חכם אלייָצ'וּנוֹ וחכם רָבֵּנוּצֶ'ה תחת אימם בו' רבקה

594

De aki i endelantre el enpesa la partida De H. Elijatchuno i H. Rabenutcho, los Ijos tchikos de Hr. Josef.

595    Biografia de H. Elijatchuno i H. Rabenutcho, soto el Guijo de sus madre.      1833

En el anio de 5593, sigun eskrito en el N-ro 530 de esta biografia kon la espartision ke tuvieron los ermanos i ke lis resto a los ditchos H. Elijatchuno i H. Rabenutcho 10,000 gr, ke iva a ser de los enteresos ke si ivan a pasar, kon ke ivan a kontenuar sus estudios, i sus madre la Bu. Revka ke los tenija de guijarlos, lo todo lo reintcheron i foeron andando i biviendo, i eran mui kontentes, i H. Merkadutcho ke ja estava en su butika era sovre todo mas alegres, i de ves en koanto el las Vijitava, i lis demandava si es ke kerijan alguna koza ke el ja estava pronto para sirvirlos, i esto sigun ke ja saven ke la Bu. Revka nunka non si pasava kon H. Merkadutcho i ansi era ke non si li aderesava para nada ande el otro ke koando kerija alguna koza era ande H. Rafael i ande los Ijos de Hr. Tchelebi ke si lis aderesava, i ejos li merkavan todo esto ke eja lo kerija, era Hr, Tchelebi ke li iva tambien a demandarle i el li merkava, lo mas muntcho, seja de las komanijas komo tambien i de vistimientas i todas mas los otros menesteres i el si lo traiva a su kaza, ke non si avregonsava,

la Bu. Revka ke ja era una mujer, mui nekotchera, i mui fursuda ke non si kansava de lavorar eja mizma para todos los menesteres de la kaza, i en mizmo tiempo guijarlos a los 2 sus IJOS ke los mandava al estudio, i ejos ke ja foeron mui reposados, eran siempre en kaza, ke non los dechava salir, a dingun lugar, i kon los otros IJOS ke eja si los trucho de Sofia ja estavan aparte, i eja

596        Biografia de H. Elijatchuno i H. Rabenutcho, soto el Guijo de sus madre.       1833

de ves en koanto los vijitava i los akonsejava porke si pudieran boeno komportar ke mas non estava sus padrasto ki los kudijava tanto i ejos de mizmo ke ja foeron mui ikonomiozos, toda sus vida, sigun ke ja van a meldar mas adelantre las estorijas ke paso kon ejos,

En el anio de 5594, ke H. Merkadutcho, era en butika aparte, i komo los etchos non li estavan endo boenos i por sus pagamientos ke non los estava pudiendo enkontrar, ke aparte ke ja si enprestava, de todos los parientes, i non li era bastante, lo azija ke si enboratchava, i se li iva ande su madrasta, i kon pilijar li tomava moneda emprestado, ke por esto a los presipios, non lo avlava, ma koando li enpeso a irle mas espeso eja si akechava ande H. Refael ke de el koal non si espantava H. Merkadutcho, i mas tadre eja la Bu. Revka si lo iva ande Hr. Tchelebi jorando, ke de esto ultimo era ke si espantava, i Hr. Tchelebi lo jamava i lo gritava en diziendole ke si en kavzo tenija la uzadija de irle otra una vez ansi ande la Bu. Revka, ke lo iva azer meter en prezo, i kon esto ja pasava algo de tiempo, ma torna koando si enburatchava, era ke de moevo si li iva ke una vez ja lo izo enserar, i estuvo 15 dijas enserado, ma iva tambien i la Bu. Ruzu a rogar porke lo ketaran ke mas non tenija de ir,

La Bu. Revka visto ke eja guijava la kaza i esto ke

597         Biografia de H. Elijatchuno i H. Rabenutcho, soto el Guijo de sus madre.        1834

resivija de los enteresos, era a penas ke li estavan abastando i para eja non sovrava nada por algunos sujos menesteres ke kerija, i a H. Elijatchuno, ke ja estava mas grande lo keto de el Talmud tora i lo metio en el midrach ande estava Hr. Avraam Alkalai, ke era el Rabino de la sivdad, porke lo embezara a estudijar en la Guemara, ke el koal era mui kapatche de saver embezar, i ansi foe ke de el presipio ja entro H. Elijatchuno en los estudios, altos, i iva siempre adelantando, i kon el H. Rabenutcho tambien ke era mas tchiko, era ke kontinuava al Talmud Tora, i eja empeso a vijitar por las paridas, ke foe en esto ke kijo embezarse la komadres, ke kon esto iva a ser ke podija ganar mas mijor,

En el anio de 5595, la Bu. Revka sigun ditcho ke vijitava por las paridas eja en este anio ja enpeso a resivir i a algunas paridas, ke por el presipio mizmo ke li kirijan pagar eja non resivija, lo todo por embezarse mas muntcho, i denpoes eja lo pronto el etcho para frikontar solo en las paridas ande podija tomar mas grande paga, ke a las ke eran mas flakas i ke non li podijan pagar, sigun ke eja lo meresija, era ke non lis tomava nada, i li azija de mizmo ke las vijitava lo todo sigun i de estas ke resivija paga, i muntchas vezes a las menesterozas, era ke lis mandava i gainas i mas todo el menester para una parida ke kon esto si gano mas

598   Biografia de H. Elijatchuno i H. Rabenutcho, soto el Guijo de sus madre.        1835

muntcha, onor i eja ke ja era mui mirikijoza, ke todo loke tomava en mano lo lavorava saaglam^[3], i non si enfastijava, i a las paridas ke eja akomadrijava, eja las vijitava 40 dijas, i las banijava a las krijaturas, fin ke si enrezijava la parida muntcho bien, eja si era el menester si etchava tambien i muntchas notches en la kaza de las paridas, lo todo por la paga ke li pagavan a sus boena veluntad sin ke diera a dinguno kechas,

En el anio de 5596, los enteresos ke eja resivija de Hr. Tchelebi por los 10,000 groches ke lis kedo a los ijos H. Elijatchuno i H. Rabenutcho, ke eran 2000 gr. foe ke non lis estava abastandoles, i avija empesado a travarse, de el kapital, ke esto li kavzava a razon ke Merkadutcho, si los iva muntchas vezes, a sus kaza, i se estava kon semanas enteras, kon toda Su Familija, ke si mismo lo kovalijavan el non se iva, i empesava a pelijar i boratcho ke ja estava siempre, era ke lo dechavan fin a ke el lo kerija ke esto foe la razon de azerse komadre i kon esto kerija amontonar una sierta kantedad, de moneda kon la entision de kazar a los IJOS i denpoes irse a Jeruchalaim, i eja todo esto ke ganava por el presipio ja lo foe metiendo a la vanda i eja era mui gustoza por sus IJOS ke ja eran mui reposados, i ke la eskutchavan en todo esto ke eja los akonsejava, i siempre lis kontava, las boenas etchas de sus

599         Biografia de H. Elijatchuno i H. Rabenutcho, soto el Guijo de sus madre.        1836

Padre, i ke si i ejos kamenavan en sus kaminos era ke podijan alkansar tambien la onor de sus padre, lo todo era la kerensija de la Bu. Revka porke si enbezaran a meldar sigun sus padre,

En el anio de 5597, kon ke eja ja avija avansado de esto ke akomadrijava, i siendo ke si li vinija H. Merkadutcho a su kaza kon toda su familia ja ke para ke si foeran era el menester, ke li dieran i algo de paras para ke si foera i esto li dava eja de sus paras, porke en tal ke si foera i ke non si lis foera enmankando el kapetal de sus IJOS,

ejos los IJOS ke kontinuavan los estudios ivan adelantre, i H. Elijatchuno, ke ja estava mas grande, el si enpeso a enteresar en los kontos sujos, i li demandava el konto de la madre ma eja non savija, ke solo li dezija ke el gaste lo estan tiniendo mas grande, ke ansi li dicho la madre porke gaire si lo resiviera el esto i ke governara sigun es el menester, ke sus kapitales ja lis avijan abachado a serka la metad, i de esto foeron mui sikilijados i lo decharon para ke los akonsejaran sus parientes, i mas tadre lo izieron de azer solo la ikonomija en los gastes, i ke non lo resivieran mas a H. Merkadutcho, mizmo ke si li vernija por foersa, i ke sigun lo izieron unas koantas vezes ke li dieron paras para ke si saliera de kaza esto lo podija azerlo siempre, ke si era ke tenijan

600         Biografia de H. Elijatchuno i H. Rabenutcho, soto el Guijo de sus madre.        1837

de ande darle non enportava, ma aki es ke estavan i ejos kedando sin paras, esto todo si azija mukaet H. Refael, ke los amava mui muntcho i aparte el si lo estava prontando, a H. Elijatchuno por tomarselo por jerno, sigun ke ja foe ansi,

            Sovre esto lo topan los mansevos de agora ke lo izo jero H. Elijatchuno, de kazarse kon su prima ermana, i ke por esto es ke salieron ejos flakos, lo koal merando, a muntchos otros ke lo azen esto los vemos ke ja estan mui sanos i mui rezios, Jshak Avino ke si kazo kon su prima ermana koalo podemos dizir ke tuvieron los IJOS ke pario, a tiempo ke ja foeron todos unos leones, i ansi los ke nasieron denpoes de ejos,.

En el anio de 5598 visto ke non pudieran reuchir, por non resivirlo a H. Merkadutcho en sus kaza, porke torna si lis foe ke non tenija koalo azer, ke si es ke azija sigun lo azen agora ke koal se foe i koal si etcha mas muntcho a la negrigura, ja kale dezir ke iva aser mas negro ke i esto tambien non es ke non lis vinija al tino ma era ke tenijan foerte amur familiar, i tambien el amure propre, por ke si guadravan mui muntcho por ejos ke non si dichera nada, entre la djente, i kon una adjunta ke ejos tuvieron lo izieron para ketarselos de kaza, ke li resentaron una sierta semanada, de entre los parientes i la Bu. Revka si kontento a ketarse

601         Biografia de H. Elijatchuno i H. Rabenutcho, soto el Guijo de sus madre.        1838

de su djoja partikular ke eja tenija i venderla para ke si li merkara una kaza, ke kon esto iva a ser ke lis parisio ke ivan a repozar i esto kon la kontentes de todos sus parientes lo izieron i li merkaron la kaza de la aiko, sigun ke ja lo eskrivi en la partida de H. Merkadutcho, mas en largo, i kon esto, si lis foe de kaza, i denpoes ke la Bu. Revka ja vendio la Djoja i li dio las paras porke si merkara la kaza eja foe mui repintida, ke por esto uvo tambien i kistion, ke eja lo kijo ke si li rekojera tambien i esta suma i ke si li boltaran atras, i por esto tambien mas tadre lo izieron i se las dieron ke era una suma de 1000 groches, lo todo lo izieron ke si las rekojeron de entre los parientes, ke eja dizija komo una mujer, devija i eja tener algo si non es paras al menos djoja,

En el anio de 5599 ke ja lo resentaron a H. Merkadutcho, i la mubilija de kaza ke si lis avija muntcho estroido i ke lo kerija espozarlo a H. Elijatchuno, eja enpeso a resentar, la kaza kon ke merko algo de mobilija, i para azerlo esto li kalija ke foera travando de el kapital ke tenijan i ansi era ke siempre si le iva enmankando ainda mas muntcho i eja non kerija sintir koando lo ivan diziendo, porke non foera aziendo gastes demazija, i muntchas vezes si lis aravijava, por koando non li kirijan darle paras demazija de el menester de su gaste ke lo podija tener el menester, i ansi foe ke de los 10,000 groches ja lis avija apurado a 4000 gr.

602         Biografia de H. Elijatchuno i H. Rabenutcho, soto el Guijo de sus madre.        1839

i lo todo lo enkulpavan a H. Merkadutcho ke era el ke lo kavzava, ejos todos los 2 ermanos eran en el midrach estudijando kon Hr. Avraam alkalai, i ejos ke eran tanto entelejentes, sus kuvdisija era mui grande sovre los estudios, i ansi ke ejos si enbezaron la Guamara kaje mijor de sus profesor,

Kon la kontentes de todos los parientes, lo konvinieron el espozorio, kon H. Refael su Tio, de espozarlo a H. Elijatchuno, kon la IJA de H. Refael la Bu. Bulisu, i komo parientes, ejos non meraron muntchas kondisiones, ke lo todo lo decharon al boen pareser, de H. Refael, ejos si prontaron en akeja mizma semana, i lo izieron el espozorio, kon muntcho saltanat, i se alegraron toda la Familija, sigun ke esto ja lo tengo eskrito la forma ke lo azijan i en el dija de Chabad ejos todos si rekojeron en la kaza de H. Refael, i esto tambien ja lo tengo eskrito ke si ivan kon las komidas i komijan todos djuntos kon muntchos kantares i bailes i gustos i denpoes ejos si mandavan los presentes de uzo, en todas las fiestas, i vijitarsen ke ja era siempre,

            En el anio de 5600, ejos si prontaron por azer la boda, i en el dija fiksado ejos ke ja estuvieron de todo pronto la izieron la boda de todo djusto, i la novija ke ja era boena i mui ermoza, i achugar i kontado ke ja trucho mas muntcho de esto ke lo

603   Biografia de H. Elijatchuno i H. Rabenutcho, soto el Guijo de sus madre.  1840

esperavan, foe ke izieron la boda kon muntcho kef i alegrija sovre todo ke ja lo saven ke el S-r. de H. Refael komo de persona ke era seja en el kantar, komo tambien i en los Djombuches, i mas muntcho la novija ke ja era ke konosija el kante mas mijor de el padre eran dijas i notches sin kansarsen aziendo los miles de kantes i de los djugos, ejos se amavan i se konvenijan siempre seja kon su marido komo tambien i kon su esfoegro,

            En este anio eja tambien la Bu. Bulisu pario, un Ijo ke i por esto tambien lis foe gusto grande, i lo izieron de mizmo sigun de todas las paridas, i lo jamaron BEHOR JOSEF, i sigun el uzo lo rihmieron kon mas muntcho saltanat, ke la madre se vistio kon los vistidos de Novija, en este dija, era eja la madre ke lo aletcho i lo kudio, i en este anio si salio de el estudio H. Elijatchuno i era solo una ora al dija ke iva i sentija de esto ke los otros Hahamim meldavan, ke esto tambien lo izo muntchos anios fin ke estuvo en Samokov,