חכם מרקדוצ'ו עם בנו

532

De aki i en delantre si enpesa la Biografia i algunos pasajes de H. Merkadutcho (Mihael) Josef Arie

533                                   Biografia de H. Merkadutcho Josef Arie,                                 1833

En el anio de 5593, H. merkadutcho ke ja estuvo en su kaza, aparte, i ke ja tomo le [la] eredad de su padre, aun kon todo ke non foe tanto kontente, porke el kerija estarse en la kaza de su padre, para non tener mas dingun kargo por nada, lo todo sin ke si duliera, por el sujos avenir, kontandolo ke el era tambien mui bien savido i mui entelejente, ma era solo la boratches ke non lo dechava alevantar kavesa, el ke ja tenija de mas antes su butika de merkansija, i kon la suma de moneda ke tomo izo ke la engrandesio mas algo su negosio, i esto sus parientes lo akonsejaron porke si merkara una kaza, i ke non foera arastando en kiras, ke en esto los sintio a sus parientes i foe si merko la kaza, ke morava su S-r. papu S-r. Avraam el primer ke vino a Samokov, esta mizma ke si la tenija dado el S-r. de Mehmed Emin AA. koando se vino a Samokov, i la merko por 1500 groches el li izo algo de reparasion, i se paso en eja mui gustozo i kontente, ansi de mizmo si gustaron i todos sus parientes i todos lo vijitaron i li mandaron muntchos prezentes, i si li foeron a komer el primer Chabad, sigun ke lo uzavan en akel tiempo sigun ke ja lo tengo eskrito, i en el etcho de la butika li iva mui boeno kamenando i se topava mui bien kontente, el si pudo ganar bastante de klientes, i konosia la metoda de la merkansija, i tambien ke savija enkontrarlos, i mui bien sirvirlos,

            En este anio tambien li nasio un IJO, ke si gusto mui muntcho, ke li foe la kaza en boen SIMAN i todos sus parientes lo

534                                          Biografia de H. Merkadutcho Josef Arie,                               1833

vijitaron i li mandaron los platos i los prezentes, i en el dija de el Birkad mila kombedo a todos los parientes i los Hahamim, i li mitieron el nombre, JOSEF, i su madre lo kudio i lo aletcho,

En el anio de 5594, era ke de mizmo kontinuava en su negosio dela merkansija ke azia en su butika, ma siendo ke kijo engrandeserlo el etcho parisiendolo kon la suma de moneda ke tomo de la eredad de su padre, ke ja iva a poder enkamenarlo, ma el kon la kaza ke merko, foe ke iva siempre gastando en eja i tambien la iva mobelijando i en el gaste ke si avrio, mas muntcho foe ansi ke avija empesado a non poder enkontrar sus pagamientos, i era ke por los presipios si iva emprestando de sus parientes i todos lo ajudavan ma i esto mas tadre ke non lo estava podiendo azerlo era ke si empeso a avregonsarsei i era torna entre los parientes ke si lo ivan akomodando ma el ke ja tenija la manija de bever foe ke en este tiempo lo empeso ainda mas muntcho a emboratcharse, i ansi era ke non estava saviendo ni loke dava ni loke tomava, i lo todo ke bivia era solo vino i la boka li golija muntcho a vino, ke non si podija asentar dinguno serka de el ni menos platikar, i siendo ke vinija buratcho a kasa era ke siempre estava pilijando kon su mujer la Bu. Ruzu, i tambien non estava traendo los menesteres por la kaza, i la Bu. Ruzu ke ja era una mujer mui aguda i mui nekotchera era ke si

535                                          Biografia de H. Merkadutcho Josef Arie,                               1834

iva ande sus parientes i lis demandava ke li dieran algunos ofisios or lavorar en sus kaza algunos etchos ke ja tenijan siempre, i de esto lis pagavan i tambien li davan mizmo sin ke lavorara, algunos prezentes, seja en moneda komo tambien i en komanijas i algunos vistidos i kon esto era ke akomodava algunos menesteres de la kaza, i H. Merkadutcho si etchava las notches sin komer, ke el ja estava buratcho, i tambien ke non traiva,

En el anio de 5595, era de mizmo ke ja si iva a la butika ke tenija ma era lo todo sin meter ropas moevas, i de lo poko ke vindija era ke algo bivija i poko apenas jevava a kaza algo de komanija i a los muntcho ke lo apretavan era ke lis dava algun akonto por esto ke lis devija i ansi era ke non tenija pasadija del en todo boena,

          Koando si enboratchava, boeno su ditchizion era ke si vinija a kaza i enpesava a pelijar kon su mujer para ke rekojera las krijaturas, i algo de sus vistidos, i ke si van a ir ande la Bu. Revka, ke es a lo kaza de sus ermanos los tchikos H. Elijatchuno i H. Rabenutcho, i su mujer la Bu. Ruzu komo non kerija, era ke lis arivava el etcho fin harvarla, ke en sus pleitos entre la mujer i el marido era todo ke la Bu. Ruzu li dizija el ke non kudijara por el mantenimiento de la kaza, ke esto ja lo tiene de merarlo eja, i

536                                          Biografia de H. Merkadutcho Josef Arie,                               1835

el ke si merara su etcho de la butika, porke eja sigun ja lo eskrivi ke si iva ande sus parientes i lis lavorava todo esto ke era el menester i todas ja li pagavan mas muntcho de loke era el menester en todos los puntos, ma el non si kontentava a esto ke la mujer li avlava, i non tenija el remedio i se ivan ke la Bu. Revka koando los vija venir ja morija de el Saar, i era lo todo kon gritos i pleitos ke si estava, i seja la BU. Revka komo tambien i la Bu. Ruzu todas las 2 ivan jorando por los males i negras vidas ke lis dava,

En el anio de 5596, la Bu. Revka ke si akechava ande sus kunijados sovre la estada de H. Merkadutcho en su kaza i ke non era koza de poderlo somportar, era ke lo akomodavan fin a un grado el etcho de H. Merkadutcho i li mandavan a su kaza i kon esto era ke pasavan algo de tiempo, ma la buratches non si dechava, i kon lo poko de paras i de komanija ke li davan era ke fin si li eskapava, ja estava boeno i denpoes era siempre lo mizmo, i ansi era ke la Bu. Revka si avija mui muntcho deskurajado, ke eja tambien empeso a ir en algunas kazas de los parientes koando avijan algunas paridas, i las iva merando ke de esto iva buchkando por devinir en un dija komo komadre ke de esto podija tener mas grande ganansija i lo todo era kon entision, i de esto ke eja estava en okazion en sus parientes era tambien mui bien pagada, ke esto lo azija por no

537                                          Biografia de H. Merkadutcho Josef Arie,                               1836

gastar para el sujo menester, de las paras de los IJOS, porke ja non li estava abastando los 2000 groches de enteres ke tomava, i ke kerija i eja tambien tener unas koantas paras, ke esto mizmo lo azija i la Bu. Ruzu, al menos tener para akomodar sus krijaturas,

            En este anio tambien li nasio una IJA, ke para esto ja tenijan el kargo todos sus parientes i li mandavan kon su demazija todo esto ke li era el menester, i sin dinguna deferensija era ke la vijitavan todos i li mandavan todos los platos ke si uzava a mandarsen en todas las paridas, i en el Chabad si li ivan a komer kon jevarsen kada uno aparte sus komidas, i la fadavan a la IJA kon muntcho gusto i alegrija i kantavan i se gozavan i a esta IJA la jamaron Mazal ke es esta la S-ra Mazalu ke la kazo en su tiempo kon S-r. Avramatche B. Aaron de Dubnisa, i eja toda su vida paso mui muntcho bien eja pario IJOS i IJAS, ke fin a un sierto tiempo bivieron en Dubnisa i denpoes si vinieron a Sofia i azijan modos de las merkansijas i el IJO grande es agora merkador de mubilijas i otras kozas ke alguno kere venderlas en groso, i se paso mui bien,

            En el anio de 5597, H. Merkadutcho, en su butika ma ja non pudo boltarla, i ansi foe ke lo poko de ropa ke li avija ke dado la vendio, de mizmo izo i kon la kaza, ke la vendio i entre sus parientes, li rekojaron la suma ke podieron i pagaron a algunos

538                                          Biografia de H. Merkadutcho Josef Arie,                               1837

de los kreditores, i kon lo restan lo decharon para mas tadre, por akomodarlo en alguna manera, ma esto resto longo tiempo ansi i el si asento en kaza, seja ke non kijo buchkar, para enbeveserse en algun otro negosio, or seja ke non lo estava topando, i tambien a detras de la deskurajes, era ke si etchava a la buratches, i de vez en koanto iva tambien i jorando, i era ke los parientes li mandavan sus menester, i tambien I la Bu. Ruzu, ke eja penava mui muntcho, i se ganava, era ansi kon grande mizeria ke lo ivan pasando,

            Visto a este konporto es de maravijar, ke en siendo de la edad ainda mui mansevo ja izo las mil maneras de estorijas, ke en akel tiempo a este konto ja eran de la edad de 18 a 20 anios igual a los de el tiempo de agora komo koando ja son de 30 i de 35 anios ke va enpesar en algun negosio, i por esto era tambien poede ser ke sus vida era tambien i de los mas muntchos mas kurta, ke lo kazavan de 14 i de 15 anios i en un enterval de 4-5 anios ja podija ser arodejado kon 3 i 4 krijaturas, i el mizmo de la edad de 20 anios en siendo i el una krijatura, i viendose padre de 3 i 4 krijaturas i en non reuchendole los etchos de sujo es ke poeden devinir en ansi komportos, lo koal ke non sirija tanto de afejar^[8] esto ke eran koal buratchos i koal si foiva, or otra koza, i ansi ke dedavan [dechavan] para toda sus vida, jevar la mizeria, i mal lo azija ke si asentava en kaza non solo por el non tener kale dizir i ke si avregonsava, el ja era una persona ke ja si konsintija i era mui bien kapatche, ma koando non li kaminan los etchos koalo es ke poede azer,

539                                          Biografia de H. Merkadutcho Josef Arie,                               1837

i ansi era ke lo azija ke koando li suvijan los unos a la kavesa si enboratchava, i se rekojija a la mujer i sus krijaturas i se iva a la kaza de sus ermanos, porke non tenija otro remedio,

            En el anio de 5598, ke ja non pudo mas del en todo detener su kaza, i por non meter fin en su vida, lo izo ke la kaza ke el estava la abandono i se rekojo lo poko ke tenija de kozas i de otras i se foe a la kasa de sus ermanos, diziendo fin a koando i ejos tienen vamos a komer en djuntos, i la Bu. Revka era ke si sekilijava mui muntcho, ma non tenija koalo azer,

1. Merkadutcho era una persona alta, i su poerpo era mui deretcho el era sano i fursudo i propersional godre, su fatcha era morena, i los ojos tenija salidos^[9] para afoera, su boz era mui godra i de garon antcho, su linguaje era mui klaro, i avlava repozado sin ke gritava, su vistido era ke jevava un chalvar de amerikan mavi i en su talija apretado de un kuchak, de lana, i en sima al presipio una fermela de panio i denpoes un djube, en vezes de panio i en vezes de marinos^[10] i por el envierno era un kiordi en la kavesa jevava una fes grande atada de un chami, preto, i su kalsado era jeminis pretos, el si vistija mui limpio, i a debacho de el djube jevava siempre un ibrik de baro el koal era para vino, ke sin este ibrik non kaminava, ke en kada tiempo iva biviendo, i koando ja

540                                          Biografia de H. Merkadutcho Josef Arie,                               1838

si li vazijava, era ke si iva ande sus parientes, i lo entchija, de ande li vinija mas serka, ke a tanto ke bivija si poeda dizir el dija entero era ke non si enboratchava, i la avia [avla] non si li trokava, i kon el ibrik en djunto jevava tambien i debacho la alda i un tchibuk, de un takim^[11] mavi ke i de esto era tambien mui trijakli i el tutun tambien lo tomava, de los parientes, i koando enkontrava a alguno de sus parientes era siempre ke lis demandava ke li dieran paras, i todos ja li davan, ma el non jevava a kaza nada, por sus menester, i kon la Bu. Revka komo non si pasava boeno era siempre ke ivan en kaza pelijando, i visto ke non era koza de poder bivir, lo izo eja la Bu. Revka ke si foe ande sus parientes jorando porke li meraran el molde de ketarlo de kaza a el H. Merkadutcho, kon toda su Familia ke non podijan mas bivir, i sovre todo ke el gaste lis estava siendo mui grande, ke i ejos ja lo estavan viendo ke iva travando muntchas paras, i los enteresos solo non li podijan abasteser, foe ke lo izieron de darli a entender, ke kalija ke si saliera, i ke ja li ivan a merkar una kaza, i el lis dicho ke ja podija ser ma el non tiene paras para poderse mantener, ke sovre esto lo akomodaron kon ke rekojeron entre los parientes, algo de moneda, i la kaza ke li merkaron foe de la aiko i la moneda de esta kaza la dio la mas grande partida la Bu. Revka, kon ke eja en tal de, estar mas repozada, i non tener grandes gastes, para mantenerlos ke eja disija, koando ai musafires mos azemos todos musafires, i kale para todos prontar, la meza, lo koal ke koando estamos solos ja mos podemos pasar muntchas

541                                          Biografia de H. Merkadutcho Josef Arie,                               1838

notches i kon un pedaso de keso, i ansi muntchos dijas, i kon esta modo de ikonomijas era ke si podijan pasar solo kon los enteresos ke tomavan, i a rason de el estar H. Merkadutcho, lis kalio ke travaran i de el kapital, ke sovre la ditchision tomada foeron kontentes de todas las dos partes, i la Bu, Revka li kalio ke enprendara de su Djoja para pagar la kaza,

            En el anio de 5599, ke la kasa ja la pasaron i kon la suma de moneda ke rekojeron de entre los parientes, si la dieron en la mano de H. Merkadutcho, i si salio de kasa, i se paso en la kasa ke li merko la Bu, Revka, kijendo disir ke esta kasa es de los ermanos H. Elijatchuno i H. Rabenutcho, i kon esto se iva akomodando i tambien era la Bu. Rusu su mujer ke kudijava mas muntcho, porke eja ja ganava, de loke merava hasinos, i tambien era eja para todas las paridas i bodas ke avijan seja entre los parientes i tambien i en todas las otras kasas, i kada uno aparte de loke li pagavan en moneda era tambien ke li davan i presentes de komanija i muntchas vistidos, solo ke el desplazer era ke H. Merkadutcho, non si decho el boratchijar,

            era la Bu, Rusu ke metija en su lugar, algunas kozas de kasa ke H. Merkadutcho si las tomava de kasa i iva las vendija or las metija en prendas lo todo para bever, ke esto a los presipios

542                                          Biografia de H. Merkadutcho Josef Arie,                               1839

a la Bu. Ruzu li foe mui pezgado i estava lo mas muntcho jorando ma mas tadre ja si lo tomava a pasensija, i se iva de kaza, para ke non viniera el marido al menos entre el dija a kaza ke era siempre para tomarse kozas i venderlas para bever, i koando non kerija darle era ke enpesava a pelijar i muntchas vezes lis venija el etcho i de harvarsen i kalija las vizinas ke los espartieran,

En el anio de 5600, esto de moneda ke avija tomado para ke si saliera de kaza foe en este anio ke ja si li eskaparon sigun ke ja si save koando si ketar i non meter ke si eskapan en un punto, es ke de mizmo avija enpesado, mas muntcho a buratchijar, i tomarse kon la mujer i tambien iva i ande la Bu Revka, i li demandava ke li diera paras, ke komo non li iva a dar ke si li iva a ir torna a su kaza, i eja en tal de ketarlo i espantandose non seja ke si li foera, era ke li dava algo de moneda de esto ke i eja tambien non tenija, ansi era ke lo todo boltava torna ande los IJOS de Hr. Tchelebi, sovre todo ande el Tchelebi Gavriel ke el koal li era amo ke es ke en akel tiempo koando eran solo un ijo de un padre i ke non li bivieron los otros era ke lo vendijan i se jamava ke era komo ijo de otro, i este amo era ke lo protejava, i li mandava prezentes i li mandava vistidos, i Tchelebe Gavriel ke ja era enfasijado de ir dandole, era ke si sikilijava mui muntcho, i foe mui repentido para

543                                          Biografia de H. Merkadutcho Josef Arie,                               1840

ke lo merko, ma non era koza ke si podija boltar, atras esta merkida i ansi era ke siempre li iva dando,

            En este anio ke lo kazaron a H. Elijatchuno, ja foe kon ferman el irse H. Merkadutcho, a la boda kon un mez de mas antes, i esta era la kaza entera, ke este modo era la moda.

            En este anio de 5601, kijo vender la kaza ke li tenija merkado su madrasta, a razon ke ja non tenija de el entodo de ande gastar, i ansi era ke lo poko de mubilia ke avija merkado iva enpesandola a vender, i la Bu. Ruzu ke non lo dechava, lo azija ke si rovava un tendjer de kaza, or ansi otra koza i li enprendava, i koando eja li demandava, ja li dizija ke en tala mejana esta por tala suma enprendado i komo kerija ke foera i ke si lo tomara, i eja ke ja lo tenija de menester, azija ke de lo poko ke eja ganava, lo pagava i se lo traiva de moeve a kaza, lo todo si goadrava por ke non lo viera su marido porke lo azija ke de moevo si lo tomava, es ansi ke ja si kere entendido las vidas ke las ivan pasando, i en kada tadre ja era komo su kasa ke iva kon el ibrik de baro ke lo jevava siempre debacho de su djube, ande sus parientes kon sira a todas las kazas, porke si lo intcheran ke esto lo izieron para ke non vindiera or enprendara, las kozas de kaza, i todos ke ja tenijan el vino en kasa era ke si lo entchijan ke de esto ja mi akodro jo ke

544                                          Biografia de H. Merkadutcho Josef Arie,                               1841

vinija a moestra kaza, las tadres i se vinija por la poerta de atras a la eskondida i non entrava arientro otro ke batija la poerta i kon boz godra dizija na el ibrik, i muntchas vezes mi mandava ami mi S-ra madre porke si lo intchera, i eja li dava i algunas otras kozas, de kaza, i kon tomarlo ja enpesava a bever ke esto lo azija ke si lo bevija i se iva i en otra kaza en la mizma tadre i para ke si lo intcheran i entre el dija i la notche si bevija de 5 a 6 okas de vino i todo estava mahmur,

            En el anio de 5602, todos sus parientes visto a la grande mizerija ke sufrijan i tambien a el komporto de H. Merkadutcho ke era mui negro kon su mujer i su madrasta, lo izieron ke si rekojeron i vinieron en un lugar, por meter una fin a la vida de H. Merkadutcho, ke todos djuntos lo toparon de torna darle algo de moneda i asentarlo en una butika, kon la kundision ke tenija de bever solo a un ibrik de vino solo en las notchos, i esto de mizmo lo iva a tomar en kada tadre denpoes ke ja sero la butika, de kada kaza de sus parientes, i en mejane ke non devija de entrar ni menos pasar, i el ke ja si kontento li tomaron la butika ke mora oi Hadji Dimitre Cheitan, i de la suma de moneda ke rekojeron de entre los parientes si lo merkaron de ropa, i aparte li salio fijansa su amo ke era Tchelebi Gavriel, por 4000 groches ande algunos de los merkaderes

545                                          Biografia de H. Merkadutcho Josef Arie,                               1842

ke vindijan ropas en groso, i kon este foe ke repozaron seja la Bu Revka komo tambien i su mujer la Bu Ruzu, i ansi tambien i toda la Famija^[12], i el ke ja estava mui enfasijado de estar ailaz tanto tiempo si asento en la butika i enpeso a lavorar ke ja tenija muntchos amigos, i kon el bever tambien era ke mui bien se iva komportando i non bevija, entre los dijas sigun de antes, i en kaza tambien mas non pilijava, i se pasava kon todos boeno, i a dingun lugar non salija ke era solo de kaza a la butika i de la butika a kaza,

            En el anio de 5603, era de mizmo ke kontinuava la butika i se topava kontente, i ja era koza ke ja si estava pudiendo ganarse el bastante por el sujo mantinimiento i este kon ke la Bu. Ruzu tambien ajudava de su ganado ke a eja non si li estava enportando de penar i para ajudar al menester de lo poko de gaste ke ejos tenijan enfrentante de bivir una vida mas repozada,

            En este anio li nasio una IJA, i de mizmo izieron i kon eja sigun de todas las otras paridas ke non meravan los grados de las puzisiones de kada uno, otro ke kada koza era por si, i todos la vijitavan i li mandavan todos los platos i prezentes kon adjuntando tambien prezentes seja en moneda komo tambien i en komanija, i en el dija de Chabad ke la fadavan de mizmo se ivan kon las komidas i la fadavan a la ija ke la jamaron DONNA, era su madre ke la

546                                          Biografia de H. Merkadutcho Josef Arie,                               1843

kudijava i tambien la aletchava, i en su tiempo a eja la kazaron kon su primo ermano S-r. Konorte el IJO grande de H. Tchelebon ke es el IJO sigundo ke si trucho la Bu. Revka, ejos bivieron mui bien kontentes, i pario 2 Ijos i 6 Ijas, el S-r. Konorte toda su vida su negosio foe kasap de las grandes, el tuvo su kaza i butikas el patronaje, i sus IJOS todos son estudijados i patrones de etcho, i si pasan mui bien.

            En el anio de 5604, aun kon todo ke H. Merkadutcho fin a un grado ke ja estava endo boeno en la butika torna kon todo el kijo ainda mas muntcho, profetar, i el bever ke ja si lo avija dechado, lo supo ke en Kiostendil, la merkansija era boena, i ke non avijan del entodo echpikolantes sovre la merkansija, de la malifatura, foe ke lis rogo a sus parientes, porke lo alesensijaran de irse a Kiostendil, ke kon lo poko de ropa ke tenija i algo se iva a merkar, de el kredit ke li tenija avrido su amo Tchelebi Gavriel de los 4000 groches, i kon esto el ke ja tenija la grande esperansa, de poder reuchir, i su mujer i su madrasta ke ensistieron porke si foera es ke al presipio si foe solo a Kiostendil i se alkilo una butika, i lo estudio el etcho bien i en poko tiempo el si torno a Samokov i rekojo todo esto de la ropa ke el ja la tenija en la butika, i se merko ainda mas algunos artikolos ke eran pasavles en Kiostendil i

547                                          Biografia de H. Merkadutcho Josef Arie,                               1844

i mui gustozo resento algo de komanija para la kaza, i li decho tambien i algo de moneda ke esto foe la primera mez [vez] ke lo izo, i mui kontente partio por Kiostendil, djunto la ropa i a la manijana ke ja arivo, sin tadrar, el si resento la butika i de prima ja enpeso a tener venditas, i todos li ivan koriendo, komo ke trucho kozas moevas, i a los presipios foe vindiendo mas barato, fin a dar reklam, i en su kaza su mujer i todos los parientes eran mui gustozos ke ja li iva endo boeno los etchos,.

            En el anio de 5605, ke H. Merkadutcho ja estuvo boeno resentado en Kiostendil i los klientes ke ja los tuvo tambien mui boenos, era ansi ke el etcho ja li iva mui boeno kamenando i se topava mui bien kontente sovre todo mas muntcho eran gustozos su mujer la Bu. Ruzu, i non li demandava porke li mandara paras para sostener la kaza lo todo espantandose, non seja ke si boltara atras ke esto mi parese ke azija jero, i eja era ke lavorava ande lo topava, por ganarse el mantenimiento ke era kon la mas grande ikonomija, i kartas komo non li mandava a la mujer era ke eja lis iva ande sus parientes por kudijar seja por el komo tambien i por su etcho, ke el espanto mas grande era non seja ke buratchijara, i sus parientes ke ja tenijan siempre kartas seja de el komo tambien i de sus amigos ke i ejos non si kreivan a las kartas ke resivijan de el, ke

548                                          Biografia de H. Merkadutcho Josef Arie,                               1845

ejos eskrivijan tanbien i a sus amigos porke lo dolachijaran i ke lo kudijaran i ke siempre lis eskrivieran sigun ke esto ja lo azijan, i la Bu. Ruzu ke ja lo sentija era gustoza, i kudijava por sus krijaturas i tambien el menester seja para la kaza komo tambien i para las krijaturas, ke lo mas muntcho era ke tenijan el kargo todos sus parientes ke li mandavan kaje lo mas muntcho de el sostenimiento i de el mantenimiento, ke era kon esto ke podijan bivir,

es mui muntcho de alavar lo de akejos tiempos de tanto ke si ajudavan ke non solo en esto de el mantenimiento sigun ke ja lo estan viendo, ke era por todos los puntos lo koal ke agora, esta siendo al kontrario, ke esto ja lo saven todos, algunos dizen ke sirija poede ser, ke la Familia arie, mos alechimos la parientes, ma jo non esto viendo el abrasamiento mizmo en los mas serkanos parientes, ande ai algunos ke aparte de loke ejos ja estan sufriendo i non son ajudados es ainda, ke si vei ke estan buchkando los medios ainda para azerlo mas sufrir sin peadad, lo todo si estan prontandosen si non para ejos bien poedi ser para alguno de sus vinientes, ke esta enimistad ja esta i de agora enreinando, es grande desplazer, para la Familija ARIE,.

            En este anio de 5606 era de mizmo mas mijor endole su merkansija, en de mas en este anio li avijan enpesado i a irle a su botika i algunas Turkas por azer sus emplejos, i el ke ja savia

549                                          Biografia de H. Merkadutcho Josef Arie,                               1846

boeno komportarse, i la lingua turka ke ja la konosija, mui bien, siempre si lo ivan muntchiguando, entre las turkas ke li ivan avia tambien i una manseva ke era bivda, lo koal ke esto de el presipio H. merkadutcho non lo savija ke era bivda, i siendo ke non tenija el menester de su mantinimiento, bastante lo azija ke kamenava en los pasos de vergoensa, i siendo ke el uzo ja era, ke si jevava, ropas en las kazas de las Turkas lo azija esta Turka ke li enkomendava porke li jevara tambien i en su kaza, i H. Merkadutcho kon su boen korason, li jevava ropas i en kada ves li azija algunas Chakas, ke kon esto lo pudo konvenser, i era ke azija su plazer, ma solo ke ja si boltava mas presto a la butika, i de esta manera, lo avija enpesado a azerlo montchas vezes, i mas tadre enpeso a restarse mas muntcho tiempo en la kaza de la Turka i la butika la tenija serada muntchas oras i los amigos ke ja lo savijan por esta Turka ke era dezonorada i la Butika de H. Merkadutcho ke la vijan muntchas vezes serada, i enpesaron a kudijar si era ke si estava endo ande esta Turka, sigun ke ja foe ansi, ke antes de eskrivirselos a sus parientes, li ivan diziendo porke si repentiera de esta sevda, ke si li vazia la butika i sigun ke ja foe ansi ke esto ke li jevava ropas i aparte ke non li pagava era ke ainda li dava i paras ensima, i los amigos viendolo la ardor ke si li enviszio [envisio], i la butika ke mas ja non la estava merandola, i vaziando ke ja si estava, lo izieron ke en sikreta lis eskrivieron, a sus parientes porke lo kudijaran i ke estava kamenando en estos pasos, i de esto koando resivieron esta karta si lis

550                                          Biografia de H. Merkadutcho Josef Arie,                               1846

izo una mui negra edeja, i sin azerlo saver a dinguno li rogaron a su S-r. Tio H. Refael porke foera a Kiostendil, i ke merara si es verdad, esto ke estan eskriviendo, i ke merara de traerselo a Samokov ke ja si vido la grasija, i ansi foe ke partio H. Refael, i koando ja arivo ke ja lo supo H. Merkadutcho, foe ke si eskondio, i non salio unos dos dijas, ke H. Refael tuvo la pasensija, i espero, fin ke el mizmo vino, i denpoes de muntchos deskulpamientos, sin dinguna baza i sin muntcho avlarle, li rekojo lo poko de ropa ke li avija kedado i djuntos kon el si vinieron a Samokov, ke esto de eskonderse lo izo de mizmo i en Samokov, ke lis foe para toda la familija, grande mufina i H. Merkadutcho era siempre en kaza, i mas tadre ke empesa a salir, era ke li demandavan por los kontos i tambien ke devija i kada uno ke reklamava su aver era ke non respondija a dinguno nada komo ke li kozieron la boka, i kon los 4000 groches ke li era fijansa Tchelebi Gavriel li kalio ke los pagara, i enfrentante a los 4000 li dio H. Merkadutcho una urika^[13], ke tenija una valor de 300 groches, i mas non li demando porke non tenija,

            Seja la Bu. Revka komo tambien i la Bu. Ruzu su mujer era ke joravan de los males porke avija de moevo empesado a boratchijar i de esto li traiva ke pelejava seja kon la una komo tambien i kon la otra, i kon si ke non pudo traerse nada de moneda, era ke lis tomava, de las mujeres lo todo kon pelijar, i muntchas vezes i harvarlas, ke lo todo era solo para bever, i mas non kijo salir de kaza, i la mandava a la mujer, porke li merkara tutun i vino i

551                                          Biografia de H. Merkadutcho Josef Arie,                               1846

koanto a los menesteres de la komanija de la kaza era por lo todo la Bu. Ruzu ke kudijava, i esto sigun ditcho ke eja lavorava ande lo topava i kon ke los parientes ke li mandavan siempre, sin estankar de todo el menester, seja de la komanija komo tambien i de vistimientas era ke lo ivan pasando ke ja si keri entidido komo de vidas eran ke lo pasavan, i la Bu. Ruzu ja si avija muntcho aflakado.

En el anio de 5607, foe de mizmo komo el anio pasado ke H. merkadutcho, non tuvo nada de etcho, i su komporto era de mizmo komo de antes, i lo azija de vender algunas kozas de kaza, i para irse komportando, sus apetites,

Ke reviniendo a la vida de este S-r. para mozotros koalo serija de dizir, sigun mi pareser es ke non podemos djuzgarlo de la parte de la negrigura, sigun si veye es ke ja esta prokurando i buchkando todos los moldes para i el lavorar komo todos ke lavoran i de lo todo ke el tokava koando non li reuchija koalo es ke lo podija azer, i siguro es ke deva de etcharse, a la negrigura, or ke kalija ke si matara, sovre todo ke non tenija por ande, ser una persona sin konsensija, visto a toda su familia seja los de antes de el komo tambien i a los de denpoes de el, es ke mos kale dizir ke es solo el mazal, i para esto serija solo ke non deve tener dingun etcho por si mizmo, otro ke poede ser serija mas mijor, de ser adjuntado

552                                          Biografia de H. Merkadutcho Josef Arie,                               1847

a alguno otro, i enkamenar, lo todo al nombre de el otro i esto fin a un sierto tiempo fin ke si li trokar a el mazal, ke ja es naturel por kada persona ke kere el adelantamiento i komo tiene reglado fin a un sierto grado su pasadija de sujo es ke non tiene de trezjararse, ma esto non si lo izieron, ke non es porke non lis vernija al tino, otro ke kale dizir ke avria alguna otra razon.

            En el anio de 5608, la Bu Revka non lo kijo mas ke li foera ni vizino, ke la kaza ke li avija merkado, eja kijo ke si saliera, porke li paresija ke kon esto iva a ser ke non iva a pelijar, i tambien avija enpesado i a tomarle algunas kozas de su kaza, i las vendija, porke la kaza ja era suja de la Bu. Revka, ma esto non li atchetava, el H. Merkadutcho, i lo izieron ke li kalio ke li merkara otra kaza, ke es la kaza ke mora agora S-r. Nisim Aladjem, i kon ke li dieron tambien i unas koantas paras, si kontento a salirse, i se paso a la kaza moeva ke li merkaron tambien la Bu. Revka de la moneda de sus IJOS H. Elijatchuno i de H. Rabenutcho, i kon la kaza ditcha la derokaron i si la entraron arientro de el kortijo sujos, i kon esto tuvieron algo de repozo, i la Bu. Ruzu, iva siempre jorando ke non era por el mal de sus pasadija, ke para esto eja ja lo estava akomodando, de la manera sigun eskrito de mas antes, otro ke loke jorava siempre era por la suja negra vintura, i ke

553                                          Biografia de H. Merkadutcho Josef Arie,                               1848

estava siempre pilijando en kaza sigun ditcho ke lis vinija el etcho i de Harvarsen, era el IJO S-r. Josef, ke ja estava mas grande lo gritava al padre, i el ke si avregonsava, era ke si kedava algo mas repozado,

            En el anio de 5609, ke su IJO S-r. Josef ja foe mas grande, i en la echkola ke non pudo mas estar, foe ke su S-ra madre si konrogo kon sus parientes, de kudijar por su IJO, i ke lo kerija ketar al tcharchi i ke enpesara en alguna koza a ganar, i lo kijo ke li dieran algo de moneda ke li tenija de merkarle algo de sal i otras kozas ke si venden en los sirguis de los dijas de pazar i kon esto ke enpesara por los presipios, i sus parientes, ke ja estavan siempre prontos para ajudarlos foe ke rekojeron entre ejos 250 groches, i se los dieron en la mano de la Bu. Ruzu, i eja mui gustoza de esto lo izo eja propia, ke merko los artikolos menesterozos, i se asento eja mizma kon su IJO en el pazar, i toda la ropa ke la avija merkado, tuvo el mazal ke la vendieron toda, i a la notche ke si meraron el konto foe ke tuvieron una ganansija de 35 groches i ja si keri entindido el gusto ke tuvieron, sus gaste de la simana entera era ke gastavan de 18 a 20 groches, ma lo izieron ke de estas paras ke ganaron non gastaron ke si pasaron sigun ke de las otras semanas, i ansi de mizmo lo izieron i kon los otros pazares,

554                                          Biografia de H. Merkadutcho Josef Arie,                               1849

ke si iva tambien la Bu. Ruzu djuntos kon su IJO, i asijan las venditas mijor de un ombre, i en un enterval de 5-6 pazares ejos ja tuvieron 500 groches de paras ke esto lis foe muntcho ke non tenijan visto en un lugar 500 groches, ke koando ja tuvieron esta suma la Bu. Ruzu si foe ande los parientes ke li avijan dado los 250 groches, por kontarles las ganansijas ke ejos tuvieron i ke lis kijo boltarles atras los 250 gr. ke li tenijan enprestado, ma todos ejos a una boka li dicheron porke los detenga i kon esto ke lis seja MAZAL boeno, para el sujos avenir,.

En el anio de 5610, para ke non si mleskara H. Merkadutcho en el etcho de su IJO lo izieron entre los parientes, ke li reglaron una semanada por venirle en la ajuda para su menester i tambien i algo por su kaza, i esto era ke iva en kada djuevis ande todos los parientes, i li davan esto ke lo avijan fiksado i la Bu. Ruzu tambien ke ja ganava i algo empeso tambien i S-r. Josef de ajudar para el gaste, aun kon todo ke la madre non lo kerija ma el dezija, ke ja poede dar alguna koza, i esto foe ke mas tadre ke ja tuvo mas muntchas paras lo izo ke si tomo una butika i se resento de los mizmos artikolos ke los vendija en los sirguis de el pazar, i kon esto era ke tenija i entre la semana tambien i algo de venditas, i siempre si ketava en kada semana de 40 a 50 gr. i se topava mui bien kontente i todos eran mui gustozos ke ja iva a kamenar

555                                          Biografia de H. Merkadutcho Josef Arie,                               1850

adelantre, i en kaza mas non tuvieron pleitos, ke ja estava fin a un grado reglado su vida i tambien ke S-r. Josef Koando el Padre lo vija ke si komportava sigun de antes, lo gritava i muntchas vezes tambien i lo amenazava, i el si espantava, i si estava reposado, i la Bu, Ruzu era jena de la alegrija,

Ejos lo kijeron espozar a S-r. Josef, i li toparon una Novija mui ermoza de Berkovisa, la ija de H. Baruh Pardo, i lo konvinieron ke li tenija de dar 500 gr. de kontado i achugar a su onor, i ejos todos mui gustozos izieron el espozorio ke estuvieron todos sus parientes, sigun ke ja saven la manera ke azijan seja los espozorios komo tambien i las bodas, i por todo lo menesterozo ke eran ajudados de todos los parientes, foe ke todos si gustaron i el etcho de la butika ke ja li estava kamenando mui bien lo ivan mui bien en este tiempo pasando.

En el anio de 5611, ejos si prontaron todo el menester por la boda si entiendo ke kaje lo todo ja foe, mandado de los parientes, en todos los puntos ke aparte ke los ombres ja li dieron era ke las mujeres li mandavan mas muntcho, seja sovre la komanija komo tambien i de los vistidos, ke esto tambien era mui emportante, sigun ja vieron ke non tenijan kaje nada, i en su tiempo ejos la izieron la boda de todo djusto i todos la vijitaron kon las manos

556                                          Biografia de H. Merkadutcho Josef Arie,                               1851

jenas, i li dieron a la Novija todos bezas de mano seja los ombres komo tambien i las mujeres, i la Novija si jamava Lea, eja foe mui meujuda i mui repozada, i katava a todos los de su kaza, i su marido la amava muntcho, i eran de todas las 2 partes kontentes, i la Bu. Ruzu ke ja era una mujer mui savida la savija mui bien guijar, i non la dechava en nada lavorar, i siempre la jevava a vijitar ande sus parientes ke todos la resivijan kon muntcha boena kara,

1. Merkadutcho ke ja tenija su semanada reglada, era de mizmo sigun ditcho antes, ke la rekojija de sus parientes en kada semana, i agora ke ja tenija i noera non si enboratchava sigun de antes i ansi era ke ja estava mui bien repozado en kaza,

            S-r. Josef kon el kontado ke tomo tambien lo metio de ropa en la butika ke para la boda de estas paras non gasto nada i el etcho de la butika li iva endo mui bien i la Bu. Ruzu non li dechava nada gastar, para kaza, ke era eja ke penava, i lavorava para ganar en tal ke adelantara su IJO, ma eja ala eskondida siempre era ke iva jorando, ke por esto su IJO la gritava, en diziendole ke i el ja podija alguna koza ajudar para el gaste de kaza,

En el anio de 5612, H. Merkadutcho, ke ja foe mui enfasijado de estar, sin dingun etcho, li foe ande Tchelebi Jeuda ke era el prezedente de la komonita, por rogarle a ke lo nomenara i a

557                                          Biografia de H. Merkadutcho Josef Arie,                               1852

el por Hazan para el KAAL, ke meldar la Peracha ja savija ke Haham tambien era, i boz aun kon todo ke era mui godra, ma kantar ja savija, i Tchelebi Jeuda ke ja era su Primo ermano li izo kondision komo non iva a bever, i ke tenija tambien de levantarse temprano para ke foera a el midrach, ke dizijan antes de la Tefila, algunos pedasos de meldares ke eran uzo i sovre lo todo ke ja estuvo kontente, foe ke lo nomeno i li pagavan a 12 groches a la semana, ke kon esto a los presipios, ja estuvo kon grande sevda, i azija lo todo sigun de las kundisiones si li izieron,

            Sus ermanos H. Elijatchuno i H. Rabenutcho, ejos en tal ke no si li viniera torna en sus kasas, lo azijan ke kudijavan siempre, por el menester de su mantinimiento i era ke li mandavan siempre el menester, seja en komanija seja en moneda, i la Bu. Ruzu ke en este anio enpeso a azer medkirija, por las mujeres, i li vinijan en kaza muntchas kazalinas, i lis dava kuras por las hazinuras de mujeres, i de esto iva tambien ganando ke la paga era, ke li traivan gainas i otras komanijas, i aparte ke iva tambien i por las kazas, de sus parientes i otras era ke de todas por los hizmetis ke lis azija todas li pagavan, kada una de su manera,

            S-r. Josef, era en su butika ke kontinuava, i siendo ke li foe poko los artikolos ke vindija foe en este anio ke metio tambien i algo de tchara por los kazalinos, ke esto non lo konosija era ke lo azija kortar de otros tchariktchis, kon ke lis pagava, i si entiende de sujo ke i la ganansija tambien era mas tchika, ma ja

558                                          Biografia de H. Merkadutcho Josef Arie,                               1852

iva tambien i el vindiendo ke para azerlo esto era ke en los dijas de pazar avrija sergui en el lugar ke si rekojija el pazar, i la butika la serava en este dija,

            En el anio de 5613, li nasio a S-r. Josef IJA i la jamaron Belija, ke kon eja de mizmo lo izieron sigun ke lo azijan en todas las paridas, de vijitarla i mandarle todos los prezentes, kon un demazija de muntchos de los menesteres de la komanija i de otras kozas i tambien i prezentes en moneda, la parida ke ja en sana i boena era eja ke la krijava i la aletchava, i en su tiempo la kazaron a esta ija en Berkovisa en uno de la Familija de Pardo i biven mui bien i mui kontentes ke eja pario IJOS i IJAS, i su marido es boen merkader en Berkovisa ke mas tadre si levanto a Kutlovisa ke si izo grande pazar en esta sivdadika, i tambien si topa mui bien kontente,

            Koanto a H. Merkadutcho, era de mizmo tambien ke azija la Hazanija sigun i de el anio pasado ma el etcho de el bever el vino lo enpeso torna de moevo a emplijarlo i esto lo azija antes de la Tefila i ansi era ke li golija la boka muntcho a vino i Tchelebi Jeuda ke era tambien i el Gabai de la Keila aun kon todo ke non era koza de poderlo somportar, ma porke era su pariente era ke lo iva somportando, i mizmo ke li azija las remarkas todas torna kon todo

559                                          Biografia de H. Merkadutcho Josef Arie,                               1853

non trokava, ke esto li era komo una hazinura,

            i la Bu. Ruzu, era de esto mui sikilijada, i ansi ke mas non li avlava nada, porke non pilijara,

En el anio de 5614, su IJO el S-r. Josef, ke era en su butika, el non pudo, profitar en este anio ke a razon ke tomava i el la mas grande parte en el gaste de la kaza, era ke si li iva enmankando sus artikolos, i meter a su lugar ke non los estava pudiendo era ansi ke apenas vendija por tapar los gastes, ke lo todo era por razon ke el padre de lo poko ke tomava de semanada, i algo de algunas otras entradas ke tenija de loke era Hazan seja de las nedavod, ke etchavan koando sovijan a sefer tora seja ke iva a los jarsajatis, i ansi otras kozas, era ke a los presipios, ja gastava i el algo para los menesteres de la kaza, i siendo ke empeso torna a bever era ke non li estava abastando ni mizmo para el menester de la buratches i otros sus gastes, i kon la semanada ke lo tengo eskrito ke li avijan reglado sus parientes, mas non iva a tomarla, ke dizija ke agora ja tiene de ande mantenerse, era por esto ke su IJO iva lo mas muntcho gastando, i la Bu. Ruzu ke en este tiempo ke iva estando algo malata, era ke non podija kamenar, sigun de antes, ansi ke ivan torna sufriendo.

            Foe ke el poevlo enpeso a dar kechas por esto

560                                          Biografia de H. Merkadutcho Josef Arie,                               1854

ke vinija buratcho a el KAAL, i koando meldava el Sefer tora, aparte ke si durmija era ke azija muntchos jeros, i muntchas vezes si ulvidava de ande eskapo la peracha la enpesava torna, de moevo i se aravijava koando li ariftavan, i ansi foe ke lo ketaron de ser mas Hazan, i se asento en kaza,

En el anio de 5615, ke ja estuvo en kaza, era mui avregonsado, i su IJO lo iva gritando, i la Bu. Ruzu era solo ke jorava, i de esto non podija tambien eja ganar, por venir algo en la ajuda de la kaza, lo izieron torna de moevo de darle la semanada ke li davan de antes, i kon esto ke si foeran pasando lo todo ke loke tomava en kada semana ke si li devijan de darselas a la Bu. Ruzu, i eja ke las gastara, i koanto a el vino era tambien ke en kada tadre se iva a entchir el ibrik de una kaza, kon sira, i kon este ke non tenija de ande merkarse porke non li davan a fijado dinguno ke en Samokov loke avija era solo 2 mejanes, de Djidios, i siendo ke en las mejanes de los Kristijanos non si podija entrar, por razon de Nesah ke era mui grande pekado i se alguno lo vija ke merko de mijanes de Kristijanos, seja vino or seja raki era ke lo metijan en Herem ke li mandavan la talega, a kaza i mas non podija venir a el KAAL ni menos ke si li aserkava dingun Djidio, porke ja foe enkonado i ansi era ke non podija entrar, en las mejanes de los kristijanos, ke podia

561                                          Biografia de H. Merkadutcho Josef Arie,                               1855

tambien topar i a fijado i iva aser bever a la artura, mas tadre ke ja non podija estar mas en kaza ke lo mandava su mujer por ke foera al menos a el midrach, i ke meldara kon los otros Hahamim ke ja avijan ke eran pagados, de los IJOS de Hr. Tchelebi, porke i el Midrach, tambien era sujos, ke porke estuviera avierto era ke lis pagavan i en este midrach era ke Djuzgavan a el poevlo Djidio,

En el anio de 5616, foe ke i su IJO S-r. Josef mas non pudo detener la butika, i ansi foe ke i el tambien kedo sin dingun etcho, i ansi ke era mui muntcho sikilijado, fin a el grado ke si hazenijo, i por el tambien lo izieron de buchkar a ke torna la podiera avrir la butika ma el non lo kijo porke dicho una vez ke mi padre kamina en ansi unos pasos, va a ser ke mi se va a venir i el a la butika i en nada de tiempo la vamos torna a verla vazija ansi ke el kerija ser empeigado, en koalo foesa, i flako ke era porke non foe de el entodo bien mantenido, i loke podija ser solo era en algunos lavoros de ser asentado, ke en los kamenantes, non lo podija, i esto ke non lo estava pudiendo toparlo, era ke iva ainda mas muntcho aflakandose, el era una persona mui kajada, i esto li kavzava, los males, i non salija a dingun lugar, ke lo mas muntcho si estava en kaza, el non savija tambien ni meldar, porke non lo detuvieron en la echkola, ke lis paresija komo

562                                          Biografia de H. Merkadutcho Josef Arie,                               1856

iva a salir a la plasa de presipio ja iva a ganar, ke a estos non lis afito, mizmo ke a los presipios, ja iva ganando, kale dizir, ke lis paresija ke ja ganavan, a tiempo ke de el presipio ja enpesava a detener la kaza, or ke non savijan los kontos,

Ansi ke era siempre todo el kargo a la Bu. Ruzu, i a esto ke seja sus parientes komo tambien i la boena djente ke tenijan el boen kargo i esto en akel tiempo enreinava mui muntcho de ajudar a los menesterozos, ke lo mas muntcho era solo entre las mujeres ke kudijavan i lis mandavan de loke ejas lo tenijan en sus kazas, ke ja lo saven ke en akel tiempo era ke tenija kada uno en kaza todo modo de komanija, lo koal ke agora la moda ke ja es ke si mizmo si tiene de menester, una sivoja, es de el bakal ke la van a merkar, i en kaza non deve de toparse demazija, de el menester de el dija ni un grano de sal, i ansi es ke non poede aver, estas, dadivas de parte de las mujeres,

            En el anio de 5617, visto a el S-r. Josef ke esta va indo siempre flako ke era porke estava, sin dingun etcho, lo izieron de tomarlo por melamed para las krijaturas las mas tchikas, i ke las detuviera, i li dieron por el presipio a 10 groches a la semana, i aparte ke ja tenija i algunas otras entradas, de los jar, sajates i otras kozas de kolel era ke si iva pasando, kon solo esto

563                                          Biografia de H. Merkadutcho Josef Arie,                               1857

ke i esto ja li foe, koza grande sigun ditcho ke el non savija de el entodo meldar, i foe ke de esto enpeso a ir endo a el midrach, i de esto ke iva sintiendo meldar era ke i el se iva alguna koza enbezandose, i kon el padre ke ja estavan de boenas i ke ja savija el padre meldar, era ke en algunas kozas lo iva enbezandolo, lo todo ke estava prontandose por devinir, en el grado para ser i el komo uno de los otros melamedim, i kon esto podija tomar una paga mas grande i tambien ser i mezamer, en el kaal,^[14]

            Su S-r. Padre H. Merkadutcho, era de mizmo sigun de antes pasandolo, i el bever era mas poko ke non solo porke non tenia ma ja non estava mas pudiendo beverlo ke iva endo siempre flako, i ansi era ke non salija i estava lo mas muntcho en kaza, i se estava solo en la kamareta, i lo mas iva jorando sin ke savija por koalo, ke koando li demandavan el non respondija, i jorando se durmija, ke esto tambien lis era para todos otro sikinti,

            En el anio de 5618, ke H. Merkadutcho iva jorando foe en este anio ke si etcho hazino i estava en la kama i sus ermanos ke lo vijitavan siempre, era ke li mandavan el menester de sus mantinimiento el uno el dija i el otro la notche, i en su kaza mas no avrieron kozina porke la Bu. Ruzu lo kudijara, i la kaza ke lis era enteramente vazija de lo todo era ke lo izieron ansi por mas

564                                          Biografia de H. Merkadutcho Josef Arie,                               1858

kolailik, i tambien para ke foera mas mijor kudijado, el Hazino su Noera la S-ra Lijalutcha en este tiempo era ke si topava en berkovisa eja non si kirija venir tanto presto, aun kon todo ke la mandavan a jamar, i S-r. Josef era de mizmo ke kontinuava en el melamedud, i resivija su paga en regla, i los todos otros parientes, todos ja tenijan el boen kargo de siempre ir mandandole koalo lo podijan, sin ke foeran demandados, i kon esto lo pasavan fin a un grado kontentes, i la Bu. Ruzu en este tiempo non salio de kaza, sigun de antes, ke salija para ganar,

En el anio de 5619, H. Merkadutcho ke era hazino en este anio ja estuvo sano i boeno i las manijanas se iva a el midrach, i entre el dija lo mas muntcho lo pasava tambien en el Midrach ke meldava djuntos kon los Hahamim i mas tadre lo izieron tambien i a el una paga de estas ke tomavan los otros Hahamim, ke era una paga mui tchika, i aparte tenijan i 4 kahves ke bivijan a el dija sin pagar, ke esto ja era de el gaste de el midrach, ke si azia i estos todos gastes ke si azijan en el midrach, era ke los gastava el Rabino de la sivdad, i en kada 6 mezes lis javava el konto a los 3 ermanos ke son Tchelebi Jeuda, Gavriel i Abraam, i se lo pagavan a igual parte, i al Rabino li davan una gratifikasion aparte por esto ke el jevava los kontos i porke era la kavesera de el Midrach, i este

565                                          Biografia de H. Merkadutcho Josef Arie,                               1859

Midrach era avierto para todos ke kada uno era libero de entrar, seja ke el kerija meldar or seja ke kerija sintir meldar,

            koanto a su IJO el S-r. Josef, ke era Melamed de las Tchikas krijaturas, foe ke non lo pudo azer este ufisio a razon ke si hazenio, i entre sus parientes li avrieron una tchika butika de bakalik, i kon esto era solo para ke si enbevisiera, i profito de nada non tenija, ke apenas podija ketar para pagar la kira de la butika, i de esto se iva mas muntcho aflakando, era ke li kedava torna el kargo entero a la Bu. Ruzu, i a esto ke los parientes li davan en kada semana, i kon esto si ivan pasando,

            En el anio de 5620, El S-r. Josef non pudo detener mas la butika, era ke azija algunos mandados, para los parientes, i de esto ke lis sirvija era ke li pagavan ke non era por el hizmet ke li davan otro ke era porke, non si avregonsara, ma era mui abatido kamenando, i siempre iva estando flako i hazino ke sigun li dizijan era ke de non poder somportar el mal ke jevava, mas muntcho por esto ke non estava pudiendo reuchir en nada de todo loke azija, de esto ke li davan para ke ganara,

Ansi era i el Padre ke aparte de la suja mizerija era ke li enportava i por esto de su IJO, el ke ja si avija dado de rindido era solo ke en kada djuevis iva por las butikas de estos ke li avijan resentado la semanada, i la rekojija, ke era de 15 a 20

566                                          Biografia de H. Merkadutcho Josef Arie,                               1860

groches ke tomava, i kon el vino era aparte, ke tambien era el mizmo ke iva a las kazas sigun ke ja lo eskrivi mas antes, i ke todos ja si li entchijan el ibrik ke el lo traiva a debacho de el djube lo todo goadrandolo ke non lo vieran, i la Bu. Ruzu era de mizmo lo todo sigun i de los otros anios, ke eja sola kudijava por, la kaza entera, sin enfastijarse,

            En el anio de 5621 H. Merkadutcho seja de el muntcho bever seja de los males ke tenija sovre todo esto ke su IJO, ke estava endo kada dija mas flako, era ke i el tambien se iva aflakando i de esto ke si iva a el midrach, mas non tenija la foersa ni de kamenar i estava lo mas etchado en kaza, i siempre iva jorando, ke non dezija por koalo i sus ermanos, ke lo vijitavan era ke i a ejos tambien si lis enportava, mui muntcho, la Bu Ruzu, lo mas non estava en kaza ke se entremitija en la komadres ke esto li kalija ke estuviera siempre por las paridas era la su nuera la S-ra Lijalutcha ke kudijava por la kaza, i mas tadre estuvo en la kaza de Tchelebi Gavriel, ke estava ahazino i ke mas tadre Murio, tambien i era ke estava para responder en los etchos de la kuzina,

            Su IJO el S-r. Josef, ke mas non pudo estar en Samokov si tenija ido a berkovisa serka de su esfoegro, S-r. Pardo, porke lo kudijara, i H. Elijatchuno ke ja estava en este tiempo vijajando

567                                          Biografia de H. Merkadutcho Josef Arie,                               1861

por estas sivdades, lo izo ke estuviera tambien komo Melamed, en Berkovisa kon una paga de 25 groches a la semana, i ke estuviera en la kaza de su Esfoegro fin a un sierto tiempo fin ke si jevava a la Familia, i ke rekojera algo de moneda, i a Samokov ke non lis mandara nada ke por ejos ja ivan a kudijar la Bu. Ruzu kon sus parientes, i ansi ke estavan de todas las partes kontentes,

            Foe en este anio ke uvo mui grande frio i H. Merkadutcho, ke ja estava malato, i estava tambien su vistimienta flaka, i en el tiempo ke kortaron el siete de Tchelebi Gavriel ke foeron a el Bed Akevarod a el kortamiento de el Siete, i el ke estava vistido de un Tchube delgado ke era de una ropa de sof, i ke i el tambien kijo vinir, foe ke si jelo i kon venir foe ke si etcho en kama i pasando pokos dijas foe ke murio de Puntada ke es (pnomoni) i lo joraron muntchos dijas, i su IJO S-r. Josef ke non estava en Samokov foe ainda mas grande mufina, para toda la familia, i en el 11 Chevat de este anio foe ke murio, non keri ditcho ke ja li dieron todos los kudios menesterozos ma lo todo foe sin dingun provetcho,

568                                                      VIDA ABANDONADA.

            La prensipala razon de arivar, H. Merkadutcho, en esto de la Buratches, si veye, ke foe kavzante esto ke si kazo por la sigunda ves, Hr. Josef, i esto non podemos dizir a razon ke si kazarija i ke non estarija, kontente, es koza ke non si poede taksar, porke i H. Merkadutcho si non lo kerija ja iva aser, ke li ivan a azer saver ke non podija ser ke estuviera en ansi una edad si[n] kaza irse, i por esto non iva a ser, razon de arivar en esto, otro ke si poede dizir, soli [solo] por esto ke si trucho la Bu. Revka a los 2 IJOS sujos kon eja, i naturel es ke a el entenado non lo tiene de kudijar, komo a los propios sus IJOS mizmo ke era IJO de su ermana, ke si i el era kudijado komo los otros non podija ser ke de el presipio ja enpeso a pelijar, kon su madrasta fin ke foe el menester, ke lo ketaran de kaza, i ja es natural ke si va a enselar, i por esto de el presipio ja enpeso a bever lo todo para depedrer, ke si es ke si lo rekojijan torna en sus kaza, ja si podija dizir, ke podija poedi ser trokar, ma esto ke non lo izieron aparte ke si depedrio a si mizmo foeron kavzantes, de depedrer, i todos sus vinientes denpoes de el fin a este tiempo ke la dita la esto eskriviendo, ke esto mi parese ami i non es por enkulpar Has Vechalom a dinguno, i esto tambien si poede dizir ke el Padre non tuvo el tiempo ke murio mui mansevo

569

Fin aki si eskapa la Partida de H. Merkadutcho Mihael Josef Arie, fin a el anio de 5621 ke murio, en el mez de 11 Chevat, i su vida foe, de 55 anios ke bivio,