בני סניור יהודה מ. אריה

1356

De aki i endelantre si enpesan las partidas de los Ijos de Tch. Jeuda, ke son S-res Mochonatche Davidtchonatche, Naimatche, i Chemoelatche, enpesandon de el anio de 5630 por kada uno fin a el anio de 5660-61,

1357  Biografia de S-res Mochonatche, Davidtchonatche, Naimatche i Chemoelatche  1870

                En este anio de 5630, ke Tch. Avraam ja estuvo apartado, i kedaron solos los Ijos de Tch. Jeuda, i todos los 4 ermanos si aonaron i se konvinieron en sus pursiones, i se izieron Haverim, por lavorar djuntos, i denpoes ke ja vinieron en ansi akordo ejos si metieron de akordo tambien i por espartirsen i de lo restan ke enpatronava sus padre, seja en mulkes komo tambien i moneda i djojas i  mobilias, i ansi lo todo por de una vez eskaparse ke lo izieron esto, ke lo eskrivieron todo i en mizmo tiempo lo i presiaron, fin a la mas tchika koza, ma kon la suma de moneda en kontante ke la tenija en kacha sus padres, non lo savijan la suma ke era, a razon ke la jave  de la kacha de fiero, ande detinija la moneda era ke la tenija su madre, i anke ke si la demandaron foe ke eja non kijo, karla [darla] a denguno, sovre ejo los ermanos por non tomarsela por foersa de sus madre, tuvieron la pasensija fin a topar el momento, ke eja non estuvo en la mizma kamareta, i ronpieron el dolap ande estava la kacha i se la tomaron entera, ke por esta etcha foe ke estuvo mui muntcho tiempo ravioza sus S-ra madre, (es este karar ke lis koadrava a las mujeres de akejos tiempos, ke si ansi koza akontese en este tiempo, todas ja lo van azer ke de pechin se van a ketar la suma ke lo kerla i denpoes seja ke lis dara la jave or seja ke se ja jevaran va aser ke eja ja va a estar de mano kon su entision ke lo pensara, porke non poede aver ken es el ke li iva a demandar el konto,) i ejos ke ja la avrieron lo tomaron tambien i esto en nota, i de todo loke pudieron eskrivir por lo todo kada uno se tomo a igual parte lo todo en la koenta

1358  Biografia de S-res Mochonatche, Davidtchonatche, Naimatche i Chemoelatche  1870

de la moneda, ke lo traivan a koal koalo lo kerija tomarse, i lo tomavan en nota, solo ke sovre las kazas ande ejos moravan foe ke las metieron en enkante i las estuvieron artirjandolas entre ejos, i esto lis kavzo a razon de unas avlas letigantes ke tuviera, los ermanos mas grandes, i ansi foe ke la kaza ande morava Tch. Jeuda la ketaron a 160,000 gr, i les kedo sovre los S-res Davidtchonatche i Naimatche, i esto foe ke denpoes tomo parte, S-r. Naimatche, en la metad, a tiempo ke non valija ni el medio presio, porke S-r. Davidtchonatche kijo repentirse, i kon la otra kaza, ande morava S-r. Mochonatche, salio a 115,000, gr. i le kedo a S-r. Mochonatche, solo, i s-r. Davidtchonatche era ke non morava en estos kazas porke el ja estovo aparatado de kaza kon 2 anios antes, i estava morando a kira en la kaza de Haseki Suleman AA, i de la jaila, li dieron de parte, solo para sus ermana la Bu. Jael 8-96, partes, ke eja era menesteroza i tomava 8 liras de kira a el anio, ma a las otras ermanas non lis dieron dinguna parte, ni menos ke reklamaron, koanto por sus madre, li apartaron 3 butikas, i de la djoja esto ke eja lo kijo, i todos sus vistidos ke eja los tenija, i mobilia por uno kamareta, i aparte li nombraron a darle a 100 gr. a el mez por su djep hachlik, i por la suma ke lo podija tener por vistirse sin fiksar nombre, de la suma, i koanto a el sujo mantinimiento, ke eja iva a ser libera de estarse kon koal ijo lo kerija, i devijan de pager aparte, ma si eja lo kerla estarse sola tambien iva a ser ke la devijan de sostenerla a sus onor i esta de el padre, lo todo ke devijan pagar a igual parte

1359  Biografia de S-res Mochonatche, Davidtchonatche, Naimatche i Chemoelatche  1870

ejos en este anio estuvieron todos sigun de los otros anios i kon sus gastes ke azijan era ke lo todo si gastava de enmedio, i mientres este tiempo ke ejos se ivan apartando, i resiviendo las kozas ke si apartaron foe ansi i koando ja estuvo todo apartado, se vinieron kada uno en sus kaza, i se komportavan kada uno por si, ansi de mizmo lo izieron i kon en etcho de la plasa, i eran aunados, i se kamenavan a los ordenes de el S-r. Mochonatche, ke el koal lis foe por derektor i admenestrador,

                Mas tadre ejos kon el akordo de todos se detchezaron por avrir en Kostan, una kaza por azer operasiones de banka, i sovre ejo lo mandaron a S-r. Naimatche a Kostan, i estuvo komo 3 mezes buchkandose a un Haver pertenesiente para esto, i sus ermanos de Samokov, ke ja foeron eskriviendo a sus amigos sovre todo a S-r. Kamondo i kon las rekomendasiones de el S-r. Kamondo lo toparon de deretcho por tomarselos a un sierto mansevo S-r. Baruh Jshak Koen, ke el koal ja era kapatche por ansi operasiones, i ke S-r, Kamondo tambien era ke ja los iva a protejar, i ejos si lo avinieron kon ke S-r, Baruhatche lis metio un tchiko kapetal, de 1000 liras, i ejos metieron la suma de 10,000 liras, i ande S-r. Kamondo se izieron los kontratos menesterozos i los afirmaron, i se asentaron en uno de los apartamentos de los hanes ke ja los tenija S-r. Kamondo, en galata, i ejos ketaron sus tcherkolares i en mizmo tiempo azijan saver i kon kartas a todos sus parientes i amigos i konosidos, i la firma jevavan era, ARIE BARUH KOEN & KOMPANIJA, i mas tadre tomo parte tambien i el S-r.

1360  Biografia de S-res Mochonatche, Davidtchonatche, Naimatche i Chemoelatche  1870

Kamondo, de el presipio ejos enpesaron en etchos de komision, sovre saraflik, de merkar i vender bechlik i otras monedas en la borsa lo todo por los kontos de sus klientes, i ejos lis tomavan una tchika komision de a 1/2 % i kon esto ejos si ganaron en poko tiempo a muntchos klientes, i mas tadre ejos enpesaron a merkar havales pagavles en las kachas de los vilaetis ke esto de las havales ja lo tengo eskrito sigun eran i esto ejos ke las tomavan deretcho de los ministerios i en vezes las merkavan de los podratchikis ke si vendijan en la plasa i esto kon unos presios mui konvenivles, i denpoes era ke ejos las vendijan a sus klientes kon tiempos i les kovravan a 12 % de entereso a el anio i tambien ganavan i de el presio i de estas havales ke tan presto non las podijan venderlas era ke las mandavan a kovrarlas por sus kontos, i a esta rason ke merkavan ansi havales foe ke si avrieron tambien i kreditos en la hasne ke por esto tambien ja lo tengo eskrito de koala forma era, ke los jamavan TAUDTCHIS, i tambien en kurto tiempo tuvieron i los kreditos i en las bankas grandes de el ajeno, ejos davan muntcha moneda kon entereso a sus klientes ke muntchos si prevalijan de ejos, era el S-r. Baruhatche ke vijitava siempre en todos los ministerios i admenestrasiones, i se gano grande enfloensa i lo konosijan kaje lo mas muntcho de los Pachas i de los personajes grandes el lis enprestava moneda a todos estos kon enteresos, i kon esto tambien li ajudava para eskapar sus etchos, i S-r. Naimatche era siempre en el Buro, i todos los 2 eran los derektores por enkamenar los etchos i entre ejos si akonsejavan, por sekretar,

1361  Biografia de S-res Mochonatche, Davidtchonatche, Naimatche i Chemoelatche  1870

lo tuvieron a S-r. Jzak Dalmediko, i por kachero a Tch. Jshak el padre de S-r. Baruhatche, i aparte tuvieron tambien i el personal ke era menester, kon sus mosos i hervates, i S-r. Naimatche estuvo solo sin ke avrio kaza por su konto, i siempre estava en la kaza de S-r. Baruhatche ke komija i dormija i tenija una kamareta por su konto, i lo meravan i lo kudijavan muntcho, sin ke lis pagava nada,
Ejos los otros ermanos ke estavan en Samokov, era ke si okupavan solo en los maadenis, i algo de hachares ke tomaron por ke estavan en el anio de el padre i era ke en kada tadre se ivan en kaza ke vinijan 10 hahamim i meldavan por la alma de el padre, i ejos ke si resentaron kada uno en sus kaza i kon los mulkes ke lis avija kaido de la espartision de Tch. Avraam ejos non lo metieron por kapital a sus moeva Hevra otro ke los revinidos si los tomavan kada uno por si solo ke era ke si meravan en la oda, i los kontos tambien si jevavan por kada ono en partidas aparte, i kon los maadenis, foe ke los metieron a lavorarlos djuntos, i por konto de la hevra, i kada uno si travava moneda el menester por sus gastes,
En este anio de 5631, li nasio a S-r. Mochonatche una ija i la jamaron Zafira, ke kon eja tambien se izo lo todo sigun de todas las otras paridas, eja de mizmo kontinuo todas las echkolas i es mui repozada i mui bonatcha sovre todo mui vergonsoza, i en su

1362  Biografia de S-res Mochonatche, Davidtchonatche, Naimatche i Chemoelatche  1871

tiempo la kazaron en Filibe kon S-r. Nisim B. Israel (de karlovo), eja bive medijana ma ja si pasan i eja pario ijos i djas, i de ves en koanto los vijita a sus ermanos, aki en Sofia, i la regalan,

                En este anio foe ke S-r, Mochonatche lo mando a su Ijo S-r, Behoratche a viena, porke si enbezara la lingua nemsa, i estuvo en viena serka de un anio, ke alguna koza ja enbezo ma non si pudo estarse mas porke ja estava kazado, i koando se vino a Samokov se trucho kon si a una demoazela katolika ke sirviera komo governanta para las krejaturas, i eja konosija muntchas linguas i muntchos de los ufisios i los lavoros de mano, i tambien konosija i boeno i djugar en el pijano, era eja ke lis dava lixiones a todas las mansevas de kaza seja en el pijano komo tambien i en el franses, i kon eja estavan todos siempre pasando la ora, ke savija kontarles kozas de azerlas reir, i era mui ermoza i mui delikada, i mas tadre seja ke las mujeres si enselavan or seja ke ja foeron enfastijadas, la mandaron atras a viena, kon ke la jevo S-r, Behoratche fin Sofia i de Sofia la mando a Lom Palanka, i se foe vija la tuna, la paga ke li pagavan era de 80 fr, a el mez, i aparte la mantenijan i la vestijan i mas todo el menester, de una persona, li abastesijan,

                En este anio tambien ejos siempre si enbevisijan en ir aziendo kozas de bien fizensias, i davan tambien i muntcha SEDAKA ejos fragoaron un TALMUD TORA, en 2 etajes, kon a 4 kamaretas, i esto en el kortijo de el Kaal viejo, i metieron en la pared ensima el balkon una piedra eskrita kon letras de oro, ke era EKDECH, de S-r.

1363  Biografia de S-res Mochonatche, Davidtchonatche, Naimatche i Chemoelatche  1871

Naimatche, i en memoria de su Padre Tch. Jeuda, i el gaste ke lo izieron foe de 20,000 gr. ma non foe sirvido por Talmud Tora otro ke por Midrach para dizir Tefila entre la semana, esto era en el sigundo etaje i en el primer foe salon por las adjuntas, de los etchos de el Kolel, i estos ke ja avijan de antes ke ja eran medios estroidos los derokaron i se izo un grande kortijo, i aparte ejos trucheron hoentes dekontino korientes, kon abastansa de agoas, i la una la izieron en el kamino de Samokov a la Bana, de kiostendja, i la metieron en medio de el kamino, ke era en el kazal de GUSAL^[20], kon una piedra de mermer eskrita kon letras de oro, en Turko i en djudezimo, ke era Hairat^[21] de Tch. Jeuda, i esta hoente foe etcha en un lugar muntcho ke foe pertenesiente porke non avija otra hoente ande ke podijan bever agoa los pasajeros, komo tambien i las animales, i estuvo fin a el tiempo de la gera Turka-Russa, de 5638, i koando ja entro el Russo, foe ke rompieron la piedra i bozdejaron todos los kanales, asta el grado de depedrerla enteramente, ke mas denpoes ke kijeron renovarla foe ke de mizmo la ivan rompiendola, i ansi foe ke mas non la izieron i ansi era ke ivan gastando en las fragoas de los mulkes de el kolel por renovarlos, i a muntchos menesterozos los ajudavan kon moneda, ejos mas izieron ke nombraron una sierta suma de moneda, por ke de los revinidos ke meldaran unos koantos Hahamim, en kada tadre de los dijas de mierkoles, por la alma de Tch. Jeuda, ke i esto tambien foe kontinuando fin a la gera, i mas tadre anke ke el fondo si lo komieron estos ke lo devijan era ke ejos torna lis ivan pagandoles a los

1364  Biografia de S-res Mochonatche, Davidtchonatche, Naimatche i Chemoelatche  1871

Hahamim, i mas tadre ke seja ke el derektor de la echkola mas non los kijo alesensiar, or seja ke non lis abastava las pagas ke lis pagavan foe ke esta manera en kada dija se iva enmankando fin ke lo abandonaron, i mas non lis pagaron ni ke ejos mas foeran                   Kon sus negosios ejos en este anio lo enpesaron ainda muntcho mas a engrandeserlos, ejos tomaran en el tiempo ke si vindieron los diezmos de los trigos (hachares) mas de la metad de los kazales de Samokov, i ejos por vija de sus personales tambien los dieron, i todo loke rekojeron de trigos lo todo lo depozitaron en hambares seja de los sujos i estos de el tchiflik i tambien de los maadenis i vignas i aparte ejos lis kalio i ke si i alkelaran ainda mas por abasteser, i denpoes era ke los ivan vendiendolos a los kazalinos por tiempos mas largos i si entiende de sujo ke kon i mijor presios, i aparte de esto ejos merkaron a partidas bastante grandes de los sahtijanes i machines ke salijan de las partes moestras, i lo todo, lo mandavan a Viena a S-r. Math, Russo, i en okaziones tambien i se prevalijan i esto a sumas godras, i de Kostan ke ja eran ke merkavan las havales por todos los departamentos de los vilaetis de la Europa era ke si las mandavan a ejos por kovrarlas i ejos ke en todos estos lugares ja tenijan a sus personales pagados de kontino era ke asijan los enkasos i siempre de todos los lugares lis remitijan deretcho a kostan, i esto era ke azijan los prevalimientos lo todo de la kaza de Kostan i lo todo ke ja lo savijan i mui bien enkamenarlo, era ke non azijan dingunos jeros, ne arivavan en dingunos apretos, seja en

1365  Biografia de S-res Mochonatche, Davidtchonatche, Naimatche i Chemoelatche  1871

Samokov komo tambien i en Kostan, ke lo todo era soto los komandos de el S-r. Mochonatche,
Por el enkamenamiento de los maadenes, ke ejos ja eran okupados, en otros etchos lo kargaron enteramente a un sierto Kinali Mehmed Efende ke el koal era mui kapatche i mui akurat para el etcho i tambien ke era i boen eskrivano ke savija jevar las korespondensias para los Pachas i los personages mas grandes, i era el ke eskrivija todas las kartas en turko, i aparte merava tambien i el etcho, de los maadenis ke i en esto era ke davan grandes foersas por lavorar koanto era posible mas muntcho, ke en esto eran las ganansias mas muntcho, i el koal tambien tenija i uno otro ke lo ajudava, i por el vindidor de los fieros en pazardjik, (satidji), lo tuvieron a molla Ibraim, Kurd oglo, ke el koal tambien era ona persona mui akurat, i se iva en kada semana a pazardjik, segun de todos los otros satidjis i el era el grande de todos i de el si nombrava los presios de el fiero en kada semana por ke el tenija mas muntcho de todos los otros, i el azija las venditas lo mas muntcho a kredit, i los kovramientos tambien non los asija presto, ke era a la boena veluntad de kada kliente para aser los pagamientos, i esto ke lo kontinuo, algo de tiempo foe ke si lis rekojo a sumas bien grandes estos averes i esto era lo todo kon tefter, i de el satidji, ke mas tadre visto a esto ke no era etcho lo enpesaron a enmankarlo i en mizmo tiempo tambien enpesaron i apretar por sus averes, tambien tenijan i mas mijor ke el primo fiero, ke si lavorava entre todos los maadenes de Samokov era este

1366  Biografia de S-res Mochonatche, Davidtchonatche, Naimatche i Chemoelatche  1871

ke si lavorava en el maaden de radoil ke lo tenijan ejos, i arazon de este azija vender i los otros,
Kon sus komportamientos en kaza, eran de la mas grande gala i saltanates, i a razon de esto era de i los gastes ja es de sujo ke foeron muntcho mas grandes de esto ke gastavan de mas antes, anke kada uno si gastava por su konto, torna kon todo el S-r. Davidtchonatche, ke era mui kontra de esto era ke aparte loke el non gastava era ke rebivija i avlas entre ejos, i de esto lis salija a litigas i el ke ja estava lechos de ejos ke morava en la kaza de Haseki suleman AA, asistija mui ralo a las adjuntas ke las tenijamos siempre en la familija, i koando ja venija era ke si asentava en un kenariko, komo un ajeno, i esto de apartarse foe ke ja lo kerija en antes tiempo ma era ke el padre non lo dechava, i estava pagando la kira en vazio, ke era 3500 gr, i lo todo era porke li vinija muntcho de todo loke vija en el otro, i las krejaturas tambien ke i se pelejavan era ke salija avlas en las madres i denpoes ande los padres, i en esta kaza el estuvo 4 anios i era kontente, ke li plazija el estarse solo, i se kontentava de su dezejo, sus ermanos non lo vijitavan muntcho, ansi i sus madre era mui ralo koando li iva, ke de esto li enportava mui muntcho,

                En la banka de Kostan, era lo mizmo tambien ke lo ivan engrandisiendo sus etchos, i en estos tiempos ke si foeron fondando muntchas bankas en Kostan era ke kon todas tuvieron kontos korientes i kon grandes kreditos, i aparte era i kon las bankas de el

1367  Biografia de S-res Mochonatche, Davidtchonatche, Naimatche i Chemoelatche  1871

ajeno, ke en kada tiempo se ivan aziendo avrir kreditos en todos los estados, ejos azijan muntchas operasiones en la borsa de merkar i vender fondos seja turkos komo tambien i de los ajenos, i esto koalo en la borsa de Kostan i koalo en las borsas de el ajeno, ke lo mas muntcho lo azijan por los kontos de sus amigos, i algo por sus konto i la komision de estas operasiones eran mas grandes, por poder alkansar, a todas las admenestrasiones, ke S-r. Baruhatche las frekontava i ke ja era kanso de kamenar apie, ejos si merkaron un kupe, paiton, kon unos kavajos blankos, mui ermozos i estava siempre en la poerta de sus banka, i siempre era ke S-r. Baruhatche iva en todos los Pachas ke el ja avija tomado el andar sigun de loke era el menester de komportar, i eskapava tambien i los etchos, ejos koando topavan el kurso de el bechlik mas konvenivle mizmo ke non tenijan algunas komandas era ke si los merkavan por sus kontos, i lo detinijan fin ke resivijan algunas komandas i el presio tambien ke ja trokavan, era ke de mizmo si los vendijan a el presio de el dija, ke la komision les era mui tchika, ke era de a 1/2 %, ejos sus kontoar lo avrijan demaniana a las 8 1/2 i el dija entero estava avierto ke non lo seravan por irsen a komer, ke era ke los unos se ivan i koando boltavan era ke se ivan los otros, i en vezes komijan tambien i en el buro, i la tadre seravan, 7 la ora i se ivan por los kafes i otros i 9 la ora ja eran todos en kaza, ke en turkija non si podija mas de esto restar ke ja lis kalija ke tomaran fener en sus manos, i tambien ke non eran tanto siguros de kamenar solos, ke avijan djente negra,.

1368  Biografia de S-res Mochonatche, Davidtchonatche, Naimatche i Chemoelatche  1872

               En el anio de 5632, li nasio a S-r. Davidtchonatche, una ija i la jamaron Rachel, i esto la pario en la kaza apartado, de el Haseki Suleman AA, i sigun ke la familija Arié siempre si goadro, su onor i por ke non se diga por ejos nada, ja li foeron todos a vijitarla,  i de mizmo lo todo sigun ke lo azijan kon todas las paridas foe tambien i kon esta, i eja ke ja era mui sana i mui rezija era ke su madre la aletchava i en mizmo tiempo kudijava por todas sus krijaturas fin ke eran tchikas i eja era ke kudijava tambien i por la kaza, esta M. Rachel koando ja foe mas grande tambien frekonto las echkolas i konose algo de el franses i de el Djudezimo i en su tiempo sus ermanos la kazaron kon S-r. Behor Aronovitch, de Pirot, ke a los presipios ke era en Pirot fin a un grado pasava, i mas tadre se vino a filibe i estuvo kon su esfoegra porke non uvo kon koal Ijo eja ke estuviera, i entre los 2 si akomodavan i lo pasavan, eja pario una ija i mas non pario fin a este tiempo, eja foe siempre mui bonatcha i mui repozada,
S-r. Naimatche en este anio de koando si avija ido a Kostan ke non tenija venido, a Samokov, foe ke si vino i siendo ke entre los ermanos tenijan de reglar algunas kistiones, i era ke tan presto non pudieron reglarlas seja de sus enteresos komo tambien i familijaras, i S-r. Baruhatche ke era solo en Kostan, lo iva mandando a jamar kon telegrafos, i el ke non se kijo irse por sus razones, anke ke sufrijan los enteresos de la banka de Kostan, lo izieron ke

1369  Biografia de S-res Mochonatche, Davidtchonatche, Naimatche i Chemoelatche  1872

lo mandaron a S-r. Chemoelatche, i estuvo komo a 4 mezes en Kostan i S-r, Naimatche, era en Samokov, buchkando a poder enderetchar sus deferensias ke las tenijan entre los ermanos, i tambien ke lo mas enportante li era por poder resentarse su vida por el avenir i mas regular, porke ja era mui enfastijado de estarse solo, anke ke ja estava mui bien merado, i pasava la mijor vida ke podija ser, i tambien ke el ja era mui bien visto de todos sus amigos ke si los gano, en Kostan, ma mi kontava ke en kada tadre de viernes, i ke si iva a trokarse por resivir el Chabad, i tambien en todos los arbai Moadim ke lo azija lo mizmo era ke si li soltava un joro, en su kamareta ke si eskondija, por ke non lo vieran dinguno, fin ke si artava era ke iva jorando, pensandose ke kada uno kon loke el DIO, lo engrasio, se va en su kaza, i se rekoje kon su mujer i krejaturas, i se kontentanlo koal por enfrentante koando vinija para el i enpatronado de todo, esto, era ke el jorava de la una parte ke iva a esperar koal era ke lo iva a jamar, i de la otra parte su mujer i krejaturas tambien lo mizmo jorando, mizmo ke la kaza de S-r. Baruhatche ja estava avierta para el ma el karakter sujo non li permitija sin de moevo ke foera siempre jamado, i siendo ansi koalo era de rijir non savija i kaza ke non kijo avrir, en Kostan por jevarse a su mujer, i krejaturas, ke i esto kale dizir, ke non estava siguro, de sus etchos, i ansi foe ke iva restando en Samokov, ke tambien en este tiempo avija muntcha hazinura en Kostan, de la holera, i foe esperando fin ke si aralava, ke i esto mas tadre ke ja paso es ke si foe de moevo, a Kostan, ma non si foe gustozo i de ver ke los decho tanto abatidos a su mujer i

1370  Biografia de S-res Mochonatche, Davidtchonatche, Naimatche i Chemoelatche  1872

krijaturas, i koando ja arivo en Kostan denpoes ke estuvieron kon S-r. Chemoelatche unos koantos dijas,
Foe ke a S-r. Chemoelatche lo mandaron de Kostan a ke si foera a rustchuk, kon havales ke ja las tenijan siempre por ke las kovrara, i en el tiempo ke el estava en Rustchuk, i ke si estava fragoandose el kamini de fiero, Chemen de fer, de Rustchuk a Varna, si avijan metido en enkante 150.000 pares de tramvezes^[22], de lenio de meche, i para esto tomarlo el se izo haver, kon el S-r. Zever efendi ke el koal era un miembro de la Familia de el Dr. Chalom de la bosna i S-r, Manuch Avtalion, i de Rustchuk, i S-r, Azarija Geron, de Filibe ke el koal tambien ja estava en rustchuk, i denpoes ke ejos ja si konvinieron en sus % se izieron los kontratos, menesterosos, solo ke el S-r. Chemoelatche komo mas mansevo, non lo izo el kontrato sigun de loke premija i foe al kontrario los haverim lo izieron lo todo a sus favor, i los presios ke ja eran mui konvenivles, lo tomaron a el nombre de S-r. Chemoelatche, i ejos ke si metieron en el lavoro de el presipio lis demostrava muntchas ganansias, i mas tadre ke ejos non estuvieron pudiendo topar los kuris, (Charas) de ande kortar los lenios, era ke apenas koando ja topavan lis estava kostando, mui karo, i de esto sus ermanos ke non estuvieron de akordo, era siempre ke li ivan eskriviendole porke de la manera foesa ke merara de desbarasarse, ma los haverim non lo soltavan, a dingun presio por ke i ejos eran tambien mas muntcho espantados, anke ke los kapetales de lo haverim ja eran mui tchikos, i visto ke non si estava podiendo

1371  Biografia de S-res Mochonatche, Davidtchonatche, Naimatche i Chemoelatche  1872

desbarasarse, foe ke sus ermanos enpesaron a buchkar los moldes, vija de el Vali Pacha, en diziendo i defendiendosen por S-r. Chemoelatche ke non era majorente, koando afirmo el kontrato, i ansi lo ivan aziendo vija de los Pachas de kostan i tambien kon la ajuda de S-r. Kamondo, ke las enfloensas anke ke ja eran en todos los 2 mui grandes ma en esto a dingun presio en nada non podieron reuchir, ke el Vali Pacha dezija mijor de este kontrakttchi, ande lo podemos topar ke ja mos poede responder para lo todo, i ansi foe ke lis kalio ke lo kontinuaran, i todos los haverim mas ja enpesaron a non okuparsen, i por lo todo lo ivan dechando solo a S-r. Chemoelatche ke respondiera, i ansi foe ke estuvo 2 anios enteros en rustchuk fin poder desbarasarse, i esto lis kosto mui grandes piedritas, ke los haverim a uno a uno ja si esbarasaron, de la manera lo kijeron, i mientres este tiempo ke estuvo en Rustchuk, era ke ja asija i algunas operasiones de banka ke de esto ja ganava, i tambien era el etcho de las havales ke ja eran a sumas bien redondas, i el tomava havales i por las otras kachas de el departamento i se iva el mizmo por azer los kovramoentos mas presto ke era lo mas muntcho ke iva a jenidje i esketche^[23] i ansi en otras sivdades mas tchikas, i kon las kartas de el Vali ke li tomava, por todos estos seja los mutesarifes i los kaimakames ja era ke lis rekojija toda la moneda ke si lis topava en las kachas de el governo, i mas tadre koando ja si eskapo el etcho S-r. Chemoelatche avrio proses kontra de sus Haverim por buchkar las piedritas, ke i esto lis turo longo tiempo ma tambien non gano nada por

1372  Biografia de S-res Mochonatche, Davidtchonatche, Naimatche i Chemoelatche  1872

ke estos ultimos non enpatronavan ni nada, i denpoes resto adjuntos kon S-r. Azariatche Geron, i ivan lavorando en djuntos ke ejos tenijan sus kaza ande moravan i tenijan sus gizandores a un sierto de filibe Melamed, i aparte sus mosos, el koal savija azerlis boenas komidas i las agristadas ke lis plazija muntcho,
S-re Naimatche ke ja estuvo en Kostan, era ke kontinuava en sus negosios ke ja los tenijan, i siempre era ke los ivan engrandisiendolos, i ejos eran mui kontentes, por ke en todos los etchos ke ejos los azijan era ke ja lis iva kamenandoles adelantre, i sus fama tambien se lis iva engrandisiendose, i en este tiempo ke sus etchos ja lis foeron muntcho mas grandes era ke engrandisieron tambien i el personal, i kon sus gastes ke los azijan por sus plazeres los tuvieron ainda muntcho mas grandes, ejos en este anio tomaron en Haidar Pacha kazaliko, de parte de la azija, un grande tchiflik, a kira por el enverano, por el presio de 180 liras por los 6 mezes, ke el koal lis servio por kampanija, i se foeron todos i en kada de manijana si vinijan a el etcho i las tadres se ivan kon ke lis ivan tambien i muntchos musafires i ahbapes por pasatiempo, era ke solo, el S-r. Baruhatche, ke non si bivija boeno kon su mujer la Bu. Merjamutcha, i non li avlava, ke siempre estavan anojados, i esto li vino a razon ke eja en una notche ke estavan komiendo en la meza kon su padre i madre, foe ke lo avregonso a su marido delantre el padre, i el ke lo karava [katava] muntcho a su padre foe ke la aboresio i mas non li avlo en toda su vida, i antes de esto ke tuvo una ija mas non pario

1373  Biografia de S-res Mochonatche, Davidtchonatche, Naimatche i Chemoelatche  1872

i esto mos enbeza el karar de foersa tiene el karakter de la persona de koando si respekta a sus parientes i ke li venga ansi de su mujer ke seja avregonsado delantre su padre ke lo aze alechar de su kostija para siempre, sovre esto las pardonansas seja de sus parientes komo tambien i de su mujer ke non kere ditcho ke ja las izieron todas ma non valio nada, i por esto es ke moestra lei akavida ke el avregonsar karas de el otro delantre djente es el mas grande pekado de todos los otros, ma agora esto los mansevos non miran mismo koando lis veén a sus padres korer las lagrimas por sus barvas blankas, es aparte ke los maltratan ainda i los amenazan, sin peadad,
En Samokov ke eran solos los 2 ermanos S-res Mochonatche i Davitchonatche, era ejos solos ke si meravan sus etchos i non tenijan a dinguno por ke los ajudara, i era ejos ke si eskrivijan i la korespondensija ke la jevava solo el S-r. Mochonatche porke su eskritura era mui ermoza, i sovre todo el istil ke lo tenija era ainda mas mijor, i en alguna ves ke non alkansava a eskrivir a todos i las kartas era ke i S-r. Davitchonatche tambien a algunos ke lis eskrivija, i su ermano ke la meldava era ke la korojijava, kon enmankar or pujar algunas palavras ke de esto ke si la dava atras por ke demoevo la eskriviera era ke li vinija mui muntcho pezgado, mizmo ke non li avlava i la kopiava de moevo ma ja kedava anojado, i en okazion lis salija i avlas tambien i por esto, i siendo ke sus etchos non lis era nunka mankos i ja tenijan okupasiones, ja lo ulvedavan,

1374  Biografia de S-res Mochonatche, Davidtchonatche, Naimatche i Chemoelatche  1873

               En este anio de 5633, ejos merkaron el Sumun de los fieros ke tomava el governo, en 8 uno, de los maadenis, i esto era una suma grande de fiero, ke por estas merkidas ja lo tengo eskrito mas antes sigun era ke las azijan, ke era en natur, la una merkida i la otra en moneda, i esta ke foe de la de moneda, foe ke a razon de muntchos konkorentes ke uvieron lo merkaron mui karo, ma por ejos no era nada porke en la banka de kostan tenijan el konosimiento mui grande kon el Pacha de la Tersane, i ejos si lo vendieron a la Tersane kon unos presios mui altos, i esto entregado en Samokov i Pazardjik i por sus kovramientos ke ejos ja tomavan las havales, por los Vilaetis ke ejos lo kerijan i ke fin lis deskaivan sus pagamientos ke i ejos lo tomavan a pagar kon taksites, era ke ejos ja enkasavan la moneda de mas antes, i ansi foe ke ganaron tambien muntcha moneda en esto i ke ja lis konvino a darles i fiero de los ke ejos los tenijan porke la vendita se izo mas karo de el presio de la plasa,

                        En este anio foe dekurado el S-r. Mochonatche kon el nichan MEDJIDIE? de el Sultan de la koatrena klasa, i en mizmo tiempo  tambien foe i nomenado, kon ferman aparte por, Haham Bachi Vekili de las sevdades de Kiostendil i de Dubnisa, ke al presipio, para meldar el ferman de el nichan, li vino el kaimakam de la sevdad, akompaniado de su sekretar, i el Dajan kon 2 azas, de su medjlich, a la kaza de el S-r. Mochonatche, por meldar el ferman, i enkolgarle el nichan en la petchadura, de la parte siedra, i estando todos en pies,

1375  Biografia de S-res Mochonatche, Davidtchonatche, Naimatche i Chemoelatche  1873

propio el kaimakam meldo el fermana i li enkolgo el Nichan i lo saludo en nombre de el Sultan, i lo jamo Mochonatche Efendi, i denpoes si asentaron todos i los adulsaron, kon modos de kahves i dulses i cherupes, i tchebukes de la prima gala, kon los takumes de el kelebar fino en dejamantes, i a la notche lis izo una soare (daavet) en kombedando tambien i a otros begis, i los notavles de la sivdad, kon los modos de las komidas i de los dulses a la turka ke esto ja lo tengo eskrito, i komieron i bivieron todos mui kontentes, i a la manijana lis bolto a todos estos visita, i denpoes ke ja pasaron unos koantos dijas, si foe tambien i a Kiostendil i Dubnisa, ande los kaimakames porke meldaran i ejos los fermanes, para ke lo konoskan por HAHAM BACHI VEKILI?, ke de mizmo i kon estos kaimakames foe sigun esto de Samokov, i lis rogo en mizmo tiempo por ke los meraran kon boenas karas a los Djidios, de todas las 2 sivdades, i ejos tambien li prometieron de azerlo sigun de sus uvligo, i ke en kavso menesterozo ke ja si lo azen saver por todos los menesteres por goadrar los enteresos de los djidios, i ke este en su repozo, i en todas las 2 sivdades estuvo a 2 dijas, ke en Kiostendil estuvo en la kaza de H. Davitchon B. Moche i en Dubnisa en la kaza de S-r, Mochonatche Asseo, i en todas las 2 sevdades los djidios lo resivieron kon muntcha onor, i todos lo vijitaron, i li izieron daavetis, ke i a ejos tambien los akavedo sigun de loke si devijan komportarsen seja enfrente de los Turkos i ansi i de los krestijanos, i mizmo ejos los djidios, i se en kavso arivaran en algunas deferensias seja entre ejos komo tambien i kon

1376  Biografia de S-res Mochonatche, Davidtchonatche, Naimatche i Chemoelatche  1873

las otras nasiones, sin por nada travarsen i sin tadrar ke si lo agan saver, ke el ja los tiene de protejarlos, i en mizmo tiempo el lis resento algunas deferensias ke tenijan de Kolel entre ejos, i en mizmo tiempo lis reglo el adelantamiento de la echkola, i mui kontente de todas las 2 partes el si vino a Samokov,

         I pasando poko tiempo, el S-r. Mochonatche vino de resivir en un dija muntchos telegrafos i kartas de los djidios, seja de los notavles komo tambien i de el poevlo, todos de Kiostendil, en asiendole saver kada uno de su manera en el grado tanto pirikolozo, ke si topavan sovre ke si lis etcharon los kristijanos ensima de ejos harvandolos i maltratandolos i rovandoles de sus bienes, kon enkulparlos, ke si rovaron a un ijiko krestijano, por tomarle la sangre para sirvirsen de ejos sigun la ALILA, ke etchan a los Djidios, i anke ke ja tomaron las mizuras todas vija la polisija ma era ke non estava tambien pudiendo ajudarlos en nada, i ke mui presto si foera, por tomar las mezuras i delebrarlos, i sin tadrar partio el S-r. Mochonatche de Samokov, por Kiostendil, i en mizmo tiempo li telegrafejo, seja a el Mutesarif Pacha de Sofia komo tambien i a el Vali Pacha de Rustchuk, en rogandole por ke tomaran i ejos presto las mezuras, kon dar los ordenes a el Kaimakam de Kiostendel las mas foertes ke podijan ser, por goadrar el repozo, sigun ke ja es savido a todos por ansi koza ke non exesto ni ke tiene de existar en los djidios, a servirsen de sangre omana, i ansi foe ke todos los 2 Pachas mizmo i antes ke arivara el S-r. Mochonatche a Kiostendil todos los 2 Pachas,

1377  Biografia de S-res Mochonatche, Davidtchonatche, Naimatche i Chemoelatche  1873

ja li telegrafejaron a el kaimakam dandole los mas foertas ordenes i sigun de la manera ke si devija komportar, i S-r. Mochonatche tambien ke ja arivo era ke lo azijan kon bien apretar a los krestijanos i ejos los krestijanos a dingun presio non si konvensijan de los presipios, i defendendosen kon la razon ke las 2 mosas ke tenija H. Davitchon ke eran krestijanas lo deklaravan en diziendo ke ejas vieron, koando trucheron a una krejatura tapada la boka, i denpoes ke vino un djidio, kon una barva ke tenija blanka, i lo degojo, i a ejas denpoes las ketaron a la kae, i por esta ditcha IDUD, de estas momas, el kaimakam lo izo las ensero, i las amenazo en diziendoles, ke si en kavso non dizes la verdad, ala ora las va a detener enseradas 10 anios, i ke deven de deklarar ken es el ke las enbeso para  ke digan ansi, i visto a estos amenazos ke ejas ke si espantaron, atorgaron todas las 2 momas, diziendo ke el Tchorbadji, lis djo a 2 bechlikes a kada una, i las enbeso por ke digan ansi, i ejas foe ke si enganiaron i dicheron, i el kaimakam a delantre de las 2 momas lo jamo a el Tchorbadji, i li dicheron las momas, na tomate los bechlikes ke mos dates, i por ke foe ke mos enganijates en una koza ke no lo vimos i a el tchorbadji lo metieron en prezo, ke estuvo komo un anio en serado, i lo uvligaron por ke lo deskuvriera a el krestijaniko, ke lo avijan eskondido, i ansi foe ke si akajo la koza, ke esto todo lo izieron los krestijanos por el selo ke lo tienen kontra de los Djidios a razon ke estos ultimos foe ke en este anio avijan enpesado a avrir mas muntchos djidios butikas seja en la sivdad komo tambien i en los

1378  Biografia de S-res Mochonatche, Davidtchonatche, Naimatche i Chemoelatche  1873

kazales, i tambien ke ja estavan mas liberos, i espantandosen de la konkorensia, lis paresio de azerlo esto, i mas tadre ke koando ja estuvieron el ijiko kon su madre de delantre el kaimakam, i todos los 2 en jorando li dizen a el kaimakam, ke arazon ke los amenazaron i ke lis dicheron ke los ivan a matarlos, i ke estavan eskondidos en una de las kamaretas sikretas de la klisa, foe ke lo izieron esto, i el-S-r, Mochonatche de loke si avija mui muntcho sikilijado, estuvo unos koantos dijas hazino, ke esto turo komo 15 dijas, fin ke si reglaron todos estos atagantos, i denpoes S-r, Mochonatche se vino a Samokov, mui gustozo de esto ke ja pudo, reuchir, en todas sus defensias, i mas non si avlo de esto i los krestijanos eran mui avregonsados, ma los djidios non lis avlavan,

            Estas  kozas mos enbeza ke la verdad es de non azerse sirvir el Djidio de mosa seja ombre komo tambien i mujer ma esto ke ja esta espandido agora en general en todos los djidios, por ke non topan a los mosos djidios, ni menos ke los sierven, anke menesterozos solo ke podija ser de ser algo travados de ejos, ke kada uno ja lo atina, ke en aserkandose el Pesah, ejas ja si enpesan a espantarsen i va a ser mijor ke lis den a komer pan i non la massa,

          La kaza de Kostan era ke lavorava de mizmo ke de los otros anios, solo ke en este anio ejos era ke azijan las operasiones de la borsa mas grandes, i esto lo mas muntcho a levre, i a sumas bien redondas, en deferentes fondos, ejos tambien echpekolijavan en los kambios de merkar i vender londras i frankos i florinos por los

1379  Biografia de S-res Mochonatche, Davidtchonatche, Naimatche i Chemoelatche  1873

tiempos ke los topavan, i para esto ejos se prevalijan de las sumas de 300,000 fr. a la semana a paris, ande S-r. Kamondo, ansi de mizmo i kon las merkidas de las havales ke lo mas enportante davan las foersas en esto, a razon ke ja lo resentaron mui bien este etcho, seja en la merkida komo tambien i en las venditas i estas ke ejos las enkasavan ke kon todos los Pachas ja tenijan mui bien las relasiones,
En Samokov ejos merkaron en este anio tambien aparte de los hachares i los sahtijanes de el deredor de Samokov entero, i anke foeron los presios mas karos de el anio pasado, i aparte resentaron a resivir las monedas de las kachas de los mutesariflokes de Sofia i de Filibe, i darles polisas por Kostan i de Kostan azijan i traer ordenes, de el malie por las monedas ke entravan de los komertchos, de estos lugares por ke si les entregara a ejos, ke era solo en midjidijes blankos, i tambien lis davan polisas por kostan, i las ganansias de todo esto era a penas de a 1 % ma ja era bastante porke ja eran sumas grandes,
S-r. Davitchonatche, ke tenija edeja de non entrar en etchos grandes, seja en kostan komo tambien i en Samokov, era ke por esto ivan tiniendo en kada tiempo deferensijas entre los ermanos, i anke ke ja li ivan diziendole porke en todas las operasiones, ja lis eran mui bien favoravles, ma non li era bastante i muntchas vezes si lis rebivijan i litigas, i esto non lo tomavan nada en mano solo era ke lo ivan kontinuando, ke S-r. Mochonatche li dizija ke el non si espantava, i sigun ditcho ke ja ganavan por koalo ke non engrandisian

1380  Biografia de S-res Mochonatche, Davidtchonatche, Naimatche i Chemoelatche  1873

ainda koanto podijan, todo esto ke si lis prezentava, ma el S-r. Davitchonatche, se Jevava por edeja, ke una ves poeden i boltar los etchos, i topandosen enkachados en mas grandes sumas, podija tambien i aver i grandes las piedritas, ma non era eskutchado otro ke ivan kontinuando, i estavan reuchendo,
En kaza era ke todos si komportavan mui bien, i de mizmo i M. Rahelutcha, mujer de S-r, Naimatche, era lo mizmo i era mui bien vista seja eja komo tambien i sus krejaturas, solo ke eja era mui abatida de esto ke estava siempre bekijara, ansi i sus ijas,

                En este anio de 5634, li merkaron los 2 tchiflikes en Kiostendil de S-r. H. Davitchon B. Moche, i se los izieron a el nombre de M. Rahelu mujer de S-r. Naimatche, por razon ke H. Davitchon non kijo ke si supiera ke esta vindiendo, i tambien ke si goadrava, muntcho de el Mehmed AA, i por koando es ke lo iva a saver el Mehmed AA, estava aparejado para dizirle, ke a el nombre de todos sus Ijos ja lis izo Tchiflikes, i agora ke estos los va a pasar a el nombre de la Ija, i la razon ke si los vendjo, foe porke sus Ijos, tomaron parte en el beilik de NICH, i tambien ke su Ijo el grande H, Behoratche, ke estava siempre en eskopia, foe i el tambien ke en este anio merko sumas grandes, de Hachares, en Eskopia, i la anjada ke lis foe tanto negra, i ke pidrieron a sumas grandes seja en el beilik de Nich

1381  Biografia de S-res Mochonatche, Davidtchonatche, Naimatche i Chemoelatche  1874

komo tambien i en los hachares de Eskopia, i para esto ke tuvieron el menester a sumas grandes de moneda, era lo todo ke la travavan, de la banka Arie, de Kostan, sigun ke ja lo saven ke S-r. Naimatche era Jerno de H. Davitchon, i para ke si li alevjanara la devda lo izieron de merkarle estos 2 Tchiflikes kon unos presios mui altos, ke eran tambien Bachtinas, estos tchiflikes, i a razon de estos ke ja los tomaron era ke foeron i mas ansi tchiflikes merkando seja en Kiostendil komo tambien i en Djuma, de los turkos ke los ivan vendiendo, i lo todo tambien eran Bachtinas, i lis traiva boenos venidas
En este anio si frago S-r. Chemoelatche, una kaza ke la koala es ke esta i oi, biviendo en eja, i denpoes ke ja estuvo pronta, si salio de la kaza, ande morava su S-r. Padre, i se pasaron Djuntos kon su S-ra Madre, a la kaze moeva, kon ke li pagavan los otros 3 ermanos a S-r, Chemoelatche, por el mantenimiento de sus S-ra Madre, i el S-r. Davidtchonatche, se vino a esta kaza, i estuvieron, djuntos kon M. Rahelu, i komijan en una meza kon ke li pagava, tambien i S-r. Naimatche, por el mantenimiento, de su mujer i sus krejaturas, a S-r. Davitchonatche, i tenijan las kamaretas apartadas.
sigun ditcho mas antes ke S-r. Davitchonatche era ke siempre, lis era kontra ande sus ermanos por los etchos ke azijan ke el si espantava, i ke foe entre ejos kada dija letigas lo izieron, de kortar los kontos, i se meraron bilanso, i en este tiempo mizmo por los etchos ke si azijan ja non tuvo mas parte el S-r, Davitchonatche, seja en Samokov komo tambien i en Kostan, otro ke a el presipio

1382  Biografia de S-res Mochonatche, Davidtchonatche, Naimatche i Chemoelatche  1874

li dieron los mulkes, ke ja estavan previstos de la espartision de 5630, ke tenija el jokari maaden en Kiostendja, i el medio Tchiflik en la bana, i ansi tambien i los otros mulkes i era ke si lo merava el por si aparte, i para el maaden i el tchiflik, ke el no lo podia solo merarlo foe ke si tomo a un molla, i lo iva enkamenandolos, i por moneda koando tenija el menester era ke iva travando de la oda, i kon la kaza sigun ditcho ke lis kedo en hevra kon S-r, Naimatche, ke esto tambien foe ke si la merko S-r, Naimatche mas tadre, porke el siempre si konjorava, i siendo ke i kon esto non li abasto i por non tener litigas, li kalio a M. Rahelo ke si apartara i de la meza i komija aparte, ansi i kon las kamaretas i non tener la ilaka, i estavan todos los 2 aparte i kon esto ja si kontento, i en este tiempo tambien si espartieron i lo poko de la mobilija ke la tenijan por espartir ke avijan ainda komo platas kovres, tchibukes oras espejos, mezas i sijas, ke lo todo lo ivan arteriando i la mas grande partida la merkaron los otros ermanos, ke S-r, Davitchonatche non kijo, seja por ke el ja tenija, de la kaza de Haseki Suleman AA or seja ke kijo en moneda, koanto a la djuja, foe ke non si espartieron, porke la tenia sus madre, i eja mas tadre la foe dando, eja a ken lo kerija i a S-r. Davidtchonatche, non li djo, nada, i kon las platas foe por un jero, ke li kedaron sovre S-r. Davitchonatche, las hanokijas i algunas otras tchikas kozas, i el si merko denpoes un serviz de plata, por el presio de 2500 fr. koanto a los paitones kavajos, boejes, i karos ke tenijan, lo todo si lo tomaron sus ermanos si entiende kon moneda,

1383  Biografia de S-res Mochonatche, Davidtchonatche, Naimatche i Chemoelatche  1874

i li davan a el su parte, i M. Rahelu, en este tiempo, ke non era koza de poder bivir en la kaza al ke ja estavan aparte, i siendo ke estava siempre jorando, li kalio ke si foera a la kaza de S-r. Mochonatche, fin ke si resentaron ke lis turo mui longo tiempo, ke visto a el karakter, de su ijo, S-r. leon, en el tiempo de agora es ke lo de su padre ja es oro, i de djojas las mas presiozas, i mas tadre el si merko, un brachov, kon unos kavajos blankos mui ermozos, i kon estos kavajos el los servija i para el etcho de el maaden i tambien i los kochejava, koando se iva a el tchiflik i otros lugares,
En este anio foe ke los dekuro el Sultan a todos, los 2 ermanos a S-r. Mochonatche, kon la rutbe de la tresero klasa, i a S-r. Davitchonatche, kon la rutbe de la 4 klasa, keri dizir ke es dekurasion militer, i se lis alesensija de poder jevar, vistidos kon paletas^[24], jakas, mangas, i en la petchadura lavorado, kon klabedon i en los pantalones, un chirit, de klabedon, i kon estos vistidos es ke tienen el deretcho de enkochakarsen i la espada, i koando se azen paratas, seja ke el Sultan sale a algunas manevras i tambien por en kada viernes ke el Sultan sale a la mechkita i ke si aze mui grande parata de saltanat, ke para esto el program se aze de antes koalos rutbelis ke deven de akompanijar a el Sultan ke es en kada ves a los unos i estos kale ke si vistan de los vistidos ditchos i kavajados en kavajos ke ja si lis dan de el palasio, es ke kaminan adelantre, i kon esto tiene la libertad de entrar i salir en todas las admenestrasiones, i demandar todo loke lo kerlan, sigun ke lo tienen i los

1384  Biografia de S-res Mochonatche, Davidtchonatche, Naimatche i Chemoelatche  1874

personages mas grandes i sovre todo tenijan tambien i el deretcho de demandar i empeigos esto ke lo poede reintchir, ke por esto foe etcho sigun de los nichanes,

               En Kostan la kaza de banka ke tenijan, era ke kontinuava, en sus operasiones, ke las azijan i de mas antes, seja en los fondos, komo tambien i en otros, i el koredor sovre las operasiones, de las merkidas i venditas de los fondos era el S-r, M. Nahum, ke el koal era un ombre, mui chakadji i muntchas notches los kombedava, en sus kaza, para ke pasaran la ora, i savija mui ermozo kantar, ansi de mizmo tenija ermanos i ermanas, i ijas, ke todos eran mui grasiozos, i mui boenos kantadores, ke i jo tambien tengo muntchas veses estado en estos kombites, ke es la verdad mui plaziente, porke de los djuegos ke asija, era la notche entera ke non kedavan lados de estar ariendo, i siempre dandomos, los modos de los vinos i otros bevrajes a bever i muntchas frutas, i de los dezajunos, anke li kostava muntcho gaste esto, ma non li enportava, porke loke dizija era, ke oi, ke la borsa ja estuvo boena, es ke i mos kale meter i boen depozito tambien i rezervar por los dijas negros de la borsa, ke entonses ja se save, ke es, pan seko, i agoa sin buz i vistido arazgado, ke un bersijano a la parte non poede meter solo ke loke kome i beve es ke li poede kedar, ke esto ja es lei,
En kaza las mujeres, pasavan lo mas mijor ke si poede pensar, ejas de un dija mas antes, ja si prontavan lugar de sus pasatiempo, ke si rekojijan todas las mujeres, de la familija kon ke si

1385  Biografia de S-res Mochonatche, Davidtchonatche, Naimatche i Chemoelatche  1874

azijan traer tambien i a las dadas hanendes ke ja lo tengo eskrito ke eran las ke savijan azer areir, ke las kazas de la familija Arié entera ja eran vizinas las unas a las otras, i loke vinijan en un lugar era siempre denpoes de las medio dijas, a razon ke fin a la medio dija ejas lis kalija ke kudijaran las kazas i dar los ordenes a sus gizanderas, por el prontamiento de la komanija, ke non era ke gizavan en kada dija otro ke por el envierno era a 2 vezes a la semana, i por el enverano a 3 veses, i los gizos, eran lo mas muntcho de komidas de kezo, i modos de los dulses, lo todo kon manteka freska, ke la azijan en kaza i tambien ke ja lis vinija de las jailas, esto era por los dijas, i por las notches era siempre las komidas de karne, i el presio de la karne era a 2 gr. la oka, la manteka a 5 gr, la oka, i a este konto era todas las komanias, en kaza koando batijan las mantekas ke ketavan mui muntcho airan, non avija ken ke si lo biviera todo era, ke lo ivan mandando, a las mas serkanas parientes las amigas i tambien a las menesterozas, kon kalderas jenas kon ke lis metijan tambien i a un tuo^[25] de manteka freska ke estava nadando, en la kaldera, para ke bivieran ke esto lo azijan en kada sigundo, dia porke ja era ke en kada dija ja lis sovrava, de loke mondjijan en kaza a 6 i 7 okas de letche, i esto aparte de loke koajavan los jagurtes i kezos freskos, ke esto mo los ivamos komiendo por freskuras, ke era lo todo fresko i antes de salarlos, ke de los kezos sin sal era ke azijan los modos de los dulses, i en kada demanijana era por dezajunar ke komijamos los kezos sin sal i las mantekas de mismo i

1386  Biografia de S-res Mochonatche, Davidtchonatche, Naimatche i Chemoelatche  1874

los aeranes beverlos en lugar de agoa, esto todo era de las letches de las bufanas, ke tenijan un delgado goesmo de misk, i de las vakas era solo para beverlas ke eran las letches mas flakas, i ejas por el enverano siempre estavan asentadas, en los tchimenis kon metersen las ermozas chiltes de lanas i de algudones a debacho, ke eran enfrente de las ermozas goertas, de las mijores rozas, de goezmos i sin goesmos, i los chadervanes soltando a miles de agoas, ansi i los tchoros de las hoentes, i al deredor todo de ermozos arvoles de las frutas i sin frutas i de rozas, i anke ke ja los tenijan seja los kanabes i las sijas, i los fotolios, ma torna era sus plazeres de asentarsen ensima las jerbas, i los pasatiempos era lo mas muntcho en las goertas, i esto lo azijan fin a koando ja si eskondija el sol i se ivan kada una a sus kazas, i esperavan a sus maridos, por ke i ejos tambien mas tadre de 12 la ora a la turka non si kedavan, en el tcharchi ke todos ja seravan, porke ja era espanto de estarsen en el tcharchi koando ja era de notche, i si estavan en kaza, ke lis aparejavan en una banketika, komo 50 or 75 dramas de raki kon los modos, de los mezes, i se lo ivan biviendo a vaziko a vaziko kon ke davan i a todos los de kaza, i esto lis turava fin a 2 la ora a la turka, i en este tiempo era, ke si ivan kontandosen de los unos a los otros de esto ke lo pasaron entre el dija, i tambien i algunas moevas de la sevdad, i denpoes era ke metijan la meza i komijan por la notche, i bevijan a 2 i 3 vazikos de vino a kada uno ke seja el raki komo tambien i el vino ja lo tenijan en kaza de anio a anio, i denpoes de

1387  Biografia de S-res Mochonatche, Davidtchonatche, Naimatche i Chemoelatche  1874

esto era ke se ivan kada uno en su kamareta por durmir, i se lavantavan demaniana, la ora 9 or 10 a la turka, i metijan el mangal de delantre i bevijan a uno i 2 kahves i esto los aidados ke los mansevos era las letches, i mantekas, i los kezos, i esto era ke lis turava komo a 2 oras i denpoes era ke si ivan los ombres a el tcharchi, i las mujeres kudijavan i resentavan la kaza lo todo denpoes ke los ombres ja si foeron ke fin a el tiempo ke los ombres estavan en kaza, era ke i las mujeres van a estar kon rjos [ejos], .

            En el anio de 5635, el S-r. Davitchonatche, si estava en la oda de sus ermanos, anke los enbroljava, i non li avlavan nada i siempre buchkando kon grandes eskolkamientos, a enderetchar sus kontos foe en este tiempo ke li dicho su ermano ke esto es DIGDUKE, de ANIJUD, el adetras de esto dingun etcho por su konto en este tiempo non izo, era solo ke si okupava, en el maaden i el tchiflik, i de los etchos ke si azijan en la oda, el non tenija dinguna parte, porke no kirija, era ke los 2 ermanos S-res Mochonatche kon Chemoelatche, ke estavan en Samokov era ke kontinuavan siempre sin ke nada dechavan atras, de todo esto ke si lis prezentava, ejos frekontavan muntcho a Sofia, ke el Mutesarif, era en este tiempo, Mahzar Pacha, i el koal lis era mui amigo, i los ajudava en todo loke demandavan, foe en tiempo de este mahzar Pacha, ke S-r. Mochonatche asija ketar a muntchos

1388  Biografia de S-res Mochonatche, Davidtchonatche, Naimatche i Chemoelatche  1875

empeigados de el governo, por koando non li azijan su voluntad, i azija nomenar los ke el los kerija i ansi era ke todos los empeigados, si espantavan de el i lo katavan mui muntcho, i en kada 2 or 3 semanas era ke S-r. Mochonatche se iva a Sofia por vejitarlo a Mahzar Pacha, i kon estas vijitas el era ke eskapava muntchos de sus etchos, i en muntchas notches lo kombedava a su harem, ke komijan i bevijan juntos porke el Pacha tambien era i boen bividor de los alkolikes, i el tenija en su harem 15 djaries, (eslavas) por ke lo sirvieran a el i a su mujer, i todas eran merkadas kon moneda, mui karas, de estas ke las venden en el kavkas, ke son las mas ermozas ke podia ser, sovre todo i mui savidas en unas koantas linguas, i tambien ke konosijan kada una djugar en una manera de los enstromentos de los tanies de muzika, i era ke si las tomava delantre i le ivan kantando i aparte tenija tambien i esklavos, HADUMES, ke esto ja lo tengo eskrito sigun eran para ke podieran estar en el harem, el tenija muntchos paitones i kavajos, i mas todo el menester de un Pacha, i el gaste ke azija a el mez era de 30,000 gr, a tiempo ke su paga ke resivija era solo 17500 gr, a el mez, sigun el dizija era ke 100 okas de sukaro kerija a la semana, i ansi lo restan, ke por tapar estos gastes era ke si avija resentado kon todos los bankeres ke lis tomava komision de los etchos ke lis eskapava, i koando esto non avija era ke si enprestava, ke i jo tambien li tengo enprestado 70 liras porke i jo ke vinija a Sofia seja por havales komo tambien i otros, etchos era ke mi resivija kon mui grande onor, i me dava tchibuk i kahves,

1389  Biografia de S-res Mochonatche, Davidtchonatche, Naimatche i Chemoelatche  1875

i siempre mi demandava se i jo tenija kozas de demandarli i ke non me travara, i ansi era ke todo loke mi demandava ja mi lo azija, i koando venija a Samokov era ke i mozotros li azijamos daavetis, de gala, i li plazija mui muntcho, i se alavava de toda moestra familija en todos los personajes grandes el Pacha era un ombre mui savido i mui entelejente, i lavorava muntcho sin kansarse, i todo el ke si li prezentava lo resivija kon boena kara i lo sentija, i este foe el ke entrego las javes de Sofia a los rusos koando vinieron en 5638, i de Sofia si foe a Kostan i lo nomenaron por CHEER EMINI,(grado [gradski] natchalnik), de la sivdad de Kostan, i en el tiempo ke foe en esta mision  el vendjo todos los mezarlikes (semitierios) ke avijan arientro de la sivdad, ke eran unos kampos mui grandes i los vendjo todos por kazas i plasas moevas ke si avrieron, i tomo kon miliones de liras, i era ke la iva ermozejando la sevdad, i S-r. Naimatche ke ja estava en kostan era ke eskapava muntchos etchos vija de el i ganava tambien i el muntcho, i este mos dizija koando estava en Sofia ke el kerija ser 24 oras Malie naziri, (Ministro de las finansas,) i el ke savija komo asigurarse seja la vida suja komo tambien i estas fin a el tatara i inieto, ma non lo izieron, i de esto tambien non era poko, ke ja es komo medio Cheer emini, de las finansas,
En este anio lo espozo S-r. Davitchonatche, a su Ijo, el grande S-r. Haimatche, kon la ija de S-r. Mochonatche, M. Regina, i si konvinieron ke li iva a dar por kontado 200 lira en konsolites, fondos turkos, i achugar a su onor, kon kavesera de Viena, ke izieron

1390  Biografia de S-res Mochonatche, Davidtchonatche, Naimatche i Chemoelatche  1875

el espozorio kon muntcho saltanat, sigun ke ja lo tengo eskrito la manera ke lo azijan, kon ke estuvieron la familia entera a komer kon las komidas, i los vijitaron la sivdad entera, i se gustaron i se alegraron de todas las 2 partes, i en el tiempo ke estuvieron espozados se mandavan todas las dulsuras i los preszentes de parte a parte i seja las mujeres komo tambien i los ombres era ke siempre si vijitavan, i koanto a el kontado, ke dicheron 200 liras en konsolites, non lo aklararon se era, 200 konsolites ke le iva a darle or 200 liras en konsolites porke el nomenal de una konsolite ja era una lira ma loke valija era 44 gr. ke de parte el novio lo entienden 455 konsolites i de la otra solo 200 konsolites este mal entendimiento uvo kistion ke en la boda foe ke lo reglaron ma mi parese ke li djo 200 konsolites, solo, i mas non si supo,
En la kasa de banka de Kostan, era ke kontinuavan de mizmo sigun i de los otros anios, en sus etchos, i S-r. Naimatche ke non podija dechar la oda, sola, por poder vinirse a Samokov alguna tiempo serka de su mujer i krejaturas, i era ke todos los 2 estavan siempre solos, i bevijan de todas las 2 partes mui deskontentes, solo por esto ke eran bekoares, anke ke ja eran mui vistos seja su mujer en Samokov komo tambien i el en Kostan, torna kon todo, de todas las 2 partes joravan a las solas, era ke muntcho pensava S-r. Naimatche por jevarse a su familia a Kostan ma si espantava de avrir kaza, pensandose non seja ke li kostarija mui karo, ejos lo engrandesieron muntcho las operasiones de la borsa, i lo mas muntcho ja tenijan los

1391  Biografia de S-res Mochonatche, Davidtchonatche, Naimatche i Chemoelatche  1875

boenos afitos, i ejos tambien foeron enprestando muntcha moneda, a los Pachas i personages enfloentes, ke kon esto los azijan mudeim^[26], (sotometidos) por poder eskapar mijor sus etchos, ma era ke algunos de estos en okasion ke lis demandavan mas ke lis dieran ainda moneda i ke mas ja non lis kerijan darles lo azijan ke lis venijan kontro en algunas kozas, i de esto ke non lis davan era ke non podijan reklamar i esto ke ja les devijan, ni menos ke los podijan darlos a el djuzgo, solo ke de algunos lis ivan tomandoles algunas djujas i mobilijas i otras kozas kon unos presios mui karos, i ejos las ivan vindiendolas kon los presios baratos solo por dezbarasarsen, lo mas muntcho era el S-r. Jechaja Adjiman ke es el derektor de la banka de S-r. Kamondo, ke los akonsejava, i los enbezava de la manera ke si enkamenaran, ke el koal los kerija muntcho bien, i se los asija solo por amistad sin ke tuviera dingun entereso, el mesmo lis revedijava [revizava] los livros, i les avrija kreditos en muntchas bankas solo por plazer i el lis merkava a sumas grandes de frankos por paris koando non topavan a vender en la plasa, ke lis arivo un tiempo ande tenijan el menester de vender kambio sovre Paris fin a un milion de frankos en kada semana, i en frentante merkarlos ke ansi eran estas operasiones por los prevalimientos de akejos tiempos, i ansi era ke muntchas semanas travavan grandes apretos, fin azer las venditas, ke si kerija la moneda para merkar los, anke ke ja lo podijan i de algunas bankas merkar i a fijado ma era ke por la semana venidera se iva a kerer a 2 miliones, i todas estas operasiones si azijan por 3 mezes, ke ja uvo tiempos ke non topavan a merkar los frankos lo azijan ke merkar

1392  Biografia de S-res Mochonatche, Davidtchonatche, Naimatche i Chemoelatche  1875

londras, i las mandavan a paris por ke las negosijaran, por sus kontos i de esto non tenijan konvenensia, ma lis kalija a toda vija ke remetieran, por ke son [non] si lis protestara,
Sus S-ra Madre ke estava kon S-r, Chemoelatche, era mui bien kontenta de la suja boena pasadia, en la kaza de S-r. Chemoelatche, porke la meravan mui muntcho boeno, eja ke ja era mui nekotchera, i mui avansadera, non si dechava en nada servir, ke non li enbarasava de irse eja mizma a la kozina i tomarse koalo li premija, i Beju mujer de S-r. Chemoelatche, seja por ke tenija krejaturas, or ke parija era ke lo kudijava lo todo su Madre, en todos los moadim los primeros dijas ke era el uso de la familija de vijitar a el mas viejo de la familia era ke todos mos rekojijamos en su kaza, porke eja era la mas vieja de la familia, i se gustava mui muntcho, eja era una mujer mui meujuda i mui entelejente i mui fursuda, era de poerpo alta, i non godra, eja fumava muntcho tutun i se mantenija boeno era mui sana, i en kada demaniana en el dezajuno bevija a un vaziko de raki, i denpoes de la medio dija komo non li iva denguno a vijitarla lo azija ke se iva eja ande una de la familia, i las mandava a jamar a todas las mujeres de la familia, por ke si vinieran a la kaza ke eja estava, i todas ja era ke li ivan i ansi lo pasavan, todas eja era mui amoroza de las goertas i las azija sigun ke lo kerija,

1393  Biografia de S-res Mochonatche, Davidtchonatche, Naimatche i Chemoelatche  1876

              En el anio de 5636, S-r. Davitchonatche, lo kazo a su Ijo, el S-r. Haimatche, kon M. Reginutcha, Ija de el S-r. Mochonatche, ke ja estavan espozados, i izieron la boda, kon muntcho, gusto, i la novija ke ja trucho muntcha achugar, i muntchos prezentes ke trucheron tambien i por tchalgi a la trupa de Vasilaki, konosida ke ja era mui alegre tchalgi, i toda la familija, seja los ombres i komo tambien i las mujeres, estuvimos la boda entera, ke uvieron i muntchos kombedados, seja en la primera notche komo tambien i en las otras notches i los dijas, i koanto a el kontado, sigun ke ja lo eskrivi ke avijan avlado, por 200 liras de konsolites, esto resto ansi ke S-r, Davitchonatche non si kontento a tomar 200 konsolites, por 200 liras, i non las tomo, en el tiempo ke izieron la boda, otro ke lo decharon por mas tadre, i de esto foe ke li vinieron las primeras jelores a el novio, kontra de su esfoegro, i a esta kavza eran ke si lis rebevija en kada tiempo jelores en los moevos kazados, ke koando si avria kistion de el kontado era ke S-r. Mochonatche si defendija diziendo ke esto era su trato, i su jerno li dava kechas, i ansi era ke lis salija el etcho a litigas, i sin ke torna lo aranjavan, i muntchas vezes su esfoegro si li aravijava, anke ke S-r. Davitchonatche non era kontente ma non tenija koalo azerli a su ijo, ( esto mos enbeza ke non kali fin alkavo meter kapritcho, ke por todas las 2 partes esto ja era komo una nada, ma es ke por esto si dize ke una paja detiene un molino, i a los kavos foe bozdijado este kazamiento, i esto por koalo? kale dizir solo el presipio por esto,) ejos de el

1394  Biografia de S-res Mochonatche, Davidtchonatche, Naimatche i Chemoelatche  1876

presipio ja bivieron mui boenos, ke la novija ja es mui savida i mui meujuda, i a todos los de kaza los katava mui muntcho, eja es mui ermoza i mui meradera de la kaza, non li plazio muntcho kamenar, ke lo mas muntcho goadrava la kaza, eja es sana i proporsionel alta, i godra, konose las lingoas franses i el bulgar, seja el eskrivi komo tambien i el avlar, siempre bivijan en una kaza kon su esfoegra i se konvenijan en los etchos de la kaza,
En este anio li nasio a S-r. Davitchonatche una Ija i la jamaron Furtuna, ke kon eja tambien se izieron todos los uzos de todas las otras paridas, ke li izieron tambien i kama alta ke esto era un grande punto, i la vijitaron la sivdad entera, i todos los parientes li mandaron los platos, seja de las dulsuras komo tambien i los prezentes, i mos foemos toda la familia a komer en el dija de el Chabad, i su madre la kreo i la aletcho,
Foe en este anio ke eskaparon de reglar sus kontos kon sus ermanos de la espartision, i esto kon ke lis kedo tambien i algunos tchikos kontos, por reglarsen para koando iva a venir S-r. Naimatche de Kostan, i se dieron i se tomaron por eskrito todos los dokumentos menesterozos, de todas las 2 partes, i kon esto se salio el S-r, Davitchonatche de la oda, kon ke tomo i un akonto en moneda sonante ke ejos tenijan kondision de pagarle esto ke li revinija en ratas por unos tiempos, a razon ke i ejos tambien las tenijan i de aver, i se tomo una butika a kira ke era vizina a la oda, ke la koala mas tadre se la merko, i enpeso a azer algunos etchos en esta butika

1395  Biografia de S-res Mochonatche, Davidtchonatche, Naimatche i Chemoelatche  1876

ke a el presipio foe buchkando, los averis ke li kaeron de la espartision de sus ermanos, i en mizmo tiempo dava tambien i a algunos moneda kon entereso, i el etcho de el maaden ke ja lo enkamenava de mas antes, era ke merkava tambien i algunos fieros de los maadendjis i se iva el mizmo a Pazardjik por venderlos, i merkava tambien i algo de bechlik por azer saraflik, i siendo ke el era mui flako de energia era ke todo si estava espantando, i tambien ke se iva sintiendo, ke avija solivantamiento, i se deklararon komitos en Panajurichta, era ke se iva estando, rekojido, i todo merando fin a el santim kon el konto de sus ermanos,
Kon la medija kaza ke era de S-r. Naimatche, i en la espartision foe ke la merko de moevo de el S-r. Naimatche, i en este anio tambien li tomo el takrir, a su nombre, i el aparte si merko i otras 4 kazas la una de H. Elija B. Eliezer, i la otra de H. Mochonatche Alkalai, i otra de Djamdji Suliman AA, i otra de un Turko, ke su entision era de darlis a todos sus Ijos a una kaza a kada uno, i eran tambien todas vizinas la una a la otra, i de esta foe solo ke en la una si paso el S-r. LEON kon ke li izo algo de Rimont, i kon las otras non alkansaron a tomarlas, i foe denpoes ke las foe vindiendolas el S-r. Leon, a razon ke ja si enpatrono el de todo,
Los S-res Mochonatche, Chemoelatche, i Behoratche, ke kedaron en el etcho de la oda, ejos era ke kontinuavan en sus lavoro sin dingun trokamiento ni menos mengoar en nada, solo ke el dar moneda kon entereso i el dar a fijado los fieros sigun de antes, lo ivan

1396  Biografia de S-res Mochonatche, Davidtchonatche, Naimatche i Chemoelatche  1876

enmankando, lo todo sigun ditcho de antes a razon de los solivantamientos de los Bulgares i los Sirbos, i tambien ke i la kaime turka ja avija mui muntcho enpesado a pujar, ke esto kavso grandes danios para todas las merkansias, i tambien en Kostan ke azijan las grandes operasiones, en la borsa seja en los fondos komo, tambien i de otros, enpesaron a djugar muntcho los presios, de los fondos Turkos, i a esta razon avian dijas, ke tenijan i algunos danios, ke anke tuvieron i algo de jelores para sus etchos ma ja era ke non si demostravan en nada otro ke al kontrario ejos ivan soltando moneda a todos sus klientes las sumas ke lis demandavan, i sus klientes ja foeron muntchos ke tenijan kontos fin a Bagdat,

               En kaza los gastes foeron mas kurtos, porke non si estava muntcho pudiendo vijajar, ni menos frekontar en las kampanias komo de antes, porke los tcherkezes avijan enpesado a soidejar, a los vijajadores por los kaminos, i a razon de ejos se ivan i adjuntando, i algunos tchpkones [tchapkones] i bandidos, seja de los turkos komo tambien i de los krestijanos, i muntchas notches era ke ivan entrando, a las kazas de los kenares de la sivdad, i rovavan esto ke lo topavan, i los tcherkezes era ke si entravan desmudos sigun ke sus madre los pario, ke esto lo azijan por ke si avrijan algunos peros, era ke non lis gratavan koando estavan dezmudos, i sus kamenado era komo a las mochkas, ke non si siente, i se rovavan kavajos vakas i otras kozas, i ejos ja tenijan sus kompanias, ke el kavajo or vaka ke si rovavan de Samokov, era ke en akeja mizmo notche ja lo mandavan a

1397  Biografia de S-res Mochonatche, Davidtchonatche, Naimatche i Chemoelatche  1876

Plevna, i lo vendijan presto, i ansi lo azijan tambien i estos ke rovavan de plevna i lo traivan a Samokov tambien era ke presto ja lis konvenija a venderlos en el presio ke lo topavan, ke sus etcho i negosios era solo el rovar, aun kon todo ke ejos ja tenijan sus kampos para arar ke el governo Turko lis aparto kampos i lis djo boejes, i moneda i lis dava tambien i sus mantinimiento a la artura, ma torna kon todo non lis era bastante, ejos kon los bulgares kazalinos non si avenieron, i algunos de ejos ja avijan i boenos ma los mas muntchos eran ladrones, i kon las lingoas ke ejos la avlavan non uvo dinguno ken ke si podo enbezarse, ansi ni menos ejos si pudieron enbezarsen dinguna de las lingoas ke si avlavan en el paiz, ke todo loke si davan a entender era kon terdjumanes i desenias^[27], i koando vinijan los kazalinos a konjorarsen ande los kaimakames ke tal tcherkes li rovo seja el kavajo or la vaka, ja era al punto ke lo jamavan a el Tcherkes i loke dezija era ALAH BILIR BEN DA BILIR SEN DA BILIR,^[28] keri dezir ke el DIO, i el kaimakam lo saven i el kaimakam li dizija ke el DIO, i to ja lo save ke ja ti lo rovates i jo ja lo se por mui siguro tambien ke ja ti lo rovates i ja si lo tomavan ma ala notche ja era ke torna si lo rovavan, a muntchos ja los enseravan ma non ganavan nada porke i de la prezion se fuijan, sin ke los vieran.

1398

       Asta aki si eskapa la partida de el tiempo foeron Haverim todos los 4 ermanos Ijos de Tc. Jeuda, i de este anio 5636 ke ja si espartio el S-r. Davitchonatche, i restaron solos los 3 ermanos ke son S-res Mochonatche, Naimatche, Chemoelatche, kon ke si renovaron sus hevra kon kondisiones ke si izieron entre ejos,

Paletas – המשמעות הרגילה בלדינו היא טבלת צבעים, ברם כאן המשמעות היא כותפות, למשל באנגלית Epaulets בצרפתית Épaulettes.