חכם רבנוצ'ה יוסף אריה

847

   De aki i endelantre si enpesa Las partidas de el djerenansio de S-r. David Josef Arie kon el nombre De H. Rabenutcho, enpesando de el anio De 5612.

848                                 Biografia de H. Rabenutcho Josef Arie.                           1852

            En el anio de 5612, ke H. Rabenutcho ja estuvo espartido seja de el etcho de el magasen de ropas ke tenijan en Filibe djunto su ermano H. Elijatchono i ke eran haverim kon Tchelebi jeuda i sus ermanos, i sigun ditcho ke tuvieron entre ejos los 2 ermanos grandes defekoltades por arivar en esta espartision, ke lo todo lo kavsava su ermanastro H. Chemoelatche el Chichko ke los iva akonsejandolos a todos los 2 kon embrojarlos de las mil maneras lo todo por su entision ke el tenija i non si li enporteva de derokar kasas mismo de sus ermanos en tal de arivar a su opinion, i seja tambien ke si espartieron i de kasa aun kon todo ke moravan djuntos i en una mesa, i esto lo isieron ke estuvieron torna en la misma kasa solo ke si apartaron esto ke tenijan de mobilija i otras kosas i komijan aparte, la furtuna ke tomo en moneda sonante H. Rabenutcho foe una suma de 10,000 groches i aparte de averes 4000 gr. i se vino a Samokov, ke denpoes ke ja reposo unos koantos dijas, si asento en kasa i enpeso de moevo a examenar los kontos uno por uno, ke esto li turo mui longo tiempo i non seja ke ternijan algunos jeros i a H. Rabenutcho li plasia muntcho eskrivir ke era sin enfasiar i en mui largo i lo todo tomo notas moevas i reglo sus livras sigun de su metoda, i el primer etcho ke tomo foe ke enpeso a merkar la mubahja ke es piesas de monedas viejas de oro i de plata ke de esto ja lo konosija i se las mandava a Filibe a un sierto mubahjadji ke era S-r. Behoratche Romano por ke si las vindiera por su konto ke

849                                          Biografia de H. Rabenutcho Josef Arie.                                       1852

ejos ja si lo tenijan konvenido la komision ke li devija de pagar i en algunas semanas era ke se iva i el tambien a Filibe kon ansi valutas por ver los presios de la plasa, i de esto aun kon todo ke non li podija konvenir porke era la suma tchika i non lo podija ni mantener foe ke empeso a merkar tambien i fieros de los maadendjis i merkava en kada semana a 50-60 kantares ke esta merkida era siempre por 31 61 dia a fijado i kon un rebato de 5 fin 10 gr. de el presio de la plasa de la semana de antes, i kon estos fieros i algo de valutas ke podija rekojer mientres los dijas ke estava en Samokov era ke se iva el mismo a Pasardjik ke era el lugar ande se vindijan los fieros i la mas muntcho ja afetava ke los vendija ke lo todo ja era en kontante, i se iva tambien i a filibe por aser la vendita i de las valutas i kon esto era ke se iva komportando por poder tapar sus gastes, ke de lo todo, eran las ganansias mui flakas tenija mas ke si prevalija i de la moneda de los fieros, lo todo por poder merkar mas grandes sumas de las valutas ke esto era negosio mui limpio i gustoso,

            En kasa si komportava en mas antcho kon el gaste, ke su Mujer la Bu. Sarutcha non era ikonomiosa, i non si li enportava ke mismo su marido la akonsejava i eja non lo sentija, porke foe una mujer mui antcha ke li plasija muntcho vijitar i pasatiempos,

            En este anio li nasio una ija, i se kontentaron en este parto muntcho i todos sus parientes la vijitaron i lo mandaron muntchos platos i presentes, i la jamaron REVKA, i su madre la krejo

850                                          Biografia de H. Rabenutcho Josef Arie.                                       1852

i la kudio, i eja koando ja arivo en la edad de kasar ke foe en el anio de 5629 la kasaron kon S-r. jaakov B. Nisim Avdala, kon ke li djo su boen kontado i achugar, isieron la boda mui kontentes i bivieron a los presipios mui boenos kon su marido ma mas tadre foe al kontrario, i siempre pilijavan i la asiguija muntcho sin dinguna rason i ansi ke si avija muntcho aflakado, i eja pario Ijos i Ijas i las unas de las Ijas eran enteras blankas ke tenijan seja los kavejos komo tambien i los ojos enteros blankos i de esto era ke non tenijan las vistas boenas i lis kalija ke si metieran las manos delantre los ujos para poder mismo i kamenar i porke non sufrieran de esto lis bojadijavan los kavejos kon bojas pretas i lis metijan surme preto en las pistanijas porke devinieran pretas i era entonses ke podijan ver komo a todas las personas, i esto mismo ke foeron grandes siempre emplejaron esto de bojadijarsen porke non si lis troko la kolor de sus kavejos en toda sus vida,

            S-r. jaakov bive en la Bana de Kiostendja, i su negosio es en ropas de mali faktura, i se topa mui bien kontente de su negosio i agora biven mui kontentes i mui aunados i eja su mujer la S-ra Revkutcha ke es mui nekotchera i mui ikonomiosa sovre todo ke es mui bonatcha kudija por lo todo i eja tambien li ajuda a su marido en los lavoros de sus butikes [butikas], i otros,

851                                          Biografia de H. Rabenutcho Josef Arie.                                       1853

            En este anio de 5613, H. Rabenutcho era de mismo ke kontinuava en las mismas merkansias ke de el anio pasado, lo todo en ir merkando las valutas i los fieros i de mismo en vijajar a Pasardjik i Filibe i mientres estos vijajes el en este anio enpeso a buchkar de poder kovrar tambien i de los averes ke li avijan kaido de la espartision kon su ermano H. Elijatchuno, i era ke de algunos kon aserlis unos grandes rebatos ja kovrava, ma li nasian muntchas deferensias kon su ermano, seja sovre los klientes seja por este ke lo akonsejava, a ke non tomara los konsejos de H. Chemoelatche i de los otros ke el ja la estava viendo de sus avlas ke eran todas sovre penserios negros i sus etchos tambien ke non li estavan kamenandole tanto favoravles ma aparte ke non lo sentija era de esto ke si lis konkriavan los pleitos mas muntcho, i ansi ke mas non li avlava, porke i el tambien era una persona mui konsensiosa i mui Haham i mas de muntcho entelejente ke de la primera palavra el ja si konsentija, i non si dechava muntcho avlar porke era mui kapritchoso i kajado el era mui echpikolante i lo todo kon boena entendensia, i konto, el era nervoso vergonsoso, i esto lo asija eskonderse en okasion de entre la djente, era de esta manera su modo de saversi guijar por reintchir su edeja, el en este anio de los vijajes ke asija ke koando topava a merkar algunos artikolos komo algudones filados i sin filar i lanas i en tiempos merkava mantekas i trigos i ansi mas todo esto ke si  li presentava, ke de lo todo era sumas tchikas por poderlo vender mas presto i ansi era ke lo todo sigun de loke lo

852                                          Biografia de H. Rabenutcho Josef Arie.                                       1853

topava a venderlo lo asija ke presto ja lo vendija i esto mismo ke foera kon la mas tchika ganansia, i esto anke echpikolijava en muntchos artikolos tambien non li tapavan los gastes, i de esto tambien li kavsava a ke si adjuntara a las adjuntas ke tenijan el partido ke era kontrario de la Familia Arie ke ansi los jamavan, i su nombre era la KALDERA el non si lis aserkava muntcho ande sus primos ermanos seja ande Tchelebi jeuda komo tambien i ande los sujos ermanos mismo ke lo jamavan, solo era ke su mujer la Bu. Sarutcha ja los vijitava siempre koando ejas tenijan dekontino las vijitas entre ejas porke a la Bu. Sarutcha li plasija muntcho vijitar, i enbesarse todas las moevas ke avijan por la sivdad, i eja era ke li raportija mas muntcho todo esto ke sintija sigun ke ja es savido ke la mas de las Mujeres poeden atinar todo esto ke lo sienten propio sigun de la persona ke lo konto sin mankar ni pujar ni una palavra, ke es dada esta dadiva separatamente solo para las mujeres, el en kasa si pasava seja kon su mujer seja kon sus krijaturas mui boeno i el los amava a todos mui muntcho, el los kontentava kon todo esto ke li demandavan a su Ijo el Behor era el ke lo jevava kada dija a la echkola para ke non si espantera de los turkitos, a el li plasija muntcho la vistimienta ansi i por todos los de su kasa ejos todos sus visitidos [vistidos] los vistijan mui limpios, el jevava un chalvar de panio kon kuchak de chal i ensima una fermela kon un djube lo todo de panio en su kavesa una fes fina i por kalsado laptchines kon kundras

853                                          Biografia de H. Rabenutcho Josef Arie.                                       1853

de koero fino, i por el envierno si vistija de kiordes ke ja tenija muntchos, en kasa todos si mantenijan boenos, las notches bevija komo 25 dr. de raki i en la mesa 1/2. oka de vino,

            Kon los 80 gr. ke era adevitado por dar a los Hahamim ke meldavan en el Midrach Arie, ja los pagava en regla

            En el anio de 5614, li nasio una Ija i en este parto i tambien si alegraron muntcho, i de mismo si pronto las narandjas ke las prontavan para adulsar a los vijitadores eja lo desija a todas las mujeres ke la narandjada ke avija prontado era komo dulse por Ijo, ke eja kerija parir Ijo, i de esto la parida si enojava i jorava, ma torna todas la vijitavan i li mandavan los platos i presentes, i la jamaron AMADA, i eja su madre sigun todos los otros ansi de mismo la kodio tambien i a esta, i en el anio de 5631, ke ja arivo en la edad de kasarla, ke non las dechavan arivar a la mas grande edad de esto, su Padre la kaso en Kiostendil kon S-r. Avraam de Hako i a eja li djo su boena achugar i el buen kontado, i isieron la boda mui kontentes de todas las 2 partes i su marido bive tambien mui kontente kon eja i li pario Ijos i Ijas, su negosio es merkader de ropas de kasalinos, i tiene boena pasadija, de todas las 2 partes ejas siempre si vinijan de los unos ande los otros komo musafires i si estavan kon semanas enteras, solo por sus plaseres i kon esto si

854                                          Biografia de H. Rabenutcho Josef Arie.                                       1854

kontentavan, de todas las 2 partes eja koando vinija a Samokov lis traiva muntchos modos de frutas ke eja las tenija en su kasa,

1. Rabenutcho aun kon todo ke en la plasa era mas kajado ma en kasa avlava muntcho kon toda su familia i el era de mismo su negosio de los otros anios solo ke siempre foe endo en manko i lo todo ke si entrego enteramente a S-r. Romano ke el koal era una persona de los primeros enganijadores i el seja ke non tenija el konto por ir mas a filibe or por otras rasones, foe ke siempre li ketava kontos de piedritas i en una ves li eniego el grupo entero, i ansi en unas koantas veses ke lo foe asiendo i la furtuna ke tenija ke ja si li enmanko mui muntcho vino ma ser ke mas non lo pudo kontinoar, i el ke asija los kontos i de todas las kartas ke li mandava era ke non kerija saver de nada ni menos ke li respondija, i por enderetchar estos kontos li kalio ke foera el mismo a Filibe i kon los mil rogativas i pleitos kon ke nomenaron una komision sovre estas deferensias lo isieron kon ke los konvinieron por ke li diera S-r. Romano una tchika suma de monda i kon esto se vino a Samokov, kale disir entero vasio, i ansi foe ke estuvo mui, sikilijado, sovre todo ke non tenija de otro luger de ande mantenerse, i estuvo ansi algo de tiempo boeno sufriendo, i de esto era ke non salia de kasa i en veses si okupava en los etchos de el Kolel, para resentar los livros ke esto de el eskrivir savija muntcho i tenija una eskritura mui klara, i su ermano kon sus primos ermanos era ke lo kudijavan i li mandavan lo todo era kon esperar i de esto se iva muntcho

855                                          Biografia de H. Rabenutcho Josef Arie.                                       1854

aflakandose, i en kasa su mujer ke non savija de el en todo aser la ikonomija, li era i esto ainda mas apretos, esto de arivar de pechin en los apretos ja es kosa ke existe en muntcha djente ke por koalo serija esto mi es una demanda sovre todo a H. Rabenutcho ke ja era persona ke savija jevar boenos kontos, ke sigun mi non es solo la kavsa de flakesa de furtunas, a toda vija era un boen merkader para akel tiempo, ke ansi una furtuna ja podija responder a los 2000 groches ke podija a lo muntcho tener de gaste, es solo poede ser ke si goadravan muntcho la unor, i lo ivan eskondiendo,

            En el anio de 5615, H. Rabenutcho estava de mismo sin dingun etcho, el ke era menesteroso por ganarse koala foesa, por poder enkontrar sus gastes, era ke si iva kamenando mui muntcho abatido, i tambien ke el non estava topando, era ke iva estando algo malato i sus parientes ke ja lo vijan era solo sus primos ermanos ke lo ivan regalando porke su ermano H. Elijatchuno tambien en este anio i el estuvo sin dingun etcho, sigun ke ja lo meldaron en la partida suja, i de esto ke lo regalavan non li era bastante porke el sigun ditcho ke si komportava kon lo mano mas antcha, i la ikonomija su mujer non la savija aserla i ansi foe ke en este anio el sufrio unos koantos meses, fin ke li kalio si aderesara ande sus primos ermanos porke lo mitieran en algun etcho ke altramente el kalija or ke si matara or ke si foera por estos

856                                          Biografia de H. Rabenutcho Josef Arie.                                       1855

mundos i endelantre, por la rason ke non esta pudiendo mantener a sus krijaturas, i en este tiempo ke Tchelebi Jeuda i Avraam tenijan grandes okupasiones, en la armada de Silistra i ke lis estavan abastisiendoles toda la komanija por la armada Turka, en la Guere de Savastopol, i por enfrentante, a esto tenijan pasada a ejos la moneda ke kaiva en la kacha de Kiostendil, i para esto ke H. Rabenutcho ja era kapatche, porke ja si entindija en las monedas ke en akel tiempo tambien non es komo agora ke es la moneda solo de una manera otro ke era las monedas de todo modo de governo i toda moneda vieja, ke son las valutas seja de plata komo tanbien i de oro eran resividas i serkolijavan todos, i sigun ditcho ke esto ja lo konosija, foe ke lo jamaron Tchelebi Jeuda i Avraam por proposarle esto si el lo kerija irse a Kiostendil por resivir la moneda ke iva a kaer en la kacha de el Governo i todo esto ke iva a resivir ke la devija de trokarla por oro i en kada pochta ke devija de remeterla a Kostan ande ejos li ivan a dar el orden i lo todo ke devija aparte de kada pochta ke era uvilgado de eskrivirles todas las operasiones ke iva aserlas kon darles nota de todo loke paso, ke devija tambien i eskrivir koando topava i okasion porke era solo una ves a la semana ke avijan pochtas i por su paga ke li podijan pagar a 500 groches a el mes por su paga i esto todo ke lo sentija i ke el ja lo podija reintchir, el si asento de rodijas i lis beso las aldas de todos los 2 komo sinijal de atchitamiento, ke esta manera era el uso en akel tiempo, i sigun de loke ja si akavidavan siempre por koalo foesa ke trataran era ke lo

857                                          Biografia de H. Rabenutcho Josef Arie.                                       1855

tomavan siempre por eskrito i aki tambien lo isieron ke si isieron kontratos kon todas las kondisiones ke eran menesterosas, i H. Rabenutcho jeno de la alegrija, li dieron de pechin 200 groches porke akomodara los primeros menesteres por su vijaje i sin tadrar el ja estuvo pronto en akel mismo dija i kon las dukomentos menesterosos ke li dieron para el motesarif de Kiostendil a la manijana partio mui gustoso i kontente, i arivando en Kiostendil el si asento a reintchir su mision ke la foe asiendo lo todo a detras de los ordenes ke el los tenija, sin dinguna mankura,

            i su familia ke resto en Samokov, era ke resivija regularmente su semanada ke li tenija fiksado, i ejas tambien eran mui kontentes, i pasavan mui bien,

            En el anio de 5616, foe de mismo ke H. Rabenutcho kontinuava en las operasiones de la kacha lo todo sigun de antes, i lo reintchija pontualmente, porke era mui merikioso sovre este de ser pontual, en todo esto ke lavorava, i sus primos ermanos tambien eran kontentes de su lavoro, i el ke ja estuvo enfasijado de estar, solo, i ke non savija si era ke ainda iva a estar, en Kiostendil, lis demando a sus primos si komo los gastes sujos i estos de Samokov, li estavan siendo grandes, lo kirija venirsen todos en Kiostendil, sovre esto li dicheron ke ainda ja iva aver etcho en Kiostendil i ke el es

858                                          Biografia de H. Rabenutcho Josef Arie.                                       1856

libero para aser, sovre esto todo loke el keri, i sovre esto el si jevo a su mujer i krijaturas i sero la kasa de Samokov, porke su ermano H. Elijatchuno ja si avija merkado otra kasa i mas non meraron en djuntos, mismo ke la medija kasa ja era suja, i el en Kiostendil si resento kasa moeva, i estavan biviendo mui bien kontentes,

            En este anio en siendo en Kiostendil, li nasio, un IJO ke si gusto muntcho, i lo iso en kada dija ke la vijitaran a la parida, i en el dija de el Birkad mila jamo muntchos amigos a ke komieran en su kasa, i lo jamaron Josef, i su madre kon grande kudijado lo kresio, (i es este el Jusuf Efendi ke devino a ser uno de los grandes tresladadores en el kabineto sikreto, de el palasio de el Sultan Hamid, en los telegrafos, sigun ke ja lo tengo eskrito en lo partida, de su Papu Hr. Josef, i en mas largo sigun de loke vino a ser en esto koando eskrivire su partida ja lo van a meldar,)

             El ke ja estuvo mui bien resentado en Kiostendil i el etcho ke si li tenija konfijado ja era ke kamenava en mui regla i ke ja saven tambien ke su manera de bivir era en mas antcho ke apenas era ke li estava abastando la mesada ke el resivija, i komposedor de kartas ke ja era mui boeno, lis eskrivio a sus amos porke lo alesensijaran de merkar algunos artikolos ke eran mas korientes de la plasa, i esto de unas sumas de 8 a 10 mil gr. i la ganansija ke iva a ser a kontra metad, ke kon esto era ke i el iva a poder alguna kosa amontonar, visto ke de la mesada non li estava sovrando nada i por ke si aprovetchara, la alesensijaron solo ke non li limitaron la

859                                          Biografia de H. Rabenutcho Josef Arie.                                       1856

suma de monda ke podija travar, para echpikulijar en ansi artikolos otro ke solo lo uvligaron ke devija de aserlo saver por kada artikolo ke iva a merkar ansi tambien i para aser la vendita, i esto koando lo alesensijavan, i el ke ja tuvo esta lesensija lo primero ke merko foe un suvat^[22] (ke es vakas i bufanas engodradas), i las mando a Filibe i edirne, ke presto si li vendieron i tuvo boenas ganansijas, i denpoes el merko mas grandes partidas de mantekas i lanas de los karakatchanes^[23], ke i en esto tambien tuvo de mismo mas mijor ganansija i ansi era ke si topava mui bien kontente i a esta rason el era ke i gastava tambien mas muntcho, ke su natura era de bivir kon antchura solo ke amontonar non estava pudiendo nada, el si konportava de mui galanton i todos en Kiostendil lo konsideravan muntcho, i non li era en su ojo nada el gastar, el konochijava kon la djente mas grande, i lo mas muntcho li iva ande un sierto H. Nesimatche ke el koal era uno de los notavles de la sivdad, i de el tomava muntchos konsejos, i todo lo akonsejava por el sujo enteres, sigun ke a los kavos lo enganio i li komio muntcha moneda lo todo goadrandolo en mui sikreto por ke non lo supieran sus amos ke lo enganijava, i lo kandirjava, porke revejara en sus amos, i de lo todo ejos ke ja lo savijan ma non tenijan este tiempo para deklarar estas kosas ke non si lis enportava, mismo si tratavan kontra de ejos,

860                                          Biografia de H. Rabenutcho Josef Arie.                                      1857

            En el anio de 5617, ke sus primos ermanos Tchelebi Jeuda i avraam, ke estavan muntcho okupados en sus maneras de angajamentos ke ejos, tenijan, era ke non tenijan el tiempo ni de komer, ke vinija dijas ke ejos lis anotchesija, sin ke si konsintieran por sus mantinimiento, i ansi era ke mas non pudieron kontrolijar a las operasiones ke iva asiendo H. Rabenutcho, i el ke ja lo savija esto era ke mas non estuvo remetiendo en regla a los lugares ke remitija mas antes i ansi ke siempre estava en moneda en la kacha de sumas grandes, i sin ke mas demando el konsintimiento de sus amos por los empleos de los artikolos ke los asija en partikular, era ke todo esto ke li vinija a la mano el lo iva merkando i en mismo tiempo tambien i asija las venditas, ke de esta ke ganava el si lo gastava i de esto ke pedrija lo iva eskondiendo i ansi era ke si iva intchendo la suma a su konto en manko, i siendo ke tenija muntchas piedritas el iva de moevo merkando los modos de artikolos, ke si li presentavan kon la esperansa ke iva a ganar, i ansi poder tapar las piedritas de antes, i mas non eskrivija kartas ke de Samokov ke li ivan eskriviendole i apretandolo el kerija saver de nada, i non respondija, otro ke en siempre en ir merkando los artikolos mismo ke non li eran konosidos, en este anio komo ja non sopo mas koalo aser, el topo una grande partida de lanas menudas i de badjakes^[24] ke era kosa ke non si podijan vendersen i sin examenarlas las merko a los presios de la plasa, i tambien el merko i bufanas engodradas kon la entision de mandarlas a Kostan ke de esto iva a ser, ke si li ivan a tapar todas piedritas

861                                          Biografia de H. Rabenutcho Josef Arie.                                       1857

i gastes ke los foe tiniendo, ma de esto lo tuvo mas negro ke de todo el kon las bufanas ke mando a Kostan loke li detuvieron foe apenas la metad de su valor, i kon las lanas foe ke li kalio enpesara a vender, kon eskojer, i esto kon manko de el kosto, i de esto loke pudo vender foe a penas la metad ke la otra metad era toda badjak, i resto en magasen, i el viendose en este grado lo topo de mijor de akonsejarse kon su ermanastro, H. Chemoelatche el Chichko i li eskrivija en largo de todo loke li estava pasando, i tambien los etchos ke asija i el poder ke el lo tenija, i sigun ke ja lo saven ke el S-r. de H. Chemoelatche komo de persona tresjarador i kadirjatchi^[25] foe era ke siempre li eskrivija ke loke devija de aser era solo i solo de meter moneda a la vanda koanto lo poede sin ke tenga de nada a espantarse, i esto ke ja lo podija, lo foe asiendo, i metiendose a sumas grandes de moneda en kacha, i de tanto ke lo apretavan el lo asija de non responder a dinguna karta, pensandose por ke mas presto li vengan a tomarli el etcho i el desija ke koanto mas muntcha moneda si goadrava para el era mas mijor ke la kondana es todo uno komo disen ke preso por mil i preso por mil i kinientos es todo uno, i la maravija era de loke si komportava tambien i en estos tiempos kon los gastes ke non los trokava, visto a tantos males seja de los ke travo de antes seja de estos ke los estava travando, i en este tiempo, i esto kale seja ke es ansi koando la persona ja si da de rindido, i non pensa mas por atras, el en la kacha era de mismo ke todas las operasiones atras non las dechava, i de mismo de ves en koanto era, i

862                                          Biografia de H. Rabenutcho Josef Arie.                                       1857

ke remetija tambien i a Kostan algunas tchikas sumas, ke kon esto era ke enganijava,

            En el anio de 5618, li nasio una IJA i kon eja tambien lo iso sigun los otros parto solo ke aki tuvo una demasija ke li mando a la parida presentes en djoja, i la parida si gusto de esto mui muntcho, i la jamaron MASAL. ke este nombre de masal en ansi okasion kali taksar por ke si li trokara el masal,

            Kon las operasiones de la kacha ke ja foeron muntcho mas tchikas en este anio era ke de lo poko ke avija tambien iva apartando, de mismo para su kacha, i kontinuava, a remeter a Kostan sigun de antes solo ke non si iva konforme a los ordenes, ke li davan de Samokov otro ke lo asija sigun de loke el lo kerija,

            I kon los artikolos ke el los iva merkando, partikularmente, aun kon todo ke li eskrivijan porke mas non lo isiera esto de merkar a dingun presio ma el de mismo non sintija, i lo iva tambien kontinuando, i sovre todo ke mas ja non mandava ni kartas ni menos notas de las operasiones ke las asija, i visto a esto i S-r. Mochonatche el IJO de Tchelebi Jeuda ke ja devija de partir, kon adjile por Salonique, lo kargaron porke restara en Kiostendil para ke li merara los kontos de H. Rabenutcho, ma malgrado ke estuvo unos dos dijas era ke H. Rabenutcho se iva eskondiendo i de lo poko ke pudo

863                                          Biografia de H. Rabenutcho Josef Arie.                                       1858

alkansar a entender de los kontos ke estavan mui enboljados^[26], foe ke ja es estava en manko en una suma bien enportante, i siendo ke el non podija restarse mas ke su mision de Salonique era mui enportante lo pudo aser solo ke li tomo todos los deretchos seja estos de la kacha komo tambien i todos los otros, i en largo lo eskrivio a Samokov, porke ejos presto lo isieran akejo ke era el menester, i S-r. Mochonatche partio por Salonique, sin ke si lo iso saver a H. Rabenutcho de el komporto seja de el uno komo tambien i de el otro, ke sovre esto ke H. Rabenutcho ke si foe de moevo a su lavoro i defendiendolo foe ke si kijo komportar, komo patron i de esto ke li vino kontra a el Motesarif, lo metio en preso por 24 ores, i el enkantado de esto si foe en kasa, i mas non kijo saver, de nada, i a tantas kartas ke li eskrivijan por ke si viniera a Samokov, en disiendole ke eran mui premorosos de su vinida a Samokov el tambien non los sintia y se akonsejava kon el Chichko kon kartas i kon H. Nesimatche, de boka i ejos ke sus okopasiones eran tanto grandes, ke non podijan salir de Samokov, i a ken mandar otro ke non tenijan era ke resto el etcho ansi dekolgado i H. Rabenutcho estuvo mui ravioso, de esta etcha ke li isieron de tomarle los deretchos, ma el de loke antes si komportava seja en kasa komo tambien i en la plasa era lo todo de mismo sin dingua trokamiento,

864                                          Biografia de H. Rabenutcho Josef Arie.                                       1859

            En el anio de 5619, ke H. Rabenutcho foe de mismo ke resto en Kiostendil, i ke non kijo vinir a Samokov por entregar los kontos de todas las operasiones ke el iso en todo el tiempo ke el estuvo i ejos sigun ditcho ke non podijan ir a Kiostendil, i el menester ke lo tuvieron en este tiempo seja por la moneda komo tambien i otras rasones, foe ke lis kalio, a lo jamaran a su ermano H. Elijatchuno ke estava tambien empeigado kon ejos en los etchos de Prisdren i en su lugar resto por poko tiempo su ajudador ke el lo tenija i se vino a Kiostaendil kon ke ja li mandaron todos los dukomentos ke eran el menester para ke li tomara i li examenara los kontos sovre todo i la moneda, i de el presipio H. Rabenutcho tambien si kijo eskonderse, i non lo kijo konoser ma lo iso ke kalio si aderesara a la polisija, i kon esto lo pudo tomarselo en su kamareta ke tomo en uno de los Hanes i li turo 2 meses estos kontos ke lo mas si lis iva enpelijarsen i koando ja vinieron en el grado de serarsen los kontos H. Elijatchuno si sikilio mui muntcho, i aun kon todo ke li resivio todos los artikolos, de las echpekolasiones separatas ke las asija kon sus presios djustos i li rebatio todas las piedritas de estas echpekolasiones, i todos los gastes i tambien sus masadas, es ke torna kon todo resto a dever una suma de 200.000 groches, i estos kontos todos los mando H. Elijatchuno a Samokov, i de tanto ke el peno a mandarlo a Samokov por el presipio non lo pudo i buchko a tomarle al menos esto ke tenija de moneda pronta or algun uvligo por eskrito de mismo non li atchetava en nada i ansi foe ke si espero en

865                                          Biografia de H. Rabenutcho Josef Arie.                                       1859

fin a tomar el orden por ande ke partiera, solo ke los artikolos de las echpekolasiones foe ke si las pudo tomar i las mando a Samokov, ke i de esto foe mui repentido H. Rabenutcho por ke si las djo ke el Chichko sovre esta lo jamo ASNO. i de Samokov Tchelebi Jeuda i Avraam, resiviendo los kontos i de poko examenarlos ke lo vijan en tanto manko li eskrivieron por ke buchkara a traerlo de la manera foesa, mismo i por vija la polis, i el ke si viniera djuntos i sovre este orden H. Elijatchuno lo iso i los podo traer a todos ejos i li iso serar la kasa de Kiostendil i koando ja vinieron denpoes ke ja estuvo eskondido unos koantos dijas a detras de los konsejos de H. Chemoelatche, porke non avlara, i sigun ke ja foe ansi, ke de tanto ke li avlavan el era ke non respondija nada, i no rekonosija tambien nada, i H. Elijatchuno ke ja estuvo algo de tiempo i ke non pudo reuchir a konvenirlos li kalio ke partiera i el por su etcho de moevo a Prisdra, i resto ansi algo de tiempo,

1. Rabenutcho visto ke un sierto tiempo non foe mas presiguido, i parisiendole ke ja foe ulvidada la kosa el si metio en prontamientos de aser boda i kasarlo a el IJO S-r. Behor, ke estava esposado, kon la Biju ija de H. Mochonatche de H. Chelomo levi i en esto estuvo longo tiempo okupado en ir prontando de todos los puntos i asiendo gastes extraordenarios, i sovre esto ke H. Elijatchuno i otros amigos ke lo akonsejavan ke aparte ke el non kerija ni sintir era ke si los kontava en la KALDERA, ke es el partido, kontra los ARIES, i koando ja estuvo pronto de los menesteres, de la

866                                          Biografia de H. Rabenutcho Josef Arie.                                       1859

komanija i estos de kasa si kortaron todos ejos modos de vistidos moevos i la isieron la boda kon grande saltanat, ke konbedava a la sivdad entera, i se gustaron i se alegraron, i de todas las 2 partes foeron mui kontentes porke la novija aparte ke eja ja trucho muntcha achugar i kontado era ke la novija era mui ermosa i mui entelejente (es a esta Bijo ke la kerija por novija S-r, Nesimatche, el IJO 2do de H. Elijatchuno ke el la vija siempre traer tepsis de pidis a el orno ke era visino a sus kasa, i koando li disija a el furundji^[27], kon un ton mui delikado: FUdundji at benim tepsii. i eja avlava sisidiosa^[28] ke r non podija disir,) eja los konsidirava a todos los de kasa, i a su novio era eja ke li atava mismo los chalvares, porke foe mui tchiko i el non supo muntcho tiempo ke ja estava kasado i loke es kasar, era eja ke lo enbesava,

            koando ja si eskapo i el etcho de la boda i ke no tenija koalo aser lo iso ke si eskrivio i el komo un miembro, al partido la Kaldera, sigun ke ja lo saven ke eran kontra de la familia Arie ke es solo de los vinientes de Hr. Tchelebi, i, este partido era komposado de H. Chemoelatche el Chichko, i H. Moche B. Aaron, i H. Iaakov B. David, ala kavesera de H. Chelomo Koen, i aparte avijan tambien i algunos otros miembros ke non existijan siempre de koando tenijan las adjuntas, i en este tiempo ejos ke tenijan las adjuntas mas espesas era ke estavan notches enteras platikando sovre la quistion de el KAAL moevo ke ja estava serka para eskaparse fraguar, i en la piedra ke metieron ala entrada de las primeras

867                                          Biografia de H. Rabenutcho Josef Arie.                                       1859

poertas entre las eskrituras ke isieron, eskrivir kon letras de oro, ke ivan a aser eskrivir tambien solo los nombres de Jeuda, Gavriel i Avraam, Arie lo koal ke ejos en tantas notchadas ke ejos platikaron solo de esta tanto enportante quistion, sus ditchision foe ke si devija eskrivir tambien i veakoanim, i esto ke lo isieron protokol i se lo presentaron a Tchelebi Jeuda ke era el presedente de la komoneta, i Tchelebi Jeuda lis dicho va bien, i ke ja lo tiene de aser eskrivir ansi i de esta manera esta eskrito fin oi, i de esta manera era ke kosas ke si enbevisijan, ejos por koando ivan a tener las adjuntas, era ke si prontavan de antes las komanijas i biviendas, ke ejos entre sus platikas djugavan tambien i algunos djuegos komo fildjanes^[29], ke tienen estos djuegos muntchas kantikas, i en mismo tiempo tambien el bever ke H, Chemoelatche solo era una persona ke si bivija una oka de raki i sin ke si enboratchara, ke esto non era solo en los pasatiempos ke lo bevija, ja era or en kada notche, i ansi tambien eran i todos los otros, solo ke a mas apoko i tambien ke si i enboratchavan, ke esto lo asijan koando ja davan el karar de la kistion ke la platikava i el avlador i kandirjador mas grande era H. Chemoelatche, i todos lo sintijan i tomavan en mano sus avlas, ke lo mas muntcho era sus avlas sigun ditcho por estos Aries, ke si keri merado de topar el molde a tomarles el poder, seja en los etchos de el Kolel seja i en estos de la plasa i de las admenestresiones, i kon bos alta i godra lis disija, BRE, BRE, mira ermanos ke estos Aries va avenir un tiempo ande non vamos a poder pasar ni delantre sus

868                                          Biografia de H. Rabenutcho Josef Arie.                                       1859

butikas ni menos delantre de ejos, i esto era porke el H. Chemoelatche era verdad ke si travava de pasar porke sigun mas antes ja lo eskrivi por la kistion de Selistra, sovre el rovo ke el lo iso de 300,0 mil groches, i ke non pago ni un santim, i ke el ja si enpatrono de ejas era ke li vinija mui pesgado koando si las demandavan,(i ansi de mismo ja lo iso i kon mi Tchelebi, su ISO S-r. Behoratche, de una hevra ke tuvimos en el hachar de la okolija^[30] de Ihtiman en el anio de 5631, ke mi komio 50,000 gr, i lo meti a H. Rabenutcho porke lo konviniera el etcho i non iso nada, i ansi mas ja foe i kon sus Inietos S-res Chabad i Nisim ke eran Jondjis^[31] i lis komieron de los Ijos de S-r. Mochonatche, i S-r. Refaelatche a miles de Frankos, ke ejos so[n] torna en el mismo grado,) i en esta quistion eran mui enteresados todos i era en las adjuntas ke asijan la una detras de la otra solo en esta quistion ke platikavan notches enteras, fin ke lo toparon i dieron el karar, de mandarlo a H. Chelemo Koen ande Tchelebi Jeuda, kon ke lo enbesaron de koala manera si devija konportar i si era el menester ke podija i pelijar, i H. Chelomo komo era una persona maha i non si li boltava muntcho, foe ke el resivio a ir ande Tchelebi Jeuda, i en una demanijana ke ja estava tambien i Tchelebi Jeuda en el magasen, lo veen a H. Chelomo ke entra i todos maravijados de esta entradura, lo resivieron kon muntcha onor i li dieron tchibuk i kahve i denpoes ke ja si demandaron el hal hatir, estas esperando loke es ke iva a kerer, i de la kamareta ande si merava el etcho era aparte ke ejos estavan solos en su kamareta partikular ke estava solo

869                                          Biografia de H. Rabenutcho Josef Arie.                                       1859

Tchelebi Jeuda ande resivija a los mas grandes personajes, i H. Chelomo ke iva viendo entrar i salir a muntchas personas i todos presto eskapandosen sus etchos i se salijan ke ja estavan esperando a dieses de persona i ansi ke non tenijan el tiempo de avlar kon dinguno ke koal era ke traiva moneda i koal ke tomava, i H. Chelomo li dise, sigun de loke jo lo esto viendo, es ke ejos non tienen el tiempo no, de sintir ami, sovre la mision ke jo vini, ejos non estan alkansando, a responder mismo por sus etchos, ke ala kompanija moestra lis paresija ke i ejos tambien estavan enbevisidos, en las vanedades ke mosotros estamos pidriendo notches enteras en kosas ke non melo imajenavamos, i jo ke vini aki es ke foe mandado por ke venga a pelejar kon ejo si agora ke jo ja lo esto viendo kon mi propio ojo, es a rogarles sovre esto ke jo los detuve, i mi konosko por kulposo, i ami mi kale presto levantarme, i non ser kavsante de detenerlos de sus etchos i se levanto kon muntchas pardones, i ejos non li avlaron tambien nada, i se foe vergonsoso, i repentido por el jero ke lo iso

            I a la notche, ke ja si rekojeron toda la kompanija en la kasa de sus presedente, ke es H. Chelomo Koen, i todos kon despasensija, ke esperavan de todo loke lis paso ke lis iva a kontar, i el boen de H. Chelomo sigun ditcho ke era una persona mui reposada i denpoes ke ja bivieron a unas koantas de raki a kada uno, los dicho, todos mosotros, estamos enbabokados i undidos en el fondo de las venedades, i pidriendo notches enteras, i kedando atras de moestros etchos ke foe ande Tchelebi Jeuda, i lo vidi kon mi ojo, sus tantas

870                                          Biografia de H. Rabenutcho Josef Arie.                                       1859

okopasiones i respondiendo a las miles de personas, ke estan entrando i saliendo, i merando sus etchos, sin ke tienen el tiempo, de merarme i sintirme, a esto ke jo lis podija avlarles, i ansi ke jo mi topi tanto vergonsoso, ande non tuve el kuraje, de avrir ni la boka, i visto a esto jo buchki mas presto de salirme, i para non ser al menos jo kavsante, a detenerlos de sus etchos, sigun ke ja es mui bien savido ke esto non entra en la lei de la merkansija, i la omanedad, es ansi ke i agora ke ja estach en mi kasa, de mi parte vos akonsejo, porke non tengach mas adjuntas, i jo so el primer, ke por endelantre sovre ansi platikas jo non tengo de asistir, i todos mui enkantados de sintir todas estas avlas lis kajo a todos una mui grande kajades, ke non uvo ken ke li respondiera nada, i presto ja si levantaron, i denpoes de esto mas non si rekojeron, i foe kon esto ke si bosdejo la Kaldera i se aunaron el Kolel entero i li rogaron a Tchelebi Jeuda porke los pedronara, i ke si okopera torna sigun de antes ke mas non tienen de vinir en nada kontra, i de esta manera, foe ke longo tiempo mas todos loke asija Tchelebi Jeuda akejo era, porke el era ke sakrefikava tambien i moneda, en okasion lo koal ke los otros esto non lo asijan, i el tambien ke tenija la mui grande enfloensa en todas las admenestrasiones, ke era i de esto ke si enselavan mui muntcho,

            Koanto a la quistion de H. Rabenutcho, kon las ropas ke li avijan tomado, de estos de Kiostendil, lo vindijan lo todo a pedrer, i kon las lanas si las vendieron a H. Josef burla fijado ke

871                                          Biografia de H. Rabenutcho Josef Arie.                                       1859

el koal non kijo pagarles ni un santim i se lo komio todo, i H. Rabenutcho aparte ke non si okopava era ke si maskarijava de enfrente ke esto lo decharon para mas tadre, por aranjar esto,

            En el anio de 5620, malgrado ke lo jamaron a H. Rabenutcho unas koantas veses porke lo reglara sus kontos al amigavle i sovre lo todo ke lis iva kontra, foe ke lis kalio ke lo dieran a el djusgo, i kon los konsejos de H. Chemoelatche, lo iso ke si foe a Filibe a buchkar de aserse sudito, ke kon esto li parisio, ke mas non li poeden aserli nada, i se komija la moneda, i H. Rabenutcho ke ja lo sentija si foe i topo a aserse sudito Italijano, i para alkansar esta soditansa, li kalio ke gastara una suma de 25000 groches, i se vino a Samokov mui gustoso, i solo li iva valiendo ke el djusgo lo foe pudiendo prolongar, i era ke de todas las 2 partes los gastes ke ivan asiendo eran mui grandes, i esto ke ja uvo una fin el prolongamiento, foe ke a los kavos si li deklaro ke la suja soditansa era falsa, i a esta rason aparte de loke lo iso esto ke ja tiene kondana lo kondenaron tambien i por la suma de moneda ke li buchkavan, kon los gastes, i komo non pudo demostrarse, lo metieron en preso kon prangas ( ke esto de las prangas ja lo tengo eskrito mas antes komo eran,) i estava enserado kon los katiles^[32], ke estuvo longo tiempo, i koando ja si aserko JOM NORA^[33], li foeron algunos seja parientes or

872                                          Biografia de H. Rabenutcho Josef Arie.                                       1860

amigos, a rogarle a Tchelebi Jeuda porke lo isiera soltar, al menos por el dija de Jom-nora^[34], ma Tchelebi Jeuda seja por esto ke era mui ensanijado de las etchas ke lis iso seja por ke non dependija de el porke non era solo ke estava enserado por la devda era tambien i por la sodetansa, i ansi ke otros non avijan ke lo podijan eserlo soltar foe ke kedo en preso i la notche de Jom nora, i sigun el uso ke todos los Djidios, ke si van a el Kaal, de la tadre i H. Rabenutcho ka estava en preso, i la ora ke ivan a avrir las poertas de el Ehal para el kal Nidre, foe ke si metio Hr. Avraam Alkalai ke era el Rabino de la sivdad i non decho avrir las poertas todo tiempo ke H. Rabenutcho, non viene i el a el Kaal komo ansi un dija de las pedronansa i los todos de akordo sovre esto, lo miran todos a Tchelebi Jeuda, i li foeron serka de el en disiendole ke es solo el ke lo podija aser asoltor, i Tchelebi Jeuda ke si adereso a Tchelebi Avraam, lo isieron de mander a los mansevos ke eran S-res Behoratche kon su ermano Nesimatche, ande Rachid Bei, ke el koal era un miembro de la Familija de Usref Pacha, kon ke li dicheran muntchas saludes de Hodja Jeudatche, por ke foera kon ejos djuntos ande el Kaimakam Jasin bei i ke lo ketara a H. Rabenutcho por un dija i los mansevos ke si vinieran a el Kaal deretcho djuntos kon H. Rabenutcho i ejos ke li foeron ande Rachid Bei, sin dingun refuzo, foeron djuntos ande el Kaimakam i lo tomaron a H. Rabenutcho i si vinieron deretcho a el Kaal i en todo este tiempo, fin ke foeron i vinieron ke ja si entiende el karar de tiempo ke paso, i todos lo Djidios estuvieron esperando

873                                          Biografia de H. Rabenutcho Josef Arie.                                       1860

kon despasensija la arivada de H. Rabenutcho ke koando ja vino li rengrasiaron todos los Djidios a Tchelebi Jeuda i entonses ketaron los Sefer torod i enpesaron el arvid ke salieron komo la medija notche de el Kaal, i H. Rabenutcho vergonsoso si foe en su kasa i la notche ke ja salimos de Jom-nora si foe de moevo a su lugariko, i li enklavaron de moevo las prangas, i denpoes ke ja estuvo ainda mas longo tiempo kon las rogativas de parte las mujeres foe ke lo isieron meter en libertad kon siertas kondisiones, por forma,

            En el anio de 5621, ke H. Rabenutcho ja estuvo libero de el preso i kanso muntcho ke ja estava, lo asija ke si estava en kasa, porke el paras ja tenija bastante por su pasadija, i era lo todo ke estava meldando porke esto ja lo konosija mui bien i en las notches sin ke lo viera dinguno si li iva ande H. Chemoelatche i estavan platikando fin a la medija notche, ke lo todo era ke li kontava las operasiones i las etchas ke las iso en su estar en Kiostendil, i H. Chemoelatche lo sintija i lo enbesava por el sujo defindimiento, sovre el djusgo ke el tenija, ma el ke ja tenija paras iva gastando kon la mano antcha ke asija un gaste de 15000 groches a el anio i esto si li eskaparon mui presto,

            Su Mujer la Bu. Sarutcha ke li plasija muntcho vijitar era ke estava dijas enteros en esto i traendole los moevas de

874                                          Biografia de H. Rabenutcho Josef Arie.                                       1861

la sevdad a su marido i su noera ke ja si estava en kasa era ke kudijava por el menester de la Kasa, porke eja vino enbesada mui bien de la kasa de la madre, i H. Rabenutcho era ke muntchos dijas i las notches tambien si li iva ande su ermano H. Merkadutcho ke estava hasino i li jevava tambien i montchos presentes, seja en la komanija komo tambien i en moneda i otras kosas porke H. Merkadutcho foe a los kavos mui menesteroso,

            En el anio de 5622 a H. Rabenutcho li nasio un Ijo ke lo isieron tambien boda i todos la vijitaron a la parida i li mandaron platos, i lo jamaron Jeuda i su madre lo kreo i lo kudio, (es este el jeuda ke si auno kon una banda de ladrones i entraron en la kasa de S-r. Mairutcho Alkalai por rovar, i si komo lo aferaron ke lo matieron en preso kon prangas foe kapatche seja kon la ajuda de sus kompanieros seja la sola suja lo iso ke pudo suvirse por arientro la chemeneja i en siendo kon las prangas de 20 kilos i se abacho por el tejado i se foe a el kampo i se desklavo las prangas ke las decho en el kampo i el de balkan en balkan si foe a Kostan i se iso turko ke kon esto pudo delebrarse i lo nomenaron komo Polis Mester^[35] por una de las plasas de Kostan, i mas tadre ke el iso algunas kulpas en Kostan lo ketaron i se foe a Brusa i se kaso kon 2 mujeres turkas ke ja tenijan paras i tuvo Ijos i Ijas, ma a los kavos non

875                                          Biografia de H. Rabenutcho Josef Arie.                                       1862

se supo ande kedo,) i en este tiempo ke ja estuvo enfastiado de estar en vasio, enpeso a merkar algunos artikolos de la plasa ke los topava mas konvenivles, komo koeros de kavras ke los merkavan los tabakes i lanas de los vlahos i ansi i otros artikolos, i los detinija fin ke topava su presio, i aparte era ke dava tambien i a algunos Djidios sus konosidos algo de moneda kon tchikos enteresos i por mui kurtos tiempos, ke esto non li tapavan los gastes sigun ditcho ke li eran grandes i la familia tambien ke la tuvo mas grande era ke iva komiendo de el kapetal,

            Su mujer era de mismo sigun de los otros anios ke su penserio era siempre en vijitar i enbesarse hiduchim, i era su noera ke kudijava por la kasa entera, i sus ijos frekontavan las echkolas i siempre indo adelantre,

            En este anio ke vino a Samokov H. Haimatche Arie (non es de la Familia moestra) el mediko de Sofia, por vijitar a sus parientes a rason ke se iva a ir a jeruchalaim, i el koal si aparentava muntcho kon H. Elijatchuno i H. Rabenutcho (ke non se komo de parentes^[36] tenijan,) i ke estuvo tambien i en sus kasas, foe ke li prometio a H. Elijatchuno a darle komo presente, un livro de su mano eskrito por muntchas maneras de ratchetas para deferentes hasinuras ke las tenija enbesado de su padre ke el koal tambien era mediko en Sofia, ma H. Elijatchuno si lo refoso, en disiendole ke non kirija embroljarse en ansi kosa a rason ke ja era tadre para el enbesarse la medkiria, i H. Rabenutcho ke lo supo este foe ke

876                                          Biografia de H. Rabenutcho Josef Arie.                                       1862

si lo demando i se lo enpresento i aparte foe ke li dio unas koantas liksiones de los presipios de la medkiria, i tambien li deklaro i mas kosas konvinientes de la medkiria, i H. Rabenutcho este livro lo estuvo estudiandolo muntcho tiempo i foe ke a los kavos de la vida de su Ijo S-r. Behor ke foe menesteroso era i el tambien ke lo estudijava i asija algunas kuras para los kasalinos, i se aprovetchava de esto i ganava,

            En este anio tambien li nasio una Ija i ja i kon eja tambien lo isieron de mismo sigun de las otras i la jamaron Ventura de a la koala en el anio de 5638 sus ermanos la kasaron en Filibe kon S-r. _____ i li dieron achugar i boen kontado, i eja pasa mui bien i pario Ijos i Ijas i biven mui kontentes,

            En el anio de 5623, li nasio a S-r. Behor una IJA, i si gustaron mui muntcho ke lo isieron tambien mas muntcho de boda, i la parida estuvo 8 dijas en la kama por ke non si podija levantar, de esto ke siempre la ivan vijitando, i todos sus parientes li mandavan siempre muntchos presentes, i el esfoegro li mando muntchos dukados i tambien presentes de vistimientas, seja para la parida komo tambien i para la nasida i la jamaron JAFA, ke su madre la krejo i la aletcho, i eja ke era mui kichta de toda la kasa, la meravan muntcho,

1. Rabenutcho, en este anio si iso haver kon su asan

877                                          Biografia de H. Rabenutcho Josef Arie.                                       1863

Aga ke i era visino i merkaron unos koantos kasales, de Hachar, i metieron de kapital los 75% H. Rabenutcho i los 25% el asan aga, i ke ivan todos los dos a kamenar sovre el etcho, ejos ke el etcho todos los 2 ke ja lo konosijan, era ke si ivan a los kasales i estavan todo el tiempo ke si rekojen los trigos, i komo topavan a vender los trigos en el mismo kasal si los vindijan a los kasalinos ke era lo todo a fijado i komo non topavan ejos lo traivan a la sivdad i lo metijan en hambar, i por el envierno lo ivan vindiendolo tanbien a los kasalinos lo todo a fijado por ke era kon los presies mas karos i de esto a los presipios ja ganavan boeno solo ke para aser los kovramientos era kon muntcho mal ke non podija kovrar porke eran estos kasalinos ke ejos lis vindijan mui proves, i era kon esto ke lo ivan todos los 2 pasando, i koando non tenija de kamenar por los kasales era ke si asentava en la kavane, de los turkos, i en veses ke salia a la plasa merkava algunos gaitanes, i se los dava a su IJO S-r. Behoratche, por ke los vindiera, por la plasa para kon esto ke enpesara a enbesarse los presipios de la merkansija, ma era ke non lo pudo de el presipio aserlo esto i era i el tambien ke si iva a la kavane,

            Kon los 80 groches ke devija versar en kada mes a los Hahamim ke meldavan en la jecheva, ke esto ja lo saven foe ke mas no lis djo, i Hr. Avraam Alkalai ke los resivija para espartirselos entre ejos i los Hahamim ke non kijeron mas ir por meldar, es ke Hr. Avraam, lis foe ande Tchelebi Jeuda i Avraam por kecharse sovre esto ke non los estavan resiviendo i ke li dicheran koalo era loke podija

878                                          Biografia de H. Rabenutcho Josef Arie.                                       1863

aser, i sus repoesta foe ke ejos isieron Ekdech 10,000 groches, i el revinido de esto ke era 160 groches a el mes ke iva a ser por sus paga i esto ke los deven H. Elijatchuno kon H. Rabenutcho, i agora ke non lis estan pagando ejos non tienen loke aserlis i komo keri ke los foe a el djusgo i ke si los kovren, porke ni H. Elijatchuno tambien non lis estava pagando, i sovre esto Hr. Avraam los djo a el Djusgo i los kondino ma torna kon todo non pudo nada kovrar, i resto ansi por un sierto tiempo,

            Sovre el etcho de la suma ke resto a dever H. Rabenutcho de el etcho de Kiostandil, anke ke li avlava tanto su ermano H. Elijatchuno porke lis diera koanto foesa, i kon esto si iva todo a eskapar ma H. Rabenutcho a detras de los konsejos de H. Chemoelatche era ke non entrava en nada, ke i esto tambien resto ansi,

            En el anio de 5624, ke su IJO estava en vasio i algo de paras ke dainda ja tenija, lo iso ke si tomo una butika, i se foeron djunto kon el IJO a la ferija de usundje ova^[37], i merkaron ropas de mali faktura, i esto en partidas mas grandes, i la resentaron mui bien ke foe de el presipio ke si asento tambien i el padre, porke el ja lo konosija este etcho, i entre los 2 ivan asiendo mui boenas venditas i de el presipio ejos vendijan kon los presios mas baratos fin ke si li enbesavan los muchteris, i los kontos non los asijan tanto

879                                          Biografia de H. Rabenutcho Josef Arie.                                       1864

djustos por rason ke non metijan muntchas maneras de gastes aun ke pertenesijan para el etcho de la butika lo todo para ke demostrara mas grande ganansija, i kon esto ke si enkorajara el ISO [ijo] para ke lo kontinuera, porke non estava kiriendo levorar en nada, i lo mas se estava en kasa, i se eskondija, i lo mas muntcho era el mismo ke si okupava, ke esto era koando i el non tenija los etchos de los hachares ke siempre foe haver kon el Asan aga, i siempre tomavan a unos koantos kasales, i se ivan a los kasales ke esto lis turava de 3 a 4 meses i en este tiempo era solo su IJO S-r. Behoratche ke kedava en la butika, i el era ke respondija ma lo todo era ke non sabija ni loke dava ni loke tomava, i koando vinija el padre i ke lo vija las venditas ke asija, era ke lo gritava ma S-r. Behor se reiva, i non li vinija unos koantos dijas a la butika,

            El ke sufrija de la dolor de las piernas ke tenija foerte rematismo, era ke por el envierno non podija salir muntcho i li kalija ke estuviera lo mas muntcho asentado en kasa, i su pasatiempo era lo todo kon el livro ke li enpresento H. Haimetche, Ariel de midkirija i era dijas i notches enteras ke estava estudiandolo, i aparte si tomava muntchas notas, lo eskrivir li plasia mui muntcho, i savija aser muntchas komposisiones, el eskrivio algunos livros ma non salieron en medio, ke los goadran porke non si supiera de loke eskrivija, ke esto para agora ke ja pasaron muntchos anios ja eran enportantes de meldarsen, por koalo seja ke si eskrivirija,

            En este anio ke si morio su ermano H. Elijatchuno el

880                                          Biografia de H. Rabenutcho Josef Arie.                                       1864

si sikilio mui muntcho i lo mas muntcho estava en sus kasa, por akompanijarlos ke foe una mui grande mansija, para toda la Familia, el los ajudava en muntchas okasiones por todos los menesteres, aun kon todo ke el gaste de su kasa tambien era bastante grande, sovre todo ke i la familija era kada dija engrandisiendose,

            En el anio de 5625, era de mismo ke la butika kontinuava su IJO S-r. Behor ke la jamava BITO, ma sigun ditcho ke non merava koando asija las venditas si konvenija or non otro ke solo era vender i tambien ejos non si meravan kontos si era ke ganavan or ke pedrijan, era solo kamenar adelentre i koando kerija paras era siempre el padre ke li iva abastisiendole,

            i kon el etcho de los hachares en este anio ejos de mismo en Hevra kon el Asan aga merkaron sumas muntcho mas grandes de los otros anios, i por el afito foe ke la anijada non foe, de el en todo frotchigusa, i ansi foe ke tuvieron grandes piedritas, i de esto si lis rebevio muntchos pleitos kon el Hasan Aga, ke enpesaron a irsen kontra de el uno a el otro, i ke uvo tiempo ke si defendieron i a foersa de las armas, porke i H. Rabenutcho ja savija boeno tambien servirse de las armas, i de esto foe los kavos de sus Hevrod

            en este anio ke los rematisimos si li enfortisieron mas muntcho li kalio ke si foera a los banios de la Bana de Saparev,

881                                          Biografia de H. Rabenutcho Josef Arie.                                       1865

i el si enpeso a rekojer todo akejo ke lo podija tener de menester i lo todo lo enpakava mui bien i lo iva aparijando, seja en kosas de komanija seja tambien i en vistidos i algo de mobilija, i lo todo koando ja estuvo pronto, el si alkelo karos de vakas ke esta manera si vijajava por los banios, i el kon toda su familija partieron en dechandolo a su IJO el S-r. Behor kon su mujer en kasa, i tambien ke iva a kudijar i por la butika, i ejos todos ke partieron bien kargados de sus ropas i a la tadre ke ejos ja arivaron a la bana, i ke enpeso a deskargar, sus ropas, ke non eran pokas lo vido ke el kiordi ke si lo metija en las tadres non lo vido presto i ke non si akodro si es ke lo abacho de el karo, foe ke si asento i enpeso a eskrivirle una karta en mas largo por su IJO ke ja lo saven tambien ke li plasija muntcho i en largo eskrivir, i li enpeso de el presipio, a darle a entender, de koala manera ejos partieron de kasa, i kada kosa i kosa de onde la tomo i komo la enpako i sigun tambien ke el la kargo a el karo, i el kiordi ke estava en la trampanika de la kamareta grande, de debacho de las rimas tchikas, sigun de loke lo enborojo, en el bogo amario ke era de la S-ra madre, i komo si suvieron a los karos, i por el kamino ande restavan i ande komieron, i komo de moevo ejos si sovijan i komo partijan, i sigun de koando arivaron a la bana komo se abacharon las kosas i komo se resentaron, i kon el kiordi ke non si estava akodrando si lo abacho de el karo, i komo era ke ivan a aser las banios, i ansi mas en mui largo lo todo en esta manera de linguajes, ke si entcheron 3 pligos, alkavo por la

882                                          Biografia de H. Rabenutcho Josef Arie.                                       1865

quistion de el Kiordi non pudo alkansar a eskaparla i el kiratchi ke non kijo mas esperar, foe ke la sero lo karta sin eskaparla, i la mando i su IJO koando ja la resivio ke la meldo en tanto largo foe i el ke si ulvedo sovre la quistion de el kiordi si lo topo or ke lo buchkara en kasa i li kalio ke la meldara sigunda ves i ke non entendjo lo penso ke kale seja si li pedririja por el kamino i li eskrivio por mandarle otro ke el ja tenija muntchos kiordis, i esta korespondensija lis turo unes koantos dijas, i alos kavos foe ke el kiordi ja estuvo en la bana, el ke iso pokos banios foe ke li foeron mui muntcho provetchosos, i lo pasaron todas sus maladijas i mas longo tiempo non tuvo dinguna dolor, i foe mui sano i boeno,

            En el anio de 5626, apenas H. Rabenutcho lo pudo de vinir en un akordo kon el Hasan Aga, i esto para merarsen los kontos i de espartirsen porke si avija tambien pasado el Hasan Aga muntcha suma de moneda a su konto i koando ja si meraron los kontos foe ke pidrieron suma grande de monda i aparte li kedo a dever el Aga tambien 4000 groches ke por estos li tomo un bono ke non li pudo kovrarli ke mas non kijo aser este etcho de los hachares foe ke si asento i el en la butika i el etcho lo antcharon mas muntcho tambien era de mismo ke non profetavan porke de koando la avrieron la butika ejos ni una ves non si meraron konto, ke siempre el era ke resivija la

883                                          Biografia de H. Rabenutcho Josef Arie.                                       1866

la moneda ke kaiva a la butika i el era ke dava koando era el menester, i de la butika tambien si travava para todo el gaste de la kasa porke i esto non era poko, i lo todo por esto ke ejos gastavan dingunas notas non tomavan, i ansi era ke siempre ivan endo en manko, ma era lo todo sin avlar solo ke foera pasando,

            En este anio la kaso a su Ija Rahelu kon su sovrino S-r Refael de H. Elijatchuno, i li djo achugar boena i 400 gr, de kontado ke esto de el kontado lo decharon por mas tadre pagarlo, i la boda la isieron de todo djusto i todos los vijitaron i parientes ke ja eran ejos pasaron mui boenos sigun ke ja lo eskrivi en la partida de S-r. Refael,

            i en este anio tambien li nasio a su IJO S-r Behor una Ija ke lo isieron tambien sigun todas las paridas i la jamaron Venesia, era ke si gustava mui muntcho H. Rabenutcho de koando iva nasiendo inietikos el li dava siempre dukados por presente seja para la parida komo tambien i para lo krijatura, ke si lo kosijan en la karapusa kon mas kosas ke lis metijan a las krijaturas por el ojo malo, i a esta Venesija koando ja foe la edad de kasarse la kaso su tijo S-r Josef ke ja los detinija a toda la Familija en su estar en Kostan kon S-r. jak el drogero, i li djo su boena achuger i boen kontado, i biven mui boenos i kontentes,

            Su Ijo el S-r Behor ke era una persona mui travada ke todo si estava eskondiendose i entre la djente non si aserkava i ejos ke tenija de aver de sus venditas ke asijan en la

884                                          Biografia de H. Rabenutcho Josef Arie.                                       1866

butika, foe en este tiempo ke non li estavan pagando tanto en regla, i sigun ditcho ke S-r. Behor su Ijo ke si avregonsava de irles a demander era ke si lis iva rekojendo kada dija mas muntcho, i esto tambien li kavsava a ke sufrieran sus enteresos, i era ansi ke lo ivan boltando i lo ivan pasando,

            En el anio de 5627, sigun ditcho de antes ke el etcho de la butika non lis estuvo endoles boeno ja foe en este anio ke mas ja non pudieron meter ropas moevas i era ke ivan vindiendo de lo poko ke avijan de ropas i komiendo, i ansi era ke H. Rabenutcho estava mui sikilijado, i estuvo tambien algo i hasino, ke sigun de loke si vija era ke ainda algo de moneda ja tenija, ma ja era mui poka, i el gaste kijo travarlo ma su mujer non lo sentija i la familija ja lis foe grande era lo todo de mismo,

            I su Ijo, ke en la butika ja era el etcho mui tchiko i dijas enteros ke non avija loke ke isiera, si tomo i el livro ke lis avija enpresentado H. Haimatche Ariel, i enpeso a estudijarlo i de esto si enbeso algunos maadjunes ke los asian mleskados kon modos de drogas, i ala eskondida los vendija a los kasalinos por algunas maladijas sikretas i kon esto se iva enbevesiendo, ma non era kosa ke lo mantenija,

            El desejo de H. Rabenutcho era siempre por torna empeigarse

885                                          Biografia de H. Rabenutcho Josef Arie.                                       1867

i esto el lo kiria ande Tchelebi Jeude i Avraam, lo todo kon entision ke algun ditcho aun kon todo ke ja se vija ke tenja dainda i algo de paras lo todo a la vista de los gastes ke el, los asija sin dingunas trokamientos ma la verdad era ke ja estava en mui manko i su entision era si en kavso lo topava el molde por torna entrar i ja estava siguro ke lo iva a poder torna pasarse a si ansi una suma redonda i entonses el ja si iva a saver mijor konportar para asigurarse la vida, para siempre, i denpoes de muntchos sus penserios por topar el molde de su desejo foe, ke si adereso ande H. Avramatche el de H. Refael ke era tambien su primo ermano, i li dicho avrime la poerta ande Tchelebi jeuda i jo vos pagare voestra boena komision i H. Avramatche li demando ja si eskaparon? ma jo poedo ir solo ande Tchelebi Avraam, i esto tambien li dicho ja es bastente, i H. avramatche ke li foe ande Tchelebi  Avraam, i disiendole sovre la mision ke vino i lo todo en mui kurto porke ejos non tenijan el tiempo de muntcho platikar i ke ejos seja ke ja si ulvedaron a rason ke ja pasaron anios or seja ke tenijan el menester de personales ke podijan eskapar etcho i sovre toda sigun de loke si vee mas muntcho es ke tenijan mui grande sempateja kon sus parientes i ke siempre los kijeron ajudar, i mismo ke lis komijan i lis vinijan muntchas veses kontra i esto sigun ke ja lo estan viendo ke non era a poko ma torna kon todo non si lis enportava porke ja lis estava koriendo el etcho komo los rios, i li dicho mandameldelo ke esto a H. Rabenutcho li entro en ke pensar ma H. Avramatche la

886                                          Biografia de H. Rabenutcho Josef Arie.                                       1867

enkorajo en disiendole ke ejos koando vos keren por loke vos pensach, ja non lo savech ke ja vos jevan komo el novio? i H. Rabenutcho kon entrarle li dise los mil eskulpamientos i ke el loke iso e es todo verdad, i ke lis tiene de pagarles ke lis es devdor, ma agora es menesterosos, i Tchelebi avraam solo li dicho, es de kreer e esto?, ma estavos pronto por en estos dijas ja vos vamos poder mandarvos komo lo kerlech por la parte de la tuna, i kon una mesada de 500 gr. de paga a el mes, i H. Rabenutcho ke si gusto tanto por ke el de koando foe el etcho de Kiostendil ke non si tinijan akarado, i se salio, i se foe a su butika ke ja lo estava esperandolo H. Avramatche i todos los 2 foeron maravijados, i este ultimo ke li kijo su komision foe ke pago la ora ke iva a partir, i H. Rabenutcho enpeso a prontarse presto seja kon etcho de la butika komo tambien i todos los otros menesteres, i esperando por koando lo jamavan a estarse pronto,

            En el anio de 5628, ke H. Rabenutcho ja estuvo en Vidin i sigun ke ja lo saven tambien sigun de los kontratos ke los asijan kon todos sus empeigados solo ke aki foe kon los medios deretchos i kon el etcho de moneda el non tuvo mas dingun deretcho, otro ke era solo ke si okupava en el resumat, ke es los diesmos de todos los pechkados ke, los aferavan de la tuna i kalia ke li pasaran por

887                                          Biografia de H. Rabenutcho Josef Arie.                                       1868

su ojo i lis kovrava una sierta taksa ke ja era fiksada, i kon las sumas de moneda ke si enkasavan era ke ja avia otra persona ke la resivija i ansi era ke esto li foe por los presipios mui pesgado ma non tenija koalo aser,

            En este anio li nasio tambien a su Ijo S-r. Behor un Ijo ke kon el koal tambien lo isieron lo todo sigun de los otros i lo jamaron Haim, i todos la vijitaron mismo ke H. Rabenutcho non estava, i su madre lo krio i tambien eja ke ja era mui nekotchera los kudijava a todas sus krijaturas i tambien i a su marido i la kasa entera, el ja non tuvo mas nada de ropa en la butika, i era solo ke si enbevisija i estava dijas enteros estudiando el livro de la medkirija, i prontava algunas kuras i maadjunes, i en los dijas ke eran de pasar, vendija a sus muchteris kasalinos de el etcho de la medkirija, algunos artikolos komo sal i aros i algunos otros ansi artikolos, i kon la semanada ke li tenija fiksado su padre era ke la resivija en kada semana i se ivan mui bien pasando sin ke asijan nada de ikonomija ke por esto tambien era ke koando si salija de el empeigo non li sovrava nada i siempre kedava a dever,

            En este anio, Tchelebi Avraam li eskrivio a H. Rabenutcho ke ja estava entre Vidin i Lom porke li topara una Novia para su Ijo S-r. Refaelatche i H. Rabenutcho ke iva siempre en la kasa de S-r. Leon B. Ishak de Lom li demando a su Ija la Buka i este ultimo ke ja konosija mui bien a la familia moestra foe ke jevaron

888                                          Biografia de H. Rabenutcho Josef Arie.                                       1868

mas larga korespondensija los de parte de la Novia pensandosen ke enbaldes non es ke demandaron a su Ija ke esto el non lo meresia i se pensavan ke kale seja ke el Novio ternija alguna makula i ejos demandaron muntchas enformasiones i referensias, i ansi foe ke lis turo mas longo tiempo fin aser las kondisiones ke ja foeron unas koantas, i tambien kon el kontado

            En el anio de 5629, ke mas ja non uvo dingun etcho seja en Vidin komo tambien i en Lom, lo trucheron a Samokov i lo detinijan en vasio kon ke li pagavan su mesada, i en veses lo mandavan por rekavdos seja por las sivdades komo Sofia, Filibe, Haskovo, Stara Sagora, i ansi otras sivdades ke tenijan de aver de fieros i otras kosas, i estava kon meses enteros kamenando, i en veses lo mandavan tambien i por los kasales, lo todo por rekavdos i enderetchamiento de algunos kontos, i koando esto tambien non avija era ke lo mandavan a la kanselaria de el kolel por lo resentera las partidas de los jehidim, a rason ke siempre avijan deferensias kon los jehidim, i tambien porke isiera algunos kovramientos de las taksas ke tenijan los jehidim, ke i en esto tambien era lo mas muntcho ejos ke si okupavan ke todos los mechartim koando non podijan kovrar de ande lis amostravan era ande ejos ke si lis aderesavan i ejos lis avansavan por sus menesteres, i esto era lo todo ke lis

889                                          Biografia de H. Rabenutcho Josef Arie.                                       1869

davan porke uviera sostinimiento de komunita i tambien ke ejos los todos se ivan kada demaniana de kada dija a el Kaal por disir las Tefilod ansi en todas las tadres i koando merkavan sahtijanes^[38] era a el ke lo mandavan a lom ke era el komertcho porke los resiviera i los kargara a el vapor para Viena ki i en este tambien li turava unos koantos meses,

            kon sus Ijos los mas tchikos eran ke kontinuavan la echkola a el S-r. jeuda non li plasija muntcho estudiar, ke su tino era la mas muntcho en djugar i gastar ke el la apretava a la madre porke li diera paras i lo todo para mansevirias,

            I kon su Ijo el grande el S-r. Behor ke estava sin etcho era ansi de mismo i S-r. Behoratche el Ijo de H. Chemoelatche el Chichko i los dos ermanos ke son los padres ke vinieron en un kavo ejos lo toparon de serlos haverim i ke ejos si enbesaran alguna kosa de la merkansija, i entre los 2 padres li merkaron 2 kasales de hachar, i kon esto ejos enpesaron i era H. Rabenutcho, ke los iva enbesandolos, i lis resentava los tefteres, ma ejos todos los 2 ke eran mui regalados, era ke non savijan ni loke davan ni loke tomavan i ansi era ke non profetavan nada, i siempre pedrijan, i de esta manera ejos ivan kontinuando, i H. Rabenutcho si sikilijava mui muntcho porke el era menesteroso,

890                                          Biografia de H. Rabenutcho Josef Arie.                                       1870

            En este anio de 5630, H. Rabenutcho mas non foe empeigado ande Tchelebi Jeuda i Avraam i sigun ditcho mas antes ke a el non li sovrava nunka de las mesadas ke resivija, i siempre li era ke li mankava, i en esta anijada tambien foe lo mismo i li kalia ke si enprestara torna de ejos alguna suma para poder pasar unos koantos dijas, el era ke si iva por los tchorbadjis, i lis iva deskuvriendo algunos sikretos de los lugares ande el vijajava, lo todo en etcho de poletika, i esto ke lis era agradavle a ejos era ke lo aserkavan i en veses lo asijan ganar, de algunos sus artikolos ke lis vindija i esto kalija el ke kamenara, muntcho para aserlis las venditas i li pagavan una tchika komision, ma si komo non tenija otra kosa koalo aser era en esto ke si iva enbevisiendo, i en veses si enprestava i de ejos tambien, algunas sumas de moneda solo por abasteser los gastes de su kasa, i esto mismo lo asija tambien ke si iva ande los beguis turkos i lis rogava porke li isieron ganar alguna kosa kon ke el ja tiene de kamenar, para aser, venditas de fieros i algunas otras kosas i en mismo tiempo el lis asija i algunos hismetis, ke lis asija emlejos para kasa, i por las fabrikas, ma lo todo era kosa ke non si podija ganar por el menester, de sus gastes anke ke ja los avija muntcho akurtado,

            Su Ijo, ke era haver, kon su sovrino, ejos ke si meraron los kontos i siendo ke pidrieron foe ke mas non kontinuaron i loke li kedo a dever a H. Chemoelatche, si li endevdo, kon bonos, i de tanto delikado, ke era, torna kon todo el se iva a pie por los

891                                          Biografia de H. Rabenutcho Josef Arie.                                       1870

Kasales, i koalo podija de algunos artikolos lis jevava, por venderselos, i en mismo tiempo el lis merkava, or ke lo asija trampa, kon algunos, trigos i koeros, i algunas otras ansi kosas i las traiva a el pasar por venderlas i tambien buchkava de rekavdar de los averes ke el tenija seja de el tiempo de la butika komo tambien i de los hachares, ke esto de algunos ja kovrava, i kon esto ke algo el padre i algo el IJO, era ke si ivan de el uno a el otro, ajudandosen, i siempre estava merando torna de empeigarse, ke sigun ja lo eskrivi en unas koantas partidas ke la persona ke si enbeso a ser empeigado es mui foerte para ke poeda lavorar por so konto solo, i alos mas muntchos non lis poede afitar, ma i esto es tambien un masal, porke non eran personas ke non savijan de etchos kale disir ke mas mijor de sus amos, solo ke ejos koando tomavan etchos por sus kontos a dingun presio era ke a estos non lis afetava, i ansi foe ke todas sus vidas eran uvligados de lavorar por konto de el otro i ejos solo de resivir sus pagas

            En el anio de 5631, li nasio a su IJO S-r. Behoratche una IJA, ke de mismo lo isieron sigun todos los otros partos, i ejos todos los 2 ke eran sin etcho, era ke si estavan lo mas muntcho en kasa, ma non podijan gastar komo de mas antes, era ke muntchas veses ejos si enprestavan i esto tanto presto non podijan pagarlas, ansi era ke si avregonsavan i por esto tambien non salijan tanto

892                                          Biografia de H. Rabenutcho Josef Arie.                                       1871

por la plasa, i el nombre de la ija la jamaron LEA, ke la koala koando ja foe la edad de kasarse i ke su padre non bivija, i su tio Josef ke era en Kostan i ke si los avija jevado a toda la familia a Kostan porke foe el ke los kudio a todos, i la kaso en Dubnisa, kon S-r. Avraam Levi, i por la boda se vino a Dubnisa su madre i li djo muntcha achugar i boen kontado, i eja ke ja foe mui boena en todos los puntos, foeron mui kontentes de todas las 2 partes, i eja pario IJOS I IJAS, i su marido es la boena posicion^[39] ke biven mui kontentes.

1. Rabenutcho ke estava sin dingun etcho foe en este anio ke los IJOS de Tchelebi Jeuda ke avijan avrido una banka en Kostan por operasiones de bankerlik, i siendo ke estavan en konversasiones kon S-res Jshak Albala i Asaria Geron, de Filibe, por avrir una sukursala i en filibe, li dicheron si el si kirija irse a Filibe, komo sus prikura, kon ke li ivan a pagar a 600 groches a el mes i un tchiko % de las ganansias, de los etchos ke si ivan a poder asersen en Filibe, i el ke ja estuvo de akordo era ke estava esperando kon despasensija por koando lo ivan a jamer,

            Sus IJOS, los mas tchikos eran en la Echkola i el Josef iva mui adelantre, i lo kirija mui muntcho el profesor, porke si enbesava las liksiones, mijor de todos los otros elevos i era mui vergonsoso ma afoera de la natura su entelejensia, i koanto a el otro el S-r. Jeuda era lo todo al kontrario, ke aparte ke era algo de el meojo manko tenija tambien i muntchas negriguras, ke non eskutchava

893                                          Biografia de H. Rabenutcho Josef Arie.                                       1871

a dinguno, i siempre, era sus penserios en todo modo de nigrigura, i por esto lo tenijan mui grande ataganto seja su padre komo tambien i sus ermanos, ma non lo podieron poder aser repentir,

            En el anio de 5632, ke los IJOS de Tchelebi Jeuda sigun ditcho antes ke ja si konvinieron kon los S-res Jshak Albala, i Asarja Geron por ke lo mandaron tambien i a H. Ranenutcho, komo sus prekura, i ejos si resentaron en el etcho i enpesaron en las operasions, de dar polisas a la kacha de el governo ke resivijan la moneda en Filibe, i dopo de 31 dija si pagava la polisa en Kostan i era ke tomavan tambien alguna tchika kosa de ajo, i los bechlikes ke resivijan en Filibe era ke los trokavan por oro i en Kostan tambien ke avija deferensija en los bechlikes ke ejos los merkavan koando era ke ivan a pagar la polisa, avija tambien de 1 1/2 a 2 % de deferensija ansi era ke ganavan de 2 a 2 1/2 % esto era ke davan en kada semana de 10 a 12 jukes de polisas, i aparte tambien tenijan i ke si travavan de los unos a los otros, tambien non era a sumas tchikas, i esto a los presipios, H. Rabenutcho, non las konosija ma mas tadre i el tambien ja si las enbeso mui boenas, i lo ivan siempre engrandisiendo, i eran de todas las partes mui kontentes, i H. Rabenutcho era ke estava solo i por el menester de sus mantinimiento lis mandava de Filibe, ke non tomavan de Samokov, lo todo por esto ke kijo tener el

894                                          Biografia de H. Rabenutcho Josef Arie.                                       1872

gaste mas tchiko, ma torna kon todo non lo pudo enmankar, porke su Familija ja era bastante grande,

Su IJO el S-r. Behor tambien ke i el non tenija dingun etcho era ke kamenava por el varoch, i el ke ja savija algunas kuras i en este anio en Samokov estuvo kaje lo mas de los mansevos kon frios, i el lis dava la kura i tenija el masal ke lis pasava, i lis tomava por el presipio de 2 a 3 fr. por su paga, ma esto komo djo mui grande renome ke kon la itcherija de S-r. Behor era ke lis pasava foe ke lo enpesaron a buchkarlo en kasa, i el lo iso komo taksa ke lis tomava a 5 fr. por la una kura i era kosa de anatava ke todo el ken la tomava, era ke li pasavan i mas non li boltavan i la kura ke lis dava era ke tomava un denk, (80 santigram) de solfato i lo anatava^[40] kon 2 damlas de kesap, i lo espartija en 3 i si lo asija bever la una partida demanijana i la otra la medio dija i la ultima en la tadre i kon esto era ke lis pasava, i en kada kura li etchava un bafo,^[41] i de esto era ke tenija en kada dija a 6 i 7 muchteris, i aparte era ke lis dava i para algunas otras hasinuras, de por afoera, i de esto tambien ke ja era bastante aparte ke lis era bastante por ajudar a los gastes era tambien i ke li sovrava,

En el anio de 5633, H. Rabenutcho ke ja estuvo mui bien resentado, en el etcho i tanbien ke ja foe i grande, lo iso ke

895                                          Biografia de H. Rabenutcho Josef Arie.                                       1873

si jevo a su mujer kon sus krijatoras a Filibe, i avrio kasa moeva en dechandolo a su IJO kon su Familija i de esto su IJO foe mui sikiliado, lo todo espantandose por su pasadija, ke el non tenija nada ma su padre ja lo asiguro ke non pensara sovre esto ke el ja lo tentja de kudijar mas muntcho de loke si lo podija pensar, i kon esto foe ke ja reposo, sigun ke ja foe ansi ke siempre li mandava, i aparte en kada tiempo li mandava tambien i kosa de komanija i de vistimientas, porke H. Rabenutcho non era solo ke esperava a la mesada otro ke el asija tambien i algunas echpekolasiones, i se ganava tambien aparte, i ansi era ke ja estuvieron kontentes todos los 2.

            I S-r. Behoratche ke ja asija la medkirija, era de mismo ke kamenava por el varoch, i tambien por las mejanes, por los kasalinos, i el seja de el livro seja de las pratikas, si enbeso, una otra itchorija ke es para bel soukligi^[42]. (hasinuras de mujeres ke lis vienen a los mansevos,) i esta itchorija la asija de esta manera, ke tomava una oka de alvijanas i las partija i se komijan los gajos, i las kachkas las metija a buir en una oka de agua, i denpoes ke boeno ja boeron, la dechava jelar la agoa i se la dava a bever, a los hasinos ke la bivieran a un feldjan en kada ora, i kon esto era ke reposavan i las vinija boeno i muntchos se sanavan, kon esto, i para esto tambien foe en este anio ke li ivan muntchos viniendo i lis tomava tambien a 5 fr. por kada una oka de kachkas de alvijanas boidas sin los gajos, lo todo lo asija en mui sikreto porke era defendido muntcho a personas ke non eran medikos de dar ansi kuras, ma el ja lo

896                                          Biografia de H. Rabenutcho Josef Arie.                                       1873

iva asiendo sin por nada espartarse, i de esto tambien foe ke en esta anio lo foe pasando,

              En el anio de 5634, ke H. Rabenutcho era en Filibe kon su familija, era ke pasavan mui kontentes, i el etcho ke tenijan tambien ke ja lis foe mui grande, ke a esta rason foe ke i a el tambien li pujaron la page, i aparte lo alesensiaron porke i el podija prevalerse kon alguna suma de moneda, de la oda de Filibe, por aser algunas merkansijas por su konto, i esto ke el ja lo savija aserlo era ke foe merkando partidas de areses [arozes] i de trigos, i ansi koalo si li presentava, i en filibe ke ja era plasa bien biva, ja li afetava ke todos los artikolos ke el los merkava, siempre los vendija anke kon pokas ganansias, ma siendo ke las sumas ke asija ja eran de kantedades mas grandes, era ke ja si topava mui bien kontente i ansi era ke ja li sovrava i para mandarle tambien i a el IJO a Samokov, i aparte li sovrava ke ja tenija amontonado komo 6000 fr,

                        Su IJO el S-r. Behoratche ke si okupava en el etcho de la medkirija foe en este anio ke el kijo vijitar i a algunos hasinos ke non si podija entender las sus maladijas i sigun de su pareser foe ke a un hasino li djo unas kuras ke eran kontra de su hasinura, i foe ke estuvo persa ke a esta kavsa aparte ke lo defendieron foe tambien i ke lo amenasaron i el ke ja si espanto mui muntcho, mas

897                                          Biografia de H. Rabenutcho Josef Arie.                                       1874

non kijo kontinuar en esto, i de el espanto ke el tuvo, foe ke el estuvo eskandido en kasa unos koantos dijas, i mas tadre el si foe a Filibe ande su padre, a rogarle ke el si estava espantando de estarse mas en samokov, a rason de esto i ansi es ke kijo ke lo ajudara por merkarse el hachar de el kasal de Kiostendja, i ke si iva a ir a estarse en Kiotendja, i ke iva aser tambien i algunas otras merkansijas en el kasal ke ja era grande, i su padre en tal ke si enbivisiera i ke tambien ke lo amenasaron foe ke lo kontento i le dicho ke lo merkara, i ke el ja lo iva ajudar, si entiende kon el etcho de la moneda, i ansi lo iso ke en su tiempo el foe lo merko el hachar de Kiostendja, i el ke ja lo konosija este etcho, era ke si okupava el solo, i lo iva enkamenando, i el mas non vino a Samokov, muntcho tiempo otro ke siempre lis mandava, seja en moneda komo tambien i kosas de komanija ke ja avija en el kasal, mas tadre el enpeso a merkar i algo de materijal de lenios, komo tavlas i lenios, i esto una partida los mekava kon paras i otra partida los asija trampa kon trigos i de esto, koando si li rekojija mas grande partida ke tanto presto non lo topava a venderlo en el kasal ke siempre ja vinijan merkadores era el ke los jevava, koando a pasardjik i koando a Filibe i kon esto tambien era ke podija vender kon mijor presio los trigos, i de filibe el merkava tambien i algunos artikolos ke eran pasables en Kiostendja, i mas tadre el kon esto foe ke si avrio tambien i una tchika butika, i enpeso a resentarla de los artikolos ke si li demandavan, el en el kasal era bien visto por los presipios porke

898                                          Biografia de H. Rabenutcho Josef Arie.                                       1874

el lis asija tambien i algunas kuras para las krijaturas i non lis tomava paras, i kon esto foe ke mas tadre algunos li traivan kosa de komania, i otros li davan tambien i paras,

            En el anio de 5635, S-r. Behoratche era de mismo ke kontinuava en Kiostendja, en las merkansijas de el anio pasado porke el ja lo pudo presentar [resentar] el etcho fin a un grado, i ja si estava mui boena pasando i se topava kontente, i en este tiempo ke su IJO iva endo a filibe el lo vija ke su padre iva estando malato lo todo ke si li avijan renovado, sus maladijas ke antes unos koantos anios el sufrija, i muntchos dijas non estava pudiendo salir a la plase, ke esto los  apretava mui muntcho i eran espantados, porke li foe mui foerte, fin a ke arivo a estarse en kasa muntchos dijas i los medikos siempre lo ivan kurandolo ma sin ke el topava dingun provetcho, i los gastes tambien ke li eran mi grandes, se iva muntcho sikilijando ke koando ja tuvo el masal de arivar a rekojer algo de paras foe ke arivo en esto, era ke si iva aflakandose, sus IJOS  los  mas tchikos ke son el Jeuda kon Josef kontinuavan la echkola i era ke el Josef iva mui adelantre, sovre  los  estudios, i era mui travado, ke non kerija ver a dinguno, i estava dijas i notches enteras siempre, undido en sus estudios ma el Jeuda a tanto ke penavan kon el era ke non kijo entrar en nada de esto i ansi foe ke mas non lo mandavan i lo dechavan

899                                          Biografia de H. Rabenutcho Josef Arie.                                       1875

ke isiera sigun lo kerija porke enpesava tambien i a pelejar, ke era algo i de el meojo mankito,

1. Rabenutcho koando mas foe endo mas muntcho si li foeron enfortesiendole sus maladijas, ke era los omores (rematismo) i la kasa ke tenija en Filibe, era mui jelada, lo toparon ke podija ser serija de este i lo isieron de vinirsen a Samokov, i estuvo etchado en kama serka 4 meses, sin ke si podija menejar, i de tantas kuras ke li isieron i medikos ke era kon muntcho gastar, fin ke a los kavos el avija arivado a non tener, ni para gastar i foe uvligado de ketar de lo poko de djoja ke tenija i la vendija para poderse governar, fin ke en el——,——- kedo moerto, solo de esto i ke foe mui flako, en dechando a su mujer i sus krijaturas en vasio de lo todo, ke lo joraron por 2 males, i su IJO el S-r. Behoratche ke estava en Kiostendja se vino a Samokov, i el lo joro mas muntcho de todos por la rason ke li kedo agora toda la karga de la kasa a el solo, ma sus parientes ja lo enkorajavan i denpoes ke ja estuvo unos koantos dijas el si foe de moevo a su etcho a Kiostendja, i de mismo kontinuava en su butika i sus averes de el Hachar, i en mismo tiempo tambien el etcho de las tavlas ke siempre las jevava a Pasardjik, i kon esto el ja estava pudiendo detener la kasa entera,

900                                                      ENTELEJENSE KURJOSA

Adetras de la vida ke paso, H. Rabenutcho, ami mi es kurioso, de meldarla sovre todo ke el arivo i fin a estar, i kon prangas, koalo es esto,? non es solo de la grande, energia, ke el non si espantava de nada, so [su] entelejensa, ja li konvensija a lo todo, i la prova es ke mismo ke a los mismos ke lis asija los tantos males a el pareser, es ke torna kon todo a el li konfijavan los mas grandes, negosios, ke non si poede disir porke non avrija poede ser otra djente kapatches komo a el ma era el saverisio mui grande, i mui entelejente, el ke kedava muntchas veses sin un groch, non li era nada, por ke ja savija kondjenir etchos, solo ke en este linaje kaje ke todos lo tuvieron esto ke por sus kontos non lo pudieron en nada reuchir, i lis kalio ke foeran siempre lavorara por kontos de los otros, por una djente ke non reuchen en sus negosios le disimos porke non es kapatche i non es entelejente ke si decha enganiar de los otros, aki es a disir ke son mas muntcho de kapatches i entelejentes, i torna kon todo ke non reuchen, lo vamos a poder disir ke todos los 2 vienen a ser igual, i resta solo el etcho a MASAL? los anios de la vida de H. Rabenutcho foeron todos a penas 47 anios i murio,

901

Asta aki si eskapa la partida de H. Rabenutcho, en sus 47 anios de vida ke tuvo, el lavoro sin kansarse, i kon saverisio i non li foe su vida tanto reposada, porke el foe siempre menesteroso, i sus ondos penserios lo aflakaron, i su kontentes foe, ke ja tuvo IJOS i IJAS,