קורותיו של סניור אברהם בהיותו בווידין

17         BIOGRAFIA ARIE      1775

De aki endelantre vo a eskrivir algo de la BIOGRAFIA, i algunos pasajes de el tiempo ke estava el S-r ABRAM, en VIDIN.

18      Algounos pasos en la Familia ARIE, en VIDIN.     1775

Sovre la rason ke vinieron la Familia ARIE, por estabelisersin en VIDIN, ja lo eskrivi mas antes. I ansi es ke ja si keri entindido, en ke manera se toparon, en dechando todos sous bienes, amontonados ken save de koantos djerenansios, i ke les seigan revatados ala vista de sous ojos, i agora ser menesterosos, por oun bokado de pan.

Ma el S-r Moche Abram Arie, padre del S-r ABRAM, ke vino el primer a Samokov, foe ouna Persona, mountcho meojouda i entelejente i mountcho pasensioso, i kon tener siempre la boena esperansa del alto DIO, i por nada non deskorajarse, era ke konortava a toda sou Familia, kon moui grande reposo.

Moui poko tiempo pasando de koando vinieron a VIDIN, el S-r Moche A. Arie, komo kavesera de la Familia, si detchiso, mismo kon manos vasias, a non tadrar tiempo, i enpesar a lavorar, en el propio negosio ke lo lavoravan, en sous estar en VIENA, i kourajoso i kapatche para sou ofisio ke ja era, de los pokos amigos ke si gano, en VIDIN, si enpresto ouna tchika souma de moneda i se alkelo ouna tchika boutika en ouna de las grandes plasas de VIDIN, i kon ouna tchika kantedad de ropa ke si merko propio de la plasa de VIDIN, se asento al etcho.^[17]

5536

            Ke mientres moui poko tiempo, enpeso a ganarse klientes de la arestokrasia de VIDIN, i todos lo kirin bien i lo ajoudavan, i de esta manera foe kontinouando, fin ke poudo enpatronarse de oun moui tchiko kapital.

19      Algounos pasos en la Familia ARIE, en VIDIN.    1776

Koando ja se vido kon algo de kapital, si mero oun Bilanso i denpoes ke pago a todos sous amigos ke li avian emprestado moneda se alkelo ouna boutika mas grande en la misma plasa i merko mas mountcha ropa, i en esta manera iva kontinouando, i oulvedandose, lo pasado, todos seja en la plasa komo tambien i en kasa eran moui mountcho aounados i se katavan i se respektavan moui mountcho de los ounos a los otros, i ansi era ke bivian kontentes i tambien asian grande ikonomia en todos los pountos.

5537

En este anio ke sou negosio si iva kada dia engrandesiendo i mas non estava topando las Ropas ke si le demandavan en la boutika para merkarlas de la Plasa de VIDIN,:

Si detchiso de aser oun viaje a Konstantinople i de akel dia endelantre si enpeso a prontar, i ansi foe ke en poko tiempo reocho a prokourarse ouna sierta kantedad de sou moneda ke rekojo de las venditas de sou Boutika, i ouna sierta souma si empresto de sous amigos kon enteres por ounos mas largos tiempos, i koando ja estouvo pronto en ouna souma de 2500 groches, partio el mizmo por Kostan, en djountos kon otros merkaderes de Vidin, ke ja se ivan siempre, ansi viaje tourava (2) dos meses, a razon ke era el viajar solo a kavajo, ke non avia chemen-defer, ni mismo paitenes, ni los kaminos eran choses, i tambien avian muntchos ladrones, por los kaminos, ke aparte ke lis rovavan, toda sous moneda era ke i los matavan tambien i por esto era el viajar de akel tiempo, kalia ke

20     Algounos pasos en la Familia ARIE, en VIDIN.     1777

si rekojeran al menos (10) dies personas i se alkelavan a (2) dos guadradores tourkos moui bien armados, ke por koando li arevara ke ladrones los enkontraran va aser estos (2) guadradores ke van a defender a todos los merkaderes, i ansi guadradores era solo los Turkos, ke esto era sous negosio i de esto era sous mantinimiento i mos kali dizir ke la verdat es ke entregavan sous almas, koando lis arivava ansi algounos enkontros, por guadrar a sous merkaderes el viajar a kavajo era solo (8) otcho oras al dia, i ansi era ke lis tourava (25) vente i sinko dias para irsen de VIDIN, a Kostan, i kalia ke si jevaran kon ejos komania i kouvierta, porke non avia en los (Hanes) Hotelis kariolas, otro ke eran las kamaretas de los Hanes en tiera, i espandian oun poko de paja i ensima metia su sidjade (tapet) i kon su kiebi^[18] (palto grande) para la louvia i el frio ke se jevavan tambien, era ke se kouvijaban [kuvriavan], los gastes del viaje eran: por kira del kavajo, se pagava a (1) oun groch, al dia i la notche ande dourmian, era por el mantinimiento del kavajo i por ke van a dourmir los viajadores en kamareta por lo todo 1/2, medio groch, en souma por el viaje entero lis kostava de (125) a (150) groches.

En este anio de 5538 foe por la primera ves ke foe a Kostan, i en pokos dias los izo todos sus empleos, i se bolto a VIDIN moui kontente de sous viaje, ke en moui poko tiempo, vindio la mas

21     Algounos pasos en la Familia ARIE, en VIDIN.   1778

grande partida, de la ropa ke troucho.

Visto a esto ke la reoucho, en el viaje ke izo a Kostan, enpeso de muevo por prontarse, i para azer sigoundo viaje, tambien a Kostan, sigun ke lo izo, i en este sigoundo viaje, el S-r. MOCHE A. ARIE, por kada sivdad ke iva pasando, si ganava muntchos amigos i lo jamavan por dourmir i komer en sus kazas, porke el S-r. MOCHE era ouna persona, moui representante, i tambien era moui savido i estoudiado, en el TALMOUD, i en todas las otras sensias de moestra LEI, la Santa, i kon algounos de estos amigos, ke i ejos tambien ivan a Kostan, por sous negosios, se li adjountavan, a el i viajavan djountos, i de esta manera foe kontinouando.

En este anio de 5539, sigoun ditcho ke siempre foe kontinouando los viajes a Kostan, i sigoun ditcho tambien ke en kada viaje siempre se iva ganando amigos moevos, foe ke entre el ouno de estos viajes, ke akacho [abacho] en ANDRINOPLE, por ver si es ke iva a topar de merkar algounos artikolos, valables para el.

oun sierto merkader de la Familia, NAVON, ke lo soupo ke el S-r, ditcho MOCHE A. ARIE, Estava en Edirne, salio el mismo en sou bouchkida, por konoserlo, ke ja lo sintia de sous amigos la sou fama, i foe ke si lo jevo a sou kaza, i lo detouvo (3) dias komo sou mousafir, i todos los (2) foeron moui kontentes, i entre sous platika, lis vino el etcho, de konsograr, i ansi foe ke kedaron

22      Algounos pasos en la Familia ARIE, en VIDIN.      1779

de akordo, por darle S-r. NAVON, a su ija por novia para el ijo del S-r MOCHE A. ARIE, ki es el S-r. ABRAAM, ARIE, I el primer ke vino a SAMOKOV, i el S-r MOCHE A. ARIE, li dio presentes a la NOVIA, i se goustaron i se alegraron en akeja notche, la NOVIA, si jamava BEHORA, i kon la kontentes de todas las dos partes decharon para azer el esposorio oufisial, por koando tornara el S-r MOCHE, de Kostan i este oultimo moui kontente de la noeva parientes, partio por su viaje, a Kostan, en dechando presentes en moneda para los sirvidores de kaza i para todas las kriatouras.

5540

Denpues ke el S-r. MOCHE A. ARIE, eskapo de aser sous empleos en Kostan ja foe i la noeva aniada de 5540, i se vino a Edirne i deretcho se abacho en la Kaza de Pariente noevo S-r NAVON, ke foe resivido kon boena kara, a la maniana isieron la siremonia sigoun ouso de Edirne kon mountchos Hahamim^[19] kantando mountchos modos de PIZMONIM, i tomaron el KINIAN, de ouso, i el S-r MOCHE, ARIE, li dio de moevo presentes a la NOVIA, i a la notche el S-r Navon, iso ouna SOARE, ke konbedo a mountchos S-es los Notables de la Sivdad, porke i S-r. Navon, tambien era ouno de los Notables de Edirne, i ouvieron mountchos Tchalgis (mouzikas)^[20] i mountchos hazanim, kantando i se alegraron i se kontentaron, en topandosen de todas (2) partes

23     Algounos pasos en la Familia ARIE, en VIDIN.     1780

kontentes, las koundisiones del esposorio foeron, ke li va dar por el kontado 100 groches, i achougar, a la onor del padre de la Novia i el gaste del viaje para jevar la novia a Vidin, va a ser de parte la Novia, ke esto kostava tambien komo 100 groches ke estas koundisiones, foeron boenas, la Novia, tenia la edad de 13 anios, i de misma edad era tambien i el Novio, sigoun el ouzo de Edirne, esta Novia, ja era de moui grande edad para espozar, a razon ke el ouzo de Edirne, era ke a las novias, kalia ke las espozaran, de la edad de (8) anios, ansi i kon los novios, i estavan espozados 5 i 6 anios, fin ke poeden arivar ala edad de kazar i ansi era ke arivavan muntchos modos de maleris.

La novia era grandina i ermoza, savia eskrivir i meldar era moui sana i foursouda, tenia grande respekto a sous djenitores i de boenas manias, i foe moui bien idoukada.

Jo MOCHE A. ARIE, II, eskrividor i konpozitor de la dita BIOGRAFIA, ke estouvi en el anio de 5638, djounto mi mujer BILIU^[21] i mi ija la grande BEHORA – RACHEL, i mi ijo ABRAM – JOHANAN, en Edirne (keri dizir (100) anios dopo di esti pasaje) i me alkeli ouna kamareta mobeliada kon la paga de (100) groches al mez, en la kaza del Tchelebi JEUDATCHE H. ALFASA, vis-avi a el KAL – KADOCH, MAJOR, i entre los amigos ke mi vinian, a vijitar, foe en oun dia de CHABAD ke mi vino tambien i oun mansevo djidio akompaniado de ouna moujer komo de edad de 60 anios i nozotros la resivimos kon mountcha

24      Algounos pasos en la Familia ARIE, en VIDIN.      1780

plazer i li izimos todas las onores merisientes, i nos ke non la konosiamos, foe eja ke mos dicho, ke ejos son de la Familia NAVON i siendo ke sintio ke abacho a Edirne ouna Familia de los ARIES de SAMOKOV, es ke vinimos a ver si saven ejos ke ouna TIA souja stouvo kazada kon oun ARIE, i si es ke lo savemos esto i si somos nozotros de estos ARIES i lis rogo ke mi pedronen, ke jo kero verlos komo de djente son, mosotros mos goustimos mountcho, i tomimos las manos de noevo i mos kontimos algo de moestra BEOGRAFIA, i denpoes foemos i mozotros a vijitarlos, i ejos mos vinieron ounas koantas vezes i se vido ke trava la sangre^[22].

En este anio de 5541, el S-r. MOCHE A. ARIE, en sou butika en VIDIN siempre iva andando i engrandisiendose sou negosio, la venditas ke asia, eran todos en kontante, i todo era en detalle, ejos ke non konosian la lingua Tourka, al presipio soufrian ma mas tarde ejos se tomaron por profesor a oun Djidio, para ke los enbezara los prisipios de la lingua Turka, ansi de mizmo lo isieron i las moujeres, i ejos todos ke ja eran mountchos entelejentes foe ke en poko tiempo, si enpeso algo i a dar a entender i kon las Turkas ke li vinian a la boutika por azer empleos de moda noevas de ropas ke traiva de Kostan, mas tadre ke li enpesaron a vinir a la boutika i de los Begis Turkos, izo ke se tomo oun profesor turko i tomava liksion kada dia, ke en oun enterval de oun anio soupo i avlar boeno i tambien eskrivir.

25       Algounos pasos en la Familia ARIE, en VIDIN.     1781

Ke kon esto gano, ke enpeso a vijitar los dias de Viernes ke era ouzo de los Turkos de vijitarlos i kon esto si ganavan enfloensa, sigoun ditcho ke el S-r. MOCHE A. ARIE, era Talmudisto i savia boeno platikar, i a los Turkos ke ja lis plaze mountcho era ke lo jamavan, i lis azia saver muntchas kozas del TALMUD, el touvo montchos protejos, i levianezas, para su etcho de la boutika i lis tomava rekomendasiones para algunos Begis de Kostan,

En kaza las moujeres vijitavan i resivian vijitas kon grande onor, ejos los ombres eran religiosos, maniana i tadre azian sous orasiones kon minjan en el KAHAL, mantener si mantenian boeno ansi tambien i vistian boeno, el pasatiempo kon amigos lis plazia mountcho, ejos non frikontavan kavanes ni mismo mejanes.

En este anio de 5542, sous dos ijos los mas grandes ke estavan estoudiando en el MIDRACH del RABINO, de VIDIN sovre el TALMUD, se los tomo kon si a sou butika, i en las notches lis dava liksion el PADRE en kaza, i ke son el grande CHEMOEL i el sigundo JSHAK, i el tresero ke es el ABRAM I, el ke vino primer a Samokov, lo decho en el midrach para ke estudiara en la GEMARA.

El S-r. MOCHE A. ARIE, se detchizo de azer la boda i kazarlo a su ijo ABRAAM, i ansi foe ke se pronto para azer el viaje a KOSTAN, por azer sus empleos, de ropas para sou

26        Algounos pasos en la Familia ARIE, en VIDIN.     1782

Butika, i ke a la pasada de ENDIRNE, iva a demandar BODA^[23] kon la entision por koando boltara de Kostan, vinirse djuntos kon la Novia, i en akel tiempo era el ouzo ke si mandava konsfoegros^[24] para traer a la novia, i esto era ke li davan a la NOVIA los KEDUCHIN, de kamino, ke es al grande konfoegro lo azia prikura^[25] el NOVIO, para ketarlo de responsabelita de los rezikos del kamino, a el padre de la NOVIA, lo todo por algounos rizikos ke podran arevar solo ala NOVIA, i el S-r. MOCHE, tambien si pronto i el todo el menester por la BODA, ki es toda komania i para todos eios vistimientas, i mas todo esto ke es el menester para ouna boda, i en este tiempo tambien, li eskrivio ouna karta al konfoegro, asiendoli saver su ditchizion, i esto ke non mando konfoegros foe solo por non azerli gastar al konfoegro sigun ditcho ke sus kundision era por la traidura de la NOVIA, a los gastes del padre de la NOVIA, i el S-r. MOCHE, non le kovro del S-r. NAVON, ni los gastes por si mezmo.

Pokos dias pasando, el S-r MOCHE A. ARIE, ke ja estuvo pronto seja kon sus prontamientos de su etcho de la BOUTIKA, komo tambien i estos de la boda, partio por su viaje para Kostan i arivando a ENDIRNE, iso la demanda de azer la BODA, i el konfoegro S-r NAVON, foe de akorde [akordo], en asigurandolo ke por koando iva a boltar de kostan ke ja iva a estar pronto por partir djuntos kon la NOVIA, i denpoes ke ja estuvo el Signior MOCHE, 2 dias en EDIRNE, partio por KOSTAN.

27      Algounos pasos en la Familia ARIE, en VIDIN.       1782

En pasando komo oun mez de tiempo, el S-r. MOCHE A. ARIE, ke ja eskapo sus empleos en Kostan, se abacho en ENDIRNE i denpues ke estuvo en ENDIRNE, 3 dias ke iso tambien el konfoegro komo media boda, i jamo a sus parientes de EDERNE, i lis dio a komer i se alegraron djunto kon la NOVIA, kon muntchos bailes i kantares, ke konbedo tambien la NOVIA, a sus amigas, ke pasando i esto, partieron el PADRE i la MADRE i 2 mutchatchas sus parientas por akompaniar a la NOVIA, ejos si prontaron todo el menester de la komania, i se alkilaron i a un TURKO, armado por goadrador para el kamino, i de todas las 2 partes kontentes i alegres, ivan viajando el viajar era a KAVAJO seja los OMBRES komo tambien i las MUJERES, i arivando a Vidin, lis salieron kaji la sivdad entera a sus enkontros, porke esto foe para VIDIN, una koza moeva i mui maravioza el traer NOVIA, de un lugar tanto lechos.

Ejos ke ja vinieron SANOS, i kontentes de sus VIAJE repozaron 2 dias, i foe en DIA de MIERKOLES, ke dieron los KIDOCHIM, en la KAZA del S-r. MOCHE A. ARIE, kon muntchos HAZANIM i muntchos konbidados i a todos foeron adulsados kon muntchos modos de konfiturias i las muzikas taniendo se ivan alegrando i kontentandosen, i ala notche konbido a muntchos notabiles i parientes i sus amigos de la Sivdad i komieron i bevieron i se alegraron todos djuntos, i ansi lo izieron todos los 8 dias de la boda, i denpoes ke esto si eskapo foe

28       Algounos pasos en la Familia ARIE, en VIDIN.      1782

ke los detuvo otros 8 dias en kaza a los konfoegros, ke pasando i esto, non kijeron mas estarsen, si saludaron de los unos a los otros en forma de rengrasiamiento i de kontentes, i se Bindicheron, de todas las 2 partes, i abrasaron a la Novia kon tcheros [tchoros] de lagrimas kuriendoles de sus ojos, i meldandoles las miles – Las Bindisiones, de Padre i Madre, i partieron kontentes por sus Viaje, los mismos joros del Padre i la Madre, kontinouaron en la Novia, una semana entera.

(Sovre esto ke joran, los Parientes de la Novia, koando la dechan en la kaza del Novio; avria de demandar?!

Visto ke esto ja egziste, sovre todas las Novias en general Es? porke non estuvo este adjuntamiento formado en regla,? ke al punto de vista, es para los de la parte de la Novia, Joran porke lis revataron un pedazo [pedaso] de sus karnes i non se la poeden tomarsilas atras, i para los de la parte de la Novia [del Novio]^[26], son alegres komo ke revataron un pedaso de djoja valutoza, koando lo estudiara kada enteresente sovre esta demanda, ke responda.)

En este anio de 5543 el S.r MOCHE A. ARIE, kontinouando en su negosio, se iva siempre andando i alegrandose i kontentandose kon su parte, i de verse su negosio adelantando, i rodelado de sus 3 ijos todos sanos i bien idokados en todos los puntos, todos

29      Algounos pasos en la Familia ARIE, en VIDIN.      1783

 kazados, i todas sus Nueras boenas i respiktuozas, i en ouna meza tenerlos a todos sus ijos, ansi ke era siempre alegre i gustozo,

El S-r. MOCHE de este tiempo endelantre, los dias de lunes i djuevis, se iva a 2 oras al dia a el MIDRACH, ande estava estudiando el RABINO de la Sevdad, para estudiar el tambien en el TALMUD, i en otros dias iva i vejitava a sus konosidos BEGIS i MOLLAS^[27] savios TURKOS, i todos los resivian kon muntcha onor, sus platikas era lo mas muntcho sovre los estudios, i mui poko sovre la merkansia, i en okazion si pasava una simana^[28] i non lis iva, era ke lo vinian ejos mismos a buchkarlo, i el S-r. MOCHE, tambien si enbezava muntchas kozas de ejos, i esto lo azia porke su ijos ja la enkamenavan la BUTIKA, mijor de sus PADRE,

Todos los merkamientos^[29], para el menester de sus mantinimiento se azian todos por su mano del S-r MOCHE, i non dechava sufrir a las mujeres por nada, ke por todo esto ke li demandavan, sin en nada refuzarles, al punto si lo traiva, ansi era i kon las vistimientas, el mizmo si okupava i kudiava para azerlies vistidos para todos ejos, enpesando del grande fin a el mas tchiko para sus Noeras lis azia vistidos igual porke non uvieran selos de las unas a las otras, i esto siempre alos plazeres i los gusto di ejas mizmas, ansi i adelantre en todos los puntos, el non si e dechava sirvir, i mizmo si agua kiria bever, si levantava el mizmo i se tomava, por non demandar, ke su karakter era esto.

30       Algounos pasos en la Familia ARIE, en VIDIN.    1783

La forma del vistido ke si vistia el S-r. MOCHE ARIE, era en la kavesa, ouna Boneta, en sinial ke era, HAHAM, en sou poerpo, al prisipio, oun toman^[30], (komo forma de un pantalon antcho,) i denpoes, oun anteri largo de ropa fina lavoro de Damasko, en el bel (talia) si apretava kon oun kouchak (chal^[31]) de lana también del lavoro de Damasko, denpoes ouna Fermena [fermela] de panio fino ki es (un paltiko tchiko i kourto fin la talia) i denpoes oun Binich, de panio fino, largo fin a los pies, el kalsado^[32] era, ounas mestas de koero amario, forma de putin sin gion, i denpoes ounos sapatos godros de koero seja kolorado or amario, i por el envierno, pujava oun kiordi kapladiado de samaras finas i ensima el binich, i ansi vistidos tinia aparte para CHABAD, i aparte para todos los MOADIM seja las del inverano komo tambien i estos del envierno, i de toda samara fina tinia kapladiado, kiordis todos de panios finos, i kada ouno de sou kolor, ansi era de mismo ke tinia i sou mujer sou muntchos modos de vistimientas .

En este anio de 5544, el S-r. MOCHE A. ARIE, partio de moevo por Kostan, lo todo por azer sous empleos para su Botika, el si abacho en Enderne, i lis ezo saver a S-r. NAVON, ke la S-ra BUHURU, estava preniada, i los kombido por ke vengan a el parto, i se gustaron mountcho de esti prenijo, i S-r NAVON, li rogo al S-r. MOCHE A. ARIE, porke abachara torna en

31     Algounos pasos en la Familia ARIE, en VIDIN.    1784

 Enderne en su boltar de Kostan, por razon ke li kerin mandar algunos tchikos prezentes, para sous ija, ke la aman mountcho, i el S-r MOCHE, lis dio palavra de abachar torna en Edirne, i dopo dos días partio por Kostan, denpoes de eskapar todos sus empleos si estuvo en Kostan otros 15 dias, por konoserse kon algunos enfloentes de Kostan, porke si avia jevado muntchas kartas de rekomendasion de los BEGIS, de VIDIN, i su entision era de decharlo a VIDIN, i estableserse en KOSTAN, ma non lo pudo azer, ke non se por koala razon seria el non reintchir su entision.

j [i] por esto es ke devemos krier ke egziste en el Mundo MAZAL i ke devemos de kreerlo, sigun mas denpoes eskrito ja van a meldar los maleris ke li arivaron, i el korason ja li dio de salirse de la Sivdad de VIDIN^[33] solo ke ansi sikretos, de uno en el mundo son kuviertos, i el MAZAL, akonanta, kijendo dizir ke es solo kada uno loke tiene de MAZAL, akejo va aser, sovre esta entision ditcha, el non lo dicho a sus ijos, otro ke mas tadre lo entindieron ma i ejos tambien non li dicheron nada al PADRE.

El S-r. MOCHE, sigun la palavra ke avia dado de abachar a ENDIRNE, lo izo esto, i la djente de su NOERA, la S-ra BUHURU, li mandaron algunos prezentes, i sin estarse en EDIRNE partio por VIDIN, i sigun siempre kontinuo su negosio, sin dingun trokamiento, los dias de CHABATOD i de MOADIM, non avria sou BUTIKA, en esti viaje, lis trucho para toda su djente de su kaza a kada uno modas de VISTIDOS, ala moda de Kostan, ke esto foe ouna

32     Algounos pasos en la Familia ARIE, en VIDIN.    1784

koza moeva para VIDIN, i kon estos moevos vistidos ke lis trucho non si los dechava ke si los vistieran para koando si ivan a ir a vijitar, ande sus amigas, para ke non uvieran embidiamientos porke otra djente non los tinian, era solo ke si los vistian en kaza, en los dias de fiesta, ansi lo azian i los OMBRES.

En este anio de 5545, el S-r. MOCHE A. ARIE, si merko ouna KAZA, pronta fraguada, kontiniendo 5 grandes kamaretas i algo de kortijo, ariento la KALE, ke era de on sierto TURKO de los BEGIS, de VIDIN, por el presio de 450 groches i esto apagarsilos en oun tienpo de un anio i medio, sovre esta merkida se alegro seja el S-r MOCHE komo tambien i toda la djente de su kaza, entre los TURKOS, uvieron algunas avlas a non decharlo merkar ma el si adereso a muntchos sus konosidos BEGIS, rogandoles porke lo protejaran, i ansi foe ke si la izieron tomar ke los turkos en las Plasas ke ejos moravan non dechavan ke moraran los ke non son TURKOS, i denpoes ke ja se enpatrone de todos los dukomentos menesterozos, izo una tchika reparasion en la kaza i se pasaron en eja, mui kontentes, i izo ke jamo a muntchos de sus amigos i HAHAMIN, i lis dio a komer i bever en el dia ke si paso a la kaza, i a los HAHAMIN, lis dio prezentes en moneda, i en poko tienpo si mobilio la kaza entera de todo lo menesterozo, i bivieron todos djuntos, kon sus ijos, i todas sus Familias.

La S-ra BUHURU, ke es la mujer del S-r. ABRAHAM, I

33      Algounos pasos en la Familia ARIE, en VIDIN.    1785

ke vino a SAMOKOV, el primero, ke estava Preniada foe en este tiempo ke li arivaron los dias para parir, la djente de Kaza izieron todos los aprontamientos, para esto komo de prontar las komadres ke eran TURKAS, i mas todo el menester, i kon mountcha levianeza PARIO, un IJO, i foe alegrias grandes para toda la FAMILIA, para la PARIDA, li izieron ouna KAMA alta entornada de muntchos brozlados i de ropas finas, eja la parida etchada en esta kama, (8) dias kon muntcho bien kudiarla, i kada dia la vijitavan a grupos a grupos de las mujeres djudias de la Sivdad de VIDIN, i a todas estas vijitaderas eran kon grande onor resividas i a todas las adulsavan kon el dulse ke si aze spesialmente para las PARIDAS, ke es dulse de NARANDJA,^[34] en las notches li vinian los ombres a bekliar la parida i djugavan kartas i otros djuegos, todos los de kaza seja los ombres komo i las mujeres li mandaron modos de prezentes, seja para la parida komo tambien i para el nasido, el Padre de la parida tambien li mando muntchos presentes, en el dia del birid, ke lo izieron en kaza konbido muntcha djente, i akel dia lo izo Fiesta, i dio a komer a su amigos i a muntchos menesterozos lis dio prezentes en moneda al IJO lo nombraron TCHELEBI – MOCHE, i denpoes era su propia madre ke lo aletcho i lo kudio, (en akeos tiempos era el uso i por el respekto tanto grande ke tinian, ke era mui grande vergoensa de azer algunos djestos, las mansevas delantre las mas viejas, i ke siendo las paridas ja es naturel ke poedin azer todo modo de djestos i

34        Algounos pasos en la Familia ARIE, en VIDIN.    1785

siendo ke era mui grande vergoensa azian ke li tapavan la kara kon un velo para ke non si li vieran los djestos ke podia azerlos ke kon esto tambien li davan kuraje a las paridas, i eja non avlava nada, ke esto lo azian en los primeros partos.)

5546

Sigun ke ja lo tengo eskrito mas antes ke el S-r. MOCHE, A. ARIE, tenia en su BOTIKA, a los 2 ijos mas grandes ke son S-res CHEMOEL, i ISHAK, es en esti anio ke si lo tomo tambien i el S-r ABRAAM, I. ke es al ijo tchiko a sou botika, i mas non foe menester ke estudiara, ke ja tomo sou depluma de HLAHAM ACHALEM, ejos los tres ermanos muntcho aunados kontinoavan en sus negosio kon todas sus foersas sin kansarsen i kon el mas grande aunamiento, i kon muntcho respektarsen de los unos a los otros, Sovre todo ke si akonsejavan de los unos a lo otros i non tuvieron nunka enojos, sus S-r. PADRE, ke los via era ke si li jorava de la alegria, i siempre era ke los akonsejava, solo kon dizirles guadra la ermandad, IJOS.

El S-r. MOCHE A. ARIE, li dicho a su ijo el grande S-r. CHEMOEL, porke si pronta, ke van a partir djuntos por KOSTAN, para amostrarle los lugares de ande azia los emplejos i tambien para rekomendarlo ande todos sus konosidos seja de las sivdades por ande pasava komo tambien, i en los merkaderes de las plasas de KOSTAN, i la suja entision foe para ke por endelantre

35       Algounos pasos en la Familia ARIE, en VIDIN.     1786

non ir mas el S-r MOCHE, i ansi foe ke ejos dopo unos koantos dias estuvieron prontos, i partieron djuntos, el PADRE kon el IJO, i ande abachavan mientras el kamino lo iva levando^[35] i amostrandole i rekomendandolo ande todos sus konosidos, i tambien enbezandolo todo esto ki es menester, sus empleos ke azian eran todos kon moneda en kontante, i para esti viaje ejos si jevaron dos tantos de moneda, de loke si jevava el S-r. MOCHE, koando se iva solo, i en arivando a KOSTAN, ejos izieron sus empleos mas grandes i tambien de algunos artikolos moevos, i denpoes estuvieron unos koantos dias mas muntcho por kaminarlo i amostrarle al S-r. CHEMOEL, los mas enportantes lugares de KOSTAN. i denpoes si abacharon a ENDIRNE, i izieron tambien algunos tchikos empleos de drogas, i arivando en VIDIN, ejos los tres Ermanos kon grande amor, lavoravan i respondian a todo esto ke lo demandava la butika, i ansi era ke sus negosio lis iva siempre augmantando, i el S-r, MOCHE, sus PADRE, iva andando i konsolandose, de ver a sus IJOS, aunados, i visto a esto non iva endo muntcho por la butika, solo ke las tadres koando ja si eskondia el sol ke es ala TURKA 12 la ora de la tadre seravan la butika, i rekojija la moneda ke vindieron entre el dia i se tomava en nota en un tchiko teftiriko, ke lo jevava en el petcho, i se ivan a kaza, non tenia livros de kontabelite, ejos los ombres ke si ivan a demaniana ala butika, si estavan fin ke la seravan la tadre, i de kaza lis traivan koza de komer por la medio dia, i las mujeres era

36      Algounos pasos en la Familia ARIE, en VIDIN.     1786

ke komian solas en kaza, ejas las mujeres denpoes ke la kumieron si non lis vinian sus amigas a vijitarlas, era ke si ivan ejas i guadravan HAREM,^[36] de mizmo komo las TURKAS, ke era ke si vistian un FEREDJE, seja de panio or de ropa de seda i en la kavesa si metian un Jachmak de toka fina blanka i delgada en tapandose tambien la kara kon decharse solo la boka avierta, ke ansi era todas las mujeres djudias ke jevavan, ma las kirstianas non jevavan, i tambien Turkos i kristianos en kasas de djudios non entravan sin ke batieran la poerta, por razon del Harem sigun el uzo turko, i mas tadre se izo de uzo a non entrar ni menos djudio en kazas de djudios sin batir la poerta, ke era solo por razon de HAREM, i koando ja era 11 la ora a la Turka de la tadre ja kalia ke estuvieran en kaza, ke mujeres mas tadre de esto non kamenavan por las plasas, i kon los ombres de notche non si podia kamenar sin fener, ke komo lo enkontravan las djandares^[37] ke estava sin fener lo metian en prezo, i a la maniana lo davan al Djuzgo i lo kondinavan seja por un mez de prezo or 100 groches de Djeza ke es Endamneta, kon ansi leis goadravan el reposo.

En este anio de 5547, la S-ra BUHURU, mujer del S-r. ABRAM, I. pario un sigundo IJO, i para esti parto vinieron S-r NAVON kon su MUJER, al parto i izieron lo mezmo del primer parto kon kama alta i muntchos bruzlados, i de mizmo la

37      Algounos pasos en la Familia ARIE, en VIDIN.      1787

vijitaron la Sivdat entera de VIDIN, seja las mujeres entre el dia komo tambien i los ombres en las tadres, i aparte las notches vinian mansevos a guadrar la parida, ke kantavan i djugavan i se alegravan, de mizmo li mandaron a la PARIDA, muntchos prezentes, toda la FAMILIA, i S-r. NAVON djunto sus mujer li trucheron muntchos prezentes para la parida i aparte FATO^[38] para el moevo nasido, todo de ropas finas i brozladas, sigun el uzo de ENDIRNE, i en el dia de CHABAD, ke la PARIDA estava en la kama, los Ombres se ivan al KAAL, i se merkava el GABAJUD^[39], el PARIDO, i jamava SEFER TORA, a todos sus PARIENTES, i los PARIENTES, li merkavan MISVOD, al PARIDO, i en el KAAL, era uzo ke el HAZAN, kantava el NICHMAD, kon el KADICH, en los CHABATOD, ke avian fiestas sea de PARIDAS, komo tambien de BODAS, i denpoes en la AZARA, del KAAL, konbedava al kolel entero, solo a los ke ja eran kazados, i se asentavan en los bankos ke ja estavan etchos para esto, el RABINO de la Sivdad, azia una DERACHA, konviniente a la PERACHA de la Semana, i algo sovre la kistion de la fiesta, i denpoes dizia el HAZAN, el KIDUCH de CHABAD, kantandolo, i denpoes era los PARNASIN, de la HEVRA KEDUCHA, ke van a espartir, kon unos TAERIS de kovre al prisipio davan a un DJENET ke es komo un (kifiliko [kifliko] amasado kon goevo) i esto algunos los encharopavan, i denpoes kon otros ansi TAERIS, lis davan a todo a un goevo enhamenado ke kalia ke estuviera bien

38       Algounos pasos en la Familia ARIE, en VIDIN.      1787

kotchos fin ke devinian kolorados i denpoes los mismos PARNASIM kon unas redomas de PLATA i a 2 tasas tambien de plata en sus manos ke kontinia kada tasa a 25 dramas (75) gramos de Raki de 18/20 grados lis davan a todos, i en tomando kada uno la tasa en su mano i antes de beversela, se ivan saludando del uno al otro kon dizirsen CHABAD CHALOM, ke eskapando i esto si metia el PARIDO, delantre la poerta por ande va a salir el poevlo, todos kon una temena, lo saludavan, en diziendoli el boen BESIMANTOV, i todo esti poevlo se ivan deretcho a la kaza de la parida, i si asentavan propio en la kamareta ande estava la parida, (era solos los ombres ke ivan sin sus mujeres a razon del HAREM ke goadravan) i los adulsavan^[40] a todos kon a un TAJO de dulse de narandja, i dizian de moevo el BESIMANTOV, i se ivan kada uno a su kaza, los parnasim ke restaron en la AZARA, azian de mismo i los sirvian los CHAMACHIM solo ke tinian una previlegia de mas, i era ke tomavan a 2 goevos i a 2 tasas de raki, i denpoes azian lo mizmo i los CHAMACHIM, i denpoes se ivan djuntos los PARNASIM i los CHAMACHIM a la kaza de la PARIDA, para vijitarla, ke kon entrar de la poerta de la kae, para azer saver a la djente de kaza ke era los PARNASIM, ke vinian, kon boz alta gretavan 2 de los grandes CHAMACHIM, BESIMANTOV, i salian los patrones de kaza a resivirlos i los jevavan a la kamareta de la PARIDA i los adulsavan kon el dulse de narandja de TAJOS mas grandes

39        Algounos pasos en la Familia ARIE, en VIDIN.   1787

i por sus previlegia ke tienen lis davan tambien i a un vazo de raki, i se ivan a sus kaza, ansi se azia i koando avian bodas de kazamiento. a la medio dia uvieron sus amigos a komer tambien i HAHAMIM i HAZANIM, i komieron i bivieron ala artura i los HAZANIM, kantaron muntchos PIZMONIM, i el uzo era en ansi FIESTAS, ke komian los ombres en mezas aparte i las mujeres en mezas aparte, i la forma de las mezas eran ke espandian en medio la kamareta serka al mender, una sofra, i en medio la sofra una banketa bacha i ensima al sini de kovre redondo i en medio del sini dos panes kon un kotchio i un salero para azer el amosi, ke era ke lo azia el mas viejo de la meza or el patron de la kaza, i al deredor del sini rodejavan un pichnir^[41] [pichkir] por alenpiarsen las manos, i en bacho deredor de la meza metian kavesales i se asentavan todos en sima de los kavesales en bacho, i traivan el plato de la komida i la mitian en medio del sini i todos tomavan de esti plato kon la mano, komian, esto era en la kamareta ke estava la PARIDA, i la parida li davan agostar de algunas komidas levianas, i en el dia del BIRID, tambien foe ansi ke uvieron muntchos konbidados, i lo nombraron IOSEF, kali seja ke S-r, NAVON el Padre de la Parida si jamava Josef, porke el uzo es ke el sigundo ijo es de la madre i tieni el deretcho de meterli nombre de los parientes de madre, ansi i algunos otros deretchos.

40       Algounos pasos en la Familia ARIE, en VIDIN.    1787

Sovre ansi komportos i uzos de akejos tiempos ke tinian en akel tiempo, enfrente de las PARIDAS, i ke non korespondeja nada a lo del tiempo de agora, kada meldador, poedi azer una demanda maraviosa, es de azerlis saver, ke las naturas de akel tiempo eran tanto sanas i foertes, koza ke non si lo poedi la persona imajenar, en akel tiempo las PARIDAS, el 90% de ejas al 2 dia ke parian ja eran sanas, sigun las Kazalinas del tiempo de agora, loke estavan en la kama era para ke la vijitaran i tambien asperar los 8 dias para el birid, avian muntchas Paridas en los dias de djuevis i viernis ke las mujeres non vijitan a razon ke alimpian sus kazas i se prontan komania para CHABAD, era ke muntchas Paridas, si abachavan de la kama eskombravan i la barian la kamareta ke eja estava, solo si serava la poerta para ke non la vieran, i las Paridas ke parian ijas era ke al 3-er dia ja levantava de la kama, i se merava la kaza lo todo komo de antes, solo kon una kriatura de mas, i non tinian nada.

En este anjo de 5548, ejos los 3 ermanos eran foertemente en okupados sovre el etcho de sus butika i ansi eran ke ivan siempre engrandisiendolo, i li iva endo muntcho avante, asta el grado ke lis kalio engrandisieran la butika i se tomaran las Personales sus PADRE era jeno de aligria i mas non iva muntcho por la Butika ni menos ke los enbezava en nada, ejos los 3 ermanos si mitieron

41     Algounos pasos en la Familia ARIE, en VIDIN.   1788

de akordo por apartarsen sovre los enkamenamientos de los etchos dela butika, i resivirsen kada uno de los 3 ermanos, a una dereksion a kada uno, i kon la kontentes del sus S-r PADRE, ejos izieron kontratos, deklarandosen el kapital de sus S-r PADRE i las partes ke van a tener kada uno en las GANANSIAS, i izieron, ke va a tomar la metad de la ganansia el PADRE, kon ke tiene de gastar el PADRE, todo el menester por el mantenimiento para todos ejos todo tiempo ki estan en una meza i koanto por sus vistir ke si van a gastar kada uno por sus kontos, i kon la otra metad ke tinia de ser para todos los 3 ermanos a igoal parte,.

Koanto a sus reglamiento de la BUTIKA, lo izieron de okuparse el CHEMOEL, solo por azer los empleos de las ropas i la admenestrasion de el etcho de la BUTIKA entera, i el S-r. JSHAK, jevar los kontos, i la korespondensia, i el S-r. ABRAAM, el vindidor de las ropas en detalio, i azer saver a el S-r. CHEMOEL, los artikolos ke mankaran en la BUTIKA sovre ejo todos los 3 djunto i sus S-r. PADRE, si afirmaron kontratos, i kontinoaron en sus negosio, i foeron siempre profetando, i muntchiguando sus etchos i todo kon la union Ermandad guadravan asta el punto del kavo, i todos a la una lavoravan sin kansarsen, i sus S-r. PADRE, visto a todo esto se iva konsolandose i artando de la alegria, el salia a la plasa en algunas dias ke lo mas muntcho ande los BEGIS TURKOS a pasar la ora, i tambien se iva a el MIDRACH, para estudiar en la

42      Algounos pasos en la Familia ARIE, en VIDIN.    1788

GEMARA, sigun ditcho ke lo konosia muntcho bien esti estudio.

            El S-r. CHEMOEL, ke es el ermano grande, i kon la kontentes de todos ekos [ejos] se pronto, por azer el viaje a KOSTAN, i en mizmo tiempo ir tambien a BRUSA, i en pokos dias ke ja estuvo pronto partio por su viaje, i denpoes ke estuvo en KOSTAN i eskapo todos sus empleos ke foeron muntcho grandes, partio tambien a BRUSA, i topo muntchos artikolos konvinientes para sus BUTIKA, komo dimalos para alempiar kara i modos de los dimalos de banio, i aparte muntchas maneras de ropas ke las lavoran en BRUSA, por vistimientas i mobilias de kaza i otras mas ansi ropas i lo todo muntcho konvenibles era ke podia azer grandes konsumasiones i tambien la konkorensia, ke avian i otros muntchos merkaderes de ansi artikolos en VIDIN.

En este anio de 5549, el S-r. MOCHE A. ARIE, ke ja lo via ke sus ijos enkamenavan la BUTIKA, mijor de esto ke era menester, foe ke non abachava a la plasa ni menos ke vijitava la butika, solo era en las notches koando vinian a kaza los ijos li raportiavan al Padre todo esto ke paso mientres el dia, ansi era ke si estava en kaza, ma esto non li foe tanto boeno para la salud porke dia kada dia iva endo mas flako, ke kali dizir poedi ser porke si aparto enteramente de el djemnastik ke lo tenia koando estava en la botika, kijendo dizir ke kali la persona non deche su lavoro ke lo lavoro fin a su vejes seja kon las

43      Algounos pasos en la Familia ARIE, en VIDIN.    1789

foersas fizikas seja kon estas de meojo, i en retirandosi enteramente kali seja li aflaka la sirkulasion de la sangre, i li vienen flakezas, i de los muntchos modos de madjunia ke tomava a razon ke en akel tiempo non avian medikos komo agora, ke era solo kon ansi madjunes ke avian maestros ke los savian azer i tambien savian por koalo empliarlos, ma torna kon todo non li ajudava en nada era solo ke i va apokandose, i siendo ke era mui sano era ke lo iva somportando, de esta flakeza ke iva tiniendo el S-r. MOCHE, lis foe a sus ijos grande ansia.

El S-r. MOCHE, ke los via a sus ijos atagantados siempre los akonsejava porke non deskorajan, i ke ja li pasara, i ke non decharan atras nada de sus etchos, i ke seigan kurajosos, ke altramente, poeden tener algunos danios, i sus ijos kontinuavan sigun antes, solo ke estavan pensativles por sus PADRE, esto li tuvo serka 3 mezes i denpoes li paso todo i kada dia si iva a la butika i si estava la maniana 2 oras denpoes de medio dia tambien 2 oras, ke esto lo azia para tener algo de enbivisimiento, foe ansi pasando algo di tiempo.

Las mujeres en kaza eran todas mui aunadas ejas non tinian entre ejas deferensias, non si davan kechas de las unos a las otras koando alguna de entre ejas non iva tanto presto por los lavoros de la kaza, ejas eran todas akurat i lavoraderas sin kansarsen ejas si katavan muntcho de las unas a las otras, a la Esfoegra non la dechavan lavorar, toda koza del menester de la kaza

44      Algounos pasos en la Familia ARIE, en VIDIN.    1789

 si se demandava de sus esfoegra, i todas sus noeras la respektavan i la sentian i por enfrentante^[42] eja tambien las amava i non lis dava dinguna kechas en kavzo de algunos jeros ke azian, ejas non tinian mosas en kaza para ke las sirvieran or ke lis ajudaran para los etchos de la kaza, era solo ke ejas mismas lo lavoravan lo todo, para alempiar i azer las kamas i otras, en la kamareta de sus esfoegra, lo azian sus noeras a un dia a kada uno, ansi era i para meter la meza i traer la kumida ala meza i mas todo el menester de esto tambien lo azian a un dia a kada uno, era ansi ke non tinian dingunos pleitos, de mismo era i los ombres ke eran mui aunados en todos los puntos, i por esto kali dizir ke bivian gustozos i kontentes.

En este anio de 5550 ejos los 3 ermanos kontinoavan foertemente en sus etchos, i siempre ivan muntchiguandolo i ansi foe ke devinieron unos de los mas grandes merkaderes de VIDIN, sovre ejo uvo djente ke si enselavan, i foeron buchkando para meterlos en mal entre los TURKOS, ejos ke ja si konsintieron presto si supieron mui bien defendersen, i de sus etchos nada atras non dechavan, el S-r CHEMOEL, a detras del RAPORTO ke li dieron sus ermanos, foe ke los artikolos de la BUTIKA, ja eran muntcho en manko i ke kalia iziera de moevo un VIAJE, i ansi foe ke si pronto i partio torna por KOSTAN i BRUSA

45      Algounos pasos en la Familia ARIE, en VIDIN.     1790

por azer los empleos menesterozos, i ansi foe ke en este viaje izo una suma muntcho grande de las de mas antes, seja en KOSTAN komo tambien i en BRUSA, i en este viaje el S-r, CHEMOEL resto i en KOSTAN, i en BRUSA a unos koantos dias denpoes ke ja eskapo sus empleos, para konoserse kon algunos merkaderes mas grandes i enbezarse de ejos algunas metodas mijor sovre la merkansia i ansi foe ke si enbezo muntchas kozas moevas ke el non las konosia, i koando vino a VIDIN, izo algunos trokamientos en la BUTIKA.

Sus vistimientas de los 3 eran, ke en sus kavesas jevavan una fes grande kon un piskiul de seda preto, i ensima sardiado kon un kuchak kolorado komo un sarik ke jevan los TURKOS de la TRAKIA, sus kavesas eran arapadas enteramente kon decharsen ulufias, kortadas en la forma de una letra DALED, sus barvas non si las arapavan ni se las kirkijavan, en sus pies jevavan unos laptchines i unos sapatos kolorados or pretos, sus vistidos era un tchakchir de panio denpoes un anteri de dimikaton​ largo i un kuchak apretado en el bel i ensima una fermela de panio i dopo ensima un djube de panio i por el envierno un kiordi kapladiado kon modos de samaras ansi tinian aparti por los CHABATOD i los MOADIM, i komo eran HAHAMIM jevavan en lugar de sarik en sus kavesas una boneta estos vistidos eran i los padres i los ijos ke los jevavan i non trokavan las modas, las mujeres tambien era siempre una forma de vistidos ejas jevavan las viejas en sus kavesas

46      Algounos pasos en la Familia ARIE, en VIDIN.     1790

un tokijo ke era en forma de una boneta puntuda en la punta lis metian un tchiko peskiuliko de seda or de klabudan,^[44] i deredor de la ditcha tokejo lo ermosejavan kon modos de brozlados i ichlemes^[45] i klabudanes i resentavan modos de dukados tchikos i grandes i, djojas de perla i de dejamantes, i las mansevas jevavan serka a esta forma solo ke era jano i mas ermozo ejas tambien lo ermozejavan kon mas rozas i brozlados i testemelis lavorados finos kon klabudan i bril de oro i en el tepe lo intchian todo kon perla dela boena i djojas en dejamante i piedras boenas, esto si lo sarijavan fin a las orejas por ke non si lis vieran los kavejos sus vistir era anteris de 3 aldas de las ropas las mas karas lo todo lavorado kon bril klabudan i tertil de oro i chalvares de ropas de seda de panio lo todo tambien lavorado kon klabudan i bril ensima de esto una fermela de panio i de ropas de seda kon mangas antchas, esto era lavorado enteramente kon klabudan i bril i koando van a ir a vijitar kalia ke metieran un tcherkes en forma de un palto largo lavorado la talia entera i las aldikeras i las mangas todo kon klabudan i tertil de oro, en los pies jevavan tchorapes de lana delgada alhenjados kon muntchos modos de kolores de lanas maneras de rozas i lavoros mui delikados ke esto si los lavoravan ejas mizmas, sus kalsado era sapatos de koeros delgados i mui finos i todos lavorados karas kon seda i kon otros filos, i ensina de todo se vistian el feredje kon el jachmak ermozo i se kamenavan en las plasas.

47      Algounos pasos en la Familia ARIE, en VIDIN.     1790

El S-r. MOCHE A. ARIE, enpeso torna a estar algo malato, ke sus ijos si ivan atagantando de verlo a sus PADRE, kada dia aflakandose, ejos jamaron a muntchos MEDIKOS, de akel tiempo, por ke lo kuraran ma en nada non li ajudava, fin a ke se etcho en la kama, de dinguna dolor non sufria, solamente era una grande flakeza, ansi foe komo un mez de tiempo, i en una de maniana lo toparon moerto, mas para nunka levantarse, todos los medios ke izieron foeron sin dingun provetcho, i en akel dia mizmo lo rijeron^[46] al uzo Djidio, en sus funerales, estuvieron la Sivdad entera, (en akel tiempo era el uzo ke seravan el tcharchi entero para akompaniar al moerto,) estuvieron todos los HAHAMIM i los HAZANIM, adelantre el moerto kantando KINOD, i el poevlo entero detras del moerto, lo jevavan 4 personas a los ombros, ejos los 3 ermanos dieron muntcha SEDAKA, seja a los HAHAMIM HAZANIM i a todos los menesterozos de la sivdad, guadraron los 7 dias de limunio asentados en bacho, kada dia vinian 10 HAHAMIM, meldavan, MICHNA, ZOAR, TEELIM, dezian MINHA ARVID kon MINIAN, kada demaniana se ivan a el KAAL dizian la TEFILA, todos los 7 dias ke estuvieron asentados en kaza kada dia los vijitavan el kolel entero de Vidin i lis vinian a grupos, grupos, seja los ombres komo tambieh las mujeres, en todos los 7 dias i las notches, ki estuvieron asentados, para kada meza lis ivan unos de sus amigos djunto kon la komida i komian djuntos, porke non si podia guizar en kazas ande uvo moerto mientres los 7 dias ki

48      Algounos pasos en la Familia ARIE, en VIDIN.     1790

ke estavan asentados, i koando si levantaron del siete, si foeron todos ejos ombres i mujeres al semitario, i se rodearon todos ejos al deredor del lugar ande estava enterado, de moevo lo joraron i las mujeres a boz alta kantavan las endetchas ke ja avian apropiado para esto mujeres ke savian endetchar, i denpoes ke meldaron los HAHAMIM, unos koantos PERAKIM de MICHNA, si vinieron en kaza i de moevo meldaron los HAHAMIM, el LIMUD, ke ja esta presentado [resentado] para el kortamiento de los siete dias, i denpoes, dieron a komer a todos sus amigos, i los HAHAMIN, i HAZANIM, i MECHARTIM^[47], i muntchas mezas de menesterozos, seja a ombres komo tambien i a mujeres, ansi de mizmo lo izieron i en el kortamiento del mez, i mientres el anio entero non salian a dinguna vijita, i se distian [vistian] vistidos de limunio, i ivan kada dia a el KAAL, a MINHA, ARVID, TEFILA, la lampa en el KAAL, se ensindia a sus gastes, mientras el anio entero, davan muntcha SEDAKA, ejos en el KAAL, si asentavan en el AVEL, lugar apropiado solo para los ke estan en el anio de sus parientes, ejos merkavan la AFTARA, lo mas de las semanas de el anio, koando non avian otro merkadores, ejos los ermanos izieron eskrivir una piedra, su nombre del sus S-r. PADRE kon la data, i se la fraguaron, en su tomba, Jo MOCHE A. ARIE el II, ke estuve en VIDIN, en el anio 5633, i ke estuve en la kaza del S-r. REFAEL ARIE, i avlando por la BIOGRAFIA ARIE, mi konto, ke en SEMITERIO, de los DJIDIOS, toparon en una Tomba eskito [eskrito] en una piedra, ke apenas si

49       Algounos pasos en la Familia ARIE, en VIDIN.    1790

pudo meldar, solo, ARIE, i 5550, lo todo eskrito kon letras de djidio en MEROBAH, es ansi ke esta piedra si poedi admeter por verdad ke es la tomba del S-r. MOCHE A. ARIE el ke vino primer a VIDIN, i tambien ke murio en esti anio.

Ejos los 3 ermanos komo i de antes mui bien aunados kontinuavan en sus negosio, solo ke en este anio non izieron dingun viaje, i denpoes de la moerte de sus S-r. PADRE, pasando komo 3 mezes ejos, kon la kontentes de todos los 3 ermanos, si meraron un bilanso, ke si toparon mui kontentes, lo koal ke non lo esperavan, i si izieron de moevo kontratos, para ser torna HAVERIM, i para kontinuar el mizmo etcho, a igual pursiones, solo ke tienen de jevar konto aparte por los gastes de la kaza por sus mantinimientos, ke por sus gastes partikular, por kada uno de ejos ja lo tinian aparte i de el tiempo de sus S-r. PADRE.

Non uvo ken mi supo dezir si los ermanos mas grandes tinian ijos, ijas, poko or muntcho.

En este anio de 5551, ke la kortaron el anio de sus S-r. PADRE, i kontinuando en sus negosio de la BUTIKA, El S-r. ABRAAM, RAPORTEA, a su ermano el grande ADMENESTRADOR de la butika aziendole saver ke ja estavan en muntcho manko de muntchos artikolos de la BUTIKA, sovre ejo tomaron una

50      Algounos pasos en la Familia ARIE, en VIDIN.     1791

ditchizion para azer el viaje, en ser ke el anio pasado non lio [lis] izieron, i ansi foe ke si lis rekojo una suma bien grande de moneda, ke pokos dias pasando, el S-r. CHEMOEL, estuvo pronto i partio por VIAJE,

En akejos tiempos komo non avian gazetas, ni telegrafos ni menos pochtas a las deretchas, ansi era ke non savian de nada por lo ke pasava en sus Paiz, ke por dezgrasia i desplazen [desplazer] en el kamino lo enkontran una banda de ladrones, i aun kon todo ke ja era akompaniado de guadradores TURKOS, anke mui bien armado ma non li pudieron en nada ajudar, i li rovaron toda su moneda, ke li decharon al menos ni para gasti de poder boltarse atras, venirse a VIDIN, ke ja si kere bien entindido en ke manera de apreto toparia, de la otra parte, tuvieron mas negro ke kompanias grandes de revolusionarios veluntarios TURKOS se ispandieron de la parte de la TUNA^[48], mas muntcho se espandieron en VIDIN, i estrueron la sivdad entera i revataron, todo bien ke toparon seja por las kazas komo tambien i por las Butikas, i ansi foe ke lis revataron tambien todo esto ke enpatronavan seja en kaza komo tambien i en la BUTIKA, de la FAMILIA ARIE, de VIDIN, esta roina foe.

Sigun konta, el TARIH OSMAN I^[49], (istoria Turka) es ke en esti tiempo, en 1793-4 a la koenta Kristiana, uvieron unas foertes gueras, entre el TURKO – RUSO, ke los Rusos

51      Algounos pasos en la Familia ARIE, en VIDIN.    1791

okuparon la Sivdad de TULTCHA, i esto foe ke izo desparzer la armada entera TURKA, i foeron esti modo de djente ke ivan revatando, i el TURKO, visto ke non iva a poder reuchir si konrogo de las potensias de la Evropa, i ansi foe ke La PRUSIA i la INGLITIERA i la AUSTRIA, aprimieron a la RUSIA, por detener la guera, i izieron un armesticio, por konvenirlos ke turo 9 mezes, i foe en jach, ke si afirmaron los kontratos, i era en el tiempo del SULTAN SELIM III, la razon ke non pudo reuchir el TURKO, foe por razon ke la FRANCIA, tenia uvligo de abasteser al TURKO, toda lo menester de munisiones de guera, i siendo ke non abastisio foe ke los TURKO, pidrieron i en estos tiempos tambien ouvo revulasion en la FRANSIA, ke entro NAPOLION BONAPARTE, por PREZEDENTE de la REPUBLIKA, i denpoes ke ja foe PREZEDENTE, NAPOLION, izo de moevo konvision kon el TURKO, i li mando a KOSTAN, una partida de Muendizes, i muntchos Ofiseris por la armada, i por artileria enbezados soldados la suma menesteroza, i por la dokumhane^[50], (fonderie) por el arsenal, li mando tambien maestros kon todo el menester de los enstrumentos i una partida de TIROS en suma todo 800 personas, i avrieron i fondaron ARSINAL, i FONDERIE^[51], i aparte resento un ALAI de ARTILERI i uno de KAVALERI, i un TABUR, de INFANTERIE

52       Algounos pasos en la Familia ARIE, en VIDIN.      1791

de Soldados TURKOS, kon ke lis azian exersisio los ofiseres Francezes i aparte se dio orden a todos los jeni Itcheris, ke agan azer exersis a sus Soldados, (tambien TURKOS, ke sovre estos Soldados de los Jeni Itcheris ja tengo de eskrivir adelantre), al uzo moevo, porke fin a este tiempo en los Soldados TURKOS, non avia exersisio, i TEPETENLI ALI PACHA uno de los grandes jeni-tcheris de la ALBANIA ARNAUTLUK, rekojo su grande armada en ECHKODRA, i partio por la MOREJA, i izo una grande guera, todos los jeni- Tcheris de la TURKIA, eran prontos para partir, por vinir en la ajuda del SULTAN SELIM III, ma el GENERAL NAPOLION BONA PARTE non lo alesensio, asigurandolo ke el lo va azer de otra for, a [forma] i agora ke divia de afirmar el kontrato, de la konvension si izo el JACH ke foe ke si li dio al RUSO, toda la KREMEJA, KOPAN, i la BESARABIA, en dechando para el TURKO, solo el BUGAZ DE SUNNA, ke esto koando vido el SULTAN SELIM III, lo afirmo en jorando i en akel dia mizmo si keto la korona i se la dio a SULTAN MUSTAFA, IV, ijo de SULTAN, ABDUL HAMID, i denpoes el GENERAL NAPOLION tuvo grandes entindimientos kon la RUSIA, AUSTRIA, ITALIA, SPANIA, i RUSIA lo todo en favor del TURKO.

Koando ja bolto el S-r. CHEMOEL, de su viaje, ke lo avian soidijado los ladrones, i viendo todo esto ke lis akontesio tambien i en kaza, todos a la una joraron kon grande saluso de versin en el grado ke arivaron, ma torna kon pasensia se ivan de

53     Algounos pasos en la Familia ARIE, en VIDIN.      1791

los unos a los otro konortandosen, i kon la esperanza ke de moevo van a poder torna lavorar, ma non foe ansi ke las reboeltas eran dekontino sin kedar, ke si revultaron tambien todos los jeni-tcheris i ivan aziendo mas grandes estruisiones, de las de antes ke ansi foe ke kedaron enteramente moi vazios en todos los puntos i era ke a penas si estavan pudiendo ketarsen sus mantinimientos, kon la mas grande mizeria, esto foe kontinuando 3-4 mezes en todos los ermanos ja non avia kedado kolor en sus karas ejos ja foeron todos mui flakos, de mizmo eran i sus mujeres i kreaturas, ejas las mujeres sin avregonsarsen, salian por las plasas buchkar a ganarsen de koalo foesa ejas tomavan los lavados, de algunos de los S-res i de los hotelis para lavarselos, i de esto ganarsen koalo foesa, i para vinir i ejas tambien en ajuda para gastes de la kaza, ejas foeron a espondjar, en kasas de los S-res ejas tambien si azian guizanderas koando avian bodas, en kurto de todos los puntos ejas todas las sus mujeres salian kada dia para topar ke panar [ganar], estas kozas viendo sus maridos era ke joravan i se estrimisian, i non savian koalo azer, foe un dia ke S-r. CHEMOEL, sus ermano el grande jamo a sus ermanos los mas tchikos por akonsejarsen i topar un molde por sus vidas de el avinir, i en sus adjunta ke tuvieron foe, kon a tchoros de lagrimas kuriendo de los ojos de todos 3 ermanos kontandosen los tiempos pasados i todos los males ke lis arivo agora, lis dicho el S-r. CHEMOEL ke su edeja era ke en esta Sivdad de VIDIN, non tieni

54       Algounos pasos en la Familia ARIE, en VIDIN.   1791

dinguna esperansa de algun mas boen avenir, i ke su edeja es sin tadrar dingun tiempo irmos kada uno de buchkar lugar ande vamos a poder bivir kon onor i non ke moestras mujeres vaigan de kaza en kaza a lavorar para mantenermos, jo esto ditchizado a esto i vozotros estudia la koza, i azeldo komo vos parese mijor en mui grande desplazer esto ke vos esto avlando, mos kale kon boz mas alta jorar, por la ruina mos arivo, i aparte mas muntcho jorar por la piedrita ke tuvimos en el anio pasado kon la piedrita de la persona moestro tanto AMADO PADRE, MOCHE A. ARIE, i todos los 3 ermanos kon grande SALUSO^[52], JORRON fin al grado ke kalio vinieran djente de afoera para apartarlos ke de esta ansia todos los 3 si foeron en kaza sin tener mas la foerza por salir muntchos dias a la plasa.

Pokos dias pasando el S-r. CHEMOEL, se prikuro algo de moneda i li decho a su mujer por Los menesteres de su mantinimiento de pokos dias i partio por la ROMANIA, i se foe a TURNO SEVERIN, i este enchenplo lo tomo tambien i el S-r. ABRAAM, ke i el tambien si prekuro 20 groches, i los 10 groches los decho a su mujer i kon los 10 groches partio de VIDIN, a pie i se vino a SOFIA, el S-r. ISHAK, resto en VIDIN, esto mos enbeza ke los 2 ermanos eran mas kuradjozos, i tenian amor propre^[53], ke sigun van a meldar adelantre ja van aver ke todos los 2 ermanos profetaron de esta detchizion i koanto al S-r. ke resto en VIDIN, non tuvieron grandes adelantamientos.

55      Algounos pasos en la Familia ARIE, en VIDIN.     1791

En las partiensas de los 2 ermanos seja el grande S-r. CHEMOEL, ke partio por el TURNO-SEVERIN, en ROMANIA, komo tambien i el S-r ABRAAM, ke partio por SOFIA, ejos estuvieron mui kurajiozos, i kon la mas grande jena esperansa ke i van a reuchir las sujas entisiones, de mismo foe ke i sus mujeres, los mandaron kon el grande kuraje en BINDISIENDOLOS solamente, KAMINOS BOENOS, todos los 2 ermanos abrasaron a sus mujeres i sus kriaturas, en bezandolas, i koriendoles de todas 2 partes, a unas koantas lagrimas de sus ojos, i ansi foe sus partensia.

Aki se eskana [eskapa] la BIOGRAFIA, i algunos pasajes, i uzos, de el tiempo ke bivio el s-r. ABRAAM, I. el koal foe primero ke vino a SAMOKOV, en su estar en VIENA, i en VIDIN, kon su PADRE i sus ermanos.