צ'. יהודה ואברהם מ. אריה

1174

De aki i endelantre si enpesa la partida de Tchelebi Jeuda i Avraam, los 2 ermanos ke si izieron Haverim denpoes, ke ja si espartio Tchelebi Gavriel,

1175                            Biografia de Tchelebi Jeuda i Avraam M. Arie.                       1854

En el anio de 5614, ke sus ermano Tchelebi Gavriel ja si aparte, i Tchelebi Avraam, ke era mas mansevo, i ke ainda non avijan kedado de akordo kon Tchelebi Jeuda, si era ke ivan a estar, djuntos, i el ke solo tambien non kerija estarse, por ke non tuvo el kuraje, el lavarar solo, ke su dezejo era estarse kon el un ermano, torna Haver, ma non si rezikijava a demandarlo esto, i era ke tuvo algo de pasensia, i tchelebi Gavriel ke lo kudio, i viendolo ke era pensativle, i visto ke su ermano el grande ainda non lo avija jamado kijo entender ke poede ser ke non lo kerija, i sin ke li demando, nada a Tchelebi Avraam, el lo izo ke li foe ande su ermano el grande i le demando ke edeja tenija por sus ermano el tchiko, si era edeja de decharlo solo or, de tomarselos el uno de ejos por haver, i en adjuntandolo, ke sigun su edeja era ke si lo tomara Tchelebi Jeuda, por haver, komo ermano i jerno ke li es, i si en kavso non lo kerla, ala ora, iva a ser ke si lo iva a tomar el por haver, en tal por ke non estuviera solo, i ala ora li dicho Tchelebi Jeuda va bien, i jo, mi lo tomara, i denpoes de esto todo ke lis paso a los 2 ermanos los mas grandes si lo izo saver, a Tchelebi Avraam, i denpoes ejos los 2 ke vinieron en un kavo, si konviniron en las % ke ivan a tener, i foe ke Tchelebi Jeuda iva a tener, 60% i Tchelebi Avraam 40% i ejos si izieron sus kontratos, de todas las 2 partes, i los afirmaron kon la kondision ke la firma iva a kamenar Jeuda i Avraam arié solo ke el Tchelebi Avraam el kontrato afirmado de su ermano, si lo goadro, en la kacha ke la tenijan en le butika, kon la jena konfiensa ke ja

1176                             Biografia de Tchelebi Jeuda i Avraam M. Arie.                                 1854

la tenijan entre los ermanos sin nada pensar atras, ejos aunados si metieron en el lavoro, i se tomaron en sus livros todas las notas menesterozas, de la espartision, por poder enpesar a lavorar sovre todo esto ke si lis prezentara, para el avenir,

              En el anio de 5615, ke ja foe la gera Turka-Rusa, por la kremeja, lo izieron ke lo tomaron ejos el idare, (abastisimiento de todo modo de komania,) por la armada Turka, i ke devijan de entregar, i abasteser, todo esto ke sera el menester, por el mantenimiento de todos los soldados Turkos, i lo todo ja eran kon unos presios mui muntcho konvenivles, i kon el grande kuraje i la energia ke ja la tenijan de siempre ejos non si espantaron de nada, i sin tadrar partio Tchelebi Avraam, akompaniado de H, Chemoelatche el Chichko i se foeron a Selistra, ke en esta sivdad era el Garnizon (prensipal) chtab,) por la armada turka entera, i tambien ke los mas grandes depozitos de sus monisiones de gera eran todos en Silistra, i en Samokov ke resto Tchelebi Jeuda el enpeso a merkar, seja trigos komo tambien karneros i mas ansi todo esto ke podija ser el menester, i por merkar aroz, lo mando a H, Chelomo Levi, a Djuma, para ke merkara de los arozes de kotchina^[21] por mas baratos i tambien ke ja eran boenos, ejos enpesaron a expedir, todo esto ke ivan merkando, ansi de mizmo lo azija i Tchelebi Avraam ke iva merkando de la parte de Silistra, todo esto ke lo podija, ke las merkidas las azijan depor^[22] las partes de

1177                           Biografia de Tchelebi Jeuda i Avraam M. Arie.                             1855

la Tuna i de la Vlahija, i lo todo lo ivan depozitando, a partidas mui grandes, ke todos sus depozitos ke les tenijan eran todos ala urija de la tuna, i koando ja arivo el tiempo, ejos enpesaron a azer los entregamientos, de toda komanija ke ja la tenijan sigun ditcho a grandes partidas depozitadas, i abastesijan por todo esto ke si lis demandava, i por enfrentante, era tambien ke i les ivan mui bien en regla i pagandoles, i ansi era ke si topavan mui bien kontentes de sus lavoro, i ejos era ke siempre, buchkavam a non dechar en mankar, nada en sus depozitos, ansi de mizmo lo azia i Tchelebi Jeuda, de Samokov, estando al koriente i mui akurat, para mandarles todo esto ke li demandavan, i ansi lo azija tambien i H. Chelomo Levi de Djuma i les iva expidiendoles, los arozes, por koala parte ke si la demandavan, ma a los kavos enpeso a azer tortaldades^[23] el H. Chelomo, Levi, seja en los presios komo tambien i en las koaletas, i Tchelebi Jeuda ke ja era tanto entelejente, foe ke mui presto ja lo afero en la falsija, i sin restarse ni un punto el de notche partio kon menzil a Djuma, por azerle una revizia a el S-r. de H. Chelomo, i este ultimo ke non lo supo su arivada, para poderse prontar, ja foe el pekado a vista atorgado, i denpoes de mui bien espantarlo i mui bien i amenazarlo, por el avenir sigun de loke premija, lo izo ke lo decho torna en Djuma para ke kontinoara, i esto a razon ke non tenija a otra persona para meterlo en su lugar, i se bolto en el mizmo sija [dija] atras, a Samokov, i esto mizmo lo izo tambien i H. Chemoelatche el Chichko, en Silistra, ke i el koal tambien azija los entregamientos de las

1178                           Biografia de Tchelebi Jeuda i Avraam M. Arie.                             1855

menesteres de las komanias, a las armadas ke si topava, por los deredores de Silistra, i las resividas ke el las tomava lo asija ke la metad, foeran a su nombre, i el de esto ke azija tambien i los kovramientos, era ke si goadrava las sumas de moneda ke las azija figurar a su nombre, i lo restan si la entregava a Tchelebi Avraam, i esto ke lo izo 2 i 3 vezes, ja li asumo una suma de 100,000 groches, i koando ja foe aferado, dicho ke esto todo foe solo 10,000 groches, i el tiempo ke lis era mui kurto sovre todo ke los depozitos, eran mui grandes, ansi foe ke non podijan azer, dingunas revizias, i mas ke la gera, ja savia muntcho enfortesido fin a el grado ke ja si avijan enpesado i a espantarsen, i ansi foe ke lis kalio ke lo dechara i ke kamenaran adelantre,

              Sigun ditcho ariva ke a los presipios los pagamientos era ke la armada ja los azija en mui boena regula, ma a los kavos enpesaron a non ir pagando sigun de antes, i mas tadre enpesaron a non pagar de el entodo, i ansi era ke estavan en mui grandes apretos por moneda, i a rason de esto era ke non estavan pudiendo azer los empleos, por el abastisimiento de las komanias, ke eran menester, i esto a los kavos ke ja si lis manko de sus depozitos mui muntcho por ke i la armada ja foe mui grande, i ansi foe ke uvo tiempos ande, no pudieron entregar algunos artikolos, porke non los tenijan ni ke los podijan merkar por la mankansa de la moneda, i de esto foe ke uvieron konjoramientos de todas las 2 partes, ke el Tchelebi Avraam se defendija por esto ke non li pagavan, ansi foe ke en un dija el komandir

1179                           Biografia de Tchelebi Jeuda i Avraam M. Arie.                             1855

Pacha de la armada entera lo jamo a su kabineto i li dicho ke el non esta tiniendo dingun provetcho de todo este etcho, i adjuntandole ke vozotros ja estach ganando i los askeres ja estan komiendo i para mi non ai nada, sovre ejo, li dicho Tchelebi Avraam, va bien, i tenech mui boena razon, en tanto si es ke mi pagach, ami esto ke jo tengo de aver, fin a el tiempo, de un mez, a la ora jo vos daria a vos esto ke pertenese, i tambien loke lo meresech, i entonses li dicho el Pacha ke su paga es 100,000 groches, i komo si las dava ke ja li azija pagarle toda la suma ke la tenija de aver, fin a el tiempo de un mez, i Tchelebi Avraam ke ja si kontento a darsilis los 100,000 gr. lo izieron kon ke si kontentaron de todas las 2 partes, kon endevdarse el Tchelebi Avraam kon un bono pagavle dopo de un mez, saviendo ke lo todo dependija de el ditcho Pacha, ke sigun ja lo saven ke ejos era ke siempre, si azijan saver, los ermanos de todo loke lis pasava kon kartas, i de esto tambien ja si lo izo saver a su ermano, i ejos mui kontentes i gustozos ke ja ivan a tomar, todos sus averes ke tenijan i ke eran unas sumas mui bien redondas, ivan foertemente kontinuando, seja por ir merkando todos los artikolos menesterozos, komo tambien i entregandolos, i en arivando el tiempo fiksado, foe ke el Pacha, afoera ke non lis izo pagar, la suma entera ke li prometio a pagarles, foe ke non pago ni un groch, ke al menos por los 100 mil gr. ke ivan a ser para el tambien non li djo, i lo izo de mijor ke el pacha li reklama los 100,000 gr. de el bono i por todo esto ke Tchelebi Avraam, li kontava, i se defendija, era ke el Pacha, por

1180                           Biografia de Tchelebi Jeuda i Avraam M. Arie.                             1855

nada non rekonosia, fin ke alos kavos, el etcho vino a el djuzgo, i Tchelebi Avraam pensandose ke lo podijan kondenar, ke esto ja era mui siguro, lo topo por mijor de partir de Silistra i de vinirse a Samokov, por akonsejarse kon su ermano, i sovre esta dedjizion ke si avija tomado por salirse de Silistra, foe ke kon unos 2 dijas de mas antes ja si lo izo saver, kon kartas, i Tchelebi Jeuda kon resivir ansi karta, non tadra i lo izo ke partio, de Samokov a vista, i en este tiempo ke i Tchelebi Avraam tambien ja avija partido, de Silistra, foe ansi ke vino a ser a ke non si podieran enkontrarsen por el kamino, i koando el Tchelebi Avraam ke arivo a Lozna, foe ke lo, supo ke su ermano, ja avija partido por selistra, i sin ke viniera a Samokov, ke ja estava serka komo 6 oras de kamino, lo izo ke si bolto atras por alkansarlo a su ermano, i kon kerer kon el menzil de dija i de notche, es ke apenas lo pudo alkansarlo en Lom Palanka, ma el Tchelebi Avraam ja foe muntcho kansado seja de el vijaje, komo tambien i de el etcho de el bono, ke li foe un mui grande apreto, i siklet, i mas tambien ke tuvo i muntchos espantos, a razon ke a los kavos de la gera, ke ja eran, i sigun ke ja lo saven ke todos sus depozitos eran a la urija, de la tuna, i en kada ves ke ejos ivan a los depozitos, por ketar las komanias, i el inimigo ke ja estava enfrente, i ke los vijan, koando avrijan los depozitos, era ke lis tiravan, ma ja foe ki ni en una ves non tuvieron dingunos danios, i visto a todos apretos ke Tchelebi Avraam los travava, foe ke si hazenio, i su ermano mizmo de koando ja si enkontro en Lom i ke ja lo vido en el

1181                           Biografia de Tchelebi Jeuda i Avraam M. Arie.                             1855

grado ke estava, mismo ke li porfio muntcho por ke si boltara a Samokov, ma el non kijo i se foeron djunto a Selistra, i denpoes ke ejos ja arivaron a Selistra i ke ja si apararon a el djuzgo, i ke el Dajan ja lo entendio, ke era koza de Ruchbet, foe ke nomenaron una komision para ke lo apartara, el etcho ke komo viene a ser ke el Pacha tenga de aver, ansi una suma, de los idaredjis, foe ke la komision los konvinieron, porke el Pacha non buchkara la suma reklamada i ejos ke non tomaran ganansia de una sierta kantedad, de las ropas, ke entregavan, i kon esto foe, ke si arazgo el bono, i estos rebates ke lis izieron anke ja foe unas sumas mas grandes de los 100,000 gr. ma enfrentante de loke podijan ser kondenados a grandes penaletas, sigun las leés de el CHOHAD, es ke foeron i los profitos mas tchikos, ke i por esto non si lis enporto,

               I denpoes, ke ja pasaron unos koantos dijas, de koando ja si eskapo i esto de el djuzgo, i Tchelebi Avraam ke iva endo dija kada dija mas hazino, ejos los 2 ermanos, lo izieron de decharlo a H. Chemoelatche el Chichko, kon i a otros sus personales, ke ja los tenijan, i partieron todos los 2 por Samokov, i denpoes ke ja repozo Tchelebi Avraam unos koantos dijas foe ke li vinieron unos frios de koartanas, ke li turaron komo 6 mazes, i en este tiempo el mediko ke avija en Samokov era un sierto S-r. andonake unterberg, el koal era aboltado, de djidio a krestijano, i de moestra Familia, ke ja ivan siempre a viena, i ke ja tenijan a muntchos konosidos, lo supieron, ke tenija ermanos djidios en Viena, i era el koal S-r. Unterberg,  ke

1182                           Biografia de Tchelebi Jeuda i Avraam M. Arie.                             1855

lo vijitava a 3 vezes a el dija, ma de todas las kuras ke el lo ko kurava, nada non li foe ajudando, i visto a esto lo akonsejo por ke si foera a los banios de las agoas minerales, i esto en la Bania de Saparev, ke es serka a Dubnisa komo 2 oras, ma en akel tiempo era mui pirikolozo, el estarse persona komo a ejos en los kazales, a razon de las muntchas tchetas, (bandas) de ladrones, ke avijan por akejas partes, ke eran todas derejidas^[24] de el grande voivoda^[25], KARGALI?^[26] ke era un turko de Dubnisa, mui renomado, i de todas las mizuras ke las tomavan de la polisija era ke en nada, non reuchijan seja porke i estos ultimos tomavan parte or ke eran mui foertes, en las geras ke azijan, i de esto era ke los merkaderes non podijan vijajar i kavzo muntcho el akortamiento, de todos los negosios, porke a akel merkader ke lo aferavan, lo azijan ke aparte ke li rovavan todo esto ke el tenija lo azijan ke li kortavan i la kavesa, i sovre esto ke uvieron grandes konjoramientos a Kostan, foe ke de Kostan mandaron a un sierto Pacha para ke podiera esparzir estas bandas, i el koal ke ja foe mui entelejente i bien kapatche, i kon grande repozo, el lo pudo topar ke eran todas detinidas kon las foersas de los kaimakames i de los mutesarifes, en el nombre de Kargali ke eran todos Haverim, i lo izo de kondenarlos a todos los kaimakames, i motesarifes, i kon esto foeron esparzidas i mas longo tiempo non uvieron, i al S-r. De Kargali lo metieron en prezo ke i mas tadre se fujo i de prezo,

              I Tchelebi Avraam visto ke non si estava sanando, foe ke si detchiso de irse a los banios, en diziendose ke mijor serija

1183                           Biografia de Tchelebi Jeuda i Avraam M. Arie.                             1855

de sanarse en lugar de estarse hazino anke ke era tanto pirikolozo, ke si era ke li kontinoavan estos frios ainda, la esperansa non era boena, i li podija kavzar i la moerte, es ansi ke murir, era mijor de enkacharse en el pirikolo kon la esperansa, ke poede ser non lo aferavan, i sigun de i loke ja foe ansi, i el ke en aziendose los banios ke si podija tambien i sanar, foe ke partio djunto su Familija kon un karo de vakas, i akompanijado de un moso para ke lo kudiara, ke el arivo mui boeno sin ke tuvo dingunos enkontros malos, i sin tadrar ke el si abacho en el tchiflik de un sierto Haseke Suleman AA, ke ja era serka de los banios, i enpeso en el mizmo dija a azerlos ke foe una koza de maravija ke kon azer, de 8 a 10 banios, el ja enpeso a versi kada dija mas mijor, i ansi foe ke estuvo un mez aziendose en kada dija los banios, i se topo mui kontente, i se vino a Samokov mui sano i boeno, i mas en toda su vida, non tuvo frios, i mientres de su estar en la bania todo el menester de su komania si lo azija traer, de Dubnisa, solo ke de entonses li kedo ke tenija muntchas agruras de el estomago, mizmo ke ja si goadrava de el komer ma torna kon todo koando komija lo poko de dezajunos, ke era en akel tiempo ke kalija los izieron en los dijas de viernes, para el dija de Chabad, komo borekitas i frejaldikas, i kezadikas i eskolatchas, i los modos de los dulses ke eran todos gizados, kon manteka i de kaimakes kotchos i krudos, i letches kotchas kon aroz pezado, era ke lo topava de esto ke li kavzava, ainda mas muntcho a traerle las agruras, i esto li turava fin a el dija de martes, i la kura ke emplejava

1184                           Biografia de Tchelebi Jeuda i Avraam M. Arie.                             1855

por kontra a estas agruras era kon ir komiendo los gajos de las mezes, unos kotchos i otros krudos, i kon esto li paresija ke ja li venija algo boeno, i estas agruras li turaron fin a ke tuvo la edad de 54 anios, i denpoes mas non las tuvo mizmo ke komija los dezajunos ditchos, i denpoes ke ja pasaron otras 3 semanas de koando ja bolto de los banios, i ke ja si vido ke ja estava sano i boeno, partio de moevo por Selistra, por merar i de akomodar, el etcho ke li konfojo a H. Chemoelatche el Chichko, i koando ja arivo en Silistra, i ke enpeso a reglar los kontos de tanto tiempo es ke li foe mui grande, pena ma siendo ke ja konosija mui bien el jevar kontos, i tefteres, ja foe en un kurto tiempo ke lo reglo todo, i de mizmo ivan kontinuando, en sus entregamientos de todos los artikolos ke si les demandavan, ma H. Chemoelatche el Chichko, foe i el tambien ke si hazenio, i kalio ke lo mandaran a bukarest, para sanarse porke non savija ni el loke tenija, i koando ja arivo en Bukarest, i ke si adereso ande los medikos ke al punto ja lo entendieron su hazinura porke el si tenija kaido tambien i de un kavajo i bever ke ja bevija a muntcho, fin a el grado ke vinijan dijas ke si bivija i a una oka de raki ke es komo 2 litros, i non si enboratchava, i la hazinura ke tenija era ke tenija el menester de una operasion, i demandandole la suja kontentes foe de akordo enfrentante por estar sano, i para el dija ke li feksaron li dicheron ke devija irse a una de las bolnisas echpetal, i en este dija ke devija de irse el lo izo ke si bevio una oka de el raki i los medikos ke lo kijeron endormeserlo, i denpoes ke ja li

1185                           Biografia de Tchelebi Jeuda i Avraam M. Arie.                             1855

dieron en todos los goesmos por el endormisimiento, i ke non lo asija endormeser, ansi i mizmo ke li ivan dandole a goler los mas foertes goesmos era de mismo ke non si endormesija, ke altramente, non li podijan azerle la operasion, fin ke kalio ke si li aderesaran a el mizmo por demandarle ke dichera alguna razon i el riendoselis dicho ke el antes de vinir a el ichpetal si bevio, serka 2 litros de raki, i es ansi ke el rake akonante a todos los goezmos foertes ke li ivan dandole, sovre esto ejos los medikos lo metieron en una de las kamaretas de la bolnisa, i lo detuvieron 3 dijas enserado para ke non biviera, i al koatren dija li izieron la operasion ke li foe mui levjana, i en pokos dijas el ja estuvo sano i boeno, i se vino de moevo a Selistra, i kontenoava en su etcho,

              En este anio li nasio a S-r. Mochonatche, el IJO grande de Tchelebi Jeuda una IJA, i la Jamaron Belia, ke es mujer de S-r. Chemoelatche su Tio, i lo izieron tambien i kon eja sigun el uzo de todas las paridas, de entre la familia i su madre propia la aletchava, i la krejava kon darle todos los kudios menesterozos i mas tadre ke su madre ja era sana i boena, era ke kudiava tambien i por los menesteres de la kuzina, i estos de su marido, i tambien por la kaza, i era una dechipla de la edad de 10 a 12 anios ke la velava a ja kreatura en la kuna,

             Esta Belia koando ja foe mas grande, frekonto la echkola seja por en djodezmo ansi tambien i por el franses, eja es buena idokada, i mui nekotchera, i eja kazo de la edad de 13 anios, kon su

1186                           Biografia de Tchelebi Jeuda i Avraam M. Arie.                             1855

Tio S-r. Chemoelatche, ke Tchelebi Jeuda lo kijo kazarlo en su vida ejos biven mui aunados, i kontentes, eja mizmo ke ja estava kazada i parida, torna kon todo ja tomava liksiones de piano i lis kantes de la boka, porke ja kudijava su esfoegra, seja por la kasa komo tambien i por las krijaturas,

               En el anio de 5616, a razon de el idare de la armada ke la tuvieron silistra, ejos avijan muntcho enmankado, de lavorar, en el etcho de los echkontos, i en este anio ke mas ja non uvo etcho de armada era ke ivan endo para desbarasarsen, ke i esto, non lis turo, muntcho tiempo, i foeron desbarasados de todo punto, i foe torna ejos ke enpesaron a dar todas las foersas siempre, en los echkontos, ke era de esto ke ejos tenijan los mas grandes profitos, arazon ke lis tomavan sovre 20 % a el anio, ke este % ja era entre las merkaderes, komo barato, ejos aparte de loke ja merkavan de kaje todos los maadendjis, los fieros ke ejos los lavoravan, era tambien ke tenijan ke ketavan i de el maaden, de Rado[il] el ke ja era sujos, de 20 a 25 kantares a la semana, i lo todo lo mandavan a Pazardjik, ke en este lugar era el pazar, por las venditas de todos los fieros, i era en kurchumli han i ke si depozitavan, i kada maadendji tenija su depozito fragoado de tavlas, ande los depozetavan, i en los 2 dijas ala semana ke era en los dijas de martes i de mierkoles, los dijas ke si rekojijan los pazares, ke vinijan de las partes de Iderne i de

1187                           Biografia de Tchelebi Jeuda i Avraam M. Arie.                             1856

Filibe, i ansi de mas i los otros, ke eran a los deredores de Pazardjik, i non era solo por las merkidas de los fieros, era tambien i  ke merkavan, a partidas grandes de los arozes, i sakos i ansi mas i otras kozas ke salijan en Pazardjik, i ejos ke ja tenijan sus satidji, era ke en kada semana se iva a pazardjik, i lis vendija, los fieros, i estos tambien ke los tomavan de los maadendjis, ke era ke lis davan la metad de la moneda, i la otra metad si la detinijan a la devda, i kon ke li rebatijan tambien i a 10 gr. por kada kantar, de el presio dela plasa de akeja semana, i era siempre ke de esta metad ke lis tomavan paras ke altramente ejos non podijan kontarles en moneda porke nunka non lis podija sovrar,

             En este anio ejos aparte de loke ja lo merkavan siempre los sahtijanes ke salijan en samokov, foe ke en esta anio ejos, merkaron tambien i partidas mui grandes, de pazardjik i de otluk kiovi^[27] i de otros ansi lugares ke lo lavoravan i lo todo era ke siempre lo mandavan a Viena la mas grande partida a S-r. Leon Adut. i la una partida a S-r. Elijau Chaki ke el koal tambien era jerno de S-r. Adut i ke si lo vindieran siempre por sus kontos i la komision ke lis pagavan era de a 2% de komision i a 1/2 % de magazenaje, i por en kavzo ke si lis azija el menester de travar moneda i antes ke si lis vindiera las ropas tenijan ke podijan travar, kon ke lis pagavan a 6 % de entereso a el anio, ma esto a los presipios lo azijan mui poko, por ke non tenijan el menester, de prevalersen, a razon ke i ejos tambien lo merkavan a fijado i por tiempo bien largos i mas antes ja lo

1188                           Biografia de Tchelebi Jeuda i Avraam M. Arie.                             1856

tengo eskrito sigun de loke azijan estos pagamientos, ke era mui grande la konfiensa ke lis tenijan, lo todo por ke im[i] ejos tambien era ke si konportavan sigun de loke primija i siempre era kon la mas grande deretchedad, i tambien ke si pagavan mui muntcho de la razon, i azijan grandes adaletis^[28], (prezentes), sin dingunas entisiones de por el avenir, ke sus karakter era esto,

              Koando merkavan Hachares ke es los diezmos delos trigos era a sumas grandes i esto de los mas grandes kazales, ke por los tchikos non si endenijavan a tomar, por ke merkaran i otros, i ke non avlaran la djente, i para diezmarlos era ke si ivan en okasion i ejos mizmos kon ke ja eran akompanijados de turkos ke ja lo konosijan este ofisio, i las pagas de a estos personales ke lis pagavan era de 100 a 120 gr. a el mez, i mantener ke ja si mantenijan de los kazales era ke lis eran mui rekonosientes porke otros non lis pagavan estas pagas sigun ditcho ke eran mui galantes, i ansi era ke si lis aparavan delantre komo a los kaimakames, i todo era kon las temenas ke resivijan las komandas ke lis davan i por reintchirlas, lo koal ke a otros seja djidios or krestijanos, non lo azijan esto ke los Turkos son orgojozos ma a ejos ja lo azijan i esto por koalo, seja por la grande enfloensa ke la tenijan en general or ke i ejos tambien era ke si savijan mui boeno i komportar, ke tenijan los karakteres de los turkos de ser galantones i peadozos, i los trigos ke los rekojijan de los kazales ja era ke la mas grande partida la vendijan a los mizmos kazalinos i esto ke lis sovrava, lo depozetavan en sus

1189                           Biografia de Tchelebi Jeuda i Avraam M. Arie.                             1856

hanbares ke ja los tenijan, i koando non lis abastava sus depozitos ejos tomavan kon kira ja avijan muntchos i les pagavan de 200 fin a 300 gr. de kira a el anio, por un depozito ande podijan depozitar de 100 a 120,000 okas, i en medio de el envierno ja venijan de moevo los kasalinos i lo merkavan kon 4 i 5 gr. mas karo por kutla (una kutla era 30 okas,) i lo todo a fijado, i lis tomavan senetis afirmados a 10 i 15 personas en kada bono, i afeansados el uno por el otro, i por unos tiempos de 4 a 6 meses, i en sus deskaimientos era ke nunka non pagavan por su djusto, solo ke era ke ja davan algunas siertas sumas akonto i por lo restan torna lo renovavan los senetis kon ke i lis pujavan i los enteresos, i ansi era siempre ke lo ivan prolongando fin ke pagavan i nunka non batijava nada, ke en veses koando la rekolta lis era boena era ke lis tomavan i tregos por las devdas, i esto kon sus grandes kontentes, porke i ejos lo tenijan a poko, i de esta manera se komportavan i eran de todas las 2 partes kontentes, i sin ke nunka si akechavan de ejos,

             Ejos anke ke ja si avijan retirado de la merkansia de las ropas, era ke torna kon todo si azijan traer, de Viena i de Triesta, algunas artikolos de los mas karos, i esto por nin dechar kale seja enteramente en la kaza ke ja la tuvieron lavorado, i los artikolos ke los traivan era Tchivit, i kalai i nichadir, ke el Tchivit lo vendijan fin a 300 gr, la oka, i el kalai de 25 a 30 gr, kon el nichadir, i esto era ke lo davan a fijado por 4 meses a los bojadjis, ke avijan muntchos en Samokov, ke bojadejavan los Chajakis de esto

1190                           Biografia de Tchelebi Jeuda i Avraam M. Arie.                             1856

i era una de las mas grandes endustrias de Samokov, ke vinijan grandes merkaderes seja de la Bosna komo tambien i de la Girgaja, por merkar los Chalvares ke ja los prontavan en un Tcharchi grande ke avija ande los lavoravan i se jamava el Tcharchi de los abadjis, i lo vendijan kon una ganansia de 15 % i esto era solo por ke ja eran sus klientes de viejo, i en okazion tambien avija ke non ganavan, ma ejos torna kon todo siempre lo kontinuavan ke i en mi tiempo tambien koando ja estuve i jo en la oda tambien ja tenijan, de esto,

              Sigun ke mas antes ja lo tengo eskrito ke ejos foe ke siempre si okupavan delos etchos de el kolel, i anke se ejos ja las tenijan sus okopasiones, tantas, ma torna kon todo esto non lo dechavan i 2 veses a la semana ke ejos si rekojijan en el midrach agadol de el Kaal viejo era para dusgar a el poevlo seja por los etchos de el kolel komo tambien i estos de sus merkansijas i de familiares, i a todos los metijan en paz, i los sentijan, ke era komo azerlo una rechenia i en kavzo menesterozo lo azijan reintchir i por vija de la polisija, ke estas foersas ja las tenijan, i mientres estas adjuntas ke ejos las asijan foe ke kon la kontentes de todo el poevlo, ejos si detchizaron por fragoarsen una moeva i grande KEILA, i para esto ejos lo izieron ke kada uno kon micheberah, ke etchara akejo le lo podija i envelontava, su alma, i en el primer micheberah ejos ja rekojeron komo 15 mil gr. ke esto ja lis foe mui bastante, i ansi lo foeron kontinuando, i rekojendo de ande lo podijan mizmo a sumas tchikas, i todos kon grande kerensia ivan dando a la kacha, de el

1191                           Biografia de Tchelebi Jeuda i Avraam M. Arie.                             1856

Kolel, en los tiempos, ke kada uno lo podija, i ansi foe ke reucheron por alkansar sus buto,

              Sigun ditcho mas antes ejos de mizmo sus vidas de kasa foeron siempre las mismas, i lo mas muntcho de sus pasatiempo era siempre lo mas muntcho entre la familia, ke lo azijan por las notches de el envierno ke eran largas, si rekojijan en kada tiempo en una de sus kazas, kon ke prontavan i komanijas de modos de indijanas jenas kon aroz, i modos de otras komidas, i tambien de modos de komidas de dulses ke esto ja las savijan mui bien azerlas, i se adjuntavan kon las mujeres, i kantavan i djugavan a mudos de los djuegos de akejos tiempos, i en vezes lo azijan esto i ande sus amigos en otras kazas kon ke si prontavan de mizmo las komanijas, i djugavan a los fildjanes modos de djugos a la turka ke ja eran mui agradavles, i esto koando lo azijan en otras kazas era solo los ombres, i las mujeres si restavan en kaza, i lo todo era kon orfane, ke lis tokava, a 4 i 5 gr. por persona, por todo el gaste, porke lo todo era mui barato, i esto lo azijan tambien i por los dijas de el enverano ke si ivan a los kampos i las vignas i en vezes durmijan tambien en las vignas i los maadenes, i si anke ejos sigun ke ja meldaron ke arivavan en unos  tiempos de mui grandes apretos, ma torna koando avija de pasatiempo, atras non lo dechavan, i por los gastes non si lis enportava,

               Tchelebi Jeuda si levantava kada dija demanijana, i se iva a el Kaal a dizir la TEFILA, kon MINJAN, i a razon ke iva el era ke vinijan kaje todos los Djidios a el Kaal ke era muntcha vergo

1192                           Biografia de Tchelebi Jeuda i Avraam M. Arie.                             1856

vergoensa, el non vinir a el Kaal, seja por la Tefila de las manijanas komo tambien i por la minha i el Arvid de las tadres, ma Tchelebi Avraam non vinija, siempre, por los dijas de la semana, ke el a rason ke era mui kanso de los lavoros de el dija ke el los tenija i non podija durmirse de prima ke si etchava mui tadre, era ke dizija la Tefila en kaza i se mitija 2 pares de Tefilim,

              En este anio en el mes de Adar ke era el 25, murio, sus S-ra madre la Bu. Lea en Jeruchalaim, de una edad de 69 anios, i eja estuvo en Jeruchalaim 13 anios, ke sigun de loke pasava en Jeruchalaim ja lo tengo eskrito mas antes, i sus IJOS los aprofejados ke los tenija en jeruchalaim la enteraron i li izieron todos los kavodes ke lo merisija, i ejos si enpatronaron de todo el bien ke eja lo enpatronava, ma ejos los IJOS en samokov lo supieron denpoes de 2 mezes ke por ejo si aravijaron mui muntcho de esto ke si lo goadraron, ke i ejos tambien kerijan asentarsen en siete, i azer, todos la onor por una madre, i ejos en el anio entero li dicheron el Kadich, i mas lo todo, de ir dando Sedaka a todos los menesterozos, i ansi mas lo todo ke foe el menester,

               (sovre esto ke una djente lo uzan muntcho a goadrarlo serija sigun mi jero, porke tadre or temprano es ke torna ja lo va a saver, a koalo es ke si gana, a tiempo ke lo vemos en las otras Umod en ansi kavsos kon telegrafos lo azen saver a sus djenetores, por ke vengan ande el moerto, i kon esto, non es koza ke si poede esperar ke si podra torna rebevir, es ansi ke non si keri goadrado,)

1193                           Biografia de Tchelebi Jeuda i Avraam M. Arie.                             1857

             En este anio de 5617, Tchelebi Jeuda i Avraam, lo entraron i a S-r. Mochonatche, el Ijo grande de Tchelebi Jeuda, en la Hevra de sus magazen ke ejos lavoravan, kon ke li metio su padre, 200,000 gr. por kapetal, i esto kon ke si los mengo, de el kapetal ke el lo tenija en el magazen, i li nombraron por ke tuviera de parte 10 % seja de las ganansias komo tambien i de las piedritas, i S-r Mochonatche mui kontente i gustozo de esto ke el ja estava kazado i aijado, si metio tambien i el en el lavoro, porke el ja era mui savido i entelejente, i tambien ke era i boen HAHAMI grande ke ja era, lavorava, de esto ke li amostravan, i pasando komo poko tiempo, lo mandaron a Kostan, kon darle las kartas menesterozas, porke lo rekonosieran, seja ande S-r Kamondo komo tambien i otros mas sus konosidos ke ja los tenijan i ke tratavan kon ejos de mas antes, lo todo, foe kon la entision, para ke merkara, los diezmos ke es los Hachares a razon ke en este tiempo si avijan trokado las leés, de las venditas de los Hachares ke si vendijan en kada sivdad, kada una por si aparte, i foe ke si devijan de vendersen solo en Kostan i esto en groso ke es solo los departamentos, i non solo los djezmos era tambien i los beglikes^[29] ke es el dasio ke si kovrava por los karneros, i de los pechkados, i de los tutunes, i ansi mas todos los otros dasios ke si kovravan, iva a ser ke solo en Kostan si ivan a poder vendersen ke es la kapetala, i por levijaneza a estas venditas, de parte de el governo avrio kreditos, a los mas grandes bankeres, de Kostan para ke estos foeran las fijansas ke los jamavan TAUDTCHIS^[30], i todos estos

1194                           Biografia de Tchelebi Jeuda i Avraam M. Arie.                             1857

dasios ke los metijan en enkante, i los konkorentes, ke ja si prezentavan, era ke ivan pujando kada uno de los primeros presios ke el governo los nombro, fin ke en alguno li kedava, i esto era ke si asijan estas venditas, por tiempos de 4 i 6 i 8 mezes, i a el konkorente ke li kedo, koal de estos dasios foesa devija de amostrar a uno de los taudtchis (bankeres) ke el governo lis tenija avrido los kreditos, i kon esto si lis dava los Fermanes, porke iva a ser el solo el multezim, i el banker era ke asija los pagamientos en sus deskaimientos, ni S-r. Mochonatche ke ja ariva a Kostan porke era en 15 dijas ke lo podija aser este vijaje, i lo todo kon menzil, ke esto de el menzil ja lo tengo eskrito de koala forma era, de el presipio el si adereso ande el S-r. Kamondo, kon ke li jevo las kartas, i lo resivieron kon grande onor i se lo jevaron en sus kaza komo sus musafir, anke ke el ja tenija su kamareta en el han de Mustafa Pacha, ke era el mas grande Hotel, i ke era akompanijado de su moso Haim, Aladjem, ke en akel tiempo koando vijajavan los merkaderes mas grandes kalija ke foeran akompanijados de sus mosos seja para ke los kudijaran komo tambien i para ke los goadraran, i los sirviera, i depo [dopo] de unos koantos dijas el S-r. Mochonatche lis demando ande los S-res kamondo si era ke los ivan a kredetar por i ejos merkar ansi seja de los Hachares or de los otros multezimes, ke de esto ja li foeron de akordo, i izieron las kondisiones, para serlis ejos los Taudtchis, kon kondision ke toda moneda ke la tenijan de rekojer, ke si la devijan de remetersila kon kada pochta, i la suma ke non abastara, por el

1195                           Biografia de Tchelebi Jeuda i Avraam M. Arie.                             1857

adjusto de kada taksit ke ja lo ivan a adjustar ejos kon la kundision de pagarles a 12 % de enteres por las sumas ke ivan a desbolsar en konto koriente, i aparte a 2 % de taudié,

Ke sovre esta konvension ke lo izo saver a Samokov, i topandolo de djusto li eskrivieron porke isiera algunas merkidas de algunos departamentos, solo en los hachares, i S-r, Mochonatche, i ke resivio ansi orden el akompanijado de un personal de S-r, Kamondo, si presento, al lugar ande si azijan estas venditas, i demostrandose komo konkorente, i en mizmo tiempo i a el Taudtchi el konkorejava en muntchos departamentos, i le kedaron sovre el los departamentos, de Bresnik, Zlatisa, Trin i de Samokov, lo todo era una suma de serka un milion i medio de frankos, i sovre estas merkidas ke el las izo i ke ja foeron aprovadas a sus nombre, kon prima lo izo saver a Samokov i ejos avista partieron por los ditchos departamientos, i enpesaron a azer venditas en groso ke los vendijan tambien i ejos, a los echpikulantes de este ofisio, a kazales enteros, ke algunos lis angajavan i a 2 i 3 kazales kon ke lis tomavan i sus boenas garansijas, i tambien komo kaparo i algunas sumas de moneda i adelantado i de estos ke lis kedavan i ke non los podijan venderlos, era ke metijan ejos sus personales i los djezmavan, i las venditas ke las azijan ja era kon boenos kontos i ganansias, porke non tenijan apreto por moneda, ke el taudtchi ja iva a responder, en sus tiempos por los taksites, i toda la moneda ke lis kaiva seja de esto ke tomavan de los kaparos y seja tambien i de otros lugares lo todo siempre lo ivan remetiendo

1196                           Biografia de Tchelebi Jeuda i Avraam M. Arie.                             1857

en grupos kon las pochtas a Kostan, lo todo ande S-r. Kamondo sigun ditcho ke era en konto koriente sus partidas i non tenijan limeto de la suma de kredit ke tenijan otro ke era la kacha avierta fin la suma ke lo kerijan, ma ejos siempre si reservavan,

            Denpoes ke ja eskapo estas merkidas non se vino a Samokov el S-r. Mochonatche otro ke li eskrivieron porke restara en Kostan fin ke vinija el tiempo ke si ivan a vender tambien i los Beglikes kon las resumates, (este de los resumates era el deretcho ke si kovrava por los pechkados i las vakas i kavajos i ansi mas i tambien por los pechkados), ke si vendijan en los pazares, ke era en el mez de marso ke si vendijan, ke en arivando tambien i este tiempo, foe, de mizmo vija de S-r. kamondo ke merko el Beglik, de el departamento de Sofia, i los resumates de los departamentos de Sofia i de Vidin, ke i esta merkida foe de una suma de 1 1/2 milion de frankos, i tambien i estas venditas si azijan kon las kundisiones, sigun de los Hachares i por lo todo el Taudtchi ke ja lis era el S-r. Kamondo, era, ke a ejos lis restava solo el lavorar, sin pensar por los pagamientos, i kon el Resomat foe ke lo vendieron a los echpikolantes kon mui boenas ganansias, i tamben a personas mas siguras, i koanto a el Beglik lo enkamenaron i lo exploataron ejos mizmos porke non toparon a venderlo, ke era una koza mas rezikioza, de los otras seja los Hachares komo tambien i los resomates, ke al punto de vista merando ja eran koza de aires, i lo todo a el MAZAL, ke i ejos tambien eran de el presipio, algo espantados pensandosen ke sovre el beglik podija ser

1197                           Biografia de Tchelebi Jeuda i Avraam M. Arie.                             1857

ke uviera la mortalidad, i kon los hachares de mizmo ke la rekolta non foera boena, ansi i kon los resumates, ke non saliera pechkados ma ejos torna kon todo kon el mui grande kuraje, si metijan al lavoro sin kansarsen, ke sovre el Beglik ke lis kedo ja lo tengo eskrito sigun ke lo azijan ke si kovrava a 4 gr. por kavesa de karnero i la kavra ke ja era de la edad de un anio, i lo todo era ke kalia mui presto ke si kontara lo todo en el mez de marso, ke lo mas muntcho de las mortaldades son en este mes, de la prima vera, i era ke esto todo ja si savija en el enterval de un mez seja las ganansias komo tambien i las piedritas, i denpoes ke ja azijan i las tchalkaturas^[31] ja era ke enpesavan i a kovrarles ke en los pagamientos, era ke si lis rebivijan muntchos modos de defekultades, ke lo todo iva a ser, por vija de los kaimakames i los motesarifes ke si ivan a djuzgar, ke para esto tambien lis era el menester, de traerles muntchas kartas de rekomendasiones de los mas grandes Pachas de Kostan i para esto tambien ke si kerija ken ke foera kamenando era ke S-r. Mochonatche tambien lo kalia ke estuviera en Kostan por ir tomando ansi las rekomendasiones i tambien ordenes foertes por ke foeran mui bien protejados, i bien vistos, ke lo todo tambien lo ajudava i s-r, kamondo i lo rekomandava en las admenestrastones, las mas grandes para ke si li podiera reintchir su dezejo, i ansi foe ke estuvo kon sira 15 mezes, en Kostan, sin venir a Samokov,

            A el ke ja non li kedo mas por koalo restar en Kostan partio por vija de Salonique, por mar, kon mas otros kompanieros ke

1198                           Biografia de Tchelebi Jeuda i Avraam M. Arie.                             1857

si li adjuntaron, i ejos todos ke tomaron lugar komo mansevos en la goverta, seja por los boenos aires or seja por mas barato i koando ja estuvieron en medio de el kamino foe ke salio una furtuna en la mar mui grande, de foertes aires, fin a el grado ke si iva entchendo el Vapor jeno de agoa, de las foertes dalgas ke avijan, i visto a esto mizmo ke ja buchko por tomar lugar en la prima klasa, sin merar las taksas, ma ja foe mui tadre ke otros ja avijan angajijado todos los lugares ke non kedo para el ne por estarse mizmo en pies, i ansi foe ke resto torna en la goverta, i todo el aire ke li foe dandole i el espanto ke ja li foe mui grande, apenas ke el ja arivo a Samokov foe ke iva endo siempre mui flako, i siempre era vijitado de los medikos i lo toparon ke tenija hazinura de el egado, i de esto era ke non podija kaje nada komer i kansar li kalija ke non si kansara de el entodo, foe endo ansi siempre flako fin a el anio de 5622, ke li kalio si foera a viena por merarse de los medikos de viena i el si foe kon su mujer, la Bu. amadutcha i su IJO S-r. Behoratche, i tambien si lo jevo i a Konorte B. Chelomo komo moso ke ja lo tenijan en el magazen, i los medikos de viena lo mandaron a los banios de Karlesbad i otros, i kon unos koantos banios ke el los izo ja estuvo sano i boeno i ejos ke ja vinieron en viena, lo decho a su ijo el S-r. Behoratche kon konorte sus moso i ejos los 2 partieron a Paris, ke estuvieron komo 10 dijas, kamenandosen en tiatros i muzemis, i ansi mas en todos los lugares mijores de Paris, i lis kostava de gaste solo por sus plazeres a 250 fr. a el dija, i koando ejos ja boltaron a

1199                           Biografia de Tchelebi Jeuda i Avraam M. Arie.                             1857

Viena, si merko muntcha mobilija, para la kaza moeva ke la avijan fragoado el anio de 5621, sigun ke esto ja lo vo a eskrivir en este anio de 621, i aparte si merko tambien i muntchas modas de vistidos seja para los ombres komo tambien i para las mujeres, i ansi merko tambien i muntchos presentes para toda la familia ke esto ja era el uzo ke lo azijan siempre todos koando vijajavan, ke non si merkavan solo para ejos i siempre kudiaron por la familia entera, i este vijaje li turo 3 mezes, i se vino a Samokov mui kontente i sano i boeno ma torna kon todo el si goadrava mui muntcho, i sovre todo por el tutun ke lo avijan defendido enteramente, ke non lo fumo 20 anios, lo azijan ke en algunos dijas de fiesta si tomava el tchibuk, largo, de jasimi, de los mijores takumes de kelebar, ke ja los tenija, i se asentava en la kioche, de la kamareta de vijita, ke lo venijan a vijitarlo, sigun ja lo saven en los primeros dijas de Pesah i de Sukod i a todos estos vijitadores ke ja lis dava a kada uno el tchibuk ke lo meresija, kon los boenos takumes de los kelebares finos, i todos ke ivan fumando, ansi i el era kon el tchibuk sujo fumando, sin ke uviera en la lula de su tchibuk ni tutun ni braza, solo lo fumava en vazio, por pasatiempo, i plazer,

              En este anio Tchelebi Avraam la espozo a su ija S-ra Behorutcha, kon S-r. Behoratche el ijo de H. Elijatchuno, i en el mizmo anio tambien izieron i la boda, i en akel tiempo sigun ke ja lo saven la manera ke los espozavan i non era komo agora ke si van a azer al presipio las konosensias i los amores, otros en la Familia

1200                           Biografia de Tchelebi Jeuda i Avraam M. Arie.                             1857

moestra era ke el grande dela Familia era ke kudijava por los sea espozorios i seja los kazamientos, i Tchelebi Jeuda en este tiempo ke el era el mas grande i viejo de la familia, i sin ke lo izo saver a dinguno, lo izo ke en un dija lo jamo a H. Elijatchuno en su kaza i le dicho, ke sepas ke ja lo topi por deretcho, de espozarlo a tu Behoratche, kon la Behurutcha de Tchelebi Avraam, i non mi tienes de romper mi palavra, i H. Elijatchuno ke non li rompia a Tchelebi Jeuda non topando loke dizirle, foe ke si kedo kajado, i en asigondandole li respondio, ke jo non se el boi, para konsograr kon ejos, i sigunda ke kale demandar en kaza i la tresera, ke jo non esto en esta pozision de azer boda, i ke Boher [Behor] tambien es ainda mui tchiko, i Tchelebi Jeuda li dicho esto ke ja lo izo es ke non tienes de dizirme non, ke por lo todo ja lo ve [vo] akomodar jo, i por kontado, ti vamos a dar 5000 groches, ke esto ja era mui grande kontado para akel tiempo i aparte li vamos a dar i achugar a moestra onor, i H. Elijatchuno ke si foe a su kaza i lo konto a su mujer i sus parientes, ke todos ja lo toparon de mui djusto, i se bolto H. Elijatchuno ande Tchelebi Jeuda kon una rida de konfites, en sinijal de kontentes, i denpoes de esto ejos lo izieron el espozorio, kon muntcho saltanat i gusto i alegria, i se kontentaron de todas las 2 partes, i en todo el tiempo ke ejos estuvieron espozados, si mandavan de todas las 2 partes, muntchos regalos i presentes, i modos de dulsuras, ke avijan por kada fiesta i okaziones ke mandavan de una manera de dulsuras, ke era en Chavuod, el pastarial^[32], kon presentes de dijamantes, i al novio si

1201                           Biografia de Tchelebi Jeuda i Avraam M. Arie.                             1857

mandava, masapan, i en todos los Taanitiod, si li mandava a el novio modos de los desajunos para ke bozdejara el Taanid, de mizmo i en Sukod, tambien dulsuras i prezentes, lo mas muntcho era siempre por la Novija, en Hanuka modos de komidas i siempre kon presentes, en Purim mandavan a la novija, koti de plata jeno de paras enplatejadas i un koti tambien de plata por sakiz, i a el novio li mandavan megila de plata, lo todo tambien i kon dulsuras, en las frutas era los modos de frutas, de todas las 2 partes, i en la laomer, era un kodrero ke lo telejavan^[33] kon varak i aparte komidas, i aparte era ke todos los parientes seja los de el Novio komo tambien i los de la Novija kalia ke lis mandaran los unos a el Novio i los otros a la Novija, i en el dija de kipur li mandavan Sirio a el Novio para ke lo asendiera en el Kaal de mismo kon las dulsuras i los dezajunos para ke bozijara el Taanid, i de estas todas dulsuras si mandava a las mujeres de la sevdad entera por ke gostaran de las dulsuras, i ansi avijan mas i mui muntcho uzos, ke non si poeden todos eskrivir, koanto a los uzos de akel tiempo son enteramente deferentes a los uzos de el tiempo de agora, i el novio kon la novija non si podijan versin, ni ke menos, podijan estarsen debacho de un tejado, i en este tiempo ke estuvieron espozados, era ke ivan aziendo, i prontando la achugar i al presipio era la blankerija, i esto lo azijan prontar de las maestras turkas ke savijan lavorar, en sedas i en klabedon de oro, ke era ke davan a lavrar, tuvajas, testemelis, ridas, kamizas, tokijos, tchikures, i ansi mas kamizas i saragoeles lo todo kon modos de pinturias, en

1202                           Biografia de Tchelebi Jeuda i Avraam M. Arie.                             1857

sedas de kolores i klabudan i tertil, i tambien las mudaduras de lo todo el menester de las blankerijas, i koando ja era serka ke ja van azer la boda, i ke van a kortar los vestidos, en akel dija si jamava a los parientes, komo tambien i a las konsfoegras, i se les prontava komeres de muntchos modos de las komidas, kon modos de dulses, i kantavan i bailavan todas kon la Novia, i se alegravan, i el chastre ke ja estava pronto, i en la primera tijera ke iva a kortar el primer vistido, lo azija ke non kortava la tijera, i era el uzo ke kalija la ezmolara, i esto si ezmolava, kon ke li etchavan todas las kombedadas, prezentes en moneda, ensima de la ropa ke la tenija para kortar, i denpoes ke todas ja li etcharon, era ke tomava el chastre, la una piesa de los presentes, i la ezmolava la tijera i kon esto, la tijera ja li kortava, i enpesava a kortar los vistidos, ke era a el presipio kortavan 5-6 kiordis ke se ivan a kapladijar kon los modos de las samaras, ke eran, elma, vachak, samur, tejun,^[34] nafe,^[35] i ansi mas i otras, lo todo de panios i de las ropas de sedas, i denpoes los tcherkezes tambien de panio, i esto los lavoravan las talias kon los klabedones de oro en maneras de las rozas i de otras pinturias, i denpoes las fermelas de panio i de ropas de sedas, lo todo, lavoradas kon klabedon, i kapladejadas kon modos de samaras, i denpoes los chalvares de panio i de sedas tambien lavorados, kon klabedon i sedas ansi i en ropas de sedas, i denpoes los enteris, largos de 3 aldas de ropas de ichlemes i modos de jesis^[36], tambien lavrados kon tertil i klabedon, i de mangas antchas, i jelekis, i ansi mas todos los vistidos

1203                           Biografia de Tchelebi Jeuda i Avraam M. Arie.                             1857

de las ropas de lanas i de las basmas, para ke si vistiera la novia en kada dija sin ke tuviera el menester de kortarse vistidos mas para 6 i 7 anios a lo poko, adjuntando i las kalsas i tchorapes i los kalsados, i las kachas ande goadrar los vistidos i kamas i koltchas, i savanas i mobilijas ke para lo todo foe el gaste de la achogar, 20,000 groches ke es komo gastar agora al menos 20,000 fr, i koando ja era todo pronto en el dija de Chabad si vinijan a komer djunto kon sus komidas, todos los parientes, en la kasa de la novija, i kombedavan tambien i a los konsfoegros, i las konsfoegras, i denpoes ke ja si adolsavan, i bevijan los rakis, i otros bevrajes, ordenavan las mezas i komijan, i en la fruta ke bevijan tambien i el vino, era ke lo fiksavan el dija de la boda, i denpoes ke kantavan i se bailavan i se adulsavan de moevo, se ivan kada uno a sus kazas, i en todo esto era ke el Novio, non asistija en esta seremonija, por la razon ditcha ke non si podijan versin el novio kon la novija, i este Chabad si jamava el Chabad de danechik,(akonsejarsen por fiksar el dija de la boda) esto mizmo lo azijan i en la notche de alhad, i se vinijan todos en la kaza de la novija, i denpoes de esto ja era ke ivan a espander la achugar, i vinijan las parientas para ajudar a espanderla, i denpoes ke ja estuvo espandida la achugar era ke la vijitavan en los dijas todas las mujeres i todas eran adulsadas kon pedasos de dulse de narandja ke lo prontavan en kaza, i en las notches lis vinijan los parientes i amigos ombres, de mizmo eran i ejos adulsados, i era ke lo azijan komo una boda en todos los dijas ke la achugar

1204                           Biografia de Tchelebi Jeuda i Avraam M. Arie.                             1857

estava espandida, i en el Chabad, de antes de los Kiduchim, era de moevo ke si vinijan todos los parientes kon sus komidas i las baklabas i era ke los parientes de parte el novio se vinijan ande el novio i estos de la novija se ivan ande la novija, i todos los djidios koando salijan de el Kaal vinijan todos a vijitar la achugar ke kalia Chabad ke estuviera enkolgada, i este Chabad si jamava el Chabad de Talamo, i a la manijana en el dija de alhad azijan el presijado ke es presijar la achugar, i li davan tambien i el kontado en mano de el padre de el novio, i esto tambien era ke vinijan los parientes i los amigos a presijarla i desijan el Besimantov, de todas las 2 partes en sinijal de kontentes sovre loke presijaron, i lo todo kon tchalgis i adulsares, i al dija de lunes, ja vinijan de parte el novio, i se la rekojijan i se la jevavan en la kaza de el novio, tambien kon tchalgis i konfiturias, i lo restan de los dijas eran para adonar a la Novija, i en el dija de mierkoles la tadre ke foe en el 20 Tamuz, dieron los Kiduchim en kasa de el Novio, kon ke vinijan el Kolel entero a esto, i tambien eran adulsados i a la notche ke es la notche de la boda kombedavan a la sivdad entera, ke eran komo 60 a 70 familias, i komijan i bevijan i se alegravan, i toda la Familia de la parte de la novija estavan todos los 8 dijas de la boda en la kaza de el Novio, seja por komer komo tambien i por dormir, de mizmo ivan vijitando en kada dija las mujeres i en las notches tenijan a muntchos kombedados lo todo kantando i bailando, i alegrandosen, i en el Chabad de boda kombedavan a todos los parientes ke era sin las komidas,

1205                           Biografia de Tchelebi Jeuda i Avraam M. Arie.                             1857

i komijan i bevijan i kantavan, solo pizmonim ke non si podija ke lis tanieran los tan^[37] boenos tchalgis ke avijan, i a la notche de elhad ke era la ketadura de el velo de la novija porke fin a esta notche la novija estava siempre kon el velo de los kiduchim tapados la kara, i le venijan todas las mutchatchas, de la sivdad entera, ke lo azijan mirenda, i ejas gustavan a la novija kon kantares i bailares i en esta notche li etchavan los presentes, kon ke en bailando todas sus parientas i amigas li etchavan el presente de modos de ropas i de otras kozas, i se lo enkolgavan en el braso de la novija, i koando ja era dija de martes, lo asijan el pechkado, ke era ke tomavan pechkados bivos, i los metijan en ondos tchinis jenos de agoa, por ke estuvieran nadando, i al deredor metijan todos los mosos, i las gizanderas, i kilerdjis^[38], ke sirvieron en la boda, tambien i los Hazanim i melamedim, i chamachin, i tchalgedjis, tchinis kon modos de frutas todos telejados, kon varak, ke se rekojijan komo 20 a 25 de estos tchinis, i kombedavan a todos los parientes i amigos a esta seremonia, i los pasavan a los moevos kazados, 3 vezes por ensima de el tchini de los pechkados, en sinijal para ke muntchiguaran komo a los pechkados, i denpoes todos los asistientes etchavan en todos los tchinis presentados a kada uno sigun su voluntad, presentes en moneda i los patrones de la boda, aparte de las pagas ke lis pagavan a todos los sirvidores de la boda, ke eran mui bien pagados era tambien ke en este dija lis davan a todos i a los tchalgidjis presentes en ropas a kada uno de su manera, i esto lo asijan seja los de la parte de el

1206                           Biografia de Tchelebi Jeuda i Avraam M. Arie.                             1857

Novio komo tambien estos de la Novija, i koando ja era mierkoles era ke se ivan a ir kada uno a sus kasas en dechando a la novija kon las bendisiones de detchoza i kontente i esto era kon joros, seja la novija komo tambien i sus djenetores i los mandavan tambien kon panderos, i a el Chabad se ivan torna de moevo a komer todos los ke estuvieron en la boda i esto kon sus komidas, i lo asijan de mizmo sigun ke en la boda, i este se jamava el Chabad de torna boda,

               En este anio ke ja eskaparon de fragoar la kulle, ke lo jamavan el Tchark, anke ke ja lo eskrivi, mas antes, ma aki es lo enportante para ke lo sepan de koala forma i la manera era, esta kampanija era komo 15 puntos de lichura a la sivdad, i en el kampo de la tchelik hana, fragoada en 2 etajes, i kontenija en el sigundo etaje 4 kamaretas grandes, kon sus grandes i antchos koredores i sus kozinas, i mas todo el menester por una kaza, ke esto era por sus estar, i bivir ejos en eja, i en el primer etaje avijan, kamaretas por los mosos i los goadradores, i depozitos, ke servijan por los menesteres de la fabrikasion, de los gaitanes i por las machinas de pelar las lanas, sigun adelantre, en esta kampanija ke era mui ermoza fragoada, i sovre todo ke era en medio de una janura, de un mui antcho kampo, i arodejado de paredes de piedras de todas las 4 partes, i kontiniendo komo 40 metros de lechura de todas las 4 partes de la kole, i en el kampo de la una parte era, la entrada kon goertas de rozas, ermozas, i de hoentes i chadirvanes, i kiochkis, mui adonados, i resentados, i de la sigunda parte era todo sembrado de

1207                          Biografia de Tchelebi Jeuda i Avraam M. Arie.                                1857

zarzavates lugombris, i de vidruras ke siervan por mezes de rakis i de vinos, i en la tresera parte era tambien todo sembrado de ermozos arvoles, de las mijores frutas i estos ke non davan tambien frutas ke era solo por la su ermozura, i lo todo en tchimenlikes vedris, i mui resentados, i por la koatrena parte era fragoada el lokal de la machina el tarak de pelar la lana, era Tchelebi Jeuda ke tenija la mas grande kerensia en esta kampanija, i el era ke la frekontava, mas muntcho de todos, ke muntchas notches restava i a durmio kon ke los jamava i a su familia, i en veses el si jamava tambien i a los sujos amigos, i se aguzavan kon muntchos komeres i beveris, ke lo todo era kon muntcha antchura, el gastar, ke non azija ikonomijas, en tal de azerse sus plazeres, avija tambien ke restava i en algunos de los Chabatiod, i se li ivan la Familia entera, i se jamava tambien i djente para minijan, kon ke si jevava i Sefer Tora i dezijan la Tefila kon minjan, i a los ke vinijan para dizir la Tefila, lis dava i a dezajunar, i rakis kon goevos komo una Hevra, ke esto lis era para todos muntcha onor, i todos los ke vinijan ansi i otros lo dezejavan por ke siempre los jamaran, por el boen pasatiempo, i lo boeno era ke siempre eran gustozos, mizmo ke tenijan kaje siempre komo estos atagantos, ke los males non los tomavan fin a el kavo, i eran mui muntcho pasensiozos, i siempre era ke tenijan adjuntas entre ejos mizmos, por platikar i detchezar, sigun de la manera, ke lo topavan de mijor para enkamenar seja en lo boeno or en lo non boeno, i de la detchizion ke tomavan non trokavan, i solo el uno de ejos non eskapava

1208                          Biografia de Tchelebi Jeuda i Avraam M. Arie.                                1857

dingun etcho ke non estuvo de todos ejos detchisado, i era ansi sus komportos, i kali poede ser tambien i dizir ke lis kamenavan i sus todos etchos mui en regla, i tambien ke profetavan, ejos koando kedavan sin etcho era ke buchkavan en koalo foesa de lavorar i non estavan nunka sin etcho, para estarsen siempre okopados,

               Para el lavoro de el tarak ejos si trucheron tambien i a los maestros, ke este tarak lis kosto,17,000 groches, i denpoes ke ja estava mui bien lavorando ke las krestijanas ja si avijan mui boeno enbezado ke lis era muntcha levjanesa foe el solivantamiento ke esto ja lo eskrivo mas antes, de la manera lo izieron, i lis kalio, ke lo ketaran i lo vendieron a S-r. Jumuch jerdan ]Gümüşgerdan[ de filibe ke el koal ja tenija su fabrika de esto ke asija tambien i el Chajakis, i se lo vindieron por 7000 gr. i resto solo por kampanija, i esto lis trucho algo de jelor, anke ke torna ja si ivan, i pasando komo un anio la kemaron, i de esto si avijan muntcho sikilijado, i tambien ke lis avija vinido a kostar serka 50,000 gr, ma ejos non buchkaron a saver ken la azeria kemar por reklamer, los danios porke ja savijan ke era de los grandiozos, i pasando komo pokos mezes ejos la fragoaron de moevo, si entiende muntcho mijor de loke era, i de mizmo se ivan sigun de antes, i se amuzavan tambien mas mijor de antes, i en la fragoa de el tarak lo izieron para tcharkes de trensar los gaitanes kon ke trucheron lo todo de viena, ke eran 100 tcharkis, i lo laboravan ejos mizmos kon ke tenijan sus maestros, i los gaitanes ke ketavan los vendijan a los merkaderes ke ja venijan de la bosna i a

1209                           Biografia de Tchelebi Jeuda i Avraam M. Arie.                             1857

otros i tambien mizmo i en Samokov, ke esta endostrija tambien era grande en Samokov, i esto foe unos koantos anios, i mas tadre ke ja si izieron muntchos ansi tcharkes i la konkorensija ke ja foe mui grande foe ke non tuvieron ejos konto por lavorarlos i los dieron kon tchikas kiras a otros, i esto foe tambien fin a el anio de 5638, ke ja foe la gera Turka-russa, si enpeso a derokar la vila de kampanija de mizmo foe i kon la fragua de los tcharkes, i este lugar ke li apartuvo  en este tiempo a S-r. Chemoelatche el IJO tchiko de Tchelebi Jeuda, i ke non kijo sostenerlo, lo izo ke lo deroko todo i lo alempio el kampo i lo izo tchair por tomar la paja ke toma de 5 a 7 karos de paja a el anio, i los tcharkes si los trucho a kaza i denpoes los foe vindiendo en Samokov i Karlovo i Filibe, i de esta manera foe depidrida esta ermoza kanpanija en el tiempo de la gera, ditcha,

            En este anio de 5618, li nasio a S-r. Davidtchonatche un ijo, i lo jamaron Haim, ke el koal foe mui dezejado, por razon ke non li bivieron las krijaturas ke pario mas antes, i de mizmo foe etcho i en este parto sigun de todos los otros ke ja lo eskrivi sigun ke lo azijan, i lo velavan mui muntcho, asta el grado, ke en los dijas de viernes ke si iva la madre a la kozina, era S-r. Davidtchonatche ke si estava en kaza para velarlo i non decharlo solo kon la dechipla ke tenijan, esta S-r. Haimatche koando ja tuvo 2-3 mezes i ke tenija las narizes tapadas asta el grado ke non podija tan boeno

1210                           Biografia de Tchelebi Jeuda i Avraam M. Arie.                             1858

respirar, por la naris, i jo mi akodro, porke i jo estuve Tambien en un dija de viernes ansi konandolo, i lo vide ke li mitieron pechkadikos mui tchikos en los kajos de la naris, en siendo bivos por ke li foeran tchopando, i esto si lo izieron unas dos veses, ke kon esto si li avrieron los kajos de la naris, mas muntcho de loke era el menester, i denpoes siempre foe ke respero mui boeno,

               Es este el S-r. Haimatche, ke eskapo sus estudios en a echkola de Salonique, i konose el franses i Turko Grego, i Bulgar i algo de el Ingles i Nemsi, i koando ja foe grande el stuvo kon su padre en el negosio ke tenijan, i mas tadre foe el ke si okopo en la fragua de la kaza grande ke tienen en sofia, i a los kavos el ke foe usteledijado^[39] de el uno de sus ermanos, aparte ke li tomo todos los deretchos, por el non poderlo somportar, lo izo ke si foe a Marsilija i ke ja son agora komo 20 anios, ke esta sufriendo kon ser Kelner, de hoteles i kavanes, kon la page de 60 i de 70 fr. a el mes i en su partida si lo podre ja lo vo eskrivir, la estremesivle biografia ke el la esta pasando i esta ke la paso, sin ke ainda uno ken ke si apejadara por el mizmo ni su madre,

El mediko de Samokov S-r. Andonake Unterberg, ke era mui echpikolante, i mui kandirjador, foe kapatche de konvenserlos a Tchelebi Jeuda i Avraam por fragoar una fabrika de fiero, kon deritir la ruda^[40], sigun las fabrikas de la Izbitchira, i esto kon tomarlo i a el Kaimakam Jasin Bei, ke el koal ja era morador de Samokov i enpatronava tambien vignas i maadenis, kon ke i el tambien iva a tomar,

1211                           Biografia de Tchelebi Jeuda i Avraam M. Arie.                             1858

 parte, i kon esto iva a ser ke podijan konkorijar a todos los otros maadenis ke tambien podijan i ketar a partidas grandes, i siendo todos mui konvensidos de esto, es ke vinieron en un kavo, si aonaron i se konvinieron las % i se izieron kontratos, i se mitieron a el lavoro kon ke partio S-r. Unterberg por Viena, i angajio los maestros para fragoarla ke era el enjenier, S-r. Makioni, i merko tambien i todo el materijal menesterozo, ke en arivando lo todo ejos kedaron de akordo por fragoarla, en el kampo de la vigna de jasin bei ke ja era mui grande, i tambien ke ja era serka de la sivdad, ke es de la otra parte de el kopri de el rio iskir, en el kamino ke si va a los kazales delos iskeris, i en este lugar ke el tenija sus kasas de kampanija seja por su harem komo tambien i por selamlik, i kampo ke estuvo lo todo pronto, ke uvieron tambien unas alturas por etchar la ruda i los kimures a el odjak ande se iva a deritir el fiero, i siendo ke de esta altura ke etchavan el materijal, se li vija el Harem, ke a los presipios non avlo nada, i koando ja estuvo lo todo pronto, ke izieron la prova, i soltaron la fabrika, ke era a foersa de la agoa, ke kon 10 puntos ke lavoro, akaisio ke si rompio la valma^[41], ke es la foersa ke boltava a todas las machinirijas, ke a toda vija ja pudo deritir komo una kantedad de una bomba, de 8 a 10 kilos, i todos mui guztozos mizmo ke si rompio la valma, visto ke ja deritio, i en kijendo meter valma moeva foe ke el Jasin Bei non dechava, a dingun presio renovar la valma kon la pretensia ke si li estava viendo el

1212                           Biografia de Tchelebi Jeuda i Avraam M. Arie.                             1858

harem i ke el non decha ke li veigan su Harem los lavoradores, ke de tanto ke porfejaron i de todas las mizuras ke ejos tomaron seja kon prometerle de fragoarle harimlikes muntcho mijor, or merkarsila por el persio ke lo iva a kerer, i ansi todo loke kerija le ivan a darle i se mizmo non lo kerija ser Haver a la ora se ivan a kontentar por ketarlo i darle mizmo i ganansia, foe ke en nada non si konteto  solo i solo derokarla, i ansi foe ke non li pudieron azerli ni nada sovre todo ke el era el kaimakam i tenija el poder de azer todo loke kirija i mas ke ejos eskapavan lo mas de sus etchos por su vija i sin ke lo supiera dinguno el lo izo ke en un dija se alkelo a mui muntchos lavoradores i en un enterval de pokos dijas ja estuvo entera derokada, i mizmo el kampo alempiado sigun ke era antes, i todo el matirial ejos si lo espartieron kon Jain Bei, porke el S-r. Unterberg non tenija desbolsado nada, i ansi foe ke pidrieron, toda la moneda ke avijan gastado ke foe una suma de 300,000 groches, i kon el material ke si lo avijan espartido, esto ke era de lenio lo emplejaron para las vignas i otros lugares i esto de fiero ke non servia ke era kiunkis de tchugun i otros, koando si espartio Tchelebi Avram en el anio de 5630, lo todo lis kedo a los ijos de Tchelebi Jeuda, i los detuvieron fin a denpoes de la gera Turka-Rusa, de 5638, i denpoes S-r. Chemoelatche lo iva vindiendo para tchogun ke lo deritijan  los echpikolantes,

sigun si vee non sirija solo la kavsa de el derokamientopor el etcho de el harem, otro ke si poede taksar tambien ke