קורותיו של צֵ'לֵבּי גבריאל ובנו סנ' בְּכוֹרָצֶ'ה־יצחק אריה

1759

De aki i endelantre si enpesa la partida

de la biografia de Tch, Gavriel i sus vinientes

de detras de el fin a el anio de 5661,

1760                           Biografia de Tch. Gavriel kon su ijo S. Behoratche.                        1854

En el  anio de 5614, sigun ke ja lo eskrivi en las partidas de koando todos 3 ermanos foeron Haverin la manera ke ejos si espartieron, i Tch. Gavriel ke resto solo, por su konto, el se tomo en nota de todo su bien ke a el li toko, ke ja lo saven tambien i por el aver ke ejos lo tenijan ke era una suma bien redonda, i ke si lo resivio todo Tch. Gavriel, mizmo ke a el non li tokava esta suma, foe ke si konvinieron por lo demazija ke lis devija pagarle kon algunos tiempos a sus ermanos Tch. Jeuda i Avraam, i el ke era tanto merikiozo i ke si espantava mui muntcho de devda, foe ke de el presipio, el li foe ande sus ermanos por prometerles la medija jajla a konto de la devda ke lis devija versarles anke mas tadre, i esto por el presio ke la tenijan pasado en konto, i Tch. Jeuda ke ja tenia su moneda partikolar, foe ke si la merko el solo por su konto, kon ke verso a la butika esta suma, i esto ja li foe una levianeza, i en este anio ke vino tambien i S. Behoratche su ijo de viena ke ja lo saven ke estuvo en viena por sanarse de el mal de piedra ke el sofria, i ke ja vino sano i boeno foe ke si gusto mui muntcho i foe ke lo vijitaron el kolel entero i aparte toda la familia en el primer Chabad si li foeron todos a komer kon las komidas ke ja lo tengo eskrito sigun de loke lo azijan, ejos todos si gustaron i se alegraron sovre todo ke el S. Behoratche era ke savija i boeno kantar i el ke si enbezo ainda mas i algunos kantes en su estar en viena, era ke lis iva kantando, i denpoes de esto ke el ja estuvo unos koantos dijas

1761        Biografia de Tch. Gavriel kon su ijo S. Behoratche.      1854

en kaza por repozarse i ke el tambien fin a este tiempo non estuvo en la plasa foe ke si lo tomo su S. Padre kon si por entrar en el negosio, ke el lo iva a lavorar,

En el anio de 5615, Tch. Gavriel ke non tenija ainda butika, era ke lo poko de etcho ke el lo azija era ke lo merava en kaza, i koando el salija ala plasa era ke si asentava en la butika de el S. Mairutcho Alkalai, ke es i la botika ke la tiene i oi de mizmo su ijo S. Behoratche, ke esta butika era ke S. Mairutcho la tenija a kira, i por azerle plazer, ke ja lo savija ke non tenija butika, foe ke li dicho ke si es ke lo kerija ke ja si podija el salirse de esta butika i se la dava a el por ke si asentara en eja, i sovre esto foe ke Tch. Gavriel si lo rengrasio mui muntcho, sigun i ke ja foe ansi i mas tadre S. Mairutcho se salio de esta butika, i se la tomo a kira Tch. Gavriel, i se asento en eja, i la tuvo a kira unos koantos anios, i denpoes el la merko de el Tahmiz^[20], por 4000 gr, i bivio en eja en toda su vida, i es tambien esta mizma ke i el la tiene, i S. Behoratche, ke el le izo un trokamiento, kon una reparasion, i tenija 3 odelenijas,^[21] i de 2 partes era la entrada,

por el presipio el foe mui espantado, i mui deskorajado lo todo por los averes ke el si los resivio, ke el si lo imajenava, si en kavzo podija ser ke non iva a poder kovrar estos averes

1762        Biografia de Tch. Gavriel kon su ijo S. Behoratche.      1855

iva a ser ke devija de kedar prove, i de esto era ke el non dormia en las notches, i non saviendo koalo azer, era ke si le iva ande su ermano Tch. Jeuda por akonsejarse, ke el koal lo enkorajava mui muntcho kon dizirle porke non tuviera dingun espanto ke aparte ke lo iva a kovrar era ke iva a ser ke todos le ivan a pagarle por su djusto, i de esto el ja era ke repozava, por azer la ikonomija en kaza era ke el lis kontava su situasion ke podija arivar i kon esto era ke azijan la mas grande ikonomija en kaza, el ke era algo supito era ke por la mas tchika koza el era ke si araviava en kaza, i ansi era ke todos los de kaza li tenijan muntcha temor,

Koando el ja estuvo boeno resentado en su botika i algo de etcho ke ja enpeso a azer, era ke estos ke li devijan li enpesaron a venirle a uno a uno por reglar sus kontos ke era ke li jevavan a un akonto de sus devetos i por lo restan lo prolongavan por algunos tiempos, i esto lo azijan estos ke ejos lis avijan rebatido a koal 50 i a koal 75 % ke los ke devijan i ke eran boenos pagaderes ja era ke li jevavan por su djusto, i de esta manera ke foeron todos kontinoando, i se iva muntcho gustandose, i dezija ke estava entchendo aldas jenas de dukados, i ansi foe ke de los averes ke el los kovro ke eran tchuruk i ke los kovro por su djusto li asumo a una suma de ariva de 100,000 gr. i su metoda por azer estos kovramientos foe mui repozadamente, i kon muntcho kebarlik, i era ke non los apretava ke era a la veluntad de los devdores era ke lis demandava sigun de loke ejos lo kerijan ansi lo azija, ke los unos li demandavan ke

1763        Biografia de Tch. Gavriel kon su ijo S. Behoratche.      1855

los esperara i los otros ke non lis kovrara muntcho entereso, i ansi otros, ke li davan un akonto i por lo restan prolongavan foe ke pudo kovrar kaje todo uvo tambien ke a muntchos non lis demando por ke ja lo vija ke non tenijan,

El de esta manera iva rekojendo moneda en la kacha, i koando ja tuvo mas muntcho moneda, el enpeso a dar a alguna djente kon entereso i tambien merkar las valutas ke el ja las konosija, i las detinija en la kacha fin ke si li rekojijan mas grande suma, por denpoes, remeterla a los lugares ke li konvenija, solo ke el ja era una persona ke si kontentava, kon poka ganansia, i tambien era ke el non podija ser sin ke tuviera moneda en kacha, i en okazion ke li i afetava ke kedava kon poka moneda en kacha ja era ke non podija durmir las notches, ni estar en un lugar,

Su ijo el S. Behoratche ke ainda era moevo salido ala plasa foe ke presto ja li tomo las manias de el padre, i konosio tambien la metoda de el andar de sus negosios, por ke el era savio, ke fin a este tiempo el estuvo estudiando en el midrach, kon Hr. Avraam Alkalai, i su S. padre ja era ke no lo kargava en algunos etchos i el tambien era ke non lavorava muntcho solo por razon ke non si kansara su ijo, sigun ja saven ke era flako de natura,

En este anio li nasio a S. Behoratche una ija i a eja la jamaron Venezia, ke kon eja tambien lo izieron sigun el uzo de todas las paridas, i de mizmo su propia madre la aletcho i la kudio, i koando eja ja foe mas grande si la tomo su vava la Bu. Amadutcha,

1764        Biografia de Tch. Gavriel kon su ijo S. Behoratche.      1855

i era kon eja ke dormija i eja la kudijava, i la amava mui muntcho por ke eja foe mui ermoza, i eja savija mui ermozo tambien i kantar para eja era ke li merkavan panderikos i modos de los djogetos, i de esto su ermana la mas tchika era ke si enselava mui muntcho, ke era Ester, i siempre era ke pelejavan, i tambien la maltratava, i de esto la Ester era mui abatida, seja de esto ke para eja non li merkavan i tambien ke non la meravan,

La Bu. Amadutcha kon su noera la Bu. Dudutcha, si pasavan siempre boenas, i era solo la Bu. Amadutcha ke kudiava por todos los menesteres de la kaza, porke eja foe siempre mui Sana i boena, i la Bu. Dudutcha kudiando por sus krejaturas, i tambien eja aziendose todos sus plazeres, ke esto lis era mui grande gusto, seja a su esfoegro Tch. Gavriel komo tambien i a su esfoegra la Bu Amadutcha, de esto ke era mui alegra, i Tch. Gavriel era ke lo amava muntcho a su inieto el grande S. Mochonatche, i era ke siempre lo detinia asentado en su alda i le dava djugetos,

En el anio de 5616, ke el ja estuvo resentado su etcho mas mijor el enpeso a engrandeser, sus negosios kon ke era siempre ke si enkamenava sovre lo mas siguro fin ande era posible i el era ke merkava las valutas seja de oro komo tambien i de plata, i las mandava a kostan i a Saloniqe, i tambien dava i moneda kon entereso

1765        Biografia de Tch. Gavriel kon su ijo S. Behoratche.      1856

a estos ke el ja los konosia, de mas antes,

El en este anio merko unos koantos kazales de hachar i esto los ke eran mas serka de la sevdad, por razon ke era el S. Behoratche ke si iva tambien kon otros por diezmarlos, lo todo por ke si koziera en el lavoro para kon esto iva a estar mas sano, i el anke ke li vinija este etcho mui pezgado ma siendo ke era ke non li podija venir kontra los komandos de su padre, era ke si iva, i esto sovido a kavajo, solo ke su padre ala sikreta era ke lo kudijava mui muntcho, i los trigos ke los rekojijan era ke los depozitavan en los hambares, por venderlos por el envierno lo todo a los kazalinos i esto era siempre a fijado solo ke los kazalinos pagavan en mui regla i de esto tenijan siempre profitos anke poko,

En este tiempo vino a Samokov Tch, Chimon Bihmoarach de enderne, i el koal si abacho en su kaza komo musafir, i era ke tenija havales de kovrar de la kacha de Samokov, i la suma tambien era bastante grande, i siendo ke Tch. Chimon non podija restarse en Samokov por azer los kovramientos, foe ke si las izo paso a Tch. Gavriel por ke las kovrara, por su konto i ke li foera remetiendole el enporto ande li komandava, i esto era ke i li pagava su boena komision, ke esto el ke ja era mui akurat i kon mui grande deretchedad, era ke li iva eskapandole su etcho i Tch. Chimon ke ja era mui kontente de su lavoro, era ke siempre le iva ansi mandandole i otras havales ke esto lo kontinoaron unos koantos anios, foe i ke de esto tambien el tuvo boenos provetchos, i les kedo la amistad fin agora,

1766        Biografia de Tch. Gavriel kon su ijo S. Behoratche.      1856

El en este anio izo una komanda, de ropas a viena, i el ke ja konosija este ofisio, i savija los artikolos ke eran pasavles, i los artikolos foeron lo mas muntcho de panios, i jezis^[22], i fezis i ansi mas i otros i estos artikolos ke li vinijan a Samokov, era ke vendija esto ke podija en Samokov i lo restan lo mandava a Sofia, ke se iva su ijo S. Behoratche, djunto kon la ropa, i si estava en Sofia fin ke si li vendija, i la suma ke li kedava para venderla en Sofia era mas tchika, i todo era ke lo vendija a fijado, i esto ja era ke todos ja li pagavan en sus tiempos en mui boena regula, i esto por ke H. Haimatche su esfoegro era ke lo enbezava i le dizia a ken era de fijar, i el era ke kudijava, i tambien en todo este tiempo ke estava en Sofia era siempre en su kaza de el esfoegro ke si estava, i avija tambien ke muntchos de los merkaderes de Sofia era ke li davan komandas porke lis truchera por sus kontos kon pagarle a un sierto % por su komision, foe ke entre las fezes ke traiva por jero li mandaron la una kacha de unas fezes mui grandes, ke de estas fezes era ke si podijan vendersen entre Sofia i Samokov komo a 6 fezes a el anio, i la kacha ke kontenija 500 fezes, si kere entendido el tiempo ke si kerija para vendersen, i ansi foe ke lis turaron fin a el anio de 5638 ke foe la gera Turka-Rusa, i se las decharon ande H, Menahem el Janinali ke el koal era kazas^[23] i vendija fezes i azija los peskiules para las fezes, sin nombrar ni presio ni menos tiempo i de esto foe ke non li podieron nada kovrarle,

Avija un merkader Bochnak, ke venija a Samokov, i se

1767        Biografia de Tch. Gavriel kon su ijo S. Behoratche.      1856

jamava Meremitch, Mehmed AA, el koal era ke merkava en Samokov, muntcha ropa, i vistidos prontos de chajak i abas, ke los lavoravan en Samokov, i el koal era una persona mui rika, i siempre era ke si traiva kon si de 8 a 10,000 dukados minsas, por azer estos empleos, ke los vistidos ke los vistijan en akejos tiempos lo mas muntcho de los bochnakes eran Chalvarijos kurtos, i tchepkenes, i era lo mas muntcho en Samokov ke los prontavan, i esta suma de moneda era ke si la dechava ande Tch, Gavriel porke el iziera los pagamientos, de estos artikolos ke los iva merkandolos, i Tch. Gavriel ke tomava los dukados i los trokava por la moneda koriente en la plasa, i ke tenija una deferensia de 2 a 3 % i aparte tenija mas tambien ke i se prevalija de la moneda ke los pagamientos era ke si azijan en 3 i 4 mezes i esto tambien era ke lo kontinoava unos koantos anios, ke de todas las 2 partes eran mui kontentes, i el ditcho mehmed AA era una persona ke si bivija komo 2 okas de rake a el dija ma ja era ke non si enboratchava, no menos ke pedrija su tino, foe ke mas tadre el ditcho Meremitch AA, trucho a Samokov, 8000 okas de satchis, de fiero, i ke los lavoravan en la bosna, ke estos satchis los merkavan los kazalinos, ke se servijan de ejos kon kaentarlos por ensima i debacho ke metijan lumbres era ke kozijan sus bogatchas i entchusas i mas koza de masa ke era sus komidas, i la konsumasion ke si azija en Samokov de estos satches era de 40 a 50 okas a el anio, i se vendijan sovre a 8 gr. la oka, i el S. de el Mehmed AA ke li dicho a Tch. Gavriel ke li tenijan de arivar ansi una suma de estos satchis, i ke si los

1768        Biografia de Tch. Gavriel kon su ijo S. Behoratche.      1856

podija venderselos, sovre a 5 gr. la oka i por unos largos tiempos i Tch. Gavriel ke savija ke el presio de estos satches ja eran de la valor de a 8 gr, la oka, solo ke la konsumasion el non la savia i no li paresija ke iva a ser este karar de tchika, foe ke li djo palavra por koando li vernan ke ja si los podija merkarselos, i de esto pasando komo unos koantos dijas ja foe ke lo mando a jamar por dezirle ke la ropa ja arivo i ke los resiviera, i el en este tiempo ke ja si enbezo la konsumasion ke si azija i ke el non kijo tomarse la palavra atras, foe ke los resivio por un tiempo de 2 anios a pagarle i esto ja foe ke en su tiempo el si los paga sin ke kaje nada podo vender, i foe en el tiempo de los 2 anio fin ke los pago la suma ke el pudo vender apenas foeron de 500 okas, i esto sovre a 8 gr. la oka, el ja kerija vender mizmo i abacho de el kapetal ma non avija ken ke los merkara, i ansi foe ke li restaron en magazen i pasando algo mas ainda de tiempo foe ke vinieron a Samokov, unos siertos turkos lazlis^[25] un departamento turko en la azia, ke eran tambien grandes merkaderes i trucheron una grande partida de los filos trabuzan^[26], ke servijan por los abadjis, ke kon estos filos era ke kozijan los vistidos ditchos ariva, porke en akel tiempo non avija komo agora filos de las makaras inglezes, i tambien non era solo los abadjis ke lo emplejavan otro ke ja era i los chastres i por las kazas, i estos merkaderes ke trucheron partida mas grande i ke ja lis vendieron a todos seja los abadjis komo tambien i a los otros i la partida ke lis avija sovrado era ainda bastante grande i ke non la estavan podiendo plasala, i el

1769        Biografia de Tch. Gavriel kon su ijo S. Behoratche.      1856

Tch. Gavriel ke lo supo de esto foe ke los jamo a su botika a estos merkaderes, i les dicho ke el lis podija merkarlos toda la suma de los filos ke ternan solo ke era komo li merkavan i de el los satchis i todas las 2 partes ke ja eran mui enfastijados de sus artikolos, ja foe la ditcha kon la etcha, i kon pokas palavras ejos ja si lo konvinieron mui presto, i sin tadrar de todas las 2 partes ja si apresuraron a trokarsen los artikolos, i denpoes seja el uno komo tambien i el otro ja foeron mui gustozos, i Tch. gavriel ke enpeso a buchkar por vender su artikolo moevo foe ke todos ja si avijan merkado para 2 i 3 anios, i anke ke ja vendija ma era la vendita igoal a los satches, i este filo lo tuvo tambien fin ala gera Turka Rusa, 5638, i por serarse esta partida foe la gera ke lo alempio kon ke si los rovaron i kon esto foeron ezbarasados, de esto,

En kaza las mujeres lo azijan de mizmo sigun i de los otros anios, i Tche. Gavriel si komportava mui kebar, el era sano i grandino i mui deretcho, su fizonomija era morena i su barva kurta i rala, su vistido ke si vistija era siempre de las mas finas ropas, i los vistija mui limpio, porke el los tenija muntchos, el si levantava mui demaniana, i en las notches de el envierno el se iva a Tikun Hasod ke era en kaza en el midrach moestro ke lo meldavan, i denpoes ke ja dezija la tefila, se vinija en kaza i meldava el Hok le jsrael, i los korbanod, i denpoes dezajunava, i salija tadre ala plasa, el komija en la botika por la medio dija, ke li mandavan de kaza, i koando ja era la komo a 9 la ora ala turka el ja si iva

1770        Biografia de Tch. Gavriel kon su ijo S. Behoratche.      1856

a kaza, i denpoes ke bevija su kahve, el meldava el zoar i los tekonim, i tambien meldava muntcho el sefer a berid, i ansi tambien i otros livros de estudios, anke ke non era mui Haham, a el li plazija estarse solo mas muntcho, por estudijar, i melder, el tenija ke era tambien mui sopito ke por nada de koza el si araviava, i el non li plazija muntcho adjuntarse en las pasatiempos ke avijan, i era mui neotral en todos los puntos, li plazija mui muntcho resivir los musafires en su kaza, i dormijan tambien en kaza,

En el anio de 5617, li nasio a S. Behoratche, una ija, i la jamaron Ester, ke si izo kon eja tambien sigun de todas i las otras paridas, Tch. Gavriel si gustava mui muntcho koando era ke li nasijan seja inietikos komo tambien i inietikas, i era ke a todas las kontentava de la mizma manera, i eja la S. Ester koando ja foe mas grande, era mui abatida por razon ke eja sofrija de unas granos ke los tenija en la kavesa, i ke siempre li ivan koriendole materia i a esta kavza era ke i li kortavan los kavejos, por poderla kurarla i era tambien ke non la aserkavan ni menos ke li azijan en sus plazeres ni le merkavan para eja los djugetos ke li merkavan por la otra, ke era la Viniziu, i tambien la dechaven sola i non la meravan i la maltratavan, i esta hazinura ke eja la tenija en la kavesa la jamavan la naksa^[27], i ansi era ke todo estava eskondida, (es ainda i oi ke

1771        Biografia de Tch. Gavriel kon su ijo S. Behoratche.      1857

lis da las kechas a sus parientes sovre todo a su k….. de esto ke la maltratavan, es a dizir ke non si deve de azer selos a sus propias krejaturas de aserkar alas unas i alechar a las otras, ke kada una tiene su boen mazal sigun ke todas las 2 ja foeron mui bien kazadas ma la maltratada foe muntcho mas venturoza de la otra,) i eja mas tadre ke ja foe sana i boena, era ke li plazija okuparse en los etchos de la kaza, i los kudijava seja a sus ermanikos komo tambien i a sus ermanikas i sus parientes, su natura foe siempre bonatcha,

En este anio Tch. Gavriel tuvo muntcho trato kon un sierto S. Zaharie Hadji. Jurov, ke el koal era uno de los grandes i notavles djorbadjis, entre los krestijanos de Samokov, i le iva dandole moneda kon entereso, por los menesteres de sus negosias ke los azija grandes, i de esto ejos devinieron tambien i a ser amigos, ke en este tiempo ke sus ermanos Tch. Jeuda i Avraam avijan merkado, en kostan, los hachares de los trigos de 5 sevdades kon sus kazales, i entre ejas era ke i estava tambien i la sevdad de Trin, foe ke si aunaron los 2 Tch. Gavriel kon el Sr. Zaharie i les merkaron el hachar de la sevdad de trin, por un presio mas konvenivle, i siendo el ditcho Sr. zaharie ke era mui enfloente, foe ke el mizmo si foe a trin i lo iva diezmando, i la anijada ke ja foe mui benditcha, ke de lo todo uvo a muntchidombre, i ansi era ke todos ivan pagandole en boena regula, i de esto ejos pudieron ganar komo a 150,000 gr. i ansi era ke estavan mui alegres, i gustozos, i a esta kavza foe ke Tch. Gavriel foe engrandisiendo sus etchos kon el Sr. Zaharie, i li dava

1772        Biografia de Tch. Gavriel kon su ijo S. Behoratche.      1857

tambien i moneda la suma ke li demandava, i era tambien ke i azian i algunos i otros etchos en hevra, i ja era ke siempre ganavan,

Foe en un dija ke Tch. Gavriel, si estava endose para el Varoch de ariva, koartal ande moravan solo los krestijanos, i el S. Zaharie ke si estava viniendose para el konak ande el kaimakam, i en sus enkontro Tch. Gavriel lo saludo, kon la temena, (ke era kon la mano deretcha, li azija una senial, kon esterarla enfrente de el enkontrador, i denpoes jevarsela en su korason, i denpoes a su boka i detras sovre su kavesa, kijendole dizir ke lo saluda de korason i de boka i de sovre su kavesa,) i esto es la segnifikasion de el saludo turko, i siendo ke el Sr. Zaharie, non li respondio, ke se izo komo ke non lo vido, foe ke a Tch. Gavriel li vino esto mui pezgado i esto seja por ke el estava asubido en un ermozo kavajo blanko, kon la hacha^[28], de panio i lavorada kon sirma i akompanijado de 2 sus mosos el uno ke li jevava el tchibuk i la tchanta i el otro detiniendo su mano en la espalda de el kavajo, i kamenando a pie ke ansi era koando de los personajes grandes azijan las vijitas ufisial en los Pachas i las admenestrasiones, or seja por orgojo, i Tch. Gavriel non li avlo mas nada, i en su boltar a su kanselaria el avrio la partida de el Sr. Zahari i li keto el konto, kon remeterselo i demandarle por ke li remetiera la suma de moneda ke el la tenija de aver, i siendo ke la suma era mas grande foe ke el Sr. Zaharie non si la pudo remeter, i mas ke Tch. Gavriel era ke lo vijitava mas espeso i de este tiempo foe ke mas non li iva, i las relasiones las tuvieron jeladas

1773        Biografia de Tch. Gavriel kon su ijo S. Behoratche.      1857

i el Sr. Zaharie visto a esto i ke el ja si konsintija por la kulpa ke el la izo, era ke si li vinija a la kanselaria de Tch. Gavriel i lo resivja kon onor ma non li boltava kara, i al Sr. Zaharie era ke li ensistija, por ke li dichera la razon de estas jelores, sovre todo de esto i ke li demando i la moneda ke li devija, i su repoesta foe ke la jelor es de la parte suja por el non endiniamiento, de respender al saludo ke lo saludo, i ke el non lo saludo por esto ke el estava suvido, en su kavajo blanko, otro ke foe solo komo persona i amigo ke li era, i ke ansi kavajos ja las enpatrona i el unos koantos i ke el si avregonso de otros ke lo vieron, ma non kero dizir nada, i Sr. Zaharie, se lis demodo su kara, i en deskulpandose ke non atino i non por el non endiniamiento, i esto foe ke si razonaron ma foe i tambien ke i reglaron sus kontos i mas tadre si kovro todo su aver i mas non tuvieron las relasiones sigun de antes,

En este anio Tch. Gavriel izo EKDECH, 25 liras turkas para enprestar a algunas menesterozos, fin ala suma de 100 gr. kontra prenda, i por el tiempo de un anio, sin ke li pagaran dingun anteroso, i era ke lis tomava por eskrito seja por sus devitos komo i tambien i por la prenda ke li dechavan, i en arivando en tiempo fiksado si era ke non la podijan pagarla era ke la prolongavan por otro un anio i ansi era ke algunos lo ivan prolongando, i los otros ja pagavan, i esto si lo konfejaron a H. Mochonatche Alkalai kon ke i li pagavan tambien i a el una tchika paga, i por los presipios era ke lo foe kontinuando ke los unos ke pagavan era ke la tomavan los

1774        Biografia de Tch. Gavriel kon su ijo S. Behoratche.      1857

otros, i esto porke las prendas ke las traivan era ke ja tenijan la valor, de la suma de moneda ke topavan era ke ja ivan pagando, ma koando ja arivo un tiempo ke la valor de las prendas mas ja non lis valija la suma ke ejos la devijan foe ke restaron todas estas prendas en una kacha i esto en el poder de H. Mochonatche Alkalai, lo todo fin a el anio de 5638 ke ja foe la gera Turka-Rusa, i en la platchkas ke izieron los zebekis en este tiempo foe ke si jevaron tambien i esta kacha, i de esto mas non buchkaron ni los devdores sus prendas ni menos tambien ejos ke las tenijan de aver, i kon esto foe ke i se sero este konto, i la bien fizensia,

Tch, Gavriel kon su ijo era de mizmo ke kontinoavan, en dar moneda kon entereso i tambien el merkar las valutas, i de ves en koanto ejos era i ke ordenavan, las ropes de la malifaktura, a viena, i de esto era ke enpeso a komandar i el tchivit, i el kirmoz ke lo merkavan muntcho los bojadjis ke avijan muntchos por razon de los chajakis, para la bosna, i en vezes koando si li rekojija mas muntcho los averes era ke si iva ala feria de uzundje ova por azer los kovramientos, i en mizmo tiempo era ke merkava i valutas i algunos operasiones de los saraflikes,

Ejos en kaza eran mui solid en los gastes, i koando salijan era ke vijitavan solo entre los parientes, i sus konversasion era solo por las moevas de el mundo, a el non li plazija mleskarse en los etchos de el kolel, i non si enteresava a saver las moevas de la plasa, i lo mas muntcho era ke lo pasavan entre ejos solos en kaza

1775        Biografia de Tch. Gavriel kon su ijo S. Behoratche.      1857

el en kada dija salia ala plasa, en su butika, i su moso era konorte B. Chelomo Tadjer, el koal era pariente de la Bu. Amadutcha, i el era ke li barija la butika, i le azija los mandados de kaza, su mirikija era ke estuviera todo modo de koza en su lugar seja estas de la kaza komo tambien i de la botika, koando esto non lo azijan era ke si araviava mui muntcho, el en todos los dijas de los viernes, i estos de los arbai moed, ja si vinija de la medio dija a kaza, por lavarse i resivir de temprano seja el Chabad komo tambien i el moed, i el koando si kortava las unias, li kalia ke si estuviera solo en una kamareta, por razon ke el tenija muntchas kuzkijas, i era ke en kada vez ke iva a meter su tejera en la unija, por kortarsela, todo si estava ariento, i para ke non lo vieran ke el si reiva de esto, era ke si estava solo ma ja lo vijan por las jendrzes^[29], koando era ke si estava a riendo, de esto, i esto li turava longo tiempo, el tutun el lo fumava siempre kon tchibuk i de boenos takumes de kelebar, el era tirjakli en Chabad de esto ke non lo fumava en Chabad, por el enverano seja en los tadres de Chabad komo tambien i algunas de ensimana, denpoes de la minha komijan en el tchimen i antes ke anotchesiera, el bivija antes de komer 25 dr. de raki kon los mezes ke foeron salados, i el vino lo bivija a poko solo en la meza, era ke travava i el enfie, i el si metija entojos seja por eskrivir komo i meldar,

1776        Biografia de Tch. Gavriel kon su ijo S. Behoratche.      1858

En el anio de 5618, Tch. Gavriel enpeso a tratar kon Mahmud bei, el muteveli de Ihtiman,^[30] i el koal era ke tomava, los hachares seja de ihtiman komo tambien i de sus 7 kazales ke tinija a su deredor, i esto era ke li entchija una suma de 250 a 300,000 gr. a en anio, i esto ke li vino a kedar por tomar el estos Hachares es ke en el tiempo ke okopo el turko la bulgarija i las geras ke eran mui grandes i foertes, i el komandir ke lo goadrava kon su armada seja a Ihtiman komo tambien i a kapudjik^[31], ke es el demir kapo una pozision mui foerte, se jamava Mihal, i por okoparla los turkos ke non la estavan podiendo, foe ke si konvinieron kon el komandir, para ke si la entregara kon darle a el los hachares de este lugar ditcho, i para esto ke ja salio ferman de el sultan, foe ke la entrego, i denpoes foe tambien ke li kalio si konviertiera a el Slamizmo, i lo jamaron Mihal bei, es ke el ditcho Mahmud bei era de los desendientes de el ditcho Mihal Bei i se tomava el los diezmos, i siendo ke lo tenija el menester de tener su banker, era ke fin a este tiempo, tratava kon Tch. Jeuda i Avraam, i en un konto ke li dieron foe ke li pasaron i los enteresos de 400 okas de kal ke li avijan dado, ke era una valor de 100 gr. i el Bei ke li paresija ke era komo enprestado ke si la avijan dado, foe ke si aravio i los decho a ejos i enpeso a tratar kon Tch. Gavriel, i mas tadre ke el Mahmud bei tenija de aver de la Hazne una suma de 800,000 gr. de los diezmos de 3 anios ke non si los avijan pagado, foe ke la resivio Tch. Gavriel esta moneda, i el li izo pagar a sus ermanos 170,000 gr. ke lis avija kedado a dever, ke

1777        Biografia de Tch. Gavriel kon su ijo S. Behoratche.      1858

siempre ja era ke el bei devija anke ke tomava esta suma, i ansi era ke Tch. Gavriel ganava en kada anio kon el Bei de 20 a 25000 gr. i esto lo kontinoaron fin a el tiempo ke foe la gera Turka-rusa, de el anio 5638, i era ke si foe a kostan i lo devija a su ijo el Sr. Behoratche, 300 liras turkas, i para azer este kovramiento li kalio ke si foera tambien su ijo de Sr. Behoratche Sr. Mochonatche a kostan i le pago menos los enteresos, ke este ultimo li dicho va bien ke lo kijitech ansi ma al menos pagame alguna koza por los gastes ke lo ize para vinir a kostan i foe ke li djo 15 liras

El en este anio merko una suma mas grande de Hachares i ansi foe ke i los trigos tambien li foeron muntchos, i siendo ke non los pudo venderlos en el harman foe ke los depozito en hambares i para dezbarasarse de esto li turo mas longo tiempo, era ke i merkava tambien i fieros, de los maadendjis, kon unos presios mas konvenivles i lo azijan ke se ivan ejos mizmos a Pazardjik por venderlos i esto era a sumas mas tchikas, sigun ditcho mas antes ke Tch. Gavriel nunka non si enkachava en etchos grandes, ke siempre ja era ke si kontentava kon lo poko, porke su ojo era mui arto, i a su ijo el Sr. Behoratche todo loke li dizija era, ke para bivir kontente i repozado, li kale ke toma los enchemplos de el mas tchiko de el, i si en kavso lo kerla tomar los enchemplos de el mas grande ke a el ala ora li va arivar de estar siempre kon los apretos, i poede tambien i de meter en riziko, toda su furtuna, i esto seja el komo tambien i sus vinientes detras de el lo kontinuaron, i se toparon kontentes,

1778        Biografia de Tch. Gavriel kon su ijo S. Behoratche.      1858

En este anio ke el enpesaron a fragoar el KAAL moevo en Samokov, era ke si okopava mui muntcho, sovre la fragua, i de la grande kerensia ke el la tenija era ke iva tambien i rekojendo moneda i de entre sus amigos de otras sevdades, i koando ja li arivo a tener rekojido komo una suma de 5000 gr. si foe el mizmo a filibe, ke avijan mijor maestros de aze las ventanas, de fiero ke estan i oi, i la suma ke non abasto foe ke la adjusto el de su petcho, i mas tadre el lo adono el KAAL entero kon lampikas, ke estos sindjires ke si veen i oi era ke enkolgavan las sienes de los kandiles, en lampikas ke adrijan de la azeite, i era en los moadim ke las asendijan i era mui ermozo ke es a el uzo turko, i mas tadre el izo traer almenaras de vidro, ke de las koalas ja existen i agora,

komo unos koantos anios mas antes de esto los 3 ermanos Tch. Jeuda, Gavriel i Avraam, tienen fragoado el midrach, en la kae de el Kaal moevo vizino ala kaza de S, Behoratche i S. Mochonatche, i gastaron en este midrach, 20,000 gr. i aparte ejos tambien merkaron i muntchos mas livros, sigun ke esta i oi, i ansi es ke seja el lokal komo tambien i los livros, i el Sefer tora i mas todo esto ke kontiene en este midrach es el patronage solo de los 3 ditchos ermanos, i todo gaste ke si azija era ke lo pagavan kada uno su tersio i ansi de mizmo kontinoaron fin a el anio de 5661, sus vinientes de estos 3 ermanos, i ansi es ke dinguno non poede dizir or enpatronarse nada demazija de esto ke li podra apartener, en tomando en mano el un tersio ke apartiene a el un ermano ditchos i este tersio es ke

1779        Biografia de Tch. Gavriel kon su ijo S. Behoratche.      1858

lo van a enpatronar todos los vinientes de el un ermano ditchos ariva, i para esto ja tengo jo una skisa zaverijada^[32] de el gradski sovet de Samokov ande deklara el patronage seja de el midrach komo i tambien los livros i mas todo esto ke kontiene,

En este tiempo Tch. Gavriel tuvo una edeja de abandonarlo a Samokov, i irse a bivir en enderne, i esto era porke non topava kon ken pasar la ora, i el ke foe enfastijado de estarse siempre solo, i la razon era porke era nervozo i de esto si araviava mui muntcho por la mas tchika koza, i esto era la razon ke el non si antchava en los etchos, i siempre buchkava de toparse rekojido, ma non lo pudo, el iva siempre apartando moneda en bolsas aparte kon ke en kada una eskrivija EKDECH, sin ke asenialava komo de ekdech, i a dinguno non lo dizija esto ke el lo azija, foe tambien ke en estos tiempos ke uvieron unos Chelohim de jeruchalaim, i eran mui Hahamim i mui entelejentes, i estos ala familia entera Arié lis izieran, fondar una forma de Sedakod, mui levianas por ARBA ARASOD, i era ke lis izo azerles a una kumbara en kada kaza, i ke etcharan a una para por kada miembro de la kaza en kada meza ke ivan a komer, i esto ke ejos lo kontinoaron era ke vinija en kada 3 anios el Chaliah, de estas sevdades de el Arba arasod i lo rekojia, i esto ke en los 3 anios si lis rekojia de 350 a 400 gr, i se las davan a el Chaliah, ke aparte era i ke li davan tambien i las nedavod, i ansi los chelohim era ke de Samokov salijan mui kontentes ke tomava de 2500 a 3000 gr, i a los mas muntchos de estos chelohim era ke los resivijan en sus kasas

1780        Biografia de Tch. Gavriel kon su ijo S. Behoratche.      1858

ma mas tadre ke ja foe la gera, lo abandonaron este uzo i era ke lis mandavan, torna algo de nedavod, porke non salieron muntchos anios los Chelolim de Jeruchalaim, i sovre todo ke ja non uvo mas ansi djente santa sigun de antes, uvo un Chaliah de Tevaria ke si jamava Hr. Konorte Koen, ke el koal era algo pariente moestro ke era ke tenija por mujer a una de las 10 ermanas i este ombre era mui djusto i mui hasid, ke i lo jamavan santo, el estuvo kamenando 10 anios por Chelehud, sin ke foe a Tevaria ni una ves, i lo dolachejo kaje el mundo entero ande existijan djidios, i en Samokov estuvo 2 vezes, i el rekojo muntcha moneda, i el ke tenija el un tersio por su paga, foe ke tuvo una ganansia de 5 a 6000 liras de este viaje i mas non salio porke ja si avija etcho su pozision,

En el anio de 5619, Tch. Gavriel demando de sus ermanos Tch. jeuda i Avraam, porke li dieran i a el una parte en el jumruk^[33], de el tutun de Djuma ke lo avijan tomado ejos, i ejos sin dingun refuzo, li dieron esto de parte ke el lo kijo, i denpoes ke ja si izieron sus kontratos, (tenijan de boeno ke koando ejos azijan koal negosio foesa, seja kon el ajeno i seja kon sus ermanos era ke kalia ke si tomaran por eskrito,) i lo reglaron el etcho sigun de loke lo tenijan de enkamenarlo, foe ke lo mandaron a H. Chelomo levi, komo jevador de el etcho, i este ultimo ke ja lo resivio i partjo por,

1781        Biografia de Tch. Gavriel kon su ijo S. Behoratche.      1859

Djuma, i denpoes ke el ja lo iva enkamenandolo, era tambien i ke siempre lis iva eskriviendoles de la manera ke estava el Taachir^[34], i en mizmo tiempo el lis azija saver ke non estava kamenando de el en todo boeno, i ke el estava mui deskorajado, de esta mision ke li konfejaron, porke la rekolta non estava de el entodo boena, i lo kijo tambien ke mandaran a alguno otro en su lugar, ke el non lo va a poder reintcheir, i esto ke lo foe eskriviendoles unas koantas vezes, foe ke Tch. Gavriel tambien si deskorajo, i visto a esto era ke Tch. Gavriel si iva ande sus ermanos por akonsejarse, i en sus platikas era ke lis salia tambien el etcho i a ravias, kon algunas avlas ke lis disija, ke anke ja li dizija Tch. Jeuda ke non si kere merado a esto ke iva eskriviendo el H. Chelomo, i si mizmo ganar non avra ja era ke por pedrer non avija dingun dubio, i siendo ke Tch. Gavriel ja foe mui deskorajado, foe ke lis kalio ke si konvinieran kon ke resivio, Tch. Gavriel a pedrer de su parte 5000 gr. i salirse de la parte, i ejos razgaron sus kontratos, i ejos los 2 ermanos ke lo kontinoaron era ke dezijan ke si era ke iva a ver de piedrita 15000 gr, na ke agora ja abacharon a 10000 gr, ma a los kavos non tuvieron dinguna piedrita i kon esto foe ke repozo Tch. Gavriel,

Sigun eskrito mas antes ke Tch. Gavriel non estava topando komo pasar el tiempo, i de esto era ke se iva i sikilijando i tambien ke a el non li plazija tanto adjuntarse, kon todas las personas, i de esto era ke kedava solo, lo izo en este anio ke si adjunto a si a unas koantas personas komo de su edad, ke eran H. Presijado

1782        Biografia de Tch. Gavriel kon su ijo S. Behoratche.      1859

i su ermano H, Jeuda Echkenazi i a H. Chemoelatche el Chichko i ansi tambien i otros, i lo azija ke si adjuntavan 2 vezes ala semana, kon ke i se azijan prontar modos de los juvetchis, i pastelis i las halvas i otras ansi komanias, i los modos de los rakis i vinos kon sus mezes, i se rekojijan lo mas muntcho en la kaza de H. Presijado Echkenazi ke tenija la kamareta mas grande, i ejos bevijan i kantavan i djugavan alos fildjanes, i kon el gaste era ke tomava la mas i grande parte Tch. Gavriel,

En este anio el si merko, un grande kampo, de Chakir Bei, por 4000 gr, ke era de la parte de su kaza, i de la otra parte de el rio, i el li avrio poerta para su kaza, i lo izo un bostan, por sembrar vidruras i zarzavatis, i lo rodejo, entero kon paredes de piedras, i frago ala entrada de la parte de su kaza, un kiochk i en el si asentava en las tadres de el enverano, i bivija su rake de kada tadre, i en muntchas de las notches era tambien i ke komijan en este kiochk i mas tadre el frago tambien en esta bostan i de la parte de la kae agolar mahalesi ke es agora ke la jaman entre los djidios, Makedonija, un ahir, i ensima una otluk hana, por paja, i una kazika ke servija por un morador komo moso arabadji, kon ke si i merko tambien i un par de vakas, kon karo, ke li traiva la lenija para la kaza, i era ke los detinija en este lugar, i aparte frago i tambien unos grandes depozitos por meter sus ropas ke tenija komo lanas i koeros i ansi otras mas kozas, i esto li turo fin a el tiempo de el anio 5652, ke si izo el plan de la sevdad i le paso una kae,

1783        Biografia de Tch. Gavriel kon su ijo S. Behoratche.      1859

por enmedio de este bostan, i a esta razon foe i ke resto el lugar de 2 partes i esto tambien i mui tchiko, anke ke alguna koza ja li pagaron, i resto en vazio i pasejavan las vakas i bezarikos de la djente, i en vezes ke lo godravan por tomarle la paja ma non lis konvenija, i koanto a el ermozo kiochk ja foe ke lo derokaron en el tiempo de la gera Turka Rusa, en 5638, i kon los ahires i la otluk hana resta en su ser, i la dan por ke si sierban algunos solo por ke seja goadrada, sin dinguna kira,

el Tenija mandas i vakas i por ke las merara era ke tenijan a un moso krestijano en hevra kon Tch. Avraam, i los servija a todos los 2 ke ejos tenijan tambien i kavajos, por koando vijajavan en este tiempo ke la Bu. Amadutcha kijo irse a filibe seja por kamenar i seja por azerse merar de los medikos por ke kerija parir, i para esto li trucheron de filibe una britchka ke en Samokov non avija i se foeron djuntos kon su ijo Sr. Behoratche, ke estuvieron unos koantos dijas i eja ke kamenava en las plasas de filibe lo vija los tcharchis i le plazija mui muntcho, i mos kontava, ke eja lo vija en los kafafes^[35] butikas jenas de patitikas^[36] grandes i tchikas i mas tchikas i tchikitikas ansi en otros tcharchis kupas grandes i tchikitikas i mas tchikitikas i de esta manera todo mode de kozas i eja longo tiempo estuvo kontandomos de esto ke eja lo vido en filibe, i de tanto boeno ke eja lo paso i estuvo en la kaza de el Sr. Albalah

El koando se iva a Sofia era siempre ke si abachava en la kaza de H. Haimetche Tadjer, ke era su konsfoegro, i el koal i

1784        Biografia de Tch. Gavriel kon su ijo S. Behoratche.      1859

ke era uno de los notavles de Sofia, i ke el kolel de Sofia en este tiempo vino en estretcho por moneda i ke tuvieron i menester de vender 2 botikas de los mulkes de el Kolel de Sofia i de los sevdadinos ke non kijo dinguno merkar por esto ke non si dichera ke si lo revato el mulk de el kolel foe ke li rogaron a Tch. Gavriel por ke el los merkara, i el por non romperles si las merko por 2300 gr. ma el por los presipios non las podija alkelarlas i ansi era ke non tenija dingun profito, i mas tadre arazon de estas el foe merkando mas ansi butikas vizinas a estas, era ke li konvenija por ir a Sofia por buchkar de alkelarlas, i esta kaza ke tiene i oi el Sr. Behoratche en la plasa de marija loiza es propio en este lugar de estas butikas ke li sovro de koando se izieron los planes en Sofia.

Koanto a sus negosios era lo mizmo sigun i de los otros anios, i el entre los dijas era ke salia mas tadre ala plasa, i de mizmo i se iva a kaza de mas temprano, porke todo akejo ke era el menester ja lo estava eskapandolo su ijo el sr. Behoratche,

ere de mizmo ke i en kaza lo pasavan las mujeres mui bien i ejas aziendosen todos sus plazeres, ejas eran servidas de 2 mosas, i en kaza ke ejos ja los tenijan todos los menesteres de las komanias, koalo por 6 mezes i koalo por un anio, ke lo todo si lo azijan traer de otros lugares ke en samokov non si topava siempre a merkarlo era solo ke merkavan los kondutchos i la karne de kada dija ejos si prontavan todo modo de las frutas por el envierno koalas en vedres i koalas sekas i otras en truchis, ansi i kon los vinos i rakis

1785        Biografia de Tch. Gavriel kon su ijo S. Behoratche.      1859

ke los traivan de filibe, i ansi era ke komijan lo todo ala artura ejos lo gizavan en kada dija fresko, i esto gizado boeno,

En el anio de 5620, li nasio a Sr. Behoratche una ija i la jamaron Donna, i kon eja tambien lo izieron sigun de todos los partos, i su madre tambien la kudjo i la aletcho eja koando ja foe mas grande era mui alegra, i koando a eja non la meravan era ke a eja non si li enbarasava, i todo estava kantando, i era eja mizma ke si merava por si i non esparava ke kodjaran or ke li merkaran para eja los djogetos de las krejaturas i era eja ke si los merkava, i eja koando ja kazo en Nich, la reina de Serbija Natali li tenija grande sempateja i era ke la mandava a jamar koando estava en Nich para avlar kon eja en Franses, i tambien ke si i supo mui bien komportar kon kada modo de persona, i su avla es gustoza i dulse,

El entre los artikolos de los modos de ropas ke el las traiva de Viena, foe ke en este anio trucho tambien i 10 kachas de fiero para goadrar moneda ke de las koalas la una si la detuvo por si i las otras las vedjo a los begis i otros merkaderes ke esto era mui ralo ken ke truchera i esta ke si la detuvo por si foe ke topo su presio i la vendjo tambien i denpoes el si merko un boron de fiero ke en la gera si lo rompieron parisiendoles ke avija moneda, i denpoes ja uvo unos maestros ke si lo adovaron i lo kolanijava, i el

1786        Biografia de Tch. Gavriel kon su ijo S. Behoratche.      1860

ke ja iva a pazardjik lo azija ke i merkava tambien i arozis, i el si los vendija por los konakis ke lis mandava a 4 5 sakos por kada konak i las paras non lis demandava era ke los esperava de 3 a 4 mezes i denpoes ja era ke todos li pagavan i li demandavan porke lis mandara, i ansi mas arozes esto era i kon las ropas ke la traiva ke era lo todo a fijado ke lo vendija i esto era seja a sofia koao tambien i en Samokov, el koando alguno li kerija azer alguna chemikirija^[37] era ke mui presto buchkava de ezbarasarse, anke ke li kostava i mas para siempre non tenija etcho kon este, i esto era tambien i kon las personas ke el lis dava moneda kon entereso, i esto era por estarse siempre limpio i desbarasado, kon su entision ke el la tenia,

Foe en este anio ke el si enpeso por prontarse para irse a Jeruchalaim, i sigun de siempre ke el ja se iva ala feria de usundje ova, foe i en este anio tambien ke el si foe ma sovre esta entition ke el la tenija non lo dicho a dinguno, i ala feria ke si i iva ja lo saven ke era por azer sus kovramientos, seja de los dechkontos komo i tambien i de otros, i el ke ja estuvo en la ferija i ke ja eskapo su etcho, lo deskuvrio a sus kompanieros, ke el iva a partir por Jeruchalaim, i esto komo era en akejos tiempos koza mui Santa era ke lo akompanijavan kon los modos de kantes de los pizmonim, i todos i davan paras para Sedaka por Jeruchalaim, i lo akompanijavan todos fin a un sierto lugar ke era posivle de kamenar apie, i todos lo bezavan i lo bendizijan i el ke ja arivo a enderne, el si estuvo unos koantos dijas, i en enderne ke avijan boenos djojeros, ke savijan

1787        Biografia de Tch. Gavriel kon su ijo S. Behoratche.      1860

lavorar los modos de las rozas en dijamante, el lis komando muntchos modos de rozas i en dijamantes, i otras boenas piedras, i orejales i las amailis, i anios, i tambien i un kuti de enfie de oro bien lavorado, ke lo todo ke estuviera pronto por koando el iva a boltar de Jeruchalaim, i la suma de esta djoja ke el la komando foe komo a 40 mil gr. i antes ke el partiera de Enderne el li eskrivio a Su ijo ke tenija de partir vija kostan para jeruchalaim i ke era por azer a su madre una iziara, de mizmo i a moestros avoelos i ver tambien la tiera santa, i koando ejos la resivieron la karta foeron todos mui maravijados, de esto ke non lo avlo de mas antes en Samokov, ke sigun si vido es ke era la ferija, ke si lo izo el kamino ke el niet, ke lo izo sirija kon kondision ke si li afetava el etcho de la feria, i siendo ke ja si foe kale dizir ke ja si li eskapo su etcho ke el lo asenialo, el era akompanijado de su moso, Aron B, Chemtov, ke abacharon en Izmir, i denpoes a Jafa, i a Jeruchalaim koando ja arivo el se izo konoser de montchos siniores i de los Hahamim de Jeruchalaim i de todos el tuvo muntcha onor, i el ke enpeso por kamenar para azer las iziaras, era ke en todas dava muntcha sedaka, i tambien muntchas dadivas, i koando el ja estuvo en la Iziara de Ribi Chimon Ben Johai i de loke el si kanso i sudo foe kali seja ke si li jelo la sodor, i li tomo en akel mizmo dija un frio mui foerte, ke de esto foe mui deskorajado i se espanto mui muntcho, i su moso ke ja estava siempre kon el djunto, presto ja foe ke li djo todos los primeros ajudos i

1788        Biografia de Tch. Gavriel kon su ijo S. Behoratche.      1860

le jamo tambien i a muntchos medikos, i lo enkorajaron ke era solo una frealdad ke el la tuvo i ke ja li tenija presto de pasarle sigun i ke ja foe ansi, i de moevo el kontinoava en todas las mas iziaras, i en este tiempo ke en Jeruchalaim estavan fragoando un Talmud tora, izo el un prezente de 5000 gr, i en paga a esto li eskrivieron su nombre ensima de la poerta de una kamareta, i denpoes ke el estuvo i en Tevaria, aparte de montchas sedakod i Nedavod ke el dava, lis djo tambien ala kacha de el kolel, 5000 gr, komo prezente por ajuda por un talmud tora ke ivan tambien a fragoar, i por la ditcha suma ke el la tuvo depozitado en la kacha de el Kolel, foe ke la echkola non la fragoaron, i esta moneda ejos la amplejaron por otros menesteres de los gastes de el kolel, i pasando komo 13 a 14 anios, foe ke salio i un Chaliah de Tevaria por rekojer moneda por la fragoa de el talmud tora, ke el koal Chaliah ke estuvo tambien i en Samokov, i ke estuvo tambien i en la kaza de el Sr. Behoratche, i avlando de esto foe ke el Chaliah li dicho ke el tenija 93 liras prontas por remeterlas a Tevaria, i ala ora ki dicho el Sr. Behoratche ke esto ja si lo podia azersilo el de remetersilas, i el Chaliah de boena gana si las entrego, i Sr. Behoratche, ke ja estava mui bien a el koriente de esto de el prezente de el padre i ke non las enplejaron para esto ke el padre las djo, i pensando ke si serija verdad ke i agora tambien lo ivan a fragoarlo foe ke non las remetio i se las detuvo, por tomarse atras los 5000 gr. i sovre ejo ke uvieron grandes quistiones i litigas de parte los Rabanim de Tevaria, era ke el Sr, Behoratche siempre

1789        Biografia de Tch. Gavriel kon su ijo S. Behoratche.      1860

si defendija, en diziendoles ke su Sr. padre ke tenija dado, los 5000 gr. eran solo para la ajuda de el Talmud tora, i siendo ke non lo fragoaron, es ke si las toma atras djunto kon los enteresos,

En el anio de 5638 ke el Sr. Behoratche estava en kostan, foe ke si lis renovo esta quistion i tuvieron grande korespondensia sovre esto, kon los Rabanim de Tevaria, i denpoes ke los Sr. Rabanim ja si izieron kreer, ke en verdad la ivan a fragoar la echkola i sr. Behoratche kontentandose lis konto la moneda,

Este Talmud Tora en Tevaria ke lo fragoaron en el bodre de el lak, (mar-moerta) foe ke apenas ke ja lo eskaparon de fragoarlo i antes ke lo estrenaran, akontesio ke uvo una mui grande furtuna, en el ditcho lak, i de las grandes olas dalgas, ke harvava en los bodres foe ke lo aravdono a el talmud tora entero sin ke li decho dinguna sinial de la fragoa, i ansi es ke este lugar resta sigun de loke era mas antes limpio i vazio,

Tch. gavriel ke kontinoava en todas las iziaras, el vijito tambien i en todos los lugares antigos, seja de Jeruchalaim komo i tambien i de toda la tiera santa, i en todos estos lugares ke el iva kamenando era ke li azijan muntcha onor, i de todos los lugares de ande el kamenava era ke merkava de todo loke si lo vija por traerles prezentes seja a sus parientes komo tambien i a sus amigos, i este vijaje li turo komo a un mez, de tiempo, i denpoes partjo por vija berut, i resto unos koantos dijas i de este lugar el merko, muntchas ropas de estofas de seda i otras, i denpoes abacho en izmir,

1790        Biografia de Tch. Gavriel kon su ijo S. Behoratche.      1860

de mizmo resto unos koantos dijas i tambien merko esto ke avija en Izmir, i denpoes a kostan ke izo lo mizmo i denpoes si vino a Enderne, i resivio la djoja ke el la avija komandado, i koando ja vino a Samokov li salieron todos los parientes i amigos por resivir a el Hadji baba, kon muntcho saltanat ke ja lo tengo eskrito sigun de lo ke resivijan alos Hadjis, i a todos el lis djo sus prezentes sigun de loke kada uno lo meresija, i el foe mui kontente de su viaje, i para todos los de su kaza lis trucho a muntchos prezentes, de mizmo i para todos sus parientes,

pasando de esto komo a 2 anios, i ke Tch. gavriel ja si avija morido foe ke Sr. Behoratche resivio una karta de Tevaria de Hr. Konorte ke por el koal ja lo tengo eskrito ke mos era algo i pariente, i li dize ke estuvo en su kaza komo su musafir, i a el li tuvo demandado komo konsejo si era edeja de irse a Tevaria, i ke el lo deskorajo es agora ke si estava el muntcho rependiendo por koalo tuvo de deskorajarlo ke podija ser komo se iva a Tevaria podija mas ainda bivir i de esto supieron ke de Samokov kerija salirse sigun ke ja lo eskrivi i mas antes ke el buchko un tiempo por irse a bivir en Enderne ke non tuvo esto mazal de bivir ke murio mui mansevo,

i el Sr. Behoratche en todo el tiempo ke estuvo su padre en el vijaje era lo todo ke el lo enkamenava seja esto de la plasa komo i tambien lo de kaza,

1791        Biografia de Tch. Gavriel kon su ijo S. Behoratche.      1861

En el anio de 5621, El enpeso mas muntcho a konsentirse mas muntcho las dolores ke el tenija seja en el braso komo tambien i en la pierna, i los medikos era ke li dizijan ke era komo rematizimo, ma ja era koza ke li pasava presto el ja era i ke si goadrava mui muntcho i ansi era ke non salija muntcho ala plasa,

Su inieta la grande S. Behurutcha, ke ja estava espozada, en Sofia kon su tio S. Mordehajutcho, ke era el ermano de la madre, ejos kedaron de akordo por azer la boda, i ejos la achugar ke ja la foeron aprontando de mas antes foe i en este tiempo ke lo prontaron tambien i el adjusto, i esto foe mui muntcho loke li dieron ke era tch. Gavriel ke si okopava i dizija ke para esta ija va aser ke el la iva a kazarla komo ke foera su propia ija i de esto era ke non merava i le iva aziendole todo a muntcho, i koando ja estuvieron de todo pronto, sigun el uzo de akel tiempo li vinieron konsfoegros, i lo izieron la primera boda en la kaza de la novija kon muntcho saltanat, i denpoes ke ja lis kalio ke partieran foe ke si foeron todos los de su kaza, i aparte tambien si foeron i mi S. Madre djuntos kon mi i Refaelatche, i mi S. Padre non estava en Samokov, ke estava en este tiempo en viena aziendose una operasion ke sufria de el emorait i en akeja demanijana ke ivamos a partir, por Sofia, i S. Refaelatche ke la detinija en sus brasos a la ija de mi ermana M. Buhurutcha, i en abachando de la eskalera foe ke izo un paso jerado, i se kaeron todos los 2 i afito ke uvo un klavo puntudo ande si li korto,

1792        Biografia de Tch. Gavriel kon su ijo S. Behoratche.      1861

el mucho de Sr. Refaelatche, ke si li izo en 2 pedasos ke era el mucho de ariva, ke presto ja li jamaron a un sierto djerah ke avija en Samokov, S. George papas oglu, i el koal presto ja si lo kozio, i mui bien tambien i se lo ato, i de mizmo siendo ansi ejos partieron kon el mucho atado i en unos koantos dijas ke si koro ja li paso por entero i non si li vee mas otro ke poka sinial i denpoes kon el mustatcho a si li tapo todo, en la boda lo pasaron mui alegre ke por el kamino entero tuvieron una trupa de daules i zurnas^[38] ke estavan en el kamino entero kantando i alegrandosen, ansi de mizmo foe i en la boda ke la izieron kon mui muntcho saltanat, i en todos los 8 dijas i las notches de la boda, tenijan a muntchos kombedados, i la novija ke ja era mui ermoza, i savida i mui repozada, i 5000 gr. de kontado ke ja li jevo i achugar tambien mui muntcha, era ke pasaron mui kontentes de todas las 2 partes, i ejos era ke si i amavan mui muntcho ejos bivieron en Sofia ke el S. Mordehajutcho, su negosio era de el presipio en la merkansija, de ropas de los kazalinos ke la vendija en groso, i mas tadre el izo algo de Saraflik, el era algo nervozo ke koando sus etchos non li kamenavan en boena regla era ke si li reboltava de su meojo, i ansi era ke non savija loke azija, era ke si vinija a Samokov i se estava en la kaza de su esfoegro, i denpoes ke ja estava unos koantos dijas i ke ja li pasava era ke se iva torna a Sofia, i kontinoava en su etcho, la M. Behurutcha era ke parija siempre de 4 i de 8 mezes i ansi era ke non tenija krejaturas, ke esto li kontinuo, 11 anios, i en el anio de 5632, si foeron a Viena, todos

1793

los 2 por merarse de los medikos, seja el komo tambien i eja i por ajudo alos gastes, li djo su esfoegro 100 napoloinis, ma non li pudieron a el ajudarlo ke mas tadre foe ke si li renovaron sus nervozedades muntcho mas foertes, i lo izo ke torne si vinieron a Samokov i denpoes ke ja estuvieron longo tiempo, i ke ja estuvo boeno se foe de moevo a Sofia, i paresiendole i algunos ke li dicheron porke trokara la kaza, foe ke la vendjo la kaza ke era de el padre a un sierto djidjo bogatchadji por 28000 gr. (ke esta kaza agora ke ja pasaron komo 40 anios vali 500,000 gr.) i el si merko otra kaza i moro en eja el tenija i mas ansi kaza i tambien i botikas, i aparte era i ke li iva merkandole de su ermano H. Chabetajutcho, algunas butikas, a el li plazija muntcho el pasatiempo ke savija tambien i boeno kantar, el era mui kebar i se vistija mui limpio, i koando foe la gera el si foe a enderne, i denpoes el ke, ja si vino a Sofia, i kontinoava el saraflik, i en este tiempo el merko una grande partida de los kartoches^[39] ke avija dechado el turko en la gera, i ke el presto non los pudo venderlos, i li restaron fin a el anio de 5645 ke foe gera sirba, i los tiros ke si sentijan en Sofia i a el parisiendole ke los sirbos podijan entrar en Sofia i se tomava estos kartoches ke era una suma mas enportante, i de el espanto ke el tuvo foe ke de moevo si le renovo esta maladija, fin a el grado de non saverse de si, i de todos los medikos i los echpetales i las kuras ke li izieron lo todo foe sin dingun provetcho, i ansi foe ke de moevo lo trucheron a Samokov, i le tomaron una kaza a los kudios de su esfoegro, i lo iva pasando, i kon el bien i los mulkes ke el los tenija en Sofia era ke S, Mochonatche los kudijava, i non si kansava de ir a Sofia

1794        Biografia de Tch. Gavriel kon su ijo S. Behoratche.      1861

muntchas vezes, por rekojerle esto ke el lo enpatronava i el ja lo pudo todo rekojer i venderle sus mulkes i se lo izieron lo todo en moneda, i se la metieron en la banka ke de los revinidos ja era ke li abastavan para sus gastes, el tuvo ke en el anio de 5644, li nasio una ija i la jamaron Ventura, i la koala en su tiempo la kazaron en filibe kon Sr. Tchelebi Halfon, i eja denpoes ke pario, i estuvo kazada komo 6 anios por ser ke tuvieron una deferensija kon su marido i la djente de su kaza eja en una demanijana sin ke dinguno la viera sin ke penso por sus krejaturas foe i se etcho ala mariza i a eja ke la buchkaron i ke non la toparon i pasando komo una semana la toparon aogada en un kenar de la marisa, i en el anio de 5646 tuvo un ijo i lo jamaron Nisim, i era ke su madre los kudijava, kon los parientes ke tenija Sr. Mordehajutcho en Sofia li davan muntchas kechas a Sr. Behoratche de esto ke non lo estava kudijando tanto boeno, i el non sentija a dinguno porke ja lo savija ke sus parientes si kerijan en patronarsen de su bien, mas tadre li fragoaron en Samokov una kaza, ke ja la tienen sus ijos i oi, i el Sr, Mordehajutcho non troko, i non savija loke azija i siempre estava por los kampos, seja en el frio komo i en la kalor, el en vezes si razgava sus vistidos, i todo loke dizijn era DEZDETCHADO DE MI? era siempre ke esta palavra la dizija, i su mujer la M. Buhurutcha era ke siempre jorava, i eja los kudijava seja a su marido komo tambien i a sus krejaturas, i nunka non se akechava de la vida ke eja la bivija solo ke kon pasensia lo somportava, fin ke arivo el anio de 5659, ke Sr. Mordehajutcho kajo

1795        Biografia de Tch. Gavriel kon su ijo S. Behoratche.      1861

hazino i en kama, i el ke estuvo pokos dijas hazino, sin ke si supo de koalo sofrija, ni menos ke si akechava por nada i mas ke koando li demandavan el non respondija, i ansi foe ke murio, i su mujer de tanto ke foe ansioza, i pasando komo un mez de tiempo, le vino una foerte enflamasion en el garon i se li izo entre el paladar jeno de granos, fin a el grado ke non pudo mas nada englotir, i pokos dijas pasando foe ke i eja morio, i denpoes ke ja li goadraron el siete li rekojeron todas sus kozas en una kamareta, i a las krejaturas si las jevo en su kaza, Sr, Behoratche i era ke las kudijavan seja su vava komo tambien i todos los de kaza komo a sus propias krejaturas sin ke las dechavan sufrir por nada, ejas frekontaron todas las echkolas solo era ke kamenavan mui abatidas, ke por esto era ke si lis enportava a todos mui muntcho ma non lis podijan nada avlarles porke todos los 2 enpesavan a jorar,

I denpoes ke ja si eskaparon los 8 dijas de la boda, Tch. Gavriel kon su inieto Sr. Mochonatche i jo Tchelebi tambien mos vinimos a Samokov en restando las mujeres por unos koantos dijas otros, i esto ke era en el mez de Tevet, era ke avija un frio mui foerte, i el ke si jelo por el kamino foe ke si li renovaron sus dolores seja en el braso komo tambien i en la patcha, fin a el grado ke li kalio ke estuviera asentado en la chelte, i su kamareta era la kamareta de el banio, i el de otra koza mas de nada non sofria, ke era mui sano i boeno, i komija de lo todo i tambien todos djuntos, i la meza ke la metijan de delantre de el por komer todos djuntos i ke

1796        Biografia de Tch. Gavriel kon su ijo S. Behoratche.      1861

espandieron la sofra sigun el uzo de akel tiempo a delantre de el, i ordenaron la meza i ke ivan a komer todos djuntos, i Tch. Gavriel ke ja lo saven ke travava el enfie i ke tenija tambien el koti de oro ke lo avija merkado en Enderne, i por olvido ke el lo metio serka de si i enriva de la sofra, i denpoes ke ja eskaparon de komer i ke rokojeron tambien la sofra, i el koti de oro ke estava en la sofra, ke sin ke lo vieran lo rekojeron todo djunto i lo etcharon a el bokluk, i el mas tadre ke lo bochko el koti i ke non lo topo, foe ravias i atagantos mui grandes, ke non kedo lugar ande non lo buchkaron, i sin ke nada podieron topar, i de esto Tch. Gavriel foe mui sikilijado, i en este tiempo ke lo avijan tomado por moso a Refael B. Manoah, era ke lo ivan mandandolo muntchas vezes ala zenganarija, pensando ke podija ser si lo rovarija alguna zingana, ke tambien non topava nada i pasando muntcho tiempo foe ke lo toparon en kaza debacho de un kavesal, i a Tch. gavriel ke koando mas iva endo era ke mas muntcho se li ivan enfortisiendosen las dolores, i el mediko ke lo merava era Sr. Andonake unterberg, i lo vijitava a 2 i 3 vezes a el dija, i era ke lo konstatava solo por rematizino, i koando ja foe un dija de martes, 3 Chevat, de este anio 5621, tuvo un foerte dezmajo i su ijo el Sr. Behoratche ke estava en su botika, i apartando las valutas de oro, ensima de una tavla, ke la detinija en su falda, i ke lo mandaron a jamar porke presto foera a kaza, i de tanto ke si li tomo el tino de esta jamada, i sigun ke tenija la tavla de las monedas apartadas, la vazio en su kacha de fiero, i en dechandola la

1797        Biografia de Tch. Gavriel kon su ijo S. Behoratche.      1861

kacha avierta, i korio a kaza, i su ijo el Sr. Mochonatche ke era el ke lo avija jamado, resto en la butika por serar la kacha i vinirse denpoes i el a kaza, ke koando ja entro el Sr. Behoratche en la kamareta ke estava el padre li dize ansi BITTIM Behoratche, BITTIM, (ia eskapi) i non kere ditcha ke ja korieron todos sus parientes i amigos i tambien ke ja mandaron presto por el mediko, i fin ke el mediko vino ja foe ke li asegondo, el sigundo dezmajo, sin ke tuvo mas dingun riflo, i kedo moerto para siempre, i por dezplazer foe ke non esperaron al menos ni medija ora i ke foe por komando de el grande de los parnasim por ke al punto lo rijeran i en un enterval de 2 oras ja estuvo enterado en la foja (pasando de esto algunos anios si supo, ke los rohesim rijendolo foe ke si menio, ma no lo decharon por ver koalo podija arivar de esto otro ke ejos lo augaron,) i estas kechas era ke si las davan siempre a este Sr. Grande de los parnasim ke en akel tiempo dependija esto de el parnas ke komandava alos rohesim, por ke rijeran alos moertos,

En el tiempo de el dezmajo ejos ivan espartiendo mui muntcha sedaka, i la Bu. Amadutcha ke non savija loke azija era ke todo esto ke eja enkontrava en kaza, las iva rompiendolas i arendjandolas, i el dezmajo lo konstataron komo un sinial de gota (apopleksi) en el tiempo de los siete era ke li venijan todos los hahamim i sus parientes, i eran meldando, por su alma i en mizmo tiempo era i ke ivan dando i muntcha sedaka, i en el anio entero tambien li vinijan 10 hahamim, en kada tadre i meldavan 10 ojas de el zoar, i 30 salmos

1798        Biografia de Tch. Gavriel kon su ijo S. Behoratche.      1861

de teilim, i un pedaso de alguna gemara, i denpoes dizijan la minha i el arvid kon minijan, i era ke li vinijan tambien i sus parientes en muntchas de las tadres,

En este anio el Sr. Behoratche non mero dingun etcho i de loke si sikilio el izo una larga i foerte hazinura, ke estuvo etchado en la kama serka de 3 mezes, i a esta razon ke i su ijo el Sr. Mochonatche tambien ke si iva sikilijando, foe ke i el tambien li vino un foerte bokado ke si li bolto a tifus, i todo era ke si konjorava ke tenija foerte dolor en el gosiziko de el asiento, i esto li vino ke komio kakis (peras sekas) ejos todos longo tiempo non si kanortaron, i Sr. Behoratche era siempre abatido, i era ke iva endo tambien i siempre hazino, i mas tadre li trucheron a su konjado H. Chelomo B. Haim de Sofia porke lo podiera konbenser a ke trokara i ke si enbevesiera en sus etchos, i era ke li dezija ke lo devija i el de azerlo sigun de loke azen todos los ijos koando si lis moeren sus padres, i de este tiempo el ja enpeso a trokar,

1799                                                   ENERGIA PROFETADA.

Sigun ke ja lo eskrivi de el presipio de koando ejos los ermanos si metieron a el lavoro sovre el negosio, denpoes de la moerte de sus padre, ke ejos estuvieron enteramente vazios de moneda foe ke Tch. Gavriel el primer, ke tuvo la ventura de tener un esfoegro a venirle en su ajuda, ke non es bastante el protejo ke el lo tuvo es tambien i el mazal ke tuvo de poder, reuchir, seja en la merkida de las ropas komo tambien i en las venditas, sovre todo de rezistir los anios de la solaldad por los hanes, i las ikonomijas ke el las izo, el ke era tanto nervozo, non mos kale dezir ke era, de natura, otro ke el etcho ke el lo tuvo era ke lo azia envistir de ansi nervozedad, kada uno ja si lo aze una edeja sigun sos las vidas de los bekjares sovre todo en akejos tiempos, el koando ja repozo, la mizma metoda se enkameno de lavorar siempre sovre lo siguro, ke el dizir ke si kontentava kon lo poko ja lo azen kada uno konto, ke es mas muntcho, de las grandes baranod, (ja es bastante kon dizir la palavra ke a gota a gota si aze rijo,) aki tambien foe esto el alkanso rikezas grandes i sin muntchas baranod, i mui repozado, el anke ke non konbenava echpekolasiones moevas a el ja li era bastante lo sujo, en su vida non foe avierto muntcho kon sus gastes or algunos saltanates, solo ke el lo poko ke bivio, alos kavos lo paso mui kontente, i non mi jero de dizir ke agora ja son 53 anios ke morio es de su furtuna ke la decho ke si estan i oi komportando, el bivjo solo 52 anios, siempre sano i kontente,

1800

Asta aki si eskapa la partida de Tch. Gavriel, ke

murio, i esto enpesando de el anio de 5614 de koando

el espartjo de sus ermanos fin a el anio de 5621,