סניור רפאל א. אריה ואמו בו' בוליסו

663

De aki i endelantre si enpesa La partida de S-r Refael Elijau Arie Djunto su S-ra Madre la Bu. Bulisi, ke ejos restaron en esta kasa

664                             Biografia de S-r Refael Eliau Arie kon su Madre.                         1865

En el anio de 5625, sigun ke ja lo meldaron en la partida de H. elijatchuno, en el anio de 5614, en la oja 634, ke si avija endevdado a su ermano H. Chemoelatche el Chichko, kon bono a pagarle 5000 groches, de el etcho de la hevra de Filibe,

Ejos ke estavan tanto doloriosos, sovre todo ke i el ja lo savija ke de su ermano non kedo nada mismo ke non tenijan ni para sus mantinimiento de akel mismo anio, torna kon todo sin dinguna peadad, el kijo, aserli vender de la poka mubilija ke ejos tenijan en kasa i esto por vija de la polisija, para kovrarse los ditchos 5000 groches, i para ke non lo pudiera aserlo esto, foe ke la Bu. Bulisu, su mujer, de H. Elijatchuno demando su deretcho de la KETUBA? ke era una suma de serka 30,000 groches, i sigun moestra lei ke ja es ke antes de todo si paga la Ketuba i denpoes por lo restan de devdas, i aki tambien lo isieron esto ke lo eskrivieron toda la mobilija al nombre de Bu. Bulisu i tambien i la kasa, i esto de la Djoja ke tenijan i anke eskrivieron i mas todo esto ke poede aver en una kasa torna kon todo non si pudo entchir la suma, ke sovre ke reklamo H. Chemoelatche, foe ke tambien reklamo i H. Chelomo Koen, porke i el tambien tenija lo mismo de aver 5000 groches, de la misma Hevra, i por todos los dos lo isieron entre los amigos ke lo konvinieron por todos los 2 los 10,000 groches por solo 1000 groches i esto lo espartieron entre los 3 ermanos S-res Behoratche, Nisimatche i Rafael kon ke lis tomaron bonos moevos endevdandolos a 333 groches

665                               Biografia de S-r Refael Eliau Arie kon su Madre.                                  1865

a kada uno, por unos siertos tiempos, i kada uno ja lo pagaron en regla, i koando a esto de la mobilija i la kasa ke la isieron al nombre de la Bu. Bulisu, foe kon esto ke eja pudo ser patrona de lo todo i bivio toda su vida en esta kasa, djunto kon su IJO el Tchiko S-r. Rafael, ke a los kavos eja la enpresento esta kasa a solo a los IJOS de S-r. Refael ke fin oi ke esto eskriviendo la dita ja la enpatronan estos sus inietos,

Koanto a sus mantinimiento de la Bu. Bulisu i las 2 sus IJAS sigun ditcho ke non avija de ande ke kumieran, lo isieron ke si uvligaron Tchelebi Jeuda i Avraam, a darles por el tiempo de 2 anios a 20 groches a la semana, i sus IJOS ke li dieran el S-r. Behoratche a 10 groches i S-r. Nesimatche a 15 groches i el S-r. Refael a 7 1/2 los todos a la semana, i en suma ke si li rekojo 52 1/5 groches a la semana ke kon esta suma era kosa ke ja si iva a poder boena pasar i en kada semana era ke las rekojija S-r. Refael i se ivan mui boenos pasando,

En el anio de 5626, ke la Bu. Bulisi ja estuvo fin a un grado konortada de la moerte de su marido, i kon la suja pasadija tambien ke si lo reglaron ja estuvo mui bien kontente, ke di­cho mismo ke jo estuve kasada, foe toda mi vida kon estar bekijara de mi marido ma torna kon todo kon la esperansa ke un dija iva

666

667                               Biografia de S-r Refael Eliau Arie kon su Madre.                                  1866

arivar, a ke i jo estuviera komo a todas las mujeres era ke mi iva sufriendo i tiniendo la pasensija, foe ke non tuve este masal, i es agora, tu mi IJO el tchiko Refael ke mi vas a kompanijar, toda mi vida, ke jo bivire, i esto todo si lo estuvo kantandolo kon kantikas adjis (trajik) en abrasandolo en sus petchos i koriendole tchoros de lagrimas, de mismo foe tambien i de su IJO Refael, i ansi lo pasavan muntchas veses, i esto ja lis pasava presto,

i sigun ditcho kon la semanada ke li reglaron era ke la rekojija S-r. Refael en kada semana i todos ja si la ivan pagando en mui boena regla, i de esto ja eran kontentes, ma si pensavan ke esto non podija ser siempre,

S-r. Refael ke ja era grande eja lo kijo kasar, ma eja pensava si los ermanos ivan a estar de akordo ke esto foe eja ande sus IJOS los grandes i lis dicho ke kalija kasarlo i Refael i eja lo topo por deretcho de demandar a la IJA, de H. Rabenutcho la Rahel, i esto ke foeran todos los 2 i ejos ke ja lo toparon de djusto li foeron ande sus Tijo i lo isieron el esposorio, kon la kondision ke li diera 400 groches de kontado i achugar^[17] a su onor i esto ke lo podiera para aser la boda en este mismo anio i sus Tijo ke ja estuvo kontente lo isieron el esposorio ufisijal ke li foeron todos los parientes, i se gustaron i se alegraron i en el tiempo ke ejos estuvieron esposados si mandaron todos los presentes ke si usavan en akel tiempo i mas tadre ejos si prontaron por aser la boda tambien ke i esto lo isieron kon todo djusto kon ke eran ajudados por lo

668                               Biografia de S-r Refael Eliau Arie kon su Madre.                                  1866

todo de todos sus parientes, i de mismo lo isieron sigun ke lo asijan en todas las bodas, ejos si gustaron ke ja tomaron Novija de sus parientes i la Novija ke ja era mui boena i savida i achugar ke ja trucho mas muntcho de esto ke lo esperavan ainda eran mas kontentes i ansi vino a ser ke todos los 3 ermanos si tomaron mujeres de la Familija ARIE, i en este Djerenansio de H. Elijatchuno foeron ke de mismo i H. Elijatchuno tuvo mujer de la Familoja ARIE, i de esto va venir a ser ke los de la mas pura sangre de ARIE, son los vinientes de este Djerenansio, de entre toda la Familia ARIE,

            En el anio de 5627, ke S-r. Refael estava sin dingun etcho lo isieron sus ermanos ke li resentaron una tabla kon ke li mitieron kosas de minudensijas para ke kamenara por el varoch^[18], i otras mahales i ke foera vindiendo akejo ke podija i kon esto ke enpesara a entrar en la merkansija i el ke ja estuvo mui kontente, lo asija ke en kada dija demanijana si tomava kosa de komer para la medio dija porke non alkansava a venir a kasa, i el dija entero iva kamenando por las mahales seja de los kristijanos komo tambien i de los Turkos i tambien i de Djidios, i a la tadre ke si vinija kasa era ke ja vendija por los presipios de 20 a 30 groches a el dia i kon esto ja era mui kontente, i ansi iva kontinuando, i muntchiguando sus artikolos, ke entre todo foe una suma de serka 500 groches

669                               Biografia de S-r Refael Eliau Arie kon su Madre.                                  1867

ke li era bastante para sus artikolos ke los jevava al ombro sujo

kon los 20 groches a la semana ke li avijan reglado Tchelebi Jeuda i Avraam, ke eran por el tiempo de 2 anios foe en este anio ke ja deskaeron los 2 anios, i ansi foe ke mas non li dieron, i S-r. Nesimatche ja li dava siempre los 15 gr. ke si avija adevitado ma S-r. Behoratche, era ke koando tenija ja li dava i en algunas semanas ke non tenija era tambien ke non li dava, i era ke torna avija ensado [enpesado] a sufrir, porke S-r. Refael non podija sostenerlos menesteres de la kasa porke el non ganava, mas muntcho de los71/2 gr. lo asija ke si regalava siempre ande sus parientes, ke era lo todo las mujeres ke la regalavan,

Eja la Bu. Bulisu, foe una mujer mui pasensiosa, en las notches siempre li estava kontando, la beografija de la vida desu padre, i esta de su marido, kon esto pasavan las largas notchedas de el envierno i tambien li kantava siempre kantikas de konsolasion i esto si las enbesava tambien, porke i S-r. Refael savija boeno kantar, i de tanta miserija ke eja travava era ke ande la djente nonka si demostrava, i siempre era alegra, delantre la djente,

            En el anio de 5628, el S-r. Refael era ke de mismo kontinuava, en el negosio de su tabla, i siendo ke el era dijas enteros ke kamenava por los aires i los frios i las luvijas, foe ke

670                               Biografia de S-r Refael Eliau Arie kon su Madre.                                  1868

si jelo i de esto li vino una foerte frialdad, ke tuvo longo tiempo foerte dolor en el ujido ke mas tadre li foe kuriendo materija i de muntchas itchurijas ke el si iso foe ke la dolor ja li paso ma kedo sodro de el un ujido i mas tadre non enpeso a sintir tambien i de el otro ujido ke esto lo topava de loke si iva jelando en los dijas de el envierno, i tambien ke non estava tanto bien vistido, i por esto tambien era ke jorava la madre, i a razon de esto tambien era ke non podija salir muntchos dijas kon su tabla,

Su esfoegro H. Rabenutcho, tambien lo protejava en muntchas okasiones, aun kon todo ke era kon poko, i siempre lo vijitava, i lo akonsejava,

            Koanto las semanadas ke eja resivija foe tambien en este tiempo ke i S-r. Nesimatche ke li dava a 15 gr. li enpeso a darle solo a 10 gr. i esto li era mui poko, ma non tenija loke aser era torna kon esto ke la regalavan sus parientes ke si lo iva pasando i de esto eja si iva tambien i hasinijando,

En el anio de 5629, ke su ermano S-r. Nesimatche si asento en butika por vender lanas i otras kosas konvinientes, para las kristijanas ke lavoravan el Chajak,^[19] i ke lis vendija tambien i algo a kredit, i su ermano S-r. Refael ke ja las konosija a todas estas, foe ke si lo tomo kon si i decho el etcho de la tabla i esto

671                               Biografia de S-r Refael Eliau Arie kon su Madre.                                  1869

era ke li pagava una mesada, ke ja li era bastante, i siempre iva kamenando por aserlis venditas i en mismo tiempo tambien para aser i los enkasos, i todas li pagavan en boena regla

De esto sus madre la Bu. Bulisu era mui konsolosa de ver ke los 2 sus IJOS ja estavan en etcho i tambien ke eja ja iva a tener una pasadija mas reposada, i eja ke sufrio muntcho i ke a eja li plasija muntcho las komidas dulses, i siendo ke non las alkansava, foe en este tiempo ke eja si asija siempre boikos de asukar ke esto desajunava kada demanijana, i tambien lis dava a sus ijas i su noera, i lis disija kome be djanum, mira ke esto es loke envisia a la persona, sus IJAS eran mui delikadas i mui boenas ermosas eja las kudijava mui muntcho, i las mantenija boeno, i siempre las iva akonsejandolas i kontandoles las pasadijas ke eja lo paso i la boena esperansa de sujos avenir, i ejas la sintijan kon muntcha atansion eja las enbesava tambien i a kantar porke todas ja tenijan bose ermosas i tambien de garon alto,

            en muntchos dijas eja si iva a pasarlo ande su konijada la Bu. Bejutcha mujer de H. Chemoelatche el Chichko, i kon eja li tomava muntcho ke si kontavan de las unas a las otras las moevas ke avijan por las sevdad, ma de eja non tenija dingun provetcho en okasion por algun menester, seja para eja komo tambien i para sus IJOS ke H. Chemoelatche era mui tamahkijar,

              En este anio de 5630 era de mismo ke S-r. Refael

672                               Biografia de S-r Refael Eliau Arie kon su Madre.                                  1870

kontinuando en la butika de su ermano i en este anio ke S-r. Nesimatche enpeso a frekontar en las ferijas para aser sus emplejos de las ropas ke li eran el menester por su butika era ke lo dechava a S-r. Refael solo i el era ke la enkamenava, todo el menester ke lo demandava la butika, porke i el tambien si konsiente i save todos los menesteres de la merkansija, i sovre todo ke el tambien savija jevar los tefteres i savija boeno i klaro eskrivir,

La S-ra Rahelu mujer de el S-r. Refael ke ja eran 4 anios ke ja avija kasado i ke ainda non avija parido i eja ke era algo vergonsosa i mui travada, era ke non si vistija boena i non si afeitava, komo otras mansevas, i su esfoegra la akonsejava i la asiguija muntchas veses porke foera mas avierta i ke si vistiera de los mijores vistidos i tambien ke si afeitara para ke la kijera su marido mas muntcho i tambien ke la amara, aun kon todo ke su marido non li enportava, de esto, porke i el era tambien persona travada ke el non salija a dingun lugar, ke non li plasija los pasatiempos de los mansevos el non frikontava en su mansevos las kavanes ni menos les otros pasatiempos, ke era siempre de kasa a la butikai de la butika a kasa, su penserio era siempre en el negosio,

En este anio ke ejos ja tenijan una pasadia mas mijor ejos eran mui kontentes, i siempre si enkamenavan sovre la ikonomija, ke sus madre lis disija ke era grande jero este de aser la ikonomija en el tiempo ke ja poeden gastar, para mas mijor mantenersen, ke eja ja lo iso esto ma non gano nada, ke es jevar mal seja

673                               Biografia de S-r Refael Eliau Arie kon su Madre.                                  1870

en el tiempo de la provesa komo tambien i en el tiempo de la rekesa, ma en esto su IJO non era de akordo, i por kontentar a su madre era ke asija tchikos trokamientos,

En el anio de 5631, era ke la vijitavan mas espeso a la Bu. Bulisu, sus noeras las grandes, visto ke ja estava mas kon antchura, ke eja koando estava, ke ja tenija su boena pasadija, li plasija muntcho kantar, i tambien kontar estorijas viejas de los de antes de eja i esto ke lis plasija mui muntcho a sus noeras era ke estavan dijas enteros, enbivisidas en esto i estavan siempre asiendolas arijir, ma sus IJOS non la vijitavan muntcho, porke ejos ja estavan okupados en sus etchos, i de esto eja non lis dava dingunas kechos, ma eja non lis iva muntcho en sus kasas.

Ejas non tenijan muntcho lavoro en kasa ke non es komo agora, i lo todo siempre ja estava en regla eran non sirvidas de mosas ke ejas si alimpijavan i se prontavan la komanija, i ansi era ke ja tenijan el tiempo para lo todo,

Eja era una mujer, delikada i non era godra era sana su vistido era de un chalver, i de un tcherkes, i en su kavesa si tokava kon un chami, i koando salija a los plasas si mitija feredje kon un jachmak de toka fina i blanka, eja era mui resivida de todos porke su platika era mui dulse, ke lo mas muntcho avlava en lingua

674                               Biografia de S-r Refael Eliau Arie kon su Madre.                                  1871

Turka, i lo todo kon ke savija darles a entender,

Su IJO S-r. Refael era de mismo en la butika kon su ermano S-r. Nesimatche, ma por desplaser los etchos lo enpesaron a non kamenarle tanto boenos, ke esto era mui sikilijados todos los 2, ma ja ivan kontinuando,

En el anio de 5632, ke su noera la tchika ainda non avija parido lo tenija esto por grande ataganto, i eja ke iva muntcho ande las Turkas, ke sigun ja saven ke la aserkavan mui muntcho seja porke lis kantava koando ejas tenijan vijitas i la mandavan a jamarla ke todas ja la konosijan por el nombre de DUDA, or seja ke lis asija muntchos mudos de djuegos, es de esto ke eja si enbesava muntchas itchorijas ke las asijan las Turkas para parir, i eja kon estas itchorijas ke li foe asiendo a su nuera foe ke kedo prenijada i pario denpoes unas koantas veses, i de esto si gustava muntcho,

S-r. Refael ke era ande su ermano i ke resivija una mesada regular, foe ke en este anio mas S-r. Nesimatche non la pudo detenerla la butika ke ja si entiende ke non li foeron los etchos boenos, i li kalio ke la serara, i ansi foe ke i S-r. Refael tambien kedo sin dingun etcho, i seja su madre komo tambien i toda su Familija eran mui sikilijados, sovre todo ke las semanadas ke si li avijan reglado non las estava mas resiviendolas, i de lo poko ke lo

675                               Biografia de S-r Refael Eliau Arie kon su Madre.                                  1872

avija avansado S-r. Refael era ke si ivan pasando i esto kon la mas grande ikonomija, i eja koando li arivava ansi era ke mas non salija de kasa i sus parientes ke ja lo savijan esto era ke todos li ivan enpesando a mandarle de todos los menesteres i lo todo en sikreto para ke non lo supiera de ken lo resivija,

            En el anio de 5633, li nasio a S-r. Refael un IJO ke si gustaron toda su familija porke eja pario a los 7 anios de kasada, i todos la vijitaron i li mandaron muntchos presentes, i lo jamaron BEHORELIJAU, ke en su tiempo lo rihmieron tambien kon muntcho gusto, i foe mui bien kudijado, i engrandisido, porke el de su tchikes ke ja foe mui flako i mui menudo, sigun ke i agora es tambien mui flako i mui menudo,

La Bu. Bulisu ke ja sufrija de tantos modos de atagantos, foe en este tiempo tambien ke a su IJA la grande VENESIJA, li salio una nuve blanka^[20] en el ojo i esto eja ke ja era tanto kapatche a detras de tantas itchorijas ke li iso ke lo todo era ke si las enbesava de las Turkas eja reucho a sanarla solo ke kedo algo de la vista mas kurta i la nuve blanka si li depedrio enteramente, i de esto kedo fin oi de mui kurta vista,

            El S-r. Refael era ke si merkava sal de mar i avrija serguis en el dija de pasar ke era dija de lunes, i lis vendija a los kasalinos

676                               Biografia de S-r Refael Eliau Arie kon su Madre.                                  1873

 i kon esto era ke si ganava alguna tchika suma, i entre la semana tambien lo asija ke kamenava por el varoch i algunas kristijanas ke tenija konosidas era ke li enkomendavan algunas ropas i el si las jevava i de esto tambien ganava alguna kosa i se ivan pasando lo todo ke ja si kere bien entindido, era tambien ke i sus ermanos lo ajudavan tambien en algunas kosas,

            En el anio de 5634, ke S-r. Refael kontinuava de mismo en los negosios de el anio pasado, foe ke su ermano S-r. Nesimatche enpeso de moevo a traer ropas de Selanik, i las Vendija en Samokov a los merkaderes en groso i siendo ke li era el menester de un ajudador foe ke iva tambien en muntchos dijas ande su ermano para ajudarlo i de esto tambien li pagava, koanto a los 10 groches ke S-r. Behoratche su IJO li devija de darsilos en este tiempo non pudo darli, i eja non li avlava nada porke ja lo vija ke i el tambien non tenija, a rason ke i el era ke li estuvieron dandolo,

            Su IJA la Tchika Revka ke era tanto delikada i ke ja foe mas grande si la djo a la bu. Bulisu de Tchelebi Avraam, por decjpla [dechipla] para ke li merara a sus krijaturas i esto foe solo en esta kasa porke eran mui amigas ke eja tambien la merava komo a su IJA, i aparte de la semanada ke li dava era tambien ke la vistija i li dava muntchos presentes seja a la Revka komo tambien i ala su madre,

677                               Biografia de S-r Refael Eliau Arie kon su Madre.                                  1874

Por koal unke kosa ke uviera en la Familija era ke todos la jamavan a eja seja ke uviera bodas seja hasinos or seja en pasatiempos, seja paridas, i mismo por akonsejarsen i de mismo si alguna mujer kerija eskojerse kolores de ropas por aserse vistidos era de mismo ke a eja la jamavan para ke eskojera ke eja tenija muntcho gusto i savija las modas lo todo de esto ke eja estava siempre por las Hanimes, i la djente mas grande, i ansi era sin ke dichera la S-ra konsfoegra non podija ser, ke este modo la jamavan todos i eja ja lis venija a todos, ke esto lo asija solo por plaser, i ansi era ke todos la amavan i eja non si lo kontinija.

            En el anio de 5635, el S-r. Refael enpeso a kamenar mas muntcho por los kasales i era ke lis jevava algunas ropas de los kasalinos i las asija trampa por modos de trigos i de avikas i otras kosas, i esto ke tomava lo traiva a el pasar de Samokov, i lo vendija i esto era ke el si iva a pie a los kasales porke non li konvinija irse kon kavajo, i ansi era ke li estava siendo mui foerte para poderse ketar su mantinimiento, el si vinija a kasa tanto kanso ke non salija 2 dijas para reposar, su madre lo adjidijava mui muntcho i muntchas veses jorava de verlo en la tanto grande miseria ke non asija otro ke li kantava kantikas de konsolasion, i kon esto era ke lo ivan pasando, i sin ke dinguno los viera, i kale disir

678                               Biografia de S-r Refael Eliau Arie kon su Madre.                                  1875

ke de loke si sikilijava la Bu. Bulisu foe ke en este anio tuvo una grande dolor de petcho ke de esto sufrio muntchos meses, i a poder de muntchas itchorijas i medikos ke la vijitaron foe ke por este tiempo ja li paso solo ke kedo mui flaka, i mas non podo komo de mas antes kamenar por los lugares de pasatiempos ke ja avijan siempre, era ke a eja ja la vijitavan siempre todos sus parientes sovre todo ke sus IJOS ja la kudijavan siempre i li mandavan todo el menester, ke ja era kontenta de resivir de sus IJOS,

            En el anio de 5636, ke la Bu. Bulisu de Tchilibi Avraam iva endo siempre hasina era ke la jamava a eja para ke estuviera kon eja ke li tenija muntcha sempatija, i ansi lo asija ke si li iva kada dija i estava kon eja kontandole kosas viejas i tambien ivan kantando siempre kantikas trajik, porke i eja tambien savija boeno kantar, i muntchas notches si etchava kon eja en su kamareta

            En el anio pasado ke si avija morido H. Rabenutcho, ke era esfoegro de S-r. Refael, lo iso ke demando ke li dieran tambien i a el la parte dela eredad, ke li tokava a su mujer porke es ke i el tambien las tenija de menester, ma non pudo tomar nada por ke non kedo nada de H. Rabenutcho, mas ke devdas, i en esto ke ja foe konvensido lo kijo al menos li pagaran el kontado ke era 400 groches, i para esto foe apenas ke li dieron solo 200 groches porke

679                               Biografia de S-r Refael Eliau Arie kon su Madre.                                  1876

koando kaso non li dieron el kontado i lo isieron kon bonos i tambien non si los pago,

            En este anio tambien li nasio a S-r. Refael el sigundo IJO, ke kon este parto tambien lo isieron sigun todos los otros i lo jamaron ISHAK, i su madre lo krio i lo kudio, ke lo todo era a los kudios de la su esfoegra,

            El era ke kontinuava, de mismo en los kamenares seja por los kasales seja en la sivdad, i de esto ke los ermanos li davan i ke todos los parientes siempre ke los regalavan era de esta manera ke lo ivan pasando, i siempre desasperados,.

            En el anio de 5637, ke S-r. Refael kaminava por los kasales de esto ke si kansava foe indo hasino i esto ke su madre si lis konjoro ande sus IJOS los mas grandes foe ke li resentaron una tchika butika de artikolos de bakal i esto ke li era mui poko asija tambien ke si iva a los fabrikantes de gaitan i lis tomava de ejos partidikas tchikas i las kamenava por las plasas i las iva viniendo por los tersis, i otros ke merkavan de este artikolo i de esto tambien tenija ke ganava koanto esto de la butika, i mas tadre se iva a los kasales para entchir kesos en tulum ke los prontavan por Kostan i era ke serava la butika i estava komo 2 meses por los kasales, ke en este tiempo era ke ja traiva de 12 a 15 liras de lo

680                               Biografia de S-r Refael Eliau Arie kon su Madre.                                  1877

avansado, i kon esto si merkava el trigo i la lenija i algunas otras tchikas kosas por el envierno, ke disija tener el pan i denpoes por los otros menesteres era ke loke podija iva traendo,

            Eja la su madre en este tiempo era siempre en la kasa de Tchelebi Avraam akompanijandola a la Bu. Bulisu ke estava Hasina i ejas las 2 estavan en la kamareta, i de kontino lo iva kantandole, kantikas garip, i siempre todas las 2 ivan jorando i en su kamareta non dechava entrar otra djente, lo mas muntcho de el dija foe de esta manera ke lo isieron fin ke murio ke era en el 8 Nisan de esta anio, denpoes ke ja estuvo el mes entero si foe.

            En el anio de 5638 ke su ermano ja estuvo hasino si li foe tambien en su kasa para merarlo ke esto mismo ke lo asija ande la Bu. Bulisu ke li iva kantando lo asija tambien i ande su ermano i era kon esto ke se ivan konsolandosen i pasandole eja ke ja era algo malata, i de las nutchadas ke eja pasava, sin dormir era ke ja estava kamenando medija abokada, porke tenija i dolores en el bel ke para esto si enkochakava kuchakes, ke kon esto era ke estava pudiendo detenerse, fin a un grado,

            En este tiempo ke era tambien i la Guera Turka-Rusa ke lis kalija ke estuvieran lo mas muntcho eskondidos era de esto tambien ke S-r. Refael non podija salir para ganarse su menester, i ansi era ke de esto ivan mas muntcho sufriendo, solo ke era de sus

681                               Biografia de S-r Refael Eliau Arie kon su Madre.                                  1878

ermanos ke lo ivan aremedijandolo i lo ajudavan kon ke li ivan i dandole seja en muneda komo tambien i de los todos otros menesteres ke esto foe kontinuando fin ke vinieron los Ruses ke koando ja vinieron mas non uvo dingun espanto i tambien ke todos los negosios la foeron mui bivos i todos ganavan a muntcho, porke los Ruses trucheron muntcha moneda, i todos los artikolos foeron muntcho demandados i se vindijan kon presios mui karos,

En el anio de 5639, ke S-r. Refael se iva por los kasales en el tiempo de los kesos ke los savija entchirlos, i a rason de esto si foe tambien i a las mandras komo kalfa para aser kachkaval ke esto era ke los kalfas lis pagavan medija paga i ke su entision era ke en 2 anios si podija aser maestro i ke podija resivir una paga de 30 liras, por el tiempo de 2 meses, ma este non lo pudo aserlo ke li vino mui pesgado el estarse por los balkanes, i tambien ke la pena era mui foerte i el ke non era tanto foerte, era ke si kansava mui muntcho, es la una i otra si espanto a rason ke avijan muntchos ladrones en este tiempo sigun ke ja lo eskrivi en la partida de S-r. Refael de H. Avramatche, ke si lo avijan jevado los ladrones i ke sufrio tanto, es ke mas non kijo lavorar en esto, i era ke torna kontinuava en irse solo por los kasales i iva intchando kesos, i denpoes de esto ke ja pasava el seson era por la

682                                Biografia de S-r Refael Eliau Arie i su Madre.                                     1879

 la plasa de Samokov ke kamenava, i merkava i vendija algunos artikolos de mano a mano, i kon esto se iva enbivisiendo,

            En este anio la kasaron a la Venesija kon S-r. Avraam Josef Koen de Samokov, ke para atalnarse [atakanarse]^[21] esta boda anke ke jevaron algo de apreto ma non foeron muntchos ke seja de ejos komo tambien i de sus ermanos los mas grandes ke ja foe mui bien ajudada, i mas ke i todos los parientes, non mankava ke ja eran para lo todo en su ajuda la isieron la boda mui bien, i foeron mui bien kontentes de todas las 2 partes i foe siempre mui kichta de todos de su kasa, i el marido tambien la kudija muntcho,

            En el anio de 5640, a S-r. Refael li nasio una IJA ke kon eja tambien de mismo lo isieron sigun ke en todas las paridas i S-r. Refael li dicho a la madre ke si es ke li asija estar itchorijas ke li iso tantas para ke pariera kon unos koantos anios mas tadre non iva a tener loke pedrer ke a este konto ja va a ser patron de 10 or 15 krijaturas, i la madre li dirija el ken las da a estas Krijaturas ja da tambien i para ejos, ma esta IJA bivio solo 3 anios, i murio

            Eja Bu Bulisu lo mas de los dijas se ivan ande Su IJA Vinisiu ke era resin kasada i siendo ke non era usada a los usos de la kasa ke eja entro li estava viniendo mui pesgado era ke

683                               Biografia de S-r Refael Eliau Arie kon su Madre.                                  1880

la iva akonsejandola, i en mismo tiempo enbesandola, i kon esto mas tadre ja si uso, i se pasavan mui boenas, porke en la kasa ke eja entro era de lo todo jena i tambien la meravan muntcho,

            S-r. Refael en este anio tambien asija de mismo ke de los anios pasados ke un demasija tuvo ke sus ermanos ke ja estuvieron en mas mijor pusision era ke li davan las semanadas, mas en regla i kon esto ja era ke estavan mas mijor,

            En el anio de 5641, la Bu Bulisu kijo kasarla tambien i a su IJA la Tchika la Revka porke eja dicho ke en loke eja esta biva kasarlas a todas para ke non joren koando van a kedar en mano de sus ermanos, ke esto si empleja muntcho, kijendo disir ke ermanos non son pejadosos, i por esto es ke las IJAS deven de tomar parte en la eredad, de sus padre or madre, ke esto ke non kodijan es porke koando ja non tienen mas padre or madre i de lo todo ke ja si enpatronan los IJOS viene a ser ke las IJAS ja kedan komo unas ajenes, i lis viene pesgado a los IJOS de dar paras a la djente ke mas ja non las kontan komo sus ermanas, i este ke ja lo konosen todos en djeneral es ke buchkan propio sus parientes de kasarlas, ke esto es loke mi parese ami ma kada uno ja lo save ke esto ja enreina, i por esto foe tambien ke i aki la Bu. Bulisu lo kijo esto i eja tuvo el masal ke en este tiempo S-r. Jeuda B. Elieser, ke si avija kasado

684                               Biografia de S-r Refael Eliau Arie kon su Madre.                                  1881

 de serka tiempo kon la IJA de S-r. Moche B. Avraam, i por algunas siertas rasones, ejos ke si apartaron, foe ke la demando a la ditcha Revka, i siendo ke foe sin kontado i sin dinguna achugar, ejos lo toparon por deretcho de darsela i sin tadrar lo konvinieron i isieron la boda, i foeron de todas las 2 partes mui bien kontentes i mas tadre ke ejos si foeron a Viena, a bivir por los presipios ja pasaron boenos ma mas tadre su marido la apretava i pelijava muntcho, i de esto eja ke non lo podija somportar foe ke li vino una hasinura en los ojos, ande sufrio muntchos anios, i mas tadre anke li paso i se sano de esto ma kedo de mui kurta vista, i agora ja biven mui aunados i kontentes eja pario IJOS i IJAS, i todos ja foeron mui bien idokados i kontinuaron sus estudios a los kavos ke ejos todos son empeigados en los mas altos postos, kon sus boenas pagas eja la S-ra Revka tiene muntcho desejo de vinir a Samokov, i eja koando lo save ke alguno de sus parientes van en Viena es eja misma ke los buchka i se los jeva su kasa, i li demanda por toda la Familia Arie, eja siempre li mandava muntchos presentes a la madre, i siempre si kartijavan,

            S-r. Refael era mui travado ke de tanto ke lo jamavan sus parientes porke foera en sus kasa el non venija i por enfrentante todos los parientes lo vijitavan seja en el tiempo ke bivio la madre komo tambien i koando era solo i esto el disija ke si avregonsava, por esto ke non sintija muntcho, a loke li ivan a avlar, su negosio foe mas mijor, en este anio i el ja alkansava, tambien i

685                               Biografia de S-r Refael Eliau Arie kon su Madre.                                  1881

para poder sostener a su IJO el Behor ke ja iva a la echkola, ke esto li kostava por el presipio mas muntcho,

            En el anio de 5642, la Bu. Bulisu si akecho ande sus IJOS los mas grandes, en disiendoles ke non la estavan mas kijendola merar i en mismo tiempo kudijarle, ke eja ja estava gaire mui kansa de sufrir, i flaka ke estava endo era mas muntcho de verlo a su IJO Refael, ke non estava mas pudiendo alkansar, para sostenerlos, i S-r. Nesimatche ke estava en este tiempo solo en Vakarel li dicho ke si li foera en su kasa i ke estuvieran kon la Bu Jael eja lo iso esto de irse a la kasa de S-r. Nesimatche, i de la Bu. Jael ke ja foe mui bien resivida i la merava muntcho i li asija en mismo tiempo todos los sujos plaseres ma eja non pudo estar longor tiempo ke torna si foe a su kasa kon S-r. Refael, i S-r. Nesimatche siempre li mandava presentes seja de komanija seja de vistimientas i esto lo kijo S-r. Refael porke el podija pasarse kon la ajuda de la madre ke seja ke resivija de sus parientes komo tambien i de sus IJOS los mas grandes, i eja komo tenija siempre la mas grande sempateja kon su IJO el tchiko era ke si adjuntavan siempre en un kavo S-r. Refael ke era un mansevo mui penador, i grasijas ke ja era mui fursudo i tenija la foersa de kamenar a pie, i non si avregonsava de frekontar en koal unke^[22] lugar foera para ganarse koala lo podija

686                               Biografia de S-r Refael Eliau Arie kon su Madre.                                  1882

ke por lo todo si kontentava, i kon muntcha pasensija a lo todo lo somportava, el en Muntchas okasiones li arivavan unas mui foertes kalasiones,^[23] i se atava un kuchak grande en la kavesa i kon esto si iva demadruga por los kasales, el non durmija mas de 4 i 5 ores i koando ja si espertava el si salija presto de kasa, i se iva sin ke espertara a dinguno, el era de mismo i en kasa mui travado ke el non demandava nada por ke li dieran or ke lo sirvieran,

            En el anio de 5643, a S-r. Refael li nasio una IJA ke kon eja tambien lo isieron sigun todas las otras, ke de mismo li mandaron los presentes i eja misma la krio i la kudio, kon la ajuda de su esfoegra, sigun ke ja lo saven ke eja ja era jakichiklija i alkansava para responder a lo todo, eja las akonsejava a sus parientes ansi kontentavos be djanum, i de las mijores kosas kome be djanim, i siempre vistivos de los mijores vistidos be djenim, i nada atras de loke vos viene al tino non dechech i todo aseldo be djanim ke koando vos asech viejas mira ke muntcho vos repintich, porke non lo isitech, be djanim, i aparte eja lis kontava miles de modos de enchemplos, i konsejas ke non las dechava ni ke lis kedava lados de estar ariendosen,^[24] eja tambien lis kantava modos de las kantikas ke eja ja las konosija kaje todas de estas ke si kantavan en akel tiempo ke ja lo saven ke las savija tambien i kantarlas, eja ke savia

687                               Biografia de S-r Refael Eliau Arie kon su Madre.                                  1883

 tambien aser modos de djuegos de pasatiempo kon sus kantikas ke i las kantava tambien, i para kada manera de djuego koando lo asija, era ke i se vistija tambien, el vistido konviniente, para kada djuego veses ke djugava el djugo konvinivle a las Turkas eja si vistija de vistidos de Turkas i se enbolava propio komo a las Turkas i avlar en Turko ke ja savija komo a una propia Turka i kon el jachmak ke si lo enbolava non era kosa ke si podija apartar, i koando era menester eja si vistija de los vistidos ke si visten las singanas i se tomava la torba a su ombro, i enpesava a avlar kon a las singanas i lis avrija los Fales ke las singanas lo avren a lo mas muntcho a las mujeres ke lis kontan modos de bienes i males por sus maridos, i esto non si apartava komo ke una singana lo estava avlandolo, i en veses si vistija de ombres i se mitija un potur kon ona fes i una Tchalma en su kavesa i enpesava a aser las etchas ke lo asen los ombres, i ansi para todo modo de pasatiempo era ke todo lo savija aserlo i esto mui hinoso^[25] i eja tambien savija todos los bailes de estos djuegos, i tambien i bailarlos, eja savija aserse las toaletas seja de los tiempos antigos seja de el tiempo presente i de kada nasion i kon esto lis amostrava a las mansevas, i para ke si foeran riendo ke lo todo tambien lo asija mui reposada, i todo kantando sin ke eja si kansava, i esto era solo delantre de mujeres ke lo asija esto ke lo esto eskriviendo porke jo mi eskondija koando era mas tchiko i ke non mi viera porke todas las mujer mi ketavan afoera

688                               Biografia de S-r Refael Eliau Arie kon su Madre.                                  1883

i era ke lo estava viendo koando los djugava i mi enpesava i jo tambien a reirme, non ai agora mas ansi mujeres para ke si entremetan en esto i para ke veigan al menos las mansevas de agora,

            En el anio de 5644, ke S-r. Refael non tuvo tanto etcho era ke estavan jevando algo de apretos tambien i por sus mantinimiento i S-r. Behoratche G. Arie li mandava en kada semana 10 groches para ke si los emplejara para eja aparte, ma a eja li vinija mui pesgado, de Verlo a S-r. Refael ke iva sodando, fin ke alkansava de akomodar el Chabad, i sovre esto eja si li foe a la kasa de su IJO el grande S-r Behoratchei, i li dicho ke eja si va a estar, por endelantre en su kasa ke Refael non estava pudiendo alkansar no para eja mismo ni para sus krijaturas ke ja si li avija krisido la Familija, i ejos seja su IJO komo tambien i su noera la resivija ni kon grande plaser solo ke si estuviera, ma en el mismo dija ke eja salija de kasa ja si li vinijan sus inietikos i su noera detras, en disiendole lo ande va estar eja es a i ke van a estar i ejos, i sus parientes ke de esto ja lo savijan era ke todos li mandava, kada uno de su manera i li mandava a disir su nuera porke viniera a kasa i ke resiviera ke non save ken li van mandando todo modo de komanija i eja lo asija ke torna se iva en su kasa porke non si pudo apartar de sus inietikos ke si kresieron en sus brasos, en este tiempo eja

689                               Biografia de S-r Refael Eliau Arie kon su Madre.                                  1884

lis iso la kasa ke ja lo saven ke era de su patronaje al nombre de sus inietos i esto lo iso kon ke lo iso en el Rabenato, i ansi es ke eja toda su vida bivio en esta kasa i de mismo su IJO, S-r. Refael i denpoes ke murio tambien i S-r. Refael sus IJOS i oi la enpatronan i biven en eja,

            En el anio de 5645, la Bu. Bulisu, ke eja somportava tantos males i lo todo ke ja era kon la mui grande pasensia, i siendo ke eja ja foe mas de edad, es ke seja de este ke sufrija or seja ke ja non lo podija mas somportar, foe ke li vino una dolor en el bel i de tiempo en tiempo eja avija enpesado a kamenar i abokada fin ke eja mas non si pudo enderetchar, i sus IJOS los grandes por esto de la dolor de el bel i ke kamenava abokada era ke li ivan mandando medikos ma eja non los resivija ke disija koando los medikos ja enpesan a vijitar a la persona, non es boena sinijal, otro ke eja si asija las etchurijas de las mujeres, i kon esto se iva pasando i siendo ke mas non podija kamenar komo de mas antes, eja ke tenija el menester tambien i de paras era ke estava ketando algunas kosas de kasa ke non li eran mas menester i las iva vindiendo i lo todo en grande sikreto los IJOS non la dechavan.

            en los tiempos ke eja tenija la dolor mas foerte i ke non salja siempre la vijitavan todos sus parientes, i en mismo

690                               Biografia de S-r Refael Eliau Arie kon su Madre.                                  1885

tiempo li jevavan tambien i muntchos presentes, i el pasatiempo kon eja era solo ke kantavan todos djuntos de las kantikas viejas i S-r. Davitchonatche, komo el savija tambien boeno kantar, i li plasija siempre de las kantikas viejas era ke si li iva a su kasa i eskrivija las kantikas ke el non las savija i esto era tambien ke las kantavan djuntos, i kon esto eja si konsolava, i li plasija muntcho, koando la vijitavan,

            En el anio de 5646, a S-r. Refael li nasio una IJA ke de esto parto el si sikilio, porke la madre iva endo malata i la kasa ke ja non avija ken ke la kudiara era el menester ke si okupava era i el tambien en los etchos de la kasa, ma todos lo konsolavan ke esto non es kosa ke viene de la mano de la persona, i kon eja tambien lo isieron sigun todas las otras paridas i eja la S-ra Rahelu anke ke era flaka ma torna eja era ke los kudijava a todos, i a sus krijaturas i lo todo kon grande ikonomija,

            En este anio lo metio a su IJO el Behor en el ofisio ke de parte la alijansa Jsraelid, kudijavan i lis Pagavan tambien 10 frankos el mes i lo metieron en el ofisio de los chastres, ke i en las notches tomavan liksion de el Franses a 4 oras s la semana ke esto los kudijava el derektor de la Echkola i aparte era ke lis pagavan tambien i a los maestros ke los enbesavan lo todo de parte

691                               Biografia de S-r Refael Eliau Arie kon su Madre.                                  1886

la alijansa Jsraelid,

            El si iva en este tiempo tambien por los kasales i lis jevava vistidos prontos para los lavoradores ke avijan lavorando en los kaminos de el Chemen de fer, ke eran los mas muntchos de la parte de la Austrija, i de Italija i de esto era ke tenija mas mijor ganansijas de las otras merkansijas, ke lo mas muntcho era a Vakarel i Belova ke lis jevava,

            En el anio de 5647, Eja la Bu. Bulisu enpeso a sufrir mas muntcho de sus maladijas de el petcho ke en este anio si li adjunto tambien i algo de dolor en la petchadura, ke lo mas muntcha li vinija en las notches, fin al grado ke si li tapava el suluk i de esto ke era por las notches de el envierno lo mas muntcho era ke non podija durmir ke apenas de 3 a 4 oras ke muntchas notches li kalija ke lo jamara i a su IJO Refael para ke li foera kaentando le bevrajes kaentes ke kon esto era ke reposava algo i de esta manera estavan las notches largas de el envierno pasandolas koalo kon kantar i koalo kon jorar, i koando eja mas tadre ja estuvo mas sana lis foe ande sus IJOS los mas grandes akechandose ke esto ke eja va estando hasina era solo porke non estava bien mantenida, i ke deven de kudijar por eja i ke li agan ona semana bastante para poder bivir, ke refael non esta podiendo abasteser, ma por desplaser non la

692                               Biografia de S-r Refael Eliau Arie kon su Madre.                                  1887

kontentaron en disiendole porke si foera en sus kasa, ke ejos no poeden mantener la kasa de Refael, i eja ke non si kijo salir de el odjak de su marido, i tambien ke non podija pasar boeno en las kasas de sus IJOS los grandes ke eja disija si es ke si iva a ir a la kasa de S-r. Behoratche, el ja tenija muntchas krijaturas i todos mui tchikos i non podija sintir el jurulti, ke si es ke si iva a la kasa de S-r. Nesimatche non podija ser porke la Bu. Jael era mui ikonomijosa i non la dechava aser los guisos ke a eja li plasija, anke S-r. Nesimatche ja la alesensijava, i traiva todo esto ke si li demandava, i ansi foe ke resto torna kon su refael, i se akomodavan kon esto ke S-r. Rerael lo alkansava,

            Eja ke vijitava mui ralo a su ermana la Bu. Revkadutcha foe en este tiempo ke kijo vijitarla i entre sus konversasiones foe tambien ke la Bu. Bulisu si akecho kon su ermana por esto ke eja iva sufriendo i la Bu. Revkutcha en lugar de konsolarla, foe ke i eja li enpeso a kontarle mas muntchos males en disiendole ke de tanto bien ke posida su marido i ke los dukados los rekojo kon palas, es ke eja sufre por un groch ke non tiene para pagar el banio i es uvligada de dechar por prenda el bogo de vistidos, i ansi komo estas kosas otras, i a eja la Bu Bulisu ke non li abastavan sus males li dicho en Turko (benim bir kutim vardir episi itchine oda itchine,) jo un kuti tengo todo arientro i esto arientro, solo ke el mal mijo es mas grande ke el voestro, i siendo ke sus linguaje lis salija a ravijas era ke la dechava i se vinija torna su kasa, i se

693                               Biografia de S-r Refael Eliau Arie kon su Madre.                                  1887

akomodava kon este ke eja lo alkansava, keri disir ke el menesteroso nunka non poede ser kontentado de el otro mismo i de sus mas serkanos i esto ke todos ja lo saven torna kon todo si aderesen, i mui ralo son kontentados, sus desejos,

            En el anio de 5648, S-r. Refael lo metio i a su sigundo IJO el Jshak tambien en la echkola de los ofisios sigun de su ermano, i este kijo ser nalbant, ke i a el tambien li pagavan sigun ke li pagavan a su ermano a 10 fr. a el mes, i tomava las liksiones en las notches, i de estas paras ke ejos resivijan se las gastavan para ejos i en algunas semanes, ke lo vijan a el padre ke non tenia era ke todos los 2 ermanos li davan, esto ke lo podijan i el padre si las resivija, kon plaser, porke el non pudo, fin a este tiempo nada amontonar de todo loke lavoro, ke era apenas para un mal mantinimiento, ke el alkansava, i esto siempre kon la mas grande ikonomia i toda su esperansa era siempre en los IJOS ke disija koando fin agora ke jo non pude alkansar, a tener la mas tchika suma de moneda para poder i jo asentarme komo a todos en una mismo i tchika ke seja butika es ke mi vida va a ser siempre en esto, sovre todo ke el tambien non tenija ken ke lo sostuviera i en alguna okasion tambien i protejarlo, sigun de sus ermanos los mas grandes, i ansi era ke siempre iva de lo mismo kontinuando i siempre kamenando por kasales

694                               Biografia de S-r Refael Eliau Arie kon su Madre.                                  1888

i en tiempos intchendo los kesos ke ja lo tengo eskrito.

koando los IJOS li vinijan a vijitarla i ke si rekojijan todos ejos ke entre sus platikas ke ejos avlavan era ke platikavan tambien i de las ikonomijas, i por aserlos ariir, lis disija eja kon estas voestras ikonomijas, be djanim, dechaldas para koando mi vo a murir, i en lugar de merkar la AFTARA, en kada semana, i meterme piedra grande ke kosta mas muntcha moneda, i algunas SEDAKOD ke darech, non es mas mijor ke lo kontech ke ja esto moerta, i loke vach a gastar entonses ke lo gastech kon mi agora ke dainda ja esto biva i komere algo mas mijor para ke si konsole mi alma, i estas kechas a los IJOS si lis enportava mui muntcho ma non li avlavan nada para ke non si sikilijara, i de este tiempo ke ja enpesaron a kudijarla mas muntcho, i la vijitavan mas espeso,

Kon la kasa ke ja lo tengo eskrito ke si la avija eskrito para sus inietos los IJOS de S-r. Refael, en el RABENATO, foe en este anio ke eja lo kijo foera en el notarios ke non solo li eskrivio la kasa otro ke i toda la mubilija i todos sus vistidos i li dicho a su IJO Refael es esto ke jo enpatrono si los enpresento a tus IJOS, ke foeron engrandisidos en mis brasos, i los amo muntcho i por la paga ke tu foetes el ke kudijates mas muntcho de tus ermanos por mi lo abraso i lo bindicho kon las mil bindisiones i todos los 2 joraron i esto en estando solos ejos,

695                               Biografia de S-r Refael Eliau Arie kon su Madre.                                  1889

En el anio de 5649, era ke sus IJOS kontinuavan en los ofisios ke ejos foeron metidos i S-r. Refael koando non tenija etcho seja de kamenar en los kasales seja por la plasa de Samokov, lo asija ke si iva a la butika de ande estava su IJO a Behor ke era ke estava enbesando el tersilik, i li ajudava a kuzir algunas tchikas kosas ke el las podija i de esto el maestro era ke li pagava una mui tchika paga, kon esto de esto de tersis la alijansa non alesensijava, saviendo ke non era boen ufisio, ma los raportos ke lis asija el Derektor eran ke esto mankava muntcho en Samokov i kon esto foe alesensijado ma mas mijor iva a ser ke non estuviera en esto porke non lo pudo enbesarlo sigun de loke prime, i ansi es ke kedo medio enbesado i a penas poede kosir koando otros los kortan los vistidos, i mas tadre foe ke kon la ajuda de sus tios i ejos ke estavan en Sofija si lo trucheron ande ejos i lo mitieron en un maestro kon la kundision ke lo devija de enbesarlo i a kortar tambien i kon esto ke estuvo foe ke ja si enbeso mas mijor, i si esta pudiendo mantener, lo todo kon la ikonomija,

EJa la Bu. Bulisu de moevo si li renovaron sus maladijas i ansi ke en este anio eja ja non estava pudiendo mas somportarlo ke la dolor de la teta la abatija mas muntcho de esto de la petchadura, ande eja koando la ivan a vijitar sus parientas era ke lis demandava porke la aregalaran kon paras ke eja ja si va a merkar esto ke li iva a premir i todos li davan i aparte tambien era i

696                               Biografia de S-r Refael Eliau Arie kon su Madre.                                  1889

ke li mandavan kada uno de esto ke a eja li plasija i lo mas muntcho eja estava etchada en la chilte, ke non si podija menejar, en muntchos dijas, i ansi era ke eja non salija mas a dingun lugar,

             En el anio de 5650, ke la Bu. Bulisu mas ja non pudo estar ni en la chilte asentada, i kon ke li ivan disiendo ke si estuviera en la kama para ke non si tuera, eja non lo kerija esto ke si espantaba mui muntcho por koando si iva a etchar en kama ke mas non iva aver levantar, ke esto ja lo tienen muntcha djente, i sigun ke en los mas muntchos ja akontese esto ke koando ja si etcha en kama i ke ja es mas de la edad, son mui ralo los ke si levantan, ma aki non podija estar en la chilte ke si avija enpesado i a burakar eja mismo ke estava en kama i koando li ivan sus parientas i kon la bos bacha mismo las akonsejava i lis disija mira mansevas es jo ke volo digo ke vos goadren mui muntcho de las bivdas i kon ejas non muntchiguech, avla ke sus ojos son mui foertes, i non es boeno ke vos vestach i vos alavech ande ejas, para ke non arivech en algunos males, i el karar ke podech goadravos de todas ejas, i todos ke ja la sintijan era ke non li avlavan nada, eja sufrio 4 meses en la kama, i lo todo solo de esto ke si li tomava el suluk, ke el dolor de la teta mas non tuvo i tambien era i la dolor de el bel ke si akechava muntcho, i todos los ajudos ke foeron posible de asersen

697                                Biografia de S-r Refael Eliau Arie kon su Madre.                                 1890

nada atras non lo decharon i ansi foe ke en la notche de el 7 Veadar de este anio suplo su ultimo riflo para siempre i esta moerte trucho mui grande mankura para toda la familia i tambien para sus IJOS ke sigun ke ja lo meldaron ke eja foe una mujer de todo lo boeno ke todos era kon boka jena koando si avlava de la S-ra konsfoegra i sin ke eja estuviera nada non si enpesava, todos la jorimos longo tiempo ke mismo i agora ainda si avla de sus etchas,

En el anio de 5651, ke S-r, Refael ja estuvo i sin madre era ke siempre iva jorando i sus ermanos lo gritavan de esto el si abatio tanto ke non kijo mas ver a dinguno ni menos ke iva ni ande sus ermanos, i era ke sus ermanos li vinijan de kontino i en muntchas okasiones lo protejavan i lo ajudavan, i en este anio ke su IJO el grande ja enpeso a resivir algo de paga de su maestro era ke i el tambien ajudava por el gaste de la kasa, i kon esto ja si ivan pasando fin a un grado boenos, de lo poko de djoja ke kedo de su madre el la goadro, i non si la amostro a sus ermanos lo koal ke ejos li demandaron, ma non lis djo nada i ejos mas non buchkaron el era ke de su ufisio de kamenar non lo abandono ke siempre se iva por los kasales mismo ke non tenija dingun etcho, ke siempre ja era ke topava porke tenija muntchos konosidos i lo kerijan bien i muntchos de estos li enprestavan koando lis demandava, kon djidios non