סניור רפאל א. אריה ובניו

698                             Biografia de S-r Refael Eliau Arie kon sus IJOS.                         1891

konochijava tanto el era al presipio ke si vistia de un chalvar i mas denpoes si vistio de potures ke esto li servija por el envierno ke li kaentava las patchas, i mas tadre si vistio kon pantalon i de un tchiko paltiko lo todo de chajak i en el envierno di [si] metija un kjurdi su boi era alto ma flako el era fursudo ke non si kansava, i lavorava sin kansarse, kada dija se iva a el KAAL a desir las Tefilod, el tutun lo fumava poko ansi tambien en algunas tadres el si bivija en la mejane un vasiko de raki, las notches si venija de temprano en kasa, i se etchavan tambien temprano,

            En el anio de 5652, S-r, Refael alkilo la una partida de su kasa por 400 groches a el anio, i su IJO el Behor ke fin a un grado ja si pudo enbesar a kortar i si merko una machina de kusir i se tomo una butika i si adjuntaron kon el padre i enpesaron a kusir vistidos prontos, i tambien li estavan enpesando i a venir i algunos de sus konosidos porke lis kusieran algunas kusturas, ke S-r, Refael tambien ja si avija enbesado boeno a kusir, i los vistidos ke tan presto non si li vindijan en Samokov era S-r. Refael ke si los jevava a Belova i vakarel ke esto ja lo asija i de mas antes i tenija sus muchteris i aparte lis tomava komandas i lis tomava tambien i las mesuras i la ropa i los kosijan en Samokov i se los mandava or ke si los jevava, el mismo i koanto a su IJO Jshak, i el

699                                 Biografia de S-r Refael Eliau Arie kon sus IJOS.                               1892

tambien foe en este anio ke ja avija enpesado a resivir i el paga de su maestro, por el nalbantlik ke el foe mui akurat en el ofisio i aparte el lo asija ke en las notches batija muhes^[1] ke esto los tomava ke ja si vendijan prontos, i de esto tambien su padre los jevava a Dubnisa a los pasares i los vendija kon boenos presios, ke i de esto tambien ganavan ke en lo todo javavan kontos aparte, i de esto aparte ke ejos ja si mantenijan kon artura era tambien i ke ja lis sovrava i ansi ke estava mui kontentes, sovre todo ke eran tambien i mui aunados i lo sintijan a los konsejos de el padre,

En el anio de 5653, S-r. Refael era de mismo ke kontinuava kon sus IJOS i lo mas muntcho era en la butika de su IJO el Behor ke el kaminava para topar etcho i en este anio ke la soldaderija de Samokov, iso suma grande de vistidos para los soldados i era ke ejos los kortavan i de sus ropas i los davan a kosirlos kon unos presios mui konvenivles lo isieron ke tomaron i ejos a sumas mas grandes i se tomaron tambien i mas kalfas i tchirakes kon la medija paga ke ejos la resivijan i ivan kusiendo i tambien tenijan ke lis sovrava de las ropas i de los astares i tambien de los filos ke de esto tambien ejos asijan mas vistidos i los vendijan a otros seja de los soldados ke si merkavan partikular vistidos seja a otra djente i los davan mas baratos i en esto estuvieron serka de un anio.

700                                  Biografia de S-r Refael Eliau Arie kon sus IJOS.                                1893

lavorando i se topavan siempre kontentes,

            En este anio tambien lo buchkaron a Behor por Soldado i de esto si sikilijaron mui muntcho i foe ke non lo tomaron porke non vino a la mesura, porke S-r. Behor es un mansevo mui delikado i mui tchiko de poerpo i tambien flako ke non parisio a dinguno de los de la Familija ARIE sigun ke todos son grandinos i foertes, i esto lo foeron kontinuando unos koantos anios i siempre foe de lo mismo menudo ke non lis venija a la mesura, i ansi foe ke non sirvio el sirvisio militer,

            Su IJO el tchiko S-r, Jshak era de mismo tambien ke kontinuava, en batir los muhes por las notches i de esto si ganava de 10 a 12 frankos a la semana, i de su maestro tambien ke tomo en este anio dublada su paga era ke kontentes ivan lavorando, i ejos los 2 ermanos ke eran mui aunados si pasavan boenos i lo respektavan muntcho a sus padre, i tambien lo sintijan a los konsejos ke lis dava siempre, i todos li davan a el padre paras para el gaste de la kasa i tambien ejos si vistijan boenos, ejos foeron mui reposados tambien i non frekontavan kavanes ni dingun pasatiempo i ejos non si kansavan de el lavoro ni menos ke si avregonsavan,

En el anio de 5654, ke S-r, Behor ja foe liberode ser soldado i ke li prometieron a la IJA de S-r, Rahamim B. Chelomo

701                                   Biografia de S-r Refael Eliau Arie kon sus IJOS.                               1894

la Revka i lo konvinieron el esposorio i en este mismo anio ejos isieron la boda mui kontentes ke la Novija ja era mui boena i ermosa i achugar i kontado ke ja trucho esto ke era menester, i todos sus parientes la vijitaron i li dieron muntchos presentes, i de todas las 2 partes ke ja si toparon mui bien kontentes si alegraron i si kontentaron en la boda, i biven mui kontentes, seja ejos komo tambien i toda la djente de su kasa,

            Ejos ke kontinuavan en sus etcho de el tersilik foe en este anio muntcho mas grande, i si merkaron la sigunda machina i se tomaron tambien mas kalfas i tchirakes ke lo mas muntcho era ke davan foersa sovre los vistidos prontos, ke los ivan vindiendo kon boenos presios i lo todo por los kasales ke esto era siempre ke S-r. Refael los jevava, ansi de mismo era i S-r. Jshak, ke kontinuava en batir los muhes por las notches, el kijo apartarse de su maestro i avrirse butika por su konto ma lo apretava esto de el sirvisio militer, i siempre iva buchkando de avansar moneda prontandose por koando lo tomavan por soldado para toparse kon moneda, ke es por non demandarles seja de su padre komo tambien i de su ermano, ke en akel tiempo si espantavan muntcho porke los apretavan ke si merakaran ejos los kalsados koando eran rotos, i tambien ke non komijan de el kasan de loke los mantenijan ke era por TAREF,

702                                   Biografia de S-r Refael Eliau Arie kon sus IJOS.                               1895

            En el unio de 5655, ke ejos ja tuvieron mas ainda grande sus etcho de el tersilik, i ke ja avijan avansado i algo de moneda, i sigun ditcho ke S-r. Behor non si pudo enbesar boeno el ufisio de kortar, lo iso ke si foe a Sofia i se konrogo de sus primos ermanos ke ja estavan todos en Sofia porke li toparan un maestro ande lo enbesara tambien i a kortar ke esto ja es lo mas enportante i sus primos todos a la una lo kudijaron i li toparon ansi un maestro ke era Tudesko, i en el tiempo de 3 meses ke el estuvo foe ke ja si pudo enbesar, i en este tiempo era ke lo sostenijan sus primos i lo detinijan en sus kasas, i lo mantenijan i lo kudijavan i denpoes si vino torna a Samokov, i li foe ainda mas grande su lavoro i li vinijan tambien muntchos sevdadinos para ke lis kortara i se los kosiera sus vistidos, i esto lo asija mui konvenivle porke el ja lavorava de dija i de notche, sin kansarse, i de esto si gustava muntcho el padre, i el tambien koando topava algun etcho en la plasa era ke tambien lo asija i se ganava lo todo para ke pudieran avansar sus IJOS por ke tuvieran algo de moneda pronta, ke esto lis demandava a todos los 2 para detenersen ropas por ke lis foeran mas baratas, sigun ke todos los otros lo asijan i kon esto era ke podijan konkorejar,

El S-r, jshak kijo en este anio mas non estar ande a su maestro, el si topo a un haver, kristijano para avrir djuntos una butika ke dicho si mismo lo tomavan por soldado ke ja iva a enkamenar el etcho solo el Haver, i kon esto iva a ser ke por koando era

703                                   Biografia de S-r Refael Eliau Arie kon sus IJOS.                               1895

ke iva a salir de el sirvisio para topar la butika pronta, ma esto ni uno de sus parientes non lo decharon aserlo i ansi foe ke resto tambien i en este anio en su maestro, ke era de el presipio solo ke kon esto tuvo una aogmentasion en su paga,

En el anio de 5656, ke S-r. Jshak, ja foe merado por soldado foe ke lo tomaron por 2 anios de sirvisio, i el padre si sikilio mui muntcho, ma ja foe ke lo mandaran a Sofija ke ja estavan sus primos ermanos i era ke lo kudijavan i lo jamavan siempre en sus kasas i kon lo poko de lo avansado ke el tuvo foe ke lo iva pasando i esto komo un soldado de akel tiempo ke era algo mas foerte ke de el tiempo de agora,

            Kon el etcho de la butika de S-r. Behor era mui bien kamenandole i lo mas muntcho si estava tambien i S-r. Refael, i kon esto era ke ja si ketavan siempre la semanada, i se estavan mui boenos pasandosen sin ke mas tuvieron el menester de ser de dinguno ajudados, i en el tiempo ke era de intchir seja los kesos komo tambien i en el tiempo de las pajas, el se iva por esto i se ganava de 5 a 6 frankos a el dija, i era kon las pajas ke si iva a los tchaires i las asija entchir los karos de a 400 okas i se vinija djuntos kon los karos i li pagavan a medio franko por kada karo i era de esto ke si merkava la lenia i el trigo para el envierno ke esto ja

704                                  Biografia de S-r Refael Eliau Arie kon sus IJOS.                               1896

lo tenija previsto en su bodjeto ke lo asija en kada anio, i koando afitava algun moed ke estava por los kasales mas lechos de Samokov i ke non kerija estar por los kasales era ke si vinija a Sofia ma non salija en medio^[2] ke si avregonsava de los vistidos ke non los tenija boenos i sus sovrinos ke ja lo savijan ke estava en Sofija era ke lo buchkavan porke si lis foera en sus kasa ma el torna non iva i li davan muntchas kechas por esto ke non lis iva ma el lis desija ke estava guliendo a kesos i kachkavales i sus vistidos enteros rotos i golidos non kerija enmatakarlos i ansi ke non lis iva i en la notche ke salija de moed el ja si iva a su etcho, de esto el en muntchas veses era ke jorava, sin ke dinguno lo viera,

            En el anio de 5657, li nasio a S-r. Behor una IJA i se gustaron mui muntcho i la Jamaron Donna, i todos sus parientes la vijitaron i li mandaron muntchos presentes, i de mismo i los platos de paridas ke los usavan a mandar i eja su madre la krio,

Kon el etcho de sus butika en este anio lis foe endo mas flako, ke de esto era ke si sikilijava el S-r. Refael i non era ke estava topando la rason, i ansi foe ke de los lavaradores ke el los detinija enpeso a enmankarlos, i eran solos ejos ke ivan lavorando i para un sujos mantinimiento ja se lo ivan ketando ke esto tambien era ke asijan mas muntcho la ikonomija, i de esto ke si foe

705                                   Biografia de S-r Refael Eliau Arie kon sus IJOS.                               1897

sikilijandose era ke iva endo mas flako, i koando komija non li padijava^[3] boeno la komida i era ke siempre lo revesava, esto ke komija i ansi era ke siempre estava kedando sin foersa, i a rason de esto non pudo mas kamenar por los kasales ke era lo todo a pie ke si iva, i esto de la flakesa li trucho tambien ke li salieron i de las almoranas, (emorait) ke i esto tambien non lo dechava kamenar, i sus sovrinos ke lo supieron de esto era ke li mandavan presentes en moneda i Gavriel li mando 50 frankos en una ves, ansi lo asijan tambien i todos los otros sus parientes los mas serkanos,

El S-r. Jshak en este anio ke ja salio de el askerlik ke lo paso mui levijano i kon vinirse el si adjunto kon el haver ke antes de irse ja avijan avlado i se tomaron butika para esto de aser el ofisio de los nalbantes ke ejos de el presipio ja tuvieron mui bien el etcho i eran kontentes, i S-r. Refael era tambien ke los kodijava, i los enkamenava i era ke estava siempre en todas 2 butikas, para vinirles en koala ajuda ke foesa,

En el anio de 5658, lo esposaron a S-r. Jshak kon la IJA de S-r. Aron B. Moche Avdala, Linda, ke la koala era sodra de los 2 uidos ke li vino de una hasinura ke eja tuvo en su tchikes, i li djo 100 napoliones de kontado, i achugar aparte, i en este anio tambien ejos isieron la boda, i se alegraron i la novija ke ja era

706                                  Biografia de S-r Refael Eliau Arie kon sus IJOS.                               1898

mui ermosa i achugar i kontado ke ja trucho muntcha era ke ja estuvieron mui bien kontentes, i se pasavan todos boenos i los respektava a todos eja la Novija es de las senija ke li asijan es ke entindija loke li kerijan demandar, i de esto de el kontado ke tomo es ke lo engrandisio mas muntcho el etcho, i eran de lo todo kontentes solo ke sus primos ermanos li foeron algo raviosos por esto ke non si tomo a Simha sus ermana lo koal ke i ejos tambien li podijan darli i mas muntcho de 100 napoliones de kontado, i lo protejavan mas mijor de S-r. Aronatche, ke el lis disija ke esto foe su kismet, i non es por otra kosa, i ke eja ja va a tener poedi ser mijor masal

            En el anio de 5659, li nasio a S-r. behor un IJO i lo jamaron NISIM, ke kon el tambien lo isieron sigun de todos los partos i se gustaron ke ja tuvo ijo, i S-r. Behor disija el ke estava tambien tchikitiko ke lo krijaran i a el i ke si esta avregonsando ke ja es padre de 3 krijaturas, i kon esto ivan pasando el tiempo, i se areivan, ejos non vijitavan a sus parientes komo en el tiempo ke bivija la madre, i en okasion ke avijan algunas fiestas i kon jamarlos a unas koantas veses era ke apenas venijan i esto non es [se] por koala rason era,

            El S-r, Jshak, ke ja tuvo mas grande kapetal el lo engrandisio muntcho el etcho i el asija traerse los fieros por los

707                                   Biografia de S-r Refael Eliau Arie kon sus IJOS.                               1899

muhes kon vagones i koando si li rekojija mas grande partida era ke si la dava a su ermano kon un presio mas barato i el los jevava a Sofia i Dubnisa i Radomir i la ganansija se la espartijan kontra metad, ke esto era koando non tenija etcho su ermano ke i en veses lo asija tambien i kon su padre para ke i ejos ganaran, i koando ejos tenijan sus okupasiones era ke lo asija el mismo i se iva en lugares ditchos i siempre lo vendija porke eran mui ralo los ke lavoravan en esto, i siempre ja era buchkada esta ropa,

            A sus padre non lo decharon mas kamenar por los kasales a pie, ke li disijan ja abasto el peno i agora ke reposara ma el sin okupasion non podija estarse, i era ke si okupava en el tersilik kon su IJO, i el li topava lavoro,

            En el anio de 5660-61, a S-r. Refael si li renovaron de moevo sus maladijas i era ke torna iva revesando koando el komija i a el tambien li paresija komo koando disija la madre ke non era bien mantenida i por esto era ke estava flaka i hasina i aki foe lo mismo ke sovre esto sus IJOS traivan siempre mas mijor komanijas i li asijan para el aparte guisados, mas mijor para ke si mantiniera mas mijor ma i esto non li ajudava, ke mas foerte li era esto de las almoranas ke lo abatija mui muntcho i konsintija mui grande dolor i por esto de esta dolor si lo eskrivio a su konijado S-r. Josef

708                                 Biografia de S-r Refael Eliau Arie kon sus IJOS.                                 1900

ke estava en el Sarai en el kabineti [kabineto] sikreto de los telegrafos ke li venijan a Sultan Hamid, komo draguman i ke pudiera demandar de los medikos de el palasio, por ansi maladija i S-r. Josef ke ja tenija el konosimiento kon kaje todos los medikos de el palasio foe ke li tomo unas siertas kuras i se las mandava en kada semana kon la pochta i kon esto foe ke si li amahava la dolor i podija algo reposar i esto lo foe longo tiempo kontinuando, de mismo era ke li mandava ansi kuras i por esto ke gomitava, i en mismo tiempo tambien li mandava i presentes en moneda ke esto sigun ditcho mas antes ke sus suvrinos de Sofija ke estavan todos tambien li mandavan de kontino i kon esto era ke lo podija mas mijor pasar, ke el non podija salir por ganarse de algun lugar,

Su IJO el S-r. Behor non li kamenava el etcho de el tersilik ke loke asija de vistidos prontos non avija ken ke los jevara por los kasales para venderlos ke la ganansija non li podija abastar para los gastes, por rason ke el padre koando si jevava era ke si iva el a pie, i gaste de nada non li kovrava, ke el si ketava lo poko de gaste ke asija de otras kosas ke el merkava de los kasalinos sigun ke ja lo eskrivi ke el tenija muntchos konosidos i amigos ke lo protejavan muntcho, i sus IJOS tambien mas non lo decharon salir a dingun lugar, ke era lo todo ejos ke kudijavan i ejos gastavan i aparte li davan djep hachlik a el padre,

En este anio pario Linda mujer de S-r. Jshak ma foe mui foerte el parto ke li turo 3 dijas i lis kalio ke la isieran

709                                 Biografia de S-r Refael Eliau Arie kon sus IJOS.                               1900

parir por vija de los medikos, i el nasido foe moerto, i denpoes de esto sufrio la parida 4 meses ke vino a el grado de riiko [riziko^[4]] de murir

            de esta manera foe tambien el S-r. Refael ke estuvo i en el anio de 5661, i en Samokov ke non lo pudieron sanar los medikos lo iso ke tomo un sertifikato de lo monasipaleta, de Samokov komo de bednost^[5], i se foe a Sofia i entro en la bolnisa aleksandrova sin dinguna paga, i estuvo serka de 2 meses kurandose, i koando ja estuvo algo mas mijor si salio i se vino a Samokov, ke esto li turo poko tiempo i mas tadre ke de moevo si li renovaron todas sus maladijas sovre todo mas muntcho las almoranas, ke li foeran muntcho mas foerte, i lo iso ke de moevo si foe a Sofia i entro de moevo a la bolnisa i en un enterval de 20 dijas lo sanaron kon ke si las kortaron i estuvo mui boeno siempre,

             Sus IJOS ke kudijavan por la kasa era ke gastavan a una semana a kada uno i en kada semana si meravan konto, i se pagavan tambien kada uno su parte ke era kontra metad, ejos foeron mui aunados i se pasavan mui boenos, ma ejas las kunijadas si pelijavan i se maldesijan ke a la S-ra. Linda mujer de S-r. Jshak li paresija ke era solo su marido ke detinija la kasa entera mismo ke ja li asijan saver ke non era sigun ke eja lo entindija ma torna kon todo lo asija i koando era la semana ke gastava el S-r. Behor eja non komija porke non era traido de su marido ke esto lo asija porke foe konvensida de sus parientes ke kon esto era ke si iva a poder apartar lo koal ke non podija ser, i esto li enbarasava muntcho a el S-r.

710                                   Biografia de S-r Refael Eliau Arie kon sus IJOS.                               1901

Refael ke disija esta Linda mi bosdejo el reposo de la kasa,

            En este anio li nasio a S-r. Jshak un IJO i lo jamaron REFAEL, ke kon eja lo isieron en el parto sigun de los otros, i mas tadre ja si konvinieron las kunijadas fin a un grado i si pasavan sin ke si maldicheron koando si pelijavan ke esto foe tambien ke foeron akonsejadas de SUS maridos, i tambien i de sus esfoegros, ejos ke kontinuavan de mismo sigun los otros anios en sus negosios era solo por un mantinimiento ke lo pudieron ke amontonar fin a este tiempo non pudieron nada,

711

asta aki si eskapa la partida de S-r. Refael Elijau Arie, seja en el tiempo ke estuvo kon su madre seja kon sus IJOS fin a el anio de 5660-61 i los enteresantes si lo kerlan poeden kontinuar,