סניור יהודה ויוסף ד. אריה

910

De aki i endelantre si enpesa la partida de S-res Jeuda i Josef David Arie, enpesando de el anio de 5638 fin a el anio de 5661.

911     Biografia de S-res Jeuda i Josef David Arie.   1879

En el anio de 5639, ke las 2 prensepales kaveseras ja foeron todas 2 moertas, i tambien ke eran en vasio, i iva aser solo a los kudios de S-r. jeuda ke si iva a detener la kasa i esto sigun ja lo eskrivi ke non era para esto foe sigun eskrito ke S-r Josef, ke ja si foe a Pasardjik era kon la paga ke tomava la iva toda mandandola a Samokov, i kon esto lo pasavan i s-r. Josef ke ja foe tanto boeno i kapatche para detener i resentar la echkola mas muntcho de loke lo esperavan, era ke lo kerijan i lo meravan muntcho, i por ke non isiera gaste lo isieron los notavles de Pasardjik ke si lo jevavan en sus kasa i komija i lo lavavan i dormija a un mes en kada kasa, i aparte siempre li davan presentes seja en moneda seja en ropas para ke si isiera vistidos, el en la echkola lo asija su lavoro kon muntcha atension, i sin kansarse ni menos ke asija deferensia de los elevos si eran rikos or non, el si los tomava kon sira a todos los elevos de delantre i lis estava dandoles a entender sus liksiones, uno por uno, i ansi foe en mui kurto tiempo ejos ja avansaron esto ke avansan en otras echkolas en un anio, i ansi era ke lo katavan mui muntcho i el lis disija ke non lo meresija fin a este grado porke su natura es esto i tambien ke el ja esta mui kontente seja de los jehidim komo tambien i de los elevos i todos estos mansevos de este tiempo ke estan empeigados en las kanselarias i ke saven boeno el franses son solo de el tiempo de m. Josef, ke mismo i agora lo alavan i lo rekonosen, i demandan

912     Biografia de S-res Jeuda i Josef David Arie.   1879

por el, koanto al S-r. Jeuda de el non avija dingun provetcho aparte de danios ke el era todo asiendo rovos i se lo gastava solo para el sujo plaser, i siempre lo estavan buchkando de la polisia lo todo por esto de los rovos i estava eskandido en kasa ke la madre lo amava mas muntcho de todos los otros,

1. M. Biju mujer de S-r. Behoratche ke eja tambien estava en kasa seja por esto ke lo pasavan kon muntcha estretchura seja ke si kirija kasar foe ke demando ke li dieran la ketuba, i ke sus krijaturas ja eran grandes ma de su marido komo non kedo nada era ke i esto lo tenijan por mui grande apreto, ma en este anio lo decharon ansi por merar el molde mas tadre, el guijamiento de la kasal lo tenija la Bu. Sarutcha era eja ke resivija la moneda ke li mandava el ijo i ansi algunos otros de sus parientes i eja lo gastava, i eja asija todos los emplejos,

            En el anio de 5640, S-r. jeuda ke ja estava en Samokov i eskondido en kasa foe ke si adjunto a una kompania de bandidos kristjanos, ke los koalos tambien ja eran de el ufisio de S-r. Jeuda i era ke kada notche los resivija en su kasa i tenijan adjuntas para kalkular los rovos de la manera ke los devijan de aserlos i esto era disen ke la Bu. Sarutcha lis prontava komanias para todos estos ke komijan en su kasa i li pagavan a eja por esto ke lis

913     Biografia de S-res Jeuda i Josef David Arie.   1880

prontava la komania i tambien ke los resivija en su kasa i ke mas muntcho porke goadrava el sikreto, i eja komo mujer, i ke non pensava tanto koalo li podija arivar, era ke lo iva asiendo i tambien ke li ivan dando i paras, i eja ke ja era mui gastadora, non si li enportava, porke sigun dicheron ke tomava i eja parte en los planes, ke las asijan sigun ke ja lo isieron ke en una notche, lo isieron eskonder a el S-r, Jeuda de la tadre en el dichari avli de S-r, Mairutcho Alkalai, i kon sus sinjales ke ja estuvieron de akordo ke la kompanija entera, tenija de ir ala medija notche, i el S-r. Jeuda ke lis devija de avrir la poerta, i entrar por aser los rovos ke los todos ja eran mui bien armados, sigun ke ja lo isieron i ejos adetras de loke lis amostrava, el S-r. Jeuda ke ja konosija, la kasa entera, i ande es ke tenija la moneda, porke la Bu. Sarutcha era ermana de S-r mairutcho, i ejos ke entraron sin ke dinguno los sintio, si jevaron toda la djoja ke tenija prendas, i aparte toparon 500 liras i se salieron tambien sin ke dinguno los vide, i esta suma de moneda, kon la djoja, ejos si la konfejaron a la Bu. Sarutcha, i pasando 2-3 dijas en una notche si rekojeron de moevo en la kasa de la Bu. Sarutcha, sigun de antes ke lis prontava la komanija i se espartieron los rovos ke ejos los isieron en tomando parte tambien i la Bu. Sarutcha

            Kon la Quistion de la ketuba de su noera la S-ra Biju foe en este anio ke lo konvinieron i li pagaron kon kontentarla, i eja los decho a todas sus krijaturas en kasa a los kudios de el S-r. Josef i eja si foe ala kasa de su padre, (ke mas tadre eja la S-ra

914     Biografia de S-res Jeuda i Josef David Arie.   1880

Biju si kaso kon S-r. Moche B. Mordehai, ke pario tambien ijos i Ijas, i biven mui kontentes,)

S-r. Josef ke era en la echkola en Pasardjik, iva de mismo kontinuando, i siempre eran kontentes la komonita de Pasardjik i a esta rason li pojaron su paga a 100 fr. el mes, i aparte tuvo de mas ke enpeso a dar liksiones, de franses a algunas empeigados en las notches, ke i de esto li entchija komo a 100 fr. a el mes, i ansi era ke si topava mui kontente, i siempre era el kargo de mandarlas, por todo loke lis ivan demandando de samokov, ke su madre era ke si li iva siempre konjorando, ke non lis estava abastando, i el por ke non sufrieran era ke todo loke tomava era ke si los mandava, ma de todo esto ke estava pasando en su kasa el non savija nada,  ke de el lo goadravan i esto lo supieron detenerlo en boen sikreto,

            En el unio de 5641, ke S-r. Josef, de tanta moneda ke el iva tomando era ke alkavo non li sovrava para el por aserse ni un vistido a las deretchas, i los unos de sus amigos ke lo kerijan bien i ke ja lo savian la manera ke si estavan komportando en su kasa de Samokov, i ke para el non li estava sovrando nada, li dicho por ke non era el menester de mandarles a Samokov, todo su ganado otro si ja es ke los keri ajudar lo iva a aser mijor de nombrarles una sierta suma ke el lis poede mander, i demasija ke non lis diera mas nada i entonses era ke podija i el tambien ver la kolor de su ganado ke

915     Biografia de S-res Jeuda i Josef David Arie.   1881

tantos anios ja si isieron el ke non tenga ainda nada amontonado non era de deretcho, i ansi foe ke el lis eskrivo ke por el avenir iva a ser ke lis iva a poder mandarles solo a 70 Fr. a el mes i kon esto ke pudieran pasarsen i esto por un sierto tiempo, ke por mas tadre non savija si es ke lis iva a poder mandar tambien i esto, i su madre ke resivio esta karta foe males grandes, i li iva eskriviendo kartas mataderas ma el lo iso boeno ke non lis mando mas nada un sierto tiempo, i kon esto foe ke eja si kontento porke li mandara esto ke li tuvo prometido, i de esta manera foe ke en mui kurto tiempo el ja si vija kon paras siempre i en Samokov tambien si pasavan mui boenos, solo ke la Bu. Sarutcha komo era mui kapritchosa a tan presto ke non li abastava, lo asija ke ketava kosas de kasa i las vendia para aserse su plaser,

            I el S-r. Jeuda, era siempre kon su kompania de los ladrones i todo su ganado era solo para sus plaseres ke el nada non kudijava por la kasa, i la madre ke lo amava tanto era ke non li demandava, porke i el tambien kudijara, i siempre eran la kompanija en su kasa, komiendo i biviendo, i kantando, i ejos en este anio tambien lo isieron sigun la otra ves de eskonderse de moevo el S-r. jeuda para en la medija notche ke lis avriera la poerta, i por rovar de moevo, ke lo isieron esto i entraron i si rovaron esto ke toparon tambien kosa de djoja i algo de moneda, ma en esta ves los vieron i sus kompanieros, pudieron foirsen kon los rovos ke los isieron ma el S-r. Jeuda foe aferado, i lo metieron en preso kon prangas, sigun de

916     Biografia de S-res Jeuda i Josef David Arie.   1881

los ladrones, fin a ke iva a ser djusgado ke esto turava mas longo tiempo, i en este tiempo ke el estava apresado, kontavan la djente, ke lo vijan a unos mansevos kristijanos en kada semana li jevava, a la bu. Sarutcha a una lira i ke li mandara a jeuda todo esto ke lo tenija de menester, i siempre la akavedavan i kon amenasarla porke non seja ke eskuvriera nada, ke en una notche la matavan a eja i a todos los de su kasa, i eja era ke ja lo iva goadrando, i ke non si espantara de nada, ke ejos ja lo van a merar de eskaparlo, i koando ja estuvo, komo 2 meses, i kon 2 kadenados en una kamareta enserado, foe ke en una notche el si pudo salir de esta kamareta, i se foe a la kosina i se enkacho arientro de la chemenea, i se suvio ariva, ke ja li avijan kale seja aprontado sus kompanieros una koedra para ke de eja si podiera abacharse, i el ke ja lo iso esto foe ke si abacho por la koedra, i pudo sin ke dinguno lo viera eskonderse, i sigun dicheron foe ke estuvo en kasa eskondido, unos koantos dijas i denpoes, mas non si supo por ande si foe, i mas tadre lo vieron en Kostan, i ala manjana ke lo buchkaron en su kamareta i non lo toparon ke non keri ditcho ke todas las buchkedas menesterosas, de arientro la presion, ke ja si isieron i en non topandolo, ansi de mismo i en su kasa i en la sivdad entera, i telegrafos por todas las sivdades, i kasales, lo todo foe una nula i el estava en su kasa, mui bien eskondido, i mas tadre ke ejos kijeron saver, komo si foirija, i examenando en todos los lugares de la turma^[18] lo vieron ke avija una koedra atada, en la chemenea, i soltada, de el tejado para abacho i entonses lo vieron ke kale seja ke si enkacho arientro la chemenea

917     Biografia de S-res Jeuda i Josef David Arie.   1881

i se abacho ma examenandolo el borako de la chemeneja tambien lo vieron ke non podija kaver, por el borako foe en kurto ke non podieron nada topar, i enpesaron a apretar a la madre, ke i eja non lis eskruvio [eskuvrio] nada, i S-r. Maerutcho ke non ensiste porke si espantava non seja ke li entraran i otra ves i ke tambien lo polijan i matarlo foe ke resto el etcho sin mas ke lo buchkaron,

En el anio de 5642, ke la komonita de Pasardjik, ja tuvo de la alijansa jsraelid, ke lis mandaron derektor por sus echkola i ansi foe ke mas non tuvieron el menester, de S-r. Josef, i li dieron su boen presente, i lo rekomendaron, a los turkos de Filibe,ke ejos kerijan avrir en sus echkola por frenses, lo jamaron a Sr .Josef ke ejos ja lo supieron la kapatchedad ke el mostro, en pasardjik i el ke ja konosija tambien i la lingua Turka i tambien i bien la eskritura, ke esto lis foe ainda mas grande plaser, foe ke lo trataron por 10 liras de paga a el mes, i aparte li dieron lugar por su koartir i aparte li davan muntchos presentes en komanja i otras kosas, i por demasija li pagava un sierto Mehmed bei, paga aparte ,porke lis diera liksion a sus IJOS i IJAS, en su kasa ke este ultimo non mandava a sus IJOS a la Echkola ke ansi asijan los S-res ke non lis era onor de ke foeran sus IJOS kon todos los otros, (es este Mehmed Bei ke foe kavsante, de entrarlo a Sr. Josef en el Palasio)

918     Biografia de S-res Jeuda i Josef David Arie.   1882

i komo turkos ke ja son plasenteros i S-r. Josef ke ja konosija tambien i la lingua bulgara al fondo era ke todo modo de eskrituras seja prochendijas^[19] i otros dokumentos, ke si lis asija menester de eskrivir a todos los turkos era ke todos si los asija eskrivir a S-r. Josef kon ke todos li pagavan mas mijor de los otros eskrivanos, i ansi era ke si topava muntcho mas kontentes de pasardjik, i el la echkola la enkamenava, mui boena en regla i se enbesavan los elevos anke ke eran turkos, i todos los Turkos lo jamavan JUSUF EFENDI, i lo katavan mui muntcho, solo ke el mismo ke estava kon tanta djente la mas grande seja Turkos komo tambien i Kristijanos mismo i Djidios era ke su karakter ainda non avija trokado, i siempre se iva avregonsando, i buchkava para estarse eskondido, lo koal ke los mas grandes begis i S-res turkos lo jamavan por ke komiera kon ejos en sus mesa i el komo si avregonsava era ke non lis iva, ma esto non li traiva dingun danio, ke ja lo konosieron su saverisio i kapatcheta, ke el la tenija, i koanto a esto ke el lis mandava a Samokov por sus mantinimiento era de mismo sigun ke lo reglo en su estar en pasardjik i lis mandava en mui regla porke de otro lugar ejos non tenijan de ande tomar, i en veses lis mandava tambien i algunas ropas para ke si isieron algunos vistidos, es de alavar en este linaje entero ke foeron en general todos estos ke lo podijan ajudar a sus familijas si sakrifikavan enteros, en tal de non decharlos sufrir lo koal ke en otros esto es mui ralo ke lo asen sovre todo en el tiempo de agora   ke aparte ke non los ajudan ainda i los kovalejan i de kasa, en siendo suja i se enpatronan ejos lo koal ke ja uvo uno ke murio de

919     Biografia de S-res Jeuda i Josef David Arie.   1882

esto ke su IJO si permetio de kovalijar a el padre, ke lo kudijo tanto i ke serka tambien lo avija i kasado, i su noera ke si mlesko en disiendole ke eja non poede mas estar kon viejos i ke si vaiga i ke mire de buchkar a mantenerse i el padre ke non pudo somportar sovre todo i esto de su nuera foe ke si li revento la fiel i murio, i denpoes este IJO ke li iso kavod a el padre, foe a el Kaal i merko la aftara, i etcho muntchas nedavod, por esto ke ja foe ventoroso de ser kavsante de matar a el padre, i li disija tambien i Kadich, JMCVCS^[20]. i S-r. Jeuda era en Kostan arastando por las plasas,.

En el anio de 5643, ke S-r. Josef ja estuvo mui bien resentado en Filibe, i tambien ke el ja rekojo una sierta bastante kantedad de moneda, i ke enpeso a estar tambien i algo malato ke era i algo flako, i enfastijado ke ja estava de estar solo tantos anijos por los hoteles i su madre ke lo iva siempre afedentandolo por paras i alkavo non li abastesijan lo iso de traerselos a todos ejos a Filibe, i kon esto era ke podija algo mijor reposar, i esto kon la kontentes de su madre lo iso, i se vino a Samokov, i aparte de sus mobilija esto ke lis podija valer, para Filibe i lo restan lo vendjo todo, i sin tadrar el enpako lo poko de su mobilija i rekojo a su madre i krejaturas komo tambien i estas de su ermano el grande i se foeron a Filibe ke el ja avija aprontado una kasa bastante para todos

920     Biografia de S-res Jeuda i Josef David Arie.   1883

ejos i algunas tchikas kosas ke lis mankava, ejos si las merkaron i la Bu. Sarutcha ke ja konosija los usos de Filibe de koando estava kon su marido era ke bivijan mui boenos i kontetes,

            I el era de mismo, ke kontinuava en la Echkola i tambien, sus likisiones partikular i tambien sus eskrituras ke si las enbeso siempre mas mijor, i El S-r. jeuda ke estava foido en Kostan foe ke si vino i el a Filibe en disiendo ke estava muriendo ala ambre en Kostan era ke i el tambien estava a los kodios de su ermano, i ansi kon el IJOS de su ermano el grande S-r. Behor, ke es el Haim, era ke lo kudijava mui muntcho i lo mandava a la echkola, i lo sostenja, solo ke non lo eskutchava a el Tijo,

            En el anio de 5644, era el Mehmed Bei tanto kontente de S-r, Josef ke non avija en loke non lo ajudava, el li disija ke ja saves ke jo aki ja tengo enfloensa, i sin alavar tambien i el poder para sostenerte, i tu estate mui siguro ke todo tiempo ke jo esto en filibe va, aser ke i tu vas a estar, porke esto S-r. era una persona de los mas rikos de Filibe, i tambien komo era la otonomja, estava i el en un empeigo de los mas altos, i denpoes ke si jo mi ire a Kostan komo lo keres venirte kon mi espero ke ti vo a poder nomenar en un posto de los mas altos ande non ti lo poedes sonijar, ke jo ti se mui rekonosiente de esto ke tu foetes kapatche de enbesar

921     Biografia de S-res Jeuda i Josef David Arie.   1884

a mis ijos i ijas, el franses, es ansi ke jo non mi ulvido (estos Turkos ja lo saven ke koando rekonosen mas non si ulvidar,) i sigun de loke ja van a meldar mas adelantre por el posto ke tuvo es este S-r. el kavsante, i S-r. Josef aparte de las grasijas ke el li djo foe ke li beso i la alda, i non se decho porke li dicho tu sos mas grande de mi en el saverisio, i ja abasta, solo tener vida i salud, de esto era mui gustoso, i lo iva siempre a su konak i non goadravan el Harem de el, i se entrava komo un IJO de kasa,

La IJA grande de su ermano S-r. Behor ke ja la tenia en kasa ejos su[se] aunaron i se amaron i se esposaron i isieron la boda en korto tiempo, ke la Novija Jafa era mui ermosa i mui savida, el li iso muntchas modas de vistidos, i se pronto por la boda, i se kasaron i todos los amigos de filibe, lo vijitaron ansi tambien i los Turkos sovre todo el Mehmed bei i su Harem ke lo vijitaron li trucheron muntchos presentes seja para el Novio komo tambien i para la Novia i ejos biven mui aunados i kontentes, porke i la M. Jafa tambien es en el karakter, de su marido, su S-ra madre foe mui gustosa de esta etcha,

            I kon el s-r. Jeuda ke ja estava en Filibe era ke non kirija por nada okuparse i su ermano ke li dava i paras por ke non estuviera en vasio i ke si enbevesiera en algun etcho ma el era ke tomava las paras i se las oplejava [emplejava] por sus plaseres, ke esto lis traiva pleitos i desreposo en kasa, i su madre ke non li avlava nada era ke esto tambien lo asija muntcho sikilijar a S-r. Josef, fin ke li dicho porke si apartaran eja kon jeuda i el ja lis iva ajudar

922     Biografia de S-res Jeuda i Josef David Arie.   1884

por el menester de sus gastes, ma eja non si kontentava, i ansi era ke lo ivan pasando, i S-r, Jeuda si asentava en kasa,

              En el anio de 5645, las deferensijas de kasa por la rason de el S-r. Jeuda, lis foeron mui grandes, ke lo todo era por ke li kirija ke li diera paras el Sr. Josef, i esto aun kon todo ke ja li fikso esto ke li podija darle ma a el non li estava abastando, i era siempre kon pleitos ke li tomava las paras, ke koando non li dava la suma ke el la kerija lo asija ke si rovava algunas kosas de kasa, i las vendija para gastar por sus plaseres, i mas tadre ke i esto mas non lo pudo aserlo, el si prekuro una sierta suma de moneda i si foe a Kostan i kon esto foe ke tubieron algo de reposo en kasa, i el ke ja estuvo unos koantos meses en Kostan i ke non pudo mas pasarse porke non tuvo paras lo topo de mijor de irse a Brusa, i demando ke si kirija aserse Turko, esto ke ja era para los turkos muntcha onor por el grande fanatismo ke lo tienen, lo resivieron i kon esto el demando porke li dieran algun empeigo, i foe ke lo isieron djandar de las plasas, kon una tchika paga ke esto ja li foe mui bastante, i se iva pasando i tambien resivija algunos presentes de los derviches, i muntchas veses komija i dormja en sus kasas,

             El S-r. Josef era de mismo sigun de antes ke kontinuava en la echkola de los Turkos, lo todo sigun de antes, ma en este

923     Biografia de S-res Jeuda i Josef David Arie.   1885

anio ke los Bulgares okuparon la rumilija uriental, ke era la kapetala Filibe, ke estava el governador Gavril Pacha, ke al koal lo mandaron de notche, por asentarsen ejos, ke de esto los turkos ke eran en Filibe i ke non eran pokos, a rason de esto foeron mui deskorajados, i tambien si espantaron de estarsen mas en Filibe, ke los muntchos de ejos si estavan prontando por irsen de Filibe, sigun ke algo unos ja avijan enpesado i a partir, i esto lo foeron asiendo presto i a esta rason la echkola tambien se iva dija kada dija entchekesiendose, solo ke el Mehmed Bei el protejador mas grande de el S-r. Josef ja estava ainda en Filibe, i siempre lo enkorajava, ma a el S-r. Josef non li kaentava, i ansi era ke se iva mui muntcho sikilijando, sovre todo ke ja era el tiempo ke lo devijan de merarlo por soldado solo ke por esto ja avija una lei ke komo era profesor de echkola a algunos non los tomavan, i su paga de la echkola ja la resivija en regla solo ke las liksiones ke dava mas antes non las tuvo mas, i tambien de el Mehmed bei non resivija mas ke esto non si li estava enportando ke el ja avija rekojido una boena sierta suma de paras, ande ja podija longo tiempo sostenerse,

                        En el anio de 5646, li nasio a Sr. Josef una IJA i kon eja lo isieron de todo djusto en el parto ke la vijitaron sus amigos i parientes, i li mando el parido presentes a la parida, ke

924     Biografia de S-res Jeuda i Josef David Arie.   1886

si gusto mui muntcho, i la jamaron Behora- _____ i su madre la kreo i la kudio, solo ke por desplaser, esta IJA ke ja foe grande non pudo avlar, ke foe sodra-muda, i fin a el anio de 5660 ke jo eskrivija la dita biografija foe ke la trucheron a Samokov, por aserlo algunas kuras, para ke podiera avlar, ke el todo akejo ke foe menester, de aserlo seja en filibe komo tambien i en Kostan todo ke ja lo isieron lis foe todo sin dingun provetcho, i mas tadre non supi de loke foe de eja,

El S-r, Jeuda, ke era en Brusa, era de mismo djandar i en este anio el si topo a una turka ke ja tenija eja unas koantas paras i si kaso kon eja i estavan mui boenos biviendo, solo ke era kon grande miserija porke non li abastava la mesada ke el resivija, i entradas de dingun lugar ke mas ja non tuvo, era ke de ves en koanto seja ke eja li dava or seja ke el li demandava, i ansi lo ivan pasando, ke el ja foe repentido de esto seja ke si iso turko i mas muntcho porke i se kaso tambien, ma non tenija loke aser,

En kasa en Filibe ke estavan las mujeres se pasavan boenas, i muntcho non salijan sigun de antes porke el S-r, Josef lis disija ke agora non es komo de antes ke kada dija si li estava, entchikisiendo su etcho es ansi ke devijan de buchkar la parte de la ikonomija lo mas muntcho ke podija ser, i ejas lo eskutchavan i la goadravan, porke i ejas ja lo estava viendo,

            El ja estava en la Echkola ma ja foe enteramente mui tchika, i el Mehmed Bei tambien ke ja si foe kon toda su Familia, i

925     Biografia de S-res Jeuda i Josef David Arie.   1886

antes de irse lo jamo i li dicho ke fin lo detienen en la echkola el ke non si salga, i la paga el ja enkomendo porke pagaran por su djusto, i ke lo protejaran, i ke este siguro ke el non si tiene de ulvedarse, i de Kostan ja li tiene de eskrivir por su avenir, el li djo su boen presente, i partio, ke de este tambien si sikilio, ma ja era ke los turkos ke kedaron en filibe tambien lo meravan kon boenos ojos, i en este tiempo tambien ke ja lo meraron por soldado ja foe ke los turkos li isieron bien i lo podieron delebrar de esto sirvisio ke lis foe mui rekonosiente, i de esto si gusto mui muntcho, ke lo tenija por mui grande ataganto,

En el anio de 5647, los turkos en filibe ke ja foeron mui pokos ansi foe ke la echkola mas ja non la pudieron sostenerla i lis kalio ke la seraran i el S-r. Josef, estava sin dingun etcho i li eskrivio a el Mehmed Bei asiendole saver, ke la echkola ja estuvo serada i el tambien ke estava en vasio sin dingun etcho, i ke non si ulvedara de el, i esto pasando unos koantos dijas, ja li vino la repoesta, sigun ditcho ke lo kerija muntcho bien, en disiendolo, porke si foera a Kostan i ke ja tenija de merarlo un molde de aserlo empeigar en algun lugar, i koando resivio la karta si gusto mui muntcho i sin tadrer, el topo el molde de fuirse sin ke lo supieran porke non dechavan a los mansevos salir afoera de el konfin, i en arivando a Kostan el si foe deretcho ande el Mehmed Bei, ke estuvo en

926     Biografia de S-res Jeuda i Josef David Arie.   1887

su kasa unos koantos dijas, komo su musafir, i el Mehemed Bei non manko en este tiempo de buchkarle un empeigo, i pudo toparle en el telegraf, ke de este tambien ja lo konosija mui bien i le iso pagar, a 6 liras de mesada, i el turko i franses ke ja lo konosija al fondo, era ke si topo mui kontente seja el komo tambien i les Efendis sujos i iva kontiniuando, sin kansarse, porke era mui lavorador, i kon muntcha atansion, eskapava todos sus etchos ke li davan i siempre li iva endo ande el Bei i siempre rengrasiandole, por el bien ke li iso,

Toda su Familija era en Filibe i lis mandava, siempre sus menesteres, en mui regla ke esto ja lo tenija por primer uvligo, a non decharlos sufrir por nada, i ejas tambien las mujeres, eran de mismo mui gustosas ke ja si topo etcho, i ke ja iva a ser, por siempre i kon la entesion ke presto ja las iva a jevarlas tambien i a ejas a Kostan, i tenijan la pasensija,

Kon el S-r. Jeuda ke era en Brusa era de mismo djandar, i kasado ke ja estava i sigun ditcho ke eja ja tenija unas koantas paras ma siendo ke non li abastava, la paga ke tomava, i apoko apoko, si li eskaparon tambiem i las paras de eja, i el esto li vino boeno de sirvirse de la moneda de su mujer, i agora lo penso de decharla a esta i buchkar a tomarse otra, ke terna moneda, i esto ke enpeso a buchkar, ja topo, ma foe kon kundision ke non devija de dechar a la primera, i el ke ja si kontento, foe i se kaso tambien i kon la sigunda, i si li isieron agora 2 mujeres, i koando non tenija paras li tomava i de la sigunda, i ivan seja el komo tambien i ejas

927     Biografia de S-res Jeuda i Josef David Arie.   1887

mui kontentes i boeno pasando, ejas si espartieron entre ejas ke las tenija de vijitar a una semana a kada una, i esta manera lo ivan kontinuando, i en este tiempo ke S-r. Chabad su primo ermano ke estava tambien en Brusa, i el era por esto de el askerlik a ke si foe tambien, ke koando lo via, i li avlava en djodesmo, el era ke li respondija en turkesko, i lo akonsejava, porke, ja abasto estuvo turko i ke si viniera kon el i ke si isiera de moevo djidio, i su repoesta era, ke el ja estava mui kontente, porke los turkos lo protejavan mui muntcho i en muntchas okasiones lo ajudavan i kon paras i otras kosas, es ansi ke ja estava mui boeno, i por esto ke li avlava el non li iva muntchas veses porke todos los turkos non lo savijan ke el era aboltado,

            En el anio de 5648, ke S-r. Josef ja si resento boeno en Kostan, el si topo una tchika kasa, kon mas barata kira, i el li eskrivio a su mujer, porke apartara las kosas mas enportantes, ke li podijan servir por Kostan i lo restan ke lo vendieran sigun ke lo podijan i ke esten prontas, ke ja lis tenija de eskrivirles presto por ke si foeran i ejas, i esto ejas sin tadrar lo isieron i se lo isieron saver ke i esto tambien el presto lis eskrivio i partieron de Filibe mui kontentes, i se resentaron en Kostan mui kontentes i el Mehmed Bei tambien era ke siempre lo buchkava, i el tambien li

928     Biografia de S-res Jeuda i Josef David Arie.   1888

iva i lo akonsejava de la manera ke si devija komportar, i li disija ke el ja estava avlando porke lo metieran en un lugar mas mijor ke si entiende i kon la paga mas grande,

            S-r. Naimatche ke estava siempre en Kostan era ke li iva tambien muntcho i ansi de mismo lo vijitava i la Bu. Sarutcha, i de mismo i el tambien los vijitava, siempre,

            I el S-r. jeuda era de mismo en Brusa, i pasando kon sus 2 mujeres mui boeno el tuvo tambien i turkitos i turkitas de todas las 2 mujeres, el las amava mui muntcho a todas las 2, ansi i el tambien era mui kichto de todas las 2 el non las dechava ke si pelejaran i lis asija el plaser de todas las 2 a igoal, sin deferensija, ejas todas las 2 eran mui ermosas, i mui mansevas,

            En el anio de 5649 S-r. Josef foe nomenado en el telegraf emperijal de el Sultan Hamid, en el kabineto sikreto, ke el era ke resivija los telegrafos, i los tresladava de el franses a el Turko i los mandava ande el sultan i apate el era tambien i uno de los ke devijan de estar al koriente, de los artikolos ke si puvlikavan seja en las gasetas komo tambien i otras brochures, de todo logar, i las meldava por estar al koriente de todo esto ke si pasa, en el governo i koando lo vija ke eran algunas eskrituras kontra los enteresos de el governo el lo asija protekol i lo mandava a los lugares

929     Biografia de S-res Jeuda i Josef David Arie.   1889

ke eran pertenesientes, i en el tenijan mui grande konfiensa, i li isieron su paga a 12 liras a el mes, ke de esto tambien si gusto muntcho, i esto todo lo iso el S-r. de Mehmed Bei i el ke ja lo savia esto ja era ke li iva darle las grasijas, i el Bei si reiva, sigun el uso de los turkos, ke lis plase koando lo rekonosen,

              En este anio li nasio en Kostan un IJO, i kon el tambien lo isieron sigun de los otros i kombedo el berid, a S-r Naimatche ke ja li foe, i se gusto mui muntcho, i li jamaron Reuben i de mismo su madre lo kerio [krio], i lo kudio,

            S-r. Jeuda ke estava en brusa i ke era tambien djandar foe ke en este anio lo ketaron i ansi era ke non tenija de ande, mantenerse sovre todo ke tenija i 2 mujeres porke i la moneda ke la tenija i su sigunda mujer ja foe eskapada, i el si vino a Kostan en de su ermano i li rogo a la madre porke lo resivieran en kasa ke el ja se iva a bolter torna a djidio, ma su ermano aparte ke non li atcheto a esto foe ke lo i kovalejo de kasa, i non lo resivio mas, i ansi ke si foe i de kasa, i denpoes ke ja estuvo unos koantos dijas otros en Kostan, si foe de moevo a brusa, i enpeso a pelejar kon sus mujeres i las harvava, lo todo para ke si foeran, ma ejas tenijan la pasensija porke tenijan i krejaturas,

            su sovrino el s-r. Haim ke ja avija eskapado las echkolas i ke ja era grande, i mui entelejente i echpikolante ke ja era el enpeso a kamenar por las plasas de Kostan i asija algunas korodirijas, i siempre ja topava a ganarse, solo ke todo su ganado era ke

930     Biografia de S-res Jeuda i Josef David Arie.   1889

si lo gastava por sus plaseres, ma i esto disija su tio ke sepa ganar i non enpide si lo esta gastando por el presipio, ke por mas tadre ja va a saver, i detenerlas,

En el anio de 5650, ke S-r. Josef ja estuvo bien resio en su ofisio en el telegraf i sovre todo ke era moi bien visto i kichto ke ja lo entendieron porke era mui goadrador de los sikretos era ansi ke tenijan grande konfiensa en el, sigun de loke tengo eskrito ke era mui travado i mui vergonsoso i kon una kavesa jena de meojo komo el goevo, era i su vistido tambien ke lo vistija de vergoensa, S-r Naimatche mi kontava de koando li vija i ke si gustava entero por el posto ke lo tenja i solo lo desplasija mas de muntcho de verlo kon un vistido anke moevo el si lo vistija koando toerto i koando la jaka sin aboltarla i kon la jaka blanka ke jevava en su koejo era tanto antcha ke kavija la kavesa entera i por esto li desija a ke li foera mas estretcha ke aparte ke non estava ermoso ja era i verguensa ma el a estas kosas non merava i se kamenava siempre ansi ke non si avergonsava por nada.^[21] uvieron muntchos echpikolantes de la borsa ke si li aderesaron porke lis eskuvriera algunos sikretos de la poletika ke esto lis era a ejos mui enportante por sus operasiones de borsa, ma el mismo ke li prometijan muntcha moneda, non

931     Biografia de S-res Jeuda i Josef David Arie.   1890

resivio nunka a eskuvrir nada ke desija (I. el komo poede eskuvrir los sikretos ke li foeron konfijados sovre todo de un governo, i (II. de ande es ke lo podija saver si non eran estos mandados de parte sus kolegas por aprovarlo, i (III. ke a el ja li era bastante la paga ke resivija i non kerija aserse riko de rovos, i kon esto tambien el lo vija ke ja lo tenijan por persona de konfiensa i se pudo ganar su onor i estarse siempre en su empeigo i  bien visto de todo el personal de el palasio,

            Su sovrino el Sr. Haim era de mismo kontinoando en la komision i se gano muntchos amigos seja de la plasa de Kostan komo tambien i de su deredor i se estava ganando su mesada ma era ke non li ajudava nada para el gaste de la kasa, i se lo gastava lo todo por su plaser.

            Las mujeres la Bu. Sarutcha kon su nuera jafa, ke ja estavan bien vistidas a la moda de Kostan era ke salijan a vijitar ande sus amigas ke eran mui bien resividas i le iva tambien i ande S-r. Naimatche ke el koal tambien las resivija kon muntcha onor i venijan en avla por las komidas de Samokov, ke li plasijan mui muntcho estas ke eran de masa i ke esto non avija ken ke si las isiera en Kostan i la Bu. Sarutcha ke ja savija mui bien aser este modo de komidas de masa ke eran, komo bohtchas^[22], burikitas, pides, otchkur, pidesis, filadonijas, bir juslis, i ansi mas otros modos, li disija ke eja ja li asija i en esto ke davan ke muntchas veses li asija i se las komijan djuntos, ansi era ke i en kada

932     Biografia de S-res Jeuda i Josef David Arie.   1890

Roch-achana, lo asijan esta de las komidas de keso por los jei rasones^[23], i se los komijan en djuntos ke de esto si gustavan seja la Bu. Sarutcha komo tambien i S-r. Josef, lo mismo i S-r. naimatche ke ja estavan en una mesa kon sus parientes,

            El S-r. Jeuda era en Brusa kon sus 2 mujeres i en este anio tuvo ke li nasio de la sigunda mujer una turkita, i el era mui HASID, ke las 5 tefilod de kada dija non las pedrija, ke son (bech-vakit-namas,)^[24]

            En el anio de 5651, el S-r. Jeuda ke era en Brusa i kasado kon las 2 mujeres turkas, i ke ja tuvo i de todas las 2 krijaturas, siendo ke mas non tuvieron ejas paras i el ke non las pudo mantenerlas, en un dija ke tuvieron un grande pleito, kale disir ke el li kalio ke lo truchera a esto, porke non podija mas sostenerlas, lo trucho el etcho a darles la sultura a todas las 2 porke en los turkos esto de dechar a la mujer ja es bastante kon disirle el marido delantre de 2 personas (boch etim seni)^[25] keri disir ti do soltura, i kon esto ejas kale ke si vistan de su feredje, ke es agora su marido un ajeno i kale ke goadren el harem, i kon esto el foe delebrado de todas las 2 mujeres i se vino a kostan ande su ermano por rogarle a ke lo resiva en su kasa i ke ja se bolto agora a djidio, i su ermano ke era tanto ravioso non

933     Biografia de S-res Jeuda i Josef David Arie.   1891

lo kijo sentir a nada de loke li avlava, solo ke ja estuvo en kasa i non si vijan kon su ermano,

            Kon su sovrino el Sr. Haim lo empeigo, ande S-r, Viktor Chnur ke es el jerno de S-r. Naimatche por 4 liras a el mes de paga, por ke li foera agente por la plasa ke el koal es uno de i los mas grandes komisioneres ke representa ariva de 150 fabrikas de la avrepa i komo pariente lo merava i lo enbesava i el tambien ke ja era mui entelejente era ke si topavan kontentes de todas las 2 partes,

            EI s-r. Josef sigun ke ja lo saven ke era una persona mui reposada seja en la plasa komo tambien i en kasa ke el non si araviava por nada ni menos ke lis asia dingunas remarkas ke el non frikontava dinguna kevane ni menos dingun lugar de pasatiempos, ke su tino era siempre en los estudios i meldar gasetas, a el en este anio lo nomenaron i komo revesor en el telegrafo i pochta de Galata, i a esta rason li pojaron su paga a 15 liras a el mes, ke esto li foe mas grande alegrija ke non era su gusto solo por la pujita otro ke esta suma de paga en kostan es igual a 1500 fr. de otros estados,

            En el anio de 5652, foe de mismo revesor en el telegraf i pochta de galata i en mismo tiempo tambien i en el kabineto

934     Biografia de S-res Jeuda i Josef David Arie.   1892

sikreto de el Sultan Hamid, ke siendo ke su paga la resivija de el palasio era ke la tomava en regla, porke en Kostan a los empeigados si lis paga sus mesada koando dopo de 4 i koando denpoes de 6 meses i es por esto ke son los empeigados los ijos de los pachas i otros personajes rikos ke non esperan a la mesada i tambien ke Turkia non ai echkolas de el governo por las klasas mas altas para estos ke non los poeden sostenerlos, por ke poedan aver i de las klasas mas bachas, ansi empeigados, el kontinuava su ofisio kon grande atansion, mas muntcho de koando foera sujo, el S-r. Haim ke foe tambien mui akurat en el lavoro ke li dava S-r. Chnur, porke este ultimo era una persona mui raviosa i mui puntoal, i siendo ke ja lo eskotchava a todos sus komandos i ke pudo tomar komandas de los merkaderes los mas grandes, foe ke li pujo su paga a 6 liras a el mes,

                        El S-r. Jeuda ke ja estava en Kostan, foe ke su ermano el s-r. Josef ja lo enpeso en este tiempo a merarlo kon mas boenos ojos, solo ke el era mui vergonsoso de los jeros ke iso, i siempre se iva eskondiendo, i non salia muntcho era siempre solo la madre ke lo protejava, i ejas las mujeres kudijavan por la kasa i eran mui aunadas i se pasavan boenas, sin ke si davan dingunas kechas de las unas a las otras.

935     Biografia de S-res Jeuda i Josef David Arie.   1893

            En el anio de 5653, a S-r. Josef li nasio el sigundo Ijo, ke de mismo si gustaron i lo jamaron ELIJAU, en akel tiempo koando lis ansija [nasija] krijaturas era mui grande gusto, komo ke era una kosa ke solo el era el masaludo, para tener krijaturas mismo ke ja tenija i muntchas, i non pensavan por el sostinimiento ,ni menos por el kudiamiento, ke esto ja era komo una kosa de un dover seja de las madres para kudijarlos i non li era en sus ojos nada de sakrifikar su manseves por la amor tan grande ke tenija para kreserlos, ansi de mismo i a sus padres, ke era komo los kasalinos ke ejos agora si gustan, koando tienen muntchas krijaturas ke lis van a servir koal en pasijar los karneros i koal para las vakas i otros por el lavoro de las tieras ke koando mas muntchos Ijos tiene ainda mas riko si ase, lo koal ke en el tiempo de agora aparte de loke apenas ja si va a kasar pasado de los 30 anios es ke de el presipio eja ja buchka a non parir de el presipio en disiendo ke eja si keri gosar de la noviedad, i koando ja va a parir denpoes de los 4 i 5 anios ke ja kaso, ja kale ke este asentada los meses de el prenijado, i kudijada de unas koantas komadres i medikos, i apenas ke ja va a parir es por vija de los medikos i la parida hasina kon 3 i 4 meses i la krijatura va a ser aletchada de kriaderas, ke eja va a ser flaka si la aletcha, i ansi es ke si goadra de parir mas 5 i 6 anios, en disiendo ke eja non lo poede etchar la manseves en merar krijaturas, ke eja kere bivir i gosarse de la vida, i los padres ke non tienen koalo aser, es ke

936     Biografia de S-res Jeuda i Josef David Arie.   1893

i ejos son de akordo en pensandosen ke non poeden tener dinguna esperansa de los Ijos, afoera de gastar kon ejos para enbesarlos ken konto lo poede i a los kavos es ke aparte ke los maltratan i los avregonsan ke i ejos non lis ase onor de desir ke este es mi padre, i ai muntchos i ke los kovalejan si en kavso a la vejes viene a ser menesteroso i le dise ke ja abasta bivio ke el ja paso en su manseves muntcho mijor de loke ejos lo pasan agora, i es ansi ke los unos si eskonden de los Ijos i los otros buchkan de irsen a Jeruchalaim i esperar a el rasilnek^[26] de la pochta por la poerta ke li va a traer kartas i a el goerko por la ventana por tomarle li alma, i esto de ande mos kale disir ke verna, sigun mi es solo de la enstruksion, i esto ke kale porke altramente non si poeden mantener, es ke algunos lo asen mas mijor ke non si kasan de el entodo i kon esto vienen a este mundo para bivir, estos todos Ijos ja avlan mui boenos, el era de mismo ke kontinuava en los telegrafos, i siempre sigun de los otros anios sin trokar en nada de el sujo karakter, i kontentandose solo kon la suja paga ke esto ja la resivija en mui boena regla,

               Ansi de mismo era i el S-r. Haim, de mismo empeigado ande Sr. chnur i eskapandole sus komandos ke li ordenava i era ke en este anio de koando si salia demaniana de sus kanselaria era a la tadre ke vinija i li entregava las komandas ke resivija, por non pedrer tiempo porke el ja supo i estava al koriente de el etcho entero, koanto a el S-r. Jeuda el ke non pudo somportar

937     Biografia de S-res Jeuda i Josef David Arie.   1893

mas la vida ke la paso en este tiempo en Kostan foe ke lo iso a ke en un dija sin ke lo iso saver a dinguno partio de Kostan i se foe por la parte de la asia, sin ke mas lo buchkaron, i ansi es ke non si supo ande es loke esta,

            En el anio de 5654, a S-r. Josef li isieron saver ke lo ivan a dekurar kon el nichan de Medjidie de la sikunda klasa ke de esto el foe mui sikilijado, i enpeso a buchkar a ke non li isieiran esto, en disiendo ke el non es pertenesiente ni si konsiente en si a este modo de rango, i unos ke li dicheron ke kon esto podija alkansar un empeigo muntcho mas grande el non lo kijo a dingun presio, ke el non va a poder saver ni jevarlo ni menos komportarse ,i a el ja li abasta, en esto ke el esta ke akel ke suva sin eskalera kae de kavesa, i ansi foe ke lo pasaron a otro, i el resto ande estava, lo todo era porke si avregonsava, i de esto non troko nada i se kontentava kon la parte suja, porke el fin a este tiempo ja avia avansado serka una suma de 800 liras de paras i las iva a siempre mitiendo en las bankas, ke de esto el si goadrava mui muntcho, ke non lo supieran la djente, i kon el S-r. Haim era ke i el pudo avansar seja de las mesadas seja ke i el ganava de afoera de algunas echpekulasiones ke las asija una suma de 150 liras, i aparte el si konrogo de el S-r. Chnur porke li pujara su mesada, i

938     Biografia de S-res Jeuda i Josef David Arie.   1894

ke lo regalara, kon koalo foesa, i el Sr. Chnur ke ja lo kerija bien por su kapatcheta ke el si demostrava foe ke li pujo su paga a 8 liras a el mes ke de esto si gustaron seja el komo tambien i su tio i toda la djente de su kasa, koanto por el Sr. Jeuda ke no se savia por ande estava, ejos enpesaron a eskrivir por las partes de la asija ma non lo topavan i su madre la Bu. Sarutcha era ke jorava i enpesaron presto mas serioso a buchkarlo ma tambien non estavan podiendo toparlo, i esto los asija muntcho apretar,

               En el anio de 5655, ke las 2 mujeres turkas ke tenijan en Brusa el S-r, jeuda, i ke ja tuvo de ejas krijaturas ejas todas las 2 li trucheron a las krijaturas or ke si las resive or ke lis asigurara una sierta suma por poder mantenerlas i ke non lo toparon ejas si aderesaron ande su ermano S-r. Josef ke el koal aparte ke non kijo rekonoserlas foe ke lis dicho ke i ejos lo estan buchkando ke si ejas lo poeden toparlo ke lis isieran saver tambien i a ejos i anse fon [ansi foe] ke entre las buchkedas ke isieron de las 2 patres ja lo toparon ke estava arientro de la asia i dandose por turko i su ermano i madre i mujeres ke lo jamavan el non kirija nada sintir i si estava kon los derviches, porke en turko ja savija i meldar i eskrivir porke el ja lo enbeso en la echkola de Samokov ke las mujeres non pudiendo mas estar en Kostan ejas si foeron de

939     Biografia de S-res Jeuda i Josef David Arie.   1895

moeva a Brusa, i esperando por koando iva a boltar,

            Koanto a el s-r. Haim, ke estava en la kanselaria de el S-r. Chnur. el non kijo mas estarse i se salio, ke el se iso konto ke paras ja tenija bastante para i el aserlo esto de la komision por la plasa ke lo vija ke muntchos merkaderes ke traivan kada uno sus modos de artikolos, a Kostan por venderlos i avijan muntchos ke a tan presto ke non los podijan venderlos los metijan en magasen i se los dechavan a algunos komisioneros, porke si los vindieran por sus kontos, kon ke lis pagavan sus boenas komisiones, ke esto foe loke eskolo [eskolko] el S-r. Haim, i iva a muntchos ansi topando ke si las konfijavan sus ropas, i el en okasion lis avansava tambien i algunos emportos, kon ke lis kovrava tambien i los enteresos, entre sus klientes ke li dechavan kada uno sus modos de los artikolos uvo tambien i un sierto Italijano ke trucho a Kostan una nave de piedras de marmor, i el koal tambien ke non las pudo presto venderlas, foe ke si las konfejo a S-r. Haim, kon sus kondisiones ke ejos las isieron, i foe tambien ke li avanso una suma de 50 liras, ke la valor de la nave era de 600  liras, i el Italijano ke li kalio ke partiera, ke esto tambien lo kijo el S-r. Haim ke si foera mas presto, i kon pasar 2-3 dijas, ke el patron ja partio foe ke S-r. Haim, la vendjo la nave entera, por una suma de 250 liras, i djunto la moneda el partio a Triesta, sin ke lo iso saver ni menos a su ermano, i mas tadre ke el Italijano lo buchka i non lo topa i se enbeso ke la ropa ja estuvo vendida, por la suma de 250 liras ke era sin ke li konviniera, i non topandolo el

940     Biografia de S-res Jeuda i Josef David Arie.   1895

iso todas las reklamas, i buchkedas, por todas las vijas ma lo todo foe sin dingun provetcho, i denpoes ke el patron ja estuvo longo tiempo, en Kostan i non pudiendo aser nada li kalio ke si boltara, i pidiriendo lo todo, i el Sr. Haim era siempre en Triesta, i estava eskondido, kon ke si troko tambien i el nombre, i ansi era ke seja su ermano komo tambien i su madre eran mui angustijados de esta etcha, i siempre li eskrivija porke si viniera ke kon el italijano ja lo ivan a konvenir el etcho mui kolai ma el non atorgava en nada,

                El S-r. Josef, era de mismo sin nada trokar, kontinuando en su empeigo de antes, i se pasava mui boeno i kontente i sovre todo tambien mui bien visto, i biviendo mui kontente,

            En el anio de 5656, el s-r. Haim ke estava en Triesta i algo de moneda ke ja tenija, era ke iva merkando i vindiendo algunos artikolos, ke li vinijan a la mano i lo mas muntcho el si enbevesija en kahves, ke a esto dava mas muntcha foersa, ke lo todo era kon entision i kon aser mas grandes merkidas i de los kahves el pudo alkansar a ganarse la konfiensa en uno de los vindidores de los kahves fin ke lo pudo merkar una nave de ansi kahves, a fijado, kon las kundisiones ke ejos las isieron ke si entiende todas ja foeron en favor de el vindidor, i denpoes ke la nave ja estuvo kargada, kon ke li avanso tambien i 150 liras, por kaparo, i antes ke partiera la nave ke si enbeso el vindidor por el Sr. Haim, foe ke la detuvo, i

941     Biografia de S-res Jeuda i Josef David Arie.   1896

se la metio de moevo en su magasen en jamandolo a S-r. Haim porke li versara la suma, ke era, de 20,000 liras i en kavso kontrario ke lo iva a pedrer, el kaparo, i esto ke el S-r. Haim non lo pudo aser lo foe ke lo pedrio i el kaparo i su entision era de tomar la nave i venderla por koanto lo iva a poder, porke ja li konvinija a lo todo foe ke lo pedrio todo, i kedo enteramente vasio, porke en todas las operasiones ke el asija en Trieste nada non ganava, solo ke iva gastando i pidriendo i ansi foe ke li kalio ke si viniera de moevo a Kostan i se estuvo en kasa, en vasio, i mas tadre ke el lo kijo de moevo, empeigarse, ande s-r. Chnur, ma non lo resivio,

        En el anio de 5657, ke el S-r. Jeuda mas ja non pudo estar, por los lugares kaentes de parte la asia, i ke non topava, ni menos para mantenerse, lo iso ke si vino de moevo a Kostan ande su ermano i si estava en kasa ma la era kon el nombre de djidio, i era mui abatido, ke non salija a dingun lugar, el kijo ke lo metiera en algun etcho ma non tenijan la konfiensa, solo ke li disijan ke si este en kasa, i ke ejos ja lo van a mantener, porke tenija el mal de sus krijaturas, ke las turkas lo ivan buchkando, i kon ejas tambien mas tadre ja si lo konvino,

El s-r. Josef, foe en este tiempo ke si enpeso a enteresar en los etchos de la poletika, i el ke ja estava al koriente de

942     Biografia de S-res Jeuda i Josef David Arie.   1897

la pletika Turka entera, iso provas de aser algunas operasiones de venditas i merkidas de los fondos turkos en la borsa de Kostan i en unas koantas operasiones ke el iso, tuvo boenos afitos i grandes ganansias, i ke li vino boeno dulse ma era tambien i ke kerija ke non si supiera, i en este tiempo ke i el S-r. Haim ke ja era mui echpikolante ,era ke i el tambien lo asija esto i el tambien iva algo profetando, ke kon esto ke todos los 2 ja estavan echpikolijando lo isieron ke vinieron en un kavo, i se isieron haverim, i kon los sikretos ke li eskuvrija su Tio era ke asijan las operasiones, i siempre foeron ganando, i siendo ke las operasiones ja lis foeron muntcho grandes foe ke lis premio mas grandes kapetales i S-r. Josef, konvinsido foertemente en esto, lo iso ke li metio a S-r. Haim toda su furtuna i era ke lo asijan las operasiones, bien grandes ke era tambien ke ivan i boeno ganando, i ansi lo kontinuaron, i estavan mui gustosos, i a rason de esto ejos foeron mui antchos en los gastes de kasa, sin karar, i eran todos los 2 mui pontuales, para estar al koriente de las pletikas, i ejos enpesaron a aser operasiones i en las borsas de el ajeno ke i en akejas tambien tenijan siempre ganansijas, uvo un tiempo ke S-r. Josef lo kerija dechar el enpeigo ke el tenija ma por esto ja uvo ke lo akonsejaron por ke non lo dechara, i ansi lo iso, i era de mismo ke kontunuava, en el Telegrafo de el palasio, i en mismo tiempo revesor en el telegrafo de Galata, ke visto a las ganansias ke el tenija en la borsa non li era nada en sus ojo, la mesada ke el estava resiviendo, i de esto era ke iva mas tadre a la ovra,

943     Biografia de S-res Jeuda i Josef David Arie.   1897

porke el se iva demanijana a la borsa, i li asija saver, algunas moevas de la poletika, ke el non si dava en mano de esta manera de operasiones ke estava asiendo,

En este anio de 5658, ke el S-r. Haim iva kontinuando en las operasiones de la borsa, foe ke en algunas enpeso a tener i algunas piedritas, i S-r. Josef si meravijava muntcho ke komo podia ser ke en la borsa trokaran los presios de los fondos Turkos, kontra de los avisos ke el los konsentija, ma siendo ke ja tenijan i en veses ganansias, era ke ja estava traendo a las tchikas piedritas, i ejos non si deskorajavan koando tenijan piedritas, otro ke el S-r. Haim ke era el echpikolante, i el jevador de el etcho, i la firma ke era tambien a su nombre, ansi lo asija ke si iva enkachando en las merkidas i venditas las mas grandes, ke para ejos non eran ke podijan responder, i ansi foe ke en una operasion ke isieron bastante grande ke si foeron kon la edeja de el aumento adetras de los avisos poletikos ke los via en el palasio, por desplaser li foe lo todo kontra ke esto el non lo supo, ke los chifros sikretos eran trokados i ansi foe ke tuvo las piedritas aparte de sus tanto grandes furtunas ke ejos ja avijan alkansado, denpoes ke lo pidrieron todo, ejos kedaron a dever sumas grandes, i ansi era ke los devdores lo ivan prisigendo, i ke non tenija el molde para pagarles era ke se iva

944     Biografia de S-res Jeuda i Josef David Arie.   1898

eskondiendo, i el S-r. Josef, de tanto ke si sikilio, pensandose, de todo su avansado en koantos anios, i de tantas ikonomjas ke la iso, a ke venga arientro de un dija ke si li vaiga todo i ensima ke dar tambien i a dever, era kosa ensoportavle i de esto se eso hasino ke estuvo etchado en kasa, unos koantos dijas, i koando ja estuvo boeno, el enpeso de moevo a vijitar la borsa, kon la entision de aser de mismo algunas tchikas operasiones, i kon esto poder alkansar al menos ganarse su kapetal ke lo tenija rekojido a uno i a dos groches i sus amigos ke lo vijan foe ke lo akonsejaron ke aparte ke non aga mas este etcho ke buchko a non pasar ne menos por afoera de la borsa porke esto non el ke lo poede alkansar, ja uvo muntcho mas grandes, ke a el i non poede ser ke de la borsa poeda levantar dinguno kavesa i kon esto el si repentio, i enpeso de moevo a aser la ikonomija en kasa, por poder alkansar la suma foesa, komo de el presipio, i es lo todo grasias a la mesada, ke ja la resivija en regla,

          En el anio de 5659, S-r. Jeuda ke estava en vasio i por vija de su ermano pudo nomenarlo komo KANON ke es polisai de una de las plasas de Kostan i kon esto era ke resivija su mesada non en regla i era su ermano ke li avansava por el sujo menester, esto ke ja lo konosija mui bien de saverse komportar i tambien sirvirse de las armas, ke esto ja existo en toda la Familia Arie, lo koal ke

945     Biografia de S-res Jeuda i Josef David Arie.   1899

en otras familias djidios de moestras partes esto non avija, por ke lis mankava la energia,

            Su ermano era de mismo sigun antes solo ke kamenava mui deskorajado, i pensativle sovre todo ke la kasa ja la tuvo grande, i non li estava abastando la mesada ke el resivija, i ansi era ke ivan tinieido deferensijas kon todos 2 ermanos, porke i ejos tambien ke kudijaran por el gaste de la kasa koanto lo podijan, de esto seja el uno komo tambien i el otro non estavan en este modo de posision para poderlis ajudar, foe ke el S-r. Haim non pudo estar mas en Kostan seja por esto de las deferensias kon el ermano seja porke lo presigijan los devdores, lo iso ke partio de Kostan i se vino a Samokov, i se abacho ande la madre ke estava kasada kon S-r Moche B. Mordehai, kon la entision de toparse en Samokov algun etcho i restarse en Samokov, i en mismo tiempo el kijo i esposarse i kon topar una novia ke le podija traerle muntcho kontado, i denpoes ke ja estuvo komo 2 meses i non topo ni etcho ni menos Novia anke por poko kontado, el si foe a Sofia i iva endo i viniendo tambien i a Kiostendil, lo todo era por esposarse i tambien topar mas muntcho kontado, i mas tadre ke i en estos lugares non pudo topar el si foe a Dubnisa, i topo a esposarse kon la ija de el S-r Haim Aseo, i le djo 100 napoliones de kontado i achugar aparte i en el tiempo ke estuvo esposado era siempre en la kasa de el esfoegro i lo detinija en su fabrika de tutun, kon ke li pagava tambien por esto ke li lavorava, ke en kurto tiempo ejos isieron la boda, en

946     Biografia de S-res Jeuda i Josef David Arie.   1899

la kasa de la novia i a los gastes de el esfoegro, i tambien era siempre en su kasa sin ke li pagava nada por esto ke bivijan en una mesa, i en este tiempo ke estava en Dubnisa el kon su ermano S-r. Josef siempre si kartejavan i toda sus korespondensija era lo todo por los etchos de la borsa ke a todos los 2 lis kemava las grandes piedritas ke ejos las tuvieron sovre todo ke kedaron enteramente vasios,

            En el anois de 5660-61, ke ja la isieron la boda kon muntcho saltanat ke estuvo tambien i la madre de el Novio, i el gaste ke ja era todo de parte la Novia foe ansi ke todos los 8 dijas de la boda tenijan i de dija i de notche siempre kombedados i siempre kantando i bailando i alegrandosen, i denpoes ke ja pasaron unos koantos meses el S-r. Haim non kijo mas estarse kon el esfoegro en la fabrika i kon los 100 Napoliones ke tomo de kontado el kijo lavorar aparte i se resento una butika de bakalie, i por los presipios al punto de vista ja era ke estava asiendo bastante de etcho ma era lo todo aires sin konto las venditas ke las asia i ansi foe ke en poko tiempo non pudo merkar ropas porke non mas tuvo mas paras i ansi foe ke en merandole su esfoegro los kontos ja foe ke aparte ke lo pedrio todo el kapetal, kedo i a dever tambien i li kalio ke serara la butika i a esta kavsa ejos tuvieron

947     Biografia de S-res Jeuda i Josef David Arie.   1900

entre el esfoegro i el jerno, algunas deferensijas, litigantes, i el S-r. Haim, lo topo de mijor de fuirse de Dupnisa i se vino a Sofia, en dechando a su mujer, en la kasa de el padre, i esto mas tadre, lo enpesaron a jamar, kon kartas ma el non lis dava ne repoesta, ke mitieron djente en medio por ke si apartaran i ke li diera el get, ma el non atchetava en nada, i estava kamenandose en vasio por las plasas de Sofia, i sin ke tuviera paras ni para gastar, i su esfoegro, de ves en koanto, li mandava alguna suma de moneda, para ke non kedara devdor por los hoteles, i el komo non tenija paras ja las resivija i de esta manera estuvo unos koantos meses, ke mas tadre, en el anio de 5661, li kalio ke viniera aki su esfoegro, por entender, la suja edeja, i denpoes de muntchas litigas i platikas, lo konvinieron el etcho de avrirle una mejane djunto kon kavane, kon ke li metio el esfoegro algo de kapetal i lo iso haver, kon un sierto otro djidio ke el koal tambien non tenija nada, i enpesaron en el lavoro, ke ja ivan tiniendo algo de etcho ma siendo ke todos los 2 foeron gastadores, foe tambien ke i en esto non lis salieron los kontos i en kurto tiempo ejos ja seraron la kavane, i resto de moevo en vasio, i de lo poko de paras ke li kedaron de este negosio el si foe a Kostan ande su ermano ke i en Kostan tambien non topo koalo aser lo iso ke si prekuro algo de moneda i se foe a Paris, ke de mismo estuvo muntcho tiempo en vasio i mas tadre se vino torna a Dupnisa, i su esfoegro si lo tomo kon si en la fabrika i en kasa ke ja lo detinija, se iva pasando, i agora ke esto eskriviendo la dita, el ja esta boeno i se

948     Biografia de S-res Jeuda i Josef David Arie.   1901

iso representante de la kasa de S-r. Alatine, por merkidas de tutunes i de esto el pudo avansar una sierta suma, mas grande, i mas tadre el si topo a un Haver kon algo de kapetal i asen dechkontos en la plasa de Dupnisa, ke los alavan ke asen boenas operasiones ke esto ja lo konose mui bien el S-r. Haim, i agora estan en Kasa aparte i tiene krijaturas, i biven mui boenos kon su mujer i tambien su esfoegro, ke tambien lo proteja,

            El Sr. Josef, era de mismo en su etcho por demasija tuvo ke en el palasio tenija mas grande, konfiensa, i ansi era ke no [en] muntchas okasiones lo jamava el Sultan i le dava algunos komandos, ke el komo era mui travado a los persipios si espantava mui muntcho ma mas tadre ke ja foe entrando unas koantas veses ja si avija fin un grado usado i mas tadre ke ja si fondo el partido de Jeun Turk, i eran los mas grandes pachas i prensis ke si ivan eskriviendo, entre ejos lo kombedavan tambien i a el ma el le asija ke si eskondija, i siempre buchkava para estarse en okupasion, porke non savija si era ke kon la entision boena, ke de esto ke el Sultan ja lo savija era ke los presigija, i los tomava de sus kasas de notche, i los asija etcharlos a la mar sin ke tuviera el animo dinguno a reklamar ke si alguno lo asija esto era tambien i a el ke lo asijan esto i lo etchavan tambien a la mar, i sigun ke ja lo eskrive en la partida de su papu en eja N. 524 sigun de loke li paso tambien i a el i de este li kavso tambien i la moerte, ke es verdad, ke si keri tenido relasion kon djente grande ma fin a un grado por rason ke los kavos non sale

949     Biografia de S-res Jeuda i Josef David Arie.   1901

kontente, i el denpoes ke murio, su mujer disen ke ja tiene algo de pensija ke resive, i sus ijos ke ja salieron mui bien enbesados es ke todos ja resiven sus pagas de sus empeigos, i se pasan en Kostan mui boenos, i kontentes,

            Koanto a el S-r. Jeuda foe siempre Kanon i de esto se iva pasando i tambien kon el protejo de su ermano, i mas tadre loke foe de el nada non pudo saver, i la Bu. Sarutcha bivio muntchos anios i eja foe sana ansi tambien i su Noera, la S-ra JAFA, ke salio mui nekotchera, i savija detener la kasa entera,

950

            Sigun de loke ja lo eskrivi i en el kavo de la Partida de H. Refael porke es kada miembro libero, por koando lo kerla para kontinuar su biografija seja enpesando de su linage entero or seja de su Djerenansio, i ansi de mismo i solo de su partida, i non keri ditcho ke ja lo poeden tambien i de la Biografija entera, solo kon la kondision de non enmankar ni pujar, de lo eskrito ne un a letra mismo, solo ke kada uno lo poede en su partida ke kerla eskrivir, por algunas kosas ke non li serijan ke foeron eskritas deretchas, ke sigun ja lo eskrivi de el presipio, ke mis eskrituras todas foeron a detras de loke mi lo disijan otros mas viegos de mi, i mas tambien es alesensijado solo a el miembro ke es de la familia Arie para poder tomarse kopia i kontiuar,

951                                       FROTCHIGUAMIENTO.

            En el Linaje de Hr. Josef A. Arie, el frotchiguamiento i el montchiguamiento de almas, foeron en el tiempo de 97 anios kontando de la data ke kaso, ke es en el anio de 5547, nasio, i en el a anio de 5567, kaso i en el anio de 5591 murio, i fin a el anio de 5660-61  ke eskrivi la dita biografia, demostra ke foeron todos los nasidos, 79 almas, i paridos de 19 madres, i las koalas foeron las 4 madres de la familia arie, i las 15 madres de deferentes familijas, i de sivdades, i de los koalos nasidos foeron los 37, matchos i las 42 embras, ke de las koalas murieron fin a este tiempo, las 22 almas de las koalas las 13 embras i los 9 matchos, de una edad proporsional de 44 anios, ke adjuntando i las madres ke ja estan bivas i ke son de otras familias, ke son 11, i las koalas ja entran en la familia de Arie, son todos los bivos 68 almas, de las koalas los 40, embras, i los 28, matchos, lo todo fin a la data de 5660 ke de todos estos es en Samokov ke biven solo una Faimilja ke es S-r. Jshak R. Arie, i lo restan biven los unos en Sofia, Dubnisa, Kostan, Paris, i en otros lugares ke non estan bien asentados, i kon las embras ke foeron kasadas todas biven en deferentes sivdades,

952                              DADIVA DE DIO DARBA^[27] .

            Este linaje de Hr. Josef A. Arie, foe engrasijado kon la dadiva de el DIO, solo kon la entelejensa, sigun ke ja lo, meldaron en general en todas las partidas, los maravijosos pasajes ke ejos pasaron los todos kon grande entendensia, i saverisio, ke todos sus negosios ke ejos los isieron por sus kontos todos ja foeron mui djustos, enkamenados fondados, solo ke ejos non pudieron reuchir para aprovetcharsen, ke esto por koalo ke seja, i es de decharlo a kada uno ke lo poeda apartar, ke sigun mi es koando un negosio ke si ase todo a las rovadas i ala eskondida, a ke non lo veigan ke non foe kon la lesensija de el patron de la moneda, deve de ser ke non poeda ir adelantre, i la prova ke ejos ja konosijan la merkansija a el fondo es ke koando lavoravan por el konto de el otro, era ke en todo mui boeno reuchijan, i non podemos disir ke eran diktijados de el otro, porke sigun si vee, es ke koando los mandavan por koal negosio foesa era ejos solos ke lo enkamenavan sin ke los diktijavan por lo todo, porke ja los vijan ke sus enkamenamiento de koal etcho foesa ejos era fin ke si entraron arientro i mas non tenijan el menester, de akonsejarses porke el konsintimiento sujos es mui ralo ke poeda

953

existir en otras personas, solo ke por ejos mismos non pudieron alkansar, or reuchir por enpatronarsen en dingun modo de etcho, ejos tenijan adjuntas por alkansar a saverlo este sikreto ma non lo toparon, i ansi foe ke lo pasaron sus vidas siempre kon lavorar por los kontos de los otros, i esto era ke estavan siempre en vijajes de tiempos largos, i kale disir ke ejos foeron kansos, i por esto bivieron mui poko, i por aser krier sovre ke ja foeron todos entelejentes, es de rogarles por ke melden el pasaje de H-r. Josef kon usref pacha i este de S-r. Josef su inieto ande Sultan Hamid, i esto ja serija bastante por aserlos kreer, ke ja foeron entelejentes, ke komo non eran non podijan tener, relasiones kon ansi personajes,

954

            Asta aki si eskapan las partidas todas de el Linaje de Hr. Josef, A. Arie, fin a el anio de 5660 i eskritas en Sofia fin al 21 Januari 1914 i 7 Chevat 5674,

 955

En el libro original esta pagina ha sido sacada^[28]

I por tanto no se pudo reproducir.-

 956

igual mención que en Le pagina 955.-

 957

Página vacia del libro original.-

 958

Igual mención que en la pagina 957.-

 959

 960

 961