חריבי יוסף א. אריה עד 5592 • היפרדות בני חריבי יוסף אחרי מותו

506

De aki i en delantre si enpesan las partidas, de la Biografia, de Hr. Jesef A. Arie,

507                                 Biografia de Hr. Josef A. Arie en Samokov                            1829

En el anio de 5589, sigun eskrito en oja 265, de esta Biografia, la manera ke ejos los 4 ermanos denpoes de la moerte de sus Padre, ke si espartieron, i ke kada uno si aparto sovre koal negosio devijan de lavorar, en resiviendo kada uno su parte ke li revino de eredad de su padre, ke lo todo lo izieron igualmente las partes sin ke reklamaron los mas grandes ermanos alguna suma de mas en ser ke ejos ja lavoraron longo tiempo djuntos kon sus Padre, ke sus furtunas de a kada uno foeron de a 50 mil groches, ke la resivio kada uno sigun de loke ja lo eskrivi de el N-ro 265 i endelantre i kon la kaza ke tenijan ke era de el S-r. de Mehmed Emin AA. dada a el S-r. Abraam I. para ke morara en eja toda su vida, de koala manera foe tambien entregada a el S-r. de Mehmed Emin AA. tambien ja esta eskrito, i el enteresante lo poede meldar,

            El S-r. de Hr. Josef, de prisipio, i antes de meterse en el lavoro ke el iva a lavorar, lo izo ke si konvino i se auno kon su ermano el grande Hr. Tchelebi, por merkarsen una kaza i morar en djuntos, i ejos ke siempre ja si konvinijan i eran de akordo en todas sus konversasiones, seja ke ja meldaron i seja ke adelantre ja van a meldar, la manera de savios ke eran todos los 2, ke sus manera de los linguajes eran todos kon peso de a miskales^[7], i avlas baldijas en ejos non avijan, i ansi foe ke ejos si toparon a merkarsen una kaza, en un presio ke lo toparon por konvenivle^[8] de 2000 groches ke aun kon todo ke para akel tiempo ja era kara ma non meraron, en tal

508                                      Biografia de Hr. Josef A. Arie en Samokov.                            1829

de tener sus kaza, ke i esto lis era una onor, i la kaza ditcha es agora en este tiempo ke la empatrona S-r. Haim B. Moche (adji jako) ejos li izieron una tchika reparasion i presto si pasaron en eja, mui kontentes bivieron en djuntos fin a un sierto tiempo i a los kavos moro en eja toda su vida, H, Rabenutcho, i de la manera ke la enpatrono i tambien koando si vendio esta kaza de parte los IJOS de H. Rabenutcho, lo todo en sus partida ja lo tengo de eskrivir si el DIO mi dechara bivir,

Denpoes ke el ja si resento boeno en kaza, lo izo ke si tomo butika i la kantedad, de ropa ke resivio de la espartision si la resento i enpeso en la vendita solo en groso, i en este tiempo tambien ke tenija de resivir i moneda en kontante era ke ivan aziendo los enkasos de los averes ke tenijan i se la espartijan adetras de sus akordo ke ejos devijan de resivir, sus porsion, seja de lo poko de venditas de las ropas ke tuvo i de esto ke enkasavan i poko tiempo pasando el ja tuvo una sierta kantedad, de moneda ke ja li foe bastante para irse a Kostan para azer sus empleos, i ansi foe ke tambien presto lo izo esto i en arivandole sus ropas el ja tenija boenos i muntchos klientes, i en kurto tiempo tambien ja izo boenas venditas, i rekojo moneda mas grande suma i algo tambien el si empresto de sus amigos lo todo de Turkos Beguis, ke lo konosijan kaje todos, i los emprestimos ke azija eran todos sin dingun enteres i partio de moevo por kostan, i se abacho en la kaza de el Tchilibi Bohor Karmona, ke por el koal ja lo tengo eskrito ke los protejava

509                                      Biografia de Hr. Josef A. Arie en Samokov.                            1829

muntcho i tambien los ajudava, i sus pasatiempo era siempre en los estudios, porke Hr. Josef era mui grande estudijado i entelejente ke ja era muntcho, i su avla era mui klara ke savija kon pokas palavras dar a entender, i el Tchilibi Bohor Karmona tambien ke ja era persona bien savida, ke aparte ke li plazija el estudijar era ke li kalija ke estuviera al koriente en muntchos de los estudios, por razon sigun ke ja lo saven ke el koal era uno de los kapo keajasis en el tiempo de Sultan Mahmud, i tambien el saraf bachi de la Valide Sultan, i siendo ke entrava i salija muntcho en el Sarai, i tenija konversasiones kon lo mas de los pachas de el Sarai, li kalia ke estuviera pronto por responder a todas las demandas ke si li azijan, ke todos ja lo saven ke el konversar kon ansi personajes koando por la mas tchika demanda ke si li aze i en non estando pronto por poder responder, sovre konvenserlo, aparte ke si le rien es ke lo dechan a la vanda, i mas non poede eskapar dingun etcho ke lo kontan komo persona vana sovre todo en los Turkos,

Hr. Josef, ke era ke djuzgava a los Djidios de Samokov ja lo tengo eskrito mas antes, ke el era ke si okupava por koando avijan algunas deferensijas en la komunita de Samokov i ke si podijan eskapar solo ande el pacha, era lo todo vija de Hr. josef ke si eskapavan, a razon ke en akel tiempo non eran kon lei los apretamientos, ke forsavan a los Djidios, i era ke asigun a kada grandiozo li paresija, ke este modo de okaziones si prezentavan muntchas, i la enfloensa ke tenija Hr. Josef ande el

510                                      Biografia de Hr. Josef A. Arie en Samokov.                            1829

Usref Pacha ke devino mas tadre el Hajan de Samokov era mui grande, i siendo ke de el dependija todo, era ke por nada non li rompija sovre todo ke Hr. Josef koando iva a Kostan sigun ditcho ke estava ande Tchilibi Bohor Karmona, lo azija ke li tomava siempre rekomendasiones para el Usref pacha, ke i esto tambien lo ajudava ainda mas muntcho, a razon ke el pacha dependija de Tchelibi Bohor ke era el kapu keajasi tambien sujo, i koando tenija el menester de moneda el pacha era ke si prevalija de S-r. Karmona, era ke i esto tambien lo ajudava, i non era solo por los Djidios esto otro ke mizmo era ke li vinijan ande el i Turkos i Kristijanos por rogarle a ke lis eskapara algunos etchos ande el Pacha, ke lo azija a todos solo por plazer sin dingun enteres, i ansi era ke la onor ke tenija i el respekto ke li tenijan todos en jeneral era mui grande, i a el non le [li] era nada de ir para azer plazeres ni menos ke si lo kontenija otro ke lo todo li era komo koza natural ke kada uno es el dever de azer plazer i lo kontava komo ke es koza natural, el de las platikas ke tenija kon el S-r. Karmona si enbezava muntchos mudos de komportos para komportarse kon los personajes grandes, i tambien el linguaje, el ke ja era tan entelejente de lo poko ke si li avlava el ja lo entendija i el tambien avlava poko i non tenija el menester, de dar a entender kon muntcho avlar porke su linguaje era mui klaro i entendivle, i la lingua Turka tambien la konosija al fondo,

El en su ser en Kostan sus emplejos los azia mui perato i koando li venija a samokov sus ropas kon avrirlas ja tenia

511                                      Biografia de Hr. Josef A. Arie en Samokov.                            1829

sus klientes, ke si la revatavan la ropa, i todos ja tenijan la konfiensa en el sovre los presios ke non avija tratar,

            koando li kedavan algunas ropas mas muntchas el las jevava a las ferias, i las vendija kon mas poka ganansija i era lo todo en kontante, ke siempre buchkava de non decharse ropas de el un vijaje al otro, lo todo fin ande era posivle,

1. Merkadutcho el IJO grande de Hr. josef, ke ja lo avija kazado, kon la Bu. Ruzu, la IJA, de la Bu. Donna, ke es la IJA de su ermana, i torna kon todo los desrepozava en kaza, porke el non si pasava boeno kon su madrasta la Bu. Revka, a tan boena mujer ke era, i tambien estava siempre boratchijando, i ansi foe ke lo izo de apartarlo de kaza, i tambien li djo 5000 grochas para ke negosijara aparte, i kon esto poede ser ke si repentira de la boratches, i tambien por tener repozo en kaza, i esto lo azija muntcho atagantar a Hr. josef, i la Bu. Ruzu siempre iva jorando i uvo un tiempo ke la Bu. Rusu si foe ande el padre, porke pelijava tambien i kon eja, lo todo era la boratches, ke lo kavzava, sigun ja lo van a ver en su partida las vidas ke las paso,

Koanto a los IJOS ke si trucho la Bu. Revka era ke los tenija en kaza i eran mui repozados,

En el anio de 5590 a Hr. Josef li nasio una IJA, i

512                                      Biografia de Hr. Josef A. Arie en Samokov.                            1830

kon eja tambien lo izieron sigun en todos los partos, ke si mandavan dulsuras i prezentes, i la vijitavan i en el dija de Chabad, ke si ivan todos a komer, i la fadavan a la IJA, ke i aki tambien lo izieron todo esto, i la jamaron, AMADA, era eja su madre ke la kudijava i la krijava, solo ke seja esta ija komo tambien i el IJO Avraam ke tenija, todos los 2 koando ja foeron mas grandes, ejos foeron atakados de la tuberkuloza, i ansi foe ke ivan sufriendo siempre de una flakeza extra ordinaria, i siempre hazinos, i todos los medios ke lis azijan eran todos sin dingun provetcho i ansi foe, ke en el anio de 5604, todos los 2 murieron, en la flor de sus manseves, ke lis foe para toda la Familia, la mas grande dolor,

Hr. Josef, era de mizmo ke kontinuava en su negosio el azija de mismo los vijajes seja para los emplejos de las ropas, komo tambien i para las venditas, el non si ajudava de dinguno ke ja era kapatche para alkansar a lo todo, el javava sus kontos i tefteres kon muntcha deretchedad, i en la mijor regla aun kon todo no avija las reglas de las kontabelites de agora, torna kon todo non azija ni el mas tchiko, jero i ansi era ke su etcho li iva siempre adelantre, i todos lo kerijan bien, i lo onoravan mui muntcho, porke a todos lis azija plazer, i sin dingun enteres,

El si okupava, siempre de los etchos de la komunita i en mismo tiempo goadrava los enterases, de la komunita, ke el era ke espartija el dasio anual ke si pagava al governo turko, ke eran 100 groches al anio por todos los Djidios ke avijan en Samokov, ke

513                                      Biografia de Hr. Josef A. Arie en Samokov.                            1830

el governo savija un nombre, los Djidios komunita, de Samokov 100 groches, los kristijanos, 1000 groches los Zinganos 50 groches, i estas sumas las reklamava de las kaveseras de kada nasion i ejos sigun kirijan ke si las espartieran, ke para esto tambien ja avijan por kada nasion nombrado ke lo jamavan (milet bachi)^[9] estos tambien tenijan sus (kabzi-mal^[10]) ke es birnikis, para ke las rekojera, de kada uno esto ke si li fikso ke devija de pagar, ke si en kavzo fin el dia ke era fiksado non si jevavan era ke lo metijan en prezo al birniki lo todo era sin dinguna paga,

La espartision de estos 100 gr. de dasio era ke si los espartijan entre el kolel entero, i para esto tenijan una adjunta partikular, a la kavesera, de los 2 ermanos Hr. Tchelebi i Hr. Josef, ke jamavan a los notavles de la sivdad, i de presipio, ejos los 2 ermanos si resivijan a pagar los 35, gr. i lo restan de 65 gr. los espartijan a el kolel entero ke eran de 50 a 60 familias, ke de las koalas apartavan a los Hahamim i Rohesim i Chamachim, i los kabarim i algunos ke non podijan pagar, i estos eran liberos de el dasio ke non solo de esto era ke mizmo non tomavan parte i en el gasto de el kolel, i a los ke podijan pagar si lis taksava ke pagaran de medio gr. Fin a 2 gr. i era pleitos grandes i lis turava el dia entero, fin a ke si konvenijan ke muntchas veses esta adjunta si ajurnava para espartir los 65 gr. ke esto era Hr. Josef ke si okupava mas muntcho, a razon ke el entrava i salija mas muntcho ande el Usref Pacha ansi i en las todas otras admenestrasiones, ansi deferensias

514                                      Biografia de Hr. Josef A. Arie en Samokov.                            1830

era tambien i en los kristijanos, i koando non si podijan konvenir era ke lo jamavan a Hr. Josef i el ja los resentava i esto lis era mui grande onor, ke lis kavzava el repozo, i koando tenijan tambien i algunas deferensijas entre los merkaderes kristijanes los mas grandes Tchorbadjis tambien era a el ke li rogavan para ke los konviniera, i el non rompija a dinguno ke mizmo si tenija i algunas etchos los dechava i se iva para esto en tal de azer plazer,

El era lo mas muntcho ke Darchava en el KAAL seja en los Moadim komo tambien i en los Chabatiod, i los deruchim ke darchava, los resentavan entre los 2 ermanos kon Hr. Tchelebi, ke sigun ja lo tengo eskrito ke los primeros dijas de los moadim lis vinijan el KOLEL entero a vijitarlos ke era koando salijan de el KAAL deretcho si ivan en sus kaza, i lis azija un daruch, konviniente al moed, i denpoes ke i ejos tambien al sigundo dija los vijitavan kaji a todos era de mizmo ke en kada kaza lis darchava de una manera, i es de entonses ke kedo fin a el tiempo ke estuvimos en Samokov ke mos venijan a vejitar en todas las kazas de los ARIES, i el Rabino de la sivdad era ke darchava, en kada kaza de su manera,

            Hr. Josef era una persona alta i flako i mui deretcho su poerpo, i tambien sano i rezio, ke non si kansava el era mui Hasid, se levantava demaniana i se iva a el KAAL a dizir la TEFILA i se metija 2 pares de Tefilim, i meldava el Hok le Jsrael, ansi lo azija i en las tadres ke si iva a el KAAL para dezir la Minha i el Arvid, las tadres si vinija de temprano en kaza i non bivija dingun

515                                      Biografia de Hr. Josef A. Arie en Samokov.                            1830

modo de rakis en las notches otro ke solo en la meza bevijan todos a unos dos vazos de vino ke esto ja lo tenijan siempre en kaza, i koando lo merkavan era ke kalija ke foera mui siguro de el mas Kacher, ke ja avijan en Filibe Djidios ke lo azijan ejos mizmos, i lis kostava en Samokov entregado de 15 a 20 paras la oka, i el raki valija de 60 paras fin 2 groches la oka, i esto lo azijan en kaza ke tenijan alambikes, lo todo por kacher, ejos si mantenijan mui bien todo modo de komanija la ke era posible la tenijan siempre por el menester seja lo de el enverano komo tambien i esta de el envierno de nada non dechavan siempre mankarle, i mizmo ke todo ja lo tenijan en kaza non era sin konto el emplejarlo ke todo era kon mui bien konto i azijan la ikonomija, mizmo se prontavan i la fruta para el envierno, todos los dos ermanos ke eran en una kaza ke moravan era ke komijan tambien i en una meza, i se konvinijan seja ejos los ombres komo tambien i las mujeres en todos los puntos, ni el uno de ejos non si aravijavan en kaza por nada, ke eran mui pasensiozos, i mizmo kon las krijaturas non si aravijavan ni las gritavan i todos si konsediravan de los unos a los otros, el gaste ke azijan entre los dos ermanos para el anio entero de sus mantinimiento era 3000 gr. ke esto era mui muntcho para akel tiempo, i aparte tenijan por sus vistimientas, ke Hr. Josef si vistija de las mas finas ropas, i tenija tambien muntchas modas de vistimientas, i era mui limpiosu^[11] vistido era de un tchakchir, i ensima un anteri largo i kon un kuchak apretado en su talija, i una fermela de panio i ensima un djube, i

516                                      Biografia de Hr. Josef A. Arie en Samokov.                            1830

denpoes un binich kon mangas antchas i largas tambien de panio i en su kavesa una boneta, i en sus pies mestas kon sapatos, lo todo de ropas finas i por el envierno era en logar de el djube se vistija un kiordi de samara boena ke esto tenija muntchas mudas de kiordis de todas las samaras finas i ansi de todos los otros vistidos ke non si li estroivan porke tenija a muntchos i tambien ke non avija pasar las modas, ansi era tambien i en las mujeres ke i ejas tambien si vistijan de las mas mijores ropas i tenijan tambien a muntchas modas de vistidos, i era estos vistidos ke los azijan grandinos seja a los ombres komo tambien i a las mujeres, ejos kamenavan mui repozados, su vista era morena, su barva era kurta i preta, la kavesa entera si la arapava i se dechava ulufijas, todos los ermanos en kada Chabad i moadim eran en un kave i komijan tambien djuntos, ejos kantavan i se alegravan, en kada viernes kalija ke los vijitara a todos los Beguis, i koando non lis iva era ke lo buchkavan, i para kada lugar ke el iva si apartijava una manera de linguaje, i todos lo sentijan, ke su avla sigun ke ja lo tengo eskrito ke era mui klara i tambien ke konosija la lingua Turka boeno,

mizmo ke vijitava en todos estos lugares torna kon todo el ja alkansava para lo todo, i en su magazen era el ke si lo akomodava, a lo todo i en su tiempo el se iva por azer sus emplejos i koando era el menester tambien se iva i a las ferijas, i todas sus venditas las azija en la mas mijor regla, ansi tambien i los kovramientos, ke todos li pagavan en su tiempo sin dingunas defekultades

517                                      Biografia de Hr. Josef A. Arie en Samokov.                            1830

i su bonatches era la mas grande ke si poede pensar, i de mizmo su entelejensia era mui foerte,

En el anio de 5591, sigun ditcho mas antes sovre la taksa de los 100 gr. ke los Djidios devijan de pagar al governo por el dasio ke lis kovrava el Governo Turko i ke era solo Hr. Josef ke los jevava en el tiempo fiksado, lo izo i en este anio tambien ke si los jevo i entero gustozo ke ja los avijan rekojido sin dinguna defikultad, foe ke el kachero li dicho ke tiene el orden de el Pacha, por ke li aga saver ke por el avenir la taksa para los Djidios tiene de ser, 400 gr. en lugar de 100, ke esto de ansi una grande pujita era mui muntcho, i Hr. Josef si sikilio mui muntcho de esto i al kachero non li dicho nada otro ke tuvo la pasensija para topar un momento mas favoravle, i avlarle a el pacha sovre esto ke sigun ditcho para espartir los 100 gr. era males grandes i agora ke keren 400 non keri ditcho ke non los podijan pagar ke lo mas de el poevlo eran proves, ke apenas si podijan ketar sus mantinimiento,

En este tiempo foe ke si li izo la ida a Kostan por azer sus emplejos, i kon el pacha ke non topo tambien la okazion por avlarle i tambien ke si travava de avlar sovre ansi kozas ke eran kontra el provetcho de la Hazne, i sin ke li dicho tambien a el Pacha ke tenija de partir por Kostan porke en kada vez ke si iva era

518                                      Biografia de Hr. Josef A. Arie en Samokov.                            1831

ke si lo azija saver ke siempre el Pacha ja tenija muntchos etchos en Kostan, ke esto lo izo travandose, de non avlar por el presipio sovre el etcho de el dasio, lo izo ke si foe a Kostan, i sigun siempre ke el ja si abachava ande el Tchelebi Bohor Karmona, foe i en esta vez tambien ke si abacho i sigun ditcho ke ejos platikavan sovre muntchas kistiones, foe ke entre ejas li demando el Tchelibi Bohor komo estava el Usref pacha, i komo si estava komportando enfrente de los Djidios, i si es ke los estava merando kon kara boena, a la ora ke topo la okazion li dicho ke el pacha agora lis suvio el dasio ke era ke pagavan 100 groches, al anio de dasio i por endelante lis dicho ke deven de pagar a 400 groches, i esto non save komo es ke lo van a poder pagar, ke kaje todos los Djidios de Samokov apenas si estan pudiendo ketarsen el pan i agora ke es tres tantos de dasio mas va a ser mui grande mal, i Hr. Josef li rogo si era posible ke lo ajudara sovre este punto, sovre ejo el Tchelebi Boher, mui maravijado i algo enervado, li dize este modo si esta komportando el Usref, kon los Djidios de Samokov?, decha vermos i el Usref Pacha en estos dijas ja tiene de vinir a Kostan, i umde [ande] jo ke ja vo lo vo poder abachar torna sigun de loke era antes, i vos estavos en voestro repozo, i Hr. Josef se lo engrasio,

            denpoes de este linguaje, Hr. Josef, i eskapo de azer sus emplejos, i ke non kalija ke si tadrara el ke ja si estava prontando para partir, es ke lo supo ke el Usref Pacha ja avija arivado a Kostan ma seja ke si travo de ir a toparlo seja ke non topo

519                                      Biografia de Hr. Josef A. Arie en Samokov.                            1831

de deretcho pensandose sovre el linguaje ke tuvieron kon Tchelebi Bohor, foe ke non si aserko ande el Pacha, i el ja lo vido unas dos vezes ma era ke si iva apartandose i guadrandose porke non lo viera, i ansi foe ke sin versen Hr. Josef partio por Samokov, ke en su tiempo el arivo i merandese su etcho.

            I el Usref Pacha ke resto en Kostan por poder enderetchar su etcho ke era ke li kerijan tomarle el deretcho de non ser mas Govenador de Samokov, i esto podija enderetcharle solamente por vija de el Tchelebi Bohor Karmona, ke el koal sigun ke ja lo eskrivi mas antes ke era uno de los grandes kapu keajasis de kostan i ansi kozas era ke si podijan eskapar solo por la vija de ansi kapu keajasis, porke ejos tenijan las konosensijas en el Palasio i en todas las admenestrasiones i los ministerios, sovre todo ke el Tchilibi Bohor era tambien i el grande saraf de la Valide Sultan, i el usref Pacha ke era ke eskapava sus etchos por vija de el S-r. Karmona, i tambien ke li era i su Saraf por koando si li azija el menester de moneda era solo de liras si prevalija, es i agora tambien le foe, i demandarli koalo devija de azer, para ke non lo ketaran de este tanto grande siniorio, i tambien mui ganansiozo, i de esto todo ke Tchelebi Bohor ja estava al koriente, de el prisipio non li dicho nada, otro ke lo sentio ke li kontara koalo era ke el lo kerija, i esto lo decho estar en pies sin ke li dicho ke si asentara, ke ansi personajes mizmo ke seigan pachas, es ke sin ke lis digan ke si asenten non si asentan, i esto li foe mui grande dezonor para

520                                      Biografia de Hr. Josef A. Arie en Samokov.                            1831

el Pacha, ma non tenija koalo azer, porke Tchelebi Bohor era de mas grande grado de el Pacha, i denpoes ke ja eskapo de avlarle li amostro lugar porke si asentara, i se asento, i li izo traer tchibuk i kahves i modos de cherbetes ke si uzan a la Turka, i el pacha esperando la repoesta, i denpoes ke ja lo servio kon todas las onores ke li izo, li dicho, mi desplaze dizirte ke jo tengo algo de kechas ande ti S-r. Pacha, i el pacha sintiendo esto dizir de Chaptchi olu^[12] ke este modo lo jamavan los Turkos, ja kedo en las demandas, i kon despasensija li rogo porke li iziera saver, por koalo eran las kechas en adjuntandole ke el aze a todos bien i nunka non lo esperava ke persona si li podija akechar de el, ma es mui kuriozo para sintirlo, i Tchelebi Bohor ala ora li dicho ke sigun mi enbezi es ke a los pokos Djidios ke tienes en Samokov ke lo mas de ejos son proves i lis pujates el dasio de 100 groches ke ti pagavan a el anijo lis keres agora kovrar a 400 groches lo koal ke non ti poeden pagar, i el Pacha non topando komo eskulparse foe ke li iniego, i li dicho ke el ja konose la puzision de los Djidios de Samokov, i nunka non lis puja ni menos ke lo penso de pujarles, ma si de su admenestrasija i lo arijan esto el non tenija dingun saver, ma li dicho ke li asigura ke si en kavzo avrija ansi koza el ja lo tiene de enderetchar i non tiene de dechar kovrar mas de la taksa ke fin agora la pagaron solo de 100 groches, i S-r. Karmona si lo rengrasio i li dicho lo vere, i koanto a tu etcho ke mi avlates i jo tambien ti asiguro ke todo esto ke es posible de azerse ja vo buchkar para kontentante,

521                                      Biografia de Hr. Josef A. Arie en Samokov.                            1831

i tchelebi Bohor, ke ja iva kada dija a el palasio, i todas las otras admenestrasiones, foe tambien i kon esto ke enpeso a reglarselo i arientro de pokos dijas el ja lo izo meter todo en mui bien orden, i se lo izo saver al Usref Pacha, ke si topo mui kontente, i si entiende ke los pasos etchos de Tchelebi Bohor non son baratos i se pagava, de 50 mil fin a 100 mil groches, por ansi un eskapamiente de etchos, i esta ja lo tenija kaji kada dija,

            I el usref pacha denpoes ke ja si eskapo este etcho i ke estuvo unos koantos dijas otros en Kostan, ke azija algunos emplejos de su menester, i tambien prezentes ke merkava, si vino i el tambien a Samokov, i era mui raviozo sovre la kecha de S-r. Karmona por los Djidios de Samokov, ke lo todo lo tomo ke foe de Hr. Josef, ke ja lo supo tambien ke estuvo en Kostan, i ke estava siempre ande el S-r. Karmona,

            I Hr. Josef, ke ja estava de mas antes de el Pacha en Samokov, era todo kon los mil penserios i se iva muntcho tambien i espantando por koando iva a venir el Pacha ke lo iva alguna koza i amenazarlo, sovre todo ke mas non lo podija merar de boenas sigun de mas antes i tambien ke tenija i riziko de ansi personajes koando si aravijan ke lo depiedren tambien a la persona i non ai ken demande konto, ke mas tadre ke el Pacha ja vino, i el espanto li foe ainda mas grande, lo izo ke se izo de el hazino i si etcho en la kama, ke el ja lo estava esperando ke lo iva a jamar, para darle seja kechas or i amenazos, sigun ke ja foe ansi, ke li paresio ke komo estava e

522                                      Biografia de Hr. Josef A. Arie en Samokov.                            1831

hazino el Pacha, lo iva a dechar, fin ke si sanava, i ke en pasando dijas, ja podija ser ke li pasava la ravija, i non li avlava nada, ke lo todo foe al kontrario de loke si pronto, i el Pacha ke lo mando a jamar, i ke li dicheron ke estava hazino, en non kijo nada saver otro ke mando sigunda ves i komando si mizmo non podra kamenar ke lo traigan kon la kama, i vinieron sigunda ves, i li dicheron el komando de el Pacha, ke kale ke vaiga, ke Hr. Josef, non tuviendo dingun remedio, si levanto de la kama, i a pasos tchikos empeso a irse para ande el pacha, solo ke en este tiempo li dijo, un martijo en el korason i kolor en la kara ke ja non li avija kedado, apenas ke ja arivo delantre el Pacha li bezo los pies sigun el uzo, i siempre koando li iva era ke li dizija ke si asentara i agora lo decho estar en pies, ke i esto ainda lo iva aziendo mas espantar, fin al grado ke ja non estava podiendo ni menos una palavra avlar, a detras de tanto kurajozo ke era, i ke tenija el mijor protejo, ke non tenija fin a este grado el menester de espantarse, i por todo loke pensava Hr. Josef non podija ser ke el Pacha tuviera el animo de azerle porke si espantava de S-r. Karmona, ma parese ke las personas en algunos momentos si topa en alguna flakeza, lo koal ke lo aze deskurajar fin al ultimo grado, i al kavo foe, ke el Pacha komo era mui ensanijado es ke li dicho ansi, abre^[13], tu komo tuvites el animo de akecharte demi ande kezaptchi eglu ke mi izites avregonsar, i hr. Josef ke ja non li avija kedado ni riflo, kon medijas palavras li respondio jo non avli ni mi akechi ande kezaptchi eglu, i el Pacha

523                                      Biografia de Hr. Josef A. Arie en Samokov.                            1831

sigun ditcho ke estava mui ensanijado, i ke si espantava de Tchilibi Bohor, li dicho kon boz mas alta, salte de delantre de mi, i Hr. Josef, si salio, sin ke li dicho ni un adio, lo todo seja ke si espanto seja porke lo apreto de esta forma, es ke kon venirse en kaza, si etcho de moevo en la kama mas para nunka levantarse, ke todos los ajudos ke li dieron i todos los konsejos de todos sus parientes por ke si enkurajara, i ke non si espantara todos foeron en baldes, ke lo mas muntcho foe ke li paresija ke lo iva a matar, i ansi foe pokos dijas de dija kada dija apokandose, fi[n] ke emel [en el]^[14], ________ suplo su ultimo rifle i murio, en dechando a su mujer bivda para la toda su vida, i sus tchikas krijaturas, goerfanos i ke sufrieron muntcho, i lo joraron i lo endetcharon muntchos anios, seja todos sus parientes komo tambien i todos los sevdadinos, i su vida foe todo 44 anios, ke estavan ainda en el anio de el S-r. Haimatche su ermano ke avija murido en Petritch, i era koza ke non si lo estavan pudiendelo tomarsilos a pasensija.

Ansi igual a esta manera de moerte, ke foe kale dizir lo mas muntcho de espanto, akontesio i en moestro tiempo en el un inieto de el ditcho Hr. Josef, en el anio de 5668,

I foe ke el ditcho inieto, si jamava josef, ijo de H. Rabenutcho, el IJO tresero de Hr. Josef, el koal estava en el palasio de Sultan Hamid, en el kabineto de el telegraf sikreto de el Sultan i era uno de los grandes trezladadores de los telegrafos sikretos ke li vinijan al Sultan de las potensijas ajenas, i era mui kichto de

524                                      Biografia de Hr. Josef A. Arie en Samokov.                            1831

el Sultan, i tenija grande konfiensa en el si entiende ke i el tambien ja lo merisija, i era una persona mui savio i mui entelejente el konosija todas las linguas ke si avian en la Evropa entera, sovre todo la lingua Turka i araba las konosija al fondo, por tanto a tanto boeno i kichto ke estava, en el palasio, i ke tenija la konosensia kon todos los prensis, i pachas de el palasio, i kon muntchos otros personajes los mas enfloentes, es ke non si lo poede imajenar la persona, komo viene a ser, ke por el mas tchiko jero ke seja el mizmo kavzante, por derokar lo todo i meter la fin en su vida, i a este S-r. Josef li arivo de la manera siguiente.

            En el tiempo ke el partido Jeun Turk, si estava fondando ke eran todos los mas enfloentes i grandes personajes, i tambien ke avijan muntchos de los Cheh zaadez^[15],(prensis,) i lo todo ke era en mui sikreto, ke si ivan abonandosen lo todo ke era por venir kontra de el Sultan Hamid, i esto ke el Sultan ja lo savija era ke siempre los presiguija ke la polis sikreta ke avija era mui grande i koando si deklarava alguno de estos era ke de notche lo rekojijan de la kama i sin muntcho examenar azijan ke lo metijan ariento de un sako i lo etchavan a la mar, sin ke dinguno lo supiera i dinguno non tenija el animo de reklamar, porke i a el tambien lo azijan ansi i entre a muntchos ke kombedavan para ke foeran de sus partido, foe ke unas koantas vezes ke lo kombedaron tambien i a el kon prometerli las mil tchopadas de la miel, i esto era los prensis i los mas grandes Pachas, ke lo azijan ande ke es koza ni ke si lis podija

525                                      Biografia de Hr. Josef A. Arie en Samokov.                            1831

refuzar ni menos ke lo podija ketar de boka porke i ejos tambien lo entregavan, i unas koantas vezes ke ja lo pudo prolongar, ja iva pasando ma mas tadre enpesaron tambien i amenazarlo, i non tuviendo el remedio li kalio ke si abonara tambien i el, i de esta manera foe kamenando un sierto tiempo, i sigun ditcho ke la polis sikrita, ke prisiguija a estos foe ke lo supo i en un dija denpoes de la medija notche, li van en kaza i lo rekojen sigun ke estava, dezmudo, i se lo jevan a el palasıo, i lo meten en prezo, i a la manijana, el ke ja tenija muntchos amigos es ke pudo reuchir, porke lo prezentaran delantre el Sultan, ke el koal lo amava muntcho, i kon entrar delantre si li etcho a los pies rogandole ke lo pedrone, ke izo jero i ke li kalio ke si eskriviera, por razon de amenazo, i el Sultan si rejo, i li dicho ja ti pedroni i vatze [vate] al etcho, i kon esto foe delebrado, ma el ja kedo espantado, i mui flako ke ja era, era ke iva dija kada dija indo mas flako, i ansi foe ke kajo en kama, sigun su Papu mas por nunka levantarse, fin ke murio, i decho i el tambien mujer i tchikas krijaturas goerfanos,

foe esto la parte boena ke la tuvieron todos los 2 por ser enfloentes, ke en siendo tanto entelejentes, i tan savios lo trucheron el etcho fin a este grado de ser deskurajados, asta meter fin en sus vida, i koanto a la manera ke vino a ser el S-r. Josef, en el Palasio, esto ja lo tengo de eskrivir, si lo podre, en la partida suja, ke viene adelantre,

I kon la moerte de Hr. Josef, li izieron todas las ultimas onores,

526                                      Biografia de Hr. Josef A. Arie en Samokov.                            1831

sigun ke ja lo tengo eskrito ke en akel tiempo siravan el tcharchi entero todos los Djidios, para akompanijar al moerte, i aki sovre todo ke foe mas muntcho, i todos sus IJOS i ermanos li goadraron el 7 dijas de limunio, i ansi tambien i el mez entero, en kada dija li vinijan a meldar los Hahamim en las tadres, i davan muntcha sedaka i su IJO el grande el H. Merkadutcho ke ja estava apartado, seja de kaza komo tambien i de la butika, foe ke si vino i el kon toda su familia a kaza, i ansi era ke ivan tiniendo grandes gastes, ma era ke por el prisipio non lo pudieron resentar, porke el mal foe mui grande i mui ansiozo, lo foeron ansi pasando el anio entero,.

527                                          ENTELEJENSA DESKORAJADA

A detras de loke si vei en la partida de la biografia de Hr. josef, es ke foe un ombre, savio i mui entelejente, i mui amorozo por el adelantamiento de su nasion, ma es de maravijar sovre la flakeza ke si topo en un sierto momento, tanto grande de espantarse tanto fin a meter, la fin en su vida, a detras ke el ja si pudo ganar en kurto tiempo tanto grande protejo i enfloensa, i defenderse ke ja si podija mui bien, non si pudo detenerse, ke aparte, ke foe kavzante el mizmo de meter su fin en la flor, de tantos provetchos, ke si esparavan de el foe ke jevaron tambien tanto mal i los vinientes detras de el fin a este tiempo, i non es solo a sus parientes ke lis iva aprovetchar, iva a ser i a todos los Djidios de Samokov i a las otras nasiones, ande kedo la enfloensa i la kapatcheta,? i visto a esto mos kale dizir, solo un momento de flakeza ke li viene a el ombre en unos siertos tiempos, ande lo piedren todo, i este tambien por koali [koalo], es ke jo mi permeto a dizir ke poedi ser, el amur propre^[16] ke li kavzara, a embrojarlo, sigun si vido seja en su inieto S-r. JOSEF IJO de H. Rabenutcho komo tambien i en S-r. JOSEF R. Arie, ke si metieron la fin en sus vida en la flor de sus manseves, solo i solo por el amur propre, ke akontesio ke todos los 3 ke seigan de un nombre JOSEF, i todos de la mizma entelejensa, i karakter, es ainda, mas de dizir, ke kale la persona, non deve, fin al ultimo grado de okuparse, seja sovre los entereses, de los otros i sakrifikar, tiempo i estudios, lo todo ke ja es natural de arivar, desenkontros, i el momento de flakeza, i non keda para si de sirvirse, i aprovetcharse

528

de su savidorija, por ansi unos kavzos lo dicho el Ministro Kara Velov, koando lo metieron en prezo, i ke estuvo 8 anios aprezado, i el poevlo a muntchidumbre ke lo meravan koando lo abacharon de la karusa en la tcherna^[17] djamija, foe ke el si abolto a el poevlo i lis dicho, la persona ke buchka las provetchos de la nasion i ke si asenta, en las mezas de los personajes grandes i de los Rejes, su fin es ke si li azan la kama or en la karsel or en la foja, i se entro en su kamareta sin kolor en su kara,

529

Asta aki si eskapa la partida de Hr. Josef A. Arie, Kon algunos otros pasajes en su vida ke bivio 44 anios, i murio,

530                  La espartision de los IJOS de Hr. Josef denpoes de su moerte.           1832

            En el anis de 5592, ke ja si konortaron de la moerte de Hr, Josef, i visto a los grandes gastes, ke ivan tiniende, i ke los etchos de la butika eran todos dekolgados i para el avenir ke non avija ken ke si okupara, lo izieron su ermano i sus parientes de merarli un konto i apartarlos a los IJOS, i resentarles, una pasadija, fin ke los IJOS tchikos si azijan mas grandes,

            Ejos si metieron en el lavoro, i li vendieron toda la ropa ke li avija kedado, i rekavdaron todo el aver ke foe posible i li apartaron tambien la parte ke li tokava a H. Merkadutcho, i kon los IJOS entenados ke tenija los apartaron de kaza, i la suma ke lis resto apenas foe todo de 10 mil groches, ke era mui poko enfrentante a los 50 mil groches ke avija tomado kon 3 anios antes, de le eredad de su padre, ma sigun lo vieron foe ke tuvo en su vida algo de danios, i el gaste ke lis foe grande, i a su IJO H. Merkaduteho ke li iva dando para ke si sosteniera, foe la koenta djusta, i a H. Merkadutcho lo mandaron a su kaza, i la Bu. Revka, ke ja era una mujer mui kapatche, si resivio a kudijar los IJOS ke eran tchikos, kon ke los 10 mil groches si los resivio su ermano el grande Hr. Tchelebi sovre 20 por siento a pagarle los enteresos, para ke tengan un revinido de 2000 groches, i kon esto ke si pudieran mantener, al anio, ke esto por el presipio ja lis foe bastante, i se ivan pasando i los IJOS H. Elijatchuno i Rabenutcho, los decharon para ke kontinuaran sus estudios en el el midrach, i ejos ke ja eran todos los

531                  La espartision de los IJOS de Hr. Josef denpoes de su moerte.                   1832

2 mui entelejentes i ke tenijan tambien muntcha kerensija i amor por el estudio, era ke ivan kontinuando, i la Bu. Revka kudijandolos i ikonomijoza ke ja era muntcho pasavan mui kontentes, i los emplejos seja por el menester de sus mantinimiento komo tambien i por sus vistimienta, i otros todos los menesteres era por lo todo ke kudijava Hr. Tchelebi i el era ke los vijitava siempre, porke H. Merkadutcho era raviozo por esto ke lo apartaron de kaza, i koando alguna vez en mil ke lis iva era siempre ke pilijava kon la madrasta, i ansi era ke non lo resivija, en kaza,.