צ'לבי יהודה, גבריאל ואברהם מ. אריה כשהיו שותפים

1015

De aki i endelantre si enpesa, la partida de los 2 ermanos Tchelebi Jeuda i Gavriel M. Arie, enpesando de el mismo anio ke murio sus padre, i adelantre, sigun de la manera ke si enkamenaron ja lo van a meldar por kada, uno aparte,.

1016                             Biografia de Tchelebi Jeuda i Gavriel M. Arie.                               1837

            5597, Ejos los 2 ermanos, Tchelebi Jeuda i Gavriel, ke fin a un grado, ja si konortaron de la moerte de sus padre, i ke ja kortaron tambien i el mes de el limunio, de prima sus ditchision foe, de merarsen un bilanso, por saversin rijir por el avenir, i ansi por poder, lavorar, en algun negosio, a rason ke los gastes en el tiempo ke estuvo hasino sus padre lis foeron grandes muntcho mas ariva de esto ke ejos lo podijan aserlo, i ansi foe ke sin tadrar ejos rekojeron sus eskrituras, i esto de ropas ke posidavan i ke lo todo ja lo isieron mui presto, i loke toparon foe solo una suma de 10,000 groches ke lis kedava por toda sus furtunas, aparte de la kasa de 2 apartamentos ke ejos moravan en eja, i un tchair, kon 4 pedasos de tarlas, i Tchelebi Avraam, non tomo parte en este bilanso porke el estava, en el midrach, estudiando, kon Hr, Avraam Alkalai, ke foe en este anio ke tomo la Semaha (depluma ) de ahaham achalem, i ejos los 2 eramanos ke lo ataron i lo afirmaron el bilanso, foeron de el presipio mui sekilijados, ma non si deskorajaron i a dinguno non lo isieron saver sus position, otro ke ejos de mismo sin dingun trokamiento, si enkamenaron en lo todo sigun de en el tiempo de sus padre,

           Apenas ke ejos eskaparon de rekojer sus eskrituras i afirmar sus bilanso, i tambien ke ja kortaron el mes, de sus padre, foe ke si enpeso a sintirse ke entre los Turkos de Samokov, se ivan muriendo de la epidimija de la magefa ke es la (peste) i en Sofia ja estava esta maladia de mas antes, solo ke en Samokov non avija, ke de esto foeron todos mui muntcho espantados, ke non savijan koalo

1017                                   Biografia de Tchelebi Jeuda i Gavriel M. Arie.                                1837

aser, porke en akejos tiempos los Turkos non davan kredito, ke en ansi epidimijas, ke son apegaderas, ke isieran karantinas, era ejos ke disijan por koando alguno si morija era (edjeli geldi^[60]) ke es ke li vino la ora de morir, i ejos sin tadrar, lo isieron ke foeron i alkelaron el un apartamento de el tchiflik, de de unos siertos turkos de Samokov, ke eran Ahmed aga Hadji Ibich oglu, i de ali aga kara kires ke lo enpatronavan en el kampo de kalkovo,(el koal kara kires, era, un voivoda^[61], jatak or kavesera de una banda de ladrones, i morava serka de las poertas de la sivdad, i en akel tiempo la sivdad de samokov, era arodejada de unas ondas kavaduras, (endekis,) i tenija poertas para entrar ala sivdad de 2 partes, i las tadres las seravan, de parte la polisija, i ala manijana las avrijan, kon el amaneser i  mientres las notches non si podija entrar en la sivdad, i el ditcho  kara kires, ke su kasa, era serka de las poertas, ke para goadrarlos en okasion a su banda de los ladrones, lo iso ke se iso kavar un lagum adebacho la tiera, kon ke foe mui bien lavorado i en mui sikreto i por la notche los resivija en su kasa i ala manijana los mandava, sin ke dinguno los viera, i de esta manera iva lavorando i soidejando alos pasantes i tornantes, sin ke si dieron en mano longo tiempo, i mas tadre ke foeron buchkando, por saver sus sikretos, arason ke estuvieron asiendo muntchos danios, i las poertas ke mas ja non las seraron, porke esta seradura turo fin a el anio de 5625, i en este tiempo tambien lo mataron a kara kires, kon plomo de vija la polisia i foe denpoes de su moerte ke pudieron deskuvrir, el ditcho lagum, ke

1018                                   Biografia de Tchelebi Jeuda i Gavriel M. Arie.                                1837

tenija una largura de komo 300 metros, i era ke una persona etchada podija arastarse, i esto avista lo taparon, i lo derokaron, komo tambien i la kasa, i lo decharon kampo vasio, sin ke dinguno lo podia enpatronarlo,) i sigun ditcho kon el alkelamiento de el ditcho tchiflik, ejos mandaron sus menesteres seja en mobilija i seja tambien i de todos los otros menesteres por sus bivir, i en el 14 tamus de este anio partieron i ejos kon sus familias, adjuntandose tambien i H. Refael sus tio, kon toda su familia, i tambien H. Behoratche Avdala kon su familia ke es la Bu. Rachel sus tija, i estuvieran todos djuntos en el ditcho apartamento, ke en el sigundo apartamento, ke avija en este tchiflik, lo alkelaron H. Presiado Koen, kon H. Chemoelatche el Chichko, i otras familias, i eran kada uno aparte ke si governavan, koanto alas kasas i botikas de Samokov, lis eran todas seradas, i siempre si estava en el tchiflik, sin ke dinguno de ejos venija ni una ves a Samokov,

            I por el menester de sus komanijas i otros era por lo todo ke Hr. Avraam Alkalai, ke si las emlejava, i se las jevava, i lo asijan ke koando, si aserkava de el tchiflik, era ke lo safumavan mui bien a Hr. Avraam Alkalai, i tambien todas las kosas ke lis jevava, i denpoes ke ja pasavan de safumerio komo unas 2 oras, era ke las tomavan las kosas i tambien lo resivijan a Hr. Avraam ande ejos, i el era ke lis kontava todas las kosas ke pasavan en la sivdad mientres los dijas ke non vinija,

            sus maneras de bivir en este Tchiflik foe kon algo de

1019                                   Biografia de Tchelebi Jeuda i Gavriel M. Arie.                                1837

estretchura en todos los puntos, i entre ejos lis pasava, muntchas deferentes kistiones, ke sos kosas ke non si poeden eskrivir, ma ja era ke las somportavan, ejos estuvieron ansi 4 meses goadrandosen i sufriendo maneras de kosas, i grasias ke ke non arivaron en dingun modo de apreto, ni menos dingun kavso de moerte,

              i siendo ke de ejos depindija el governamiento, de la komunita de Samokov, foe ke antes ke partieran por irsen a el tchiflik, si rekojeron ejos djunto todos los notavles de la sivdad, en el Midrach lugar ke si asijan las reuniones por el reglamiento de la sivdad, por reglar tambien seja el etcho de la komonita komo tambien sovre esto de la epidemija de la magefa ke si en kavso si podija mas espanderse, i de sujo es ke kada uno iba a buchkar seja de foirse or de goadrarse i en kavso de algun moerto podija ser ke non uviera ken ke lo rijera i tambien ke lo enterara, i todas las familias ke avijan en Samokov, en este tiempo eran todo 75, i ansi foe ke nomenaron, Rohesim i kabari, i Chamasim, i de ejos lis nombraron semanada, por esto ke devijan de kudijar i tambien ke non podijan salir de la sivdad, i eran los ke lis pagavan a Hostemli^[62], a H, Chemoel Baruh, i a H, Koen i a 2 Chamachim, ke todos los kavsos de moerte, ke uvo en Samokov entre los djidios foe, de 18, ke murieron de esto,

           I mas tadre ke ja non uvo mas i ke ja era entrada de envierno i tambien ke ja foeron mui kansos de estarsen arastando por los kampos, i dechando kada uno sus kasas i botikas, i sovre todo ke los gastos tambien lis eran grandes, si enpesaron a rekojersen i venirsen kada uno a su kasa i butika, ke alos presipios lis foe espanto

1020 [1021]^[63]                       Biografia de Tchelebi Jeuda i Gavriel M. Arié.                          1837

 grande ma mas tadre ejos ja si resentaron i estuvieron mui boenos, i enpesaron kada uno a buchkar sus lavoro,

Este ditcho tchiflik denpoes de unos koantos anios, se deperdio se depedrio enteramente, i resto un kampo vasio ni sikera bastante grande, i ejos lo merkaron en Hevra kon Rachid Bei, ke era Rudichta^[64], ke salia muntcho metal de fiero, i la lavoravan para sus fabrikas, ke salija partidas grandes, i agora ke esto eskriviendo la dita lo enpatrona S-r, Chemoelatche Jeuda Arié i toma de el de 30 a 40 karos de paja en kada anio,

           En el anio de 5598, los 2 ermanos, Tchelebi Jeuda, i Gavriel kon todas sus familias, i Tchelebi Avraam ke kontinuava, de mismo sus estudios, kon Hr, Avraam Alkalai, i sus madre la Bu Lea ke ja si boltaron de el tchiflik, i se resentaron en sus kazas ke moravan de mismo i antes en el tiempo de sus padre, ke es los 2 ermanos Tchelebi Jeuda, kon Tchelebi Gavriel, si pasaron en el sigundo apartamento ke foe moevo fragoado, i la Bu. Lea kon su Ijo el Tchiko el Tchelebi Avraam, foeron en el apartamento ke ja moravan i de antes, i todas las reglas, de sus bivir foeron de mismo, sigun ke en el tiempo de sus padre, i la kosina foe tambien en la kasa de la Bu. Lea i de mismo se ivan todos a komer, en su kasa sin ke uvieron dingunos trokamientos, i ejos ke salieron a la plasa, para enpesar a buchkar de lavorar, en koalo foesa, visto sigun ditcho ke sus furtuna ke lis

1021 [1020]               Biografia de Tchelebi Jeuda i Gavriel Arie.                               1838

avija kedado de sus padre afoera ke ja era mui tchika, foe ke i esto tambien ja lo gastaron en la ida ke si foeron por rason de la magefa, ke ja si kere entendido en koala position arivaron, kijendo disir ke foeron enteramente vasios, i ejos torna kon todo los 2 ermanos, non pidrieron el kuraje, i entre las muntchas platikas ke ejos las asijan, sovre el sujo avenir, foe ke ejos si detchisaron por ke si foera Tchelebi Gavriel, a Sofia, i ke li rogara a su esfoegro, H. Presijado Tatcher, a ke li diera algunas kartas de kredito, por algunos de sus komisioneros, de Viena, porke H. Presijado era uno de los mas grandes, merkaderes de Sofia, ke el koal sin en nada refosarle ni menos dingunas defekultades, ni algunas kundisiones, foe ke li djo unos koantas kartas, i todas eskritas porke lo akredetaran sin limeto, ke de esto li djo las grasijas, menesterosas i se vino djunto kon las kartas a samokov, i ja el kere entendido el gusto i la alegrija ke ejos la tuvieron, kon la entesion, de merkar ropas, i venderlas en groso, lo todo por mas presto, i esto ejos si prontaron en pokos dijas, i partio Tchelebi Gavriel por viena, i el vijaje, ke lo asijan todo a kavajo, i se ivan vija de nich, a Belogrado, i aleksensa, i semlin, buda-pechta, i kon karusa era ke si iva a ir a viena, i esto todo li turava el vijaje komo un mes, porke goadrava karantinas en todas las granisas, (konfines) i apenas ke ja arivo en viena, sin tadrarse el si adereso ande todos los komisioneres ke lis jevo las kartas de kredito, i todos lo resivieron kon boenas karas, en disiendole ke isiera sus empleos de la suma ke lo kerla ke ejos ja, estan prontos para responder, ke de esto tambien si gusto muntcho, i

1022                                     Biografia de Tchelebi Jeuda i Gavriel M. Arie.                              1838

sin tadrar, el iso sus empleos, a detras de la nota ke ja si jevo de Samokov, i algunos tambien artikolos ke a el li parisio de boeno, ke lo todo de los artikolos ke eran los mas pasavles en Samokov, i la suma ke merko, foe, de 100,000, groches, el ke ja foe tanto kontente i kon esto, se vino a Samokov, mui kontente, i pasando poko tiempo ke ja li arivaron i las ropas, ejos isieron sus boenas venditas i kon una ganansija de 25%, ke lo mijor foe ke presto las vindieron i en kurto tiempo tambien isieron sus enkasos, en boena regla si[sin] ke tuvieron dingunas defekultades ni menos ditinimientos,

            En este anio, ke Tchelebi Avraam, estava de mismo kontinuando sus estudios, en el midrach, i siendo ke sus etchos, ja lis foeron boenos, foe ke los 2 ermanos Tchelebi Jeuda i Tchelebi Gavriel si detchesaron de kasarlo a sus ermano el tchiko, kon la Bu. Bulisu Simha, la IJA grande de Tchelebi Jeuda, i esto kon ke kedaron de akordo los 2 ermanos mas grandes, ke Tchelebi Avraam tambien tenija de tomar parte, en todos los etchos ke ejos lavorara, anke ke estava estudiando, i kon el gaste de la boda, ke lo tenijan de aserlo de enmedio, i de esto todo ke si lo isieron saver a Tchelebi Avraam, por ke foera kon su kontentes, foe de akordo, a todas sus proposisiones i sovre ejo, es ke enpesaron a prontarsen todos los menesteres por la boda, i esto en poko tiempo ejos ke ja estuvieron prontos, isieron la boda kon mui muntcho saltanat, i tuvieron a muntchos kombedados de otras sivdades, i entre los kombedados uvieron tambien i 10 de los mas grandes Rabanim de akel tiempo, ke eran de Sofia, i de Dubnisa,

1023                      Biografia de Tchelebi Jeuda Gavriel i Avraam M. Arie.               1838

i Kiostendil, i Pasardjik, i todos kon sus bonetas i biniches, i sapatos kon las mestas, i estuvieron todos los 8 dijas de la boda, en todos los dijas i en las notches, siempre alegrandosen i kantando i en estos dijas sos [los] ermanos non avrieron butika ni menos ke meravan dingun etcho, era ke en kada notche, ke tenijan mesas jenas de kombedados, i todos sus parientes, seja los ombres komo tambien i las mujeres mismo i las krejaturas, eran todos siempre en la kasa de la boda, i entre los dijas era ke kada dija vijitavan todas las mujeres i a todas las adulsavan kon mudos de konfiturias, i kahves, i tchibukes i ejas kantavan i bailavan, i se alegravan sovre todo ke koando ja avija bodas en la kasa de los Aries, sigun ke ja lo tengo eskrito, ke si gustavan todos seja ombres komo tambien i mujeres, i a ejos no si lis enporto por el grande gaste ke isieron en tal de alegrarsen, i la novia ke ja trucho 500 groches de kontado i muntcha achugar, i la novija ke ja era i foe siempre boena, i mui alegre, i nekotchera i mui jakichiklija, ke a eja li venija todo aserlo de su mano, eja foe siempre arta de lo todo, i por nada non si enselava, eja savija mui boeno kantar, i su bos era mui alta i ermosa, eja savija i konosija, la ikonomija, su natura era de eser bien a todos, eja era liberala, i esto ke lo tenija en el korason era i en la boka, ke nada non enkuvrija, i lo todo era ala klara, eja non si sotometija a dinguno, porke non si espantava de dinguno, i se savija defenderse, kon muntcha onor, i ansi era ke todos la amavan i la respektavan mui muntcho, su padre la amava mas de muntcho, i non li refusava, en nada

1024                            Biografia de Tchelebi Jeuda Gavriel i Avraam M. Arie.                       1838

por todo esto ke li demandava, siempre bivieron kon su marido, mui aunados en todos las puntos, a eja li dieron todos los parientes, i los amigos muntchos presentes, de besas manos^[65], seja en dukados komo tambien i de otras kosas, de mismo i a el novio, i denpoes ke eskaparon la boda, i ke ja mandaron a todos los kombedados, endosen mui kontentes i alegres, i ke ja pagaron a todos los sirvidores, i las sirvideras, mui bien pagados, seja en moneda komo tambien i en ropas, ansi tambien i a los tchalgedjis, reposaron unos koantos dijas, i denpoes tchelebi Avraam kon la kontentes de sus ermanos i su madre si foe tambien i en este anio a el midrach por ainda kontinuar algo sus estudios, i ejos las 2 ermanos ke ja si foeron a sus negosio, era la Bu. Lea jena de la alegrija, i governava la kasa i a todas sus 3 noeras, en restando de mismo sigun antes, la Bu. Lea kon Tchelebi Avraam, i la Bu. Bulisu en la kasa ke estavan i de antes, i los 2 ermanos de mismo en la kasa ke estavan tambien i de antes, i kon la kosina non trokaron tambien nada, i lo asijan lo todo sigun de antes, ke torna si gisava, ande la Bu. Lea i se komija todos en una mesa, sigun ke i de mas antes,

            Todas las vijitas ke lis asijan, seja los parientes, i seja tambien i otra djente, i de mismo i koando lis vinijan el kolel entero a vijitarlos en los primeros dijas de Sukod i de Pesah i esto tumbien era ke lis venijan en la kasa de la Bu. Lea, de mismo era i las mujeres, en general lo todo era en la kasa de la Bu. Lea ke si rekojijan, para lo todo, i era de esta manera ke las respektavan

1025                          Biografia de Tchelebi Jeuda Gavriel i Avraam M. Arie.                         1838

a sus parientes, i por esto kale disir ke tenijan todo lo boeno, anke ke en el tiempo de agora, es al kontrario, en lo mas de la mansevirija, kon disirles ke sus parientes ja son viejos ke los unos li disen ke ja abasta bivio, i los otros lis disen ke si vaiga en kasa i ke si etche a durmir, porke non lis ase onor a ejos ke si diga ke tienen un padre or una madre vieja,

Denpoes ke ja si eskapo la boda, i ke ejos ja kalia ke partieran de moevo a Viena por aser sus empleos, foe ke tchelebi Gavriel se iso la nota, de esto ke li kalia ke emplejara, i se pronto tambien i la moneda, (ke el prontamiento de la moneda era ke todo loke rekojijan seja en oro komo tambien i en plata, era ke lo deritijan seja el oro komo tambien i la plata, i lo asijan en kioltches, por rason ke las monedas ke serkulijavan en Turkija, non eran valavles en la austrija), i koando ja arivavan en aleksensia, serbija, i tambien semlin ke en todos los 2 lugares goadravan a 3 dijas de karantina, i en sus estar en la karantina de Semlin ja lis vinija sus bankero ke era el S-r. Mathe Ruso, i lis merkava las piesas de oro i de plata, ke ejos tenijan, i les dava minsas, ke es la moneda ke sirkolijava en la austrija, i el ditcho S-r, Ruso en el tiempo ke ejos goadravan la karantina, era ke los vijitava kada dija i muntchas veses lis traiva i kosa de komer, i komijan djuntos, i koando ja salijan de la karantina i ke estavan un dija 2 fin a topar el molde por partir adelantre, era ke S-r. Ruso si los jevava en su kasa i komijan i dormijan tambien en su kasa, fin ke partijan adelantre, i ansi

1026                         Biografia de Tchelebi Jeuda Gavriel i Avraam M. Arie.                          1838

lo asija en kada ves ke ivan, i Tchelebi Gavriel denpoes de unos koantos dijas ke el ja arivava a viena era ke non si tadrava, or merava en algunos sus plaseres, otro ke devista era sovre el etcho i mui presto buchkava, de eskapar, por vinirse, i merar de adelantar, ke en este vijaje el iso los empleos 2 veses mas grande ke de la primera ves, i en arivandoles la ropa a Samokov, i ke era la suma mas grande, i en Samokov ke non la podijan venderla tanto presto ejos lo isieron ke mandaron partida de eja a filibe i partida a Pasardjik ke en estos lugares si asijan ferijas, i de mismo las vindieron kon su boen presio i esto tambien i presto, i ansi eran mui kontentes i mui gustosos, i tambien lavoravan kon todas sus foersas,

              Usref Pacha ke era el governador de Samokov era ke los protejava mui muntcho, i ejos siempre lo vijitavan i li traivan i algunos presentes de viena, ke lo mas muntcho era tchelebi Jeuda ke lo vijitava, i era tambien ke lo asentava i li dava tchibuk i kahve ke esto era una onor mui grande para akel tiempo,

En el anio de 5599 le [li] nasio a Tchelebi Jeuda un IJO, i lo Jamaron Josef David ke es este el S-r, Davidtchonatche, i sigun ke ja estavan mui gustosos, i alegres de sus etchos ke lis kamenavan adelantre, foe ansi ke en todos los 8 dijas ke la parida estuvo en la kama lo isieron boda grande, i non kere ditcho ke en el dija de el birkad mila lo isieron fiesta grande kon ke kombedaron ala sivdad

1027                         Biografia de Tchelebi Jeuda Gavriel i Avraam M. Arie.                          1839

entera seja alos ombres komo tambien i a las mujeres, i komieron todos, kon kantes i bailes, i se kontentaron, i se alegraron, ke eran de esta manera ke si pasavan i bivijan kontentes, era su propia madre ke lo aletchava i lo kudijava, sin enfastijarse,.

Ejos era tambien i en este anio ke kontinuaron sigun de los otros anios, ke komijan todos en la kasa de sus madre la Bu. Lea, i non si antcharon en el gaste, ejos tambien goadraron la ikonomija, ke toda la suma ke ejos gastavan por el menester de sus mantinimiento, era de 3000 groches, en el anio, a tiempo ke ke koando bivija sus padre, el gaste ke gastavan era ariva de 10,000 groches, i aun kon todo ke ejos lo asijan kon esta tchika suma ke era grande la deferensija, ma torna kon todo ejos non si asijan demostrar, ande la djente, i a los ojos de el mundo, si demostravan lo todo sigun de mas antes, ke foe i esto tambien i una de las rasones, de los sujos adelantamientos, i de esta manera ejos kontinuaron unos koantos anios, sin kansarsen i kon la grande union ke los ermanos la tuvieron, i esta de todos los ke eran en kasa, i era ke lo pasavan i bivijan mui, alegres i mui kontentes,

Tchelebi Gavriel de este tiempo i endelantre, mas ja non lo topo de djusto por ir a Viena, otro ke ja li foe muntcho mas, mijor el ir solo a pechta, ke en este lugar en akel tiempo si asijan 4 ferias en el anio i el las iva a frekontar todas las 4, ke de mismo ja si topavan todas las ropas i los komisioneres i bankeres de Viena, ande ejos tenijan sus kreditos, i kon esto ejos era ke podijan i

1028                         Biografia de Tchelebi Jeuda Gavriel i Avraam M. Arie.                          1839

avrir tambien i un magasen por vender ansi ropas tambien i en Filibe, i esto ke ja lo toparon de mas djusto foe ke partio Tchelebi Gavriel torna por ir solo a pechta, kon ke si jevo en esta ves mas grande suma de moneda i esto kon ke si enprestaron de sus amigos, i de los begis, i de Sofia ke ja se ivan muntchos de los merkaderes djidios ke ja avijan foe ke si adjuntaron todos i en una partieron, i sigun ditcho mas antes ke ejos goadravan las karantinas, en aleksensa i semlin, i ke sus bankero el S-r, Mathe Ruso, ke los protejava i les trokava, sus moneda, por la moneda pasavle en pechta, foe i en esta ves tambien lo mismo, i estuvieron tambien en su kasa komo musafires, i Tchelebi Gavriel ke estava tambien, era ke lo asija ke koando se iva a salir de la kasa, el lis dava presentes en moneda a los servidores de la kasa, i esto li era a el S-r. Ruso mui grande onor i plaser, lo koal ke los otros sus musafires los Sofijalis non lo asijan esto, i ansi era ke a Tchelebi Gavriel lo vija mui klaro ke lo protejava i lo ajudava mas muntcho de los otros, i ejos ke ja estuvieron en la feria, de Pechta, lo isieron sus empleos, kada uno sigun de su posibelidad, ansi de mismo i Tchelebi Gavriel lo iso ke merko al presipio las ropas ke si merkaban a kredit, i denpoes estas ke eran por kontante, lo todo fin a ando tuvo moneda, i a toda vija los empleos ke asija Tchelebi Gavriel eran muntcho mas tchikos de estos ke los Sofijalis los asijan, i serka komo a la seradura de la feria, era ke Tchelebi Gavriel lo vija ke avijan de merkar muntchos modos de artikolos ke si estavan vindiendo mui baratos, i siendo ke el ja

1029                         Biografia de Tchelebi Jeuda Gavriel i Avraam M. Arie.                          1839

non tuvo mas moneda, era ke estava merando sigun ke los Sofijales siempre los merkavan, porke ejos ja tenijan muntcho mas de Tchelebi Gavriel, el si pensava, si mismo, eskrivija a Samokov a su ermano porke topara el molde de koala suma foesa, non podija ser porke aparte ke ja era tadre, era ke non avija tambien los telegrafos, i pochtas i otros kolailikes para aserlo esto, ansi foe ke sovre esto lo tuvo mui muntcho a pensar, komo lo podija aser, por aremedijarse de algun lugar alguna suma de moneda por poder i el tambien merkar de los artikolos ke si li vijan tanto baratos, ke astrevirse a dinguno si espantava por el refuso i kon esto era ke si goadravan muntcho la onor, lo iso ke si enpeso a kamenarse al borde de la urija de la tuna en asiendo las promenatas kon los mil penserios, i en esta promenata foe ke lo enkontro el S-r. Ruso i le demanda, koalo es la rason en el tiempo de ferija aser promenatas,? ala ora Tchelebi Gavriel li dise ke ja tiene muntcha rason de ansi una demanda ma el es ke non tenija mas moneda, por emplejar, ke ja ai muntchos artikolos ma es esto ke li mankava, i si le kerija aserli plaser, ke li enprestara la suma foesa kon ke li pagava sus enteresos, i ke ja tenija konto de pagar porke los artikolos ja estavan mui konvenivle, i ala ora el S-r. Ruso sigun ke estavan en la plasa keto su portmone, de su petcho, i li dicho deteneldos boeno porke avija muntcho aire i ke non se bolen a la tuna, i li konto 10, bankonotos de a 1000 florinos, i le demando abasta? i Tchelebi Gaviel aparte de todas las grasijas ke el li djo, li dicho tambien ke ja es i muntcho, i devista si foe a

1030                         Biografia de Tchelebi Jeuda Gavriel i Avraam M. Arie.                          1839

la plasa de la ferija, i si merko muntcho mas baratas ropas de el presipio, i ansi de esto tambien ja si keri entendido, el gusto ke tuvo, de este ultimo empleo, i denpoes ke ja expidio toda su ropa ke el la empleo, se vino a Samokov mui kontente, i pasando unos koantos dijas el partio por Filibe para alkelarse magasen, i mas tadre ke ja li  enpesaron i arevar las ropas, ejos asijan las venditas seja en samokov komo tambien i en Filibe, lo todo en mui boena regula i kon la mas grande deretchedad,

            En el magasen ke lo avrieron en Filibe, foe Tchelebi Gavriel ke estuvo, i el era ke asija todas las venditas, i era solo ke lavorava, sin ke foera ajudado de otro, dinguno, el ja konosija todas las reglas de la merkansija, savija tambien jevar mui bien la korespondensija, sus livros de la merkansija ke el propio los jevava eran mui klaros, i su eskritura era limpia, i ermosa i klara, el era mui muntcho akurat para el etcho, a el non li plasija muntcho el pasatiempo, era en uno de los hanes ke tenija su kamareta, i el mismo en veses si prontava, algo de komanija por su mantinimiento, i esto koando lo podija porke non tenija punto en la komida, el asija grande ikonomija,

           Aki lis kontare, solo una de las sus ikonomijas, ke el las iso mientres su vida ke bivio en el tiempo de su estar en Filibe, sigun ke a todos ja es savido ke persona de etcho non tiene ni li sovra el tiempo por prontarse komanija, seja por los dijas komo tambien i por las notches, i ansi djente ke ja non tienen los mas

1031                         Biografia de Tchelebi Jeuda Gavriel i Avraam M. Arie.                          1839

muntchos dingunos puntos en las komidos, era i el tambien uno de ejos, i la ora ke ja iva a komer, lo asija ke se iva a el bakal ke li era mas serka i se merkava, kosas saladas komo aseitunas i ansi otras kosas, i en la una ves ke el merko por 10, paras de aseitunas, i ke li plasija saver, los presios de todo modo de artikolo, foe ke li demando a el bakal, a ke li dichera, sovre koantos groches la oka era ke li estava pesandole, i el bakal li dicho ke era sovre a 6 groches la oka ma si era ke li merkava una oka en una ves el li darija a 4 groches la oka, i Tchelebi Gavriel kalkulandose ke la deferensija ja era de a 2 groches por oka, ke esto non li foe poko, lo iso ke si merko una oka entera, por ganar los 2 groches, i li foe por kondutcho ke komio de esta oka, de aseitunas 40 dijas i 40 notches, sin ke trokava en algun dija su kondutcho, solo era ke en los dijas de los Chabatiod, lo kombedavan en algunas de las kasas de los notavles de Filibe, i komija en sus kasas, i el restan de los dijas, era siempre en su kamareta de el han, sin dingun trokamiento, era ansi sus ikonomijas, i kon muntcha pasensija era ke i la somportavan, atiempo ke el ja podija gastar, ke su etcho ja li foe siempre mui adelantre, ma non lis venija a el tino, ni desejava a komer de las komidas, ke li podijan ser savrosas para su paladar, enfrentante de la ikonomija, i aki tambien lis kontare igoal a esto por las ikonomijas ke ejos las asijan tambien i en kasa, mismo sus ikonomijas ma torna kon todo delas reglas de el kebarlik, atras non las dechavan anke ke era, a poko, ejos en kada mesa denpoes ke ja eskapavan de komer lis kalija

1032                         Biografia de Tchelebi Jeuda Gavriel i Avraam M. Arie.                          1839

ke komieran tambien i alguna fruta, i koando era ke komijan mansanas, por la fruta, era ke metijan solo 3 mansanas, i era Tchelebi Gavriel ke las mandava [mundava], i las espartija a un koarto a kada uno i esto lo asija konto, ke lis iva a dar a todos los de la mesa a un tersio, i siendo ke mankava un koarto era ke los korasones, li kedavan para Tchelebi Gavriel, i en una ves seja por pasar la ora or seja por verdad, foe ke li dieron kechas ke los korasones komo eran para el ke los estava dechandolos mas grandes, para komer el mas muntcho de esta frota, i esto lis kavso a tener apuntamientos, seja kon su ermano komo tambien i kon la djente de kasa, i de este tiempo ejos tuvieron los korasones mas jelados, ma torna ejos lavoravan en el etcho kon muntcho ahadud, i union,

              Visto a estas tanto grandes ikonomijas, es de demandar por koalo era ke eran fin a este grado, a tiempo ke non lo tenijan por ande aserlo lo koal ke agora ke lo bemos, en okasion de ansi jevadores de etcho en otras sivdades, vemos ke si toman kasas i mosas i gesanderas, i mismo ke estan solos ejos sin sus familias, ke altramente lo disen ke si hasinejan, komo non serija bien mantenido, i si mismo non ternan dingun konto tambien, lo asen, i non pensan por adelantre, seja por ejos komo tambien i por sus vinientes denpoes de el, i esto non lo podemos jamar egoismo, porke sus IJOS, non los sienten a sus padres, lo koal por esto serija ke non buchkan por denpoes de el, i en akel tiempo komo eran rekonosientes a los komandos de sus padres i los sentijan sus avlas era i ejos tambien ke buchkavan

1033                         Biografia de Tchelebi Jeuda Gavriel i Avraam M. Arie.                          1839

el adelantamiento de sus vinientes detras de ejos, sigun ke i ejos tambien lo toparon, i ansi tambien decharlo,

               Tchelebi Avraam, mismo ke kontinuava la echkola era el tambien ke asija todos los empleos por el menester, de todo para la kasa, i lo todo lo eskrivija, i lis dava la nota a sus ermanos, de esto ke gastava, i S-r, Behoratche ke era mas tchiko era ke kontinuava el Talmud Tora, i la Bu. Lea, kon sus noeras siempre aunadas i kudijavan por la kasa i sus krijaturas, i la Bu. Buliso ke era resin kasada, eja era siempre kantando, i asiendo sus plaseres kon sus amigas ke li vinijan en kasa, i djugavan, .

                En el anio de 5600, ke fin a este tiempo ke la firma ke javavan era Gavriel Arié, seja por rason ke esto ultimo es ke lo asija todos los empleos or seja ke el foe ke tomo de su esfoegro, el kredito, i todos lo konosijan solo a el, i en este anio ke ejos ja si avijan boeno enresijado en sus etchos foe ke Tchelebi Jeuda su ermano lo kijo ke por endelantre lis foera la firma Jeuda i Gavriel Arié i Tchelebi Gavriel sovre ke ja lo kijo ansi su ermano, el non foe kontrario, i li dicho ke ja era de akordo, porke non era persona ke li plasija grandesas, ni menos, ke tenija, algunos penserios kontrarios, ke a toda vija haverim eran todos los 3 ermanos, solo ke esto li kalio ke si los isiera saver a sus todos komisioneres i kreditores por ke seja tambien i kon las sujas kontentes, i la repoesta de todos

1034                         Biografia de Tchelebi Jeuda Gavriel i Avraam M. Arie.                          1840

foe ke non eran de akordo, i ansi foe ke mas non lo isieron kistion i kontinuavan kon la misma firma, i Tchelebi Gavriel frekontava en todas las 4 ferijas de Pecha [pechta], i asija los empleos, lo todo solo al sujo nombre, i Tchelebi Jeuda, era en Samokov, okupandose de todo esto ke era el menester, i tambien ke ejos tenijan i la kacha de el governo sigun ke ja lo saven i non la decharon nunka, i siempre foeron ejos los kacheros, porke tenijan grandes ganansias, i sovre todo tambien i ke si prevalijan, en muntchas okasiones, i por detener esto ejos kalija ke siempre los foeran vijitando a los begis i los personajes mas grandes, sovre todo a el Usref Pacha, ke ja era al presipio i ke de el dependija lo todo, i saversen bien komportar ke ja si savijan era ke si asijan sus kerensias, i lo mas muntcho era el Tchelebi Jeuda ke los vijitava, i en sus platikas ke tenijan era ke muntchas veses le komandavan porke lis isiera traer, de Viena i pechta algunas ropas komo mobilias, samaras, i algunas ropas de vistimientas i siendo ke non lis podija romper, en nada, era ke si las asija traer, ma si algunas non lis agradava, era ke si las dechavan por su konto sin ke lo asijan konto ke si podija i en muntchas i pedrer, i ejos ke mismo lis venija pesgado, non lis avlava nada, ke lo asijan i buchkavan a venderlas esto ke lo podijan i esto ke non lo podijan si las traivan en sus kasas, ke de estas mobilias fin agora ke esto eskriviendo la dita Biografia ainda tengo jo en kasa una mesa de avrir i serarse, ke es mui kaavi, i S-r, Refaelatche tiene 6 sijas i ande S-r. Behoratche tienen unos kanabes, i en los IJOS de Tchelebi

1035                         Biografia de Tchelebi Jeuda Gavriel i Avraam M. Arie.                          1840

Jeuda tienen i oi un ibrik i legen de plata lo todo de este ditcho tiempo, i aparte ke ja avijan otras mobilijas i samaras, i ropas ke todas ja foeron koalas rovadas en el tiempo de la Gera Turka-Rusa, i koalas estroidas, por non saver sus valor,

Ejos ke non lis abastava solo el magasen de Filibe ke ja lo enkamenavan ejos, lo isieron tambien Haver, i a H. Ishak Garte por ke avriera i otro magasen i esto era kon la entision si era ke li kamenava sigun el sujos para en un dija decharlo ejos a filibe, i esto kon ke pasara ainda unos koantos anios, i ejos li ordenavan todas las ropas, lo todo al adreso de el H. Ishak, i el era ke jevava konto aparte seja de las venditas komo tambien i todo el menester de las eskrituras, por ansi un magasen, el asija grandes konsumasiones de ropas, i tenija tambien i grandes ganansias, porke H. Ishak era una persona mui amable i mui bonatcho, i tambien ke todo su negosio era kon la mui grande deretchedad, i otra persona en Filibe de konfiensa, kaje ke non avija, ejos kontinuaron esta Hevra unos koantos anios, i se topavan mui bien kontentes, i eran tambien mui aunados de todas las 2 partes, i mas tadre ke ja salio tambien i su Ijo S-r. Mochonatche, a la plasa, foe ke lo enpeso a enbrojarlo, a su padre, i ansi foe ke i los etchos tambien non li foeron tanto boenos, fin a ke arivaron en el grado ke kalija ke si espartieran, ke i esto tambien lo isieron presto, sigun ke lo asijan siempre ke koando lo vijan ke mas ja non podija kamenar koal etcho foesa era ke non lo dechavan para mas tadre, ansi foe i aki tambien ke si lo konvinieron

1036                         Biografia de Tchelebi Jeuda Gavriel i Avraam M. Arie.                          1840

kon ke li decharon toda la ropa a H. Ishak Garte, i por la suma ke lis kedo a dever, lo isieron los pagamientos en unas koantas ratas terminis^[66], kon ke li tomaron los bonos menesterosos, i los kontratos ke tenijan los anolaron i mas todo el menester, i ansi foe ke los primeros pagamientos ja los iva asiendolos en mas regla ma koando ja vino alos kavos lis asia algunos defekoltades ma tambien pagava, solo ke koando ja arivo el pagamiento de alkavo ke era una suma de 20,000 groches, su Ijo S-r, Mochonatche, non dechava pagarlos anke ke su padre los kerija pagar, i sus posision era de lo mijor ke podija ser ma era ke si los kerija komerselos, i en sus magasen ejos tenijan grande partida de su ropas, i en este tiempo ke ejos tuvieron mui grande partida de ropas de kolonijal, i ke non las estavan tanto presto venderlas en Filibe, ejos si las jevaron a la feria de Usundje ova, por venderlas, i Tchelebi Jeuda ke ja estava tambien en esta ferija i el kon sus ropas, mismo ke iso todos los moldes por poderli kovrar, ma non lo pudo porke la devda era de H. Ishak Garte i la ropa ke tenija en la feria figurava al nombre de S-r. Mochonatche, foe ke li rogo a H. Davitchon B. Ishak el topal de Sofia, porke li merkarara, esta suma de ropas de S-r. Mochonatche Gerte kon ke si lo konvinieron ke al kavo de la feria, koando li iva a dar los bonos ke si lo iva a serkostirjar, i H. Davitchon ke ja estava de akordo lo iso esto ke merko por la ditcha suma, i presto la enpako i la expidio, i koando ja vino, por darle los bonos Tchelebi Jeuda li metio el sirkoestro ke foe males grandes, ma Tchelebi jeuda non atchetava en nada i salio el etcho a la polisija, ke nomenaron komision de merkaderes,

1037                         Biografia de Tchelebi Jeuda Gavriel i Avraam M. Arie.                          1840

i la koala lo topo por deretcho a ke si resiva el sirkoestro, i ansi foe ke li podo kovrar, i el ditcho S-r. Mochonatche, estos 20,000 groches, en el anio de 5628, ke Jo Tchelebi estava en Filibe, i tenija kon mi esta suma de moneda, ke la avija rekavdado en akeja tadre de los nalbures^[67] de Filibe, i los tenija en una bolsa ke era todo en oro i siendo ke ala manijana foe Chabad, es ke mi jamo a su kasa, i jo ke mi foe i ala notche de alhad, ke jo ja me durmo foe ke mi la rovo i denpoes de aser todos los pasos menestarosos foe ke non podi asele nada i se kedo kon eja para siempre,.

A rason de algunas deferensias ke tuvieron en kasa entre las mujeres, foe ke tchelebi jeuda, non kijo mas komer en una mesa ke se ivan todos ande la madre, a komer, i el si avrio en la kasa ke moravan djuntos kon Tchelebi Gavriel, kosina aparte, i komija tambien aparte i solo kon su familia, kon ke el gaste lo gastavan de una bolsa, i Tchelebi Gavriel kon su familia se ivan i komijan en la mesa djunto kon su madre i Tchelebi Avraam ke ja estava en la kasa kon la madre era ke komijan todos djuntos, seja los dias komo tambien i las notches, i S-r. Behoratche ijo de Tchelebi Gavriel, i la Bu. Reinu ija de Tchelebi Jeuda, todos los 2 durmijan en la kamareta de sus Vava la Bu. Lea, ke era eja ke los kudiava, i en las notches, denpoes ke eskapava Tchelebi Gavriel de komer i ke si vinia a su kasa por durmir, li demandava Tchelebi Jeuda, loke topach tanto de avlar i areir, porke ejos si kedavan tadre, i estavan kantando, i ariendo i avlando mil modos de sus

1038                         Biografia de Tchelebi Jeuda Gavriel i Avraam M. Arie.                          1840

pasatiempos, lo koal ke Tchelebi Jeuda ke era solo, lo esperava, porke non podijan dechar las poertas aviertas,

            En este tiempo ke Sultan Mahmud korto el bechlik i el metalik, i siendo ke non tenija kaje nada de valor, ke el poevlo non estuvo kontente, arason ke en la moneda ke sirkoliava antes era de una djusta valor sigun ke ja meldaron ke los merkaderes ke se ivan en otros estados por sus empleos, lo asian ke la deritian toda moneda seja el oro komo tambien i la plata, i esto por koalo era solo porke tenia so[su] valor djusta i ansi era ke lis konvenia a diritirla porke non tenijan, dinguna piedrita, ke siendo li kalio a el governo de aser serkoliar el bechlik, i el poevlo ke marmorio lo iso ke kon ferman la abandono toda la moneda de antes, i ke era solo el bechlik ke podia serkoliar, i por rekojer la moneda de antes i darles el bechlik en su lugar, lis djo el deretcho a unos ermenis, djunto kon un sierto djidio S-r. Menache, i esto kon ferman kon ke lis nombro los presios de kada piesa de moneda, i era solo ejos ke la podijan rekojer, sin ke tenija dinguno otro este deretcho i esta kompania, mando sus personas en todas las sivdades, de la Turkia, i la ivan rekojendo, kon ke la kortavan kada piesa de moneda en 4 pedasos i la mandavan a la sarap-hane de Kostan (lugar ande si korta la moneda,) i de esto las ganansias eran mui grandes i la djente de akel tiempo los mas muntchos ke tenian los ojos mas serados, era ke dinguno non echpikolijava, ke si espantavan, i a Samokov tambien ke mandaron ansi personal, i Tchelebi Jeuda i

1039                         Biografia de Tchelebi Jeuda Gavriel i Avraam M. Arie.                          1840

Gavriel ke ja estavan en la kacha de el Guverno lo isieron kon disirle ke mismo ke tiene ferman va aser ke i ejos tambien van a rekojer por konto de el governo, i esto ke al presipio non kijo atchetar a foersa de su ferman, ma ejos non lo sentian, i enpesaron en las operasiones, sovre esto ke si eskrivio a Kostan era ejos ke si defindian, tambien, kon sus foersa de el Usref Pacha, i alos kavos foe ke si lo konvinieron, i eran ejos ke asijan todos los trokamientos, ke de esto tambien eran las ganansias bastante grandes

A rason de este negosio foe ke lo ketaron a Tchelebi Avraam de el midrach, ke estudiava, i lo metieron en la kacha para ke isiera estas operasiones, i el ke ja foe savio, i entelejente i konosia tambien al fondo todos los kontos, ansi foe ke en mui kurto tiempo el ja estuvo pronto por lo todo i respondia, tambien seja en el etcho de la kacha komo i este de las merkidas de las valutas ke non era poko,

I Tchelebi Jeuda era ke si okupava de los respondimientos, de sus otros etchos de samokov, ke tenian ropas, saraflikes, i korespondiensas, seja por Kostan i otros i seja tambien i por el ajeno, i tambien li kalia ke siempre los vijitara a todos los Begis sovre todo al usref Pacha, sigun ditcho ke era de ejos ke si le enkamenavan todos sus etchos, i a rason ke era solo el ke lo enkamenava lo todo de Samokov foe ke lo konosian todos a el i koando se iva a demandar kosa era en boka de todos, Hodja Judatche, i de esto si nombrava solo, seja Tchelebi Jeuda, seja Hodja Judatche, i el ke

1040                         Biografia de Tchelebi Jeuda Gavriel i Avraam M. Arie.                          1840

ja era una persona de grande bives, i mui serbes, i ke sin kansar se kamenava i alkansava i eskapava por lo todo, foe ke toda la djente lo onoravan i lo respektavan, i avlar ke ja savia boeno, ke konosia tambien mui bien la lingua turka, i komportarse kon kada uno sigun de loke lo meresia ke ja lo savia, era ansi ke de todo loke asia en nada atras vasio non boltava,

              I Tchelebi Gavriel era lo mas muntcho ke si okupava de el magasen de Filibe, i el era ke asia los empleos i las komandas de las ropas i el las vendia, i el korespondeava por lo todo sovre el etcho de las ropas seja de el magasen de Filibe komo tambien i de Samokov, i de mismo kon los kovramientos i respondimientos,

            En el anio de 5601, por alguna rason foe ke Tchelebi Gavriel non pudo ir a Pechta por aser los empleos menesterosos de sus artikolos de ropas seja por el magasen de filibe komo tambien i por Samokov, i ansi foe ke si foe Tchelebi Jeuda, i de mismo la suma ke pudieron rekojer de moneda sigun de antes la iso deritir en kiultches, ma non era una suma bastante, i partio djuntos kon H. Chelomo Koen i H. Eliserutcho Kujumdji oglo ke los koalos tambien se ivan, i el viaje lo isieron de mismo, sigun ke lo asia Tchelebi Gavriel, i de mismo goadraron todas las karantinas, i el S-r. Mate Ruso, los vijito en Semo, en la karantina i se los jevo tambien en su kasa, i Tchelebi Jeuda komo era mui sefkiar^[68], i mui djembuchli^[69]

1041                         Biografia de Tchelebi Jeuda Gavriel i Avraam M. Arie.                          1841

i savia tambien i mui boeno kantar, i era ke lis kantava sea en la karantina komo tambien i koando estava las notches en la kasa de el S-r. Mathe Ruso, i a S-r. Mathe Ruso komo tambien i a sus mujeres ke ja las plasia el kante turko, porke i ejos eran de serka moevos vinidos de la turkia, ke eran de la sivdad kastoria (makedonia)^[70] i era ke si gustavan i se alegravan muntcho, i li porfijavan porke restara ainda unas koantas notches en sus kasa, i a Tchelebi Jeuda ke ja li plasia mui muntcho el pasatiempo, kon djimbuches, lo asia ke restava un dia mas muntcho, lo koal ke sus kompanieros ke non si pudijan apartar, era ke si li araviavan muntcho ma a el non si li enportava de esto, i de esto tambien era mui agradisido, asta el grado ke non si lo ulvedaron akeos dias fin a el anio de 5613, ke estuvo S-r. Behoratch-Jshak G. Arié, en Vienna, i ke estava tambien i en sus kasas, i se lo kontavan komo de boeno kantavan, i se alegravan, i le desian si es ke i agora kantava tambien en Samokov, i koando, ja ivan a partir por sus viaje adelantre, i sigun eskrito ke lis dechavan presentes por los servidores de la kasa, foe ke Tchelebi Jeuda lis decho 25 sfansikes^[71] de presente, ke esto era muntcho, i S-r. Russo ke lo supo li kijo retornarle los 20 sfansikes ma tchelebi Jeuda non si los resivio, en disiendole, sigun de loke mos gostimos mosotros, es boeno ke si gusten tambien i los servidores, i de la avla dulse ke tenia era ke lo keria muntcho el S-r. Russo i lo ajudava, en todo loke li demandava, i koanto a sus kompanieros ke eran mui travados, lis decharon para los sirvidores a 2

1042                         Biografia de Tchelebi Jeuda Gavriel i Avraam M. Arie.                          1841

sfansikes a kada uno, i gustosos i kontentes partian por sus viaje, i kon arivar en la feria ejos ja enpesavan aser sus empleos,

                         i sigun ditcho ke Tchelebi Jeuda non si avija jevado bastante de moneda, enfrentante a la suma ke si jevaron sus kompanieros, i siendo ansi foe ke Tchelebi Jeuda ja eskapo mas presto de aser sus empleos por rason ke ja non li avija kedado paras, i komo kalija ke los esperara a sus kompanieros, era ke estava en vasio, fin ke i ejos eskapavan porke ejos tenijan muntcho mas de moneda i ansi era ke siempre ivan empleando, fin a el grado ke li disijan ke a ejos lis iva i asovrar moneda, i siende ansi foe ke Tchelebi Jeuda lis demando porke li enprestaran alguna suma por poder i el tambien aser, algo mas de algunos empleos, ma non li dieron nada, ke esto lo isieron por entender si era verdad ke non tenija moneda, ke a rason de esta lingoaje, ande si li kijeron alavarsen, or bien ke ja tenijan i non li kijeron darle, ke ja era kontra de sus enteresos, i Tchelebi Jeuda ke kerija tambien i merkar, lo iso ke li foe i si ande, S-r. Ruso, i li dicho ke moneda non li kedo por eskapar de aser sus empleos, i sigun ke li tenija dado a su ermano Tchelebi Gavriel, los 10,000 florenos, ke li diera tambien i a el i djunto sus enteresos, ke este siguro, ke ja si los pagan, i el S-r. Ruso ke ja lo kerija bien i tambien ke ja los entendio komo de personas eran lo iso ke li djo tambien i a el de mismo 10,000 florinos, i Tchelebi Jeuda, mui gustoso, enpeso de moevo por aser los empleos, ke sus kompanieros eran mui maravejados de verlo kon moneda, i buchkavan muntcho para saverlo de ande, es ke la tomo

1043                         Biografia de Tchelebi Jeuda Gavriel i Avraam M. Arie.                          1841

ma esto era mui lechos para ke lo podieran saverlo, porke Tchelebi Jeuda ja si savija governar, enfrente, de koal unke persuna, i ansi era ke non lo podijan alkansar a saverlo i de esto tambien si li enselavan mui muntcho, ke a el non si li enportava, i se komportava siempre komo ke non la entendija,

              Foe en este anio ke el Usref Pacha, foe nomenado, por komandante de la kale de Belogrado, ke era ke el governo turko, la goadrava, kon su armada ke tenija, i era solo en la kale ke komandava el Turko, ke el restan de la Serbija entera, ja era governada de los Sirbos, ke el Turko non si mleskava en nada de lo restan de la kale, i el Pacha komo non tenija a dingun konosido en tierra ajenas, i sigun savidos ke estos Pachas kalija ke tuvieran tambien, i sus bankero por en kavso menesteroso de moneda, i tambien i por algunas i otras kosas, foe ke lo jamo a Tchelebi Jeuda i li dicho porke li diera alguna karta de rekomendasion por alguno de sus konosidos en Belogrado, i en mismo tiempo ke li sirviera i por bankero, i Tchelebi Jeuda ke esto en Belogrado non tenija a dingun konosido, foe ke li dicho ke en Belogrado non tiene por rason ke nos avijan en akel tiempo Djidios, poderosos, i tambien ke i el non konosija, es ke li djo una karta por el S-r. Russo, de Zemlin, en disiendole ke Zemlin Ja era enfrente de Belogrado, i era ke este S-r. lo podija servir, en todo esto ke li podija demandar, i el Pacha, ke ja si kontento a esto es ke li djo, la karta por S-r. Matatia Russo, de Zemlim, asiendole saver, la grandesa de el Pacha i en mismo tiempo li eskrivio

1044                         Biografia de Tchelebi Jeuda Gavriel i Avraam M. Arie.                          1841

por todos los plaseres i protejos ke los proteja a ejos, sovre ejo li rogo porke si en kavso por la mas tchika kosa ke si li aderesara porke lo reintchera i kon esto era ke podija tener ainda mas muntcha onor i protejo, seja ejos komo tambien i por el mismo i aparte si en kavso ke li demandarija la suma ke foesa de moneda, ke li diera sin dingun refuso, or penserio ke por lo todo ja sos ejos garantes, i kon esto lo iva aser devdor para siempre, i el Pacha ke ja partio de Samokov kon toda su soeta, i arivando a Belogrado i denpoes, ke ja si resento, i ke ja paso komo un mes de tiempo, es ke li vino a el tino por la karta de rekomendasion ke avija tomado de Tchelebi Jeuda i por aser la prova ke el S-r. Mathe Russo, la iva a rekonoser, lo iso ke lo mando a su kethuda^[72], ke era Suleman efendi meras jedi, kon adjuntando a la karta de rekomendasion i una karta suja djunto i un bono de 100,000 groches endevdandose el pacha por pagarselos dopo de i ^[31] dija, ke li iso saver ke si li asijan de primura, i si era posivle ke si los enprestara kon pagarle sus enteresos, i ke si los entregara a el portador su Suleman efende, i este ultimo ke foe a zemlin i ke si li adereso a S-r. Ruso, en dandole las kartas, i el S-r. Ruso, si lo jevo en su kasa en akeja notche, i komieron djuntos i durmio tambien en su kasa i ala maniana le ato en hasnes los 100.000 groches lo todo de sfansikes ke ja era moneda pasavle i en Belogrado, i lo mando, en eskriviendole a el Pacha porke resiviera la suma ke la demando i por endelantre seja por moneda or seja por koal unke kosa, ke si li podra aser menester, a ke si li aderesara ande el ke el ja

1045                         Biografia de Tchelebi Jeuda Gavriel i Avraam M. Arie.                          1841

estava pronto para servirlo en todos sus komandos, i ke Tchelebi Jeuda i sus ermanos ke li son mui konosidos, i ke sos tambien personas de grandes konfiensa, i el Pacha ke resivio ansi karta i tambien la moneda, i el Suleman efende ke ja li konto todas las onores ke li iso dode [dado] foe ke si gusto mui muntcho, i avista li eskrivio el pacha de su propia mano una karta a Tchelebi Jeuda en rengrasijandole por la karta ke li djo ke ja li iso efeto, ke esto non si lo kreiva el Pacha, ke la karta de Tchelebi Jeuda li iva a eskapar este kasar de etcho i de este tiempo i endelantre los enpeso a merarlos kon mas mijor ojos, anke ke estava en Belogrado ma i en Samokov se reintchijan lo mas de los etchos por su komando, i deskaendo los 31 dia, el Pacha lo mando de moevo a el Soleman Efendi, kon las mismas hasnes, ke kontenijan los 100,000 groches, i sigun de lo ke las avija enpekado el S-r. Russo, porke el Pacha non tenija el menester de moneda, i sigun ditcho ke lo iso solo por prova, i sigun de loke estavan si las mando i aparte li djo tambien a el Soleman Efendi porke li pagara los enteresos, i kon una karta de rengrasiamiento, de parte de el Pacha, para S-r. Russo, ke en arivando el Soleman Efendi, i ke li djo la karta i viendo ke eran las mismas hasnes, sigun de loke el las avija enpakado, i ke kijendole darle tambien i los enteresos, foe ke li dicho ke el non resive, entereso por una moneda ke non foe de eja aprovetchada, i ansi foe ke i non si los resivio, i el Soleman Efendi, si las retorno a el Pacha i en kontandole tambien, de todo el lingoaje ke ejos tuvieron, i de esto tambien lo entendido a el S-r.

1046                         Biografia de Tchelebi Jeuda Gavriel i Avraam M. Arie.                          1841

Russo komo de persona merkader i deretcho, ke era, ke i esto tambien si lo iso saver kon karta a tchelebi jeuda, i el Pacha si gustava muntcho de ansi kosas, sigun ke los turkos lo tienen muntcho a Haram el tomar rebid, entereso, i lis es mui grande pekado,

Ejos a detras de sus merkansias de las ropas ke vendijan era ke siempre estavan viajando en los lugares ke avijan ferias i en esto tiempo ke i en Pasardjik tambien era feria i Tchelebi Jeuda ke si foe en esta feria de Pasardjik i ke tenija su oda en el Han ke eran todos los otros merkaderes, kon sus ropas, foe en un dija ke lo siente, gritar i muntcho pelear, en el Han, i Tchelebi Jeuda ke ja era kurioso, de ansi kosas, i por saver, koalo serijan estos pleitos si metio delantre de su poerta de su magasen, i estuvo sintiendo ke el S-r. Arabetian, ermeni, grande banker, i merkader de Pasardjik, ke lo estava maltratandolo, kon palavras mui fejas^[73], a el Keahja, de Mahmud Bei, Kavanos oglo, ke este ultimo era un miembro de la Familia ke eran dekorados kon el titolo de Beg-tach^[74], ke son de los dere begler^[75] de los hajanes de la Vlahija, en el tiempo ke era Turkija, i era tambien mui onorado de el Sultan, i tenian grande enfloensa, i el koal era una persona mui foerte, i mui kroel ke non si li enportava de matar a la persona si era ke non si li aparava de dentre [delantre] koando el iva a pasar, i toda la ravia de el S-r. Arabetijan ke el koal tambien era mui konsiderado i non si espantava, foe por ke li devija 50,000 groches, i ke non si los estava pagandeselos, i denpoes ke ja si apartaron, ke el keahja foe mui vergonsado, i non kere ditcho ke si

1047                         Biografia de Tchelebi Jeuda Gavriel i Avraam M. Arie.                          1841

lo konto lo todo a el Mahmud Bei, ma era ke li goadrava el gares por en okasion, pagarselo i avengarse,

I Tchelebi Jeuda ke ja kerija tener, el konosimiento kon el Mahmud Bei, lo penso ke era esta la okasion, porke el Mahmud Bei era en mismo tiempo tambien i el governador de Pasardjik, i ejos komo tenijan etcho kon las kachas, i para arivar en esto de tomar, i la kacha de Pasartchik, ke de esto era ke ejos tenijan mui grandes ganansias, lo iso ke lo jamo a el S-r. Arabetijan a su butika, i le dicho ke lo vide ke ti araviates por los 50,000 groches ke non ti los esta pagando el Mahmud Bei, ke si lo keres i si es ke mi ases algun rebato es ke ja ti los poedo jo kontartelos, i el S-r. Arabetijan kon la ravia ke estava i sin pensarlo porke era el ke tenija la kacha, foe ke li atcheto, i li iso un rebato i denpoes ke isieron todos los pasos menesterosos, li konto la moneda, i el Mahmud Bei mui kontente de este paso, lo iso ke mas a el S-r, Arabetian mas non lo aserko i el etcho de la kacha lo paso todo a Tchelebi Jeuda, i el era ke la resivija, i pasardjik ke ja era i su okolija grande i frotchegosa, ande avija muntcho etcho de modos de las valutas era ke lo estuvieron exploatando, kon muntchas ganansias,

Sus komportos de la kasa era de mismo i sigun de antes, i de este tiempo i endelantre foe ke S-r. Behoratche enpeso a merkar, todos los menesteres de la kasa, porke Tchelebi Avraam, ja no tenija mas el tiempo, de okoparse en esto, porke era el ke estava en la kacha de Samokov, i tambien ke respondija i a los otros etcho,

1048                         Biografia de Tchelebi Jeuda Gavriel i Avraam M. Arie.                          1841

koando mankavan sus ermanos de Samokov,

I la Bu. Bulisu ke non si okopava, fin a este tiempo en dinguno de los etchos de la kasa ke es mi S-ra madre, i mui  alegre ke ja era, todo su penserio era en pasatiempo, i la jamava a Bulisu de Salomo (moni) ke era sus visina i se tomavan los panderos, i estavan siempre kantando i bailando, i denpoes si li adjuntavan a eja todas las mujeres de kasa i las vasinas, i ansi lo pasavan, lo mas muntcho de los dijas de la semana,.

En el anio de 5602, ke Usref Pacha sigun ke ja lo saven ke era el komandante de la kale de Belogrado, i los Sirbos ke ja tenijan siempre deferensias, i geras kon los turkos, porke ejos, lo kerijan enpatronarsen tambien i de la kale, i ansi era ke ejos los Sirbos en la mas tchika deferensija ja lo asijan de una pulga a un gamejo, i siempre si akechavan a las potensias, i ande el Sultan i kon las muntchas notas ke mandavan, era ke i las potensias, si akechavan ande el Sultan, i este ultimo komo era siempre sotometido a ejos, lo asijan ke nomenavan komisiones, para djusgar las deferensias i para esto li kalija i de parte la Turkija ke uviera un delegado, i ke djusgaran i ke podieran meter fin a un grado una fin,

I en una de estas deferensias, ke el Sultan nomeno a Fetih Ahmed Pacha, por ansi mision, i ke kalija ke viniera a Belogrado, i el ditcho Pacha ke lo iso su Vijaje vija de la Madjarija, li

1049                         Biografia de Tchelebi Jeuda Gavriel i Avraam M. Arie.                          1842

li  eskrivio de mas antes, a el Usref Pacha, komo ke era el komandande la kale de Belogrado, porke viniera a semlen i ke li aparejara, seja koartir komo tambien i komania i esto en lugar, ke non foera de kristijanos, porke ejos si goadravan mui muntcho de el etcho de poerko, ke non lo komen, i ke el ja tenija de abachar a semlin i ke tenijan de platekar tambien sovre, la kistion, i kon 2 dijas de antes ke iva arivar, el Fetih Ahmed Pacha, a semlin, el Usref Pacha de Belogrado ja partio por semlin i jevandose kon el todo el menester de la komanija ansi tambien i algo de mobilia i koviertas, por durmir, ke ejos los Turkos lis era grande pekado, de durmir tambien i kon las kuviertas de los kristijanos, porke si enkonavan, i buchkando ansi koartir ke podija ser pertenesiente, para el Pacha, ke non topo por ke non avija turkos en Semlin, foe ke li vino a el tino de aderesarse ande el s-r. Math Russo, ke ja era djidio, i ke esto ja si podija, foe ke lo iso i se li adereso a S-r. Russo en kontandole ke iva a tener ansi un musafir, i ke sus leés non los alesensia a ke esten en kasas de kristijanos, i se es ke podija ser, ke lo resiviera en su kasa, i ke el ja tiene toda la komanija i mas todo el menester, era solo el lokal ke kerija ke foera en su kasa i ke el ja li tenija de pagar, koando era su valor, i era solo por durmir, i en adjuntandole i asiendole saver, ke era el el Usref, Pacha, ke li tuvo mandado la karta de rekomendasion de Hodja Jeudatche, i es ami ke mi enprestates los 100,000 groches, ala ora li dicho el S-r. Russo, a el Usref Pacha, vengach en la boena ora seja vos komo tambien i voestro onorado

1050                         Biografia de Tchelebi Jeuda Gavriel i Avraam M. Arie.                          1842

musafir, i li dicho ansi jo so mui ventoroso, de resivir ansi musafires, en mi kasa, i la kasa mija, es entera dechada a voestra desposision, i seja jo komo tambien i toda la djente de mi kasa, estamos a voestra desposision, i a los voestros komandos, i vos rogo ke vos servach de eja propio komo voestra kasa, i todo gaste ke ternech, es jo ke lo vo a gastar, i de agora vos rogo ke mi digach, todo akejo ke es menester, sin nada mankar, para prontarmelo, de mas antes, i el Usref Pacha, sintiendo i viendo sus dulses avlas, foe mui gustoso i se lo rengrasio mui muntcho,

              I koando ja arivo el Fetih Pacha, a semlin, lo resivio el Usref Pacha en la kasa, de el S-r. Math. Russo, i non keri ditcho ke ja li isieron todas las onores ke lo merisija, i el S-r. Russo tambien kon toda su djente de sus kasa eran sirviendolos, i prontandoles, a todos los 2 Pachas, todo esto ke era el menester, i lo todo a sujo gaste, i ejos eran tambien kontentes, i entre las konversasiones ke las tenijan los 2 Pachas, li demando el Fetih Pacha a el Usref Pacha, komo vino a ser ke en kurto tiempo ja ti ganates, tantos amigos sovre todo en Semlin ke es tiera ajena, de esto ja mi estas plasiendo tambien, i ala ora li dicho el Usref Pacha, ke jo koando vini de Samokov mi sevdad a Belogrado, li tomi una karta de rekomendasion, de un sierto Djidio, ke el jama Hodja Jeudatche, el koal es un merkader, mui grande, i es una persona mui boena, i mui savida, i es tambien mui riko, i mui onorado, i mui afamado, su nombre es konosido kaje por el mundo entero, i bive en mi sevdad, Samokov, i li konto

1051                         Biografia de Tchelebi Jeuda Gavriel i Avraam M. Arie.                          1842

tambien i el paso de los 100,000 groches, ke esto ja lo meldaron mas antes, sigun de loke lis paso, es ansi i a rason de akeja karta, ke mi astrevi, i le demandi lugar en su kasa, i estamos aki i todo el gaste lo esta gastando por su konto ke non mi kijo resivir, a ke jo gastara nada, i su nombre es, S-r. Matatia Russo, ke i el koal es tambien moestro sudito turko, i ala ora li dicho el Fetih Pacha, ke mi esto mui muntcho gustando, sovre ke ja tenemos mosotros ansi suditos, onorados en moestra tiera, i sovre todo en Samokov,.

i denpoes ke el Fetih Pacha ja estuvo en Semlin i belogrado, i la ora ke ja ivan a partir, ke el ja avija eskapado so mision, li dieron a el S-r. Russo todos los 2 Pachas las mil grasias, i li dicheron ke li foeron mui rekonosientes de todas las onores ke lis iso, i en mismo tiempo li kijeron tambien i pagarle, ke ja si entiende komo de paga iva a ser, ma el s-r. Russo, katigorikamente lis refuso i non lis resivio nada, i el mismo los akompanio a todos los 2 fin Belogrado, ke i sovre esto tambien si lo rengrasiaron,

Sigun ditcho mas antes, ke el Usref Pacha, por lo mas de algunos pasajes, ke li podijan ser enteresantes a Tchelebi Jeuda era ke siempre ja si lo asija saver, kon kartas ke li eskrivia, ma de este pasaje, ke lis paso en Semlin kon el Fetih Pacha, non li iso saver nada i ansi foe tambien ke i non savija nada, lo koal ke li era lo mas enportante,

            Mas tadre ke el Usref Pacha foe nomenado, por governador de el departamento (vilaet) de la BOSNA SARAI, i se vino a Samokov

1052                         Biografia de Tchelebi Jeuda Gavriel i Avraam M. Arie.                          1842

kon mui grande saltanat, ke si trucho kon si 70 kavajos kargados de moneda de oro i plata i de djojas, valotosas, i aparte muntchos modos de bienes, de mobilias, i otras kosas, ke lo todo li kamenavan adelantre de el, i el era kon los atis^[76] i paitones de modos, i ansi tambien i aparte por sus haremis, i denpoes ke ja estuvo unos koantos dias en Samokov, i se pronto todos los menesteres i los personales, ke era ke kalia ke tuviera kon si i Basirjan ke es merkader por abasteserli el menester de las ropas ke las podija tener menester seja para si komo tambien i para sus haremis, i todo su personal, i aparte li kalia ke tuviera i su banker, por abasteserli tambien i la moneda en okasion ke si li podija aserli menester, i sovre estas 2 misiones ke si lo dicho a Tchelebi Jeuda, foe ke por el Basirjan ke ja li era H. Refael anke ke non lo podija servir, porke non tenija ni las ropas ni menos, el poder, para merkarlas, ma ja si li foe kon el i aparte si foe tambien i H. Bohor el kujumdji, ke i el koal ja li era su merkader denpoes de la kaida de H. Refael, i koanto por bankero lo mando Tchelebi Jeuda i a H, Avramatche, el Ijo de H. Refael mismo sin moneda, porke el Pacha ja li iva a topar, los moldes, por moneda, i a el Pacha, parisiendole ke si le iva a ir alguno de ejos es ke foe algo ravioso, ma ejos non si podijan ir a dingun presio por ke sus okopasiones eran mui grandes i a dingun persio, dinguno de ejos non lo podijan akompaniar, i era ke H. Refael kon su Ijo li reintchian, fin a un grado, an fin a un grado^[77] estas misiones solo ke non eran tanto bien vistos, i era mui poko loke li sirvijan i ke el Pacha

1053                         Biografia de Tchelebi Jeuda Gavriel i Avraam M. Arie.                          1842

tambien en algunas kosas ja los asia ganar, ke non li foe a H. Refael tanto provetchoso la ida de la bosna,

Ejos todos los 3 ermanos kontinuando en sus etchos i kamenandoles lo todo mui adelantre, i ejos frekontando en todas las ferias, seja para merkar las ropas komo tambien i para vender porke era tambien ke vendian muntcho i a kredit, ke abachavan a las ferias de usundje-ova, i otras, muntchos merkaderes de la Bosna, Echkodra, Janina, i de la Vlahia i ansi i de otros logares lechanos, de la Turkia, i a muntchos de estos ke ja lis eran konosidos, anke de lugares lechanos tambien lis davan ropas a kredit, i entre ejos eran tambien i S-r. Ilel, i S-r. Halfon, ke son agora en Paris i Bukarest, Bankeres grandes, i en akeos tiempos, era ke lis empleavan i lis davan ropas a kredit, ke i oi ainda ai eskrito en un bilanso, ke S-r. Avraam Halfon, de Bukarest, devi 90 groches, i sea sovre S-r. Ilel komo tambien i sovre S-r. Halfon, ja tengo de kontar mas adelantre, un linguaje ke tiene pasado, kon Tchelebi Jeuda, koando estuvo en Bukarest, en el anio de 5615,

Los kreditos ke ejos los tenian seja en Kostan komo tambien i en Wienna, i otros lugares eran extraordenarios grandes i sin limeto, i ansi era ke si podian antchar en todo modo de etcho, i siempre estavan kon muntcha moneda en kacha, i por esto lis davan a los Begis moneda el karar ke lis demandavan, lo todo kon su boen enteres, i tambien komo lis eran sotometidos era ke eskapavan muntchos etchos via de ejos, lo asian ke merkavan a sumas grandes

1054                         Biografia de Tchelebi Jeuda Gavriel i Avraam M. Arie.                          1842

de sahtianes ke los mandavan a Wienna i Pechta por ke si los vindieran por sus kontos, i tambien merkavan de mismo a sumas grandes de fieros, i otros ansi artikolos, i de lo todo sus ganansias eran muntchas, en este tiempo ke era el governador de Vidin, AA, Usein Pacha era ke li ivan tambien muntchas veses, i asian los saraflikes, i los trokamientos de las valutas, sigun ja saven ke en esto tenian la mas grande ganansia, i ejos los viajes los asian sin kansarsen,

             De este tiempo i endelantre ejos enpesaron a antcharsen en los gastes seja en kasa sovre las komanias komo tambien i kon las vistimientas, i asersen sirvir de mosos,

            Si okupavan muntcho de los etchos de la komuneta, i en okasion non si lis enportava de sakrifikar moneda de sus petchos, ejos los djusgavan a los djidios i los kondenavan en okasion ke venian kontra de los enteresos de la komuneta,

            Sovre todos los etchos ke ejos lavoravan, eran mui aonados, i se respektavan los ermanos de los unos a los otros mui muntcho, ejos por lo todo siempre si akonsejavan i se sentian a todo lo ke avlava kada uno, i de todo loke lavoravan eran todos al koriente ejos koando viajavan era ke siempre lo asia saver kon kartas a Samokov de todo loke li pasava en el viaje i muntchas veses demandava enstruksiones de Samokov koando si topava en algun estretcho, por no aser algun jero,

            De mismo i en kasa era ke si konportavan mui bien, i todos sus gastes sea de el komer komo tambien i de el vistir, todos

1055                         Biografia de Tchelebi Jeuda Gavriel i Avraam M. Arie.                          1842

gastavan de una bolsa, las mojeres en kasa, todas aunadas i se pasavan boenas, i se sotometian a los komandos, de sus esfoegra la Bu. Lea, i sovre ke todos los djidios ke los vijitavan en los primeros dias de Pesah i de Sukod, ja lo saven ansi de mismo era i las mujeres ke lo asian, era i entre ejos la Familia tambien ke si vijitavan, de mismo, i a todos estos ke los vijitavan era tambien ke a todos, lis boltavan vijitas, lo asian mas ke en todo djimbuch or pasatiempo ke avia atras non lo dechavan, i siempre koando vinian en un kavo sus pasatiempo era kon kantar,.

Sigun ke ja lo saven tambien ke tratavan i kon el Mahmud Bei kavanos oglu, de Pasardjik, foe en este tiempo ke li avia pujado la suma de devda a el Mahmud Bei komo 250,000 groches, ke a si [ansi] una suma tener de aver solo en Mahmud Bei, lis era muntcho, i todos los medios ke isieron por enmankar esta suma non lo podieron, i ansi foe ke li kalio ke foera propio Tchelebi Jeuda a pasardjik, por darle a entender ke topara el molde por pagarla, or al menos de enmankarla, porke i ejos tambien en este tiempo estavan en grande estretchura por moneda, i el Mahmud Bei, buchkando el molde para ke si aremediaran, porke el Mahmud Bei ja si la tenia travado esta suma de moneda de la kacha de el Governo i se la tenia gastado por su konto, i a rason ke de parte de el governo li demandaron porke li remetiera toda la moneda ke avia en la kacha, i el ke ja si la avia gastado, foe ke la tomo de ejos, i sero los kontos de la kacha, fagora [agora] ke Tchelebi Jeuda, lo apreta por su moneda, es ke penso el

1056                         Biografia de Tchelebi Jeuda Gavriel i Avraam M. Arie.                          1842

Mahmud Bei, de darle 250,000 groches, ke avia en la kacha de el governo, para ke si aremediara, anke li dicho ke devia de darle una polisa de 500,000 groches para Kostan, kon la entision para kedarle a dever torna los 250,000, i Tchelebi jeuda sigun savido ke ja era mui entelejente, i konosia las entesiones de el otro, foe ke al punto ja si konsentio, koalo era la entesion de el Bei, i kon su finesa^[78] lo iso para poder kovrarle, lo iso ke si kontento a darle la polisa de 500,000 gr. i kon esto el resivio los 250000, gr. ditchos i se vino kon la moneda presto a Samokov, i kon la polisa de los 500 mil ke avia travado era sovre Tchelebi Haim Salmona, de Kostan i en mismo tiempo ke li travo, ja li eskrivio tambien, kontandole i el paso entero, i lo akavedo en mismo tiempo porke non la atchetara ni menos ke la pagara, anke ke Tchelebi jeuda ja lo savia, mui bien ke iva a ser males grandes, mismo ke el Mahmud Bei era persona negra, i matador, ma non si espantava por nada porke i la enfloensa suja tambien non era poka, i ansi foe ke la polisa foe a Kostan ala Hasne i ke la mandaron por el enkaso ande Tchelebi Haim, i el koal lis dicho, ke non la podia atchetar por pagarla por rason ke non avia resivido el enporto, i ke el non li poede akredetar esta suma, i ansi foe ke la polisa la boltaron atras,

            I el Mahmud Bei ke la resivio atras, li paresio de boeno, de mandarles solo 7500 gr. komo un akonto alos 250,000 gr. en asiendo konto ke esto ja lis iva a ser bastante, i en eskriviendoles tambien, porke eskrivieran a Kostan a ke la pagara la polisa

1057                         Biografia de Tchelebi Jeuda Gavriel i Avraam M. Arie.                          1842

ma ejos non li resivieron los ditchos 7500 gr. i se los mandaron atras, i de la grande ravia ke tuvo el Mahmud Bei foe ke los amenaso muntcho, ma ejos li mandaron a disir ke si aparara delantre de ejos, i esto non podiendolo somportar lo iso ke los djo a el djusgo komo una polisa non pagada, i mas tadre, ke lo kombedaron a Tchelebi Jeuda a Vidin, ke era el vilaet, uno de los 22 departamentos, de el governo Turko, i Samokov ke dependia de este vilaet, es ke si kalio ke si foera, i de esto foeron mui muntcho sikilijados, sovre todo el Tchelebi Gavriel era mas muntcho de todos, i ansi foe ke si li avija ketado el esfoenio de las notches, ke apenas loke podija durmir era solo 2 oras en las 24 oras, i foe de este tiempo ke el Tchelebi Gavriel non pudo dormir en toda su vida mas de 4 oras en las 24 oras,

I Tchelebi Jeuda ke ja estuvo en Vidin i sigun ke ja lo saven ke era una persona serbes, i non si espantava por nada, seja porke se iva aparer al djusgo or ke el Mahmud Bei era una persona matador, era ke non tenija dingun miedo, i sovre todo ke el Vali (governador) iva a ser ke los iva a djusgar, ke el koal ja era una persona mui boena i djusgava a todos kon la mas grande deretchedad sin aser dinguna deferensia, de las personas ke si li aparavan de delantre, ke es el nombrado AA, Usein Pacha, i Tchelebi Jeuda ke ja si avija jevado algunas kartas de rekomendasion, i antes de topar kon el Pacha, el si li adereso, a un sierto Tchelebi Haim Geron, ke el koal era el mas grande, konfedente de el Pacha, i era ke en koal unke kosa ke li demandava, en nada non li refosava, porke Tchelebi Haim era el mas grande DAL-KAUK^[79]

1058                         Biografia de Tchelebi Jeuda Gavriel i Avraam M. Arie.                          1842

(asidor de areir) de el Pacha, i denpoes ke li konto el etcho entero a Tchelebi Haim, li rogo tambien porke li diera a entender a el Pacha, ke el Mahmud Bei non podija tener dinguna rason de esto ke al lo keria, i Tchelebi Haim, ke lo entendio el etcho i ke el tambien non lo topo de deretcho esto ke el Mahmud Bei lo keria, i por aserle el plaser, denpoes ke ja si lo iso saver, lo todo a el AA, Usein Pacha, lo iso ke en akel mismo dia lo presento el Tchilibi Haim, a Tchelebi Jeuda ande el AA, Pacha, i denpoes ke li konto el paso entero, li rogo tambien i todas las rogativas menesterosas, i el Pacha li dicho ke este libero, ke a este konto el Mahmud Bei non poede tener, dinguna rason, sovre esto denpoes de darle todas las grasias, i besarle los pies, si salieron, ma anke todo esto era ke Tchelebi Jeuda tambien era bien espantado, pensandose, ke el Mahmud Bei tambien era una persona mui onorado i mui konsederado, i pasando unas dos semanas ke ja si apararon a el Djusgo, i denpoes de darsen a entender, lo topan por deretcho ke era Tchelebi Jeuda ke tenia la rason i lo kondinan a el Mahmud bei porke pagara a Tchelebi Jeuda todos los gastes i los danios, ke sovre esto ja si keri entendido la alegria i gusto ke tuvo Tchelebi Jeuda, i denpoes de rengrasiarlos seja a el AA, Husein Pacha komo tambien i a el S-r. Geron, partio Tchelebi Jeuda por via de Sofia i se abacho en Sofia en la kasa, de H. Haimatche, Tatcher, ke eran konsfoegros ke estava esposado, S-r. Behoratche, el Ijo de Tchelebi Gavriel, kon la Bu. Dudutcha, la Ija de el ditcho H. Haimatche, i akeja notche la pasaron kon muntcha alegria i kantares,

1059                         Biografia de Tchelebi Jeuda Gavriel i Avraam M. Arie.                          1842

ke uvieron tambien i algunos amigos kombedados para komer, a la onor de Tchelebi Jeuda, i la Novia ke salio para besar la mano a el S-r. Tio, foe ke li djo por besa mano 20, menduhies ^[80], de besa mano, ke esto foe mui grande besa mano para akel tiempo, i esto se espandio por Sofia entero,

              Reviniendo a el Djusgo de Vidin, foe ke el Mahmud Bei non estuvo kontente, i mui ensaniado ke ja estava, lo iso ke partio sin tadrar, por Kostan, por aserlo apelo, este Djusgo, ke era solo en Kostan ke si podia aser la kasasia^[81], i tambien lo espandio, ke el AA, Husein Pacha li tomo de Ruchfet, de Hodja Jeudatche, 200 liras, i por esto foe ke lo gano el Djusgo, i de esto ke el mahmud Bei lo foe disiendo ke el AA. Pacha komio Chohad si espandio mui muntcho, i esto tambien ke ja tenija el deretcho de aserlo, foe ke mas tadre, lo kombidan a tchelebi jeuda de moevo por este mismo Djusgo a Kostan, ke i esto tambien lis foe mas grande apreto de el primero, ma non tenijan koalo aser, i kalia ke foeran i tambien non si deskorajavan fin a el kavo, ke sovre esto tambien ke ejos lis kalia ke tuvieran las rekomendasiones, menesterosas, i era solo de el Usref Pacha ke las podian tomarlas, ke el koal estava komo governador en la Bosna, i el sus S-r. Tio H. Refael ke ja estava tanbien en este tiempo en la Bosna i ke ja era protejado de el Usref Pacha, li eskrivieron, kartas seja para el Usref Pacha komo tambien i para H. Refael, en asiendoles saver en largo todo el etcho kon el Mahmud Bei, i en mismo tiempo rogandoles a todos los 2 porke lis diera kartas de rekomendasiones por

1060                         Biografia de Tchelebi Jeuda Gavriel i Avraam M. Arie.                          1842

Kostan ke estavan en el mas grande apreto ke podia ser, i de esto seja el Usref Pacha ke ja los amava komo tambien i el H, Refael ke ja li rogo, foe ke lis mando una karta mui bien sijada, ande non la podijan avrirla, por saver loke li eskriviria, ke era por el Fetih, Ahmed Pacha, i pasando algo de tiempo ke ja kalia ke partiera Tchelebi Jeuda por Kostan para apararse tambien i en este Djusgo, el partio algo sikiliado, ma torna su korage [koraje] non lo pedria, i en arivando en iderne, el si abacho en la kasa de Tchelebi Haim, Avigdor, ke ja li era su konosido i amigo, i mismo ke estava algo sikilijado, ma torna kon todo, el non si apretava muntcho, i en akeja notche ke el estuvo en la kasa de S-r. Avigdor, el si kombedo a mas otros sus amigos i se iso prontar, komania i muntchas biviendas sovre todo ke el vino de edirne ja es el mas asenijalado, de muntchos lugares, i se iso jamar una trupa de Tchalgidjis de los mas mijores de edirne, ke i de esto de el kante de iderne ja es tambien konosido i avlado, i la pasaron akea notche fin a la maniana, kon bever i kantar i djimbuch, i el ke tenia kon si moneda mas poka i para esta notchada ke tovo el menester, 1000 groches, i ke los gasto todos ansi foe ke li kalio ke si enprestara de Tchilibi Haim, esta suma kon ke travo a Samokov a Tchelebi Gavriel porke los pagara, i mismo ke la notche entera ke no durmieron el torna kon todo de su viaje atras non kedo i ala maniana el partio, por su viaje por Kostan, era ansi la natura i el karakter de Tchelebi Jeuda, ke non si lo tomava la kosa fin a el kavo,

            Por enfrentante, era la kontra el Tchelebi Gavriel ke

1061                         Biografia de Tchelebi Jeuda Gavriel i Avraam M. Arie.                          1842

si espantava i se sikilijava mui muntcho, i el parisiendole ke lo iva a poder aranjar el etcho al amigavle, el partio por pasardjik, i topar kon los parientes, de el Mahmud Bei, i de la manera ke foesa el ja estava kontente, de aranjarlo ma esto todo los enkorajo mas muntcho, visto ke lis foe a rogarles, ke lo todo lo iso sin ke lo savia su ermano Tchelebi Jeuda, i non kontentandosen en nada el si bolto en vasio, a Samokov,

            I koando Tchelebi Jeuda ja arivo a Kostan, lo primero ke lo iso foe, de toparlo a el Fetih Ahmed Pacha, por darle la karta de rekomendasion de el Usref Pacha, i en akel dia mismo ke ja lo topo, i li djo la karta, anke sigun ditcho ke non savia el kontenido de la karta, i de mismo non savia nada, sovre loke tengo eskrito, en el N-ro 1050, de la dita Biografia sovre el pasaje ke lis paso en la kasa de el S-r. Math, Russo, en Semlin, por ejos, i en el mismo tiempo, ke Tchelebi Jeuda, estava aparado de delantre el Fetih Pacha, i ke estava meldando la karta, ke li djo, por poder denpoes, rogarle i kontarle por su etcho, lo foe atinando ke el Pacha de ves en koanto, lo iva merandolo a Tchelebi Jeuda, i denpoes torna la meldava, esta karta, i sovre ke lo foe asiendolo ansi el Pacha unas koantas veses, foe ke Tchelebi Jeuda tuvo boeno a pensar sovre estas meradas, i tambien si espanto, non saviendo la rason, ke lo todo era sin nada ke li avlava, ni mismo ke li demandava, alguna kosa, i era siempre ke si estava aparado en pies, sin tener el kuraje de disirle nada, i siendo ke non tenija dingun remedio, era ke iva tiniendo la pasensia

1062                         Biografia de Tchelebi Jeuda Gavriel i Avraam M. Arie.                          1842

i kon grande kuraje ditiniendose, i koando ja la eskapo de meldarla ke si vido ke ja si avija ulvedado, de el Pasaje, de Semlin, foe ke li demando a el presipio, SEN MI SIN HODJA JEUDATCHE? (tu sos, el Hodja Jeudatche,) i Tchelebi Jeuda kon grande kuraje li respondio, si, mi S-r. Pacha, jo so tu esklavo, judatche de Samokov, ke esta manera es la polites turka enfrente de los personajes mas grandes, ala ora el Pacha denpoes ke penso un poko li dicho porke si asentara, ke en esto non lo kijo ma el Pacha li porfio, i li kalio ke si asentara i esto era de rodijas ke si asentavan delantre de ejos, i le iso traer tchibuk i kahve, i denpoes ke li demando algunas kosas por la sivdad de Samokov, i antes ke li kontara Tchelebi Jeuda nada de su etcho, el Fetih Pacha li meldo la karta ke li trucho de el Usref Pacha ande li eskrivio,: ti lo rekomendo a Hodja Jeudatche, por ke lo protejes, i ke lo sientas, por esto ke ti va a rogar, ke es por un djusgo ke tiene kon Mahmud Bei, de Pasardjik, ke es este akel Hodja jeudatche, ke ti konti koando estovimos en Semlin en la kasa de el S-r. Matatia Russo, i ke mi avijan demandado, de koala manera es ke mi avia ganado, en tieras ajenas, amigos, i si es ke keres pagarle por tantas onores ke mos iso el S-r. Russo, koando estuvimos en su kasa, ke foe lo todo por kavsa, de este Hodja Jeudatche, es agora la ora ke li vengas en su ajuda i ke lo protejes, i Tchelebi Jeuda de sintir meldar ansi una karta de el Pacha ja si kere entendido komo de alegria tuvo, i se iva gustando i riendo, sintiendola meldar, ma era en mismo tiempo mui korioso de saver tambien loke siria el pasaje de

1063                         Biografia de Tchelebi Jeuda Gavriel i Avraam M. Arie.                          1842

ande el S-r. Math. Russo, sigun ditcho ke non lo savia, ke kon grande kuraje, li demando Tchelebi Jeuda en rogandole porke li kontara este pasaje porke el non lo savia, i el Pacha, si nada enkuvrirlo li konto lo todo en largo sigun ke ja lo eskrivi mas antes, i en mismo tiempo lo bendicho, i se lo rengrasio tambien i a el por todas akeas onores, ke non si las tiene de ulvedar, i en mismo tiempo lo kargo porke lo saludava de su parte, a el S-r. Russo, i denpoes li enpeso a kontar, el etcho sujo, ke tenia kon el Mahmud Bei, i denpoes ke lo sentio i lo entendio mui bien el etcho entero, li dicho, ansi, sos mui masaludo, ke jo so agora serka nomenado, por presedente, de la korta de Kasasion, de aki de Kostan, i es jo ke vos vo a djusgar ke ansi estate libero i mui siguro ke jo ja tengo de buchkar el tujo provetcho, es ansi ke kamenate unos koantos dijas en Kostan, fin ke jo lo estudiare de muevo este proseso, i antes de el dia de el djusgo ja ti mando a jamar, i te digo sigun de loke ti deves konportar, i Tchelebi jeuda gustoso i alegre li beso los pies de el Pacha i se salio, de el salon ande estuvieron mas de 3 oras,

               I denpoes ke ja pasaron 3 dias i Tchelebi Jeuda esperando este dia ke lo va a jamar, foe ke lo jamo, i li dicho ke estuviera pronto ke a la maniana si tenia de merarse el Djusgo i lo enbeso tambien en algunas kosas sigun de loke devia komportarse, ke i esto arivando ejos ke si apararon a el djusgo, ke todos los otros asistientes, todos foeron de parte de el Mahmud Bei, i la resulisia foe ke a Tchelebi Jeuda lo avian kondenado, ansi tambien i a una su

1064                         Biografia de Tchelebi Jeuda Gavriel i Avraam M. Arie.                          1842

suma grande por los gastes, ma el Fetih Pacha komo presedente, foe ke non la aprovo esta kondana, i lo ajurno por otro dija, por merarse de moevo, si entiende ke ja lis iso saver a todos los asistientes ke non era legal esta kondana, i ansi foe ke la troko i lo isieron ganador a Tchelebi Jeuda i kondenado a el Mahmud Bei kon todos los gastes ke los avijan previsto de antes a Tchelebi Jeuda ke los pagara, i de esto ke ja si kere ditcho ke foe mas muntcho gustoso, el partio atras por Samokov, i el Mahmud Bei, de mismo se vino en vasio a Pasardjik, i seja el komo tambien todos sus vinientes denpoes de el siempre todos foeron inimigos i tuvieron la inimistedad, fin a el tiempo ke estuvieron en pasardjik, ke sovre estos ja tengo de eskrivir i un pasaje ke paso entre las mujeres, de la Familia moestra kon las mujeres de la Familia de el Mahmud Bei, ke es ejas ke estavan en los banios de la bana de Kiostendja, i lis afito ke estavan de todas las 2 partes lavandosen en uno i mismo banio, i la una turka ke ja lo supo ke eran de la Familia de Arie, eja si permetio de etcharle un tas de agoa kaente en la espalda de m. Beju, ke es Ija de S-r. Mochonatche i mujer, de S-r. Chemoelatche, Jeuda Arié, ke esto denpoes ke salio a el djusgo, ma en este tiempo, ja lis kalio ke foeran de la bana, por la rason ke ja lo van a meldar, en una de las partidas de los vinientes de Tchelebi Jeuda,

            En el anio de 5603, li nasio a Tchelebi Avraam una

1065                         Biografia de Tchelebi Jeuda Gavriel i Avraam M. Arie.                          1843

Ija, Behora i la jamaron Lea, i foe una mui grande alegria, para toda la familia, porke non tenijan otra kriatura, ansi tchika en kasa, i tambien ke la Bu. Bulisu, ja era el sinken anio ke avija kasado, i non avija parido, toda la familia li mandaron muntchas dulsuras i presentes seja para la parida komo tambien i para la nasida, a eja li isieron una kama, alta de parida, adonada kon muntchos modos de broslados, i en todos los dias ke eja la parida estuvo en la kama era ke la vijitavan entre los dijas todas las mujeres, de la sivdad i por las notches li vinijan muntchos ombres a beklijar la parida, kon ke komijan i bivijan i kantavan, i denpoes, era ke non ivan a durmir la notche entera, por goadrar a la parida, i en este tiempo ejos djugavan a kartas i otros djuegos por non durmirsen, i en mismo tiempo, bivijan i komijan modos de frutas i algunos desajunos, ke lo todo lo asijan en la propia kamareta ke estava la parida, i sigun ke ja lo tengo eskrito ke en el dija de Chabad ke era el Fadado^[82], sigun ke lo asian, tambien i aki lo isieron kon mas muntcho saltanat, i denpoes, kon la ajuda de las mujeres ke ja eran en kasa, la kudijavan i su madre la aletchava, i kon grande regalo eja foe engrandesida, i koando eja ja foe de una edad, de 5 a 6 anios, la mandavan a la echkola por ke si enbesara a meldar, a el uso de akel tiempo, ma eja ja save meldar todas las tefilod, i las perachiod, i ansi todos los otros menesteres, i para ke eja si foera, en kada dia a la echkola era ke li davan a 10 paras en kada dia, por ke si merkara seja de frota or de bonbenes, i muntchas veses ke su padre non estava en la

1066                         Biografia de Tchelebi Jeuda Gavriel i Avraam M. Arie.                          1843

sivdad, lo asia ke si iva demaniana a la butika i esto antes ke dainda la avrieran i lo estava esperandolo a el papu Tchelebi Jeuda para ke li diera las 10 paras, ke sin esto non se iva a la echkola, a eja todos la amavan muntcho i li merkavan mudos de djogetis de las kriaturas, i djugavan tambien kon eja,

            En este anio lo kaso Tchelebi Gavriel a su uniko Ijo, el S-r, Behoretche, ke ja lo eskrivi en el anio pasado ke estava esposado kon la Bu, Dudutcha ija de H. Haimatche, Tatcher, de Sofia, ke el koal era uno de los grandes merkaderes de Sofia, i kon una semana antes de la boda, sigun el uso ke esto ja lo saven tambien ke si mandava konsfoegros para ke trucheran a la novia, i esto mandaron a djente ke eran los pertenesientes ala onor de H. Haimatche, i en Sofia los resivieron kon muntcho onor i saltanat, ke H. Haimatche lo iso komo una boda, en todos los dias ke estuvieron los konsfoegros, i kombedava en kada notche a sus parientes i amigos, i komijan djuntos, kon muntchos kantes, i djimbuches, por ke pasara la ora sus konsfoegros, i koando ja si vinieron a Samokov, aparte de toda la djente de la kasa de la novia ke si vinieron todos ke seraron la kasa, foe ke uvieron tambien i muntchos i otros kombedados, ke vinieron para la boda, ke estuvieron en Samokov 15 dias, lo todo, kon muntcho tchalgis, i kantares, alegrandosen seja en los dijas komo tambien i en las notches, i era ke kombedavan a la sivdad entera en kada dia i en kada notche a un modo de djente, i a todos era ke los adulsavan i komian i se alegravan, i en kada dia los vijitavan toda la djente,

1067                         Biografia de Tchelebi Jeuda Gavriel i Avraam M. Arie.                          1843

i todos los de kasa ke non salian a la plasa en todos los 8 dijas de la boda, era ke los resivian kon muntcha onor, era ansi ke si gustavan i se alegravan, i la novia ke ja era boena i mui ermosa, i ke eja ja trucho muntcha achugar, i 500 groches de kontado, era ke de todas las 2 partes foeron mui bien kontentes, biven mui aonados. i se aman mui muntcho kon su marido, eja respekto siempre, a todos los de kasa, eja nunka non tuvo kechas kon dinguno, a eja la keren i la respektan todos, porke eja es una mujer, muntcho bonatcha, i non li plase la fantasia, ni muntcho la vistimienta, eja es goadradera de la kasa, i pronta todo el menester de la kasa, eja lo respekta muntcho a su marido, i eja li pronta i li gisa todas las komidas, i nunka non si konfio, a dinguna gisandera, a en kada dia li pronta freskas, sin kansarse, eja los ama i los goadra muntcho a todos sus Ijos, i les kumple todos sus deseos,.

            La Bu. Lea, madre de Tchelebi Jeuda, Gavriel i avraam ke eja ja si estuvo prontando kon 2 anios de mas antes de agora, todos los menesteres, por irse a Jeruchalaim, i estava esperando para verlo  kasar, a su inieto S-r. Behoratche, ke lo amava muntcho i kale disir ke foe eja ke lo kudio i lo engrandesio, porke de koando lo desteto su madre, foe eja ke lo tuvo en su kamareta i kon eja durmia, en todas las notches, fin a ke kaso, i pasando komo 3 meses de koando ja kaso, ke eja ja estuvo pronta, de muntchas modas de vistidos i modaduras, i algo de mobilia, kon ke si jevo tambien i de su djoja, esto ke li resto denpoes, ke eja lis djo, a todos sus Ijos noeras, inietos, i parientes, a kada uno a una kosa sigun de loke lo pertenisian, i eja si jevo tambien i toda su moneda ke eja la avanso en toda

1068                         Biografia de Tchelebi Jeuda Gavriel i Avraam M. Arie.                          1843

su vida, aparte de loke ja li dieron sus Ijos, la suma menesterosa por el viaje, i aparte, de adelantado li dieron i por los 6 meses, de la suma ke li tuvieron, asenijalado, por mandarle en kada anio, ke ja era una suma mas muntcha de esto ke podia tener el menester, eja djo a todos los menesterosos muntcha sedaka, i aparte eja decho i por todas las kupod, i bienfisensias, ke avijan en Samokov, lo mismo, i denpoes ke eja si abraso kon todos i los beso kon las lagrimas koriendo a tchoros de sus ojos eja partio, i la akompaniaron toda la djente de Samokov, fin a el lugar ke ja era asenjalado i sus IJOS la akompaniaron fin Dubnisa, i en Dubnisa si lo dieron a H. Avraam, el Chekerdji, porke la akompaniara fin a Jeruchalaim, i el viaje lo isieron via de salonique, ke partieron kon nave, a Jafa, por rason ke en akel tiempo non avia vapores, i este viaje por mar, ke el aire lis foe mui djusto lo pasaron mui kontentes, i todo el viaje de Salonique, fin a Jeruchalaim foe 12 dias, i koando ja arivaron en Jeruchalaim, H. Avraam el akompaniador, li tomo una boena kamareta en la kasa de Hr. Rabeno Devach, por su koartir, i se la mobelio, i la resento mas todo el menester, por su bivir, i la djo a konoser, a los mas muntchos de los notavles de Jeruchalaim, i denpoes ke ja estuvo komo 15 dias el H. Avraam kon eja, si vino a samokov i lis konto lo todo en largo seja por el viaje komo tambien i sigun ke la resento, i ke ja estava kontenta,

           Eja la Bu. Lea era mui konsolosa, de toparse en jeruchalaim, i mas tadre eja si aporfejo [profejo] a 3 ijos, ke foeron H. Presiado

1069                         Biografia de Tchelebi Jeuda Gavriel i Avraam M. Arie.                          1843

Ariel, Hr. Chemoel Devach, i Hr. Jaakov Kapiluto, ke los koalos la meravan i la kudiavan, i la vijitavan komo sus propios IJOS, ke ansi era el uso, de las mujeres poderosas, ke se ivan de HUSA-LA ARES? i bivir en Jeruchalaim, la tiera santa, ke si tomavan komo ijos a personas de Jeruchalaim, al nombre, de koantos IJOS tenia eja en su sevdad, i era kon esto ke lo iva a pasar el eskarinio, de sus propios ijos, i los koalos aprofejados, ke ja si kontavan komo sus ijos, era ke denpoes ke moria esta madre, iva a ser, ke la ivan a enterar, i enpatronavan todo el bien ke eja lo posidava,

            Eja la Bu. Lea era konsiderada i mutcho onorada, de todos los S-res de Jeruchalaim, eja gastava para bien visensias i dava muntcha sedaka, a todos los menesterosos, i su anijada, ke li tenijan fiksado sus IJOS eja la resivija en su tiempo i mui regularmente i sus ijos li mandavan siempre aparte, muntchos presentes, en kada okasion ke topavan, eja eskrivia a sus IJOS, muntchas kartas, ande lis asia saver, de todo lo boeno de Jeruchalaim, nunka eja non si lis akecho, por dinguna kosa, otro ke al kontrario era ke siempre si lis alavava ke siempre li sovra de lo todo i ke estava pasando komo las vidas de las dukesas, ansi de mismo era ke seja sus ijos i komo tambien i todos sus parientes, siempre li eskrivian kartas, asiendole saver de todo esto ke pasava, en Samokov, en toda la Familia en el anio de 5611, ke li foe su IJO el grande a vijitarla, a Jeruchalaim, ke estuvo kon eja serka de un mes, en su kasa, i ja si kere mui bien entendido, la alegria ke la tuvieron todos los 2, i el li

1070                         Biografia de Tchelebi Jeuda Gavriel i Avraam M. Arie.                          1843

jevo muntchos presentes, i siempre kamenavan tchuntos [djuntos] en los lugares, ke avija de vijitar, i li reglo ainda mas mijor su pasadja, i la rekomendo a muntchos de los S-res de jeruchalaim, eja era ke todo lo estava merandolo en la kara, de el grande aranko de alma ke tenia por todos ejos, i ansi era ke non li podia muntcho demandarle, por la rason ke koando li damandava, era ke li saltavan las lagrimas, i non keria ke la viera ke estava jorando, i koando Tchelebi Jeuda ke ja iva a partir, eja ja lo foe abrasandolo unas koantas veses, i lo iva besandolo, i bindisiendolo, de todas las bindisiones de una madre i li rogava porke, non la decharan sin karta, eja lo akompanio fin a sierto logar ke lo podija i partio, por Samokov, i denpoes de esto eja bivio, fin a el mas de Adar, de el anio de 5616, i sus IJOS ke eja los tenia en Jeruchalaim aprofejados, la enteraron en el propio, lugar ke eja ja si lo tenija merkado de muntchos anios mas antes, i li  isieron todas las onores meresientes, i denpoes ejos si enpatronaron de todo el bien ke eja lo enpatronava ke esto non era poko, ma sus sus propios IJOS de Samokov, lo supieron la moerte de sus madre denpoes de 2 meses, ke de esto foeron mui  araviados, por esto ke non si los isieron saver, i ke lo goadraron, porke ejos kerijan tambien aserli el kavod, pertenesiente, de una madre, i anke ke de el presipio non lo supieron ejos torna kon todo si asentaron en el Avel en el anio entero i dieron muntcha sedaka, i mas todo esto ke lo podieron

            Ejos los 3 ermanos, kontinuando en sus etchos, ke ja lo saven ke era, frekontar en todas las ferias de moestras partes, i

1071                         Biografia de Tchelebi Jeuda Gavriel i Avraam M. Arie.                          1843

ke eran Filibe, Usundje ova i ansi otras i aparte sus magasenes tambien ke ja los tenijan seja en Filibe Pasardjik i Samokov, i aparte el etcho de los enteresos ke lis davan moneda a los begis kon entereso, i ke lis merkavan tambien i los fieros ke ejos los lavoravan en sus fabrikas^[83], i Tchelebi Avraam, era en el etcho de la kacha ke era lo mas enportante, siempre trokando las monedas ke kaivan en la kacha, i S-r. Behoratche ke era mas mansevo era ke kontinoava sus estudios en el midrach, kon Hr, Avraam Alkalai, i se okopava, tambien en las merkidas de las kosas ke eran el menester, por sus komanias, i eran todos sus gastes de una bolsa, i todo loke si merkava era ke si jevava, en la kosina de abacho i Tchelebi Jeuda ke tenia kosina aparte era ke si li apartava, el menester, por ejos i se lo davan i eja si lo gisava aparta,

          Ejos siempre si vijitavan en la mas tchika okasion, i esto entre todos los parientes, sin dingun apartamiento, ejos asian muntchas soares, i kantavan i se alegravan, i los ombres solos se adjuntavan kon otros amigos i asian juvetchis, i otras komidas i se ivan a los kampos ke era a los arvolikos, i komijan i bivijan i kantavan i bailavan, avija muntchas veses, ke estando en sus alegrias, lis venian algunos turkos negros, i los presigijan i los maltratavan i ejos lis kalia ke presto si fujeran, i mismo ke si lis bosdejava sus reposo ja era kosa ke non si lis enportava, porke esto ja si lis avija etcho natura, porke ansi era la vida de los djidios en la Turkija, avija ke a muntchos ansi Turkos lis davan algo de moneda por ke los decharan en sus reposo, avia tambien i muntchos ladrones, ma

1072                         Biografia de Tchelebi Jeuda Gavriel i Avraam M. Arie.                          1843

ja tenijan de boeno ke si kontentavan kon poka moneda, i los mas de ejos eran los KIR-AGASIS, ke eran propio los goadradores, de los kampos ke nos [non] ivan a dechar ke uvieran ladrones, i los merkaderes seja DJidios, komo tambien i kristijanos koando se ivan en viaje seja a las ferias komo tambien i a otros lugares, era ke kalia ke si adjuntaran 20-25 merkaderes, i se alkelavan a algun turko ke para esto tambien ja avijan apropiados turkos ke sus etchos era solo esto, i ke ja eran bien armados, i kavajado de su boen AT, i era este turko ke los iva a goadrar i defender de los ladrones, ke muntchas veses ja afetava ke los enkontravan los ladrones, i las mas muntchas bandas de los ladrones, ja eran en los tiempos de las ferias, i koando ja los detinijan a estos todos viajadores por soidejarlos, i tomarles la moneda, era el ditcho Turko ke ja estava armado, ke iva a pelejar por ejos, lo asia ke si lis aserkava ande los ladrones, i les disija jo ke so Turko, i ke mi estan pagando estos merkaderes porke los vo a goadrar, porke de esto es mi mantenimiento, i vosotros tambien ke soch mis ermanos, Turkos keri disir, ke es ami voestro ermano ke li vach a tomar el bien, i ansi es ke jo vos rogo, por amor de moestra lei, ke mi dechech libero por kontinuar, mi viaje, i kon algunos de estos ladrones, avia ke si los konvinian kon ke lis davan algo de moneda, i algo de la komania ke tenijan i de ejos avijan ke los dechavan liberos sin ke lis tomavan nada,

            Las mujeres en kasa ejas mui aonadas si pasavan mui boena, i ejas tambien si vijitavan de las unas a las otras, i las

1073                         Biografia de Tchelebi Jeuda Gavriel i Avraam M. Arie.                          1843

moevas kasadas, djugavan i bailavan i kantavan i se adonavan, anke ke non tenian sirvideras en kasa, i era todo ejas ke ivan a responder sovre todo ke en akel tiempo, los ombres si asian muntcho sirvir de sus mujeres, i non komo agora, ma torna kon todo ja lis sovrava el tiempo por aser i todos sus plaseres,

            En el anio de 5604, vino a Samokov, H. Presijado Tatcher, de Sofia ke es el esfoegro de Tchelebi Gavriel, i denpoes ke ja estuvo en sus kasa unos koantos dijas, li dicho a su jerno el Tchelebi Gavriel, jo non esto boeno, en mis etchos, i toda la onor, i kreditos ke jo los tenia, de antes, es agora ke todos ja mi los kortaron, i ansi es, ke jo vini solo ande vos, a rogarvos porke mi dech algunas kartas de rekomendasion i en mismo tiempo, de kredito, por algunos de los voestros komisioneres, de viena porke mi avran un kredito, i va aser kon esto ke mi vach a rebivir, i mi vach a pagar esto de el kredito ke jo vo lo tengo dado, koando mi vinitech vos mismo a Sofia en el anio de 5598, a demandamelo, i jo sin dingun refuso vos di las kartas aviertas, por los komisioneres ke jo los tenia i es de entonses ke vos estach kamenando en todos voestros negosios adelantre i lo mas mijor ke poede ser,

           I Tchelebi Gavriel, ke penso un poko, lo topo por mui deretcho, de la proposision de su esfoegro i sin ke si akonsejo kon sus ermanos, lo iso ke li djo las kartas menesterosa si H. Presijado p

1074                         Biografia de Tchelebi Jeuda Gavriel i Avraam M. Arie.                          1844

partio, sin tadrar, a Sofia i de mismo partio i por viena, i kon las ditchas kartas el iso todos los empleos, ke lo kijo, i algo de tiempo foe kontinuando, en su etcho ma mas tadre tambien sus etcho no li foeron de el en todo boenos fin a el grado ke li  kalio ke isiera falimento, i de esto foe ke lis kedo a dever una suma de 80,000 gr. i non pudieron tomar ni un gr. i ejos lis kalio ke los pagaran,

            A S-r. Behoratche el IJO de Tchelebi Gavriel en este anio li vino una hasinura, i tenija una mui grande dolor koando iva a urinar, i denpoes ke ja lo kuraron aki en Samokov todos los medikos foe ke non lo pudieron sanarlo, i ansi foe ke su S-r. padre ke ja estava lo mas muntcho en Filibe, i ke a el non si lo asian saver, ke sufria fin a este grado, i mas tadre ke el vino a Samokov, i ke lo vido ansi, sin tadrar, si lo jevo a Filibe, por aserlo kurar de los medikos de Filibe, i se lo detuvo kon si kurandolo, serka de 3 meses i el koando ja topo la boena milisina lo trucho de moevo a Samokov, i mas longo tiempo el non tuvo nada, i eran mui gustosos ke ja estava sano i boeno, i de mismo el kontinuava sus estudios, en el midrach, i tambien por ke si enbevesiera lo asia ke asia los empleos por el menester de la komania de la kasa,

            Tchelebi Gavriel ke estava kaje el anio entero en filibe, i su mujer kon su familia ke eran siempre solos i eran desasperados, kijo kon esto kontentarlos, de aserles unos vistidos, de una moeva ropa ke avia salido ke si jamava marinos, i lis korto 10 modas de vistidos, i los iso kosir en filibe a la moda de filibe, ke ja

1075                         Biografia de Tchelebi Jeuda Gavriel i Avraam M. Arie.                          1844

avian mas mijor, kosinderas i koando se vino a Samokov, si los trucho komo presente, para ke si gustaran, sovre, ejo i sigun ke ja lo saven ke todo el gaste, ke lo asian seja por el komer komo tambien, i por el vistir, ke era lo todo, de una bolsa, i siendo ke ansi kosas, kavsan muntchos selos, sovre todo entre las mujeres, ke es lo mas muntcho, i su koniada la grande, la Bu. Rahel, ke si lo konto a su marido Tchelebi Jeuda, en akechandose tambien ke eja non tenia ansi unos ermosos vistidos, i Tchelebi Jeuda sin ke lo kalkolo de mas antes foe ke lo djo kechas a Tchelebi Gavriel, en disiendole, ke estava asiendo gastis grandes, i Tchelebi Gaviel li respondjo ke siendo era su Familia, siempre bekiara, i para aserlos ulvedar, de las sujas solaldad, es ke lo iso esto, i mas li adjunto tambien, ke estas todas modas, foeron etchas de un top, de marinos, ke era de 60 metros, i su valor era, de 60 groches, i 40 gr, li kostaron todas las kusturas, es ansi ke todo el gasti foe de 100 gr. i mas li dicho ke jo es solo un IJO, ke tengo, por todo, i kalkulando el gaste, ke lo asemos de enmedio, es ke esto ja non poede ser ni nada, ma de agora i endelantre, mos tenemos de apartar los gastes, seja estos de las komanias komo tambien i estos de el vistir, i Tchelebi Jeuda ke ja foe mui repentido, de darle ansi unas kechas, foe ke non tuvo mas de koalo avlarle, i ejos de loke avlavan era ke non dechavan por nada, pasar tiempo, otro ke lo reintchian al punto, i foe ke si konvinieron por el avenir, de apartar los gastes, de el vistir, i kon este de la komania lo kontinuaron sigun ke era i de mas antes lo todo de una i

1076                         Biografia de Tchelebi Jeuda Gavriel i Avraam M. Arie.                          1844

misma bolsa, solo ke esto lis trucho en sus korasones algo de jelor i sin ke nada avlaran,

            Sigun ke ja lo saven ke siempre merkavan tambien i sahtijanes, i ke los mandavan a Vienna i Pechta por ke si los vindieran solo por sus kontos, foe en este anio tambien ke ejos merkaron muntcho mas grandes partidas, ke lo todo era al presipio por ganar, i en mismo tiempo tambien ke tenijan grandes prevalimiento, de la monedas, i para podersen sirvir mas muntcho tiempo de la moneda, aki lis kontare de koala forma lo asian por sirvirsen de mas longo tiempo, era ke ejos todas estas merkidas ke las asian era por unos tiempos i komo kaparo lis davan a kada tabak, a una sierta suma de moneda i por lo restan, si lis endevdavan a pagarles en ratas, i ejos ke ja resivijan las ropas era ke las mandavan i ja las vendian, kon sus boenos presios, i de esta moneda, ke ejos ja si la travavan aparte ke ganavan de la ropa, era ke kovravan i grandes onores en viena, i tambien lo mas muntcho era por, el prevalimiento, ke ejos ganavan de los otros negosios, ke tenijan ke lis kalia ke foera, lo todo kon moneda kontante, i koando ja enpesavan a deskaer, los pagamientos de los tabakes, i enpesavan a venirles, lo asian ke lis dava komo akonto algunas tchikas sumas, i esto, lis davan bolsikas de aspros ke kontenian a 100 gr. en kada bolsita, i lo asian ke lis metian a 10 i 15 gr. mas muntcho, i siendo ke la konfiensa ja tenian era ke non las kontavan en la butika, i se ivan en sus kasa por kontarlas, i ejos ke lo topavan ke avia a 10 i 15 gr. mas muntcho lo asian ke non lis vinian

1077                         Biografia de Tchelebi Jeuda Gavriel i Avraam M. Arie.                          1844

kon meses mas a demandarles paras a tiempo ke ejos lis enkomendavan porke las kontaran i ke lis dicheron seja por manko or demasia, i ke lis foeran tambien por darles i mas moneda, ma ejos travandosen i ke ja se ivan a ulvedar, era ke non lis ivan i ansi lo asijan kon todos ke era kosa maraviosa, ke arason de lo demasia, non lis vinian i esto era las santedades, de los Turkos, i tenijan tambien ke ejos la moneda non la tenijan de menester, ke era solo por koando, ivan a merkar de moevo los koeros, i esto tambien ke ja lo savijan ke la moneda la ivan a tomar para meterla en sus kachas, era i de esto ke si prevalijan, i se aprovetchavan, i de esta manera era ke en el anio entero apenas lis eskapavan de pagarles, i siempre kon grande onor, i les davan kechas por esto non lis vinian a kovrarsen,

Ejos todos los 3 ermanos, ke kontinoavan foertemente en koal unke etcho ke foera ke lo tomavan era sin kansarsen el lavorar, i era solo ejos ke si lo meravan fin ande lo podijan i esto ja era de maravia ke ja alkansavan a lo todo ejos, ke lo vijan ke en el etcho de el dechkonto, ke lo asijan era ke tenijan mijor, la konviniensa, i ansi foe ke de este tiempo i endelantre, ejos enpesaron a enmankar, de los otros etchos i foeron dando mas muntcho la foersa, en los dechkontos, i este de merkarles los fieros, de los maadendjis ke si los tomavan kon 10 i 15 gr, menos de el presio, ke si vendjo, en Pasardjik la semana pasada, ke era en Pasardjik, el pasar de las venditas de los fieros, i en kada semana era ke abachavan los merkadores de este artikolo, en Pasardjik, i venijan de Filibe, Stara Sagora

1078                         Biografia de Tchelebi Jeuda Gavriel i Avraam M. Arie.                          1844

Edirne, kisanlik, i ansi mas de los deredores, de todos estos lugares, i esto tambien era uno de los grandes negosios, i era ejos ke si ivan tambien a Pasardjik, por aser las venditas, i esto ejos los vendijan muntcho mas karos de los otros a Rason ke los davan a fiado i en los enteresos, ke ja tenijan ke lis tomavan a 20%, i ke ja era, a sumas bien redondas, i de el trokamiento de las monedas, era tambien ke ganavan en la moneda de plata, a 5 % i esto era solo koando la mandavan a Salonique, i el remitido era por via de los Jurukes, ke ja lo tengo eskrito, loke eran estos, i kon el etcho de la kacha, ke siempre ja la tuvieron ejos i de esto non la decharon, anke ke non lis era ni nada, ke jo mi akodro, fin a el anio de 5626, ke mi S-r. Padre se iva a la kacha, una ora demaniana, i 2 oras la tadre, i resivia 170 gr. de paga a el mes, ke kon esto era ke ejos savian de lo todo loke pasava el dia en el konak, i loke si avlava por ejos, i por saversen defender, de mismo lo asian ke los vijitavan en kada viernes, a los begis, i ejos tambien los resivian en sus butikas, mismo ke si estavan kon oras, non si lis enportava, i en todo los sentian, i de todo loke lis demandavan en nada non lis refuzavan, ke en todo los kontentavan, mismo si en okasion era i ke lis kostava, seja tiempo komo tambien i moneda, foe de este tiempo ke lis trokaron el nombre, porke antes los jamavan a la familia arie seja los turkos komo tambien i los kristianos, Basirjan, i de agora foe ke los enpesaron a jamarlos, SARAFLAR, i este nombre, lo enplean fin oi en Samokov, seja los turkos komo tambien i los kristianos sovre todo ke los kasalinos

1079                         Biografia de Tchelebi Jeuda Gavriel i Avraam M. Arie.                          1844

ja es ke mos jaman Sarafite, i koando mos veen, aki en Sofia, es la verdad, ke si aserkan de grande amistad, i siempre lo disen non solo a mosotros mismo i a muntchos otros ke la Familia arie ke si levanto, de Samokov, foe mas muntcho, para ejos la mankura, i non mi jero el disir, ke el 60% de los kasalinos de Samokov eran moestros lavoradores, i ejos koando si lis asia el menester, seja de moneda or seja de otra kosa era lo todo ke si aremedijavan solo de mosotros i esto mismo i koando ja non uvo mas maadenes, torna kon todo koando venian por algunos enprestimos era ke ja lis davamos,

            En el anio de 5605, foe de mismo ke ejos siempre, ivan buchakando de ir enmankando, los etchos de la merkansija i por, en mas limpios i en este anio si foe Tchelebi Jeuda a Sofia, i merko la Haratcheria, kere disir, el dasio ke kovrava, el governo Turko, de los sujos suditos, estos ke non eran turkos, komo Djidios, Kristianos, Singanos, Ermenis, ke moravan en su tiera, i esto era en lugar de el sirvisio militario, ke lis kovrava, a 20 gr. por kada persona matcho, de la edad, de 20 anios para ariva, fin ke se iva a murir, i los kovramientos non eran ke si lis asijan de kada persona por si aparte, otro ke sigun sus rigistro ke esto ja lo tenijan fin a un grado, de kada nasion aparte, i los reklamavan de el milet bachi ke es el kapo de kada nasion, ke i esto se nomenava, de parte de el governo, i kada nasion si lo espartian, entre ejos sigun la posibilidad

1080                         Biografia de Tchelebi Jeuda Gavriel i Avraam M. Arie.                          1845

de kada persona, ke a los unos los uvligavan ke pagaran 50 gr. i a algunos 20 gr. i a otros ke non tenijan los uvligavan solo por 5 gr. i ansi de algunos non lis kovravan nada, i de esta manera, lo asian todas los nasiones, i era ke tenijan pleitos mui grandes fin a koando si lo konvenian, i por esto era ke lo vendian, a los bankeros kon unos presios mui konvenivles, i era kon taksites, los pagamientos, de mismo lo asian i los kovramientos, kon ke de la polisia en kavso menesteroso era ke ja li dava seja sapties, komo tambien i todos los otros menesteres, por koando avijan los pleitos mas grandes i Tchelebi Jeuda ke lo merko esto li kalio ke si asentara el mismo, en Sofia, i era el ke si iva dando a entender, i lis kovrava, en mui regla solo era kon los singanos li era mui foerte, ke era siempre por via de el zaptie, porke los gritos i las aigaras seja de los ombres ansi tambien era ke lo de las mujeres i de las kriaturas era kosa ensonportavle, ma non tenia koalo aser, porke i las ganansias, tambien non eran tchikas, sovre todo ke li kaijan i muntcha moneda, de esto de las valutas ke i de esto tambien tenija grandes ganansias ke la trokava kon el bechlik, i esto siempre a la eskondida, ke sigun ja lo eskrivi, ke estos trokamientos eran solo, alesensiados, una kompania de ermenis ke avia kon ejos i un sierto Djidio S-r. Menache, i era solo ejos ke la podijan trokarla,

           i Tchelebi Jeuda ke non si lo pudo avenir kon el S-r. Menache, i el ke non keria darle tambien sin nada aprovetcharse, foe ke en una ves, ke a Tchelebi Jeuda si li avijan rekojido una suma,

1081                         Biografia de Tchelebi Jeuda Gavriel i Avraam M. Arie.                          1845

de 4 kargas, de ansi modos de valutas de plata i de oro, i el S-r. Menache ke lo supo, i lo presigija por tomarselas, ke era ke si las kerija konsfeksijarselas, para ke lo pedriera todo, ma Tchelebi Jeuda ke ja lo savija esto, lo iso ke las enpako en hasnes, sigun ke en akel tiempo enpakavan por remeter, kon kavajos, i sin tadrar si alkelo 6 kavajos, de mensil, (ke esto avija una kompania, ke tenija muntchos kavajos, i transportava a las pochtas, i tambien i alos merkaderes, i era kon unas taksas fiksadas, ke kovrava, por ora por kada kavajo), i de los ditchos 6 kavajos ke el si alkelo, en los 4 kargo las hasnes de la moneda, i en el uno si suvio tchelebi Jeuda mismo i en el otro, era para el surudji, (ke es el jevador de todos los kavajos, i en mismo tiempo amostrador de los kaminos porke non avia choses, i este surudji, tambien koando enkontrava por el kamino algunos pasajeros era ke de mas antes ja enpesava a gretar naaras^[84], hu, hu, hu, hup, por sinial ke li dieran kamino, i ansi lo asia i koando era ke pasava por todos los kasales i de mismo en la entradura de las sevdades, komo sinial ke estava jevando etchos de el governo, or ala pochta, i todos eran uvligados de darle kamino porke si pasara), i ejos si estavan viniendo a Samokov, kon la entision de remeterla seja a Salonique, or a Kostan or bien goadrarla, solo ke el Tchelebi Jeuda lo iso ke si troko su vistido, i se vestio komo los vistidos de los turkos, porke non lo konosieran, porke el ja si savia giar komo propio los usos de los turkos, i el S-r. Menache, ke lo supo ke partio por Samokov foe ke i el tambien si alkelo ansi kavaos

1082                         Biografia de Tchelebi Jeuda Gavriel i Avraam M. Arie.                          1845

de mensil, de los mas foertes, kon la entision, de alkansarlo en el kamino, i tomarle la moneda, i en medio de el kamino ke el S-r. Menache ja los alkanso, foe ke non lo konosio, a Tchelebi jeuda de esto ke estava demodado de sus vestidos, i sigun ditcho ke los surudjis gritan las Naaras, i Tchelebi jeuda ke ja lo vido ke era el S-r. Menache i ke vinia tambien para el, li djo orden al sujo surodji porke li diera la sinial kon su Naara porke si pasara, sigun ke ja foe ansi i kon la furia grande ke ejos korian, lo decharon fin ke de ejos ja si alecho i ke mas ja non se vian, lo iso Tchelebi jeuda ke si bolto atras a Sofia, pensandose, ke ja tenia el tiempo de alkansar, por remeterlas ande ejos las remitian, i el estava en Sofia merandose su etcho, komo ke non lo iso este viaje, i el S-r. De Menache ke la estuvo en Samokov, i non topandolo, sin tadrar si bolto de moevo a sofia, lo todo kon la suja entesion, solo ke ja foe tadre, i ejos ke ja si enkontraron en sofia, i denpoes de aser todas las bochkedas i mas todos los menesteres ke foeron todos una NULLA es ke lo entendio, ke non iva a poder ser sin ke si lo konviniera kon ejos, i de esta forma li kalio, ke lo isiera kon las kondisiones ke Tchelebi jeude las kijo, i lo resivieron ejos este rekojimiento de las valutas, ke lo todo ja lo estan viendo ke era kon la grande energia ke ejos la tenian sin ke si espantavan por nada, ni menos ke pensavan para atras, i kon esto, era ke profetaven, i tambien, ejos tenian i grandes protejos, de los personages los mas altos, i mas ke sus kreditos eran mui grandes i non lis enportava si era ke

1083                         Biografia de Tchelebi Jeuda Gavriel i Avraam M. Arie.                          1845

lis podia kostar i algo de moneda,

            En este anio de 5605, ke Tchelebi Gavriel, era siempre en Filibe, okopado kon el negosio de las ropas, i era por lo todo ke el solo lo governava sin ke demandara dingunas enstruksiones de Samokov, i el era ke los asia todos los empleos, lo todo en su tiempo sin ke dechava pasar ni un dia, i el mismo se iva a las ferias de Pechta i de Vienna, ansi lo asia i kon las venditas, ke era el ke se iva tambien a las ferias, por aser las venditas, i esto era a su mas bien konsederavles grandes, i kon muntchas ganansias i siempre kon la union ermandad, i ansi era ke non li sovrava el tiempo, ni ke li vinia a el tino para vinir a Samokov i vijitar su Familia, i esto era kon anios ke lo kontinuava, i ansi foe ke en este tiempo el ja estava mui kanso, i tambien i algo enfastiado de el sujo gurbetlik, i lo todo non era komo agora ke tenian, algunas komoditas, i tambien sus boenos mantinimientos, solo ke ja eran foertes i sanos, i lo podian somportar i en este anio tambien ke a su ijo el S-r. Behoratche si li renovaron sus maladias, de la dolor ke la tenia en la urina, i en esta ves li foe mui foerte, i a esta kavsa li kalio ke si viniera a Samokov, por merar un molde para sanarlo, ke era mui sikiliado, de verlo los sufrimientos ke el sufria, i non topo otro molde mas de jevarlo a Iderne, ke ja avian mijor medikos, i tambien por ke trokara la klima, ke si avia mui muntcho aflakado, i esto

1084                         Biografia de Tchelebi Jeuda Gavriel i Avraam M. Arie.                          1845

sin tadrar, ejos partieron de Samokov i si lo jevo a Iderne, i lo djo en mano de los medikos de Iderne, i los koalas li dicheron ke kalia ke restara 6 meses, i iva aser entonses ke lo ivan a poder boeno sanarlo, i siendo ke ja foe konvensido, a esta proposition, foe ke li rogo a S-r. Tchelebi Haim Avigdor, grande merkader, i sus mui grande amigo, porke lo resiviera en su kasa, si entiende ke ja foe i kon su boena paga, i el koal ke ja si kontento, i estuvo en su kasa en todo el tiempo, ke lo kuravan los medikos, i lo merava i lo kudiava, mas muntcho de su propio Ijo, i los medikos ke lo ivan kurandolo era ke sufria mui muntcho, en las operasiones ke li asian, i en este tiempo ke estuvo en iderne i para ke si enbivisiera, li tomaron a un profesor, ke konosia el kante vokal, para ke lo enbesara a kantar, i el ke ja tenia bos boena i alta, i amava tambien en esto i mas porke ulvedara las dolores, i ke tuviera, ande enbeveserse, i era ke en kada dia li venia, i le dava liksiones de esto, de maneras de kantes, seja de los mekames turkos, i de kantikas (charkis) i de los pismonim, i de los PIJOTIM, ke si usan a kantar en los dias de los moadim en las KEILOD, i el KJAR entero ke es todos los mekames atados el uno kon el otro, i ansi lo todo ke existia en akel tiempo i ansi foe ke si enbeso lo todo mui djusto sin dingun jero, i koando si adjuntavan seja en los moadim, i Chabatiod, i bodas, era ke todos se ivan de el enbesandosen, i kantavan, los pismonim, ke toda la Familia se isieron eskrivir a un djonk a kada uno i todos kantavamos i oi tambien kantamos lo todo de akeos pismonim, ke para kada mekam

1085                         Biografia de Tchelebi Jeuda Gavriel i Avraam M. Arie.                          1845

tenia su pismon, i la charki, i los kantes de los PIJOTIM, ke los kantan i oi en Samokov, en las TEFILOD de todos los MOADIM, son todos ke S-r. Behoratche si los enbeso en Iderne, i el si los enbesava a los Hasanim de Samokov,

             I en todo este tiempo ke el estuvo en Iderne Kurandose, i de tantas operasiones ke li asian torna kon todo la deferensia era mui tchika i su S-r. padre ke ja lo vijitava siempre, i ke ja lo vido algo mas mijor foe ke si lo trucho a Samokov, i torna lo decho en el midrach porke estudiara kon Hr. Avraam Alkalai, i ke si okopava tambien sigun de antes en aser los empleos por los menesteres de la kasa, ke non kijo ketarlo a el tcharchi para ke non si kansara i ke non si sikiliara, porke era mui flako,

            Tchelebi Avraam ke era solo en este tiempo en Samokov, porke sigun ditcho ke Tchelebi Jeuda, era en Sofia, i Tchelebi Gavriel, en Filibe, ansi ke era todos los respondimientos, seja en los etchos de Samokov komo tambien i el etcho de la kacha, i los trokamientos de las monedas, i ansi i los remitimientos, i tambien las korespondensias seja kon el ajeno i estas de kon sus ermanos i mas todo el menester, komo la sentrala, ke lo todo dependia de Samokov, ansi ke foe mui kanso, ma torna kon todo, el ja alkansava i para aser las vijitas, i ande los begis ke esto lis kalia ke los vijitaran i reintchir sus komandas de monedas ke lis premija, i tambien tomarles los fieros, ke esto koando el etcho ja esta resentado anke ke ja se enkamina solo ma torna si kere i uno ken lo enkamine, no

1086                         Biografia de Tchelebi Jeuda Gavriel i Avraam M. Arie.                          1845

se por koalo era ke non si tomavan kon ejos a algunos de sus personales para ke los ajudara en sus etchos ke siempre foe ke ejos propios si lo lavoravan, sin ke foeran ajudados de dinguno otro,

            En kasa las mujeres aun kon todo ke ja si pasavan boenas, porke ja estavan aparte komiendo, ma una ves por otra las kuniadas tenian algunas deferensias, ke la grande si akechava, por esto ke non li apartavan para eja de las mijores kosas ke traivan para la kasa, a rason ke lo todo si merkava en un lugar i denpoes era ke si lo espartian a kada una sigun su menester, ke la Bu. Amadutcha i la Bu. Bulisu, komijan en una mesa, ke ja eran aunadas, i kon la koniada grande ke en veses tenian algunas avlas, era porke la Bu. Amadutcha avlava mas muntchiko i la Bu. Bulisu ke non si pasava tanto boena, era ke en algunas veses si anojavan, ma ja era ke tanto presto ja si desanojavan^[85] i eran komo de antes aunadas i vijitavan todas djuntas, i la Bu. Dudutcha ke era resin kasada, era ke eja no si mleskava en nada de los etchos de la kasa, otro ke eja si merava por si i asiendose sus plaseres, ke si adjuntavan kon la Bu. Bulisu, ke li plasia muntcho el pasatiempo, i se jamavan a Bulisu la de moi [moni] i a otras ansi sus visinas, i amigas i se tomavan los panderos, i estavan dias enteros kantando i bailando, i asiendo los mil modos de djuegos, i sus djentes las dechavan porke si kontentaran i se artaran de aser sus plaseres, a razon ke en akel tiempo era de esta manera ke si artavan de sus plaseres ke esto ja era muntcho koando las dechavan ja era mui boeno, i sus maridos eran tambien kontentes

1087                         Biografia de Tchelebi Jeuda Gavriel i Avraam M. Arie.                          1845

porke ejos tambien lo asian kon sus parientes i amigos, ke non avia en akel tiempo ke lo pasaran los ombres kon las mujeres en un lugar i lo todo era aparte, ke era grande vergoensa el estar los ombres i las mujeres en un lugar, sovre todo de pasatiempo.

            En el anio de 5606, a Tchelebi Avraam Li nasio, una IJA, i la jamaron MASAL-TOV, i en el parto lo isieron de mismo sigun de koando pario premirisa, i todos los parientes li mandaron los platos de parida ke usavan a mandarlos, ansi i los presentes, seja para la madre komo tambien i para la nasida, i su propia madre la kreo i la aletcho, a eja la amavan todos mui muntcho, porke eja en su tchikes, foe mui bonatcha i mui reposada, i eja koando ja foe un poko mas grande non si dechava sirvir, de dinguno, otro ke eja misma si asia todos sus menesteres, de tchika eja ke ja enpeso a frekontar la echkola, su natura era de konochijar, i platikar, kon las mutchachas, ke eran muntcho mas grandes ke a eja, eja era mui meujuda a eja non li plasia muntcho los djugos de las krijaturas, i sus parientes ke li m mandavan porke djugara, ma eja non si servia de ejos, ke mas muntcho li plasia el estarse sola en kasa, i pasarse kon sus livros i ofisios ke los konosia muntcho ke de djugar, eja si enteresava tambien i lo kudiava, en los etchos de la kasa, i ansi era ke todos la amavan, por la suja bonatches, ke tenia,

            En este anio tambien la esposo Tchelebi Jeuda i la

1088                         Biografia de Tchelebi Jeuda Gavriel i Avraam M. Arie.                          1846

kaso a su IJA la sigunda Bu. Riinu, kon S-r. Chelomo, el IJO de H. Avramatche Tatcher de Sofia ke el koal era merkader grande, i li vinieron muntchos konsfoegros para tomar a la novija sigun el uzo de akel tiempo, i foeron resividos kon muntcha onor, i en el tiempo ke estuvieron los konsfoegros era  ke en kada notche lis jamava a los parientes i a los amigos i komian i kantavan i bailavan, lo todo en la kamareta ke estava enkolgada la achugar, ke ja foe muntcha, i li djo 500 groches, de kontado, i siendo ke el uso era ke lis davan tambien i kavesera, broslada i esto de lavoro, de viena, i siendo ke non li dieron, era ke en kada okasion ke venia S-r. Chelomo a Samokov, mismo i denpoes ke ja avia 20 anios ke ja kasaron, era ke lis dava kechas por esto ke non li dieron kavesera, i la demandava, por ke si la dieran mismo mas tadre ke de esto foe ke en la una ves lis salio el etcho a ravias, i denpoes ke i el Chabad tambien ja paso ke i esto tambien ja lo saven sigun ke lo asian, i en el dia de alhad, ke lo asian el presiado de la achugar, i denpoes ke resivian i el kontado, era los konsfoegros ke la enpakavan la achugar, por mandarla a Sofia, i ejos alkilavan, kavajos, para todos los ke se ivan a ir a Sofia, ke todo este gaste de la jevadura de la novia era ke si asia de la parte de el novio, i el viaje lo asian seja los ombres komo tambien i las mujeres i las krejaturas, todos a kavajo, por rason ke en akeos tiempos non avian karusas or paitones, porke los kaminos no eran komo agora etchos choses, otro ke eran sigun de el tiempo de NOAH, kedados, i ejos ke ja arivaron a Sofia foeron resividos kon

1089                         Biografia de Tchelebi Jeuda Gavriel i Avraam M. Arie.                          1846

muntchos karchis i saltanates, a todos los ke si foeron ke eran lo mas muntcho de la Familia, i la boda la isieron tambien kon grande saltanat, i muntcho gaste, porke sigun ditcho ke H. Avramatche, Tatcher, era tambien uno de los mas grandes merkaderes, de Sofia, si gustaron i se alegraron de todas las 2 partes, i siempre bivieron mui kontentes i mui aunados, i su marido la amava, mui muntcho, i ke eja la Bu. Reino, ke ja si supo mui bien komportarse, ansi ke toda la djente de kasa la kerian muntcho, i tambien ke toda la djente de Sofia la respektan tambien mui muntcho, i eja por enfrentante ke es una mujer ke ja si save mui bien komportarse, kon toda la djente,

           Eja li pario a S-r. Chelomo 2 IJOS i 3 IJAS, el grande S-r. Presiado, i S-r. Esra, son i oi en la mijor posision, i mui onorados, sus negosios son grandes, i godros, i sus IJAS la grande Rusutcha i la sigunda, Rachel ke esta kasada kon S-r. Jomtov, su primo ermano, i la tresera, Sultana, i todas mui boenas, i eja la Bu. Reinu, ke bivio kon su marido, fin a el anio de 5645, i ke murio, paso la mas mijor vida ke poede ser, kon todo djusto, i denpoes fin a ke lo kaso a su IJO, el S-r. Esra, estuvo kon el, i denpoes, si foe kon su IJA la Grande Rusutcha, ke avia kedado, bivda de su marido, kon ke sus IJOS li reglaron una mesada, de a 150 fr. a el mes, i bivian djuntas, i mas tadre ke enbevdo tambien i su IJA, la tchika Sultana, ke su marido era en lennier [enjenier] de los kaminos, de fiero, si foe a la KINA, por ansi lavoro, i en el anio de 5661, ke tuvo el Ingles i las otras potensias, geras kon los KINESIS i estos ultimos, a los primeros

1090                         Biografia de Tchelebi Jeuda Gavriel i Avraam M. Arie.                          1846

ke mataron foe a los enjenieres ke estavan mesurando los kaminos i el S-r. Pesaro su marido ke estava tambien kon ejos, mansevo i el sigundo anio ke avian kasado, foe ke kedo bivda tambien i eja, i ansi foe ke si li vino i eja en su kasa, i biven djuntas, las 2 IJAS kon la madre, su karakter, es mui alegre, i siempre buchka los lugares de pasatiempo, i si va de kasa i se adjunta lo mas muntcho, kon las mansevas, i le plase muntcho el djugar, en las kartas, i non si enfasia dias i notches enteras de djugar, eja es mui ikonomiosa, i le plase muntcho la limpiesa, i su natura es mui sana, su poerpo, es proportional, i mui deretcha, es delgada, los ama i los kudija, muntcho a sus IJOS i los vijita siempre,

            En este anio vino a Samokov, H. Behoratche, de Tchelebi Aron, de Sofia, por rogarle a Tchelebi Avraam, a ke li diera una karta de kredito, por viena, ke el koal ja era merkader, i de mas antes, i Tchelebi Avraam por aserle plaser, i komo pariente ke ja era, lo iso ke li djo una karta, i el S-r. De H. Behoratche, sin ke nada tadro, lo iso ke si foe a viena i merko, kon esta karta, las ropas ke li podijan ser mas presto vendivles, i kon arivarle las ropas el tan presto ja iso las venditas, i rekojo toda la moneda, en su petcho, i non kijo mas saver, por pagar a dinguno, i mas tadre el si deklaro de falit, i se foe a Vidin i se asento, sin aser mas dingun etcho, i Tchelebi Avraam ke ja lo supo esto i ke estava tambien foido en vidin, el si foe presto a vidin por merar, de tomarle koalo foesa, ma lo todo foe en baldes ke non li pudo tomar ne un santim, i

1091                         Biografia de Tchelebi Jeuda Gavriel i Avraam M. Arie.                          1846

ansi foe ke li kalio ke kontara por el 115 mil groches, i de este tiempo mas nunka H. Behoratche, si pudo levantar, ni menos a dinguno nada pagar, i mas tadre ke el ditcho H. Behoratche vinia a Samokov, siempre si li abachava en su kasa, i estava kon semanas enteras, komo musafir, i tambien era i mui menesteroso ke non tenia nada, ke anke li tenia etcho tanto danio, torna kon todo lo resivia kon kara al alegre, i lo detinia en su kasa i koando se iva a ir, el li dava, i presentes, seja en moneda, i otras kosas,

           Tchelebi Gavriel ke ja lo avia traido a su IJO S-r. Behoratche, de ederne, ke los medikos de edirne non lo podieron sanarlo, sigun de loke premia, i era ke torna sufria, de sus dolores, i por poderlo sanar, lo iso ke si lo jevo a Kostan, por decharlo i de los medikos de Kostan tambien merarlo, i ejos ke ja estuvieron en Kostan i los medikos ke lo ivan kurandolo, era muntcho ke lo asian sufrir, i de las operasiones, ke li asian era ke muntchas veses si kedava desmajado kon oras enteras, ke su padre, era ke sin ke lo viera su IJO, estava jorando, de verlo a su uniko IJO tanto sufrir, ma kon la esperansa ke ja iva a toparla melisina, lo ivan todos los 2 somportandolo, i el dia ke si li iva aser la operasion ke lo tenian por mui grande reselo era ke joravan i el padre i el ijo, ejos estuvieron 3 meses en Kostan, i se tomaron una kasa a kira por sus konto i tambien i sirbideras, i gisanderas, i entre los dijas se kamenavan por las plasas i los paseos, i tambien en los lugares de pasatiempo, lo todo para ke se ulvedara, los males su IJO, i koanto a los,

1092                         Biografia de Tchelebi Jeuda Gavriel i Avraam M. Arie.                          1846

gastes mismo ke li eran grandes non era ke si li estava enportando en tal ke si sanara, i koando ja estuvo boeno i sano ejos tambien restaron ainda muntchos dias en Kostan lo todo para ke si enresiara boeno, tambien i de su salud, ke avija kedado mui  flako, i ansi era ke todos los 2 visto ke ja estuvo sano i boeno eran boratchos de la alegria, ejos merkaron muntchos presentes, por todos ejos, i se vinieron a Samokov gustosos i alegres, i Tchelebi Gavriel si foe torna de mismo a sujo magasen de Filibe, por kontinuar en su etcho,

            En este anio kon el etcho de el saraflik ke es el trokamiento de las monedas, lis foe muntcho mas grande ke de los otros anios, i ansi era ke non lis abastava, los dias por apartarlas, era ke i en las notches tambien estavan las notches enteras apartando, las monedas de plata i de oro, ke era ke tenijan por kada partidas de las piesas ande tenijan mijor la konviniensa, i lis kalia ke las apartaran por mandarsen ande era el lugar, ke lis konvenia, i esto, ke lo asian era antes ke ainda, komieran, ke siendo kerian eskapar, era ke si lis asia mui tadre, i las kriaturas i mismo las mujeres, ja si dormian, sin ke komieran, i los mosos ke ja las kaentavan a unas koantas veses la komida, ja eran i ejos enfasiados, porke no era una or 2 i 3 notches, otro ke era en kada notche sin enfastiarsen, i siempre kontinuando, ke lis amanesia, i sin komer, ke ejos ja si ulvedavan ke si keri i komido, i los mosos disian entre ejos ke esto era komo las vidas de los hamales, ke estavan pasando ma a ejos de nada non si lis enportava, siempre era ke las monedas de plata lis konvenia

1093                         Biografia de Tchelebi Jeuda Gavriel i Avraam M. Arie.                          1846

por mandarsen a Salonique, i las de oro, a Kostan, i ansi lo asian entre el dia ejos sus okopasiones eran grandes, por rason ke las monedas ke lis davan a los begis era lo todo en kontos korientes, i esto lis kalia ke jevaran sus livros en mui regla, i tambien ke era ke lis ivan i a resivir los fieros ke lis tomavan siempre, i sovre, todo lis kalia tambien i ke estuvieran i al koriente, de sus etchos, de los Begis, por saversen komportar, por darles i moneda, i esto era lo todo kon ke los ivan vijitandolos, i se podian enbesarsen, i en la kacha, ke siempre, lis kalia ke la dolachijaran, ansi era ke los dias non lis abastava, ma non si kansavan, i sus reposo era solo en los dias de los Chabatiod, i de los JAMIN TOVIM^[86], ke reposavan i en estos dias non lavoravan ni menos si lis venian kartas era ke no las avrian, i por dingun etcho, non platikavan,

            En kasa las mujeres, siempre si rekojian en un lugar, i ejas pasavan mui bien kontentas, de lo todo, ejas koando vijitavan, seja ande las parientas komo tambien i ande sus amigas, eran todas, djuntas ke si ivan, ansi de mismo eran i alas kriaturas, ke djugavan djuntas i non si peleavan, non tenian dingunos puntos en las komidas seja los ombres komo tambien i las mujeres, sus kasas eran siempre jenas de lo todo, sin ke lis mankava nada, ansi eran tambien i mui bien mobelijadas, i asijan tambien grandes saltanates, lo koal ke en dinguna otra kasa non avia esto ke ejos lo tenian, i de las mijores komanias ejos si mantenian, i kon la karne ke en akel tiempo era mui manka para los Djidios, i avijan muntchos pleitos, entre los Djidios

1094                         Biografia de Tchelebi Jeuda Gavriel i Avraam M. Arie.                          1846

para merkarsen la karne para Chabad, i H. Josef, el mejanedji ke era tambien i el kasap, ke en mismo tiempo, era i el merkader de la karne para ejos, lo asia, ke al presipio apartava, el menester, de la karne ke era para ejos, kon ke lis disia a todos los djidios ke estavan esperando, na ke esto es para arientro, i por lo restan era ke lis disia agora pelejavos vosotros, i koando ja si disia para, arientro ke es para los ARIES? mas non tenija dinguno el animo de avlar, porke seja la vaka komo tambien i la butika ja era sujas, ejos resivian siempre a muntchos musafires en sus kasas,

             En este anio de 5607, li nasio a S-r. Behoratche, Jshak G. Arié una IJA. la Behora i la jamaron LEA, de mismo foe ke li nasio tambien i a Tchelebi Jeuda una IJA i la Jamaron JAEL, i kon todas las 2 paridas, lo isieron sigun ke lo asian en todas las otras, paridas kon kamas altas, sovre todo la kama de la Bu. Dudutcha ke foe premirisa, li isieron kon muntchos broslados, ke esto era la kontentes de las paridas, i lis mandaron a todas las 2 a muntchos, platos de las dulsuras de las paridas ke si usavan ke era el masapan, i de mismo todas las mujeres i los ombres las vijitavaron, i sus propias madres las kudiaron i ejas propias las kudiaron [aletcharon], todas las paridas, eran mui sanas, i de nada non sufrian, ni menos ke si akechavan, i todas kaje ke mui kolai ja parian, i ansi era ke tanto muntcho, non las kudiavan, i en el tiempo ke ejas eran preniadas, de mismo komo

1095                         Biografia de Tchelebi Jeuda Gavriel i Avraam M. Arie.                          1847

i de nada non si goadravan, i ande los medikos tambien non si aderesavan, i por demostrasion a esto ke ja los parijan mui boenos, es ke las miren a las personas ke foeron en akel tiempo paridos, i enfrentante a los ke son agora paridos ala franka, era ke avija tambien i en okasion de algunos menesteres, en las preniadas, ma era solo a las komadres ke si aderesavan, i tambien a las mujeres viejas, ke ja si topavan tambien mui bien kontentas, i en akel tiempo era mui grande vergoensa el aser saver, las kosas de las mujeres a los ombres, ejas goadravan mui muntcho el djudesemo, ke las jamamos agora fanatikas, ejas las mujeres todos en general, era ke kaveos, non amostravan, i deskalsas, sin tchorapes, non salian, i en bel (talia) non kamenavan sin ke si vistieran de un tcherkes, palto ke era largo, lo todo delantre koal unke ombre ke foera, i koando salian a las plasas ke esto ja lo saven ke sin el feredje, i el jachmak or la toka blanka, en sus kavesas mui bien tapadas, non salian, ni ke kamenavan, i kon los ombres, muntcho non avlavan, i ansi en muntchas kosas era ke muntcho si goadravan, ke esto todo turo fin la guera Turka-Rusa, en el anio de 6637, i de 638,

A rason de algunas deferensias letigavles^[87], ke tuvieron los 2 ermanos los mas grandes, por kistiones, solamente de kasa, i de estas de entre las mujeres, foe ke Tchelebi Jeuda si merko una kasa, ke es la ke mora oi, la Bu. Bulisutcha, mujer de el S-r. Davidtchonatche, i li kosto 24000 groches, i sin ke li iso dinguna reparasion si paso en eja, i por la kasa ke estavan si lo konvinieron entre los ermanos, ke Tchelebi Gavriel si tomo, el apartamento, ke

1096                         Biografia de Tchelebi Jeuda Gavriel i Avraam M. Arie.                          1847

mora i oi su IJO S-r. Behoratche, i Tchelebi Avraam, si tomo, el otro apartamento, ke es en el ke mora i oi, S-r. Mochonatche, Jshak Arié i ejos si espartieron tambien i la mobilia ke tenian, sin dinguna deferensia, ke lo todo lo isieron komo ermanos, ke si esparten, i a esta rason ejos si apartaron tambien i los gastes de la komania ke lis era de una bolsa, i kon el gaste de la vistimienta ke ja la tenian aparte, foe i ke si eskrivian kada uno esto ke si travava, i tenian partidas aparte, i kon esto mas non tuvieron dingunas deferensias sovre los gastes, seja estos de el vistir, komo tambien i estos de el komer, i los 2 ermanos Tchelebi Gavriel i Avraam, ke eran en un kortijo, ejos si lo konvinieron, kon el gaste de la komania, i se gisava, en la kasa, de Tchelebi Gavriel i komijan en una mesa, kon ke si ivan Tchelebi Avraam kon su Familia, seja en los dias komo tambien i en las notches, i komijan en un lugar, i tambien kon la grande pasensia ke ejos la tenijan era ke bivijan mui aunados, i eran, tambien i kontentes, por rason ke davan muntcho, en todas las kosas de pasadas, seja los ombres, komo tambien i las mujeres, lo koal ke esto en el tiempo de agora non poede ser, i ansi de mismo, lo pasava tambien i Tchelebi Jeuda, ke era solo en su kasa, i todos los 3 eran mui kontentes, ansi de mismo era ke en los etchos de la plasa, anke tenian en veses, algunas kontraditchas, lo todo sovre algunas de las operasiones, ke las asian, i de mismo ke si letigavan ma ja era, ke lis pasava mui presto, i mui presto si lo ulvedavan, ke era, siempre por el kamenar adelantre, ejos siempre si vijitavan i se katavan mui

1097                         Biografia de Tchelebi Jeuda Gavriel i Avraam M. Arie.                          1847

muntcho de los unos a los otros, i Tchelebi Jeuda en pasando algo de tiempo, si frago, en la kasa ke merko, ke ja era de un kampo mui grande, ke era de 5000 metros koadrados, i en frente, de la kasa, ande era, foe ke frago, un lugar para chadirvan, ke lo jamavan enfrente^[88], ke lo iso komo un grande salon, a su deredor, todo de vintanas mui grandes, i en medio de este salon era ke kontenia el chadirvan, ke estava de kontino koriendo la agoa, de un tchoro, sovido komo de 4 metros, de altura, i en la havus, soltava, pechkados bivos para ke foeran nadando, i de la una parte, le iso, 2 kamaretas, la una bien grande, i la otra mas tchika, i lo todo lo mobelio mui bien, i se merko tambien i un Sefer-tora mui tchiko, i lo metio, en este salon, ke desian en las tadres de los Chabatiod, i de los Moadim, la Minha i el Arvid, ke era ke li vinian, muntcha djente, i la disian kon el Minian, de 10 personas, i mas tadre ke el ja non salia tanto a la plasa, era ke si asentava, en los dias, en este Chadirvan, ke li era sigun ditcho vis avi, a la kasa, i a su deredor, era el kortijo entero todo de goertas, i ermosos arvoles, de su manera, i de tchimenlik i de foentes koriendo, en unos koantos lugares, i tambien i Chadirvanes, ke era mui ermoso i mui saludoso, de los ermosos goesmos seja de las rosas, komo tambien i de los arvoles, i los aires, ke tenia, de todas las 4 partes, i el koal Chadivan existo fin a el anio de 5659, en el tiempo ke morava, sola la Bu, Bulisu mujer, de S-r. Davidtchonatche, i siendo ke non lo goadraron, foe, ke si iva derokando i ansi foe ke lo alempiaron entero, i lo isieron tambien goerta,

1098                         Biografia de Tchelebi Jeuda Gavriel i Avraam M. Arie.                          1847

i en el anio de 5613, Tchelebi Jeuda iso un grande trokamiento, en esta kasa, kon ke adjunto i otras 3 kamaretas, i de moevo la mobelio, i aparte tambien li iso i una reparation, en el selamlik, ke lo tenia, en el dichari-avli, ke en el koal mas tadre koando ja non era ke salia de el en todo a la plasa, era ke si asentava, entre los dias ke kontenia 3 kamaretas, i kahve odjagi, i resevia, a los begis, i otros ke li vinian a vijitarlo, i tambien este selamlik li servia por koando li vinian musafires turkos, i era ke durmian en este logar, ke ansi era el uzo turko, i en el anio de 5628, frago un salon ensima de la kasa entero, de una largura de 25 metros i de 12 metros de antchura, i lo mobelio, de la mijor mobilia de akel tiempo, ke en el resivia las vijitas, de gala, i koando li vinian el kolel entero a vijitarlo i ansi por las bodas ke tanian, ke podian sentarsen de 350 a 400 personas, i en toda la vida ke bivio Tchelebi Jeuda, foe en esta kasa ke estuvo, i era mui kontente, porke non mankava nada en la kasa, ke tenia todo demasia,

            Sigun ke ja lo eskrivi, en la partida de los 2 ermanos H. Elijatchuno i H. Rabenutcho, en el N. 615 de la dita biografia, por el magasen ke lis avrieron a estos ultimos S-res, en Hevra por venditas de ropas, foe ke si foeron djuntos kon Tchelebi Gavriel por resentarlos, i ke sus entision ja foe por ejos ir apoko a poko travarsen porke sigun ditcho ke ja eran kansos, i tambien ke ja tenian bastante de etcho en samokov, i ansi foe, ke lo resento i de lo todo sigun de loke lis paso ja esta eskrito en largo en la partida, sujas, ke

1099                         Biografia de Tchelebi Jeuda Gavriel i Avraam M. Arie.                          1847

Tchelebi Gavriel era ke kontinuando en su magasen i era ke siempre lo estava enmankandolo, i ke esto ja lo iso mas presto, i ke koando ja foe enteramente limpio de el magasen kon ke si trucho algo de algunas de las ropas ke non las pudo presto venderlas, a Samokov, lo iso ke i el tambien se vino a Samokov, i lavorava, djunto kon sus ermanos ke ja avija muntcho lavoro, para todos,

            El Kaimakan (governador) de la sivdad de Samokov, en este tiempo era, Jasin Bei, ke el koal era tambien de Samokov, i era patron de Maadenis, (fabrikas, de fiero) i asian grandes etchos, kon ke li davan muntcha moneda, sin ke li tomavan dingunos enteresos, i esto a rason ke era el Kaimakam, i les eskapava muntchos etchos, de estos de las monedas de las kachas, ke tenijan maneras de profitos, i prevalimientos, ke i muntchas veses li davan tambien i a el parte de estas ganansias, i ansi era ke los keria muntcho bien i lis eskapava, todos sus etchos, en todos los puntos, ke ganaron mui muntcha moneda por su kavsa, i Tchelebi Jeuda ke era el ke estava mas muntcho ande el, muntchas veses li dava lugar en sus vignas, i de mismo, sus kotchis (paitones) por ke si foeran todos la familia entera, i si estavan kon semanas enteras en las vignas, por kampanias, i se gosavan i se alegravan de todo lo boeno, i esto lo asian unas koantas veses en el anio, i mas tadre ke foeron mas amigos, li demando Tchelebi Jeuda, a Jasin Bei, porke li enpresentara, or ke li vindiera un pedaso de kampo, en algun lugar, serka de la sivdad, ke esto ja dependia de los kaimakames, por fragoarse i el un lugar de ansi

1100                         Biografia de Tchelebi Jeuda Gavriel i Avraam M. Arie.                          1847

kampania, por ke li sierva para irse kon sus kriaturas por el enverano i ejos tambien, i el koal ke sigun ditcho ke non los rompia, lo iso, ke si foeron en un dia djuntos a el kampo de la tchelik-hana, ke es en el kampo de koando se sali de la sivdad de la parte de el varoch, de abacho, endose para el kasal de Dragochin, i li mesuro, komo 5 dekares de kampo, ke era serka de la sivdad komo un kilometro, i esto si lo iso presente, kon ke lo enpatrono kon los dukomentos, ke eran menester, i tchelebi Jeuda li djo las grasias menesterosas, i se gusto mui muntcho, de esto ke ja iva a tener, lugar por kampania, i mas tadre el frago, una kampania, ke la Jamavan la KULE, i la iso de 2 etajes, altos i kontiniendo 8 kamaretas, i salones grandes kon muntchos kiochkes, i la fragua la iso en medio, de este kampo, ke el deredor lo sero todo, kon, tchites, de palos, trensados, i tenia mui muntcha sevda en esta KULLE, i mas tadre isieron traer i un tarak^[89] (machina de peinar la lana) ke esto non avia en Samokov, sovre todo, ke la mas grande endustria, de Samokov era el lavoro de las lanas, ke todas las krestianas, lo asen ke lo techen el chajak, ke era un negusio bastante grande, i avijan tambien muntchas machinas, ke lo trensavan los gaitanes, ke venijan de la Bosna i de otros lugares, lechanos, muntchos merkaderes i lo merkavan, i el ditcho tarak lo metio, en este kampo, kon ke li frago tambien i un lugar ke era menester, por esto, i era ke avijan mui boeno a traer, las krestijanas, sus lanas por taradijarlas, kon ke lis tomavan a una tchika paga por oka, ke lis era mui levjanesa, i eran kontentas, ansi era ke i

1101                         Biografia de Tchelebi Jeuda Gavriel i Avraam M. Arie.                          1847

otros tambien traivan, i arason ke era rodejado el kampo kon los tchites, era ke si pudrian i ke kalia los renovaran era ke kon la lesensia de el jasin bei lo iva engrandisiendo este kampo kon meter los tchites mas para afoera, i ansi foe ke este kampo devino muntcho grande, i sovre este engrandisimiento, los turkos ke ja eran mui selosos, i ke non podijan nada disirle, a rason ke los mas muntchos ja lis eran sotometidos, i les devijan muntcha muneda, i akecharsen tambien non lo podijan ke i en esto non lis aprovetchava, ke el Kaimakam ja era kon ejos, i por aser mal lo asen ke ke las solevantan a las krestijanas, i las ensienden tambien i a las turkas, en konvensiendolas kon disiriles, ke este tarak ke lo metieron los Saraflis, en la KULLE, non vos estach pensando, ke vos va arivar un dija, ande ke vach a morir todas de ambre, por rason ke para vosotros mas etcho non vos va a dechar, i adetras de este tarak, van a traer i las, machinas de felar la lana, i tambien para techer los chajakes, ke ansi sin ke vos tadrech, aseldo de presto rekojervos, i aonavos muntchas en un lugar, i jevavos kon vosotros, palos, i piedras, i todas ala una andavos kon gritos i maujos, a el lugar de el tarak, i rompeldo, i rompelde los djamis, i mas todo loke vech, en la kole, revataldo, i deroka koalo lo podech, i aselde los mil danios, sin ke vos espantech por nada, i ejas esto ke ja lo kijeron sintir, foe ke mui presto ejas, ja vinieron en un lugar, i lo isieron esto ke rompieron i algunos danios, lo todo, sigun de loke li diktiaron los grandiosos, turkos, i sin ke pudieron nada aserles, porke eran muntchas, i de

1102                         Biografia de Tchelebi Jeuda Gavriel i Avraam M. Arie.                          1847

esto ejos los ermanos foeron mui sikilijados, por rason ke aparte, de loke avijan gastado, en esta, KULLE, serka 50,000 groches, iva a ser tambien ke ja era i espanto, de ir en eja, ke i esto pasando, algo de tiempo, lo isieron de moevo la reparasion, mas mijor, i el tarak lo vendieron, a en sierto, Otluk-kiovli, sin ke pidirieron, i en el lugar ke estava el tarak, lo isieron tcharkis, para trensar, los gaitanes, i de este tiempo i endelantre, li trokaron el nombre, de KULLE, i lo jamaron TCHARKIS, i de esto ja estuvieron kontentes, i sin dingun espanto ejos se ivan a esta kampania, i esto denpoes ke ja si aparto Tchelebi Gavriel i ke lis kedo a Tchelebi Jeuda, i Avraam, i lo mas de los dijas de el enverano ejos si estavan, i dormijan, kon semanas enteras, i en los dijas de Chabatiod, i de los Moadim se ivan la Familia entera, i komijan todos en djuntos, i kantavan i se alegravan, ejos desijan, tambien i las Tefilod, de los Moadim i de los Chabatiod, kon minian ke tenijan i Sefer-tora, i les vinijan todos los parientes, i amigos a disir las tefilod, i denpoes lis davan HEVRA, i modos de desajunos, i dulses i rakis, a todos los musafires ke lis vinian, sigun ditcho ke era de una lichura de komo un, kilometro, de la sivdad, i sigun moestra LEI, ke si kiria i el IRUV por poder, transportar, las kosas menesterosas, foe ke lo isieron i esto ke ja mi akodro i jo koando, lo mitieron este iruv, ke en medio de el kamino, enteraron una redoma, ke non se loke kontenia, esta redoma i kon esto era ke si kontava, komo un kortijo, i kamenavan mui liberos sin tener, dingun pekado, era ansi sus gostos, i pasatiempos, i

1103                         Biografia de Tchelebi Jeuda Gavriel i Avraam M. Arie.                          1847

en mismo tiempo tambien era ke non dechavan pasar, nada de los usos relegiosos, ke agora lo jamamos fanatismo, lo mas muntcho de boenos era ke eran mui aonados, i se respektavan mui muntcho de los unos a los otros, i por esto poede ser ke si podra disir, ke pasavan boenos i en sus negosios siempre lis ivan avantes, sin konto, i esto foe, fin a el anio de 5621, i en este anio seja por el solo [selo] ke lo tenijan no solo los turkos era tambien i las otras nasiones, i en una notche, la kemaron la kulle entera, kon todo esto ke kontenia, ke estava jena mas muntcho de las kasas ke tenijan en Samokov, i mas non kijeron fragoarla, por muntchas kavsas, i tambien ke ejos en este tiempo ja tuvieron muntchas kampanias, en las vignas i los maadenes, sigun ke ja van a meldar adelantre, i kedaron solo los tcharkes, i mas tadre ke ja non uvo etcho i en esto los vindieron, i resto un kampo vasio, ke oi lo enpatrona, S-r. Chemoelatche, el IJO tchiko de Tchelebi Jeuda, i lo alempio i lo iso tchair, ke toma komo 3-4 karos de paja,

            Todos los 3 ermanos ke dekontino lavoravan kon mui grande reposo i saverisio, en todos sus negosios, i a lo todo ke ja alkansavan i sin ke foeran ajudados de otro dinguno, era i siempre, ke si lis engrandesian sus etchos, i lo todo lo Javavan kon muntcha regla, ke de esto era ke si lis enselava i mas muntcho por esto ke los konsederavan mui muntcho ke koando si disia los sarafes, era komo nombrar el nombre de el KSAR^[90], era solo ejos ke si okupavan el etcho de el kolel, i los 75 % de los gastes ke avijan para el kolel era ejos ke lo gastavan, i era ejos ke djusgavan a el poevlo, seja las

1104                         Biografia de Tchelebi Jeuda Gavriel i Avraam M. Arie.                          1847

deferensias ke las tendjan entre ejos komo tambien i estas de el kolel, i todo esto si eskapava, ande Tchelebi Jeuda, i los mansevos S-res Behoratche, i Mochonatche, kontinuavan en sus estudios, kon Hr, Avraam Alkalai en el midrach, sujos, i era ejos ke si okupavan en las merkidas de los menesteres de las kasas, ansi eran tambien i las mujeres okopadas, en los menesteres de sus kasas, i kudiando a sus kriaturas, kon todas las desiplinas de kasa, i de sus pasatiempo tambien atras non kedavan en todas las okasiones,

           En el anio de 5608, ke vinia a samokov, muntchas, veses, el S-r. Bedros AA. ke el koal era uno de los ermenis ke lo tenian el deretcho, de resivir, todas las monedas de oro i de plata, i tambien i estas de las kachas de el Governo, ke era solo a ejos, ke era alesensijado ke las podijan trokar, ke esto todo ja lo eskrivi mas antes, en mas largo, i ke ejos tambien de la manera ke si lo  tenijan konvenido, i ke ja las trokavan, foe ke en esta ves li isieron un daavet, (soare) i li kombedaron a muntchos de los begis i otros, ansi personajes, de los mas onorados de Samokov, lo todo en la onor, suja, i komieron djuntos, ke lis jamaron tambien i tchalgis, i Kiotchekes, (bailaderas singanas,) i mas ansi okabases^[91], ke son los Asedores de reir, i las komidas a la moda turka era ke metian a 30 i 40 modos de komidas, i muntchos modos de dulses, i de los bevrajes, de los mas finos, ke era i es esto mui grande saltanat, i tambien ke

1105                         Biografia de Tchelebi Jeuda Gavriel i Avraam M. Arie.                          1848

lis kostava, i muntcha monedas, i en sus estar en la mesa, i komiendo i al keéf, i la alegria de los boenos bevrajes, i el tchalgi de lis estava kantando, vinieron en avla kon el Bedros AA, disiendole ke en Pasardjik avijan muntcho mas mijor tchalgis, de los de Samokov ke este ultimo lo mas muntcho de su estada era en pasardjik, i ke koando kaso S-r. Behoratche, el IJO de Tchelebi Gavriel, isieron traer tchalgi de Pasardjik, para la boda, i e ke eran en la trupa, ke avian un sierto Josef Adut, i H. Tchelebon Mesan, ke este ultimo lo savija djugar el violon, (keman,) mui ermoso, seja porke era de 16 teles or ke lo konosia mui bien el djugarlo, i ke el koal H. Tchelebon, en akeos dijas si avia morido, i a Tchelebi Jeuda ke li plasia muntcho, los tanies, i parisiendole ke el keman tambien ajudava, foe ke si lo demando unas koantas veses de su mujer, este keman porke si lo vindira, ma la mujer a dingun presio non si kontentava, a venderlo, i el S-r. de Bedros AA. li dicho ke este mui siguro ke el ja si lo va a poder merkarselo, sigun ke ja foe ansi, ke poko tiempo pasando, el S-r. de Bedros AA, ke ja estuvo en pasardjik, si lo merko por 500 Gr. i se lo mando, ke de esto si gusto mui muntcho i li eskrivio, karta de agradisimiento, i kon esta sevda, Tchelebi Jeuda, li tomo, un maestro por ke lo embesara a su ISO S-r. Mochonatche, a djugar, en el keman ke kontinuo en esto mui largo tiempo, i es de este tiempo ke S-r. Mochonatche, es ke save djugar el violon, i fin a el anio de 5661, este violon lo detienen ke es de 16 teles,

                 Tchelebi Gavriel kon Tchelebi Avraam los 2 ermanos,

1106                         Biografia de Tchelebi Jeuda Gavriel i Avraam M. Arie.                          1848

ke komijan en una mesa, kon ke si iva en kada dija i en las notches kon su mujer, i kreaturas, a la kasa de Tchelebi Gavriel, sigun ditcho ke era kosa maraviosa, la amistad ke si tenijan, i ke si respektavan i por esto pasavan i bivijan mui kontentes, ke todo estavan riendo, i kantando, ke seja la Bu. Amadutcha komo tambien i la Bu, Bulisu, savijan i konosijan la mas mijor metoda de el kantar, kon la boka, i Tchelebi Avraem ke ja tenija 2 kreaturas, ke eran tchikas, i ke tambien la Bu. Bulisu mi S-ra madre ja estava, preniada, de mi, i en las notches de el envierno ja lis era mui foerte ketar a las kreaturas, ke si i dormijan tambien, koando ja kedavan mas tadre, ansi foe ke lis kalio ke si apartaran, ke esto lis foe a todos los 2 mui grande siklet, a karar ke la primera notche, joraron de todas las 2 partes, ma torna lo mas muntcho siempre era ke komijan en un kavo, kon ke si jevavan de los unos a los otros sus komidas, i en los moadim kaje todos siempre era ke si iva tchelebi Avraam a la kasa, de su ermano Tchelebi Gavriel i komijan en un kavo, i en todos los primeros dijas de Pesah, seja las notches komo tambien i los dijas ja era siempre ke si li iva Tchelebi Avraam, ke esto lo kontenuo, fin a el anio de 5628, mismo ke Tchelebi Gavriel ja si avia morido, i en Sukod, eran tambien en un kavo, fin a este tiempo, ke asijan para todos los 2 una suka, i la masa, la isieron siempre en el orno de la kasa de Tchelebi Gavriel, ke esto foe fin a ke si salio de esta kasa porke si avia fragoado en otro lugar, una moeva, ejos eran en un kortijo, sin ke tuvieron apartado nada, era ke todos los 2 se sirvijan

1107                         Biografia de Tchelebi Jeuda Gavriel i Avraam M. Arie.                          1848

de todos los lugares de el kortijo, ejos nunka non tuvieron deferensias por los lugares de el kortijo a disir ke este lugar apartien a el uno or a el otro, ke esto todo kale disir ke era porke si respektavan muntcho, i se goadravan para non arivar, en las kosas ke lis podia sontraer, deferensias i litigas,

                        Ejos todos los 3 ermanos, sin kansarsen, ke eran koando viajando, por todas las partes, i siempre lavorando en las operasiones de el bankerlik, kon ir dando a sumas enportantes, de moneda kon enteresos, i era mui poko ke si okupavan, en los etchos de la merkansia, de las ropas ke las tuvieron de mas antes, i ejos nunka no kijeron ni buchkaron a merkarsen algunos mulkes, porke ejos i la butika ke la tenijan era ke pagavan una tchika kira, ke foe en este anio ke un sierto turko ke lis devija una sierta suma de moneda, i ke non si las pudo pagar, lis kalio kon muntchos rogarles, ke li merkaron la butika ande ejos estuvieron muntchos anios, fin ke si fragoaron magasenes, foertes, i ejos toda sus moneda, ke rekojian en los dijas si las traivan kon sembiles a kasa, por las notches, ejos kon dingun djidio non tuvieron en estos tiempos dingun trato, i esto por ke todos si lis enselavan i lis buchkavan de aserles danios, i era solo para los pasatiempos ke si rekojian i se adjuntavan, ala kavesera era el konosido H. Chemoelatche el chichko, ke los rekojia, a los otros kompanieros, ke el koal era el mas DAL-KAUK, asedor de reir, ke lis asia los mil modos delos djuegos para ke si rieran, i ke pasaran la ora, en las notches de los alhades de el envierno, ke

1108                         Biografia de Tchelebi Jeuda Gavriel i Avraam M. Arie.                          1848

ja era komo un uvligo ke kalia lis vinieran a pasar la ora, sigun ke los vijitavan en los primeros dijas de los moadim, i ejos djugavan al djugo de los fildjanes^[92], ke era un djugo ke en kada ketadura de kada fildjan era ke kantavan una kantika ke ja eran apropiadas, las kantikas de los fildjanes ke esto todo lo konosia H. Chemoelatche, kosa ke non los dechava lados de aserlos areir, ke esto or ke lo asijan a el presipio en las kasas de todos los de la Familia Arie i denpoes tambien era ke si lis iva en sus kasas,

                Kon los gastes seja de el komer i seja de el vistir, de este tiempo i endelantre ja lis foe muntcho mas grande, anke ke ejos non si asijan servir, de muntchos mosos, mismo ke i ja los tenijan, eran ejas las mujeres ke gisavan, i lavavan, i metijan i ketavan la mesa ke komijan, i ejas eran ke traivan las komidas a la mesa i ejas lis davan a lavar las manos en la mesa, i la mesa era ke espandijan al presipio, una sofra, por denpoes rekojer kon las migas or algunas kosas ke kaivan, i en medio de esta sofra, metijan una banketa komo de medio metro de altura, i ensima un sini de kovre or de tavla, i un pichkir a el deredor, i se asentavan todos en bacho kon ke lis metian kavesales, todos rodejados en este sini, i por traer las komidas a la mesa ke non eran manko de 5-6 platos, era ke si levantava la mas manseva mujer de la mesa i la traiva, i de moevo si asentava, i komijan todos kon la mano ke non avijan ni tchenis ni menos pirones, i koando el sini era mas grande era ke algunos de la mesa non alkansavan, a el plato, i era ke non komia otro ke iva a

1109                         Biografia de Tchelebi Jeuda Gavriel i Avraam M. Arie.                          1848

la kusina por komer seja de lo de la mesa ke sovro or otra kosa, porke era vergoansa el disir ke eja non estava komiendo, i de esto era ke las noeras ke sufrian mas muntcho de todos, i a ejas anke ke lis venia pesgado, ma ejas savijan ke esto es ser noera, ejas lavoravan kon muntcha atansion, i las respektavan mui muntcho a las esfoegras i tambien ejas si espantavan, era ke las esfoegras lis ivan a komandar komo de vistidos si devija de vistir, i eran sotometidas a todos sus komandos, ejas non podijan nada avlar mismo kon sus maridos adelantre de sus esfoegros, ejas lis kalia ke si levantaran antes de sus esfoegras, ejas non eran liberas de tomar nada de komania de la kasa, mismo si tenia ambre, or ke li desejava alguna kosa, seja de fruta or de dulse i kahve, siempre eran desasperadas, i esperavan, koando a las esfoegras lis iva a venir a el tino ke tienen noeras, i ke lis ivan a dar, i ansi era ke lo mas muntcho, joravan ande sus madres, i sus madres era ke las regalavan i las kontentavan ke lo todo en mui sikreta porke si lis aravijavan sus esfoegras, es por esto ke todas las noeras lo disen ke Esfoegra ni de baro boena, i por enfrentante avijan muntchas nueras ke las asijan sufrir, a sus esfoegras koando kedavan bivdas, kon ke si lo rekodravan todo esto eskrito, ma ejas ja si deskulpavan, ke esto era la desiplina en frente de las noeras, ke i a eja li isieron de esta manera,

                        Todas 3 konijadas, ke ja tenijan sus kasas aparte, todas foeron muntcho nekotcheras, i de mismo i ikonomeosas, ejas si levantavan demanijana, i alempiavan i prontavan, a lo todo porke los

1110                         Biografia de Tchelebi Jeuda Gavriel i Avraam M. Arie.                          1848

ombres non venijan a komer en los dijas a kasas, i era todas las 3 ke lis mandavan a komer a sus maridos a komer en la butika i ejos lo asian ke komijan djuntos, i esto non era kon ora fiksada para komer a detras de sus okopasiones, ke muntchos dijas avija ke komijan i a las 4 i a las 5, denpoes de medio dia, solo ke ja era ke si vinian en las tadres de temprano a kasa, a rason ke si espantavan de kedarsen tadre, i ejas en los dijas sus okopasion era koando non tenijan ande vijitar, solo kon las kriaturas i en aser tchorapis de lana, i prontarsen algunas kosas por koando ivan a ver algunas vijitas, i los pasatiempos de las vijitas eran, lo mas muntcho kon kanter i bailar, i aser djuegos ke son maneras de tchikas representasiones, de las vistimientas antigas ke esto ja lo tenijan, i tambien estorias de la vida de las mujeres antigas, de los tiempos de antes, ke para esto ja avijan mujeres, ke lo savijan aserlo, i vestirsen de akeja manera, i esto si era ke non lo alkansavan a eskaparlo en la una vijita era ke lo prolongavan por otra, i ansi era ke si areivan i se kontentavan, i se topavan muntcho kontentas solo ke de esto non lis kontavan nada a sus maridos, ke el akordo ke lo tenijan entre todas las mujeres era ke non devijan nada kontar ni aser saver a sus maridos, ke este sikreto lo goadravan muntcho,

            En el anio de 5609, li nasio, a Tchelebi Avraam, un IJO? ke el koal foe ke mi pario, mi madre ami en dia de viernes, la

1111                         Biografia de Tchelebi Jeuda Gavriel i Avraam M. Arie.                          1849

tadre, en EREV Kipur, 9 Tichri, i me jamaron Tchelebi Moche, al nombre, de mi papu, ke viene a ser ke devengo jo el treser Tchelebi Moche A. Arie en la Familia ARIE, ke su jo el ke eskrivi la dita biografia, porke responda a el arvol, de la Geneologi, ke lo fondo el primer, de entre la Familia Arie, ke foe mi S-r. Esfoegro, S-r. Behoratche Jshak G. Arie i sin enfastiarse, el pudo rekojer, las enformasiones, de el ditcho arvol, en un tiempo, de 16 anios, ke lo todo lo iso mui djusto, i si entiende aparte de loka el sakrifikava, el tiempo el tambien lo izo, ke gastava i muntcha moneda, ke esto ja lo enkontraron en unos koantose lugares, ande el li kalia ke gastara, por tomar las enformasiones, mas djustas, i esto lo izo fin a el anio de 5661, ke ja si avijan levantado lo mas de la Familia de Samokov, i es ke foe etcho, de koando, vinieron la Familia Arié a Samokov, ke foe en el anio de 5553, por el tiempo ke bivieron en Samokov, ke es, fin a el anio de 5661, i foe de este anio de 5660, ke jo enpesi a rekojer,las enformasiones, de esto ke las estan meldando, i lo alkansi a tomar las notas, fin a el anio de 5674, ke son 14, anios, i jo tambien sin enfastiarme, foe rekojendo, esto ke parisio, de eskrivirlo, i lo todo kon asigurarme ke ja foeron verdad, i es agora, ke lo esto eskriviendo en blanko, sigun ke en kada kolla, ja eskrivi i la data koando lo foe eskriviendolo lo todo por ke si sepa las vidas ke las pasaros moestros padres, en Samokov, i esto seria tambien de demandarse, koalo lis kavsaria, seja a el S-r. Behoratche, komo tambien i ami para metermos en esta pena el uno 16 anios i jo 14 anios,

1112                         Biografia de Tchelebi Jeuda Gavriel i Avraam M. Arie.                          1849

de estar pidriendo el tiempo i sakrifikando tambien suma i de moneda, es a disir ke en la vida la persona sigun savido ke ja tiene unas koantas veses ke li arivan deferentes momentos de los bienes i tambien la kontra, algunos malares ensomportavles, ke lo mas muntcho son estos de Familieres, ande lis kavsan algunos lo asen ke si matan i otros si etchan a la boratches, i al komardjelik, i algunos se fuen sin ke saven ande si van a ir i otros se enlokesen, i esto todo por ulvedarsen, i los otros ke lo pensan mas muntcho, si entremeten, en okupasion de eskrituras, lo todo tambien por ulvedar, lo todo kon la entision, ke ja va a trokar, es aki tambien por ansi rasones ke esto de sus partidas de kada uno ja lo poeden saver fin a un grado, i non por algun enteres, i aki lis kontare uno de los momentos de apretos, era en el anio de 5660 ke jean, estava kontinuando sus estudios en Genove, i en el tiempo de sus examenes, el tadrava de mandarmos kartas, i su madre, ke lo keria tener sus kartas en kada sigundo dija, era ke notches i djas enteros estava jorando, i Sofi ke era tchika i ke la via a su madre siempre jorando, i non topando otra kosa koala disirle ke eja si esperto de sintirla jorar, kon reposo li dicho ansi: mama, mama, ja abasto jorates, mira ke mas, non ti va a kedar jorada, i esto ke la iso areir, foe ke reposo por akel momento, i ansi tambien otras resones, muntcho mas enportantes, i esto seja en el tiempo, ke tomava notas i ansi tambien i en el tiempo ke la esto eskriviendo en limpio, i Dio, kijera, poder tener la foersa para eskaparlo de eskrivir, si entiende esto ke pudi tomar

1113                         Biografia de Tchelebi Jeuda Gavriel i Avraam M. Arie.                          1849

notas, i algunas kosas de el tiempo de agora ke la esto eskriviendo

               En este anio tambien li nasio i a Tchelebi jeuda un Ijo i lo jamaron NAIM? I ES ESTE EL S-r. Naimatche, ke avrio la kasa de Banka en Kostan, kon la firma Arie Baruh Koen & C-ie. en el anio de 5631, i el era el derektor de la Banka, el estuvo en Kostan 6 anios solo, i su mujer kon sus kriaturas en samokov tambien solos, i en este tiempo foe solo 5 a 6 veses ke vino todo a Samokov, el en todos los Chabatiod i los Moadim, porke era aparte de su mujer i kreaturas era ke siempre jorava, anke ke su haver i sus amigos non lo dechavan solo, i esto kontinuo fin a el anio de 5637, ke vino el mismo a Samokov i esto a rason de la gera Turka-Rusa, i se jevo a su familia a Kostan, ke por su vida ke el la paso i de esta ke i oi la pasa en la partida de su Biografia ja lo van a meldar, i es de regretar ke denpoes ke el murio, foe tambien ke murio, i su uniko ijo mansevo i ke non estuvo kasado, Ferid (Efraim) i ansi es ke si depiedre el nombre, ke esto foe en el tiempo ke esto eskriviendo en limpio la dita Biografia,

                 Ansi de mismo, foe en este anio en el 25 Nisan ke i li nasio tambien i a S-r. Behoratche G. Arie un Ijo i lo Jamaron Moche ke es este el S-r. Mochonatche ke jevo la firma de el etcho de su padre 15 anios, por las rasones sigun ke eskrivire algunas de ejas en sus partidas, i es este tambien el S-r. Mochonatche ke si okopo mas muntcho por reglar los etchos de su Tio i koniado, ke S-r. Mordehai B. Haim Tatcher ke foe marido de su ermana M. Behurutcha

1114                         Biografia de Tchelebi Jeuda Gavriel i Avraam M. Arie.                          1849

a rason ke estuvo longo tiempo manko de el meojo, ke de mismo van a enkontrar i algunos pasajes, de esto,

           En todos los tres partes, lo isieron kon muntcho saltanat i alegria i gusto, i de mismo todas lis mandaron todos los platos de las dulsuras ke usavan a mandar a las paridas i tambien i los presentes, seja de los parientes komo tambien i los paridos ke lis davan dukados seja a las paridas komo tambien i para los nasidos, ke esto era un punto grande komo non lis davan, i sus propias madres i los aletcharon i ejas mismas kon muntcho kudiado los kriaron,

            Tchelebi Gavriel en este anio la deroko la kasa ke la tuvo tomado de koando si espartieron las kasas ke ejos tenian, i es la propia kasa ke mora i oi su Ijo S-r. Behoratche, i la frago enteramente moeva, ke iso una kamareta grande para resivir vijitas, i 3 otras medianas, i una tambien tchika, i en medio li iso una sala grande kon ajates, un boen banio kon su tevila, 2 magasenes, i aparte de la kasa iso kosina kon kileres, i hanbares, i boen orno, i mas todo el menester por una grande kasa, i en poko tiempo el la eskapo de fragoarla, ke gasto en eja 50,000 gr. i denpoes ke la mobelio kon todo djusto el si paso en eja i bivio toda su vida en esta kasa muntcho kontente, ke non tenia mankura de nada,

            i en el anio de 5634, su Ijo S-r, Behoratche, frago ensima de esta kasa, un salon, grande de 25 metros de lergura i de 11 metros de antchura, djunto i una tchika kamareta, i de un ajat, ensima de la eskalera, kon ke si iso traer a los dulgeres maestros de

1115                         Biografia de Tchelebi Jeuda Gavriel i Avraam M. Arie.                          1849

Filibe, a estos ke los tuvo tchelebi Avraam koando frago so kasa en el anio de 5626-28, i gasto en este salon, 105000 gr. kon ke iso algunos  trokamientos seja en las kamaretas komo tambien i en la sala de el primer etaje,

              Ma de antes de enpesar la fragua de este salon i mismo de koando enpeso a prontarse el material ke ja tuvo pretensias, de S-r. Mochonatche J. Arié, ke li mando a disir, ke non si metiera en fragua, porke non lo va a dechar fraguar, i tambien ke li iva a kostar muntcha moneda, a rason ke S-r, Mochonatche iva a tener algunos danios, ma el S-r, Behoratche non lo sentio, i sin nada mankar el foe kontinuando en el prontamiento de el material, i ke ja enpeso la fragua, ke a deredor entero li iso todo de grandes ventanas, i koando ja foe serka de eskapar de fraguarse, S-r, Mochonatche lo djo al djusgo, demandando el deretcho de harem, ke sigun la Lei turka es ke non alesensia, porke seigan vistas mujeres, mismo de parientes koando son algo lechanas, i ejos ke si apararon a el djusgo, foe ke S-r. Behoratche si defendia, kon disir a los djusgadores, ke aparte, de moestra Lei Djudia, ke non mos defende ni ke tenemos el uvligo de goadrar el harem, ke i esto en la Lei turka tambien por una familia koando es tambien non defende, ke mosotros somos primos ermanos, i mi ija ke es su noera, tambien non defende, i el Dajan ke tomo en konsederation, el defendimiento de S-r, Behoratche, i porke non uvieran desgustos entre la Familia, los konvinieron kon ke lo uvligaron a S-r, Behoratche, porke aga una pared alta i enrechada de tuvlas

1116                         Biografia de Tchelebi Jeuda Gavriel i Avraam M. Arie.                          1849

fin a el grado, ke non se li ivan a ver, de el salon, de el S-r. Behoratche, a las ventanas de el S-r. Mochonatche, ke esto lo izo, i a raszon de esta pared, lis kavzo el enojamiento, ke lis turo 2 anios i denpoes, eran jelados en sus frekontar, ke i esto fin a un grado, ke si lo ulvedaron, i pasando, ainda komo otros 15 anios, de la fragua de la ditcha pared, ke tuvo el menester, de algunas reparasianes foe ke S-r. Behoratche, li demando, a el S-r. Mochonatche, si es ke lo keria ainda esistara [existara] la pared, i ja tenia el menester de renovarla anke ke a S-r. Mochonatche, esta pared, li kavso el eskorisimiento de algunas de sus ventanas, ma lo somportavan, i en esta okasion li dicho ke si la derokava, iva a ser, mas mijor, ke akejo foe un, jero, i ansi foe derokada, i dechado, una bacha pared solo por apartar el kortijo,

            koanto a sus negosios, ejos de mismo los 3 ermanos, todos sin kansarsen kontinuavan en todas sus merkansias i estas, de los dechkontos, ke era lo enportante, i tambien esto de el saraflik, i los mansevos, S-res Behoratche, i Mochonatche, eran en el Midrach kontinuando en sus estudios, de mismo i las mujeres, kada una en su kasa kudiando, seja en la kasa komo tambien i sus kriaturas, i gozandosen de todo lo boeno porke siempre foeron indo i antchandosen seja en sus reposo komo tambien i en los gastes, ke ja foe kon la mano mui antcha de este tiempo i endelantre, i mas ja enpesaron a non merar las ikonomias, seja las mujeres komo tambien i los ombres^[93], i las kriaturas, ke ejos engrandisieron el personal de sus mosos, ke

1117                         Biografia de Tchelebi Jeuda Gavriel i Avraam M. Arie.                          1849

seja por en kasa komo tambien i por sus butikas, i tambien ejos los ombres, si komportavan de mas gala,

              En el anio de 5610, Tchelebi Jeuda lo kaso a su IJO el grande S-r. Mochonatche, kon la Bu. Amadutcha, la IJA de Hr. Tchelebi-David B. Josef, de Sofia ke era muntcho onorada, i rika, i ke la novia, ja es mui boena, i mui ermoza, i entelejente, izieron la boda kon grande saltanat, i kon muntchos tchalgis, i de samokov, mandaron sigun el uzo de akel tiempo a muntchos konsfoegros, los mas onorados estos ke eran pertenesientes, ala onor de Hr. Tchelebi, ke en sus estar en Sofia, ke foeron resividos todos en su kasa lis iso grandes onores, i se komporto sigun de las mas mijores reglas de akel tiempo i denpoes ke ja estuvieron en Sofia i lo izieron lo todo tambien sigun todos los uzos, ke esto ja lo eskrivi en unos koantos lugares, si vinieron, a Samokov, kon todos los de la kaza de Hr. Tchelebi, i aparte tambien uvieron i muntchos otros sus amigos i parientes kombedados, i de otras sivdades, i la novia ke ja trucho muntcha achugar, i boen kontado, i eja tambien mui boena, foe ke isieron la boda kon grande saltanat, tambien, ke en todos los 8 dias de la boda, tenian mezas jenas de djente a komer, i aparte, tuvieron i a muntchos turkos i krestianos, ke i ejos vijitavan i komijan uvieron muntchos modos de reprezentasiones, de kara-jozes, ke las reprezentavan a el uzo turko, ke eran mui agradavles, i de estalar de reir, ejos de todas las

1118                         Biografia de Tchelebi Jeuda Gavriel i Avraam M. Arie.                          1850

2 partes, foeron siempre mui bien kontentes, i eja foe i es mui bien vista, seja en kasa de todos sus djenitores, komo tambien i de toda la Familia, biven kon su marido mui aunados, i se aman i se respektan, muntcho, eja la Bu. Amadutcha es una mujer, mui reposada, i muntcho meujuda, i eja kudia muntcho por la kasa, i sus kreaturas, a kada persona, sigun su valor, sovre lo todo ke eja non es de el entodo orgojoza,

Jo Tchelebi-Moche, ke era de una edad, de un anio, i sigun ditcho, ke lis davan sus padres, presentes, en dukados koando nasian, foe ke este presente mi lo iso mi S-r, Padre, de un doblon i ami ke mi lo kuzieron en mi karapusa ke jevava, kon mas i otros, modos de kozas, ke lis kozijan en las karapusas, por goadrarlos de el ojo-malo, i mi dechipla ke era, Revka, ke es agora, mujer, de S-r. Jshak B. Chem-tov, ke mi jevava en su braso, i sin ke eja lo vido kon mi lo arankaria, foe ke si lo jevaron i denpoes de aser todas las buchkedas ke foeron nada, foe ke non toparon, i lis kalio, ke mi lo izieran otro ansi doblon, ke es dukado de 4 minsas en un kavo,

            Tchelebi Avraam, en este anio li iso un trokamiento, en su kasa ke la tomo koando si apartaron los ermanos, de las kasas siendo ke el ajat ke avia de mas antes, en la sala li foe tchiko, ke para aserlo mas grande i mas ermoso, lo bozdejo, i lo iso grande i redondo, kon ventanas muntchas i grandes, i tambien la sala la izo, muntcho mas grande, lo todo mui ermozo, i aparte izo ke la eskalera,

1119                         Biografia de Tchelebi Jeuda Gavriel i Avraam M. Arie.                          1850

ke estava de la parte de afoera, la metio arientro por ke si serara lo todo kon una jave, i aparte iso tambien i boena kosina, kon su orno, i li avrio poerta de la kosina, para el dichari avli, por servirsen por esta poerta para los menesteres ke lo traivan para la kosina, i ansi otras kosas, porke non si pasara por la sala, sigun ke esta manera, ja esta i agora, i en el anio de 5619, adjunto a esta kasa, kon fragoar un koltuk^[94], (tchika kamareta) ma ke por este koltuk, tuvieron algunas deferensias, bastante letigavles, i de boenas ravias, kon su ermano Tchelebi Gavriel, ke este ultimo lo defendia por rason, ke las ventanas de este koltuk, meravan a la kamareto, ke el dormia, ke era la kamareta de el banio, ke la jaman, i siendo ke lo podia verlo, foe ke lis kavso, las ravias, a tiempo ke non tenia otro lugar por ande avrirle, ventanas, ke de las 3 partes, ke era paredes, i denpoes, de las muntchas ravias, si lo avinieron, kon ke Tchelebi Avraam, ke mitiera, en el koarto de las ventanas, en lugar, de djamis, tavlas, ke era por koando ivan a estar asentados en el koltuk, en los minderes, ke non si podieran versin las ventanas, de la kamareta, de su ermano, (kale seja ke non etchavan las notches los perdes,) ke a rason de estas ravias, ke tuvieron, i sigun eskrito de mas antes, ke los primeros dijas de Pesah, i tambien i las notches, ke Tchelebi Avraam se iva a komer, kon su meza en la kasa de Tchelebi Gavriel, foe ke en el Pesah de este anio ke non si foe, i Tchelebi Avraam si lo Jamo, a H. Menahem Matatia, en todas las 2 notches, i en los dijas, djunto kon su mujer, la Bu. Mirutcha, i lo pasaron

1120                         Biografia de Tchelebi Jeuda Gavriel i Avraam M. Arie.                          1850

en este Pesah, todos los 2 ermanos, aparte, ke este apartamientos lis foe a todos los 2 ermanos mui foerte, i mas tadre ke ja lis paso las ravias, ke esto existia mui muntcho ke lis pasava, mui presto, i enpesaron a kontinuar, lo todo komo de mas antes, en ulvedando a todo lo pasado, komo ke non uvo nada, i foeron djuntos fin a el anio de 5628, ke si salio Tchelebi Avraam de esta kasa, i siendo ke esta, kasa, si la vendio, a su IJO S-r. Behoratche, G. Arie, foe ke en este mismo anio lo deroko este koltuk, i lo decho un kampiko, ke si servia por una tchika goerta, i mas tadre koando si aparto tambien su IJO, de S-r. Behoratche, ke es el S-r. Mochonatche, lo frago de moevo,

En este anio ke los todos Begis ja lis foeron kon a sumas mas grandes, devdores, i viendolos, ke en todas sus operasiones ke eran en todo mui adelantre, i el selo ke lis foe tambien mui grande, lo asian ke tenijan adjuntas, de koala manera, derokarlos, i ejos ke si antcharon muntcho mas seja en los saltanates, komo tambien i en los gastes, i se avijan muntcho a decharsen servir, de muntchos mosos, seja en sus kasas ansi tambien i en la plasa, era solo el Kaimakam de la sivdad Jasin Bei ke los protejava, ejos ivan muntcho a las vignas, (kampanias) djunto kon sus mujeres i kreaturas i akompaniados de mosos armados turkos, kon los paitones, ke lis tomavan de los begis, i pasavan por los Tcharchis, ke esto lis kavsava a los turkos ainda mas muntcho el selo, era ke muntchas veses los i amenasavan, ma esto tenijan ke la energia, lis era mui foerte ande, ke de dinguno non si espantavan ni metijan al tino ansi avlas, ke

1121                         Biografia de Tchelebi Jeuda Gavriel i Avraam M. Arie.                          1850

en okasiones, era ke ejos, los davan a el djuzgo a algunos turkos, koanto a el etcho de las kachas, de el governo ke ejos las tenian, i ke ejos si enpesaron a enteresar, los etchos ke asijan, i alkansando a saver, ke las ganansias lis eran grandes, lo podieron aser, ke si isieron traer, a un sierto Bedros AA, ermeni ke era de Pazardjik, i lo metieron por kachero, ke i esto turo komo 3 meses, i por via de el Jasin Bei, lo izieron ketar, i la tomaron torna ejos la kacha, i a esta kavza, lo asian ke algunos de los empeigados, ke si kijeron mleskar, en el etcho, de la kacha, los asijan ketar, de sus empeigos ansi i kon estos ke ejos lis devijan i si mleskaron tambien en esto foe ke lis kortaron los kreditos, i lis vinijan denpoes a rogarles, i a deskulparsen, kon ke entregavan a los kavzantes, i de akejos era tambien ke si avengavan, sin ke dinguno lis podija venir kontra,

Tchelebi Jeuda, era el gabai de el Kaal, i el si asentava en la teva, i jamava a Sefer Tora, a ken el lo topava de djusto i esto era ke jamava kon sira a todos los djidios, i tambien koando i alguno tenija fiesta, era la alija entera suja kon ke pagavan una tchika taksa, siendo ke era el el Gabai era tambien ke si okupava de el etcho de el kolel entero i lo todo dependija de el i el los djusgava i todos ja si kontentavan a esto ke los kondinava, i les metia las taksas de los dasios de el kolel, i el nomenava a los memonim, i los parnasim i chamachim, i a mas todo el personal, por el enkamenamiento de los etchos de el kolel, era en esto ke avijan las deferensias en los pleitos de el kolel, ma el non los sentia, solo ke en kavso de

1122                         Biografia de Tchelebi Jeuda Gavriel i Avraam M. Arie.                          1850

menester, de moneda non dechava a ke sufrieran los enteresos de el Kolel, i lo asia ke lo gastava, todo el menester, el de su bolsa, i sovre esto non era solo Tchelebi Jeuda, otro ke todos 3 ermanos, lo asijan siempre esto, ke i por esto tambien tenijan el solo [selo], los mas muntcho de los djidios,

               Las mujeres, si rekojijan lo mas de los dijas de la semana, kada dija en una kasa, lo todo solo entre la familia, i ejas de este tiempo, enpesaron a enbevesersen solo, sovre sus afeites i las vistimientas, ke sus platikas era, todo de esto, ejas ke las vijitavan mas muntcho a las hanumes, de los begis, ke eran todas de Kostan i ke tenijan vistimientas de las mas mijores, i tambien los afeites, enpesaron i ejas tambien a decharsen lavorar, sus vistidos ke si los kortavan moevos, kon klabudan, i sirma gaitan, i de tertil lo todo de oro, en sus chalvares de sedas i de panios, i fermelas, i tcherkeses, i sus sapatos, i maneras de las velas por su tokejos, de sus kavesas, ke esto eran las vistimientas de akel tiempo, i lo todo ke si traivan i turkas, para ke las enbesaran seja a vistirsen i seja tambien, i a tokarsen, las kavesas, a los usos turkos, i tambien, merkavando las turkas muntchas maneras de sus afeites, kon ke las enbesavan sigun ke los devijan de emplejar, aparte, si asijan tambien traer, i a turkas ke konosijan el gizado, si entiende, de lo mas fino, para ke lis gizaran en okasion i en mizmo tiempo ke i las enbezaran, tambien, a ejas, los gizados, de los turkos, i tambien i los modos de las komidas dulses, i los kompotes, de todas las frutas

1123                         Biografia de Tchelebi Jeuda Gavriel i Avraam M. Arie.                          1850

i los cherupis, ke avia de malina, i de merdjan^[95], i vichna, i ansi de mas i otras frutas, i era dijas enteros ke estavan enbevesidas, lo todo en esto, i esto ke lo saven agora, es de loke foeron en este ditcho tiempo, enbezadas i de madre a ija, ke si esta kontinuando, i mas ainda tadre ejas kontinuando, en ansi kerensiozas, i agradavles kozas, i frekontando ande las Hanumes, i ke la una koza akareja a la otra, si konsintijan ke non estavam, kapatches, de saversen komportar, seja enfrente de sus maridos, komo tambien, i de los personajes mas grandes ke a ejas, ke i para esto tambien ke ja avijan, turkas enbesaderas, lo izieron, ke angajaron, a ansi turkas, i lis vinijan a 2 i 3 vezes a la semana, i lis davan liksiones, por ansi puntos i tambien las enbezavan avlar la lingua turka, en djunto kon su TON i a todas estas turkas eran mui bien pagadas, i en las vijitas, ke avijan en las mujeres, djudijas de otras families, anke eran mui bien kombedados, era ke lis ivan mui ralo, ejas mas tadre ke ja foeron mas idokadas, foe ke mas ja non kijeron ni se endeniavan, a lavorar, en los etchos de la kasa, sigun ke lo azijan de antes, otro ke ja foe lo todo por vija de los mosos i mosas, i esto tambien lo engrandisieron muntcho, el personal, i a razon ke ja non avija en koalo lo pasaran el dija, ejos enpesaron a enbevesersen, en las goertas, para ermozejarlas lo todo para el visto, ke esto ja lo tenijan los lugares, mui grandes en todas las kasas, i tambien los arvoles, i de moevo tambien sembrar, de los modos de frutas, i de los goesmos agradavles, ande golija el kortijo, entero, i para esto tambien eran las

1124                         Biografia de Tchelebi Jeuda Gavriel i Avraam M. Arie.                          1850

turkas solo ke lo savijan aser, las ermozas moestras en las goertas i sembrar, las rozas, de mudos i de maneras seja de goesmos, de las klaveinas, de maneras, i los cheboes, i ansi mas muntchas, i tambien de estas las ke non tenijan golor, ke era solo por las sujas ermozuras, i para esto eran muntchos dijas ke estavan lavorando, lo todo las turkas, ke es la verdad, ke era mui ermozo, i ansi es ke toda goerta, or rozas, ke las veremos, agora mozotros, non mos es koza de maravijas, porke ja las tuvimos mozotros, muntcho mas mijor, en las moestras propias kazas, i sovre esto de las goertas, ja lo van a enkontrar, en uno de los pasajes de adelantre, de koala manera, mi S-ra. Madre, los tellejo los Cheboes, kon varak, kolorado, i blanko, los de la goerta moestra, en una ves, ke si le iso una soare, a el Vali Abdurahman Pacha, en moestra kaza, i ansi tambien era ke i de estas kozas se selavan seja los Turkos komo tambien i las otras nasiones, ma ejos, komo non si espantavan, era ke non metijan ne atino de koalo foera ke avlaran, kalo ke sepan tambien ke los turkos lo tenijan mas grande el selo por esto ke las asijan lavorar a las turkas, en siendo ejos los S-res de la tiera, i es la verdad ke en otras sivdades esto non avija ke lavoravan seja turkos i non kere ditcho turkas ande djidios, ma en Samokov, ja lo azijan, i tambien ke i eran mui bien pagados, i esto ivan solo ande los sarafes,

              En el anio de 5611, li nasio a Tchelebi Avraam un IJO

1125                         Biografia de Tchelebi Jeuda Gavriel i Avraam M. Arie.                          1851

i lo jamaron Refael, es este el S-r. Refaelatche, ke si foe el primer de la Familia Arie, a estudiar en las lingoas ajenas en Vienna, i es este el S-r. Refaelatche, ke lo abandono, a Samokov, el primer, de los vinientes, de el Linage, de Hr. Tchelebi, Moche A, Arié i se foe a Sofia, por azer sus negosios mas grandes, i tambien bivir mas kontente i repozado, porke el foe prisigido, tanto, seja de los Djidios, i tambien de los Kristianos, denpoes, ke el foe, 9 anios, prezedente, de la komuneta, djudija, seja sinagogal, komo tambien i echkolar, i ke sakrifiko, seja moneda, komo tambien, tiempo i salud, por el fragoamiento, de el lokal de la echkola, de Samokov, i por el en deretchamiento de todos los etchos de la komonita, i tambien foe 9 anios, miembro, de el sovet, de el gradski sovet, (manesipalita,) de Samokov, i porke siempre el buchko, por la deretchedad, a los kavos, foe amenazado i medio kondenado, ke por esto el sufrio muntcho fin a poderse delebirar, i kon este parto tambien lo izieron sigun de todos los otros, ke lis mandavan los platos de parida i los presentes i los dukados seja por la parida komo tambien i por el nasido, i de mismo la vijitaron, i todos los uzos otros sin nada mankar, el de su madre propia foe, kriado i kudiado, ke de el presipio el foe algo flako, i lo mas muntcho era malato, ma rezio, de la salud, i mas tadre el ja foe sano i boeno, i en este mismo anio tambien li nasio i a Tchelebi Jeuda, una IJA, i la jamaron TAMAR, ke es esta la S-ra Tamarutcha, mujer, de el S-r. Moche Jshak Arié eja es una mujer ke li plaze muntcho, de okuparse en bien fizensias, i eja tambien konose,

1126                         Biografia de Tchelebi Jeuda Gavriel i Avraam M. Arie.                          1851

mui bien la manera, de komportarse, kon todas las personas, i kon esto eja es ke profita a saver, de todas las moevas, i los sikretos de kada uno, eja save tambien boltar el linguaje, de las mujeres, en los tiempos ke si topan en algunos apretos, para la parte boena, ansi i mas otras, ke en algunas partidas ja lo van a enkontrar, por eja algunos pasajes, i kon eja tambien si li iso lo todo de mismo sigun de todas las paridas, i su madre la kreo i la kudio ke i eja tambien en su tchikes foe mui flaka, ma siendo bien kudiada, eja de vino mui sana i boena,

               En este anio ejos los 3 ermanos, kon un akordo ke lo tuvieron, ejos li merkaron el medio maaden de Hadji Ibraim, Kabran, ke era en el kazal de radoil, kon sus 2 vignas, ke eran en rudech, komo 3 kilometros lechos de la sivdad, i el nombre de el maaden era ke lo jamavan orta maaden, ke esta merkida ke ejos la izieron foe a razon, ke el Hadji Ibraim Aga, ja li avija suvido la devda a grandes, sumas, fin al grado ke ja non estava alkansando a pagarles, ni menos los enteresos, i koando ejos ja si enpatronaron, tambien lo lavoraron i foe ke en el mismo anio ke los fieros estuvieron en grande pujita pudieron ganar, en el primer anio 70,000 gr. i esto ke ejos dieron grandes foersas por lavorar, si entiende kon meter, grandes kapetales i a esta kavsa, en este anio tambien ejos lis merkavan de todos los otros maadendjis, kaje la mas grande partida, de sus fieroes, i kon esta echpekulasion, ejos tambien ganavan i mas muntcho de las merkidas ke lis azijan, i este maaden koando si espartio, Tchelebi Gavriel

1127                         Biografia de Tchelebi Jeuda Gavriel i Avraam M. Arie.                          1851

en el anio de 5614, lis kedo a Tchelebi Jeuda i Avraam, ke lis avija kostado, por 80,000 gr. i por este presio ejos si lo resivieron, ke mas tadre ejos li merkaron tambien i el otro medio maaden de el Hadji Ibraim, por el presio de 105,000 gr, kon sus otras 2 vignas, i de mismo lo lavoravan kon grandes kerensia, i siempre era ke ganavan de el mas muntcho de todos los otros maadendjis, por la rason ke metijan kapetales grandes, ejos denpoes fragoara seja en el maaden komo tambien i en las vignas, en todas, kasas por kampanias i esto lo todo grandes, i altas de a 2 i de 3 etajes, i en todos ejas ejos se ivan i se estavan kon semanas, enteras, kon sus familias, era ke en las vignas, tenijan kampos mui grandes, lo todo rodejados, de sus paredes de piedras i de tchites, ke avijan bostanes, por los sembrados de todos los zarzavates, (lugombris,) i de litchugas, i otras, ansi bedruras, lo todo por sus menesteres, i aparte avijan goertas, sembradas, de modos i maneras de las rozas las mas mijores, kon sus chadirvanes i foentes koriendo dekontino kon la montchedumbre de los tchoros, mui godros, avijan tambien i lograr [logar] por muntchos kovanes, por tomarles la miel para sus menester, de las kazas, i de las seras era ke azian los sirios, ke davan en Kipur a el Kaal por ke foeran kacher enteranente, mantenijan vakas i kavras, por tomarles las letches, ke aparte de loke bevijan i koajavan jagurtes, i batijan por, ketar manteka, i los ajeranos, lo todo por sus plazeres, ke era lo todo kon abondansa, i montchedumbre, las mantekas si batijan a foersa de la agoa, kon machines, ke si rodejavan en las hoentes, i aparte,

1128                         Biografia de Tchelebi Jeuda Gavriel i Avraam M. Arie.                          1851

tenijan tcharkes, kon sus chiches largos de fiero, para koser, los kebapis, filandolos^[96] en estos chiches, ke si jama chich, kebabi, i se kosijan rodejandosen a foersa de la agoa, kon poka lumbre, i 6 7 oras, de tiempo, ke era una karne de karneros engodrados, ke si asija komo maadjun, blanda, i mui savroza, i ansi mas komo estas kozas, ke azen todos los plazeres de la persona, i siendo ke non si poede mas eskrivir ke ja al ainda mui muntchas ansi kosas ma non si abastese ni tiempo ni menos papel, ke algunos de los kiridos meldadores, ke agora estan meldando en el tiempo ke esto eskriviendo, me dizen ke esto eskriviendo en mui largo, ma esto si keri meldado mui avagar ke jo de eskrivir ainda non mi a enfastiado, ke DIO kijera, tuviera la pasensia para kontinuar adelantre, anke ke siria eskrituras baldias, algunas de ejas, i en 5630 ke si aparto i Tchelebi Avraam mi S-r. Padre, de los IJOS de Tchelebi Jeuda, su ermano, tambien foe ke el ditcho orta maaden de radoil, lis kedo tambien i a ejos, i de mismo ejos lo lavoraron fin a el anio de 5636, djuntos los 4 ermanos, i mas tadre, ke i ejos los ermanos, seja el S-r, Davidtchonatche, komo tambien i mas tadre, i el S-r, Naimatche, ansi i S-r, Chemoelatche, ke si apartaron, foe ke li resto este maaden solo en S-r, Mochonatche, i en 5638, ke ja foe la gera Turka-Russa, i ke si avija algo derokado, en el anio de 5640, li izo una tchika reparasion, i lo lavoraron en Hevra, kon S-r. Hristo Srebenisa, i kontinuaron komo 3 anios, ma non tuvieron dingunos profitos, i lo vendieron a un sierto Radoil pop Hadji Vasil, kon las 2 vignas, en el kazal de mahalejovan, por,

1129                         Biografia de Tchelebi Jeuda Gavriel i Avraam M. Arie.                          1851

la suma de 200 liras, ke foe ke kosto 2000 liras, i kon la vigna en Rudech, ke era la prima kampania, la derokaron en la ditcha gera, i el kampo lo enpatrona, agora S-r. Chemoelatche, ke lo iso Tchair, por tomar, 6-7 karos de paja,

               Ejos los 3 ermanos, sigun ditcho ke foertemente, kontinoavan las operasiones, de los dechkontos mas muntcho de todos los otros sus negosios, foe en este anio ke si enpesaron algo a travarsen de esto, anke ke non era koza ke si podijan presto alevianar^[97], a razon ke las sumas ke ejos las tenijan de aver, eran mui grandes, i en mui muntcha djente, lo azijan ke davan solo a estos, ke eran mui flakos i esto por ke non si detuvieran, i ke kontinoaran, en sus negosios, kon ke siempre, lo ivan enmankando, para ke non sufrieran la suma, entera, i esto foe, ke el governo turko non tenija fiksado, fin a este tiempo Leés, fin a koando de enteresos si podija tomar, i siendo ke en este anio, lo fiksaron ke si podija tomar, fin a 12%, de entereso a el anio, kon ke salio FERMAN, por akejos, seja bankeros, or, merkaderes, ke tomaron, a mas muntcho de 12 % de entereso a el anio, ke tenijan el deretcho de reklamar, i resivirlo atras, esta demazia, mismo si era ke los unos lavoraron a 30 i 40 anios, ke ja lo asen el konto, las sumas ke devijan de boltarles, kosa ke non lo poeden enpatronar, i esto si jama en turko EADEI-MUHASEBE^[98], keri dizir boltamiento atras de los kontos i pagamiento, i estos Fermanes, si meldaron, en todas las sevdades, i kazales, de el governo de la Turkija, i kon akavedarlos, ke kada uno es libero, de reklamar, sin ke tengan por

1130                         Biografia de Tchelebi Jeuda Gavriel i Avraam M. Arie.                          1851

nada loke travarsen ni menos espantarsen, (sus kontrarios, seja los djidios, i las otros nasiones, eran mui gustosos de esto i ke gaire agora, ja es los kavos de la roina de los ARIES,), i los Begis komo tambien i otros merkaderes, ke si puvliko esto, de el presipio enpesaron a tener, los Begis espesas adjuntas, por platikar, en esta kistion, i en mizmo tiempo, ejos eskrivijan a los mas grandes, personages, komo Pachas i kaimakames, i advokatos, por tomar mijor, las enformasiones, i tambien estavan estudiando los kanones, leés de esto, lo todo por reklamar i ejos estos kontos,

              I ejos los 3 ermanos ke ja lo savijan de todas estas, adjuntas, ke las ivan espesas tiniendolas, eran mui muntcho sikilijados, ma i atras de sus dedjizion ke tomaron de nada non enmankavan, otro ke siempre si kamenavan adelantre, i kontinuavan,

              Tchelebi Gavriel ke era el mas, deskorajozo de los otros 2 ermanos, el siempre buchkava, i les iva ande todos sus klientes, por poder konvenirse kon kada uno aparte, era ke kon algunos, lis propozava, de rebatirles, la metad, de sus devdas, i ke non reklamaran, ke si azia konto, si era ke reklamavan, non era koza de poderlo somportar, a responderles, ni menos ke tenijan estas sumas, de kapetal, a razon ke los enteresos ke lis tomavan, eran de a 20 % a el anio i en kada 6 meses lo asijan kapital, los enteresos, i aparte lis tomavan tambien i a 2 1/2 % de sarafie, komision i en todos los fieros ke lis tomavan lis rebatijan a 5 gr. por kantar, ma todos los pasos ke el los azija eran enbaldes, porke estos todos kontos los

1131                         Biografia de Tchelebi Jeuda Gavriel i Avraam M. Arie.                          1851

azijan tambien i las begis, i todos ejos ke eran mui siguros ke ja podijan ganar, i ke si ivan e azer todos mui rikos, era ke non lis atchetavan en nada, de las propozisiones, de Tchelebi Gavriel,

              Tchelebi Avraam, ke era mui mansevo, era ke si okopava, de los otros etchos i el jevador, de los livros, i reglando los kontos kon kada uno, i apartava las monedas, de oro i de plata, i las enpakava, i las remitia, a Kostan a S-r. Jshak Kamondo, las unas i las otras, a Salonique, a S-res Jshak M. Tijano, i en Kostan tenijan tambien i etcho i kon, los IJOS de Tchelebi Behor Karmona, ke es el Tchelebi Davidtchon Karmona, ke kon estos ultimos lo Meldaron mas antes, en las partidas de Hr. Josef, Arié, ke li iva muntcho ande el Tchelebi Behor Karmona i ke tratava tambien kon el, i mas tadre denpoes ke lo mato Sultan Mahmud, a Tchelebi Behor, ke li parisio, ke era i el de el partido de los djeniseros, era ke el Usref Pacha, el konosido, lis mando, a sus IJOS, en toda su vida ke bivio, el i Pacha, a 250 gr. a el mes, i esto si li mandavan siempre, vija de Tchelebi Jeuda i sus ermanos,

              Tchelebi Jeuda, por razan de estos solivantamientos, i espandimientos, de la Eadei-muhasebe, para enbezarsen i ejos, mas mijor, lo izieron de ir a Kostan i esto, sin ke otros si konsintieran, lo espandio ke si va ir a Jeruchalaim, por vijitor, a su madre, i en mizmo tiempo azer tambien las IZEARAS, religiozas, el partio de Samokov deretcho a Kostan, i resto unos koantos dijas en Kostan, por enformarse esto de la Eadei-Muhasebe, kon ke si aderesava, seja ande

1132                         Biografia de Tchelebi Jeuda Gavriel i Avraam M. Arie.                          1851

S-r. Kamondo komo tambien i ande S-r. Karmona, i a todos los 2 ke lis kontava, en largo por las reklamas ke estavan aparejados, para azerles de ejos, los Turkos de Samokov, sovre lo todo ke era koza ke non lo podijan somportar, i lis rogava en mizmo tiempo, porke estuvieran en sus ajuda, i ejos todos los 2 seja el S-r, Kamondo komo tambien i el S-r. Karmona, ke ja los kerijan, muntcho, i ke lis tenijan la mas grande sempatia, i sovre todo ke tenijan muntcho trato kon ejos, i los ditchos S-res ke ja la tenijan la mas grande enfloensa, en todas las admenestrasiones, i en los mas grandes personajes, i los Pachas de kostan, i todos los 2 li dicheron, porke estuviera en el mas grande repozo, i ke non tuviera por nada a kudijar, ni menos a pensar sovre ejo, ke por lo todo akejo ke era el menester, ja iva a ser ke ejos lo ivan a eskapar, i ke non iva a tener nada loke pedrer, otro ke al kontrario iva a ganar los danios, i los gastes, i en disiendole tambien ke ja es verdad, ke ai ansi una lei, etcha moeva ma ai tambien ke este Eadei muhasebe, non si poede aser, para las personas ke tienen ferman, koalmente son, EVROPA TUDJARI^[99], i ke ansi un ferman ejos ja si lo poeden tomar mui kolai, i ke ejos los S-res Kamondo, i Karmona, ja los tenijan ansi fermanes de mas antes, i agora es ke lo poeden tomar, por los otros komo ke son sus personales, i ke de estos todos enkorajamientos, ja si kere entendido, la alegria i gusto ke tuvo i de koala manera de rengrasiamientos, ke lis djo a todos los 2 Tchelebi Jeuda, i ejos ke ja lo savijan ke si iva a ir a Jeruchalaim, todos los 2 li dicheron porke si foera en la boena

1133                         Biografia de Tchelebi Jeuda Gavriel i Avraam M. Arie.                          1851

ora, al sujo vijaje, i en mismo tiempo lis demando porke li dieran algunas kartas de rekomendasion, por estos lugares, i todos los 2 li dieron una karta, por Jeruchalaim, para el S-r. Moche Levi, i una por Safet, para el S-r. Hr. Chemoel Abud^[100], ke el koal era konsolo, de el Governo Franses, en Safet, i una otra ansi karta, para Beirut, para el S-r. J. Aboaf, ke todos estos 3 S-res eran los mas grandes, rikos i poderozos i onorados de estos logares, i en sus sivdades,

               I Tchelebi Jeuda ke partio por Jeruchalaim, i dopo de unos koantos dijas ke el ja arivo en Jeruchalaim, i ke si abacho en la kaza, de Hr. Rabenu Devach, ke era en esta kaza ke tenija su S-ra Madre la Bu. Lea su koartir, i koando la Bu. Lea ke resivio, por musafir a su IJO el Grande, ja si lo imajinan los kiridos meldadores, de koala manera seria estos enkontros, i de koala manera joraron todos los 2 de la alegria, i Tchelebi Jeuda ke li jevo muntchos prezentes para su S-ra madre i para todos los ke la kudiavan, de mizmo ja si lo imajinan, sigun de loke foeron tambien i resividos, i en todos los dijas ke el estuvo en Jeruchalaim, siempre era kon su madre, en su kaza, i en todos los logares ke ejos vijitaron i tambien en todas las iziaras, ke el las izo siempre kamenavan djuntos, aparte de loke eja ja lo tenija resentado lo todo mui djusto, i boeno, ainda foe, ke li resento mas mijor, seja el repozo de la kasa komo tambien, i por la suja pasadja, en mas antchura, por el avenir, i aparte la rekomendo, a muntchos de los konosidos ke el si gano en su estar, en jeruchalaim, porke Tchelebi Jeuda tuvo grandes onores, ke todos los

1134                         Biografia de Tchelebi Jeuda Gavriel i Avraam M. Arie.                          1851

Rabanim i los personages mas grandes de Jeruchalaim, todos lo vijitaron, i lo respektavan, i Tchelebi Jeuda en Jeruchalaim, espartjo muntcha muneda, por Sedaka, a los Hahamim, i a los menesterozos izo tambien i ke djo, 5000 gr. de prezente por la ajuda de una echkola ke estavan fragoando, i a esta kavza li metieron en la una poerta de la una kamareta, de este Talmud-Tora, una piedra eskrita su nombre kon letras de oro, por la NEDAVA, ke el kijo bien aser, i siendo ke la suma de moneda ke el si jevo a Jeruchalaim foe lo todo 6000 gr i mui presto ke ja si li eskaparon, li foe ande el S-r. Moche Levi este de la rekomendasion ke li trucho i li demando, porke li enprestara, algo de moneda ke non li abasto esto ke el si avija traido, kon ke li travo a S-r, Kamondo la suma ke el si empresto, i denpoes ke ja estuvo ainda mas unos koantos dijas en Jeruchalaim, i denpoes ke ja izo todas las vijitas menesterozas, i tambien las iziaras, si abrasaron i se bezaron i joraron kon su madre, i eja denpoes ke lo bindicho, todas las bindisiones, de una madre enfrente de su IJO, foe ke partio tambien por azer i las iziaras de ARBAA-ARASOD, ke i en ejas tambien sakrifiko muntcha moneda, lo todo sigun de loke lo izo en Jeruchalaim, i de mizmo i en todos estos lugares el tuvo muntchas onores, ke li izieron, i en arivando a la sivdad de Safet, el si abacho deretcho en la kaza de el Hr, Chemoel Abud, ke el li djo la karta de rekomendasion ke tenija, i el S-r. Abud lo resivio kon grande onor, i lo respekto muntcho i kamenavan djuntos en todos los lugares i en las iziaras, i estuvo mas muntchos dijas en Safet, por la

1135                         Biografia de Tchelebi Jeuda Gavriel i Avraam M. Arie.                          1851

entision ke el de loke si lo penso, i sigun ke ja reucho sigun eskrito adelantre,

Sigun ditcho ke el S-r. Abud, ke era konsolo de el Governo Franses en Safet, ansi de mizmo era i su ermano, konsolo en la sivdad de ORAN, en la algeria, i en akel tiempo la algeria era debacho de la podestanija, Turka, i siendo ke a Tchelebi jeuda non lo salia de el tino, el etcho de la eadei muhasebe, ke aun kon todo ke en Kostan ja li avijan dado todas las boenas esperansas, ma por tener i otra ainda mas foersa, i por en kavzo menesterozo, ke ja li dicheron tambien ke para akejos bankeres, ke son Evropa Tudjari, non era la lei sigun de a sus suditos, ke a esta razon si lo konto esto a el S-r. Abud, i esto ke li dicheron los S-res Kamondo i Karmona, i li demando ke li iva a aser plazer, si es ke li podija das [dar] un pasaporto komo ke era sodito Franses, i el S-r. Abud, sin por nada refuzarle, i por mas ainda mijor, el li eskrivio a su ermano, en Oran, porke li mandara ansi pasaporto i ke lo iziera registrar, en el rigistro komo su sudito, i ke si lo mandara, ke esto ja foe lo todo mui presto i arivando el ditcho pasavant, si lo djo en su mano i denpoes ke li djo todas las grasias, i ke li kijo tambien i pagarle ma non li resivio, i partio de Safet i se vino a Izmir, en restando tambien i en Beirud, unos koantos dijas ke en todos estos 3 lugares el iso muntchas merkidas, de ropas i muntchos prezentes, para toda su Familia, i por todos sus amigos seja djidios komo tambien i non djidios, i aparte el komando tambien a viena, porke li lavoraran un parohed, para

1136                         Biografia de Tchelebi Jeuda Gavriel i Avraam M. Arie.                          1851

el Kaal de samokov, de ropa de seda, i lavrado kon klabedon, de oro kon unos mui ermozos pinturias, i li izo eskrivir su nombre komo su presente, i kon la data de 5611, ke es de la kolor maavi, i el koal PAROHED? lo emplean solo en los dijas de las fiestas, i bodas fin a este tiempo, ke ainda es mui sano i rezio en ser de la ropa la mas fina, i koando ja vino a samokov kaje ke la sivdad entera li salieron al sujo enkontro i a todos lis dava a un tespi a kada uno, de presente  de el Hadjilik, i denpoes todos lo vijitavan,

              Es a foersa de este pasaport, ke los vinientes de el Tchelebi jeuda lo renovaron la suditansa, en Kostan en el anio de 5638, i siendo ke de el presipio ja foe etcho en mui regla foeron rekonosidos, todos komo suditos Fransezes, i ke de esto tienen muntcho provetcho en muntchas okaziones,

                En el anio de 5612, Tchelebi Gavriel lo mando a Sofia a su ISO S-r. Behoratche, gjunto kon su mujer, la Bu. Dudutcha i sus krijaturas, para la boda, ke la iva a kazar H. Haimatche a su IJA Esturulu, kon S-r. Avraam B. David de Kiostendil, ke i ejos tambien si foeron a Kistandil ala boda, i S-r. Behoratche fin a este tiempo ainda non estava en el negosio, otro ke era siempre estudiando en el midrach, djunto kon S-r. Mochonatche, kon Hr. Avraam Alkakai, i S-r. Davidtchonatche, ke era mas tchiko, era de mismo ke frekontava las echkolas, i en mismo tiempo el era ke si enteresava, tambien,

1137                         Biografia de Tchelebi Jeuda Gavriel i Avraam M. Arie.                          1852

muntcho en los etchos de la merkansia, i era al koriente de lo todo el frekontava tambien i las echkolas turkas, i konosio muntcho boeno seja la lingua komo tambien i la eskritura, turka,

Mientres de este anio, sigun ditcho, ke los Turkos Begis, eran detchizados para demandar los deretchos, del EADEI MUHASEBE, i el Vilaet, (departamento,) ke era en este tiempo, en NICH, i ke Samokov tambien ke era debacho de el Vilaet de NICH, si prontaron todos los Begis, i algunos delos otros merkaderes ke ejos tuvieron kontos kon ejos, en aziendosen kada uno su lista aparte, de las deferensias ke lis tokava a reklamerlas i resivirlas atras, la suma de moneda, ke ja era una Suma bien redonda, i todos estos los izieron vekil (prikura) a unos siertos Emin Beg, i Mehmed AA jasidji oglo, i los mandaron a NICH, ande el Vali Pacha, kon ke li dieron i muntchas kartas de rekomendasion, i todos mui gustozos, i mui siguros ke ja tenijan el deretcho de ganar, se ivan alechandosen de ejos, i non lis venijan komo de antes, i Jasin Beg ke era el kaimakam de Samokov i sigun ke ja lo eskrivi mas antes, ke lis era muntcho amigo i los protejava tambien muntcho, anke lis dizia muntchas vezes, porke ke non si mitieran en ansi un baile, akonsejandolos, ke aparte ke non podijan nada ganar, podija ser ke ivan a ser kondenados a los gastes i danios, i sovre todo ke mas non podijan tener, ken ke lis avansara moneda en kavso menesterozo, ma non lo sentijan, por ke ejos ja estavan mui siguros de ganar, i tenijan tambien ke los enkorajava, mui muntcho un sierto DAJAN, (djusgador,) de Samokov, ke si jamava, Hadji

1138                         Biografia de Tchelebi Jeuda Gavriel i Avraam M. Arie.                          1852

Emin efendi, el koal era mui inimigo de djidios, i mui grande i antesimit, tambien,

              I Tchelebi Jeuda, ke ainda non avija tomado de su viaje de Jeruchalaim, i Tchelebi Gavriel i Tchelebi Avraam ke estavan en Samokov, i ke ja lo supieron de la partensia de los ditchos Emin Bei i el Mehmed AA, kon la mision ditcha por avrir el proseso, ande el Vali Pacha, era ke estavan todos los 2 mui sikilijados, i mui pensativles, i sus ermano el Tchelebi Jeuda, ke non savijan ande loke era ke estava, porke en este tiempo non avijan pochtas en kada dija sigun ke ai agora, otro ke era una ves, a los 10 or 15 dijas, i ejos los 2 ermanos de samokov, era ke en kada dija li ivan eskriviendole kartas a muntchas lugares, porke mas presto si viniera, en aziendole saver las mizuras ke las avijan tomado, los Turkos, i otros, i para poder merar el molde de sus defindimiento, i Tchelebi Jeuda ke non tomava ansi kartas, era ke tambien non savija de todo esto ke estuvo pasando, i el por todos los logares de ande iva pasando, era ke si iva estando a unos koantos dijas en kada lugar, por su plazer,

              pasando pokos dijas de koando ja partieron de Samokov los ditchos Emin Bei i el Mehmed AA. i ke ja arivaron en Nich, ejos, sin tadrar, izieron todos los pasos menesterozos, ande el Vali Pacha i sigun sus regla, lo jamaron a Tchelebi Gavriel vija de el Kaimakan Jasin bei kon darle el orden porke lo mandaran kon djandar, ke esta manera era en akel tiempo koando jamavan de parte de el Vilaet, ma el Kaimakam non lo mando kon djandar, otro ke solo li dicho por ke,

1139                         Biografia de Tchelebi Jeuda Gavriel i Avraam M. Arie.                          1852

si foera, i esto ke lo jamaron a Tchelebi Gavriel foe para modre, ke ja lo savijan ke Tchelebi Jeuda non estava, en Samokov,

               I Tchelebi Gavriel ke kalia ke partiera, foe ke dopo de unos dos dijas, partio vija de Sofia, i se abacho en la kasa, de H. Haimatche, Tagger, ke ja estava su IJO, S-r. Behoratche, djunto su mujer, i sus kriaturas, ke ja lo saven ke si avijan ido para la boda, i la Bu. Dudutcha estava preniada, de Biju, mi mujer, i Tchelebi Gavriel ke ja durmio en akeja notche en la kaza de H. Haimatche, li dicho a su IJO, porke restara en Sofia, fin a ke iva a boltar de el Djuzgo, en kontandole tambien i el etcho entero, de este Djuzgo, i el S-r. Behoratche sigun el komando de el Padre, lo izo de restarse en Sofia fin ke iva a boltar,

               Ala maniana Tchelebi Gavriel en lugar de partir a Nich si foe vija de Lom-palanka, a Kostan, i en este tiempo ke Tchelebi Jeuda ja abacho a Izmir, i ke topo muntchas kartas mandadas de Samokov, aziendole saver, el etcho entero i porke presto si viniera, i sin tadrar, el partio de Izmir, kon nave, porke non avijan en este tiempo vapores, i la mar ke ja foe mui repozada i kon el aire boeno, en pokos dijas el arivo a Kostan, i Tchelebi Gavriel tambien en este tiempo, ke ja arivo i el tambien en Kostan, i si enkontraron, los 2 ermanos i se isieron saver, de todo loke lis, estuvo pasando,

              De esta parte, ke el Emin Bei i el Mehmed AA. Ke lo esperavan a Tchelebi Gavriel en Nich, i ke ja lo supieron tambien ke si foe a Kostan, lis eskrivieron a los Begis de Samokov, i estos ke

1140                         Biografia de Tchelebi Jeuda Gavriel i Avraam M. Arie.                          1852

eskrochijan dientes de estas etchas i ke non si sotometijan a los komandos de el Vali Pacha, si rekojeron en viniendo en un lugar, i se foeron, ande el Dajan de Samokov, disiendole porke ejos keren, ke foeran djusgados en Samokov, i ke foera jamado a Tchelebi Avraam el uno de sus ermanos ke ja estava en Samokov, i sigun ditcho antes, ke el Dajan de Samokov ja era grande antesimid, i tambien ke li era mui konvenivle a razon, ke en este tiempo el governo Turko, lis dava el deretcho a los Dajanim, por el Resim (taksa fiksada, de a 2 % ke si paga, por el deretcho de djuzgar,) i era esto las pagas delos dajanim, porke el governo non lis pagava, dinguna mezada, i este djuzgo ke ja era, boeno i de una redonda suma, sin tadrar, lo resive a Djuzgarlos, i lo mando a jamar a Tchelebi Avraam, a la sala de el Djuzgo, i todos los reklamadores ke ja asistijan, en esta sala, i koando Tchelebi Avraam ke ja si lis presento, lo primero ke li dicho el Dajan foe, siendo ke tus ermanos non kijeron ir, a Nich, sigun el komando de el vali Pacha, para ke respondieran a las reklamas ke vos azen estos S-res, de tanta suma de moneda, ke lis tomatech, sin dinguna razon, es ke agora la reklaman de ti porke si las retornes a kada uno sigun las notas, ke ja las exameni jo i deves de kontarselas, i Tchelebi Avraam ke ja estava al koriento de todo, esto ke lavoravan sus ermanos en Kostan, i por non azer algunos jeros, lo topo de djusto i sin muntcho pensar, i kon grande kuraje, lis respondio en diziendole, ke jo non vos poedo por nada responder, sovre estas demandas ke vozotros mi las azech, por razon ke jo es verdad ke so sus ermanos

1141                         Biografia de Tchelebi Jeuda Gavriel i Avraam M. Arie.                          1852

ma en sus etchos jo non mi poedo mleskar, porke jo lis so ande ejos komo un empeigado, i ejos todos sintiendo ansi disir, i en non kriendosen, li dize el Dajan, siendo ke respondites ansi, i parisiendole ke kon esto lo iva a espantar, es ke jo ti kondino a prezo, fin ke vienen tus ermanos, ala ora Tchelebi Avraam li dize ke jo resivo la voestra kondana de ser aprezado, solo ke vos rogo ke mi la meldech, esta kondana, i en mismo tiempo ke mi dech, el deretcho de amostrarvos a 2 fijansas, sovre ke jo ja mi tengo de presentarme, en el punto ke mi jamarech, i el Dajan li dicho ala ora, ke ja li enpresento esto de el prezo, ma Tchelebi Avraam non li kijo resivir este prezente, i le dicho ke jo sigun voestra kondana, jo ja esto de este punto aprezado, i los mando a jamar, a H. Chelomo Koen i a H. Chemoelatche el Chichko, porke lis salieran fijansa, i lo izieron sigun las leés de las fijansas, i kon esto foe libero, i se vino a su butika a kontinuar en su etcho, i de lo todo si los izo saver a sus ermanos ke estavan en Kostan,

               Tchelebi Jeuda, ke ja li izo saver lo todo a Tchelebi Gavriel de los prontamientos, ke si pronto de antes seja en Kostan komo tambien, i en safet, i de mismo li izo saver el Tchelebi Gavriel por todos los prontamientos etchos de parte de los Turkos, i ke el tambien foe jamado a NICH, i ke nin [non] foe, i esto ke li paso tambien i a Tchelebi Avraam en Samokov, ke ja resivieron su karta, era ke si akonsejavan los 2 ermanos, en Kostan, i eran mui sikilijados, i bien pensativles, non saviendo koalas mizuras serijan de tomarsen, ma ejos

1142                         Biografia de Tchelebi Jeuda Gavriel i Avraam M. Arie.                          1852

kon ke la tenijan la foerte energia, non pidrijan el kuraje, i kon pasensia lavoraron i kontinuaron, kon ke todos los 2 lis ivan seja ande el S-r. Kamondo komo tambien i ande El S-r. Karmona, por akonsejarsen i en mismo tiempo rogarles porke lis estuvieran en sus ajudas i sigun ke ja saven ke estos oltimos todos los 2 ja estavan al koriente de el etcho entero i ejos ke ja li tuvieron ditcho a Tchelebi jeuda por ke non tuviera, en nada loke kudijar ni menos pensar, ke era ejos ke lo ivan a eskapar, lo todo, i lo ivan azer tambien i ganar, i sin ke mas esperaron ejos todos los 2 ke si akonsejaron, lo primo ke lo izieron foe, ke li tomaron en sus nombre, un BERAT, or, FERMAN, nombrandolos sovre ke eran EVROPA TUDJARIS i denpoes lis tomaron i un orden de el ahkiam adlie. (ministerio de la djustisia,) para el Vali Pacha de NICH, komandandole, porke en vista los mandara a Kostan a las prekuras de los begis de Samokov, ke eran el Emin Bei i al Mehmed AA. ke los koalos lo estavan a Tchelebi Gavriel esperandolo ke iva a ir andeh, disiendole a el Vali Pacha, ke este Djuzgo, si tiene de merar, en Kostan en el AHKIAM-ADLIE, i todo esto los  ditchos S-res lo izieron vija de el gran sekretar, ke si jamava, Mumtaz Efendi, i el koal era ke los iva i a djuzgar, i este ultimo lis era mui grande amigo de todos los 2 ditchos bankeres, i el Vali Pacha de NICH, ke resivio ansi ordin a vista los mando a todos los 2 a Kostan, i en arivando estos prekuras en Kostan ke i ejos tambien si jevaron muntchas rekomendasiones, seja de el Vali komo tambien i de otros, por Kostan, i arivando el dija fiksado ke si

1143                         Biografia de Tchelebi Jeuda Gavriel i Avraam M. Arie.                          1852

ivan aparar, en la sala de el djuzgo i ke era el Ditcho Mumtaz Efendi ke los iva a djuzgar, ejos ke ja si apararon a el Djuzgo i antes ke uvieran dingunas demandas ni platikas, ke Tchelebi Jeuda i Tchelebi Gavriel prezentaron sus dokumentos los ditchos fermanes, i el Mumtaz Efende ke los meldo i los exameno, lis dicho a las ditchas prekuras, ke enfrentante, a estos fermanes, ke non poeden tener, dingunos deretchos, por azer dingunas reklamas, de esto ke ejos lo demandan, i ansi foe ke los kondenaron a las prekuras, porke lis pagaran los gastes i los danios, ke era una suma, de 30,000 gr, i en este tiempo ke estavan aparados en la sala de el djuzgo, foe ke el Emin Bei i el Mehmed AA. si komportaron komo turkoes, en trespajandolos kon palavras fejas a Tchelebi Jeuda i Gavriel, ke sovre ejo ejos demandaron sus deretcho, de el sus negros komportamiento delantre de el djuzgo, ke i por ejo tambien los kondenaron a un mes de prezo, i esto ke foeran jevados en preso deretcho de la sala de el Djuzgo, i ke foe tambien reintchido, i metidos a todos los 2 en prezo,

               I ejos los 2 ermanos ke ja salieron de la sala de el Djuzgo ganados, ja si kero entendido la aligria i gusto ke ejos la tuvieron i en deretcho ejos si foeron ande el S-r, Kamondo i S-r. Karmona por darles las grasias, i rekonosensias, sovre todos los plazeros ke lis izieron, i de este tiempo siempre lis foeron ainda mas rekonosientes i los respektavan mui muntcho i siempre trataron kon todos los 2 en koalo podijan,

               Pasando unos koantos dijas ke ja estuvieron en preso

1144                         Biografia de Tchelebi Jeuda Gavriel i Avraam M. Arie.                          1852

los ditchos prekuras, ejos si konrogaron de el Mumtaz Efende, los jamara a Tchelebi jeuda i Gavriel i ke si los pedronaran si lo isieron jero, i ke foe de el apreto ke lo izieron esto, i ke los iziera meter en libertad, por razon ke ja non lis avija kedado moneda ni para gastar, i Tchelebi Jeuda lo izo ketar solo a Emin Bei, kon ke li  djo tambien i 500 gr. porke ja lo savija ke en verdad non tenija moneda, i koanto a el Mehmed AA. lo decho a el boen pareser de el Djuzgo ke esto non eran en kudiado, i ansi foe ke el Mehmed AA. Los adjusto los 30 dijas, de el preso, ke la rason de non ketarlo tambien a este ultimo foe, porke el foe ke los trespajo mas muntcho de el Bei

               Tchelebi gavriel ke ja non avija kedado mas koalo restarse mas en Kostan el partio por Samokov, en restando solo Tchelebi Jeuda por tomar, los ilames, menesterozos, i esto ke mas tadre tambien ke ja los tomo, todos en la mui boena regla, i en el tiempo ke el estuvo en Kostun, esperando fin ke si li prontaran los ditchos dokumentos, el iva lavorando, en las admenestrasiones, menesterozas, para ke si iziera i en samokov, un djuzgo de tidjaret, (merkantil) i ke foera tambien kon la prezedensia suja, ke i en esto tambien el foe ke reucho mui bien, i tambien de esto tomo todos los ordenes, menesterozos para el Kaimakam, de samokov, para ke si fondare, el ditcho djuzgo merkantil, i tambien i kon la suja prezedensia,

               Los Turkos Begis de samokov, ke ainda, non lo savijan por el djuzgo de kostan, ke foeron pedridos, i kondenados a los gastes, i ke sus prekuras tambien ke estavan en prezo, enserados, foe,

1145                         Biografia de Tchelebi Jeuda Gavriel i Avraam M. Arie.                          1852

ke S-r, Davidtchonatche, ke era tchiko, i estava djugando kon los, IJOS de estos Begis, li dicho a Faredin beg, el ijo de Emin Beg, ke a su padre lo izo enserar, su S-r. Padre, i este oltimo ke lo konto a los turkos, i sintiendolo todos los Begis, i sin poderlo ketar, de boka, lis foe para todos ejos uno mui grande mafina,

             i denpoes, ke Tchelebi Jeuda, ja tomo todos los dukomentos menesterozos, por el djuzgo, el si okupo, por azerle ketar a Dajan ke era en Samokov, i ke los enkorajo tanto a los turkos, sovre el ditcho djuzgo, i en esto tambien foe ke mui bien reucho, kon ke tomo el mizmo el orden, de el sujo azilik, (dechamiento de el posto) i este orden si lo trucho kon si a Samokov,

              I denpoes ke el ja estuvo pronto de todos sus etchos si enpako, sus ropas ke el las tenia merkado, seja en Jeruchalaim, i tambien en todos los otros logares, ke el abachava, i se merkava algunas kozas seja por si komo tambien i prezentes, por toda la Familia i los amigos, el partio via de Salonique, por mar, ke li turo el vijaje por vinir a Salonique, 12 dijas, i tuvo muntchos apretos, i espantos en la mar ke foe mui reboelta, porke era kon naves a vela ke lo azijan estos vijajes,

               Mas tadre ke ja vino a Samokov, i ke todos ja lo supieron, foe ke kaje la sivdad entera li salieron al sujo enkontro, seja turkos, i todos los Begis, mismo i estos Begis ke si djuzgaron, i el kaimakam Jasin Beg, i el Dajan, i mas ansi empeigados, i tambien, muntchos krestianos, i todos los djidios, ke uvo muntchos ke li foe

1146                         Biografia de Tchelebi Jeuda Gavriel i Avraam M. Arie.                          1852

foeron fin a rijan^[101], ke es un kazal komo 8 kilometros lechos de la sivdad, i antes de entrar a la sivdad eran los Hazanim kantando los pizmonim, i salmos de los Teelim, ke era de esta manera ke resivijan a los Hadjis, i Tchelebi Jeuda, a kada uno aparte, lis rendjo, todos los menesterosos rengrasiamientos, por la onor ke li izieron de salir al sujo enkontro, foe solo el Dajan ke li demando en el tiempo ke lo feliseto, la bien vinida, i estando en el kampo, porke li kontara de las moebas de kostan, ke sovre esta demanda ke li vino mui pezgado, su repoesta foe, ke ja vos truche para vos una moeva, ma non la tengo kon mi para darvola agora, i esta repoesta a el Dajan lo iso muntcho pensar, i denpoes ke ja estuvo en kasa, li vinieron de moevo todos estos S-res, a kasa, i todos foeron resividos kon muntcha onor, en dandoles a todos tchibukes i kahves, i dulses i modos de cherupes i aparte lis djo tambien a kada uno un modo de presente, de su manera i su mirisimiento, ke a koalos lis dava tespis, i a koalos chavones, i parfumes, i chales, i ansi mas todo esto de las ropas de el Hadjilik, i el Dajan tambien ke estava, i ke era mui kuriozo i despasensiado, por alkansar mas presto a saver, la moeva ke li dicho ke li avia traido, porke a el Dajan ja li batio en el korason ke seria koza por kontra de el, i ansi foe, ke non pudo tener pasensia i le demando en estando ainda en kaza, por ke li dichera, koalo era esto ke li dicho, i Tchelebi Jeuda, li entrego la karta, ditcha ke es el Azilik, i el Dajan kon poko meldarla ke ja lo vido ke era ansi una koza foe ke kedo en el lugar, i de esto Tchelebi Jeuda, foe mui muntcho, ke si

1147                         Biografia de Tchelebi Jeuda Gavriel i Avraam M. Arie.                          1852

repintio, de esta etcha ke izo de darle en su kaza, ke li vino a saludar, ansi karta, ke non era de djusto porke saliera de su kaza dinguno desgustado,

               i en pasando unos koantos dijas ke ja reposo de su vijaje, el enpeso a todos estos ke li vinieron a tornarles vijita, i a kada uno lis iva kontandoles, de todo esto ke el lo vido mientres su viaje, porke su avla era muntcho dulse, i klara i kon muntcha, onor avlava a todos,

               Kon el ordin ke lo avija tomado en Kostan por avrir i en Samokov, un konsilio, merkantil, foe ke si lo jevo a el Kaimakam Jasin Bei, para ke nomenara, los miembros menesterozos para esto, i el kaimakan, nomeno a 4 personas de turkos i krestianos, soto la prezedensia de Tchelebi Jeuda, i apartaron 2 dijas a la semana, por ke tuvieran las adjuntas i ke djuzgaran a el poevlo i ke tenija ser rekonosido sus kondanas de el Kaimakam, i esto lo izieron ke las adjuntas las azijan en la butika de Tchelebi Jeuda, i djuzgavan a el poevlo sus deferensias ke tenijan, i eran reintchidas, sus kondanas i era ke estavan el dija entero entremetidos solo en esto sin ke lis kovravan dinguna paga, i de esta manera lo kontinuaron muntchos anios ke mas ja non se ivan a el Dajan,

            Tchelebi Jeuda en su estar en Kostan el si tuvo merkado un FERAGI, ke es un pol grande de oro, i lo jevava kosido en la fes, ke javava en la kavesa, komo una sinial de dekurasion, i esto lo ajudava muntcho para su etcho, i lo reglava sigun de loke el lo

1148                         Biografia de Tchelebi Jeuda Gavriel i Avraam M. Arie.                          1852

kerija, i a kavza de esto el tenija i muntcha onor ke lo konsedirava todos mil muntcho, ke ansi Feragia era ke los dava en este tiempo, el Sultan, a los personages los mas grandes solo de Kostan,

               I mas tadre de este mismo anio, foe ke vino el Vali Pacha de Nich, a Samokov, i estos todos Begis ke ja si avijan djuzgado, en Kostan lo izieron de aderesarsen todos por rogarle, kijendo renovarlo el djuzgo, i el Vali Pacha ke non estava al koriente de lo todo loke lis paso en Kostan, foe ke resivio a djuzgarlos, i sovre esto ke todos los Begis ja foeron mui gustozos, ejos lo azen todos los pasos menesterozos, i el Vali Pacha los manda a jamar, a Tchelebi Jeuda kon sus ermanos, porke si prezentaran a el djuzgo, i ke non lo izieron sigun de koando foeron jamados a Nich, i ke non foeron, ala ora ejos tuvieron tambien i boeno a pensar, sovre esto i sus detchizion foe tambien de non prezentarsen, kon la razon ke kalio, si iziera Tchelebi jeuda de el hazino, kon ke si etcho tambien i en la kama, i el vali Pacha non kriendose a esto lo izo ke li mando a el mediko, ke era S-r. Andonake Unterberg, porke lo examenara, i koando el mediko ja vino i lo topo en la kama, foe ke li djo un sertifikato diziendo ke ja es verdad ke estava hazlino i ke non podija levantarse i kon esto lo pasaron en akel dija,

               Ala maniana, li foe Tchelebi Jeuda solo ande el Pacha en estando a las solas, i denpoes ke ja si eskulpo, sovre loke non pudo irle en el dija de antes, li amostro todos sus dukomentos, ke los avija tomado de el Ahkian Adlie en Kostan, de koando ejos si tenijan djuzgado, i el Vali Pacha meldandalos, i sigun ditcho ke el non

1149                         Biografia de Tchelebi Jeuda Gavriel i Avraam M. Arie.                          1852

estava al koriente de todo esto ke lis paso en Kostan, li dicho el Vali Pacha ke si el savija, ke tenija ansi dokumentos era ke non los mandava a jamar, ni menos ke lo resivija a merarlo, ma siendo ke ja si topo ditcho a los bagis ke ja los iva a djuzgar, i por la boena regla li dicho, porke si prezentara, en traendose kon si i todos estos dokumentos, i lo enbezo tambien de koala manera ke si devija i komportar, por koando ivan a estar aparados en el djuzgo, i ke estuviera mui siguro, ke non, iva a tener en nada loke pedrer, i Tchelebi Jeuda li djo las grasias, i le bezo la alda de el Vali i se salio,

               I el Vali Pacha en pasando komo 2 oras de koando ja salio Tchelebi Jeuda, de su kabineto, los mando a jamar seja a los Begis komo tambien i a Tchelebi Jeuda kon sus ermanos, ke esto ja foe mui presto rekojidos, i aparados en la sala de el djuzgo, i denpoes ke los Begis ja lo izieron todas sus demandas i reklamas, Tchelebi, Jeuda li entrega todos sus dokumentos en mano de el Vali Pacha, i en disiendole ke konforme a estos moestros dokumentos, es ke mozotros, ja mos djuzgimos en Kostan en el Ahkiam i Adlie, sovre todas estas reklamas ke de moevo ejos las estan aziendo delantre de vos, i sovre esto vos rogamos ke los examenech, i el Vali Pacha ke los resivio i ke si izo komo ke non los tenija visto otra una vez, los meldo todos ala klara, i les dicho a todos los begis, ke por un djuzgo ke ja foe djuzgado en el ahkiam adlie, jo non lo poedo de moevo merar, ni menos ke vos poedo i djuzgar, es ansi ke jo vos kondino porke li pagech, a Hodja Jeuchatche, todos los gastes i danios, i los keto afoera,

1150                         Biografia de Tchelebi Jeuda Gavriel i Avraam M. Arie.                          1852

Los begis sintiendo ansi dizir de el Vali Pacha, eran todos muntcho angusiados, i mui pensativles, i mas tadre ke algunos de estos begis en verdad ke avijan kedado enteramente, sin paras, i tambien i proves, foe ke lo metieron a Hadji Ibraim Kabran, ke el koal era uno de los grandes begis de Samokov, i lo konsideravan todos mui muntcho, porke lis rogara a los Sarafis, porke lis dieran algo de moneda a estos Begis ke kedaron enteramente proves, i ejos porke non lis parisiera, a los begis, ke eran kapritchozos, li dieron a el Emin Beg, 4000 gr. i ansi tambien i a algunos otros ke lo demandaron, kon ke por enfrentante lis tomaron i por eskrito, ke mas non lis keda dingunas demandas ni reklamas, i ke ja si pagaron, todos los kontos fin a el tiempo ke ejos lo kijeron, i de esta manera lo foeron aziendo mas tadre kon todos estos ke tuvieron el djuzgo i foe kon esto ke mas non reklamaron,

En este anio ejos merkaron un balkan, ke si jama kon el nombre Vrichnik^[102]-Dupnila, el koal es en 12 balkanes, i kada uno tiene su nombre, aparte, i es en las muntanias, de Djebeli Rila, de los vakefes de el Gazi Mustafa Pacha, ke es ensima de los kazales de los Iskeris, los koales balkanes tienen una espandidura de serka 50,000 dekares, i el pasto es boeno, i tiene tambien grandes koris, arvoleras, ke los karakatchanes, ke son patrones de ovejas, i ke kaminan kon tiendas en el enverano si vienen en estos balkanes por pasiar sus ovejas, es ke los alkilan i pagan, de 4 a 5000 frankos de kira a el anio, i lo merkaron la una metad de Chakir beg, i la otra,

1151                         Biografia de Tchelebi Jeuda Gavriel i Avraam M. Arie.                          1852

metad de Latif AA. por el presio de 70.000 groches, es esta la jaila ke la enpatronaron los vinientes de Tchelebi Jeuda i de Tchilibi Gavriel fin a el anio de 5665, ke la bendieron todos los 2 por el presio de 100,000 frankos, i se vinieron a Sofia,

Visto a los apretos i presigimientos ke ejos lo tuvieron en este djusgo de los Begis, ke sufrieron mui muntchos apretos ejos vinieron en un lugar, i siendo ke estavan en muntcha moneda, i estos djuzgos ke los deskorajo muntcho por kontinuar, los enteresos ke ejos lis dava a todos los turkos i los krestianos, moneda, i para ser mas rezervados, si detchizaron de travarsen a una sierta kantedad de moneda a kada uno lo todo sigun de sus porsiones ke ejos tenian, kon la kundision ke non podijan negosiarla kada uno en partikolar, por razon de non traer algunos danios a los etchos ke ejos tenian en la butika, otro ke devijan detenerla kada uno en su kacha komo rezerva, i para en kavzo menesterozo, ke lis iva a servir por sus prevalimientos, solo para los etchos de la butika, i ansi foe ke si tomaron kada uno su % i se las goadraron en sus kachas ke ejos ja las tenijan de fiero en sus kazas, ( Jo mi akodro en 5626-7, ke estava en la edad, komo elevo, i muntchas vezes mi mandavan porke foera ande mi S-r. papa Tchelebi Jeuda por ke mi diera 400 i 500 liras de enprestimo, i el ke mi dava la jave porke mi tomara, la suma ke jo la keria, lo vija ke tenija komo 3 a 4000 liras en una grande bolsa, ke pokos dijas pasando mi las davan porke si las retornara,)

               Sigun ke ja lo saven ke el S-r. Behoratche jshak G.

1152                         Biografia de Tchelebi Jeuda Gavriel i Avraam M. Arie.                          1852

Arié, ke estava en Sofia, i su mujer la Bu Dudutcha ke estava tambien preniada, foe ke en el 10 Tevet de este anio, pario en Sofia, en la kasa de su S-r. padre H. Haimatche Tagger, una IJA i la jamaron BELIA, i H. Haimatche, en el parto lo izo komo una boda, i muntcho saltanat, i lis mandaron todos sus parientes, muntchos prezentes seja para la parida komo tambien i para la nasida, i Sofia entero la vijitaron i todos muntcho si alegraron, ke pasando komo un mez, denpoes ke ja pario i ke la parida ja estuvo sana i boena, ke es en el mez de CHEVAT, Tchelebi Gavriel lo mando a su ermano Tchelebi Avraam, a Sofia porke las truchera, i era ke avija muntcho frio i inieves, i el vijaje komo era todo a kavajo, ke lo benijavan, Tchelebi Avraam, si tomo a la Belia, la rezin nasida en su alda, mui buen sarijada, para ke non si jelara, i a las otras 2 kreaturas las asuvio en un kavajo, i El S-r behoratche kon la Bu. Dudutcha a un kavajo a kada uno, i aparte otros kavajos por sus bagajes, i se vinieron en 2 dijas a Samokov, mui boenos, es esta la S-ra Bejutcha, mi mujer, i es esta tambien la ke kudija i los goadra a sus IJOS de entre toda la Familia Arié mas muntcho de todos, i sakrifika su salud por ejos, i eja es una mujer, ke non li plasio nunka nada de las fantasias, i a eja non li plaze platikar en avlas baldias, non li plaze tambien decharse sirvir de mosos, anke ke ja los tiene, koal unke la mas tchika koza ke foesa a eja non li plaze demandar por ke si lo traigan, ke mas kolai li viene de tomarselo eja mizma, en tal de non demandar, a eja non li plase enpretarse dinguna koza seja de el vizino komo

1153                         Biografia de Tchelebi Jeuda Gavriel i Avraam M. Arie.                          1852

tambien i de el pariente, eja es muntcho akavedada, por prokurarse siempre todos sus menesteres por toparse siempre pronta, i en la partida de sus biografia ja van a meldar, ainda mas algunas de sus koaledades en mas largo,

               En el anio de 5613, li nasio a S-r. Mochonatche, el IJO grande de Tchelebi Jeuda, un IJO i lo jamaron Behor-Eliezer, i foe muntcho gusta i alegria, i tuvieron por demazia de todas las otras paridas, Tchalgi, en todos los dijas ke la parida estuvo en la kama, i la kama alta ke a eja li izieron, foe de muntchos brozlados, i de lavrados de ropas finas, i al deredor de la kama, le izieron, kon muntchas kurtinas de ropas de seda, figurando, formas de ventanas, i adonadas kon modos de rozas de dejamantes, i todos los parientes i amigos todos siempre la vijitaron i le mandaron, modos de las dulsuras i de los platos de paridas i muntchos presentes, i siempre tuvieron a muntchos kombedados, seja en los dijas komo tambien i en las notches, i de su propia madre foe krijado i aletchiado, i de todos ejos mui bien kudijado,

               Es este el S-r. Behoratche ke estuvo tambien en Viena por aser sus estudios, en las linguas ajenas, i su karakter es neotral de todos lo otros de la Familia Arié, ke non li plaze tanto el frekontar, i toparse en las vijitas, seja en su kasa komo tambien i en otras kasas, su enbevisimiento es lo mas muntcho en meldar, las

1154                         Biografia de Tchelebi Jeuda Gavriel i Avraam M. Arie.                          1853

las gazetas ke las melda enteras sin enfastijarse, i lo todo por alkansar a saver los etchos de las poletikas de el mundo entero, ke esto es solo por estar al koriente, sin dingun entereso,

               I en este anio tambien li nasio i a Tchelebi Jeuda, un IJO, i lo jamaron Chemoel, i su madre lo pario, en el apartamento ke tenija fragoado, por chadirvan ke lo jamaron enfrente, ke por este enfrente ja lo tengo eskrito mas antes, sigun de loke era, i esto foe a razon, ke en la kaza ke ejos meravan [moravan] foe en este anio ke li izo un trokamiento i estavan fragoandola sigun ke i por esto tambien ja lo eskrivi mas antes, i de mismo se izo i en este parto tambien sigun de todos los otros, seja de vijitarla komo tambien i de mandarle todos los prezentes, ke si uzavan a mandarsen a las paridas, i su propia madre tambien lo kreo i lo kudio,

               Ke es este el S-r. Chemoelatche, ke foe el mas kurajozo, de todos los Aries, i es este el ke non si espanto, de estarse solo en Samokov, en el tiempo ke foe la gera, Turka-Russa, por la Bulgaria, en el anio de 5638, i ke si foeron toda la Familia Arie, de samakov, por goadrar, todos sus bienes, i estos de sus ermanos, i el supo defenderse i pelejar, kon los Generales i majores Rusos, aun kon todo ke muntcho lo amenazavan, los Rusos i mas tadre tambien i los Bulgares, ke muntchas okasiones tuvo ke el kalia ke si eskondiera, unos koantos dijas ma denpoes torna salija, sin dingun espanto, i godro sus bienes, fin a un grado, el tambien sakrifiko muntcho tiempo, i viajo muntcho, por el plazer, i por venirles, en la ajuda

1155                         Biografia de Tchelebi Jeuda Gavriel i Avraam M. Arie.                          1853

de sus dos ermanos S-res Mochonatche, i Naimatche, i sin ke tovo el dingunos enteresos, ke solo lo asia por el plazer de todos los dos,

               En este anio foe ke a S-r. Behoratche, Jshak G. Arié si le renovaron sus maladijas ke el tenia en la urina, i su S-r. Padre el Tchelebi Gavriel, lo izo ke li kalio lo mandara a Viena, por ke lo podieran los medikos de viena sanarlo, i el li adjunto, a un sierto S-r. Elija B. Eliezer, porke lo akompaniara, i en mizmo tiempo i ke lo kudijara, i ke lo diera en mano de los medikos, ke kon esto podija ser ke si iva a poder sanar, kon ke a este ultimo li pagava, su bien paga, kon akavedarle tambien porke non lo soltara de sus ejos ni menos un punto, i ejos partieron de Samokov, kon ke li djo tambien i muntchas kartas de rekomendasion, i el koal tambien foe verdad, ke lo kudio mui muntcho, i aparte foeron todos los 2 mui akavedados, porke non izieran dingunas ikonomijas en el gaste, sin ke lo izieran konto koando ivan a gastar un florint, ke tenija de valor 10 groches porke en viena el gastar un florint, era komo gastar en Samokov un groch, ke de esto a el non li iva a enbarasar, por el gaste solo i solo ke miren de sanarlo i de azer todos sus plaseres por todo esto ke era el menester, i de mismo era ke siempre en todas las kartas ke lis eskrivija lo mas muntcho era de esto por ke gastaran sin aser kontos, i ansi foe ke gasto mui muntcha moneda, en el tiempo ke ejos estuvieron de 15 meses en viena, i en este tiempo el foe merado i kurado de los mas grandes profesores i de los medikos de viena, en kada dija, ke tenija maneras de kuras i de operasiones, ke li asijan mui

1156                         Biografia de Tchelebi Jeuda Gavriel i Avraam M. Arie.                          1853

foertes, i todas ejas, el S-r. Behoratche, kon grande kuraje, i kon muntcha pasensia el las somportava, a el lo kudijavan muntcho i lo vijitavan kaje en kada dija los S-res Leon Adut, i S-r. Elijau Chaki i todos los de la Familia de El S-r. Matatia Ruso, i ansi mas i otros muntchos amigos, ke lis eran todos sus komisioneres, i estos todos S-res era ke li asijan saver a Tchelebi Gavriel kon las kartas de kada pochta, por el estado ke si topava en kada dija el S-r. Behoratche, i siempre li davan todas las boenas esperansas, i el kuraje, ke ja tenija de melesenarse por entero, i por enfrentante era ke el Tchelebi Gavriel lis respondija a todos estos a kada uno de su manera dandoles las miles de grasias, ke su pensierio era lo todo siempre en esto, i ansi foe ke dija kada dija el ke ja foe estando, siempre, mas mijor, fin ke si sano por entero i fin a el anio de 5661 el non tuvo mas ni una ves ke sufrio de esto,

                En todos los Chabatiod i los Moadim, los S-res amigos ditchos ariva, lo kombedavan en sus kasas, i lo amavan mui muntcho, porke foe i es mui bonatcho, i Haham ke ja es, ke a S-r. Adut i S-r Chaki, lis plasija muntcho el estudiar en la Gemara, i sigun ke ja lo saven ke el kante, bokal el ja lo konosio al fondo de loke si lo enbezo en edirne, era ke lis kantava muntchos Pismonim, i charkis, ke esto sovre todo lis plasija mui muntcho, ke non topavan komo ke lo rengrasiaran, i mui ermozo ke ja era, ansi foe ke era kichto i amado de todos, i lo tenijan komo uno de sus propios IJOS, foe ke en el dija de KIPOR, ke estavan todos en la Keila, i el S-r. Behor,

1157                         Biografia de Tchelebi Jeuda Gavriel i Avraam M. Arie.                          1853

Ruso ke era el Gabai de la Keila de los Sefaredim, i el Hazan ke tenijan non era tanto pratiko para ke lis kantara los PIJOTIM? ke si uzan a kantar en las tefilod de los Moadim, i S-r. Ruso si astrivio, kon S-r. Behoratche rogandole, porke suviera a la TEVA, i ke lis kantara algunos de los PIJOTIM, i, el S-r. Behoratche, sin dingun refuzo si sovio a la TEVA, i lis kanto muntchos pedasos, ke todos los asistientes, en la KEILA, seja ombres komo tambien i mojeres i las kreaturas mizmo eran enkantados, de el ermozo kante, i mui agradavle i mui djusto kantado, ke el lis iva kantandoles, i todos si ivan demandando de el uno a el otro, por saver ken era este ermozo mansevo, ke lis kantava, ke esto tambien li trucho a ke lo respektaran i lo amaran, mas muntcho, i ala maniana li vinieron en su koartir, muntchos S-res, por rengrasiarselo, i el S-r. Behor Ruso li eskrivio, una larga karta a Tchelebi Gavriel en rengrasiandole, por el bien ke lis izo, su kirido IJO, de kantarles en la KEIKA, en el dija de el santo KIPUR, i li izo saver tambien el tan grande plazer, ke lis foe a todos los Djidios, seja ombres i mojeres, i tambien i las kreaturas, i ke todos lo bendicheron, i ke li son mui rekonosientes, i Tchelebi Gavriel ke non lo savija ainda, i ke en tomando ansi karta si gusto mui muntcho, ke i mas tadre tambien i S-r. Behoratche, ja si lo izo saver tambien sigun de todo loke lis paso,

                I denpoes ke ja si sano, ke mas non tuvo el menester, de medikos, el resto en viena, algo de tiempo, por kamenarse i repozar i en este tiempo, ke ja foe el anio de 5614, el enpeso a azer,

1158                         Biografia de Tchelebi Jeuda Gavriel i Avraam M. Arie.                          1853

algunos empleos, para kaza, i merko muntchas kosas de mobilias, i pirones, kotcharas, kotchijos, kandelares, hanokijas, tablas de adulsar i de kahves, lo todo de plata, merko tambien i muntchos livros, de tefilod, peracha, moadim, todos jaldizlis, para todos i eskritos, sus nombres, tambien i Sefer torod, megilod, kon sus platas, i muntchos vidros i tchenis, de su manera, i aparte tambien i muntcha djiken dijamantes i de birlantes, i tambien modas de vistidos, i aparte, ropas, por azersen en Samokov, i lo todo de las primeras koalitas, ke para estos todos enplees, el izo un gaste de 100,000 groches, ke foe aparte de el gaste ke el tuvo mientres los 15 meses ke si estuvo kurandose, i koando el ja eskapo de azer todos estos empleos, el si vino a Samokov, sano i boeno, ke ja si keri entendido el gusto i la alegria ke la tuvieron todos sus parientes, i todos lo vijitaron, i le mandaron dulsuras, i platos,

               Los pirones i kotchijos, de plata kirteklis^[103], ke los tenemos mozotros jo Tchelebi i S-r. refaelatche, son de estos ke li tiene traido S-r. Behoratche, a mi S-r. padre, Tchelebi Avraam, djunto i un Sefer Tora eskritura de viena, i 2 kupas para agoa, de vidro fino koloradas, eskritas el nombre Avraam Arié, kon el dato de 5614, ke las tengo jo tchelebi, son tambien de el S-r. Behoratche, traidas i S-r. Leon D. Arié mi jerno ke tiene, una megila, de plata, djunto la Lei, eskritura de viena, ke si la di jo prezente, en el anio de 5645, koando kazo kon mi IJA, Rachel, es tambien traida de el S-r, Behoratche en este anio de 5614,

1159                         Biografia de Tchelebi Jeuda Gavriel i Avraam M. Arie.                          1853

Ejos los 3 ermanos ke ja estavan travados muntcho de la merkansija de las ropas, foe torna kon todo ke si lis aderesaron a Viena ande los S-res Adut, i otros de los sujos komisioneres, por akonsejarsen en demandandoles, si era edeja de dechar la merkansija por entero, a rason ke la konkorensia estava mui grande, i tambien, ke ejos ja estavan topando muntcho mijor, konviniensa en los etchos de el saraflik, i el darles moneda a los turkos kon entereso, i de Viena las repoestas de todos ke la tomaron foe, ke sigun sus edejas es ke non era de el entodo etcho el dechar la merkansija, por rason ke los turkos a el presipio, ja lis dan a ganar, ma mas tadre ejos si lo komen todo, ke algo de razon ja tuvieron el dizirles ansi seja porke ja lo savrijan de el djuzgo ke lo tuvieron kon los begis, ke foe una koza mui rezikioza i tuvieron grande mazal ke pudieron ganar i tambien kale disir ke non era para ejos del entodo konvenivle, ma ejos non tomaron en mano ni uno de estos konsejos, otro ke siempre kontinuaron en sus negosios, de los saraflikes i de los dechkontos, i me kali disir ke si en kavso ejos tomavan los konsejos ditchos, a la ora, digo ke non podija ser, ke podijan arivar, kon las merkansias de las ropas, en ansi grado i posision, i tambien kali ke sepan, ke non era solo ke davan moneda a los turkos kon entereso, otro ke ejos ja lo tenijan i el etcho de la kacha, de el governo ke era de este tambien ke tenijan muntchas ganansias, ejos tambien tenijan ke i ke merkavan muntchos hachares (el diesmo de los trigos) i aparte merkavan a grandes partidas de sahtijanes, ke los mandavan a viena por

1160                         Biografia de Tchelebi Jeuda Gavriel i Avraam M. Arie.                          1853

ke si los vindieran por sus kontos, ejos la primera ves ke tomaron sahtijan denpoes de la moerte de sus padre, foe, en Hevra kon el S-r. Adut, de viena ke el koal ja era sus komisioner, i ejos ke davan moneda a los turkos ja era kon sus boenas fiansas, i prendas ke lis tomavan, i mas tadre ejos lis tomavan los fieros i este kon a 5 i 10 gr. menos de el presio de la plasa, i ejos los mandavan a pazardjik a venderlos por sus kontos ke tenijan tambien sus satodjis [satidjis], partikular solo por ejos, ke era ke si los vendija, i ansi mas komo estos negosios i merkansijas ke lis kaiva a la mano nada atras non lo dechavan, i mas tadre ejos enpesaron a merkarsen muntchos mulkes, ke los topavan por baratos, i mas tambien ke en los djuzgos ke les eskrivi mas antes, ejos non tuvieron a sufrir algunas sumas ensomportavles, i a rason de estos djuzgos kale ke sepan tambien, ke si ganaron mui grandes enfloensas, i tuvieron muntcho konosimiento, kon los Pachas i los personages, los mas grandes, i de este la tuvieron muntcho mas grande la renome i la onor,

               Mi S-r. padre Tchelebi Avraam, me dezija, por en okazion, koando ti arivara algun momento ke lo ternas el menester, de akonsejarte seja kon el pariente or seja kon el amigo, es mas mijor, koando lo tomas el konsejo, komo sera serka a la tuja edeja, ke tu ti lo detchezarias, ma si en kavzo el konsejador, ti akonsejara enteramente, kontra a la tuja edeja, ala ora non es de tomarse, otro ke kale ti aderesas a el sigundo, i si i este ultimo akonsejandote de mizmo sigun de el primer, ala ora es ke mas non deves de aderesarte

1161                         Biografia de Tchelebi Jeuda Gavriel i Avraam M. Arie.                          1853

a el tresero, i serija mas mijor, i sin muntcho kalkular, para ke non ti enbrolies, i kon grande kuraje, azer sigun tu edeja, i por lo todo ti va a poder kamenar, boeno,

               Foe en este anio ke S-r. Mochonatche, ke non estava, en dingun negosio, i su Padre el Tchelebi Jeuda, anke ke non podija azer dingun negosio, kon la moneda ke si la tenijan trovado, sigun ke ja lo eskrivi mas antes, i ejos pensando ke non iva a ser, kontra para los otros ermanos, i algo, en sikreto, lo izo Haver, kon Ibraim AA, Piperko, en su maaden, por lavorar, en hevra, kon ke li metio Tchelebi jeuda el kapetal, i ejos ke lavoraron el anio entero, foe ke non tuvieron dingunos profitos, otro ke al kontrario, i siendo ke si aklaro el etcho a rason de la piedrita, porke tuvieron i algunas deferensias kon el S-r. de Piperko, esto lis kavzo a ke tuvieron i algunas deferensias i kechas entre lis ermanos,

                Sigun ke ja lo eskrivi ke el Gabai de la Keila, i tambien por todos los enteresos de el Kolel ke era siempre Tchelebi Jeuda ke si okupava, i las pagas de los empeigados, ke loke podijan pagar de el Kolel era a penas, de 8 i a 10 groches a la semana, i esto, ke non lis abastava, lo asijan ke lis davan ejos los 3 ermanos, a kada uno de sus bolsas, a 2 i a 3 groches, a la semana, ke i esto lo azijan ke davan tambien i a algunos menesterezos, i esto lis venijan en kada viernes a sus butikas, por resivirlas, i tambien lis davan i a 2 pares de jeminis (kalsado) a el anio, ke era en erev de Pesah i de Sukod, adjuntandoles, en Pesah i en Purim, i a una oka de vino a kada uno, i aparte presentes, ke lis mandavan a todos estos en Purim

1162                         Biografia de Tchelebi Jeuda Gavriel i Avraam M. Arie.                          1853

i mientres el envierno lis mandavan tambien i a 3 karos de lenia, i a 100 okas de trigo, lo todo de sus bolsas,

               i de esto ja mi akodro i jo, seja koando vinijan a la butika, por las semanadas komo tambien i kon las lenijas ke ja lis tengo i jo jevado, por amostrarles las kasas a los arabadjis,

              S-r, Davidtchonatche, el IJO sigundo de Tchelebi Jeuda en este tiempo li mando una karta a el padre, diziendole ke el ja si estava avregonsandose i enselandose, de ver ke todos los mansevos de su edad, ja estavan todos kasados, i ke non estava pudiendo adjuntarse kon ejos, en sus pasatiempo, es ansi ke li rogava porke lo espozara tambien i a el, i sovre ejo ke sus djenitores, lo toparon razonavle, i lo espozaron, kon la Bu. Bulisutcha, IJA de H. Haimatche Tagger, de Sofia, i lo izieron el espozorio, kon muntcho saltanat i se alegraron de todas las 2 partes, sovre todo el Novio, ke ja era libero para adjuntarse a sus arkadaches,

               En el anio de 5614, lo metieron a H. Avramatche, el IJO de H. Rafael por kachero en la kacha de el governo, porke ejos estavan mui okupados en los otros muntchos etchos ke los tenijan, i H. Avramatche, lo reintchija, todo el menester, kon ke i ejos era, ke li asijan en kada dija revizias, i lo enbezavan de la manera ke si devija komportar, i el kon muntcha atansion los sentija, i le pagavan su boena mesada, ke de esto era mui gustoso,

1163                         Biografia de Tchelebi Jeuda Gavriel i Avraam M. Arie.                          1854

             S-r. Davidtchonatche, ke ja estava espezado foe en este anio ke Izieron la boda, i mandaron de Samokov a muntchos konsfoegros porke trucheran a la novia sigun el uzo de akel tiempo i los konsfoegros estuvieron en Sofia 5 dijas en la kasa de H. Haimatche, ke los resivio i lis izo grandes onores, i les kombedava en kada notche a muntchos de sus amigos, i parientes, ke kantavan i bailavan, i se alegravan, i denpoes ke ja rekojijan la achugar, i resivijan el kontado, partieron todos los de la kaza de H. Haimatche, i se vinieron djuntos, i por el kamino li pasaron todo kantando i alegrandosen i de Samokov lis salieron toda la djente, de la sivdad a karchi, ke foe el saltanat mui grande, kon muntchos paitones, i kavajeros, i a todos los paitondjis, i los kavajeres, lis enkolgavan presentes, de modos de ropas, en las kavesas de los kavajos, i aparte a los paitondjis lis davan presentes, en moneda, lo todo era ke lis davan de todas las 2 partes, seja de parte de el novio komo tambien i de parte de la novija, i en la boda ke ja lo saven ke era todos los 8 dijas de la boda ke non avrijan sus butikas, i ke estavan todos los ombres en kaza, aziendo djombuches i kontentandosen kon los tchalgis, i  los muntchos kombedados, ke tenijan seja en los dijas komo tambien i en las notches, i era las notches enteras, ke estavan adjuntados, los ombres kon las mujeres, siempre kantando i bailando, i los todos estos djombuches los azijan en biviendo rakis, i otros  bevrajes, i antes ke komieran, i la meza la metijan denpoes de la medija notche, i les turava las mezas, asta el amaneser de el dija, i la novija,

1164                         Biografia de Tchelebi Jeuda Gavriel i Avraam M. Arie.                          1854

ke ja trucho muntcha achugar, i boen kontado, i eja ke ja foe boena i mui savida i respektioza, li dieron muntchos prezentes i bezas de manos, seja a la novija komo tambien i a el novio, i de todas las 2 partes foeron mui bien kontentes, i ejos si aman muntcho, eja ke ja es mui meradera de la kaza, i muntcho ikonomioza, i kudija mui muntcho por sus krejaturas, i en todas las mezas koando komijan en las notches el PILAF, metijan en medio de el pilaf, una kandela adriendo, ke las izieron de gudrura KACHER, i algunos non kerijan komer, el pilaf a razon de la kandela, parisiendoles ke era de sevo, i ke es trefa, ma ja lis dezijan ke eran kacher i etchas de gudrura kacher ke esto foe por la primera ves ke lo izieron por mas saltanat,

Ejos todos los 3 ermanos, sigun de siempre ejos kontinuavan en sus negosios, kon grandes kurajes, i kon sus union ke la goadravan eran siempre de akordo, sus vijajes los azijan en el punto ke era de menester, sin ke lo dechavan para ala maniana, ejos non tenijan apartado koal de ejos, devija de vijajar, ke lo mas muntcho a el presipio, vijajava Tchelebi Gavriel i mas tadre ke ja era mui kanso, i enfastijado, porke koando vijajavan era kon anios ke si estavan por los vijajes, i tambien ke ja lo saven ke non avijan hotelis i trakteris, otro ke era rnsima [ensima] de un sidjade, ke si li jevavan en el kavajo, kon ke en alguna ves komo topavan poko de paja, la metijan adebacho, i ensima el sidjade, lo esteravan, i las sujas egbes^[104], ande metijan sus bagaje, era ke lis iva a servir por kavesera i en esta manera era ke apenas podijan dormir, de 3 a 4 oras en la notche, i

1165                         Biografia de Tchelebi Jeuda Gavriel i Avraam M. Arie.                          1854

i por sus komanijas era ke kalija ejos propios ke si las prontaran i esto era en veses komo tenijan el tiempo, ke lo mas muntcho de sus mantenimiento era kon azeitunas, i pechkados salados i frutas, porke ne el kezo non lo topavan, a merkar el kacher, ke non avijan ansi, bakales djidios, ma torna kon todo non si lis enportava, porke ansi era para todos, i non lo pensavan en la komanija, i mas tadre ke lo enpeso a vijajar, mi S-r. Padre, Tchelebi Avraam era i el ke lo azia lo mizmo, i todos sus gastes ke azijan en koal vijaje foesa era ke non lis sovija ariva de a 50 groches a el mes, kon el han i la komanija porke non avija ande ke gastaran, i era todo mui barato,

               S-r. Behoratche ke era en viena, aziendose sus melizinas sigun ke ja lo eskrivi mas antes, i los S-res Mochonatche, kon Davidtchonatche, kamenavan en vazio i non estavan en la butika kon sus padre, ke era solo el S-r, Mochonatche, ke azija algunos etchos de mano a mano en la plasa, por su konto, i mas tadre ke i el enpeso a dar algunas edejas, por los etchos ke asijan los ermanos, era ke a Tchelebi Gavriel non li plazijan, ni menos ke era de akordo, i de esto foe ke enpesaron a tener algunas deferensias, entre los ermanos

               I ejos todos los 3 ermanos ke ja tenijan kada uno sus kazas aparte, i bivijan i se gastavan kada uno tambien por si aparte ja era ke siempre si adjuntavan, seja ejos komo tambien, i las mujeres en todos los Chabatiod i los Moadim, por sus pasatiempo, ma las krijaturas non estavan en la kamareta ke ejos los padres i madres, ke estava, ke para ejas las krejaturas los metijan por ke djugaran en

1166                         Biografia de Tchelebi Jeuda Gavriel i Avraam M. Arie.                          1854

los koltukes (kamaretikas tchikas) i non los dechavan entrar en sus kamaretas ande ejos estavan, ansi era tambien i ke lis davan i a komer tambien aparte, i entre los dijas de la semana ke si adjuntavan las, mujeres era ke mientres sus platikas muntchas veses lis kavzava, a traersen selos de las unas a las otras por kavza de sus vistimientas ma ja era ke lis pasava mui presto.

               En este anio Tchelebi Avraam, li tuvo dado a Latif AA 50,000 groches, kon enteres de su moneda partikular ke el tenija, i sus ermanos ke li demandaron, sigun ke ja lo saven ke non podijan negosijar estas monedas ke ejos las tenijan aparte, foe ke lis dicho ke era kon la entision, por los enteresos ke los iva a tomar, para pagar a 10 personas, a 20 paras en kada notche, i tambien darles i a 2 kahves, en kada manijana, i pagar tambien el gaste de el eklaraje i este de kaentar, el midrach, para ke meldaran en kada manijana en el midrach sujos el TIKUN HASOD, kon algo de los TEILIM, i de las MICHNAJOD, por su vida, i esto lo izo i enpesaron a meldar, en kada madruga ke lo mas eran los mechartim, i algunos menesterozos i ke ja si levantavan demanijana, foe de este anio ke si enpeso, i la suma de gaste ke lo azija era de serka 2000 groches en el anio ke era solo las manijanas de el envierno ke meldavan, i era ke enpesavan de la notche ke salija de KIPUR, fin a la notche ke salija de PURIM, i en toda su vida lo foe kontinuando, i mas tadre ke estos 50,000 gr. ja si los kovro de Latif AA el enpeso a darlos kon enteres, e los merkaderes djidios ke lis tomava CHETARIOD, i a los krestijanos, kon

1167                         Biografia de Tchelebi Jeuda Gavriel i Avraam M. Arie.                          1854

senetis (bonos) i esto fin a el anio de 5626, ke el mismo las negosio, si li isieron 250,000 groches, i era ke si jevava konto aparte i de esta moneda non tokava, kon su entision ke eran siempre los 50 mil gr. por el EKDECH, i kon lo restan por fragoarse kaza, i este sigun el lo kalkulava, fin a koala suma alkansar, ke en este anio de 5626, el negosijava, i echpekolijava, en los fondos Turkos ke i en esto tuvo mui grandes afitos, en la operasiones ke las azija entre los motones^[105] i las konsolites^[106] ke las trokava en kada 3 mezes, i li raportava unos enteresos de 20 a 25 % a el anio, i esto todo lo azia en Paris vija de la banka de S-r, Kamondo de kostan, i la kaza ke la enpeso a fragoarla foe tambien en este anio ke es la kasa ke moro jo i S-r. Refaelatche, i kon los 50,000 gr. de el EKDECH, ditchos ke los tenija entre Chetariod, i senetis, i algo de moneda, sonante, en la kacha, si los entrego todos a Hr. Avraam Koen ke era el Rabino de Samokov, porke el la negosiara i de los revinidos ke pagara a las personas ke meldavan el TIKUN HASOD, i tambien los gastes, i para el li fikso una sierta suma por su paga, i anke ke ja li revidejava en vezes los kontos ma era mui ralo, i ansi foe ke el S-r. de Hr, Avram en unos koantos anios ke la negosio esta moneda, lo trucho el etcho, asta ke apenas podija tomer i enbolsar, solo para los gastes, porke Hr. Avraan lis dezija a los devdores, el entereso solo pagame, i kon el keren (kapetal) ke este firme para el mundo el vinien, i Tchelebi Avraam alkansando a saverlo el komportamiento de Hr. Avraam Koen, li kalio ke si lo tomara el etcho, i ansi foe ke lo merava el mizmo, solo ke ja foe mui tadre, i ansi era ke en verdad tambien i el non

1168                         Biografia de Tchelebi Jeuda Gavriel i Avraam M. Arie.                          1854

estava pudiendo enkasar, mizmo para el gaste i ansi era ke lo iva adjustando de su moneda partikular, i ansi lo izo fin a el anio de 5640, ke murio, en dija de lunes 2 KISLEV, demadruga, de este anio de 5640 ke ke ja era tambien i denpoes de la gera Turka-Rusa, en el anio de 5638, i ke non kijeron de el entodo pagar, i jo Tchelebi kon S-r, Refaelatche lo kontinoimos ansi fin a el anio de 5655, ke kon muntcho penar, i dar tambien i a algunos a el djuzgo, era ke si podija kovrar alguna kosa i esto ke non abastava, lo adjustavamos, mozotros jo i S-r Refaelatche kontra metad, i mas tadre ke ja non kijeron rekonoser a nada pagar, kon aprovetcharsen de las leés, de el estado por un devete ke ja pasaron 15 anios ke non si podija reklamar, i sus ovligos ke era todo kon Chetariod, i eskritos en lachon akodech i ke non eran markados foe ke i la plasija [polisija], non kijo rekonoserlos, i tambien ke algunos de estos devdores enpesaron a reklamar, kontos de marazod, ke lis ternijan kovrado poede ser algunos enteresos a mas muntcho de 12 % a el anio, i por mas mijor enpesaron i a non ir, a el midrach por disir el Tikun Hasod, i se kovravan sus pagas, en la boena regla, i visto a todas estas kozas, foe ke mos detchizimos a non kontinuarlo mas, porke toda la moneda ja si la komieron los ke la devijan, i ansi foe abandonado, i de el primer dija ke ja si abandono mas el midrach non si avrio, mismo por algunos ke kerijan ir i sin paga, i non si meldava el TIKUN, en un kolel, sin ke foeran pagados, i algunos de estos uvo ke maltrataron i avlaron muntchas avlas fejas, ma non tenijan dinguna razon,

1169                         Biografia de Tchelebi Jeuda Gavriel i Avraam M. Arie.                          1854

            Por un dezakordo ke tuvieron entre los ermanos, ke Tchelebi Jeuda i Avraam eran mui korjiozos ke la kontra era el Tchelebi Gavriel sovre todo foe mas deskorajado de koando foe el djuzgo kon los begis, ke si deskorajo mui muntcho, i ejos ke ja estavan en la pozision de entrar en los mas grandes etchos, i los mansevos ke davan edejas kontra de sus komporto de antes, era ansi ke non estavan tanto de akordo, i Tchelebi gavriel sigun ditcho ke ja estava mui kanso de los vijajes ke el los izo kon anios, foe ke akaesio, ke kalia ke si foera en akeja semana, a Pazardjik, por razon ke si lis avia rekojido, una suma mas grande, de fieres, para ke merara el molde, de venderlos, i sigun ditcho ke Tchelebi Gavriel ja era mui kanso i enfastiado de los vijajes, el si dicho entre si ke non avija, la premura, para ir en akeja semana, ma torna por non vinir kontra i por non refuzarles, el partio, ma foe sin plazer i algo raviozo, i esta ida a Pazardjik, i ensestada, por ke si foera, si veé ke foe de las 2 partes komo un atchake entisionel por el sujos avenir, sigun i ke ja foe ansi ejos en esto okazion ke non estuvo en Samokov, si kalkularon i se detchezaron por espartirsen, ke i lo mizmo foe, i de la otra parte, ke si detchizo mientres de su vijaje,

i en arivando el Tchelebi gavriel de el vijaje, ke no estava kontente, el ke eskapo todo el menester en Pazardjik, i ke lis entrego el konto, i entre sus konversasiones, de sus negosios sigun ditcho ke Tchelebi gavriel non dechava entrar en etchos mas grandes ejos kedaron de akordo por espartirsen, i ke ja foeron todos kontentes

1170                         Biografia de Tchelebi Jeuda Gavriel i Avraam M. Arie.                          1854

era en los kavos delos mezes, de este anio de 5614, ejos sin tadrar, i kon grande kerensia, enpesaron en sus eskrituras, i rekojeron sovre presto esto ke foe posible, i en un enterval, de un mez de tiempo ejos ja estuvieron prontos,

            Los kontos ke los rekojeron i ke los ataron foeron de la manera sigiente, kon los mulkes ke ejos tenijan de la hevra, ke es aparte de sus kazas ke ja las tenijan kada uno aparte ansi i kon sus mobilias, i djojas, i otras kosas, ke non lo metieron en konto, lo izieron en katigorias, sigun de sus %, ansi de mizmo lo izieron, i kon algunos artikolos de ropas ke tenijan, i esto lo izieron ke si lo espartijan kon GORAL, porke non uviera dingunas avlas, i kon los averes ke tenijan ke era una suma de 500,000 groches, lo izieron en 4 katigorias, ke la una foe kon la entision ke se iva a kovrar por, su djusto, i la segunda ke si podra kovrar, el 50 % i por la tresera de mizmo kon la entision de kovrarse el 25 %, i kon la koatrena, foe de non poderse nada kovrar, i en esto de el aver, uvieron tambien i algo de deferensias ke tuvieron pensandosen si non serija kon alguna entision, de ver ke izieron ansi unos grandes rebatos, ma por non vinirsen en esto kontra i por ke uviera fin en sus akordo lo izieron de meterse esto en enkante, la suma entera sin ke foera espartida en algunas partidas, i de el presipio Tchelebi Jeuda, lis dicho a sus ermanos ke el si lo resivija estos averes sigun de loke estava asenijalado, ma si a la ora alguno de los otros ermanos si lo kerla resivir ke el ja era de akordo, i en repoesta a esto foe Tchelebi Gavriel

1171                         Biografia de Tchelebi Jeuda Gavriel i Avraam M. Arie.                          1854

ke lis dicho ke si los iva a resivir el, i sin nada refuzar ni menos  dingunas mas algunas kundisiones, foe ke todos los 2 a una boka, li dicheron BESIMAN TOV, i kon los mulkes lo izieron por las partes de Tchelebi Jeuda i Avraam, ona parte i esta de Tchelebi Gavriel una parte lo todo sigun de sus % ke tenijan i ansi foe ke el maaden i tarlas,  i mas ansi otras kozas, lis kaeron a Tchelebi Jeuda i Avraam, i la jaila, kon el tchair, i algo de tarlas li kaeron a Tchelebi Gavriel, i koanto a la[s] sumas de moneda foe lo todo ke la tomaron tchelebi Jeuda i Avraam, a razon de el aver ke si lo resivio Tchelebi Gavriel i ke non li tokava esta suma de su parte, i era ke kalia lis ketara ainda una boena suma a sus ermanos, para ke si lis podiera balansiarsen sus kontos, i denpoes ke i esto ja lo eskaparon, i ke ja si lo resivieron kada uno, su parte, ejos si dieron de los unos a los otros los dukomentos menesterozos i si eskrivieron batalnames, i kontraros afermados detodos los 3, lo todo mui en regla, sigun de i loke es el menester, i se tomaron las manos, en kedando de akordo ke torna la tienen de goadrar la ermandad, i la onor de la familia, i de ajudarsen en okazion de los unos a los otros, i se foeron kada uno a sus etchos, ke los enpesaron de moevo,

               Mientres de sus espartision, anke ke ejos tenijan i muntchas deferensias, ma era ke non lo azijan saver, a otros dinguno de la djente de afoera, i siempre era ke solo entre ejos ke si lo konvenijan, i ansi era ke toda la djente de Samokov mismo i de las vizinas sevdades, todos eran kuriozos, por saver, alguna razon ma de

1172                         Biografia de Tchelebi Jeuda Gavriel i Avraam M. Arie.                          1854

esto ejos lo detuvieron en mui grande sikreto, las sujas furtunas de loke ejos si espartieron de el etcho de la butika foe, aparte de loke ejos enpatronavan seja en moneda, ke ja lo saven ke tenijan en partikular, i sus kasas i mobilijas i otras kosas, i esto de los mulkes, foe de a una suma de a 250,000 groches a kada uno, i de esta espartision ejos lo isieron saver a todos sus komisioneres seja de viena komo tambien i de Kostan i otros lugares, en demandandoles tambien si es ke por el avenir, en okasion si es ke ivan a tener sus kredites aviertos, i de todos estos ejos todos tomaron repoestas favoravles, i aogorandoles sus espartision,

1173                Bioarafia de Tchelebi Jeuda, Gavriel i Avraam M. Arie.

          Asta aki si eskapa la partida, de los 3 ermanos IJOS de H, Tchelebi, ke son Tchelebi Jeuda, Gavriel i Avraam, mientres el tiempo ke foeron Haverim, i ke lavoraron sin kansarsen,