קורותיהם של הסנ' לאון, לוסיין וז'אק, בניו של סנ' דָּוִיצ'וֹנָצֶ'ה

1607

De aki i endelantre kontiene la partida de los

3 ermanos ijos de el S. Davitchonatche, ke son S-es

Leon, Lusien, i Jeaqe, de el anio 5657, fin a el anio

5660-61,

1608               Biografia de S-es. Leon, Lusien i Jeaqe, ijos de S, Davitchonatche.         1897

En el anio de 5657, ke ja estuvieron apartados los 2 ermanos S-es, Haimatche, i Jomtov, i ke kedaron en una los S-es. Leon, Lusien i jeaqe, i S. Leon ke era por lo todo ke el respondija el lo izo ke si tomo notas moevas de sus livros, por kontinuar para adelantre solo los kontos de los 3 ermanos, i de mizmo el lo kontinuava, lo todo, en partidas aparte de esto ke lo tenijan en djuntos,

El ke tenija por su konto aparte, la Hevra kon el aptekar el S. Goinarev, la machina, de la soda, foe en este anio por algunas deferensias ke las tuvieron entre los haverim, lis arivo el etcho a espartirsen, fin ke si lo konvinieron entre ejos, kon ke si resivio, todo el etcho djunto i la machina, S. Leon por su konto, i por la suma ke la tenija esbolsado, el S. Goinarev, si la resivio el S. Leon apagarle, por algunos tiempos, i el ke ja foe agora, de la machina enteramente patron, lo izo ke si frago en su kaza, propia e koala el morava, un lokal para esto, i se merko un ermozo karo de 2 etajes por transportar alos klientes las redomas, de esto i era kon boenos jaes​, i tambien el merko i un kavajo, por este karo, ke mandava tambien i alos kazales deredor de samokov, i kon esto el azija grande la konsomasion, i kon los presios tambien era ke si los vendia mui konvenivle, i por la fabrikasion de esto era el mizmo ke si okopava, anke ke ja tenija el personal menesterozo,

Sigun ke ja lo tengo eskrito, por el bezesten de Sofia ke foe derokado, i ke resto el tereno algo de tiempo en vazio sin

1609               Biografia de S-es. Leon, Lusien i Jeaqe, ijos de S, Davitchonatche.         1897

 fragoarse, kon ke mas tadre ejos se lo espartieron, kon sus tios, los s-es. Mochonatche i Chemoelatche, ke lo enpatronavan a kontra metad, i por vija de los enjenieres, se lo apartaron, kon ke si nombraron koala partida iva a partener ala una parte i koala ala otra, i en la espartision, tuvieron grandes defekoltates i ravias, asta el grado ke en un dija ke ejos si estavan razonando, S. Mochonatche kon S. Leon en Sofia, propio en el lugar de el bezesten, porke S. Mochonatche lo frago mas antes de el S. Leon, i tanto foeron las ravias, ke non lis abasto kon las palavras, i S. Leon ke tenija en su mano, un baston, foe ke lo harvo a su S. Tio, el S. Mochonatche, i afeto tambien i ke si rompio el baston, seja porke era flako or ke ja estava roto, ke para espartirlos lis kalio ke vinieran otra djente, i el S. Mochonatche esto non lo izo kistion, esta asotada kon el baston, otro ke el si akecho, en la kanselaria de el konsolato,

Denpoes de esto ke ja lis foe, komo defenetivamente apartado foe ke S. Leon se decho azer un plan, por fragoarlo la partida sujas, i se konvino kon uno de los arhitektis, por la suma de 20,000 fr. en todo, sin ke iva a tener mas el S. Leon nada a kudijar ni menos darle dingun material, solo ke devija el arhitekt darle las javes en la mano, de todo punto pronto, kon ke fiksaron tambien i un sierto tiempo ke lo devija de fragoarlo, i el arhitekt ke si metio en el lavoro, i en el tiempo fiksado ke ja estuvo pronto, lo kombedo a S. Leon por entregarselo, i S. Leon ke ja vino a Sofia por resivirlo, i pagarle la suma ke li avija restado adever, ma lo vido ke li

1610               Biografia de S-es. Leon, Lusien i Jeaqe, ijos de S, Davitchonatche.         1897

 mankava ainda algunas kozas por eskaparlas, i por esto el non lo kijo resivir, ni menos kontarle i la moneda, i el arhitekt ke ansistija, foe tambien ke tuvieron i algunas deferensias, i siendo ke no si podieron konvenir de afoera, lo ketaron el etcho alos djuzgos, ke i esto tambien mas tadre, si lo konvenieron i se pagaron, seja ke en algunas kozas el arhitekt, lis adjusto i seja ke S. Leon, li djo i algo de moneda ainda mas, i se konvinieron,

S, Lusien ke ja eskapo sus estudios de la medikiria, i ke ja tomo su depluma lo koal foe de el primo rango, i el se vino a Samokov siendo ke el ja estuvo mui kanso de los examenes ke el tuvo era ke unos koantos dijas el non salio ala plasa, ke era a el ke lo vijitavan siempre sus amigos en su kaza, ke pasando algo de tiempo ke el ja repozo, enpeso a salir ala plasa, ande sus ermanos, i entre sus konversasiones ke ejos las tenijan, li dicheron porke iva a azer de boeno si enpesava tambien i a aprontarse, i para dar i el examen menesterozo i en la dereksia de la bulgaria, porke sin esto non si konosijan los medikos para ke pudiera seja vijitar alos hazinos komo i tambien ke li foeran rekonosidas sus ratchetas en las aptekas de la bulgaria, i el ke non konosija de el entodo la lingua bulgara, i li foe mui foerte para azerlo esto, i ansi foe ke non si lo paso ni por el tino para azerlo esto, ke su edeja foe de el presipio, para estabeleserse en kostan, i ansi tambien lis dicho a sus ermanos, i de esto ke non eran kontentes sus ermanos, foe ke estuvieron algo de tiempo anojados, i ke entre otras kozas enpesaron tambien i a tener, i

1611               Biografia de S-es. Leon, Lusien i Jeaqe, ijos de S, Davitchonatche.         1897

algunas deferensias, i esto kon litigas, i en kurto foe ke S. Lusien lis dicho de merarsen kontos i tomarse tambien i el esto ke li revinija, i ansi apartarse, ma foe ke non lo podieron azerlo esto por algunas razones, i el S. Lusien ke ja foe i algo raviozo el non lis avlo mas de esto otro ke el buchko a prokurarse, algo de moneda, bastante para el viaje, i dopo de pokos dijas el partio por kostan, ke en arivando, se adereso ala kanselaria Franseza, en demostrandose kon sus dokumentos, komo de mediko i aparte ke era tambien i komadron i en mizmo tiempo el demando por ke lo nomenaran, i a el por mediko para el echpetal franses, ke avija en kostan, ke esto siendo ke tanto presto non lo pudo alkansar, a razon ke non tenija partido ni dingunas rekomendasiones, ke enfloensavan en esto, i el lo enpeso kon reklames a puvlikar seja en las gazetas i otros ansi avizos, aziendo se konoser, sovre ke era i komadron, i kon esto era ke algunaos lo enpesaron a jamar, i de esto tomava de 8 a 10 liras por kada parto, i esto era ke kon un mez de mas antes li kalija ke foera vijitando a la parida kon ke le iva en 3 i 4 dijas una ves, i le dava tambien i algunas kuras por ke pariera mas kolai, i esto ke non li era bastante i ke ja estava i algo deskorajado, foe en un dija ke el estava en la kanselarija de el konsolato franses, i platikando sovre la suja kistion de esto ke ainda non se li avija podisto resentar su etcho, por entrar en el echpetal anke ke la paga le sirija mas tchika por el presipio, foe ke le dicho el amigo ke platikavan, ke sigun su edeja era ke ja estava ainda sin kazar, i mansevo tan boeno ke ja sos

1612               Biografia de S-es. Leon, Lusien i Jeaqe, ijos de S, Davitchonatche.         1897

 i para ke lo poedas esto alkansarlo, iva aser poede ser boeno, se topavas el molde, ke la demandaras ala ija, de Florans, de Vitales Pacha, el koal ke ja es atache, de kampo de Sultan Hamid, i la ija ke ja es mui boena i mui savida, i Vitales Pacha ke ja tiene grande enfloensa, seja en el Sarai komo tambien i en el kunsolato, Franses i ala ora sos siguro ke todos tus dezejos ja son aponto reintchidos i mas ke la madre de esta ija ke es la mujer de el Vitales Pacha, era Djudija, i se kazo kon el ditcho Pacha ke es katoliko, i el S. Lusien konvisiendose de esto lo izo, i la demando a esta ija, de el pacha, i esto sin ke el de antes se akonsejo, seja ken su Tio el S. Naimatche ke ja estava en Kostan, ansi tambien i kon sus ermanos de Samokov ke kon estos ultimos el de koando partio de Samokov, ke ja si foe, deskontente, (ke foe esto loke ganaron de no kontentar tambien i algo de sus dezeos,) en kurto el si espozo, kon la ditcha demoazela Florans, i en poko tiempo el ja foe nomenado komo mediko para el echpetal franses, i esto koando sus ermanos de Samokov, lo supieron foeron mui raviozos de la etcha ke izo, i a S. Leon su ermano parisiendole ke lo iva a poder konvenser, para azerlo repentir, de esto ke si tomo, mujer krestijana, el partio por kostan, i en arivando ke ja si li adereso ande el S. Lusien i denpoes de tanto ke li avlo el S. Leon, foe ke S. Lusien non kijo ni sentirlo, i li korto la avla kon algunas sus razones, i ansi foe ke S. Leon se vino a samokov, i anke ke todos eran mui raviozos, el mas tadre si kazo, kon eja en la klisa katolika, kon ke si konvertio i el tambien a el krestjanizmo, i el

1613               Biografia de S-es. Leon, Lusien i Jeaqe, ijos de S, Davitchonatche.         1897

 mas tadre tuvo ke li nasio una ija i la jamaron Margerit, i en un sierto tiempo ke ejos estuvieron raviozos era ke non si kartejavan, ma mas tadre ja foe viniendo el S. Lusien a Samokov, i ejos tambien ivan a Kostan i se vijitavan, i tambien se kartejavan,

En el anio de 5658, la espozaron a sus ermana, la koatrena, S. Furtuna, kon S, Albert, Zoref, de Slivno, i para ezerlo el espozorio, foeron a Slivno, sus ermanos S-es, Leon i Lusien, ke avija vinido de Kostan, i ejos ke foeron a Slivno foe prima por entender su pozision, i esta de sus parientes, i sigunda por ke li viera tambien S. Lusien komo doktor, se es ke era persona sana, i ejos ke ja estuvieron en Slivno unos koantos dijas, i konvesiendosen ke ja podija ser sus jerno, lo izieron el espozorio, i se konvenieron, ke le ivan a darle 10,000 fr. por kontado i por achugar, kon ke nombraron una sierta suma de los 10,000 fr, ke ivan aser por achugar, i por djoja, i por lo restan de la suma, ke si las ivan a kontarlas, la una partida, i kon lo restan, en 2 ratas, kon ke se ivan a endevdar, kon bonos sus ermanos, de la novija, i esto de lo adelantado iva a ser por koando ivan a azer la boda, i en este tiempo ejos fiksaron tambien i la data ke devijan de azer la boda, i denpoes ke se lo reglaron lo todo ejos, izieron el espozorio, sigun de el uzo de Slivno, i se alegraron i se kontentaron i se vinieron a Samokov,

1614               Biografia de S-es. Leon, Lusien i Jeaqe, ijos de S, Davitchonatche.         1898

La novija tambien ke ja foe kontente de este Novio, ke li tomaron foe ke ejos si enpesaron por aprontar, los presipios de la achugar, i tambien algunos prontamientos de komanija por la boda, por ke era en este mizmo anio ke la devijan de azerla, i mientres de el tiempo ke ejos estuvieron espozados era ke li mandavan ala novija mudos de dulsuras, i algunos presentes, i el novio tambien la vijitava a su novija en Samokov, i de parte de la novija tambien li mandavan a el novijo dolsuras, i de todas las 2 partes eran kontentes,

Koando ja si aserko para ser el tiempo de la boda, eja si foe a viena akompandjada de su ermano S. Leon kon Rachel su mujer por azer la achugar, ke estuvieron serka de 6 semanas, para esto ma eja la novija non eran de akordo sovre las merkidas de las ropas, ke eja kijo siempre merkarse, de las ropes las mas finas, i luksozas, i de kolores ke lo poedan vistir solo las dukesas i markizas, esto mizmo era i kon las blankerijas, i anke su ermano ke le iva diziendo ke fin a este grado non podija merkarse, por razon, ke lis estava kostandoles mui karo, i la suma ke se li tenija soltado para esto non podija ser ke li podija avasteser, i mas ke por las partes moestras non si uzava de esta manera de vistimientas, i ala kaza ke eja iva a ir era de mizmo ke non vistijan ansi luksozas ropas, i aparte ke non ivan a estar kontentes, iva a ser ke lis podija kavsar i selos, entre las otras mojeres ke avijan en la kaza, ma eja non los sentija a todo loke le iva avlandole, i era i ke si lis aravijava, i lis salija el etcho a pleitos, kon ke lis dezija ke eja non poede mantenerlos

1615               Biografia de S-es. Leon, Lusien i Jeaqe, ijos de S, Davitchonatche.         1898

i pagarles los vijajes i los hoteles, por su ermano i konijada ke la akompanijavan, i era solo por eja ke si li gastara, i ansi lo azijan seja por koando ivan a komer, ke si pagavan kada uno por si aparte, i ansi todas las kozas, ke por esto de el gaste ja era ke a su ermano non li enportava, si el iva a gastar de su petcho, era ke a el li enportava de estos ke eja lo estava kiriendo azerse la achugar mui luksoza, i ansi foe ke non si podieron darsen a entender, i la dechava ke eja si lo iziera sigun ke lo kerija, mizmo ke li iva a kostar algo mas de esto ke podijan gastar, i ke ivan a desbolsar sus ermano por sus kontos, en tal ke eja estuviera kontente, i koando ja eskaparon esto ejos si vinieron a Samokov, i koando ja foe el tiempo de azer la boda, lo izieron todos los uzos seja de enkolgar la achogar, komo tambien ke vinieron konsfoegros, sigun ke ja lo tengo eskrito de la manera ke lo azijan, i se foeron a Slivno, su madre i S. Leon kon M. Rachel i Regenutcha, i la izieron la boda kon muntcho kef i alegrija, i les izieron todas las onores, en la kaza de el novio, i de todas las 2 partes, ke ja foeron mui bien kontentes, se vinieron a Samokov, i ejos bivin tambien mui kontentes, seja de la una parte komo tambien i de la otra, el novio era ke estava en un etcho kon su padre i kon los otros mas ermanos, ke estavan en una butika, kon sus tio ermano de su padre, i sus negosio era de los artikolos, en ropirias de la malifaktura, i el novio el kontado ke tomo lo metio tambien en esta botika, sin ke tomo por eskrito de sus djenetores, i de sus haver, sovre ke metio i el tambien ansi suma de

1616               Biografia de S-es. Leon, Lusien i Jeaqe, ijos de S, Davitchonatche.         1898

 moneda, or nombrarse ke i el iva a tener algun % de las ganansias or de alguna otra forma, i era ke todos gastavan de una bolsa i sin ke ejos si notavan en kontos aparte, ejos alos presipios ja era ke lis iva kamenando sus etchos boenos, i eja la M. Furtuna vinija a Samokov a vijitar a sus parientes, solo ke kon su konijada M. Rachel era ke non si pasava tanto de boenas lo todo de el tiempo de koando estuvieron en viena, por azerse la achugar, i mas tadre ke sus etchos lis enpeso a irles atras, i fin a el grado ke non pudieron mas azer sus respondimientos en regla, i de esto lis kalio ke detuvieran sus pagamientos, i a esta kavza lis kalio ke seraran tambien i la butika i el S. Albert marido de la M. Furtuna kedo enteramente vazio, i se vino a Samokov, kon la entision a ke sus konijados lo metieran en algun etcho ma esto ke non lo podieron azerselo, el si foe a Filibe i se empeigo en una kaza de merkansija, kon una tchika paga de mezada, i se trucho a su mujer a Filibe, i mas tadre ke a el non li abastisija para sus gastes la tchika paga ke el la tomava, lo izo ke si foe a Burgas de mizmo komo enpeigado solo ke non biven kontentes,

Kon la kaza ke ejos la tenijan en kostan i ke la tenijan alkelada ala komonita de los gregos por echkola, i sus tio el S. Naimatche ke era ke si okopava de esto, era ke lis iva eskriviendo, ke la estavan mui muntcho estruendola, i tambien ke de las lumbres ke la ivan kaentandola, iva saliendo i foegos, i sovre todo ke i las kiras avijan enpesado a non pagarlas en boena regula, era ke los akonsejava porke foeran algunos de ejos a kostan por merar un molde, de

1617               Biografia de S-es. Leon, Lusien i Jeaqe, ijos de S, Davitchonatche.         1898

 koalo serija mijor de azer kon eja, aun kon todo ke S. Lusien ja estava, en Kostan, ma era ke non si okupava, seja por ke i el tambien tenija sus okupasiones, or seja ke non eran de akordo kon su ermano S. Leon, i este ultimo ke tenija sus okopasiones en samokov, foe pasando ansi algo de tiempo, ma mas tadre visto a el menester, li eskrivio S. Leon a el S. Naimatche, ke su edeja era de venderla, i li rogo porke si okupara, a poder topar algun muchteri, para ke si las merkara, i la edeja de el S. Naimatche ke ja era esto, de venderla, foe ke S. Naimatche li topo a un muchteri, i se lo eskrivio a S, Leon porke foera a Kostan i para kortar el trato, i S. Leon sin tadrar, si foe a kostan i la vendjo por la suma de ____ liras, i lo izieron pronto todo el menester por el takrir, i se la paso a el Merkador i resivio el enporto, i le pago tambien i a S. Naimatche, su komision por la vendita ke lis izo,

En este tiempo ke S. Leon estuvo en Kostan avlaron i los 2 ermanos, ke es kon S. Lusien, ke ja estava en kostan, por sus etchos, i de meter tambien i una fin, i kedaron de akordo ke era ke iva a venir el S. Lusien a Samokov, por merar de reglar, i meter una fin por espartirsen,

En el anio de 5659, sigun ke ja lo tengo eskrito sovre esto ke S. Leon si avija el tomado la admenestrasion, de todos

1618               Biografia de S-es. Leon, Lusien i Jeaqe, ijos de S, Davitchonatche.         1899

 sus etchos i era el solo ke respondija alo todo sigun de esto ke a el li paresija, i sin ke si akonsejara kon dinguno otro de sus ermanos, i mizmo koando alguno de sus ermanos ke kerija dezirle alguna koza era ke el non sentija a dinguno, i sin ke si li enportava de koando ejos tenijan kaje en kada dija los pleitos i las letigas, el kon la suja entision, non merava nada, a dinguno, i ansi era ke dinguno de sus ermanos non pudieron konvenserlo, visto ke ja estava el kaje komo medjo enpatronado de el bien de todos los ermanos, i sus ermanos, visto a esto i espantados ke non ivan ejos en nada a enpatronar, ivan buchkando los medios, para desbarasarsen i tomar koalo foesa sigun ke foe ansi i les iva merkandoles sus partes sigun de loke el lo kerija, i enpatronandose de el bien de sus ermanos, kon kada uno de su manera, non si poede dizir por sus ermanos ke eran personas ke non savijan ma el karakter non lis permetija de ketarlo el etcho alos djuzgos, porke el S. Haimatche el ermano grande ke ja lavoro kon su padre unos koantos anios, era ke ja savija jevar sus etchos mas de esto ke era el menester, i por non poderlo somportar, el si foe a Marsilija, kon dechar todo ke ja son agora komo 20 anios sin venir a Samokov, i se kontento a ser kelner, por los hoteles, de esto ke li revataron el bien, i kon el S. jomtov, es ke komo non era persona konsensioza non li konfijavan a el la dereksion de una banka en filibe Balkanska, i despoes tergovska, ansi i a S. Lusien de mizmo la dereksion de el ichpetal en kostan de la fransia i kon el S. Jeaqe la dereksion de una echkola, en la amerika, tambien de la fransia, i son todos estudijados de las akademijas las mas altas,

1619               Biografia de S-es. Leon, Lusien i Jeaqe, ijos de S, Davitchonatche.         1899

koanto a el mizmo es de una energia ke si servio, i esto orgojoza,

Kon la machina de soda, ke el la tenija por su konto partikular, era lo mas muntcho en eja ke si okoupava, i lavorava el mizmo i koando el mankava de Samokov era ke su mujer M. Rachel, ke la enkamenava, i eja azija las venditas i los enkasos,

Adetras de el akordo ke avijan kedado en Kostan el S. Leon kon S. Lusien ke iba a venir a Samokov, por aranjar sus etchos i tambien espartirse, foe mas tadre ke el ja vino, i ejos los ermanos kedaron de akordo porke si espartiera tambien i S. Jeaqe, i ejos ke ja enpesaron en el lavoro de algunas de sus eskrituras, por rekojer fin a un grado sus kontos, i azersen i un bilanso, i en algunas de las partidas ke el S. Lusien li demandava a su ermano porke si las aklararla, para entenderlas, era ke si li araviava, i el S. Lusien ke li ensistija, de esto ke non kerija deklararselas lis salija el etcho a pleitos, i en unas koantas vezes ke lo izo ansi, foe ke el S. Lusien lo amenazo a su ermano, kon algunas palavras pekaderas, en i adjuntandole tambien, kon dizirle, ke el non se va a dechar azer sigun de loke lo izo kon los otros ermanos S-es, Haimatche, i Jomtov, i mas li dicho tambien na ke jo komo persona, mi poedo murir, i jo ke tengo mujer krestiana, i krejaturas krestijanas, ke son estos ke van a eredar mi bien, i siendo ansi, non es ke va aver una mleskatina el los delos, de djidios kon krestijanos, en la familija Arié, i en el bien de moestro padre, ke foe djidio i ijo de ijos de djidio ? ke komo de deretchedad es esto ?, ke esto sintiendolo el S. Leon, foe, ke

1620               Biografia de S-es. Leon, Lusien i Jeaqe, ijos de S, Davitchonatche.         1899

demando por ke si nomenara una komision, de unos koantos tambien miembros de la familija Arié, porke los avinieran i lis metieran una fin, por avenirlos para espartirsen, i esto ke lo izieron, i la komision nomenada, denpoes ke ja exameno sus kontos fin a un grado, lo topo, por djusto, porke el resivieran, los S-es. Lusien i Jeaqe, la kaza de lege en Sofia, i S. Leon el bezesten, kon ke nombraron tambien i sus presios, en tomando en mano ke la kaza, en lege ke ja tiene una valor, montcho mas grande de el bezesten, i ansi tambien i mas kazas, i botikas, i tchaires, i mas todas las otras kozas ke ejos las enpatronavan, en Samokov, lo todo metiendo los nombres de sus presios, i kon los averes i las devdas ke ejos tienen ke devijan de tomar tambien kada uno parte sigun de su %, i kon la kaza grande de Samokov la apartaron, por ke li apartiniera a sus madre, i aparte li nombraron la suma ke deve de versar kada ermano, seja por el mantenimiento komo i de su mas todo el sostenimiento, a sus onor, i lo todo lo izieron un protokol, i se lo dieron a ejos, ke a el presipio, ja foeron fin a un grado kontentes, i ejos si eskrivieron i kontratos, sovro esta manera de espartision, ma mas tadre ke S. Leon ke lo exameno seja el protokol komo tambien i el kontrato foe ke non estuvo, kontente i ansi foe ke non si afermaron, los kontratos, i lis resto ansi dekolgado, solo ke a sus S. Madre, era ke ja li ivan dandole, sigun de esto ke lo vido por deretcho la komision, i el S. Lusien ke foe mui raviozo de esto, ke non pudo eskapar, i meter una fin, en esto, el partio por kostan, i kontinoar en su etcho de el ichpetal, i

1621               Biografia de S-es. Leon, Lusien i Jeaqe, ijos de S, Davitchonatche.         1899

 de otros sus klientes, i por poder enkasar su parte de los revenidos era ke siempre li kalija ke li estuviera eskriviendole a S. Leon por ke li remetiera, la moneda, i en aziendole saver tambien, ke non li estava abastandole, por tapar sus gastes, la paga i los otros revinidos ke el los tenija, ke esto era tambien kon males,

I el S. Jeaqe, visto a esto, ke non pudieron meter una fin para espartirsen, demando i el ke kerija irse, a el ajeno, para estudiar sovre la agrkoltura, ke para esta su demanda, el S. Leon, le dicho, ke kale seja kon la kontentes seja de sus madre komo tambien i de los otros ermanos, i el ke ja si okopo sovre esto, i fin ke li dieron la kontentes ke ja paso algo de tiempo, el era ke si enbevisia, en ir eskriviendo, i kompozo un livro, i lo jamo IDEAL, ke el kontinido, foe lo mas muntcho, sovre el sosializmo, ke lo kompozo i lo izo mui bien, lo todo en la lingua bulgara, i lo decho estamparlo en muntchos livros, i los iva vindiendolos i dechava en muntchas livririjas porke si los vindieran por su konto,

Mas tadre ke la kontentes seja de su madre i esta de sus ermanos ke ja li foe akordada, i el ke foe mui gustoso se enpeso a prontarse, i en poko tiempo el partio por Monpelie, en la fransia, i se entro en la universitet de los estudios sovre la agrkoltura, ke en esto lo foe su dezejo, de el presipio, i sus ermanos seja los de Samokov komo tambien i S. Lusien de Kostan, le ivan eskriviendole, porke trokara su edeja, de esto de la agrekoltura, arazon ke es un ofisio mui penivle, i ke su natura es flaka, ma S. Jeak non kijo

1622               Biografia de S-es. Leon, Lusien i Jeaqe, ijos de S, Davitchonatche.        1899

trokar su edeja, kon dizirles por la propia ke es flako es ke lo kere esto, visto la vida ke biven los kazalinos, ke son foertes, i es por esto ke biven sanos, i ke estan siempre por los kampos, i en los averes limpios, i el era ke foe kontinoando, en esto.

Koanto alas mujeres era ke ejas lo pasavan sigun ke ja lo tengo eskrito, siempre entre la Familia, ke si vijitavan de las unas a las otras, i era mui ralo koando ivan a otras familias, solo koando avijan algunas bodas or paridas i ke eran mui bien kombedadas, ke ejas non tenijan el menester de otros pasatiempos, porke ande ejas ja era ke lis venijan las pasaderas de ora ke las azijan areir, i lis kontavan lo todo ke si pasava por la sevdad, ke de esto era ke si enselavan muntcho las otras familias, i mas muntcho ke las kazas todas ande bivijan en djeneral la familia Arié ja eran todas, mui grandes, i todas kon goertas i foentes, i arvoles, ke non avija kaza menos de 2 a 3000 metros koadrados de kampos, i ejas ke ja eran mui bien servidas de muntchos mosos i mosas, i sus mantinimiento ke ja era de lo mijor, de todas las komanias, ke esto ke non lo topavan a merkarlo en Samokov ejos ja era ke lo azijan traer de otros lugares en kurto era ke de lo todo ja lo tenijan siempre en kaza, sin mankura de nada, i por todo esto ke lis venija a el tino ejas ja lo azijan, de sus gizanderas gizarlo i kechas non avija ken lis diera ni menos ke azijan la ikonomija, sovre esto, ke lo esto eskriviendo, ja si podra dizir ke sirija komo alavasiones, ma ke esten mui siguro ke es i mizmo poko, loke esto eskriviendo, la manera de las vidas ke las

1623               Biografia de S-es. Leon, Lusien i Jeaqe, ijos de S, Davitchonatche.         1899

 pasavan ejas koando kerijan salir por los kampos i las kampanias, ja lo saven ke tenijan los paitones a unos koantos en kada kaza, i ja abastava ke ejas lo kijeran por kamenarsen ke non avija ken las defendija, ke muntchos lo dezijan ke era vidas de prenses ke pasavan i por esto es ke si podre dizir poede ser ke el 90 % de los miembros de la familia Arié son todos sanos i godros, i mui foertes de foersa lo todo en akejos tiempos ma por dezplazer es agora ke bolto la vida i estan mas flakos,

En el anio de 5660-61, S. Jeaqe ke estava en monpelie, kontinuando en sus estudios, sovre la agrekoltura, a razon ke li foe mui kaente la klima de este lugar el se vino a Jenev, por entrar en la akademi de jenev, lo todo sovre el mizmo estudio, i el ke estuvo algo de tiempo en jenev era ke i mi ijo Jean ke estava tambien en jenev era ke si kamenavan en djuntos siempre, i el resivija en mui regla su mezada ke li mandavan sus ermanos de samokov de los sujos revinidos, ma mas tadre el ke non li plazio la akademi de jenev lo izo ke si foe torna a Monpelie,

Kon la vendita ke ejos tuvieron etcho a los kiostendjelis seja sus parte de el balkan komo tambien i el maaden i siendo ke fin a este tiempo ejos ainda non avijan kovrado foe ke por vija de los advokatos, lo dieron el etcho a el djuzgo, anke ke era mui

1624               Biografia de S-es. Leon, Lusien i Jeaqe, ijos de S, Davitchonatche.         1900

 foerte a djuzgar kon un kazal entero i las polisias los protejavan siempre a los kazalinos, i era ke ivan gastando ma ja foe ke a los kavos si lo konvinieron i se kovraron el enporto,

Kon el etcho de la machina de la soda ke S. Leon la tenija por su konto aparte, foe en este anio ke li si li avija mui boeno engrandisido sus konsumasion, solo ke en este anio li pujaron muntcho el haksis^[5] dasio ke lo kovravan, i aparte tambien i li metieron, i un kontrolor, para ke merara la kantedad de redomas ke el konsomija, i koando ja las entchija era ke el kontrolor li apagava, el banderol, i si en kavso algunos de estos banderoles seja ke si espegavan or ke azijan algunos jeros, en la koenta, i koando li azijan revizias, ke esto ja era en kada sigondo or koatres dija, i si es ke avijan ansi jeros era ke li azijan akt, i non lo dechavan lavorar fin ke lo enderetchava, el jero i esto ja era ke li turava unos koantos dijas, i la mezada de el kontrolor era ke la pagava el S. Leon, i de estas revizias el era ke se iva deskorajando, i non iva foerte lavorando i ansi era ke i los profitos li eran tchikos,

El S. Lusien en kostan era de mizmo ke su etcho si li estava dija kada dija engrandesiendole, kon los klientes moevos, i aparte a el lo jamavan i de los kazales deredor de kostan, por ke akomadreara, alas paridas, i muntchas vezes el se iva alos kazales, i dormija tambien en las kazas de las paridas, ke sovre esto el djo, grande reklam, i renome, i de esto era tambien mui bien pagado, su kaza era en pera en las mas mijores kalejas, i la tenija mui bien

1625               Biografia de S-es. Leon, Lusien i Jeaqe, ijos de S, Davitchonatche.         1900

mobelijada, i en la mizma kaza el tenija kabineto aparte ande resivija alos hazinos, i aparte kamaretas en kavso de algunas operasiones i tenija i oras fiksadas por resivir hazinos, ke lo vijitavan muntcha djente, i esto lo mas muntcho de la klasa arestokrasija, i aparte a el lo vijitavan tambien en los dijas de las fiestas, i por enfrentante era ke i el tambien lis boltava vijitas, i el gaste ke lo azija en kaza anke ke su mujer ja era mui ikonomejoza, ma torna kon todo li era mui grande, eja es mui meradera de la kaza i mui limpia, non li plaze muntcho los luksos, i eja es mui hasida, i kaje fanatika, ke eja avoda^[6] atras non dechava i esto kalia ke lo iziera en la klisa eja kudia muntcho por sus kreaturas, i las ama muntcho,

En este tiempo a S. Leon li foe viniendo mui akoruto un dolor foerte en la tripa, fin a el grado ke koando li tomava, era ke si kedava dezmajado, i ansi era ke por una [unas] koantas oras era ke no li vinija el tino ala kavesa, i de tanto ke si aflakava el restava i unos koantos dijas etchado en la kama, de todos los medikos ke lo vijitavan i ansi algunas mujeres ke li azijan muntchas de las itchorias era ke mui poko li ajudavan, ke muntchas vezes este dolor era i ke li tomava en medio de la notche, i mos jamava i a mozotros por darle algunos ajudos, i mozotros sigun mos levantamos de la kama sin vistirmos era ke korijamos, i esto ke lo podijamos ja lo akomodavamos i de esto tambien si li renovava el boltamiento de la kavesa ke el ja la tuvo mas antes tiempo, i kon los banios ke los avija etcho era ke ja li avija boeno pasado, i los medikos de Samokov li dezijan ke

1626               Biografia de S-es. Leon, Lusien i Jeaqe, ijos de S, Davitchonatche.         1900

esta dolor li kavzava de esto ke devija tener la maladija de el gros enstenten, i ke iva aser mas mijor de decharse merar de algunos medikos, mas savidos i espesijalistos de esto, i siendo ke esto le foe viniendo mas espeso, el se lo izo saver a S. Lusien en kostan ke el koal lo jamo porke si foera a kostan i ke el djunto kon otros medikos ke esto en kostan ja avijan i ke ja lo tienen de kudijarlo sin ke tenga dingun espanto, i kon mandarle algunas kuras de Kostan non li poeda nada ajudar, i ansi foe ke el en pokos dijas mas tadre si foe a Kostan, i estuvo kon a 2 mezes, su ermano kon i otros medikos ke azijan siempre konsultas, i lo kuravan ke el si sano enteramente, seja kon el dolor de la tripa komo tambien i el boltamiento de la kavesa, i se vino a samokov sano i boeno,

En el anio de 5661 la espozaron a sus ermana la tchika S. IDA, kon S. David Gerchon de lom palanka, ke vino el novio a Samokov, akompaniado, de sus parientes, komo tambien vinieron i 8 mujeres mansevas, tambien sus parientes, i estas mujeres ke ja eran todas mui mansevas, era ke si trokavan a modos de vistidos a 2 3 veses en kada dija, lo todo de grandes luksos i de las primeras modas i tambien de las mas finas i valotozas ropas, lo koal ke este modo de vistimientas non avija en Samokov, i lo isieron el espozorio, kon ke izieron tambien i la seremonia, kon grande saltanat, i la konvesion foe ke li ivan a darle 10,000 fr. entre kontado i achugar, kon ke nombraron tambien i la suma ke devijan de gastar por la achugar, i en los dijas ke estuvieron seja el novio komo tambien i los akompaniadores

1627               Biografia de S-es. Leon, Lusien i Jeaqe, ijos de S, Davitchonatche.         1901

 era ke lo azijan komo una boda, ke siempre eran la familia entera i kaje la sivdad entera ke ivan vijitando, i era siempre alegrandosen kon kantares, i bailares, i otros pasatiempos, i denpoes ke ja estuvieron una semana entera, partienon el novio kon sus akompaniadores mui kontentes de todas las onores ke si lis izieron, i entre ejos si dizijan a mozotros ja mos izieron la mas grande onor ke podija ser loke non lo esperavamos, ma ejos koando van a vinir a lom, para la boda, komo va aser ke vamos a poder resivirlos, i ke non lo podemos a azerles ni el 10 % de esto ke ejos mos izieron, parisiendoles ke a todos estos de la familija ke lo vieron, komo ke era ke se les ivan a ir para la boda,

En este anio ke izieron tambien i la boda, foe ke enpesaron por azer algunos aprontamientos, seja kon la achugar komo i tambien i las mas otras kozas menesterozas, i koando ja foe el tiempo de la boda lo izieron sigun de todas las otras i se foeron a Lom, su S. Madre i S. Leon kon su mujer Rachel, i S. Dona su ermana ke abacho de vidin a lom, la izieron la boda mui semple, i los ke foeron de Samokov ke ja non kijeron saltanates i ke non izieran tambien i gastes, fin a el grado ke ejos si merkavam las manianas koza de dezajuno de la plasa, i ansi tambien en los dijas, komijan en el resturant, i la djente de la kaza ke ja non kudijavan de el entodo por sus musafires, ke lo todo estuvieron solo 3 dijas i se vinieron el S. Leon kon su mujer a Samokov, i su S. Madre resto kon su ija M. Dona, una semana otra, i denpoes si foeron djuntas a Vidin, i dopo a Samokov

1628               Biografia de S-es. Leon, Lusien i Jeaqe, ijos de S, Davitchonatche.         1901

            Eja la novia ke ja era mui savida i mui meujuda, era ke seja su marido komo tambien i toda la djente de la kasa la meravan kon boenos ojos i mui kichta, i bevijan kon su marido mui kontentes i por enfrentante era ke i eja tambien si komportava kon todos mui bien, su marido el S. David era djunto kon sus ermanos, en una butika de ropas de malifaktura, i sus etcho lis kamenava tambien boeno, i mas tadre el S. David se espartio de sus ermanos i se foe a rustchuk, i se izo haver kon S. Kalme de mizmo por el negosio de ropas i esto por venditas en groso, ke izieron grandes konsumasiones i esto kon miliones, i foeron boenos,

Kiridos meldadores, sigun ke ja meldaron en esta biografia, en unos koantos lugares, la manera de las vidas ke ejos las pasavan, la familia en djeneral entera, i ejos era ke buchkavan siempre las okaziones solo por sus pasatiempo, i en algunos de los pasajes ke lo meldaron, ke lis azijan los saltanates, a los otros, or ke lis azijan las onores i ke sakrifikavan tambien i muntcha moneda, es a dizir ke non era por azer solo alos musafires otro ke esto lis era la okazion por sus pasatiempo, i tambien por ejos estarsen alegres, i tambien lis era i las okaziones para i ejos adjuntarsen i koanto a los gastes ke los azijan non era ni nada para ejos, por razon ke ja lo podijan gastar, i siendo ke la manera de sus bivir en akejos tiempos ja era ansi era ke lo azijan, todos ejos, i ansi se alegravan, ke por esto ja lo avlavan i muntcha otra djente ke los alavavan

i en este anio de 5661 tambien era ke seja el S. Leon

1629               Biografia de S-es. Leon, Lusien i Jeaqe, ijos de S, Davitchonatche.         1901

komo tambien todos kontinuavan en lo todo sigun de los otros anios foe en este anio ke podieron konvinirsen kon los kiostendjelis por vija de un sierto S. Stefanos advokato por la suma de 16,000 fr, ke lis avija kedado de aver, kon ke foe i mui bien pagado el advokato, ke de esto foeron kontentes porke ja estavan kansos de los djuzgos,

Asta aki si eskapan todas las partidas de las Biografias,

de el S. Davitchonatche, kon sus ijos S-es. Haimatche, Leon, i

Jeaq, i todas sus ermanas, ke ja foeron bien kazadas,