קורותיהם של הסנ' בְּכוֹרָצֶ'ה־יצחק ג' ובנו סנ' ישועה

1910

De aki i endelantre el enpesa la partida de Sr.

Behoratche djuntos kon su ijo sr. Jechua,

1911   Biografia de Sr. Behoratche kon su ijo Sr. Jechua.   1894

En el anio de 5654, ke Sr. Mochonatche ja si salio de la butika foe kon esto ke repozo Sr. Behoratche i el si lo tomo a su ijo el tchiko Sr. Jechua a su butika, por ke si enpesara a enbezar de los etchos de su padre, ma es solo ke non esto bien savido si es ke li nombro, alguna suma por su kapetal, i ala vista es ke no li nombro nada, otro ke entre ejos lo izieron por kondision i esto ke si i dieron por eskrito de parte a parte, solo sovre los mulkes, ke li enprezento el un tersio de la kaza i los magazenes de Sofia, i de mizmo, de los magazenes de filibe, i esta de las 2 kazas ke tentjan en Samokov, ande ejos moravan, i ke los revenidos ke ivan a ser sujos kon ke non tenija de gastar or de tomar parte con [kon] el menester de el mantenimiento de la kaza, por todos ejos i esto ke iva a ser al konto de su Sr. Padre, i de los revenidos ke iva a tomar era ke iva a ser por amontonar, i ke si li aga kapetal solo ke por el menester de sus vistimientas ke se iva a gastar de estos revenidos, i tambien algunos tchikos gastes partikolar i de todas las 2 partes ke ja estuvieron kontentes ejos si metieron en sus lavoro de esto i ke mas antes ja lo lavoravan, lo todo de dar moneda kon entereso, i buchkar de ir kovrando los revenidos de los mulkes ke tenijan,

En este anio li nasio a Sr. Jechua una ija, i la jamaron Sara, ke estuvo la madre de la parida a el parto i se estuvo en Samokov serka de 2 mezes, i su madre la krejo i la aletcho, i esto lo mas muntcho a detras de los kudios de la Bu. Dudutcha, por ke la M. Eliza era ke non kudijava tanto por los etchos de la kaza, ke era

1912    Biografia de Sr. Behoratche kon su ijo Sr. Jechua.   1894

 por lo todo la Bu. Dudutcha ke respondija mizmo i para eja mizma era ke si i dechava servir, de su esfoegra i eja era ke kudjava por todos i todos los menesteres de la kaza,

En el anio de 5655, li nasio a Sr. Jechua la sigunda ija, i la Jamaron devora (jeta), de mizmo foe ke vino la madre de lom antes ke pariera i denpoes tambien vino i el padre, kon la entesion ke si era ke iva a parir ijo ke ivan a ser ejos los Sandakes, i kon este parto tambien foe etcho sigun de todos los otros, i su madre la krejo lo todo alos kudios de sus vava la Bu. Dudutcha, era ke la Bu, Dudutcha se reselava mui muntcho koando vinijan estos kon esfoegros por razon ke aparte de loke si dechavan muntcho servir era i ke davan tambien i kechas, i non endenijavan nada i se burlavan tambien por los gios de la kaza, a tiempo ke ejos eran mui flakos de todos los puntos, ke esto ja lo emplejan algunos parisiendoles ke de esta manera de komporto ke si podijan demostrar sus grandezas a tiempo ke ejos ja lo savijan en el grado ke estava, ma non lis avlavan nada i dechavan porke si kontentaran,

Sr. Mochonatche ke ja estuvo aparte era ke de ves en koanto lo vijitava en la butika a su Sr. padre i sus konversasion era ke si li akechava, su padre por los etchos ke non li estavan kamenando sigun de antes, i le respondija por ke non si konfejara por

1913   Biografia de Sr. Behoratche kon su ijo Sr. Jechua.  1895

entero ande Sr. Jechua por ke era mui adjami, ma ja era ke solo lo sentija i el de su saver nada non trokava,

Su ija la M. Donna ke estava bivda de su marido en Nich, i ke era kodijada de su esfoegro, i ke tenija su kaza aparte, eja li foe eskriviendole a su Sr. Padre por ke kudijara por eja ke su esfoegro ja non estava kiriendo darle mas el menester de su mantinimiento, kon dizirle por ke i el tambien non tenija, i ke non estava podiendo abasteser, i kon esto era ke su esfoegro kerija porke si foera eja ala kaza de el padre i ke alas krejaturas ja las tenija de detenerlas el i tambien kudijarlas, sovre ejo lo mandaron a sus moso el Sr. Josefatche Levi a Nich por ke li podiera darle a entender a el Sr. Kario su esfoegro i ke li iziera alguna suma de loke el lo tenija seja por sus inietos komo i tambien i por la M. Donna, i esto koza ke podran bivir, i ke si vengan a Samokov, ma el Sr. Kario non kijo ni sintirlo de todo esto ke li avlava, i ansi foe ke si bolto en vazio sin ke pudo nada areglar, sigun ja lo eskrivi mas antes ke la kavza de la moerte de el Sr. Jshakutcho foe solo de esto ke el lo kijo adonar la suka por esto ke iva aser Hatan-tora, i murio en la edad de 28 anios, lo todo kale dizir ke la persona ke si va a gustar por una koza es ke kale ke si pronte por otra djente, i entonses es ke topa el gusto, i ke si kontenta, viene a ser ke i el gusto tambien non tiene valor por si mizmo solo, ansi es ke si uno si merka un vistido ermozo i de grande valor, ke para gustarse ke ja lo enpatrona lo vemos ke si li visto por koando va estar entre la djente

1914   Biografia de Sr. Behoratche kon su ijo Sr. Jechua.   1895

 i non por koando esta solo en kaza,

En este anio de 5656, era la M. Donna ke i en este anio tambien le iva eskriviendole a su padre de esto ke eja sofria, en Nich, fin a el grado de non poder somportarlo, i Sr. Behoratche li mando de moevo a su ijo el Sr. Jechua por ke pudiera, reuchir a ke li iziera, una semanada, koala suma foesa, kon la entesion a ke si viniera la M. Donna a Samokov kon sus krejaturas, i ejos ke ja la ivan a resentarla, i el denpoes ke ja estuvo komo a 20 dijas en Nich foe ke apenas atcheto a dar una mui tchika semanada, i Sr, Jechua ke ja si vino a Samokov, foe ke non estuvo kontente de esto el Sr. Behoratche sovre ejo foe ke enpesaron a korespondijar kon eja si era ke si kerija kazarse i ke podijan buchkar algun marido konvenivle para eja i eja seja ke estava enfastijada de jevar mal or ke i se keria i kazarse, foe ke lis atcheto i le toparon a Sr. Moche Levi tambien de Nich, i se konvinieron kon ke li djo Sr. Behoratche 100 napoliones por kontado, i por kazarsen ejos si vinieron a Samokov, i se kazaron i foe ke por koando se iva a venir la M. Donna a Samokov, ke ja demando de su esfoegro por ke li pagara su ketuba, i alguna koza de presente ke ja se iva a irse ala kaza de su padre, foe ke en su mano non li djo nada, otro ke el Sr. Kario si kontento a detenerse a las 2 krejaturas en su kaza i el ke las iva a kudijar fin ke si azijan

1915   Biografia de Sr. Behoratche kon su ijo Sr. Jechua.    1896

grandes i ala ija ke la tenija el de kazarla komo a su propia ija i por el ijo por koando si azija majorente ke li tenija de darle 2 butikas, i esto kon ke si las paso de este tiempo a su nombre, i denpoes de esto eja si rekojo sus kozas todas ke eja las tenija en su kaza ke ja estava aparte, por vinirse a Samokov ke mientres de este tiempo eja foe endo mui flaka sin ke savijan por koalo era i koando i ja estuvo en Samokov i ke la meraron los medikos foe ke eja sofria de la maladija de chirit^[3], i esto en un enterval de 15-20 dijas ja li paso i estuvo Sana i boena, i sigun ditcho mas antes ke ejos koando si kazaron si foeron de moevo a Nich, ma siendo ke la moneda ke avia tomado ke ja si li eskapo mui presto i ke anke ja li tomo i otras 50 liras ma tambien non foe bastante i se vino a Samokov por demandarle otras 50 liras i kon las 50 de mas antes ke li tenija dado ke lo iziera lo todo en un bono i ke por el tiempo de un anio ke si las tenia de pagar i tambien ke si kerija i venir i a Samokov por azer algun etcho ma esto Sr. Behoratche ke non lo kijo ke si vinieran a Samokov li djo 30 napoliones i ke si foeran a Kiostendil i ke avriera una botika de bakalik i ke kiostendil ja era la vida mui barata, i esto ja lo izieron ma tambien non pudo estar longo tiempo i se vino a pazardjik. ke i para esto tambien era ke le iva enprestandole siempre algo de moneda, i lo foeron pasando i kon este marido non pario la M. donna, el troko unas koantas merkansias seja en Nich komo i en Kiostendil ansi i en Pazardjik, ejos si amam muntcho i biven mui aonados i todos los 2 son mui antchos de la natura i biven boenos,

1916   Biografia de Sr. Behoratche kon su ijo Sr. Jechua.   1896

            Ejos era ke anke meravan sus etchos ma era lo mas muntcho ke estavan okopados seja en el etcho de la M. Donna komo tambien i este de el Sr. Mordehajutcho, i era Sr. Jechua tambien ke iva a Sofia por reglar algunos etchos sujos i en este tiempo era i ke merava i por lo sujos, ma era ke non si antchavan,

En el anio de 5657, ke la M. Donna ja estuvo kazada i ke ja estavan en Nich, mui boenos era ke si gustava el Sr. Behoratche i tambien ke eja ja si jevo todo esto ke lo enpatronava en la kaza de el otro marido, ansi ke i eja ja tenija muntchos vistidos, i todo esto ke era el menester, i pasavan mui boenos i kontentes,

Sr. Jechua sigun ditcho ke el tenija el un tersio de los revenidos de los mulkes ke li enprezento el padre foe ke en este anio el ja pudo ikonomezar una suma de 4000 fr. i el li demando de su Sr. padre ke esta suma el la kerija darla tambien kon entereso a algunos merkaderes por su konto aparte i kon esto i el tambien alkansar por tener alguna koza de kapetal aparte, i esto li plazia muntcho a su Sr. Padre de esto ke ja estava kiriendo, buchkar de ganar i ke ja lo alesensio era ke los iva dando a kon li paresija de boeno i non tenija ke mleskava en la kacha de el padre, i era konto aparte i kon esto de sus merkansijas era ke lo kontinoavan ke i de esto tambien era ke i el ja tenija parte,

1917    Biografia de Sr. Behoratche kon su ijo Sr. Jechua.   1897

 Ejos anke ke Sr. Mochonatche ja estava aparte seja de la kaza komo i tambien i de el etcho torna kon todo era ke en kaza siempre estavan en un kavo, i Sr. Mochonatche se li iva kaje en kada notche ala kaza de el padre por ke pasara la ora i li kontava de todas las moevas ke el las sentija en la plasa, ansi era i la M. Tamarutcha tambien ke i eja ke ja kamenava siempre por las vizinas i ke li plazija tambien enbezarse las moevas de entre las mujeres ke esto eja ja lo savija demandarles i les kontava tambien i eja ke era de esta manera ke lo pasavan las notches, i si estavan fin a 3 la ora ala turka ke esto ja era tadre para akel tiempo, i denpoes se ivan en sus kazas por komer, por ke non era el uzo de vijitarsen por las notches por los vizinos i los amigos ke kada familia koando ja era de notche era ke si estavan en sus kazas kon sus poertas mui bien i seradas, solo era ke por las notches de los alhades i esto solo de el invierno ke se ivan a vijitar en los parientes i los amigos, i era lo mas muntcho fin a las oras 4 ke si estavan, i este era komo un ovligo ke kalija ke si vijitaran de los unos a los otros, ma mas tadre esto si foe aralando i era tambien i en las notches de los alhades komo a kada notche solo ke en okazion si avijan algunas bodas or musafires en algunas de las kasas de los parientes ke ivamos, i ansi era tambien i en los Chabatiod i los Moadim.

1918     Biografia de Sr. Behoratche kon su ijo Sr. Jechua.      1898

 En el anio de 5658, li nasio a Sr. Jechua un ijo i lo jamaron David, ke tambien vinieron de Lom el padre i la madre ke foeron los sandakes, i de mizmo lo izieron tambien sigun de todas i los otros partos, ma el ijo foe mui flako, i siempre estava hazino ke el mal ke tenija era ke non podija salir de el koerpo, i era mui kabis, anke ke li davan muntchas purgas ma era lo todo en baldes, i apenas era en 4 i 5 dijas una ves ke si porgava, i esto kon ke li ketavan la soziedad kon el dedo, i ansi foe ke loke pudo bivir foe 3 anios i murio, ke si sikilijaron mui muntcho, de esto ke non lo podieron sanarlo, ke los medikes non toparon el remedio,

Sr. Behoratche ke ja estuvo en mas alta edad era mui flako, i ansi era ke non salija muntcho ala plasa i non si okopava mas en el negosio, era ke denpoes de la medio dija komo estava el tiempo boeno se iva a el midrach ande meldavan los Hahamim i el ke ja savija tambien i boeno meldar pasava algo de tiempo en esto i tambien el si kamenava por su goerta ke ja la tenija boeno en kaza, i en los dijas ke eran de emplejar las komanias para la kaza era el ke salia ala plasa i azija los empleos djunto kon su moso krestijano ke lo tovo siempre en kaza ke el koal li amatava las kandelas de notche de Chabad, i li asendija las sobas, i otros hizmetis de kaza, el komo era mui flako, ansi era tambien i ke si jelava mui muntcho, i por los dijas de el enverano mizmo koando la temperatura de su kamareta li abachava a 14 grados azija traer lumbre en su kamareta i por kontra era la Bu. Dudutcha ke tenija la natura mui kaente, era ke non si

1919     Biografia de Sr. Behoratche kon su ijo Sr. Jechua.  1898

estava en esta kamareta, kon los vistidos ke el si vistija eran muntchos el uno ensima de el otro, ke enpesando de la kamiza fin a el kiordi ke lo jevava por el envierno eran komo ariva de 20 pedasos, i por el enverano eran kon 4 pedasos manko, por el presipio era la Bu. Dudutcha ke si los dava koando se iva a vistir, i mas tadre ke ja non lo pudo mas era sus 2 mosas ke si los davan koando el se iva a vistir i esto li kalija ke la kamareta estuviera mui kaente, el de koando ja foe en la edad de 20 anios mas ja non supo loke es kortarse sus kavejos de la kavesa, i era koando el tiempo estava mui kaente ke li kortavan algo de sus kavejos, i en este dija el non salia ansi foe i lavar en el banio ke non si lavo nunka i koando ja non lo podija ke ja li komijan la sodor el kirlilik, era ke li fregavan kon una espondja en seko, el kirlilik, i kon esto era ke repozava i li era komo a banio, lo todo por el enverano i koando era el tiempo, mui kaente, el tenija prontos 3 modos de vistidos por el dija apropiados, ke era por la maniana ke era el tiempo fresko, si vistija de el vistido mas godro, i por la medio dija el vistido mas delgado, i por las tadres ja era ke si trokava su palto en kiordi, de las samaras delgadas por el enverano i de samaras godras por el envierno, su vista ke era kurta el jevava unos entojos, de vista larga, por koando iva a kamenar, i otros entojos de vista mas kurta por meldar i por en kaza, el tambien jevava i dientes postizos, i koando komija era ke li azijan los dientes muntcho roido por ke los tenija flochos ke non los podija tenerlos apretados, i su mantinimiento foe kaje en la

1920    Biografia de Sr. Behoratche kon su ijo Sr. Jechua.    1898

 toda su vida, kon pojos i karne de bitela i esto era mui apoko ke komija, i era ke komija 4 i 5 vezes a el dija i esto komo a 100 gr. de koza el alos kavos foe su mantinimiento solo kon la letche jelada i kon una tchika revanadika de pan, el tutun lo fumava mui poko, li plazija muntcho vistirse de las samaras boenas

En el anio de 5659, el Sr. Jechua iva endo mui flako, i ansi era ke i iva estando i hazino, lo mas muntcho poede ser ke era porke non tenija dinguna okopasion, i era ke estava dijas enteros asentado, i meldando romansos, i algunos ansi otros livros, lo todo en franses, ke esto lo konose mui bien el a esta razon era i ke se levantava mui tadre, i restava en kaza fin poko antes de la medio dija aziendose su toalet, i pasando la ora kon su mujer i krejaturas i koando ja salija ala plasa, era ke non si okopava muntcho de los sujos negosios ke ejos los tenijan, ansi era tambien i ke non si okopava ni en algunos de los empleos por el menester de la kaza ke su Sra madre le mandava por ke iziera algunos de los empleos en tal ke non foera el Padre ma el non lo kerija, ke lo mas muntcho era tambien por esto i ke se le iva i akortandolo la vista, anke ke ja jevava a entojos ke de el presipio el ja tuvo la vista mas kurta, i koando el iva a meldar alguna koza li kalija ke si lo apegara mui serka alos ojos para ke podiera ver a meldar, i era solo de el un ojo ke podija

1921    Biografia de Sr. Behoratche kon su ijo Sr. Jechua.   1899

 algo ver, i esto de los entojos foe ke los medikos li dicheron por ke non si li akurtara ainda mas la vista ke li kalija los jevara, i de akel tiempo ke los kolaneja i de esto es ke resto en akeja vista el de parte de su estomago es mui flako, i el sujo mantinimiento es solo de las komidas mui levijanas, ke si mantiene ke el koando si arta ja li viene la dolor ke siempre li kale ke non este arto, i ke koma tambien a mui apoko, era ke esta manera lo iva kontinuando, i era siempre mui flako, i non tenija foersa,

foe en este tiempo ke el ja pudo ikonomezar, una suma de 6500 a 7000 fr. de los revinidos i de esto ke i el lo iva ganando aparte, i de esto era ke el padre si gustava mui muntcho, i siempre lo iva i akonsejandolo, por ke non gastara, kon dizirle ke ja lo estava viendo, ke de los etchos ke ejos los azijan era ke aparte de lo ke non estavan podiendo nada acansar [alkansar] era ke i estavan endo i en manko, i los gastes tambien ke los tenijan mas grandes de los otros anios, porke los negosios todos ja avijan trokado, i ke las saludes de todos los 2 ke non lis permetija, por lavorar en los etchos de este tiempo, ke ja avijan algunos etchos ma lis kalija ke vijajaran, i de esto era ke estavan lo mas muntcho asentados, i ejos ja lo vijan ke otros era en el tiempo de el enverano ke estavan siempre viajando por los kampos, i nada atras non dechavan,

1922     Biografia de Sr. Behoratche kon su ijo Sr. Jechua.    1900

En el anio de 5660-61, el Sr. Behoratche era ke se iva muntcho sekelejandose de esto ke su ijo el Sr. Jechua, iva endo flako i ke sufrija muntcho de el estomago, i en este tiempo ke era la expozision en Paris, i de Samokov ke ja avijan i otros komo a el mansevos ke ja se ivan a ir, lo demando de su Sr. Padre por ke lo alesensiara i a el tambien de irse djuntos kon ejos, i a esta okazion azerse tambien i merar de los medikos seja por esto de la vista komo i tambien de la dolor ke la iva tiniendo en el estomago, i su Sr. padre li dicho ke ja es mui boeno ke si vaiga ma es ke el no li podija nada ajudar para el gaste, i Sr. Jechua ke si kijo ir i ke ja tenija el avansado una sierta suma de moneda de sus ikonomijas, foe ke partieron todos djuntos, i denpoes ke ja estuvieron en Pariz komo 25 dijas, i ke ja la kamenaron lo enportante de paris i la exposision ke ja la vijitaron unas koantas veses, i el ke ja se izo i merar de algunos de los medikos en Paris, seja por la vista komo i tambien i por la dolor de el estomago, foe ke non tuvo dingun provetcho, i los gastes ke ja li foeron grandes, i sus kompanieros ke ja si vinieron, foe ke si vino i el tambien kon ejos i se abacho en viena, ke el si foe alos medikos de viena, i li dicheron por la dolor de el estomago ke si foera alos banios de Karles-bad, i el ke si foe i estuvo en estos banios komo 5 semanas, i koanto por la vista foe ke no lo podieron en nada ajudarlo, i viendose ke ja estuvo sano i boeno, se vino a Viena i vijito en la kaza de Sr. Math ruso i siendo ke non si djo a konoser por ken era i el ke kijo ke li demandaran foe por ke li dicheron si era ke kerija alguna koza foe ke el si avregonso,

1923     Biografia de Sr. Behoratche kon su ijo Sr. Jechua.    1900

i se salio de sus kontoar sin avlarles nada, este vijaje li turo serka de 3 mezes i li kosto 3000 fr. i siendo ke el ja estuvo kontente de este vijaje ke vido muntcho provetcho i mas ke non tuvo denguna dolor i kon la vista ke ja si uzo en esto pasa mui bien,

Ejos ke mos dicheron ke el vijaje lo ivan a azer por vija de jenev, i mi ijo Jean en este tiempo ke estava en Jenev, en sus estudios i mozotros por ke si gustara Jean li mandimos de kaza algunos dulses i dezajunos, ma siendo ke ejos lo boltaron el kamino foe ke non si lo jevo anke ke mozotros le ivamos eskriviendole por ke si lo mandara kon la pochta a moestro gaste ma el non lo mando ke si iva a gustarse Jean seja por ke iva a resevir presentes komo i tambien ke iva a ver sus parientes, solo ke pasando komo a 2 meses foe ke ja si lo mando ma ja si avija bozdejado i esto ke li eskrivi muntchas kartas,

El koando ja vino a Samokov i denpoes ke ja reposo de su vijaje, si enpeso a sikilijarse de esto ke estava sin dinguna okopasion, i en Samokov ke ja non estavan aziendo dingun etcho, i visto ke algunos si estavan prontandosen para salir de Samotov de esto ke non avija dingun etcho para la familia moestra, li demanda de moevo de el padre porke lo alesensiara de irse a sofia i buchkarse algun etcho, en diziendole ke i el agora ja es kazado i ke ja es tambien i padre de krejaturas, i ainda mas pasando en vazio, non lo topa komo era ke iva i el a poder detener kaza, i ke toda su vida ke non

1924     Biografia de Sr. Behoratche kon su ijo Sr. Jechua.    1900

 tiene de komer de la meza de el Padre, i el padre ke no kerija ke si foera de Samokov, li dicho por ke si buchkara algun etcho en Samokov, ke lo ke iva a ganar en otra sevdad iva a ser le i lo iva a gastar al menos koando es en Samokov ja iva a ser ke el padre lo iva a mantener seja a el komo i tambien i su mujer i krejaturas, i de lo poko mizmo ke ganara ja iva a ser lo todo avansado, ke lo todo era por non kedar solo Sr. Behoratche i tambien ke sigun su konto ja era mui djusto ansi ma el Sr. Jechua ke non lo kerija esto era ke lo ivan ansi pasandolo, en avlas i kalkulos, era ke el Sr, Jechua estuvo raviozo de esto ke non lo dechava, i por esto el non li entrava en su kamareta, ande estava el padre ke era solo para komer ke lo jamavan i a el padre de esto non li enportava, por ke ja era ke el Sr. mochonatche ja lo vijitava siempre, i lo azija ke buchkava de enbezarse las moevas de la sevdad por kontarselas a el Padre, i koando lo jamavan en la kamareta era ke non avlava, ke esto li vinija mui pezgado a el padre, ma sigun ditcho ja lo somportava,

Koando ja foe el anio de 5661 visto ke no lo pudo ir en otra sivdad el si avrio una butika de bakalik, para vender en detalio, en Samokov, ke de esto ja estuvo kontente el padre i el padre resto solo en su botika de mizmo lo poko de etcho ke el tenija de dar moneda kon entereso a sus klientes ke ja los tuvo de siempre, i el Sr. Jechua merkava sus artikolos de el bakalie, de todos estos ke si li demandavan, i en mizmo tiempo tambien era ke iva i boeno vindiendo, lo todo de el presipio el foe vindiendo mas barato por ganarse

1925     Biografia de Sr. Behoratche kon su ijo Sr. Jechua.    1901

muchteris, ke ja era ke toda la familia Arié li azijan su empleos todo de su butika ma pasando algo de tiempo ke el si mero un konto foe ke non tenija dingunos profitos, i siendo ke los presios kijo algo pujarlos era ke dija kada dija se lo ivan enmankando sus klientos, i de esta manera el lo enkameno esto etcho komo a 2 anios, i visto ke non tenija nada de ganansias li kalio ke lo dechara, i la ropa ke la tenija lo kalio ke la vindiera kon menos presios, por poder dezbarasarse, ke li vino a kostar esto serka 4000 fr. i foe ke kedo torna sin etcho i se foe de moevo ala butika de el padre i el padre si sekilijava muntcho de esto ke non pudo reuchir, i ja era ke lo konsolava por ke non si sikilijara,

1926

Asta aki si eskapa, la partida de la biografia de Sr.

Behoratche, Jshak G. Arié seja la sujo komo iEstas de kon

sus ijos S. Mochonatche, i S. Jechua, fin a el tiempo ke

estuvieron djuntos.