קורותיי, צ'לבי משה א' אריה [המחבר]

2070

De aki i endelantre si enpesa la

partida miya Tchelebi-Moche A. Arié de

el anio de 5647 fin a el anio de 5660-61

2071                   Biografia por mi Tchelebi-Moche A. Arie.             1887

En el anio de 5647, ke i yo tambien ya estuve espartido mi ermano Sr. Refaelatche, seya de los etchos de la plasa komo i de estos de kaza, i de la manera ke mozotros foe moestra espartision kon kontentes de todas las 2 partes, i ke molo konvinimos por lo todo, entre mozotros kon muntcho aunamiento ya lo eskrivi mas antes, yo ke non teniya kozina lo ize ke adjunti debacho de el Midrach una kozina kon su tchiko orno i lugar por lavado, i mas ansi todo el menester, ke a M. Beyu mi mujer por el presipio li foe esto muntcho foerte de esto ke iva a estar sola, ma ya foe mui presto ke si lo resento, anke ke ya era ke siempre ya estavamos en un lugar,

Yo estava en la butika ke la tuvimos de siempre, i era ke mi okopava en los averes i esto lo mas muntcho viya de los i djuzgos de el presipio yo buchki de vender los kampos ke mi aviyan kaido ami de las vignas i de los maadenes ke ya estuvieron todos derokados, i de eyos los unos foe gastando por azerlos al menos Tchaires i kon el kampo de la vigna de golka, ke era mui grande ke por esto ya lo eskrivi ke mi Sr. padre era ke si iva siempre, i el koriente de la agoa ke ya la teniya de muntcha foersa i de kantedad grande de agoa foe ke lo ize de fragoar un bitchki, por kortar tavlas, i lo di a kira por 250 fr, a el anio, i en este lugar ivamos i mozotros por paseyo ke ya era serka de la sivdad, i lo restan de kampo lo dechi, por tchair, ke tomava 2 vezes a el anio la paja, i todo era komo a 12 karos ke el un karo era el kalkulo de 400 okas, i la vendiya en el pazar, kon la butika ke yo la tuvo en el pazar, i ke ya era i mia

2072                    Biografia por mi Tchelebi-Moche A. Arie.             1887

de el bakalik, era ke lo teniya a Hristo Chehtov, ke la enkamenava i por viya i de el tambien era ke si aziyan las merkidas de los artikolos solo ke non era koza de kontinoarse por ke las venditas eran mui flaka, ke apenas era ke si podiyan tapar los gastes de la butika i ke esto mas tadre ya la abandoni,

Sigun ke ya lo eskrivi tambien por la exploatasion De el matirial de el balkan de kiostendja ke el governo lo, defendio Era ke i los kazalinos ivan rovandosen de los lenios los mas mijores i eyos los kazalinos, lo izieron ke eran komo a 600 kazas, i se aunaron todos i entraron komo a 1000 baltas i arientro de 3-4 diyas eyos lo kortaron los tres koartos de el balkan, sovre esto ke los dimos a el djusgo mos turo longo tiempo i muntchos gastes, ke era kon un kazal entero ke mos ivamos a djuzgar, foe alos kavos ke mos konvinimos kon eyos i se lo vendimos djunto kon el tereno de el maaden, ke ke lo teniyamosen kiostendja, por el presio de 900 liras la parte moestra ke teniyamos la metad, i komo un kaparo tomimos un akonto i por lo restan ke molo ivan apagar mas tadre, yo ke teniya en par de los foyos en el maaden restaron en la kanselaria de la obchtina de kiostandja i un martiyo de fiero de un pezo de 400 okas lo dechi en el kampo de al maaden ke fin agora ke esto eskriviendo la dita ya esta en el mizmo lugar ke lo dechi, i esto lo tengo por memeoria ke este kampo foe una ves moestro, anke ke tiena una valor al menos de 300 fr. i esto ya mi lo konto, Sr Dobri Petkov, ke estuvo en este lugar i se lo amostraron ke es miyo i ke vaiga por levantarlo ma yo

2073                    Biografia por mi Tchelebi-Moche A. Arie.             1887

li diche komo ministro ke es por oras va restar i mas tadre ke si yo terne la okazion de ir a Kiostendja, por koando izimos esta vendita iva a ser ke mos ivan a enpatronar de un kampo en este Balkan i esto ainda non lo reintcheron, lo todo foe kon las prometas de la boka i se keren ke mos enpatronen ande eyos lo keren,

Mozotros teniyamos a un moso krestiyano por servidor para todos los 2 i goadrava el dichari avli, i mozotros sigun ke ya lo eskrivi mas antes ke era siempre estavamos en un lugar,

En el anio 5648, ke yo era buchkando de kovrar, mis averes ke lo mas era por viya de la polis, foe ke un sierto Mustafa Ke mi deviya una suma mas grande molo konvinimos kon ke mi dyo su kaza en paga i ke ya era en una plasa de serka a el tcharchi i kon una tchika reparasion ke yo le ize, la dava a kira ande ya mi traiva boenos revenidos i mas tadre la vendi a otros turkos kon 2 presios de loke mi kosto, aviya un arvol en esta kaza, ke dava de 6 maneras de frutas i era sembrado de 150 anios antes i viniyan muntcha djente por verlo ke era mui grande,

En la prima vera de este anio merki 400 karneras kon sus kodreritos por tomarle la letche i por pasto para eyas tomi de el gradski sovet, el deretcho por ke podieran paseyar en el kampo de la tchelik-hana, i esto kon ke pagava a 2 fr. por karnera kon la kondision ke deviya de vender la letche sovre a i groch la oka solo a

2074                    Biografia por mi Tchelebi-Moche A. Arie.             1888

los sevdadinos, i ansi era ke se mondjiyan 3 vezes a el diya i por toda la letche, ke se mondjiya era komo 240 okas, i ya era ke kada diya ya si vendiya i los kodrerikos los vendiyamos alos kasapis de Samokov, esto era el enverano entero, i denpoes tambien estas karneras era i ke las vendiyamos tambien alos kasapis por degoyarlas por razon ke si aziyan de metil, unos guzanos en la reya ande non podiyan enviernar, lo todo a razon de el pasto, ke era en yanura, los presios ke si merkaron estas karneras era de 90 fin 105 gr. el par i kon sus kodrerikos, i la ganansia era de 20 a 25 gr. por karnera, ke lo todo era un etcho limpio i gustozo,

Era i ke aziya tambien i algunos de los echkontos sea alos merkaderes komo i a los kazalinos, ke era en kada diya de pazar ke viniyan seya por tomar la moneda or pagar i ansi era i ke si lis aziyan i los bonos ke deskaeran solo en los diyas de los pazares,

kon el etcho de la butika de el bakalik non kamenava de el entodo boena i ansi era ke siempre iva buchkando por venderla a alguno, en la kaza ke morava era ke tuvo el menester de algunas reparasiones, i este le iva aziendolo, i en mizmo tiempo era i ke iva i beyadiyando a una i 2 kamaretas en kada tiempo, i tambien adjustando i algo de mobilias, ke ya estavan estroidas, era i ke iva tambien i a Kiostendja por el aver de el balkan ke lis vendimos ke non kijeron pagar por algunas deferensias ke aviyan non solo de los merkadores era i ke tovimos tambien i de entre mozotros en los otros Haverim, por ke eyos keriyan tomer parte de la moneda ke mos pagavan

2075                    Biografia por mi Tchelebi-Moche A. Arie.             1888

a mozotros i esto kon ke mitieron i zapores, lo koal ke mozotros era todo kon los djuzgos ke estavamos podiendo kovrarlas, i era ke Sr. Refaelatche iva endo a pazardjik ke era el djuzgo i en una vez lo afero Filo el renomado yatak de ladrones ke era de kiostendja, i le rovo alguna suma de moneda i tambien li yevo la ora anke ke este Filo ya era konosido por ke era de Kiostendja ma non si pudo defender ke i por esto tambien ke si afero la ora en un sierto Jirov, tambien de Kiostendja, foe ande unas koantas vezes a pazardjik, ke ya non keriya mas buchkar por ke ya era enfastiyado i tambien los gastes ma el djuzgo non lo dechava i foe grasias ke si kemo el Okrujen Sud, de Pazardjik, i kon todos los Delos foe i este ke si kemo i kon esto si eskapo este Delo, i mas tadre lo enseraron a el ermano de Filo ke i el tomo parte i estuvo 15 anios en la kale de vidin en prezo, ma la ora non si topo ke si kemo en el Djuzgo,

En el anio de 5649, merko una partida de totunes de los kazales de Dubnisa, i esto mi akompenio Sr. Haim Aseo, ke el koal ya era spesilis, de esto kon ke li pagava tambien i su komision, i denpoes ke ya lo izimos en denkis yo li eskrivo a Sr. Istavridis de Filibe ke el koal era ke teniya fabrika por azer en paketes, prometiendoselo por vender, i el me respondio, en eskriviendo el mio adereso, kon adjuntar Evreino, i yo en akel mizmo diya li respondi en aderesandolo la karta su adereso i li adjunti tambien Grogeno, ke por esto se izo quistion i koando mi lo eskrivio yo li respondi i li i

2076                    Biografia por mi Tchelebi-Moche A. Arie.             1889

adjonti kon letras grandes torna el Grageno, ma el mi demando pardon i lo kijo merkarlo ma non si lo vendi ke yo lo ize azer en paketos, en la fabrika de Sr. Aseo i lo vendiya en Samokov ke tuve mas grande profite, i denpoes ke ya metieron el haksis ya non uvo mas el konto, de kontinuarlo, este etcho,

En este anio ize tambien partida de kezos en tulum, Por kostan i esto kon Haverim era ke los angajeyava los kezos en Los kazales i en kada semana iva entchendo fin a 50 tulumes ke mas de esto non si mandava una persona a Kostan i se vendiya en el mizmo diya ke arivaya a Kostan a el presio de la plasa era komo Borsa, tambien era negosio limpio, sin entrar en magazen

Kon el etcho de los dechkontos era de mizmo ke lo i kontinoava, lo mas muntcho a los kazalinos, i kon la butika de el kolonial sigun ditcho mas antes ke non aviya dingun profito lo ize ke li vendi la ropa a Sr. Jshak Ben Ruzu, Levi, el koal yevava el nombre por su madre a razon de el padre si aviya etcho turko ke si yamava Salamo el turko, i la suma de ropa ke aviya era komo a 4000 fr. i esto si la vendi por pagarlos en tiempos mas largos, kon ke li di tambien i la botika a kira mui barata,

Yo ke iva a Kiostendja lo todo por los averes de el Balkan i el maaden foe en este anio ke estava en el maaden i en un diya me manda a yamar, el Kmet por ke devista ke mi abachara a el Kazal kon i ke mi mando 2 strajares i yo ke mi foe a su kanselaria, ke era el Kmet Sr. Jovan Matraktchiski, i delantre la poerta ya era

2077                    Biografia por mi Tchelebi-Moche A. Arie.             1889

i ke estavan prontos 4 kavayos ke eran en el uno ke deviya yo suvirme i en los 3 ke mi ivan akompaniar 3 strajares fin ala bana i ke mi ivan a entregar en el kmetstvo de la bana kon ke li eskrivio por ke mi diera de mizmo strajares i kavayo i ke mi mandara a Samokov a el Natchalnik, i yo viendo esto todo ke ya mi espanti, i li rogi por ke mi dichera la razon ma el en la kanselaria non kijo dizirme otro ke el mi akompanio fin a la salida de el kazal i mi dicho ke yo ti esto aziendo plazer ke en esta notche ti va a rovar el renomado Filo i te poede yevar a el balkan por esto ke lo datech a el djuzgo por el rovo de la ora, ke ansi vate i non ti espantes, ke yo ya mande i adelantre otros 2 Strajares ke ti goadren por el kamino, i jo ke non podiya refozar mi vine a Samokov en la media notche ande el Natchalnik ke mi entregaron i denpoes me vini a kaza, i lis di prezente alos ke mi trucheron foe ansi ke mi izo el plazer el ditcho Matraktchiski ke i oi tambien mi vienen ande mi seya el komo i sus ijos i tenemos i ke li enpresto moneda en okazion, ke sos vendidores de lenia, ke pasando komo a 15 diyas ya lo trocheron matado a Filo, kon plomo, ke lo mataron propio los kazalinos, por los danios ke azia,

En el anio de 5650, li vendi el kampo de la vigna de Golka kon el Bitchki a un sierto kaluger^[18] Yonikin por el presio de 120 liras ke el koal denpoes gasto muntcha moneda por azerlo todo al deredor de paredes i se frago i una tchika vila este era ke mi

2078                    Biografia por mi Tchelebi-Moche A. Arie.             1890

kontava ke foe koando devino a ser el Egumen de el manastir de la Rila, ke el si enkanto de ver los milis de kolos [kilos]^[19] de modos de platas ke yevavan los krestiyanos i krestiyanas ke vijitan este manastir, ande vienen i djente de la Rusiya i aparte de los presentes ke los davan en moneda para el manastir, era ke davan tambien i los prezentes en maneras de las maniyas i yerdanes, i mas ansi djoyas ke yevan los kazalinos, i ke aviyan hanbares yenos de esto i el ke kijo trokar las lamarinas de los tetchos de los unos manastires ke ya estavan estroidos i meter en su lugar kovre foe ke lo demando de el Sveti sinod por vender i ke iva a azer las venditas por viya de mi, foe ke non lo alesensiaron de vender otro ke ya podiya trokar las lamarinas por kovre ke esto ya si lo ordeni yo de la fabrika ke era una suma bien redonda, i la merkida lo izo kon moneda ke el manastir enpatronava komo a 10 miliones de frankos de moneda, i el governo en una okazion dizen ke si tomo komo a 5 miliones de fr. i lo enportante es i ke mi kontava ke el vido en las arhivas ande eskriven los prezentes ke los aziyan ke un sierto ARIE, izo presente un par de kandelares de plata grandes i los empleyan solo en la notche de Velikiden^[20], solo ke mon mi pudo dizir el nombre, ke esto ya lo tengo sintido i yo de mi Sr. padre ke ya uvo ke si dyo ansi prezente i eran de el Sr. Avraam ke vino primer a Samokov,

Mi ijo johanan ke ya aviya eskapado la echkola de los Djidios en Samokov, esta de la Aliansa jsraelid, lo ize entrar en la Echkola de los amerekanos (protestantes) ke enbezara el Ingles, i en

2079                    Biografia por mi Tchelebi-Moche A. Arie.             1890

esta Echkola ya era i ke aviya ke enbezavan lo mas muntcho el Bulgaro, i ke ya era en este tiempo tambien i rekonosida de el governo komo todas las Gemnazias, i la paga era mui tchika loke si pagava a el anio el ke era mui repozado i mui vergonsozo, i las leksiones si las enbezava kaje de la primera vez ke la meldava el profesor, i era ke i li ayudava mui muntcho esto ke lo supo mui bien el franses, i foe kontinuando mui kontente i todos los profesores lo keriyan mui muntcho bien sovre todo de esto ke era mui ermozo, i mui entelejente i eyos ke lo keriyan ke uvieran tambien i Djidios en sus Echkolas lo kudiyavan mui muntcho, i entro en la primera klasa,

En el anio de 5651 la kaza de djirk, ke la yamava mos ke es esta ke moro mi ermana Buhurutcha unos koantos anios, i ke era vizina a la kaza de Sr. Nisim Aladjem, seya ke el la iva derokandola or seya ke otros la derokavan lo todo de notche i se rovava i el material, foe forsado de vendersela tambien a Sr. Nisim Aladjem, en un presio mui barato, i esto ke non mi pago en regla ke era los mil males para dar alguna tchika suma de moneda i en unos koantos anios, por ke el si kontava komo a moestra persona.

Kon los mismos negosios ke los aziya i en los otros anios foe de mismo ke i en este anio, los iva asiendolos i esto lo todo kon haverim kon ke era los kapetales mios, ma ya era ke i meravan el etcho kon mas mijor ojos, i kon mas grande deretchedad de

2080                    Biografia por mi Tchelebi-Moche A. Arie.             1891

el tiempo de agora, i lo mas muntcho era kon krestiyanos las hevrod ke las aziya, si entiende ke era solo por koando aziya los kezos i los karneros i algunos etchos de los kampos, ke viya de eyos si aziyan los gastes mui tchikos i kon grande ikonomiya, koanto a esto de los Echkontos era yo solo ke mi lo merava i en okazion de era el menester iva tambien i alos kazales ande era mui bien resivido lo ize tambien ke unas 2 vezes ke foe ande algunos kon el pristav por serkosteriar algunas sus ropas ma esto mi foe mui foerte de koando yoravan la[s] mujeres ke en una kaza ke yoraron tambien i las kreyaturas yo los dechi, i non lis tomi nada i mos venimos kon el pristav en vazio ke por esto foe mui alavado seya de el pristav komo i de muntchos de los kazalinos ke mi lo dizen i agora, i eyos mi viniyan denpoes komo rekonosientes i las rebatiya la suma ke eyos lo keriyan i mi pagavan es mui ralo mizmo i agora ke estamos en Sofia koando mi veén seya sevdadino komo i kazalino ke non si aserka por demandar komo lo pasamos i ke regretan mui muntcho de esto ke mos levantimos todos de la familia de samokov, ke eyos siempre dizen ke avlan boeno por mozotros i ke mos alavan i koando alguno avla mal por mozotros dizen ke lis tapen las bokas, ke de mozotros non uvo mal en Samokov, i a todos i ke ya es la verdad ke lis aziyamos muntchos bienes, en todos los puntos, i non lo eskrivo por alavarmos, es verdad

mozotros ke mas ya non tovimos ni una de las moestras vilas lo aziyamos ke mos ivamos i mozotros a los arvolikos ande se rekojiyan todos los Djidios en las tadres de el enverano, i lo pasavamos

2081                    Biografia por mi Tchelebi-Moche A. Arie.             1891

djuntos kon eyos, ansi era i ke en vezes ivamos tambien i a el isker ande se rekojiyan tambien los Djidios en las tadres de Chabad, i ansi era i ke ivamos i ala birariya ande era la fabrika ke ya era en la plas [plasa] de los Djidios, por lo todo ya si kere entendido sigun de lo ke era, enfrentante alas vilas moestras,

A mi mujer M. Beyu ke si li renovo el kabsislik [kabislik],^[21] i a esta razon era ke li dava i dolor en el mayasil i el mediko mos dicho ke mos foeramos en los banios de la Bana de Kiostendja, i lo izimos esto ke mos foemos todos mozotros i estuvimos komo a 3 semanas i ke ya estuvo algo boena mos vinimos a kaza sanos i boenos,

En el anio de 5652 mi nasio una ija i la yamimos Simha (Sofi) el parto foe kon muntcho reselo, ma ya foe mui kolai ke la pario, la parida M. Beyu era mui muntcho vergonsoza, por esto ke la pario ala vejes, a tiempo ke mas antes komo es ke podiya parir, por razon ke eya pario en el anio de 5627 a Rachel i en el anio de 5637 a Johanan, ke pasaron 10 anios i en este anio de 5652 ke la pario a la Sofi komo ke pasaron otros 15 anios sovre todo ke eya era apenas de una edad de 40 anios, ya si jamavan aidadas, ma torna kon todo se izieron todos los uzos por las paridas Sigun ke ya lo tengo eskrito, eya foe kriyada de kreyaderas djunto kon su Madre, unos koantos mezes ke su madre tuvo la letche mui flaka, i mas tadre foe lo todo kon a la mamadera, ke lo mas muntcho lo aziya yo, esto i me

2082                    Biografia por mi Tchelebi-Moche A. Arie.             1892

levantava en las notches a unas koantas vezes por mantenerla, i eya ke ya foe mui repozada, i no yorava de el entodo, foe mui bien kudiada, koando ya foe mas grande eya ke enpeso a frekontar todas i las echkolas i mui muntcho entelejente ke ya es, i ke si enbeza mui presto, sin ke eya si decha su profesor ke li de kechas i ke tiene tanto el amour propre, sigun el karakter de arié. i ke ya es de la mas pura sangre de mas toda la Familia arié. foe ke eya koando era mui tchika i ke foe alos presipios, ke aviya entrado ala Echkola, i el Haham de Djodezmo ke li era H. Behoratche, Koen, ke li estava dandole liksion de la TORA, i ke tan presto ke eya non pudo adjuntar la palavra TORATENO? foe ke li dicho, ti yazik ke sos Arié i alkavo 5 paras de meoyo non tienes, ke esto koando lo sentio dizir enpeso a yorar i se vino a kaza, yorando, por esto ke li tuvo de dizir el Haham ke non teniya meoyo, eya denpoes ke ya estuvo en la Echkola de Samokov fin a el tiempo ke estovimos en Samokov, i koando ya mos venimos a Sofia foe de mismo ke si entro en la Gemnazia i denpoes se foe ala Echkola katolika por el Franses i el Nemse, i denpoes estuvo en la echkola de los Chastres i denpoes ke eya lo kijo, empeigarse se empeigo, en el balkansko drujesto de el presipio, por 80 fr, de paga a el mez, i pasando komo a 3 mezes resivio de paga sovre a 110 fr, i pasando komo a 6 mezes eya ya resivio 150 fr, a el mez, lo todo en la korespondensia ke konose el Bulgar i el franses a el fondo i el nemse kon la stenografi, i el daktelografi, i la algebra, i se topa kontente, por ke eya tiene su kabineto por si aparte, i es mui

2083                    Biografia por mi Tchelebi-Moche A. Arie.             1892

akurat por el etcho non si kansa ni ke si trava de su lavoro por ke li podran kechas, sovre todo ke es mui muntcho konsederada, i mui bien vista, de todos los otros enpeigados,

En este anio ke foe la Expozision de los Bulgares por sus endustriyas en Filibe, i ke los trenos ya foeron todos kon unos grandes rebatos por los viajadores, foe ke mi foe i yo tambien kon Johanan a Filibe, i estuvimos komo a 10 diyas lo todo vijitando, ke era lo todo avierto para todos, i aviyan tambien muntchos lugares de pasatiempos, seya por las notches komo i por los diyas i los presios seya por los hoteles komo i por las komanias era lo todo fiksado i ansi por todo lo restan de las kozas menesterozas por los vijitaderes i M. Beyu mi mujer ke si teniya metido dientes en viena, i ke si li aviyan rompido i yo ke mi los yevi por adovarlos foe ke los pedri i le izo azer otros moevos de el Dantist Vasil Argazov, ke kostaron 10 napoliones ke son fin agora estos ke los kolaneya, i denpoes ke ya estovimos mui boenos venirmos, a kaza kontentes,

En el anio de 5653, ke en Samokov, izieron de enderetchar la kaleja ande mozotros moravamos ke era una de la prensipalas, i sigun ke ja lo tengo eskrito, ke teniyamos grandes fragoas komo los ahires i las otluk-hanas i las kanselarias seya de mi Sr. Padre komo i estas de los Mullas i los mosos, lo todo iva a ser derokado i ke ya era ke kaliya i mos pagaran kon ke mos kontentaramos i

2084                    Biografia por mi Tchelebi-Moche A. Arie.             1893

mozotros, ke eyos fin a un grado ke la aviyan taksado era de darmos 4000 fr. ma komo mozotros esto non lo sopimos, foe ke de el presipio mos kijeron pagarmos 800 fr, i lo konvenimos por 1000 fr. ke foe ke mos enganiaron, i lo derokimos ke mos tomimos mozotros el material, i lo vendimos por otros 600 fr, i izimos las paderes kon los parmakes sigun de todos los otras, por ke estuviera avierto i ke se veiga de la kae las kazas i los kortijos i goertas, lo todo era por ke si viera si alguno keriya entrar de notche i kon esto non aviya ke entravan los ladrones, ke foe mas siguro de antes,

Johanan ke kontinoava en la Echkola de los amerikanos foe un diya ke foe gomitando, i esto sin dingun atcheke, i tambien iva i tiniendo dolor de kavesa i los Chacheos, ke si kayo un diya lavandose la kara, i tambien kaentura grande lo todo era i ke estava i kamenando, ma koando ya pasaron 2 diyas ke ya tuvo la kaentura mas grande i ke li dimos purga lo koal ke non si kiriya dado, foe ke el mediko ke aviya en Samokov Sr. Martinov, ke lo mero lo deklaro ke lo teniya el tifus i esto bien foerte i era el fievre de depoid, i sigun de koando si li enrezio esto foe de una manera 40 diyas, ke estuvo sufriendo, sin ke si depedria de si el en todo este tiempo non komiya nada, era el mediko ke li viniya 4 vezes a el diya, ke era solo el kinin ke li dava, i mas nada, alos kavos ke ya non tuvo mas la foersa, kedava desmayado, el durmir ke durmiya era solo a 5 puntos i se saltava, por abacharle la kaentura era kon los banios ke si li aziyan i esto seya para entrar en la banierola komo i para salir lo

2085                    Biografia por mi Tchelebi-Moche A. Arie.             1893

todo era desmayado ke lo ketavamos, los profesores de la Echkola de los protestantes ke eran i en mizmo tiempo i Papazim de sus klisa ke la teniyan en la Echkola era ke aziyan tefila en la klisa por la milizina de Joan, ke lo yamavan Jovantcho, i en kada alhad li viniya a vijitarlo el derektor de la Echkola ke era Sr. Hazkel, i lo bindizia en mitiendole las manos en la kavesa, i koando ya estuvo de su hazinura sano el estuvo otros 3 mezes por la konvalesensea, i denpoes i de esto ke ya estuvo sano i boeno a el li salieron en las patchas las varizes, ke las tuvo abufadas i mas tadre ke el empleava el tchorap de elastik lo kolaneyo muntchos anios i denpoes ke mas ya no lo kijo yevarlo si li avrio i li korio unos koantos anio[s] ke kalia siempre ke si lo kurara, i koando el estuvo en la gera, de los Balkanes de 1913 i ke estava en la bolnisa foe ke los medikos se lo kuravan i se le sere el burako i estuvo sano i boeno, i tambien esto ke tenia las patchas abofadas foe i ke si li ezbofaron, i de moevo denpoes de esta hazinura kontinuo la echkola mizma fin ala sinkena klasa,

En el anio de 5654, ke en el anio pasado non meri dingun etcho a detras de la hazinura de Joan, ke era seya los diyas komo i las notches siempre en kaza kudiandolo i para mi en este tienpo ke estuvo hazino komo a 4 mezes era ke non mi etchava ni mi deznudi para etcharmi seya el diya komo i las notches era siempre asentado i serviendolo por todo el menester en todos los puntos sin ke

2086                    Biografia por mi Tchelebi-Moche A. Arie.             1894

mi kansi ni me enfasii, yo komo durmiya sigun estava asentado komo a una ora en las 24 oras ya mi era bastante, i estava kon mis foersas para en kaza i esto de la plasa,

En este anio yo rekoje tambien los karneros sigun ke ya lo eskrivi mas antes, i lo enkamenava viya de el Haver Kosto Chehtov ke lo konosiya el ufisio i saviya tambien i el mondjirlas i lo mas muntcho ke el era ke vendiya la letche kon yevar de kaza en kaza ke esta manera el uzo i ansi era i loke i se vendiya, tuve tambien i ke rekoji i los kezos en tulum por Kostan ke de lo todo ya era un negosio, mui gustozo i limpio, i tambien i boeno i ganansiozo, i mas tadre ke ya si eskapo estos kezos i las karneras i en este anio ke la rekolta estuvo muntcho manka por las partes moestras, ansi era ke los kazalinos foeron uvligados de merkarsen el trigo de el pazar, i yo pensando ke esto ya si iva a poder konsomir, seya en trigo komo i en arinas lo ize ke por los presipios foe merkando algunas tchikas partidikas de trigos por los kazales de radomir i de Dubnisa i lo aziya moler arina i lo ivamos vindiendo en detalio, seya alos sevdadinos komo i mas muntcho a los kazalinos, i esto ke si engrandesio muntcho era ke lo enpesi a merkarlo de las garas de Mezra i de Roman, i lo traiva kon vagones ala gara de la bana i kon karos a Samokov ke kira ya era mui barata i esto era tambien lo todo venditas en kontante, i la konsumasion tambien ke era bastante grande lo foemos kontinuando, i era yo mizmo tambien ke estava en esto,

kon las reparasiones ke las aziya en kada anio en la

2087                    Biografia por mi Tchelebi-Moche A. Arie.             1894

kaza foe i en este anio tambien ke la boyadei, la kamareta esta ke yo dormiya, kon i ke ize serar las 4 ventanas en restando solo 6 ke teniya 10 ventanas i tambien renove algo de la mobilia de esta kamareta, ansi foe i de mizmo ke la mobelei, i la kamareta de el sigundo etaje ke era ensima de esta i ke era de boyas mavi kon unas penturias eya el tavan komo i las paderes mui ermozas i en akel enverano solo foe ke dormimos las notches en eya, i tambien i en los otros anios era ke aziya de mizmo las reparasiones i en las otras kamaretas, i tambien lis aziya i a 2 pares de djames kon a medias ventanas de fiero, lo todo kon i boyadiyarlas, ke lo todo kostava mui muntcho barato, i ke aviya tambien i gusto,

En el anio de 5655, ke Johanan ya aviya eskapado, la sinkena klasa en la Echkola de los amerekanos, i ke para el anio vinidero, ke non iva aver la sezena klasa por ke non teniyan elevos por poder avrir klasa, i parisiendomos sigun ke mos aviyan ditcho ke ya era i rekonosida i esta Echkola komo alas gemnazias mos foemos a Sofia ke mi i lo yevi tambien i a Sr. ivan Mantchev ke el koal ya era utchitel^[22] por ke lo embezara algunas kozas en kavzo ke podiya ser el menester ke diera examen por entrar en la sezena klasa, foe ke la Echkola ande el estuvo non foe rekonosida i ke deviya de dar examen por todas las klasas, i esto ke foe moi foerte i ke tambien non kijo mos kalio de buchkar partido de los profesores mas grandes i kon i

2088                    Biografia por mi Tchelebi-Moche A. Arie.             1895

algo de gaste ke se izo, por forma el dyo un examen de la sikena klasa, por poder entrar en la sezena, i esto kon ke i pagimos todas las taksas, el ke ya estuvo komo a una semana en esta Gemnazia, i en las revizias ke las izo el derektor, li dicho ke non era bastante solo kon el examen de la sinkena klasa otro ke li kaliya ke diera por todas las klasas, i esto ke el non lo kijo, foe ke si salio i non kijo ir mas, i en akel tiempo ke la ley ya era ke se resiviyan alos elevos en las aptekas de la sinkena klasa, por viya de Sr. Jshakutcho, B. Avraam (satchi) lo entrimos en la Apteka de Sr. Gustav Celten ke era la prima apteka en Sofia, i esto kon i azer todas las formaledades en la sanitarna dereksia, i el ke ya estuvo komo a 2 mezes en esta apteka, i Sr. Selten ke lo apretava muntcho en el lavoro, i ke estava el diya entero en pies, i tambien ke ande pezava era todo lajado, i de loke si yelava foe ke li vino el rematizimo, i esto li kavzo de hazeniyarse i se iva aflakandose, i el ke dormiya en la kaza de mi ermana M. Buhurutcha, ke ya estava en sofia kon sus ijos, i eya viendole ansi flako lo izo ke si lo trucho a Samokov, i esto sin ke si lo izieron saver ni a Sr. Selten ni menos ala Sanitarne dereksia, el ke ya estava en Samokov foe ke Sr. Selten mui araviado, lo izo demandar viya de la Sanitarna Dereksia por ke si li foera, a el lavoro, i mozotros respondimos siendo ke Sr. Selten teniya lajas en la apteka ande lavorava ke estava pezando i de esto li vino el rematizimo, es ke no iva a poder irse, ke por esto tambien ke el ja lo troko en tavlas ma torna non lo mandimos, porke era persona ravioza

2089                    Biografia por mi Tchelebi-Moche A. Arie.             1895

el Sr. Selten i no lo kudiava boeno, lo izimos ke si entro en la apteka de Samokov de Sr. Robert Goinarev, i estuvo kontinuando los 2 anios ke deviya de estar komo a utchenik,^[23]

Mozotros ke restimos en este tiempo enteramente solos en kaza era ke mos enbevisiyamos lo mas muntcho en la goerta, i en salirmos de kaza seya vijitar ande los parientes komo i kamenar por los paseos i ande aviya pasatiempos i yo en la plasa era en los negosios de los otros anios ke los iva kontinuandolos, i en las notches era ke meldava en los livros de los estudios i estos de estorias, i estava siempre fin a denpoes de la media notche, por ke non saliyemos de kaza en las notches, era lo mas muntcho solos ke estavamos, ke ya mos aviyamos uzado a esta vida i non mos era nada el estarmos solos ke por esto ya mos demandavan muntcha djente ma anos non mosi enportava, ke en kaza ya estava i Sr. Refaelatche,

En el anio de 5656, a razon de las leés moevas ke las izo el governo de esto de avansarles moneda a los kazalinos, de la zemledenska banka, i kon unos enteresos mui baratos, kontra de sus bienes ke los enpatronavan kada kazalino, por los tiempos de 10 i 20 anios, solo ke li yevaran los enteresos, en su tiempo, ke al punto de vista ya lis foe una koza mui leviana ma eyos en un enterval de 2 anios ya foe ke si travaron toda la moneda de los kreditos ke si lis avrio a kada uno, i esto lis kavzo por ke torna si aderesaran

2090                    Biografia por mi Tchelebi-Moche A. Arie.             1896

ande los bankeres por tomar moneda para pagar los enteresos, i esto por ke eyos ke ya toparon moneda pronta era ke foeron pagando i gastando, i sin ke buchkavan komo de antes por lavorar i ganar, el governo ke ya lo vido esto los decho liberos i el los enpeso i apretar por sus averes, ke lo aziya ke lis enpeso i a venderles las tarlas i los tchaires i la lei ke era ke non podiya merkar sevdadino las tiaras de los kazalinos iva a ser ke kaliya si las merkaran de los unos alos otros, i esto ke non lo podiyan merkar los kazalinos por ke ya estuvieron todos devdores a esta banka, foe ke lis iva kedando estas tiaras ala Banka i los kazalinos ke eran raviozos por esto ke lis iva tomandoles sus tieras era ke non se las tomavan por lavorar i kon esto kedavan vaziyas, i esto ke si lis rekojo muntcho i ke podia i arivar a ke todas las tieras pasaran a esta banka, lo izieron ke trokaron esta lei de tomarles las tiaras otro ke i estas ke lis i teniyan tomado de boltarselas a kada uno atras, i prolongar sus devetos por unos tiempos mas largos i kon unos enteresos de a 4%, a el anio, i enpesaron de moevo kada uno en sus lavoros, i era ke los unos ke tenian moneda i ke lis merkaron las tieras ya profetaron ma los unos kedaron mui proves, i esto kavzo algo de danio los Bankeres de estos ke lis tomava la banka las tieras ke era ke antes de todos la banka akonantava i el si kovrava de presipio,

Jean era ke kontinoava en la apteka de Sr. Robert, i lo merava mui bien i lo enbezava, ke por el presipio non li pagava nada anke ke la lei ya era ke li deviya de pagar al menos 50 fr .a

2091                    Biografia por mi Tchelebi-Moche A. Arie.             1896

el mez ma siendo ke mozotros lo kijimos a ke estuviera en Samokov foe ke non li demandimos, ma el ya foe ke mas tadre li enpeso a darle a 30 fr. a e mez, ke de esto si gustava mui muntcho koando las resiviya, i veniya ala botika i me las amostrava ansi era i ke li i iva ande la madre i se las empleyava por sus plazeres, de kreyaturas por ke era ke i yo ya li tava [dava] en kada semana aparte la semanada a 3 fr. ala semana, por su djop-hachlok,

Yo ke tuve una foerte dolor en el braso siedro, sin ke lo supe de koalo me vino era ke sofria muntcho i el braso non lo podiya levantar para vistirme i de todas las kuras ke mi ize nada no mi aprovetcho solo ke enpesi a irme a los banios de Beltchin kon todos mozotros i estavamos de 4 a 5 semanas, aziendomos a 2 vezes a el diya los banios, i kon unos koantos anios ke lo foe kontinoando de ir en estos banios foe ke mi si depedrio, i mas non tuve fin a este diya ke esto eskriviendo.

En el anio de 5657, ke a Joan ya si li adjuntaron los 2 anios de el sirvisio de elevo, i kon el sertifikato ke tomo de el Sr. Robert, si foe a Sofia por dar el examen en la sanitarna dereksia por tomar el deretcho de pomochtnik aptekar, ke denpoes ke li kalia ke estuviera i otros 2 anios komo pomochtnik tambien en alguna apteka era ke lo podiya irse en la Europa por estudiar a salir komo aptekar, i el ke ya dyo el examen en Sofia i ke ya reucho a pasarlo

2092                    Biografia por mi Tchelebi-Moche A. Arie.             1897

kon ke tomo los deretchos de esto i se konvinoen la apteka de Sr. Koltchakov, en utch bunar, por 125 fr, de paga a el mez, kon ke tenia i de durmir en la apteka, i por su mantinimiento era de su paga ke iva a mantenersem, i esto ke resiviya era ke lo gastava por sus plazeres i le adjustava yo por el menester, seya por vistir i otras kozas, i de esta apteka ya era kontente, i estuvo kontinuando en todo el tiempo ke foe el menester, en este tiempo ya foe ke yo i Beyu lo vijitimos unas koantas vezes, por ke el non viniya muntcho a Samokov i en este tiempo era i ke yo iva buchkando de topar kon algunos de los amigos por platikar sovre las leés de los soldados, lo todo por topar el molde de delebrarlo de este servisio, ke el no lo podiya a razon ke esto de las varizes, i yo ke iva endo ande los medikos i ande los personajes mas enfloentes militer, era ke kada uno me iva diziendo de una manera i en mizmo tiempo tambien i tomava i algunos de los sertifikatos, lo todo prontandole por el anio venidero, ke ya i kaliya ke lo meraran, i por esto yo vine a Sofia unas koantas vezes i ansi foe ke ya podimos reuchir anke ke por los primeros anios el dasio ke li metieron li foe mui grande,

kon el etcho de los dechkontos ke los aziya sigun eskrito, ke el governo iva kondenando a algunos ke tomavan mas grandes los enteresos de 12%, era ke yo mas non ize esto otro ke siempre va buchkando de kovrar esto ke mi deviyan i lo todo por viya de el djuzgo, i era por viya de los djuzgadores ke si eskapavan los etchos kon ke las kondisiones eran ke si li pagava a el el deretcho de advo

2093                    Biografia por mi Tchelebi-Moche A. Arie.             1897

advokato ke era a 5 %, i esto lo aziya ke en el mizmo diya ke los kondenava ya era ke mi viniya ala butika por kovrarse su deretcho i yo ya era ke al punto i li pagava i lo todo siempre era en sikreto, ke el non podiya tomar dinguna paga i lo todo si entiende ke era i kon la grande deretchedad, i ke ya mi los deviyan, este Djuzgador lo aziya para estos ke li pagavan su komision i koando si aparavan a el Djuzgo, lis demandava alos devdores ansi tu ke li deves a Sr. Arié Kon polisa 200 fr. dimi aver por koal tiempo es ke si los keres pagar, i el devdor en repoeta a esta demanda li diziya ke agora no tengo i kere ke mi espere los unos deziyan 3 mezes i los otros 6 mezes ke kon esto era ke ya atorgo ke deviya i sin mas ke lo dechava avlar ya aziya la rechenia, i koanto por los otros sigun ditcho ke non era el pagado, la demanda ke lis aziya a los devdores era ansi: tu non li deves a Sr, Jovan 200 fr,?, i el devdor respondiya ke non li deviya i kon esto li diziya a el reklamador, ke esta diziendo ke non ti deve, i kale ke lo demostres ke non es bastante solo kon la polisa i mas non dechava avlar, ke seya ke lo prolongava por ke lo demostre or lo serava el delo, i era en esta manera los djuzgadores, ke non estavan en kudiado, si pedria lo todo, por su komision, koando non li pagavan, porke la paga ke tomava tambien era tchika,

En el anio 5658, ke ya lo meraron a Joan la komisia i denpoes de muntchos examenares ke uvieron foe ke ya lo toparon ke non podiya ir

2094                    Biografia por mi Tchelebi-Moche A. Arie.             1898

a servir por soldado lo todo por esto ke teniya las varizes, i lo oblojeyaron [ovligaron] kon el dasio de pagarlo 10 anios sovre a 320 fr. a el anio ke esto ke mi foe mui muntcho yo li di kechas a Sr. Hristake zografski ke era el Kmet^[24], i mi dicho ke tenemos kaza grande por esto es ke mos metieron i el dasio grande, el koal era de 2 karas i tambien antisimit, ma esto lo pagimos 3 anios i denpoes ya lo abachimos a pagar solo a 80 fr, a el anio i esto de la primera komisia non era bastante era i ke kalya i ke lo merara i en la berhivna komisia^[25], i esto mos kalio vinir a Sofia, por ke lo meraran i denpoes ke ya paso i esto i el ke ya aviya aduztado [adjustado] i los 2 anios de ser pomochtnik, en las aptekas i ke era en el mes de oktombre, ke ya si avrian las Echkolas en la Europa, si foe a Lozan en la soiz^[26], kon ke lo akompani fin a Saribrot, la granisa de serbia, i el ke ya arivo en el treser diya a Losan se entro en la universitet, de esto por Farmasien, i la taksa era 600 fr. solo por la Echkola, ma ya era ke el gaste suyo de el presipio ya li foe poko, i denpoes ke el ya estuvo mui boeno kontinuando ke ya teniya kompanieros muntchos de la bulgaria i el si adjunto kon un elevo Samakovli ke estudiava sovre advokato, ke era Sr. Dimitre Manov, i durmiyan en una kamareta, i mas tadre el era i ke iva i en algunas de las eptekas de Lozan i lavorava a 2 i 3 oras a el diya ke por esto li pagavan a 5 fr. a el diya, i yo ke li mandava por el presipio a 150 fr. a el mez ya li era bastante, ma mas tadre ke non li abasto era i ke li mandava i demaziya, lo todo era i ke aparte pagava por las taksas i livros i vistidos i otras kozas,

2095                    Biografia por mi Tchelebi-Moche A. Arie.             1898

i era ke en kada diya teniyamos ke mos mandava karta aziendamos saver de todo loke li pasava en kada diya ansi era de mizmo i mozotros ke li mandavamos tambiem en kada diya i esto lo kontinoimos en todo el tiempo ke estuvo seya en Lozan komo i en Jenev, sin mankar ni un diya, el foe mui kontente de este estudio ke li foe i mui leviano a razon ke el ya lo konosiya mui bien seya el Franses komo i el Ingles i entelejente ke ya es mas de muntcho era siempre de los primeros de los estudentis, i lo keriyan muntcho sus profesores por esto ke ya la entindiya las liksiones mui presto,

En este anio ke yo estuve en Kostan komo a 2 mezes i Sr. Refaelatche ke ya si aviya ido a Sofia, era ke estavan solas las mujeres i lo pasavan entre las 2 solas, i mizmo denpoes i ke yo ya vine de Kostan era siempre ke M. Buhurutcha estava djunto kon mozotros ke Sr. Refaelatche estuvo en Sofia komo a uno i medio anio solo i denpoes si yevo ala familia,

En el anio de 5659, Jean vino de Lozan en el tiempo de las vakansas, i estuvo en Samokov algo de tiempo i denpoes si foe a Kiostendil i Dubnisa por kamenar djuntos kon otros mansevos, ansi tambien i a Sofia, i en su tiempo el partio de moevo i non kijo mas estar en Lozan ke si foe a Jenev, por eskapar sus estudios, i ansi es ke i los gastes tambien los tuvo mas grandes, ke esto ya foe algo mas pezgado para ami, ma non li refozi, i koando partio si foe mui

2096                    Biografia por mi Tchelebi-Moche A. Arie.             1899

gustozo, ke mientres este anio el foe a paris, i a otros ansi las grandes sevdades, el estuvo tambien i en una kanpania serka de Jenev ande estuvo tambien i algo malato, ma ya foe ke li paso presto, i en todo el tiempo ke el estuvo en sus estudios si alava mui muntcho ke lo paso mui boeno i ke si gozo, de todo lo boeno seya en la Chvesari komo i en la Fransia, i en el Tirol, i en la Almania i la Austria ke el estava en todas las mas enportantes sevdades de estos lugares, ma la vida de Jenev es la mijor de todas i su dezoyo es i siempre avla solo de jonev, i ke el un diya es a Jenev ke si va a ir a bivir, ke la depluma ke tiene es sovre ke ya poede lavorar i avrir apteka en Jonev lo koal ke los mas muntchos las deplumas ke lis dan es Bon pour L'orian^[27] ke esto es por ke non meten tino en esta ditcha,

Foe en este tiempo ke las komitas si espandieron mui muntcho i esto ke el Governo, la detinia i las iva mandando por ke foeran aziendo los mil males en la Makedonia i kon esta delantera i foersa ke eyos la teniyan era i ke ivan por foersa tomando i moneda de los sevdadinos de la Bulgaria kon ke i amenazavan i esto foe i ke trucho grande espanto por los Djidios. eyos rompiyan djamis en la notche por las kazas de los djidios, sigun ke en una notche li ronpian la poerta de Sr. Leon mi yerno ma el ke teniya en kaza un pero mui foerte foe ke modrio a unos koantos i kon esto foe ke si foeron a toda viya era ke aviya espanto, grande, i los konyoramientos ke si aziyan en la Polis non los apretavan ke era kon esto ke se ivan a enpatronar de la Makedonia, i visto a este foe ke Sr. Refaelatche si

2097                    Biografia por mi Tchelebi-Moche A. Arie.             1899

yevo a su Familia a Sofia, i la kaza ande eyos moravan en este tiempo ke kedo vazia era ke estavamos solos mozotros en la kaza entera i esto mos era grande apreto, por ke si en la notche un gato saltava ya mos paresia ke ya entraron los komitos, i mos espantavamos de salir de la kamareta, i ansi era ke las notches enteras estavamos sin etcharmos, i lo ivamos pasando kon meldar

yo ke non ize mas las arinas por razon ke i esto era ke si las enpesaron a tomar kon sakos i sin demandar, era ke iva a Sofia i en Hevra kon Sr. Refaelatche traivamos de Chichtov, kon bagones [vagones] gaz, ke esto ya si veniya ansi tambien i arozes de Pazardjik, anke ke las ganansias eran tchikas ma ya se iva vindiendo, i koanto a los averes ke teniya ya foe en este tiempo ke mas ya non si pudo, nada kovrar, ni menos buchkar ke el espanto i los amenazos ya foeron grandes lo todo solo de estos komitos, ke lo mas muntcho eran de los mansevos makedonialis, i estos ke ivan por los kazales de la makedonia ke kemavan i matavan i koando los presigiyan se viniyan a samokov ke era la granisa, i los mantiniyan sigun los soldados lo todo de el governo, i ke era mui ala sikreta i los turkos koando los aferavan era ke los degoyavan komo a las gainas, por ke non eran kon koenta, lo todo por ke los enganiavan los Voivodas, ke tambien i eyos eran makedonialis, i teniyan kada uno sus tchetas, aparte, el governo era ke gastava para estas tchetas komo a 2 miliones de frankos a el anio i esto lo kontinoaron fin ke lis pujo el gaste a 10 miliones a el anio i 30 anios estuvieron en esto, fin ala gera de los balkanes de 1913

2098                    Biografia por mi Tchelebi-Moche A. Arie.             1898

i ke sigun eyos lo esperavan de enpatronarsen de la makedonia entera non lo podieron ke sigun ya lo saven todos esta estoria,

Estas vidas foe ke mi foeron muntcho deskorajando el estarmi mas en Samokov, i lo todo esperando por koando iva a venir Jean de sus estudios, por buchkar de abandonarlo i yo a Samokov, ke non uvo mas etcho para ami en Samokov,

En el anio de 5660-61, era de mizmo ke kontinoava esto de las komitas i en este anio lis alesensiaron de parte de el Governo por ke ya podiyan i rekojer donos de todas las personas i sovre esto eyos fondaron de entre eyos komisiones por ke rekojeran moneda de todas las personas, i ansi foe ke ivan apretando alos Djidios por ke lis dieran la suma ke ejos la keriyan i li mandavan a dizir si en kavzo fin a tal tiempo non lis yevava a moneda ke lo ivan a matar, ke esto ya lo izieron a unos koantos i alos Djidios era ke los harvavan, i lis revatavan por foersa, i este espanto foe ke mas non saliyan mujeres a kamenar en las plasas, por ke i a eyas era ke las amenazavan, la polisia era ke ala klara deziya ke non lis dieran nada ma ala espalda era ke alguna koza daleldos por ke i eyos si estan matando por la patria, esto foe ke trucho ainda mas grande el kedamiento de los etchos en la plasa, ke uvo muntcha djente ke sofrian por el pan, ma entre los djidios ya foe ke los ayudavan a estos menesterozos, i Sr. Josef ke en Sofia era ke si enbevesia en algo de la

2099                    Biografia por mi Tchelebi-Moche A. Arie.             1900

vendita de koeros lavorados, foe ke vinimos en un akordo por azerlo este etcho en Hevra, i avrir tambien i una butika kon ke yo deviya meter alguna tchika suma de moneda por kapetal, i esto ke lo izimos kon ke i mos izimos i kontratos por las moestras kondisiones tomimos la botika en la fragoa de Sr. Gake trifonov, i enpesimos a merkar de estos artikolos i mas tadre ordenarlos de las fabrikas, i era solo Sr. Josef ke lo enkamenava i ansi de diya en diya foe siendo grande i yo mi foe a Samokov, ke mas tadre ke el etcho ya foe mas grande me vini i yo tambien i estovimos djuntos, lavorando fin a el grado ke en el primer anio se izo un oborot de 100,000 fr, i al sigundo pujo a 200,000 fr, i ansi a el treser a 400,000 fr, i ansi foe endo adelantre, i denpoes trokimos la butika ke ya foe esta tchika, i mas tadre me vini i yo tambien kon la Familia la Sofia, i lo kontinoimos en djuntos fin a un sierto grado i denpoes ke entro tambien i Sr. Dobri Petkov por Haver i pasando komo a 6 mezes ke estuvimos en djuntos foe ke mi sali yo ke mi ize Haver tambien kon Sr. Petkov por operasiones de bankerlik, i eyos los 2 restaron havarim sovre este negosio ke lo foeron tambien kontinuando, i esto komo un anio i ke eyos tuvieron una deferensia entre eyos foe i ke si espartieron i resto Sr. Josef solo por su konto lavorando ke li pujo el oborota mas ariva de un milion de fr. a el anio, i ke Sr. Petkov lo nomenaron por prezedente de la kamara i ke non podiya tener dinguna merkansia foe i ke mi esparti i yo de el i resti solo lavorando este mizmo negosio por mi konto, kon ke li bolti a Sr. petkov su kapetal ke mi lo

2100                   Biografia por mi Tchelebi-Moche A. Arie.             1900

aviya dado djunto i su ganansia, mozotros i en este anio tambien estuvimos en los banios de Beltchin ke mos viniya seya ami komo tambien i a Biyu mui boeno, i lo pasavamos tambien mui boeno ke viniya muntcha djente seya djidios komo i krestiyanos i era la kamareta a 100 paras de kira a el diya i mozotros teniyamos 2 kamaretas ke pagavamos a 4 gr. a el diya por kira de las 2 kamaretas, solo ke kalia ke mos yevaramos todo el menester de mobilia i esto kostava a 8 gr. el karo por yevarlo, la komania mola prontavamos en Beltchin kon ke mos aziyamos traer la karne i los kondutchos de Samokov, la paga de el banio era la I. klasa un gr. i la II. klasa 20 paras,

Jean denpoes ke ya si vino i eskapo sus estudios en Jenev, mos foemos djuntos a Sofia por ke diera i el examen tambien en la saniturna dereksia para ke foera rekonosido i para la Bulgaria foe ke estuvimos komo a 2 mezes para esto fin ke li arivo el tiempo ke por esto si reselava muntcho ma ya lo paso mui kolai, por ke era ke lis aziyan muntchas demandas, i le davan tambien i lavoros si era ke los iva a poder azerlos, i esto si pagava por taksa 100 fr. i era paga para los medikos, el ke no kijo entrarse en dinguna apteka foe ke avrio una butika por vender de estos artikolos, de drogeria,

Mozotros koando vinimos a Sofia tomimos a kira en el II. etaje de la kaza de Josef Prochek en el pasaje de Sveti-Nikola, sovre a 50 fr de kira a el mez, i estuvimos 5 anios, i pasimos mui boenos i kontentes,

2101

Asta aki si eskapa la partida por mi Tchelebi-

Moche A. Arié, ke enpesa de el anio de 5647 en el

tiempo ke yo estuve solo fin a el anio, de 5660-61,