חרבי צ'לבי משה א. אריה

962

            De aki i endelantre si enpesan las partidas

de la biografia de el Linaje de Hr. Tchelebe Moche

A, Arie, kontinuando solo la data generala, i enpesando

de el anio de 5588, por kada kavesera, de la

Familija kontinuando fin a la data de su moerte, es

ansi a kontinuar fin a el anio de 5660-61.

963     Biografia de Hr. Tchelebi Moche A. Arie.    1828

            En el anio de 5588, sigun eskrito en oja N. 266 por la espartision de los 4 ermanos, ke ejos si espartieron denpoes de la moerte de sus padre, ke esto kale seja lo isieron por ke non aigan algunas deferensias, en todos los puntos, porke todos ja eran savios i mui mui bien entendidos, ejos lo isieron de pechin a espartirsen en todas las kosas seja estas de la plasa komo tambien i de kasa, sin dechar para mas tadre, ke si es ke podijan tener algunas deferensijas ke sejan en una ves, para siempre, ejos solo lo isieron de morar en la misma kasa fin ke ejos se ivan a merkar, porke la kasa ja lo saven ke non era sujas i lis kalija si la entregaran a el S-r. de Mehmed Emin AA. i sigun ke ja si la entregaron mas tadre, i ejos ke komijan todos de una mesa, i a un gaste foe i de esto tambien ke si apartaron i komijan kada uno en su mesa aparte, i se gastavan kada uno por si, kon ke si asenjalavan kada uno esto ke travava I Hr. Tchelebi, sigun ditcho ke el de el presipio non tuvo dingun etcho, porke el non kijo enbeveserse en la merkansija, otro ke su edeja foe de negosijar en las operasiones de el bankerlik, i siendo ke el devija resivir su parte solo en moneda sonante, i esto ke non lo podijan porke tenijan seja ropas komo tambien i muntchos averis, i li kalija ke esperara fin a koando iva a enkasar, su parte, i ansi era ke si okopava mas muntcho en los negosios de los otros ermanos, i en este tiempo, era ke buchkava, por aser i kovramientos de los averes viejos, porke era todos ke vinijan a la butika de H. Refael a rason ke la butika de el tiempo de el padre, li kedo a H. Refael, ke

964     Biografia de Hr. Tchelebi Moche A. Arie.     1828

a esta rason era ke vinijan todos, en esta Butika, i era Hr, Tchelebi ke lis merava los kontos i lis kovrava, i denpoes el las espartia a kada uno su % i de esto tambien era ke tenijan algunas deferensijas kon H. Refael ke li disija, ke si estava pasando a si mas muntcha moneda i de esto si aravijava muntcho Hr. Tchelebi, en disiendole ke si komo el era mui okopado en sus etchos era ke non tenija el tiempo para examenar, estos kontos, porke el tenija de aver, de Hr. Tchelebi otros 2000 groches de el konto de la espartision de la mobilija, de kasa, ke i estos tambien non los reklamava, en este tiempo ke Hr, Tchelebi non si los podija pagar, por ke estava sin etcho, i esto non li era en sus ojos nada enfrentante de non trokar su edeja, sigun ke ja reucho, ke lo todo mos enbesa ke si kere tenido la pasensija, en la kosa ke si detchisa la persona, sin trokar antes de reintchirla i por koando non podra reuchir denpoes de aser unas koantas veses la prova i non reuchendo, ja es ke deve trokar, i esto es loke si dise tambien ke la persona deve en kada 10 anios trokar su negosio, lo todo si lo vee ke ke li van algunos desriuchimientos i non esperar a la natura solo, or ala kapatcheta, porke todo modo de persona es kapatche para su etcho,

            En este anio li nasio a Tchelebi Gavriel un Ijo foe mui grande alegria, porke ja foeron ke pasaron unos koantos anios fin a ke pario i eja se iso muntchas itchurijas i koando li dieron haber a el padre li dio de bakchich a la komadre 5 rubies, i al moso ke korio mas antes li dio 3 rubies i ansi tambien i a

965     Biografia de Hr. Tchelebi Moche A. Arie.     1828

todos los otros ke li ivan dandole haberes, ejos en todos los 8 dijas ke la parida estuvo en la kama lo isieron de dija i de notche boda i siempre tuvo kombedados i todos los parientes li mandaron seja a la parida komo tambien i para el nasido muntchos presentes, i el parido li djo ala parida presentes de djojas i para el nasido dukados i en el dija de el birid^[24] kombido ala sivdad entera seja ombres komo tambien i mujeres i komieron todos i lo jamaron BEHOR-JSHAK I SU MADRE LO KREO i lo kudio, i ansi tambien lo isieron i en el dija de el rihmido, ke kombedo de mismo ala sivdad entera i komieron todos djuntos i ansi era ke si alegravan i se kontentavan,

            En este mismo tiempo ke Tchelebi AVRAAM, ja era la edad de mandarlo a el Talmud Tora, lo isieron ke unos 2 dijas mas de mas antes se prontaron kon aser pitas i otras komanijas para los Hahamim i en el dija ke lo jevaron lo vistieron a el Ijo de los vistidos de Chabad i kon un Livriko jaldisli^[25] en su mano akompaniado de su padre i madre i de algunos de sus parientes kon ke de antes ja mandaron las pitas i un kaldero jeno de miel i tambien la komida ke foe prontada por los Hahamim i un ibrik de vino, i algunas frutas i aserkandosen lo resivieron los Hahamim kon algunas bendisiones i todos los elevos ke ja estavan, lis dieron al presipio a todos los elevos a una pita viertiendo^[26] arientro de kada pita a unas 2 kutcharas de la miel i kada uno ke la resivija se iva gustandose i saltando indosen en sus kasas, i denpoes senaron los Hahamim djuntos kon el elevo moevo i sus parientes i lis dieron a todos los Hahamim

966     Biografia de Hr. Tchelebi Moche A. Arie.     1828

presentes en moneda, i lo decharon a el elevo a los kudios de el un Haham ke el koal li djo la primera liksion i denpoes li djo un boen punijado de konfites i gustoso de los konfites i de la kara boena de su Haham djugava kon sus amigos, i foe ke kontinuo sus estudios fin arivar a tomar la SEMAHA (depluma) de HAHAM ACHALEM, ke li foe dada de Hr, Avraam Alkalai ke era gran Rabino de el Kolel de samokov i denpoes devino Grand Rabino de el Kolel de Sofia,

            En este anio de 5589, ke ja si merko Hr, Tchelebi una kasa en djuntos kon su ermano Hr. Josef, ke es la kasa ke moro en eja toda su vida H. Rabenutcho i ke en este tiempo ke esto tiempo ke esto eskriviendo la dita, la empatrona, S-r. Haim B. Moche (hadji Jakov) i la kasa ke moravan ke es la ke foe dada a el S-r, de AVRAAM sus padre ke vino primero a Samokov, de parte de el S-r. De Mehmed Emin AA. porke biviera en eja toda su vida, ke esto ja lo eskrivi mas antes de koala forma foe entregada, i ejos los 2 ermanos ke ja eran mui aunados, li isieron una tchika reparasion, i la mobelijaron, i se konvinieron por komer en una mesa, kon ke gastavan a kontra metad, i eran mui kontentes de todas las 2 partes, seja ejos komo tambien i sus mujeres, i noeras i krijaturas, ejos si enkamenavan de parte la ikonomija, i non avijan enojos ni kechas ke non keri ditcho pleitos, ejos en todos los tiempos ke eran djuntos sus platikas i pasatiempos era solo de los estudios, i non platikavan

967     Biografia de Hr. Tchelebi Moche A. Arie.     1829

de dingun negosio, i esto por non akarijarsen i goadrarsen de non arivar en la mas tchika litiga, saviendo ke de esto son los presipios de las deferensias por arivar en litigas sovre todo ke ejos eran de deferentes negosios,

        La forma de los vistidos ke vistija Hr. Tchelebi eran de un tchakchir de panio preto i de tchividi mor^[27], i ensima de un anteri largo de modos de ropas i de kolores seradas, i en su talia de un kuchak de lana fina enkochakado, i ensima una fermela de panio  kontiniendo de 2 petchos por meter papeles i otras kosas i ensima una echkurta kapladijada de samaras delgadas, kon aldikeras aviertas, esto era koando estava seja en la butika komo tambien i en kasa, i koando salia a kamenar, si vistija de un binich de panio kon mangas antchas, de kolor preto, i en su kavesa una fes kolorada saradijada de modos de chales de lana finas formando un sarik, su kalsado era de unos laptchines de koero i sapatos, lo todo de koero fino, i de kolor pretos i en veses amarios, i un tchibuk kon takim^[28] de kelebar en su mano i una bolsa de ropa fina i lavrada kon bukme de seda jena de tutun enkolgada en su talia, esto era en los dijas de ensimana, i en los dijas de Chabatiod i Moadim, era ke en lugar de sarik jevava boneta, a rason ke era Haham i la misma forma de vistidos solo ke si los trokava en mas finos, i por los dijas de el envierno era kiordi, era mui limpio en la vistimienta, i li plasija ke toda la djente de su kasa vistieran limpios, su poerpo era alto, i non godro, ke su vistimienta lo demostrava grandino

968     Biografia de Hr. Tchelebi Moche A. Arie.     1829

kamenava mui reposado, su fisonomija poko morena, su kavesa arapada en dechandose tchikas ulufias, su barva preta i rala i sovre kurta sin ke si la kirkijava, mi dicheron ke la fisionomia, de Tchelebi Avraam, su ijo era propio komo la de su padre, sigun ke la fisionomia de S-r. Refaelatche ke es misma komo esta de su padre tambien i es ansi ke fin a el inieto foeron de una i misma fisionomia, de los vistidos ke el tenija es ke en este tiempo tiene S-r. Mochonatche el un anteri largo i se lo viste solo en los dijas de Moadim ke es de la kolor amaria i su materia es de lana tursida fina i es techido de mano, sigun los chales de laur ke tiene grande valor, i ansi ropas las merkan los antikadjis, kon presios mui altos, el era mui hasid kada dija asija su Tefila en el Kaal kon Minjan, el si mitija 2 pares de Tefilim i meldava el Hok le Israel i denpoes desajonava, el era bonatcho i non si sikilijava ni se apretava por nada ni menos ke si aravijava, el tenija 15 kiordis kon echkurtas todos kapladijados de las mas mijor i finas samaras, i ansi de mismo anteris largos de las mas finas i valutosas ropas, i ansi tambien i chales de modos de lanas i lavoros por enkochakarse, i denpoes ansi todos los otros vistidos, su S-ra madre era en su kasa, i non lis kovrava dinguna paga de los otros ermanos porke estava en su kasa era el ke la vistija i la mantenija a sus gastes, eja lis iva mui ralo en las kasas de los otros ijos, seja a rason de sus madre or seja a rason de su ermano komo el mas grande era ke li vinijan en todos los moadim i lo mas muntcho de los chabatiod, a vijitar i en

969     Biografia de Hr. Tchelebi Moche A. Arie.     1829

muntchas veses si kedavan i a komer en su kasa kon ke si traivan i kada uno sus komidas, i komijan en una mesa, ejos kantavan i se alegravan i algo platikavan de los estudios i en kosa de merkansia non platikavan, porke non si podija avlar de esto en los chabatod i moadim, i esto ke si vinijan era kon sus mujeres i todas las kriaturas, i en los primeros dijas de Sukod i de Pesah denpoes ke salijan de el kaal era ke todos los djidios antes ke foeron en sus kasas todos deretcho si vinijan en la kasa de Hr. Tchelebi a vijitarlo, i los resivija kon muntcha onor ke lis dava a los mas viejos tchibukes, i en este tiempo el lis darchava seja de la kistion de el dija komo tambien i de algunos konsejos, i otros, i denpoes los adulsava, ke esto era solos los ombres, i ala tadre li vinijan a la Bu. Lea todas las mujeres tambien por vijitarla el moed, ke i eja tambien asija lo mismo de resivirlas kon muntcha onor i de mismo a las mas viejas lis dava tchibuk, i las adulsava, i ejas kantavan las kantikas de Lei, i a el sigundo dija iva el kon sus ermanos i ijos i vijitava a todos estos ke li vinijan i ansi tambien denpoes de el moed las vijitava i la Bu. Lea a todas las mujeres, i ansi era ke si ganavan la onor i el respekto ke esto en dinguna kasa otra non se asia, i esto kontinuo fin a ke estuvimos en samokov la Familia Arie fin a el anio de 5660, ke vijitavan en esta forma en todas las kasas de la familia Arie, ke de esto anke ke si enselavan a los kavos i avlavan por abandonarlo este uvligo ma torna kon todo vinijan i en las kasas moevas koando alguno de la

970      Biografia de Hr. Tchelebi Moche A. Arie.     1829

Familia Arié si apartava, i a los kavos ke ja foeron de 8 a 10 kasas tambien era ke vinijan en todas ejas i lo todo era lo asian sigun de el uso viejo i el Rabino de la sivdad era ke darchava en kada kasa de su manera en adjuntando tambien lo konviniente de kada kasa aparte, i lo todo esto foe solo en el Linage de Hr. Tchelebi, ke enpesandose de ande el mismo foe ke kontinuo fin a el kavo en todos los djerenansios de denpoes de el,.

            Sigun ditcho ke de el presipio non tuvo dinguna okupasion lo pasava lo mas muntcho de el dija en vijitar los konakes de los begis, i tambien li iva kaje en kada dija a el konak de el S-r. De Mehmed Emin AA, i era mui bien resivido ke lo asija asentar i li dava tchibuk i kahves, sigun ke ja lo tengo eskrito ke ansi personajes grandes non los asentavan a el ken lis iva mismo a vijitar i non kere ditcho tchibuk i kahve, i ejos platikavan en muntchas kistiones, lo todo ke lis turava a 3 i 4 oras, i era en ansi okasion ke li asija algunas demandas i siendo ke el AA, non tenija dinguna okupasion, i li plasija su linguaje ansi ke a otros non resivija koando estava el, solamente era ke entrava su sovrino Usref bei, ke el koal era su ofiser, i de el rango alto, ke amostrava grandes djiganterijas, en las geras ke tenija el Sultan, i ansi era ke estava suviendo dija kada dija en grandesa, i es este el Usref Pacha ke devino el Hajan de samokov denpoes ke lo mataron a el Mehmed Emin AA, i esto ja lo van a meldar mas adelantre de la manera ke foe i ke estava tambien i Hr. Tchelebi kando lo mataron, i koando non

971      Biografia de Hr. Tchelebi Moche A. Arie.     1829

lo decharon salir de la kamareta ande lo mataron, ke si espanto mui muntcho, i en los dijas ke non iva por los konakes el si okupava, en los etchos de el kolel, ke resentava los tefteres i asija algunos kovramientos, i tambien djusgava a el poevlo sus deferensias ke algunos las tenijan i todos lo sentijan i se kontentavan a todo loke el lis desija, i en este tiempo ke el estava libero lo asija ke estudiava en el Talmud ke ja lo saven ke era Haham grande,

             Todos los empleos ke eran el menester por su kasa era e los asija el mismo, seja en las kosas de la komania ansi tambien i todos los otros menesteres, i lo todo lo merkava de las mas mijores koaletas, el non si avergonsava ni se kansava por aser estos empleos su mirikija era de non dechar sufrir en kasa a las mujeres por nada i eja la Bu. Lea ke ja era mui nekotchera, non lo dechava ke gastara a muntcho, porke era mui ikonomiosa,

           El ke ja estuvo en una Suma mas grande de moneda de el presipio lis iso merkar a sus ijos algunos artikolos de la plasa, i los vendijan kon tchikas ganansias, ke lo todo lo asija seja por provas seja porke non estuvieran sus ijos enteramente en vasio, ke lo todo lo asija kon su komando i konto, i mas tadre el mismo enpeso a dar a algunos merkaderes sus mui bien konosidos, algo de moneda kon tchikos enteresos, i por kurtos tiempos, i lis tomava chetar iska^[29] kon las kondisiones de el ribid, ke lo todo si veé ke lo iva asiendo komo provas, i los ijos ke ja lo eskotcharon a el presipio a el padre, era ke non li avlavan nada, porke lo respektavan mui muntcho,

972      Biografia de Hr. Tchelebi Moche A. Arie.     1829

i denpoes ke el ja iso las provas de unos koantos modos de negosios el si eskojo de mijor el negosio de el bankerlik, i sovre esto el enpeso a dar mas muntcha foersa i de el presipio lo asija en kasa i mas tadre ke li foe mas grande el si tomo a kira una butika ke era la butika ke la tiene S-r. Chemoelatche visina a el magasen grande i djunto kon sus ijos si asentaron i enpesaron en este negosio por el presipio, i eran mui kontentes i gustosos,

            En el anio de 5590, Era ke kontinuava de mismo en el etcho de el bankerlik djunto kon sus ijos, ejos nunka non mankaron de visitar siempre en todos los konakes de los begis, a ejos era ke li ordenavan algunas ropas or samaras i mobilias ke non las topavan a merkarlas en Samokov, i ejos ja las asijan traerlas de Wiena^[30] or de otros lugares, i si en kavso non lis plasia lo asijan ke si las dachavan por sus kontos, sin ke si lis enportava si ivan a pedrer i ejos siempre lo vendijan kon piedrita, solo ke los asijan ganar de otros lugares, muntcha moneda, i todos los turkos i kristianos lo jamavan hodja tchelebon, kon boka jena i lo konsidiravan mui muntcho, porke el asija bien a todos,

           En este anio tambien el si merko una kasa ke es la kasa ke se enpatrona el S-r. Behoratche Jshak G. Arié, ke tenija 2 daire apartamentos, sigun ke es i agora, ke en el un apartamento ke mora S-r. Behoratche (ke foe fragoado de su padre en el anio de 5609

973      Biografia de Hr. Tchelebi Moche A. Arie.     1830

i en su partida ja lo vo a eskrivir sigun ke la frago,) ke koando la merko Hr. Tchelebi era ke kontenija el primer apartamento, solo 2 kamaretas, ke la una era mui grande, i li servija solo para resivir vijitas, i en la sigunda ke era mas medijana, i se kaentava boena era la ke bivija i dormija en eja Hr. Tchelebi kon su ijo el tchiko Tchelebi Avraam, tenija tambien i un grande koredor kon un ajat^[31] mobelijado de minderes, ke por en el enverano en las manijanas bevija el kahve, i en las tadres si asentavan todos ejos i a el li metijan en una banketika una tchika redomika jena de raki kon un tchiko vasiko i unos koantos meses i bevija el al presipio en saludando las boenas notches i denpoes li dava a su mujer i sus ijos i todos saludavan, i denpoes ordenavan la mesa i komijan en este mismo ajat, tenija i una boena i grande kosina i un orno, ke todo el menester de la komanija si prontava en esta kosina i era la Bu. Lea ke lo gisava todo, i lo prontava, tenija i un boen i grande banio ke en el si baniavan todos, i en kada viernes lo asendijan, i se lavavan, avija un grande kortijo, i un kampo, ke sembravan algo de sarsavat por los tchikos menesteres de kasa porke non los topavan a merkarlos, i el sigundo apartamento es este ke mora oi S-r, Moche Jshak Arié, i tenija 4 kamaretas, ke las 2 eran para arientro k ke meravan para el kortijo, enfrente de el apartamento primero, eran grandes i kaentes, i tenijan sus banios, ke en la una de ejas durmija Tchelebi Jeuda kon sus krijaturas i en la otra durmija Tchelebi Gavriel kon su ijo, i en todos los dijas i en las notches se

974      Biografia de Hr. Tchelebi Moche A. Arie.     1830

ivan a komer en la kasa de el padre i komijan en una mesa ejos i sus mujeres i krijaturas, porke la komania ke si prontava era solo en la kosina de la kasa de el padre, i denpoes se ivan kada uno a durmir en su kasa, i esto lo kontinuaron en toda la vida ke bivio Hr. Tchelebi sus padre, sin nada trokar, ke a los presipios ja eran ke pasavan mui boenos, ma mas tadre ke ja si lis avija muntchiguado la familija, era ke lis venija mui foerte en las notches de el envierno ketar a sus krijaturas para irsen a komer en la kasa de sus padre, i tambien enpesaron a tener i algunas litigas i deferensijas seja entre los 2 ermanos komo tambien i kon sus padre, ke li demandaron tambien de komer aparte, ma el non los alesensijava, i lis desija ke todo tiempo ke el va a bivir, ke van a komer en una mesa, sigun ke ja foe ansi, sus ijos seja Tchelebi Jeuda komo tambien i Tchelebi Gavriel non tenijan dinguna % en el etcho ke lavoravan kon sus padre ni menos ke ejos enpatronavan dinguna suma de kepetal aparte, ke lo todo lavoravan por el konto de sus padre, i todo era de sus padre solo ke el los mantenija i los vestija, i mas todo akejo ke era el menester era ke lis abastesija i ejos tambien non li demandavan de sus padre sigun ke es agora a ke lis agan i a ejos alguna % koando lavoran djuntos, or ke lis den kapetal por lavorarsen ejos aparte, ke esto non era uso, ni ke lis venija a el tino de demandar ansi kosa solo ke ivan a esperar por denpoes de la moerte de el padre a tomarsen esto ke lis revendra de la jerucha i en las otras 2 kamaretas ke meravan para el

975      Biografia de Hr. Tchelebi Moche A. Arie.     1830

dichari avli, el kortijo de afoera la una la iso Midrach ke es la Bibliotika ke es i oi i de este tiempo foe ke si nombro lugar aparte para esto, el kon grande sevda resento los livros ke el ja los tenija, i aparte de este tiempo el enpeso a merkar todo modo de livros ke li akesija, i esto siempre de los mas mijor i de estudios undos porke en akel tiempo kostavan moi karos ansi livros, porke no si estampavan muntcho, i a el non li era en el ojo nada de merkarlos por el presio mismo karos, i en este midrach asija sus estudios i su ermano Hr. Josef tambien era ke vinija en este midrach a estudijar, ansi tambien i otros Hahamim ke avijan en Samokov, i mas tadre el si merko i un Sefer Tora, i lo metio en este midrach, i disijan Minha i Arvid seja en la notche de chabad komo tambien i en la tadre de chabad, lo todo kon Minjan, ke ja li vinijan muntchos seja de los Hahamim komo tambien i de los amigos i de los parientes, i de esto si gustava mui muntcho i mas tadre ke Hr, Josef ke djusgava a el poevlo era en este midrach ke los djusgava, i en la sigunda kamareta, lo metio a H. Behor Besalel, ke al koal lo kaso Hr. Tchelebi, kon su mosa ke lo servio, en los menesteres de kasa i el li djo achugar i kontado porke eja non tenija, i el ditcho H. Behor ke era tcharektchi, lo protejava muntcho, i non li kovrava dinguna kira por la kasa, ke en veses li enprestava moneda porke su ofisio era tcharektchi, i ejos todos los 2 en veses lis asijan algunos hismetis en kasa, i el ditcho H. Behor tambien lis era komo un goadrador de la kasa, i los Jamavan ansi: a el H. Behor por

976      Biografia de Hr. Tchelebi Moche A. Arie.     1830

el nombre de su mujer i a la Bu. Lijalutcha por el nombre de H. Behor, su marido, ke es ke es ko [ke] los jamavan a H. Behor el de lea i a Bu. Lea la de H. Behor, ejos bevijan mui aunados, i mui boenos, i eja la Bu. Lea de H. Behor la servio a la Bu. Bulisu de Tchelebi Avraam en toda su vida ke eja bivio i moro en esta kasa muntchos anios, i el Ijo de la Bu Lea el S-r. Nesim Besalel era ke no[lo] jevava a mi en tchutchus^[32] a el talmud tora, koando era tchiko, i mismo mas tadre mi jevava por el braso, i tambien mi traiva a kasa, i por esto mi S-ra madre li pagava aparte, i komijamos djuntos en el meldar,

I Hr. Tchelebi koando la estreno la kasa lo iso ke kombedo a todos sus parientes i amigos i lis djo a komer i bever, i kantaron i se alegraron muntcho, ke esto foe por el Hinuh abaid, ke meldaron tambien i los Hahamim algunos kortes de la Gemara i otras kosas, ma non mi es savido, si su ermano Hr. Josef, si es ke li merko la medija kasa de Hr. Tchelebi, su ermano ke la avijan merkado en djuntos, porke en eja moro Hr, Josef toda su vida, i de mismo su Ijo H. Rabenutcho, i ansi tambien i lis IJOS de H. Rabenutcho, fin a el anio de 5655, ke la vendjo, S-r. Josef el ISO de H. Rabenutcho, ke koando la vendjo S-r. Josef el Ditcho, li kijeron los Ijos de H. Elijatchuno ke lis diera i a ejos parte, de esta vendita, ke la vendjo por 50 liras turkas, komo ke lis apartenija i a ejos la metad, ma los desendientes de Hr. Tchelebi, lis dicheron a los Ijos de H. Elijatchuno ke non podijan nada reklamar por rason, ke Hr. Tchelebi koando si salio de esta kasa, non li tomo nada de Hr. Josef, i se la

977      Biografia de Hr. Tchelebi Moche A. Arie.     1830

decho entera a el i ansi de mismo lo arija i H. Eljatchuno, i ansi foe ke si la tomaron toda la moneda los desendientes de H. Rabenutcho, i se foeron a Kostan,

Sigun eskrito mas antes de Hr, Tchelebi era siempre ke vijitava, en los konakes de todos los begis de Samokov i lo mas muntcho era ke estava en el konak de el S-r. de mehmed emin aa. ke ja lo saven ke es este S-r. ke los trucho a ejos a samokov, i lo kerija i lo ajudava mui muntcho, i ke el tambien era el Hajan de Samokov ke de el dependija todo, i en este tiempo ke Sultan Mahmud kijo depedrer a los djeniseros, (keri disir, ke en akel tiempo el governamiento de la turkija, era todo vija de ansi Pachas komo el Mehmed Emin AA, ke avijan en lo mas muntcho de las sivdades de la turkija, i ejos si gonernavan por si mismos i kovravan todos los dasios ke los governos los kovran, i ejos djusgavan a el poevlo i los kondenavan i mas lo todo sigun un tchiko prensipato, solo era ke tenijan kortadamente, la suma de moneda, i otras kosas ke li davan a el Sultan en kada anio, i tambien koando tenija geras el Sultan era ke i est tenijan kortadamente la suma de soldados ke li devija mandarle, i algunos de estos djeniseros, siendo ke revejaron en el Sultan foe ke isieron geras grandes en siendo todos turkos i el Sultan ke los vensio a todos estos, denpoes enpeso a buchkar por depedrerlos, i enpeso de las kaveseras, ke adetras de la nota ke tenijan estuvo tambien i el Mehmed Emin AA. lo koal ke non era de estos, ma esto lo iso el Osman Pacha el Hajan de Sofia, ke lo entrego, por una tchika

978      Biografia de Hr. Tchelebi Moche A. Arie.     1830

deferensia ke ejos tuvieron, i denpoes ke de parte de el Sultan ja los tomaron en nota en mui sikretamente a todos estos djeniseros ke eran las kaveseras, salio ferman afirmado de el Sultan porke foeran todos matados kon tomarlis las kavesas i jevarlas a Kostan, i por kada uno de estos ke van aser matados, nomenaron, Delis,^[33] ke son los komandires, adjuntandoles a kada uno a un arabo djelat ke es el degojador, i akompanijados de una partida de soldados, i en dandoles a kada uno de estos a un HAT, Ferman por ke tengan el poder de reintchir esta mision, sin ke dinguno lis poeda vinir kontra, i todos estos en el dija fiksado partieron i tambien el DELI, ke era por Samokov ke ja se supo en el dija ke iva a venir, i Hr. Tchelebi, parisiendole por boeno li foe presto ande el Mehmed Emin Aa por asersilo saver en mui reposadamente, i en mismo tiempo akonsejarlo porke si saliera de Samokov, or ke el eskondiera, ke anke todo si lo dicho, ma el Mehmed Emin AA, non lo kijo eskutchar, en disiendole ke el non tiene de loke espantarse, ni ke menos dinguno lo podija tokar, porke el ja tiene todos los HATESI^[34] FERMANES, menesterosos i ansi foe ke mas non li pudo avlarle, porke si espantava, i siendo ke estas etchas si reintchen presto i al asalto si[n] tadrar i en este tiempo ke estavan konversando solos los 2 en su salon, ja li isieron saver ke soldados turkos li blokaron su palasio, i adetras ja entro el DELI akompanijado de su DJELAT? i viendolos el Mehmed Emin A, kon Hr. Tchelebi ke estavan solos, ja si kere entendido komo de espanto ke tuvieron todos los 2 ke si lis tomo la

979      Biografia de Hr. Tchelebi Moche A. Arie.     1830

palavra, ma non tenijan koalo aser, i Hr, Tchelebi ke si espanto mas muntcho, kon medijas palavras ke de el espanto non tuvo la foersa de avlar, si levanto en pies i li rogo a el DELI, porke lo alesensijara a salirse de el salon ande estavan, ma el S-r. de el DELI li dicho, ansi kon bos mas alta: tu non tienes nada por koalo espantarte ni menos trublarte, ke jo non vini aki para degojar ala djente otro ko solo i solo tomarmi la kavesa de el Mehmed Emin AA, i al punto vo a partir, i esto kon el Ferman de el Sultan, i ansi foe ke non si pudo salirse i resto tambien en el lugar ke estava, i de este linguaje Hr. Tchelebi ja estuvo por si mismo algo kurajioso, i lo vido i lo sentio koando li dicho el DELI a el Mehmed Emin AA. Ansi AGA, jo mandado de el Sultan Hamid i kon su ferman afirmado de  su propija mano por rason ke revejates en sus komandos es ke vini por tomarle la kavesa i jevarsela a el Sultan, i el Mehmed Emin AA, sigun ditcho ke ja tenija sus fermanes, foe solo esto su defindimiento ke dinguno non lo podija tokarlo, kon tambien i amostrandoselos, i el deli li respondjo kon amostrarle tambien i el su ferman, ke es la kondana, i disiendole: HATINA, HAT^[35], i al punto li djo el komando a el arabo ke era el djeliat, porke li tomara la kavesa, i el arabo kon meterle la pierna en su petchadura, li afero de los kavejos de la kavesa de el AGA, en abokandole la kavesa, en el mismo lugar ke estava asentado, i kon su kotchio en su boka apretado de sus dientes dicho el BISIM-ILLAI, ke es kon el nombre de el DIO, i este de el Sultan, i de la parte de el piskoeso li korto kon foersa en una ves

980      Biografia de Hr. Tchelebi Moche A. Arie.     1830

la kavesa, i sin mas ni un punto restarsen ejos partieron, kon tomarsen la kavesa kon ejos, en dechando el poerpo de el AGA, sin la kavesa, i pokas oras pasando, arivo una pochta spesiala, en traendole a el ditcho DELI, sigundo orden kon ferman, de el Sultan, en komandandole, ke el Mehmed Emin AA, non es kulposo, i ke lo dechara en su reposo, ma por desplaser ke ja foe tadre i ke ja avia eskapado su etcho i mismo partido, i ansi foe ke non lo alkanso, ke si es ke tomava el konsejo, de Hr. Tchelebi ke lo avia akonsejado porke si saliera de Samokov or ke si eskondiera, ala ora podija ser ke non iva a ser matado, (i esto es loke disen el proverbo: non mi enkolgech aki otro ke enkolgame mas para aki i es en este tiempo ke akontesen los mil modos de trokamientos) i ala manijana ke lo enteraron, non kere ditcho ke li isieron todas las onores meresientes ke non solo porke era un personaje grande otro por esto ke foe tambien i matado sin dinguna rason, i mas tadre ke li isieron tambien i la tomba, kon ke las isieron traer de Kostan lo todo piedras de marmor blanko todas lavoradas de unas pinturias mui finas i rikas i eskritas kon letras de oro de la mijor pinturia, senjalando modos de chirim, en lingua turka i araba, i en medio de esta tomba metieron en pies una piedra redonda tambien de marmor blanko, figorando su poerpo, kon la kavesa kortada, i a su deredor rodejado kon varandado de fiero preto, ke esto estuvo fin a el anio de ke se iso prensipato la Bulgaria ke foe en el anio de 5640 ke los Bulgares lo alempiaron este lugar i las piedras las depidieron

981      Biografia de Hr. Tchelebi Moche A. Arie.     1830

ke lo ivan aser este lugar goerta, ke era a la entrada de la sevdad, ma fin agora ke la dita esto eskriviendo ainda non lo isieron i denpoes de todo esto ke ja si eskapo, Hr. Tchelebi se salio del el palasio i se vino deretcho a su kasa, porke foe mui muntcho deskorajado ke si espanto muntcho, i lo iso por etcharse a durmir un poko ma non pudo durmir, i de esto foe ke muntchas notches non podija dormir ke li amanesija las notches sin dormir, i de esto li kavso a enpesar a estar nervoso, i esto dija kada dija si li foe siempre enfortisiendole asta ke arivo en un tiempo mui foerte sigun ke mas adelantre ja lo van a meldar sus ultimas dijas sigun ke alkanso, lo todo kero disir, (ke el tener muntchas relasiones kon los personajes grandes son ansi kosas ke si poeden enkontrar, i son kavsantes a depedrersen a si mismo lo todo kada uno de su manera sigun ke igual a esto ja li akontesio tambien i a su ermano Hr. Josef sigun ke li paso kon el Usref Pacha ke ja lo eskrivi en su partida i li kavso la moerte solo por esto ke si espanto, ma es kosa maraviosa ke muntcha djente lo desejan esto de tener ansi relasion kon personajes grandes,) i kada uno ke lo melde estas kosas i pasajes i ke lo buchka a alkansarlo para prontarse i el tambien depedrerse, de su manera,.

En este anio de 5591, li nasio a Tchelebi Jeuda una Ija ke foe alegria grande i se gustaron todos muntcho i esto lis

982      Biografia de Hr. Tchelebi Moche A. Arie.     1831

era okasion para alegrarsen i pasatiempo, i kon esto era ke si vijitavan i se mandavan los presentes ke ja lo tengo eskrito i tambien ke si adjuntavan en esta kasa de la fiesta i komijan i bivijan i kantavan i se alegravan, porke altramente de pasatiempos sigun ke ai ai agora en este tiempo non avijan, i esto era ke lis afitava una or 2 veses en el anio, i la Jamaron REINA, i su propia madre la kreo i la kudio,

                Hr. Tchelebi ke estava algo nervoso de loke si espanto de la matansina, de el Mehmed Emin AA, foe ke en este anio ja estuvo mas reposado, i por governador ke lo nomenaron a el Usref Pacha se isieron saltanates mui grandes, ke todo lo vijitaron i tambien Hr. Tchelebi a los presipios ja li iva ma mas tadre non lo dechavan ke foera i era sus Ijos ke li ivan siempre, i a ejos tambien los aserkava muntcho i los kontentava kon todo esto ke li demandavan, i siempre lis desija porke non si travaran de irle,

              En akeos tiempos los turkos non dechavan merkar dingun modo de mulk imobel a otras nasiones, i esto para poderlo merkar era ke kalija ke tomaran a el presipio la kontentes de los notavles turkos de la sivdad, i komo era el presio 2 veses mas karo de su valor, i en non uviendo algun merkador turko, i si es ke lo vijan, a el patron ke era premoroso de venderlo, era ke si li alesensiava porke lo merkara, i esto todo denpoes ke ja lo isieron, i avija un sierto Turko patron de fabrikas de fiero, ke si jamava Ejub aga, ke el koal foe ansi promeroso de vender la una vigna, ke es fabrika

983      Biografia de Hr. Tchelebi Moche A. Arie.     1831

ande si derite el metal de el fiero ke es la ruda, i aparte tenija una kulle, kasa de 3 kamaretas, i kampo grande redjado [rodejado] de tchit^[36], i era en el kampo de koru-bunar komo 6 kilometros lechos de la sivdad i Hr. Tchelebi ke lo kijo esto foe ke si la merko kon ke i el lo iso ke li tomo al presipio la kontentes de el Usref Pacha, i denpoes ke tomo todos los dukomentos menesterosos, el kon grande sevda i kerensia li iso una boena reparasion, i la mobelio, kon ke si iva el mismo en kada dia, i denpoes este lugar li servia por lugar de kampania ke si ivan en los dias de el enverano, kon toda su familia ke lis tomava los kutchis paitones de los begis, ke todos li davan i se prontavan komanias i biviendas i si estavan solo los dijas i komijan i bivijan i kantavan i se alegravan, i koando ja era la tadre ejos kantando se vinijan en kasa, ke aun kon todo ke ja tenijan lugar i para dormir ma ejos si espantavan de estarsen por los kampos en las notches a rason ke avijan muntchos ladrones,

para lavorar en esta fabrika el fiero ke lo deritijan la ruda ke es el metal, i se asija un pedaso de un peso de 120-130 kg el si trucho los maestros i enpeso a lavorarla, i keto en el primer anio, 200 kioltches^[37] de este fiero, i siendo era el menester de batirse para aserlo en varas largas ke lo asijan en 3 varas i esto ke esta manera de fabrika maaden el non la tenija era ke lis pagava a los Begis ke ja tenijan i se lo asijan por su konto i el denpoes lo vendija ke su valor era las 60 okas de 140-150 groches, ke de esto las ganansias eran mui tchikas, ke non era kosa ke li podija

984      Biografia de Hr. Tchelebi Moche A. Arie.     1831

ma el lo iso esto por una prova por ver komo es este negosio, i tambien ke kerija tener un lugar de kampania, por pasatiempo sigun ke ja vieron ke su natura era antcha i gustosa, i esto de esta merkida de esta vigna non lis foe plasiente a los turkos en disiendo ke este djidio si es ke si li amostra ganansia va enpesar a buchkar de merkar i maadenes i ansi ke poede arivar un tiempo ande si va a poder empatronar de todos los maadenes i por esto non lo ajudavan, koanto a esto ke lo pensaron ja foe mui djusto ke mas tadre esto ja lo enpesaron a aserlo mismo ke los merkavan muntcho mas karos de sus valor asta ke arivo un tiempo ke de los 18 maadenes kon sus vignas le[ke] avija en Samokov, ja si avijan enpatronado de los 10 maadenes i los 2 ke non lavoravan era ke lis avija kedado a ejos los 6 i estos ja non los estavan podiendo lavorarlos ke si la gera Russa-Turka era kon 3-4 anios mas tadre ja ivan a ser todos moestros, ke ejos todo el fiero ke lavoravan ja si lo vendijan i mismo para loke ivan a lavorar i denpoes de 2 i 3 semanas lo todo a los moestros porke ejos estavan enbesados ke lis lavoraran lo todo solo por un mantinimiento i esto ke lis davan ejos el trigo kon koenta i mas tadre ke non lo podijan aser esto era ke non lis abastesijan las ganansias para los gastes ke ejos tenijan,

            La djente de su esfoegro el RAV ZEHOR LEAVRAAM, de Dubnisa li vinijan siempre en su kasa i si estavan kon semanas enteras komo sus musafires, i en la una ves ke li vino su konijado Hr. josef  Haim ke es el ijo grande de el Rav Zehor leavraam, i en dija

985      Biografia de Hr. Tchelebi Moche A. Arie.     1831

de Chabad ke estuvieron en el KAAL, demanijana a tefila, lo jamaron al ditcho Hr. josef Haim a Sefer Tora, i sigun el uso ke si etcha tambien Nedava seja para las kupod i otros i tambien para los mechartim, foe ke etcho 180 aspros de nedava para las Kupod, i ansi por los otros tambien, porke el si penso, si era ke etchava, 250 aspros le iva a ser muntcho, i si es ke etchava 100, li foe poko a rason de la onor de su konijado Hr. Tchelebi porke estava en su kasa, i lo todo iva a ser ke los iva a pagar su konijado porke el non tenija i sovre esto de etchar esta suma, foe ke grito Hr. Tchelebi ariento to de el KAAL, ansi: Ho, Ho Ho muntcha kosa, i por lo todo todos los 2 si rieron, i ansi tambien se iva i Hr. Tchelebi en veses a Dubnisa ala kasa de su esfoegro el Rav Zehor Leavraam, i se estava unos koantos dijas, en su kasa komo musafir, i en las manijanas koando si espertava porke si levantava mui temprano i en estando ainda en la kama, lo asija ke enpesava a kantar, i todos los de kasa se levantavan i se li vinijan en su kamareta por bever el kahve de la maniana, i en este tiempo ejos tambien kantavan i denpoes se ivan a el kaal a disir la Tefila de la maniana, ke era ansi sus pasatiempos i por esto eran siempre gustosos i alegres,

Hr, Tchelebi, komo negosiante ke era i tambien mui echpikolante, i siempre non mankava ke tenia tambien i algunos atagantos, i para non estar en kasa angusiado, lo asia ke koando entrava de la poerta de su kasa, li disia a el tokmak de la poerta, ansi: un emanet ti vo a dechar porke mi lo goadres en esta notche i amaniana

986      Biografia de Hr. Tchelebi Moche A. Arie.     1831

mi lo entregaras, ke i ala maniana koando se iva a salir de la poerta si lo demandava por ke si lo diera el emanet, ke li tenija konfejado de ajer la tadre, i todo esto lo asia a la klara, para ke lo sintieran sus ijos i ke ejos tambien lo isieran ansi, kijendoles disir, ke por todas las kosas ke si pasan en la plasa ke resten en la plasa, i en kasa ke non esten pensativles, or angustijados, ke el ser ansi en kasa, aparte ke non si gana nada, lis kavsa tambien i a traer pleitos i hasinuras en la kasa, ke por non arivar en esto i estar al menos gustosos i kantar en kasa, foe ke lo topo de mijor i lo asia ansi, i bivia kontente,

            Hr. Tchelebi su avla era mui klara, i konosia i savia mui bien la metoda, de saver avlar koal unke kosa ke foera, para ke presto lo podiera bien entender el sintidor, i lo todo sin ke lo repitijava la avla unas koantas veses sigun ke algunos lo asen otro ke solo de la primera avla ja si li entendija,

            La Bu. Buhuru su S-ra madre ke estava siempre en la kasa de Hr. Tchelebi, ke a eja non li plasio nunka estarse kon dinguno de los otros ijos,

             foe ke en este anio eja estuvo mui angosijada, i siempre iva jorando, porke en el anio de 5589, si le morio, el ijo tchiko en petritch sigun ke ja lo eskrivi en su partida, i ke en este anio tambien si li morio i su sigundo ijo el Hr. Josef, ke i kon esto tambien ja lo eskrivi en su partida la manera de su moerte, i de tanto alegre ke eja era, todo si li bolto en mofina, foe ansi ke lis dicho a sus 2 ijos ke li avian kedado ke eran Hr. Tchelebi

987      Biografia de Hr. Tchelebi Moche A. Arie.     1831

i H, Refael, ke mas de agora i en delantre para eja mas vida sana non li kedo, i ke la mandaran a Jeruchalaim, i sus ijos todos los 2 ke la respektavan mui muntcho, i tambien ke la kontentavan en todo loke lis demandava, foe ke i en esto tambien la kontentaron i algo mas muntcho de agora sovre el fanatismo ke ja avia, i sin en nada refusarle li kompleron su desejo, i arientro de mui poko tiempo seja ejos los ijos komo tambien i eja si aprontaron por todo el menester de ansi vijaje, i por la vida de jeruchalaim, kon ke li  nombraron, la suma de moneda ke li ivan a remeter en kada anio i li dieron el menester de moneda por el viaje i la suma fiksada por el primer anio, ke aparte eja si jevo tambien i toda la moneda ke la tenija avansado en su vida i tambien toda su djoja ke tenija ke non era poka i tambien todos sus vistidos i mudaduras i otras kosas ke eja enpatronava, i lo demasija, lis enpresento a kada uno de sus ijos noeras, inietos, i parientes, i amigos, a kada uno koalo lo meresija, i denpoes ke si abraso i los beso a todos ejos, i espartio muntcha sedaka a los menesterosos, i en el dija fiksado partio via de Salonique, ke la akompaniaron la sivdad entera kantando los Hasanim, los pismonim konvinientes, todos fin a rijan i sus ijos la akompaniaron fin a Djuma, i eja lo iso el viaje mui leviano, i siempre mandava kartas mui boenas en asiendoles saver ke ja estava mui boena i ke si topava mui kontenta, solo ke lis rogava porke nunka non la decharon sin karta, ke kon esto era ke li iva a pasar el eskarinio, porke eja era mui amorosa de todos, eja

988      Biografia de Hr. Tchelebi Moche A. Arie.     1831

tuvo muntcha onor en jeruchalaim, i tambien ke la rekomendavan mui muntcho a todos sus amigos i konosidos, i siempre si kartejavan de todas las 2 partes, i la anijada si la mandavan siempre en mui regla, sin ke lis demandara, i muntchas veses li mandavan tambien i algunos presentes ke eran posible de mandarle,.

            En este anio tambien el negosio de Hr. Tchelebi era lo mismo de dar moneda kon entereso seja a algunos merkaderes komo tambien i a algunos de los begis, i en veses lis merkava tambien i partedikas^[38] tchikas de fieros, i el los jevava a pasardjik por venderlos, ke de esto era ke ganava seja de los fieros por ke los tomava kon unos presios mas baratos i seja tambien ke kon esto podija ser mas kolai los kovramientos de estos ke lis avansava moneda,

En kasa sus bivir era mui boeno, i sus gastar era kon muntcho konto, i las mujeres eran mui aunadas, i todas djuntas lavoravan en los menesteres de la kasa, el Tchelebi Avraam kontinuava la echkola, su padre i madre lo amavan i lo kudijavan muntcho i la Bu Bulisu, ija grande de Tchelebi jeuda, era la Bu. Lea, su vava, ke la kudiava mas muntcho i eja la governava, i su padre ke la amava muntcho era ke li dava muntchas veses kechas a la Bu. Rahel su mujer por esto ke non la kudiava muntcho,

           En el anio de 5592. Hr. Tchelebi ke enpeso mas muntcho a ir a la vigna ke tuvo merkado i esto ke si iva kon toda su famia^[39]

989      Biografia de Hr. Tchelebi Moche A. Arie.     1832

i pasava por el tcharchi kon los kutchis ke los tomava de los begis, i los turkos ke estavan asentados en las kavanes ke los vian pasar i tornar, foe ke si enpesaron a enselar, i tambien amenasarlo, i de la otra parte los begis, ke eran patrones de los maadenis i vignas, en sus adjuntas ke ejos tenijan, enpesaron a disir, ke hodja Tchelebin, ansi lo jamavan, ke tomo esta vigna de Ejub AA, non va a goler para nos boeno, ke mas tadre este si va a enpatronar de todos moestros maadenis i vignas, i Hr. Tchelebi ke ja lo supo ke avlavan ansi, lo iso ke lis foe en un dija ke ejos tenijan adjuntas ke tratavan i platikavan, sovre el etcho de los maadenis a rogarles, i disirles, ke la vigna ke tomo de el Ejub AA, en el anio pasado, ke non es kosa ke la va a poder detener, ke non es su etcho, i sovre ejo lis rogava si podija ser ke si la merkaran alguno de ejos, i sovre esta prometa lis plasio muntcho a los begis, porke ejos ja foeron mui repintidos ke si la decharon merkar, i Hr. Tchelebi ke si goadrava muntcho, de ansi kosas para non romper kon los turkos, foe ke si konvino i sin dinguna ganansia, si las djo a el uno de ejos, ke sovre esta vendita Hr. Tchelebi si sikilio mui muntcho, porke tenia mui grande sevda en esta vigna, ma non tenia otro remedio, porke siempre kalia ke lis isiera sus deseos, i kon esto foe ke gano la enfloensa, i pasava boeno, i poko tiempo pasando i torna kon la lesensia de los begis, el si merko un tchair pajera^[40] de un kampo grande ke kortava de 20 a 22 karos de paja i se jamava kupichta,^[41] i esto era ke li servia por kampania en lugar de la

990      Biografia de Hr. Tchelebi Moche A. Arie.     1832

vigna ke la vendio, i en este tchair, avia etchado la sevda, i lo asia ke en el tiempo ke si kortavan las pajas, i el ke si tomava lavoradores para ke la bitchijaran, en este mismo dia, kon ke si prontava de un dia mas antes, unos juvetches i bevrajes de vino i rakis i se alkelava un karo de vakas, i se asuvijan todos ejos ombres mujeres krijaturas, i la komania i se ivan mui demaniana antes ke saliera el sol i arivavan temprano porke la lechura era de una ora lechos de la sevdad, i se estavan el dia entero i komijan i bevjan ke los juvetchis eran el uno de aros i el otro de modos de los kundutchos ke topavan, i  mientres el dia ejos kantavan i bailavan i se alegravan, i koando ja era oras de enoerarse el sol ejos si vinijan a kasa gustosos i alegres, i de este tiempo ke los turkos avlaron en las kavanes ke Hodja Tchelebon si esta karejando kon kutchis mas non si suvieron fin ke ejos los tuvieron, es este el tchair ke lo empatrono Tchelebi Gavriel en toda su vida, ke li kajo a el de koando si espartieron los ermanos en el anio de 5614, i fin a oi lo enpatrona su ijo S-r. Behoratche Jshak G. Arié, i la paja ke torava la vendija en el pasar a el presio ke topava porke non tenija lugar ande deskargarla por venderla en el envierno kon presios mas karos, i esto non lo asia por negosio otro ke solo por keef, i mas tadre el si terko [merko] muntchas tarlas en la okolia de Ihteman, en los kasales de Tchamdjas i Hadji-amsa i kalilar, ke son los lugares ke kresen los mijores trigos ke es todo bogdai^[42], i el los dava a trekio kon ke tomava el solo la una tresera parte de loke kresia, i en el

991      Biografia de Hr. Tchelebi Moche A. Arie.     1832

tiempo de la moisone^[43] ke si kortan los trigos se iva el mismo a estos kasales i si iva a las tarlas en kada dia i si estava fin ke lo rekojijan, i djunto kon el trigo ke li tokava de su parte si i vinija djuntos, ke era una suma mas muntcho de esto ke el tenija el menester por el mantinimiento de su kasa i lo restan lo vendia ke i de esto tambien si gustava mui muntcho i li era mui grande plaser koando ja vinia a kasa, djunto kon el trigo, i en kasa longo tiempo lis estava kontando, de todo esto ke lo vido en su estar seja por los kasales komo tambien i por los kampos, i tambien sigun era la vida ke lo pasan los kasalinos, ke de estas vistas el tomava muntchos enchemplos, para si mismo,

            En este tiempo, los Begis enpesaron a salir a el tcharchi i era ke li vinijan ala butika de Hr, Tchelebi, i se rekojijan todos, i si estavan a 2 i 3 oras en kada dija, i sus platikas era algo de sus etchos i algo de la poletika, i Hr. Tchelebi era siempre asentado kon ejos, i non goadravan de el nada de todo loke platikavan, i el lis dava tchibukes i kahves, i a esta okasion asia muntchos etchos kon ejos, i esto ganansiosos, i lo ajudavan a lo todo i a esta kavsa la mobelio mui bien la butika, ke fin a este tiempo los begis non salian, porke lis era grande vergoensa, i ejos tenijan kada uno sus selamlikes, ke es en sus propios konakes, en el dichari avli tenijan un apartamento, spesial bien fragoado, kontiniendo 3-4 kamaretas, i este apartamento lis servia para merar sus etchos i en mismo tiempo para resivir vijitas, i koando tenian ke

992      Biografia de Hr. Tchelebi Moche A. Arie.     1832

resivijan algunos musafires tambien los resivijan en este selamlik, i eran mui bien mobelijados i muntcho mas mijor de los sujos konakes, ande ejos bivijan, kon sus haremis,

Hr. Tchelebi, su tino era lo mas muntcho sovre los estudios, el se iva kaje en kada dia a su Midrach ke lo aparto sigun eskrito mas antes i si estava estudiando en la Gemara a 2 i 3 oras a el dia, i en este tiempo el si okupava de los etchos de la komita, i en mismo tiempo el los djusgava a el poevlo i a muntchos el los kondenava, ke tenia el poder de meterlos tambien i en preso, i el tambien li darchava, en todas las tadres de los chabatiod, en el KAAL, i todos lo sentijan, kon muntcha atansion, en los dijas de los viernes el si lavava i se vistia demaniana, de unos mas mijor vistidos i se iva a vijitar en todos los konakes de los begis i de los S-res turkos de la sivdad, ke este modo era el uso de los turkos i en todos los lugares era mui bien resivido, i tambien ke ejos los turkos en los dijas de viernes non salijan,

Koanto a sus negosios, era lo todo ke si okupavan sus Ijos Tchelebi Jeuda i Tchelebi Gavriel, i en este tiempo enpesaron a merkar i vender i algunos otros artikolos, ke lo todo era kon la lesensia de el padre, i todos los enkasos ke asijan si lo entregavan a sus padre, i el era ke tomava de lo todo notas,

Hr. Tchelebi ke avia mui muntcho tiempo ke non tenia ido a Kostan i en este anio seja ke si kijo kamenar or seja ke ja tenia el menester de merkar algunos artikolos por su merkansia i mas

993       Biografia de Hr. Tchelebi Moche A. Arie.     1832

muntcho por enbesarse algunas operasiones de el bankerlik porke era toda su foersa ke la dava en esto, el viaje li turo 15 dias, para irse a Kostan, i koando ja arivo, el ja estuvo nervoso, sigun ke ja lo saven ke de koando si espanto de la moerte de el Mehmed emin AA, ke estava siempre kon merikija, i le disijan ke loke tenia era pohondra, i ansi foe ke estuvo en Kostan solo 7 dias, i buchko mui presto de eskapar koalo pudo de su etcho i se vino presto a kasa, i denpoes, por los 7 dias ke el estuvo en Kostan lis kontava en kasa, siempre de todo esto ke lo vido seja en el viaje seja en kostan porke el ja vido mas muntcho de loke si lo poede la persona imajenar, i tambien ke tenija muntcha zehira (tino).

                En el anio de 5593, Hr. Tchelebi ke ja estava nervoso i ansi foe ke mas non si pudo okupar de los etchos de la komunita ni menos tambien djusgarlos, ke ja lo tengo eskrito ke en akejos tiempos era solo los Hahamim ke djusgavan a los djidios, i ande los djusgadores turkos non ivan porke lo metian en herem, i ansi tambien ke non lis pudo darchar ke i esto tambien kalia ke uviera en una komunita, seja porke avia grande fanatismo, or seja ke la masa de el poevlo lo kerian, porke son djidios, i kon esto ivan a ser kichtos de el DIO para el otro mundo, i esto todo ke lo reintchia, Hr. Tchelebi i sus Ijos ke non lo dechavan, lo isieron de traerlo a Hr. Avraam Alkalai de Dubnisa, ke el koal ja era boen Haham, i era tambien i boen sofer i kon una tchika paga ke li

994      Biografia de Hr. Tchelebi Moche A. Arie.     1833

pagavan el resivio por reintchir esta mision i se vino a Samokov i kon las eskrituras ke asia seja de SEFER-TOROD, seja de MEZUZOD i de MEGILOD, era ke si mantenia, i su asiento foe en el MIDRACH, de Hr. Tchelebi i los djusgava i lis darchava, i en mismo tiempo li metieron tambien i elevos porke los enbesara a meldar en la GEMARA, porke i este ofisio lo konosia mui bien i savia la metoda de enbezar a meldar, sigun ke los primeros elevos ke el los tuvo foeron, H. Elijatchuno, Tchelebi Avraam, i denpoes S-r. Behoratche i S-r. Mochonatche i H. Rabenutcho, i ansi mas otros, i todos estos foeron Hahamim grandes, ke foe a todos solo el ke los enbezo, i todos los otros Hahamim ke foeron denpoes de el mismo ke tenian ansi elevos ma non pudieron enbesarsen sigun estos ditchos, i en veses tambien iva i Hr. Tchelebi a el Midrach i estudiavan djuntos, i de mismo ivan i todos los otros Hahamim ke avian en Samokov i kon ejos tambien era ke estudiavan en koalo foesa, el era tambien i chohet ke los enbesava i a los ke lo kerijan,

            Sigun ke ja lo tengo eskrito ke lis tomava los fieros de los maadendjis ke el lis dava moneda ke muntchas veses li arivava ke i el tambien si enprestava de ejos, i entre la una ves ke el lis merko una partida mas grande lo kijo de irse el mismo a pasardjik por venderlos, i el ke si abacho en el Han de Kurchumli, por el afito foe ke era la notche de koleda^[44], i en el han estava solo i el handji sin asersi saver nada lo iso ke sero todas las poertas i se foe i el tambien a su kasa, en dechandolo solo a Hr. Tchelebi

995      Biografia de Hr. Tchelebi Moche A. Arie.     1833

el ke durmia mui puko, i las notchadas ke ja son las mas grandes i el ke si levanto en la media notche i buchkandolo a el handji i ke non lo topo el si salio a el kortijo por toparse un remedio de salirse de el hotel i esto ke non podija ser porke las paderes de este han son mui altas, ansi foe ke li kalio ke si viniera torna en su kamareta i esperar fin a denpoes de el amaneser ke iva a venir el hoteldji, ke en este tiempo anke ke el buchko por durmirse ma non lo pudo seja ke el ja era nervoso or seja ke si iva de las mil imajinasiones imajinandose, i el espanto ke li foe mui grande, ansi foe ke si hazenio i li renovo de moevo todas sus pohondrias, a tiempo ke en el han non uvo mismo ni ken batio la poerta, ni ke uvo dingun roido, i esto li kavso ke presto si viniera a samokov, sin ke pudo nada de etcho eskapar en esta ida, de pazardjik, (esto kale dizir ke ja es koza ke akontese a todos estos ke vijajan, ke i jo tambien en el anio de 5635 ke estuve en Ihtiman, i estava en han de ahatch kakan, foe i kon mi ke mi decho solo el hoteldji i ke non avia dingun otro pasajero, i era tambien en una notche de praznik,^[45] i sero todas las poertas, i mi decho solo, ke i jo mi esperti tambien en medio la notche i esto porke avijan muntchas tchintchas, i estuve tambien fin ala maniana asta ke vino el hoteldji, i a rason de esto jo mi sali de este hotel lo todo goadrandome ke non seja mi lo aga otro una ves, ma non mi espanti porke jo ja tenija armas kon mi,) i de esto Hr. Tchelebi iva endo dia kada dia mas muntcho nervoso fin a ke mas enpeso a non kerer saver por nada

996      Biografia de Hr. Tchelebi Moche A. Arie.     1833

i tambien de ves en ves iva biviendo, sin ke lo vieran parisiendole ke kon esto iva a ulvedar,

           i en este tiempo tambien sus ijos era ke kontinuavan en sus etchos i lo todo por el konto de el padre, i de todas las operasiones ke asian, siempre si lo asian saver anke ke estava hazino i Tchelebi Jeuda de este tiempo foe ke enpeso a aser algunas merkansias por su konto, ke lo primero ke iso foe ke topo a merkarse una partida de kahves, i el los vendija por los konakes de los begis kon presios karos, porke el si los dava a fijado, i de esto, tenia, ke ganava boeno, i mas tadre el se iso traer de Viena, via de S-r. Avraam Hazan ke era en Viena Hazan i azia tambien i komision, muntchos modos de vidros, i tchinis i fildjanes para kahve i ansi mas i otras kozas i lo todo lo vendia por los konakes, i a razon de esto ke entrava i salia muntcho por los konakes era ke li komandavan i otros artikolos ke lis primija i el los merkava de ande los topava i se los vendia lo todo kon boenas ganansias, ansi lo iso i Tchelebi Gavriel tambien, ke i el si merkava valutas de oro i de plata, i las vendia kon ganansias mas tchikas porke era el etcho mas riko i mui limpio, i Hr. Tchelebi ke ja era siempre kachero ke resivia tambien una mesada de el governo i aparte era ke todas las valutas ke kaijan en la kacha lo todo era ke lo trokava por moneda koriente, ke de esto era lo mas muntcho de las ganansias, i en este etcho de la kacha era ke lo meravan entre el padre kon los ijos ke non lo asijan deferensia, i mas tadre lo todo

997      Biografia de Hr. Tchelebi Moche A. Arie.     1833

lo isieron una kacha seja esto ke ganava Tchelebi Jeuda komo tambien i Tchelebi Gavriel i esto de sus padre, i todos de esta kacha era ke tomavan i etchavan, Tchelebi Avraam su ijo el tchiko era ke kontinuava sus estudios, i iva siempre adelantre, i de todos era mui bien visto, Hr. Tchelebi aparte de sus okupasiones tenia tambien ke kudiava i por su ermano H. Refael i sigun ke lo protejava ja lo eskrivi en mas largo en su partida, i mas muntcho era ke los kudiava a los ijos de su ermano Hr. Josef, ke eran H. Elijatchuno i H. Rabenutcho ke kedaron tchikos i mui vasios, i el era ke lis merkava todos los menesteres por la kasa seja en la komania i seja en todos los otros, i esto tambien ja lo eskrivi en sus partidas lo todo en mas muntcho antcho,

                       Koanto a los enkamenamientos de la kasa, era por lo todo ke kudiava la Bu. Lea, ke kudiava i por su komando si enkamenava lo todo, todas las mujeres la konsediravan mui muntcho i siempre la vijitavan, i por enfrentante tambien i eja las vijitava a todas estas ke a eja li vinijan, ejas kon sus noeras i parientas las vijitavan a las Hanumes, porke i ejas tambien lis vinijan, sus vistidos ke lo vistijan era, de anteris largos de 3 aldas de las ropas de seda i de lanas finas, i en sus kavesa si tokavan de un tokejos, kosa a ke non si lis pudiera ver ni menos un tchiko kaveo de sus kavesas, ke esto era el mas grande pekado para las mujeres, ejas todas si vistian de feredjes, de ropas finas de seda i de lana, i en sus kavesa kon jachmakes de tokas blankas delgadas, sigun ke lo asian las turkas,

998      Biografia de Hr. Tchelebi Moche A. Arie.     1833

i esto por koando salian a la plasa para i ejas goadrar el Harem, sigun los turkos, solo ke la deferensia era ke koando las mujeres, djudias salian a la plasa mismo enboladas komo las turkas, era ke torna kon todo los turkitos aparte ke las maltratavan, era ke lis arondjavan piedras i pedasos de kanios, i las enmatakavan enteras, i non si podijan akechar i de esto era ke si rekojian de temprano en kasa, ansi era i los ombres ke i a ejos tambien lis asian esto, i ejos tambien si enseravan de temprano en kasa, i en okasion koando tinian el menester de salir de notche kalia ke si rekojeran unos koantas personas i kon sus feneres en sus manos, era ke podian salir i esto kon espanto grande ke los harvavan, los turkos, i si mismo si kechavan en las polisias non avia ken los sintiera, i koando algun turko asia algun mal grande i se akechavan, era solo ke al turko lo akavedavan por otra ves ke non lo isiera,

           En el anio de 5594, li nasio a Tchelebi Jeuda un Ijo, ke de esto si gustaron ke ja van a tener la okasion para pasar el tiempo i ala parida la kama ke li isieron foe de modos i muntchos broslados, porke la vijitavan las hanumes, i todos los djidios seja ombres komo tambien i mujeres todos la vijitaron i todos los parientes li mandaron los platos de modos de dulsuras i presentes seja para la parida komo tambien i para el nasido, i en kada notche tenian konbedados para bever raki i en veses i komijan, i

999      Biografia de Hr. Tchelebi Moche A. Arie.     1834

kantavan, i se alegravan, i en el dia de el BIRKAD MILA, ke foe el SANdak, su papu Hr. Tchelebi lo isieron boda grande ke konbedaron a la sivdad entera i lo jamaron MOCHE, i su madre lo aletcho i lo kudio, lo todo kon la ajuda de todas las mujeres ke eran en kasa, ke si ajudavan de las unas a las otras,

             Hr. Tchelebi en este anio komo el non pudo ir a Kostan por aser algunos empleos de modos de los artikolos ke ejos los vendijan en veses, i esto era ke ejos non tenijan apropiado los artikolos ke los ivan a vender, otro ke era koalo lis paresia de boeno era ke los merkavan i los vendijan a kredit, i en este anio ejos kijeron jevar ropas ala feria de uzundje-ova, i para esto lis kalia ke isieran los empleos mas grandes, i li dio a su ijo Tchelebi Jeuda una suma mas grande de moneda, i ke si foera el a Kostan por aser estos empleos, i el koal partio de Samokov, solo ke non avlaron la manera de los artikolos ke tenia de emplear, ke aparte de la moneda le li djo foe ke li djo tambien i muntchas kartas de kredito ke esto ja tenija ke lo akredetavan mui muntcho en Kostan, i Tchelebi Jeuda ke ja arivo a Kostan foe ke li paresio de boeno de merkar lo todo en artikolos de vidros i tchinis i esto los de las primas koalitas, i todo ropas mui finas i mui karas ke ansi artikolos las venditas son mui pesgadas, ke esto foe porke sigun ke ja lo eskrivi mas antes, ke el las asia traer de viena, ma era a poko i este artikolo ke demanda muntcha i resia enpakadura i las balas ke son muntchas, es ansi ke i el navlo es tambien mui karo, solo

1000      Biografia de Hr. Tchelebi Moche A. Arie.     1834

ke los pagamientos de los navlos era ke si pagavan en la feria i Tchelebi Jeuda ke ja estuvo en la feria esperando las ropas i koando ja arivaron ke el las resento, i esperando a los muchteris foe ke todos los ke li vinian li demandavan delos artikolos bachos i ke foeran baratos ke esto era loke pasava, i ansi foe ke non pudo aser venditas mismas ni para poder pagar las kiras, i koando ja vino a los kavos serka ke ja se iva a serar la feria li kalio ke enpesara a vender, seja a el kapetal i mismo menos de el kosto ke i esto tambien li foe mui foerte, ma apenas entre los amigos, ja lo pudo enkasar para poder pagar las kiras, i de esto ja si kere entedido, los apretos i sikletis ke tuvo, i su Tio H. Refael ke estava tambien en la feria, aparte ke non lo kijo ajudar en nada foe ke li reklamo los 2000 groches ke ja lo tengo eskrito ke buchkava de lo menos de mobilia ke el resivilo de la espartesion de los ermanos i en esto foe mui serioso i li dio grandes apretos, anke lo via ke estava en apreto, i esto foe ke kalio si metieran los amigos i los konvinieron kon ke li dio la una partida en moneda i la otra de estos artikolos, i kon esto foe ke si pagaron en la feria a tiempo ke esto lo podia reklamar en Samokov muntcho mas mijor, i sin ke li diera este karar de apretos i ke lo iso de vergoensa i  koando ja si eskapo la feria i toda la ropa ke li kedo ke non era poka, la enpako de moevo i la expidio partida a filibe i partida a sofia i pasardjik, i lo restan a Samokov, i koando ja arivo enpeso a buchkar de vender i esto li turo longo tiempo i ansi foe ke tuvo

1001      Biografia de Hr. Tchelebi Moche A. Arie.     1834

mui grandes danios, i piedritas, i de esto foe ke si lis apoko mui muntcho sus kapetales, ke esto li kavso tambien a Hr. Tchelebi ke si li renovaron sus hasinuras, i si avija etcho mas nervoso i ke era la pohondria, i por mas mijor tuvo ke en este anio tambien li afeto ke deroko el sigundo apartamento, ande era el midrach, ke esto ja lo eskrivi mas antes sigun de loke era, i iso 4 kamaretas, i una sala en medio, todas grandes i bien klaras, djunto sus kosinas i magasenes, i mas todo el menester por una kasa, i gasto en eja muntcha moneda, i lo todo sigun ke es agora i ke mora oi en eja el S-r. Moche Jshak Arie, i para el Midrach, iso en las kamaretas ke eran afoera, las iso bachas, en tiera, le [ke] la una li servia por Midrach, i la otra si la dio a H. Binjamin Mandil ke moro en eja mui muntchos anios, lo todo sin ke li pagava dinguna kira, otro si lo asijan por plaser, i tambien porke non estuviera sola la kasa, ma H. Binjamin ke ja lo rekonosija esto era ke en veses lis asija i algunos hismetis en kasa,

            Tchelebi jeuda si okupava siempre en la vendita de los vidros, i era mui sikilijado por esto ke li era mui muntcha pena por venderlos, ke era siempre ke estava kamenando por las sivdades ande los avija desbarkado, i tambien ke non los estava presto venderlos, i esto lo todo kon piedritas grandes, i Tchelebi Gavriel era lo mas muntcho ke estava en la kacha, i tambien si okupava de el etcho, de las valutas ke merkavan, i apartava tambien i estas, ke li kaijan en la kacha, ke lo todo las enpakava i las remetija en veses a Kostan

1002      Biografia de Hr. Tchelebi Moche A. Arie.     1834

i en veses a Salonique i sovre lo todo era ke kalija lo metieran al koriente a sus padre Hr. Tchelebi ke por su komando era ke si eskapava lo todo, i Tchelebi Avraam ke era en el estudio era ke lo kontinoava, i iva siempre adelantre, i Hr. Avraam Alkalai, ke lo amava era ke siempre li dava a entender, de todo esto ke estudiavan, ejos en kasa ke eran en los gastes mas aviertos foe en este tiempo ke enpesaron a enmankarlo, i asijan mas foerte la ikonomija, i kon los pasatiempos ke ejos los tenijan de los otros anios en este anio era, kaje nada, i en kasa koando ejos vinijan era ke non avlavan sigun de antes, koanto a el komportamiento ke ejos si komportavan enfrente de los BEGIS. de esto nada non trokaron, ke lo todo era sus komportos sigun de antes, i tambien de esto ke sus etchos non lis kamenavan boenos nada non si davan a konoser ala djente, i entre la djente tambien nada non trokavan,

                       En este anio enpesaron a kartejarson kon sus parientes de Vidin, i de esto ejos enpesaron a buchkar de aser algun negosio en Vidin i ke ja lo asijan i Hr. Tchelebi a esta rason iva i vinija muntchas veses a vidin, lo todo por aser algunas merkansijas, i siempre ja las topava, porke la onor ke tenija era mui grande, i todos lo akredetavan, i kon sumas grandes,

                      En el anio de 5595, ke Hr. Tchelebi estuvo tambien en Vidin, foe ke topo a merkar una suma mas grande de sahtijanes, ke

1003      Biografia de Hr. Tchelebi Moche A. Arie.     1835

lo todo lo merko, a fijado, i el lo todo lo enpako i alos tabakes lis djo bonos por unos siertos tiempos, a pagarles, i el la ropa la mando a Viena a S-r. Leon Adut, porke si la vindiera por su konto, ma siendo ke la merko kon unos presios mui karos, era ke en viena no li pagavan los presios ke li podijan konvenir i de esto foe ke li kalio, ke esperara ma torna kon todo non pudo alkansar el presio ke li podija konvenir i ansi foe ke aparte ke non tuvo dingun provetcho foe ke tuvo i piedrita, i el ke estava en Samokov, era ke li enpesaron a deskaer sus pagamientos, i el ke estava en manko de moneda, i lo iva asiendo ke si iva emprestando, de los amigos i de los Begis i esto el ke ja tenija grande kredito i onor, kon muntchos apretos lo iva akomodando estos pagamientos i tambien a algunos lo prolongava, i esto lo iso mui muntcho, atagantar, ke lo todo era por non avregonsarse i kon esto era ke si goadrava la onor, i de esto es ke si gano la grande enfloensa atodo vija en reposo non estuvo, porke las kosas li foeron viniendo una ensima de la otra, ke tenija tambien ke non pudo eskapar la kasa ke la estava fragoando, sigun ke ja lo saven ke avija derokado el sigundo apartamento, i kerija eskaparla por ke non tenijan lugar ande ke moraran sus Ijos, ke i ejos tenijan familijas i tambien krijaturas, i mas porke non si dichera ke Hr. Tchelebi enpeso a fraguar i non pudo eskapar, i estos apretos ke el non los pudo somportar, i algo ke ja estava nervoso i li pujo la pohendrija, mas muntcho, i por ulvidar el enpeso a bever fin ke si enboratchava, i ansi era ke non salija a la plasa, anke sus Ijos ke ja

1004      Biografia de Hr. Tchelebi Moche A. Arie.     1835

meravan todo loke tenijan ma sigun ditcho, ke kalija por lo todo ke si lo isieron saver a sus padre ke lo respektavan mui muntcho, i todo loke tokavan era ke non estavan pudiendo reuchir, i sus padre non los dechava ke isieran nada, i de esto si les rebivija pleitos, i kontrariedades, entre ejos, i Hr. Tchelebi, ke ja estava lo mas muntcho boratcho, era ke si li iva ande su ermano H. Refael i se akechava muntcho de sus Ijos, ke i H. Refael ke ja lo vija tambien ansi ke iva boratchijando, lo koal ke mas antes non bevija ni menos ke si tenija enboratchado, i el tambien kon muntcho reposo lo akonsejava, siendo ke los etchos ke ja non li estavan kamenando tanto boenos al menos ke non biviera, ma non li ensistava, porke lo respektava,

La Bu. Lea era mui deskurajada, i siempre estava jorando, seja de esto ke lo vija boratcho i tambien ke ivan en kasa i pelijando i non avija reposo, ma Hr. Tchelebi sovre esto la gretava muntcho ke eja ke non merara estas kosas i ke si merara por si i ke demandara todo loke kerija ke el ja la iva a kontentarla en lo todo, i sus noeras ke lo vijan tambien todas estas kosas, ejos eran de enfrente i se estavan mui bien kajadas, i de estas todas kosas era ke Hr. Tchelebi iva endo dija kada dija mas flaka i estava tambien i hasino i el mas non kijo akararse kon dinguno ni menos kijo ke lo vijitara dinguno ni ke kijo resivir a dinguno i de tantos vistidos tanto boenos ke el tenija mas foe ke non kijo vistirse i era siempre ke si vistija de los vistidos los mas viejos, i enmatakados, ke su ojo mas ja non kijo ver nada, i solo ke si iva en veses a el midrach

1005      Biografia de Hr. Tchelebi Moche A. Arie.     1835

ande estava estudiando su Ijo el Tchiko Tchelebi Avraam, i kon el tambien meldava algunos pedasos de la gemara, ke ja si los avija enbesado, porke lo amava muntcho i lo akavidava porke si enbesara a meldar ma non si estava muntcho i se vinija a kasa, i lo todo su tino era en el bever, kon el etcho de la kacha non lo dechavan, mismo ke tenijan tantos males i apretos,

            En el anio de 5596, Hr. Tchelebi topo el molde por eskapar de fragoar la kasa ditcha, i denpoes ke ja la eskapo el tambien i la mobelio, i sus Ijos se pasaron en eja i iso algo de el Hinuh abaid, de uso, i kon el etcho de la kusina era ke si gisava, sigun antes en la kasa de el padre i se ivan todos a komer en una mesa seja en los dijas komo tambien i en las notches, ke esto non lis kijo atchetar, el padre por avrir 2 kusinas, i esto lis era mui pesgado, ma non tenijan koalo aserli, i de esto si lis foe rebiviendo, kaje en lo mas de las notches, pleitos i litigas grandes seja entre los ermanos Tchelebi Jeuda i Tchelebi Gavriel komo tambien i kon sus padre, i lis arivava, los pleitos en estando en la mesa, i lis kalia ke si levantaran de la mesa antes de eskapar de komer, ke esto todo lis kavsava, porke sus etchos non lis estavan kamenando boenos, ma ja tenijan una i boena, ke non lis turava, los enojos mas de ala manijana, i tambien ke lo respektavan muntcho a el padre, i por lo todo ke lis pasava, ja era ulvedado, i muntchas veses lis akarejavan

1006      Biografia de Hr. Tchelebi Moche A. Arie.     1836

los pleitos de parte de las mujeres i de las krijaturas, i de esto era ke si sikilijava mui muntcho Hr. Tchelebi, porke el era solo ke kudijava por la familija entera, era tambien ke si iva mui muntcho apretando i por su ermano H. Refael ke non li estavan tambien indole i sus etchos de el en todo boenos fin ke arivo a ke li kalio, ke vindiera la kasa, ke era tanto boena, ansi de mismo por los Ijos de su ermano Hr. Josef seja kon el H. Merkadutcho komo tambien i kon los Ijos de la Bu. Revka ke son H. Elijatchuno i H. Rabenutcho, ke era solo el ke iva a responder, por todos, i visto ke sus negosios non li estavan kamenando tambien de el en todo boenos, i por ulvedar, era ke si etcho a ir biviendo rakis i vinos i kon esto si enboratchava, ma el de su konsensia non si depidrija, i lo todo lo admenestrava, kon muntcha sensia, solo era ke lo asija hasino i li kavsava, a ke foera endo siempre mui flako, i tambien se li iva pujando la nervosedad i de esto se iso i pohondrali, i a todos los de su kasa lis era esto mui grande siklet, sovre todo ke en lugar de enmankar esto ke iva biviendo foe ke dija kada dija lo iva mas pujando, i tambien ke estava i hasino, i sus IJOS ke asijan todos los medios para non decharle bever, fin ke li ivan a detras de el por ke non biviera, ma el si aravijava i pelejava koando non li davan, ke muntchas veses se li iva ande, su ermano H. Refael, i li rogava porke li diera al menos 50 dramas de raki, i alos presipios ja li foe dando, ma mas tadre ke i el tambien non kijo darle, era ke li tomava por foersa, i a rason ke sus IJOS lo ivan gretandole, el era ke si eskondija, ande

1007      Biografia de Hr. Tchelebi Moche A. Arie.     1836

1. Refael, lo todo siempre por ir biviendo, ke la pohondra li dava en esto, i sus IJOS lo isieron, ke enkomendaron a todos los mejanedjis porke non li dieran, i esto koando lo vido foe ke el enpeso a merkarse lokma-ruhu^[46], kon ke disija ke tenija dolor de tripa, i ke era kon esto ke li pasava la dolor, i a los presipios ja lo kreivan ma mas tadre ke enpesaron a verlo ke el iva biviendo este lokma ruhu-8 redomas enteras, lo vieron ke era en lugar de raki ke lo iva biviendolo i ansi foe ke i de esto tambien lo defendieron, i ansi era ke sus bivir en este tiempo lis foe kon mui grandes defekultades, i non tenijan de el en todo dingun reposo,

Koanto a sus negosios era muntcho en manko ke ejos traivan algo de algunos artikolos, ke era kosa ke los ivan a poder venderlos por los konakis, i algo de saraflik tambien lo asijan ke lo todo muntcho a poko, i anke ke asijan la mas grande ikonomija torna kon todo non lis tapavan los gastes ke ejos ganavan i ansi era ke siempre foeron endo en manko, i non eran libertos sigun antes, ke lo mas los abatija la nervosedad de sus padre, ansi de mismo eran i las mujeres en kasa ke mas non salieron a dingun lugar ni menos ke lis plasija koando lis vinijan alguna djente a vijitarlas, era solo ke si estavan siempre en kasa, i kudijando la kasa i las krijaturas Tchelebi Avraam, ke era en el estudio era ke i el tambien visto a estas todas kosas lo kijo mas non estudijar ma su padre non lo alesensijava, porke saliera a la plasa, i ansi foe ke resto torna en el

1008      Biografia de Hr. Tchelebi Moche A. Arie.     1836

Midrach, i la Bu. Bulisu la ija grande de Tchelebi Jeuda ke era tchika eja sufrija muntcho porke non era bien merada, i tambien ke la maltratavan ma eja kon la pasensija lo todo lo somportava, avija tiempos ke muntchas veses la dechavan jorando kon oras enteras enserada en la kamareta, i siempre jorando i non avija ken ke si apejadara de eja, i eja ke ja si avija enbesado a esto, non tenija ande akecharse, sovre todo ke ja estavan ansi sin keef,

Solo ke esto ja tenijan de boeno ke si goadravan mui muntcho de non darsen a saver a la djente seja a djidios seja a los non djidios, de la manera de sus vida i esta de sus posision i anke ke toda la djente ja lo sentijan ma si goadravan porke de ejos non saliera nada de sus bokas, i ejos sigun ke lis ivan de mas antes a vijitarlos a todos los begis i ansi ande el Usref Pacha, era ke lo asijan tambien i en este tiempo, sin dingun trokamiento,

En el anio de 5597, era de mismo ke Hr. Tchelebi Kontinuava en el bever seja los rakis i vinos i seja tambien koando lo topava el lokma-ruhu. porke i esto li iva asiendo mas grande danio de los otros bevrajes, i porke non biviera el lokma-ruhu. le isieron ke si konvinieron a ke biviera solo el raki kon la kondision ke a mas de a un vasiko en una ves ke non biviera i en esto el ja foe kontente, i sovre esto li dieron el orden a H. Josef levi el mejanedji, ke era en Samokov, para los djidios, ke ja lo saven tambien ke a dingun

1009      Biografia de Hr. Tchelebi Moche A. Arie.     1837

presio en akel tiempo non bivijan seja rakis komo tambien i vinos de las mejanes de los kristijanos, porke era mui grande pekado ke era aparte de nesah era tambien i taref, i ansi era ke non si espantavan ke podija ir en las mejanes de los kirstijanos, porke li diera en kada ves ke si li iva a presentar solo a un vasiko tchiko de raki de el boeno i H. Josef, lo asijan si[n] ke Hr. Tchelebi si estava enfrente de la mejane, i le iva a bever el vasiko, i se salija, i si estava kamenando komo unos 2 puntos i boltava, porke li diera tambien su vasiko, i presto ke si lo bivija tambien se salija, i era de esta manera ke estava kontinuando el dija entero fin ke si enboratchava muntcho i ke mas ja non podija ni kamenar, i esto el mejanetchi ke lo asija, i ke ja lo estava viendolo i tambien ke era porke non biviera, torna kon todo lo iva dandole, ke kale disir seja ke era por el enteres, i non si li enportava, si es ke una persona se iva a besejar^[47] or era ke non li vinija a el tino de estas kosas, i esto koando ja si lo aklararon ja foe tadre, porke mas ni el tambien non kijo bever, ke ja si li kemo la reja,^[48] i ja era mui flako, ke apenas podija i kamenar, i sus Ijos ke lo vijan ansi i ke mas ja non estuvo i biviendo, i pensando ke el non bever tambien non seja ke li arija i algun danio, lo asijan ke li prometijan de ves en koanto por darle algo seja raki or seja vino ma el ja non kijo mas, nada, i de tanto ke el avlava, foe ke i esto tambien lo korto i non avlava, ni ke lo kijo mas ni sintir el avlar, ke li avlaran, i lo asija ke si estava siempre en kasa, i en veses tomava algun livro para meldar ma i esto

1010      Biografia de Hr. Tchelebi Moche A. Arie.     1837

non podija i lo dechava, i se estava solo en una kamareta sin ke lo kijo ke si aserkara dinguno, i esto ke li turo pokos dijas ke mas ja non pudo ni estarse i asentado foe ke si etcho en kama, lo todo porke non tenija la foersa ni de menejarse, i esto sin ke si akechava por nada, ni menos por dinguna dolor, otro ke solo i solo era un grande desforsamiento i un apokamiento, ke tenija, ke sovre esto li trucheron muntchos medikos, i todas las kuras ke si asijan en akejos tiempos todas ja si las isieron ma nada non li aprovetchava, i gastar ke ivan gastando sin merar atras ma de mismo era ke non li ajudava nada, i ansi estuvo sufriendo 4 meses en la kama, i fin ke arivo en un dija de djueves, ke era en el 11, Sivan de este anio de 5597, i entrego su alma a el krujador, sin ke si akecho por nada, i todos sus parientes i amigos lo joraron muntcho tiempo, porke el lo asija a todos muntcho bien, i todos lo rekonosijan, i en sus fonerales li isieron todas las onores meresientes, i todos sus Ijos li goadraron los 7 dijas de limunio, kon ke li vinijan en su kasa en kada dija i meldavan a unos koantos salmes de los Teélim, i unas koantas ojas de la Michna, i tambien muntchas ojas de el zoar, i ansi algunas otras kosas, i desijan kadich i tambien desijan en kasa la tefila de la manijana i estas de la tadre la minha i el arvid lo todo kon minjan, i davan tambien muntcha sedaka en kada dija, i tambien a komer a los Hahamim i a los menesterosos, i en el Kaal asendieron el anio entero una lampa por la alma de el moerto, i siempre ivan a el Kaal por todas las tefilod a disirlas kon minijan i tambien el Kadich

1011      Biografia de Hr. Tchelebi Moche A. Arie.     1837

i en kada tiempo ejos kon las mojeres se ivan a el Bed akevarod, i denpoes ke lo joravan ejos meldavan a unos koantos perakim de la michna, i ansi lo isieron en el mes entero ke non meravan otro etcho i esto lo isieron en esta manera en el mes [anio] entero,

1012                                                    ENERGIA KONSENSIOSA

          Hr. Tchelebi, sigun ke ja meldaron, el foe una persona mui konsensiosa, i su komporto era, komo estos de los mas grandes personajes, el foe siempre fin a los kavos mui muntcho amoroso de toda su familija i estos de los sus serkanos parientes, el amava de mismo el adelantamiento, de la nasion Djudija, ke para esto non li era nada en sus ojos de sakrifikar tiempo i moneda, el anke ke alos kavos si etcho ala boratches, non era en vasio or por depedrerse, a si, otro ke sigun de loke si veé es, solo i solo por abatir sus males, i por ulvedar sus espantos, ke el los tuvo seja en la matansina, de el Mehmed Emin AA. seja i esto de el Hotel koando resto enserado la notche, i mas tambien ke sus negosios, era ke li avijan enpesado a kamenarle kontra, i anke todo esto el de todas sus etchas, mismo en ansi tiempo de nada non troko, i lo todo lo reintchija sigun de mas antes, el foe siempre onorado i mui respektado, de todos seja de djidios i de turkos i de kristijanos, fin a el dija de su moerte, nunka non li mankavan ke li ivan toda la djente a demandarle konsejo i a todos los resivija kon grande onor i kara alegre, el nunka non iso dingun trato ande podija arivar la mas tchika kosa de litiga, el foe tanto kapatche de saver gijar a sus ijos a el sujo karakter, sigun ke adelantre ja lo van a meldar, en todas sus partidas todas sus koaledades, ke de el presipio de koando si espartieron los ermanos ke el ja troko, su negosio, i si anke a los kavos non reuche el ja bivio mui kontente, i siempre alegre, ansi de mismo ke i sus

 

 

1013                                        ENERGIA KONSENSIOSA

vinientes denpoes de el ja foe mui presto ke ejos si levantaron i foeron siempre, adelantre, ke esto tambien ja lo van a meldar adelantre i esto es solo en este linaje, i adetras de loke si veé en esta biografia es ke la Familija Arié foe la tresera ves ke tuvo las katastrofas, i esto en kada komo 40 anios, ke es la primera ke foe en viena i la sigunda en Vidin i na ke i la tresera, en Samokov, i esto en todos los 4 ermanos ke estuvieron en Samokov, solo ke en esto mi paresi disir, ke en el Linaje de Hr. Tchelebi, es loke si veé, el presto solivantamiento, en atinando, ke fin a este tiempo, seja los otros tres Linajes i seja tambien, estos de Vidin, restan ainda sin tener la vintura, de adelantarsen sigun de loke lo kale, i esto por koalo ke seja ansi, en siendo todos, de una sangre, i de un saverisio, i poede ser mas muntcho entelejantes, ke aparte de el masal, no serija, i algo ala natura? es ke kada uno, ke lo poeda apartar, i jo mi parese disir, ke serija poede ser, porke todos estos, si foeron adetras de lo pronto, i resivir sus pagas para lavorar, por konto de el otro, i de esto non poede ser, ke poeda aver, adelantamiento, ke es un pan kortado, lo koal koando es por su konto lavorar, ja poede aver la esperansa, de profetar,.

1014

Asta aki si eskapa, la partida de Hr, Tchelebi Mocha A. Arie, enpesando, de el anio, 5588, fin a el anio de 5597, ke murio, de una edad, de 52, anios,