סניור רפאל א. אריה ובניו בראשון לציון עד שנת 565

453                 Biografia de S-r. Refael A. Arie kon sus IJOS, en Richon le Sijon                 1888

i en esta anijada lis foe mui muntcho boena la rekolta, ke tuvieron muntcho trigo i de los otros sembrados, el si jevava los pazares ke eran mas serka i vendija, i la suma de moneda ke tomava la emplejava de algunos menesteres por la kaza, era solo ejos ke lavoravan toda la tiera ke ejos tuvieron el ke si okupava solo sovre los arvoles foe ke tuvo ainda mas lugar i sembro tambien i muntchos arvoles de portekales i limones i algo de zeitunas, i de datelesi i mas toda fruta ke krese por akejas partes, el se izo i una tchika gortizika de ermozas rozas ke si asentavan las notches i komijan delantre de eja i aparte sembro tambien i bostan por los modos de kondutchos ke por lo todo era el ke si okupava i kapatche i mui lavorador ke ja era ansi es ke en lo todo ja reuchija, i se gustava mui muntcho ke ja era patron por si i ke ja estava rekojido kon toda su Familia en una meza i sus IJOS lo respektavan muntcho seja a su Padre komo tambien i a su madre i ansi por enfrentante a todos los 2 lis kaiva la bava^[4] por sus IJOS.

En este anio tambien li nasio un IJO a S-r. Refael i se li vino su ermano M. David, kon su Familia i eran siempre akompaniando a la parida, i en el dija de el Birkad mila kombedo a todos sus amigos de Richon le Sijon i komieron djuntos, i lo jamaron el nombre MORDEHAI, porke era en Purim, ejos en este dija non foeron al lavoro, eja la parida ke ja era mui sana i boena, los kudijava a lo todo, i todos eran siempre mui kontentes, el lo izo saver kon bilietos a todos los parientes de Samokov i de Sofia sovre este IJO ke

454                     Biografia de S-r. Refael A. Arie kon sus IJOS en Richon le Sijon                   1888

li nasio, i todos li boltaron las saludes, menesterozas,

En el anio de 5649, ejos todos seja el Padre komo tambien i sus IJOS i la mujer todos era ke si ivan kada demanijana a su lavoro ke ja lo tenijan apartado, i sin kansarsen i kon muntcha gana ejos todos lavoravan i sovre todo ke tenijan grande union i el S-r. Gavriel era ke dava las komandas i todos lo sentijan,

en este anio si merkaron gainas, i era la S-ra Dudutcha ke las kudijava, i por los presipios, los goevos ke rekojija los jevava una ves a la semana al pazar de Jeruchalaim, i las vendija, ke de estas paras si merkava para eja algunos menesteres, i lis traiva prezentikos para sus krijaturas, ke si gustavan mui muntcho, i mas tadre la S-ra Dudutcha enpeso a avansar algo de la letche, ke mundjija de la vaka ke tenijan ke tomava, a 6 okas de letche al dija i lo koajava jagurt, i lo jevava tambien a el pazar de jeruchalaim i lo vendija a la djente ke eran de moestras partes, ke esto non avija en Jeruchalaim, i lo vendija kon boenos presios, ke de esto avijan enpesado a demandarle i otras mujeres, i ansi foe ke si merkaron otra una vaka i ivan koajando ansi jagurtes, i siempre era, ke lo jevava la S-ra Dudutcha a el pazar, ke enpeso a ir a 2 vezes a la semana, i avija enpesado a traer, en kada ves ke iva a 20 i 30 groches, i esto lo avijan enpesado a apartar, la metad, por ainda

455                     Biografia de S-r. Refael A. Arie kon sus IJOS en Richon le Sijon                   1889

merkarsen seja vakas or kavras, ke esto lo kijeron engrandeser, i kon el etcho de las gainas ke ja tuvieron serka 120 era ke los goevos tambien lis ajudava muntcho, porke los vendija, a 20 i 30 paras el uno, solo ke ja li estava viniendo pezgado el estar ande al pazar a pie ke era una lechura de 4 oras de kamino,

            En todos los dijas de los moadim i Chabatiod, dinguno de ejos non lavoravan, i se ivan a el Kaal, todos, porke esto ja era, el prensip de la kolonija de non lavorar en estos ditchos dijas, i ke repozaran ejos todos los de la kolonija si vijitavan de los unos a los otros, i si kontavan kada uno de sus lavoro, i tambien tenijan gazetas, todos si ajudavan de los unos a los otros, i el derektor de la kolonija era ke kudijava por todos i los djuzgava koando tenijan algunas deferensijas, i todos lo sentijan, i lo katavan i si espantavan de el, porke era una persona mui serioza,

            a la kolonija venijan muntchos felahes, para lavorar, ke ja avija, algunos ke non alkansavan ejos solos i los tomavan a estos kon dija, i los lavoravan, i esto era en los dijas ke era la mas grande kalor, i para esto ja eran alesensiados, solo ke en los dijas de los moadim i de Chabatiod non los dechavan lavorar, era solo ke los mantenijan, i ejos ja eran kontentes,

            S-r. Refael era ke li eskrivija siempre kartas a su primo ermano S-r. Behoratche porke li iziera saver de algunas moevas, de los parientes de Samokov, ke el kerija saver, por kada uno aparte, i li dezija tambien ke el si topa mui kontente, ke si es ke lo keri

456                     Biografia de S-r. Refael A. Arie kon sus IJOS en Richon le Sijon                   1889

ke vaiga una vez i si li agrada la vida, tanto libera, de estos lugares, ke si estabelisiara i el kon ejos, ke ja si pasa mijor muntchas vezes de Samokov, i S-r. Behoratche esto lo dezejava mui muntcho, ma sus IJOS en este tiempo estavan en Brusa, i non si astrevija de eskrivirles ansi una koza, era ke li respondija por mas tadre i ke li vengan los IJOS por poder avlar sovre esto,

En el anio de 5650, a S-r. Refael li nasio una IJA, ke kon eja tambien lo izieron sigon i de el otro parto i la jamaron ESTER, i de mizmo su madre aun kon todo mas aedada, era eja ke la kudijava, solo eja iva jorando ke non kerija mas parir, i sus IJOS li dizijan aki tenemos el menester de muntcha djente, ke para todos ja si lavoro, i es kon parir ke mos vamos azer djente, ke ansi para mantenermos ja tenemos kon la ajuda de el alto DIO, por nada non devemos de sikilijarmos, solo i solo estar mui gustozos, i rogar al DIO para estar sanos, i boenos,

El S-r. Refael ke si okopava lo mas muntcho sovre los arvoles foe en este anio ke li enpesaron a dar frutas i era mui gustozo, el aranko de las primeras frutas i se las jevo al KOEN i li rogo porke si las resiva, komo korban, i en mizmo tiempo ke vaiga djunto kon el a la goerta i ke li bendiga los arvoles, i lo izieron esto i mas tadre ke las frutas ja estuvieron etchas, en kada tadre

457                     Biografia de S-r. Refael A. Arie kon sus IJOS en Richon le Sijon                   1890

lis traiva a sus kriaturas de todas las maneras de frutas ke tenija, i todos se gustavan i lo esperavan por koando iva a venir, i koando ja foeron mas muntchas las arankava kon muntcha atansion i las jevava a Jeruchalaim al pazar i las vendija, ke esto lo foe aziendo kada sigundo dija, ke kon esto de las frutas jevava tambien i los goevos, i gainas ke ja eran viejas i los jagurtes, i koando boltava en kaza si traiva de 50 a 60 groches, i de estas sumas ke uvo tomava en kada vez ke si iva a el pazar, una partida iva metiendo a la vanda, por razon ke en este anio devija de enpesar a versar, por los 200 dekares de tiera ke si li tiene dado, i en su tiempo el ja estuvo pronto para entregarlas, en mui boena regula,

            La S-ra. Dudutcha ke ja pasaron komo 2 mezes ke ja avija parido i sana ke ja era, enpeso i eja a ir al pazar de Jeruchalaim, i se tomava kon si a la tchika kriatura, i kargava en un karo ke lo alkelava, i lo kargava de todos sus artikolos, i kamenava de kaza en jeruchalaim, i lis iva vindiendo a las mujeres a koala frutas i a koalas goevos i gainas i de las otras mas kozas ke eja si jevava, i de mizmo denpoes ke eja azija sus emplejos por todo el menester, ke tenija seja para si komo tambien i para sus krijaturas, lo restan lo traiva i se lo dava a su marido ke tambien non era manko de 50 i 60 groches de vendita ke eja tambien azija, i lis kontava las notches de todo esto ke vido en el pazar,

Avija muntchas mujeres djudijas ke non merkavan de otro lugar i era ke la esperavan a eja, porke non avija otra mujer ansi

458                     Biografia de S-r. Refael A. Arie kon sus IJOS en Richon le Sijon                   1890

Djodija ke vinija a el Pazar para vender ansi kozas, i toda ja la konosijan i li enkomendavan ke lis trucheran siempre i li pagavan kon mas mijores presios, i muntchas la detinijan en sus kazas ke koala li dava kahves i koala dulses i otras la detinijan a ke komiera en sus kazas, kon ejas en djunto, i eja ande las mas ke li eran konosidas alguna vez ja si estava, porke non tenija muntcho el tiempo de restarse a razon ke a la notche ja kalija ke estuviera en kaza, eja si akavedava mui muntcho de la djente ke non las konosija, porke akontesija muntchas kozas siempre en Jeruchalaim, de modos de maleres, sovre todo en las mujeres viejas i ke eran bivdas,

En el anio de 5651, el S-r. Refael ke si foe al pazar de JAFA, ke si jevo tambien algunos de sus artikolos, por venderlos foe ke topo a merkarse un karito kochjado^[5] de 2 aznikos i siendo ke lo topo a merkarlo mui barato i paras ke ja tenija, foe ke los merko i kochijarlos el ke ja los savija, los trucho el mizmo kochijandolos a la kolonija i todos sus IJOS i su mujer ke salieron al sujo enkontro, al kenar de la kolonija, lo vieron ke viene kon una araba kochijados de 2 aznikos i todos ke ja korieron para enkontrarle, i visto ke non avija karijador li demandaron de ken es esto, i el lis dicho, ke vos merki un paiton para ir a los pazares, i para transportar, algunos moestros artikolos, arientro de la kolonija, todos si

459                     Biografia de S-r. Refael A. Arie kon sus IJOS en Richon le Sijon                   1891

sovieron a esta arabaika jenos de la alegria ke ja tienen i agora araba, i karijandosen enpesaron todos a la una a kantar pizmonim i ansi kantando entraron a la kolonija,

            Ejos ke agora ja tenijan ansi karo se sirvijan de el para todos sus sirvisios de sus transportes i lis ajudava mui muntcho, i koando si ivan a el pazar de Jeruchalaim tambien si ivan kon este karo i por el kamino ivan kantando siempre pizmonim, porke la S-ra Dudutcha tambien ja savija kantar muntchos pizmonim, foe ke en una vez ke ejos estavan indo al pazar de jeruchalaim djunto kon la S-ra dudutcha, i estavan de mizmo kantando tambien pizmonim, i por el kamino ke avijan S-res djidios, ajenos ke vijitan las Iziaras de la tiera santa, i ejos ke sintieron kantar, i tambien ke eran pizmonim i jenos de la alegrija, de sintir kantar, a djidios, kazalinos foe ke ejos si kedaron para verlos ken sirijan, i koando ja si enkontraron denpoes ke si gustaron lis rogaron porke torna kantaran, i lis kijeron darlis algunos prezentes en moneda ma ejos lis refuzaron i lis dicheron ke ejos estavan jevando modos de artikolos a el pazar de los prodoidos de el lavoro de sus sodor, i ke ja van a tomar paras en el pazar, i denpoes kijeron merkarle algunas frutas, ke ejos lis demandaron porke lis vendan i a esto lis atchetaron, i antes ke lis izieran el konto ejos los vijajadores, lis dieron por la paga, 3 napoliones, i S-r. Refael lis dicho ke esta suma es muntcho, ma ejos li dicheron ke la resiva, por la valor de esto ke lis merkaron i S-r. Refael si los engrasio, i denpoes este todo pasaje lo publikaron

460                     Biografia de S-r. Refael A. Arie kon sus IJOS en Richon le Sijon                   1891

en las gazetas de Jeruchalaim, en adjuntando unas koantas palavras sovre la amor nasional, i mas ansi otras ditchas de enkurajamiento, sovre los Djidios en jeneral,

            Ejos eskapavan sus venditas en el pazar i presto buchkavan de tornarsen en kaza, por non pedrer, nada de tiempo para sus lavoro, i es por esto ke ejos mui bien ivan indo i adelantandosen en todos los puntos, i eran jenos de la alegrija sovre todo koando el pazar lis era, de presto i de boenas venditas, tenijan mas tambien ke tanto presto ke en el pazar non podijan vender los sujos artikolos lo azijan presto de kamenar por las kazas ke ejos ja las konosijan i todos ja lis merkavan,

En este anio de 5652, agora ke ja tenijan i kareta, era lo mas muntcho el S-r. Refael ke si servija de eja, sigun ke ja lo saven ke la sevda de el S-r. Refael era siempre en los arvoles, i dijas enteros estava arankando las ujikas ke kresijan demazija, i los iva enderetchandolos i arufijandolos, i ansi adelantre todo esto ke era el menester, todo sus IJOS ke ja eran mui estudijados sovre la agrekoltura, kada uno si okupava en la una partida de sus tieras i la mujer kon sus IJAS, se okupavan de la kaza, i de las gainas, i las otras kozas ke tenijan, las notches, koando ja vinijan en kaza kada uno kerija mas presto kontar, de su lavoro de el dija i jenos

461                     Biografia de S-r. Refael A. Arie kon sus IJOS en Richon le Sijon                   1892

de la alegrija ke en la tarla suja, ja krisio los vachakes^[6], kon 38 trigos, i el otro ke los tchokanes^[7], de los misires sujos, el konto en el uno i avijan 154, granos, i ansi el otro alavandose tambien de su produido, i al padre li iva kaendo la bava de la alegrija, de ver a sus IJOS, tanto amorozos i li kaivan las lagrimas, de la alegrija i su mujer tambien kontava, ke oi rekojo 25 goevos i las 4 kuatchkas^[8] ja ketaron a 24 poikos, i ke a la manijana devijan de ketar i las otras 6 kuatchkas ke lis metio a 35 goevos, ke son las grandes, i el S-r. Refael lis kontava, ke en los arvoles sujos atino ke ala entrada, de la goerta, koando mos vamos de aki i en la sigunda sira el sezen arvol ke es de portokales, avija uno ke pezava mas de medija oka, i en la otchena sira, ke son los limones, avija tres limones ke estavan apegados, i krisiendo en una paliko, i de la otra parte ke son las peras i mansanas, eran los arvoles tanto jenos ke de el un arvol si aranko la una rama, kon estas konversasiones, lis turava oras enteras, i lo todo koando estavan en la meza, eran estos los konsoelos de el S-r. Refael seja ke los vija a sus IJOS a su deredor alegres i kontentos, seja ke si alegrava, por ke ja reocho para alkansar en esto de ser endependiente, seja el mizmo komo tambien i sus IJOS para siempre, i todo lo eskrito ke ja lo meldaron las sufriensa, i apretos ke el los paso i tambien i estas de su padre, ke ja las vija todas, non azija otra koza mas de ir kantando [kontando] i en vezes si lo intchijan los ojos de grandes lagrimas de alegrija, i todos sus IJOS ke ja lo vijan era ke non li avlavan nada, porke en kada

462                                               Biografia de S-r. Refael A. Arie,                                             1892

okazion siempre lis kontava de todo loke pasaron en sus vida en Samokov, seja el komo tambien i su S-r. Padre, i mizmo i de sus S-r. Papu, ke esto koando lis kontava, ejos lo sintijan kon mui grande atansion, i S-r. Refael si desforsava mui muntcho, i esto lis foe, kontandoles, mas muntcho en este anio, i sigun ditcho ke lo aflakava muntcho, foe mas tadre ke enpeso a ir mas ralo a los arvoles, ke koando non podija ir el azija ke la mandava a su mujer, i li enkomendava, de koalos arvoles ke li truchera frutas, i muntchos dijas se iva el mizmo aun kon todo ke estuvo en un grado ke ja kalija ke repozara i sus IJOS li dizijan ke non saliera, ainda unos koantos         dijas fin ke si enrezijara boeno ma el non los eskutchava, i ke ejos ja lo ivan azer todo esto ke si terna el menester de lavorar en los arvoles, fin ke pokos dijas pasando ja kalio ke goadrara la kama, i su mujer i sus IJOS eran mui sikilijados, de verlo ke dija kada dia se iva mas muntcho aflakando fin ke arivo en un grado ke non tuvo la foersa mas ni mizmo de avlar i esto foe en un tiempo de 15 dijas i todos los medios ke li dieron vija los medikos ke avijan en la kolonija foe lo todo sin dingun provetcho asta ke en una notche de el ——- de este anio de 5652, suplo su ultimo riflo i kedo moerto para siempre, i todos sus djente lo joraron sin artarsen i a la manijana lo enteraron kon ke foeron toda la djente de la kolonija por akompanijarlo, i li izieron todas las onores meresientes, i li goadraron los 7 dijas de limunio, de uzo ansi tambien i en el mez entero, ke ivan en kada dija a el KAAL, i li dızıjan el KADICH,

463                     Biografia de S-r. Refael A. Arie kon sus IJOS en Richon le Sijon                   1892

de mizmo lo kontinuaron i en el anio entero,

            Ejos los IJOS, izieron estampar bilietos de limunio i mandaron a todos los parientes, seja estos de Samokov komo tambien i a Sofia i otros lugares ande ejos tenijan parientes, ke todos lis respondieron, en tomando parte a la manzija ke foe en la edad la mas ande iva a ver algo de boeno, solo ke al menos ja murio kontente ke ja keto a la alforia, a sus IJOS, i kon esto sus IJOS, es ke deven de rekonosersilos, ke si el non sufrija tanto komo es ke iva a alkansar en esto, aun kon todo, ke estan lechos de sus viejos parientes lo koal na ke agora en el anio de 5674 ke jo esto eskriviendo esta biografia ja son agora ejos komo 4 kazas, i ainda pasando unos koantos anios ja van a ser i ejos muntchas kazas,

464                   ENDEPENDENSIJA ALKANSADA.

            A detras de loke ja meldaron, la biografija kon algunos los mas emportantes pasajes ke tuvo el S-r. Refael mientres su manseves ja lo entindieron los grandes apretos i sufriensas ke tuvo, i ke tuvo tambien la foersa para poderlas somportar, i lo todo en un tanto kurto tiempo, i sigun de loke si vee, es ke foe solo i solo por alkansar la endependensia se [de] suja komo tambien i esta de sus vinientes detras de el, ke para reintchir su buto non li era en su ojo nada de sakrefikar su vida, fin al ultimo grado en tal de alkansarlo, lo todo sigun el karakter de un vero ARIE,

            Seria de regretar, solo por este ke el mizmo si aprovetcho mui poko tiempo, i visto a las vidas de su S-r. Papu H. Refael ke bivio 54 anios i su S-r. Padre H. Avramatche 51 anio el non la tuvo la ventura de alkansar mizmo las kurtas vidas de sus padres, ke todo foe 45 anios loke bivio, i esto en toda su mansevez de nada non se gozo, ke foe al kontrario de sus padres, ke ejos se gozaron en sus manseves i en la vejes sufrieron, i aki foe, ke en la manseves sufrio, i en la vejes lo poko ke seja ja si gozo, sovre todo ke los keto a la alforija a sus IJOS i prontar tambien i para los vinientes detras, de ejos, esto es ainda mas de alavar, sovre su kapatcheta i de tener la ventura, para alkansar en esto,

            El era una persona mui entelejente, i esto ke era a las kajadas i non si demostrava tanto muntcho entre la djente ja mos kale dezir ke foe sigun ditcho en su manseves, mui menesterozo, i no lo podija azer sigun otros, ke non tenija este tiempo a detras de sus

465

ondos pensamientos, para poder alkansar los menenesteres de el sostenimiento de su grande Familia, ke el tuvo,

El koando konversava, sovre koal punto foesa, i kon los mas grandes personajes, non era persona ke si avregonsava, para responder, kon muntcha entendensija, i todos sus kalkulos non foeron en vano, adetras de loke si estan viendo las provas de todas sus etchas ke el tambien las alkanso,

466

Fin aki si eskapa la partida de la Biografia, de S-r. Refael, i de algunos pasajes de su vida, ke foe apenas 45 anios, i murio.