ke kavzava las mankuras de las venditas por ke los fieros de la evropa i estos de la Bosna lis konvenija a venderlos, ainda mas barato de los presios ke lo merkaron en Samokov, de a 150 gr, i esto kavzo a ke si foeran intchendo
los depozitos seja de Pazardjik komo tambien i los de Samokov, i el kalkulo ke lo izieron ke loke ivan a poder lavorar ke iva a ser de 1200 a 1500 kantares por maaden foe ke lavoraron todos ariva de a 2000 kantares, i visto ke non estuvieron pudiendo azer venditas foe ke lo abacharon el presio a 160 gr, ma tambien foe ke non pudieron vender i de esta manera lo foeron abachandolo fin a 150 gr, i ivan endo, por todas las sevdades seja deredor de filibe komo tanbien i de Iderne, i sin merar el presio, i darle fijado por los tiempos ke

1323 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1867

demandavan, ma siendo ke la suma ke si avia rekojido ja era grande i siempre ke ivan i entregando, non avija eskapasion, i mas muntcho ke moneda tambien era ke non estavan abastisiendo, i de ande prevalersen mas ja non estavan topando, ke de todos ja si lis entcho, las sumas bien redondas, i ansi era ke los apretos ke travavamos eran mui grandes i tambien ke las piedritas ainda mas grandes, i de esto non tenijan la gana de ver nada, fin a ke enpesaron a merar los moldes de bozdejar los kontratos, ma los maadendjis eran mui foertes i non si kontentavan en nada, uvo unos tiempos ke [non] los podimos azer los pagamientos, i los unos non avlavan nada ma los mas muntchos, era ke gritavan i amenazavan, i mozotros non tenijamos nada koalo avlarles otro ke era ir dechando pasar, kon la entesion ke podra boltar, ma foe siempre mas negro, i a los kavos koando mas ja non si pudo, la dedjision ke tomaron foe de ir a Sofia i rogarle a el motesarif ke era Aziz Pacha, i una persona mui bonatcha, i rogarle kon darle a entender, todo el etcho i ke merara el molde de delebrarlos, i arazgar los kontratos, porke non era koza ke lo ivan a poder somportarlo, i ansi foe ke sin tadrar, partio Tch. Jeuda por Sofia, i denpoes ke ja
topo kon el Pacha i ke li djo a entender todo el menester, i diziendole ke esto es el primer anio ke ainda avijan sigun el kontrato i otros 2 anios, i en el primer anio ke ja si lis rekojo esta suma i ke non estan podiendo responder, va a ser de estroir ona kaza de 100 anios, i li dicho ke debaldes non lo iva a kerer, i li djo 50 liras rogandole por ke si las resiva i ke venga a Samokov, foe ke ala ora

1324 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1867

li dicho el Pacha ke por su Hatir, ja viene a Samokov, i bichka por konvinirlos ma non era tanto siguro, i a la manianan si vinieron djuntos a Samokov, i los jamo a todos los maadendjis i los rogo, por ke non foeran kavzantes, de traer la roina a una ansi familia, i tambien ke koando ja non poeden mas, resivirvos non podech, tener nada lo ke azerlis, otro ke lo boeno era de konvinirlo en una manera, ke seiga por todas las 2 partes boeno, i ansi foe ke el Pacha lo topo por deretcho, por toda la suma ke ja lis devijan por ke si la pagaran, i por las sumas de fieros ke tenijan fin a akel dija ke si los resiviera, i ke si razgaran los kontratos, i ansi foe ke avista lo tomaron en nota las sumas de los fieros ke los tenijan i se meraron los kontos de las sumas de moneda ke lis devijan, i se endevdaron de moevo por unos tiempos mas largos, i razgaron los kontratos, i denpoes li izieron un daavet a el Pacha, kon ke konbedaron i a todos los maadendjis, i de esta manera foe ke si podieron delebrar de ansi un etcho ke non podieron reuchir, ke denpoes era, ke enpesaron a buchkar de ir vindiendolos los fieros, ke tenijan i non uvo a ken non ivan dando, i lo todo a fijado i por tiempo mui largos, i en los presios de fin a 90 gr. el kantar, ke las sumas ke las tuvieron en los depozitos foe de ariva de 15,000 kantares, i el kalkulo de las piedritas foeron de ariva de 1.200,000 gr.

En este anio Tch. Avraam se izo un brachov, (kutchi) de un kavajo, i lo izo azer en Samokov i se merko tambien i un grande kavajo ke lo jamavan tungar ma non pudo ser por un kavajo, ke mas

1325 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1867

tadre ke non pudo ser por un kavajo lo izo azer por 2 kavajos i se merko otro un kavajo, i la primera estrenadura foe ke antes de suvirse el, lo izo ke si lo demando el Mediko S-r. Andonake, i se foe a Sofia, i siendo ke eran mui amigos foe ke non lo kijo romperlo i se lo djo, ma koando si lo entrego foe ke si lo djo roto, ma non li avlo nada, i denpoes ke ja lo adovo era ke se iva a las vignas i a los maadenis, por ke era mui levjano,

            En este anio de 5628, S-r. Mochonatche, si foe a Kostan por poder merkar algunos intizamis, ke en su tiempo ke si vindijan i kon el ajudo de S-r. Kamonde, ke ja lo tengo eskrito sigun era de loke si podijan merkar, i ke kalija uvieran uno de los taudtchis ke eran rekonosidos de el governo, i merko, los beilikes de los departamentos de Sofia i de Vidin (Nich), i este ultimo lo merko, en hevra kon S-r. Haimatche Farhi, i tambien merko i el rusomat, ke es el dasio, de los pechkados, de el departamento de Vidin, i denpoes ke ja tomo, todos los ordenes, se vino i el a Samokov, i se metieron en el lavoro, i kon el beilik de Sofia ke era solo por moestro konto, era ke ivamos siempre el uno de nos a Sofia, por el enkamenamiento, i mi S-r, padre kon S-r. Refaelatche, si foeron a Kiostendil i Dubnisa, i fin ke li djo las enstruksiones, menesterozas estuvo i el tambien i denpoes resto S-r. Refaelatche en Dubnisa i el si vino a samokov, i Jo Tchelebi era siempre en Samokov, por ke era el kachero, i era de

1326 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1868

dija i de notche estando resiviendo moneda i apartandola por remeter kon kada pochta a los lugares ke era el menester, i S-r, Naimatche si foe a Nich, por merar el etcho de el beilik de Nich, kon ke tuvo tambien i S-r, Farhe a su personal, por su meted, i a S-r. Naimatche era Hr. Merkadutcho ke era el Rabino de la sivdad i en mizmo tiempo banker ke lo ajudava, i lo ivan enkamenandolo entre los 3 i a Vidin por el etcho de los resumates lo mandaron a H. Rabenutcho, i se asento en Vidin, ke estuvo el anio entero, i los resumates de las sivdades de el deredor de vidin las foe vindiendolas a los echpikolantes kon boenas ganansias, foe en este tiempo ke estuvo H. Rabenutcho en Vidin ke izo el espozorio, de S-r, Refaelatche, kon la M. Buhurutcha, Ija de el S-r, Leon B. Jshak de Lom Palanka, sigun ke ja lo van a meldar adelantre, i en estos beilikes i los resumatis uvieron grandes ganansias, i a los kavos por poder kortar los kontos kon el S-r. Farhi mos turo longo tiempo, i uvieron muntchas defekultades ke non amostrava los kontos en regla seja por ke non tenija los tefteres en regla or seja ke non kerija entregar, i a los kavos foe ke si lo konvinieron sin kontos i foe ke li tomaron el medio bezisten por 16000 gr, i kon esto si kortaron los kontos,

              En este anio, Mi S-r. Padre foe por la primera vez, ke estuvo en Kostan, i la ida foe por buchkar a dezbarasarse, de un tirk^[19] ke izieron, un anio antes de los fieros de el sumun, (dasio ke tomava el governo de los maadenes en 8 uno de los fieros ke lavoravan) i esto ke era una suma bien grande, porke foe los fieros de 3

1327 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1868

anios ke si vindieron de una, i en este tiempo de la merkida, ja eran los presios, sigun el koriente de la plasa, i ke si estavan i buchkandosen tambien, ma por la aprovasion de este merkida kalia ke foera de Kostan i esto ke pasaron otros 3 anios i los presios ke ja trokaron i el fiero ke ja si farojejo, es ke li kalio ke foera por, ke si abandonara esta primera vendita, i estuvo en Kostan komo 3 mezes, i el vijaje lo izo por vija de rustchuk lo todo por tomarle de el Vali Pacha algunas rekomendasiones por Kostan, i kon la ajuda de S-r. Kamondo tambien, lo konvinieron porke lo resiviera en top hane, estos fieros en el presio ke lis kosto i kon azerlo entrada i salida komo ke vindieron i ke lo merkaron i siendo ansi non tuvieron dingun danio, i en todo su estar en Kostan lo mas muntcho lo kombedavan en la kaza de S-r. Kamondo, ke komija i dormija muntchos dijas, i en este anio ke Tch. Bohoratche, Kamondo la kazo a su ija kon el ijo de Tch. Nisim Alfasa, i entre los kombedados ke uvieron foe tambien i mi S-r. Padre kombedado, i esto foe kon bilietos de prima gala, i de koala manera devijan de estarsen vistidos, i el vistido ke devija de vistir era de redingot i pantalos de kazmir fino i preto, i  la jeleska kon la gravata i las maneras todos blanko, i el ke non lo tenia ansi vistido li kalio ke si lo merkara i li kosto 500 fr. i mos kontava el grande saltanat ke lo izieron, i el kontado ke li djo foe, 20,000 liras, i a este konto tambien i la achugar, i los presentes ke non kere ditcho ke ja foeron de modos de djojas i otras ansi las mas rikas kozas, i sovre el presente ke li devija de darle el esfoegro,

1328 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1868

a la Novija, uvieron muntchos debates, i konsultas, koalo era ke podija ser meresiente, porke si li dava en birlantes or en dijamantes i ansi de koalas otras piedras presiozas koalo foesa eja lo tiene todo, i foe sus ditchision ke koza de merdjan lo terna mas poko i ke ja le iva ser agradavle i merko un par de urijales de merdjan, por el presio de 3500 fr. ke non valijan este presio ma ansi li kalio por ke komo eran mas baratas non era onor para S-r. Kamondo, i tambien ke estas son las okasiones ke profitan los djojeros, i mas mos kontava ke S-r, Kamondo tenija tambien Midrach en su kaza ke aparta, de loke meldavan, entre la semana, 10 hahamim ke eran todos pagados, era tambien ke dizijan i dija de Chabad i la Tefila, i mi S-r. Padre sigun ditcho ke ja estava tambien en sus kaza, foe ke en una maniana de Chabad, foe sintiendo gritar, a Tchelebi Avraam kamondo en el koredor serka de la eskalera, (bech, on echekler,) i esto unas koantas, vezes i mi S-r. padre ke lo sentjo, lo izo ke salio por ver loke era ke kerija i los mosos ke estavan abacho biviendo sus kahves koal de letche i koal de tchikolata, li dize S-r. Kamondo na ke kero ir a dizir Tefila i non ai ken mi detenga el kuchak para atarmelo, i por alkansar la tefila, i el ke kijo detenersilo non lo resivio i li kalio ke abachara abacho i ke los jamara ke ja eran en kaza 10 i 12 mosos, i se iva araviandose, i los gritava ma non avija ken ke li respondiera, nada, i de ansi kozas ja kontava muntchas ma non si poeden eskrivir, la keila ke tenija en kaza era mui ermoza,

               Sigun ke ja lo saven la kaza ke si frago foe en

1329 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 5628

este anio ke si eskapo i tambien ke i se paso, en eja i era en Chavuod, i de kostan el merko, todo el menester seja jevaduras i rahtesi djames^[20] i mas todo akejo ke era el menester komo tambien i algo de mobilija, i koando si salio de la kaza vieja, ke si la vendjo tambien a S-r. Behoratche, por 22,000 gr. ke esto ke lo kerija S-r. Davidtchonatche merkarla, i ke si i aravjo tambien por esto ke non si la djo a el ma mi S-r, Padre lo topo mas de djusto de darsela a S-r. Behoratche, a razon ke li dicho, mozotros ke ja bivimos en un kortijo tantos anios, i ke pasimos boenos, i agora ke va entrar otro, no va aser kavzante, poede ser ke non pasaremos boenos i mose poede bozdejar el repozo de la vida entera, i esto ke lo tomo en mano es ke si la djo a el, i en el dija ke mos salimos todos mos abrasimos i mos bezimos, i tambien jorimos de todas las 2 partes, i esta kaza estuvo serada longo tiempo, fin ke si aparto su ijo el S-r. Mochonatche i se paso en eja ke biven i fin oi,

               En este anio lis nasieron a los S-res Mochonatche una ija Sultana, i a Davidtchonatche, un ijo, Jom Tov, i a Naimatche, una ija Sara, i kon todas ejas si lis izo lo mizmo de todas las paridas, i todas foe ke sus madres las krejaron, i todas las paridas, foeron mui sanas i boenas, i en sus tiempos de sus edad todos frekontaron las echkolas, i todos foeron enbezaron las linguas seja de el djudezmo komo tambien i de el franses i bulgar i en sus tiempos tambien, kazaron kon sus boenos kontados i achogares, i la M. Soltana, kazo kon S-r. Mordutcho, ishak Tatcher, i S-r. Jom-Tov, kon M. Rachel

1330 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 5628

ija de S-r. Chelomo Tatcher, i a M. Sara kon S-r. Chnur en Kostan, ke todos biven mui boenos i kontentes, i todos parieron i Ijos i Ijas as, solo ke por dezgrasia el S-r, Mordutcho, marido de la M, Sultana ke morio en el banio de apoplexi^[21], i biven la M. Sultana kon sus kreaturas en la kaza de su esfoegro, ke la kudijan i la protejan boeno

                Tchelebi Avraam foe en este anio ke li merko, los 2 tersios de el maaden ke lo tenija latif AA en kiostendja ke era el jokari maaden, kon sus vignas, i todos los adavates^[22], i de mizmo i el koru (balkan) i esto tambien los 2 tersios, i esta merkida la izo por su konto partikular de su moneda ke el ja la tenija aparte de la hevra, i el S-r. de latif AA ke lo kijo ke el etcho se merara torna en su kaza, i lo metio mi S-r. Padre a S-r. Behoratche su jerno i el Latif AA lo metio a su molla Abdurahman, i era los 2 ke lo enkamenavan, i los dezbolsos los azijan kada uno su % ma siendo ke el Latif AA non pudo abastiser el menester de la moneda ke era el menester i lo izieron kondision ke li devija de abastiser Tch. Avraam kon ke li devija de pagar un enteres, de 10 % a el anio, i esto ke lo kontinuaron ma a el Latif AA non li abastisija las ganansias por ke li podieran tapar sus gastes, i era ke siempre iva kedando devdor, porke i era tambien i mui bividor de raki, i en las kondisiones ke lo izieron foe ke en el dija de Chabad S-r, Behoratche non iva a lavorar, i por enfrentante, i el molla Abdurahman ke non iva a lavorar en el dija de viernes, i los fieros ke los ketavan era ke los vendijan en pazardjik vija de otros satidjis i non de los ke ja tenijan ejos, i mas

1331 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 5628

Tadre ke el Latif AA non pudo sostenerlo li kalio ke lo vindiera, i el un tersio ke li avija kedado, i lo merkaron de la hevra, i mi S-r. padre lo metio i sus 2 tersios a la hevra, djunto kon el balkan ke este balkan tenija grande koru, i se servijan por los kimores para todos los otros maadenis, i Latif AA ke non tuvo otro maaden era ke koando kerija irse en kampanija li davan las javes de la una kule ke el la kerija i se estava kon semanas, anke ke estava mobelijada, non lis enportava, prima ke ejos ja tenijan muntchas otras i segunda por azerle bien por ke el Latif AA era una mui boena persona, i era, ke siempre li azijan plazeres, i tambien li enprestavan i moneda sin dingunos enteresos,

                En este anio tambien foe ke Tch. Avraam lo kazo a S-r Refaelatche, sigun ke ja saven ke estava espozado kon la Ija de S-r. Leon B. Jshak de Lom i mos foemos por konsfoegros de Samokov para traer a la novija, S-r. Davidtchonatche, i jo, Tchelebi i S-r. Behoratche mi konijado, i S-r. Jeudatche B. Manoah, i por moso a S-r. Jshak B. Chembov, todos djuntos partimos de Samokov, kon muntchos kantares i mos prontaron muntcha komanija i biviendas, i dulsuras, por el vijaje ke era largo, i a todos mos metieron rozas telijadas kon varak, i la primera notche dormimos en el kazal de Lozna, i en el tchiflik de Hadji Bekir AA, i en mizmo tiempo lo angajimos por i en la boelta para dormir en el, i a la manijana ke partimos foe ke non entrimos en Sofija otro ke pasimos por el kenar, i dormimos en el duruk^[23] de kodja balkan, i a la otra notche en Berkovisa, i mos abachimos

1332 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 5628

en la kaza de H. Tchelebon Machalla, i lo pasimos mui muntcho bien de mizmo loke angajimos en lozna foe tambien i en Berkovisa en esta mizma kaza por i a la boelta ke mos resiviera, i ke foe tambien i pagado, i de mizmo ke partimos i a la manijana i por Lom foe ke koando ja arivimos komo una ora serka de lom i en un kazaliko topimos, a los konsfoegros i a muntchos i otro amigos ke mos estavan esperando, i denpoes ke ja las izimos todas las topaduras, mos adulsaron i denpoes, mos dieron i a komer, i foe ke merkaron el vino de la mejane de el kazaliko, i ejos ke mos dieron tambien a bever de esta vino, ke era NESAH, Taref, mozotros ke non uzavamos a bever de los vinos Trefa foe ke lis refozimos ke sovre esto ejos si avregonsaron, ma i ejos ja lo bivieron, ke a nos de esto non mosi enporto, i denpoes i de esto foe ke partimos todos djuntos kon muntchos paitones ke ja mos trucheron, i mos resivieron en sus propia kaza, i en akeja notche uvieron muntchos kombedados, i la kaza ke ja era mui boena i ke tenija tambien i mui ermoza vista, ke era enfrente de la tuna, ke entre los muntchos kantadores ke uvieron estuvo tambien i S-r, Presjado de H. Acher Farhe de vidin ke el koal era una persona mui ermozo kantador i mui djembuchli, i en este tiempo vino tambien i la Novia mui bien vistida, i mos bezo a todos las manos, i en el dija de el Chabad ke ja estuvo la achugar enkolgada, vinieron todos los djidios de lom kon sus mujeres a vijitar la achugar, ke foe una achugar mui alavada i mui rika sovre todo la blankerija, ke esto por las partes non avija, ansi tambien i las vistimientas ke las izo todo en Viena,

1333 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 5628

i el kontado ke li djo foe 200 dukados minsas, i en el dija de alhad se izo el presijado, ke tambien uvieron muntchos kombedados, i en este dija jo kon S-r. Davidtchonatche mos foemos a Vidin por topar kon el Pacha ke era Aziz Pacha, ma non estuvo, i lo topimos a Raif efende ke era el tefterder i su remplasante i kon foe ke eskapimos el etcho ke era por unas havales i el rusumat, i lo todo lo areglemos i mos vinimos a lom a la maniana, i en este tiempo foe ke los kompanieros moestros ke enpakaron la achugar i la mandaron de antes a samokov, i estuvimos en Lom 8 dijas, i en kada notche venijan a kantar i bailar los amigos ke eran todos kombedados, i lo pasimos mui alegre i estovimos mui bien kontentes de todas las 2 partes, ke mos izieron mui grande onor, i en dija de viernes partimos de lom i vinimos a Berkovisa i mos abachimos en la kasa de mizmo de H. Tchelebon Machalla ke el koal tambien mos resivio kon grande onor i lo pasimos mui bien i a la notche de alhad ke vamos a dizir la AVDALA, i S-r. Jeudatche B. Manoah ke tenija ermoza boz i tambien mui alta, foe ke mos kanto la Avdala, kon el vazo de el vino ke lo avijan aparijado, solo ke uvo un jero ke sigun el mizmo vazo avijana, aprontado i otro ansi vazo de era de senam iki^[24], por el uno de la kaza ke li ivan a darle por purga i s-r. Jeudatche en lugar de tomar el vazo de el vino lo tomo, el vazo de el senam iki, i denpoes ke ja la dicho la avdala foe ke si lo bevio el vazo entero, i esto mas tadre ke li enpeso a azerle efeto, foe entonses ke lo vieron ke era el jero ke se izo, i de esto si sekilijaron mui muntcho en kaza ma ejos dinguno non lo kulparon,

1334 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 5628

i en estando en Berkovisa ejos los konsfoegros avlaron en serado kon entision ke kerijan foera enkolgada la achugar tambien i en Samokov, i ke kerijan estarsen antes de los kiduchim, 7 a 8 dijas ke sus entision foe solo, porke en Berkovisa foeron mui maravijados ke komo poede ser ke los Aries vaigan a lom por tomar novia kale seja ke el novio es or hazino or alguna otra koza, ke esto lo sintieron dizir, ke ejos kerijan ver a la djente ande es loke iva a ir i tambien i a el novio, ke lo sintieron ke el novio non urinava regular, i koando ja lo sopimos ke era esto la rason ja si lis izo saver, ke non ai nada de esto, i ke esten mui siguros en todos los puntos ma era el Tio Hako ke non si kontentava, ma non foe sintido, i koando ja foeron konvensidos porke non kerijan partir de Berkovisa, i partimos ke arivimos torna a el duruk, de kodja balkan, i a la otra notche en Lozan en el tchiflik de Hadji Bekir aa i dija de martes ke ja vinimos mas temprano en la vigna de Rudech, ke foe el karchi ke vinieron samokov entero, i el Tchalgi ke era la trupa de Vasilake mui alavado Tchalgi mos resivieron kon mui grande saltanat, i denpoes ke adulsaron a todos los konsfoegros i a todos los enkontrantes, partimos por samokov mui bien resentados seja los kavajeros komo tambien i los paitones ke eran muntchos i el tchalgi ke ja era siempre kantando, todos salijan en sus poertas por vermos pasar, i mos abachimos en la kaza de Tch. Jeuda ke foe de grande gala i uvieron mui muntchos kombedados, i los konsfoegros mui kontentes i enkantados de todas estas onores era ke solo ivan chachijandosen, ke era por ejos parisiendoles, i se

1335 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 5628

ivan gustandosen, i a la manijana ke ja si dieron los KIDUCHIM, de mizmo kon gala, i los Kiduchim foeron en el KAAL, i koando ja vinimos en kaza de mizmo los ke vinieron foeron todos adulsados, i en la notche de la boda ke ja lo saven sigun lo azijan tambien foe i aki ansi, de mizmo se izo i en todos los 8 dijas de la boda seja en los dijas komo tambien i en las notches, i la kaza ke ja respondija para lo todo era sin kansar, loke se ivan kontentandosen, i el Tchalgi ke ja trucho muntchas moevas charkis era siempre kantandolas, i denpoes los ivamos jevando a los konsfoegros a todas las kampanijas i los lugares de los mijor pasatiempos, i tambien i a las kazas de los parientes i de todos los amigos i todos los parientes mos izieron los daavetis, kon muntchos kombedados, i tambien de las primas galas, i denpoes ke ja estuvieron 2-3 dijas los ombres ejos si foeron i kedaron las mujeres otros 15 dijas i ejas ke si foeron kaje avergonsadas, i mui kontentes de todas las 2 partes, i la novija ke ja es mui boena i ke mui presto ja si asamelo a toda la familija biven mui kontentes kon toda la familija, ansi de mizmo i kon su marido,

              En el anio de 5629 li nasio a Tch. Avraam un IJO, i lo jamaron NURIEL, ke avija 16 anios ke non parija mi S-ra madre, eja si lo reselava mui muntcho de este prenijado, i anke ke ja si izo mui muntchas de las itchorijas por moverlo ma non li aprovetcho, eja de
tanto alegre ke era sigun ke ja lo meldaron mas antes foe en este

1336 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

prenijado ke eja mas non kijo saver de salir a dingun lugar i non resivija tambien i a dinguno otro ke eja si enkachava sola en una kamareta i estava dijas enteros jorando, i eja ke era godra  i mui sana foe en este tiempo ke dija kada dija iva estando hazina, i se iva i siempre aflakandose, i koando ja si li aserkaron los dijas por parir, i ke foe tanto espantada, era ke siempre tenija serka a eja a 2 mojeres, ke la akompanijavan i le ivan kontandole las mil kozas ma eja non kerija nada sentir, era ke solo una kajades, sin eja nada avlar, i koando ja si asento a parir ke ja li vinieron unas 2 komadres, eja se izo jamar i a el mediko andonake ke estuviera en la otra kamareta ansi tambien a su Padre Tch. Jeuda i mozotros todos ke ja estavamos, anke tuvo algo de las dolores de las paridas ma ja foeron mui pokas i pario mui kolai, ke lo todo era kon jorar, i tapandose la kara, i non kere ditcho ke todas las mujeres de la familia entera ja estavan, i ke eja ja estuvo mui boena li kijeron azerli kama alta i en mizmo tiempo adonarla i kon los brozlados ke los metijan el tiempo ma eja non kijo nada solo ke una kama en bacho li izieron i estuvo los 8 dijas i en este tiempo la sivdad entera la vijitaron i a todos eran resividos kon grande onor, i de mizmo lo izieron en el dija de el Birkad mila, ke kombedo a la sivdad entera, i mas tadre ja enpeso a estar mas alegre ma non komo antes i eja lo aletcho, i lo kudio, i el ke ja era mui repozado i mui bonatcho era ke todos li traivamos los modos de los djogetes i las konfeturias, i mos esperava, i se gustava mui muntcho i todos lo abrasavamos i lo bezavamos,

1337 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

las manijanas su madre lo kamenava, por las goertas, i los kortijos i se lo jevava ande su Papu Tch. Jeuda ke lo amava muntcho, i koando ja foe mas grande ke ja supo avlar, i kamenar el si iva koriendo por los kortijos, i djugando era godro, i mui repozado i non jorava, ni ke avlava muntcho,
En este anio lo kazo S-r. Mochonatche a su Ijo S-r. Behoratche, kon M. Viniziu Ija de el S-r. Jshak G. Arie, i mas tadre lo kazo tambien i Tch. Jeuda a su Ijo el Tchiko, S-r. Chemoelatche, kon M, Beju, Ija de su ermano S-r, Mochonatche, i en la boda de el S-r. Mochonatche estuvo por Tchalgi la trupa de Vasilake, esta ke tiene estado en la boda de S-r. Refaelatche, i en la boda de el S-r. Chemoelatche estuvo la trupa de Miho, ke en todas las 2 bodas si izo sigun ke ja lo saven de estar la familia entera i a la sivdad entera kombedados i de mizmo todos los saltanates menesterozos todos ja si izieron, i las achukares^[25] i los kontados ke esto ja era komo una lei ke los davan a 5000 gr. ke non los pujavan ni menos ke los abachavan i las novijas todas las 2 ke ja eran boenas i mui savidas sovre todo la M. Venizju, ke era mui ermoza i kaje ke non avija otra entre la Familija komo a eja ermoza, i entelejentas i konosijan seja el franses komo tambien i el Djodezimo, i de la familija ke ja eran i non avija en koalo ke tomaran manijas moevas, i a todos respektavan i a sus maridos lo mizmo, i en estas bodas en las Hevrod ke dieron ke era el goevo i el raki kon un djinet encharopado aki uvo una demazija, ke dieron i a un koarto de dulse de narandja, i esta foe la ultima,

1338 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

hevra ke si djo en Samokov, i esto a razon, ke ja enpeso a kostar mui karo ke todos ke non podijan azer ansi gastes, ma era ke se ivan avregonsando, i tambien salio i pleitos a razon ke los parnasin i los Chamachim era ke bevijan a 2 tasas i tomavan i a 2 goebos, i estos ke si enboratchavan i ansi avijan i otros, i lo toparon de djusto por abandonarla i ansi foe ke lo izieron i vindieron todas las redomas, tasas de plata i los taeres ke eran de kovre ande metijan los goevos i ansi los pechkires i los saleros, i todo las otras kosas ke ja si kijo la moneda por el sostenimiento de la echkola, i de estas redomas i de las tasas de platas entre todos los merkadores foe ke i mi S-r. padre tambien merko la una redoma kon las 2 tasas de plata por el presio de 800 gr. anke ke non valija i esta redoma i las tasas las tengo jo Tchelebi fin oi, i lo mas grande partida de esta vendita ke si izo foe ke lo merko la Familija ARIE, mas tadre ke la S-ra Bulisa mujer de Tch. Jeuda ke era lo mas muntcho en la kaza de S-r. Chemoelatche, i M. Beju ke la kudijava mui muntcho, era ke siempre li dava presentes en djojas i de las antikas ke eja las tenija muntchas, porke ja li era i noera i inieta,

                 Jo Tchelebi era ke iva lo mas muntcho a Pazardjik, por vender los fieros i esto koando ja si rekojijan mas muntchos ke el satidji non los podija venderlos, i me iva kon kavajo i akompanijado de el satidji, ke era a los mijos komandos, lo todo ke se iva a azer seja en los maadenes komo tambien i en Pazardjik, i en la primera notche ke dormijamos seja en el maaden de Radoil or seja en Kiostandje

1339 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

li dava el orden por lo kargaran todo el fiero, ke avija en el maaden i ansi eskrivija i a los otros maadenes por ke lo izieran de mizmo, i lunes a la medio dija ke ja abachavamos en Pazardjik, era ke azija ketar todo el fiero ke estava en los depozitos ke era en el han de kurchumli han ke tenijamos moestros depozitos i kamareta para durmir i era moestro mulk, i en la mizma tadre ke ja estava todo resentado ke era a lo manko de 500 a 600 kantares i de los maadenes ke vinijan a la manijana otros 250 a 300 kantares todo era resentado en los kortijos, i los azija alempiar, i atar algunos kantares ke eran dezatados i ja mi afitava siempre, ke ja vinijan muchteris, i era, manijana de martes ke kortavamos el trato, i enpesar a bender, i en mierkoles de manijana ke ja si eskapava el pazar, i lo poko ke kedava ke algunos lo kerijan eskojerlos i jo ja los alesensijava lo koal ke otros esto non lo asijan i ke era jero, era ke jamava a los nalbures de pazardjik i kon un rebato de a 4-5 gr. por kantar era ke si vendija todo, i las venditas eran a algunas en kontante i lo mas muntcho a fijado, i denpoes rekojija de los averes, kavijan [ke avijan] de antes i esto ke rekoji de la vendita de los fieros i lo azija en grupo i se los mandava a Samokov djunto kon la nota de las venditas ke ize, i el satidji, partija por Samokov, i jo en akeja mizma tadre me iva a Filibe porke el pazar en Filibe era dija de djueves, i en Samokov koando resivijan mi karta de las venditas ke las ize se gustavan mui muntcho, de esto ke lo ivan i a saver, el konto de el magazen tambien i jo en filibe era ke vindija polisas por Viena i Kostan i la moneda

1340 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

ke tomava era ke la trokava por bechlikes i midjidies i tambien pagava a los tabakes de sahtijanes ke tomavamos de pazardjik, filibe, Haskiovi, Stenemaka, i Tchirpam, i ansi de todos los deredores i esto lo azija en el dija de Djueves, i a la manijana viernes era ke mi iva por los pavlikianes^[26] ke eran estos los nalbures los vindidores de los fieros i buchkava por venderles i tambien kovrarles ke kon todos ja tenijamos kontos aviertos, i toda suma ke rekojija era tambien ke la mandava a Samokov kon la pochta, i en una ves ke jo kedi mas tadre el dija de viernes, ke avija rekojido komo 25000 gr. de los koalos eran los 20,000 en oro i el restan en plata, i jo ke kiji decharlas en alguna de las odas de el han de Filibe ke ja tenijamos i kontos kon los S-res Eliezer Kalev, Jshak Albala, i eliezer Geron i ansi i otros, ma siendo ke ja era tadre i todos ja avijan serado, lo ize ke el oro mi lo detuve en el petcho i la moneda blanka^[27] la goadri en el han ande tenija mi kamareta, por mi, i esto por ke era Chabad, ke seraron mas temprano, i jo ke estava en la kamareta de mi han trokandome el vistido de Chabad, mi entra de la poerta el un IJO de H. Mochon Garte a kambedarme por ke mi vaiga Chabad en sus kaza, ke i otra vez tambien ja tengo estado en su kaza, i estos ja lo tengo eskrito ke ja foeron una ves Haverim de moestros padres en Filibe, i estos ke eran una djente seja el H. Mochon komo tambien i todos sus IJOS, mui alegres i savijan todos mui boeno kantar, i anke ke estavan algo deskaidos, ma ja se ivan pasando, i jo, por non estar solo goadri la plata, i el oro mi lo tomi kon mi i mi foe a sus kaza, i esta moneda

1341 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

de oro sigun ditcho ke era una suma de 20,000 gr, la tenija en una bulsika de djamfes^[28] maavi, i me la mezi [meti] en el petcho i mi foe a la kaza de el H. Mochon ke ja mi estavan esperando, i akeja notche de Chabad komimos i kantimos i mos etchimos, i ami mi dieron uno kamareta por mi solo, i la bolsa de la moneda mi la mezi [meti] a debacho de la kavesera, i mi dormi, i ala manijana mi tomi la bolsa, en el petcho i mos foemos a Tefila, a el KAAL i torna venimos en kaza, i dezajonimos, i denpoes foemos a visitar en algunas bodas ke avijan i a sus parientes, i de moevo boltimos en kaza i komimos, i denpoes jo mi foe a mi han ke era en kara olan hani ke tenija kamareta, i la moneda ke la avija dechado ja estava, en su lugar, i por la notche de alhad mi jamo torna ke mi foera en su kaza, ke me ivan a jevar a las mirendas ke avijan, i jo kon la bolsa en el petcho mi foe torna a su kaza, i denpoes ke ja komimos i bevimos, mos foemos por las mirendas i kedimos fin a denpoes de la medija notche, i koando ja venimos en kaza, sigun de la notche de antes jo mi meti torna la bolsa a debacho de la kavesera, i mi dormi sin ke mas mi senti nada, i a la maniana kon espertarmi beraber lo primero foe ke meti la mano a debacho de la kavesera por ver si estava la bolsa i jo ke non la topi, mi levanti dezmudo sigun ke estava i koriendo mi foe a dizirle a S-r. Garte ma el koal ja si avija ido i jo ke presto foe a buchkarlo i ke lo topi en la kavane, de kurchumli han ke estava afoera asentado kon otros amigos biviendo kahve kon la nargile, lo jami i li konti el paso i el riendose, mi dize kale seja ke non miri boeno, i djuntos ke

1342 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

mos foemos en kaza i denpoes de azer todas las buchkidas, i las demandas a todos los de la kaza lo todo foe una nula, i jo dezasperado de non saver koalo rijir, mi foe andi S-r. Elizurutcho Kalev, i li konti el paso entero, i el koal a vista los rekojo, a los S-res Geron i Albala, i a otros enfloentes, de la sivdad, i lo jamaron a S-r, Garte, por poder de una manera konvenirlo el etcho de la manera foesa ma tambien non pudieron nada reuchir, i jo ke lis iva endoles siempre, i de verme tanto dezasperado, mi jevaron ejos mizmo a la kaza de el S-r. Garte i mi azijan enkachar en los kazanes de los banios ke eran jenos de agua, i mui grandes, i en otros eskondedijos, i por los tejados, por ke jo buchkara, ma tambien non topimos nada, i denpoes mi izieron telegrafijar a mi S-r, Padre por ke i el viniera, i denpoes de 2-3 dijas ke ja vino, i kon las boenas anke buchko a konvenirlo i non uvo dingun remedio, fin ke li kalio ke si aderesara a el Pacha ke era Ata Bei, i li izo todo el menester seja ke lo amenazava i lo ensero tambien ma tambien a dingun presio en nada no entrava, i ansi foe ke estovimos kon mi S-r, Padre komo a un mes de tiempo, i siempre en kada notche estavamos en la kaza de S-r. Geron, ke mos metija unos mui boenos pransos, i de mui boenas komidas i siempre el ja tenija i a otros 6 7 musafires, i ejos en kaza ke ja eran 10-12 personas era ke el pranso de kada notche era de a 20 i 22 personas, i avija montchas notches ke dormijamos tambien en su kaza, i el koal tambien buchkava mui muntcho de poder alkansar por toparme, la bolsa, ma tambien non si pudo nada topar ke la verdad era ke el

1343 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1869

solo mi las jevo, solo ke non lo podimos konvenser, i siempre lo jamaron el de la bolsa, ke ansi se li troko su nombre,^[29] i koando ja paso este karar de tiempo i ke non izimos nada, mi dicho mi S-r. padre ke non avija mas por koalo restar, i ke non mi sikilijara, i mos vinimos a Samokov, i denpoes ke estuve unos koantos dijas en Samokov mi mandaron a moevo a Pazardjik i Filibe, por el mizmo etcho, i sin ke mi akavedavan de la manera ke devija komportar, solo ke jo lo azia ke nunka paras kon mi non las tenija i las mandava en el mizmo dija ke las enkasava, i esta manera kontinuava siempre,.

              En este anio de 5630, Tch, Jeuda iva endo dija kada dia^[30] mas flako, i se iva mui muntcho demodandose el kolor de su kara, i el ke era mui fursudo, era ke azija gairet para kamenar, ma a el mediko non li plazija amostrarse, sovre todo a el S-r, Andonake ke non tenija de el entodo sempatija kon el i otro tambien ke non avija foe ke su ermano i sus IJOS lo forsaron por ke kalija ke si amostrara, a el mediko, i en un dija ke si lo mandaron, i denpoes ke ja lo exameno li dicho por ke si kamenara unos koantos dijas en otra sivdad, i kon esto ke iva a trokar el aver iva aser ke podija estarse mas mijor i esto lo mando por ke iziera unos koantos banios en Djuma ke ja era la klima mas kaente, ke sin tadrar lo mandaron, i denpoes ke ja estuvo i se izo los banios tambien non li foe boeno i foe al kontrario ke lo aflako ainda mas muntcho, i se bolto a Samokov i pasando pokos,

1344 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

dijas si foe a Sofia, i se abacho en la kaza de su jerno S-r. Chelomo Tatcher, ke lo resivio kon muntcho plazer i li izieron grandes onores, mizmo ke non si pasavan tanto boenos, i denpoes ke estuvo i en Sofia unos koantos dijas tambien non pudo estar, ke si iva muntcho enervando, i se iva tambien i araviando por la mas tchika koza, i tambien se vino a Samokov, i siempre era ke iva estando mui abatido ke non tenija la gana de ver a dinguno, i de esto foe ke enpeso tambien i a non tener apatite de komer, i de tanto ke bivija seja de los rakis komo tambien i vinos i otros, ma non kijo de el entodo, i de mizmo kon el tutun, i en algunos dijas ke si vinija a penas a la oda, ke es sus kontoar, i entre las avlas ke uvo por esto de la oda (ke es ke la tenijan fragoado en el anio de 5619, i siendo ke de los mas aidados non ovo en este tiempo, dinguno en Samokov, era ke solo el S-r. Davidtchonatche ke estuvo i ansi foe ke non pudo aserla fragoar adetras de loke premija, i sovre todo ke lis keto un gaste de 140 mil groches ke esto para akel tiempo era mui muntcho,) i aparte, de esto, se iva araviando ke vija ke estavan eskriviendo seja kartas komo tambien i tefteres, i dizija loke va aser estas tantas kartas i tantos tefteres, i iva sudando ke si ketava la fes de su kavesa i le salija tambien i fumo de la kavesa, de la grande ravija, ke koando i lo vijan vinir ja rekojijan presto por ke non viera i ke non si araviara, ma era ke algunas vezes ke non lo vijan tambien si araviava, i siendo ke de esta manera foe kontinuando unas koantas vezes, foe, ke mi S-r. padre li dicho ke en este tiempo de agora non podia ser,

1345 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

sin eskrituras, i komo era ke iva a poder ser ke si podijan topar, los kontos kon kada uno ke esto non eran pokos, i entre estas avlas jo Tchelebi ke era el kachero, i la kacha era, a la ventana de la otra kamareta ande si asentava TCH. Jeuda, i el kapak de la kacha ke estava avierto para la ventana, i entre las avlas i algunas ravias, ke uvieron, kale seja ke a Tch. Jeuda si li aerempocho [arempocho] el kapak dela kacha i jo ke estava arientro de la kacha abokado tomando algunas paras, i a de una mi kajo el kapak, i mi djo en la frente, i esto foe i mas kavsa ke si arebivieron ainda mas las avlas, i litigas, i sus IJOS ke ja estavan enfastijados porke era i en kaza ke siempre se lis iva araviando, i de las muntchas avlas lis vino el etcho por espartirse mi S-r. Padre, kon ke kedaron de akordo de el mizmo dija por, enpesar a azer el enventar, i Tch. Jeuda ke ja si foe ejos ke kedaron foe ke lo renovaron sus dedjizion i kedaron de akordo por espartirse mi S-r. Padre djunto kon mi, i sin tadrar ejos a la maniana enpesaron en el lavoro, i lo izieron saver a todos sus bankeres i komisioneres i kon todos estos ke tenijan sus tratos, sovre sus dedjizion ke dieron por espartirsen, i de este dija mas non izieron dingunas operasiones otro ke kon todos ivan serando los kontos i siempre ivan rekojendo moneda, sin ke a dinguno remitijan anke ke lis devijan, i ansi foe ke si avija rekojido en la kacha una grande suma de moneda, i en un dija el S-r. Davidtchonatche, mi demando por ke li diera las javes de la kacha, en diziendome ke ejos ja avlaron, en sus kaza kon sus S-r. padre, porke mi las demandar, i jo li diche va bien i kale i

1346 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

kontar la moneda ke esto non abastava 6-7 dijas ke si avija rekojido fin a este tiempo serka 850,000 gr, en oro, i komo 900,000 gr, de bechlik i metalik i moneda echna [ejna]^[31], i otras ke si kerija i apartada i le diche tanbien ke kali ke lo sepa i mi S-r. padre i a la ora me dicho veremos, (foe en este dija ke mi dicho i amostrandome kon el dedo ke jo kale ke lo sienta a el porke es 10 anios mas grande demi) i jo ke si lo diche a mi S-r. Padre, i el mi dicho ke una vez ke ja ti demando en nombre de todos ejos, kontasela i entregala, i jo si lo diche a S-r. Davidtchonatche, por ke viniera para kontarsela ma no lo kijo en diziendome ke non ai agora este tiempo, i resto torna en mi la kacha, i ejos sin enfastijarsen era dijas enteros ke estavan siempre eskriviendo i reglando los kontos kon kada uno i uno, i de esta manera estuvieron ansi lavorando komo 2 mezes, i siendo ke a tch. Jeuda si li enfortisieron sus flakezas, fin a el grado ke li kalio ke goadrara la kama i esto ke li foe dija kada dija mas foerte foe ke lis kalio ke decharan las eskrituras, i li trucheron medikos de Filibe ke avija un renomado ma non li aprovetcho, ke su hazinura era lo mas muntcho ke non podija urinar, i esto era todo, ke li travavan la urina kon los siertos enstrumentos, i de esto era ke sufria mui muntcho i lo mas foe porke tuvo hazinura de la rija, ke dizijan a razon ke bivio muntcho los alkolikes en su manseves era ke si li kemo la rija,^[32] i esto li kavzava ala urina, i de esta manera, foe su riendo^[33], i sus Ijos era ke siempre lo ivan velandolo, ke el uno salia i el otro entrava, i el S-r. Davidtchonatche, ke era lo mizmo foe,

1347 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

ke kon su entision, ke 5-6 dijas non si apartava nunka de la kamareta ande estava etchado su padre, i esto foe ke lo izo de dija i de notche, i siempre era el ke lo iva sirviendolo por todo el menester i esta remarka ke ja la asijan todos ja lo esperavan ke era por azer se kerer ainda mas muntcho ande el padre i en un dija el lo konbemo [konbeno] ke serija, favoravle, komo si lo presentava a su Ijo, el S-r. Haim, kon dizirle ke lo iva a mandar a los estudios a Salonique, i ke lo bindichera, kon ke le iva i a bezarle la mano, i en este tiempo, aserli la demanda ke el la konbeno, i para esto el lo metio en la kamareta vizina de ande el padre estava etchado a un sierto Hr. Haim, ke el koal era el eskrivano de los Chetariod, i los prezentes ke los azijan los padres antes de sus moertes a alguno de sus Ijos, i esto ja abastava, kon prometer solo kon la boka i era el Haham eskrivano ke lo iva a dar de IDUD, i tambien todos los papeles de prometa el ja los izo prontar de mas antes, i el ke ja topo la okazion si lo metio a su Ijo el S-r. Haimatche, en su kama, i li rogo porke li dierala mano i ke lo bindichera, i su Papu esto li vino pezgadiko ma non li avlo nada i li djo la mano i lo bindicho, i en este tiempo li demando por ke li iziera a el aparte 100,000 gr. i ke Hr, Haim, ja lo pronto todo, ke esto sintiendo, Tch. Jeuda, anke ke sufrija ma torna el estuvo kon su sensija i sin avlarle si kon rio de una riza de dezdenio i kon la mano li amostro porke si saliera de delantre de el i foe de esto ke si li espertaron mas ainda algunas de las dolores i de esto ke ja lo supieron sus ermanos, sin ke li avlavan nada, era

1348 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

ke lo meraron en toda su vida kon estos ojos, de ver ke lo KEIDLO^[34] a azer una ansi demanda, sin dinguna razon, i S-r. Haimatche ke li kalio ke lo mandara foe ke lo akompanio el uno de los mosos Hain Aladjem, kon las kartas ke li djo de rekomendasion seja por el S-r. Jshak Tijano seja i por otros el ja estuvo 2 anio, i se enbezo las lingoas seja el Franses komo tambien i el Turko i grego i koando vino  a Samokov el kontinuo la echkola i se enbezo tambien i el Bulgar, i en Salonique era bien visto, ke en los Moadim i Chabatiod lo jamavan los amigos, i lo kudijavan,

              I Tch. Jeuda ke era en la kama, era siempre sufriendo i mas tadre el ja entro en las agonijas ke non si savija de si i li turo esto 15 a 20 dijas ke era sus djeretos^[35] muntcho estremesivles, i ansi foe ke en el dija de mierkoles 4 Kizlev, murio, ke todos lo jorimos, i la sivdad entera seja djidios komo tambien Turkos i krestianos todos lo joravan, i lo akompaniaron fin a el BED AKEVAROD, i todas las ultimas onores si li izieron, i se li goadro los 7 dijas de el limunio, i en kada tadre vinijan 10 hahamim i meldavan por la alma de el moerto, i dieron muntcha sedaka, i es verdad ke foe una grande piedrita non solo para su familia foe de mizmo i para la sevdad entera, ke el a todos lis asija plazer i los ajudava seja en matirial komo tambien i en moral, ke era una persona mui azidor de plazer i non si li enportava, de gastar, su fama foe mui grande i tuvo muntcha onor, en muntchas partes de el mundo, i su nombre ja era konosido en el mundo entero, i mi S-r. Padre kon todos a estos ke lis

1349 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

tokava el siete ke estavan asentados i ejos ke non podijan eskrivir era ami ke mi azijan eskrivir kartas, por todos los parientes i los amigos de las otras sivdades, i a todos estos kon ken tenijan etchos lis asija saver la moerte, i aparte lo povlikava en todas las gazetas ke salijan seja en Kostan Izmir, salonique, jeruchalaim, i Viena, por ke lo puvlikaran i en mizmo tiempo dava el avizo ke kada Haham ke etchava algunos artikolos seja en lachon akodech seja en ichpaniol ivan a ser todos pagados i tambien todas las gazetas tenijan el orden de resivir ansi koal artikolo foesa ke lo publikaran i ke ejos ja li ivan a pagar, i esto kontinuo el anio entero i ansi era ke en todas las gazetas, avijan puvlikados modos delos artikolos i alavando la grandeza de Tch. Jeuda, i en el kortamiento de los siete si dieron montchas mezas a komer a los menesterozos, i en mizmo tiempo era ke lis ivan i dandoles a punijados de moneda de Sedaka, i mientras ke estavan asentados en el siete lis isieron saver ke li avrieron el KEVER, de Tch. Jeuda, i pensando non seja ke si lo avijan jevado, ke en este anio uvo hazinura en los animales i los kristijanos kazalinos lo uzavan a rovarsen a los moertos ke eran serka enterados, i Djidios i de esto lis era por itchorija para ke non uviera mas mortaldad, i otra ke lis parisjo, ke los djidios enteran a los moertos kon muntchas djojas i muntcha moneda, i por tomarselas, i sin tadrar ke foemos a el cimetiério, ke estuve i jo tambien, i foe la verdad ke ja estava avierto, i estava jeno de agoa, i el poerpo ke lo izimos levantar, era ke ja estava entero sin ke foe nada tokado, i lo izimos de moevo

1350 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

taparlo i metieron a un goadrador porke non lo avrieran mas, i de tantas buchkedas ke si izieron nada non si pudo topar, i denpoes ke li goadraron i el mez entero i de mismo se izo i en el kortamiento, de el mez sigun de los siete, i denpoes ke ja enpesaron a salir, ala plasa, i algunas korespondensias ke avijan era ke ivan eskriviendo, ke la firma ke si enkamenava de antes era sigun ja Saven Jeuda i Avraam Arie, i S-r. Mochonatche ke era el korespondente, i afirmava, PP. de Jeuda i Avraam Arié, Moche, foe ke mi S-r. padre vido ke en una karta afirmo M. Jeuda Arié i en demandandole por koalo foe ke afirmo ansi li dicho, ke esta M, non si va a meldar Moche Jeuda Arié, otro ke Manoah Jeuda Arié i Tch. Avraam ke dicho, ke esto lo vach a poder afirmar, denpoes ke ja mos espartimos, i fin a este tiempo non si va azer dingun trokamiento, i ansi foe ke mas non afirmo S-r. Mochonatche, i ejos sigun ke ja estavan rekojendo i aziendo sus eskrituras, por azer el bilanso foe ke lo kontinuaron i lo eskaparon en ROCH HODECH ADAR, de este anio i sus ganansias foeron mui grandes loke si lis demostro, lo koal ke ejos non las esperavan, i lo ataron los kontos i mos kopimos todos a un bilanso a kada uno i todos los afirmimos kon azer tambien i algunas deklarasiones sovre el akordo de espartir i algunas kundisiones por el avenir, seja de algunos jeros de mas, or de manko, i algunos ulvidos i tambien i algunos solivantamientos de algunas deferensias de otros or mizmo de entre ejos, por lo todo lo izieron por eskrito i kondision, i denpoes si espartieron los mulkes de kada uno sigun de loke li kajo, i uvligandosen de darsen el takrir

1351 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

de los unos a los otros ke los mulkes ke tenijamos eran a los nombres de koal de nos foesa, ke esto non meravan, si es ke si lo izo a su nombre, ke el maaden de Radoil era a el nombre de S-r. Mochonatche i el Tchiflik de la bana kon el maaden de Orta en kiostandja era a el nombre de S-r, davidtchonatche i el Balkan i jokari maaden en kiostendja eran a el nombre mijo, i ansi era ke tenijan todos, i denpoes era ke mos ivamos dandomos los takrires koando lo kirijamos, i sin dingun refuzo era ke todos los davamos, ansi lo izieron i kon los
averes i las devdas, i en kada partida de kada uno ke si lis avrio en el mizmo bilanso era ke lis deklarava a kada uno loke li apartenia i kon la partida de Tch. Jeuda, se la espartieron entre los 4 ermanos ke son s-res Mochonatche, Davidtchonatch, Naimatche, i Chemoelatche, todos a igual %, i S-r. Chemoelatche ke non tenija parte en la Hevra
tomo solo la parte ke li revino dela partida de su padre, lo koal ke i a el tambien lo izieron afirmar en este mizmo bilanso, i denpoes ejos si espartieron loke enpatronava sus padre separato seja en kaza komo tambien i en la plasa, ke por esto ja lo van a meldar adelantre,
i kon esto foe ke se aparto mi s-r. padre, i jo tambien i restaron ejos los 4 ermanos fin a un sierto tiempo haverim sigun i de esto lo ja lo van a meldar tambien adelantre,

                 En este anio li nasio a S-r, davidtchonatche, un Ijo, i lo jamaron Eljakim, ke es este el ke si jama agora Lusien, i en este parto non se izo sigun de todos los otros a razon ke estavan en el anio de Tch. Jeuda, i su madre de mizmo sigun de los otros foe ke

1352 Biografia de Tch. Jeuda i Avraam i S-res Mochonatche, Davidtchonatche,i Jo Tchelebi i Naimatche. 1870

lo kreo, i lo kudio, es este el S-r. Losien ke salio doktor en la medisina, i bive en Kostan ke es el Chef de los medikos de el Ichpetal Franses en Kostan, i es mui bien visto i sovre todo ke es mui savido el eskapo sus estudios en la akademi de Paris, kon sus mui  boenas deplumas, solo ke por algunas deferensias i mal entindimientos ke tuvo kon su ermano i algunas i otras razones, foe ke se baftezo en la klisa katolika i se kazo kon la Ija de vitales pacha, ke ja tiene fin a este tiempo i 2 ijikas ke en sus partida ja van a meldar en mas largo algunas pasajes ke uvieron, bien enportantes,

1353                                                   ENERGIA BIVA

              Tchelebi Jeuda, anke ke ja lo meldaron de todas sus etchas mientres de su vida, demostra la grande bives, ke el tuvo, por saverse komportar, kon kada persona, en todas las okasiones i los tiempos, el ke era tanto kurajozo, i de una mui foerte energia, es loke si veé ke alkanso, la grande enfloensa, i la onor, ke so nombre es konosido kaje por el mundo entero, el non tuvo temor de dinguno, i los mas grandes personages, lo konsidiravan, el non foe de el presipio, una persona, mui rika, por ke si aremara a su rikeza, otro ke el se savija defender, kon su dulse avla ke el la tenija, i komportamiento, ke si demostrava, komo ke era protejado, de los prenses, el koando se iva a prezentar, en lugares altos sin ke si foera rekomandado non si prezentava, el en okazion si era el menester, i azija la gera de las mas foertes avlas ande los mas grandes personajes sin ke si espantara de dinguno, sovre todo ke en akejos tiempos, ke eran MUSTESNA, i kada uno ke lo vija kon ansi fortaleza, era ke si travavan de el i el pudo konvenser a muntchos, i los azija kondenarlos, por koando non lo sentijan, todo loke lavorava i en esto ke el si entremetija era lo todo kon la mas grande deretchedad, el non si kansava, de pedrer tiempo, i de sakrifikar moneda, por salir kon su ditcha, i alkansava a venir ensima de lo todo, era una persona mui pasensioza, i non si araviava, koando li davan las kontras, el koando viajava, si demudava de sus vistidos, para ke todos non lo konosieran el era savio en la lei djudio, i konosija mui bien el Lachon

1354                                                   ENERGIA BIVA

akodech, el muntchas vezes ke los hazanim de Samokov, li revejavan sigun ke ja lo saven ke foe el siempre ke governo todo el etcho de el kolel, lo azija ke suvija el a la teva i dezija la tefila seja en los Chabatiod komo tambien i en los moadim, porke ja savija, kijendo dizir ke non era persona ke era menesteroso de el otro, ke tan presto ke non li azijan ja era ke lo savija azerlo i el i ansi era en z todo modo de koza, el non si espantava de entrar en los mas grandes negosios, de mismo por esta razon ke ja los savija i el enkamenarlos koando tan presto, non topava, los personales, i el lavorava, sigun un mas tchiko lavorador koando era el menester, i non si avregonsava de dinguno, i tambien ke ja li permitijan i sus foersas, el non era orgojozo, i kon todos si azija ala una, en todas las okaziones, a el lo plazija mui muntcho el pasatiempo, i kantar, ke esto li kavsava, ke lo azija bever, el nasio en el anio de 5564, i morio, en el anio de 5630, kere dizir ke bivio komo 67 anios, i lo mas de los dijas de su vida los paso mui kontente, i foe sano

1355

Asta aki si eskapa, la partida de Tch. Jeuda i Avraam i S-res Mochonatche i Davidtchonatche, i jo Tchelebi i Naimatche, ke foemos haverim, fin a el anio de 5630, i ke si aparto Tch. Avraam kon mi Tchelebi  en restando solos los Ijos de Tch. Jeuda, por lavorar por sus kontos, ke si izieron Haverim,