קורותיו של סנ' חיימָצֶ'ה ד. אריה

1630

De aki i endelantre enpesa la partida de el S.

Haimatche, ijo de S. Davitchonatche, de el anio

5657 fin a el anio de 5660-61,

1631                                       Biografia de S. Haimatche. D. Arié.                                      1897

En el anio de 5657, sigun eskrito mas antes ke S. Haimatche, ja estuvo, enteramente apartado de sus ermanos, i ke el tambien estava i solo por ke ja avija devorsado de su mujer, tambien en esta espartision, el si foe a Sofia i estuvo algo de tiempo en Sofia, i algunas kozas de la kaza ke tenija en Sofia el las iva vendiendolas i komiendo, ke mas non la podija sostener la kaza, i ala governanta la Tinka ke el la tenija si la mando ala kaza de sus madre i algunas de las kozas ke non las pudo vender el se las trucho mas tadre a Samokov, ala kaza ande estava la madre kon sus ermanas i los ermanos los mas tchikos, i kon esto li foe serada la kaza de Sofia, i en samokov, era ke estava en vazio, i lo iva pasando en estarse mas muntcho en kaza porke non avija ande ke estuviera, de boena gana el ja lo kerija avrir algun etcho ma non tenija dingun kredito, en dinguno, era ke se iva enbevisiendose, en azer algunos empleos para la kaza, i su S. Madre ja li dava de ves en koanto algo de hachlik, komo por un bivo, ma non li era nada, muntcho tiempo el foe buchkando seja en Sofia komo tambien i en Samokov, a poderse empeigar en koalo foesa, i kon la mas tchika paga, i el karakter no li rejevava, de aderesarse alos logares mas bachos, el en muntchas okaziones lis mandava por rogarles a sus ermanos, porke lo tomaran kon ejos i ke el los iva a servir komo a un moso, i kon la mas tchika paga ma todos los 2 ermanos ke estavan en samokov, li refozaron, i otro empeigo, ke non topo, era ke estava kamenando komo un enkantado, el ja konosia

1632                                       Biografia de S. Haimatche. D. Arié.                                      1897

mizmo i las linguas, i eskrituras, de el Franses al fondo, i el alman, grego, bulgar i turko i algo de ingles, foe ke nada non li aprovetcho en este tiempo, era solo ke su ermano S. Leon, li dezija, por ke estuviera enbevisido, i se lo kerija ke si okopara de los empleos por el menester de la komanija de las kazas, i el por non estar en vazio, foe ke non li refuzo, i lo iva aziendo esto, kon ir merkando, las komanias menesterozas, i los iva mandando a estos de ken el lis merkava, ande S. Leon porke lis pagara, i esto li turo poko tiempo a razon ke en el tiempo ke ja era serka de el envierno, era el uzo en Samokov ke si merkava, lo mas de la komania por el envierno entero, i entre las kozas ke las iva merkando, en estos tiempos foe ke merko tambien i 15-20 indijanas (bibas) i era ke i de esto tambien si merkava por kichlik, i koando li mando porke lis pagara, foe ke el S. Leon si aravio sovre esta merkida, i se las izo boltar atras, i de esto mas non lo decho ke iziera dingun empleo, otro komo lo kere ke si este en kaza, i ke komo i beva i ke durma, i siendo ke li tomo i este deretcho, el ke si iva sikilijando, era ke se li iva ande, el S. Zafir, pernikli, ke ja era sus Haver, i le iva tomandole en vezes algo de moneda enprestado, i en mizmo tiempo li iva rogandole, por ke li topara algun molde, para enpeigarse seja ande los ermanos, or en algun otro lugar, anke ke el ditcho Zafir lis avlava a sus ermanos ma era ke non podija en nada reuchir, i el por si ke non estava en tanto boeno de su pozision, era ke lo iva tambien pasandolo, en vazio el iva buchkando, para azer algunos etchos almenos de komision, i de

1633                                       Biografia de S. Haimatche. D. Arié.                                      1897

 esto algunos de los amigos, anke ke ja li davan ma non era koza kaje de poder nada ganar, i sigun ditcho ke su karakter, non li rejevava a enkacharse, en todo modo de lugar, i sus mas serkanos parientes ke non lo kijeron protejar de el entodo, ke todo loke lo jamavan era Haim el Tudro, i ansi tambien lo foe pasando i jorando alas solas, i apokandose en este anio en vazio, ma siendo ke el era un ombre, grandino, i godro, i sano i mui fursudo, era ke non li amostrava en la kara dingun trokamiento,

En el anio de 5658, S. Haimatche dezasperado de su vida ke el la estava pasando, enpeso mas a non salir ala plasa, por ke ja si estuvo avregonsandose, de estar mas entre la djente, lo azija kon ke si eskondija en un kanton de la kaza, i estava siempre jorando, i sus djentes de la kaza ande el estava ke non kudijavan por el, era ke restava, dijas enteros eskondido i jorando, era i muntchos dijas ke non lo buchkavan al menos para ke komiera, i el ke non si astrevija a demandar de kaza, por mantenerse, era solo en las notches i koando ja era i tadre, ke su madre i esti koando ja estavan asentados todos ejos en la meza para komer, ke demandava ande esta Haimatche, i en muntchas notches era ke komijan ejos, i non lo esperavan, kon la entision ke mas tadre ja iva a venir, i sin ke lo buchkaran, es de regretar ke al menos la madre tambien non lo kudiava

1634                                       Biografia de S. Haimatche. D. Arié.                                      1898

i koando ja era mui tadre ke ivan a salir a buchkarlo, era ke lo topavan esterado en un kanton de el kortijo, abufado de jorar, ke estuvo el dija entero jorando, i moerto de ambre, i kon mil gritos i ravias, i por foersa era ke si lo jevavan arientro, i todos estalandosen de las rizas, komo tambien i su madre, i sin ke kudijara, al menos seja algo afalagarlo or akonsejarlo, i sovre todo, darle tambien i a komer, i lo etchavan en la kama, ke ja es bien entendido, komo de nutchadas, las iva pasando, i la kantedad ke el dormija, i kon a amaneser el dija, sin ke dinguno lo viera, tambien se salija de su kamareta, de mizmo lo azija i se eskondija en algun otro kanton de el kortijo, era ke tambien non lo buchkavan, ni lo kudijavan, i mas ke foe ansi pasandolo ja foe ke enpeso i a kedar sin sus foersas, fin a el grado ke ja non pudo mas ni salirse a los kortijos, lo azija ke si enkachava a debacho de la kama, i estava de boka abacho dijas enteros jorando, la suja negra vintura, i sin nada avlar ni menos kon dinguno akecharse, porke su karakter non era negro, i sigun su dizir era ke esto lo dicho denpoes ke ja repozo, ke loke lo azija ansi, era ke el si estava espedasandose, entre si, i pensandose komo boena djente, jo el ke lavori, tantos anios kon mi padre, ke todos ja lo saven el respekto ke jo le tenija a mi padre, i en todo esto ke el mi komandava, en nada jo nunka li refuzi, i jo non foe nunka komo a todos los mansevos de agora, luksozos por azer gastes, i jo era ke siempre buchkava de la parte de la ikonomija, i jo lo mas muntcho estava viajando, por los negosios i etchos kon mi padre, jo no foe,

1635                                       Biografia de S. Haimatche. D. Arié.                                      1898

buratchon ni menos djugador, i denpoes ke morio mi padre foe lo mizmo, jo estuve en Sofia anios enteros, koando ivan derokando la sivdad, i jo mi lo se komo de apretos los foe pasando, fin a poder a arezgatar, moestros lugares ke otros si los ivan revatando, i fin a poder adjustar una kantedad, de tereno para poder fragoar, esta kaza ke tenemos oi, en Sofia, ja si lo poede kada uno imajinar, es jo el ke foe ke mi okopi ke non solo por la fragua, ma i por topar tambien i el molde por la moneda, en fin todo loke avlare es una nula para el dija de oi, i komo ke non este jorando de dija i de notche, por la negra vintura mija, es solo jorar por los burakos, i ke mi vaigan arondjando todos mis parientes, i ermanos de el un lugar a el otro, i sin ke dinguno se apejade de mi, i ke mi revaten todo mi bien sin dingun deretcho, i ke mi dechen deznudo i arematado komo a un pero, de las plasas, era solo jorar por los kantones, i koando mas ja no mi kedo foersa, etcharme de boka abacho, i a debacho de las kamas, para estar eskondido, jorar i siempre jorar fin a el grado, ke mi i kaijan los mokos, sin artar, i mas tadre foe i ke mi arondjaron i de kaza, i me jevaron a el dichari avli, en una kamareta i jo esterado en bacho, de mizmo jorando dijas i notches enteras, solo, asolado, i koando ja pasaron ainda, dijas, non se koal es ke la tuvo la boena veluntad, i me lo mandaron a un sierto turko Ali efendi, ijo de ahmed efendi, seidi oglu, ke este ultimo era el mas grande amigo, entre los turkos de mi padre, i me trucho algo de komania, ke jo ja estava de 3 dijas ambierto, sin komer, i kon grande repozo el koal mi se aserko

1636                                        Biografia de S. Haimatche. D. Arié.                               1898

kon dizirmi, ansi: Haim efende ti rogo ke mi sientas, esto ke jo ti vo a dizir, i jo vergonsozo li diche, avlame, i el Ali efende me dicho, ansi: jo truche aki un kuchluk^[5], i tengo el plazer de komer oi kon ti en djuntos, ti rogo ke ti asentas i komeremos, i jo mi lavi la kara, i me asinti i komimos, i denpoes ke ja eskapimos de komer el mi kijo jevar a su kaza, ma jo non mi foe, i ala maniana mi vino de moevo i me jevo a su kaza, ande mi akonsejo kon algunas dulses palavras, i denpoes de esto si enpesaron a enteresar mis ermanos, Leon i Jomtov, i en las enkontras ke las tenijamos era todo kon amenazos, i ravias, ma jo non lis avlava ni nada, solo ke en vezes Jomtov era ke mi dava algunas paras, i kudijava por mi mas muntcho, i jo era ke iva kamenando, abatido i abokado, i dezasperado, por las kalijas, i las plasas las mas desoladas,

I mas tadre ke ja non lo pudo mas i esto somportarlo, lo izo ke si li adereso a su ermano el S. Jomtov, en rogandole, por ke li merkara, una roza de dejamantes, ke estas rozas las tenija merkado, el S. Davitchonatche de Kostan, por 40 liras, kon la entision de darselas a sus noeras M. Reginutcha, i M. Rachel, i es esta la roza ke si la kijo verdersela el S. Jomtov, non si la kijo merkarsela por alguna de sus razones, otro ke el ke ja lo savija ke tenija el menester de la moneda, i por azerle el plazer, se li adereso a S. Jechua Arié. su primo ermano, en diziendole porke si la merkara por 300 fr. i este oltimo foe ke si la merko, i la detuvo 3 anios, i denpoes si la demando, el S. Jomtov por ke si la vendiera a el i sin ke

1637                                        Biografia de S. Haimatche. D. Arié.                               1898

li tomo dinguna ganansia, lo izo ke S. Jechua si la vendjo, i el S. Haimatche ke ja tomo estos 300 fr, sin tadrar el si rekojo, algo de sus vistidos, i tchamachires i algunas otras kozas, i partjo por Kostan, vija de Sofia, por tomarse pasaporto, i koando ja arivo a kostan, si abacho en el hotel de serkedji, en el hotel evropa, i jo ke en este tiempo estava en kostan i en este hotel, estovimos djuntos i jo ke li demanda para koalo foe la vinida a kostan, foe ke mi dicho ke visto alos sufrimientos ke el sufre de sus ermanos, i de sus parientes i ke era koza ensoportavle, lo topo de mijor por salirse de Samokov, i poede ser ke topara algun etcho por azer en kostan, i jo ke kaje ja era ke lo vija en kada dija a el S. Naimatche, li diche por el S. Haimatche si es ke lo vido i ke ja estava en Kostan, i el koal me dicho ke el ja lo sentio tambien ke estava en kostan ma non lo avija visto, i era ke i S. Naimatche tambien lo maltratava, ma ja foe ke non si li aserko ni menos ke li foe anke ke ja lo jamava, por ke li foera a su kantora ke el la tenija en havijar han^[6], en galata, i ami tambien ke mi dicho por ke li foera ma torna non li kijo irle ansi foe ke no foe tambien ni ande su ermano el S. Lusien.

En kostan estuvo el S. Haimatche, serka de un mez, i siendo ke non topo, dingun etcho, i la moneda, ke el tenija ke ja si li estava eskapandose, foe ke en un dija si vistio, de 2 vistidos el uno ensima de el otro, ansi i de los tchamachires i otras kozas, en dechando lo restan de su bagaje, en el hotel, porke non tuvo para poder pagar seja al hotel komo tambien i ande el komija, i apenas el

1638                                       Biografia de S. Haimatche. D. Arié.                                      1898

 tuvo paras por tomarse bilieto de el vapor, i partio por marsilia i pasando unos koantos dijas ke el hoteldji lo buchko, i lo supo ke ja avija partido por Marsilia, foe ke si adereso, ande el S, Naimatche i el S. Lusien, ke ja lo savija ke li eran sus parientes, en aziendoles saver ke S. Haimatche li decho en el hotel su bagaje, i ke no li pago por el tiempo ke estuvo, seja al hotel komo tambien i a el ahtchi ande el komija, ke lo todo era una suma de 60 fr, i S, Lusien si los pago a todos los 2, i se tomo el bagaje ke lo avija el dechado, i el S. Haimatche ke ja estuvo en Marsilia, i pasando komo algo de tiempo era ke S. Lusien si kartejava kon su ermano, i le mando su bagaje kon i algo de moneda, i S. Haimatche la resivio, porke el alos presipios non topo koalo azer, i era ke se iva al porto de Marsilia ande abachavan los viajadores, i el los resivija i les azia algunos hizmetis i servisios, i de esto ke li pagavan era ke si estuvo pasando, ke esto li turo fin a el kavo de el anio, ke lo todo ja si kere entendido, komo era ke si estava pasandose, i fin a este tiempo dinguno de sus ermanos, or sus parientes non kudijaron por el i el tuvo tiempos de muntchas i grandes krizas seja por moneda komo tambien i de la salud, el estuvo algo de tiempo etchado en kama hazino, en los hoteles, i era los hoteldjis i sus amigos kamaratos, ke lo kudijaron, i el non eskrivio a dinguno de sus parientes por el estado ke el si topava, i koando ja estuvo algo mas mijor, lo izo ke si empeigo, en un resturant, komo kelner, kon kundision ke iva a durmir i mantenerse, de el resturant, i sin dinguna paga fiksada, solo

1639                                       Biografia de S. Haimatche. D. Arié.                                      1898

iva aser ke los klientes ke ivan a venir, a el resturant, si iva a ser ke ivan a estar kontentes de su servisio i esto ke li ivan a dar por presente, ke iva a ser su paga, i el kontente alo todo lo iva kontinuando, i estuvo tambien longo tiempo en esto, ma siendo ke el lavoro ke tenija li foe, muntcho, foerte, ke era el dija entero, i koriendo por sirvir, a kada kliente, en pies, i las notches era lo mizmo ke li turava, fin ala medija notche, i denpoes ke ja si ivan todos li kalia, djunto kon los otros ansi kelneris barer, i alempiar i esbarasar i resentar de moevo para la maniana, i lo todo kalia ke estuviera mui limpio, i el kon grande pasensia lo iva aziendolo, ke non li kedava tiempo seja por repozar komo tambien i por durmir, i el iva jorando, i esto sin ke dinguno lo viera, i siendo ke sigun ja es a todos savido ke todo modo de lavoro para todas las personas no es dado, i viene tiempo seja ke si kansa or ke si hazineja, sigun ke ja foe ansi i de tanto dezasperado ke el estuvo, li eskrivio una karta a su ermano el S. Lusien de Kostan en pokos palavras en diziendole, ke estava etchado en kama i hazino, ke aparte ke non tiene paras ke non tenija no menos vistido, para vistir, i S. Lusien rekojo de los vistidos sujos ke el mas ja non los podija vistirlos, i algo de moneda, i se la mando a Marsilia, i en mismo tiempo el S. Lusien lis eskrivio i alas otros ermanos, de Samokov, S-es. Leon i Jomtov, aziendoles saver la karta ke el resivio, de su ermano el grande, i ke el ja li mando vistidos i moneda, i visto a esto los ermanos de Samokov li mandaron koal 50 fr, i koal 60 fr. i S. Haimatche era ke los iva

1640                                       Biografia de S. Haimatche. D. Arié.                                      1898

 resiviendo porke non tenija otro remedio, i de esto foe ke mas tadre koando se aserkava, el tiempo de los moadim, de Pesah, i de Sukod li mandavan todos los ermanos koal 50 i koal 60 fr. A kada uno, i denpoes ke ja estuvo sano i de esta hazinura, foe ke lo pedrio este empeigo, i el topo a empeigarse en una de las kavanes de marsilia, kon una paga de 70 fr, a el mes sin mantener i dormir en la kavane, era ke de estos 70 fr, ke se iva a mantener, i dormir, i es de esta manera ke lo esta pasando en Marsilia, i esta biviendo en el mundo, denpoes de tantos poderosos su ermanos,

Vengamos, agora i se pensamos un poko, por la vida de este S. Haimatche, kada meldador de esta biografia, ja va a poder djuzgar sigun de su pareser, se entiende i kon korason limpio, en tomando en mano ke este es el ijo grande de el S. Davitchonatche, i ke foe krejado i velado, en las palmas de sus parientes, ke antes ke nasiera el S. Haimatche sus parientes tuvieron i otras krejaturas ma foe ke non li bivieron, i en realita es este el ke estuvo, en saloniqe, en la echkola i enbezo las linguas, Franses, Turko, i grego, i kon su padre tambien ja estuvo djuntos en el etcho komo a 10 anios antes de los otros ermanos, i es este el ke estuvo tambien en Sofia anios enteros, seja en el derokamiento de la sivdad Sofia, koando las enderetcharon las plasas, i ke tenijan i ejos ansi butikas, i tambien ja es el ke si okupo, en la fragua de la kaza, de la uliza Lege, ke la tienen en Sofia, i porke ternija algunos jeros ke lo mas enportante foe de esto ke el tuvo de tener una governanta, or mizmo i

1641                                       Biografia de S. Haimatche. D. Arié.                                      1898

 ke ternija i algunas i otros ansi jeros, devijan sus ermanos arondjarlo, fin a este grado, sovre todo i revatarlen or pasarsen su bien a uno de los otros ermanos, i decharlo enteramente, deznudo i vazio i sovre todo na ke ja se izieron komo a 20 anios fin a este tiempo ke la esto eskriviendo, el ke esta sufriendo, en las sevdades lechanas de sus parientes, i non uvo ainda ken ke si apejadara de el, non mos kale dizir ke esto non kave el las leés de la omanedad,? decharsemos de la una parte a sus ermanos, i ke kada uno si podra azer una edeja, sovre ansi komporto de sus ermanos,

Revengamos a su propia madre ke lo pario, eja ke non bive serka ni de el un ijo, ke eja los tiene en Samokov, i eja estuvo longo tiempo, kon su ija la grande M. Rebeka por razon ke su marido, si avija foido a el kairo, sigun ke esto ja lo eskrivi mas antes, i ejas bivijan solas las 2 en una kaza, i mas tadre ke eja si vino a Filibe a bivir, porke mas ja non uvo dinguno de sus ijos en i samokov, foe ke si adjuntaron kon su jerno S. Behor Aronovitch. i esto ke mas tadre tambien non pudo estarse el S, Aronovitch, kon eja foe ke si aparto i restaron torna las 2 sigun antes, i lo izieron ke i komijan aparte, i kijendo dizir ke eja non si akodro ainda i non uvo un dija, or en una notche, ke esta madre se metio, su mano en su frente, i pensar ke toviendo tantos ijos i alos kavos estarse sola, i al menos tiniendo a el ijo grande, arastando i ke esta tanto sufriendo, solo asolado en tieras lechanas, i traerselo serka de eja, i bivir al menos, kon su ijo i sovre todo i mantenerlo, de lo poko ke

1642                                       Biografia de S. Haimatche. D. Arié.                                      1898

 eja lo tiene, i non decharlo izolado, toda su vide, a tiempo ke eja komo lo kerija azerlo esto non avija dinguno ken ke la podija defender, ma es ke ainda non lo izo, kale dizir ke non li vino ainda a el tino i este S. Haimatche ja es agora de una edad komo de 55 anios ja es desplazer, el non adjidijarsen, i en siendo todos los otros ermanos tanto poderozos,

Si podra dizir i por el S. Haimatche, mizmo, de ke no podrija fin agora, toparse un molde, i venirse serka de sus parientes, ma lo primo es sigun me dicheron, algunos amigos ke lo tienen visto en Marsilia, es ke el lis dicho, ke muntcho ja si kerija venir serka de sus parientes, ma el ainda non avia podisto enpatronar, una kantedad de suma de moneda, bastante ni para el viaje, i otra si podra dizir, sigun lo vemos de algunas personas, ke koando lis arivan los males en somportavles, los unos si etchan ala boratches, i los otros, koal, al komardjilik, koal si asenta en kaza eskondidu, koal si va por estos mundos i endelantre, koal, esta siempre jorando, koal si mata kon el plomo, koal, si enkolga, si etcha ala mar, koal si sale loko, i koalos van sufriendo, kon tener la pasensia, por un dia podra arivar de alkansar, su estado sigun de antes, ansi karakter, ja es savio [savido], si poede dizir, i este ke Haimatche es esto ke lo esta esperando, i su energia, non lo decha, aser otra koza,

1643

Asta aki si eskapa la partida de el S. Haimatche,

el ijo grande de el S. Davitchonatche, i ke esta fin

a este tiempo en marsilia